ܦܫܘܿܛ ܡܵܪܲܢ ܘܐܲܠܵܗܲܢ ܝܲܡܝܼܢܵܐ ܕܲܡܪܲܚܡܵܢܘܼܬܼܵܟܼ ܡܼܢ ܡܪܵܘܡܵܐ ܕܩܘܼܕܼܫܵܟܼ. ܘܒܲܪܸܟܼ ܘܩܲܕܸܫ ܠܡܹܐܟܼܘܼܠܬܼܵܐ ܗܵܕܹܐ ܕܣܵܓܼܘܿܕܲܝ̈ܟ ܒܲܫܡܵܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ. ܘܫܲܪܬܲܚܹܝܗܿ ܒܛܵܒܼ̈ܵܬܼܵܐ ܘܒܼܘܼܪ̈ܟܵܬܼܵܐ ܕܡܼܢ ܠܘܵܬܼܵܟܼ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܥܲܠ ܦܵܬܼܘܿܪܵܐ.

ܒܝܲܡܝܼܢ ܡܵܪܘܼܬܼܵܟܼ ܐܲܒܼܵܐ ܚܲܢܵܢܵܐ؛ ܢܸܬܼܒܲܪܲܟܼ ܦܵܬܼܘܿܪܵܐ ܗܵܢܵܐ ܕܣܵܓܼܘܿܕܲܝ̈ܟ. ܘܲܒܼܡܸܠܬܼܵܐ ܕܛܲܝܒܿܘܼܬܼܵܟܼ ܢܸܫܬܲܪܬܲܚ ܒܛܵܒܼܵܬܼ̈ܵܐ ܕܡ̣ܢ ܠܘܵܬܼܵܟܼ. ܕܐܲܢَܬ݁ܘܼ ܡܵܪܵܐ ܘܒܼܵܪܘܿܝܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܣܘܼܒܵܥܵܐ ܕܦܵܬܼܘܿܪܵܐ.

ܕܙܲܢܬܵܢ ܡܵܪܝ ܒܛܲܝܒܿܘܼܬܼܵܟܼ؛ ܘܣܲܒܲܥܬܵܢ ܒܲܡܪܲܚܡܵܢܘܼܬܼܵܟܼ. ܫܘܼܒܼܚܵܐ ܐܲܡܝܼܢܵܐ ܕܠܵܐ ܫܲܠܘܵܐ ܢܲܣܸܩ ܠܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ. ܒܪܝܼܟܼܝܼܢ ܡܦܲܠܲܓܼܵܘܗ̈ܝ ܘܲܡܛܲܝܒܼܵܢܵܘܗ̈ܝ ܘܐܵܟܼܘܿܠܵܘܗ̈ܝ. ܡܵܪܝܵܐ ܡܵܪܲܢ ܡܲܥܡܲܪ ܠܹܗ ܠܒܲܝܬܵܐ ܗܵܢܵܐ ܠܕܵܪܕܵܪܝܼܢ؛ ܫܒܼܝܼܚܘܼ ܙܵܐܸܢ ܟܠ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܦܵܬܼܘܿܪܵܐ ܕܚܲܣܝܵܐ ܫܠܹܝܡܘܿܢ

ܕܲܦܪܵܬܼ ܡܲܝܫܵܢ:

ܕܣܲܒܲܥܬ ܟܲܦܢܘܼܬܲܢ ܗܵܫܵܐ؛ ܡ̣ܢ ܦܵܬܼܘܿܪܵܟ ܩܲܕܝܼܫܵܐ. ܢܲܣܸܩ ܠܵܟ̣ ܫܘܼܒܼܚܵܐ ܦܪܝܼܫܵܐ؛ ܒܦܲܓܼܪܵܐ ܐܲܟܲܚ݇ܕܼ ܘܲܒܼܢܲܦ̮ܫܵܐ. ܘܐܲܝܟ̣ ܕܛܲܝܸܒ̣ܬ̇ ܠܲܢ ܟܠ ܐܵܕ݂ܫܵܐ؛ ܠܩܘܼܝܵܡ ܗܵܢ ܦܲܓܼܪܵܐ ܡܛܲܠܫܵܐ. ܬܲܪܣܵܐ ܘܙܘܼܢ ܠܲܒܼܢܲܝ̈ܢܵܫܵܐ؛ ܘܲܠܚܲܝ̈ܘܵܬܼܵܐ ܘܲܠܪ̈ܲܚܫܵܐ. ܘܠܲܐܝܠܹܝܢ ܕܫܲܡܫܘܼܢ ܒܲܬܼܥܵܫܵܐ؛ ܘܣܲܝܒܲܪܘ ܚܘܼܡܵܐ ܥܲܡ ܩܘܼܪܫܵܐ. ܦܪܘܿܥ ܐܸܢܘܿܢ ܪܵܚܹܡܢܵܫܵܐ؛ ܚܘܼܠܡܵܢܵܐ ܕܡ̣ܢ ܟܠ ܚܲܫܵܐ. ܘܐܸܢܵܐ ܐܲܟܼܣܢܵܝܵܐ ܘܚܲܠܵܫܵܐ؛ ܕܲܥܒ̣ܝܼܕ݂ ܐ݇ܢܵܐ ܦܘܼܡܵܐ ܠܐ݇ܢܵܫܵܐ. ܡܵܘܕܹ݁ܐ ܐ݇ܢܵܐ ܚܠܵܦ ܟܠ ܐ݇ܢܵܫܵܐ؛ ܠܐܲܠܵܗܵܐ ܙܵܐܹܢ ܐ݇ܢܵܫܵܐ. ܘܡ̣ܢ ܒܪܵܫܝܼܬ̣ ܥܕܲܡܵܐ ܠܗܵܫܵܐ: ܘܡ݂ܢ ܗܵܫܵܐ ܘܲܠܗܵܠ ܗܵܫܵܐ. ܠܵܐ ܚ̣ܣܲܪ ܘܠܵܐ ܢܸܚܣܲܪ ܠܐ݇ܢܵܫܵܐ؛ ܡܵܙܘܿܢܵܐ ܠܩܘܼܝܵܡ ܢܲܦ̮ܫܵܐ. ܗܵܫܵܐ ܘܲܒ̣ܟ̣ܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܣܘܼܒܵܥܵܐ ܕܦܵܬܼܘܿܪܵܐ.

ܦܵܬܼܘܿܪܵܐ ܕܐܸܟܲܠܢܲܢ ܡܸܢܹܗ؛ ܒܘܼܪܟܿܬܼܵܐ ܬܸܫܪܸܐ ܒܓܼܵܘܹܗ. ܘܦܲܪܨܘܿܦܵܐ ܕܲܠܐܝܼ ܒܥܲܡܠܹܗ؛ ܢܚܲܕܹܝܘܗܝ ܡܵܪܲܢ ܒܚܘܼܠܡܵܢܹܗ. ܘܒܲܝܬܵܐ ܕܣܲܬܿܪܲܢ ܒܛܸܠܵܠܹܗ؛ ܠܥܵܠܲܡ ܢܩܵܘܸܐ ܒܸܢܝܵܢܹܗ. ܘܡܵܪܝܵܐ ܕܙܵܢܲܢ ܡܵܘܗܲܒܼܬܹܗ؛ ܢܩܲܒܸܿܠ ܟܠܲܢ ܛܲܝܒܿܘܼܬܹܗ. ܘܢܵܘܕܸܐ ܠܹܗ ܥܲܠ ܛܵܒܼܘܼܬܹܗ؛ ܗܵܫܵܐ ܥܲܕܼ ܝܘܿܡ ܡܹܐܬܼܝܼܬܹܗ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܕܣܘܼܒܵܥܵܐ ܕܦܵܬܼܘܿܪܵܐ.

ܐܵܠܹܦ ܐܲܠܦܝܼ̈ܢ ܘܪܸ̈ܒ̇ܘܼ ܪܸ̈ܒܿܘܵܢ ܩܘܼܒܵܠܛܲܝ̈ܒܿܘܵܢ ܠܐܲܠܵܗܵܐ ܡܵܪܹܟܿܠ: ܢܸܣܓܹܿܐ ܡܵܙܘܿܢܵܐ ܗܵܢܵܐ ܘܢܸܬܼܝܲܬܲܪ: ܘܲܢܩܵܘܹܐ ܘܠܵܐ ܢܸܚܣܲܪ: ܒܲܨܠܵܘܵܬܼܗ̈ܘܿܢ ܕܲܫܠܝܼܚܹ̈ܐ ܬܪܸܥܣܲܪ: ܘܕܐܲܒܼܵـ̈ܗܵܬܼܵܐ ܟܹܐܢܹ̈ܐ ܘܙܲܕܝܼܩܹ̈ܐ ܕܲܫܦܲܪܘ ܠܡܵܪܗܘܿܢ ܘܫܵܦܪܝܼܢ ܒܟܼܠܕܵܪ ܘܕܼܵܪ. ܢܸܗܘܸܐ ܦܵܬܼܘܿܪܵܐ ܗܵܢܵܐ ܐܲܝܟܼ ܦܵܬܼܘܿܪܹܗ ܕܐܲܒܼܘܼܢ ܐܲܒܼܪܵܗܵܡ: ܕܠܵܐ ܚܵܣܲܪ ܘܠܵܐ ܒܵܨܲܪ ܡ̣ܢ ܛܵܒܼܵـ̈ܬܼܵܐ ܫܡܲܝܵܢ̈ܝܵܬܼܵܐ: ܒܟܼܠܹܗ ܙܲܒܼܢܵܐ ܕܩܵܐܹܡ ܒܹܗ ܥܵܠܡܵܐ ܗܵܢܵܐ: ܒܵܬܲܝ̈ܗܘܿܢ ܕܲܡܗܲܝܡܢܹ̈ܐ ܢܸܬܼܒܲܪܟܼܘܼܢ: ܘܩܘܼܪ̈ܒܵܢܲܝܗܘܿܢ ܢܸܬܼܩܲܒܿܠܘܼܢ: ܘܥܲܢܝܼܕܲܝ̈ܗܘܿܢ ܢܸܬܼܢܲܚܡܘܼܢ: ܘܚܵܘܒܲܝ̈ܗܘܿܢ ܘܲܚܛܵܗܲܝ̈ܗܘܿܢ ܢܸܬܼܚܲܣܘܿܢ: ܘܲܠܛܘܼܒܹ̈ܐ ܕܡܲܠܟܘܼܬܼܵܐ ܢܸܫܬ̇ܘܘܿܢ: ܫܒܼܝܼܚ ܙܵܐܹܢ ܟܠ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ: ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܟܸܢ: ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

♱♱♱♱♱♱♱

ܐ݇ܚܪܹܬܼܵܐ ܕܣܘܼܒܵܥܵܐ ܕܦܵܬܼܘܿܪܵܐ.

ܐܘܿ ܕܣܲܒܲܥ ܐܲܠܦܹ̈ܐ ܒܕܲܒܼܪܵܐ؛ ܘܐܸܟܲܠܘ ܡ̣ܢ ܠܲܚܡܵܐ ܙܥܘܿܪܵܐ؛ ܒܲܪܸܟܼ ܡܵܪܝ ܠܗܵܢ ܦܵܬܼܘܿܪܵܐ؛ ܕܢܸܗܘܸܐ ܡܲܠܝܵܐ ܘܥܲܬܿܝܼܪܵܐ‌܀ ܕܢܹܐܟܼܠܘܼܢ ܡܸܣܟܹܢܹ̈ܐ ܘܢܸܣܒܿܥܘܼܢ؛ ܘܝܲܬܼܡܹ̈ܐ ܡܸܢܹܗ ܢܸܬܿܬܲܪܣܘܿܢ؛ ܘܟܼܠ ܬܸܓܼܡܝܼ̈ܢ ܥܠܵܘܗܝ ܢܸܣܬܲܡܟ̇ܘܼܢ؛ ܘܲܒܼܛܵܒܼܵܬܹܗ ܢܸܬܼܒܲܣܡܘܼܢ‌܀ ܐܲܝܟܼ ܦܵܬܼܘܿܪ ܐܲܒܼܪܵܡ ܓܲܒܼܝܵܐ؛ ܘܕܼܵܘܝܼܕܼ ܡܲܠܟܵܐ ܘܲܢܒܼܝܼܵܐ؛ ܘܲܫܠܹܝܡܘܿܢ ܥܲܡ ܚܹܙܲܩܝܵܐ؛ ܘܩܘܿܣܛܲܢܛܝܼܢܘܿܣ ܙܲܟܵܝܵܐ‌܀ ܗܵܟܲܢܵܐ ܡܵܪܝ ܢܸܬܼܒܲܪܲܟܼ؛ ܦܵܬܼܘܿܪܵܐ ܗܵܢܵܐ ܕܥܲܒܼܕܵܟܼ. ܘܢܸܫܬܲܪܬܲܚ ܡܼܢ ܛܵܒܼܵܬܼܵܟܼ؛ ܒܪ̈ܲܚܡܹܐ ܫܦܝܼܥܹ̈ܐ ܕܛܲܝܒ̇ܘܼܬܼܵܟܼ‌܀ ܒܲܪܸܟܼ ܡܵܪܲܢ ܐܲܟܵܪ̈ܵܘܗܝ؛ ܒܲܪܸܟܼ ܡܵܪܲܢ ܡܛܲܝܒܼܵܢܵܘ̈ܗܝ. ܒܲܪܸܟܼ ܡܵܪܲܢ ܐܵܟܼܘܿܠܵܘ̈ܗܝ؛ ܒܲܪܸܟܼ ܒܲܝܬܼܵܐ ܘܥܵܡܘܿܪ̈ܵܘܗܝ‌܀ ܐܲܓܸܢ ܡܵܪܝ ܥܲܠ ܗܵܢ ܒܲܝܬܵܐ؛ ܘܐܲܫܪܵܐ ܒܓܵܘܹܗ ܒܘܼܪ̈ܟܵܬܼܵܐ. ܘܥܵܡܘܿܪ̈ܵܘܗܝ ܒܐܲܡܝܼܢܘܼܬܼܵܐ؛ ܢܸܬܼܢܲܛܪܘܼܢ ܡܼܢ ܒܝܼ̈ܫܵܬܼܵܐ‌܀ ܒܲܪܸܟܼ ܒܥܝܼܪܵܐ ܘܐܢܵܫܘܼܬܼܵܐ؛ ܒܲܪܸܟܼ ܟܲܪ̈ܡܹܐ ܘܢܸܨ̈ܒܵܬܼܵܐ. ܒܲܪܸܟܼ ܙܲܪ̈ܥܹܐ ܘܥܲܠ̈ܠܵܬܼܵܐ؛ ܘܲܠܟܼܠܲܢ ܒܲܟܼܢܝܼܫܘܼܬܼܵܐ‌܀ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܪܘܼܫܡܵܐ ܕܥܲܠ ܦܵܬܼܘܿܪܵܐ ܕܠܲܚܡܵܐ.

ܡܫܝܼܚܵܐ ܡܵܪܲܢ ܘܐܲܠܵܗܲܢ ܕܒܲܪܸܟܼ ܥܲܠ ܚܲܡܸܫ ܓܪ̈ܝܼܨܵܢ ܘܲܬܼܪܹܝܢ ܢܘܼܢ̈ܝܼܢ. ܘܐܸܟܲܠܘ ܘܲܣܼܒܲܥܘ ܐܲܠܦܹ̈ܐ ܕܐ݇ܢܵܫܵܐ ܘܝܼܬܲܪܘ ܡܸܢܗܘܿܢ ܬܪܸܥܣܲܪ ܩܘܿܦܝܼܢ̈ܝܼܢ. ܐܲܫܪܵܐ ܡܵܪܝ ܒܘܼܪܟ̇ܬܼܵܟܼ ܒܠܲܚܡܵܐ ܗܵܢܵܐ ܕܥܲܒܼܕܲܝ̈ܟ. ܘܟܼܠܡ̇ܢ ܕܐܵܟܹܠ ܡܸܢܹܗ ܢܵܘܕܹܐ ܘܢܸܣܓ̇ܘܿܕܼ ܘܲܢܫܲܒܲܚ ܠܲܫܡܵܟܼ ܪܲܒܵܐ ܘܩܲܕܝܼܫܵܐ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

♱♱♱♱♱♱♱

ܬܘܼܒܼ ܕܣܘܼܒܵܥܵܐ ܕܦܵܬܼܘܿܪܵܐ ܕܥܲܢ̈ܝܼܕܹܐ.

ܡܫܝܼܚܵܐ ܡܵܪܲܢ ܘܐܲܠܵܗܲܢ ܗ݁ܘ ܕܲܡܒܲܝܲܐ ܟܠ ܒܲܚܢܵܢܹܗ. ܘܲܡܠܲܒܸܒܼ ܟܠ ܒܲܡܪܲܚܡܵܢܘܼܬܹܗ. ܗ̤ܘ ܢܒܲܝܲܐ ܠܠܸܒܵܘܵܬܼ̈ܟܼܘܿܢ ܒܣܲܒܼܪܹܗ. ܘܲܢܠܲܒܸܒܼ ܢܲܦ̮ܫܵܬܼ̈ܟܼܘܿܢ ܡܥܵܩ̈ܵܬܼܵܐ ܒܛܲܝܒܿܘܼܬܹܗ. ܘܲܢܫܲܪܲܪ ܬܲܪ̈ܥܝܵܬܼܟܼܘܿܢ ܡܲܟܼܐܒܼ̈ܵܬܼܵܐ ܒܥܘܼܕܼܪܵܢܹܗ. ܘܲܢܫܝܼܓܼ ܟܘܼܬܼ̈ܡܵܬܼܵܐ ܕܲܚܛܵܗܲܝ̈ܢ ܒܙܘܿܦܵܐ ܕܒܲܣܝܼܡܘܼܬܼ ܚܘܼܒܹܗ. ܘܲܢܢܝܼܚ ܢܲܦ̮ܫܵܬܼ̈ܵܐ ܕܥܲܢܝܼܕܹ̈ܐ ܕܡ̣ܢ ܒܲܝܢܵܬܲܢ ܦ̣ܪܲܫܘ ܒܲܓܼܢܘܿܢܵܐ ܫܒܼܝܼܚܵܐ ܕܡܲܠܟܿܘܼܬܹܗ. ܘܲܥܠܲܝܢ ܘܲܥܠܲܝܟܿܘܿܢ ܢܲܓܸܿܢ ܝܲܡܝܼܢܵܐ ܕܲܒܼܛܝܼܠܘܼܬܹܗ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܣܘܼܒܵܥܵܐ ܕܦܵܬܼܘܿܪܵܐ ܕܥܲܢܝܼܕܹ̈ܐ.

ܐܲܠܵܗܵܐ ܡܵܪܹܟܿܠ ܢܩܲܒܸܿܠ ܩܘܼܪܒܵܢܟܼܘܿܢ ܒܲܡܪ̈ܵܘܡܹܐ ܥܸܠܵܝܹ̈ܐ ܥܲܡ ܫܲܪܟܵܐ ܕܐܲܒܼܵܗܵܬܼ̈ܵܐ ܕܲܒܼܕܵܪ̈ܝܼܢ ܕܵܪ̈ܝܼܢ. ܘܲܢܢܝܼܚ ܠܥܲܢܝܼܕܲܝ̈ܟܿܘܿܢ. ܘܲܢܚܲܣܸܐ ܚܛܵܗܲܝ̈ܟܿܘܿܢ. ܘܩܘܼܪܒܵܢܵܐ ܕܝܵܘܡܵܢܵܐ ܩܲܪܸܒܼܬܿܘܿܢ ܥܲܠ ܡܲܕܼܒܿܚܹܗ ܕܡܵܪܝܵܐ ܡܩܲܒܠܵܐ ܢܸܗܘܸܐ ܩܕܼܵܡ ܬܪܘܿܢܘܿܣ ܕܫܘܼܒܼܚܹܗ ܕܲܡܫܝܼܚܵܐ. ܟܲܕܼ ܗܵܘܹܐ ܠܟܼܘܿܢ ܐܲܠܵܗܵܐ ܕܫܲܡܸܫܘܬܿܘܿܢܵܝܗܝ ܒܣܵܓܼܘܿܕܼܵܘܗ̈ܝ ܘܝܲܩܲܪܬܿܘܿܢܵܝܗܝ ܒܲܡܫܲܒܼܚܵܢܵܘܗ̈ܝ؛ ܥܵܕܼܘܿܪܵܐ ܘܲܡܣܲܝܥܵܢܵܐ ܘܣܵܡܘܿܟܼܵܐ ܘܲܡܢܲܛܪܵܢܵܐ ܘܦܵܪܘܿܩܵܐ ܘܲܡܫܵܘܙܒܼܵܢܵܐ؛ ܡ̣ܢ ܟܠܗܘܿܢ ܢܸܣܝܘܿܢܹ̈ܐ ܟܣܲܝ̈ܵܐ ܘܲܓܼܠܲܝ̈ܵܐ. ܘܲܚܠܵܦ ܕܝܲܩܲܪܬܿܘܿܢܵܢ ܒܗܵܠܹܝܢ ܥܵܒܼܘܿܪ̈ܝܵܬܼܵܐ. ܡܲܠܟܵܐ ܡܫܝܼܚܵܐ ܢܒܲܪܸܟܼܟܼܘܿܢ ܘܲܢܩܲܕܸܫܟܼܘܿܢ ܘܲܢܒܲܝܲܐܟܼܘܿܢ. ܘܲܢܩܲܒܸܠ ܥܲܡܠ̱ܟܼܘܿܢ ܘܲܫܚܵܩܟܼܘܿܢ. ܘܪ̈ܲܚܡܵܘܗܝ ܘܲܚܢܵܢܹܗ ܢܸܫܬܲܦܥܘܼܢ ܥܲܠ ܟܠܟܼܘܿܢ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܚܘܼܬܵܡܵܐ ܕܘܵܠܝ̈ܵܬܼܵܐ ܕܥܲܢܝܼܕܹ̈ܐ.

ܡܵܪܝܵܐ ܐܲܠܵܗܵܐ ܚܲܝܠ̱ܬܼܵܢܵܐ؛ ܡܵܪܵܐ ܕܡܝܼܬܹ̈ܐ ܘܲܕܼܚܲܝܹ̈ܐ؛ ܡܵܪܹܗ ܕܡܵܘܬܵܐ ܘܡܲܦܩܵܢܵܐ. ܢܸܦܩܘܿܕܼ ܢܝܵܚܵܐ ܘܒܼܘܼܣܵܡܵܐ ܠܗܲܕܵܡܵܐ ܡܫܝܼܚܵܝܵܐ ܕܡ̣ܢ ܒܲܝܢܵܬܲܢ ܦ̣ܪܲܫ ܘܲܠܘܵܬܹܗ ܚ̣ܙܲܩ ܘܫܲܢ̣ܝܼ. ܢܸܬܸܿܠ ܠܹܗ ܡܵܪܝܵܐ ܐܲܠܵܗܵܐ ܓܲܠܝܘܼܬܼ ܐܲܦܹ̈ܐ ܕܲܩܕܼܵܡܵܘܗ̈ܝ؛ ܥܲܡ ܟܠܗܘܿܢ ܐَܢܵܫ̈ܵܐ ܟܹܐܢܹ̈ܐ ܘܙܲܕܝܼܩܹ̈ܐ. ܥܲܡ ܟܠܗܘܿܢ ܐܲܝܠܹܝܢ ܕܲܫ̣ܩܲܠܘ ܝܘܼܩܪܹܗ ܕܝܵܘܡܵܐ ܘܚܘܼܡܹܗ. ܘܲܢܒܲܣܡܝܼܘܗܝ ܒܛܵܒܼܵܬܼ̈ܵܐ ܕܲܥܬܼ̈ܝܼܕܵܢ ܘܠܵܐ ܥܵܒܼܪ̈ܵܢ. ܘܐܵܦ ܠܟܼܘܿܢ ܕܐܸܫܬܵܘܬܲܦܬܿܘܿܢ ܒܚܲܫܵܐ ܗܵܢܵܐ ܘܟܲܪܝܘܼܬܼܵܐ؛ ܢܸܬܸܿܠ ܠܟܼܘܿܢ ܒܘܼܝܵܐܵܐ ܥܦܝܼܦܵܐ ܕܲܒܼܚܲܕܿܘܼܬܼܵܐ ܘܒܲܦܨܝܼܚܘܼܬܼܵܐ ܬܫܲܒܚܘܿܢ ܠܲܫܡܹܗ ܩܲܕܿܝܼܫܵܐ ܕܡܵܪܝܵܐ. ܒܵܬܲܝ̈ܗܘܿܢ ܕܲܡܗܲܝܡܢܹ̈ܐ ܢܸܬܼܒܲܪܟܼܘܿܢ؛ ܘܩܘܼܪ̈ܒܵܢܲܝܗܘܿܢ ܢܸܬܼܩܲܒܿܠܘܿܢ؛ ܘܥܲܢܝܼܕܲܝ̈ܗܘܿܢ ܢܸܬܼܢܲܚܡܘܿܢ؛ ܚܵܘܒܲܝ̈ܗܘܿܢ ܘܲܚܛܵܗܲܝ̈ܗܘܿܢ ܢܸܬܼܚܲܣܘܿܢ. ܘܲܠܛܘܼܒܹ̈ܐ ܕܡܲܠܟܿܘܼܬܼܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ ܢܸܫܬܿܘܘܿܢ. ܫܒܼܝܼܚ ܙܵܐܹ݁ܢ ܟܿܠ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܡܲܩܦܝܼܢ؛ ܐܲܒܼܘܿܢ ܕܒܲܫܡܲܝܵܐ܊

♱♱♱♱♱♱♱

ܨܠܘܿܬܼܵܐ ܕܥܲܠ ܟܪ̈ܝܼܗܹܐ.

ܡܲܚܸܐ ܟܠ ܒܲܚܢܵܢܹܗ؛ ܘܲܡܩܝܼܡ ܟܠ ܒܨܸܒܼܝܵܢܹܗ؛ ܘܪܵܕܹܦ ܟܠ ܟܹܐܒܼܝܼ̈ܢ ܘܟܼܘܼܪ̈ܗܵܢܝܼܢ ܒܲܡܪܲܚܡܵܢܘܼܬܹܗ. ܐܲܣܵܐ ܡܵܪܝ ܒܲܚܢܵܢܵܟܼ ܠܥܲܒܼܕܵܟܼ ܗܵܢܵܐ ܘܐܲܩܝܼܡܲܝܗܝ ܡܼܢ ܟܘܼܪܗܵܢܹܗ ܒܣܘܿܓܼܐܵܐ ܕܛܲܝܒܿܘܼܬܼܵܟܼ؛ ܕܢܵܘܕܸܐ ܠܵܟܼ ܥܲܠ ܐܲܦܲܝ̈ ܦܘܼܪܩܵܢܵܟܼ ܕܲܠܘܵܬܹܗ: ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܠܵܘܗܝ.

♱♱♱♱♱♱♱

ܐَܚܪܹܬܼܵܐ ܕܥܲܠ ܟܪ̈ܝܼܗܹܐ.

ܐܲܠܵܗܵܐ ܝܵܗܘܿܒܼܵܐ ܕܟܼܠܵܗ݁ ܐܵܣܝܘܼܬܼܵܐ ܘܲܡܫܲܟܿܢܵܢܵܐ ܕܟܼܠܗܹܝܢ ܛܵܒܼܵܬܼ̈ܵܐ. ܗ݁ܘ ܕܲܒܼܟܼܠܙܒܲܢ ܒܛܝܼܠ ܠܹܗ ܥܲܠ ܓܸܢܣܵܐ ܕܐَܢܵܫܘܼܬܼܵܐ؛ ܘܠܵܐ ܟܵܠܹܐ ܡܸܢܲܢ ܥܘܼܕܼܪ̈ܵܢܵܘܗܝ. ܗ̤ܘ ܢܲܓܸܿܢ ܥܠܲܝܟ ܝܲܡܝܼܢܵܐ ܕܲܡܪܲܚܡܵܢܘܼܬܹܗ؛ ܘܢܸܕܼܚܘܿܩ ܡܸܢܵܟܼ ܡܲܪܥܵܐ ܘܟܼܘܼܪܗܵܢܵܐ ܘܢܸܟܼܝܵܢܹ̈ܐ ܘܣܵܩܘܿܒܼܠܹ̈ܐ. ܘܲܢܫܲܟܸܿܢ ܠܵܟܼ ܚܲܝܹ̈ܐ ܛܵܒܹ̈ܐ ܘܚܘܼܠܡܵܢܵܐ ܘܐܵܣܝܘܼܬܼܵܐ ܕܦܲܓܼܪܵܐ ܘܢܲܦ̮ܫܵܐ ܘܬܸܦܪܘܿܥ ܫܘܼܒܼܚܵܐ ܘܬܼܵܘܕܝܼܬܼܵܐ ܠܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ: ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܥܲܠ ܟܪ̈ܝܼܗܹܐ.

ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܒܲܫܡܵܟܼ ܪܲܒܵܐ ܘܲܕܼܚܝܼܠܵܐ ܘܲܒܼܚܲܝܠܵܐ ܕܥܘܼܕܼܪܵܢܵܟܼ ܡܲܠܟܵܐ ܚܲܝܵܐ ܘܲܡܠܸܐ ܪ̈ܲܚܡܹܐ ܥܲܬܿܝܼܪ ܒܡܵܘܗܒܼܵܬܹ̈ܗ ܘܲܫܦܝܼܥ ܒܚܘܼܒܹܗ؛ ܣܵܐܹ݁ܡܢܵܐ ܐܝܼܕܼܝ ܘܩܵܪܹܢܵܐ ܠܵܟܼ ܡܵܪܲܢܝܼܫܘܿܥܡܫܝܼܚܵܐ ܘܠܲܫܡܵܟܼ ܩܲܕܝܼܫܵܐ ܗ݁ܘ ܕܣܵܡܬܵܝܗܝ ܥܲܠ ܡܝܼܬܹ̈ܐ ܘܲܚܝܵܘ؛ ܘܓܲܪ̈ܒܹܐ ܘܐܸܬܿܕܲܟܿܝܼܘ؛ ܘܲܣ̈ܡܲܝܵܐ ܐܸܬܼܦܲܬܲܚܘ ܥܲܝܢܲܝ̈ܗܘܿܢ؛ ܘܲܡܫܲܪ̈ܲܝܵܐ ܐܲܣܝܼܬܿ ܐܸܢܘܿܢ ܒܛܲܝܒܿܘܼܬܼܵܟܼ. ܐܸܫܵܬܼܵܐ ܥܲܪܵܘܝܼܬܵܐ ܘܕܸܚܠ̱ܬܼܵܐ ܘܙܵܘܸܥܬܼܵܐ ܘܟܹܐܒܼ ܪܹܫܵܐ ܘܟܹܐܒܼ ܥܲܝܢܵܐ ܘܟܼܠ ܟܹܐܒܼ ܘܟܼܠ ܟܘܼܪܗܵܢ ܐܲܠܝܼܨ ܕܲܡܫܲܠܛܝܼܢ ܒܹܝܬܼ ܒܢܲܝ̈ܢܵܫܵܐ. ܐܲܝܟܵܢܵܐ ܕܲܪܕܲܦ ܦܘܼܩܕܵܢܵܟܼ ܐܸܫܵܬܼܵܐ ܥܲܪܵܘܝܼܬܵܐ ܡ̣ܢ ܚܡܵܬܹܗ ܕܫܸܡܥܘܿܢ ܟܹܐܦܵܐ؛ ܘܐܲܕܢܲܚܬܿ ܢܘܼܗܪܵܐ ܕܙܲܕܝܼܩܘܼܬܼܵܐ ܥܲܠ ܗ݁ܘ ܓܲܒܼܪܵܐ ܕܲܫܬܵܐ ܫܹܐܕܹ̈ܐ ܢܦܲܩ̣ܘ ܡܸܢܹܗ ܘܐܲܣܝܼܬܿ ܐܸܢܘܿܢ ܒܛܲܝܒܿܘܼܬܼܵܟܼ. ܠܲܬܼܪܝܼܥܲܬܼ ܕܡܵܐ؛ ܘܐܲܚܠܸܡܬܿ ܠܗ݁ܘ ܡܫܲܪܝܵܐ ܒܡܸܠܬܼܵܐ ܚܲܝܬܼܵܐ ܕܡ̣ܢ ܣܸܦ̈ܘܵܬܼܵܟܼ؛ ܘܲܒܼܩܵܠܵܟܼ ܚܲܝܵܐ ܘܩܲܕܝܼܫܵܐ ܟܐܲܝܬܿ ܒܝܲܡܵܐ ܕܥܲܠ ܝܲܕܼ ܝܲܡܵܐ ܕܛܲܒܵܪܝܼܘܿܣ ܘܫܲܬܸܩܬܿ ܠܓܲܠܠܹ̈ܐ ܘܡܲܚܫ̈ܘܼܠܹܐ ܕܲܒܼܓܵܘ ܝܲܡܵܐ ܘܲܗ̤ܘܵܐ ܫܸܠܝܵܐ ܪܲܒܵܐ ܘܲܢܝܵܚܵܐ. ܘܐܵܦ ܗܵܫܵܐ ܒܵܥܹܝܢܲܢ ܡܸܢܵܟܼ ܗܲܒܼ ܚܲܝܠܵܐ ܠܲܡܚܝܼܠܹ̈ܐ ܘܫܲܕܲܪ ܥܘܼܕܼܪܵܢܵܐ ܠܥܲܒܼܕܵܟܼ ܗܵܢܵܐ ܦܠܵܢ؛ ܘܢܸܬܼܐܲܣܸܐ ܡ̣ܢ ܟܠܗܘܿܢ ܟܹܐܒܹ̈ܐ ܘܟܘܼܪ̈ܗܵܢܹܐ ܘܚܲܫܹ̈ܐ ܥܲܣܩܹ̈ܐ؛ ܒܲܨܠܘܿܬܼ ܩܲܕܝܼܫܹ̈ܐ؛ ܡܵܪܵܐ ܕܟܼܠ ܠܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܥܲܠ ܡܸܫܚܵܐ ܕܐܵܣܝܘܼܬܼܵܐ.

ܐܵܣܝܵܐ ܫܲܪܝܼܪܵܐ ܕܡܲܠܝܵܐ ܡܸܠܬܹܗ ܟܠ ܚܘܼܠܡܵܢܝܼ̈ܢ ܘܟܼܠ ܥܘܼܕܼܪ̈ܵܢܝܼܢ ܘܟܼܠ ܐܵܣ̈ܘܵܢ. ܐܲܢَܬܿ ܡܵܪܝ ܐܲܫܪܵܐ ܛܲܝܒܿܘܼܬܼܵܟܼ ܒܡܸܫܚܵܐ ܗܵܢܵܐ ܕܢܸܗܘܸܐ ܡܥܲܕܼܪܵܢܵܐ ܘܥܵܨܘܿܒܼܵܐ ܕܟܼܠܗܘܿܢ ܟܘܼܪ̈ܗܵܢܝܼܢ؛ ܘܲܡܦܲܝܓܼܵܢܵܐ ܕܐܘܼܠܨܵܢܲܝ̈ܢ؛ ܘܡܲܪܘܚܵܢܵܐ ܕܥܘܼܣܵܩܲܝ̈ܢ؛ ܘܡܲܚܠܡܵܢܵܐ ܕܟܹܐܒܲܝ̈ܢ؛ ܘܲܡܕܲܟܿܝܵܢܵܐ ܕܲܚܒܼܵܪ̈ܵܬܲܢ؛ ܘܲܡܛܲܠܩܵܢܵܐ ܕܐܸܫܵܬܲܢ؛ ܘܢܸܫܬܿܟܲܚ ܠܟܼܠ ܚܘܼܠܡܵܢܝܼ̈ܢ ܘܲܠܟܼܠ ܥܘܼܕܼܪ̈ܵܢܝܼܢ ܒܚܘܼܠܡܵܢܵܐ ܕܲܥܒܲܕܬܿ ܒܹܗ ܠܘܵܬܲܢ. ܘܬܸܫܒܿܘܿܚܬܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܢܲܣܸܩ ܠܲܬܼܠܝܼܬܼܵܝܘܼܬܼܵܟܼ ܡܲܠܝܲܬܼ ܟܠ ܛܵܒܼ̈ܵܢ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܐܸܫܵܬܼܵܐ.

ܒܲܫܡܵܟܼ ܐܲܒܼܵܐ ܛܵܒܼܵܐ؛ ܘܒܲܫܡܹܗ ܕܝܼܚܝܼܕܼܵܝܵܐ ܡܵܪܲܢ ܝܑܼܫܘܿܥ ܡܫܝܼܚܵܐ؛ ܘܒܲܫܡܹܗ ܕܪܘܼܚܵܐ ܕܩܘܼܕܼܫܵܐ ܚܲܝܵܐ ܘܩܲܕܝܼܫܵܐ. ܛܵܪܹܕܼ ܐَܢܵܐ ܠܵܗܿ ܠܐܸܫܵܬܼܵܐ ܡܼܢ ܥܲܒܼܕܵܟܼ ܦܠܵܢ ܒܪܵܗ݁ ܕܲܦܠܵܢܝܼܬܼܵܐ. ܘܦܵܣܹܩ ܐܢܵܐ ܠܹܟܼܝ ܐܘܿ ܐܸܫܵܬܼܵܐ ܥܲܪܵܘܝܼܬܼܵܐ ܒܗܿܘ ܚܲܝܠܵܐ ܕܲܩܥܵܐ ܠܘܵܬܼ ܚܡܵܬܹܗ ܕܫܸܡܥܘܿܢ ܟܹܐܦܵܐ ܕܐܲܚܝܼܕܼܵܐ ܗَܼܘܵܬܼ ܒܐܸܫܵܬܼܵܐ ܘܩܵܡܲܬ̤ ܘܐܸܬܼܚܲܠܡܲܬ̤ ܘܫܲܪܝܲܬ̤ ܡܫܲܡܫܵܐ ܗَܼܘܵܬܼ ܠܹܗ ܠܡܵܪܲܢ. ܐܵܦ ܗܵܫܵܐ ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ ܫܲܪܲܪ ܒܘܼܪ̈ܟܵܘܗܝ ܕܥܲܒܼܕܵܟܼ ܗܵܢܵܐ ܦܠܵܢ ܒܪܵܗ݁ ܕܲܦܠܵܢܝܼܬܼܵܐ؛ ܘܲܢܩܘܼܡ ܘܢܸܬܼܚܠܸܡ ܡܼܢ ܟܘܼܪܗܵܢܹܗ ܗܵܢܵܐ ܒܚܲܝܠܵܟܼ ܐܲܠܵܗ ܐܲܠܵܗܝܼ̈ܢ ܘܡܵܪܹܐ ܡܵܪ̈ܵܘܵܬܼܵܐ؛ ܘܲܒܼܥܘܼܕܼܪܵܢܵܐ ܕܡܸܢܵܟܼ ܐܲܣܵܐ ܘܐܲܚܠܸܡ ܠܥܲܒܼܕܵܟܼ ܗܵܢܵܐ؛ ܒܲܨܠܘܿܬܼ ܡܵܪܬܿܝ ܡܲܪܝܲܡ ܛܘܼܒܼܵܢܝܼܬܼܵܐ ܐܸܡܵܐ ܕܢܘܼܗܪܵܐ؛ ܘܒܲܨܠܘܿܬܼ ܟܠܗܘܿܢ ܩܲܕܝܼܫܵܘ̈ܗܝ ܕܡܵܪܲܢ: ♰ ܗܵܫܵܐ ܘܲܒܼܟܼܠܙܒܲܢ ܘܠܥܵܠܲܡ ܥܵܠܡܝܼܢ.

♱♱♱♱♱♱♱

ܩܘܼܕܵܫ ܡܲܝ̈ܵܐ ܛܲܡ̈ܐܹܐ (ܠܲܫܝܵܓܼܬܼܵܐ ܕܥܲܢܝܼܕܹ̈ܐ).

ܩܲܕܼܡܵܝܲܬܼ ܡܫܲܪܹܝܢ؛ ܬܸܫܒ̇ܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ؛ ܬܢܝܼ؛ ܓ؛ ܙܲܒܼܢܝܼ̈ܢ؛ ܘܥܲܠ ܐܲܪܥܵܐ ܫܠܵܡܵܐ؛ ܘܣܲܒ̣ܪܵܐ ܛܵܒܼܵܐ ܠܲܒܼܢܲܝ̈ܢܵܫܵܐ ܒܟܼܠ ܥܸܕܵܢ ܠܥܵܠܡܝܼܢ ܐܵܡܹܝܢ.

ܘܡܲܩܦܝܼܢ ܐܲܒܼܘܼܢ ܕܕܲܫܡܲܝܵܐ... ܘܫܲܪܟܵܐ.

ܘܐܵܡܲܪ ܡܫܲܡܫܵܢܵܐ. ܢܨܲܠܸܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܢܸܣܬܿܓܸܕܼ ܘܢܸܫܬܲܒܲܚ ܘܢܸܬܼܝܲܩܲܪ ܘܢܸܬܼܪܲܡܪܲܡ ܘܢܸܬܿܬܵܘܕܸܐ ܘܢܸܬܿܒܲܪܲܟܼ ܒܲܫܡܲܝܵܐ ܘܒܲܐܪܥܵܐ ܫܡܵܐ ܣܓܼܝܼܕܼܵܐ ܘܲܡܫܲܒܵܚܵܐ ܕܲܬ̣ܠܝܼܬܵܝܘܼܬ̣ܵܟܼ ܡܫܲܒܲܚܬܵܐ؛ ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ؛

ܘܥܵܢܹܝܢ؛ ܐܵܡܹܝܢ.

ܘܲܡܫܲܪܸܐ ܟܵܗܢܵܐ؛

ܐܲܠܵܗܲܢ ܢܪܲܚܸܡ ܥܠܲܝܢ. ܗܲܠܸܠܘܼܝܵܗ ܗܲܠܸܠܘܼܝܵܗ ܡܲܚܸܐ ܡܝܼܬܹ̈ܐ ܫܘܼܒܼܚܵܐ ܠܲܫܡܵܟܼ. ܐܲܠܵܗܲܢ ܢܪܲܚܸܡ ܥܠܲܝܢ* ܢܒܲܪܟܲܢ ܘܢܲܢܗܲܪ ܐܲܦܵܘ̈ܗܝ ܒܲܢ‌* ܕܢܸܕܲܥ ܒܐܲܪܥܵܐ ܐܘܼܪ̈ܚܵܬܹܗ* ܘܲܒ̣ܟ̣ܠܗܘܿܢ ܥܲܡܡܹ̈ܐ ܦܘܼܪܩܵܢܹܗ‌* ܢܲܘܕܿܘܼܢ ܠܵܟܼ ܥܲܡܡܹ̈ܐ ܐܲܠܵܗܵܐ* ܢܵܘܕܿܘܿܢ ܠܵܟܼ ܥܲܡܡܹ̈ܐ ܟܠܗܘܿܢ‌* ܢܸܚ̈ܕܿܝܵܢ ܘܲܢܫܲܒ̈ܚܵܢ ܡܲܠ̈ܟܿܘܵܬܼܵܐ* ܕܕ݂ܵܐܹ̇ܢ ܐܲܢَܬܿ ܠܥܲܡܡܹ̈ܐ ܬܪܝܼܨܵܐܝܼܬܼ‌* ܘܲܠܡܲܠ̈ܟܼܘܵܬܼܵܐ ܡܕܲܒܲܪ ܐܲܢَܬܿ ܒܐܲܪܥܵܐ* ܢܵܘܕܿܘܼܢ ܠܵܟ݂ ܥܲܡܡܹ̈ܐ ܐܲܠܵܗܵܐ‌* ܢܵܘܕܿܘܼܢ ܠܵܟܼ ܥܲܡܡܹ̈ܐ ܟܠܗܘܿܢ* ܐܲܪܥܵܐ ܝܸܗܒܲܬ̤ ܦܹܐܪܹ̈ܝܗ̇‌* ܢܒܲܪܟܲܢ ܐܲܠܵܗܵܐ ܐܲܠܵܗܲܢ ܘܲܢܒܲܪܟܲܢ ܐܲܠܵܗܵܐ* ܘܢܸܕܼܚ̄ܠܘܼܢ ܡܸܢܹܗ ܟܠܗܘܿܢ ܥܸܒܼܪܹ̈ܝܗ̇ ܕܐܲܪܥܵܐ. ܡܲܚܸܐ ܡܝܼܬܹ̈ܐ ܫܘܼܒܼܚܵܐ ܠܲܫܡܵܟܼ* ܫܲܒܲܚ. ܡܲܚܸܐ ܡܝܼܬܹ̈ܐ ܫܘܼܒܼܚܵܐ ܠܲܫܡܵܟܼ* ܥܵܠܲܡ. ܡܲܚܸܐ ܡܝܼܬܹ̈ܐ ܫܘܼܒܼܚܵܐ ܠܲܫܡܵܟܼ*

ܨܠܘܿܬܼܵܐ. ܨܠܘܿܬܲܢ ܡܵܪܝ ܬܸܒܼܣܲܡ ܠܵܟܼ ܘܒܼܵܥܘܼܬܲܢ ܬܸܥܘܿܠ ܩܘܼܕܼܡܲܝܟ ܘܡ̣ܢ ܒܹܝܬ̣ ܓܲܙܹܗ ܕܲܚܢܵܢܵܟܼ ܢܸܬ̣ܦܲܢ̈ܝܵܢ ܫܹ̈ܐܠܵܬܼܵܐ ܕܲܣܢܝܼܩܘܼܬܲܢ؛ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ؛ ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

ܥܘܿܢܝܼܬܼܵܐ.
ܒܩܵܠ؛ ܫܠܝܼܚܹ̈ܐ ܟܹܐܦܵܐ.

ܗ̇ܘ ܕܐܝܼܬܼܵܘܗܝ ܡ̣ܢ ܩܕܼܵܡ ܥܵܠܡܹ̈ܐ ܀ ܡܫܲܒܲܚ ܒܲܡܪ̈ܵܘܡܹܐ ܡܵܪܝܵܐ. ܐܝܼܬܼܝܵܐ ܕܥܵܡܲܪ ܒܲܡܪ̈ܵܘܡܹܐ؛ ܘܪܸܡܙܹܗ ܡܕܲܒܲܪ ܠܲܬܼܗܘܿܡܹ̈ܐ؛ ܐܲܓܸܿܢ ܝܲܡܝܼܢ ܡܵܪܘܼܬܼܵܟܼ؛ ܥܲܠ ܡܲܝ̈ܵܐ ܗܵܠܹܝܢ ܛܲܡܹ̈ܐܐ. ܘܩܲܕܸܫ ܐܸܢܘ̇ܢ ܒܲܚܢܵܢܵܟܼ؛ ܕܢܸܗܘܘܿܢ ܠܚܘܼܣܵܝܵܐ ܕܥܲܡܡܹ̈ܐ؛ ܒܲܨܠܘܿܬܼܵܐ ܕܬܸܫܥܵܐ ܬܸܓܼܡܹ̈ܐ؛ ܐܵܦ ܕܲܓܼܡܝܼܪܹ̈ܐ ܘܨܲܝܵܡܹ̈ܐ. ܬܢܝܼ܀ ܘܫܲܒܲܚ. ܒܵܗ̇.

ܨܠܘܿܬܼܵܐ. ܪܘܿܣ ܥܠܲܝܢ ܡܵܪܲܢ ܘܐܲܠܵܗܲܢ ܛܲܠܵܐ ܡܦܲܝܼܓܼܵܢܵܐ ܕܒܲܣܝܼܡܘܼܬܹܗ ܕܚܘܼܒܵܟܼ؛ ܘܚܲܠܸܠܲܝܢ ܒܹܗ ܡ̣ܢ ܟܘܼܬܼ̈ܡܵܬܼܵܐ ܕܲܚܛܝܼܬܼܵܐ؛ ܪܵܥܝܵܐ ܛܵܒܼܵܐ ܕܲܢ̣ܦܲܩ ܒܲܒܼܥܵܬܲܢ ܘܐܸܫܟܲܚ ܠܐܲܒܿܝܼܕܼܘܼܬܲܢ ܘܨܵܒܹܐ ܒܡܸܬܼܦܲܢܝܵܢܘܼܬܲܢ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ؛ ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

ܩܵܢܘܿܢܵܐ.

ܪܲܚܸܡ ܥܠܲܝ ܐܲܠܵܗܵܐ ܐܲܝܟܼ ܛܲܝܒܿܘܼܬܼܵܟܼ. ܘܐܲܝܟܼ ܣܘܿܓܼܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈. ܒܙܘܿܦܵܐ ܕܪ̈ܲܚܡܲܝܟ ܢܸܬܼܚܵܘܪ̈ܵܢ ܟܘܼ̈ܬܼܡܵܬܲܢ ܚܲܢܵܢܵܐ. ܪܲܚܸܡ ܥܠܲܝ ܐܲܠܵܗܵܐ ܐܲܝܟܼ ܛܲܝܒܿܘܼܬܼܵܟܼ. ܘܐܲܝܟܼ ܣܘܿܓܼܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈‌* ܐܲܣܓܵܐ ܐܲܫܝܼܓܲܝܢܝ ܡ̣ܢ ܥܵܘ̣ܠܝ. ܘܡ̣ܢ ܚܛܵܗܲܝ̈ ܕܲܟܵܢܝ‌* ܡܸܛܠ ܕܣܲܟܼܠ̱ܘܵܬ̣ܝ ܝܵܕܲܥ ܐَܢܵܐ.‌ ܘܲܚܛܵܗܲܝ̈ ܠܘܼܩܒܲܠܝ ܐܸܢܘܿܢ ܒܟܼܠܙܒܲܢ‌* ܠܵܟܼ ܒܲܠܚܘܿܕܲܝܟ ܚܛܹ݁ܝܬܼ.‌ ܘܒܼܝܼ̈ܫܵܬܼܵܐ ܩܕ݂ܵܡܲܝܟ ܥܸܒܼܕܹ̇ܬܼ* ܡܸܛܠ ܕܬܸܙܕܲܕܲܩ ܒܡܸܠܬܼܵܟܼ ܘܬܸܙܟܸܿܐ ܒܕܼܝܼܢܲܝ̈ܟ.‌ ܡܸܛܠ ܕܲܒܼܥܵܘ̣ܠܵܐ ܐܸܬܼܒܲܛܢܹܬܼ ܘܒܲܚܛܵܗܹ̈ܐ ܒܛܸܢܬܲܢܝ ܐܹܡܝ‌* ܐܲܢَܬܿ ܕܹܝܢ ܒܩܘܼܫܬܵܐ ܨܒܲܝܬܿ. ܘܟܲܣ̈ܝܵܬܼܵܐ ܕܚܸܟܼܡِܬܼܵܟܼ ܐܵܘܕܲܥܬܵܢܝ‌* ܪܘܿܣ ܥܠܲܝ ܒܙܘܿܦܵܐ ܘܐܸܬܿܕܲܟܸܐ.‌ ܚܲܠܸܠܲܝܢܝ ܒܹܗ ܡ̣ܢ ܬܲܠܓܵܐ ܐܸܚܘܲܪ‌* ܐܲܣܒܲܥܲܝܢܝ ܒܘܼܣܵܡܵܟܼ ܘܚܲܕܼܘܼܬܼܵܟܼ.‌ ܘܢܸܚܕܿܘܿܢ ܓܲܪ̈ܡܲܝ ܡܲܟܿܝܼܟܹ̈ܐ‌* ܐܲܗܦܸܟܼ ܐܲܦܲܝ̈ܟ ܡ̣ܢ ܚܛܵܗܲܝ̈.‌ ܘܟܼܠܗܹܝܢ ܣܲܟܼܠ̱ܘܵܬ̣ܝ ܥܛܝܼ‌* ܠܸܒܵܐ ܕܲܟܼܝܵܐ ܒܪܝܼ ܒܝܼ ܐܲܠܵܗܵܐ.‌ ܘܪܘܼܚܵܟܼ ܬܩܲܢܬܼܵܐ ܚܲܕܸܿܬܼ ܒܓܼܵܘܝ‌* ܠܵܐ ܬܸܫܕܹܿܝܢܝ ܡ̣ܢ ܩܕܼܵܡܲܝܟ. ܘܪܘܼܚܵܟܼ ܩܲܕܝܼܫܵܐ ܠܵܐ ܬܸܣܲܒܼ ܡܹܢܝ‌* ܐܸܠܵܐ ܐܲܗܦܸܟܼ ܠܝܼ ܒܘܼܣܵܡܵܟܼ ܘܦܘܼܪܩܵܢܵܟܼ.‌ ܘܪܘܼܚܵܟܼ ܡܫܲܒܲܚܬܵܐ ܬܣܲܡܟܲܢܝ‌* ܕܐܲܠܸܦ ܠܥܵܘܵܠܹ̈ܐ ܐܘܼܪܚܵܟܼ.‌ ܘܚܲܛܵܝܹ̈ܐ ܠܘܵܬܼܵܟܼ ܢܸܬܼܦܢܘܿܢ‌* ܦܲܨܵܢܝ ܡ̣ܢ ܕܡܵܐ ܐܲܠܵܗܝ ܐܲܠܵܗܵܐ ܕܙܲܕܿܝܼܩܘܼܬܼܝ. ܘܲܢܫܲܒܲܚ ܠܸܫܵܢܝ ܙܲܕܿܝܼܩܘܼܬܼܵܟܼ‌* ܡܵܪܝܵܐ ܦܬܲܚ ܠܝܼ ܣܸܦ̈ܘܵܬܼܝ. ܘܦܘܼܡܝ ܢܲܦܸܩ ܬܸܫ̈ܒܿܚܵܬܼܵܟܼ‌* ܡܸܛܠ ܕܠܵܐ ܨܒ݂ܲܝܬܿ ܒܕܸܒܼܚܹ̈ܐ.‌ ܘܐܵܦܠܵܐ ܒܝܲܩ̈ܕܹܿܐ ܫܲܠܡܹ̈ܐ ܐܸܬܼܪܲܥܝܼܬܿ‌‌* ܕܸܒܼܚܵܘ̈ܗܝ ܕܐܲܠܵܗܵܐ ܪܘܼܚܵܐ ܗَܝ̣ ܡܲܟܿܝܼܟܼܬܵܐ.‌ ܠܸܒܵܐ ܫܚܝܼܩܵܐ ܐܲܠܵܗܵܐ ܠܵܐ ܡܲܣܠܸܐ. ܒܙܘܿܦܵܐ ܕܪ̈ܲܚܡܲܝܟ ܢܸܬܼܚܵܘܪ̈ܵܢ ܟܘܼ̈ܬܼܡܵܬܲܢ ܚܲܢܵܢܵܐ * ܫܲܒܲܚ. ܥܵܠܲܡ. ܐܵܣܝܵܐ ܡܲܐܣܸܐ ܟܠ ܟܹܐܒܼܝ̈ܢ ܐܲܣܵܐ ܡܘܼܡܲܝ̈ܢ ܒܲܚܢܵܢܵܟܼ* ܪܲܚܸܡ ܥܠܲܝ ܐܲܠܵܗܵܐ ܐܲܝܟܿ ܛܲܝܒܿܘܼܬܼܵܟܼ. ܘܐܲܝܟܼ ܣܘܿܓܼܐܵܐ ܕܪ̈ܲܚܡܲܝܟ ܥܛܝܼ ܚܛܵܗܲܝ̈. ܐܵܣܝܵܐ ܡܲܐܣܸܐ ܟܠ ܟܹܐܒܼܝ̈ܢ ܐܲܣܵܐ ܡܘܼܡܲܝ̈ܢ ܒܲܚܢܵܢܵܟܼ*

ܬܸܫܒܿܘܿܚܬܵܐ.

ܬܵܐ ܡܵܪܝ ܠܥܘܼܕܼܪܵܢܲܢ ܘܚܲܝܸܠ ܡܚܝܼܠܘܼܬܲܢ؛ ܕܲܥܠܲܝܟܿܘܼ ܣܲܒܼܪܲܢ ܠܸܠܝܵܐ ܘܒܼܐܝܼܡܵܡܵܐ. ܬܢܝܼ܀ ܪ̈ܲܚܡܹܐ ܘܲܚܢܵܢܵܐ ܡܸܢܵܟܼ ܫܵܐ̇ܠܝܼܢܲܢ؛ ܠܵܐ ܬܸܟܼܠܸܐ ܡܸܢܲܢ ܐܲܢَܬܿ ܪܵܚܹ̇ܡ ܐَܢܵܫܵܐ‌܀ ܗܲܒܼ ܠܲܢ ܡܫܝܼܚܵܐ ܕܲܒܼܠܸܒܵܐ ܕܲܟܼܝܵܐ؛ ܘܒܲܥܒܼܵܕܹ̈ܐ ܛܵܒܹ̈ܐ ܢܸܓܼܡܘܿܪ ܨܸܒܼܝܵܢܵܟܼ‌܀

ܟܵܪܘܿܙܘܼܬܵܐ.

ܢܩܘܼܡ ܫܲܦܝܼܪ ܟܠܲܢ ܒܚܲܫܵܐ ܒܲܚܦܝܼܛܘܼܬܼܵܐ؛ ܢܸܒܼܥܸܐ ܘܢܹܐܡܲܪ ܡܵܪܲܢ ܐܸܬ̣ܪܲܚܸܡ ܥܠܲܝܢ.

ܘܥܵܢܹܝܢ؛ ܡܵܪܲܢ ܐܸܬܼܪܲܚܸܡ ܥܠܲܝܢ.

ܘܡܲܩܸܦ؛ ܡܵܪܝܵܐ ܚܲܝܠܬܼܵܢܵܐ ܐܲܚܝܼܕܼ ܟܠ ܐܲܠܵܗܵܐ ܕܐܲܒܼ̈ܵܗܵܬܲܢ؛ ܒܵܥܹ̇ܝܢܲܢ ܡܸܢܵܟܼ‌܀

ܩܲܕܝܼܫܵܐ ܘܲܡܫܲܒܿܚܵܐ ܕܲܒܼܩܲܕܝܼܫܹ̈ܐ ܥܵܡܲܪ ܘܡܸܬܿܬܿܢܝܼܚ ܨܸܒܼܝܵܢܹܗ؛ ܒܵܥܹ̇ܝܢܲܢ ܡܸܢܵܟܼ‌܀

ܡܲܠܟܵܐ ܕܡܲܠܟܹ̈ܐ ܘܡܵܪܵܐ ܕܡܵܪ̈ܵܘܵܬܼܵܐ ܕܥܵܡܲܪ ܒܢܘܼܗܪܵܐ ܓܲܐܝܵܐ؛ ܒܵܥܹ̇ܝܢܲܢ ܡܸܢܵܟܼ‌܀

ܗ̇ܘ ܕܐ݇ܢܵܫ ܡ̣ܢ ܒܢܲܝ̈ܢܵܫܵܐ ܠܵܐ ܚ̣ܙܵܝܗܝ ܘܐܵܦܠܵܐ ܡܨܸܐ ܠܡܸܚܙܝܹܗ؛ ܒܵܥܹ̇ܝܢܲܢ ܡܸܢܵܟܼ‌܀

ܗ̇ܘ ܕܨܵܒܹ̇ܐ ܕܟܼܠܗܘܿܢ ܒܢܲܝ̈ܢܵܫܵܐ ܢܸܚܘܿܢ ܘܢܸܬܼܦܢܘܿܢ ܠܝܼܕܲܥܬܵܐ ܕܲܫܪܵܪܵܐ؛ ܒܵܥܹ̇ܝܢܲܢ ܡܸܢܵܟܼ‌܀

ܥܲܠ ܚܘܼܠܡܵܢܵܐ...‌܀ ܐܲܠܵܗܵܐ ܡܪܲܚܡܵܢܵܐ‌...‌܀ ܗ̇ܘ ܕܒܲܫܡܲܝܵܐ...‌܀

ܫܲܝܢܵܟܼ ܘܲܫܠܵܡܵܟܼ ܐܲܫܪܵܐ ܒܟܸܢܫܵܐ ܕܣܵܓܼܘܿܕܲܝ̈ܟ ܡܫܝܼܚܵܐ ܦܵܪܘܿܩܲܢ؛ ܘܐܸܬ̣ܪܲܚܲܡܥܠܲܝܢ‌܀

ܘܐܵܡܲܪ ܡܫܲܡܫܵܢܵܐ. ܐܲܪܝܼܡܘ ܩܵܠܟ̣ܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܐܵܡܪܝܼܢ: ܩܲܕܝܼܫܵܐ ܐܲܠܵܗܵܐ... ܀ ܘܫܲܪܟܵܐ.

ܘܡܲܩܦܝܼܢ: ܐܲܒܼܘܼܢ ܕܒܲܫܡܲܝܵܐ.

ܨܠܘܿܬܼܵܐ. ܚܲܢܵܢܵܐ ܕܩܲܕܝܼܫ ܫܡܹܗ ܘܛܵܒܼܵܐ ܘܟܹܐܢܵܐ ܕܡ̣ܢ ܥܵܠܲܡ ܫܦܝܼܥܵܐ ܛܲܝܒܿܘܼܬܹܗ ܘܲܡܪܲܚܡܵܢܘܼܬܹܗ؛ ܐܲܫܦܲܥ ܡܵܪܲܢ ܘܐܲܠܵܗܲܢ ܚܢܵܢܵܐ ܕܒܲܣܝܼܡܘܼܬܹܗ ܕܚܘܼܒܵܟܼ ܥܲܠ ܢܲܦ̮̈ܫܵܬܼܵܐ ܕܣܵܓܼܘܿܕܲܝ̈ܟ؛ ܕܩܵܪܹܝܢ ܘܡܸܬܼܟܲܫܦܝܼܢ ܠܵܟܼ؛ ܒܟܼܠܗܘܿܢ ܙܲܒ̣ܢܹ̈ܐ ܘܥܸܕܵܢܹ̈ܐ؛ ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ؛ ܒܲܪܸܟ ܡܵܪܝ.

ܚܒܲܪܬܼܵܗ̇. ܒܒܼܘܼܪܟܿܬܼܵܟܼ ܡܵܪܲܢ ܘܐܲܠܵܗܲܢ ܢܸܬܼܒܲܪܟܼܘܼܢ ܥܲܒܼܕܲܝ̈ܟ؛ ܘܒܲܒ̣ܛܝܼܠܘܼܬܹܗ ܕܨܸܒ̣ܝܵܢܵܟ ܢܸܬ̣ܢܿܛܪܘܼܢ ܣܵܓ̣ܘܿܕܲܝ̈ܟ؛ ܘܫܲܝܢܵܐ ܡܵܪܝ ܐܲܡܝܼܢܵܐ ܕܐܲܠܵܗܘܼܬܼܵܟܼ ܘܲܫܠܵܡܵܐ ܢܲܓܿܝܼܪܵܐ ܕܡܵܪܘܼܬܼܵܟܼ؛ ܢܲܡܠܸܟܼ ܒܥܲܡܵܟ ܘܲܒ̣ܥܹܕܬܵܟܼ ܟܠܗܘܿܢ ܝܵܘܡܵܬܹ̈ܗ ܕܥܵܠܡܵܐ؛ ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

ܘܟܸܢ ܬܵܢܹ̇ܐ ܥܲܠ ܡܲܝ̈ܵܐ ܨܠܘܿܬܼܵܐ ܗܵܕܹܐ. ܒܗ̇ܘ ܦܘܼܩܕܵܢܵܐ ܡܵܪܵܢܵܝܵܐ ܘܐܲܠܵܗܵܝܵܐ ܕܐܸܬܼܩܲܕܲܫܘ ܒܹܗ ܡܲܝ̈ܵܐ ܕܝܘܼܪܕܢܵܢ ܟܲܕܼ ܥ̣ܡܲܕܼ ܒܗܘܿܢ ܦܵܪܘܿܩܲܢ ܡ̣ܢ ܝܲܕܼ ܥܲܒܼܕܹܗ ܘܫܵܘܫܒܼܝܼܢܹܗ ܝܘܿܚܲܢܵܢ؛ ܒܹܗ ܢܸܬܼܩܲܕܫܘܼܢ ܡܲܝ̈ܵܐ ܗܵܠܹܝܢ ܡ̣ܢ ܟܠܵܗܿ ܛܲܡܐܘܼܬܼܵܐ ܕܡܝܼܬܼܵܐ ܘܕܲܚܢܝܼܩܵܐ؛ ܘܢܸܗܘܘܿܢ ܚܲܝܹ̈ܐ ܠܫܵܬܿܘܿܝܲܝ̈ܗܘܿܢ ܘܚܘܼܠܡܵܢܵܐ ܠܐܲܝܠܹܝܢ ܕܲܡܫܝܼܓܼܝܼܢ ܡܸܢܗܘܿܢ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ. ܘܪܵܫܹܡ ܥܲܠ ܡܲܝ̈ܵܐ.

ܐܲܩܸܦ. ܠܵܟܼ ܩܲܕܝܼܫܵܐ ܕܩܲܕܸܫ ܒܲܥܡܵܕܹܗ ܠܟܼܠܗܘܿܢ ܝܲܡܡܹ̈ܐ ܘܢܲܗܪ̈ܵܘܵܬܼܵܐ ܘܐܵܓܼܡܹ̈ܐ ܘܥܲܝ̈ܢܵܬܼܵܐ ܘܲܡܥܝܼܢܹ̈ܐ ܘܡܲܒܿܘܼܥܹ̈ܐ ܕܡܲܝ̈ܵܐ؛ ܡܸܬܼܟܲܫܦܝܼܢܲܢ ܩܲܕܸܫ ܡܵܪܝ ܒܛܲܝܒܿܘܼܬܵܟܼ ܠܡܲܝ̈ܵܐ ܗܵܠܹܝܢ؛ ܘܢܹܐܬܸܐ ܪܘܼܚܵܟܼ ܩܲܕܝܼܫܵܐ ܢܲܓܸܿܢ ܘܢܸܬܿܬܿܢܝܼܚ ܥܠܲܝܗܘܿܢ؛ ܘܢܸܗܘܘܿܢ ܠܥܘܼܕܼܪܵܢܵܐ ܘܲܠܚܘܼܠܡܵܢܵܐ ܕܦܲܓܼܪܵܐ ܘܲܕܼܢܲܦ̮ܫܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ. ܘܪܵܫܹܡ ܥܲܠ ܡܲܝ̈ܵܐ.

ܚܘܼܬܵܡܵܐ.

ܚܲܝܠܵܐ ܡܵܪܵܢܵܝܵܐ ܕܲܟܼܣܸܐ ܒܐܵܬ̤ܵܐ ܕܲܨܠܝܼܒܼܵܐ ܢܲܓܸܿܢ ܘܢܸܫܪܸܐ ܥܲܠ ܡܲܝ̈ܵܐ ܗܵܠܹܝܢ؛ ܘܢܸܛܪܘܿܕܼ ܡ̣ܢ ܩܕܼܵܡܲܝܗܘܿܢ ܟܠܵܗ̇ ܬܲܡܣܘܼܬܹܗ ܘܬܲܛܘܲܫܬܹܗ ܕܥܵܠܡܐ ܗܵܢܵܐ ܥܵܒܿܘܿܪܵܐ؛ ܟܠ ܐܲܝܟܵܐ ܕܡܸܙܕܼܿܠܚܝܼܢ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ ܐܵܡܹܝܢ. ܪܵܫܹ̇ܡ ܥܲܠ ܡܲܝ̈ܵܐ ܘܲܡܫܝܼܓܼܝܼܢ ܒܗܘܿܢ ܠܥܲܢܝܼܕܵܐ.

♱♱♱♱♱♱♱

ܐܵܘ ܗܵܕܹܐ ܨܠܘܿܬ̣ܵܐ ܕܩܘܼܕܵܫ ܡܲܝ̈ܵܐ ܗܵܕܹܐ ܠܚܘܿܕܼ؛

(ܡ̣ܢ ܛܲܟܼܣܵܐ ܕܩܘܼܕܵܫܵܐ).

ܠܵܟܼ ܡܵܪܝܵܐ ܐܲܠܵܗܵܐ ܚܲܝܠ̱ܬܼܵܢܵܐ ܩܲܕܝܼܫܵܐ ܘܲܡܫܲܒܿܚܵܐ ܡܵܘܕܝܼܢܲܢ ܘܣܵܓܼܕܝܼܢܲܢ؛ ܕܲܒܼܦܵܪܹܗَܣܝܼܵܐ ܕܝܲܗ݇ܒܼܬܿ ܠܲܢ ܫܵܐ̇ܠܝܼܢܲܢ ܡ̣ܢ ܒܲܣܝܼܡܘܼܬܼܵܟܼ ܕܬܸܦܫܘܿܛ ܝܲܡܝܼܢܵܐ ܕܲܡܪܲܚܡܵܢܘܼܬܼܵܟܼ؛ ܘܲܬܼܒܲܪܸܟ ܘܲܬܼܩܲܕܸܫ ܠܡܲܝ̈ܵܐ ܗܵܠܹܝܢ؛ ܘܬܲܫܪܸܐ ܒܗܘܿܢ ܥܘܼܕܼܪܵܢܵܐ ܕܡܸܢܵܟܼ؛ ܕܟܼܠ ܟܲܪ ܕܡܸܬܼܝܲܗ݇ܒܿܝܼܢ ܘܡܸܬܿܬܲܪܡܹܝܢ ܘܡܸܙܕܲܠܚܝܼܢ ܘܡܸܬܼܐܲܫܕܝܼܢ؛ ܢܸܪܕܦܘܼܢ ܡ̣ܢ ܬܲܡ̇ܢ ܟܠܵܗ̇ ܛܲܢܦܘܼܬܼܵܐ ܘܛܲܡܐܘܼܬܼܵܐ ܕܡܝܼܬܼܵܐ ܘܕܲܚܢܝܼܩܵܐ؛ ܘܟܼܠ ܕܫܵܬܹ̇ܝܢ ܡܸܢܗܘܿܢ ܐܵܘ ܡܸܬܼܚܲܫܚܝܼܢ ܒܗܘܿܢ ܢܲܩܕܼܘܼܬܼܵܐ ܘܦܲܐܝܘܼܬܼܵܐ ܘܕܲܟܼܝܘܼܬܼܵܐ ܕܢܲܦ̮ܫܵܐ ܘܲܕܼܦܵܓܼܪܵܐ ܢܸܩܢܘܿܢ ܡܸܢܗܘܿܢ؛ ܘܢܸܬܿܠܘܼܢ ܒܡܵܘܗܲܒܼܬܼܵܐ ܕܟܼܝܼܬܼܵܐ ܕܡ̣ܢ ܠܘܵܬܼܵܟܼ ܥܘܼܕܼܪܵܢܵܐ ܘܦܘܼܪܩܵܢܵܐ ܠܢܲܦ̮̈ܫܵܬܼܵܐ ܕܨܵܒܼ̈ܝܵܢ ܘܚܵܕܼ̈ܝܵܢ ܒܩܲܕܝܼܫܘܼܬܼܵܐ ܘܲܒܼܒܲܝܬܵܝܘܼܬܼܵܐ ܕܡܵܪܘܼܬܼܵܟܼ؛ ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝ̈ܒܿܘܵܬܼܵܟܼ ܕܲܠܘܵܬܲܢ؛ ܢܲܤܸܩ ܠܵܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܬܵܘܕܝܼܬܼܵܐ ܘܣܸܓܼܕܬܼܵܐ؛ ܗܵܫܵܐ ܘܲܒܼܼܠܙܒܲܢ ܘܲܠܥܵܠܲܡ ܥܵܠܡܝܼܢ؛ ܘܥܵܢܹܝܢ؛ ܐܵܡܹܝܢ. ܘܪܵܫܹܡ ܥܲܠ ܡܲܝ̈ܵܐ.

ܫܠܸܡ ܩܘܼܕܵܫ ܡܲܝ̈ܵܐ ܡܫܲܡܠ̱ܝܵܐܝܼܬܼ؛

ܘܲܠܝܵܗ ܫܘܼܒ̣ܚܵܐ ܐܲܡܝܼܢܵܐ؛ ܐܵܡܹܝܢ.

♱♱♱♱♱♱♱♱♱♱♱♱

ܬܘܼܒܼ ܛܲܟܼܣܵܐ ܙܥܘܿܪܵܐ ܕܡܸܫܬܲܡܲܫ ܥܲܠ ܟܪ̈ܝܼܗܹܐ؛

ܐܲܝܠܹܝܢ ܕܲܡܚܝܼܠܝܼܢ ܒܥܸܠ̈ܠܵܬܼܵܐ ܦܲܓܼܪ̈ܵܢܵܝܵܬܼܵܐ.

ܩܲܕܼܡܵܐܝܼܬܼ ܡܫܲܪܹܝܢ؛ ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ؛ ܓ؛ ܙܲܒܼܢܝܼܢ. ܘܐܲܒܼܘܢ ܕܒܲܫܡܲܝܵܐ...ܘܫܲܪܟܵܐ.

ܘܐܵܡܲܲܪ ܡܫܲܡܫܵܢܵܐ؛ ܢܨܲܠܹܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܠܵܟܼ ܡܵܪܝ ܡܣܲܟ̈ܝܵܢ ܢܲܦ̮̈ܫܵܬܲܢ؛ ܘܠܲܚܢܵܢܵܟܼ ܚܵܝܪ̈ܵܢ ܥܲܝܢܹ̈ܐ ܕܠܸܒܵـ̈ܘܵܬܲܢ؛ ܘܡܸܢܵܟܼ ܫܵܐܠܝܼܢܲܢ ܫܘܼܒܼܩܵܢܵܐ ܕܣܲܟܼ̈ܠِܘܵܬܲܢ؛ ܗܲܒܼܠܲܢ ܒܛܲܝܒܿܘܼܬܼܵܟܼ ܘܲܒܼܪ̈ܲܚܡܲܝܟ ܐܲܝܟܼ ܕܲܡܥܵܕܲܬܿ ܒܟܼܠܥܸܕܵܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ ܡܲܙܡܘܿܪܵܐ ܗܵܢܵܐ؛

ܠܐܲܠܵܗܵܐ ܡܣܲܟܿܝܵܐ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ. ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ. ܠܐܲܠܵܗܵܐ ܡܣܲܟܿܝܵܐ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ* ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ* ܘܒܹܝܬܼ ܓܵܘܣܝ ܪܲܒܵܐ ܕܠܵܐ ܐܹܙܘܼܥ* ܥܕܲܡܵܐ ܠܐܸܡܲܬܼܝ ܡܸܬܼܓܲܪܓܼܝܼܢ ܐܲܢَܬܿܘܿܢ ܥܲܠ ܓܲܒܼܪܵܐ ܕܬܸܩܛܠܘܼܢ* ܐܲܝܟܼ ܐܸܣܬܼܵܐ ܕܡܵܛܲܬ݀ ܘܐܲܝܟܼ ܣܝܵܓܼܵܐ ܕܲܕܼܚܝܼܩ* ܐܸܠܵܐ ܐܵܦ ܡ̣ܢ ܐܝܼܩܵܪܹܗ ܐܸܬܼܪܲܥܝܼܘ ܠܡܸܕܼܚܝܹܗ* ܘܲܪܗܸܛܼܘ ܒܕܲܓܵܠܘܼܬܼܵܐ* ܒܦܘܼܡܗܘܿܢ ܡܒܲܪܟܼܝܼܢ ܘܲܒܼܠܸܒܿܗܘܿܢ ܠܵܝܛܝܼܢ* ܠܐܲܠܵܗܵܐ ܣܲܟܵܝ ܢܲܦ̮ܫܝ ܕܡܸܢܹܗ ܗܘ݀ ܦܘܼܪܩܵܢܝ* ܘܗܘ݀ܝܘܼ ܐܲܠܵܗܝ ܘܦܵܪܘܿܩܝ* ܘܒܹܝܬܼ ܓܵܘܣܝ ܕܠܵܐ ܐܹܙܘܼܥ* ܒܐܲܠܵܗܵܐ ܗَܘ̣ ܦܘܼܪܩܵܢܝ ܘܐܝܼܩܵܪܝ* ܬܘܼܩܦܝ ܘܥܵܕܼܘܿܪܝ ܘܣܲܒܼܪܝ ܐܲܠܵܗܵܐ ܗَܘ̣* ܣܲܒܲܪܘ ܒܹܗ ܟܠ ܫܵܥܵܐ ܥܲܡܵܐ* ܘܐܲܫܘܿܕܼܘ ܩܕܼܵܡܵܘܗܝ ܠܸܒܿܟܼܘܿܢ* ܡܸܛܠ ܕܐܲܠܵܗܵܐ ܗَܘ̣ ܣܸܬܵܪܵܐ ܕܝܼܠܲܢ* ܘܐܲܝܟܼ ܠܲܗܓܵܐ ܐܸܢܘܿܢ ܟܠܗܘܿܢ ܒܢܲܝ̈ܢܵܫܵܐ ܕܲܓܵܠܹ̈ܐ* ܕܲܒܼܡܲܐܣܲܬܼܵܐ ܡܲܥܠܹܝܢ ܘܲܣܪܝܼܩܝܼܢ ܐܲܟܼܚَܕܼܵܐ* ܠܵܐ ܬܸܬܲܟܼܠܘܼܢ ܥܲܠ ܛܠܘܼܡܝܵܐ* ܘܲܚܛܘܼܦܝܵܐ ܠܵܐ ܬܸܪܚܡܘܼܢ* ܩܸܢܝܵܢܵܐ ܡܵܐ ܕܣܵܓܹ݁ܐ ܠܵܐ ܢܸܚܕܸܿܐ ܒܹܗ ܠܸܒܿܟܼܘܿܢ* ܚܕܼܵܐ ܗَܝ̣ ܕܐܸܡܲܪ ܐܲܠܵܗܵܐ* ܘܲܕܿܬܲܪܬܹܿܝܢ ܗܵܠܹܝܢ ܫܸܡ݁ܥܹܬܼ* ܡܸܛܠ ܕܥܘܼܫܢܵܐ ܕܐܲܠܵܗܵܐ ܗَܘ̣* ܘܠܵܟܼ ܡܵܪܝܵܐ ܛܲܝܒܿܘܼܬܼܵܐ* ܡܸܛܠ ܕܐܲܢَܬܿ ܦܵܪܲܥ ܐܲܢَܬܿ ܠܓܲܒܼܪܵܐ ܐܲܝܟܼ ܥܒܼܵܕܼܵܘ̈ܗܝ* ܫܲܒܲܚ* ܥܵܠܲܡ* ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ.

ܘܐܵܡܲܲܪ ܡܫܲܡܫܵܢܵܐ؛ ܢܨܲܠܹܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܦܪܘܿܩ ܡܵܪܝ ܠܥܲܡܵܟܼ ܡ̣ܢ ܛܘܼܒܵܥܵܐ ܕܐܲܒܼܕܵܢܵܐ؛ ܘܕܲܠܵܐ ܢܲܦ̮̈ܫܵܬܲܢ ܡ̣ܢ ܟܝܼܡܘܿܢܹ̈ܐ ܕܲܚܛܝܼܬܼܵܐ؛ ܘܲܫܪܵܪܵܟܼ ܢܸܣܡܘܿܟܼ ܗܲܠ̈ܟܵܬܲܢ ܒܲܫܒܼܝܼܠܹ̈ܐ ܕܙܲܕܝܼܩܘܼܬܼܵܐ ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ ܡܲܙܡܘܿܪܵܐ.

ܐܲܠܵܗܵܐ ܦܲܨܵܢܝ ܡܵܪܝܵܐ ܠܥܘܼܕܼܪܵܢܝ ܟܲܬܲܪ. ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ. ܐܲܠܵܗܵܐ ܦܲܨܵܢܝ ܡܵܪܝܵܐ ܠܥܘܼܕܼܪܵܢܝ ܟܲܬܲܪ* ܢܸܒܼܗ̱ܬܼܘܼܢ ܘܢܸܚܦِܪܘܼܢ ܐܲܝܠܹܝܢ ܕܒܼܵܥܹܝܢ ܠܢܲܦ̮ܫܝ* ܢܸܗܦܟܼܘܼܢ ܠܒܸܣܬܲܪܗܘܿܢ ܘܢܸܚܦܪܘܿܢ* ܐܲܝܠܹܝܢ ܕܨܵܒܹ݁ܝܢ ܠܒܼܝܼܫܬܿܝ* ܢܸܬܼܡ̱ܗܘܿܢ ܒܬܸܢܝܸܐ ܕܒܸܗܬܲܬܼܗܘܿܢ.* ܐܲܝܠܹܝܢ ܕܐܸܡܲܪܘ ܥܠܲܝ ܐܹܗܹܐ ܐܹܗܹܐ* ܢܸܚܕܿܘܿܢ ܒܵܟܼ ܟܠ ܕܒܼܵܥܹܝܢ ܠܵܟܼ* ܘܢܹܐܡܪܘܼܢ ܒܟܼܠܙܒܲܢ ܕܪܲܒܿܘܼ ܐܲܠܵܗܵܐ* ܐܲܝܠܹܝܢ ܕܪܵܚܡܿܝܼܢ ܦܘܼܪܩܵܢܵܟܼ* ܘܐܸܢܵܐ ܡܸܣܟܹܿܢܵܐ ܐََܢܵܐ ܘܒܼܵܝܫܵܐ* ܐܲܠܵܗܵܐ ܟܲܬܲܪ ܠܝܼ* ܡܥܲܕܿܪܵܢܝ ܐܲܢَܬܿ ܘܲܡܦܲܨܝܵܢܝ ܡܵܪܝܵܐ ܠܵܐ ܬܲܘܚܲܪ* ܫܲܒܲܚ* ܥܵܠܲܡ* ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ.

ܘܐܵܡܲܲܪ ܡܫܲܡܫܵܢܵܐ؛ ܢܨܲܠܹܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܨܠܘܿܬܲܢ ܡܵܪܝ ܬܸܒܼܣܲܡ ܠܵܟܼ؛ ܘܒܼܵܥܘܼܬܲܢ ܬܸܥܘܿܠ ܩܘܼܕܼܡܲܝܟ. ܘܡ̣ܢ ܒܹܝܬܼ ܓܲܙܹܗ ܪܲܒܵܐ ܕܲܚܢܵܢܵܟܼ ܢܸܬܼܦܲܢ̈ܝܵܢ ܫܹܐ̈ܠܵܬܼܵܐ ܠܲܣܢܝܼܩܘܼܬܲܢ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ ܥܘܿܢ̈ܝܵܬܼܵܐ.

ܒܩܵܠ؛ ܐܲܠܵܗܵܐ ܡܸܠܬܼܵܐ.

ܣܪ̈ܝܼ ܘܐܸܬܼܡ̱ܣ̈ܝܼ ܚܒܼܵܪ̈ܵܬܼܝ܀ ܐܲܝܡܸܟܵܐ ܢܹܐܬܸܐ ܡܥܲܕܿܪܵܢܝ. ܐܲܝ݁ܢܵܘ ܐܵܣ݁ܝܵܐ ܕܠܲܚܒܼܵܪ̈ܵܬܼܝ ܟܲܣ̈ܝܵܬܼܵܐ ܢܕܲܟܸܿܐ. ܐܵܘ ܡܸܫܟܲܚ ܕܢܲܐܣܸܐ ܘܲܕܼܢܸܣܥܘܿܪ. ܐܵܘ ܡܲܢ̣ܘܼ ܡܨܸܐ ܕܲܢܦܲܨܹܝܢܝ ܡ̣ܢ ܢܘܼܪܵܐ ܩܵܥ݁ܝܵܐ ܗَܘ̣ܵܬܼ ܙܵܢܝܼܬܼܵܐ. ܐܸܫܪܸܐ ܐܸܢܘܿܢ ܠܲܓܼܕܘܼܠܹ̈ܐ ܕܲܚܛܝܼܬܼܵܐ. ܘܲܠܘܵܬܼܝ ܡܵܪܵܐ ܘܦܵܪܘܿܩܵܐ ܐܸܬܼܩܲܪܲܒܼ. ܠܡܵܟܼܣܵܐ ܓܹܝܪ ܠܵܐ ܫ̣ܕܼܵܝܗܝ ܡ̣ܢ ܩܘܼܕܼܡܵܘܗܝ. ܘܲܠܫܵܡܪܵܝܬܵܐ ܒܡܲܡܠܠܹܗ ܬܘܼܒܼ ܐܲܦ̣ܢܝܼ. ܒܡܸܠܬܹܗ ܠܲܟܼܢܲܥܢܵܝܬܵܐ ܝܲܗَ̣ܒܼ ܠܵܗ݁ ܐܵܣ݁ܝܘܼܬܼܵܐ. ܘܲܒܼܡܸܠܬܼܵܐ ܕܪ̈ܲܚܡܵܘܗܝ ܠܙܵܢܝܼܬܼܵܐ ܚܲܪܲܪ ܡ̣ܢ ܚܵܘܒܹܿܝ̈ܗ݁. ܘܲܒܼܣܸܦܪܵܐ ܕܚܲܝܹ̈ܐ ܥܲܡ ܒܬܼܘܼ̈ܠܵܬܼܵܐ ܙܲܡ̣ܢܵܗ݁. ܘܥܲܡ ܗܵܠܹܝܢ ܐܵܡ݁ܪܵܐ ܗَ̣ܝ ܢܲܦ̮ܫܝ ܒܟܼܠܥܸܕܵܢ. ܡܒܲܪܲܟܼ ܗَܘ̣ ܡܫܝܼܚܵܐ ܦܵܪܘܿܩܲܢ܀ ܬܢܝܼ‌܀ ܡܵܪܝܵܐ ܒܨܲܝܬܵܢ̣ܝ ܘܝܼܕܲܥ̣ܬܵܢܝ. ܡܵܪܝܵܐ ܝܼܕܲܥ̣ܬܿ ܠܐܲܝܠܹܝܢ ܕܲܣܢܝܼܩܝܼܢ ܥܲܠ ܚܘܼܠܡܵܢܵܐ ܐܵܣ݁ܝܵܐ ܛܵܒܼܵܐ ܕܢܲܦ̮̈ܫܵܬܲܢ. ܕܠܲܟܼܪ̈ܝܼܗܹܐ ܘܡܲܪ̈ܥܹܐ ܩ̣ܪܲܝܬܿ ܘܐܲܦܢܝܼܬܿ ܡ̣ܢ ܩܕܼܵܡ ܐܲܝܠܹܝܢ ܕܲܚܠܝܼܡܝܼܢ. ܠܵܘ ܕܲܒܼܙܲܕܿܝܼܩܹ̈ܐ ܡܲܗܡܸܐ ܐܲܢَܬܿ. ܐܸܠܵܐ ܠܚܲܛܵܝܹ̈ܐ ܚܵܐܹ݁ܢ ܐܲܢَܬܿ. ܘܐܸܢܵܐ ܕܐܝܼܬܲܝ ܩܲܕܼܡܵܝܵܐ ܡܸܬܼܟܲܫܲܦ ܐَܢܵܐ. ܕܥܲܡ ܗܵܢ݁ܘܿܢ ܕܒܲܚܕܼܵܥܸܣܪܹ̈ܐ ܫܵܥܝܼ̈ܢ ܥܲܠ̣ܘ ܠܟܲܪܡܵܟܼ ܐܸܬܼܡ̱ܢܸܐ. ܘܐܸܫܘܸܐ ܠܡܵܘܗܲܒܼܬܼܵܟܼ ܪܵܚܹ݁ܡܢܵܫܵܐ܀ ܡܲܐܣܸܐ ܠܲܬܼܒܼܝܼܪ̈ܲܝ ܠܸܒܵܐ ܘܥܵܨܹ݁ܒܼ ܟܹܐܒܲܝ̈ܗܘܿܢ. ܣܲܡܵܐ ܕܲܬܼܝܵܒܼܘܼܬܵܐ ܝܲܗَ̣ܒܼ ܗَܘ̣ܵܐ ܡܵܪܲܢ. ܠܐܵܣܵܘ̈ܵܬܼܵܐ ܡܗܝܼܪܹ̈ܐ ܕܐܝܼܬܲܝܗܘܿܢ ܟܵܗ̈ܢܹܐ ܕܥܹܕܬܵܐ. ܘܐܲܝܢܵܐ ܕܲܡܚ̣ܵܝܗܝ ܣܵܛܵܢܵܐ ܒܟܹܐܒܹ̈ܐ ܕܥܵܘ̣ܠܵܐ. ܢܹܐܬܹܐ ܢܚܵܘܹܐ ܚܒܼܵܪ̈ܵܬܹܗ. ܠܬܲܠܡܝܼܕܼܵܘ̈ܗܝ ܕܐܵܣ݁ܝܵܐ ܚܲܟܿܝܼܡܵܐ. ܘܗܸܢ̣ܘܿܢ ܡܲܐܣܹܝܢ ܠܹܗ ܒܣܲܡܵܐ ܪܘܼܚܵܢܵܐ܀ ܫܲܒܲܚ. (ܒܲܟܼܪܝܼܗܢܵܐ ܒܲܚ̈ܛܵܗܲܝ). ܡܫܝܼܚܵܐ ܐܵܣ݁ܝܵܐ ܫܲܪܝܼܪܵܐ ܕܐܲܣ̣ܝܼ ܒܡܸܠܬܹܗ ܟܹܐܒܼܵܘ̈ܗܝ ܕܲܟܼܝܵܢܲܢ. ܐܲܣܵܐ ܡܘܼܡܲܝ̈ܢ ܒܲܚܢܵܢܵܟܼ ܘܲܥܨܘܿܒܼ ܟܹܐܒܲܝ̈ܢ. ܘܐܲܚܠܸܡ ܒܪ̈ܲܚܡܲܝܟ ܟܪܝܼܗܘܼܬܲܢ. ܘܲܒܼܛܲܝܒܿܘܼܬܵܟܼ ܚܲܝܸܠ ܡܚܝܼܠܘܼܬܲܢ܀ ܥܲܠܵܡ. ܡܵܪܝܵܐ ܫܲܕܲܪ ܠܐܹܫܲܥܝܵܐ ܠܘܵܬܼ ܚܹܙܲܩܝܵܐ ܡܲܠܟܵܐ ܘܐܸܡܲܪ ܠܹܗ. ܙܸܠ ܐܲܩܝܼܡܲܝܗܝ ܠܚܹܙܲܩܝܵܐ ܡ̣ܢ ܟܘܼܪܗܵܢܹܗ. ܫܲܕܲܪ ܡܲܠܲܐܟܼܵܐ ܕܪ̈ܲܚܡܲܝܟ. ܕܢܲܐܣܸܐ ܟܹܐܒܲܝ̈ܢ ܘܢܸܥܨܘܿܒܼ ܟܘܼܪ̈ܗܵܢܲܝܢ܀

ܨܠܘܿܬܼܵܐ. ܚܘܼܣ ܥܠܲܝܢ ܐܲܢَܬܿ ܚܲܢܵܢܵܐ ܒܛܲܝܒܿܘܼܬܼܵܟܼ. ܘܐܸܬܼܦܲܢ ܥܠܲܝܢ ܡܠܸܐ ܪ̈ܲܚܡܹܐ؛ ܘܠܵܐ ܬܲܗܡܸܐ ܚܝܵܪܵܟܼ ܘܲܒܼܛܝܼܠܘܼܬܼܵܟܼ ܡܸܢܲܢ. ܕܲܥܠܲܝܟܿܘܼ ܣܲܒܼܪܲܢ ܘܬܼܘܼܟܼܠܵܢܲܢ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܪܝܼܢ ܚܠܵܦ ܩܵܢܘܿܢܵܐ؛

(ܟܲܕܼ ܡܲܩܦܝܼܢ ܠܹܗ ܦܸܬܼܓܼܵܡ ܦܸܬܼܓܼܵܡ).

ܝܵܬܹܿܒܼ ܒܣܸܬܵܪܹܗ ܕܲܡܪܲܝܡܵܐ. ܣܲܬܲܪܲܝܢܝ ܐܲܠܵܗܵܐ܋ ܘܲܒܼܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܐܸܡܲܪ ܠܡܵܪܝܵܐ ܬܘܼܟܼܠܵܢܝ. ܣܲܬܲܪܲܝܢܝ ܐܲܠܵܗܵܐ܋ ܒܹܝܬܼ ܓܵܘܣܝ ܐܲܠܵܗܵܐ ܕܲܬܼܟܼܝܼܠ ܐَܢܵܐ ܥܠܵܘܗܝ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܕܗ̤ܘ ܢܦܲܨܹܝܟܼ ܡ̣ܢ ܦܲܚܵܐ ܕܬܼܘܼܩܠ̱ܬܼܵܐ. ܣܲܬܲܪܲܝܢܝ ܐܲܠܵܗܵܐ܋ ܘܡ̣ܢ ܡܲܡܠ̱ܠܵܐ ܕܲܣܪܝܼܩܘܼܬܼܵܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܒܐܸܒܼܪ̈ܵܘܗܝ ܢܦܲܨܹܝܟܼ ܘܲܬܼܚܘܿܬܼ ܟܸܢܦܵܘ̈ܗܝ ܬܸܣܬܲܬܲܪ. ܣܲܬܲܪܲܝܢܝ ܐܲܠܵܗܵܐ܋ ܙܲܝܢܵܐ ܢܸܚܕܿܪܵܟܼ ܩܘܼܫܬܹ݁ܗ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܠܵܐ ܬܸܕܼܚܲܠ ܡ̣ܢ ܕܸܚܠ̱ܬܹܗ ܕܠܸܠܝܵܐ. ܣܲܬܲܪܲܝܢܝ ܐܲܠܵܗܵܐ܋ ܘܡ̣ܢ ܓܹܪܵܐ ܕܦܵܪܲܚ ܒܐܝܼܡܵܡܵܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܘܡ̣ܢ ܡܸܠܬܼܵܐ ܕܲܡܗܲܠܟܼܵܐ ܒܚܸܫܘܿܟܼܵܐ. ܣܲܬܲܪܲܝܢܝ ܐܲܠܵܗܵܐ܋ ܘܡ̣ܢ ܪܘܼܚܵܐ ܕܫܵܝܕܵܐ ܒܛܲܗܪܵܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܢܸܦܠܘܼܢ ܡ̣ܢ ܣܸܛܪܵܟܼ ܐܲܠܦܹ̈ܐ. ܣܲܬܲܪܲܝܢܝ ܐܲܠܵܗܵܐ܋ ܘܪܸ̈ܒܿܘܵܬܼܵܐ ܡ̣ܢ ܝܲܡܝܼܢܵܟܼ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܘܲܠܘܵܬܼܵܟܼ ܠܵܐ ܢܸܬܼܩܲܪܒܼܘܼܢ. ܣܲܬܲܪܲܝܢܝ ܐܲܠܵܗܵܐ܋ ܐܸܠܵܐ ܒܥܲܝܢܲܝ̈ܟ ܒܲܠܚܘܿܕܼ ܬܸܚܙܸܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܒܦܘܼܪܥܵܢܗܘܿܢ ܕܪ̈ܲܫܝܼܥܹܐ ܬܸܚܙܸܐ. ܣܲܬܲܪܲܝܢܝ ܐܲܠܵܗܵܐ܋ ܡܸܛܠ ܕܐܲܢَܬ݁ܘܼ ܡܵܪܝܵܐ ܬܘܼܟܼܠܵܢܝ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܕܒܲܡܪܵܘܡܵܐ ܣܵܡܬܿ ܡܲܥܡ̱ܪܵܟܼ. ܣܲܬܲܪܲܝܢܝ ܐܲܠܵܗܵܐ܋ ܠܵܐ ܬܸܩܪܘܿܒܼ ܠܵܟܼ ܒܝܼܫܬܵܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܘܲܡܚܘܿܬܼܵܐ ܠܵܐ ܬܸܬܼܩܲܪܲܒܼ ܠܡܲܫܟܿܢܵܟܼ. ܣܲܬܲܪܲܝܢܝ ܐܲܠܵܗܵܐ܋ ܡܸܛܠ ܕܲܠܡܲܠܲܐܟܼܵܘܗ̈ܝ ܢܦܲܩܸܕܼ ܥܠܲܝܟ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܕܲܢܢܲܛܪܘܼܢܵܟܼ ܒܟܼܠܗܹܝܢ ܐܘܼܪ̈ܚܵܬܼܵܟܼ. ܣܲܬܲܪܲܝܢܝ ܐܲܠܵܗܵܐ܋ ܘܥܲܠ ܕܪ̈ܵܥܲܝܗܘܿܢ ܢܸܫܩܠܘܼܢܵܟܼ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܕܠܵܐ ܬܸܬܿܩܸܠ ܒܪܸܓܼܠܵܟܼ. ܣܲܬܲܪܲܝܢܝ ܐܲܠܵܗܵܐ܋ ܥܲܠ ܓܵܪܣܵܐ ܘܥܲܠ ܚܲܪܡܵܢܵܐ ܬܸܕܼܪܘܿܟܼ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܘܲܬܿܕܼܘܼܫ ܐܲܪܝܵܐ ܘܬܲܢܝܼܢܵܐ. ܣܲܬܲܪܲܝܢܝ ܐܲܠܵܗܵܐ܋ ܡܸܛܠ ܕܠܝܼ ܒܥ̣ܵܐ ܐܹܦܲܨܹܝܘܗܝ ܘܐܹܥܲܫܢܝܼܘܗܝ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܡܸܛܠ ܕܝܼܕܲܥ ܫܹܡܝ ܢܸܩܪܹܝܢܝ ܘܐܸܥܢܹܝܘܗܝ. ܣܲܬܲܪܲܝܢܝ ܐܲܠܵܗܵܐ܋ ܥܲܡܹܗ ܐَܢܵܐ ܒܐܘܼܠܨܵܢܵܐ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܐܹܥܲܫܢܝܼܘܗܝ ܘܐܹܝܲܩܪܝܼܘܗܝ. ܣܲܬܲܪܲܝܢܝ ܐܲܠܵܗܵܐ܋ ܢܘܼܓܼܪܵܐ ܕܝܵܘ̈ܡܵܬܼܵܐ ܐܹܣܲܒܿܥܝܼܘܗܝ ܘܐܹܚܵܘܹܝܗܝ ܦܘܼܪܩܵܢܝ. ܡ̣ܢ ܒܝܼܫܵܐ ܘܚܲܝܠܵܘܵܬܹ̈ܗ܋ ܫܲܒܲܚ. ܣܲܬܲܪܲܝܢܝ ܐܲܠܵܗܵܐ܋ ܥܵܠܲܡ. ܡ̣ܢ ܒܝܼܫܵܐ ܘܚܲܝ̈ܠܵܘܵܬܹܗ܋

ܬܸܫܒܿܘܿܚܬܵܐ.

ܡܫܝܼܚܵܐ ܕܠܵܐ ܡܲܗܡܸܐ ܡ̣ܢ ܟܠ ܕܩܵܪܹܝܢ ܠܹܗ؛ ܒܪ̈ܲܚܡܲܝܟ ܠܵܐ ܬܲܣܠܸܐ ܒܵܥܘܼܬܼ ܣܵܓܼܘܿܕܲܝ̈ܟ‌܀ ܡܫܝܼܚܵܐ ܕܠܵܐ ܡܲܗܡܸܐ ܡ̣ܢ ܟܠ ܕܩܵܪܹܝܢ ܠܹܗ؛ ܒܪ̈ܲܚܡܲܝܟ ܠܵܐ ܬܲܣܠܸܐ ܒܵܥܘܼܬܼ ܣܵܓܼܘܿܕܲܝ̈ܟ‌܀ ܐܵܣ݁ܝܵܐ ܚܲܟܿܝܼܡܵܐ ܕܡܲܐܣܸܐ ܟܠ ܡܲܚ̈ܘܵܢ؛ ܐܲܣܵܐ ܡܵܪܝ ܒܪ̈ܲܚܡܲܝܟ ܠܥܲܒܼܕܵܟܼ ܕܣܲܟܸܿܐ ܠܵܟܼ‌(ܐܵܘ؛ ܠܐܲܡܬܼܵܟܼ ܕܣܵܟܿܝܵܐ ܠܵܟܼ)܀

ܟܵܪܘܿܙܘܼܬܼܵܐ.

ܐܲܠܵܗܲܢ ܣܲܓܿܝܼ ܪ̈ܲܚܡܹܐ ܗ̇ܘ ܕܲܡܙܲܕܸܿܩ ܡܲܓܵܢ ܠܚܲܛܵܝܹ̈ܐ؛ ܒܵܥܹܝܢܲܢ ܡܸܢܵܟܼ‌܀ ܪܵܥܝܵܐ ܛܵܒܼܵܐ ܕܲܢܦܲܩ ܒܲܒܼܥܵܬܹܗ ܕܓܸܢܣܲܢ ܘܐܲܫܠܸܡ ܢܲܦ̮ܫܹܗ ܥܲܠ ܐܲܦܲܝ̈ܢ؛ ܒܵܥܹܝܢܲܢ ܡܸܢܵܟܼ‌܀ ܐܵܣܝܹܗ ܕܲܟܼܝܵܢܲܢ ܕܐܸܬܼܵܐ ܘܐܸܬܼܓܼܠܝܼ ܒܲܒܼܣܲܪ ܘܚܲܣܝܼ ܚܵܘܒܵـ̈ـܬܲܢ ܘܐܲܣ̣ܝܼ ܚܒܼܵܪ̈ܵܬܲܢ؛ ܒܵܥܹܝܢܲܢ ܡܸܢܵܟܼ‌܀ ܕܲܝܵܢܵܐ ܕܩܘܼܫܬܵܐ ܕܠܵܐ ܪܵܓܹ݁ܙ ܟܠܝܘܿܡ ܐܸܠܵܐ ܡܲܓܲܪ ܪܘܼܚܹܗ ܥܠܲܝܢ ܘܥܲܠ ܣܲܒܼܪܵܐ ܕܲܬܼܝܵܒܼܘܼܬܲܢ: ܒܵܥܹܝܢܲܢ ܡܸܢܵܟܼ‌܀ ܡܵܪܵܐ ܕܲܠܬܲܝܵܒܹ̈ܐ ܐܲܩܢܝܼ ܣܲܒܼܪܵܐ ܘܠܘܼܒܵܒܼܵܐ ܒܡܵܟܼܣܹ̈ܐ ܘܙܵܢ̈ܝܵܬܼܵܐ ܕܩܲܒܸ̇ܠ ܘܚܲܣܝܼ؛ ܒܵܥܹܝܢܲܢ ܡܸܢܵܟܼ‌܀ ܥܲܠ ܚܘܼܠܡܵܢܵܐ‌...܀ ܐܲܠܵܗܵܐ ܡܪܲܚܡܵܢܵܐ‌...܀ ܗ̇ܘ ܕܒܲܫܡܲܝܵܐ...܀ ܥܲܠ ܚܲܛܵܝܹ̈ܐ ܕܲܢܬܼܘܼܒܼܘܼܢ ܘܬܲܝܵܒܹ̈ܐ ܕܢܸܙܕܲܕܿܩܘܼܢ ܘܙܲܕܿܝܼܩܹ̈ܐ ܕܢܸܬܼܓܲܡܪܘܼܢ؛ ܒܵܥܹܝܢܲܢ ܡܸܢܵܟܼ‌܀ ܚܘܼܢܲܝܢ ܘܚܲܣܵܐ ܚܵܘ̈ܒܵܬܲܢ ܒܛܲܝܒܿܘܼܬܼܵܟܼ؛ ܘܐܲܫܦܲܥ ܚܢܵܢܵܟܼ ܥܲܠ ܢܲܦ̮̈ܫܵܬܲܢ ܘܐܸܬܼܪܲܥܵܐ ܠܟܼܠܲܢ: ܘܐܸܬܼܪܲܚܡܥܠܲܝܢ‌܀

ܘܟܸܢ؛ ܐܲܪܝܼܡܘ ܩܵܠܟܼܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܩܲܕܝܼܫܵܐ ܐܲܠܵܗܵܐ؛ ܩܲܕܝܼܫܵܐ ܚܲܝܠ̱ܬܼܵܢܵܐ؛ ܩܲܕܝܼܫܵܐ ܠܵܐ ܡܵܝܘܿܬܵܐ؛ ܐܸܬܼܪܲܚܲܡܥܠܲܝܢ‌܀ ܫܲܒܲܚ. ܩܲܕܝܼܫܵܐ ܐܲܠܵܗܵܐ. ܥܵܠܲܡ. ܘܩܲܕܝܼܫܵܐ ܐܲܠܵܗܵܐ.

ܨܠܘܿܬܼܵܐ. ܦܵܬܲܚ ܬܲܪܥܹܗ ܠܲܕܢܵܩܫܝܼܢ ܒܹܗ؛ ܡܦܲܢܸܐ ܫܹ̈ܐܠܵܬܼܵܐ ܠܲܕܫܵܐܠܝܼܢ ܠܹܗ. ܦܬܲܚܠܵܗ݁ ܡܵܪܲܢ ܘܐܲܠܵܗܲܢ ܬܲܪܥܵܐ ܕܪ̈ܲܚܡܹܐ ܠܲܨܠܘܿܬܲܢ ܘܩܲܒܸܿܠܹܝܗ݁ ܠܒܼܵܥܘܼܬܲܢ؛ ܘܦܲܢܵܐ ܒܪ̈ܲܚܡܲܝܟ ܫܹ̈ܐܠܵܬܲܢ ܡ̣ܢ ܒܹܝܬܼ ܓܲܙܵܟܼ ܥܲܬܿܝܼܪܵܐ ܘܲܫܦܝܼܥܵܐ؛ ܛܵܒܼܵܐ ܕܠܵܐ ܟܵܠܹܐ ܪ̈ܲܚܡܵܘܗܝ ܘܡܵܘܗ̈ܒܼܵܬܹܗ؛ ܡ̣ܢ ܣܢܝܼܩܹ̈ܐ ܘܐܲܠܝܼ̈ܨܹܐ ܥܲܒܼܕܵܘܗ̈ܝ ܕܩܵܪܹܝܢ ܘܡܸܬܼܟܲܫܦܝܼܢ ܠܹܗ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܚܵܬܼܵܗ݁. ܫܵܡܲܥ ܒܩܵܠܵܐ ܕܟܹܐܢܹ̈ܐ ܘܲܕܼܙܲܕܝܼܩܹ̈ܐ ܕܲܡܪܲܥܹܝܢ ܠܹܗ ܐܲܡܝܼܢܵܐܝܼܬܼ؛ ܘܥܵܒܹ݁ܕܼ ܨܸܒܼܝܵܢܵܐ ܕܕܼܵܚܠܵܘܗ̈ܝ؛ ܫܡܲܥ ܡܵܪܝ ܨܠܘܿܬܼܵܐ ܕܥܲܒܼܕܲܝ̈ܟ ܒܲܚܢܵܢܵܟܼ؛ ܘܩܲܒܸܿܠ ܒܵܥܘܼܬܼܵܐ ܕܣܵܓܼܘܿܕܲܝ̈ܟ ܒܲܡܪܲܚܡܵܢܘܼܬܼܵܟܼ؛ ܘܚܘܼܢ ܠܐܲܠܝܼܨܹ̈ܐ ܘܠܲܡܛܲܪ̈ܦܹܐ ܥܲܒܼܕܲܝ̈ܟ ܕܩܵܪܹܝܢ ܘܡܸܬܼܟܲܫܦܝܼܢ ܠܵܟܼ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܗܵܪܟܵܐ ܩܵܪܹܐ ܥܠܵܘܗܝ ܩܸܪܝܵܢܵܐ ܗܵܢܵܐ ܡ̣ܢ ܐܹܘܲܢܓܲܠܝܼܘܿܢ؛

ܐܹܘܲܢܓܲܠܝܼܘܿܢ ܩܲܕܝܼܫܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܟܵܪܘܿܙܘܼܬܼܵܐ ܕܝܘܿܚܲܢܵܢ.

܀ ܒܪܵܫܝܼܬܼ ܐܝܼܬܼܵܘܗܝ ܗَܘ̣ܵܐ ܡܸܠܬܼܵܐ؛ ܘܗ̤ܘ ܡܸܠܬܼܵܐ ܐܝܼܬܼܵܘܗܝ ܗَܘ̣ܵܐ ܠܘܵܬܼ ܐܲܠܵܗܵܐ؛ ܘܐܲܠܵܗܵܐ ܐܝܼܬܼܵܘܗܝ ܗَܘ̣ܵܐ ܗ̤ܘ ܡܸܠܬܼܵܐ܋ ܗܵܢܵܐ ܐܝܼܬܼܵܘܗܝ ܗَܘ̣ܵܐ ܒܪܵܫܝܼܬܼ ܠܘܵܬܼ ܐܲܠܵܗܵܐ܋ ܟܠ ܒܐܝܼܕܹܗ ܗܘ̤ܵܐ؛ ܘܒܸܠܥܵܕܼܵܘܗܝ ܐܵܦܠܵܐ ܗܘ̤ܵܬܼ ܡܸܕܸܿܡ ܕܲܗܘ̤ܵܐ܋ ܒܹܗ ܚܲܝܹ̈ܐ ܗܘ̤ܵܐ ܘܚܲܝܹ̈ܐ ܐܝܼܬܲܝܗܘܿܢ ܢܘܼܗܪܵܐ ܕܲܒܼܢܲܝ̈ ܐَܢܵܫܵܐ܋ ܘܗ̤ܘ ܢܘܼܗܪܹܗ ܒܚܸܫܘܿܟܼܵܐ ܡܲܢܗܲܪ ܘܚܸܫܘܿܟܼܵܐ ܠܵܐ ܐܲܕܪِܟܹܗ܋ [ܝܘܿܚܲܢܵܢ ܐ؛1-5]

ܘܟܸܢ ܩܲܪܸܒܼ ܟܵܗܢܵܐ ܠܐܲܝܢܵܐ ܕܲܟܼܪܝܼܗ؛ ܘܣܵܐܹ݁ܡ ܝܲܡܝܼܢܹܗ ܥܲܠ ܪܹܫܹܐ ܘܐܵܡܲܪ؛ ܐܲܠܵܗܵܐ ܝܵܗܘܿܒܼܵܐ ܕܟܼܠܵܗ݁ ܐܵܣܝܘܼܬܼܵܐ ܘܲܡܫܲܟܿܢܵܢܵܐ ܕܟܼܠܗܹܝܢ ܛܵܒܼܵܬܼ̈ܵܐ. ܗ݁ܘ ܕܲܒܼܟܼܠܙܒܲܢ ܒܛܝܼܠ ܠܹܗ ܥܲܠ ܓܸܢܣܵܐ ܕܐَܢܵܫܘܼܬܼܵܐ؛ ܘܠܵܐ ܟܵܠܹܐ ܡܸܢܲܢ ܥܘܼܕܼܪ̈ܵܢܵܘܗܝ. ܗ̤ܘ ܢܲܓܸܿܢ ܥܠܲܝܟ (ܥܠܲܝܟܿܝ) ܝܲܡܝܼܢܵܐ ܕܲܡܪܲܚܡܵܢܘܼܬܹܗ؛ ܘܢܸܕܼܚܘܿܩ ܡܸܢܵܟܼ (ܡܸܢܹܟܼܝ) ܡܲܪܥܵܐ ܘܟܼܘܼܪܗܵܢܵܐ ܘܢܸܟܼܝܵܢܹ̈ܐ ܘܣܵܩܘܿܒܼܠܹ̈ܐ. ܘܲܢܫܲܟܸܿܢ ܠܵܟܼ (ܠܹܟܼܝ) ܚܲܝܹ̈ܐ ܛܵܒܹ̈ܐ ܘܚܘܼܠܡܵܢܵܐ ܘܐܵܣܝܘܼܬܼܵܐ ܕܦܲܓܼܪܵܐ ܘܢܲܦ̮ܫܵܐ. ܘܬܸܦܪܘܿܥ (ܘܬܸܦܪܘܿܥܝ) ܫܘܼܒܼܚܵܐ ܘܬܼܵܘܕܝܼܬܼܵܐ ܠܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܠܹܗ ܠܲܟܼܪܝܼܗܵܐ ܒܹܝܬܼ ܥܲܝܢܵܘܗ̈ܝ ܒܡܸܫܚܵܐ ܕܲܨܠܘܿܬܼܵܐ، ܐܵܘܟܹܿܝܬܼ ܕܲܟܼܪ̈ܝܼܗܹܐ.

ܘܲܢܒܲܝܲܐ ܠܹܗ ܟܵܗܢܵܐ ܠܐܲܝܢܵܐ ܕܲܟܼܪܝܼܗ ܕܲܢܗܲܝܡܸܢ ܘܢܸܒܼܥܸܐ ܒܬܲܚܢܲܢܬܵܐ ܠܘܵܬܼ ܡܵܪܵܐ ܡܪܲܚܡܵܢܵܐ ܕܢܸܬܸܿܠ ܠܹܗ ܚܘܼܠܡܵܢܵܐ ܘܐܵܣܝܘܼܬܼܵܐ ܕܲܦܓܲܪ ܘܲܕܼܪܘܼܚ؛ ܟܲܕܼ ܠܵܐ ܢܸܦܣܘܿܩ ܣܲܒܼܪܹܗ ܕܥܲܠ ܐܲܠܵܗܵܐ.

ܫܠܸܡ ܒܥܘܼܕܼܪܵܢ ܡܵܪܲܢ.

♱♱♱♱♱♱♱♱♱♱♱♱

ܨܠܘܿܬܼܵܐ ܥܲܠ ܡ݁ܢ ܕܡܸܬܼܢܲܣܸܐ ܡ̣ܢ ܕܲܝܘܵܐ.

ܐܵܣܝܵܐ ܕܟܼܠ ܟܹܐܒܼܝܼ̈ܢ ܘܥܵܨܘܿܒܼܵܐ ܕܟܼܠ ܡܲܚ̈ܘܵܢ. ܐܲܣܵܐ ܡܵܪܝ ܠܥܲܒܼܕܵܟܼ ܗܵܢܵܐ ܡܼܢ ܡܚܘܿܬܹܗ ܕܲܒܼܥܸܠܕܲܪܵܐ؛ ܘܐܲܝܟܼ ܕܛܸܪܕܲܬ̤ ܛܲܝܒܿܘܼܬܼܵܟܼ ܠܠܸܓܼܝܘܿܢ ܡܼܢ ܗܿܘ ܕܲܒܼܒܹܝܬܼ ܩܒܼܘܼܪܹ̈ܐ ܥܵܡܲܪ ܗَܼܘܵܐ ܘܲܒܼܝܲܡܵܐ ܐܲܪܡܼܝܼܬܿ ܣܚܲܦܬܵܝܗܝ؛ ܘܲܥܒܲܕܬܿ ܪܘܲܚܬܵܐ ܠܥܲܒܼܕܵܟܼ؛ ܗܵܟܲܢܵܐ ܡܵܪܝ ܐܵܦ ܡܼܢ ܥܲܒܼܕܵܟܼ ܗܵܢܵܐ؛ ܢܸܪܕܦܝܼܘܗܝ ܚܲܝܠܵܟܼ ܘܢܸܥܩܪܝܼܘܗܝ ܨܸܒܼܝܵܢܵܟܼ. ܘܢܸܗܘܸܐ ܠܵܟܼ ܠܒܹܝܬܼ ܡܲܥܡܪܵܐ؛ ܘܢܸܬܼܪܫܸܡ ܒܢܝܼܫܹܗ ܚܲܝܵܐ ܕܲܨܠܝܼܒܼܵܟܼ ܘܢܸܛܥܲܢ ܢܝܼܪܵܟܼ ܒܣܝܼܡܵܐ؛ ܘܢܸܬܼܚܲܠܲܛ ܒܲܓܼܙܵܪܵܟܼ ܥܵܒܼܘܿܕܲܢ ܚܲܢܵܢܵܐ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܒܘܼܝܵܐܵܐ.

ܠܵܟܼ ܡܒܲܝܐܵܢܵܐ ܕܐܲܒܼܝܼܠܹ̈ܐ؛ ܘܡܲܦܨܚܵܢܵܐ ܕܲܟܼܡܝܼܪܹ̈ܐ؛ ܘܲܡܠܲܒܿܒܼܵܢܵܐ ܕܲܡ̈ܥܵܩܹܐ ܒܣܲܒܼܪܹܗ ܫܲܪܝܼܪܵܐ ܘܠܵܐ ܡܸܬܿܕܲܓܠܵܢܵܐ ܡܸܬܼܟܲܫܦܝܼܢܲܢ. ܐܲܥܒܲܪ ܡܵܪܲܢ ܘܐܲܠܵܗܲܢ ܟܲܪܝܘܼܬܼܵܐ ܕܥܲܒܼܕܲܝ̈ܟ ܒܲܚܢܵܢܵܟܼ؛ ܘܟܲܦܲܪ ܕܸܡܥ̱ܬܼܵܐ ܡ̣ܢ ܐܲܦܲܝ̈ܗܘܿܢ ܒܛܲܝܒܿܘܼܬܹܗ ܘܲܒܼܪ̈ܲܚܡܲܝܟ؛ ܡܵܪܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܲܠܡܝܼܢ.

♱♱♱♱♱♱♱

ܐَܚܪܹܬܼܵܐ ܕܒܘܼܝܵܐܵܐ.

ܒܲܝܲܐ ܡܵܪܲܢ ܘܐܲܠܵܗܲܢ ܠܥܲܡܵܟܼ ܕܐܲܒܼܝܼܠܝܼܢ؛ ܘܲܠܥܵܢ̈ܵܐ ܕܡܲܪܥܝܼܬܼܵܟܼ ܕܚܲܫܝܼܫܝܼܢ؛ ܘܗܲܒܼ ܠܗܘܿܢ ܪܘܲܚܬܼܵܐ ܡ̣ܢ ܥܵܩܵܬܼ̈ܗܘܿܢ ܕܲܡܛܲܪܦܝܼܢ؛ ܘܐܲܫܠܲܚ ܡܸܢܗܘܿܢ ܢܲܚܬܹ̈ܐ ܕܟܲܪܝܘܼܬܼܵܐ ܕܛܵܒܼ ܐܲܠܝܼܨܝܼܢ؛ ܘܐܲܠܒܸܿܫ ܐܸܢܘܿܢ ܢܲܚܬܹ̈ܐ ܪ̈ܓܼܝܼܓܹܐ ܕܒܼܘܼܝܵܐܵܐ ܕܛܵܒܼ ܟܡܝܼܪܝܼܢ؛ ܕܐܲܢَܬܿܘܼ ܡܒܲܝܐܵܢܵܐ ܕܕܼܵܚ̈ܠܲܝܟ ܒܟܼܠ ܐܘܼܠܨܵܢ̈ܝܼܢ؛ ܡܵܪܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܲܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܥܲܠ ܫܲܒܼܪܹ̈ܐ.

ܗܿܘ ܕܒܲܪܸܟܼ ܛܲܠܝܘܼܬܹܗ ܕܐܝܼܣܚܵܩ؛ ܘܲܢܒܲܥ ܡܸܢܹܗ ܡܘܼܠܟܵܢܵܐ ܕܚܲܝܹ̈ܐ ܒܥܵܠܡܵܐ ܗܵܢܵܐ ܘܲܚܙܵܘ ܠܓܼܵܘ ܡܸܢܹܗ ܢܝܼܫܵܐ ܕܦܘܼܪܩܵܢܵܐ. ܗ̤ܘ ܢܒܲܪܟܼܵܟܼ ܘܲܢܪܲܡܪܸܡ ܠܐܲܒܼܵܗܲܝ̈ܟ؛ ܘܲܢܚܲܕܸܐ ܐܸܢܘܿܢ ܒܬܲܪܒܿܝܼܬܼܵܟܼ ܘܲܒܼܢܸܒܼܥܵܐ ܕܚܸܟܼܡܬܼܵܟܼ؛ ܘܝܲܡܝܼܢܹܗ ܘܛܲܝܒܿܘܼܬܹܗ ܕܥܸܠܵܝܵܐ ܬܢܲܛܪܵܟܼ. ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܪܹܫܹܗ.

♱♱♱♱♱♱♱

ܐَܚܪܹܬܼܵܐ ܕܥܲܠ ܫܲܒܼܪܹ̈ܐ.

ܐܲܠܵܗܵܐ ܡܵܪܹܟܿܠ ܢܫܲܦܸܐ ܪܸܥܝܵܢܵܟܼ ܘܲܢܨܲܠܸܠ ܗܵܘܢܵܟܼ ܘܲܢܩܲܕܸܫ ܘܲܢܙܲܗܸܐ ܠܢܲܦ̮ܫܵܟܼ؛ ܘܢܸܬܸܿܠ ܠܵܟܼ ܕܲܟܼܝܘܼܬܼܵܐ ܕܠܸܒܵܐ ܘܫܲܦܝܘܼܬܼܵܐ ܕܚܘܼܫܵܒܹ̈ܐ ܕܲܡܪܲܥܹܝܢ ܠܡܵܪܘܼܬܹܗ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܪܹܫܹܗ.

♱♱♱♱♱♱♱

ܨܠܘܿܬܼܵܐ ܕܥܲܠ ܛܠܵܝܹ̈ܐ.

ܡܵܪܝܵܐ ܐܲܠܵܗܵܐ ܚܲܝܠ̱ܬܼܵܢܵܐ ܘܩܲܕܝܼܫܵܐ؛ ܗ݁ܘ ܕܪܲܒܿܝܼ ܛܲܠܝܘܼܬܹܗ ܕܝܑܼܣܚܲܩ ܘܒܲܪܟܹܗ ܘܥܲܒܼܕܹܗ ܦܹܐܪܵܐ ܕܒܼܘܼܪ̈ܟܵܬܼܵܐ ܒܡܘܼܠܟܵܢܹܗ؛ ܘܚܲܕܝܼ ܒܹܗ ܐܲܒܼܵܗܵܘ̈ܗܝ. ܘܐܲܣܓܿܝܼ ܙܲܪܥܹܗ ܐܲܝܟܼ ܟܵܘܟܿܒܹ̈ܐ ܕܒܲܪܩܝܼܥܵܐ ܘܚܵܠܵܐ ܕܝܲܡܵܐ. ܘܐܲܦ̣ܨܲܚ ܠܝܲܥܩܘܿܒܼ ܒܲܒܼܪܹܗ ܝܵܘܣܸܦ. ܒܵܥܹܝܢܲܢ ܡܸܢܵܟܼ ܘܡܸܬܼܟܲܫܦܝܼܢܲܢ ܠܵܟ؛ ܕܲܬܼܒܲܪܸܟܼ ܠܛܲܠܝܵܐ ܗܵܢܵܐ ܒܛܲܝܒܿܘܼܬܼܵܟܼ؛ ܘܢܸܬܼܪܲܒܹܐ ܒܚܘܼܠܡܵܢܵܐ ܘܲܒܼܚܸܟܼܡܬܼܵܟܼ. ܘܢܸܚܕܘܿܢ ܒܹܗ ܐܲܒܼܵܗܵܘܗ̈‌ܝ؛ ܘܢܸܗܘܸܐ ܠܗܘܿܢ ܣܵܡܟܼܵܐ ܒܣܲܝܒܿܘܼܬܼܗܘܿܢ؛ ܘܢܸܚܸܐ ܫܢܲܝ̈ܵܐ ܕܫܲܝܢܵܐ ܘܙܲܒܼܢܹ̈ܐ ܕܲܫܠܵܡܵܐ. ܘܒܲܒܼܛܝܼܠܘܼܬܼܵܟܼ ܢܸܬܼܪܲܒܸܐ ܬܲܪܒܿܝܼܬܼܵܐ ܛܵܒܼܬܼܵܐ؛ ܒܚܲܝܹ̈ܐ ܢܲܟܼܦܹ̈ܐ ܘܲܒܼܕܘܼܒܵܪܹ̈ܐ ܕܲܡܪܲܥܹܝܢ ܠܵܟܼ. ܘܢܸܬܼܢ̱ܛܲܪ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ. ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܪܹܫܹܗ. ܘܩܵܪܹܐ ܥܠܵܘܗܝ ܩܸܪܝܵܢܵܐ ܗܵܢܵܐ ܡ̣ܢ ܐܹܘܲܢܓܲܠܝܼܘܿܢ؛

ܐܹܘܲܢܓܲܠܝܼܘܿܢ ܩܲܕܝܼܫܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܟܵܪܘܿܙܘܼܬܼܵܐ ܕܡܲܬܲܝ.

܀ ܗܵܝܕܹܝܢ ܩܲܪܸܒܼܘ ܠܹܗ ܛܠܵܝܹ̈ܐ ܕܲܢܣܝܼܡ ܐܝܼܕܹܗ ܥܠܲܝܗܘܿܢ ܘܲܢܨܲܠܸܐ؛ ܘܲܟܼܐܵܘ ܒܗܘܿܢ ܬܲܠܡܝܼܕܼܵܘܗ̈ܝ. ܗ̤ܘ ܕܹܝܢ ܝܼܫܘܿܥ ܐܸܡ̣ܲܪ ܠܗܘܿܢ؛ ܫܒܼܘܿܩܘ ܛܠܵܝܹ̈ܐ ܐܵܬܹ݁ܝܢ ܠܘܵܬܼܝ ܘܠܵܐ ܬܸܟܼܠܘܿܢ ܐܸܢܘܿܢ؛ ܕܕܲܐܝܠܹܝܢ ܓܹܝܪ ܕܐܲܝܟܼ ܗܵܠܹܝܢ ܐܸܢܘܿܢ ܐܝܼܬܹܝܗ݁ ܡܲܠܟܿܘܼܬܼܵܐ ܕܲܫܡܲܝܵܐ. ܘܣܵܡ̣ ܐܝܼܕܹܗ ܥܠܲܝܗܘܿܢ ܘܐܸܙܲܠ ܡ̣ܢ ܬܲܡ݁ܢ܋ [ܡܲܬܲܝ ܝܛ؛13-15]

ܐܵܘ ܩܪܝܼ ܗܵܢܵܐ.

ܐܹܘܲܢܓܲܠܝܼܘܿܢ ܩܲܕܝܼܫܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܟܵܪܘܿܙܘܼܬܼܵܐ ܕܡܲܬܲܝ.

܀ ܒܗ݁‌ܝ ܫܵܥܬܼܵܐ ܩܪܸܒܼܘ ܬܲܠܡܝܼܕܹ̈ܐ ܠܘܵܬܼ ܝܼܫܘܿܥ ܘܐܵܡ݁ܪܝܼܢ؛ ܡܲܢܘܼ ܟܲܝ ܪܲܒܿ ܒܡܲܠܟܿܘܼܬܼܵܐ ܕܲܫܡܲܝܵܐ؟ ܘܲܩ̣ܪܵܐ ܝܼܫܘܿܥ ܛܲܠܝܵܐ؛ ܘܐܲܩܝܼܡܹܗ ܒܲܝܢܵܬܼܗܘܿܢ. ܘܐܸܡ̣ܲܪ؛ ܐܵܡܹܝܢ ܐܵܡܲـ̇ܪ ܐَܢܵܐ ܠܟܼܘܿܢ؛ ܕܐܸܢ ܠܵܐ ܬܸܬܼܗܲܦܟܿܘܼܢ ܘܬܸܗܘܘܿܢ ܐܲܝܟܼ ܛܠܵܝܹ̈ܐ؛ ܠܵܐ ܬܸܥܠܘܼܢ ܠܡܲܠܟܿܘܼܬܼܵܐ ܕܲܫܡܲܝܵܐ. ܡ݁ܢ ܗܵܟܹܝܠ ܕܲܡܡܲܟܸܟܼ ܢܲܦ̮ܫܹܗ ܐܲܝܟܼ ܗܵܢܵܐ ܛܲܠܝܵܐ؛ ܗ̤ܘ ܢܸܗܘܸܐ ܪܲܒܿ ܒܡܲܠܟܿܘܼܬܼܵܐ ܕܲܫܡܲܝܵܐ. ܘܡ݁ܢ ܕܲܡܩܲܒܸܿܠ ܐܲܝܟܼ ܛܲܠܝܵܐ ܗܵܢܵܐ ܒܫܹܡܝ؛ ܠܝܼ ܗَܘ̣ ܡܩܲܒܸܿܠ. ܘܟܼܠ ܕܢܲܟܼܫܸܠ ܠܚܲܕܼ ܡ̣ܢ ܗܵܠܹܝܢ ܙܥܘܿܪܹ̈ܐ ܕܲܡܗܲܝܡܢܝܼܢ ܒܝܼ؛ ܦܲܩܵܚ ܗَܘ̣ܵܐ ܠܹܗ ܕܬܸܗܘܸܐ ܬܲܠܝܵܐ ܪܲܚܝܵܐ ܕܲܚܡܵܪܵܐ ܒܨܵܘܪܹܗ؛ ܘܲܡܛܲܒܲܥ ܒܥܘܼ̈ܡܩܵܘܗܝ ܕܝܲܡܵܐ܀ ܚܙܵܘ ܠܵܐ ܬܸܒܼܣܘܿܢ ܥܲܠ ܚܲܕܼ ܡ̣ܢ ܗܵܠܹܝܢ ܙܥܘܿܪܹ̈ܐ. ܐܵܡܲܪ ܐَܢܵܐ ܠܟܼܘܿܢ ܓܹܝܪ؛ ܕܡܲܠܲܐܟܲܝ̈ܗܘܿܢ ܒܟܼܠܙܒܲܢ ܚܵܙܹ݁ܝܢ ܦܲܪܨܘܿܦܹܗ ܕܐܵܒܼܝ ܕܒܲܫܡܲܝܵܐ܀ ܗܵܟܲܢܵܐ ܠܲܝܬܿ ܨܸܒܼܝܵܢܵܐ ܩܕܼܵܡ ܐܲܒܼܘܼܟܼܘܿܢ ܕܒܲܫܡܲܝܵܐ ܕܢܹܐܒܲܕܼ ܚܲܕܼ ܡ̣ܢ ܗܵܠܹܝܢ ܙܥܘܿܪܹ̈ܐ܋ [ܡܲܬܲܝ ܝܚ 1-6، 10، 14]

♱♱♱♱♱♱♱

ܨܠܘܿܬܼܵܐ ܕܐَܢܵܫ ܥܲܠ ܢܲܦ̮ܫܹܗ.

ܡܵܪܝܵܐ ܐܲܝܟܼ ܕܝܵܕܲܥ ܐܲܢَܬܿ. ܘܐܲܝܟܼ ܕܨܵܒܹ݁ܐ ܐܲܢَܬܿ. ܘܐܲܝܟܼ ܕܲܡܢܵܚ ܐܲܢَܬܿ. ܘܐܲܝܠܹܝܢ ܕܥܵܕܿܪܵܐ ܠܡܸܣܟܹܿܢܘܼܬܼܝ ܘܕܵܘܝܘܼܬܼܝ ܘܚܲܠܵܫܘܼܬܼܝ ܣܥܘܿܪ ܠܘܵܬܼܝ. ܡܸܛܠ ܕܕܼܝܼܠܵܟܼ ܐܸܢܘܿܢ ܪ̈ܲܚܡܹܐ ܘܲܚܢܵܢܵܐ ܘܛܲܝܒܿܘܼܬܼܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ.

♱♱♱♱♱♱♱

ܐَܚܪܹܬܼܵܐ ܕܥܲܠ ܢܲܦ̮ܫܹܗ.

ܐܲܝܟܲܢܵܐ ܐܸܩܪܹܝܟܼ ܡܵܪܝܵܐ. ܐܲܢَܬܿ ܝܵܕܲܥ ܐܲܢَܬܿ. ܐܸܢܵܐ ܒܥܝܼܪܵܐ ܐܝܼܬܲܝ ܘܠܵܐ ܝܵܕܲܥ ܐَܢܵܐ ܡܸܕܸܡ. ܐܲܢَܬܿ ܐܲܝܬܿܝܼܬܵܢܝ ܠܐܲܩܡܵܐ ܕܚܲܝܹ̈ܐ ܗܵܠܹܝܢ. ܦܪܘܿܩܲܝܢܝ ܡܸܛܠ ܪ̈ܲܚܡܲܝܟ. ܐܸܢܵܐ ܥܲܒܼܕܵܟܼ ܐܝܼܬܲܝ ܘܲܒܼܪܵܗ݁ ܕܐܲܡܬܼܵܟܼ. ܡܵܪܝܵܐ ܒܨܸܒܼܝܵܢܵܟܼ ܐܲܚܵܢܝ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܡܫܝܼܓܼ ܟܵܗܢܵܐ ܐܝܼܕܼܵܘܗ̈ܝ

ܒܥܸܕܵܢ ܡܗܲܝܡܢܝܼܢܲܢ.

ܐܲܠܵܗܵܐ ܡܵܪܹܟܿܠ ܢܫܝܼܓܼ ܨܵܐܬܼܵܐ ܕܚܵܘܒܲܝ̈ܢ ܘܕܲܚܛܵܗܲܝ̈ܢ ܒܙܘܿܦܵܐ ܕܲܚܢܵܢܹܗ. ܘܢܸܡܪܘܿܩ ܟܘܼ̈ܬܼܡܵܬܼܵܐ ܕܣܘܼܪ̈ܚܵܢܲܝܢ ܒܝܲܡܵܐ ܫܦܝܼܥܵܐ ܕܲܡܪܲܚܡܵܢܘܼܬܹܗ ܠܥܵܠܡܝܼܢ ܐܵܡܹܝܢ.

♱♱♱♱♱♱♱

ܕܟܲܕܼ ܡܟܲܦܲܪ ܐܝܼܕܼܵܘܗܝ.

ܡܵܪܝܵܐ ܡܟܲܦܲܪ ܫܘܼܚܬܼܵܐ ܕܲܚܛܵܗܲܝ̈ܢ؛ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ ܠܥܵܠܡܝܼܢ ܐܵܡܹܝܢ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܡܫܲܠܸܡ ܐَܢܵܫ ܠܲܨܠܝܼܒܼܵܐ.

ܚܲܝܠܵܐ ܕܲܟܼܣܸܐ ܒܲܨܠܝܼܒܼܵܐ؛ ܢܲܩܢܹܝܢܝ ܚܲܝܠܵܐ ܘܠܘܼܒܵܒܼܵܐ؛ ܡ̣ܢ ܩܪܵܒܼ ܫܹܐܕܼܵܐ ܒܥܸܠܕܒܼܵܒܼܵܐ؛ ܒܪ̈ܲܚܡܵܘܗܝ ܕܐܲܠܵܗܲܢ ܛܵܒܼܵܐ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܡܫܲܠܸܡ ܐَܢܵܫ ܐܹܘܲܢܓܲܠܝܼܘܿܢ.

ܚܲܝܠܵܐ ܕܲܟܼܣܸܐ ܒܲܣܒܲܪܬܼܵܐ؛ ܡܲܠܝܲܬܼ ܚܲܝܹ̈ܐ ܘܛܲܝܒܼܘܬܼܵܐ؛ ܢܸܡܠܸܐ ܠܪܸܥܝܵܢܝ ܚܸܟܼܡ̱ܬܼܵܐ؛ ܕܐܸܕܲܥ ܣܘܼܟܵܠܵܐ ܕܡܸܠܬܼܵܐ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܡܫܲܠܸܡ ܐَܢܵܫ ܫܟܼܝܼܢܬܵܐ ܕܩܲܕܝܼܫܹ̈ܐ.

ܢܫܵܘܬܸܦ ܠܲܢ ܡܵܪܲܢ ܘܐܲܠܵܗܲܢ ܒܲܡܝܲܬܿܪܘܼܬܼܵܟܼ ܐܲܒܼܘܸܢ ܩܲܕܝܼܫܵܐ؛ ܘܢܸܫܬܿܘܸܐ ܠܪ̈ܲܚܡܹܐ ܘܠܲܚܢܵܢܵܐ ܒܲܨ̈ܠܵܘܵܬܼܵܟܼ.

♱♱♱♱♱♱♱

ܬܘܼܒܼ ܨܠܘܿܬܼܵܐ ܕܲܩܕܼܵܡ ܫܟܼܝܼܢܬܹܿܗ ܕܩܲܕܝܼܫܵܐ.

ܨܠܘܿܬܹܗ ܘܒܼܵܥܘܼܬܹܗ ܘܬܲܟܼܫܲܦ̮ܬܹܿܗ ܘܬܲܚܢܲܢܬܹܿܗ ܕܐܲܒܼܘܿܢ ܙܲܗܝܵܐ ܘܩܲܕܝܼܫܵܐ ܡܵܪܝ ܦܠܵܢ ܢܲܨܝܼܚܵܐ ܘܲܕܼܟܼܠܗܘܿܢ ܟܢܵܘܵܬܹ̈ܗ؛ ܬܸܗܘܸܐ ܠܲܢ ܐܲܡܝܼܢܵܐܝܼܬܼ ܒܟܼܠܗܘܿܢ ܙܲܒܼܢܹ̈ܐ ܘܥܕܵܢܹ̈ܐ ܠܥܵܠܡܝܢ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܥܵܐܹ݁ܠ ܐَܢܵܫ ܠܗܲܝܟܿܠܵܐ.

ܡܵܪܲܢ ܝܑܼܫܘܿܥ ܡܫܝܼܚܵܐ؛ ܚܲܝܸܠܲܝܢܝ ܘܥܲܕܲܪܲܝܢܝ ܘܚܲܣܵܐ ܠܝܼ ܚܵܘܒܲܝ̈ ܘܲܚܛܵܗܲܝ̈. ܘܙܵܘܸܕܲܝܢܝ ܡ̣ܢ ܒܲܝܬܵܟܼ ܩܲܕܝܼܫܵܐ ܙܘܵܕܹ̈ܐ ܕܥܘܼܕܼܪܵܢܵܐ ܘܲܕܼܦܘܼܪܩܵܢܵܐ. ܘܪܘܿܣ ܛܲܠܵܐ ܕܒܲܣܝܼܡܘܼܬܼܵܟܼ ܥܲܠ ܢܲܦ̮ܫܝ ܕܵܘܝܼܬܼܵܐ. ܘܗܲܒܼܠܝܼ ܕܐܸܚܙܸܐ ܚܢܵܢܵܟܼ ܒܝܵܘܡܵܟܼ ܪܲܒܵܐ. ܒܲܨ̈ܠܵܘܵܬܹܗ ܕܡܲܠܲܐܟܼܵܐ ܩܲܕܝܼܫܵܐ ܕܲܡܢܲܛܲܪ ܠܝܼ ܐܵܡܹܝܢ.

♱♱♱♱♱♱♱

ܨܠܘܿܬܼܵܐ ܕܟܲܕܼ ܥܵܐܹ݁ܠ ܐَܢܵܫ ܠܒܹܝܬܼ ܣܵܗܕܹ̈ܐ.

ܡܵܪܲܢ ܝܑܼܫܘܿܥ ܡܫܝܼܚܵܐ ܚܲܝܸܠܲܝܢܝ ܘܥܲܕܲܪܲܝܢܝ ܘܙܵܘܸܕܲܝܢܝ ܡ̣ܢ ܒܲܝܬܵܟܼ ܩܲܕܝܼܫܵܐ ܟܿܠ ܥܘܼܕܼܪ̈ܵܢܝܼܢ ܘܟܼܠ ܝܘܼܬܼܪ̈ܵܢܝܼܢ. ܘܟܼܠ ܦܘܼܢܵܝ ܫܹܐ̈ܠܵܬܼܵܐ ܫܲܦܝܼܪ̈ܵܬܼܵܐ. ܒܲܨܠܵܘܵܬܹ̈ܗ ܕܐܲܒܼܘܼܢ ܩܲܕܝܼܫܵܐ ܡܵܪܝ ܦܠܵܢ. ܘܒܲܨ̈ܠܵܘܵܬܼܵܐ ܕܟܼܠܗܘܿܢ ܣܵܗܕܲܝ̈ܟ ܘܩܲܕܝܼܫܲܝ̈ܟ ܒܢܲܝ̈ ܐܲܡܢܹܗ ܕܐܲܒܼܘܼܢ ܙܲܗܝܵܐ ܐܵܡܹܝܢ.

♱♱♱♱♱♱♱♱♱♱♱

ܨܠܘܿܬܼܵܐ ܕܩܘܼܕܵܫ ܡܲܝ̈ܵܐ ܛܲܡ̈ܐܹܐ؛ (ܠܚܘܿܕܼ).

ܠܵܟܼ ܡܵܪܝܵܐ ܐܲܠܵܗܵܐ ܚܲܝܠ̱ܬܼܵܢܵܐ ܩܲܕܝܼܫܵܐ ܘܲܡܫܲܒܿܚܵܐ. ܡܵܘܕܹܝܢܲܢ ܘܣܵܓܼܕܝܼܢܲܢ ܕܲܒܼܦܵܪܹܗَܣܝܼܵܐ ܕܝܲܗَܼܒܼܬܿ ܠܲܢ؛ ܫܵܐܠܝܼܢܲܢ ܡܼܢ ܒܲܣܝܼܡܘܼܬܼܵܟܼ؛ ܕܬܸܦܫܘܿܛ ܝܲܡܝܼܢܵܐ ܕܲܡܪܲܚܡܵܢܘܼܬܼܵܟܼ ܘܲܬܼܒܲܪܸܟܼ ܘܲܬܼܩܲܕܸܫ ܠܡܲܝ̈ܵܐ ܗܵܠܹܝܢ. ܘܬܲܫܪܸܐ ܒܗܘܿܢ ܥܘܼܕܼܪܵܢܵܐ ܕܡܸܢܵܟܼ ܕܟܼܠ ܟܲܪ ܕܡܸܬܼܝܲܗَܒܿܝܼܢ ܘܡܸܬܿܬܲܪܡܹܝܢ ܘܡܸܙܕܲܠܚܝܼܢ ܘܡܸܬܼܐܲܫܕܝܼܢ؛ ܢܸܪܕܦܘܼܢ ܡܼܢ ܬܲܡܿܢ ܟܠܵܗܿ ܛܲܢܦܘܼܬܼܵܐ ܘܛܲܡܐܘܼܬܼܵܐ ܕܡܝܼܬܼܵܐ ܘܕܲܚܢܝܼܩܵܐ. ܘܟܼܠ ܕܫܵܬܹܝܢ ܡܸܢܗܘܿܢ ܐܘܿ ܡܸܬܼܚܲܫܚܝܼܢ ܒܗܘܿܢ؛ ܢܲܩܕܘܼܬܼܵܐ ܘܦܲܐܝܘܼܬܼܵܐ ܘܕܲܟܼܝܘܼܬܼܵܐ ܕܢܲܦ̮ܫܵܐ ܘܲܕܼܦܲܓܼܪܵܐ ܢܸܩܢܘܿܢ ܡܸܢܗܘܿܢ. ܘܢܸܬܿܠܘܼܢ ܒܡܵܘܗܲܒܼܬܼܵܐ ܕܟܼܝܼܬܼܵܐ ܕܡܼܢ ܠܘܵܬܼܵܟܼ؛ ܥܘܼܕܼܪܵܢܵܐ ܘܦܘܼܪܩܵܢܵܐ ܠܢܲܦ̮̈ܫܵܬܼܵܐ ܕܨܵܒܼ̈ܝܵܢ ܘܚܵܕܼ̈ܝܵܢ ܒܩܲܕܝܼܫܘܼܬܼܵܐ ܘܲܒܼܒܲܝܬܵܝܘܼܬܼܵܐ ܕܡܵܪܘܼܬܼܵܟܼ. ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝ̈ܒܿܘܵܬܼܵܟܼ ܕܲܠܘܵܬܲܢ؛ ܢܲܣܸܩ ܠܵܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܬܼܵܐ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܲܠ ܡܲܝ̈ܵܐ.

♱♱♱♱♱♱♱

ܐَܚܪܹܬܼܵܐ ܕܩܘܼܕܵܫ ܡܲܝ̈ܵܐ.

ܚܲܝܠܵܐ ܡܵܪܵܢܵܝܵܐ ܕܲܟܼܣܸܐ ܒܐܵܬ̤ܵܐ ܕܲܨܠܝܼܒܼܵܐ ܗ̤ܘ ܢܲܓܸܿܢ ܘܢܸܫܪܸܐ ܥܲܠ ܡܲܝ̈ܵܐ ܗܵܠܹܝܢ؛ ܘܢܸܛܪܘܿܕܼ ܡ̣ܢ ܩܕܵܡܲܝܗܘܿܢ ܟܠܵܗ݁ ܬܲܡܣܘܼܬܹܗ ܘܬܲܛܘܲܫܬܹܗ ܕܥܵܠܡܵܐ ܗܵܢܵܐ ܥܵܒܼܘܿܪܵܐ ܟܠ ܐܲܝܟܵܐ ܕܡܸܙܕܲܠܚܝܼܢ ܘܡܸܬܼܐܲܫܕܝܼܢ. ܘܢܸܗܘܘܿܢ ܚܲܝܹ̈ܐ ܠܫܵܬܼܘܿܝܲܝ̈ܗܘܿܢ ܘܚܘܼܠܡܵܢܵܐ ܠܐܲܝܠܹܝܢ ܕܲܡܫܝܼܓܼܝܼܢ ܡܸܢܗܘܿܢ؛ ♰ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܪܵܫܹ݁ܡ ܥܲܠ ܡܲܝ̈ܵܐ.

♱♱♱♱♱♱♱

ܨܠܘܿܬܼܵܐ ܕܥܲܠ ܣܵܘ̈ܟܹܿܐ ܕܐܘܿܫܲܥܢܹ̈ܐ.

ܐܵܘܫܸܛ ܡܵܪܲܢ ܘܐܲܠܵܗܲܢ ܝܲܡܝܼܢܵܟܼ ܡ̣ܢ ܫܡܲܝ̈ ܩܘܼܕܫܵܟܼ ܡܫܲܒܿܚܵܐ. ܘܒܲܪܸܟܼ ܠܣܵܘ̈ܟܹܿܐ ܗܵܠܹܝܢ ܕܙܲܝܬܵܐ ܕܡ̣ܢ ܐܝܼ̈ܠܵܢܹܐ ܐܸܬܼܦَܫܲܚ. ܕܲܢܙܲܝܚܘܼܢ ܒܗܘܿܢ ܣܵܓܼܘܿܕܲܝ̈ܟ ܠܥܹܐܕܼܵܐ ܕܡܲܥܠܬܼܵܟܼ ܕܐܘܿܪܸܫܠܸܡ. ܘܩܲܕܸܫ ܐܸܢܘܿܢ ܒܩܲܕܝܼܫܘܼܬܼܵܐ ܕܲܫܡܵܟ݂. ܕܢܸܗܘܘܿܢ ܡܩܲܕܫܹ̈ܐ ܒܡܸܠܬܼܵܟܼ ܘܲܒܼܦܘܼܩܕܵܢܵܟܼ. ܘܢܸܩܢܘܿܢ ܥܲܒܼܕܲܝ̈ܟ ܩܲܕܝܼܫܘܼܬܼܵܐ ܡܸܢܗܘܿܢ. ܘܲܢܩܲܒܿܠܘܼܢ ܡܸܢܗܘܿܢ ܒܘܼܪ̈ܟܵܬܼܵܐ ܘܲܢܩܲܠܣܘܼܢ ܠܡܲܥܠܬܵܟܼ ܒܚܲܕܼܘܼܬܼܵܐ ܘܒܲܦܨܝܼܚܘܼܬܼܵܐ. ܘܒܲܙܡܝܼܪ̈ܬܼܵܐ ܘܩܝܼ̈ܢܵܬܼܵܐ. ܘܢܸܬܼܚܲܠܛܘܼܢ ܥܲܡ ܢܸܥ̈ܡܵܬܼܵܐ ܕܩܵܠܲܝܗ̈ܘܿܢ ܕܫܲܒܼܪܹ̈ܐ ܒ̈ܢܲܝ ܥܸܒܼܪ̈ܝܹܐ ܗܵܢܘܿܢ ܕܲܩܥ̣ܵܘ ܐܘܫܲܥܢܵܐ ܒܲܡܪ̈ܵܘܡܹܐ ܠܫܘܼܒܼܗܵܪܵܐ ܕܥܲܡܡܹ̈ܐ ܕܗܲܝܡܸܢܘ ܒܵܟܼ. ܘܲܠܪܘܼܡܪܵܡܵܐ ܕܡܵܘ̈ܕܝܲܝ ܒܡܵܪܘܼܬܼܵܟܼ. ܘܲܠܟܼܘܼܐܵܪܵܐ ܘܒܸܗܬܿܬܼܵܐ ܕܣܵܩܘܿܪܹ̈ܐ ܕܲܫܡܵܟܼ. ܘܲܠܚܲܕܘܼܬܼܵܐ ܘܠܲܦܨܝܼܚܘܼܬܼܵܐ ܕܣܵܓܼܘܿܕܲܝ̈ܟ. ܕܢܲܣܩܘܼܢ ܫܘܼܒܼܚܵܐ ܘܢܸܦܪ̱ܥܘܿܢ ܬܵܘܕܝܼܬܼܵܐ. ܠܐܲܒܼܵܐ ܘܲܒܼܪܵܐ ܘܲܠܪܘܼܚܵܐ ܕܩܘܼܕܫܵܐ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܨܠܝܼܒܼܵܐ ܥܲܠ ܣܵܘ̈ܟܹܿܐ ܘܲܡܦܲܠܸܓܼ ܠܟܼܠܢܵܫ.

♱♱♱♱♱♱♱

ܐَܚܪܹܬܼܵܐ ܕܥܲܠ ܣܵܘ̈ܟܹܿܐ.

ܐܵܘܫܸܛ ܡܵܪܝ ܝܲܡܝܼܢܵܟܼ. ܘܒܲܪܟܼ ܠܣܵܘܟܹ̈ܐ ܗܵܠܹܝܢ ܕܡ̣ܢ ܐܝܼܠܵܢܹ̈ܐ ܕܙܲܝܬܵܐ. ܕܥܲܠ ܐܝܼܕܲܝ̈ܢ ܛܥܝܼܢܝܼܢ. ܠܐܝܼܩܵܪܵܟܼ ܘܲܠܙܘܼܝܵܚܵܐ ܕܥܹܐܕܼܵܟܼ ܩܲܕܿܝܼܫܵܐ ܡܵܪܵܐ ܕܟܼܠ؛ ♰ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܪܵܫܹ݁ܡ ܨܠܝܼܒܼܵܐ ܥܲܠ ܣܵܘ̈ܟܹܿܐ.

♱♱♱♱♱♱♱♱

ܨܠܘܿܬܼܵܐ ܕܥܲܠ ܙܲܪ̈ܥܹܐ.

ܫܘܼܒܼܚܵܐ ܠܵܟܼ ܢܵܨܘܿܒܼܵܐ ܕܟܼܠ ܐܝܼܠܵܢܝܼ̈ܢ ܠܡܸܛܥܲܢ ܦܹܐܪܹ̈ܐ ܗܲܢܝܼ̈ܐܹܐ ܠܒܼܘܼܣܵܡܵܐ ܕܥܲܒܼܕܵܘܗ̈ܝ؛ ܒܲܪܸܟܼ ܡܵܪܝ ܠܙܲܪܥܵܐ ܗܵܢܵܐ ܕܥܲܒܼܕܲܝ̈ܟ؛ ܘܢܸܥܦܘܿܢ ܡܸܢܹܗ ܡܪ̈ܲܥܝܵܢܹܐ ܠܡܵܪܘܼܬܼܵܟܼ. ܘܢܲܣܸܩ ܠܵܟܼ ܫܘܼܒܼܚܵܐ ܥܲܠ ܐܲܦܲܝ̈ ܦܘܼܪ̈ܢܵܣܲܝܟ ܠܥܵܠܡܝܼܢ؛ ܐܵܡܹܝܢ.

♱♱♱♱♱♱♱

ܐَܚܪܹܬܼܵܐ ܕܥܲܠ ܙܲܪ̈ܥܹܐ ܘܟܲܪ̈ܡܹܐ ܘܓܲܢ̈ܢܹܐ.

ܫܘܼܒܼܚܵܐ ܠܵܟܼ ܢܵܨܘܿܒܼܵܐ ܕܟܼܠ ܐܝܼܠܵܢܝܼ̈ܢ ܠܡܸܛܥܲܢ ܦܹܐܪܹ̈ܐ ܗܲܢ̈ܝܼܐܹܐ ܠܒܼܘܼܣܵܡܵܐ ܕܥܲܒܼܕܵܘܗ̈ܝ. ܒܲܪܸܟ ܡܵܪܝ ܠܙܲܪ̈ܥܹܐ ܐܵܘ ܟܲܪ̈ܡܹܐ ܐܵܘ ܠܓܲܢ̈ܢܹܐ ܗܵܠܹܝܢ ܕܥܲܒܼܕܲܝ̈ܟ؛ ܕܢܸܥܦܘܿܢ ܡܸܢܗܘܿܢ ܦܹܐܪ̈ܢܐ ܡܚܲܕ̈ܝܵܢܹܐ ܠܒܼܘܼܣܵܡ ܣܵܓܼܘܿܕܲܝ̈ܟ. ܘܐܲܥܒܲܪ ܡܸܢܗܘܿܢ ܥܲܝܢܵܐ ܒܝܼܫܬܵܐ ܘܚܲܣܵܡܬܵܐ ܘܩܲܡܨܵܐ ܘܫܵܘܒܵܐ ܘܨܵܪܨܘܼܪܵܐ ܘܐܵܟܼܠܵܐ ܘܬܼܵܘܠܥܵܐ ܘܦܵܪܲܚܬܵܐ ܘܲܒܼܥܝܼܪܵܐ ܘܚܲܝܘَܬܼܵܐ ܕܕܲܒܼܪܵܐ. ܘܟܼܠܗܹܝܢ ܒܝܼ̈ܫܵܬܼܵܐ ܢܸܬܼܒܲܛ̈ܠܵܢ ܘܢܸܙܕܲܓܼܪ̈ܵܢ ܡ̣ܢ ܙܲܪ̈ܥܲܝܗܘܿܢ ܐܵܘ ܟܲܪ̈ܡܲܝܗܘܿܢ ܐܵܘ ܓܲܢܢܲܝ̈ܗܘܿܢ ܕܥܲܒܼܕܲܝ̈ܟ ܗܵܠܹܝܢ. ܘܢܲܣܩܘܼܢ ܠܵܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܼܬܼܵܐ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܥܲܠ ܚܲܡܪܵܐ.

ܫܸܩܝܵܐ ܫܡܲܝܵܐ ܕܲܪܕܼܵܐ ܡ̣ܢ ܛܘܼܛܝܼܬܼܵܐ ܡܒܲܪܲܟܼܬܵܐ؛ ܒܲܪܸܟܼ ܠܚܲܡܪܵܐ ܗܵܢܵܐ؛ ܘܲܡܙܘܿܓܼ ܒܹܗ ܚܢܵܢܵܐ ܕܛܲܝܒܿܘܼܬܼܵܟܼ؛ ܕܢܸܗܘܸܐ ܡܚܲܕܝܵܢܵܐ ܠܠܸܒܵܐ ܕܫܵܬܼܘܿܝܵܘܗ̈ܝ؛ ܘܢܲܦܨܲܚ ܪܸܥܝܵܢܵܐ ܕܫܵܩܵܘܵܬܹ̈ܗ؛ ܕܟܲܕܼ ܚܵܕܹܝܢ ܒܲܛܥܸܡ ܚܲܡܪܵܐ ܕܡ̣ܢ ܣܓܼܘܿܠܲܝ̈ܟ؛ ܢܵܘܕܘܿܢ ܘܲܢܫܲܒܲܚܘܿܢ ܠܵܟܼ ܥܲܠ ܐܲܦܲܝ̈ ܛܲܝ̈ܒܿܘܵܬܼܵܟܼ ܕܲܠܘܵܬܼܗܘܿܢ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

♱♱♱♱♱♱♱

ܨܠܘܿܬܼܵܐ ܕܡܸܬܼܐܲܡܪܵܐ ܥܲܠ ܟܲܠܬܼܵܐ

ܟܲܕܼ ܬܸܥܘܿܠ ܠܥܹܕܬܵܐ ܡ̣ܢ ܒܵܬܲܪ ܐܲܪܒܿܥܝܼܢ ܝܵܘ̈ܡܝܼܢ.

ܐܘܿ ܚܲܢܵܢܵܐ ܘܲܡܪܲܚܡܵܢܵܐ ܡܫܝܼܚܵܐ ܐܲܠܵܗܲܢ ܕܥܲܠ ܟܠ ܫܦܝܼܥܵܐ ܛܲܝܒܿܘܼܬܹܗ. ܐܲܫܦܲܥ ܛܲܝܒܿܘܼܬܼܵܟܼ ܘܥܘܼܕܼܪܵܢܵܟܼ ܥܲܠ ܟܲܠܬܼܵܐ ܗܵܕܹܐ ܘܩܲܕܸܫܹܝܗܿ ܒܪ̈ܲܚܡܲܝܟ. ܘܐܲܫܘܵܗܿ ܕܬܲܚܸܒܼ ܠܛܵܒܼ̈ܵܬܼܵܐ ܘܬܸܣܢܸܐ ܠܒܼܝܼ̈ܫܵܬܼܵܐ ܘܬܸܥܒܸܿܕܼ ܥܒܼܵܕܹ̈ܐ ܕܢܸܫܦܪܘܼܢ ܠܵܟܼ. ܘܢܸܗܘܘܿܢ ܡܼܢ ܥܘܼܒܵܗܿ ܦܹܐܪܹ̈ܐ ܕܚܲܕܼ̈ܘܵܬܼܵܐ؛ ܘܢܸܬܼܪܲܒܿܘܼܢ ܒܗܲܝܡܵܢܘܼܬܼܵܐ ܕܥܹܕܬܵܟܼ ܩܲܕܝܼܫܬܵܐ. ܘܲܒܼܨܸܒܼܝܵܢܵܟܼ ܬܗܲܠܸܟܼ ܩܕܼܵܡ ܚܲܬܼܢܵܗ݁ ܟܲܕܼ ܒܥܲܝܢܹܝ̈ܗ݁ ܬܸܚܙܝܼܘܗܝ ܫܲܦܝܼܪ؛ ܘܒܸܐܕܼܢܹܝ̈ܗܿ ܬܸܫܡܲܥ ܡܼܢ ܦܘܼܩܕܵܢܵܘ̈ܗܝ ܘܬܼܵܘܕܸܐ ܒܗܘܿܢ. ܘܦܘܼܡܵܗܿ ܢܡܲܠܸܠ ܥܠܵܘܗܝ ܬܪܝܼܨܘܼܬܼܵܐ؛ ܘܲܒܼܠܸܒܵܗܿ ܬܲܚܸܒܼ ܠܹܗ ܒܲܫܪܵܪܵܐ؛ ܘܐܝܼܕܹܝ̈ܗܿ ܢܸܥ̈ܒܿܕܵܢ ܨܸܒܼܝܵܢܹܗ؛ ܘܪܸ̈ܓܼܠܹܝܗܿ ܢܗܲܠܟܼ̈ܵܢ ܒܙܲܗܝܘܼܬܼܵܐ ܘܲܒܼܩܲܕܝܼܫܘܼܬܼܵܐ. ܘܗ̤ܝ ܟܲܠܬܼܵܐ ܘܚܲܬܼܢܵܐ ܘܫܵܘܫܒܼܝܼܢܵܐ ܘܫܵܘܫܒܼܝܼܢܬܵܐ ܢܸܬܼܢܲܛܪܘܼܢ ܡܼܢ ܟܠ ܢܸܟܼܝܵܢܝܼ̈ܢ؛ ܒܝܲܕܼ ܨܠܵܘ̈ܵܬܼܵܗܿ ܕܝܵܠܸܕܬܵܟܼ ܫܡܲܝܵܐ ܕܬܲܪܬܹܿܝܢ ܡܵܪܬܿܝ ܡܲܪܝܲܡ ܛܘܼܒܼܵܢܝܼܬܼܵܐ؛ ܘܲܕܼܟܼܠܗܘܿܢ ܩܲܕܝܼܫܲܝ̈ܟ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܪܵܫܹ݁ܡ ܥܲܠ ܪܹܫܵܗ݁.

♱♱♱♱♱♱♱

ܒܘܼܪܟܿܬܼܵܐ ܕܡܸܬܼܐܲܡܪܵܐ ܥܲܠ ܛܲܠܝܵܐ ܘܐܸܡܹܗ؛

ܟܲܕܼ ܗܵܘܹܐ ܠܹܗ ܐܲܪܒܿܥܝܼܢ ܝܵܘ̈ܡܝܼܢ ܡܼܢ ܒܵܬܲܪ ܡܵܘܠܵܕܹܗ ܟܲܕܼ ܥܵܐܠܵܐ ܒܹܗ ܐܸܡܹܗ ܠܥܹܕܬܵܐ.

ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ ܒܵܪܘܿܝܵܐ ܕܲܫܡܲܝܵܐ ܘܕܼܐܲܪܥܵܐ ܘܟܼܠ ܕܲܒܼܗܘܿܢ؛ ܕܲܥܒܲܕܬܿ ܢܵܡܘܿܣܵܐ ܠܐܲܒܼ̈ܵܗܵܬܼܵܐ ܩܲܕܼܡܵܝܹ̈ܐ؛ ܘܦܲܩܸܕܬܿ ܒܹܗ ܕܟܼܠ ܕܸܟܼܪܵܐ ܒܲܪ ܐܲܪܒܿܥܝܼܢ ܝܵܘ̈ܡܝܼܢ ܢܹܐܬܸܐ ܠܗܲܝܟܿܠܵܟܼ ܩܲܕܝܼܫܵܐ؛ ܘܢܸܬܸܠ ܩܘܼܪܒܵܢܵܐ ܠܟܼܵܗܢܵܐ ܘܲܢܨܲܠܸܐ ܥܠܵܘܗܝ ܘܢܸܬܼܕܲܟܸܿܐ. ܘܐܲܢَܬܿ ܡܵܪܝ ܫܲܡܠܝܼܬܿ ܗܵܢܵܐ ܦܘܼܩܕܵܢܵܐ ܒܡܲܥܲܠܬܹܗ ܕܲܒܼܪܵܟܼ ܚܲܒܿܝܼܒܼܵܐ ܠܗܲܝܟܿܠܵܐ ܟܼܲܕܼ ܗ̤ܘܵܐ ܒܲܪ ܐܲܪܒܿܥܝܼܢ ܝܵܘ̈ܡܝܼܢ. ܟܲܕܼ ܩܲܒܿܠܹܗ ܫܸܡܥܘܿܢ ܣܵܒܼܵܐ ܥܲܠ ܕܪ̈ܵܥܵܘܗܝ ܘܐܵܘܕܝܼ ܘܲܫܐܸܠ ܡܸܢܹܗ ܫܪܵܝܵܐ ܠܚܲܝܵܘ̈ܗܝ. ܘܐܵܦ ܗܵܫܵܐ ܡܵܪܝܵܐ ܐܲܠܵܗܵܐ ܒܲܪܸܟܼ ܘܩܲܕܸܫ ܠܝܲܠܘܿܕܵܐ ܗܵܢܵܐ ܦܠܵܢ ܕܐܸܬܼܵܐ ܠܥܹܕܬܵܟܼ ܩܲܕܝܼܫܬܵܐ ܕܐܝܼܬܹܝܗܿ ܒܹܝܬܼ ܡܲܥܡܪܵܐ ܕܙܲܕܝܼܩܘܼܬܼܵܐ ܕܢܸܫܐܲܠ ܡܸܢܵܟܼ ܕܬܸܬܸܿܠ ܠܹܗ ܕܢܸܣܓܸܿܐ ܚܲܠܒܼܵܐ ܕܡܲܝܢܲܩܬܹܗ ܘܢܸܬܼܢܛܲܪ ܡܼܢ ܒܝܼܫܵܐ ܘܚܲܝ̈ܠܵܘܵܬܹܗ؛ ܘܢܸܬܼܪܲܒܸܿܐ ܒܩܲܕܝܼܫܘܼܬܼܵܐ ܘܲܒܼܗܲܝܡܵܢܘܼܬܼܵܐ ܕܲܫܪܵܪܵܐ ܟܠܗܘܿܢ ܝܵܘ̈ܡܵܬܼܵܐ ܕܚܲܝܵܘܗ̈ܝ܀ (ܐܲܩܸܦ ܥܲܠ ܐܸܡܹܗ ܕܛܲܠܝܵܐ) ܘܐܲܢَܬܿܝ ܐܸܡܹܗ ܕܛܲܠܝܵܐ ܬܸܬܿܙܝܼܥܝܼܢ ܒܒܲܪܢܵܫܵܐ ܟܲܣܝܵܐ ܕܲܒܼܠܸܒܵܐ ܒܲܥܒܼܵܕܹ̈ܐ ܛܵܒܹ̈ܐ. ܘܢܸܦܩܘܼܢ ܡܼܢ ܚܲܨܲܝ̈ܟܿܝ ܒܢܲܝ̈ܵܐ ܘܲܒܼܢ̈ܵܬܼܵܐ ܕܲܡܪܲܥܹܝܢ ܠܐܲܠܵܗܵܐ ܒܲܥܒܼܵܕܲܝ̈ܗܘܿܢ ܫܲܦܝܼܪܹ̈ܐ. ܘܬܸܬܼܒܲܣܡܝܼܢ ܒܛܵܒܼܵܬܼܹ̈ܗ ܕܡܵܪܝܵܐ. ܘܐܲܢَܬܿܝ ܘܲܒܼܪܹܟܼܝ ܬܸܬܼܢܲܛܪܘܼܢ ܡܼܢ ܟܠ ܢܸܟܼܝܵܢܝܼ̈ܢ ܒܲܨܠܵܘ̈ܵܬܼܵܗܿ ܕܲܒܼܬܼܘܼܠܬܵܐ ܥܛܝܼܦܲܬܼ ܢܘܼܗܪܵܐ ܫܡܲܝܵܐ ܕܬܲܪܬܹܿܝܢ ܡܵܪܬܿܝ ܡܲܪܝܲܡ ܝܵܠܕܲܬܼ ܡܫܝܼܚܵܐ ܐܲܠܵܗܲܢ؛ ܘܒܲܨܠܘܿܬܼ ܟܠܗܘܿܢ ܩܲܕܝܼܫܹ̈ܐ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܲܠ ܪܹܫܲܝܗܘܿܢ.

♱♱♱♱♱♱♱

ܨܠܘܿܬܼܵܐ ܕܥܲܠ ܐܲܢَܬܿܬܼܵܐ ܕܫܵܐܠܵܐ ܨܠܘܿܬܼܵܐ ܠܥܹܕܬܵܐ.

ܡܵܪܲܢ ܝܑܼܫܘܿܥ ܡܫܝܼܚܵܐ ܗܿܘ ܝܲܠܕܵܐ ܓܢܝܼܙܵܐ ܕܐܲܒܼܵܐ ܟܲܣܝܵܐ؛ ܗܿܘ ܕܡܸܛܠ ܓܸܢܣܵܐ ܕܝܼܠܲܢ ܡܚܝܼܠܵܐ ܘܬܼܵܚܘܿܒܼܵܐ ܐܲܪܟܿܢܘܼܟܼ ܪ̈ܲܚܡܲܝܟ؛ ܘܡܼܢ ܫܡܲܝܵܐ ܠܐܲܪܥܵܐ ܢܚܸܬܼܬܿ؛ ܘܦܲܓܼܪܵܐ ܕܐَܢܵܫܵܐ ܡܼܢ ܒܬܼܘܼܠܬܵܐ ܡܲܪܝܲܡ ܒܲܪܬܼ ܕܵܘܝܕܼ ܢܣܲܒܼܬܿ؛ ܘܢܵܡܘܿܣܵܐ ܕܡܘܼܫܹܐ ܥܲܒܼܕܵܟܼ ܫܲܡܠܝܼܬܿ؛ ܟܲܕܼ ܒܝܵܘܡܵܐ ܬܡܝܼܢܵܝܵܐ ܓܙܘܼܪܬܵܐ ܩܲܪܸܒܼܬܿ؛ ܘܲܒܼܬܲܪܒܿܝܼܬܼܵܐ ܦܲܓܼܪܵܢܵܝܬܵܐ ܐܲܝܟܼ ܕܲܟܼܬܼܝܼܒܼ ܬܲܕܼܟܿܝܼܬܼܵܐ ܚܠܵܦ ܬܲܕܼܟܿܝܼܬܼܵܐ ܩܲܪܸܒܼܬܿ. ܕܐܲܢَܬܿ ܕܝܼܬܲܝܟ ܩܘܼܪܒܵܢܵܐ ܡܩܲܒܿܠܵܐ ܘܪܹܝܚܵܐ ܒܲܣܝܼܡܵܐ؛ ܕܒܼܵܟܼ ܐܸܬܼܪܲܥܝܼ ܐܲܒܼܘܼܟܼ ܠܓܸܢܣܲܢ ܡܚܝܼܠܵܐ ܘܬܼܵܚܘܿܒܼܵܐ. ܐܲܢَܬܿ ܐܵܦ ܗܵܫܵܐ ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ ܗܲܒܼ ܚܘܼܣܵܝܵܐ ܘܫܘܼܒܼܩܵܢܵܐ ܘܕܼܘܼܟܵܝܵܐ ܠܐܲܡܬܼܵܟܼ ܗܵܕܹܐ ܦܠܵܢܝܼܬܼܵܐ ܕܲܠܗܲܝܟܿܠܵܟܼ ܩܲܕܝܼܫܵܐ ܐܸܬܿܛܲܝܒܲܬ̤ ܝܵܘܡܵܢܵܐ؛ ܘܲܠܘܵܬܼ ܥܲܒܼܕܵܟܼ ܡܚܝܼܠܵܐ ܘܚܲܛܵܝܵܐ ܐܸܬܼܩܲܪܒܲܬ̤؛ ܘܒܼܘܼܪ̈ܟܵܬܼܵܐ ܥܲܡ ܨܠܵܘ̈ܵܬܼܵܐ ܫܵܐܠܵܐ؛ ܘܫܘܼܟܵܢܹ̈ܐ ܕܛܲܝܒܿܘܼܬܼܵܐ ܕܡܼܢ ܫܡܲܝܵܐ ܗܿܝ ܕܲܒܼܝܲܕܼ ܟܵܗܢܘܼܬܼܵܐ ܡܼܢ ܡܪܲܚܡܵܢܘܼܬܼܵܐ ܕܝܼܠܵܟܼ ܒܵܪܘܿܝܵܐ ܕܟܼܠܲܢ ܐܸܬܼܝܲܗَܒܲܬ̤. ܐܹܝܢ ܒܒܼܵܥܘܼ ܡܸܢܵܟܼ ܡܵܪܝܵܐ ܐܲܚܝܼܕܼ ܟܠ؛ ܐܸܬܼܦܲܢ ܡܵܪܝܵܐ ܒܪ̈ܲܚܡܲܝܟ ܥܲܠ ܐܲܡܬܼܵܟܼ ܗܵܕܹܐ ܒܥܸܕܵܢܵܐ ܗܵܢܵܐ؛ ܘܫܲܕܲܪ ܥܠܹܝܗܿ ܛܲܝܒܿܘܼܬܼܵܐ ܕܪܘܼܚܵܐ ܕܩܘܼܕܼܫܵܐ؛ ܐܲܝܟܲܢܵܐ ܕܬܸܬܼܩܲܕܲܫ ܘܬܸܬܼܡܪܸܩ ܡܼܢ ܟܠܵܗܿ ܛܲܡܐܘܼܬܼܵܐ ܕܒܸܣܪܵܐ ܘܲܕܼܪܘܼܚܵܐ؛ ܘܲܒܼܕܲܟܼܝܘܼܬܼܵܐ ܘܲܒܼܩܲܕܝܼܫܘܼܬܼܵܐ ܬܸܨܛܲܒܲܬܼ؛ ܕܬܸܗܘܸܐ ܡܢܝܼܚܵܢܝܼܬܼܵܐ ܕܨܸܒܼܝܵܢܵܟܼ؛ ܘܢܵܛܘܿܪܬܵܐ ܕܦܘܼܩܕܵܢܲܝ̈ܟ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܲܠ ܪܹܫܵܗ݁.

♱♱♱♱♱♱♱

ܨܠܘܿܬܼܵܐ ܕܥܲܠ ܡܵܐܢܹ̈ܐ ܚܲܕܼܬܹ̈ܐ ܕܡܸܬܼܩܲܪܒܼܝܼܢ ܠܡܲܕܼܒܿܚܵܐ.

ܡܵܪܝܵܐ ܐܲܠܵܗܵܐ ܕܐܲܒܼ̈ܵܗܵܬܲܢ. ܐܲܢَܬܿ ܕܲܒܼܕܼܵܪܹ̈ܐ ܩܲܕܼܡܵܝܹ̈ܐ ܐَܪܵܙܵܢܵܐܝܼܬܼ ܩܲܕܸܡܬܿ ܛܲܦܸܣܬܿ ܐَܪ̈ܵܙܹܐ ܕܥܹܕܬܵܐ ܡܗܲܝܡܲܢܬܵܐ ܒܐܝܼܕܲܝ̈ ܪܹܫܵܐ ܕܪܹܫ ܟܵܗܢܹ̈ܐ ܡܘܼܫܹܐ ܢܒܼܝܼܵܐ. ܟܲܕܼ ܦܲܩܸܕܬܿ ܠܹܗ ܕܲܒܼܡܸܫܚܵܐ ܩܲܕܝܼܫܵܐ ܢܸܗܘܸܐ ܡܩܲܕܸܫ ܠܡܲܫܟܿܢܵܐ ܘܲܠܟܼܠܗܘܿܢ ܡܵܐܢܵܘ̈ܗܝ ܐܲܝܟܼ ܡ݁ܢ ܕܢܸܗܘܘܿܢ ܦܪܝܼܫܝܼܢ ܒܛܲܝܒܿܘܼܬܼܵܐ ܘܲܒܼܩܲܕܝܼܫܘܼܬܼܵܐ ܡܸܛܠ ܕܐܲܢَܬܿ ܩܲܕܝܼܫܲܬܿ. ܐܵܦ ܚܢܲܢ ܡܵܪܝܵܐ ܡܪܲܚܡܵܢܵܐ ܘܪܵܚܹܡ ܐَܢܵܫܵܐ ܒܵܥܹܝܢܲܢ ܡܸܢܵܟܼ ܘܡܸܬܼܟܲܫܦܝܼܢܲܢ ܠܵܟܼ ܕܐܲܝܟܼ ܫܘܼܘܕܵܝܵܟܼ ܕܲܠܘܵܬܼ ܫܠܝܼܚܲܝ̈ܟ ܩܲܕܝܼܫܹ̈ܐ؛ ܕܲܬܼܫܲܕܲܪ ܛܲܝܒܿܘܼܬܼܵܟܼ ܡܲܥܒܿܕܲܬܼ ܟܠ ܛܵܒܼ̈ܵܢ ܘܲܬܿܕܲܟܸܿܐ ܘܲܬܼܩܲܕܸܫ ܠܡܵܐܢܵܐ ܗܵܢܵܐ ܘܒܲܪܸܟܲܝܗܝ ܕܢܸܗܘܸܐ ܠܚܘܼܫܵܚܵܐ ܟܵܗܢܵܝܵܐ ܐܲܝܟܼ ܕܫܵܘܹܐ ܕܢܸܫܬܲܡܫܘܼܢ ܒܹܗ ܐَܪ̈ܵܙܲܝܟ ܐܲܠܵܗܵܝܹ̈ܐ ܘܲܡܚܲܣܝܵܢܹ̈ܐ. ܘܲܡܫܘܿܚܲܝܗ‌ܝ ܒܵܟܼ ܕܐܝܼܬܲܝܟ ܡܸܫܚܵܐ ܕܫܘܼܡܠܵܝܵܐ ܕܲܓܼܡܝܼܪܘܼܬܼܵܐ. ܘܢܸܗܘܸܐ ܠܵܟܼ ܗܲܝܟܿܠܵܐ ܕܲܟܼܝܵܐ ܘܩܲܕܝܼܫܵܐ ܕܥܵܡܪܵܐ ܒܹܗ ܐܲܠܵܗܘܼܬܼܵܟܼ. ♰ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܪܵܫܹ݁ܡ ܥܲܠ ܡܵܐܢܹ̈ܐ ܒܝܲܡܝܼܢܹܗ.

♱♱♱♱♱♱♱

ܐَܚܪܹܬܼܵܐ ܕܥܲܠ ܡܵܐܢܹ̈ܐ.

ܡܵܪܝܵܐ ܐܲܠܵܗܵܐ ܚܲܝܠ̱ܬܼܵܢܵܐ ܐܲܚܝܼܕܼ ܟܠ؛ ܩܲܕܝܼܫܵܐ ܘܲܡܫܲܒܿܚܵܐ؛ ܕܲܡܬܼܘܿܡܵܐܝܼܬܼ ܩܲܕܝܼܫܲܬܿ؛ ܘܥܵܡܲܪ ܐܲܢَܬܿ ܢܘܼܗܪܵܐ ܕܠܵܐ ܐَܢܵܫ ܡܸܫܟܲܚ ܠܡܸܬܼܩܲܪܵܒܼܘܼ ܠܹܗ؛ ܕܫܘܼܒܼܚܵܟܼ ܘܩܘܼܕܼܫܵܟܼ ܠܟܼܠ ܡܠ̣ܵܐ؛ ܘܠܵܐ ܫܒܲܩܬܿ ܢܲܦ̮ܫܵܟܼ ܕܠܵܐ ܡܫܲܒܿܚܵܢܹ̈ܐ؛ ܘܲܒܼܪܲܝܬܿ ܠܟܸܢܫܲܝ̈ ܪܵܘܡܵܐ ܕܲܢܫܲܒܿܚܘܼܢ ܘܲܢܩܲܕܫܘܼܢ ܠܪܲܒܿܘܼܬܼܵܟܼ؛ ܠܵܘ ܕܥܲܠ ܬܸܫܒܿܘܿܚܬܵܐ ܣܢܝܼܩܲܬܿ؛ ܐܸܠܵܐ ܕܲܡܫܲܒܿܚܵܢܲܝ̈ܟ ܒܵܟܼ ܢܹܐܪܒܼܘܼܢ؛ ܘܐܲܢَܬܿ ܒܪܲܝܬܿ ܠܥܵܠܡܹ̈ܐ ܒܛܲܝܒܿܘܼܬܼܵܟܼ؛ ܘܐܲܩܝܼܡܬܿ ܠܪܹ̈ܫܲܝ ܟܵܗܢܹ̈ܐ ܠܐܝܼܩܵܪܵܟܼ؛ ܘܲܩܒܲܥܬܿ ܡܲܫܟܲܢܙܲܒܼܢܵܐ ܠܲܫܟܼܝܼܢܬܵܟܼ؛ ܘܗܲܕܲܪܬܵܝܗ‌ܝ ܒܡܵܐܢܹ̈ܐ ܫܒܼܝܼܚܹ̈ܐ ܘܲܒܼܦܝܼܪ̈ܡܹܐ ܘܲܒܼܦܝܼܢܟܹ̈ܐ؛ ܘܒܲܡܢܵܪ̈ܵܬܼܵܐ ܘܲܒܼ̈ܟܼܵܣܹܐ؛ ܘܲܒܼܫܲܪܟܵܐ ܕܟܼܠܵܗ݁ ܬܸܫܡܸܫܬܵܐ ܡܘܼܫܵܝܬܵܐ ܕܦܲܩܸܕܬܿ. ܐܵܦ ܗܵܫܵܐ ܡܵܪܝ ܚܢܲܢ ܥܲܒܼܕܲܝ̈ܟ ܦܪ̈ܝܼܩܲܝ ܒܲܨܠܝܼܒܹܗ ܕܝܼܚܝܼܕܵܝܵܟܼ؛ ܡܦܝܼܣܝܼܢܲܢ ܠܪ̈ܲܚܡܲܝܟ ܕܲܬܼܩܲܕܸܿܫ ܠܡܵܐܢܹ̈ܐ ܗܵܠܹܝܢ ܕܥܲܠ ܐܝܼܕܲܝ̈ܢ ܣܝܼܡܝܼܢ؛ ܕܲܠܬܸܫܡܸܫܬܵܐ ܕܡܲܕܼܒܿܚܵܟܼ ܐܸܬܼܩܲܪܲܒܼܘ؛ ܕܢܸܗܘܘܿܢ ܠܐܝܼܩܵܪܵܐ ܕܲܫܟܼܝܼܢܬܵܟܼ؛ ܘܲܠܬܸܫܒܿܘܿܚܬܵܐ ܕܲܫܡܵܟܼ ܩܲܕܝܼܫܵܐ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ. ܘܩܲܒܸܠ ܡܵܪܝ ܦܘܼܪܫܵܢܵܐ ܨܸܒܼܝܵܢܵܝܵܐ ܕܗܵܠܹܝܢ ܕܩܲܪܸܒܼܘ ܐܸܢܘܿܢ؛ ܘܲܕܼܟܼܠ ܡ݁ܢ ܕܐܸܫܬܲܘܬܲܦܘ ܒܗܘܿܢ؛ ܕܐܲܢَܬܿܘܼ ܝܲܡܵܐ ܡܲܫܦܲܥ ܛܵܒܼܵـ̈ܬܼܵܐ ܒܛܲܝܒܿܘܼܬܼܵܟܼ ܘܲܒܼܪ̈ܲܚܡܲܝܟ؛ ܘܠܵܟܼ ܡܸܬܿܬܿܚܝܼܒܼܵܐ ܬܵܘܕܝܼܬܼܵܐ ܡ̣ܢ ܦܘܼܡ ܟܠܗܘܿܢ ܡܠܝܼܠܹ̈ܐ ܕܲܒܼܪܲܝܬܿ؛ ♰ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܲܠ ܡܵܐܢܹ̈ܐ ܨܠܝܼܒܼܵܐܝܼܬܼ.

♱♱♱♱♱♱♱♱

ܨܠܘܿܬܼܵܐ ܕܒܼܘܼܪܵܟܼ ܒܵܬܹ̈ܐ.

ܬܠܝܼܬܼܵܝܘܼܬܼܵܐ ܕܒܼܵܗܿ ܐܸܬܼܒܲܪܲܟܼܘ ܡܗܲܝܡܢܹ̈ܐ ܟܹܐܢܹ̈ܐ؛ ܘܐܲܒܼ̈ܵܗܵܬܼܵܐ ܩܲܕܼܡܵܝܹ̈ܐ. ܒܵܗ݁ ܢܸܬܼܒܲܪܲܟܼ ܒܲܝܬܵܐ ܗܵܢܵܐ ܘܢܸܗܘܸܐ ܡܒܲܪܟܼܵܐ ܡܸܟܹܿܝܠ ܘܲܥܕܲܡܵܐ ܠܥܵܠܲܡ. ܘܢܲܛܲܪܲܝܗܝ ܡܵܪܝ؛ ܘܠܲܕܼܥܵܡܿܪܝܼܢ ܒܹܗ ܡܼܢ ܟܠ ܢܸܟܼܝܵܢ ܘܟܼܠ ܥܵܩ̈ܵܢ. ܘܢܸܫܬܲܪܬܲܚ ܒܟܼܠ ܛܵܒܼܵܬܼ̈ܵܐ؛ ܒܲܕܼܡܘܼܬܼ ܒܲܝܬܹܗ ܕܐܲܒܼܪܵܗܵܡ. ܘܢܸܣܓܸܿܐ ܘܢܹܐܪܲܒܼ ܩܸܢܝܵܢܹܗ؛ ܐܲܝܟܼ ܒܲܝܬܹܗ ܕܐܝܼܘܿܒܼ ܟܹܐܢܵܐ. ܘܢܸܬܼܩܲܝܲܡ ܒܲܨ̈ܠܵܘܵܬܼܵܗ݁؛ ܕܡܲܪܝܲܡ ܒܬܼܘܼܠܬܵܐ ܩܲܕܝܼܫܬܵܐ. ܡܸܟܹܿܝܠ ܘܲܠܥܵܠܲܡ.

♱♱♱♱♱♱♱

ܐَܚܪܹܬܼܵܐ ܕܒܼܘܼܪܵܟܼ ܒܵܬܹ̈ܐ.

ܫܲܝܢܵܐ ܡܵܪܝܐ ܐܲܡܝܼܢܵܐ ܕܐܲܠܵܗܘܼܬܼܵܟܼ؛ ܘܲܫܠܵܡܵܐ ܢܲܓܿܝܼܪܵܐ ܕܡܵܪܘܼܬܼܵܟܼ؛ ܘܪ̈ܲܚܡܹܐ ܡܬܼܘܿܡܵܝܹ̈ܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ. ܐܲܓܸܿܢ ܘܐܲܫܪܵܐ ܒܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ؛ ܘܢܲܛܲܪ ܠܥܵܡܘܿܪ̈ܵܘܗܝ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ؛ ܒܲܨܠܘܿܬܼ ܟܠܗܘܿܢ ܩܲܕܝܼܫܹ̈ܐ ܡܪ̈ܲܥܝܵܢܲܝܟ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܬܘܼܒܼ ܨ̈ܠܵܘܵܬܼܵܐ ܕܟܲܕܼ ܥܵܐܹܠ ܐَܢܵܫ ܠܒܵܬܹ̈ܐ ܕܲܡܗܲܝܡܢܹ̈ܐ.

ܒܲܪܸܟܼ ܡܵܪܝ ܠܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ ܐܲܝܟܼ ܡܲܫܟܿܢܹܗ ܕܐܲܒܼܪܵܗܵܡ ܘܐܲܝܟܼ ܒܲܝܬܹܿܗ ܕܙܲܟܲܝ ܘܐܲܝܟܼ ܥܸܠܝܼܬܼܵܐ ܕܲܫܠܝܼܚܹ̈ܐ. ܘܢܲܛܲܪ ܠܥܵܡܘܿܪ̈ܵܘܗܝ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ ܒܲܨܠܘܿܬܼ ܟܠܗܘܿܢ ܩܲܕܝܼܫܹ̈ܐ ܡܪ̈ܲܥܝܵܢܲܝܟ؛ ܡܵܪܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܐَܚܪܹܬܼܵܐ.

ܪ̈ܲܚܡܲܝܟ ܡܵܪܝ ܘܲܚܢܵܢܵܟܼ ܘܥܘܼܕܼܪܵܢܵܟܼ ܘܦܘܼܪܩܵܢܵܟܼ. ܐܲܓܸܿܢ ܘܐܲܫܪܵܐ ܒܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ. ܘܢܲܛܲܪ ܠܥܵܡܘܿܪ̈ܵܘܗܝ ܡ̣ܢ ܟܿܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ. ܒܲܨܠܘܿܬܼ ܟܠܗܘܿܢ ܩܲܕܝܼܫܹ̈ܐ ܡܪ̈ܲܥܝܵܢܲܝܟ؛ ܡܵܪܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

♱♱♱♱♱♱♱

ܬܘܼܒܼ ܣܝܵܡܝܼܕܼܵܐ ܕܡܸܬܿܬܲܢܹܐ ܥܲܠ ܪܹܫܵܐ ܕܛܲܠܝܵܐ

ܟܲܕܼ ܡܸܬܼܪِܫܸܡ ܡ̣ܢ ܟܵܗܢܵܐ ܒܲܥܡܵܕܼܵܐ.

ܩܲܕܼܡܵܐܝܼܬܼ ܡܩܝܼܡ ܡܫܲܡܫܵܢܵܐ. ܢܨܲܠܸܐ؛ ܫܠܵܡܵܐ ܥܲܡܲܢ. ܘܡܲܗܦܸܟܼ ܟܵܗܢܵܐ ܐܲܦܵܘܗ̈‌ܝ ܠܘܼܩܒܲܠ ܥܵܡܘܿܕܵܐ. ܘܬܼܵܢܹܐ ܒܩܵܠܵܐ ܣܝܵܡܝܼܕܼܵܐ ܗܵܢܵܐ ܟܲܕܼ ܣܵܐܹܡ ܐܝܼܕܹܗ ܥܲܠ ܪܹ̈ܫܲܝܗܘܿܢ ܕܲܛܠܵܝܹ̈ܐ ܘܐܵܡܲܪ. ܐܸܫܬܲܡܠܝܼ ܡܵܪܝ ܫܘܼܘܕܵܝܵܐ ܕܪ̈ܲܚܡܹܝܟ؛ ܗ݁ܘ ܕܐܸܡܲܪܬܿ ܠܲܢ؛ ܬܢܝܼ؛ ܕܲܫܐܲܠܘ ܘܢܸܬܼܝܼܗܸܒܼ ܠܟܼܘܢ ܒܥܵܘ ܘܬܸܫܟܿܚܘܼܢ. ܩܘܿܫܘ ܘܢܸܬܼܦܬܲܚ ܠܟܼܘܿܢ. ܐܸܬܼܝܲܬܲܪ ܠܹܗ ܓܹܝܪ ܣܘܼܥܪܵܢܵܐ ܡ̣ܢ ܡܸܠܬܼܵܐ؛ ܘܲܥܒܼܵܕܼܵܐ ܡ̣ܢ ܫܘܼܘܕܵܝܵܐ. ܠܵܘ ܓܹܝܪ ܠܚܲܟܿܝܼܡܹ̈ܐ ܘܲܠܦܵܪ̈ܘܿܫܹܐ ܒܲܠܚܘܿܕܼ ܫܟܼܝܼܚܵܐ ܡܵܘܗܲܒܼܬܼܵܟܼ؛ ܘܲܦܬܼܝܼܚ ܬܲܪܥܵܐ ܕܲܡܪܲܚܡܵܢܘܼܬܼܵܟܼ. ܐܸܠܵܐ ܐܵܦ ܠܐܲܚܪ̈ܵܢܹܐ ܐܲܝܠܹܝܢ ܕܒܲܡܫܘܼܚܬܼܵܐ ܕܫܲܒܼܪܘܼܬܼܵܐ ܣ̣ܵܡ ܐܸܢܘܿܢ ܟܝܵܢܵܐ ܒܲܡܢܵܬܼܵܐ ܕܠܵܐ ܝܵܕܘܿܥܹ̈ܐ؛ ܕܡܸܢܗܘܿܢ ܐܝܼܬܲܝܗܘܿܢ ܝܲܠܘܼܕܹ̈ܐ ܗܵܠܹܝܢ ܕܩܵܝܡ݁ܝܼܢ ܩܕܼܵܡܲܝܟ. ܓܵܦܲܬ̤ ܐܸܢܘܿܢ ܛܲܝܒܿܘܼܬܼܵܐ ܒܲܡܣܝܼܕܬܵܐ ܡܲܚܝܵܢܝܼܬܼܵܐ. ܘܐܲܪܡܝܲܬ̤ ܐܸܢܘܿܢ ܒܡܵܐܢܵܐ ܩܲܕܝܼܫܵܐ ܕܲܥܡܵܕܼܵܐ ܡܚܲܣܝܵܢܵܐ. ܕܡ̣ܢ ܬܲܡ݁ܢ ܢܸܬܼܝܲܠܕܘܼܢ ܡܵܘܠܵܕܼܵܐ ܚܲܕܼܬܵܐ ܘܪܘܼܚܵܢܵܝܵܐ ܠܬܲܪܒܿܝܼܬܼܵܐ ܕܗܲܝܡܵܢܘܼܬܼܗܘܿܢ. ܘܟܲܕܼ ܠܵܐ ܡܟܲܬܿܡܝܼܢ ܦܲܓܼܪ̈ܲܝܗܘܿܢ ܒܨܵܐܬܼܵܐ ܕܲܚܛܝܼܬܼܵܐ. ܢܩܲܒܿܠܘܼܢ ܕܘܼܟܵܝܵܐ ܕܠܵܐ ܡܸܫܬܲܚܠܲܦ. ܘܢܸܗܘܘܿܢ ܗܲܕܵܡܵܘ̈ܗܝ ܕܲܡܫܝܼܚܵܐ. ܢܸܬܼܪܲܒܿܘܿܢ ܥܲܠ ܦܵܬܼܘܿܪܵܐ ܕܐَܪ̈ܵܙܵܘܗܝ. ܘܐܲܟܼܚَܕܼܵܐ ܬܸܫܘܲܚ ܒܗܘܿܢ ܩܵܘܡܬܼܵܐ ܦܲܓܼܪܵܢܵܝܬܵܐ. ܘܬܲܪܒܝܼܬܼܵܐ ܪܘܼܚܵܢܵܝܬܵܐ. ܬܼܵܘܕܲܥ ܐܸܢܘܿܢ ܛܲܝܒܿܘܼܬܼܵܟܼ ܚܲܝܠܹܗ ܕܥܵܠܡܵܐ ܕܲܥܬܼܝܼܕܼ. ܗ݁ܘ ܕܗܵܫܵܐ ܝܲܗَܒܼܬܿ ܠܗܘܿܢ ܛܘܼܦ̮ܣܹܗ ܟܲܕܼ ܠܵܐ ܫܐܸܠܘ. ܘܲܦܬܲܚܬܿ ܠܗܘܿܢ ܬܲܪܥܵܟܼ ܟܲܕܼ ܠܵܐ ܩܪܵܘ. ܕܥܲܡ ܟܠܗܘܿܢ ܫܲܪܝܼܪܹ̈ܐ ܒܢܲܝ̈ ܐَܪ̈ܵܙܲܝܟ؛ ܢܸܦܪܥܘܼܢ ܠܵܟܼ ܬܵܘܕܝܼܬܼܵܐ ܚܠܵܦ ܡܵܘܗܲܒܼܬܼܵܟܼ ܕܲܠܘܵܬܼܗܘܿܢ. ܘܢܲܣܩܘܼܢ ܠܵܟܼ ܬܸܫܒܿܘܚܬܼܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܬܼܵܐ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

ܘܪܵܫܹ݁ܡ ܒܐܵܐܲܪ ܥܲܠ ܟܠܗܘܿܢ. ܘܟܸܢ ܪܵܫܹܡ ܠܗܘܿܢ ܒܹܝܬܼ ܥܲܝܢܲܝ̈ܗܘܿܢ ܒܐܵܬ̤ܵܐ ܕܲܨܠܝܼܒܼܵܐ ܒܡܸܫܚܵܐ ܕܲܒܼܩܲܪܢܵܐ. ܒܨܸܒܼܥܹܗ ܕܲܠܘܵܬܼ ܟܪܵܬܹܗ. ܡ̣ܢ ܠܬܲܚܬ ܠܥܸܠ ܘܡ̣ܢ ܝܲܡܝܼܢܵܐ ܠܣܸܡܵܠܵܐ ܘܐܵܡܲܪ؛ ܡܸܬܼܪ̱ܫܸܡ ܦܠ݁ܢ (ܐܵܘ؛ ܡܸܬܼܪܲܫܡܵܐ ܦܠܵܢܝܼܬܼܵܐ) ܒܡܸܫܚܵܐ ܕܲܡܫܝܼܚܘܼܬܼܵܐ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

♱♱♱♱♱♱♱♱♱♱♱♱

ܬܘܼܒܼ؛ ܡܵܘܕܥܵܢܘܼܬܼܵܐ ܕܐܲܝܟܲܢ ܡܸܬܼܥِܡܕܼ

ܛܲܠܝܵܐ ܕܩܲܪܝܼܒܼ ܠܡܵܘܬܵܐ؛

ܐܵܘ ܡ̣ܢ ܥܸܠܬܼܵܐ ܐَܚܪܹܬܼܵܐ ܕܐܲܢܲܢܩܹ̈ܐ.

ܩܲܕܼܡܵܝܑܼܬܼ ܐܵܡܲܪ ܟܵܗܢܵܐ؛ ‌ܬܸܫܒܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ‌؛ ܓ ܙܲܒܼܢܝܼ̈ܢ؛ ܘܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

ܨܠܘܿܬܼܵܐ. ܢܸܣܬܿܓܸܕܼ ܘܢܸܫܬܲܒܲܚ ܘܢܸܬܼܝܲܩܲܪ ܘܢܸܬܼܪܲܡܪܲܡ ܘܢܸܬܿܬܵܘܕܸܐ ܘܢܸܬܼܒܲܪܲܟܼ؛ ܫܡܵܐ ܣܓܼܝܼܕܼܵܐ ܘܲܡܫܲܒܿܚܵܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܼܠܥܸܕܵܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܲܡܫܲܡܸܫ ܚܲܕܼ ܡܲܙܡܘܿܪܵܐ ܠܚܘܿܕܼ؛ ܫܘܼܪܵܝܵܐ ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟܼܪܹ̈ܐ؛ ܐܸܢ ܕܸܟܼܪܵܐ ܗَ̣ܘ؛ ܐܵܘ ܫܲܒܲܚܘ ܠܡܵܪܝܵܐ ܬܸܫܒܿܚܘܿܬܵܐ ܚܕܲܬܼܵܐ؛ ܐܸܢ ܢܸܩܒܿܬܼܵܐ ܗَ̣ܝ.

ܘܐܸܢ ܥܡܝܼܕܹ̈ܐ ܕܸܟܼܪܹ̈ܐ ܐܸܡܲܪ ܗܵܢܵܐ.

ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟܼܪܹ̈ܐ. ܐܲܝܬܵܘ ܠܡܵܪܝܵܐ ܫܘܼܒܼܚܵܐ ܘܐܝܼܩܵܪܵܐ. ܛܵܒܼܵܐ ܕܲܫܦܝܼܥܝܼܢ ܪ̈ܲܚܡܵܘܗܝ ܠܹܗ̤ܘ ܙܵܕܼܩܵܐ ܬܸܫܒܿܘܿܚܬܵܐ. ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟܼܪܹ̈ܐ. ܐܲܝܬܵܘ ܠܡܵܪܝܵܐ ܫܘܼܒܼܚܵܐ ܘܐܝܼܩܵܪܵܐ‍܋ ܐܲܝܬܵܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ. ܣܓܼܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܼܫܹܗ‍܋ ܩܵܠܹܗ ܕܡܵܪܝܵܐ ܥܲܠ ܡܲܝ̈ܵܐ. ܐܲܠܵܗܵܐ ܡܫܲܒܿܚܵܐ ܪܥܸܡ‌܋ ܡܵܪܝܵܐ ܥܲܠ ܡܲܝ̈ܵܐ ܣܲܓܿܝܼ̈ܐܹܐ. ܩܵܠܹܗ ܕܡܵܪܝܵܐ ܒܚܲܝܠܵܐ ܘܩܵܠܹܗ ܕܡܵܪܝܵܐ ܒܫܘܼܒܼܚܵܐ‌܋ ܩܵܠܹܗ ܕܡܵܪܝܵܐ ܕܲܡܚܲܬܸܿܦ ܐܲܪ̈ܙܹܐ. ܘܬܼܵܒܲܪ ܡܵܪܝܵܐ ܐܲܪ̈ܙܹܐ ܕܠܸܒܼܢܵܢ‌܋ ܪܲܩܸܕܼ ܐܸܢܘܿܢ ܐܲܝܟܼ ܥܸܓܼܠܹ̈ܐ. ܠܠܸܒܼܢܵܢ ܘܲܠܣܵܢܝܼܪ ܐܲܝܟܼ ܒܢܲܝ̈ ܪܲܝܡܵܐ‌܋ ܩܵܠܹܗ ܕܡܵܪܝܵܐ ܕܦܵܣܹܩ ܫܲܠܗܹܒܼܝܼܬܵܐ ܕܢܘܼܪܵܐ. ܩܵܠܹܗ ܕܡܵܪܝܵܐ ܕܲܡܙܝܼܥ ܡܲܕܼܒܿܪܵܐ‍܋ ܘܲܡܙܝܼܥ ܡܵܪܝܵܐ ܡܲܕܼܒܿܪܵܐ ܕܲܩܕܸܫ. ܩܵܠܹܗ ܕܡܵܪܝܵܐ ܕܲܡܙܝܼܥ ܐܝܼ̈ܠܵܬܼܵܐ ܘܲܡܥܲܩܲܪ ܥܵܒܹ̈ܐ‌܋ ܘܲܒܼܗܲܝܟܿܠܹܗ ܟܠ ܐَܢܵܫ ܐܵܡܲܪ ܫܘܼܒܼܚܵܐ. ܡܵܪܝܵܐ ܡܵܡܘܿܠܵܐ ܐܲܗܦܸܟܼ‌܋ ܝܑܼܬܸܿܒܼ ܡܵܪܝܵܐ ܡܲܠܟܵܐ ܠܥܵܠܲܡ. ܡܵܪܝܵܐ ܢܸܬܸܿܠ ܚܲܝܠܵܐ ܠܥܲܡܹܗ‌܋ ܘܡܵܪܝܵܐ ܢܒܲܪܸܟܼ ܠܥܲܡܹܗ ܒܲܫܠܵܡܵܐ. ܛܵܒܼܵܐ ܕܲܫܦܝܼܥܝܼܢ ܪ̈ܲܚܡܵܘܗܝ ܠܹܗ̤ܘ ܙܵܕܼܩܵܐ ܬܸܫܒܿܘܿܚܬܵܐ܋ ܫܲܒܲܚ. ܥܵܠܲܡ. ܛܵܒܼܵܐ ܕܲܫܦܝܼܥܝܼܢ ܪ̈ܲܚܡܵܘܗ‌ܝ ܠܹܗ̤ܘ ܙܵܕܼܩܵܐ ܬܸܫܒܿܘܿܚܬܵܐ܋ ܐܲܝܬܵܘ ܠܡܵܪܝܵܐ ܒܢܲܝ̈ ܕܸܟܼܪܹ̈ܐ. ܐܲܝܬܵܘ ܠܡܵܪܝܵܐ ܫܘܼܒܼܚܵܐ ܘܐܝܼܩܵܪܵܐ. ܛܵܒܼܵܐ ܕܲܫܦܝܼܥܝܼܢ ܪ̈ܲܚܡܵܘܗܝ ܠܹܗ̤ܘ ܙܵܕܼܩܵܐ ܬܸܫܒܿܘܿܚܬܵܐ܋

ܘܐܸܢ ܢܸܩ̈ܒܼܵܬܼܵܐ؛

ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ‍. ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܒܪܝܼܟܼ ܡܹܐܬܼܝܵܟܼ ܡܫܝܼܚܵܐ ܦܵܪܘܿܩܵܐ ܕܟܼܠ؛ ܕܐܲܫܘܝܼܬܿ ܠܲܢ ܕܥܲܡ ܪ̈ܘܼܚܵܢܹܐ ܢܫܲܒܿܚܵܟܼ. ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ‍. ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ‌܋ ܫܲܒܲܚܘ ܠܡܵܪܝܵܐ ܘܒܲܪܸܟܼ ܠܲܫܡܹܗ‍. ܣܲܒܲܪܘ ܡ̣ܢ ܝܘܿܡ ܠܝܘܿܡ ܦܘܼܪܩܵܢܹܗ‍܋ ܐܸܫܬܲܥܵܘ ܒܥܲܡܡܹ̈ܐ ܐܝܼܩܵܪܹܗ‍. ܘܲܒܼܟܼܠܗܘܿܢ ܥܲܡܡܹ̈ܐ ܥܒܼܵܕܼܵܘܗ̈‍‌ܝ‌܋ ܡܸܛܠ ܕܪܲܒܿܘܼ ܡܵܪܝܵܐ ܘܲܡܫܲܒܲܚ ܛܵܒܼ. ܘܲܕܼܚܝܼܠ ܥܲܠ ܟܠܗܘܿܢ ܐܲܠܵܗܹ̈ܐ‍܋ ܡܸܛܠ ܕܟܼܠܗܘܿܢ ܐܲܠܵܗܹ̈ܐ ܕܥܲܡܡܹ̈ܐ ܣܪܝܼܩܝܼܢ ܐܸܢܘܿܢ. ܡܵܪܝܵܐ ܫܡܲܝܵܐ ܥܒܲܕܼ‍܋ ܙܝܼܘܵܐ ܘܫܘܼܒܼܚܵܐ ܩܕܼܵܡܵܘܗ‌ܝ. ܥܘܼܫܢܵܐ ܘܬܸܫܒܿܘܿܚܬܵܐ ܒܡܲܩܕܫܹܗ‍܋ ܗܲܒܼܘ ܠܡܵܪܝܵܐ ܫܲܪ̈ܒܼܵܬܼܵܐ ܕܥܲܡܡܹ̈ܐ‍. ܗܲܒܼܘ ܠܡܵܪܝܵܐ ܬܸܫܒܿܘܿܚܬܵܐ ܘܐܝܼܩܵܪܵܐ‍܋ ܗܲܒܼܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ‍. ܫܩܘܿܠܘ ܩܘܼܪ̈ܒܵܢܹܐ ܘܥܘܿܠܘ ܠܕܼܵܪ̈ܵܘܗ‌ܝ‌܋ ܣܓܼܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܼܫܹܗ. ܬܙܘܼܥ ܡ̣ܢ ܩܕܼܵܡܵܘܗܝ ܟܠܵܗ̇ ܐܲܪܥܵܐ‍܋ ܐܸܡܲܪܘ ܒܹܝܬܼ ܥܲܡܡܹ̈ܐ ܕܡܵܪܝܵܐ ܐܲܡܠܸܟܼ. ܘܐܲܬܼܩܢܵܗ̇ ܠܬܹܒܹܝܠ ܕܠܵܐ ܬܙܘܼܥ‌܋ ܢܕܼܘܼܢ ܠܥܲܡܡܹ̈ܐ ܒܲܬܼܪܝܼܨܘܼܬܼܵܐ‍. ܢܸܚܕܘܿܢ ܫܡܲܝ̈ܵܐ ܘܲܬܿܕܼܘܼܨ ܐܲܪܥܵܐ‍܋ ܢܸܪܘܲܙ ܝܲܡܵܐ ܒܲܡܠܹܐܹܗ‍. ܢܸܬܼܥܲܫ̈ܢܵܢ ܚܲܩ̈ܠܵܬܼܵܐ ܘܟܼܠ ܕܐܝܼܬܼ ܒܗܹܝܢ‌܋ ܘܗܵܝܕܹܝܢ ܢܫܲܒܿܚܘܼܢ ܟܠܗܘܿܢ ܐܝܼܠܵܢܹ̈ܐ ܕܥܵܒܼܵܐ‍. ܩܕܼܵܡ ܡܵܪܝܵܐ ܕܐܵܬܹܗ ܠܲܡܕܼܵܢܵܗ̇ ܠܐܲܪܥܵܐ‍‍܋ ܕܵܐܹܢ ܬܹܒܹܝܠ ܒܙܲܕܝܼܩܘܼܬܼܵܐ.‍ ܘܲܠܥܵܡ̈ܡܹܐ ܒܗܲܝܡܵܢܘܼܬܼܵܐ. ܒܪܝܼܟܼ ܡܹܐܬܼܝܵܟܼ ܡܫܝܼܚܵܐ ܦܵܪܘܿܩܵܐ ܕܟܼܠ؛ ܕܐܲܫܘܝܼܬܿ ܠܲܢ ܕܥܲܡ ܪ̈ܘܼܚܵܢܹܐ ܢܫܲܒܿܚܵܟܼ܋ ܫܲܒܲܚ. ܥܵܠܲܡ. ܒܪܝܼܟܼ ܡܹܐܬܼܝܵܟܼ ܡܫܝܼܚܵܐ ܦܵܪܘܿܩܵܐ ܕܟܼܠ؛ ܕܐܲܫܘܝܼܬܿ ܠܲܢ ܕܥܲܡ ܪ̈ܘܼܚܵܢܹܐ ܢܫܲܒܿܚܵܟܼ܋ ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ‍. ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ. ܒܪܝܼܟܼ ܡܹܐܬܼܝܵܟܼ ܡܫܝܼܚܵܐ ܦܵܪܘܿܩܵܐ ܕܟܼܠ؛ ܕܐܲܫܘܝܼܬܿ ܠܲܢ ܕܥܲܡ ܪ̈ܘܼܚܵܢܹܐ ܢܫܲܒܿܚܵܟܼ܋

ܘܟܸܢ ܪܵܫܹ݁ܡ ܠܹܗ ܟܵܗܢܵܐ؛ ܐܸܢ ܥܕܲܟܹܿܝܠ ܠܵܐ ܩܲܒܸܠ ܪܘܼܫܡܵܐ. ܨܠܘܿܬܼܵܐ؛ ܐܸܫܬܲܡܠܝܼ ܡܵܪܝ ܫܘܼܘܕܵܝܵܐ ܕܪ̈ܲܚܡܹܝܟ؛ ܗ݁ܘ ܕܐܸܡܲܪܬܿ ܠܲܢ؛ ܬܢܝܼ؛ ܕܲܫܐܲܠܘ ܘܢܸܬܼܝܼܗܸܒܼ ܠܟܼܘܢ ܒܥܵܘ ܘܬܸܫܟܿܚܘܼܢ. ܩܘܿܫܘ ܘܢܸܬܼܦܬܲܚ ܠܟܼܘܿܢ. ܐܸܬܼܝܲܬܲܪ ܠܹܗ ܓܹܝܪ ܣܘܼܥܪܵܢܵܐ ܡ̣ܢ ܡܸܠܬܼܵܐ؛ ܘܲܥܒܼܵܕܼܵܐ ܡ̣ܢ ܫܘܼܘܕܵܝܵܐ. ܠܵܘ ܓܹܝܪ ܠܚܲܟܿܝܼܡܹ̈ܐ ܘܲܠܦܵܪ̈ܘܿܫܹܐ ܒܲܠܚܘܿܕܼ ܫܟܼܝܼܚܵܐ ܡܵܘܗܲܒܼܬܼܵܟܼ؛ ܘܲܦܬܼܝܼܚ ܬܲܪܥܵܐ ܕܲܡܪܲܚܡܵܢܘܼܬܼܵܟܼ. ܐܸܠܵܐ ܐܵܦ ܠܐܲܚܪ̈ܵܢܹܐ ܐܲܝܠܹܝܢ ܕܒܲܡܫܘܼܚܬܼܵܐ ܕܫܲܒܼܪܘܼܬܼܵܐ ܣ̣ܵܡ ܐܸܢܘܿܢ ܟܝܵܢܵܐ ܒܲܡܢܵܬܼܵܐ ܕܠܵܐ ܝܵܕܘܿܥܹ̈ܐ؛ ܕܡܸܢܗܘܿܢ ܐܝܼܬܲܝܗܘܿܢ ܝܲܠܘܼܕܹ̈ܐ ܗܵܠܹܝܢ ܕܩܵܝܡ݁ܝܼܢ ܩܕܼܵܡܲܝܟ. ܓܵܦܲܬ̤ ܐܸܢܘܿܢ ܛܲܝܒܿܘܼܬܼܵܐ ܒܲܡܣܝܼܕܬܵܐ ܡܲܚܝܵܢܝܼܬܼܵܐ. ܘܐܲܪܡܝܲܬ̤ ܐܸܢܘܿܢ ܒܡܵܐܢܵܐ ܩܲܕܝܼܫܵܐ ܕܲܥܡܵܕܼܵܐ ܡܚܲܣܝܵܢܵܐ. ܕܡ̣ܢ ܬܲܡ݁ܢ ܢܸܬܼܝܲܠܕܘܼܢ ܡܵܘܠܵܕܼܵܐ ܚܲܕܼܬܵܐ ܘܪܘܼܚܵܢܵܝܵܐ ܠܬܲܪܒܿܝܼܬܼܵܐ ܕܗܲܝܡܵܢܘܼܬܼܗܘܿܢ. ܘܟܲܕܼ ܠܵܐ ܡܟܲܬܿܡܝܼܢ ܦܲܓܼܪ̈ܲܝܗܘܿܢ ܒܨܵܐܬܼܵܐ ܕܲܚܛܝܼܬܼܵܐ. ܢܩܲܒܿܠܘܼܢ ܕܘܼܟܵܝܵܐ ܕܠܵܐ ܡܸܫܬܲܚܠܲܦ. ܘܢܸܗܘܘܿܢ ܗܲܕܵܡܵܘ̈ܗܝ ܕܲܡܫܝܼܚܵܐ. ܢܸܬܼܪܲܒܿܘܿܢ ܥܲܠ ܦܵܬܼܘܿܪܵܐ ܕܐَܪ̈ܵܙܵܘܗܝ. ܘܐܲܟܼܚَܕܼܵܐ ܬܸܫܘܲܚ ܒܗܘܿܢ ܩܵܘܡܬܼܵܐ ܦܲܓܼܪܵܢܵܝܬܵܐ. ܘܬܲܪܒܝܼܬܼܵܐ ܪܘܼܚܵܢܵܝܬܵܐ. ܬܼܵܘܕܲܥ ܐܸܢܘܿܢ ܛܲܝܒܿܘܼܬܼܵܟܼ ܚܲܝܠܹܗ ܕܥܵܠܡܵܐ ܕܲܥܬܼܝܼܕܼ. ܗ݁ܘ ܕܗܵܫܵܐ ܝܲܗَܒܼܬܿ ܠܗܘܿܢ ܛܘܼܦ̮ܣܹܗ ܟܲܕܼ ܠܵܐ ܫܐܸܠܘ. ܘܲܦܬܲܚܬܿ ܠܗܘܿܢ ܬܲܪܥܵܟܼ ܟܲܕܼ ܠܵܐ ܩܪܵܘ. ܕܥܲܡ ܟܠܗܘܿܢ ܫܲܪܝܼܪܹ̈ܐ ܒܢܲܝ̈ ܐَܪ̈ܵܙܲܝܟ؛ ܢܸܦܪܥܘܼܢ ܠܵܟܼ ܬܵܘܕܝܼܬܼܵܐ ܚܠܵܦ ܡܵܘܗܲܒܼܬܼܵܟܼ ܕܲܠܘܵܬܼܗܘܿܢ. ܘܢܲܣܩܘܼܢ ܠܵܟܼ ܬܸܫܒܿܘܚܬܼܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܬܼܵܐ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܥܵܢܹܝܢ؛ ܐܵܡܹܝܢ.

ܘܟܸܢ؛ ܠܵܟܼܘܼ ܡܵܪܵܐ. ܥܲܡ ܨܠܘܿܬܼܵܐ؛ ܐܲܢَܬ݁ܘܼ ܡܵܪܝ.

ܘܐܲܩܸܦ؛ ܩܲܕܝܼܫܵܐ ܐܲܠܵܗܵܐ. ܥܲܡ ܨܠܘܿܬܼܵܐ؛ ܩܲܕܝܼܫܵܐ ܘܲܫܒܼܝܼܚܵܐ.

ܘܟܸܢ ܡܲܝܬܹܿܝܢ ܡܲܝ̈ܵܐ ܒܡܵܐܢܵܐ. ܘܐܸܢ ܟܵܗܢܵܐ ܗَܘ̣ ܗ݁ܘ ܕܡܲܥܡܸܕܼ؛ ܐܵܡܲܪ ܥܠܲܝܗܘܿܢ ܚܲܕܼ ܩܵܢܘܿܢܵܐ ܒܲܠܚܘܿܕܼ؛ ܛܲܝܒܿܘܼܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܘܪܵܫܹ݁ܡ ܥܲܠ ܡܲܝ̈ܵܐ ܨܠܝܼܒܼܵܐܝܼܬܼ. ܐܸܢ ܡܫܲܡܫܵܢܵܐ ܗَ̣ܘ ܕܹܝܢ ܗ݁ܘ ܕܡܲܥܡܸܕܼ ܡ̣ܢ ܐܲܢܲܢܩܹ̈ܐ؛ ܠܵܐ ܐܵܡܲܪ ܚܲܕܼ ܡ̣ܢ ܗܵܠܹܝܢ ܕܟܵܗ̈ܢܵܝܵܬܼܵܐ ܣܵܟܼ.

ܘܪܵܫܹ݁ܡ ܟܵܗܢܵܐ ܠܡܲܝ̈ܵܐ ܒܡܸܫܚܵܐ ܕܲܒܼܩܲܪܢܵܐ ܨܠܝܼܒܼܵܐܝܼܬܼ ܟܲܕܼ ܐܵܡܲܪ؛ ܡܸܬܼܪܲܫܡܝܼܢ ܡܲܝ̈ܵܐ ܗܵܠܹܝܢ ܒܡܸܫܚܵܐ ܩܲܕܝܼܫܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܟܸܢ ܡܲܥܡܸܕܼ ܠܹܗ ܟܵܗܢܵܐ ܠܛܲܠܝܵܐ ܐܲܝܟܼ ܚܲܝܠܹܗ، ܟܠܹܗ ܓܘܼܫܡܹܗ.

ܘܟܸܢ ܐܲܒܼܘܼܢ ܕܒܲܫܡܲܝܵܐ... ܘܫܲܪܟܵܐ.

ܘܲܡܨܲܠܹܝܢ. ܚܲܢܵܢܵܐ ܕܩܲܕܝܼܫ ܫܡܹܗ؛ ܛܵܒܼܵܐ ܘܟܹܐܢܵܐ ܕܡ̣ܢ ܥܵܠܲܡ. ܫܦܝܼܥܵܐ ܛܲܝܒܿܘܼܬܹܗ ܘܲܡܪܲܚܡܵܢܘܼܬܹܗ. ܐܲܫܦܲܥ ܡܵܪܲܢ ܘܐܲܠܵܗܲܢ ܚܵܢܵܢܵܐ ܕܒܲܣܝܼܡܘܼܬܹܗ ܕܚܘܼܒܵܟܼ ܥܲܠ ܢܲܦ̮̈ܫܵܬܼܵܐ ܕܣܵܓܼܘܿܕܲܝ̈ܟ ܕܩܵܪܹܝܢ ܘܡܸܬܼܟܲܫܦܝܼܢ ܠܵܟܼ ܒܟܼܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܲܠܡܝܼܢ.

ܚܵܬܼܵܗ݁. ܒܒܼܘܪܟܿܬܼܵܟܼ ܡܵܪܲܢ ܘܐܲܠܵܗܲܢ ܢܸܬܼܒܲܪܟܼܘܢ ܥܲܒܼܕܲܝ̈ܟ؛ ܘܒܲܒܼܛܝܼܠܘܼܬܹܗ ܕܨܸܒܼܝܵܢܵܟܼ ܢܸܬܼܢܲܛܪܘܼܢ ܣܵܓܼܘܿܕܲܝ̈ܟ؛ ܘܫܲܝܢܵܐ ܡܵܪܝ ܐܲܡܝܼܢܵܐ ܕܐܲܠܵܗܘܼܬܼܵܟܼ ܘܲܫܠܵܡܵܐ ܕܢܲܓܿܝܼܪܵܐ ܕܡܵܪܘܼܬܼܵܟܼ ܢܲܡܠܸܟܼ ܒܥܲܡܵܟܼ ܘܲܒܼܥܹܕܬܵܟܼ ܟܠܗܘܿܢ ܝܵܘܡܵܬܹ̈ܗ ܕܥܵܠܡܵܐ ܡܵܪܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܲܠܡܝܼܢ. ܘܥܵܢܹ݁ܝܢ؛ ܐܵܡܹܝܢ.

ܘܚܵܬܹܿܡ ܒܗܵܕܹܐ؛

ܒܘܼܪܟܿܬܼܵܟܼ ܡܵܪܲܢ ܘܐܲܠܵܗܲܢ ܥܲܠ ܥܲܡܵܟܼ ܬܸܬܿܢܝܼܚ. ܘܲܥܠܲܝܢ ܡܚܝܼܠܹ̈ܐ ܘܚܲܛܵܝܹ̈ܐ ܪ̈ܲܚܡܲܝܟ ܘܲܚܵܢܵܢܟܼ ܢܸܗܘܘܿܢ ܐܲܡܝܼܢܵܐܝܬܼ؛ ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܝܡܝܼܢ. ܘܥܵܢܹܝܢ؛ ܐܵܡܹܝܢ.

ܘܕܲܥ ܐܘܿ ܡܵܪܝ ܩܵܪܘܿܝܵܐ؛ ܕܐܸܢܗ̤ܘ ܕܢܸܚܸܐ ܛܲܠܝܵܐ؛ ܡ̣ܢ ܟܠ ܦܪܘܿܣ ܡܲܥܡ̱ܕܼܝܢ ܠܹܗ ܓܡܝܼܪܵܐܝܼܬܼ ܒܥܕܹܬܵܐ ܐܲܝܟܼ ܛܲܟܼܣܵܐ ܡܫܲܡܠ̱ܝܵܐܝܼܬܼ.

♱♱♱♱♱♱♱♱♱♱♱♱

ܬܘܼܒܼ ܣܝܵܡܝܼܕܼܵܐ ܕܡܸܬܲܢܹܐ ܥܲܠ ܪܹܫܵܐ ܕܬܲܝܵܒܼܵܐ ܟܲܕܼ ܡܸܬܼܚܲܣܸܐ ܡ̣ܢ ܟܵܗܢܵܐ.

ܐܲܠܵܗܲܢ ܛܵܒܼܵܐ ܘܲܡܠܸܐ ܪ̈ܲܚܡܹܐ ܬܢܝܼ؛ ܕܥܲܠ ܟܠ ܫܦܝܼܥܵܐ ܛܲܝܒܿܘܼܬܹܗ ܘܲܡܪܲܚܡܵܢܘܼܬܹܗ. ܐܲܫܦܲܥ ܡܵܪܝ ܚܢܵܢܵܐ ܕܒܲܣܝܼܡܘܼܬܹܗ ܕܚܘܼܒܵܟܼ ܥܲܠ ܥܲܒܼܕܵܟܼ ܗܵܢܵܐ (ܥܲܠ ܐܲܡܬܼܵܟܼ ܗܵܕܹܐ) ܘܫܲܚܠܸܦܲܝܗ‌ܝ (ܘܫܲܚܠܸܦܹܝܗ݁) ܒܣܲܒܼܪܵܐ ܕܚܘܼܕܵܬܼܵܐ ܕܡܸܢܕܪܹܫ ܠܚܲܝܹ̈ܐ ܕܲܬܼܝܵܒܼܘܼܬܼܵܐ. ܘܚܲܕܸܬܼ ܒܓܼܵܘܹܗ (ܒܓܼܵܘܵܗ݁) ܪܘܼܚܵܟܼ ܩܲܕܝܼܫܵܐ ܕܐܸܬܼܚ̣ܬܸܿܡ (ܕܐܸܬܼܚܲܬܿܡܲܬ̤) ܒܹܗ ܠܝܵܘܡܵܐ ܕܦܘܼܪܩܵܢܵܐ. ܘܕܲܟܲܝܗܝ (ܘܕܲܟܹܿܝܗ݁) ܒܲܚܢܵܢܵܟܼ ܡ̣ܢ ܟܠܵܗ݁ ܛܲܡܐܘܼܬܼܵܐ ܕܒܸܣܪܵܐ ܘܲܕܼܪܘܼܚܵܐ؛ ܘܫܲܪܲܪ ܣܲܒܼܪܵܐ ܕܗܲܝܡܵܢܘܼܬܹܗ (ܕܗܲܝܡܵܢܘܼܬܼܵܗ݁) ܒܥܘܼܕܼܪܵܢܵܐ ܕܛܲܝܒܿܘܼܬܼܵܟܼ. ܘܲܬܼܪܘܿܨ ܗܲܠ̈ܟܼܵܬܼܵܐ ܕܕܼܘܼܒܵܪ̈ܵܘܗܝ (ܕܕܼܘܼܒܵܪܹ̈ܝܗ݁) ܒܲܫܒܼܝܼܠܹ̈ܐ ܕܙܲܕܝܼܩܘܼܬܼܵܐ. ܘܒܲܣܸܡܲܝܗܝ (ܘܒܲܣܸܡܹܝܗ݁) ܥܲܡ ܩܲܕܝܼܫܹ̈ܐ ܒܡܲܠܟܿܘܼܬܼܵܟܼ ܒܫܘܼܪܵܪ ܣܲܒܼܪܵܐ ܕܗܲܝܡܵܢܘܼܬܹܗ (ܕܗܲܝܡܵܢܘܼܬܼܵܗ݁) ܕܣܝܼܡܲܬ̣ ܒܢܲܝ̈ܵܐ ܘܒܼܘܼܣܵܡܵܐ ܕܐَܪ̈ܵܙܲܝܟ ܡܚܲܣܝܵܢܹ̈ܐ. ܘܚܲܝܸܠܲܝܗܝ (ܘܚܲܝܸܠܹܝܗ݁) ܒܥܘܼܕܼܪܵܢܵܐ ܕܪ̈ܲܚܡܲܝܟ ܕܢܸܛܲܪ (ܕܬܸܛܲܪ) ܦܘܼܩܕܵܢܲܝ̈ܟ ܘܢܸܓܼܡܘܿܪ (ܘܬܸܓܼܡܘܿܪ) ܨܸܒܼܝܵܢܵܟܼ؛ ܠܡܵܘܕܵܝܘܼ ܘܲܠܡܸܣܓܲܕܼ ܘܠܲܡܫܲܒܵܚܘܼ ܠܲܫܡܵܟܼ ܩܲܕܝܼܫܵܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ ♰ ܘܪܵܫܹ݁ܡ ܥܲܠ ܪܹܫܹܗ ܕܬܲܝܵܒܼܵܐ.

ܘܩܵܪܹܐ ܥܠܵܘܗܝ ܩܸܪܝܵܢܵܐ ܗܵܢܵܐ ܡ̣ܢ ܐܹܘܲܢܓܲܠܝܼܘܿܢ ܕܥܲܠ ܬܲܝܵܒܹ̈ܐ؛

ܐܹܘܲܢܓܲܠܝܼܘܿܢ ܩܲܕܝܼܫܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܟܵܪܘܿܙܘܼܬܼܵܐ ܕܠܘܼܩܵܐ.

܀ ܘܐܸܡܲܪ ܝܑܼܫܘܿܥ ܠܬܲܠܡܝܼܕܼܵܘܗ̈‌ܝ ܡܲܬܼܠܵܐ ܗܵܢܵܐ؛ ܕܲܒܼܟܼܠܥܸܕܵܢ ܢܨܲܠܘܿܢ ܘܠܵܐ ܬܸܡܐܲܢ ܠܗܘܿܢ܋ ܕܲܝܵܢܵܐ ܚܲܕܼ ܐܝܬܼ ܗَ̣ܘܵܐ ܒܲܡܕܼܝܼܢَܬܵܐ ܚܕܼܵܐ. ܕܡ̣ܢ ܐܲܠܵܗܵܐ ܠܵܐ ܕܵܚܸ݁ܠ ܗَ̣ܘܵܐ. ܘܡ̣ܢ ܒܢܲܝ̈ܢܵܫܵܐ ܠܵܐ ܡܸܬܼܟܲܚܲܕܼ ܗَ̣ܘܵܐ܋ ܐܲܪܡܲܠܬܵܐ ܕܹܝܢ ܚܕܼܵܐ ܐܝܼܬܼ ܗَ̣ܘܵܐ ܒܲܡܕܼܝܼܢَܬܵܐ ܗ݁ܝ. ܘܐܵܬܼ݁ܝܵܐ ܗَ̣ܘܵܬܼ ܠܘܵܬܹܗ ܘܐܵܡ݁ܪܵܐ؛ ܬܒܲܥܲܝܢܝ ܡ̣ܢ ܒܥܸܠܕܝܼܢ܋ ܘܠܵܐ ܨܵܒܹ݁ܐ ܗَ̣ܘܵܐ ܙܲܒܼܢܵܐ ܣܲܓ݁ܝܼܐܵܐ. ܒܵܬܲܪܟܸ݁ܢ ܕܹܝܢ ܐܸܡܲܪ ܒܢܲܦ̮ܫܹܗ؛ ܐܸܢ ܡ̣ܢ ܐܲܠܵܗܵܐ ܠܵܐ ܕܵܚܹ݁ܠ ܐَܢܵܐ. ܘܡ̣ܢ ܒܢܲܝ̈ܢܵܫܵܐ ܠܵܐ ܡܸܬܼܟܲܚܲܕܼ ܐَܢܵܐ܋ ܐܵܦܸܢ ܡܸܛܠ ܕܡܲܠܝܐ̱ܝܵܐ ܠܝܼ ܗܵܕܹܐ ܐܲܪܡܲܠܬܵܐ ܐܸܬܼܒ݁ܥܝܼܗ݁ ܕܠܵܐ ܒܟܼܠܥܸܕܵܢ ܬܸܗܘܸܐ ܐܵܬܼܝܵܐ ܡܲܗܪܵܐ ܠܝܼ܋ ܘܐܸܡܲܪ ܡܵܪܲܢ؛ ܫܡܥܲܘ ܡܵܢܵܐ ܐܸܡܲܪ ܕܲܝܵܢܵܐ ܕܥܵܘ̣ܠܵܐ܋ ܐܲܠܵܗܵܐ ܕܹܝܢ ܠܵܐ ܝܲܬ݁ܝܼܪܵܐܝܼܬܼ ܢܸܥܒܸ݁ܕܼ ܬܒܲܥܬܼܵܐ ܠܲܓܼܒܼܵܘ̈ܗܝ. ܕܩܵܪܹܝ݁ܢ ܠܹܗ ܒܐܝܼܡܵܡܵܐ ܘܲܒܼܠܸܠܝܵܐ ܘܡܲܓܲܪ ܪܘܼܚܹܗ ܥܠܲܝܗܘܿܢ؟܋ ܐܵܡܲܪ ܐَܢܵܐ ܠܟܼܘܿܢ؛ ܕܢܸܥܒܸܕܼ ܬܒܲܥܬܼܗܘܿܢ ܒܲܥܓܲܠ. ܒܪܲܡ ܢܹܐܬܸܐ ܒܪܹܗ ܕܐَܢܵܫܵܐ. ܘܢܸܫܟܲܚ ܟܲܝ ܗܲܝܡܵܢܘܼܬܼܵܐ ܥܲܠ ܐܲܪܥܵܐ؟܋ ܘܐܸܡܲܪ ܗَ̣ܘܵܐ ܡܲܬܼܠܵܐ ܗܵܢܵܐ. ܠܘܼܩܒܲܠ ܐَܢܵܫܵܐ ܐܲܝܠܹܝܢ ܕܲܬܼܟܼܝܼܠܝܼܢ ܥܲܠ ܢܲܦ̮ܫܗܘܿܢ ܕܐܝܼܬܲܝܗܘܿܢ ܙܲܕܝܼܩܹ̈ܐ ܘܒܼܵܣܹ݁ܝܢ ܥܲܠ ܟܠܢܵܫ܋ ܬܪܹܝܢ ܓܲܒܼܪ̈ܝܼܢ ܣܠܸܩ̣ܘ ܠܗܲܝܟܿܠܵܐ ܠܲܡܨܲܠܵܝܘܼ. ܚܲܕܼ ܦܪܝܼܫܵܐ ܘܲܐَܚܪܹܢܵܐ ܡܵܟܼܣܵܐ܋ ܘܗ݁ܘ ܦܪܝܼܫܵܐ ܩܵܐܹ݁ܡ ܗَ̣ܘܵܐ ܒܲܝܢܵܘܗܝ ܠܢܲܦ̮ܫܹܗ ܘܗܵܠܹܝܢ ܡܨܲܠܸܐ ܗَ̣ܘܵܐ. ܐܲܠܵܗܵܐ ܡܵܘܕܸܐ ܐَܢܵܐ ܠܵܟܼ. ܕܠܵܐ ܗَܘܹ݁ܝܬܼ ܐܲܝܟܼ ܫܲܪܟܵܐ ܕܐَܢܵܫܵܐ ܚܵܛܘܿܦܹ̈ܐ ܘܥܵܠܘܿܒܹ̈ܐ ܘܓܲܝܵܪܹ̈ܐ. ܘܠܵܐ ܐܲܝܟܼ ܗܵܢܵܐ ܡܵܟܼܣܵܐ܋ ܐܸܠܵܐ ܨܵܐܹ݁ܡ ܐَܢܵܐ ܬܪܹܝܢ ܒܫܲܒܿܬܼܵܐ. ܘܲܡܥܲܣܲܪ ܐَܢܵܐ ܟܠܡܸܕܸܡ ܕܩܵܢܹ݁ܐ ܐَܢܵܐ܋ ܗ݁ܘ ܕܹܝܢ ܡܵܟܼܣܵܐ ܩܵܐܹ݁ܡ ܗَ̣ܘܵܐ ܡ̣ܢ ܪܘܼܚܩܵܐ. ܘܠܵܐ ܨܵܒܹ݁ܐ ܗَ̣ܘܵܐ ܐܵܦ ܠܵܐ ܥܲܝܢܵܘ̈ܗܝ ܢܪܝܼܡ ܠܲܫܡܲܝܵܐ. ܐܸܠܵܐ ܛܵܪܹܦ ܗَ̣ܘܵܐ ܥܲܠ ܚܲܕܼܝܹܗ. ܘܐܵܡܲܪ؛ ܐܲܠܵܗܵܐ ܚܘܼܢܲܝܢܝ ܠܚܲܛܵܝܵܐ܋ ܐܵܡܲܪ ܐَܢܵܐ ܠܟܼܘܿܢ؛ ܕܲܢ̣ܚܸܬܼ ܗܵܢܵܐ ܡܙܲܕܲܩ ܠܒܲܝܬܹ݁ܗ ܝܲܬ݁ܝܼܪ ܡ̣ܢ ܗ݁ܘ ܦܪܝܼܫܵܐ. ܟܠܢܵܫ ܓܹܝܪ ܕܲܢܪܝܼܡ ܢܲܦ̮ܫܹܗ؛ ܢܸܬܼܡܲܟܲܟܼ ܘܟܼܠ ܡ݁ܢ ܕܢܲܡܸܟܼ ܢܲܦ̮ܫܹܗ ܢܸܬܿܬܿܪܝܼܡ܋ [ܠܘܼܩܵܐ ܝܚ؛2-14]

♱♱♱♱♱♱♱♱♱♱♱

ܛܲܟܼܣܵܐ ܕܒܘܼܪܵܟܼ ܒܵܬܹ̈ܐ

ܕܲܡܛܲܟܲܣ ܠܡܵܪܝ ܛܝܼܡܵܬܹܐܘܿܣ؛

ܡܝܼܛܪܵܦܘܿܠܹܝܛܵܐ ܕܡܵܠܵܒܲܪ ܘܲܕ݂ܗܸܢܕܘܿ.

ܩܲܕ݂ܡܵܝܲܬܼ ܡܛܲܝܒܼܝܼܢ ܟܠ ܡܸܕܸܡ ܕܡܸܬܼܒܿܥܸܐ ܗܵܢܵܘ ܕܹܝܢ: ܐܹܘܲܢܓܵܠܝܼܘܿܢ ܨܠܝܼܒܼܵܐ ܢܲܗܝܼܪ̈ܵܐ ܘܦܝܼܪܡܵܐ: ܘܫܲܪܟܵܐ. ܘܣܵܝ݁ܡܝܼܢ ܥܲܠ ܦܵܬܼܘܿܪܵܐ ܒܚܲܕ݂ ܡ̣ܢ ܩܲܝܛܘܿܢܵܐ ܕܠܵܚܹܡ ܠܣܘܼܥܪܵܢܵܐ: ܠܐܲܦܲܝ̈ ܡܲܕܢ̱ܚܵܐ. ܘܗܵܝܕܹܝܢ ܣܵܕܪܝܼܢ ܒܓܘܼܕܹܿܐ ܩܲܫܝܼܫܹ̈ܐ ܘܫܲܡܵܫܹ̈ܐ ܘܥܲܡܵܐ ܕܲܡܛܲܝܲܒܼ.

ܘܲܡܫܲܪܸܐ ܟܵܗܢܵܐ ܛܘܼܝܵܒܼܵܐ ܢܝܼܚܵܐܝܼܬܼ ܒܠܸܒܹܿܗ.

ܘܟܸܢ: ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕ݂ܫܵܐ ܠܥܵܠܡܝܼܢ ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ ܘܥܲܠ ܐܲܪܥܵܐ ܫܠܵܡܵܐ ܘܣܲܒ̣ܪܵܐ ܛܵܒ̣ܵܐ ܠܲܒ̣ܢܲܝ̈ܢܵܫܵܐ ܒܟ̣ܠ ܥܸܕܵܢ ܠܥܵܠܡܝܼܢ ܐܵܡܹܝܢ.

ܘܐܵܡܪܝܼܢ: ܐܲܒܼܘܼܢ ܕܒܲܫܡܲܝܵܐ... ܘܫܲܪ܊

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛
ܫܠܵܡܵܐ ܥܲܡܲܢ.

ܨܠܘܿܬ̣ܵܐ. ܒܪܝܼܟܼܝܼܢ ܡܵܪܝ ܪ̈ܲܚܡܹܐ ܕܛܲܝܒܿܘܼܬܼܵܟܼ ܘܲܣܓܼܝܼܕܝܼܢ ܫܘܼܘܕܵܝܹܐ ܕܡܵܪܘܼܬܼܵܟܼ: ܕܲܒܼܟܼܠܙܒܲܢ ܡܲܠܦܝܼܢ ܠܲܢ ܕܲܢܚܘܼܪ ܠܘܵܬܼܵܟܼ ܘܢܸܫܬܲܒܼܗܲܪ ܒܵܟܼ: ܘܠܵܐ ܢܸܦܣܘܿܩ ܣܲܒܼܪܲܢ ܡܸܢܵܟܼ ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ: ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܥܵܢܹܝܢ: ܐܵܡܹܝܢ.

ܘܲܡܫܲܪܹܝܢ ܡܲܙܡܘܿܪܵܐ:

ܡܵܪܝܵܐ ܢܸܪܥܹܝܢܝ ܘܡܸܕܸܡ ܠܵܐ ܢܚܲܣܲܪ ܠܝܼ. ܘܥܲܠ ܡܲܪ̈ܓܹܐ ܕܥܘܼܫܢܵܐ ܢܲܫܪܹܝܢܝ. ܥܲܠ ܡܵܪܝܵܐ ܢܸܫܪܹܐ ܨܸܦܬܲܢ ܝܵܨܘܿܦܵܐ ܕܒܲܝܬܵܝܵܘ̈ܗܝ. ܡܵܪܝܵܐ ܢܸܪܥܹܝܢܝ ܘܡܸܕܸܡ ܠܵܐ ܢܚܲܣܲܪ ܠܝܼ. ܘܥܲܠ ܡܲܪ̈ܓܹܐ ܕܥܘܼܫܢܵܐ ܢܲܫܪܹܝܢܝ‌‌܋ ܘܥܲܠ ܡܲܝ̈ܵܐ ܢܝܼܚܹܐ ܢܕܲܒܿܪܲܢܝ. ܢܲܦ̮ܫܝ ܐܲܦܢܝܼ ܘܕܲܒܿܪܲܢܝ ܒܲܫܒܼܝܼܠܲܝ̈ ܩܘܼܫܬܵܐ‌‌܋ ܡܸܛܠ ܫܡܵܟܼ ܐܵܦܸܢ ܐܹܗܲܠܸܟܼ. ܒܢܲܚܠܲܝ̈ ܛܸܠܵܠܲܝ̈ ܡܵܘܬܵܐ‌܋ ܠܵܐ ܐܸܕ݂ܚܲܠ ܡ̣ܢ ܒܝܼܫܬܵܐ ܡܸܛܠ ܕܐܲܢ݇ܬܿ ܥܲܡܝ. ܫܲܒܼܛܵܟܼ ܘܚܘܼܛܪܵܟܼ ܗܸܢܘܿܢ ܒܲܝܐܘܼܢܝ‌܋ ܣܕܲܪܬܿ ܩܕܼܵܡܲܝ ܦܵܬܘܿܪܹ̈ܐ ܠܘܼܩܒܲܠ ܒܥܸܠܕܒܼܵܒܲܝ̈. ܐܲܕܼܗܸܢܬܿ ܪܹܫܝ ܒܡܸܫܚܵܐ ܘܟܼܵܣܝ ܡܲܪܘܸܐ ܐܲܝܟ݂ ܚܲܝܵܐ‌܋ ܛܲܝܒܿܘܼܬܼܵܟܼ ܘܪ̈ܲܚܡܲܝܟ ܪܲܕ݂ܦܘܼܢܝ. ܟܠܗܘܿܢ ܝܵܘܡܵܬܼ̈ܵܐ ܕܚܲܝܲܝ̈. ܕܐܸܥܡܲܪ ܒܒܲܝܬܹܿܗ ܕܡܵܪܝܵܐ ܢܘܼܓܼܪܵܐ ܕܝܵܘ̈ܡܵܬܼܵܐ‌. ܥܲܠ ܡܵܪܝܵܐ ܢܸܫܪܸܐ ܨܸܦܬܲܢ ܝܵܨܘܿܦܵܐ ܕܒܲܝܬܵܝܵܘ̈ܗܝ܋ ܫܲܒܲܚ. ܥܵܠܲܡ. ܥܲܠ ܡܵܪܝܵܐ ܢܸܫܪܸܐ ܨܸܦܬܲܢ ܝܵܨܘܿܦܵܐ ܕܒܲܝܬܵܝܵܘ̈ܗܝ܋ ܡܵܪܝܵܐ ܢܸܪܥܹܝܢܝ ܘܡܸܕܸܡ ܠܵܐ ܢܚܲܣܲܪ ܠܝܼ. ܘܥܲܠ ܡܲܪ̈ܓܹܐ ܕܥܘܼܫܢܵܐ ܢܲܫܪܹܝܢܝ. ܥܲܠ ܡܵܪܝܵܐ ܢܸܫܕܸܐ ܨܸܦܬܲܢ ܝܵܨܘܿܦܵܐ ܕܒܲܝܬܵܝܵܘ̈ܗܝ܋

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛
ܫܠܵܡܵܐ ܥܲܡܲܢ.

ܨܠܘܿܬܼܵܐ. ܒܝܲܡܝܼܢܵܟܼ ܡܵܪܝ ܢܲܛܲܪ ܠܲܢ: ܘܲܬܼܚܹܝܬ̣ ܟܸܢܦܲܝ̈ܟ ܣܲܬܲܪ ܠܲܢ: ܘܥܘܼܕܪܵܢܵܟ݂ ܢܸܬ̣ܠܵܘܸܐ ܠܲܢ: ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ: ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܐܵܡܪܝܼܢ ܡܲܙܡܘܿܪܵܐ:

ܝܵܬܹܿܒܼ ܒܣܸܬܵܪܹܗ ܕܲܡܪܲܝܡܵܐ. ܘܲܒ̣ܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ. ܐܲܢ݇ܬܼܘܼ ܬܘܼܟܼܠܵܢܝ ܡܫܝܼܚܵܐ ܠܥܵܠܲܡ ܠܵܐ ܐܸܒܼܗܲܬܼ. ܝܵܬܹܿܒܼ ܒܣܸܬܵܪܹܗ ܕܲܡܪܲܝܡܵܐ. ܘܲܒܼܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ‌܋ ܐܸܡܲܪ ܠܡܵܪܝܵܐ ܬܘܼܟܼܠܵܢܝ. ܒܹܝܬܼ ܓܵܘܲܣܝ ܐܲܠܵܗܵܐ ܕܲܬܼܟܼܝܼܠ ܐ݇ܢܵܐ ܥܠܵܘܗܝ‌܋ ܕܗܘ̤ ܢܦܲܨܹܝܟܼ ܡ̣ܢ ܦܲܚܵܐ ܕܬܼܘܼܩܠ̱ܬܼܵܐ. ܘܡ̣ܢ ܡܲܡܠܠܵܐ ܕܲܣܪܝܼܩܘܼܬܼܵܐ‌܋ ܒܐܸܒܼܪ̈ܵܘܗܝ ܢܦܲܨܹܝܟܼ ܘܲܬܼܚܘܿܬܼ ܟܸܢܦܵܘ̈ܗܝ ܬܸܣܬܲܬܲܪ. ܙܲܝܢܵܐ ܢܸܚܕܪܵܟܼ ܩܘܼܫܬܹܿܗ‌܋ ܠܵܐ ܬܸܕܼܚܲܠ ܡ̣ܢ ܕܸܚܠ̱ܬܼܵܐ ܕܠܸܠܝܵܐ. ܘܡ̣ܢ ܓܹܐܪܵܐ ܕܦܵܪܲܚ ܒܐܝܼܡܵܡܵܐ‌܋ ܘܡ̣ܢ ܡܸܠܬܼܵܐ ܕܲܡܗܲܠܟܼܵܐ ܒܚܸܫܘܿܟܼܵܐ. ܘܡ̣ܢ ܪܘܼܚܵܐ ܕܫܵܝܕܵܐ ܒܛܲܗܪܵܐ‌܋ ܢܸܦܠܘܼܢ ܡ̣ܢ ܣܸܛܪܵܟܼ ܐܲܠܦܹ̈ܐ. ܘܪܸ̈ܒܿܘܵܬܼܵܐ ܡ̣ܢ ܝܲܡܝܼܢܵܟܼ‌܋ ܘܲܠܘܵܬܼܵܟܼ ܠܵܐ ܢܸܬܼܩܲܪܒܼܘܼܢ. ܐܸܠܵܐ ܒܥܲܝܢܲܝ̈ܟ ܒܲܠܚܘܿܕܼ ܬܸܚܙܸܐ‌܋ ܒܦܘܼܪܥܵܢܗܘܿܢ ܕܪ̈ܲܫܝܼܥܹܐ ܬܸܚܙܸܐ. ܡܸܛܠ ܕܐܲܢ݇ܬܿܘܼ ܡܵܪܝܵܐ ܬܘܼܟܼܠܵܢܝ‌܋ ܕܒܲܡܪܵܘܡܵܐ ܣܵܡܬܿ ܡܲܥܡܪܵܟܼ: ܠܵܐ ܬܸܩܪܘܿܒܼ ܠܵܟܼ ܒܝܼܫܬܵܐ‌܋ ܘܲܡܚܘܿܬܼܵܐ ܠܵܐ ܬܸܬܼܩܲܪܲܒܼ ܠܡܲܫܟܿܢܵܟܼ. ܡܸܛܠ ܕܲܠܡܲܠܵܟܼܵܘ̈ܗܝ ܢܦܲܩܸܕܼ ܥܠܲܝܟ‌܋ ܕܲܢܢܲܛܪܘܼܢܵܟܼ ܒܟܼܠܗܹܝܢ ܐܘܼܪ̈ܚܵܬܼܵܟܼ. ܘܥܲܠ ܕܪ̈ܵܥܲܝܗܘܿܢ ܢܸܫܩܠܘܼܢܵܟܼ‌܋ ܕܠܵܐ ܬܸܬܿܩܸܠ ܒܪܸܓܼܠܵܟܼ. ܥܲܠ ܓܵܪܣܵܐ ܘܥܲܠ ܚܲܪܡܵܢܵܐ ܬܸܕܼܪܘܿܟܼ‌܋ ܘܲܬܿܕܘܼܫ ܐܲܪܝܵܐ ܘܬܲܢܝܼܢܵܐ. ܡܸܛܠ ܕܠܝܼ ܒܥܵܐ ܐܹܦܲܨܹܝܘܗܝ ܘܐܹܥܲܫܢܝܼܘܗܝ‌܋ ܡܸܛܠ ܕܝܼܕܲܥ ܫܹܡܝ ܢܸܩܪܹܝܢܝ ܘܐܸܥܢܹܝܘܗܝ. ܥܲܡܹܐ ܐ݇ܢܵܐ ܒܐܘܼܠܨܵܢܵܐ‌܋ ܐܹܥܲܫܢܝܼܘܗܝ ܘܐܹܝܲܩܪܝܼܘܗܝ. ܢܘܼܓܼܪܵܐ ܕܝܵܘܡܵܬܼܵܐ ܐܹܣܲܒܿܥܝܼܘܗܝ ܘܐܹܚܵܘܹܝܘܗܝ ܦܘܼܪܩܵܢܝ. ܐܲܢ݇ܬܿܘܼ ܬܘܼܟܼܠܵܢܝ ܡܫܝܼܚܵܐ ܠܥܵܠܲܡ ܠܵܐ ܐܸܒܼܗܲܬܼ܋ ܫܲܒܲܚ. ܥܵܠܲܡ. ܐܲܢ݇ܬܿܘܼ ܬܘܼܟܼܠܵܢܝ ܡܫܝܼܚܵܐ ܠܥܵܠܲܡ ܠܵܐ ܐܸܒܼܗܲܬ̣܋ ܝܵܬܹܿܒܼ ܒܣܸܬܵܪܹܗ ܕܲܡܪܲܝܡܵܐ. ܘܲܒܼܛܸܠܵܠܹܗ ܕܐܲܠܵܗܵܐ ܡܸܫܬܲܒܲܚ. ܐܲܢ݇ܬܿܘܼ ܬܘܼܟܼܠܵܢܝ ܡܫܝܼܚܵܐ ܠܥܵܠܲܡ ܠܵܐ ܐܸܒܼܗܲܬܼ܋

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܒܒܼܘܼܪܟܵܬ̣ܵܐ ܡܵܪܲܢ ܒܲܪܸܟܲܝܢ: ܘܫܘܼܪ ܒܛܝܼܠܘܼܬܼܵܟܼ ܐܲܟܼܪܸܟܲܝܢ. ܘܲܠܒܲܝܬܵܐ ܗܵܢܵܐ ܘܥܵܡܘܿܪ̈ܵܘܗܝ: ܘܡ̣ܢ ܛܵܒܼ̈ܵܢ ܠܵܐ ܬܲܨܪܸܟܲܝܢ: ܘܒܲܓܼܢܘܿܢ ܢܘܼܗܪܵܐ ܐܲܣܡܸܟܲܝܢ: ܡܵܪܵܐ ܕܟܼܠ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܐܵܡܪܝܼܢ ܡܲܙܡܘܿܪܵܐ:

ܐܲܪܝܼܡ ܥܲܝܢܲܝ̈ ܠܛܘܼܪܵܐ. ܐܲܝܡܸܟܵܐ ܢܹܐܬܸܐ ܡܥܲܕܪܵܢܝ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ: ܛܲܪ ܟܠܫܵܥ ܠܲܡܚܝܼܠܘܼܬܼܝ. ܐܲܪܝܼܡ ܥܲܝܢܲܝ̈ ܠܛܘܼܪܵܐ. ܐܲܝܡܸܟܵܐ ܢܹܐܬܸܐ ܡܥܲܕܪܵܢܝ‌‌܋ ܥܘܼܕܼܪܵܢܝ ܡ̣ܢ ܩܕܼܵܡ ܡܵܪܝܵܐ. ܗ̇ܘ ܕܲܥܒܲܕܼ ܫܡܲܝܵܐ ܘܐܲܪܥܵܐ‌܋ ܠܵܐ ܢܸܬܸܿܠ ܪܸܓܼܠܵܟܼ ܠܙܵܘܸܥܬܼܵܐ. ܘܠܵܐ ܢܢܘܼܡ ܢܵܛܘܿܪܵܟܼ‌܋ ܠܵܐ ܓܹܝܪ ܢܵܐܹ݁ܡ ܘܠܵܐ ܕܵܡܹ݁ܟܼ. ܢܵܛܘܿܪܹܗ ܕܝܑܼܣܪܵܝܹܠ‌܋ ܡܵܪܝܵܐ ܗ݇ܘ̣ ܢܵܛܘܿܪܵܟܼ. ܡܵܪܝܵܐ ܢܲܛܸܠ ܠܵܟܼ ܒܐܝܼܕܹܗ ܕܝܲܡܝܼܢܵܐ‌܋ ܒܐܝܼܡܵܡܵܐ ܫܸܡܫܵܐ ܠܵܐ ܢܲܟܹܿܝܟܼ. ܘܐܵܦܠܵܐ ܣܲܗܪܵܐ ܒܠܸܠܝܵܐ‌܋ ܡܵܪܝܵܐ ܢܢܲܛܪܵܟܼ ܡ̣ܢ ܟܠܗܹܝܢ ܒܝܼ̈ܫܵܬܼܵܐ. ܢܸܛܲܪ ܢܲܦ̮ܫܵܟܼ ܡܵܪܝܵܐ‌܋ ܢܸܛܲܪ ܡܲܦܩܵܟܼ ܘܡܲܥܠܵܟܼ. ܡܸܟܹܿܝܠ ܘܲܥܕܲܡܵܐ ܠܥܵܠܲܡ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ. ܛܲܪ ܟܠܫܵܥ ܠܲܡܚܝܼܠܘܼܬܼܝ܋ ܫܲܒܲܚ. ܥܵܠܲܡ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ. ܛܲܪ ܟܠܫܵܥ ܠܲܡܚܝܼܠܘܼܬܼܝ܋ ܐܲܪܝܼܡ ܥܲܝܢܲܝ̈ ܠܛܘܼܪܵܐ. ܐܲܝܡܸܟܵܐ ܢܹܐܬܸܐ ܡܥܲܕܪܵܢܝ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ. ܛܲܪ ܟܠܫܵܥ ܠܲܡܚܝܼܠܘܼܬܼܝ܋

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛ ܫܠܵܡܵܐ ܥܲܡܲܢ.

(ܗܵܝܕܹܝܢ ܡܒܲܪܸܟܼ ܟܵܗܢܵܐ ܡܲܝ̈ܵܐ ܠܲܪܣܵܣܵܐ ܕܟܼܠܹܗ ܒܲܝܬܵܐ ܒܲܨܠܘܿܬܼܵܐ ܗܵܕܹܐ. ܨܠܘܿܬܼܵܐ ܕܩܘܼܕܵܫ ܡܲܝ̈ܵܐ ܛܲܡ̈ܐܹܐ).

ܨܠܘܿܬܼܵܐ. ܠܵܟܼ ܡܵܪܝܵܐ ܐܲܠܵܗܵܐ ܚܲܝܼܠ̱ܬܼܵܢܵܐ ܩܲܕܝܼܫܵܐ ܘܲܡܫܲܒܿܚܵܐ: ܡܵܘܕܹܝܢܲܢ ܘܣܵܓܼܕܝܼܢ ܚ݇ܢܲܢ: ܕܲܒܼܦܵܪܹܗ݇ܣܝܼܵܐ ܕܝܲܗ݇ܒܼܬܿ ܠܲܢ: ܫܵܐܠܝܼܢܲܢ ܡ̣ܢ ܒܲܣܝܼܡܘܼܬܼܵܟܼ: ܕܬܸܦܫܘܿܛ ܝܲܡܝܼܢܵܐ ܕܲܡܪܲܚܡܵܢܘܼܬܼܵܟܼ: ܘܲܬܼܒܲܪܸܟܼ ܘܲܬܼܩܲܕܸܫ ܠܡܲܝ̈ܵܐ ܗܵܠܹܝܢ: ܘܬܲܫܪܸܐ ܒܗܘܿܢ ܥܘܼܕܼܪܵܢܵܐ ܕܡܸܢܵܟܼ ܕܟܼܠ ܟܲܪ ܕܡܸܬܼܝܲܗ݇ܒܿܝܼܢ ܘܡܸܬܿܬܲܪܡܹܝܢ ܘܡܸܙܕܲܠܚܝܼܢ ܘܡܸܬܼܐܲܫܕܝܼܢ: ܢܸܪܕܦܘܼܢ ܡ̣ܢ ܬܲܡܵܢ ܟܠܵܗ݁ ܛܲܢܦܘܼܬܼܵܐ ܘܛܲܡܐܘܼܬܼܵܐ ܕܡܝܼܬܼܵܐ ܘܕܲܚܢܝܼܩܵܐ: ܘܟ̣ܠ ܕܫܵܬܹܝܢ ܡܸܢܗܘܿܢ ܐܵܘ ܡܸܬ̣ܚܲܫܚܝܼܢ ܒܗܘܿܢ: ܢܲܩܕܘܼܬܼܵܐ ܘܦܲܐܝܼܘܼܬܼܵܐ ܘܕܲܟܼܝܘܼܬܼܵܐ ܕܢܲܦ̮ܫܵܐ ܘܲܕܼܦܲܓܼܪܵܐ ܢܸܩܢܘܿܢ ܡܸܢܗܘܿܢ. ܘܢܸܬܿܠܘܼܢ ܒܡܵܘܗܲܒܼܬܼܵܐ ܕܟܼܝܼܬܼܵܐ ܕܡ̣ܢ ܠܘܵܬܼܵܟܼ. ܥܘܼܕܼܪܵܢܵܐ ܘܦܘܼܪܩܵܢܵܐ: ܠܢܲܦ̮̈ܫܵܬܲܢ ܕܨܵܒܼ̈ܝܵܢ ܘܚܵܕܼ̈ܝܵܢ ܒܩܲܕܝܼܫܘܼܬܼܵܐ ܘܲܒܼܒܲܝܬܵܝܘܼܬܼܵܐ ܕܡܵܪܘܼܬܼܵܟܼ. ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝܒ̈ܘܵܬܼܵܟܼ ܕܲܠܘܵܬܲܢ: ܢܲܣܸܩ ܠܵܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܬܼܵܐ: ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹܡ ܥܲܠ ܡܲܝ̈ܵܐ. ܘܟܸܢ ܪܵܐܹ݁ܣ ܟܵܗܢܵܐ ܡ̣ܢ ܡܲܝ̈ܵܐ ܗܵܠܹܝܢ ܒܒܲܝܬܵܐ ܟܠܹܗ.

ܘܡ̣ܢ ܒܵܬܲܪ ܕܲܫܠܸܡܘ ܗܵܦܟܼ݁ܝܼܢ ܠܘܵܬܼ ܨܠܝܼܒܼܵܐ ܘܐܹܘܲܢܓܵܠܝܼܘܿܢ ܘܩܵܝܡܝܼܢ ܒܣܸܕܼܪ̈ܲܝܗܘܿܢ ܘܲܡܫܲܪܹܝܢ ܥܘܿܢ̈ܝܵܬܼܵܐ ܗܵܠܹܝܢ:

ܒܪܘܼܟܵܒܼ: ܣܵܗ̈ܕܹܐ ܒܪ̈ܝܼܟܹܐ.

ܬܸܗܘܸܐ ܛܲܝܒܿܘܼܬܼܵܟܼ ܥܠܲܝܢ ܡܵܪܝܵܐ. ܒܝܲܕܼ ܛܲܝܒܿܘܼܬܼܵܟܼ ܡܵܪܵܐ ܡܪܲܚܡܵܢܵܐ: ܒܲܪܸܟܼ ܘܢܲܛܲܪ ܠܒܲܝܬܵܐ ܗܵܢܵܐ ܘܥܵܡܘܿܪ̈ܵܘܗܝ: ܡ̣ܢ ܫܹܐܕܹ̈ܐ ܘܐ݇ܢܵܫ̈ܵܐ ܒܝܼܫܹ̈ܐ. ܘܡܵܙܘܿܢ ܙܲܒܼܢܵܐ ܐܲܣܓܵܐ ܒܹܗ. ܘܚܘܼܒܵܐ ܘܫܲܝܢܵܐ ܘܐܵܘܝܘܼܬܼܵܐ: ܘܚܘܼܠܡܵܢܵܐ ܕܦܲܓܼܪܵܐ ܘܲܕܼܢܲܦ̮ܫܵܐ܀ ܢܸܬܼܒܲܪܲܟܼ ܒܕܼܵܪܵܐ ܕܙܲܕܝܼܩܹ̈ܐ. ܒܝܲܕܼ ܡܲܠܲܟܹ̈ܐ ܐܸܬܼܒܲܪܲܟܼ ܒܲܝܬܹܿܗ ܕܐܲܒܼܘܼܢ ܐܲܒܼܪܵܗܵܡ: ܘܲܒܼܝܲܕܼ ܡܵܪܗܘܿܢ ܕܡܲܠܲܐܟܹ̈ܐ ܒܲܝܬܵܐ ܕܙܲܟܲܝ ܐܸܬܼܒܲܪܲܟܼ. ܒܲܝܬܵܐ ܕܥܲܠܘ ܠܹܗ ܣܵܓܼܘܿܕܲܝ̈ܟ: ܬܠܝܼܬܼܵܝܘܼܬܼܵܐ ܬܸܫܪܸܐ ܒܹܗ ܘܢܸܬܼܒܲܪܲܟܼ ܒܕܼܵܪܵܐ ܕܙܲܕܝܼܩܹ̈ܐ܀ ܠܵܐ ܬܸܬܸܿܠ ܡܵܪܝܵܐ ܪܸܓܿܬܹܗ ܠܥܵܘ̣ܵܠܵܐ. ܛܪܘܿܕܲܝܗܝ ܠܣܵܛܵܢܵܐ ܕܐܝܼܬܼܵܘܗܝ ܒܥܸܠܕܒܼܵܒܼܵܐ ܕܟܼܠܵܗ̇ ܟܹܐܢܘܼܬܼܵܐ: ܡ̣ܢ ܒܲܝܬܵܐ ܕܲܫܪܹܝܢܲܢ ܒܹܗ. ܕܠܵܐ ܢܸܥܘܿܠ ܘܢܸܫܬܲܠܲܛ ܒܹܗ. ܘܫܲܪܲܪ ܡܵܪܲܢ ܫܲܬܼܐ̱ܣܵܘ̈ܗܝ ܥܲܠ ܟܹܐܦܵܐ ܕܗܲܝܡܵܢܘܼܬܼܵܐ: ܘܐܲܣܓܵܐ ܒܹܗ ܚܲܝܹ̈ܐ ܕܲܠܥܵܠܲܡ܀ ܘܐܸܡܲܪ ܝܑܼܫܘܿܥ ܠܬܲܠܡܝܼܕܼܵܘ̈ܗܝ. ܡܵܪܲܢ ܡܫܝܼܚܵܐ ܕܐܸܡܲܪ ܒܲܣܒܲܪܬܹܗ ܠܟܸܢܫܵܐ ܕܬܲܠܡܝܼܕܼܵܘ̈ܗܝ. ܟܠ ܒܲܝܬܵܐ ܕܥܵܐܠܝܼܬܿܘܿܢ ܠܹܗ ܘܲܡܩܲܒܿܠܝܼܢ ܠܟܼܘܿܢ ܐܹܒܲܪܟܼܝܼܘܗܝ. ܒܲܪܸܟܿ ܡܵܪܲܢ ܒܛܲܝܒܿܘܼܬܼܵܟܼ: ܠܒܲܝܬܵܐ ܗܵܢܵܐ ܕܣܵܓܿܘܿܕܲܝ̈ܟ: ܘܐܲܫܪܵܐ ܒܹܗ ܫܲܝܢܵܟܼ ܘܲܫܠܵܡܵܟܼ܀ ܫܲܒܲܚ. ܒܩܵܠ: ܗܵܐ ܫܒܲܢ̣ܝ. ܬܠܝܼܬܼܵܝܘܼܬܼܵܐ ܕܒܼܵܗ ܐܸܬܼܒܲܪܲܟܼܘ ܡܗܲܝܡܢܹ̈ܐ ܟܹܐܢܹ̈ܐ. ܘܐܲܒܼܵܗܵܬܼ̈ܵܐ ܩܲܕܼܡܵܝܹ̈ܐ. ܒܵܗ̇ ܢܸܬܼܒܲܪܲܟܼ ܒܲܝܬܵܐ ܗܵܢܵܐ ܘܢܸܗܘܸܐ ܡܒܲܪܟܼܵܐ: ܡܸܟܹܿܝܠ ܘܲܥܕܲܡܵܐ ܠܥܵܠܲܡ: ܘܢܲܛܲܪܲܝܗܝ ܡܵܪܝ ܘܠܲܕܼܥܵܡܪܝܼܢ ܒܹܗ: ܡ̣ܢ ܟܠ ܢܸܟܼܝܵܢ ܘܟܼܠ ܥܵܩ̈ܵܢ. ܘܢܸܫܬܲܪܬܲܚ ܒܟܼܠ ܛܵܒܼܵܬܼ̈ܵܐ ܒܲܕܼܡܘܼܬܼ ܒܲܝܬܹܿܗ ܕܐܲܒܼܪܵܗܵܡ: ܘܢܸܣܓܸܿܐ ܘܢܹܐܪܲܒܼ ܩܸܢܝܵܢܹܗ ܐܲܝܟܼ ܒܲܝܬܹܿܗ ܕܐܝܼܘܿܒܼ ܟܹܐܢܵܐ: ܘܢܸܬܼܩܲܝܲܡ ܒܲܨ̈ܠܵܘܵܬܼܵܗ̇ ܕܡܲܪܝܲܡ ܒܬܿܘܼܠܬܼܵܐ ܩܲܕܝܼܫܬܵܐ ܡܸܟܹܿܝܠ ܘܲܠܥܵܠܲܡ܀ ܥܵܠܲܡ. ܒܲܪܸܟܼ ܡܵܪܲܢ ܠܒܲܝܬܵܐ ܗܵܢܵܐ ܘܢܸܗܘܸܐ ܡܒܲܪܟܼܵܐ: ܡܸܟܹܿܝܠ ܘܲܥܕܲܡܵܐ ܠܥܵܠܲܡ: ܒܲܪܸܟܼ ܡܵܪܲܢ ܠܲܕܼܥܵܡܪܝܼܢ ܒܹܗ ܒܟܼܠ ܒܘܼܪ̈ܟܵܬܼܵܐ: ܕܦܘܼܡܵܟܼ ܚܲܝܵܐ ܘܩܲܕܝܼܫܵܐ: ܒܲܪܸܟܼ ܡܵܪܲܢ ܦܘܼܠܚܵܢܲܝܗܘܿܢ: ܘܡܲܪ̈ܗܵܛܲܝܗܘܿܢ: ܘܩܸܢܝܵܢܲܝܗܘܿܢ: ܒܲܪܸܟܼ ܡܵܪܲܢ ܙܲܪ̈ܥܲܝܗܘܿܢ ܘܚܲܩܠܵܬܼ̈ܗܘܿܢ ܥܲܡ ܥܲܠܠܵܬܼ̈ܗܘܿܢ: ܒܲܪܸܟܼ ܡܵܪܲܢ ܟܢܘܼܫܝܼܗܘܿܢ: ܒܲܪܸܟܼ ܡܵܪܲܢ ܐܵܘܝܘܼܬܼܗܘܿܢ. ܒܲܪܸܟܼ ܡܵܪܲܢ ܝܲܠܕܲܝ̈ܗܘܿܢ: ܘܚܲܣܵܐ ܘܲܫܒܼܘܿܩ ܚܵܘܒܲܝ̈ܗܘܿܢ ܕܢܸܫܬܿܘܘܿܢ ܠܲܓܼܢܘܿܢܵܟܼ܀ ܢܹܐܡܲܪ. ܒܩܵܠ: ܬܵܘ ܢܸܬܿܕܲܡܲܪ. ܐܲܒܼܵܐ ܕܐܲܫܪܝܼ ܠܲܫܟܼܝܼܢܬܹܗ: ܒܛܘܼܪܵܐ ܕܣܝܼܢܲܝ ܘܩܲܕܫܹܗ: ܐܲܫܪܵܐ ܫܲܝܢܵܐ ܕܐܲܠܵܗܘܼܬܼܵܟܼ: ܒܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ. ܘܫܲܪܬܲܚ ܛܵܒܼܵܬܹ̈ܗ ܘܐܲܫܦܲܥ ܥܘܼܕܼܪܵܢܵܘܗܝ: ܘܐܲܣܓܵܐ ܚܲܕܼܘܵܬܹ̈ܗ ܘܒܲܕܲܪ ܥܵܩܵܬܹ̈ܗ. ܘܲܒܼܡܲܥܠܵܘ̈ܗܝ ܘܲܒܼܡܲܦܩܵܘ̈ܗܝ: ܘܒܲܪܸܟܼ ܠܲܕܼܥܵܡܪܝܼܢ ܒܓܼܵܘܹܗ. ܫܲܝܸܢ ܐܘܼܪ̈ܚܵܬܼܗܘܿܢ: ܘܲܬܼܪܘܿܨ ܫܒܼܝܼܠܲܝ̈ܗܘܿܢ: ܘܒܲܛܸܠ ܡܸܢܗܘܿܢ ܩܪ̈ܵܒܹܐ ܕܫܹܐܕܹ̈ܐ: ܕܢܲܣܩܘܼܢ ܫܘܼܒܼܚܵܐ ܠܡܵܪܘܼܬܼܵܟܼ ܒܟܼܠ ܥܸܕܵܢܝܼ̈ܢ܀

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛ ܫܠܵܡܵܐ ܥܲܡܲܢ.

ܘܲܡܨܲܠܸܐ ܟܵܗܢܵܐ. ܗܲܒܼܠܲܢ ܡܵܪܝ ܕܢܸܗܘܸܐ ܕܝܼܠܵܟܼ: ܘܢܸܕܼܚܲܠ ܡܸܢܵܟܼ: ܘܲܢܙܘܼܥ ܡ̣ܢ ܡܸܠܬܼܵܟܼ: ܘܢܸܣܬܲܪܲܕܼ ܡ̣ܢ ܓܙܲܪ ܕܝܼܢܵܟܼ: ܘܢܸܙܕܗܲܪ ܒܦܘܼܩܕܵܢܲܝ̈ܟ: ܘܲܢܪܲܥܸܐ ܠܐܲܠܵܗܘܼܬܼܵܟܼ ܒܲܥܒܼܵܕܹ̈ܐ ܛܵܒܹ̈ܐ ܕܙܲܕܝܼܩܘܼܬܼܵܟܼ: ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ. ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܐܵܡܪܝܼܢ ܫܘܼܪܵܝܵܐ ܒܓܝܼܘܿܪܹܗ:

ܛܘܼܒܼܵܘܗܝ ܠܟܼܠ ܕܕܼܵܚܹܠ ܡ̣ܢ ܡܵܪܝܵܐ. ܘܲܡܗܲܠܸܟܼ ܒܲܫܒܼܝܼܠܵܘ̈ܗܝ. ܡܵܘܗܲܒܼܬܼܵܟܼ ܐܲܫܦܲܥ ܡܵܪܲܢ ܥܲܠ ܒܲܝܬܵܐ ܘܩܸܢܝܵܢܵܐ ܕܥܲܒܼܕܲܝ̈ܟ ܒܛܲܝܒܿܘܼܬܼܵܟܼ. ܛܘܼܒܼܵܘܗܝ ܠܟ̣ܠ ܕܕܼܵܚܹܠ ܡ̣ܢ ܡܵܪܝܵܐ. ܘܲܡܗܲܠܸܟܼ ܒܲܫܒܼܝܼܠܵܘ̈ܗܝ‌܋‌ ܥܲܡܠܵܐ ܕܐܝܼܕܲܝ̈ܟ ܟܲܕܼ ܬܹܐܟܼܘܿܠ ܒܲܪܢܵܫܵܐ. ܛܘܼܒܲܝܟ ܘܛܵܒ̣ܬ̣ܵܐ ܠܢܲܦ̮ܫܵܟܼ‌܋ ܐܲܢ݇ܬܿܬܼܵܟܼ ܐܲܝܟܼ ܓܦܸܬܵܐ ܫܒܼܝܼܚܬܵܐ ܒܲܫܦܘܼܠܲܝ̈ ܒܲܝܬܵܟܼ. ܒܢܲܝ̈ܟ ܐܲܝܟܼ ܢܸܨܒܿܬܼܵܐ ܕܙܲܝܬܵܐ ܟܪܝܼܟܼܝܼܢ ܠܦܵܬܼܘܿܪܵܟܼ‌܋ ܗܵܟܼܵܢ ܢܸܬܼܒܲܪܲܟܼ ܓܲܒܼܪܵܐ ܕܕܼܵܚܹܠ ܡ̣ܢ ܡܵܪܝܵܐ. ܢܒܲܪܟܼܵܟܼ ܡܵܪܝܵܐ ܡ̣ܢ ܨܸܗܝܘܿܢ‌܋ ܘܬܸܚܙܸܐ ܒܛܵܒܼܵܬܼ̈ܵܗ̇ ܕܐܘܿܪܸܫܠܸܡ ܟܠ ܝܵܘܡܲܝ̈ ܚܲܝܲܝ̈ܟ. ܘܬܸܚܙܸܐ ܒܢܲܝ̈ܵܐ ܠܲܒܼܢܲܝ̈ܟ.‌ ܫܠܵܡܵܐ ܥܲܠ ܝܑܼܣܪܵܝܹܠ. ܡܵܘܗܲܒܼܬܼܵܟܼ ܐܲܫܦܲܥ ܡܵܪܲܢ ܥܲܠ ܒܲܝܬܵܐ ܘܩܸܢܝܵܢܵܐ ܕܥܲܒܼܕܲܝ̈ܟ ܒܛܲܝܒܿܘܼܬܼܵܟܼ܋ ܫܲܒܲܚ. ܥܵܠܲܡ. ܡܵܘܗܲܒܼܬܼܵܟܼ ܐܲܫܦܲܥ ܡܵܪܲܢ ܥܲܠ ܒܲܝܬܵܐ ܘܩܸܢܝܵܢܵܐ ܕܥܲܒܼܕܲܝ̈ܟ ܒܛܲܝܒܿܘܼܬܼܵܟܼ܋ ܛܘܼܒܼܵܘܗܝ ܠܟܼܠ ܕܕܼܵܚܹܠ ܡ̣ܢ ܡܵܪܝܵܐ. ܘܲܡܗܲܠܸܟܼ ܒܲܫܒܼܝܼܠܵܘ̈ܗܝ. ܡܵܘܗܲܒܼܬܼܵܟܼ ܐܲܫܦܲܥ ܡܵܪܲܢ ܥܲܠ ܒܲܝܬܵܐ ܘܩܸܢܝܵܢܵܐ ܕܥܲܒܼܕܲܝ̈ܟ ܒܛܲܝܒܿܘܼܬܼܵܟܼ܋

ܘܐܵܡܲܪ ܡܫܲܡܫܵܢܵܐ: ܢܨܲܠܸܐ؛ ܫܠܵܡܵܐ ܥܲܡܲܢ.

ܘܐܵܡܲܪ ܟܵܗܢܵܐ ܨܠܘܿܬܼܵܐ ܕܥܲܠ ܒܲܝܬܵܐ؛ ܬܠܝܼܬܼܵܝܘܼܬܼܵܐ ܕܒܼܵܗ̇ ܐܸܬܼܒܲܪܲܟܼܘ ܘܐܸܬܼܩܲܕܲܫܘ ܒܵܬܹ̈ܐ ܕܐܲܒܼܵܗܵܬܼ̈ܵܐ ܟܹܐܢܹ̈ܐ ܘܙܲܕܝܼܩܹ̈ܐ: ܗ̤ܝ ܬܢܲܛܲܪ ܠܒܲܝܬܵܐ ܗܵܢܵܐ: ܘܲܬܼܣܲܬܲܪ ܠܥܵܡܘܿܪ̈ܵܘܗܝ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼ̈ܠܲܝܵܐ ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܣܵܐܹ݁ܡ ܟܵܗܢܵܐ ܒܸܣܡܹ̈ܐ: ܘܡܲܥܛܲܪ ܢܲܦ̮ܫܹܗ: ܘܟܸܢ ܡܥܲܛܲܪ ܠܲܨܠܝܼܒܼܵܐ ܘܠܹܐܘܲܢܓܵܠܝܼܘܿܢ: ܘܒܼܵܬܲܪܟܸܿܢ ܝܵܗܹܒܼ ܠܹܗ ܦܝܼܪܡܵܐ ܠܫܲܡܵܫܵܐ: ܘܡܲܥܛܲܪ ܫܲܡܵܫܵܐ ܠܥܲܡܵܐ: ܘܲܡܗܲܠܸܟܼ ܫܲܡܵܫܵܐ ܡܲܥܛܲܪ ܠܒܲܝܬܵܐ ܟܠܹܗ ܒܟܼܠܗܹܝܢ ܡܢܵܘ̈ܵܬܼܵܐ: ܡ̣ܢ ܠܓܼܵܘ ܘܡ̣ܢ ܠܒܲܪ. ܘܡ̣ܢ ܒܵܬܲܪ ܕܗܵܦܹܟܼ: ܡܫܲܪܸܐ ܟܵܗܢܵܐ ܘܐܵܡܲܪ ܨܠܘܿܬܼܵܐ ܗܵܕܹܐ:

ܨܠܘܿܬܼܵܐ. ܒܘܼܪܟܿܬܵܟܼ ܡܵܪܲܢ ܘܐܲܠܵܗܲܢ ܥܲܠ ܒܲܝܬܵܐ ܗܵܢܵܐ ܕܥܲܒܼܕܲܝ̈ܟ ܬܸܬܼܢܝܼܚ: ܘܲܥܠܲܝܢ ܡܚܝܼܠܹ̈ܐ ܘܚܲܛܵܝܹ̈ܐ ܚܢܵܢܵܟܼ ܢܸܗܘܸܐ ܐܲܡܝܼܢܵܐܝܼܬܼ ܣܲܒܼܪܲܢ ܛܵܒܼܵܐ: ܘܒܹܝܬܼ ܓܵܘܣܲܢ ܡܠܸܐ ܪ̈ܲܚܡܹܐ: ܘܫܵܒܹܩ ܚܵܘܒܹ̈ܐ ܘܲܚܛܵܗܹ̈ܐ ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܡܲܩܦܝܼܢ ܡܲܙܡܘܿܪܵܐ ܗܵܢܵܐ ܒܫܘܒܵܚܵܐ: ܟܲܕ݂ ܥܲܡ ܟܠ ܦܸܬܼܓܼܵܡܵܐ ܡܲܩܦܝܼܢ ܒܩܵܠ ܙܘܼܡܵܪܵܐ: ܫܘܼܒܼܚܵܐ ܠܵܟܼ ܐܲܠܵܗܵܐ.

ܫܘܼܒܵܚܵܐ.

ܐܲܝܠܹܝܢ ܕܲܡܣܲܒܿܪܝܼܢ ܒܡܵܪܝܵܐ ܒܛܘܼܪܵܐ ܕܨܸܗܝܘܿܢ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܠܵܐ ܢܙܘܼܥܘܼܢ: ܐܸܠܵܐ ܠܥܵܠܲܡ ܢܸܬܿܒܼܘܼܢ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܐܘܿܪܸܫܠܸܡ ܛܘܼܪܹ̈ܐ ܟܪܝܼܟܼܝܼܢ ܠܵܗ̇. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܡܵܪܝܵܐ ܟܪܝܼܟܼ ܠܥܲܡܹܗ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܡܸܛܠ ܕܠܵܐ ܢܸܬܿܬܿܢܝܼܚ ܫܲܒܼܛܵܐ ܕܥܵܘܵܠܹ̈ܐ ܒܲܡܢܵܬܼܵܐ ܕܙܲܕܝܼܩܹ̈ܐ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܠܵܐ ܢܵܘܫܛܘܼܢ ܙܲܕܝܼܩܹ̈ܐ ܐܝܼܕܲܝ̈ܗܘܿܢ ܒܥܵܘ̣ܠܵܐ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܐܲܛܐܸܒܼ ܡܵܪܝܵܐ ܠܛܵܒܹ̈ܐ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܠܲܐܝܠܹܝܢ ܕܲܬܼܪܝܼܨܝܼܢ ܒܠܸܒܿܗܘܿܢ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܐܲܝܠܹܝܢ ܕܲܡܥܲܩܡܝܼܢ ܫܒܼܝܼܠܲܝ̈ܗܘܿܢ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܢܕܲܒܲܪ ܐܸܢܘܿܢ ܡܵܪܝܵܐ ܥܲܡ ܥܲܒܼܕܲܝ̈ ܥܵܘ̣ܠܵܐ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܲܫܠܵܡܵܐ ܥܲܠ ܝܑܼܣܵܝܹܠ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܫܲܒܲܚ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܥܵܠܲܡ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܐܲܝܠܹܝܢ ܕܲܡܣܲܒܿܪܝܼܢ ܒܡܵܪܝܵܐ ܒܛܘܼܪܵܐ ܕܨܸܗܝܘܿܢ. ܫܘܼܒܼܚܵܐ ܠܵܟܼ ܐܲܠܵܗܵܐ܀

ܘܐܵܡܲܪ ܫܲܡܵܫܵܐ: ܐܲܪܝܼܡܘ ܩܵܠܟܿܘܿܢ ܘܫܲܒܲܚ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܥܵܢܹܝܢ: ܩܲܕܝܼܫܵܐ ܐܲܠܵܗܵܐ. ܩܲܕܝܼܫܵܐ ܚܲܝܠ̱ܬܼܵܢܵܐ. ܩܲܕܝܼܫܵܐ ܠܵܐ ܡܵܝܘܿܬܼܵܐ. ܐܸܬܼܪܲܚܸܡܥܠܲܝܢ‌܀ ܫܲܒܲܚ. ܩܲܕܝܼܫܵܐ ܐܲܠܵܗܵܐ...‌܀ ܥܵܠܲܡ. ܩܲܕܝܼܫܵܐ ܐܲܠܵܗܵܐ...‌܀

ܘܟܸܢ ܡܲܩܦܝܼܢ: ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ. ܘܒܼܵܬܲܪܟܸܿܢ ܡܨܲܠܹܝܢ ܬܲܪܬܹܿܝܢ ܨ̈ܠܵܘܵܢ ܘܚܵܬܿܡܝܼܢ.

ܨܠܘܿܬܼܵܐ. ܒܲܪܸܟܼ ܡܵܪܝ ܠܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ: ܐܲܝܟܼ ܡܲܫܟܿܢܹܗ ܕܐܲܒܼܪܵܗܵܡ: ܘܐܲܝܟܼ ܒܲܝܬܹܿܗ ܕܙܲܟܲܝ: ܘܐܲܝܟܼ ܥܸܠܝܼܬܼܵܐ ܕܲܫܠܝܼܚܹ̈ܐ: ܘܢܲܛܲܪ ܠܥܵܡܘܿܪ̈ܵܘܗܝ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ: ܒܲܨܠܘܿܬܿ ܩܲܕܝܼܫܹ̈ܐ ܡܪ̈ܲܥܝܵܢܲܝܟ ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܥܵܢܹ݁ܝܢ: ܐܵܡܹܝܢ ܒܵܪܸܟܼܡܵܪܝ.

ܚܵܬܼܵܗ̇. ܪ̈ܲܚܡܲܝܟ ܡܵܪܝ ܘܲܚܢܵܢܵܟܼ ܘܥܘܼܕܼܪܵܢܵܟܼ ܘܦܘܼܪܩܵܢܵܟܼ: ܐܲܓܸܿܢ ܘܐܲܫܪܵܐ ܒܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ: ܘܢܲܛܲܪ ܠܥܵܡܘܿܪ̈ܵܘܗܝ ܡ̣ܢ ܟܠ ܢܸܟܼܝܵܢܝܼ̈ܢ ܟܣܲܝ̈ܵܐ ܘܲܓܼܠܲܝ̈ܵܐ: ܒܲܨܠܘܿܬܼ ܩܲܕܝܼܫܹ̈ܐ ܡܪ̈ܲܥܝܵܢܲܝܟ ܡܵܪܵܐ ܕܟܼܠ: ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܥܵܢܹ݁ܝܢ: ܐܵܡܹܝܢ.

ܚܘܼܬܵܡܵܐ.

ܒܒܼܘܼܪܟܿܬܼܵܟܼ ܡܵܪܲܢ ܘܐܲܠܵܗܲܢ ܢܸܬܼܒܲܪܟܼܘܼܢ ܥܲܒܼܕܲܝ̈ܟ: ܒܲܒܼܛܝܼܠܘܼܬܹܗ ܕܨܸܒܼܝܵܢܵܟܼ ܢܸܬܼܢܲܛܪܘܼܢ ܣܵܓܼܘܿܕܲܝ̈ܟ: ܘܫܲܝܢܵܐ ܡܵܪܝ ܐܲܡܝܼܢܵܐ ܕܐܲܠܵܗܘܼܬܼܵܟܼ: ܘܲܫܠܵܡܵܐ ܢܲܓܿܝܼܪܵܐ ܕܡܵܪܘܼܬܼܵܟܼ. ܢܲܡܠܸܟܼ ܒܒܲܝܬܵܐ ܗܵܢܵܐ ܘܲܒܼܥܵܡܘܿܪ̈ܵܘܗܝ ܟܠܗܘܿܢ ܝܵܘ̈ܡܵܬܼܵܐ: ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ.

ܘܥܵܢܹ݁ܝܢ: ܐܵܡܹܝܢ.

ܘܡܲܩܦܝܼܢ: ܡܗܲܝܡܢܝܼܢܲܢ...

ܫܠܸܡ ܒܘܼܪܵܟܼ ܒܵܬܹ̈ܐ:

ܘܠܲܐܠܵܗܵܐ ܫܘܼܒܼܚܵܐ ܐܲܡܝܼܢܵܐ.

♱♱♱♱♱♱♱♱♱♱♱♱♱

ܬܘܼܒܼ ܛܲܟܼܣܵܐ ܙܥܘܿܪܵܐ ܕܡܸܫܬܲܡܲܫ

ܟܲܕܼ ܢܵܘܒܸܿܠ ܟܵܗܢܵܐ ܩܘܼܕܼܫܵܐ؛

(ܠܐَܢܵܫ ܐܲܣܝܼܪܵܐ؛ ܐܵܘ ܟܪܝܼܗܵܐ؛ ܐܵܘ ܡܸܛܠ

ܥܸܠܬܼܵܐ ܐَܚܪܹܬܼܵܐ ܐܲܝܕܵܐ ܕܗ̤‌ܝ؛ ܠܒܲܪ ܡ̣ܢ ܥܹܕܬܵܐ).

ܩܲܕܼܡܵܐܝܼܬܼ؛ ܕܲܥ ܐܘܿ ܡܵܪܝ ܩܵܪܘܿܝܵܐ؛ ܕܲܒܼܙܲܒܼܢܹ̈ܐ ܩܲܕܼܡܵܝܹ̈ܐ ܦܣܝܼܣ ܗَ̣ܘܵܐ ܕܢܸܦܘܿܩ ܠܹܗ ܠܩܘܼܕܼܫܵܐ ܠܒܲܪ ܡ̣ܢ ܥܹܕܬܵܐ ܒܲܠܚܘܿܕܼ ܒܝܵܘܡܵܐ ܪܲܒܵܐ ܕܲܩܝܵܡܬܵܐ؛ ܠܐَܢܵܫܹ̈ܐ ܡܗܲܝܡܢܹ̈ܐ ܕܢܲܦܝܼܠܝܼܢ ܗَ̣ܘܵܘ ܒܒܹܝܬܼ ܐܲܣܝܼܪܹ̈ܐ ܡܸܛܠ ܗܲܝܡܵܢܘܼܬܹܗ ܕܡܵܪܲܢ. ܗܵܫܵܐ ܕܹܝܢ ܒܙܲܒܼܢܵܐ ܕܝܼܠܲܢ؛ ܡܸܬܼܦܣܸܣܠܹܗ ܠܟܵܗܢܵܐ ܕܢܸܦܘܿܩ ܠܹܗ ܠܩܘܼܕܼܫܵܐ ܠܒܲܪ ܡ̣ܢ ܥܹܕܬܵܐ؛ ܒܵܬܲܪ ܕܲܢܣܲܒܼ ܦܘܼܩܕܵܢܵܐ ܡ̣ܢ ܡܕܲܒܿܪܵܢܵܐ؛ ܡܸܛܠ ܐܲܝܠܹܝܢ ܕܲܒܼܵܬܲܝ̈ ܐܲܣܝܼܪܹ̈ܐ ܐܸܢܘܿܢ؛ ܐܵܘ ܟܪܝܼܗܝܼܢ ܐܵܘ ܡܸܛܠ ܥܸܠܬܼܵܐ ܐَܚܪܹܬܼܵܐ ܕܐܵܢܲܢܩܹ̈ܐ؛ ܕܠܵܐ ܢܦܘܼܫܘܼܢ ܡܗܲܝܡܢܹ̈ܐ ܙܲܒܼܢܵܐ ܐܲܪܝܼܟܼܵܐ ܒܸܠܥܵܕܼ ܢܣܝܼܒܼܘܼܬܼܵܐ ܕܐَܪ̈ܵܙܹܐ ܡܲܚܝܵܢܹ̈ܐ.

ܘܕܲܥ ܕܲܒܼܝܵܘܡܵܐ ܕܐܝܼܬܼ ܒܹܗ ܩܘܼܕܼܫܵܐ ܫܵܩܹ݁ܠ ܟܵܗܢܵܐ ܓܡܘܼܪܬܵܐ ܕܲܣܒܼܝܼܥܵܐ ܒܲܕܼܡܵܐ؛ ܒܗ݁‌ܝ ܕܟܵܣܵܐ ܕܢܸܦܘܿܩ ܠܒܲܪ ܡ̣ܢ ܡܲܕܼܒܿܚܵܐ ܠܵܐ ܙܵܕܹ݁ܩ ܟܠ ܟܠܹܗ. ܘܣܵܐܹ݁ܡ ܠܲܓܼܡܘܼܪܬܵܐ ܒܟܵܣܵܐ ܙܥܘܿܪܵܐ ܐܵܘ ܒܩܸܣܛܵܐ ܐܵܘ ܒܡܵܐܢܵܐ ܐَܚܪܹܢܵܐ ܕܥܵܗܹ݁ܢ ܠܲܨܒܼܘܼܬܼܵܐ. ܘܢܸܗܘܸܐ ܫܲܬܿܝܼܩ ܟܵܗܢܵܐ ܟܲܕܼ ܛܥܝܼܢ، ܘܲܒܼܠܸܒܹܿܗ ܐܵܡܲܪ ܡܲܙܡܘܿܪܹ̈ܐ ܐܲܝܟܼ ܚܲܝܠܹܗ؛ ܥܕܲܡܵܐ ܕܡܵܛܹ݁ܐ ܠܘܲܥܕܵܐ ܕܒܲܝܬܵܐ.

ܡܵܐ ܕܹܝܢ ܕܲܡ̣ܛܵܐ ܟܵܗܢܵܐ ܠܒܲܝܬܵܐ؛ ܣܵܝܡܝܼܢ ܦܵܬܼܘܿܪܵܐ ܙܥܘܿܪܵܐ ܕܥܵܗܹܢ ܒܓܲܒܵܐ ܕܡܲܕܼܢ̱ܚܵܐ ܐܲܝܟܼ ܕܢܸܗܘܘܿܢ ܚܵܝܪܝܼܢ ܟܠܗܘܿܢ ܠܡܲܕܼܢ̱ܚܵܐ ܒܥܸܕܵܢ ܬܸܫܡܸܫܬܵܐ. ܘܣܵܝܡܝܼܢ ܐܹܘܲܢܓܲܠܝܼܘܿܢ ܙܥܘܿܪܵܐ ܥܲܡ ܨܠܝܼܒܼܵܐ ܘܢܲܗܝܼܪܹ̈ܐ. ܘܡܸܚܕܵܐ ܣܵܐܹ݁ܡ ܠܹܗ ܠܟܼܣܵܐ ܕܐܝܼܬܼ ܒܹܗ ܩܘܼܕܼܫܵܐ ܥܲܠ ܦܵܬܼܘܿܪܵܐ؛ ܥܲܡ ܢܲܗܝܼܪܹ̈ܐ ܘܫܲܪܟܵܐ ܕܨܸܒܼܵܘ̈ܵܬܼܵܐ ܕܡܸܬܼܒܲܥ̈ܝܵܢ.

ܘܲܡܫܲܪܸܐ ܟܵܗܢܵܐ ܩܲܕܼܡܵܐܝܼܬܼ؛

ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ܀ ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ. (ܬܢܝܼ ܓ؛ ܙܲܒܼܢܝܼ̈ܢ). ܘܥܲܠ ܐܲܪܥܵܐ ܫܠܵܡܵܐ ܘܣܲܒܼܪܵܐ ܛܵܒܼܵܐ ܠܲܒܼܢܲܝ̈ܢܵܫܵܐ؛ ܒܟܼܠܥܸܕܵܢ ܠܥܵܠܡܝܼܢ ܐܵܡܹܝܢ.

ܘܟܸܢ ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

ܘܐܵܡܲܪ ܡܫܲܡܫܵܢܵܐ؛ ܢܨܲܠܸܐ. ܫܠܵܡܵܐ ܥܲܡܲܢ.

ܨܠܘܿܬܼܵܐ. ܢܸܣܬܿܓܸܕܼ ܘܢܸܫܬܲܒܲܚ ܘܢܸܬܼܝܲܩܲܪ ܘܢܸܬܼܪܲܡܪܲܡ ܘܢܸܬܿܬܵܘܕܹܐ ܘܢܸܬܼܒܲܪܲܟܼ ܒܲܫܡܲܝܵܐ ܘܒܐܲܪܥܵܐ؛ ܫܡܵܐ ܣܓܼܝܼܕܼܵܐ ܘܲܡܫܲܒܿܚܵܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܼܠܥܸܕܵܢ ܡܵܪܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܲܡܫܲܪܹܝܢ؛ ܡܲܙܡܘܿܪܵܐ.

ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ. ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ. ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ‌܋ ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ* ܫܲܒܲܚܘ ܠܡܵܪܝܵܐ ܘܒܲܪܸܟܼܘ ܠܲܫܡܹܗ* ܣܲܒܲܪܘ ܡ̣ܢ ܝܘܿܡ ܠܝܘܿܡ ܦܘܼܪܩܵܢܹܗ* ܐܸܫܬܲܥܵܘ ܒܥܲܡܡܹ̈ܐ ܐܝܼܩܵܪܹܗ* ܘܲܒܼܟܼܠܗܘܿܢ ܥܲܡܡܹ̈ܐ ܥܒܼܵܕܼܵܘ̈ܗܝ* ܡܸܛܠ ܕܪܲܒܘܼ ܡܵܪܝܵܐ ܘܲܡܫܲܒܲܚ ܛܵܒܼ* ܘܲܕܼܚܝܼܠ ܥܲܠ ܟܠܗܘܿܢ ܐܲܠܵܗܹ̈ܐ* ܡܸܛܠ ܕܟܼܠܗܘܿܢ ܐܲܠܵܗܹ̈ܐ ܕܥܲܡܡܹ̈ܐ ܣܪܝܼܩܝܼܢ ܐܸܢܘܿܢ* ܡܵܪܝܵܐ ܫܡܲܝܵܐ ܥܒܲܕܼ* ܙܝܼܘܵܐ ܘܫܘܼܒܼܚܵܐ ܩܕܼܵܡܵܘܗܝ* ܥܘܼܫܢܵܐ ܘܬܸܫܒܿܘܿܚܬܵܐ ܒܡܲܩܕܿܫܹܗ* ܗܲܒܼܘ ܠܡܵܪܝܵܐ ܫܲܪ̈ܒܼܵܬܼܵܐ ܕܥܲܡܡܹ̈ܐ* ܗܲܒܼܘ ܠܡܵܪܝܵܐ ܬܸܫܒܿܘܿܚܬܵܐ ܘܐܝܼܩܵܪܵܐ* ܗܲܒܼܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ* ܫܩܘܿܠܘ ܩܘܼܪ̈ܒܵܢܹܐ ܘܥܘܿܠܘ ܠܕܼܵܪ̈ܵܘܗ‌ܝ* ܣܓܼܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܼܫܹܗ* ܬܙܘܼܥ ܡ̣ܢ ܩܕܼܵܡܵܘܗܝ ܟܠܵܗ̇ ܐܲܪܥܵܐ* ܐܸܡܲܪܘ ܒܹܝܬܼ ܥܲܡܡܹ̈ܐ ܕܡܵܪܝܵܐ ܐܲܡܠܸܟܼ* ܘܐܲܬܼܩܢܵܗ̇ ܠܬܹܒܹܝܠ ܕܠܵܐ ܬܙܘܼܥ* ܢܕܼܘܼܢ ܠܥܲܡܡܹ̈ܐ ܒܲܬܼܪܝܼܨܘܼܬܼܵܐ* ܢܸܚܕܿܘܿܢ ܫܡܲܝܵܐ ܘܲܬܿܕܼܘܼܨ ܐܲܪܥܵܐ* ܢܸܪܘܲܙ ܝܲܡܵܐ ܒܲܡܠܹܐܹܗ* ܢܸܬܼܥܲܫ̈ܢܵܢ ܚܲܩܠ̈ܬܼܵܐ ܘܟܼܠ ܕܐܝܼܬܼ ܒܗܹܝܢ* ܘܗܵܝܕܹܿܝܢ ܢܫܲܒܿܚܘܼܢ ܟܠܗܘܿܢ ܐܝܼܠܵܢܹ̈ܐ ܕܥܵܒܼܵܐ* ܩܕܼܵܡ ܡܵܪܝܵܐ ܕܐܵܬܹܿܐ ܠܲܡܕܼܵܢܵܗ̇ ܠܐܲܪܥܵܐ* ܕܵܐܹ̇ܢ ܬܹܒܹܝܠ ܒܙܲܕܿܝܼܩܘܼܬܼܵܐ* ܘܲܠܥܲܡܡܹ̈ܐ ܒܗܲܝܡܵܢܘܼܬܼܵܐ‌* ܫܲܒܲܚܘ ܠܡܵܪܝܵܐ ܒܩܘܼܕܼܫܹܗ* ܫܲܒܿܚܘܼܗܝ ܒܲܪܩܝܼܥܵܐ ܕܥܘܼܫܢܹܗ* ܫܲܒ̇ܚܘܼܗܝ ܒܚܲܝܠ̱ܬܼܵܢܘܼܬܹܗ* ܫܲܒܿܚܘܼܗܝ ܒܣܘܿܓܼܐܵܐ ܕܪܲܒܿܘܼܬܹܗ* ܫܲܒܿܚܘܼܗܝ ܒܩܵܠܵܐ ܕܩܲܪܢܵܐ* ܫܲܒܿܚܘܼܗܝ ܒܩܝܼܬܼܵܪܹ̈ܐ ܘܲܒܼܟܸܢܵܪܹ̈ܐ* ܫܲܒܿܚܘܼܗܝ ܒܲܦܠܲܓܹ̈ܐ ܘܒܲܪ̈ܒܼܝܼܥܹܐ* ܫܲܒܿܚܘܼܗܝ ܒܡܸܢܹ̈ܐ ܚܲܠ̈ܝܵܬܼܵܐ* ܫܲܒܿܚܘܼܗܝ ܒܨܸܨ̈ܠܲܝ ܫܸܡܥܵܐ ܫܲܒܿܚܘܼܗܝ ܒܩܵܠܵܐ ܘܒܲܩܥܵܬܼܵܐ* ܒܟܼܠ ܢܸܫܡܵܐ ܢܫܲܒܲܚ ܠܡܵܪܝܵܐ‌* ܫܲܒܲܚܘ ܠܡܵܪܝܵܐ ܟܠܟܼܘܿܢ ܥܲܡܡܹ̈ܐ* ܫܲܒܿܚܵܝ̈ܗܝ ܟܠܗܹܝܢ ܐܸܡ̈ܘܵܬܼܵܐ* ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒܿܘܼܬܹܗ* ܫܲܪܝܼܪܵܐܝܼܬ̣ ܡܵܪܝܵܐ ܗ݇ܘ̣ ܠܥܵܠܲܡ* ܫܲܒܲܚ‌* ܥܵܠܲܡ‌* ܘܲܡܣܲܝܟܼܝܼܢ؛ ܗܲܠܸܠܘܼܝܵܗ؛ ܗܲܠܸܠܘܼܝܵܗ؛ ܐܹܗܲܠܸܠܘܼܝܵܗ.

ܘܐܵܡܲܪ ܡܫܲܡܫܵܢܵܐ؛ ܫܠܵܡܵܐ ܥܲܡܲܢ.

ܨܠܘܿܬܼܵܐ ܕܠܵܟܼܘܼܡܵܪܵܐ.

ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝ̈ܒܿܘܵܬܼܵܟܼ ܕܲܠܘܵܬܲܢ ܕܠܵܐ ܡܸܬܼܦܲܪܥܝܼܢ. ܢܵܘܕܸܐ ܠܵܟܼ ܘܲܢܫܲܒܿܚܵܟܼ ܕܠܵܐ ܫܲܠܘܵܐ ܒܥܹܕܬܵܟܼ ܡܟܲܠܲܠܬܵܐ ܡܲܠܝܲܬܼ ܟܠ ܥܘܼܕܼܪ̈ܵܢܝܼܢ ܘܟܼܠ ܛܘܼܒܼܝܼ̈ܢ؛ ܕܐܲܢَܬܿܘܼ ܡܵܪܵܐ ܘܒܼܵܪܘܿܝܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܡܲܩܦܝܼܢ. ܠܵܟܼܘܼܡܵܪܵܐ ܕܟܼܠܵܗ݁ ܡܵܘܕܹܝܢܲܢ؛ ܘܠܵܟܼ ܝܑܼܫܘܿܥ ܡܫܝܼܚܵܐ ܡܫܲܒܿܚܝܼܢܲܢ. ܕܐܲܢَܬܿܘܼ ܡܢܲܚܡܵܢܵܐ ܕܦܲܓܼܪ̈ܲܝܢ؛ ܘܐܲܢَܬܿܘܼ ܦܵܪܘܿܩܵܐ ܕܢܲܦ̮ܫ̈ܵܬܲܢ܀ ܒܟܼܠ ܕܘܼܟ ܐܝܼܬܲܝܟ ܐܲܠܵܗܵܐ ܩܲܒܸܿܠ ܬܲܟܼܫܲܦ̮ܬܲܢ. ܠܵܟܼܘܼܡܵܪܵܐ܀ ܫܲܒܲܚ. ܥܵܠܲܡ. ܠܵܟܼܘܼܡܵܪܵܐ܀

ܘܐܵܡܲܪ ܡܫܲܡܫܵܢܵܐ؛ ܢܨܲܠܸܐ ܫܠܵܡܵܐ ܥܲܡܲܢ.

ܨܠܘܿܬܼܵܐ. ܐܲܢَܬܿܘܼ ܡܵܪܝ ܫܲܪܝܼܪܵܐܝܼܬܼ ܡܢܲܚܡܵܢܵܐ ܕܦܲܓܼܪ̈ܲܝܢ؛ ܘܐܲܢَܬܿܘܼ ܦܵܪܘܿܩܵܐ ܛܵܒܼܵܐ ܕܢܲܦ̮ܫ̈ܵܬܲܢ ܘܲܡܢܲܛܪܵܢܵܐ ܐܲܡܝܼܢܵܐ ܕܚܲܝܲܝ̈ܢ ܘܠܵܟܼ ܡܵܪܝ ܚܲܝܵܒܼܝܼܢܲܢ. ܕܢܵܘܕܸܐ ܘܢܸܣܓܿܘܿܕܼ ܘܲܢܫܲܒܲܚ ܒܟܼܠܥܸܕܵܢ ܡܵܪܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܐܵܡܲܪ ܡܫܲܡܫܵܢܵܐ؛ ܐܲܪܝܼܡܘ ܩܵܠܟܼܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.

ܘܥܵܢܹܝܢ. ܩܲܕܝܼܫܵܐ ܐܲܠܵܗܵܐ؛ ܩܲܕܝܼܫܵܐ ܚܲܝܠܬܼܵܢܵܐ؛ ܩܲܕܝܼܫܵܐ ܠܵܐ ܡܵܝܘܿܬܼܵܐ ܐܸܬܼܪܲܚܸܡ ܥܠܲܝܢ. ܫܲܒܲܚ. ܩܲܕܝܼܫܵܐ ܐܲܠܵܗܵܐ. ܥܵܠܲܡ. ܩܲܕܝܼܫܵܐ ܐܲܠܵܗܵܐ.

ܨܠܘܿܬܼܵܐ ܕܒܵܬܲܪ ܩܲܕܝܼܫܵܐ ܐܲܠܵܗܵܐ.

ܩܲܕܝܼܫܵܐ ܘܲܫܒܼܝܼܚܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ؛ ܕܲܒܼܩܲܕܝܼܫܹ̈ܐ ܥܵܡܲܪ ܘܡܸܬܿܬܿܢܝܼܚ ܨܸܒܼܝܵܢܹܗ. ܐܸܬܼܦܲܢ ܡܵܪܝ ܘܚܘܼܣ ܘܪܲܚܸܡܥܠܲܝܢ؛ ܐܲܝܟܼ ܕܲܡܥܵܕܲܬܿ ܒܟܼܠܥܸܕܵܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ؛ ܐܵܡܹܝܢ.

ܘܐܵܡܲܪ ܫܲܡܵܫܵܐ؛ ܢܨܲܠܸܐ. ܫܠܵܡܵܐ ܥܲܡܲܢ.

ܘܟܲܕܼ ܐܵܬܹ݁ܐ ܟܵܗܢܵܐ ܕܢܸܩܪܸܐ ܐܹܘܲܢܓܲܠܝܼܘܿܢ ܕܝܵܘܡܵܐ ܡܨܲܠܹܐ؛ ܚܲܟܸܿܡܲܝܢ ܒܢܵܡܘܿܣܵܟܼ ܘܐܲܢܗܲܪ ܙܵܘܥܲܝ̈ܢ ܒܝܼܕܲܥܬܼܵܟܼ؛ ܘܩܲܕܸܫ ܢܲܦ̮ܫ̈ܵܬܲܢ ܒܲܫܪܵܪܵܟܼ؛ ܘܗܲܒܼܠܲܢ ܕܢܸܗܘܸܐ ܡܸܬܿܛܦܝܼܣܵܢܹ̈ܐ ܠܡܸܠܲܝ̈ܟ ܘܓܼܵܡܘܿܪܹܐ ܠܦܘܼܩܕܵܢܲܝ̈ܟ ܒܟܼܠܥܸܕܵܢ ܡܵܪܵܐ ܕܟܼܠ ܠܥܵܠܡܝܼܢ.

ܐَܚܪܹܬܼܵܐ. ܡܲܢܗܲܪ ܠܲܡܠܝܼ̈ܠܹܐ ܒܝܼܕܲܥܬܼܵܐ ܕܪܲܒܿܘܼܬܹܗ؛ ܐܲܢܗܲܪ ܡܵܪܝ ܚܘܼܫܵܒܲܝ̈ ܠܡܸܬܼܗܲܓܵܝܘܼ ܒܣܸܦܪ̈ܲܝܟ ܩܲܕܝܼܫܹ̈ܐ ܘܐܲܠܵܗܵܝܹ̈ܐ ܒܟܼܠܥܸܕܵܢ ܡܵܪܵܐ ܕܟܼܠ ܠܥܵܠܡܝܼܢ.

ܘܐܵܡܲܪ ܡܫܲܡܫܵܢܵܐ ܒܩܵܠܵܐ ܫܡܝܼܥܵܐ. ܒܫܸܠܝܵܐ ܗ̤ܘܵܘ ܘܲܫܠܵܘ. ܘܡܲܩܸܦ ܟܵܗܢܵܐ ܘܐܵܡܲܪ. ܫܠܵܡܵܐ ܥܲܡܟܼܘܿܢ. ܘܥܵܢܹܝܢ؛ ܘܥܲܡܵܟܼ ܘܥܲܡ ܪܘܼܚܵܟܼ.

ܘܩܵܪܹܐ ܐܹܘܲܢܓܲܠܝܼܘܿܢ. ܘܡܵܐ ܕܫܵܠܹ݁ܡ ܐܹܘܲܢܓܲܠܝܼܘܿܢ ܐܵܡܪܝܼܢ؛ ܫܘܼܒܼܚܵܐ ܠܲܡܫܝܼܚܵܐ ܡܵܪܲܢ.

ܘܟܸܢ ܐܵܡܪܝܼܢ ܥܘܿܢܝܼܬܼܵܐ ܕܐَܪ̈ܵܙܹܐ ܗܵܕܹܐ؛

ܐܹܒܲܪܸܟܼ ܠܡܵܪܝܵܐ ܒܟܼܠܙܒܲܢ܀ ܘܲܒܼܟܼܠܙܒܲܢ ܬܸܫܒܿܚܵܬܹ̈ܗ ܒܦܘܼܡܝ܀ ܒܪܝܼܟܼܘܼ ܪܲܒܿܟܘܼܡܪܹ̈ܐ ܕܚܲܣܝܼ ܚܵܘ̈ܒܵܬܲܢ ܒܕܸܒܼܚܵܐ ܕܲܩܢܘܿܡܹܗ܀ ܫܲܒܲܚ. ܫܘܼܒܼܚܵܐ ܘܬܼܵܘܕܝܼܬܼܵܐ ܢܲܣܸܩ ܠܹܗ ܠܲܒܼܪܵܐ ܕܦܲܪܩܲܢ ܒܲܨܠܝܼܒܹܗ܀

ܘܐܵܡܲܪ ܫܲܡܵܫܵܐ؛ ܢܨܲܠܸܐ. ܫܠܵܡܵܐ ܥܲܡܲܢ.

ܘܲܡܨܲܠܹܐ ܟܵܗܢܵܐ؛

ܘܐܲܫܘܵܐ ܠܲܢ ܡܵܪܲܢ ܘܐܲܠܵܗܲܢ ܕܐܲܡܝܼܢܵܐܝܼܬܼ ܕܠܵܐ ܡܘܼܡ ܩܕܼܵܡܲܝܟ ܢܩܘܼܡ ܒܠܸܒܵܐ ܕܲܟܼܝܵܐ ܘܒܼܐܲܦܹ̈ܐ ܓܲܠܝ̈ܵܬܼܵܐ. ܘܲܒܼܦܲܪܹܗܣܝܼܵܐ ܗ̇ܝ ܕܡܸܢܵܟܼ ܒܪ̈ܲܚܡܹܐ ܐܸܬܼܝܲܗܒܲܬ̤ ܠܲܢ؛ ܕܟܼܠܲܢ ܫܲܘܝܵܐܝܼܬܼ ܢܸܩܪܹܝܟ ܘܗܵܟܲܢܵܐ ܢܹܐܡܲܪ.

ܘܥܵܢܹܝܢ. ܐܲܒܼܘܼܢ ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ ܬܹܐܬܸܐ ܡܲܠܟܿܘܼܬܼܵܟܼ ܢܸܗܘܸܐ ܨܸܒܼܝܵܢܵܟܼ؛ ܐܲܝܟܲܢܵܐ ܕܒܲܫܡܲܝܵܐ ܐܵܦ ܐܲܪܥܵܐ. ܗܲܒܼܠܲܢ ܠܲܚܡܵܐ ܕܣܘܼܢܩܵܢܲܢ ܝܵܘܡܵܢܵܐ؛ ܘܲܫܒܼܘܿܩ ܠܲܢ ܚܵܘܒܲܝ̈ܢ؛ ܐܲܝܟܲܢܵܐ ܕܐܵܦ ܚܢܲܢ ܫܒܲܩܼܢ ܠܚܲܝܵܒܲܝ̈ܢ. ܘܠܵܐ ܬܲܥܠܲܢ ܠܢܸܣܝܘܿܢܵܐ ܐܸܠܵܐ ܦܲܨܵܢ ܡ̣ܢ ܒܝܼܫܵܐ؛ ܡܸܛܠ ܕܕܼܝܼܠܵܟܼ ܗَ̣ܝ ܡܲܠܟܿܘܼܬܼܵܐ ܘܚܲܝܠܵܐ ܘܬܸܫܒܿܘܿܚܬܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.

ܘܡܲܩܸܦ ܟܵܗܢܵܐ ܒܲܠܒܲܟܼܬܵܐ؛

ܐܹܝܢ ܡܵܪܲܢ ܘܐܲܠܵܗܲܢ؛ ܒܵܥܹܝܢܲܢ ܡܸܢܵܟܼ ܘܡܸܬܼܟܲܫܦܝܼܢܲܢ ܠܲܡܪܲܚܡܵܢܘܼܬܼܵܐ ܕܛܲܝܒܿܘܼܬܵܟܼ. ܠܵܐ ܡܵܪܝ؛ ܠܵܐ ܡܵܪܝ؛ ܬܲܥܸܠܲܝܢ ܠܢܸܣܝܘܿܢܵܐ؛ ܐܸܠܵܐ ܦܪܘܿܩ ܘܦܲܨܵܐ ܠܲܢ ܡܼܢ ܒܝܼܫܵܐ ܘܚܲܝ̈ܠܵܘܵܬܹܗ. ܡܸܛܠ ܕܕܼܝܼܠܵܟܼ ܗَ̣ܝ ܡܲܠܟܿܘܼܬܼܵܐ؛ ܘܚܲܝܠܵܐ ܘܥܘܼܫܢܵܐ ܘܓܲܢَܒܵܪܘܼܬܼܵܐ ܘܫܘܼܠܛܵܢܵܐ ܒܲܫܡܲܝܵܐ ܘܒܼܐܲܪܥܵܐ. ܗܵܫܵܐ ܘܲܒܼܟܼܠܙܒܲܢ؛ ܘܪܵܫܹ݁ܡ ܥܲܠ ܩܢܘܿܡܹܗ (ܘܲܡܪܝܼܡ ܩܵܠܹܗ؛) ܘܲܠܥܵܠܲܡ ܥܵܠܡܝܼܢ.

ܘܥܵܢܹ݁ܝܢ؛ ܐܵܡܹܝܢ.

ܘܐܵܡܲܪ ܟܵܗܢܵܐ. ܫܠܵܡܵܐ ܥܲܡܟܼܘܿܢ. ܘܥܵܢܹܐ ܥܲܡܵܐ. ܘܥܲܡܵܟܼ ܘܥܲܡ ܪܘܼܚܵܟܼ.

ܘܡܲܩܸܦ. ܩܘܼܕܼܫܵܐ ܠܩܲܕܝܼܫܹ̈ܐ ܝܵܐܹܐ ܒܫܲܠܡܘܼܬܼܵܐ.

ܘܥܵܢܹ݁ܝܢ. ܚܲܕܼ ܐܲܒܼܵܐ ܩܲܕܝܼܫܵܐ. ܚܲܕܼ ܒܪܵܐ ܩܲܕܝܼܫܵܐ. ܚܲܕܼ ܪܘܼܚܵܐ ܩܲܕܝܼܫܵܐ. ܫܘܼܒܼܚܵܐ ܠܐܲܒܼܵܐ ܘܠܲܒܼܪܵܐ ܘܲܠܪܘܼܚܵܐ ܩܲܕܝܼܫܵܐ؛ ܠܥܵܠܲܡ ܥܵܠܡܝܼܢ ܐܵܡܹܝܢ.

ܘܟܸܢ ܐܵܬܹ݁ܐ ܟܵܗܢܵܐ ܕܢܸܩܪܸܐ ܚܘܼܣܵܝܵܐ ܐܸܢ ܣܢܝܼܩܝܼܢ؛ ܥܲܠ ܗ݁ܘ ܕܢܵܣܹܒܼ. ܐܲܠܵܗܲܢ ܛܵܒܼܵܐ ܘܲܡܠܸܐ ܪ̈ܲܚܡܹܐ؛ ܬܢܝܼ. ܕܥܲܠ ܟܠ ܫܦܝܼܥܵܐ ܛܲܝܒܿܘܼܬܹܗ ܘܲܡܪܲܚܡܵܢܘܼܬܹܗ. ܐܲܫܦܲܥ ܡܵܪܝ ܚܢܵܢܵܐ ܕܒܲܣܝܼܡܘܼܬܹܗ ܕܚܘܼܒܵܟܼ ܥܲܠ ܥܲܒܼܕܵܟܼ ܗܵܢܵܐ (ܐܵܘ؛ ܐܲܡܬܼܵܟܼ ܗܵܕܹܐ) ܘܫܲܚܠܸܦܲܝܗܝ ܒܣܲܒܼܪܵܐ ܕܚܘܼܕܵܬܼܵܐ ܕܡܸܢܕܪܹܫ ܠܚܲܝܹ̈ܐ ܕܲܬܼܝܵܒܼܘܼܬܼܵܐ. ܘܚܲܕܸܬܼ ܒܓܼܵܘܹܗ ܪܘܼܚܵܟܼ ܩܲܕܝܼܫܵܐ ܕܐܸܬܼܚَܬܸܡ ܒܹܗ ܠܝܵܘܡܵܐ ܕܦܘܼܪܩܵܢܵܐ. ܘܕܲܟܵܝܗܝ ܒܲܚܢܵܢܵܟܼ ܡܼܢ ܟܠܵܗ̇ ܛܲܡܐܘܼܬܼܵܐ ܕܒܸܣܪܵܐ ܘܲܕܼܪܘܼܚܵܐ؛ ܘܫܲܪܲܪ ܣܲܒܼܪܵܐ ܕܗܲܝܡܵܢܘܼܬܹܗ ܒܥܘܼܕܼܪܵܢܵܐ ܕܛܲܝܒܿܘܼܬܼܵܟܼ. ܘܲܬܼܪܘܿܨ ܗܲܠ̈ܟܼܵܬܼܵܐ ܕܕܼܘܼܒܵܪ̈ܵܘܗ‌ܝ ܒܲܫܒܼܝܼ̈ܠܹܐ ܕܙܲܕܝܼܩܘܼܬܼܵܐ. ܘܒܲܣܸܡܲܝܗ‌ܝ ܥܲܡ ܩܲܕܝܼܫܹ̈ܐ ܒܡܲܠܟܿܘܼܬܼܵܟܼ ܒܫܘܼܪܵܪ ܣܲܒܼܪܵܐ ܕܗܲܝܡܵܢܘܼܬܹܗ ܕܣܝܼܡܲܬܼ ܒܢܲܝ̈ܵܐ؛ ܘܒܼܘܼܣܵܡܵܐ ܕܐَܪ̈ܵܙܲܝܟ ܡܚܲܣܝܵܢܹ̈ܐ. ܘܚܲܝܸܠܵܝܗܝ ܒܥܘܼܕܼܪܵܢܵܐ ܕܪ̈ܲܚܡܲܝܟ ܕܢܸܛܲܪ ܦܘܼܩܕܵܢܲܝ̈ܟ ܘܢܸܓܼܡܘܿܪ ܨܸܒܼܝܵܢܵܟܼ؛ ܠܡܵܘܕܵܝܘܼ ܘܲܠܡܸܣܓܲܕܼ ܘܠܲܡܫܲܒܵܚܘܼ ܠܲܫܡܵܟܼ ܩܲܕܝܼܫܵܐ ܡܵܪܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܪܵܫܹ݁ܡ ܨܠܝܼܒܼܵܐ ܥܲܠ ܪܹܫܹܐ ܕܗ݁ܘ ܕܡܸܬܼܚܲܣܸܐ.

ܘܐܵܡܲܪ ܫܲܡܵܫܵܐ؛ ܒܲܪܸܟܼ ܡܵܪܝ.

ܘܟܸܢ ܐܵܡܲܪ ܟܵܗܢܵܐ ܒܩܵܠܵܐ ܫܡܝܼܥܵܐ؛ ܡܵܘܗܲܒܼܬܼܵܐ ܕܛܲܝܒܿܘܼܬܹܗ ܕܡܲܚܝܵܢܲܢ ܡܵܪܲܢ ܝܑܼܫܘܿܥ ܡܫܝܼܚܵܐ ܬܸܫܬܲܡܠܸܐ ܒܪ̈ܲܚܡܹܐ ܥܲܡ ܟܠܲܢ. ܘܪܵܫܹ݁ܡ ܨܠܝܼܒܼܵܐ ܥܲܠ ܥܲܡܵܐ.

ܘܐܵܡܪܝܼܢ ܒܵܬܹ̈ܐ ܕܥܘܼܢܵܝܵܐ ܕܐَܪܵܙܵܢܵܐܝܼܬܼ. ܠܥܵܠܲܡ ܥܵܠܡܝܼܢ ܘܐܵܡܹܝܢ. ܐܲܚܲܝ̈ ܩܲܒܸܿܠ ܦܲܓܼܪܹܗ ܕܲܒܼܪܵܐ ܐܵܡ̇ܪܵܐ ܥܹܕܬܵܐ. ܘܐܸܫܬܵܘ ܟܵܣܹܗ ܒܗܲܝܡܵܢܘܼܬܼܵܐ ܒܹܝܬܼ ܡܲܠܟܿܘܼܬܼܵܐ؛ ܗܲܠܸܠܘܼܝܵܐ.

ܘܒܼܵܬܲܪܟܸܢ ܝܵܗܹ݁ܒܼ ܩܘܼܕܼܫܵܐ ܠܐܲܝܢܵܐ ܕܲܣܢܝܼܩ. ܘܐܵܦ ܗܵܕܹܐ ܕܲܥ ܐܘܿ ܡܵܪܝ ܩܵܪܘܿܝܵܐ؛ ܕܦܲܓܼܪܵܐ ܒܲܠܚܘܿܕܼ ܝܵܗܹܒܼܠܹܗ ܕܲܣܒܼܝܼܥ ܒܲܕܼܡܵܐ.

ܘܡܵܐ ܕܫܵܠܹ݁ܡ ܡܩܝܼܡ ܡܫܲܡܫܵܢܵܐ؛ ܢܨܲܠܸܐ. ܫܠܵܡܵܐ ܥܲܡܲܢ.

ܘܲܡܨܲܠܸܐ ܟܵܗܢܵܐ ܬܲܪܬܹܿܝܢ ܨܠܵܘ̈ܵܬܼܵܐ.

ܬܸܫܒܿܘܿܚܬܵܐ ܡܵܪܝ ܘܐܝܼܩܵܪܵܐ. ܬܢܝܼ. ܘܬܼܵܘܕܝܼܬܼܵܐ ܘܣܸܓܼܕܬܼܵܐ ܘܩܘܼܒܵܠ ܛܲܝܒܿܘܼܬܼܵܐ ܐܲܡܝܼܢܬܵܐ ܚܲܝܵܒܼܝܼܢܲܢ ܠܡܲܣܵܩܘܼ ܠܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ. ܥܲܠ ܐܲܦܲܝ̈ ܡܵܘܗܲܒܼܬܼܵܐ ܕܐَܪ̈ܵܙܹܐ ܩܲܕܝܼܫܹ̈ܐ ܕܝܲܗَܒܼܬܿ ܠܲܢ ܒܲܚܢܵܢܵܟܼ ܠܚܘܼܣܵܝ ܚܵܘ̈ܒܵܬܲܢ ܡܵܪܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܥܵܢܹܝܢ؛ ܐܵܡܹܝܢ؛ ܒܲܪܸܟܼ ܡܵܪܝ.

ܚܒܲܪܬܼܵܗ̇. ܒܪܝܼܟܼ ܐܝܼܩܵܪܵܟܼ ܣܓܼܝܼܕܼܵܐ ܡܼܢ ܐܲܬܼܪܵܟܼ ܡܥܲܠܝܵܐ؛ ܡܫܝܼܚܵܐ ܡܚܲܣܝܵܢܵܐ ܕܚܵܘܒܲܝ̈ܢ ܘܕܲܚܛܵܗܲܝ̈ܢ ܘܡܲܥܒܿܪܵܢܵܐ ܕܣܲܟܼܠ̈ܘܵܬܲܢ ܒܐَܪ̈ܵܙܵܘܗܝ ܫܒܼܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ؛ ܡܫܝܼܚܵܐ ܣܲܒܼܪܹܗ ܕܲܟܼܝܵܢܲܢ ܒܟܼܠܥܸܕܵܢ ܠܥܵܠܡܝܼܢ.

ܘܐܸܢ ܨܵܒܹ݁ܝܢ ܡܲܩܦܝܼܢ ܡܲܙܡܘܿܪܵܐ ܗܵܢܵܐ ܥܲܡ ܓܝܼܘܿܪܹܗ؛

ܫܲܒܲܚܘ ܠܡܵܪܝܵܐ ܡܼܢ ܫܡܲܝܵܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܒܲܡܪ̈ܵܘܡܹܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܟܠܗܘܿܢ ܡܲܠܲܐܟܼܵܘ̈ܗܝ.‍ ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܟܠܗܘܿܢ ܚܲܝ̈ܠܵܘܵܬܹܗ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܫܸܡܫܵܐ ܘܣܲܗܪܵܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܟܠ ܟܵܘܟܿܒܹ̈ܐ ܘܢܘܼܗܪܵܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܿܚܘܼܗܝ ܫܡܲܝ̈ ܫܡܲܝܵܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܡܲܝ̈ܵܐ ܕܲܠܥܸܠ ܡܼܢ ܫܡܲܝܵܐ ܢܫܲܒܿܚܘܼܢ ܠܲܫܡܹܗ ܕܡܵܪܝܵܐ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܡܸܛܠ ܕܗ̤ܘ ܐܸܡܲܪ ܘܲܗ̤ܘܵܘ ܘܗ̤ܘ ܦܩܲܕܼ ܘܐܸܬܼܒܿܪܝܼܘ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܘܐܲܩܝܼܡ ܐܸܢܘܿܢ ܠܥܵܠܲܡ ܥܵܠܡܝܼܢ. ‍ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܫܲܒܲܚܘ ܠܡܵܪܝܵܐ ܟܠܟܼܘܿܢ ܥܲܡܡܹ̈ܐ. ܥܲܠ ܡܵܘܗܲܒܼܬܹܗ ܕܲܠܘܵܬܲܢ܋ ܫܲܒܿܚܵܝ̈ܗܝ ܟܠܗܹܝܢ ܐܸܡ̈ܘܵܬܼܵܐ. ܥܲܠ ܡܵܘܗܲܒܼܬܹܗ ܕܲܠܘܵܬܲܢ܋ ܡܸܛܠ ܕܥܸܫܢܲܬ̤ ܥܠܲܝܢ ܛܲܝܒܿܘܼܬܹܗ. ܥܲܠ ܡܵܘܗܲܒܼܬܹܗ ܕܲܠܘܵܬܲܢ܋ ܫܲܪܝܼܪܵܐܝܼܬܼ ܡܵܪܝܵܐ ܗَ̣ܘ ܠܥܵܠܲܡ. ܥܲܠ ܡܵܘܗܲܒܼܬܹܗ ܕܲܠܘܵܬܲܢ܀ ܫܲܒܲܚ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ. ܥܵܠܲܡ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܢܹܐܡܲܪ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܘܢܵܘܕܸܐ ܘܢܸܣܓܿܘܿܕܼ ܘܲܢܫܲܒܲܚ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܘܢܸܣܓܿܘܿܕܼ ܘܲܢܫܲܒܲܚ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋ ܘܢܸܣܓܿܘܿܕܼ ܘܲܢܫܲܒܲܚ. ܠܲܒܼܪܵܐ‍ ܕܝܲܗَܒܼܠܲܢ ܦܲܓܼܪܹܗ ܘܲܕܡܹܗ܋

ܘܡܲܩܦܝܼܢ. ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

ܘܡܲܩܸܦ ܟܵܗܢܵܐ ܚܘܼܬܵܡܵܐ.

ܡܵܪܲܢ ܝܑܼܫܘܿܥ ܡܫܝܼܚܵܐ ܕܫܲܡܸܫܢܵܝܗ‌ܝ ܘܙܲܝܲܚܢܵܝܗ‌ܝ ܘܝܲܩܲܪܢܵܝܗ‌ܝ ܒܐَܪ̈ܵܙܵܘܗ‌ܝ ܫܒܼܝܼܚܹ̈ܐ ܘܩܲܕܝܼܫܹ̈ܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ. ܘܗ̤ܘ ܢܲܫܘܸܐ ܠܲܢ ܠܫܘܼܒܼܚܵܐ ܦܲܐܝܵܐ ܕܡܲܠܟܿܘܼܬܹܗ ܘܲܠܒܼܘܼܣܵܡܵܐ ܕܥܲܡ ܡܲܠܲܐܟܼܵܘܗ̈‍ܝ ܩܲܕܝܼܫܹ̈ܐ؛ ܘܲܠܓܲܝܘܼܬܼ ܐܲܦܹ̈ܐ ܕܲܩܕܼܵܡܵܘܗܝ؛ ܘܲܠܩܵܘܡܵܐ ܕܡܼܢ ܝܲܡܝܼܢܹܗ ܒܐܘܿܪܸܫܠܸܡ ܕܲܠܥܸܠ ܒܛܲܝܒܿܘܼܬܹܗ ܘܲܒܼܪ̈ܲܚܡܵܘܗܝ. ܕܠܹܗ ܫܘܼܒܼܚܵܐ ܘܲܥܠܲܝܢ ܘܥܲܠ ܟܠ ܒܸܪ̈ܝܵܢ ܬܲܓܸ̇ܢ ܝܲܡܝܼܢܵܐ ܕܲܒܼܛܝܼܠܘܼܬܹܗ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܟܵܗܢܵܐ ܨܠܝܼܒܼܵܐ ܥܲܠ ܟܸܢܫܵܐ.

ܘܡܲܩܦܝܼܢ ܥܲܡ ܚܕܼܵܕܹ̈ܐ ܥܘܿܢܝܼܬܼܵܐ ܕܒܘܼܪܵܟܼ ܒܵܬܹ̈ܐ؛

ܡܵܪܝܵܐ ܢܸܫܪܸܐ ܒܹܗ ܠܥܵܠܲܡ. ܬܠܝܼܬܼܵܝܘܼܬܼܵܐ ܕܒܼܵܗ݁ ܐܸܬܼܒܲܪܲܟܼܘ ܡܗܲܝܡܢܸ̈ܐ ܟܹܐܢܸ̈ܐ ܘܐܲܒܼܵܗ̈ܵܬܼܵܐ ܩܲܕ݇ܡܵܝܹ̈ܐ. ܒܵܗ ܢܹܬ̣ܒܲܪܲܟܼ ܥܘܼܡܪܵܐ ܗܵܢܵܐ ܘܢܸܗܘܸܐ ܡܒܲܪܟܼܵܐ ܡܸܟܹܿܝܠ ܘܲܥܕܲܡܵܐ ܠܥܵܠܲܡ. ܘܢܲܛܲܪܲܝܗܝ ܡܵܪܝ ܘܠܲܕܥܵܡ̇ܪܝܼܢ ܒܹܗ ܡ̣ܢ ܟܠ ܢܸܟܼܝܵܢ ܘܟܼܠ ܥܵܩ̈ܵܢ. ܘܢܸܫܬܲܪܬܲܚ ܒܟܼܠ ܛܵܒܼ̈ܵܬܼܵܐ ܒܲܕܼܡܘܼܬܼ ܒܲܝܬܹܿܗ ܕܐܲܒܼܪܵܗܵܡ ܘܢܸܤܓܹܿܐ ܘܢܹܐܪܲܒܼ ܩܸܢܝܵܢܹܗ ܐܲܝܟܼ ܒܲܝܬܹܿܗ ܕܐܝܼܘܿܒܼ ܟܹܐܢܵܐ. ܘܢܸܬܿܩܲܝܲܡ ܒܲܨ̈ܠܵܘܵܬܼܵܗ̇ ܕܡܲܪܝܲܡ ܒܬܼܘܼܠܬܼܵܐ ܩܲܕܝܼܫܬܵܐ؛ ܡܸܟܹܿܝܠ ܘܲܠܥܵܠܲܡ‌܀

ܫܠܸܡ ܛܲܟܼܣܵܐ

ܙܥܘܿܪܵܐ ܕܡܸܫܬܲܡܲܫ ܟܲܕܼ

ܢܵܘܒܸܿܠ ܟܵܗܢܵܐ ܩܘܼܕܼܫܵܐ ܠܲܟܼܪ̈ܝܼܗܹܐ

ܘܫܲܪܟܵܐ؛ ܘܲܠܝܵܗ ܫܘܼܒܼܚܵܐ ܐܲܡܝܼܢܵܐ؛ ܐܵܡܹܝܢ.

♱♱♱♱♱♱♱♱♱♱♱♱♱

ܬܘܼܒܼ؛ ܪܘܼܫܡܵܐ ܕܥܲܠ ܟܵܣܵܐ.

ܒܝܵܘܡܵܐ ܕܲܣܢܝܼܩܘܼܬܼܵܐ ܩܕܼܵܡ ܕܢܸܣܲܩ ܠܡܲܕܼܒܿܚܵܐ.

ܩܲܕܼܡܵܐܝܼܬܼ ܐܵܡܲܪ ܥܠܵܘܗܝ ܟܵܗܢܵܐ؛ ܛܲܝܒܿܘܼܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ. ܘܚܘܼܒܹܿܗ ܕܐܲܠܵܗܵܐ ܐܲܒܼܵܐ. ܘܫܵܘܬܵܦܘܼܬܼܵܐ ܕܪܘܼܚܵܐ ܕܩܘܼܕܼܫܵܐ. ܬܸܗܘܸܐ ܥܲܡ ܟܠܲܢ. ܗܵܫܵܐ ܘܲܒܼܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܘܪܵܫܹ݁ܡ ܥܠܵܘܗܝ ܨܠܝܼܒܼܵܐܝܼܬܼ.

ܘܡܲܩܸܦ؛ ܚܲܝܠܵܐ ܐܲܠܵܗܵܝܵܐ ܕܐܲܓܸܿ ܥܲܠ ܐَܪ̈ܵܙܹܐ ܩܲܕܝܼܫܹ̈ܐ ܕܦܲܓܼܪܵܐ ܘܲܕܼܡܵܐ ܡܚܲܣܝܵܢܵܐ؛ ܘܒܲܪܸܟܼ ܐܸܢܘܿܢ ܘܩܲܕܸܫ ܐܸܢܘܿܢ. ܗ̤ܘ ܢܲܓܸܿܢ ܥܲܠ ܡܙܵܓܼܵܐ ܗܵܢܵܐ ܘܢܸܥܒܿܕܝܼܘܗܝ ܫܵܘܬܵܦܵܐ ܕܦܲܓܼܪܹܗ ܘܲܕܼܡܹܗ ܕܲܡܫܝܼܚܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܪܵܫܹ݁ܡ ܥܠܵܘܗܝ ܨܠܝܼܒܼܵܐܝܼܬܼ.

ܘܟܸܢ ܡܩܲܪܸܒܼ ܠܹܗ ܠܘܵܬܼ ܡܲܕܼܒܿܚܵܐ ܘܪܵܫܹܡ ܠܹܗ ܒܟܼܵܣܵܐ ܡܩܲܕܫܵܐ ܘܐܵܡܲܪ؛ ܡܸܬܼܪِܫܸܡ ܘܡܸܬܼܩܲܕܲܫ ܘܡܸܬܼܚܲܠܲܛ ܡܙܵܓܼܵܐ ܗܵܢܵܐ ܒܲܕܼܡܵܐ ܡܚܲܣܝܵܢܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.

ܘܡܵܘܣܸܦ ܟܲܕܼ ܪܵܫܹ݁ܡ ܠܹܗ ܒܲܓܼܡܘܼܪܬܵܐ ܥܸܠܵܝܬܵܐ؛ ܡܸܬܼܪِܫܸܡ ܟܵܣܵܐ ܗܵܢܵܐ ܒܲܓܼܡܘܼܪܬܵܐ ܡܲܚܝܵܢܝܼܬܼܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܘܝܵܗܹܒܼ ܠܹܗ ܠܲܡܫܲܡܫܵܢܵܐ ܘܡܲܫܩܸܐ ܠܥܲܡܵܐ.

♱♱♱♱♱♱♱♱♱♱♱♱♱

ܬܘܼܒܼ؛ ܒܝܲܕܼ ܐܲܠܵܗܵܐ

ܛܲܟܼܣܵܐ ܕܒܘܼܪܵܟܼ ܒܵܬܹ̈ܐ ܣܘܵܕܵܐܝܼܬ.

ܡܫܲܪܹܐ ܟܵܗܢܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ. ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ؛ (ܓ ܙܲܒܼܢܝܼ̈ܢ) ܘܥܲܠ ܐܲܪܥܵܐ ܫܠܵܡܵܐ ܘܣܲܒܼܪܵܐ ܛܵܒܼܵܐ ܠܲܒܼܢܲܝ̈ܢܵܫܵܐ ܒܟܼܠ ܥܸܕܵܢ ܠܥܵܠܡܝܼܢ. ܐܵܡܹܝܢ.

ܘܐܵܡܪܝܼܢ؛ ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

ܨܠܘܿܬܼܵܐ. ܒܪ̈ܝܼܟܹܐ ܝَܢܵܐ ܝܵܐ ܡܵܪܝܼ ܪ̈ܲܚܡܹܐ ܕܛܲܒܿܘܼܬܘܿܟܼ ܘܣܓܼܝܼܕܵܐ ܝَܢܵܐ ܩܘܿܠܹ̈ܐ ܕܡܵܪܘܼܬܘܿܟ؛ ܕܒܟܿܠ ܙܲܒܼܢܵܐ ܟܹܐ ܡܲܠܦܝܼܠܲܢ ܩܵܐ ܕܚܲܝܪܲܚ ܠܟܸܣܠܘܿܟܼ ܘܫܲܩܠܲܚ ܫܘܼܒܼܗܵܪܵܐ ܒܝܼܘܿܟܼ؛ ܘܠܵܐ ܩܲܛܥܹܐ ܣܲܒܼܪܲܢ ܡܸܢܘܿܟܼ ܟܠܵܝܗ‌ܝ ܝܵܘܡܵܢܹ̈ܐ ܕܚܲܝ̈ܝܲܢ؛ ܡܵܪܵܐ ܕܟܿܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܢܹܝܢ؛ ܐܵܡܹܝܢ.

ܘܡܫܲܪܝܼ؛ ܡܲܙܡܘܿܪܵܐ؛ ܟܓ. ܒܓܝܼܘܿܪܹܗ.

ܡܵܪܝܵܐ ܒܸܬܿ ܡܲܪܥܹܐܠܝܼ ܘܡܸܢܕܝܼ ܠܹܐ ܣܲܢܩܸܢ. ܘܥܲܠ ܡܲܪ̈ܓܹܐ ܫܲܡܝܼܢܹ̈ܐ ܒܸܬܿ ܡܲܫܪܹܐ ܠܝܼ. ܥܲܠ ܡܵܪܝܵܐ ܢܸܫܕܹܐ ܨܸܦܬܲܢ؛ ܝܵܨܘܿܦܵܐ ܕܒܲܝܬܵܝܵܘ̈ܗ‌ܝ. ܡܵܪܝܵܐ ܒܸܬܿ ܡܲܪܥܹܐܠܝܼ ܘܡܸܢܕܝܼ ܠܹܐ ܣܲܢܩܸܢ. ܘܥܲܠ ܡܲܪ̈ܓܹܐ ܕܚܲܝܠܵܐ ܒܸܬܿ ܡܲܫܪܹܐ ܠܝܼ‌܋ ܘܥܲܠ ܡܝܼܵܐ ܢܝܼܚܹ̈ܐ ܒܸܬܿ ܠܵܒܸܠܝܼ. ܓܵܢܝܼ ܡܘܿܕܸܪܹܗ ܘܩܲܡ ܠܵܒܸܠܝܼ ܒܐܘܼܪ̈ܚܵܬܹܐ ܕܗܲܩܘܼܬܵܐ‌܋ ܣܵܒܵܒ ܫܸܡܘܿܟܼ ܐܵܦܸܢ ܟܹܐ ܚܲܕܪܸܢ. ܒܪ̈ܵܘܘܿܠܹܐ ܕܛܲܠܢܝܵܬܹ̈ܐ ܕܡܵܘܬܵܐ‌܋ ܠܹܐ ܙܲܕܥܸܢ ܡ̣ܢ ܒܝܼܫܬܵܐ ܣܵܒܵܒ ܐܲܢَܬܿ ܥܲܡܝܼ ܝَܼܘܸܬܿ. ܩܵܛܝܼܬܘܿܟ ܘܚܘܼܛܪܘܼܟܼ ܐܵܢܝܼ ܟܹܐ ܝܵܗَܒܼܝܼ ܠܝܼ ܠܸܒܵܐ‌܋ ܡܘܿܪܝܸܙܠܘܼܟܼ ܩܵܕَܡܝܼ ܦܵܬܼܘܿܪܹ̈ܐ ܠܒܲܪܩܘܼܒܼܠ ܕܸܫܡܸܢܝܼ. ܡܫܸܚܠܘܼܟܼ ܪܹܫܝܼ ܒܡܸܫܚܵܐ ܟܵܣܝܼ ܟܹܐ ܡܲܪܘܸܐ ܐܲܝܟܼ ܚܲܝܵܐ‍܋ ܛܲܝܒܿܘܼܬܘܼܟܼ ܘܪ̈ܲܚܡܘܿܟܼ ܢܦܝܼܠܘܿܢ ܒܵܬَܪܝܼ. ܟܠܵܝܗ‌ܝ ܝܵܘܡܵܢܹ̈ܐ ܕܚܲܝܝܼ̈‌܋ ܕܚܵܝܸܢ ܒܒܲܝܬܵܐ ܕܡܵܪܝܵܐ ܒܝܘܼܪܟܼܵܐ ܕܝܵܘܡܵܢܹ̈ܐ. ܥܲܠ ܡܵܪܝܵܐ ܢܸܫܕܹܐ ܨܸܦܬܲܢ؛ ܝܵܨܘܿܦܵܐ ܕܒܲܝܬܵܝܵܘ̈ܗ‌ܝ. ܫܘܼܒܼܚܵܐ ܠܒܵܒܵܐ ܘܠܒܪܘܿܢܵܐ ܘܠܪܘܼܚܵܐ ܕܩܘܼܕܫܵܐ. ܡ̣ܢ ܥܵܠܲܡ ܘܥܕܲܡܵܐ ܠܥܵܠܲܡ ܥܵܠܡܝܼܢ ܐܵܡܹܝܢ. ܥܲܠ ܡܵܪܝܵܐ ܢܸܫܕܹܐ ܨܸܦܬܲܢ؛ ܝܵܨܘܿܦܵܐ ܕܒܲܝܬܵܝܵܘ̈ܗ‌ܝ܋ ܡܵܪܝܵܐ ܒܸܬܿ ܡܲܪܥܹܐܠܝܼ ܘܡܸܢܕܝܼ ܠܹܐ ܣܲܢܩܸܢ. ܘܥܲܠ ܡܲܪ̈ܓܹܐ ܫܲܡܝܼܢܹ̈ܐ ܒܸܬܿ ܡܲܫܪܹܐ ܠܝܼ. ܥܲܠ ܡܵܪܝܵܐ ܢܸܫܕܹܐ ܨܸܦܬܲܢ؛ ܝܵܨܘܿܦܵܐ ܕܒܲܝܬܵܝܵܘ̈ܗ‌ܝ܋

ܨܠܘܿܬܼܵܐ. ܒܝܲܡܝܼܢܘܿܟܼ ܝܵܐ ܡܵܪܝܼ ܢܛܘܼܪܲܢ؛ ܘܬܚܘܼܬܿ ܓܘܼܠܦܵܢܘܼܟܼ ܚܵܡܝܼܠܲܢ؛ ܘܗܲܝܲܪܬܘܿܟܼ ܗܲܝܸܪܵܐ ܠܲܢ؛ ܟܠܵܝ̈ܗ‌ܝ ܝܵܘ̈ܡܵܬܼܵܐ ܕܚܲܝ̈ܝܲܢ؛ ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܲܠܡܝܼܢ.

ܘܥܵܢܹܝܢ؛ ܐܵܡܹܝܢ.

ܘܐܵܡܪܝܼܢ؛ ܡܲܙܡܘܿܪܵܐ ܨܐ. ܒܓܝܼܘܼܪܹܗ.

ܗ̇ܘ ܕܟܹܐ ܝܵܬܹܒܼ ܒܣܸܬܵܪܵܐ ܕܡܪܲܝܡܵܐ. ܘܒܛܸܠܵܢܝܼܬܵܐ ܕܐܲܠܵܗܵܐ ܦܵܐܹܫ ܡܫܘܿܒܿܚܵܐ‌. ܐܲܢَܬܿ ܝܑܼܘܸܬܿ ܬܘܼܟܼܠܵܢܝܼ ܝܵܐ ܡܫܝܼܚܵܐ ܠܥܵܠܲܡ ܠܹܐ ܢܲܟܼܦܸܢ. ܗ̇ܘ ܕܟܹܐ ܝܵܬܹܒܼ ܒܣܸܬܵܪܵܐ ܕܡܪܲܝܡܵܐ. ܘܒܛܸܠܵܢܝܼܬܵܐ ܕܐܲܠܵܗܵܐ ܦܵܐܹܫ ܡܫܘܿܒܿܚܵܐ‌‎܋ ܒܸܬܿ ܐܲܡܪܸܢ ܠܡܵܪܝܵܐ ܬܘܼܟܼܠܵܢܝܼ. ܚܲܡܝܵܢܝܼ ܐܲܠܵܗܵܐ ܕܣܢܝܼܕܵܐ ܝܘܸܢ ܥܲܠܹܗ‌܋ ܕܗ̇ܘ ܒܸܬܿ ܡܚܵܠܸܨܠܘܿܟܼ ܡ̣ܢ ܩܘܼܠܬܵܐ ܕܬܲܪܩܲܠܬܵܐ. ܘܡ̣ܢ ܗܹܡܸܙܡܵܢ ܕܕܘܼܓܠܵܐ‌܋ ܒܦܲܪ̈ܘܼܗ‌ܝ ܒܸܬܿ ܡܦܲܨܹܐܠܘܼܟܼ ܘܬܚܘܿܬ ܓܘܼܠܦܵܢ̈ܘܼܗ‌ܝ ܒܸܬܿ ܚܵܡܸܬܿ. ܙܲܝܢܵܐ ܒܸܬܿ ܚܲܪܕܹܐܠܘܿܟܼ ܗܲܩܘܼܬܹܗ‌܋ ܠܹܐ ܙܲܕܥܸܬܿ ܡ̣ܢ ܙܕܘܼܥܬܵܐ ܕܠܲܝܠܹܐ. ܘܡ̣ܢ ܓܹܐܪܵܐ ܕܟܹܐ ܦܵܪܸܚ ܒܝܵܘܡܵܐ‌܋ ܘܡ̣ܢ ܗܹܡܸܙܡܵܢ ܕܟܹܐ ܚܲܕܪܵܐ ܒܚܸܫܟܵܐ. ܘܡ̣ܢ ܦܵܘܚܵܐ ܕܟܹܐ ܡܵܚܹܐ ܒܛܲܗܪܵܐ‌܋ ܢܲܦܠܝܼ ܡ̣ܢ ܕܸܦܢܘܿܟܼ ܐܲܠܦܹ̈ܐ. ܘܐܲܠܦܵܝܹ̈ܐ ܡ̣ܢ ܝܲܡܘܼܢܘܿܟܼ‌܋ ܘܠܟܸܣܠܘܼܟܼ ܠܹܐ ܩܲܪܒܸܢܝܼ. ܐܸܠܵܐ ܒܥܲܝܢܘܿܟܼ ܐܲܚܟ̰ܝܼ ܒܚܵܙܸܬܿ‌܋ ܒܦܘܼܪܥܵܢܵܐ ܕܒܝܼܫܹ̈ܐ ܒܸܬܿ ܚܵܙܸܬܿ. ܣܵܒܵܒ ܐܲܢَܬܿ ܝܘܸܬܿ ܡܵܪܝܵܐ ܣܲܢܕܵܢܝܼ‌܋ ܒܪܵܘܡܵܐ ܡܘܿܬܸܒܼܠܘܼܟܼ ܡܲܣܟܵܢܘܼܟܼ. ܠܵܐ ܩܲܪܒܸܢܵܗ̇ ܥܲܠܘܼܟܼ ܒܝܼܫܬܵܐ‌܋ ܘܡܚܲܝܬܼܵܐ ܠܹܐ ܩܲܪܒܸܢܵܗ̇ ܠܒܲܝܬܘܼܟܼ. ܣܵܒܵܒ ܠܡܲܠܵܐܟܼ̈ܘܼܗ‌ܝ ܒܸܬܿ ܦܵܩܸܕܼ ܐܸܠܘܼܟܼ‌܋ ܒܸܬܿ ܢܲܛܪܝܼܠܘܼܟܼ ܒܟܠܵܝܗ‌ܝ ܐܘܼܪ̈ܚܵܬܼܘܼܟܼ. ܥܲܠ ܕܪ̈ܲܥܢܵܢܵܝܗ‌ܝ ܒܸܬܿ ܫܲܩܠܝܼܠܘܼܟܼ‌܋ ܕܠܵܐ ܬܲܪܩܸܠܸܬܿ ܒܐܲܩܠܘܼܟܼ. ܥܲܠ ܐܲܪܝܵܐ ܘܥܲܠ ܚܘܼܘܹܐ ܒܸܬܿ ‌ܕܵܝܫܸܬܿ‌܋ ܘܒܸܬܿ ܕܵܝܫܸܬܿ ܐܲܪܝܵܐ ܘܬܲܢܝܼܢܵܐ. ܣܵܒܵܒ ܐܸܠܝܼ ܒܥܹܐܠܹܗ ܒܸܬܿ ܦܵܨܸܢܹܗ ܘܒܸܬܿ ܚܲܠܸܠܸܢܹܗ‌܋ ܣܵܒܵܒ ܕܝَܕܸܥܠܹܗ ܫܸܡܝܼ ܘܩܵܪܹܐܠܝܼ ܘܒܸܬܿ ܓ̰ܲܘܸܒܸܢܹܗ. ܥܲܡܘܼܗ‌ܝ ܝܘܸܢ ܒܐܘܼܠܨܵܢܵܐ‌܋ ܒܸܬܿ ܚܲܠܸܠܸܢܹܗ ܘܒܸܬܿ ܡܝܲܩܪܝܼܢܹܗ. ܠܝܘܼܪܟܼܵܐ ܕܝܵܘ̈ܡܵܬܼܵܐ ܘܒܸܬܿ ܡܲܣܒܼܸܥܢܹܗ ܘܒܸܬܿ ܡܲܚܙܸܢ ܐܸܠܹܗ ܦܘܼܪܩܵܢܝܼ. ܐܲܢَܬܿ ܝܘܸܬܿ ܬܘܼܟܼܠܵܢܝܼ ܡܫܝܼܚܵܐ ܠܥܵܠܲܡ ܠܹܐ ܢܲܟܼܦܸܢ܋ ܫܲܒܲܚ. ܥܵܠܲܡ. ܐܲܢَܬܿ ܝܘܸܬܿ ܬܘܼܟܼܠܵܢܝܼ ܡܫܝܼܚܵܐ ܠܥܵܠܲܡ ܠܹܐ ܢܲܟܼܦܸܢ܋ ܗ̇ܘ ܕܟܹܐ ܝܵܬܹܒܼ ܒܣܸܬܵܪܵܐ ܕܥܸܠܵܝܵܐ؛ ܘܒܛܸܠܵܢܝܼܬܵܐ ܕܐܲܠܵܗܵܐ ܦܵܐܹܫ ܡܫܘܿܒܿܚܵܐ. ܐܲܢَܬܿ ܝܘܸܬܿ ܬܘܼܟܼܠܵܢܝܼ ܡܫܝܼܚܵܐ ܠܐܲܒܲܕ ܠܹܐ ܢܲܟܼܦܸܢ܋

ܨܠܘܿܬܼܵܐ. ܒܒܘܼܪ̈ܟܵܬܼܘܼܟܼ ܝܵܐ ܡܵܪܲܢ ܒܵܪܸܟܼܠܲܢ؛ ܘܫܘܼܪܵܐ ܕܝܲܨܝܼܦܘܼܬܘܼܟܼ ܚܲܪܕܝܼܠܲܢ. ܘܲܠܐܵܗܵܐ ܒܲܝܬܵܐ ܘܚܲܝܵܢ̈ܘܼܗ‌ܝ؛ ܘܡ̣ܢ ܛܵܒܼ̈ܵܬܼܵܐ ܠܵܐ ܡܲܦܨܸܪܸܬܿܠܲܢ؛ ܒܓܢܘܿܢܵܐ ܕܒܲܗܪܘܼܟܼ ܡܲܬܒܼܸܬܠܲܢ؛ ܡܵܪܵܐ ܕܟܠ.

ܘܥܵܢܹܝܢ. ܐܵܡܹܝܢ.

ܘܐܵܡܪܝܼܢ؛ ܡܲܙܡܘܿܪܵܐ؛ ܩܟ. (ܒܓܼܝܼܘܼܪܹܗ).

ܡܲܪܡܸܢ ܥܲܝܢ̈ܝܼ ܠܛܘܼܪܵܐ. ܡܐܲܝܟܵܐ ܒܸܬܿ ܐܵܬܹܐ ܗܲܝܸܪܵܢܝܼ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ؛ ܛܲܪ ܟܠܫܵܥ ܠܲܡܚܝܼܠܘܼܬܼܝ. ܡܲܪܡܸܢ ܥܲܢܝܼ ܠܛܘܼܪܵܐ. ܡܐܲܝܟܵܐ ܒܸܬܿ ܐܵܬܹܐ ܗܲܝܸܪܵܢܝܼ‌܋ ܗܲܝܲܪܬܝܼ ܡ̣ܢ ܩܵܕَܡ ܡܵܪܝܵܐ ܝܠܵܗ̇. ܗ̇ܘ ܕܥܒܸܕܠܹܗ ܫܡܲܝܵܐ ܘܐܲܪܥܵܐ‌܋ ܠܹܐ ܝܵܗَܒܸܠ ܠܐܲܩܠܘܼܟܼ ܠܬܲܪܩܲܠܬܵܐ. ܘܠܵܐ ܕܵܡܸܟܼ ܢܲܛܪܵܢܘܼܟܼ‌܋ ܣܵܒܵܒ ܢܵܝܹܡ ܘܠܹܐ ܕܵܡܸܟܼ. ܢܲܛܘܿܪܵܐ ܕܝܼܣܪܵܝܹܠ‌܋ ܡܵܪܝܵܐ ܝَܠܹܗ ܢܵܛܘܿܪܘܼܟܼ. ܡܵܪܝܵܐ ܒܥܵܒܹܕ ܥܲܠܘܼܟܼ ܛܲܠܵܢܝܼܬܵܐ ܒܐܝܼܕܹܗ ܕܝܲܡܝܼܢܵܐ‌܋ ܒܝܵܘܡܵܐ ܫܸܡܫܵܐ ܠܹܐ ܚܲܙܕܸܓܠܘܼܟܼ. ܘܐܵܦ ܠܵܐ ܣܲܗܪܵܐ ܒܠܲܝܠܹܐ‌܋ ܡܵܪܝܵܐ ܒܸܬܿ ܢܵܛܸܪܘܼܟܼ ܡ̣ܢ ܟܠܵܝܗ‌ܝ ܒܝܼ̈ܫܵܬܹܐ. ܒܢܵܛܸܪ ܓܵܢܘܼܟܼ ܡܵܪܝܵܐ‌܋ ܘܒܢܵܛܸܪ ܦܠܲܛܬܘܼܟܼ ܘܥܒܲܪܬܘܼܟܼ. ܡ̣ܢ ܐܲܕܝܼܵܐ ܘܗܲܠ ܥܵܠܲܡ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ؛ ܛܲܪ ܟܠܫܵܥ ܠܲܡܚܝܼܠܘܼܬܼܝ܋ ܫܲܒܲܚ. ܘܥܵܠܲܡ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ؛ ܛܲܪ ܟܠܫܵܥ ܠܲܡܚܝܼܠܘܼܬܼܝ܋ ܡܲܪܡܸܢ ܥܲܝܢ̈ܝܼ ܠܛܘܼܪܵܐ. ܡܐܲܝܟܵܐ ܒܸܬܿ ܐܵܬܹܐ ܗܲܝܸܪܵܢܝܼ. ܠܵܟܼܘܼ ܣܲܟܿܝܼܬܼ ܥܝܼܪ ܡ̣ܢ ܟܠ؛ ܛܲܪ ܟܠܫܵܥ ܠܲܡܚܝܼܠܘܼܬܼܝ܋

ܡܒܲܪܸܟܼ ܟܵܗܢܵܐ ܠܡܝܼܵܐ ܩܵܐ ܡܲܪܝܲܣܬܵܐ ܕܟܠܹܗ ܒܲܝܬܵܐ ܒܐܵܗܵܐ ܨܠܘܿܬܼܵܐ. ܨܠܘܿܬܼܵܐ ܕܡܩܲܕܲܫܬܵܐ ܕܡܝܼܵܐ:

ܐܸܠܘܿܟܼ ܡܵܪܝܵܐ ܐܲܠܵܗܵܐ ܚܲܝܠܵܢܵܐ ܩܲܕܝܼܫܵܐ ܘܲܡܫܲܒܿܚܵܐ؛ ܡܵܘܕܘܿܝܹܐ ܝܘܲܚ ܘܒܸܣܓܼܵܕܵܐ ܝܘܲܚ؛ ܒܒܸܣܬܵܝܘܼܬܼܵܐ ܕܝܘܿܗَܒܸܠܘܼܟܼ ܐܸܠܲܢ؛ ܒܸܛܠܵܒܵܐ ܝܘܲܚ ܡ̣ܢ ܒܲܣܝܼܡܘܼܬܘܼܟܼ؛ ܕܦܲܫܛܸܬܿ ܝܲܡܝܼܢܵܐ ܕܡܪܲܚܡܵܢܘܼܬܘܼܟܼ؛ ܘܒܲܪܟܸܬܿ ܘܡܩܲܕܫܸܬܿ ܠܐܲܢܹ̈ܐ ܡܝܼܵܐ؛ ܘܫܲܪܝܵܐ ܒܝܼܵܝ̈ܗ‌ܝ ܗܲܝܲܪܬܵܐ ܕܡܸܢܘܼܟܼ ܕܟܠ ܐܲܝܟܵܐ ܕܦܵܝܫܝܼ ܝܘܼܗَܒܹܐ ܘܦܵܝܫܝܼ ܘܕܸܪܝܹܐ ܘܬܘܼܦܚܹܐ ܘܪܘܼܦܹܐ؛ ܛܲܪܕܝܼ ܡ̣ܢ ܬܵܡܵܐ ܟܠܵܗ̇ ܣܸܪܝܘܼܬܼܵܐ ܛܲܡܐܘܼܬܼܵܐ ܕܡܝܼܬܵܐ ܘܕܚܢܝܼܩܵܐ؛ ܘܟܠ ܕܫܵܬܹܐ ܡܸܢܵܝܗ‌ܝ ܝܲܢ ܡܲܦܠܸܚܠܗܘܿܢ؛ ܨܸܦܝܘܼܬܼܵܐ ܘܙܲܗܝܘܼܬܵܐ ܘܫܘܼܦܪܵܐ ܘܕܸܟܼܝܘܼܬܵܐ ܕܓܵܢܵܐ ܘܕܦܲܓܼܪܵܐ ܩܵܢܝܼ ܡܸܢܵܝܗ‌ܝ. ܘܩܵܒܠܝܼ ܚܲܠܥܲܬܿ ܨܦܝܼܬܵܐ ܕܡ̣ܢ ܠܘܵܬܘܼܟܼ. ܗܲܝܲܪܬܵܐ ܘܦܘܼܪܩܵܢܵܐ؛ ܠܓܵܢܵܬܹ̈ܐ ܕܟܹܐ ܒܲܣܡܵܠܵܝܗ‌ܝ ܘܟܹܐ ܚܵܕܝܼ ܒܩܲܕܝܼܫܘܼܬܼܵܐ ܘܒܲܝܬܵܝܘܼܬܼܵܐ ܕܡܵܪܘܼܬܘܼܟܼ. ܘܩܵܐ ܒܘܼܬܿ ܟܠܵܝܗ‌ܝ ܗܲܝܲܪ̈ܵܝܵܬܘܼܟܼ ܕܩܵܬܲܢ؛ ܒܸܬ ܡܲܣܩܲܚܠܘܼܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܫܵܟܲܪܬܵܐ ܘܣܓܲܕܬܵܐ؛ ܐܲܕܝܼܵܐ ܘܒܟܠ ܙܲܒܼܢܵܐ ܘܲܠܥܵܠܲܡ ܐܵܡܹܝܢ♰ ܪܵܫܹܡ ܥܲܠ ܡܝܼܵܐ.

ܘܗܵܝܓܵܐ ܡܲܪܝܸܣ ܟܵܗܢܵܐ ܡ̣ܢ ܡܝܼܵܐ (ܡܒܘܼܪ̈ܟܹܐ) ܠܟܠܹܗ ܒܲܝܬܵܐ. ܘܡ̣ܢ ܒܵܬَܪ ܕܦܵܪܩܝܼ؛ ܕܲܥܪܝܼ ܠܘܵܬܼ ܨܠܝܼܒܼܵܐ ܘܐܹܘܲܢܓܵܠܝܼܘܿܢ؛ ܘܩܵܝܡܝܼ ܒܣܸܕܪ̈ܵܝܗܝ؛ ܘܫܲܪܝܼ ܐܲܢܹܐ ܥܘܿܢ̈ܝܵܬܹܐ.

ܒܪܘܼܟܵܒܼ؛ ܣܵܗܕܹ̈ܐ ܒܪ̈ܝܼܟܹܐ.

ܬܸܗܘܸܐ ܛܲܝܒܼܘܼܬܵܟܼ ܥܠܲܝܢ ܡܵܪܝܵܐ. ܒܝܲܕܼ ܛܲܝܒܿܘܼܬܵܟܼ ܡܵܪܵܐ ܡܪܲܚܡܵܢܵܐ؛ ܒܲܪܸܟܼ ܘܢܲܛܲܪ ܠܒܲܝܬܵܐ ܗܵܢܵܐ ܘܥܵܡܘܿܪ̈ܵܘܗ‌ܝ؛ ܡ̣ܢ ܫܹܐܕܹ̈ܐ ܘܐَܢܵܫܵܐ ܒܝܼܫܹ̈ܐ. ܡܵܙܘܿܢ ܙܲܒܼܢܵܐ ܐܲܣܓܵܐ ܒܹܗ؛ ܘܚܘܼܒܵܐ ܘܫܲܝܢܵܐ ܘܐܵܘܝܘܼܬܼܵܐ؛ ܘܚܘܼܠܡܵܢܵܐ ܕܦܲܓܼܪܵܐ ܘܲܕܼܢܲܦ̮ܫܵܐ܀ ܢܸܬܼܒܲܪܲܟܼ ܒܕܼܵܪܵܐ ܕܙܲܕܝܼܩܹ̈ܐ. ܒܝܲܕܼ ܡܲܠܐܟܹ̈ܐ ܐܸܬܼܒܲܪܲܟܼ ܒܲܝܬܹܗ ܕܐܲܒܼܘܼܢ ܐܲܒܼܪܵܗܵܡ؛ ܘܲܒܼܝܲܕܼ ܡܵܪܗܘܿܢ ܕܡܲܠܲܐܟܹ̈ܐ ܒܲܝܬܵܐ ܕܙܲܟܲܝ ܐܸܬܼܒܲܪܲܟܼ. ܒܲܝܬܵܐ ܕܥܲܠܘ ܠܹܗ ܣܵܓܼܘܿܕܲܝ̈ܟ؛ ܬܠܝܼܬܵܝܘܼܬܼܵܐ ܬܸܫܪܸܐ ܒܹܗ ܘܢܸܬܼܒܲܪܲܟܼ ܒܕܼܵܪܵܐ ܕܙܲܕܝܼܩܹ̈ܐ܀ ܠܵܐ ܬܸܬܸܿܠ ܡܵܪܝܵܐ ܪܸܓ̇ܬܹܗ ܠܥܵܘܵܠܵܐ. ܛܪܘܿܕܲܝܗ‌ܝ ܠܣܵܛܵܢܵܐ ܕܐܝܼܬܼܵܘܗ‌ܝ ܒܥܸܠܕܒܼܵܒܼܵܐ ܕܟܼܠܵܗ̇ ܟܹܐܢܘܼܬܼܵܐ؛ ܡ̣ܢ ܒܲܝܬܵܐ ܕܲܫܪܹܝܢܲܢ ܒܹܗ. ܕܠܵܐ ܢܸܥܘܿܠ ܘܢܸܫܬܲܠܲܛ ܒܹܗ. ܫܲܪܲܪ ܡܵܪܲܢ ܫܲܬܼܐِܣܵܘ̈ܗ‌ܝ ܥܲܠ ܟܹܐܦܵܐ ܕܗܲܝܡܵܢܘܼܬܼܵܐ؛ ܘܐܲܣܓܵܐ ܒܹܗ ܚܲܝܹ̈ܐ ܕܲܠܥܵܠܲܡ܀ ܘܐܸܡܲܪ ܝܼܫܘܿܥ ܠܬܲܠܡܝܼܕܼܵܘ̈ܗ‌ܝ. ܡܵܪܲܢ ܡܫܝܼܚܵܐ ܕܐܸܡܲܪ ܒܲܣܒܲܪܬܹܗ ܠܟܸܢܫܵܐ ܕܬܲܠܡܝܼܕܼܵܘ̈ܗ‌ܝ. ܟܠ ܒܲܝܬܵܐ ܕܥܵܐܠܝܼܬܘܿܢ ܠܹܗ. ܘܲܡܩܲܒ̇ܠܝܼܢ ܠܟܼܘܿܢ ܐܹܒܲܪܟܼܝܼܘܗ‌ܝ. ܒܲܪܸܟܼ ܡܵܪܲܢ ܒܛܲܝܒܿܘܼܬܼܵܟܼ؛ ܠܒܲܝܬܵܐ ܗܵܢܵܐ ܕܣܵܓܼܘܿܕܲܝ̈ܟ؛ ܘܐܲܫܪܵܐ ܒܹܗ ܫܲܝܢܵܟܼ ܘܲܫܠܵܡܵܟܼ܀

ܫܲܒܲܚ. (ܒܩܵܠ؛ ܗܵܐ ܫܒܲܢܝ). ܬܠܝܼܬܼܵܝܘܼܬܼܵܐ ܕܒܝܼܵܗ݁ ܦܸܫܠܗَܘܿܢ ܡܒܿܘܼܪ̈ܟܹܐ ܡܗܲܝܡܢܹ̈ܐ ܟܹܐܢܹ̈ܐ؛ ܘܐܲܒܼܵܗܵܬܹ̈ܐ ܩܲܕَܡܵܝܹ̈ܐ. ܒܝܼܵܗ݁ ܦܵܐܹܫ ܡܒܿܘܼܪܟܼܵܐ ܐܵܗܵܐ ܒܲܝܬܵܐ ܘܗܵܘܹܐ ܡܒܘܼܪܟܼܵܐ؛ ܡ̣ܢ ܐܲܕܝܼܵܐ ܘܗܲܠ ܥܵܠܲܡ. ܢܛܘܿܪܹܗ ܡܵܪܝܼ؛ ܘܠܐܵܢܝܼ ܕܥܵܡܪܝܼ ܒܹܗ ܡ̣ܢ ܟܿܠ ܚܘܼܙܕܵܓܹ̈ܐ ܘܟܿܠ ܥܝܼܩܘܼܝܵܬܹ̈ܐ. ܘܦܵܐܹܫ ܡܘܼܙܝܸܕܵܐ ܒܟܿܠ ܛܵܒܼܵܬܹ̈ܐ؛ ܐܲܝܟܼ ܒܲܝܬܹܗ ܕܐܲܒܼܪܵܗܵܡ. ܘܙܵܝܕܵܐ ܘܡܓܲܪܘܸܣܵܐ ܕܵܘܸܠܬܹܗ؛ ܐܲܝܟܼ ܒܲܝܬܹܗ ܕܐܝܼܘܿܒܼ ܟܹܐܢܵܐ. ܘܦܵܐܹܫ ܢܛܝܼܪܵܐ ܒܲܨ̈ܠܵܘܵܬܼܵܗ݁؛ ܕܡܲܪܝܲܡ ܒܬܼܘܼܠܬܵܐ ܩܲܕܝܼܫܬܵܐ. ܡܐܵܕܝܼܵܐ ܘܗܲܠ ܥܵܠܲܡ܀ ܥܵܠܲܡ. ܒܲܪܸܟܼ ܡܵܪܲܢ ܠܐܵܗܵܐ ܒܲܝܬܵܐ ܘܗܵܘܹܐ ܡܒܘܼܪܟܼܵܐ؛ ܡ̣ܢ ܗܲܕܝܼܵܐ ܘܗܲܠ ܥܵܠܲܡ؛ ܒܲܪܸܟܼ ܡܵܪܲܢ ܠܕܥܵܡܪܝܼ ܒܹܗ ܒܟܿܠ ܒܘܼܪ̈ܟܵܬܹܐ؛ ܕܦܘܼܡܘܼܟܼ ܚܲܝܵܐ ܘܩܲܕܝܼܫܵܐ. ܒܲܪܸܟܼ ܡܵܪܲܢ ܦܘܼܠܚܵܢܵܝ̈ܗ‌ܝ؛ ܘܫܘܼܓَܠܵܢܵܝ̈ܗ‌ܝ ܘܐܵܦ ܩܸܢܝܵܢܵܝ̈ܗ‌ܝ؛ ܒܲܪܸܟܼ ܡܵܪܲܢ ܙܲܪ̈ܥܵܝܗ‌ܝ ܘܚܲܩܠܵܬܼܵܝ̈ܗ‌ܝ ܥܲܡ ܛܥܘܼܢܝܵܬܵܝ̈ܗ‌ܝ؛ ܒܲܪܸܟܼ ܡܵܪܲܢ ܓ̰ܡܸܥܬܼܵܝ̈ܗ‌ܝ؛ ܒܲܪܸܟܼ ܡܵܪܲܢ ܣܲܣܓܲܪ̈ܬܵܝܗ‌ܝ. ܒܲܪܸܟܼ ܡܵܪܲܢ ܒܢܘܿܢܵܝ̈ܗ‌ܝ؛ ܘܦܵܚܸܠ ܘܫܒܼܘܿܩܠܗَܘܿܢ ܓܢܵܗܵܬܵܝ̈ܗ‌ܝ: ܕܚܵܫܚܝܼ ܠܓܢܘܿܢܘܼܟܼ܀

ܘܡܨܵܠܸܐ ܟܵܗܢܵܐ. ܗܲܒَܼܠܲܢ ܡܵܪܝܼ ܕܗܵܘܲܚ ܩܵܐ ܕܝܼܘܿܟܼ؛ ܘܙܲܕܥܲܚ ܡܸܢܘܼܟܼ؛ ܘܫܲܥܫܲܥ ܡ̣ܢ ܗܹܡܸܙܡܵܢܘܿܟܼ؛ ܘܪܲܓܕܲܚ ܡ̣ܢ ܕܝܼܘܵܢܘܿܟܼ. ܘܗܵܘܲܚ ܪ̈ܥܝܼܫܹܐ ܒܦܘܼܩܕܵܢܘܼܟܼ؛ ܘܡܣܲܙܓܸܪܲܚ ܠܐܲܠܵܗܘܼܬܘܼܟܼ ܒܦܘܼܠܚܵܢܹ̈ܐ ܛܵܒܹ̈ܐ ܕܙܲܕܝܼܩܘܼܬܼܵܐ؛ ܟܠܵܝܗ‌ܝ ܝܵܘ̈ܡܵܬܼܵܐ ܕܚܲܝܲܝ̈ܢ. ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܐܵܡܪܝܼ ܫܘܼܪܵܝܵܐ؛ ܡܲܙܡܘܿܪܵܐ؛ ܩܟܙ (ܒܓܝܼܘܿܪܹܗ).

ܛܘܼܒܼܵܐ ܠܹܗ ܠܟܼܠ ܕܙܵܕܸܥ ܡ̣ܢ ܡܵܪܝܵܐ. ܘܚܵܕܸܪ ܒܐܘܼܪ̈ܚܵܬܘܼܗ‌ܝ. ܚܲܠܥܲܬܘܼܟܼ ܬܵܦܸܚ ܡܵܪܲܢ ܥܲܠ ܒܲܝܬܵܐ ܘܕܵܘܸܠܬܵܐ ܕܪܹ̈ܓܵܘܵܬܘܼܟܼ ܒܛܲܝܒܘܼܬܘܼܟܼ. ܛܘܼܒܼܵܐ ܠܹܗ ܠܟܼܠ ܕܙܵܕܸܥ ܡ̣ܢ ܡܵܪܝܵܐ. ܘܚܵܕܸܪ ܒܐܘܼܪ̈ܚܵܬܘܼܗ‌ܝ‌܋ ܓ̰ܵܦܵܐ ܕܐܝܼܕܵܬܘܼ̈ܟܼ ܟܲܕ ܐܵܟܼܠܸܬܿ ܝܵܐ ܒܲܪܢܵܫܵܐ؛ ܛܘܼܒܼܵܐ ܐܸܠܘܼܟܼ ܘܛܵܒܼܬܼܵܐ ܠܓܵܢܘܼܟܼ‌܋ ܒܲܝܬܘܼܬܘܼܟܼ ܐܲܝܟܼ ܓܸܦܬܵܐ ܡܵܪܹܐ ܛܥܘܼܢܬܵܐ ܡܲܪ̈ܙܵܢܹܐ ܕܒܲܝܬܘܼܟܼ. ܒܢܘܿܢܘܼܟܼ ܐܲܝܟܼ ܫܸܬܠܵܐ ܕܙܲܝܬܵܐ ܚܲܕܸܪ̈ܘܵܢܹܐ ܕܦܵܬܘܼܪܘܼܟܼ‌܋ ܗܵܕܟܼܵܐ ܦܵܐܹܫ ܒܘܼܪܟܼܵܐ ܓܲܒܼܪܵܐ ܕܙܵܕܸܥ ܡ̣ܢ ܡܵܪܝܵܐ. ܒܵܪܸܟܼ ܠܘܼܟܼ ܡܵܪܝܵܐ ܡ̣ܢ ܨܸܗܝܘܿܢ‌܋ ܘܚܵܙܸܬܿ ܒܛܵܒܼܵܬܼܵܗ̇ ܕܐܘܿܪܸܫܠܸܡ ܟܠܵܝܗ‌ܝ ܝܵܘܡܵܢܹ̈ܐ ܕܚܲܝ̈ܘܼܟܼ. ܘܚܵܙܸܬܿ ܒܢܘܿܢܹ̈ܐ ܕܒܢܘܿܢ̈ܘܼܟܼ. ܫܠܵܡܵܐ ܥܲܠ ܝܼܣܪܵܝܹܠ. ܚܲܠܥܲܬܘܼܟܼ ܬܵܦܸܚ ܡܵܪܲܢ ܥܲܠ ܒܲܝܬܵܐ ܘܕܵܘܸܠܬܵܐ ܕܪܹ̈ܓܵܘܵܬܘܼܟܼ ܒܛܲܝܒܘܼܬܘܼܟܼ. ܫܲܒܲܚ. ܥܵܠܲܡ. ܚܲܠܥܲܬܘܼܟܼ ܬܵܦܸܚ ܡܵܪܲܢ ܥܲܠ ܒܲܝܬܵܐ ܘܕܵܘܸܠܬܵܐ ܕܪܹ̈ܓܵܘܵܬܘܼܟܼ ܒܛܲܝܒܘܼܬܘܼܟܼ܋ ܛܘܼܒܼܵܐ ܠܹܗ ܠܟܼܠ ܕܙܵܕܸܥ ܡ̣ܢ ܡܵܪܝܵܐ. ܘܚܵܕܸܪ ܒܐܘܼܪ̈ܚܵܬܘܼܗ‌ܝ. ܚܲܠܥܲܬܘܼܟܼ ܬܵܦܸܚ ܡܵܪܲܢ ܥܲܠ ܒܲܝܬܵܐ ܘܕܵܘܸܠܬܵܐ ܕܪܹ̈ܓܵܘܵܬܘܼܟܼ ܒܛܲܝܒܘܼܬܘܼܟܼ܋

ܘܐܵܡܸܪ ܟܵܗܢܵܐ ܨܠܘܿܬܼܵܐ ܥܲܠ ܒܲܝܬܵܐ.

ܨܠܘܿܬܼܵܐ. ܬܠܝܼܬܼܵܝܘܼܬܼܵܐ ܕܒܝܼܵܗ݁ ܦܸܫܠܗَܘܿܢ ܒܘܼܪ̈ܟܹܐ ܘܦܸܫܠܗَܘܿܢ ܡܩܘܼܕܫܹ̈ܐ ܒܵܬܹ̈ܐ ܕܐܲܒܼܵܗܵܬܹ̈ܐ ܡܗܲܝܡܢܹ̈ܐ ܟܹܐܢܹ̈ܐ ܘܙܲܕܝܼܩܹ̈ܐ؛ ܗ̇‌ܝ ܢܲܛܪܵܐ ܠܐܵܗܵܐ ܒܲܝܬܵܐ؛ ܘܚܲܡܝܵܐ ܠܥܵܡܪ̈ܵܢܘܼܗܝ ܡ̣ܢ ܟܠ ܚܘܼܙܕܵܓܹ̈ܐ ܟܸܣܝܹ̈ܐ ܘܓܸܠܝܹ̈ܐ. ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܣܵܐܹܡ ܟܵܗܢܵܐ ܒܸܣܡܹ̈ܐ؛ ܘܡܲܥܛܲܪ ܢܲܦ̮ܫܹܗ؛ ܘܟܸܢ ܡܲܥܛܲܪ ܠܲܨܠܝܼܒܼܵܐ ܘܠܹܐܘܲܢܓܵܠܝܼܘܿܢ؛ ܘܒܼܵܬܲܪܟܸܢ ܝܵܗܹܒܼ ܠܹܗ ܦܝܼܪܡܵܐ ܠܫܲܡܵܫܵܐ؛ ܘܡܲܥܛܲܪ ܫܲܡܵܫܵܐ ܠܥܲܡܵܐ؛ ܘܲܡܗܲܠܸܟܼ ܫܲܡܵܫܵܐ ܡܲܥܛܲܪ ܠܒܲܝܬܵܐ ܟܠܹܗ ܒܟܼܠܗܹܝܢ ܡܢܵܘܵܬܼ̈ܵܐ؛ ܡ̣ܢ ܠܓܼܵܘ ܘܡ̣ܢ ܠܒܲܪ. ܘܡ̣ܢ ܒܵܬܲܪ ܕܗܵܦܹܟܼ؛ ܡܫܲܪܸܐ ܟܵܗܢܵܐ ܘܐܵܡܲܪ؛ ܨܠܘܿܬܼܵܐ ܗܵܕܹܐ.

ܨܠܘܿܬܼܵܐ. ܒܘܼܪܟܿܬܼܘܿܟܼ ܡܵܪܲܢ ܘܐܲܠܵܗܲܢ ܡܲܢܝܸܚܵܐ ܥܲܠ ܐܵܗܵܐ ܒܲܝܬܵܐ ܕܪܹ̈ܓܵܘܵܬܘܼܟܼ؛ ܘܥܲܠܲܢ ܡܚܝܼܠܹ̈ܐ ܘܚܲܛܵܝܹ̈ܐ ܚܢܵܢܘܼܟܼ ܗܵܘܝܼ ܒܕܵܐܝܼܡܘܼܬܼܵܐ؛ ܣܲܒܼܪܲܢ ܛܵܒܼܵܐ؛ ܘܒܹܝܬ ܓܵܘܣܲܢ ܡܸܠܝܵܐ ܪ̈ܲܚܡܹܐ؛ ܘܫܵܒܹܩ ܓܢܵܗܹ̈ܐ ܘܚܛܝܼܵܬܹ̈ܐ؛ ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܘܥܵܢܹܝܢ: ܐܵܡܹܝܢ.

ܘܡܲܩܦܝܼܢ ܡܲܙܡܘܿܪܵܐ ܗܵܢܵܐ ܒܫܘܼܒܵܚܵܐ؛ ܟܲܕܼ ܥܲܡ ܟܠ ܦܸܬܼܓܼܵܡܵܐ ܡܲܩܦܝܼܢ ܒܩܵܠ ܙܘܼܡܵܪܵܐ؛ ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ. (ܡܲܙܡܘܿܪܵܐ ܩܟܕ)؛

ܐܲܝܢܝܼ ܕܟܹܐ ܣܵܒܪܝܼ ܒܡܵܪܝܵܐ ܒܛܘܼܪܵܐ ܕܨܸܗܝܘܿܢ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܠܹܐ ܫܲܥܫܝܼ؛ ܐܸܠܵܐ ܠܥܵܠܲܡ ܒܸܬܿ ܝܵܬܒܼܝܼ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܐܘܿܪܸܫܠܸܡ ܛܘܼܪ̈ܵܢܹܐ ܚܘܼܪܕܝܼܘܿܗ݁ ܝَܢܵܐ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܘܡܵܪܝܵܐ ܚܘܼܪܕܝܼܵܐ ܝَܠܹܗ ܠܥܲܡܹܗ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܣܵܒܵܒ ܠܹܐ ܫܵܪܹܐ ܩܲܛܝܼܵܐ ܕܥܵܘܵܠܹ̈ܐ ܒܣܲܗܡܵܐ ܕܙܲܕܝܼܩܹ̈ܐ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܘܠܹܐ ܦܲܫܛܝܼ ܙܲܕܝܼܩܹ̈ܐ ܐܝܼܕܵܬܵܝ̈ܗ‌ܝ ܒܥܵܘܠܵܐ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܟܹܐ ܥܵܒܹܕ ܛܵܒܼܬܵܐ ܡܵܪܝܵܐ ܠܛܵܒܹ̈ܐ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ.

ܘܐܵܢܝܼ ܕܝܑܼܢܵܐ ܬܪ̈ܝܼܨܹܐ ܒܠܸܒܵܝܗ‌ܝ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܘܐܲܝܢܝܼ ܕܟܹܐ ܦܵܟ̰ܠܝܼ ܒܐܘܼܪ̈ܚܵܬܵܝܗ‌ܝ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܒܸܬܿ ܕܵܒܸܪܠَܗܘܼܢ ܡܵܪܝܵܐ ܥܲܡ ܦܲܠܵܚܹ̈ܐ ܕܥܵܘܠܵܐ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܫܠܵܡܵܐ ܥܲܠ ܝܼܣܪܵܝܹܠ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܫܲܒܲܚ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܥܵܠܲܡ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܐܲܝܢܝܼ ܕܟܹܐ ܣܵܒܪܝܼ ܒܡܵܪܝܵܐ ܒܛܘܼܪܵܐ ܕܨܸܗܝܘܿܢ. ܫܘܼܒܼܚܵܐ ܐܸܠܘܼܟܼ ܐܲܠܵܗܵܐ܋

ܐܵܡܸܪܿ ܫܲܡܵܫܵܐ. ܡܲܪܡܘܿܢ ܩܵܠܵܘܟܼܘܿܢ ܘܫܲܒܚܘܿܢ ܟܠܹܗ ܥܲܡܵܐ ܠܐܲܠܵܗܵܐ ܚܵܝܵܐ.

ܘܥܵܢܹܝܢ. ܩܲܕܝܼܫܵܐ ܐܲܠܵܗܵܐ...ܘܫܲܪܟܵܐ.

ܘܟܸܢ ܡܲܩܦܝܼܢ. ܐܲܒܼܘܼܢ ܕܒܲܫܡܲܝܵܐ...ܘܫܲܪܟܵܐ.

ܘܒܼܵܬܲܪܟܸܿܢ ܡܨܲܠܹܝܢ ܬܲܪܬܹܿܝܢ ܨ̈ܠܵܘܵܢ ܘܚܵܬܿܡܝܼܢ.

ܨܠܘܿܬܼܵܐ. ܒܲܪܸܟܼ ܡܵܪܝܼ ܠܐܵܗܵܐ ܒܲܝܬܵܐ ܕܣܵܓܼܕܵܢܘܼܟܼ؛ ܐܲܝܟܼ ܒܲܝܬܹܗ ܕܐܲܒܼܪܵܗܵܡ؛ ܘܐܲܝܟܼ ܒܲܝܬܹܗ ܕܙܲܟܲܝ؛ ܘܐܲܝܟܼ ܥܸܠܝܼܬܼܵܐ ܕܫܠܝܼܚܹ̈ܐ؛ ܘܢܛܘܿܪ ܠܥܲܡܪ̈ܵܢܘܼܗܝ ܡ̣ܢ ܟܠ ܚܘܼܙܕܵܓܹ̈ܐ ܟܸܣܝܹ̈ܐ ܘܓܸܠܝܹ̈ܐ؛ ܒܲܨܠܘܿܬܼܵܐ ܕܩܲܕܝܼܫܹ̈ܐ ܡܣܲܙܓܸܪܵܢܘܼܟܼ؛ ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܿܕܫܵܐ ܠܥܵܠܡܝܼܢ.

ܥܵܢܹܝܢ: ܐܵܡܹܝܢ ܒܲܪܸܟܼܡܵܪܝ.

ܚܵܬܼܵܗ̇. ܪ̈ܲܚܡܘܼܟܼ ܡܵܪܝܼ ܘܚܢܵܢܘܼܟܼ ܘܗܲܝܲܪܬܘܼܟܼ ܘܦܘܼܪܩܵܢܘܼܟܼ؛ ܡܲܨܠܝܼ ܘܡܲܫܪܝܼ ܒܐܵܗܵܐ ܒܲܝܬܵܐ ܕܣܵܓܼܕܵܢܘܼܟܼ؛ ܘܢܛܘܿܪ ܠܥܲܡܪ̈ܵܢܘܼܗܝ ܡ̣ܢ ܟܠ ܚܘܼܙܕܵܓܹ̈ܐ ܟܸܣܝܹ̈ܐ ܘܓܸܠܝܹ̈ܐ؛ ܒܨܠܘܿܬܼܵܐ ܕܩܲܕܝܼܫܹ̈ܐ ܡܣܲܙܓܸܪܵܢܘܼܟܼ؛ ܡܵܪܵܐ ܕܟܠ؛ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܥܵܠܡܝܼܢ.

ܥܵܢܹܝܢ: ܐܵܡܹܝܢ.

ܚܘܼܬܵܡܵܐ.

ܒܘܼܪܟܿܬܘܿܟܼ ܡܵܪܲܢ ܘܐܲܠܵܗܲܢ ܦܵܝܫܝܼ ܒܘܼܪܟܹܐ ܪܹ̈ܓܵܘܵܬܘܼܟܼ؛ ܒܝܲܕ ܐَܟܲܠܬܵܐ ܕܚܲܡ (ܒܝܲܨܝܼܦܘܼܬܹܗ) ܕܨܸܒܼܝܵܢܘܼܟܼ ܦܵܝܫܝܼ ܢܛܝܼܪܹܐ ܣܵܓܼܕܵܢܘܼܟܼ. ܘܫܲܝܢܵܐ ܡܵܪܝܼ ܐܲܡܝܼܢܵܐ ܕܐܲܠܵܗܘܼܬܘܼܟܼ؛ ܘܫܠܵܡܵܐ ܝܲܪܝܼܟܼܵܐ ܕܡܵܪܘܼܬܘܼܟܼ. ܫܵܪܝܼ ܒܐܵܗܵܐ ܒܲܝܬܵܐ ܘܥܲܡܪ̈ܵܢܘܼܗܝ ܒܟܠܵܝܗ‌ܝ ܝܵܘܡܵܢܹ̈ܐ؛ ܐܵܕܝܼܵܐ ܘܒܟܠܹܗ ܙܲܒܼܢܵܐ ܘܲܠܥܵܠܲܡ ܥܵܠܡܝܼܢ.♰

ܘܥܵܢܹܝܢ: ܐܵܡܹܝܢ.

ܘܐܵܡܪܝܼ: ܡܗܲܝܡܢܝܼܢܲܢ...

ܫܠܸܡ ܒܘܼܪܵܟܼ ܒܵܬܹ̈ܐ ܣܘܵܕܵܐܝܼܬܼ؛
ܘܠܐܲܠܵܗܵܐ ܫܘܼܒܼܚܵܐ.

♱♱♱♱♱♱♱♱♱♱♱♱♱

The Book of Zneen Zneen (Occational Prayers & Blessings in Aramaic)

Compiled & Edited: HH Mar Awa III Catholicos Patriarch

Commission on Inter-Church Relations and Educational Development (CIRED)

Published by Edessa Publications

P.O. Box 577500 Modesto, CA 95357-7500 USA

E-mail: info@acoecalifornia.org

All rights reserved. No part of this book may be reproduced in any form or by any electronic or mechanical means including information storage and retrieval systems, without permission in writing from the author. The only exception is be a reviewer, who may quote short excerpts in a review.

First Printing: August 2021

ISBN: 978-1-7371118-0-1

ܐܬܿܛܝܒܼ ܒܗܘܦܪܟܝܐ ܕܟܠܝܦ̮ܘܪܢܝܐ؛

ܟܠܗܘܢ ܙܕܩ̈ܐ ܢܛܝܪܝܢ؛

ܒَܟܐ (2021) ܠܡܪܢ.

The Book of Zneen Zneen (Occational Prayers & Blessings). Web and Font Design by: Fr. Lawrance Namato

ܨܠܘܬܼ̈ܐ ܕܙܢܝ̈ܢ ܙܢܝ̈ܢܡܸܛܠ ܚܫܲܚܬܵܐ ܕܟܵܗܢܹ̈ܐ ܕܥܹܕܬܵܐ ܕܡܲܕܢ̱ܚܵܐ

The Book of Zneen Zneen (Occational Prayers & Blessings)

of the Assyrian Church of the East

ܐَܚܪܹܬܼܵܐ ܕܦܵܬܼܘܿܪܵܐ ܕܚܲܣܝܵܐ ܫܠܹܝܡܘܿܢ

ܪܘܼܫܡܵܐ ܕܥܲܠ ܦܵܬܼܘܿܪܵܐ ܕܠܲܚܡܵܐ.

ܩܘܼܕܵܫ ܡܲܝ̈ܵܐ ܛܲܡ̈ܐܹܐ (ܠܲܫܝܵܓܼܬܼܵܐ ܕܥܲܢܝܼܕܹ̈ܐ).

ܨܠܘܿܬܼܵܐ ܕܥܲܠ ܡܵܐܢܹ̈ܐ ܚܲܕܼܬܹ̈ܐ ܕܡܸܬܼܩܲܪܒܼܝܼܢ ܠܡܲܕܼܒܿܚܵܐ.

ܬܘܼܒܼ ܣܝܵܡܝܼܕܼܵܐ ܕܡܸܬܲܢܹܐ ܥܲܠ ܪܹܫܵܐ ܕܬܲܝܵܒܼܵܐ ܟܲܕܼ ܡܸܬܼܚܲܣܸܐ ܡ̣ܢ ܟܵܗܢܵܐ.

ܛܲܟܼܣܵܐ ܕܒܘܼܪܵܟܼ ܒܵܬܹ̈ܐ ܣܘܵܕܵܐܝܼܬ.

ܨܠܘܬܼ̈ܐ ܕܙܢܝ̈ܢ ܙܢܝ̈ܢ
ܡܸܛܠ ܚܫܲܚܬܵܐ ܕܟܵܗܢܹ̈ܐ ܕܥܹܕܬܵܐ ܕܡܲܕܢ̱ܚܵܐ