ܕܘܒܪ̈ܐ
ܕܡܪܝ ܐܘܓܝܢ ܛܘܒ̣ܢܐ
ܡ̣ܢ ܟܬܵܒ̣ܵܐ ܕܫܲܪܒܵܐ ܕܣܵܗܕܹ̈ܐ
ܕܘܼܟ̣ܪܵܢܵܐ ܕܛܘܼܒ̣ܵܢܵܐ ܡܵܪܝܼ ܡܵܪܝ ܐܵܘܓܹܝܢ.
ܕܝܼܗܘܵܐ ܪܹܫܵܐ (ܕܝܼܚܝܼܕܵܝܹ̈ܐ) ܐܵܢܝܼ ܕܝܼܗ݇ܘܼܵܘ ܓܵܘ ܐܲܬܪܵܐ ܕܢܨܝܼܒ̣ܝܼܢ ܕܒܹܝܬ ܦܵܪ̈ܣܵܝܹܐ ܕܓܵܘ ܛܘܼܪܵܐ ܕܐܝܼܙܠܵܐ: ܘܝܑܼܗܘܼܵܐ ܪܹܫܵܐ ܕܣܝܼܥܬܵܐ ܕܫܲܒ̣ܥܝܼܢ ܘܬܪܹܝܢ ܛܘܼܒ̣ܵܢܹ̈ܐ. ܡܵܪܲܢ ܗܲܝܸܪܝܼ: ܐܵܡܹܝܢ܀
ܣܵܘܓܘܼܠܝܼ: ܟܡܵܐ ܥܵܓ̰ܝܼܒܘܼܬܵܐ ܡܘܼܫ݇ܟ̰ܸܚܠܲܢ ܓܵܘ ܬܲܫܥܝܼܬܹܗ ܕܐܵܗܵܐ ܐ݇ܢܵܫܵܐ ܓܘܼܪܵܐ ܕܥܵܓ̰ܝܼܒܘܼܬܵܐ ܥܘܼܓ̰ܸܒܠܝܼ ܐܸܕܝܘܿܡ݇ ܝܵܘܡܵܐ ܝܵܐ ܣܵܘܓܘܼܠܝܼ: ܘܪܵܒܵܐ ܒܘܼܗܪܸܢܘܿܢ ܚܝܼܵܠ̈ܝܼ ܕܲܠܩܘܼܒ̣ܠ ܙܲܗܪܝܼܪܹ̈ܐ ܕܫܸܡܫܵܐ ܕܦܸܠܚܵܢܵܢ̈ܘܼܗܝ. ܩܲܡ ܕܵܒ̣ܸܩܠܝܼ ܥܘܼܓ̰ܵܒܵܐ ܒܦܸܠܚܵܢܵܢ̈ܘܼܗܝ ܐܲܠܵܗܵܝܹ̈ܐ: ܓܪܸܫܠܹܗ ܠܚܝܼܵܠ̈ܝܼ ܙܲܒܘܼܢ ܩܸܣܲܬ ܫܲܪܝܼܪܬܵܐ ܕܗܲܝܡܵܢܘܼܬܹܗ: ܘܡܘܼܫܓ̣ܸܫܠܹܗ ܠܬܲܚܡܲܢܬܝܼ ܒܟܸܟ̰ܚܵܐ ܫܲܩܝܼ ܕܦܸܠܚܵܢܹܗ ܥܲܓ̰ܒܵܢܵܐ: ܒܕܵܡܲܝܬܵܐ ܕܓܵܡܝܼ: ܕܒܲܝܢܵܬ ܕܠܲܦܹ̈ܐ ܕܝܵܡܵܐ ܓܘܼܪܬܵܐ ܒܸܛܠܵܩܵܐ ܗ݇ܘܼܵܐ ܘܠܲܐܟ̣ܵܐ ܘܬܵܡܵܐ ܒܸܩܝܵܬܵܐ ܗ݇ܘܼܵܐ. ܘܛܠܸܩܠܝܼ ܓܵܘ ܥܘܼܡܩܵܐ ܕܦܝܼܠܵܣܘܼܦܘܼܬܵܐ ܕܥܵܩܸܠܕܵܪܘܼܬܹܗ ܐܲܠܵܗܵܝܬܵܐ: ܐܲܝܟܼ ܚܲܕ݇ ܩܵܪܝܼܒܵܝܵܐ ܒܲܝܢܵܬ ܪܵܒܵܐ ܐܘܼܪ̈ܚܵܬܹܐ. ܐܝܼܢܵܐ ܒܸܛܠܵܒܵܐ ܝ݇ܘܸܢ ܣܵܘܓܘܼܠܝܼ ܗܲܝܲܪܬܵܐ ܡ̣ܢ ܐܲܠܵܗܵܐ: ܕܒܨܠܘܿܬܹܗ ܕܗ̇ܘ ܩܲܕܝܼܫܵܐ: ܝܵܗ݇ܒ̣ܸܠܝܼ ܕܐܵܙܸܠ݇ܢ ܒܒܲܢܕܲܪ ܕܫܲܝܢܵܐ ܕܐܘܼܪ̈ܚܵܬܹܐ ܬܪ̈ܘܿܨܹܐ. ܒܕܵܡܲܝܬܵܐ ܕܢܸܫܪܵܐ ܕܟܹܐ ܦܵܠܸܛ ܓܘܼܠܦܵܢܹ̈ܐ: ܕܦܲܪܚܸܢ ܘܫܵܪܸܢ ܒܣܸܪ̈ܛܹܐ ܕܪܘܼܚܵܐ ܕܦܸܠܚܵܢܵܢ̈ܘܼܗܝ ܐܲܠܵܗܵܝܹ̈ܐ ܕܐܵܗܵܐ ܡܘܼܣܝܼܩܘܿܪܵܐ ܕܥܵܓ̰ܝܼܒܘܼܝܵܬܹ̈ܐ. ܕܪܲܫܡܸܢ ܒܩܠܵܡܵܐ ܕܚܝܼܵܠ̈ܝܼ ܦܸܠܚܵܢܵܢܹ̈ܐ ܡܥܲܓ̰ܒܵܢܹ̈ܐ ܕܐܵܗܵܐ ܐ݇ܢܵܫܵܐ ܕܐܲܠܵܗܵܐ: ܘܥܵܓ̰ܝܼܒܘܼܝܵܬܹ̈ܐ ܕܒܸܦܠܵܚܵܐ ܗ݇ܘܼܵܐ ܓܵܘ ܝܵܡܵܐ ܘܓܵܘ ܒܸܪܙܵܐ. ܕܟܲܬܒ̣ܸܢ ܒܘܼܬ ܦܠܵܫܵܐ ܕܣܵܗܕܘܼܬܵܐ ܕܝܼـܹܗ ܘܐܵܢܝܼ ܐܲܚܘܿܢܘܵܬܹ̈ܗܝ ܕܥܲܡܹܗ: ܐܵܢܝܼ ܕܓ̣ܠܸܒܠܗ݇ܘܿܢ ܒܦܸܠܚܵܢܵܢܹ̈ܐ ܪ̈ܘܼܚܵܢܵܝܹ̈ܐ ܕܟܵܪ̈ܘܿܙܹܐ ܫܠܝܼܚܹ̈ܐ ܐܲܠܵܗܵܝܹ̈ܐ: ܘܡܘܼܩܸܡܹܐ ܝ݇ܢܵܐ ܠܥܹܕܵܬܹ̈ܐ ܘܡܲܠܦܵܢܘܼܬܵܐ ܕܐ݇ܪ̈ܵܙܹܐ: ܬܪܹܥܣܲܪ ܫܠܝܼܚܹ̈ܐ ܩܲܕܝܼܫܹ̈ܐ: ܐܵܢܝܼ ܕܡܘܼܟܪܸܙܠܗ݇ܘܿܢ ܡܲܫܚܲܕܬܵܐ ܕܡܲܠܟܘܼܬܵܐ ܕܫܡܲܝܵܐ ܒܟܠܵܗ̇ ܐܲܪܥܵܐ ܕܚܲܝܘܼܬܵܐ: ܕܒܝܼܲܝܗܝ ܬܘܼܚܡܸܢܹܗ ܘܦܝܼܫܠܹܗ ܕܘܼܡܝܵܐ ܩܲܕܝܼܫܵܐ ܡܵܪܝܼ ܡܵܪܝ ܐܵܘܓܹܝܢ.
ܘܦܠܸܛܠܹܗ ܡ̣ܢ ܐܲܬܪܹܗ: ܘܚܕܸܪܹܗ ܒܟܠܲܝܗܝ ܐܲܬܪ̈ܵܘܵܬܹܐ ܐܵܢܝܼ ܕܣܘܼܪܝܼܵܐ: ܘܡܛܹܐܠܹܗ ܠܡܕܝܼܢ݇ܬܵܐ ܕܢܨܝܼܒ̣ܝܼܢ ܕܒܹܝܬ ܢܲܗܪ̈ܝܼܢ: ܕܡܠܝܼܬܵܐ ܗ݇ܘܼܵܐ ܕܘܼܓܠܵܐ ܘܥܲܠܕܵܝܬܵܐ ܕܫܹܐܕܹ̈ܐ ܙܵܠܘܿܡܹ̈ܐ: ܕܘܼܟ̣ܝܵܗ̇ ܠܹܗ ܘܡܸܠܝܵܗ̇ ܠܹܗ ܫܪܵܪܵܐ: ܘܒܘܼܗܪܸܢܵܠܹܗ ܘܠܟܠܵܗ̇ ܚܸܫܟܵܢܘܼܬܹܗ ܕܐܲܬܪܵܐ ܕܚܵܕܸܪ̈ܘܼܢܘܼܗܝ: ܗ̇ܘ ܕܕܒ̣ܝܼܩܵܐ ܗ݇ܘܼܵܐ ܒܡܲܚܲܒܬܵܐ ܕܢܘܼܟ̣ܪ̈ܵܝܹܐ: ܕܨܵܢܵܡܹ̈ܐ ܢܓܝܼܪܹ̈ܐ: ܦܸܠܚܵܢܵܐ ܕܐܝܼܕܵܬܹ̈ܐ ܕܒܢܲܝ̈ܢܵܫܵܐ. ܗ̇ܘ ܕܡܘܼܢܦܸܠܹܗ ܠܥܵܠܡܵܐ ܘܠܟܲܠܝܗܝ ܐܘܼܪ̈ܚܵܬܹܗܝ ܘܫܩܸܠܹܗ ܟ̰ܲܟܵܐ ܕܨܠܝܼܒ̣ܵܐ ܕܝܼܠܹܗ ܫܵܦܵܩܲܬܹܗ ܕܡܫܝܼܚܵܐ: ܘܦܠܸܛܠܹܗ ܘܦܠܸܫܠܹܗ ܥܲܡ ܟܠܲܝܗܝ ܨܵܢܵܡܹ̈ܐ ܕܚܲܢܦܘܼܬܵܐ ܘܕܟܸܠܕܵܝܘܼܬܵܐ [ܗ̄:ܕ̄. ܦܬܲܚܬܵܐ ܕܦܵܥܠܹ̈ܐ] ܘܕܝܼܗܘܼܕܵܝܘܼܬܵܐ. ܘܡܸܢ݇ܕܪܹܫ݇ ܦܠܸܫܠܹܗ ܥܲܡ ܟܠܲܝܗܝ ܗܲܪ̈ܵܛܝܼܩܹܐ: ܐܵܢܝܼ ܕܛܪܝܼܕܵܝܠܵܗ̇ ܘܪܘܼܦܵܝܠܵܗ̇ ܥܹܕܬܵܐ ܠܒ̣ܲܕܲܪ ܡ̣ܢ ܬܲܪ̈ܥܵܢܘܼܗ̇ ܡܘܼܚܸܒܹ̈ܐ ܘܩܲܕܝܼܫܹ̈ܐ: ܘܡܘܼܠܸܦܠܹܗ ܗܲܝܡܵܢܘܼܬܵܐ ܫܲܪܝܼܪܬܵܐ ܫܠܝܼܚܵܝܬܵܐ ܘܩܵܬܘܿܠܝܼܩܝܼ. ܕܐܵܕܝܼܵܐ ܕܒܸܕܟ̣ܵܪܵܐ ܝ݇ܘܸܢ ܘܠܹܐ ܝ݇ܘܸܢ ܦܲܪܡܘܼܝܹܐ: ܘܒܸܙܕܲܥܝܵܐ ܝ݇ܘܸܢ ܕܪܲܫܡܸܢ ܦܸܠܚܵܢܵܢ̈ܘܼܗܝ ܥܲܠ ܘܵܪܵܩܵܐ ܒܩܵܠܵܡܵܐ ܘܒܲܕܝܘܼܬܵܐ: ܐܝܼܢܵܐ ܒܸܛܠܵܒܵܐ ܝ݇ܘܸܢ ܡ̣ܢ ܐܲܠܵܗܵܐ: ܒܨܵܠܘܵܬܹ̈ܗܝ ܕܡܵܪܝܼ ܡܵܪܝ ܐܵܘܓܹܝܢ: ܕܗ̇ܘ ܕܗܵܘܹܐ ܣܢܹܐܓ̣ܪܵܐ [ܡܸܨܥܵܝܵܐ] ܡ̣ܢ ܓܹܒܝܼ ܘܡ̣ܢ ܓܹܒܵܐ ܕܟܠܵܗ̇ ܥܵܡܲܪܬܵܐ ܘܒܨܠܵܘܵܬܹ̈ܗܝ ܦܵܐܸܫ ܗܘܼܝܸܪܵܐ ܥܵܠܡܵܐ ܟܠܹܗ: ܐܵܡܹܝܢ.
ܣܵܘܓܘܼܠܝܼ: ܗܵܕܟ̣ܵܐ ܝ݇ܠܵܗ̇ ܬܲܫܥܝܼܬܹܗ ܕܡܵܪܝ ܐܵܘܓܹܝܢ: ܒܓܸܢܣܹܗ ܘܐܘܼܓ̰ܵܓ̣ܹܗ ܘܐܲܬܪܹܗ ܝܼܗܘܼܵܐ ܡ̣ܢ ܬܸܚܘܼܒܹ̈ܐ ܕܐܵܓܹܒ̣ܛܘܿܣ: ܘܡ̣ܢ ܩܠܹܘܙܡܵܐ ܓܵܙܲܪܬܵܐ ܕܝܵܡܵܐ. ܐܝܼܢܵܐ ܒܐܘܼܡܵܢܘܼܬܹܗ: ܩܲܕܝܼܫܵܐ ܝܼܗܘܼܵܐ ܚܲܕ݇ ܦܵܠܵܚܵܐ ܕܦܸܠܚܵܢܵܐ ܪܘܼܚܵܢܵܝܵܐ: ܘܟܹܐ ܓ̰ܲܡܥܝܼ ܗ݇ܘܼܵܐ ܕܵܘܸܠܬܵܐ ܦܲܝܫܵܢܬܵܐ ܕܚܲܝܹ̈ܐ ܕܠܥܵܠܲܡ. ܘܟܠ ܝܵܘܡܵܐ ܟܹܐ ܕܵܪܝܼ ܗ݇ܘܼܵܐ ܥܲܠ ܦܲܐܬܘܼܗܝ ܝܵܠܸܚܬܵܐ ܕܬܘܼܪܨܘܼܗ̇ ܗ݇ܘܼܵܐ ܒܐܘܼܡܵܢܘܼܬܵܐ: ܘܟܹܐ ܣܚܝܼ ܗ݇ܘܼܵܐ ܘܨܵܠܝܼ ܗ݇ܘܼܵܐ ܓܵܘ ܝܵܡܵܐ. ܘܡܵܣܸܩ ܗ݇ܘܼܵܐ ܡ̣ܢ ܥܘܼܡܩܹ̈ܐ ܕܝܵܡܵܐ ܡܲܪ̈ܓܲܢܝܵܬܹܐ: ܘܙܵܒܸܢ ܗ݇ܘܼܵܐ ܠܗ݇ܘܿܢ ܒܙܘܼܙܹ̈ܐ: ܘܦܲܠܓ݇ܝܼ ܗ݇ܘܼܵܐ ܠܗ݇ܘܿܢ ܩܵܐ ܥܹܕܵܬܹ̈ܐ ܘܠܕܲܝܪܹ̈ܐ: ܘܠܡܸܣܟܹܢܹ̈ܐ ܘܣܢܝܼܩܹ̈ܐ: ܘܠܝܵܬܘܿܡܹ̈ܐ ܘܠܐܲܪ̈ܡܸܠܝܵܬܹܐ. ܟܲܕ ܗܵܘܹܐ ܗ݇ܘܼܵܐ ܓܵܫܘܿܩܹܐ ܘܒܸܣܦܵܪܵܐ ܠܗܵܩܵܐ ܬܪܹܝܢ ܛܵܩܹ̈ܐ: ܕܩܵܒܸܠ ܗ݇ܘܼܵܐ ܡ̣ܢ ܡܵܪܹܗ ܘܐܲܠܵܗܹܗ. ܘܒܚܙܵܝܬܵܐ ܨܦܝܼܬܵܐ ܘܕܟ̣ܝܼܬܵܐ ܕܗܲܝܡܵܢܘܼܬܹܗ: ܓܵܫܘܿܩܹܐ ܗ݇ܘܼܵܐ ܒܒܘܼܪ̈ܟܵܬܹܐ ܠܵܐ ܡܸܬܚܲܙܝܵܢܹ̈ܐ ܕܡܵܪܲܢ ܝܼܫܘܿܥ ܡܫܝܼܚܵܐ: ܐܵܢܝܼ ܕܚܙܹܐܠܹܗ ܛܘܼܒܼܵܢܵܐ ܦܵܘܠܘܿܣ: ܗ̇ܘ ܕܦܝܼܫܠܹܗ ܓ̰ܠܝܼܒ̣ܵܐ ܗܲܠ ܠܫܡܲܝܵܐ ܕܬܠܵܬ݇ܐ. ܘܫܡܸܥܠܹܗ ܐܲܢܹ̈ܐ ܗܹܡܸܙܡܵܢܹ̈ܐ ܕܠܹܐ ܦܵܝܫܝܼ ܗܘܼܡܙܸܡܹ̈ܐ ܒܠܸܫܵܢܵܐ ܕܒܸܣܪܵܐ ܐܲܪܥܵܢܵܝܵܐ: ܘܡܘܼܩܘܸܚܠܹܗ ܘܐ݇ܡܸܪܹܗ: ܕܥܲܝܢܵܐ ܠܵܐ ܚܙܹܐܠܵܗ̇: ܘܢܵܬܵܐ ܠܵܐ ܫܡܸܥܠܵܗ̇: ܘܥܲܠ ܠܸܒܵܐ ܕܒܲܪܢܵܫܵܐ ܠܵܐ ܣܸܩܠܹܗ: ܡܸܢܕܝܼ ܕܗܘܼܕܸܪܹܗ ܐܲܠܵܗܵܐ ܩܵܐ ܕܐܵܢܝܼ ܕܟܹܐ ܡܲܚܸܒܝܼ ܠܹܗ. ܘܝ݇ܬܸܒ̣ܠܹܗ ܥܲܠ ܐܵܪܵܒܵܢܵܐ ܚܘܵܪܬܵܐ ܥܝܼܩܬܵܐ ܕܗܲܝܡܵܢܘܼܬܹܗ: ܘܚܸܙܝܵܝܠܹܗ ܠܐܵܢܝܼ ܒܘܼܪ̈ܟܵܬܹܐ ܪ̈ܘܼܚܵܢܵܝܹܐ.
ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܒܵܥܹܐ ܗ݇ܘܼܵܐ ܕܐܵܙܸܠ ܗ݇ܘܼܵܐ ܠܝܵܡܵܐ ܐܲܝܟܼ ܥܵܕܲܬܹܗ: ܦܝܼܫܠܹܗ ܚܸܙܝܵܐ ܐܸܠܹܗ ܓܸܠܝܵܢܵܐ ܐܲܠܵܗܵܝܵܐ: ܘܚܙܹܐܠܹܗ ܒܕܵܡܲܝܬܵܐ ܕܚܲܕ݇ ܟܘܼܟ̣ܒ̣ܵܐ ܒܲܗܪܵܢܵܐ: ܗ̇ܘ ܒܲܗܪܘܼܢܹܐ ܗ݇ܘܼܵܐ ܒܕܵܡܲܝܬܵܐ ܕܓܠܘܼܠܘܼܬܵܐ ܕܫܸܡܫܵܐ ܒܲܗܪܵܢܬܵܐ. ܒܸܨܠܵܝܵܐ ܗ݇ܘܼܵܐ ܘܒܪܸܚܫܵܐ ܩܵܕ݇ܡܘܼܗܝ ܥܲܠ ܡܝܼ̈ܵܐ. ܘܟܲܕ ܚܙܹܐܠܹܗ ܐܵܗܵܐ ܩܲܕܝܼܫܵܐ: ܥܘܼܓ̰ܸܒܠܹܗ ܥܵܓ̰ܝܼܒܘܼܬܵܐ ܪܵܒܵܐ ܓܘܼܪܬܵܐ: ܟܲܕ ܬܲܚܡܘܼܢܹܐ ܗ݇ܘܼܵܐ ܘܒܹܐܡܵܪܵܐ: ܝܵܐ ܪܲܒ ܡܘܼܕܝܼ ܝ݇ܠܵܗ̇ ܐܵܗܵܐ ܥܵܓ̰ܝܼܒܘܼܬܵܐ: ܕܐܸܕܝܘܿܡ݇ ܝܵܘܡܵܐ ܦܝܼܫܠܵܗ̇ ܚܙܝܼܬܵܐ ܓܵܘ ܝܵܡܵܐ؟ ܘܟܲܕ ܝ݇ܕܸܥܠܹܗ ܩܲܕܝܼܫܵܐ: ܕܓܸܠܝܵܢܵܐ ܝ݇ܠܹܗ ܐܲܠܵܗܵܝܵܐ: ܘܐܲܝܟܼ ܕܩܵܐ ܗܲܝܲܪܬܵܐ ܘܚܲܝܠܵܐ ܕܝܼـܹܗ ܦܝܼܫܠܹܗ ܚܸܙܝܵܐ ܐܸܠܹܗ ܐܵܗܵܐ ܓܸܠܝܵܢܵܐ: ܘܥܘܼܓ̰ܸܒܠܹܗ ܒܚܸܙܘܵܐ ܘܫܘܼܒܸܚܠܹܗ ܠܐܲܠܵܗܵܐ. ܘܡ̣ܢ ܕܗ̇ܘ ܕܦܝܼܫܠܹܗ ܚܘܼܠܸܢܵܐ ܘܡܫܘܼܪܸܪܵܐ ܒܐܵܢܝܼ ܫܘܼܦܪܹ̈ܐ ܐܲܠܵܗܵܝܹ̈ܐ: ܒܘܼܫ ܙܵܘܕܵܐ ܡܘܼܙܝܸܕܠܹܗ ܥܲܠ ܦܸܠܚܵܢܵܢ̈ܘܼܗܝ ܥܲܓ̰ܒܵܢܹ̈ܐ: ܘܦܲܠܓ݇ܝܼ ܗ݇ܘܼܵܐ ܚܵܠܥܲܬܹ̈ܐ ܠܡܸܣܟܹܢܹ̈ܐ: ܘܗܲܝܸܪ ܗ݇ܘܼܵܐ ܠܣܢܝܼܩܹ̈ܐ: ܒܕܵܡܲܝܬܵܐ ܕܛܒ̣ܝܼܬܵܐ ܩܲܕܝܼܫܬܵܐ: ܗܵܕܟ̣ܵܐ ܒܝܼܘܼܗ̇ ܟܹܐ ܕܵܡܝܼ ܗ݇ܘܼܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܗܲܪ ܒܐܵܗܵܐ ܟܸܟ̰ܚܵܐ ܕܦܸܠܚܵܢܵܐ ܟܹܐ ܦܵܠܸܚ ܗ݇ܘܼܵܐ ܓܵܘ ܓܵܙܲܪܬܵܐ: ܗ̇ܝ ܕܝܼܗܘܼܵܐ ܕܘܼܟܬܵܐ ܕܚܲܝܘܼܬܵܐ ܕܐܲܒ̣ܵܗ̈ܘܼܗܝ.
ܘܟܲܕ ܦܠܸܚܠܹܗ ܐܵܗܵܐ ܦܸܠܚܵܢܵܐ ܪܘܼܚܵܢܵܐ ܩܵܐ ܡܸܬܚܵܐ ܕܥܸܣܪܝܼܢ ܘܚܲܡܫܵܐ ܫܸܢܹ̈ܐ: ܘܚܙܹܐܠܹܗ ܐܲܠܵܗܵܐ ܪܸܙܵܝܹܗ ܕܩܲܕܝܼܫܵܐ ܘܦܸܠܚܵܢܵܐ ܐܲܠܵܗܵܝܵܐ ܗ̇ܘ ܒܸܦܠܵܚܵܐ ܗ݇ܘܼܵܐ: ܗܵܝܓܵܗ ܩܲܡ ܡܲܚܫܸܚܠܹܗ ܠܚܵܠܥܲܬ ܓܘܼܪܬܵܐ ܘܨܦܵܝܝܼ ܕܡ̣ܢ ܐܲܠܵܗܵܐ: ܕܗܵܘܹܐ ܒܸܛܪܵܕܵܐ ܠܲܦܹ̈ܐ ܡ̣ܢ ܓܵܡܝܼ̈ـܹܐ. ܘܚܵܕܸܪ ܗ݇ܘܼܵܐ ܥܲܠ ܝܵܡܵܐ ܐܲܝܟܼ ܕܐܸܢ ܥܲܠ ܒܸܪܙܵܐ: ܒܝܼܲܕ ܓܸܠܝܵܢܵܐ ܕܗ̇ܘ ܟܘܼܟ̣ܒ̣ܵܐ. ܘܒܚܲܕ݇ ܡ̣ܢ ܝܵܘܡܵܢܹ̈ܐ ܚܙܹܐܠܹܗ ܓܵܡܝܼ̈ـܹܐ ܕܓ̰ܵܠܵܠܝܹ̈ܐ ܕܗܕܝܼܪܹ̈ܐ ܗ݇ܘܼܵܘ ܕܦܵܠܫܝܼ ܗ݇ܘܼܵܘ ܥܲܡ ܓܵܡܝܼ̈ـܹܐ ܕܬܵܓ̰ܝܼܪܹ̈ܐ: ܘܪܬܸܚܠܹܗ ܒܚܘܼܒܵܐ ܐܲܠܵܗܵܝܵܐ: ܪܚܸܛܠܹܗ ܕܐܵܙܸܠ ܗ݇ܘܼܵܐ ܘܦܵܪܸܩ ܗ݇ܘܼܵܐ ܠܗ݇ܘܿܢ ܠܐܵܢܝܼ ܓܵܡܝܼ̈ـܹܐ ܕܬܵܓ̰ܝܼܪܹ̈ܐ ܡ̣ܢ ܓ̰ܵܠܵܠܝܼ̈ـܹܐ. ܒܪܸܟܠܹܗ ܥܲܠ ܒܸܪ̈ܟܵܟܘܼܗܝ ܒܝܵܡܵܐ ܩܵܕ݇ܡ ܐܲܠܵܗܵܐ: ܕܐܵܙܸܠ ܒܲܝܢܵܬ ܓܵܡܝܼ̈ـܹܐ ܕܬܵܓ̰ܝܼܪܹ̈ܐ ܠܓܵܡܝܼ̈ـܹܐ ܕܓ̰ܵܠܵܠܝܼ̈ـܹܐ. ܗܲܪ ܒܗ̇ܝ ܣܵܥܲܬ ܥܲܡ ܨܠܘܿܬܹܗ ܕܩܲܕܝܼܫܵܐ: ܡܚܹܐܠܹܗ ܦܵܘܚܵܐ ܡ̣ܢ ܬܲܝܡܢܵܐ: ܠܘܼܒܠܵܝܠܹܗ ܠܓܵܡܝܼ̈ـܹܐ ܕܓ̰ܵܠܵܠܝܼ̈ـܹܐ: ܐܲܝܟܼ ܬܸܫܥܝܼ ܡܝܼܠܹ̈ܐ ܓܵܘ ܝܵܡܵܐ. ܘܒܝܼܲܕ ܨܠܘܿܬܹܗ ܕܩܲܕܝܼܫܵܐ ܡܸܢ݇ܕܪܹܫ݇ ܐܲܠܵܗܵܐ ܡܚܹܐܠܹܗ ܦܵܘܚܵܐ ܡ̣ܢ ܓܲܪܒܝܵܐ: ܡܘܼܥܒ̣ܸܪܵܝܠܹܗ ܠܐܵܢܝܼ ܓܵܡܝܼܹ̈ܐ ܕܬܵܓ̰ܝܼܪܹ̈ܐ ܠܓܵܙܲܪܬܵܐ ܕܒܲܝܬܵܐ ܕܐܲܒ̣ܵܗܹ̈ܐ ܕܩܲܕܝܼܫܵܐ. ܐܝܼܢܵܐ ܬܵܓ̰ܝܼܪܹ̈ܐ ܒܥܕܵܢܵܐ ܕܚܙܹܐܠܗ݇ܘܿܢ ܡܸܢܕܝܼ ܕܗܘܹܐܠܹܗ: ܕܒ̣ܝܼܩܵܝܠܵܗ̇ ܙܕܥܘܿܬܵܐ ܪܵܒܵܐ ܓܘܼܪܬܵܐ. ܘܟܲܕ ܚܙܹܐܠܗ݇ܘܿܢ ܦܘܼܪܩܵܢܵܐ ܥܲܓ̰ܒܵܢܵܐ ܕܚܲܝܲܝ̈ܗܝ: ܓ̰ܡܸܥܠܗ݇ܘܿܢ ܠܟܸܣ ܐܸܚܕܵܕܹܐ ܟܲܕ ܐܵܡܪܝܼ: ܐܵܗܵܐ ܐ݇ܢܵܫܵܐ ܕܐܲܠܵܗܵܐ ܝ݇ܠܹܗ: ܗܵܕܟ̣ܵܐ ܒܚܲܝܠܵܐ ܕܨܠܘܿܬܹܗ ܐܲܠܵܗܵܐ ܩܲܡ ܦܵܪܸܩܠܲܢ ܡ̣ܢ ܐܵܢܝܼ ܓ̰ܵܠܵܠܝܼ̈ـܹܐ. ܘܦܘܼܠܸܛܠܗ݇ܘܿܢ ܘܝܘܼܗ݇ܒ̣ܸܠܗ݇ܘܿܢ ܠܩܲܕܝܼܫܵܐ ܬܠܵܬܝܼܢ ܡܸܬܩܵܠܹ̈ܐ ܕܕܲܗܒ̣ܵܐ: ܟܲܕ ܦܲܪܦܘܼܠܹܐ ܗ݇ܘܼܵܘ ܒܝܼـܹܗ ܕܨܵܠܹܐ ܨܠܘܿܬܵܐ ܒܘܼܬ ܕܝܼܲܝܗܝ. ܕܦܵܝܫܝܼ ܢܛܝܼܪܹ̈ܐ ܐܵܢܝܼ ܘܓܵܡ̈ܝܼܲܝܗܝ ܡ̣ܢ ܠܲܦܹ̈ܐ ܘܡ̣ܢ ܓ̰ܵܠܵܠܝܹ̈ـܐ: ܘܡ̣ܢ ܪܸ̈ܓ̰ܒܹܐ ܘܡ̣ܢ ܟܠܹܗ ܚܘܼܙܕܵܓܵܐ ܕܓܵܘ ܝܵܡܵܐ. ܗܵܝܓܵܗ ܩܲܕܝܼܫܵܐ ܨܘܼܠܹܐܠܹܗ ܥܲܠܲܝܗܝ ܨܠܘܿܬܵܐ ܘܫܘܼܕܪܵܝܠܹܗ ܒܫܠܵܡܵܐ: ܗܲܪ ܒܗ̇ܝ ܥܕܵܢܵܐ ܕܫܩܸܠܹܗ ܠܗ̇ܘ ܕܲܗܒ̣ܵܐ: ܒܢܹܐܠܹܗ ܒܝܼـܹܗ ܥܘܼܡܵܪܵܐ ܕܕܲܝܪܵܝܘܼܬܵܐ: ܕܐܵܣܩܵܐ ܒܝܼـܹܗ ܬܸܫܒܘܿܚܬܵܐ ܠܐܲܠܵܗܵܐ ܣܵܒܵܒ ܫܡܸܥܠܹܗ ܩܲܕܝܼܫܵܐ ܠܡܵܪܲܢ ܒܥܕܵܢܵܐ ܕܒܹܐܡܵܪܵܐ ܗ݇ܘܼܵܐ ܒܡܲܫܚܲܕܬܹܗ ܠܬܲܠܡܝܼܕ̈ܘܼܗܝ: ܡܲܬܒ̣ܘܿܢ ܠܵܘܟ̣ܘܿܢ ܚܲܙܢܵܐ ܒܫܡܲܝܵܐ. ܐܲܝܟܵܐ ܕܠܵܐ ܫ̰ܵܢܓ ܘܠܵܐ ܐܘܼܟ̣ܠܵܐ ܒܸܬ ܡܲܚܪܸܒ̣ܝܼ. ܐܲܝܟܵܐ ܕܝܼܠܵܗ̇ ܚܲܙܢܵܘܟ̣ܘܿܢ ܬܵܡܵܐ ܒܸܬ ܗܵܘܹܐ ܐܘܼܦ ܠܸܒܵܘܟ̣ܘܿܢ.
ܘܒܓ̰ܲܠܕܘܼܬܵܐ ܦܠܸܛܠܹܗ ܚܲܒܪܵܐ ܕܓ̣ܵܠܝܼܒܘܼܝܵܬܹ̈ܐ ܘܦܸܠܚܵܢܵܢܹ̈ܐ ܕܩܲܕܝܼܫܵܐ ܡܵܪܝ ܐܵܘܓܹܝܢ ܒܲܝܢܵܬ ܓܵܙܲܪ̈ܝܵܬܹܐ ܕܝܵܡܵܐ: ܘܥܘܼܓ̰ܸܒܠܗ݇ܘܿܢ ܟܠܲܝܗܝ ܒܝܼـܹܗ ܟܠܲܝܗܝ ܚܲܝܵܢܹ̈ܐ ܕܒܲܝܢܵܬ ܓܵܙܲܪ̈ܝܵܬܹܐ: ܘܝܵܬܒ̣ܵܢܹ̈ܐ ܕܓܵܘ ܓܵܡܝܼ̈ـܹܐ. ܘܟܠܲܝܗܝ ܬܵܓ̰ܝܼܪܹ̈ܐ ܕܐܵܢܝܼ ܓܵܘ ܓܵܡܝܼ̈ـܹܐ ܟܹܐ ܐܵܙܠ݇ܝܼ ܗ݇ܘܼܵܘ ܟܠ ܐܝܼܡܵܢ ܕܲܟ̣ܪ̈ܝܼ ܗ݇ܘܼܵܘ ܫܸܡܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܫܸܠܝܘܼܬܵܐ ܓܘܼܪܬܵܐ ܘܦܘܼܪܩܵܢܵܐ ܟܹܐ ܡܲܫ݇ܟ̰ܚܝܼ ܗ݇ܘܼܵܘ ܒܲܝܢܵܬ ܠܲܦܹ̈ܐ ܕܝܵܡܵܐ. ܘܦܝܼܫܠܵܗ̇ ܦܠܝܼܚܬܵܐ ܒܩܲܕܝܼܫܵܐ ܚܕܵܐ ܥܵܓ̰ܝܼܒܘܼܬܵܐ ܪܵܒܵܐ ܓܘܼܪܬܵܐ ܗ݇ܘܼܵܐ. ܚܕܵܐ ܓܵܡܝܼ ܦܝܼܫܠܵܗ̇ ܓܪܝܼܫܬܵܐ ܒܠܲܦܹ̈ܐ ܕܝܵܡܵܐ: ܘܛܠܸܩܠܵܗ̇ ܡ̣ܢ ܐܘܼܪܚܵܐ ܕܒܲܢܕܲܪ ܕܒܵܥܝܼ ܗ݇ܘܼܵܘ ܡܵܪ̈ܵܘܵܬܘܼܗ̇ ܕܐܵܙܠ݇ܝܼ ܗ݇ܘܼܵܘ ܐܸܠܵܗ̇. ܘܒܓ̰ܲܠܕܘܼܬܵܐ ܓ̰ܠܝܼܒ̣ܵܐ ܠܗ݇ܘܿܢ ܠܲܦܹ̈ܐ: ܘܛܸܒܥܝܵܠܗ݇ܘܿܢ ܬܚܘܿܬ ܚܕܵܐ ܓܵܙܲܪܬܵܐ. ܘܦܝܼܫܹܐ ܗ݇ܘܼܵܘ ܥܵܡܪ̈ܵܢܘܼܗ̇ ܒܲܝܢܵܬ ܕܠܲܦܹ̈ܐ ܕܝܵܡܵܐ ܠܲܝܠܹܐ ܘܝܵܘܡܵܐ: ܘܠܹܐ ܗ݇ܘܼܵܘ ܡܨܵܝܵܐ ܕܡܵܛܝܼ ܗ݇ܘܼܵܘ ܠܒܲܢܕܲܪ: ܕܐܸܠܹܗ ܒܸܚܝܵܪܵܐ ܗ݇ܘܼܵܘ ܕܐܵܙܠ݇ܝܼ ܗ݇ܘܼܵܘ. ܘܟܠ ܝܵܘܡܵܐ ܟܹܐ ܪܲܦܝܼ ܗ݇ܘܼܵܘ ܓܵܢܲܝܗܝ ܥܲܠ ܦܲܐܬ̈ܘܵܬܲܝܗܝ ܒܨܠܘܿܬܵܐ ܘܦܲܪܦܲܠܬܵܐ ܩܵܕ݇ܡ ܐܲܠܵܗܵܐ: ܟܲܕ ܒܸܛܠܵܒܵܐ ܕܦܵܝܫܝܼ ܦܘܼܪ̈ܩܹܐ ܡ̣ܢ ܠܲܦܹ̈ܐ ܕܡܝܼ̈ܵܐ: ܘܓܵܘ ܚܲܕ݇ ܓ̰ܘܼܢܓ̰ܵܪܵܐ ܓܘܼܪܵܐ ܗ݇ܘܼܵܘ. ܘܫܡܸܥܠܹܗ ܐܲܠܵܗܵܐ ܨܠܘܿܬܲܝܗܝ ܘܩܘܼܒܸܠܹܗ ܒܵܥܘܼܬܲܝܗܝ: ܘܦܘܼܪܩܲܝܗܝ ܠܹܗ ܒܝܼܲܕ ܓܸܠܝܵܢܵܐ ܕܪܘܼܚܵܐ. ܘܦܝܼܫܠܹܗ ܚܸܙܝܵܐ ܠܩܲܕܝܼܫܵܐ ܡܵܪܝ ܐܵܘܓܹܝܢ ܒܝܼܲܕ ܓܸܠܝܵܢܵܐ ܕܪܘܼܚܵܐ: ܕܐܵܙܸܠ ܘܦܵܪܸܩܠܗ݇ܘܿܢ ܠܥܵܡܪ̈ܵܢܹܐ ܕܓܵܡܝܼ ܡ̣ܢ ܠܲܦܹ̈ܐ ܕܝܵܡܵܐ: ܘܒܝܼܲܕ ܗܲܝܲܪܬܵܐ ܕܨܠܘܿܬܹܗ ܕܡܲܕܥܸܪܘܿܢ ܠܒܲܝܬܵܐ ܕܘܲܥܕܵܐ ܕܚܲܝܹ̈ܐ. ܟܲܕ ܐ݇ܙܸܠܹܗ ܐܵܗܵܐ ܩܲܕܝܼܫܵܐ: ܘܩܘܼܪܒܸܢܹܗ ܠܟܸܣ ܗ̇ܝ ܓܵܡܝܼ: ܘܚܙܹܐܠܗ݇ܘܿܢ ܐܸܠܹܗ ܥܵܡܪ̈ܵܢܹܐ ܕܓܵܡܝܼ ܟܲܕ ܒܲܚܕܵܪܵܐ ܗ݇ܘܼܵܐ ܥܲܠ ܡܝܼ̈ܵܐ: ܡܘܼܩܘܸܚܠܗ݇ܘܿܢ ܟܠܲܝܗܝ ܒܚܲܕ݇ ܩܵܠܵܐ ܟܲܕ ܒܹܐܡܵܪܵܐ ܐܸܠܹܗ: ܪܲܚܸܡ ܥܲܠܲܢ ܝܵܐ ܪܹܓܹܗ ܕܐܲܠܵܗܵܐ: ܡܣܵܒܵܒ ܒܸܕܥܵܝܵܐ ܝ݇ܘܲܚ ܘܒܵܠܲܕ ܝ݇ܘܲܚ ܕܡ̣ܢ ܐܲܠܵܗܵܐ ܦܝܼܫܠܘܼܟܼ ܫܘܼܕܪܵܐ ܠܟܸܣܠܲܢ: ܕܦܵܨܹܝܬܿ ܠܲܢ ܡ̣ܢ ܐܲܢܹ̈ܐ ܠܲܦܹ̈ܐ ܩܸܫܝܹ̈ܐ ܕܥܒ̣ܸܕܠܗ݇ܘܿܢ ܢܫܲܪܬܵܐ ܥܲܠܲܢ. ܗܵܝܓܵܗ ܐܵܗܵܐ ܩܲܕܝܼܫܵܐ ܒܪܸܟܠܹܗ ܩܵܕ݇ܡ ܐܲܠܵܗܵܐ: ܟܲܕ ܡܨܵܠܘܼܝܹܐ ܗ݇ܘܼܵܐ ܨܠܘܿܬܵܐ ܘܗܵܕܟ̣ܵܐ ܒܹܐܡܵܪܵܐ ܗ݇ܘܼܵܐ: ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ: ܟܹܐ ܝܵܬܸܒ̣ ܥܲܠ ܟܪ̈ܘܿܒ̣ܹܐ. ܘܡܵܪܹܗ ܕܝܵܡܵܐ ܘܡܲܫܠܝܼܵܢܵܐ ܕܠܲܦܹ̈ܐ: ܦܵܪܸܩ ܡܵܪܝܼ ܠܪܹ̈ܓܵܘܵܬܘܼܟܼ ܡ̣ܢ ܐܵܗܵܐ ܓ̰ܘܼܪܵܒܵܐ: ܘܡܲܡܛܝܼ ܠܗ݇ܘܿܢ ܠܒܲܢܕܲܪ ܕܫܲܝܢܵܐ. ܡܣܵܒܵܒ ܐܲܚܟ̰ܝܼ ܐܲܢ݇ܬܿ ܛܵܒ̣ܵܐ ܝ݇ܘܸܬܿ ܠܐܵܒܲܕ ܐܲܒܵܕܝܼܢ: ܐܵܡܹܝܢ. ܘܥܲܡ ܨܠܘܿܬܹܗ ܕܩܲܕܝܼܫܵܐ: ܦܠܸܛܠܹܗ ܦܵܘܚܵܐ ܕܬܲܝܡܢܵܐ ܡܚܹܐܠܹܗ ܒܝܵܡܵܐ: ܘܠܵܐ ܐ݇ܙܸܠܵܗ̇ ܗ̇ܝ ܓܵܡܝܼ: ܡܣܵܒܵܒ ܕܛܒܥܝܼܬܵܐ ܗ݇ܘܼܵܐ ܬܚܘܿܬ ܩܵܥܝܹ̈ܐ ܕܥܘܼܡܩܹ̈ܐ ܕܗ̇ܝ ܓܵܙܲܪܬܵܐ. ܗܵܝܓܵܗ ܡܸܢ݇ܕܪܹܫ݇ ܡܘܼܩܪܸܒ̣ܠܹܗ ܨܠܘܿܬܵܐ ܠܐܲܠܵܗܵܐ: ܦܝܼܫܠܹܗ ܛܸܒܥܝܵܐ ܪܹܫܵܐ ܕܗ̇ܝ ܓܵܙܲܪܬܵܐ ܓܵܘ ܝܵܡܵܐ: ܘܒܗ̇ܝ ܣܵܥܲܬ ܐ݇ܙܸܠܵܗ̇ ܓܵܡܝܼ ܫܠܹܐܠܹܗ ܗ̇ܘ ܠܲܦܵܐ ܘܐ݇ܙܸܠܵܗ̇ ܓܵܡܝܼ ܠܒܲܢܕܲܪ ܕܫܲܝܢܵܐ. ܐܲܢܹ̈ܐ ܥܵܓ̰ܝܼܒܘܼܝܵܬܹ̈ܐ ܕܒܸܥܒ̣ܵܕܵܐ ܗ݇ܘܼܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܓܵܘ ܝܵܡܵܐ ܘܓܵܘ ܒܸܪܙܵܐ: ܒܓܵܡܝܼܹ̈ܐ ܘܒܓܵܙܲܪ̈ܝܵܬܹܐ: ܘܗܲܝܲܪܬܵܐ ܐܲܠܵܗܵܝܵܐ ܒܹܐܙܵܠܵܐ ܗ݇ܘܼܵܐ ܥܲܡ ܩܲܕܝܼܫܵܐ. ܕܵܐܟ̣ܝܼ ܕܟܠ ܕܚܙܹܐܠܹܗ ܘܫܡܸܥܠܹܗ ܒܘܼܬ ܥܵܓ̰ܝܼܒܘܼܝܵܬܹ̈ܐ ܕܦܠܸܚܠܹܗ ܓܵܘ ܝܵܡܵܐ ܘܓܵܘ ܒܸܪܙܵܐ: ܥܘܼܓ̰ܵܒܵܐ ܕܒ̣ܸܩܬܲܝܗܝ ܗ݇ܘܼܵܘ ܒܘܼܬ ܕܝܼـܹܗ.
ܘܟܲܕ ܚܙܹܐܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܟܠܹܗ ܐܵܗܵܐ ܚܲܝܠܵܐ ܐܲܠܵܗܵܝܵܐ ܐܲܢܹ̈ܐ ܟܠܲܝܗܝ ܥܵܓ̰ܝܼܒܘܼܝܵܬܹ̈ܐ ܕܥܒ̣ܸܕܠܹܗ ܠܟܸܣܠܹܗ: ܒܣܸܡܠܵܠܹܗ ܕܐܵܙܸܠ ܠܗ̇ܘ ܥܘܼܡܪܵܐ ܕܒܸܢܝܵܐ ܗ݇ܘܼܵܐ ܩܵܬܹܗ: ܕܥܵܒ̣ܸܕ ܒܝܼـܹܗ ܚܲܕ݇ ܪܹܫܵܐ ܘܡܕܲܒܪܵܢܵܐ: ܘܐܵܙܸܠ ܗ݇ܘܼܵܐ ܠܚܲܕ݇ ܐܲܬܪܵܐ ܐ݇ܚܹܪ݇ܢܵܐ: ܐܲܝܟܵܐ ܕܠܵܐ ܝܵܕܸܥܠܹܗ: ܘܦܠܸܛܠܹܗ ܘܐ݇ܬܹܐܠܹܗ ܐܵܗܵܐ ܩܲܕܝܼܫܵܐ ܠܥܘܼܡܵܪܵܐ ܩܲܕܝܼܫܵܐ ܕܒܹܝܬ ܦܵܟ̣ܘܿܡ: ܕܗܵܘܹܐ ܬܵܡܵܐ. ܗܵܝܓܵܗ ܒܚܲܕ݇ ܡ̣ܢ ܝܵܘܡܵܢܹ̈ܐ: ܥܒ̣ܸܪܹܗ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܥܲܡ ܐܲܚܘܿܢܘܵܬܹ̈ܐ: ܕܡܲܠܗܝܼ ܗ݇ܘܼܵܐ ܠܹܗ ܦܸܪܢܵܐ ܐܲܝܟܼ ܥܵܕܲܬ ܕܫܲܒܵܬܵܝܹ̈ܐ. ܟܲܕ ܡܘܼܠܗܝܼܠܹܗ ܦܸܪܢܵܐ: ܘܗܘܹܐܠܹܗ ܐܲܝܟܼ ܐܲܬܘܿܢܵܐ ܕܢܘܼܪܵܐ. ܘܕܲܝܪ̈ܵܝܹܐ ܠܹܐ ܗ݇ܘܼܵܘ ܒܵܠܲܕ ܒܩܲܕܝܼܫܵܐ ܡܵܪܝ ܐܵܘܓܹܝܢ ܘܒܦܸܠܚܵܢܵܢ̈ܘܼܗܝ: ܡܣܵܒܵܒ ܒܚܲܕ݇ ܐܹܣܟܹܝܡܵܐ ܦܫܝܼܛܵܐ ܕܐܲܚܘܿܢܘܵܬܹ̈ܐ ܥܒ̣ܸܪܹܗ ܕܗܵܘܹܐ ܓܵܘ ܕܲܝܪܵܐ. ܘܐܵܡܸܪ ܐܸܠܹܗ ܚܲܕ݇ ܡ̣ܢ ܐܲܚܘܿܢܘܵܬܹ̈ܐ ܫܲܒܵܬܵܝܹ̈ܐ ܕܬܵܡܵܐ ܠܩܲܕܝܼܫܵܐ: ܝܵܐ ܐܲܚܘܿܢܵܐ. ܦܘܼܫ ܠܲܐܟ̣ܵܐ ܠܟܸܣ ܦܸܪܢܵܐ ܥܲܡ ܐܵܗܵܐ ܐܲܚܘܿܢܵܐ ܫܲܒܵܬܵܝܵܐ: ܘܗܲܝܸܪܹܗ ܗܲܠ ܕܐܵܙܲܠ݇ܚ ܡܨܵܠܲܚ ܨܠܘܿܬܵܐ ܗܲܠ ܦܲܠܓܹܗ ܕܝܵܘܡܵܐ: ܘܨܵܠܲܚ ܡܲܙܡܘܿܪܹ̈ܐ: ܡ̣ܢ ܒܵܬ݇ܪ ܗܵܕܵܐ ܒܸܬ ܐܵܬܲܚ ܟܠܲܢ ܡܐܘܼܕܵܠܹܐ ܘܡܲܠܗܝܼܵܚܠܹܗ ܦܸܪܢܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܫܩܸܠܹܗ ܪܸܦ̮ܫܬܵܐ [ܡܲܠܚܵܒ̣ܵܐ] ܕܦܪܸܙܠܵܐ: ܘܦܘܼܠܛܵܝܠܹܗ ܟܠܲܝܗܝ ܓܘܼܡܪܹ̈ܐ ܕܢܘܼܪܵܐ ܕܓܵܘ ܦܸܪܢܵܐ. ܐ݇ܡܸܪܹܗ ܗ̇ܘ ܐܲܚܘܿܢܵܐ ܫܲܒܵܬܵܝܵܐ ܠܩܲܕܝܼܫܵܐ: ܐܲܚܘܿܢܝܼ: ܐܝܼܬ ܚܲܕ݇ ܐ݇ܢܵܫܵܐ ܡ̣ܢ ܐܲܒ̣ܵܗܵܬܹ̈ܐ ܕܐܸܕܝܘܿܡ݇ ܝܵܘܡܵܐ: ܡܲܨܝܵܢܵܐ ܝ݇ܠܹܗ ܕܟܵܠܹܐ ܓܵܘ ܕܐܵܗܵܐ ܠܲܗܵܐ ܕܢܘܼܪܵܐ؟ ܐ݇ܡܸܪܹܗ ܐܸܠܹܗ ܡܵܪܝ ܐܵܘܓܹܝܢ ܠܗ̇ܘ ܫܲܒܵܬܵܝܵܐ: ܐܝܼܬ ܪܵܒܵܐ. ܣܵܒܵܒ ܐܲܠܵܗܵܐ ܗ̇ܘ ܝ݇ܠܹܗ ܕܩܲܕ݇ܡܵܝܹ̈ܐ ܘܐ݇ܚܵܪ̈ܵܝܹܐ: ܘܟܠ ܐ݇ܢܵܫܵܐ ܕܡܗܲܝܡܸܢ ܒܝܼـܹܗ ܘܥܵܒ̣ܸܕ ܪܸܙܵܝܹܗ: ܟܠ ܐܝܼܡܵܢ ܕܩܵܪܹܐܠܹܗ ܟܹܐ ܓ̰ܵܘܘܸܒܠܹܗ. ܘܐܸܢ ܐܲܢ݇ܬܿ ܡܛܵܫܸܬܿ ܠܹܗ ܐܵܗܵܐ ܣܸܪ ܘܠܹܐ ܓܵܠܹܝܬܿ ܠܹܗ ܠܗܸܟ̰ ܐܵܢܵܫܵܐ: ܐܵܕܝܼܵܐ ܒܸܬ ܚܵܙܹܝܬܿܠܹܗ ܠܚܲܝܠܹܗ ܟܸܣܝܵܐ ܕܐܲܠܵܗܵܐ ܕܒܹܐܟ̣ܵܠܵܐ ܝ݇ܠܹܗ ܚܲܡ ܠܙܲܕܥܵܢܹ̈ܐ ܡܸܢܘܼܗܝ. ܘܟܲܕ ܥܒ̣ܸܕܠܹܗ ܩܵܘܠܵܐ ܠܓܵܢܹܗ ܕܒܸܬ ܡܟܵܣܝܼ ܠܹܗ ܠܣܸܪ ܘܠܐ݇ܢܵܫܵܐ ܠܹܐ ܓܵܠܹܐ ܠܹܗ: ܗܲܪ ܒܗ̇ܝ ܥܕܵܢܵܐ ܫܘܸܪܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܘܥܒ̣ܸܪܹܗ ܠܗ̇ܘ ܦܸܪܢܵܐ ܕܢܘܼܪܵܐ. ܘܒܪܸܟܠܹܗ ܩܵܕ݇ܡ ܐܲܠܵܗܵܐ ܒܨܠܘܿܬܵܐ ܟܲܕ ܗܵܕܟ̣ܵܐ ܒܹܐܡܵܪܵܐ ܗ݇ܘܼܵܐ: ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ: ܗ̇ܘ ܕܫܘܼܕܸܪܹܗ ܡ̣ܢ ܠܟܸܣܠܹܗ ܡܲܠܲܐܟ̣ܵܐ ܕܛܠܘܼܠܵܐ: ܡܘܼܩܸܫܠܹܗ ܠܐܲܬܘܿܢܵܐ ܕܒܹܝܬ ܚܲܢܲܢܝܵܐ ܘܥܒ̣ܸܕܠܹܗ ܩܲܪܝܼܪܵܐ: ܫܲܕܸܪ ܐܘܼܦ ܐܵܕܝܼܵܐ ܚܲܝܠܘܼܟܼ ܛܸܫܝܵܐ: ܥܒ̣ܘܿܕ ܠܹܗ ܩܲܪܝܼܪܵܐ ܐܵܗܵܐ ܦܸܪܢܵܐ. ܕܗܵܘܹܐ ܥܵܓ̰ܝܼܒܘܼܬܵܐ ܠܪܹ̈ܓܵܘܵܬܘܼܟܼ: ܘܫܘܼܒ̣ܗܵܪܵܐ ܥܲܓ̰ܒܵܢܵܐ ܠܡܗܘܼܡܢܹ̈ܐ. ܘܕܚܵܙܹܐ ܟܠ ܐ݇ܢܵܫܵܐ: ܘܫܵܒܸܚ ܠܫܸܡܘܼܟܼ ܓܘܼܪܵܐ ܘܩܲܕܝܼܫܵܐ.
ܘܟܲܕ ܚܙܹܐܠܹܗ ܗ̇ܘ ܐܲܚܘܿܢܵܐ ܫܲܒܵܬܵܝܵܐ ܡܸܢܕܝܼ ܕܗ݇ܘܹܐܠܹܗ: ܕܥܒ̣ܸܕܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܗܲܪ ܒܗ̇ܝ ܥܕܵܢܵܐ ܫܘܼܢܹܐܠܵܗ̇ ܓܵܢܹܗ ܡܸܢܹܗ: ܗܘܹܐܠܹܗ ܐܲܝܟܼ ܡܝܼܬܵܐ. ܐܵܗܵܐ ܩܲܕܝܼܫܵܐ ܦܠܸܛܠܹܗ ܡ̣ܢ ܦܸܪܢܵܐ: ܘܐ݇ܙܸܠܹܗ ܡ̣ܢ ܬܵܡܵܐ. [ܡ̣ܢ ܥܘܼܡܪܵܐ] ܐܝܼܢܵܐ ܕܲܝܪ̈ܵܝܹܐ ܥܕܵܢܵܐ ܕܨܘܼܠܹܐܠܗ݇ܘܿܢ ܠܨܠܘܿܬܵܐ: ܥܒ̣ܸܕܠܗ݇ܘܿܢ ܘܲܥܕܵܐ ܘܐ݇ܬܹܐܠܗ݇ܘܿܢ ܐܲܝܟܼ ܥܵܕܵܬܲܝܗܝ ܕܡܲܠܗܝܼ ܠܹܗ ܗ̇ܘ ܦܸܪܢܵܐ: ܘܟܲܕ ܚܙܹܐܠܗ݇ܘܿܢ ܠܗ̇ܘ ܐܲܚܘܿܢܵܐ ܫܲܒܵܬܵܝܵܐ ܢܦܝܼܠܵܐ ܗ݇ܘܼܵܐ ܥܲܠ ܐܲܪܥܵܐ: ܟܲܕ ܠܲܝܬ ܗ݇ܘܼܵܐ ܓܵܢܵܐ ܒܝܼـܹܗ: ܩܘܼܪܒܸܢܘܿܢ ܡܘܼܪܥܸܫܠܗ݇ܘܿܢ ܘܐܵܡܪܝܼ ܐܸܠܹܗ: ܐܲܚܘܿܢܵܐ: ܡܘܼܕܝܼ ܝ݇ܠܵܗ̇ ܩܸܣܲܬܘܼܟܼ؟ ܘܩܵܡܘܿܕܝܼ ܢܦܝܼܠܵܐ ܝ݇ܘܸܬܿ ܗ݇ܘܼܵܐ ܥܲܠ ܐܲܪܥܵܐ؟ ܘܦܸܪܢܵܐ ܨܦܵܝܝܼ ܒܸܠܗܵܝܵܐ ܗ݇ܘܼܵܐ: ܩܵܡܘܿܕܝܼ ܐܵܕܝܼܵܐ ܩܲܪܝܼܪܵܐ ܝ݇ܠܹܗ؟ ܘܡܘܼܕܝܼ ܝ݇ܠܵܗ̇ ܐܵܗܵܐ: ܡܲܕܸܥܠܲܢ. ܗܵܝܓܵܗ ܩܸܡܠܹܗ ܐܲܚܘܿܢܵܐ ܫܲܒܵܬܵܝܵܐ ܘܐ݇ܡܸܪܹܗ ܐܸܠܲܝܗܝ: ܗ̇ܘ ܐ݇ܢܵܫܵܐ ܕܫܒ̣ܝܼܩܠܵܘܟ̣ܘܿܢ ܠܟܸܣܠܝܼ: ܗ̇ܘ ܥܒ̣ܸܕܠܹܗ ܐܵܗܵܐ ܥܵܓ̰ܝܼܒܘܼܬܵܐ: ܐܵܡܪܝܼ ܐܲܚܘܿܢܘܵܬܹ̈ܐ ܠܗ̇ܘ ܫܲܒܵܬܵܝܵܐ: ܠܹܐ ܝܵܕܥܸܬܿ ܠܐܲܝܟܵܐ ܐ݇ܙܸܠܹܗ؟ ܐ݇ܡܸܪܹܗ ܐܸܠܲܝܗܝ ܫܲܒܵܬܵܝܵܐ: ܐܵܢܵܐ ܒܗ̇ܝ ܥܕܵܢܵܐ ܕܚܙܹܐܠܝܼ ܠܐܵܗܵܐ ܥܵܓ̰ܝܼܒܘܼܬܵܐ: ܢܦܸܠܝܼ ܥܲܠ ܦܲܐܬܝܼ ܥܲܠ ܐܲܪܥܵܐ: ܘܗ̇ܘ ܦܠܸܛܠܹܗ: ܘܠܵܐ ܝ݇ܕܸܥܠܝܼ ܠܐܲܝܟܵܐ ܐ݇ܙܸܠܹܗ. ܘܒܓ̰ܲܠܕܘܼܬܵܐ ܦܠܸܛܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ: ܘܪܹܫܵܐ ܕܥܘܼܡܪܵܐ. ܠܒܹܝܬ ܟܲܪ̈ܡܹܐ ܘܠܒܹܝܬ ܣܝܵܓ̣݇ܝܹ̈ܐ ܘܠܐܘܼܪ̈ܚܵܬܹܐ ܒܵܬ݇ܪ ܩܲܕܝܼܫܵܐ: ܘܡܘܼܫ݇ܟ̰ܸܚܠܗ݇ܘܿܢ ܟܲܕ ܢܦܝܼܠܵܐ ܥܲܠ ܐܲܪܥܵܐ: ܘܫܵܒܘܼܚܹܐ ܠܐܲܠܵܗܵܐ: ܩܘܼܪܒܸܢܹܗ ܪܹܫܵܐ ܕܥܘܼܡܪܵܐ ܘܟܠܲܝܗܝ ܐܲܚܘܿܢܘܵܬܹ̈ܐ. ܘܣܓ̣ܸܕܠܗ݇ܘܿܢ ܐܸܠܹܗ ܘܡܘܼܬ݇ܝܼܠܗ݇ܘܿܢ ܠܥܘܼܡܪܵܐ: ܟܲܕ ܦܲܪܦܘܼܠܹܐ ܒܝܼܹܗ ܕܨܵܠܹܗ ܨܠܘܿܬܵܐ ܒܘܼܬ ܕܝܼܲܝܗܝ: ܐܘܼܦ ܙܹܐ ܕܟܵܠܹܗ ܠܟܸܣܠܲܝܗܝ. ܘܦܘܼܩܸܕܠܹܗ ܪܹܫܵܐ ܕܥܘܼܡܪܵܐ ܘܡܚܹܐܠܹܗ ܢܵܩܘܿܫܵܐ: ܘܓ̰ܡܸܥܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ: ܘܐ݇ܬܹܐܠܗ݇ܘܿܢ ܘܦܝܼܫܠܗ݇ܘܿܢ ܒܘܼܪ̈ܟ̣ـܹܐ ܡܸܢܹܗ. ܐܝܼܢܵܐ ܐܵܗܵܐ ܩܲܕܝܼܫܵܐ: ܕܠܵܐ ܡܲܟܪܸܒ ܗ݇ܘܼܵܐ ܠܗ݇ܘܿܢ: ܦܘܼܪܦܸܠܹܗ ܒܝܼܲܝܗܝ ܟܲܕ ܒܹܐܡܵܪܵܐ: ܨܵܠܝܼܡܘܿܢ ܨܠܘܿܬܵܐ ܒܘܼܬ ܕܝܼܝܼ ܐܵܚܘܿܢܘܵܬ̈ܝܼ. ܘܗ̇ܝ ܕܟܹܐ ܝܵܕܸܥ ܐܲܠܵܗܵܐ ܕܒܸܬ ܗܲܝܸܪܵܗ̇ ܐܸܠܝܼ ܘܐܸܠܵܘܟ̣ܘܿܢ: ܗ̇ܝ ܒܸܬ ܥܵܒ̣ܸܕܠܵܗ̇ ܠܟܸܣܠܲܢ: ܒܝܼܲܕ ܗܲܝܲܪܬܵܐ ܕܨܠܵܘ̈ܵܬܵܘܟ̣ܘܿܢ.
ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܒܥܕܵܢܵܐ ܕܝ݇ܕܸܥܠܹܗ ܗܵܕܟ̣ܵܐ ܐܝܼܩܵܪܵܐ ܗ݇ܘܹܐܠܹܗ ܐܸܠܹܗ ܡ̣ܢ ܐܲܠܵܗܵܐ ܘܒܢܲܝ̈ܢܵܫܵܐ: ܒܝܼܲܕ ܦܸܠܚܵܢܵܢ̈ܘܼܗܝ ܘܟܸܟ̰ܚ̈ܘܼܗܝ: ܒܗ̇ܘ ܠܲܝܠܹܐ ܐ݇ܙܸܠܹܗ ܡ̣ܢ ܥܘܼܡܪܵܐ ܩܲܕܝܼܫܵܐ ܕܒܹܝܬ ܦܵܟ̣ܘܿܡ: ܟܲܕ ܠܵܐ ܪܸܓ̣݇ܫܠܹܗ ܒܝܼـܹܗ ܚܲܕ݇ ܡ̣ܢ ܐܲܚܘܿܢܘܵܬܹ̈ܐ. ܘܦܠܸܛܠܹܗ ܘܐ݇ܬܹܐܠܹܗ ܠܐܵܓܹܦ̮ܛܘܿܣ: ܘܦܝܼܫܠܹܗ ܚܸܙܝܵܐ ܠܐܵܢܝܼ ܐܲܒ̣ܵܗܵܬܹ̈ܐ ܕܒܸܚܵܝܵܐ ܗ݇ܘܼܵܘ ܓܵܘ ܐܵܓܹܦ̮ܛܘܿܣ ܡ̣ܢ ܓܸܠܝܵܢܵܐ ܐܲܠܵܗܵܝܵܐ ܒܘܼܬ ܐ݇ܬܹܐܬܹܗ ܠܟܸܣܠܲܝܗܝ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܟܲܕ ܠܒ̣ܝܼܫܵܐ ܗ݇ܘܼܵܐ ܚܸܩܪܵܐ ܘܚܲܝܠܵܐ ܐܲܠܵܗܵܝܵܐ: ܘܐܵܬܹܐ ܗ݇ܘܼܵܐ ܩܵܕ݇ܡܘܼܗܝ ܟܘܼܟ̣ܒ̣ܵܐ ܗ̇ܘ ܟܹܐ ܡܲܦܫܸܛ ܗ݇ܘܼܵܐ ܠܹܗ: ܦܠܸܛܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ ܕܩܲܒܠܝܼ ܗ݇ܘܼܵܘ ܠܹܗ ܒܬܸܫܒܘܿܚܝܵܬܹ̈ܐ ܘܒܡܲܙܡܘܿܪܹ̈ܐ ܟܲܕ ܡܫܵܒܘܼܚܹܐ ܗ݇ܘܼܵܘ ܘܡܵܣܘܼܩܹܐ ܗܲܠܸܠܘܼܝܵܐ ܠܐܲܠܵܗܵܐ. ܘܒܓ̰ܲܠܕܘܼܬܵܐ ܟܠܲܝܗܝ ܩܘܼܪܒܸܢܘܿܢ ܘܦܝܼܫܠܗ݇ܘܿܢ ܒܘܼܪ̈ܟ̣ـܹܐ ܡܸܢܹܗ: ܘܦܲܪܦܘܼܠܹܐ ܗ݇ܘܼܵܘ ܒܝܼـܹܗ: ܕܟܵܠܹܐ ܠܟܸܣܠܲܝܗܝ. ܘܗܘܼܡܙܸܡܠܹܗ ܥܲܡܲܝܗܝ ܛܘܼܒ̣ܵܢܵܐ ܗܹܡܸܙܡܵܢ ܕܦܲܪܡܵܝܬܵܐ: ܘܡܘܼܚܙܝܼܵܝܠܹܗ ܢܝܼܫܵܐ ܕܘܼܙ ܕܗܲܝܡܵܢܘܼܬܵܐ ܫܲܪܝܼܪܬܵܐ. ܘܦܠܸܛܠܹܗ ܕܐܵܙܸܠ ܗ݇ܘܼܵܐ ܡ̣ܢ ܬܵܡܵܐ: ܘܐ݇ܙܸܠܗ݇ܘܿܢ ܥܲܡ ܕܩܲܕܝܼܫܵܐ ܡ̣ܢ ܐܲܒ̣ܵܗܵܬܹ̈ܐ ܕܬܵܡܵܐ ܗ݇ܘܼܵܘ ܫܲܒ̣ܥܝܼܢ ܓܲܒ̣ܪܹ̈ܐ: ܕܐܵܬܝܼ ܗ݇ܘܼܵܘ ܥܲܡ ܕܩܲܕܝܼܫܵܐ ܗܲܠ ܠܐܲܬܪܵܐ ܕܒܹܝܬ ܢܲܗܪ̈ܝܼܢ: ܠܗܘܼܟܡܵܐ ܕܡܕܝܼܢ݇ܬܵܐ ܕܢܨܝܼܒ̣ܝܼܢ. ܘܗܘܹܐܠܵܗ̇ ܐܵܗܵܐ ܕܲܣܬܵܐ ܓܘܼܪܬܵܐ ܐܘܼܦ ܐܲܠܵܗܵܝܬܵܐ ܕܠܵܐ ܒܵܨܘܿܪܘܼܬܵܐ. ܘܐ݇ܬܹܐܠܗ݇ܘܿܢ ܗܲܠ ܠܢܲܗܪܵܐ ܕܦܝܵܫܵܐ ܝ݇ܠܹܗ ܩܸܪܝܵܐ ܢܲܗܪܵܐ ܕܡܵܫܵܟ: ܘܨܠܹܐܠܗ݇ܘܿܢ ܘܥܒ̣ܸܪܘܿܢ ܒܝܼـܹܗ ܡ̣ܢ ܬܲܝܡܢܵܐ ܕܡܕܝܼܢ݇ܬܵܐ: ܘܡܘܼܫ݇ܟ̰ܸܚܠܗ݇ܘܿܢ ܚܲܕ݇ ܙܵܠܵܐ ܥܲܠ ܡܲܪܙܹܗ ܕܢܲܗܪܵܐ ܘܚܝܼܠܗ݇ܘܿܢ ܒܝܼـܹܗ: ܘܛܘܼܫܝܼܠܗ݇ܘܿܢ ܓܵܢܲܝ̈ܗܝ ܒܗ̇ܘ ܙܲܒ̣ܢܵܐ ܒܗ̇ܘ ܙܵܠܵܐ ܥܲܠ ܢܲܗܪܵܐ. ܘܦܝܼܫܠܗ݇ܘܿܢ ܬܵܡܵܐ ܫܲܒ̣ܥܵܐ ܝܵܘܡܵܢܹ̈ܐ: ܟܲܕ ܒܸܚܕܵܝܵܐ ܘܫܵܒܘܼܚܹܐ ܠܐܲܠܵܗܵܐ: ܘܗܸܟ̰ ܐ݇ܢܵܫܵܐ ܠܵܐ ܪܸܓ̣݇ܫܠܹܗ ܒܝܼܲܝܗܝ.
ܘܒܸܣܦܵܪܵܐ ܗ݇ܘܼܵܘ ܕܚܵܙܝܼ ܚܸܩܪܹܗ ܕܐܲܠܵܗܵܐ: ܘܗܵܐ ܚܲܕ݇ ܐ݇ܢܵܫܵܐ ܐܝܼܬ ܗ݇ܘܼܵܐ ܒܝܼـܹܗ ܪܘܼܚܵܐ ܟ̰ܲܦܲܠ: ܘܟܹܐ ܚܲܝܝܼ ܗ݇ܘܼܵܐ ܒܗ̇ܘ ܢܲܗܪܵܐ: ܟܠ ܝܵܘܡܵܐ ܟܹܐ ܐܵܣܸܩ ܗ݇ܘܼܵܐ ܘܨܵܠܹܐ ܗ݇ܘܼܵܐ ܓܵܘ ܡܝܼ̈ܵܐ. ܘܟܲܕ ܚܙܹܐܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܐ݇ܡܸܪܹܗ ܐܸܠܹܗ: ܝܵܐ ܪܘܼܚܵܐ ܟ̰ܲܦܲܠ: ܬܵܐ ܠܲܐܟ̣ܵܐ ܘܗܘܼܡܙܸܡܠܹܗ. ܐ݇ܡܸܪܹܗ ܐܸܠܹܗ ܗ̇ܘ ܪܘܼܚܵܐ ܟ̰ܲܦܲܠ: ܡܘܼܕܝܼ ܒܵܥܹܝܬܿ ܡܸܢܝܼ: ܡܵܪܝ ܐܵܘܓܹܝܢ ܙܲܕܥܵܢܵܐ ܕܡ̣ܢ ܐܲܠܵܗܵܐ ܚܲܝܵܐ؟ ܐܵܡܸܪ ܐܸܠܹܗ ܩܲܕܝܼܫܵܐ: ܟܡܵܐ ܫܸܢܹ̈ܐ ܐܝܼܬܠܘܼܟܼ ܕܒܸܥܡܵܪܵܐ ܝ݇ܘܸܬܿ ܒܐܵܗܵܐ ܒܲܪܢܵܫܵܐ؟ ܐ݇ܡܸܪܹܗ ܐܸܠܹܗ ܐܵܗܵܐ ܫܹܐܕܵܐ: ܗܵܐ ܬܠܵܬܝܼܢ ܫܸܢܹ̈ܐ ܐܝܼܬ ܠܝܼ ܕܒܸܥܡܵܪܵܐ ܝ݇ܘܸܢ ܒܐܵܗܵܐ ܒܲܪܢܵܫܵܐ. ܗܵܝܓܵܗ ܐܵܗܵܐ ܫܹܐܕܵܐ ܟܲܕ ܐ݇ܡܸܪܹܗ ܐܲܢܹ̈ܐ ܗܹܡܸܙܡܵܢܹ̈ܐ: ܫܘܼܪܹܐܠܹܗ ܒܸܪܓܵܕܵܐ. ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܗ̇ܘ ܕܛܪܸܕܠܹܗ ܠܠܸܓ̣ܝܘܿܢ ܡ̣ܢ ܗ̇ܘ ܕܝܼܗܘܼܵܐ ܓܵܘ ܒܹܝܬ ܩܒ̣ܘܼܪܹ̈ܐ ܒܸܚܵܝܵܐ ܩܵܐ ܪܵܒܵܐ ܫܸܢܹ̈ܐ: ܦܠܘܿܛ ܡܸܢܹܗ: ܘܡܸܢ݇ܕܪܹܫ݇ ܠܹܐ ܗܵܘܹܐܠܘܼܟܼ ܗܘܼܟܡܵܐ ܕܗܲܟܡܸܬܿ ܒܝܼـܹܗ. ܐܝܼܢܵܐ ܐܵܗܵܐ ܫܹܐܕܵܐ ܟܲܕ ܫܡܸܥܠܹܗ ܡ̣ܢ ܕܩܲܕܝܼܫܵܐ ܫܸܡܹܗ ܕܡܫܝܼܚܵܐ: ܗܲܪ ܒܗ̇ܝ ܥܕܵܢܵܐ ܐ݇ܙܸܠܹܗ ܘܦܠܸܛܠܹܗ ܡܸܢܹܗ ܟܲܕ ܡܲܩܘܘܼܚܹܐ ܘܒܸܩܒ̣ܵܠܵܐ ܘܒܹܐܡܵܪܵܐ: ܕܘܵܝ ܡܸܢܘܼܟܼ ܡܵܪܝ ܐܵܘܓܹܝܢ ܙܲܕܥܵܢܵܐ ܡ̣ܢ ܐܲܠܵܗܵܐ! ܘܒܓ̰ܲܠܕܘܼܬܵܐ ܗ̇ܘ ܐ݇ܢܵܫܵܐ ܕܐܝܼܬ ܗ݇ܘܼܵܐ ܠܹܗ ܫܹܐܕܹ̈ܐ: ܪܚܸܛܠܹܗ ܘܥܒ̣ܸܪܹܗ ܠܡܕܝܼܢ݇ܬܵܐ: ܟܲܕ ܡܲܫܚܘܼܕܹܐ ܓܵܘ ܒܵܬܹ̈ܐ ܘܓ̰ܲܕܵܘܵܬܹ̈ܐ: ܘܡܗܲܡܙܘܼܡܹܐ ܩܵܕ݇ܡ ܟܠ ܐ݇ܢܵܫܵܐ ܩܸܣܲܬ ܕܒܵܣܲܡܬܹܗ: ܘܟܠ ܐ݇ܢܵܫܵܐ ܥܵܓ̰ܘܼܒܹܐ ܗ݇ܘܼܵܐ ܘܦܝܵܫܵܐ ܗ݇ܘܼܵܐ ܥܘܼܓ̰ܒܵܐ ܒܝܼـܹܗ ܕܵܐܟ̣ܝܼ ܦܝܼܫܠܹܗ ܒܣܝܼܡܵܐ. ܒܲܩܪܝܼ ܗ݇ܘܼܵܘ ܡ̣ܢ ܗ̇ܘ ܐ݇ܢܵܫܵܐ ܟܠܲܝܗܝ ܒܢܘܿܢܹ̈ܐ ܕܡܕܝܼܢ݇ܬܵܐ ܘܐܵܡܪܝܼ ܗ݇ܘܼܵܘ: ܕܡܵܢܝܼ ܝ݇ܠܹܗ ܗ̇ܘ ܐ݇ܢܵܫܵܐ ܕܩܲܡ ܒܵܣܸܡܠܘܼܟܼ ܡ̣ܢ ܐܵܗܵܐ ܡܲܪܥܵܐ؟ ܓ̰ܘܼܘܸܒܠܹܗ ܗ̇ܘ ܕܐܝܼܬ ܗ݇ܘܼܵܐ ܠܹܗ ܫܹܐܕܹ̈ܐ: ܚܙܹܐܠܝܼ ܚܲܕ݇ܟܡܵܐ ܐ݇ܢܵܫܹ̈ܐ ܕܒܸܚܵܝܵܐ ܗ݇ܘܼܵܘ ܒܬܲܝܡܢܵܐ ܕܢܲܗܪܵܐ ܓܵܘ ܙܵܠܵܐ. ܘܗ̇ܘ ܕܝܼܗܘܼܵܐ ܪܹܫܵܐ ܕܟܠܹܗ ܒܨܠܘܿܬܹܗ ܡܘܼܩܘܸܚܠܹܗ ܒܗ̇ܘ ܫܹܐܕܵܐ: ܘܦܠܸܛܠܹܗ ܘܐ݇ܙܸܠܹܗ ܡܸܢܝܼ. ܘܗܘܹܐܠܹܗ ܫܥܵܫܵܐ ܓܘܼܪܵܐ ܓܵܘ ܡܕܝܼܢ݇ܬܵܐ: ܘܦܠܸܛܠܵܗ̇ ܗܹܡܸܙܡܵܢ ܒܟܠܵܗ̇ ܡܕܝܼܢ݇ܬܵܐ ܘܦܠܸܛܠܗ݇ܘܿܢ ܟܠܲܝܗܝ ܓܘܼܪ̈ܵܢܹܐ ܕܡܕܝܼܢ݇ܬܵܐ ܠܟܸܣ ܩܲܕܝܼܫܹ̈ܐ: ܘܟܲܕ ܚܸܙܝܵܝܠܗ݇ܘܿܢ ܘܐ݇ܡܸܪܗ݇ܘܿܢ ܐܸܠܲܝܗܝ: ܡܘܼܕܝܼ ܝ݇ܠܹܗ ܫܘܼܠܵܘܟ̣ܘܿܢ؟ ܘܡ̣ܢ ܐܲܝܟܵܐ ܝ݇ܬܘܿܢ؟ ܐ݇ܡܸܪܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܩܵܐ ܓܘܼܪ̈ܵܢܹܐ ܕܡܕܝܼܢ݇ܬܵܐ: ܐ݇ܢܵܫܹ̈ܐ ܝ݇ܘܲܚ ܩܵܪ̈ܝܼܒܵܝܹܐ: ܘܠܡܫܝܼܚܵܐ ܒܪܘܿܢܵܐ ܕܐܲܠܵܗܵܐ ܟܹܐ ܦܵܠܚܲܚ: ܘܬܲܠܡܝܼܕܹ̈ܐ ܕܝܼـܹܗ ܝ݇ܘܲܚ. ܘܒܫܸܡܹܗ ܟܹܐ ܒܲܣܡܲܚ ܟܠ ܡܲܪ̈ܥܹܐ ܘܥܲܓ̰ܲܙܝܵܬܹ̈ܐ ܘܟܹܐ ܛܲܪܕܲܚ ܐܘܼܦ ܫܹܐܕܹ̈ܐ ܡ̣ܢ ܒܲܪܢܵܫܵܐ. ܐܵܡܪܝܼ ܐܸܠܲܝܗܝ ܓܘܼܪ̈ܵܢܹܐ ܕܡܕܝܼܢ݇ܬܵܐ: ܐܸܢ ܗܵܕܟ̣ܵܐ ܝܼܠܵܗ̇ ܗܲܓ̰ܲܬ: ܩܘܼܡܘܼܢ ܥܒ̣ܘܿܪܘܼܢ ܥܲܡܲܢ ܠܡܕܝܼܢ݇ܬܵܐ: ܡܣܵܒܵܒ ܕܪܵܒܵܐ ܝ݇ܠܵܗ̇ ܣܢܝܼܩܘܼܬܲܢ ܥܲܠ ܒܵܣܲܡܬܵܘܟ̣ܘܿܢ. ܘܐ݇ܡܸܪܹܗ ܐܸܠܲܝܗܝ ܩܲܕܝܼܫܵܐ: ܕܐܸܕܝܘܿܡ݇ ܝܵܘܡܵܐ ܣܵܘܓܘܼܠܝܼ: ܝܵܘܡܵܐ ܓܘܼܪܵܐ ܕܚܲܕܒܫܲܒܵܐ ܝ݇ܠܹܗ: ܘܠܹܐ ܝ݇ܠܵܗ̇ ܗܵܣܵܢܵܐܝܼ ܩܵܬܲܢ ܕܥܵܒ̣ܪܲܚ ܥܲܡܵܘܟ̣ܘܿܢ ܠܡܕܝܼܢ݇ܬܵܐ. ܐܝܼܢܵܐ ܐܸܢ ܒܲܣܡܵܐ ܠܹܗ ܡܵܪܝܵܐ: ܩܵܝܕܲܡܬܵܐ ܒܸܬ ܐܵܬܲܚ. ܘܒܗ̇ܘ ܠܲܝܠܵܐ ܩܸܡܠܹܗ ܡܵܪܝ ܐܵܘܓܹܝܢ ܡ̣ܢ ܡܵܝܫܵܐ: ܗ̇ܘ ܘܐܵܚܘܿܢܘܵܬܹ̈ܐ ܕܥܲܡܹܗ: ܘܣܸܩܠܗ݇ܘܿܢ ܠܛܘܼܪܵܐ ܕܐܝܼܙܠܵܐ ܕܡ̣ܢ ܡܲܕܢ̱ܚܵܐ ܕܡܕܝܼܢ݇ܬܵܐ: ܠܗ̇ܝ ܕܘܼܟܬܵܐ ܕܩܘܼܪܒܵܐ ܗ݇ܘܼܵܐ ܠܓܸܦܝܼܵܬܹ̈ܐ ܕܡܵܬܵܐ. ܘܡܘܼܫ݇ܟ̰ܸܚܠܗ݇ܘܿܢ ܬܵܡܵܐ ܚܲܕ݇ ܒܸܙܥܵܐ: ܘܚܝܼܠܗ݇ܘܿܢ ܓܵܘܹܗ. ܘܗܘܹܐܠܗ݇ܘܿܢ ܓܵܘ ܗ̇ܘ ܒܸܙܥܵܐ ܩܵܐ ܡܸܬܚܵܐ ܕܬܠܵܬܝܼܢ ܫܸܢܹ̈ܐ: ܟܲܕ ܦܵܠܚܝܼ ܗ݇ܘܼܵܘ ܦܸܠܚܵܢܵܐ ܪܘܼܚܵܢܵܝܵܐ: ܘܓ̰ܲܡܥܝܼ ܗ݇ܘܼܵܘ ܕܵܘܸܠܬܵܐ ܫܡܲܝܵܢܝܼܬܵܐ. ܘܫܡܸܥܠܗ݇ܘܿܢ ܪܵܒܵܐ ܐܲܚܘܿܢܘܵܬܹ̈ܐ ܓܵܘ ܕܐܵܗܵܐ ܟܢܘܼܫܝܹܗ ܕܥܘܼܡܪܵܐ ܘܒܫܘܼܪܵܝܵܐ ܕܫܲܬܐܸܣܬܹܗ: ܓ̰ܡܸܥܠܗ݇ܘܿܢ ܘܐ݇ܬܹܐܠܗ݇ܘܿܢ ܠܟܸܣ ܩܲܕܝܼܫܵܐ ܡ̣ܢ ܟܠ ܐܲܬܪܵܐ ܘܡܕܝܼܢ݇ܬܵܐ: ܘܡ̣ܢ ܬܸܚܘܼܒܹ̈ܐ ܕܐܵܓܹܒ̣ܛܘܿܣ: ܘܡ̣ܢ ܓܵܙܲܪ̈ܝܵܬܹܐ ܪܸܚܩܵܐ ܕܝܵܡܵܐ: ܐܵܢܝܼ ܕܟܹܐ ܝܵܕܥܝܼ ܗ݇ܘܼܵܘ ܠܹܗ ܘܒܵܠܲܕ ܝܼܗ݇ܘܼܵܘ ܒܦܸܠܚܵܢܵܢ̈ܘܼܗܝ: ܘܚܝܼܠܗ݇ܘܿܢ ܓܵܘ ܕܐܵܗܵܐ ܥܘܼܡܪܵܐ ܩܲܕܝܼܫܵܐ: ܗܘܹܐܠܵܗ̇ ܐܵܗܵܐ ܕܲܣܬܵܐ ܐܲܠܵܗܵܝܬܵܐ ܬܠܵܬܡܵܐܐ ܘܚܲܡܫܝܼܢ ܐ݇ܢܵܫܹ̈ܐ. ܘܗܘܹܐܠܗ݇ܘܿܢ ܒܚܲܒ̣ܪܵܒ̣ܘܼܬܵܐ ܘܚܘܼܒܵܐ ܕܠܵܐ ܠܲܟܵܐ ܘܒܫܸܚܬܵܐ ܕܣܵܛܵܢܵܐ. ܘܟܠ ܐ݇ܢܵܫܵܐ ܦܠܵܫܵܐ ܗ݇ܘܼܵܐ ܒܓܲܢ݇ܒܵܪܘܼܬܵܐ ܘܚܲܝܠܵܢܘܼܬܵܐ: ܕܡܲܚܙܹܐ ܫܘܼܦܪܵܐ ܥܲܓ̰ܒܵܢܵܐ ܕܦܸܠܚܵܢܵܢ̈ܘܼܗܝ: ܟܲܕ ܚܲܠܘܼܠܹܐ ܗ݇ܘܼܵܘ ܐܲܩܠܵܬܹ̈ܐ ܕܩܵܪ̈ܝܼܒܵܝܹܐ ܘܡܸܣܟܹܢܹ̈ܐ ܕܗܕܝܼܪܹ̈ܐ ܗ݇ܘܼܵܘ ܠܟܸܣܠܲܝܗܝ. ܘܡܵܪܲܢ ܪܵܙܝܼ ܗ݇ܘܼܵܘ ܒܦܸܠܚܵܢܵܢܲܝ̈ܗܝ: ܒܥܕܵܢܵܐ ܕܒܵܣܘܼܡܹܐ ܗ݇ܘܼܵܘ ܡܸܪ̈ܥܝܹܐ: ܘܦܵܠܘܿܛܹܐ ܗ݇ܘܼܵܘ ܫܹܐܕܹ̈ܐ ܘܒܸܥܒ̣ܵܕܵܐ ܗ݇ܘܼܵܘ ܦܸܠܚܵܢܵܢܹ̈ܐ ܓܘܼܪܹ̈ܐ ܘܨܦܵܝܝܼ ܐܲܝܟܼ ܓܘܼܪܲܝܗܝ.
ܘܡ̣ܢ ܒܵܬ݇ܪ ܚܲܕ݇ ܥܕܵܢܵܐ: ܦܝܼܫܠܹܗ ܚܸܙܝܵܐ ܠܡܵܪܝ ܐܵܘܓܹܝܢ ܒܚܸܙܘܵܐ ܐܲܠܵܗܵܝܵܐ: ܟܲܕ ܡܲܠܲܐܟ̣ܵܐ ܟܸܠܝܵܐ ܠܟܸܣܠܹܗ ܘܒܹܐܡܵܪܵܐ ܐܸܠܹܗ: ܐ݇ܣܘܿܪ ܬܲܣܡܵܐ ܕܚܵܨܘܼܟܼ: ܘܠܲܐܟ̣ܵܐ ܡܲܟܪܸܙ ܡܲܫܚܲܕܬܵܐ ܕܡܲܠܟܘܼܬܵܐ ܕܐܲܠܵܗܵܐ. ܡܣܵܒܵܒ ܦܝܼܫܠܵܗܿ ܫܡܥܝܼܬܵܐ ܨܠܘܿܬܘܼܟܼ: ܘܦܝܼܫܠܵܗ̇ ܩܘܼܒܸܠܬܵܐ ܒܵܥܘܼܬܘܼܟܼ ܩܵܕ݇ܡ ܐܲܠܵܗܵܐ. ܡ̣ܢ ܐܵܕܝܼܵܐ ܩܘܼܡ݇ ܒܐܲܫܟܵܪܵܐ ܐܲܢ݇ܬܿ ܘܐܲܚܘܿܢ̈ܘܵܬܘܼܟܼ: ܡܲܕܸܥܡܘܿܢ ܠܵܗ̇ ܓܵܢܵܘܟ̣ܘܿܢ ܩܵܕ݇ܡ ܟܠ ܐ݇ܢܵܫܵܐ. ܘܠܵܐ ܙܲܕܥܝܼܬܘܿܢ ܡ̣ܢ ܕܐܵܢܝܼ ܕܒܸܩܛܵܠܵܐ ܝ݇ܢܵܐ ܦܲܓ̣ܪܵܐ: ܐܝܼܢܵܐ ܓܵܢܵܐ ܠܹܐ ܡܵܨܝܼ ܠܸܩܛܵܠܵܐ. ܘܒܥܲܝܢܵܐ ܒܲܗܪܵܢܬܵܐ ܕܗܲܝܡܵܢܘܼܬܵܐ: ܡܲܟܪܸܙܘܿܢ ܫܪܵܪܵܐ ܕܡܲܠܟܘܼܬܵܐ. ܘܒܵܬ݇ܪ ܗܵܕܵܐ ܨܠܹܐܠܹܗ ܩܲܕܝܼܫܵܐ ܘܐܲܚܘܿܢܘܵܬܹ̈ܐ ܐܵܢܝܼ ܕܐܝܼܢܵܐ ܥܲܡܹܗ: ܡܬܲܠܡܸܕ ܗ݇ܘܼܵܐ ܘܡܵܠܸܦ ܗ݇ܘܼܵܐ ܓܵܘ ܡܵܬܘܵܬܹ̈ܐ. ܘܐ݇ܙܸܠܗ݇ܘܿܢ ܐܲܚܘܿܢܘܵܬܹ̈ܐ ܕܥܲܡܹܗ ܠܒܹܝܬ ܦܲܚܵܪܵܐ [ܛܲܪܨܵܢܵܐ ܕܡܸܢܕܝܼܵܢܹ̈ܐ ܡ̣ܢ ܛܝܼܢܵܐ]: ܘܝܘܼܗ݇ܒ̣ܸܠܗ݇ܘܿܢ ܙܘܼܙܵܐ ܠܵܐ ܒܵܨܘܿܪܵܐ: ܘܙܒ̣ܸܢܘܿܢ ܬܠܵܬܡܵܐܐ ܩܘܼ̈ܠܹܐ [ܬܲܠܡܹ̈ܐ] ܕܡܝܼ̈ܵܐ: ܕܡܲܬܒ̣ܝܼܠܗ݇ܘܿܢ ܐܵܢܝܼ ܬܲܠܡܹ̈ܐ ܒܲܝܢܵܬ ܬܸܚܘܼܒܹ̈ܐ ܕܐܘܼܪ̈ܚܵܬܹܐ: ܐܲܝܟܵܐ ܕܠܲܝܬ ܗ݇ܘܼܵܐ ܡܝܼ̈ܵܐ: ܘܡܵܠܝܼ ܠܗ݇ܘܿܢ ܡܝܼ̈ܵܐ ܐܵܢܝܼ ܬܲܠܡܹ̈ܐ ܒܟܠ ܝܵܘܡܵܐ: ܘܡܲܦܝܸܓ̣ܝܼ ܗ݇ܘܼܵܘ ܨܵܗܘܵܐ ܠܐܵܢܝܼ ܕܥܵܒ̣ܪܝܼ ܗ݇ܘܼܵܘ ܒܐܘܼܪ̈ܚܵܬܹܐ. ܟܲܕ ܒܕܵܝܸܡܘܼܬܵܐ ܐܲܢܹ̈ܐ ܐܲܚܘܿܢܘܵܬܹ̈ܐ ܒܢܘܿܢܹ̈ܐ ܕܥܘܼܡܪܹܗ ܕܩܲܕܝܼܫܵܐ: ܟܠ ܝܵܘܡܵܐ ܟܹܐ ܡܵܠܝܼ ܗ݇ܘܼܵܘ ܠܗ݇ܘܿܢ ܡ̣ܢ ܢܲܗܪ̈ܵܘܵܬܹܐ ܘܡ̣ܢ ܥܲܝܢܹ̈ܐ ܕܡܝܼ̈ܵܐ: ܘܡܲܢܝܸܚܝܼ ܗ݇ܘܼܵܘ ܠܩܵܪ̈ܝܼܒܵܝܹܐ ܕܐܵܬܝܼ ܗ݇ܘܼܵܘ ܠܟܸܣܠܲܝܗܝ. ܘܟܲܕ ܟܹܐ ܦܵܠܚܝܼ ܗ݇ܘܼܵܘ ܩܲܕܝܼܫܹ̈ܐ ܐܵܗܵܐ ܦܸܠܚܵܢܵܐ: ܒܚܲܕ݇ ܡ̣ܢ ܝܵܘܡܵܢܹ̈ܐ ܐ݇ܙܸܠܹܗ ܚܲܕ݇ ܡܸܢܲܝܗܝ ܕܡܵܠܹܐ ܠܵܗ̇ ܗ̇ܝ ܩܘܼܠܬܵܐ ܕܥܲܠ ܐܘܼܪܚܵܐ: ܩܘܼܘܸܡܠܵܐ ܢܦܝܼܠܵܐ ܗ݇ܘܼܵܐ ܬܵܡܵܐ ܚܲܕ݇ ܟܘܿܕܲܢܬܵܐ ܛܥܝܼܢܵܐ ܗ݇ܘܼܵܐ ܚܲܡܫܲܥܣܲܪ ܟܝܘܼܠܹ̈ܐ ܕܕܲܚܠܵܐ: ܘܫܒ̣ܸܩܠܗ݇ܘܿܢ ܚܲܒ̣ܪ̈ܵܘܵܬܘܼܗܝ ܘܐ݇ܙܸܠܗ݇ܘܿܢ ܠܡܕܝܼܢ݇ܬܵܐ. ܗܲܪ ܐܵܗܵܐ ܐ݇ܢܵܫܵܐ ܟܸܠܝܵܐ ܗ݇ܘܼܵܐ ܕܚܵܙܹܐ ܐܸܢ ܐܵܬܹܐ ܚܲܕ݇ ܐ݇ܢܵܫܵܐ ܕܡܵܪܸܡܠܹܗ ܥܲܡܹܗ ܠܛܲܥܢܵܗ̇ ܕܗ̇ܝ ܟܘܿܕܲܢܬܵܐ. ܘܟܲܕ ܓܘܼܫܸܩܠܹܗ ܪܵܒܵܐ: ܘܠܲܝܬ ܗ݇ܘܼܵܐ ܚܲܕ݇ ܐ݇ܢܵܫܵܐ. ܘܗܵܐ ܗ̇ܘ ܬܲܠܡܝܼܕܹܗ ܕܡܵܪܝ ܐܵܘܓܹܝܢ ܐ݇ܬܹܐܠܹܗ ܕܡܵܠܹܐ ܡܝܼ̈ܵܐ: ܘܡܲܬܸܒ̣ ܒܩܘܼܠܬܵܐ ܐܲܝܟܼ ܥܵܕܲܬܹܗ. ܡܘܼܫ݇ܟ̰ܸܚܠܹܗ ܠܗ̇ܘ ܐ݇ܢܵܫܵܐ ܠܟܸܣ ܗ̇ܝ ܩܘܼܠܬܵܐ: ܘܦܘܼܪܦܸܠܹܗ ܗ̇ܘ ܐ݇ܢܵܫܵܐ ܒܩܲܕܝܼܫܵܐ: ܕܒܟܠ ܐܘܼܪ̈ܚܵܬܹܐ ܕܗܵܘܝܵܐ: ܥܒ̣ܘܼܕ ܒܵܘܲܪ ܬܸܪ̈ܘܲܝ ܒܸܬ ܡܵܨܝܼ ܕܡܲܪܡܝܼܠܹܗ ܠܗ̇ܘ ܛܲܥܢܵܐ. ܘܟܲܕ ܩܘܼܪܒܸܢܹܗ ܩܲܕܝܼܫܵܐ ܠܟܸܣ ܛܲܥܢܵܐ: ܒܩܵܠܘܼܠܘܼܬܵܐ ܕܠܵܐ ܟܸܟ̰ܚܵܐ ܘܠܵܐ ܗܲܝܲܪܬܵܐ ܡ̣ܢ ܗܸܟ̰ ܐ݇ܢܵܫܵܐ ܐ݇ܚܹܪ݇ܢܵܐ: ܦܝܼܫܠܹܗ ܪܝܼܡܵܐ ܛܲܥܢܵܐ ܘܦܝܼܫܠܹܗ ܡܘܼܬܒ̣ܵܐ ܥܲܠ ܟܘܿܕܲܢܬܵܐ. ܘܟܲܕ ܚܙܹܐܠܹܗ ܐܵܗܵܐ ܐ݇ܢܵܫܵܐ ܠܢܝܼܫܲܢܩܵܐ ܕܦܝܼܫܠܹܗ ܥܒ̣ܝܼܕܵܐ: ܘܦܝܼܫܠܹܗ ܥܘܼܓ̰ܒܵܐ ܒܐܵܢܝܼ ܕܗܘܹܐܠܗ݇ܘܿܢ. ܘܒܥܕܵܢܵܐ ܕܥܒ̣ܸܪܹܗ ܗ̇ܘ ܐ݇ܢܵܫܵܐ ܠܡܕܝܼܢ݇ܬܵܐ: ܡܚܹܐܠܹܗ ܡܵܪܹܗ ܒܩܸܫܝܘܼܬܵܐ ܘܐ݇ܡܸܪܹܗ ܐܸܠܹܗ: ܩܵܐ ܡܘܼܕܝܼ ܡܥܘܼܪܩܸܠܘܼܟܼ ܡ̣ܢ ܚܲܒ̣ܪ̈ܵܘܵܬܘܼܟܼ؟ ܗܵܝܓܵܗ ܗܘܼܩܝܼܠܹܗ ܗ̇ܘ ܪܹܓܵܐ ܠܡܵܪܹܗ ܟܠܵܗ̇ ܗܲܩܝܵܬܹܗ ܕܵܐܟ̣ܝܼ ܗ݇ܘܹܐܠܵܗ̇: ܘܕܵܐܟ̣ܝܼ ܡܘܼܫ݇ܟ̰ܸܚܠܹܗ ܠܗ̇ܘ ܐ݇ܢܵܫܵܐ ܙܲܕܝܼܩܵܐ: ܘܒܚܲܝܠܵܐ ܕܨܠܘܿܬܹܗ ܦܝܼܫܠܹܗ ܪܝܼܡܵܐ ܛܲܥܢܵܐ ܕܠܵܐ ܟܸܟ̰ܚܵܐ ܘܕܠܵܐ ܦܠܵܫܵܐ. ܒܘܼܬ ܕܐܵܗܵܐ ܫܘܼܒܸܚܠܗ݇ܘܿܢ ܟܠܲܝܗܝ ܠܐܲܠܵܗܵܐ ܒܘܼܬ ܕܐܵܗܵܐ ܕܗܘܹܐܠܵܗ̇. ܘܡܸܢ݇ܕܪܹܫ݇ ܪܵܒܵܐ ܓ̣ܵܠܝܼܒܘܼܝܵܬܹ̈ܐ ܕܒܘܼܫ ܓܘܼܪܹ̈ܐ ܡ̣ܢ ܕܐܵܢܝܼ ܒܸܦܠܵܚܵܐ ܗ݇ܘܵܘ ܬܲܠܡܝܼܕܹ̈ܐ ܕܩܲܕܝܼܫܵܐ ܕܡܵܪܝ ܐܵܘܓܹܝܢ.
ܗܲܪ ܒܐܵܢܝܼ ܝܵܘܡܵܢܹ̈ܐ ܡܝܼܬܠܹܗ ܐܲܦܸܣܩܘܿܦܵܐ ܡܝܼܛܪܵܦܘܿܠܹܝܛܵܐ ܕܡܕܝܼܢ݇ܬܵܐ ܕܢܨܝܼܒ̣ܝܼܢ. ܘܟܲܕ ܒܢܘܿܢܹ̈ܐ ܕܡܕܝܼܢ݇ܬܵܐ ܒܸܥܒ̣ܵܕܵܐ ܗ݇ܘܼܵܘ ܓܵܒܵܝܬܵܐ: ܝܵܐ ܪܲܒ ܡܵܢܝܼ ܚܫܝܼܚܵܐ ܝ݇ܠܹܗ ܕܗܵܘܹܐ ܡܕܲܒܪܵܢܵܐ ܕܥܹܕܬܵܐ: ܐܝܼܢܵܐ ܐܝܼܬ ܗ݇ܘܼܵܐ ܐܲܪܒܥܵܐ ܝܲܢ ܚܲܡܫܵܐ ܐ݇ܢܵܫܹ̈ܐ ܕܥܲܠܲܝܗܝ ܡܘܼܬܒ̣ܵܐ ܗ݇ܘܵܘ ܒܢܘܿܢܹ̈ܐ ܕܡܕܝܼܢ݇ܬܵܐ ܕܗܵܘܹܐ ܗ̇ܘ ܦܲܪܨܘܿܦܵܐ. ܘܐܝܼܬ ܗ݇ܘܼܵܐ ܡܸܢܲܝܗܝ ܕܒܹܐܡܵܪܵܐ ܗ݇ܘܼܵܘ: ܕܦܸܠܵܢ ܚܫܝܼܚܵܐ ܝ݇ܠܹܗ ܕܗܵܘܹܐ. ܘܐ݇ܚܹܪ̈݇ܢܹܐ ܐܵܡܪܝܼ ܗ݇ܘܼܵܘ: ܕܦܸܠܵܢ ܗܵܘܹܐ. ܘܟܲܕ ܓܵܘ ܕܐܵܗܵܐ ܥܝܼܩܘܼܬܵܐ ܕܸܪ̈ܝܹܐ ܗ݇ܘܼܵܘ: ܘܠܹܐ ܗ݇ܘܼܵܘ ܒܣܵܡܲܝܗܝ ܟܠܲܝܗܝ ܕܐܵܬܝܼ ܠܚܲܕ݇ ܣܘܼܙܓܵܪܵܐ: ܗܵܝܓܵܗ ܟܠܲܝܗܝ ܓ̰ܡܸܥܠܗ݇ܘܿܢ ܡܐܘܼܕܵܠܹܐ: ܕܐܵܬܝܼ ܠܟܸܣ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܚܵܙܝܼ ܡܘܼܕܝ݇ ܪܵܥܝܼ ܒܝܵܗ݇ܒ̣ܸܠܗ݇ܘܿܢ ܒܘܼܬ ܕܐܲܢܹ̈ܐ. ܘܟܲܕ ܐܲܝܟܼ ܓ̰ܵܡܥ ܥܒ̣ܸܕܠܗ݇ܘܿܢ ܘܲܥܕܵܐ ܘܟܠܲܝܗܝ ܐ݇ܬܹܐܠܗ݇ܘܿܢ: ܘܐ݇ܙܸܠܗ݇ܘܿܢ ܠܟܸܣ ܩܲܕܝܼܫܵܐ: ܐ݇ܬܹܐܠܗ݇ܘܿܢ ܘܟܠܹܐܠܗ݇ܘܿܢ ܥܲܠ ܬܲܪܥܵܐ ܕܩܸܠܵܝܬܹܗ: ܟܠܹܗ ܓ̰ܵܡܵܥܲܬ ܕܩܠܝܼܪ̈ܝܼܩܹܐ ܥܲܡ ܘܲܙܝܼܪܹ̈ܐ ܕܡܕܝܼܢ݇ܬܵܐ. ܘܗܵܝܓܵܗ ܦܠܸܛܠܹܗ ܠܟܸܣܠܲܝܗܝ: ܝܘܼܗ݇ܒ̣ܵܝܠܹܗ ܦܣܵܣܵܐ ܕܐܵܙܠ݇ܝܼ ܠܥܹܕܬܵܐ: ܕܟܵܠܝܼ ܬܵܡܵܐ ܗܲܠ ܡܲܟܡܸܠ ܨܠܘܿܬܹܗ. ܐܲܢܹ̈ܐ ܥܒ̣ܸܕܠܗ݇ܘܿܢ ܐܲܝܟܼ ܕܦܘܼܩܕܵܝܠܹܗ: ܣܵܦܪܝܼ ܗ݇ܘܼܵܘ ܠܹܗ ܓܵܘ ܕܲܪܬܵܐ ܕܥܹܕܬܵܐ: ܗܲܠ ܕܐܵܙܸܠ ܗ݇ܘܼܵܐ ܠܟܸܣܠܲܝܗܝ.
ܐܝܼܢܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܡ̣ܢ ܩܵܕ݇ܡ ܬܠܵܬ݇ܐ ܝܵܘܡܵܢܹ̈ܐ: ܡܛܹܐܠܹܗ ܠܟܸܣ ܩܲܕܝܼܫܵܐ ܡܵܪܝ ܐܵܘܓܹܝܢ. ܐܵܗܵܐ ܩܲܕܝܼܫܵܐ ܐܲܝܟܼ ܒܢܒ̣ܝܘܼܬܵܐ ܐ݇ܡܸܪܹܗ ܠܩܲܕܝܼܫܵܐ ܡܵܪܝ ܝܲܥܩܘܿܒ̣: ܕܐܸܕܝܘܿܡ݇ ܝܵܘܡܵܐ ܒܸܬ ܫܲܒ̣ܩܸܢܘܼܟܼ [ܦܲܪܫܸܢ ܡܸܢܘܼܟܼ] ܐܲܝܟܼ ܕܠܚܲܕ݇ ܐܲܪܚܵܐ: ܐܝܼܢܵܐ ܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ ܐܲܝܟܼ ܕܠܚܲܕ݇ ܪܵܥܝܵܐ ܘܡܬܲܓܒܸܪܵܢܵܐ ܕܥܹܕܬܵܐ ܕܐܲܠܵܗܵܐ. ܫܒܼܘܿܩ ܠܝܼ ܝܵܐ ܒܵܒܵܐ: ܠܹܐ ܝ݇ܘܸܢ ܦܲܪܡܘܼܝܹܐ ܠܡܸܢܕܝܼ ܕܒܹܐܡܵܪܵܐ ܝ݇ܘܸܬܿ ܒܘܼܬ ܕܝܼܝܼ.
ܐܝܼܢܵܐ ܟܲܕ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܐ݇ܬܹܐܠܹܗ ܠܟܸܣ ܗ̇ܘ ܟܸܢܫܵܐ: ܥܒ̣ܸܪܹܗ ܘܡܘܼ݇ܟ̰ܚܵܝܠܹܗ ܕܝܼ݇ܬܝܼܒ̣̈ـܹܐ ܝ݇ܢܵܐ ܕܲܣܬܹ̈ܐ ܕܲܣܬܹ̈ܐ. ܐܝܼܢܵܐ ܐܵܢܝܼ ܒܥܕܵܢܵܐ ܕܚܙܹܐܠܗ݇ܘܿܢ: ܦܝܼܫܠܗ݇ܘܿܢ ܫܥܝܼܫܹ̈ܐ ܒܲܪܩܘܼܒ̣ܠܹܗ: ܘܩܘܼܒܸܠܗ݇ܘܿܢ ܒܐܝܼܩܵܪܵܐ ܓܘܼܪܵܐ. ܐܝܼܢܵܐ ܡܲܙܕܸܥܝܵܢܵܐ ܗ݇ܘܼܵܐ ܫܸܟܠܹܗ: ܘܚܩܝܼܪܵܐ ܗ݇ܘܼܵܐ ܦܲܪܨܘܿܦܹܗ: ܐܲܝܟܼ ܡܲܠܲܐܟ̣ܵܐ ܕܐܲܠܵܗܵܐ: ܐܝܼܢܵܐ ܐܵܗܵܐ ܩܲܕܝܼܫܵܐ ܒܸܪܡܵܙܵܐ ܗ݇ܘܼܵܐ ܒܐܝܼܕܹܗ: ܕܟܵܠܝܼ ܗܲܠ ܕܡܨܵܠܹܗ ܨܠܘܿܬܵܐ ܓܵܘ ܥܹܕܬܵܐ. ܘܗܵܝܓܵܗ ܡ̣ܢ ܕܨܘܼܠܹܐ ܠܹܗ ܨܠܘܿܬܵܐ ܘܦܠܸܛܠܹܗ. ܟܠܲܝܗܝ ܓ̰ܡܸܥܠܗ݇ܘܿܢ ܠܟܸܣܠܹܗ ܒܚܲܕܘܼܬܵܐ ܓܘܼܪܬܵܐ. ܐܝܼܢܵܐ ܐܵܗܵܐ ܣܢܸܕܠܹܗ ܥܲܠ ܚܘܼܛܪܹܗ: ܘܟܠܹܐܠܹܗ ܒܹܝܦܲܠܓܲܝܗܝ: ܘܚܲܠܨܝܼ ܗ݇ܘܼܵܘ ܠܹܗ ܡ̣ܢ ܟܠ ܓܹܒܵܢܹ̈ܐ: ܘܢܵܫܩܝܼ ܗ݇ܘܼܵܘ ܠܐܝܼܕܵܬ̈ܘܼܗܝ ܘܠܓ̰ܘܼܠ̈ܘܼܗܝ: ܘܡ̣ܢ ܒܵܬ݇ܪ ܟܠܲܝܗܝ ܦܪܸܩܠܗ݇ܘܿܢ ܦܘܼܩܕܵܝܠܹܗ ܕܝܵܬܒ̣ܝܼ ܘܡܲܨܝܸܬܝܼ. ܡ̣ܢ ܒܵܬ݇ܪ ܗܘܼܡܙܸܡܠܹܗ ܚܲܕ݇ܟ̰ܵܐ ܥܲܡܲܝܗܝ: ܦܝܼܫܠܹܗ ܓܸܠܝܵܐ ܠܩܲܕܝܼܫܵܐ ܥܝܼܩܘܼܬܲܝܗܝ ܘܫܲܩܝܼܘܼܬܲܝܗܝ ܘܠܵܐ ܣܘܼܙܓܵܪܲܝܗܝ ܥܲܡ ܐܘܼܕܵܠܹܐ. ܟܲܕ ܒܸܒܥܵܝܵܐ ܗ݇ܘܼܵܘ ܕܐܵܡܪܝܼ ܩܵܕ݇ܡ ܩܲܕܝܼܫܵܐ: ܕܐܲܚܢܲܢ ܒܵܥܝܲܚ ܕܗܵܘܹܐ ܐܸܠܲܢ ܪܵܥܝܵܐ ܦܸܠܵܢ: ܘܐ݇ܚܹܪ̈݇ܢܹܐ ܒܹܐܡܵܪܵܐ ܐ݇ܢܵܐ ܕܦܸܠܵܢ ܠܹܐ ܝ݇ܠܵܗ̇ ܒܣܵܡܲܢ ܐܝܼܢܵܐ ܦܸܠܵܢ ܒܵܥܝܲܚ: ܘܒܵܥܝܼ ܗ݇ܘܼܵܘ ܐܘܼܦ ܠܩܲܕܝܼܫܵܐ ܕܡܲܢܦܸܠܝܼ ܠܹܗ ܒܕܘܼܪܵܫܵܐ ܐܲܝܟܼ ܕܐܵܗܵܐ: ܗܵܝܓܵܗ ܒܚܲܝܠܵܐ ܕܫܵܦܵܩܲܬ ܕܠܵܒܘܼܠܹܐ ܗ݇ܘܼܵܐ ܠܩܲܕܝܼܫܵܐ ܩܲܕ݇ܡܵܝܬܵܐ ܝ݇ܕܸܥܠܹܗ ܘܦܘܼܪܩܵܝܠܹܗ ܡ̣ܢ ܐܵܗܵܐ ܥܝܼܩܘܼܬܵܐ: ܘܡ̣ܢ ܩܵܕ݇ܡ ܕܐܲܢܹ̈ܐ ܐܵܡܪܝܼ ܗ݇ܘܼܵܘ ܐܸܠܹܗ ܚܲܕ݇ ܡܸܢܕܝܼ ܩܲܕܝܼܫܵܐ ܡܘܼܕܸܥܝܵܝܠܹܗ ܣܵܒܵܒ ܕܐ݇ܬܹܝܬܲܝܗܝ ܠܟܸܣܠܹܗ. ܗܵܕܟ̣ܵܐ ܐ݇ܡܸܪܹܗ ܐܸܠܲܝܗܝ: ܒܸܕܥܵܝܵܐ ܝ݇ܘܸܢ ܒܢܘܿܢ̈ܝܼ: ܕܡܼܢ ܕܓ̰ܘܼܡܸܥܠܹܗ ܒܵܒܵܘܟ̣ܘܿܢ ܪܘܼܚܵܢܵܝܵܐ ܠܐܲܢܒܲܪ ܕܚܲܝܹ̈ܐ ܫܡܲܝܵܢܵܝܹ̈ܐ: ܕܦܵܝܫܝܼܬܘܿܢ ܦܪ̈ܝܼܫܹܐ ܡ̣ܢ ܚܲܒ̣ܪܵܒ̣ܘܼܬܹܗ: ܒܸܕܥܵܝܵܐ ܝ݇ܘܸܢ ܕܦܫܝܼܡܹ̈ܐ ܝ݇ܬܘܿܢ ܗܲܠ ܕܦܵܐܸܫ ܦܪܝܼܫܵܐ ܩܵܬܵܘܟ̣ܘܿܢ ܚܲܕ݇ ܪܵܥܝܵܐ ܘܡܕܲܒܪܵܢܵܐ: ܒܲܣ ܝܵܐ ܒܢܘܿܢ̈ܝܼ ܫܡܸܥܡܘܿܢ ܕܝܵܗ݇ܒ̣ܸܢܵܘܟ̣ܘܿܢ ܪܲܥܝܝܼ: ܕܟܵܠܝܼܬܘܿܢ ܡ̣ܢ ܕܘܼܪܵܫܵܘܟ̣ܘܿܢ ܥܲܡ ܐܘܼܕܵܠܹܐ. ܣܵܒܵܒ ܗ̇ܘ ܐ݇ܢܵܫܵܐ ܕܓܘܼܒܝܼܠܵܘܟ̣ܘܿܢ ܠܹܐ ܝ݇ܠܹܗ ܪܵܥܝܵܐ ܘܡܕܲܒܪܵܢܵܐ ܕܝܼܵܘܟ̣ܘܿܢ: ܓܘܼܒܝܵܐ ܝ݇ܠܹܗ ܠܪܘܼܚܵܐ ܕܩܘܼܕܫܵܐ ܐ݇ܢܵܫܵܐ ܕܗܕܝܼܪܵܐ ܠܹܗ ܕܗܵܘܹܐ ܐܸܠܵܘܟ̣ܘܿܢ ܡܕܲܒܪܵܢܵܐ. ܐܝܼܢܵܐ ܐܵܢܵܐ ܒܝܼܵܗ݇ܒ̣ܵܐ ܝ݇ܘܸܢ ܐܸܠܵܘܟ̣ܘܿܢ ܪܲܥܝܼ: ܕܐܵܣܩܝܼܬܘܿܢ ܠܡܕܝܼܢ݇ܬܵܐ ܕܐܵܡܹܕ. ܫܡܸܥܠܝܼ ܕܡܚܘܼܣܝܹ̈ܐ [ܡܲܛܪ̈ܵܢܹܐ] ܩܲܕܝܼܫܹ̈ܐ: ܓܸܡܥܝܹ̈ܐ ܝ݇ܢܵܐ ܬܵܡܵܐ ܒܘܼܬ ܚܲܕ݇ ܗܲܓ̰ܲܬ ܕܦܸܠܚܵܢܵܐ: ܒܲܣ ܐܵܕܝܼܵܐ ܩܘܼܡܘܼܢ ܣܘܿܩܘܼܢ ܠܟܸܣܠܲܝܗܝ: ܘܬܵܡܵܐ ܒܸܬ ܦܵܐܸܫ ܓܸܠܝܵܐ ܐܸܠܵܘܟ̣ܘܿܢ ܐ݇ܢܵܫܵܐ ܕܗܕܝܼܪܵܐ ܝ݇ܠܹܗ ܕܗܵܘܹܐ ܐܸܠܵܘܟ̣ܘܿܢ ܪܵܥܝܵܐ ܘܡܕܲܒܪܵܢܵܐ. ܐܲܢܹ̈ܐ ܩܘܼܒܠܵܠܗ݇ܘܿܢ ܠܗܲܡܙܲܡܬܹܗ ܕܩܲܕܝܼܫܵܐ. ܥܘܼܓ̰ܸܒܠܗ݇ܘܿܢ ܒܩܲܕܝܼܫܵܐ: ܐܲܝܟܵܐ ܕܗܸܟ̰ ܡܸܢܕܝܼ ܠܵܐ ܐ݇ܡܸܪܗ݇ܘܿܢ ܐܸܠܹܗ: ܗ̇ܘ ܝܼܗܘܵܐ ܩܵܕ݇ܡܲܝܬܵܐ ܡܘܼܕܸܥܠܹܗ ܐܸܠܲܝܗܝ ܗܲܓ̰ܲܬ ܝܲܢ ܣܵܒܵܒ ܕܐ݇ܬܹܐܬܲܝܗܝ: ܘܒܘܼܬ ܦܲܪ̈ܨܘܿܦܹܐ ܐܵܢܝܼ ܕܓܘܼܒܝܵܝܠܗ݇ܘܿܢ: ܠܲܝܬ ܗ݇ܘܼܵܐ ܒܝܼܲܝܗܝ ܡܕܲܒܪܵܢܵܐ. ܗܲܪ ܒܗ̇ܝ ܥܕܵܢܵܐ ܟܠܲܝܗܝ ܪܹ̈ܫܵܢܹܐ ܕܢܨܝܼܒ̣ܝܼܢ ܣܓ̣ܸܕܠܗ݇ܘܿܢ ܐܸܠܹܗ: ܘܩܘܼܒܸܠܗ݇ܘܿܢ ܗܹܡܸܙܡܵܢܹܗ ܕܛܘܼܒ̣ܵܢܵܐ: ܟܠܹܐܠܗ݇ܘܿܢ ܡ̣ܢ ܕܘܼܪ̈ܵܫܲܝܗܝ ܥܲܡ ܐܘܼܕܵܠܹܐ: ܘܐ݇ܙܸܠܗ݇ܘܿܢ ܠܡܕܝܼܢ݇ܬܵܐ.
ܘܕܠܵܐ ܥܵܪܩܲܠܬܵܐ ܒܵܬ݇ܪ ܚܲܡܫܵܐ ܝܵܘܡܵܢܹ̈ܐ: ܩܸܡܠܗ݇ܘܿܢ ܐ݇ܢܵܫܹ̈ܐ ܝ݇ܕܸܥܝܹ̈ܐ ܡ̣ܢ ܩܠܝܼܪ̈ܝܼܩܹܐ ܡ̣ܢ ܪܹ̈ܫܵܢܹܐ ܕܡܕܝܼܢ݇ܬܵܐ: ܘܐ݇ܙܸܠܗ݇ܘܿܢ ܠܐܵܡܹܕ ܘܥܒ̣ܸܪܘܿܢ ܠܟܢܘܼܫܝܵܐ ܕܡܲܛܪ̈ܵܢܹܐ ܩܲܕܝܼܫܹ̈ܐ ܬܵܡܵܐ ܗ݇ܘܼܵܐ ܐܘܼܦ ܦܵܛܲܪܝܲܪܟܵܐ ܕܐܲܢܛܝܘܿܟ̣ܝܵܐ. ܡ̣ܢ ܒܵܬ݇ܪ ܕܪܹܐܠܗ݇ܘܿܢ ܫܠܵܡܵܐ ܠܟܠܲܝܗܝ ܐܲܒ̣ܵܗܵܬܹ̈ܐ: ܒܓ̰ܲܠܕܘܼܬܵܐ ܒܘܼܩܪܵܝܠܹܗ ܦܵܛܲܪܝܲܪܟܵܐ: ܕܠܡܵܢܝܼ ܓܘܼܒܹܠܵܘܟ̣ܘܿܢ ܕܗܵܘܹܐ ܐܸܠܵܘܟ̣ܘܿܢ ܪܵܥܝܵܐ [ܐܲܦܸܣܩܘܿܦܵܐ]: ܐܲܢܹ̈ܐ ܡܘܼܕܸܥܠܗ݇ܘܿܢ: ܕܵܐܟ̣ܝܼ ܕܐ݇ܡܸܪܹܗ ܐܸܠܲܝܗܝ ܩܲܕܝܼܫܵܐ ܡܵܪܝ ܐܵܘܓܹܝܢ: ܘܦܘܼܪܦܸܠܗ݇ܘܿܢ ܒܐܵܒ̣ܵܗܵܬܹ̈ܐ: ܕܛܵܠܒܝܼ ܡ̣ܢ ܡܵܪܲܢ: ܕܡܲܕܥܝܼܠܗ݇ܘܿܢ: ܕܡܵܢܝܼ ܝ݇ܠܹܗ ܗ̇ܘ ܐ݇ܢܵܫܵܐ ܕܓܘܼܒܹܐܠܹܗ ܡܵܪܝܵܐ ܪܵܥܝܵܐ ܠܦܸܣܩܹܗ: ܐܝܼܢܵܐ ܐܲܒ̣ܵܗܵܬܹ̈ܐ ܒܓ̰ܲܠܕܘܼܬܵܐ ܕܫܡܸܥܠܗ݇ܘܿܢ ܐܵܗܵܐ ܗܹܡܸܙܡܵܢ: ܐ݇ܡܸܪܘܿܢ ܩܵܐ ܓܵܢܲܝܗܝ: ܕܐܸܕܝܘܿܡ݇ ܝܵܘܡܵܐ ܒܸܬ ܡܲܩܪܸܒ̣ܲܚ ܨܠܘܿܬܵܐ ܠܡܵܪܲܢ ܒܘܼܬ ܕܐܵܗܵܐ ܦܸܠܚܵܢܵܐ. ܘܟܠܹܗ ܠܲܝܠܹܐ ܗܘܹܐܠܗ݇ܘܿܢ ܒܚܵܦܘܼܛܘܼܬܵܐ ܓܘܼܪܬܐ: ܘܟܠ ܚܲܕ݇ ܡܸܢܲܝܗܝ ܡܨܵܠܹܐ ܗ݇ܘܼܵܐ ܨܠܘܿܬܵܐ: ܟܲܕ ܒܸܛܠܵܒܵܐ ܗ݇ܘܼܵܘ ܘܦܲܪܦܘܼܠܹܐ ܒܡܵܪܲܢ: ܕܡܲܕܥܝܼܠܗ݇ܘܿܢ ܕܡܵܢܝܼ ܝ݇ܠܹܗ ܗ̇ܘ ܐ݇ܢܵܫܵܐ ܕܒܸܪܡܵܙܵܐ ܗ݇ܘܼܵܐ ܥܲܠܘܼܗܝ ܩܲܕܝܼܫܵܐ ܡܵܪܝ ܐܵܘܓܹܝܢ. ܘܦܸܠܓܹܗ ܕܠܲܝܠܹܐ: ܟܲܕ ܦܵܛܲܪܝܲܪܟܵܐ ܩܲܕܝܼܫܵܐ ܡܨܵܠܘܿܝܹܐ ܗ݇ܘܼܵܐ ܨܠܘܿܬܵܐ: ܘܒܚܲܫܵܐ ܓܘܼܪܵܐ ܘܒܕܸܡܥܹ̈ܐ ܕܥܲܝܢܹ̈ܐ ܘܬܵܢܲܚܝܵܬܹ̈ܐ ܦܲܪܦܘܼܠܹܐ ܗ݇ܘܼܵܐ ܒܡܵܪܲܢ ܒܘܼܬ ܕܐܵܗܵܐ ܗܲܓ̰ܲܬ: ܚܕܵܐ ܫܸܠܝܘܼܬܵܐ ܓܘܼܪܬܵܐ ܢܦܸܠܵܗ̇ ܥܲܠܘܼܗܝ: ܐܲܝܟܼ ܕܐܸܢ ܕܓܵܘ ܫܸܢܬܵܐ ܛܸܒܥܝܵܐ ܗ݇ܘܼܵܐ. ܘܗܵܐ ܚܲܕ݇ ܓ̰ܘܲܢܩܵܐ ܟܸܠܝܵܐ ܗ݇ܘܼܵܐ ܠܟܸܣܠܹܗ ܘܐ݇ܡܸܪܹܗ ܐܸܠܹܗ: ܕܡܵܪܝ ܝܲܥܩܘܿܒ̣ ܝܼ݇ܠܹܗ ܗ̇ܘ ܐ݇ܢܵܫܵܐ ܕܦܲܪܦܘܼܠܹܐ ܝ݇ܘܸܬܿ ܒܡܵܪܲܢ ܒܘܼܬ ܕܝܼـܹܗ. ܐܘܼܦ ܙܹܐ ܡܘܼܕܸܥܠܹܗ ܕܘܼܟܬܵܐ ܕܒܝܼܘܼܗ̇ ܟܹܐ ܚܲܝܝܼ ܗ݇ܘܼܵܐ: ܘܕܡܸܣܟܹܢܵܐ ܗ݇ܘܼܵܐ: ܘܪܵܒܵܐ ܥܲܓ̰ܝܼܒܘܼܝܵܬܹ̈ܐ ܒܸܦܠܵܚܵܐ ܗ݇ܘܼܵܐ ܡܵܪܲܢ ܒܐܝܼܕܵܬ̈ܘܼܗܝ.
ܥܲܡ ܫܘܼܠܵܡܵܐ ܕܗܲܡܙܲܡܬܹܗ ܕܡܲܠܲܐܟ̣ܵܐ: ܪܥܸܫܠܹܗ ܩܲܕܝܼܫܵܐ ܪܹܫܵܐ ܕܐܲܦܸܣܩܘܿܦܹ̈ܐ: ܘܩܸܡܠܹܗ ܘܫܘܼܟܸܪܹܗ ܠܐܲܠܵܗܵܐ. ܘܒܓ̰ܲܠܕܘܼܬܵܐ ܩܸܡܠܹܗ ܘܐ݇ܙܸܠܹܗ ܠܥܹܕܬܵܐ: ܘܫܘܼܕܸܪܹܗ ܘܓ̰ܘܼܡܸܥܠܹܗ ܠܟܲܠܝܗܝ ܐܲܒ̣ܵܗܵܬܹ̈ܐ: ܘܡܘܼܫܚܸܕܵܝܠܹܗ. ܘܫܘܼܕܸܪܹܗ ܘܡܘܼܕܸܥܠܹܗ ܐܘܼܦ ܠܩܠܝܼܪ̈ܝܼܩܹܐ ܘܠܪܹ̈ܫܵܢܹܐ ܕܢܨܝܼܒ̣ܝܼܢ: ܠܹܐ ܗ݇ܘܼܵܐ ܪܸܚܩܵܐ ܒܲܝܬܵܐ ܕܫܸܪ̈ܝܹܐ ܗ݇ܘܼܵܘ ܒܝܼـܹܗ ܡ̣ܢ ܥܹܕܬܵܐ: ܘܩܸܡܠܗ݇ܘܿܢ ܘܐ݇ܙܸܠܗ݇ܘܿܢ ܠܥܹܕܬܵܐ. ܘܡ̣ܢ ܕܨܘܼܠܹܐ ܠܗ݇ܘܿܢ ܨܠܘܿܬܵܐ ܘܝ݇ܬܸܒ̣ܠܗ݇ܘܿܢ: ܫܘܼܪܹܐܠܹܗ ܩܲܕܝܼܫܵܐ ܠܹܐܡܵܪܵܐ ܐܸܠܲܝܗܝ: ܕܵܐܟ̣ܝܼ ܕܪܹܐܠܹܗ ܡܵܪܲܢ ܫܸܠܝܘܼܬܵܐ ܥܲܠܘܼܗܝ ܒܥܕܵܢܵܐ ܕܨܵܠܘܼܝܹܐ ܗ݇ܘܼܵܐ ܨܠܘܿܬܵܐ: ܦܝܼܫܠܹܗ ܚܸܙܝܵܐ ܐܸܠܹܗ ܚܲܕ݇ ܐ݇ܢܵܫܵܐ ܕܟܸܠܝܵܐ ܒܲܪܩܘܼܒ̣ܠܹܗ ܘܒܹܐܡܵܪܵܐ ܐܸܠܹܗ ܒܘܼܬ ܕܘܼܟܬܵܐ ܕܒܸܚܵܝܵܐ ܗ݇ܘܼܵܐ ܓܵܘܵܗ̇ ܩܲܕܝܼܫܵܐ ܡܵܪܝ ܝܲܥܩܘܿܒ̣: ܟܲܕ ܒܹܐܡܵܪܵܐ ܐܸܠܲܝܗܝ: ܐܵܢܵܐ ܦܘܼܪܦܸܠܝܼ ܒܗ̇ܘ ܐ݇ܢܵܫܵܐ ܕܟܸܠܝܵܐ ܗ݇ܘܼܵܐ ܒܲܪܩܘܼܒ̣ܠܝܼ: ܕܡ̣ܢ ܐܲܝܟܵܐ ܝ݇ܠܹܗ ܓܸܢܣܹܗ ܘܐܘܼܓ̰ܵܓ̣ـܹܗ ܕܡܵܪܝ ܝܲܥܩܘܿܒ̣؟ ܐܝܼܢܵܐ ܐܵܗܵܐ ܐ݇ܙܸܠܹܗ ܡ̣ܢ ܠܟܸܣܠܝܼ ܘܐ݇ܡܸܪܹܗ ܐܸܠܝܼ: ܠܵܐ ܒܲܩܪܸܬܿ ܠܝܼ ܒܘܼܬ ܕܐܲܢܹ̈ܐ ܐܵܕܝܼܵܐ. ܣܵܒܵܒ ܐܝܼܬ ܐܵܢܝܼ ܕܟܹܐ ܝܵܕܥܝܼ ܠܹܗ ܠܓܸܢܣܹܗ ܘܐܘܼܓ̰ܵܓ̣ܹܗ. ܐܝܼܢܵܐ ܐܲܢܹ̈ܐ ܛܵܥܘܿܝܹܐ ܗ݇ܘܼܵܘ ܓܵܘ ܟܠܹܗ ܓ̰ܵܡܵܥܲܬܲܝܗܝ: ܕܐܸܢ ܐܝܼܬ ܐ݇ܢܵܫܵܐ ܓܵܘܲܝܗܝ ܕܟܹܐ ܝܵܕܸܥ ܓܸܢܣܹܗ ܘܐܘܼܓ̰ܵܓ̣ܹܗ: ܠܵܐ ܦܝܼܫܠܹܗ ܡܘܼܫ݇ܟ̰ܚܵܐ ܬܵܡܵܐ ܗܸܟ̰ ܐ݇ܢܵܫܵܐ ܕܟܹܐ ܝܵܕܸܥ ܗ݇ܘܼܵܐ ܠܹܗ. ܗܘܹܐܠܵܗ̇ ܛܵܥܘܵܝܬܵܐ ܐܘܼܦ ܓܵܘ ܢܨܝܼܒ̣ܝܼܢ: ܘܠܵܐ ܦܝܼܫܠܹܗ ܡܘܼܫ݇ܟ̰ܚܵܐ ܐ݇ܢܵܫܵܐ ܕܒܝܼܕܲܥܝܵܐ ܗ݇ܘܼܵܐ ܠܐܵܗܵܐ. ܩܸܡܠܗ݇ܘܿܢ ܗܲܪ ܒܗ̇ܝ ܥܕܵܢܵܐ ܘܐ݇ܙܸܠܗ݇ܘܿܢ ܠܢܨܝܼܒ̣ܝܼܢ. ܘܟܬܸܒܼܠܗ݇ܘܿܢ ܟܬܵܒ̣̈ـܹܐ ܒܣܘܼܙܓܵܪܵܐ ܕܟܠܵܗ̇ ܡܕܝܼܢ݇ܬܵܐ: ܘܛܒ̣ܝܼܥܵܝܠܗ݇ܘܿܢ. ܘܫܘܼܕܪܵܝܠܗ݇ܘܿܢ ܠܟܸܣܠܹܗ ܘܐܵܡܪܝܼ ܐܸܠܹܗ: ܡ̣ܢ ܦܘܼܩܕܵܢܵܐ ܕܐܲܒ̣ܵܗܵܬܹ̈ܐ ܐܲܦܸܣܩܘܿܦܹ̈ܐ ܕܐܵܬܹܐ ܠܥܹܕܬܵܐ ܕܢܨܝܼܒ̣ܝܼܢ: ܟܲܕ ܠܵܐ ܡܘܼܕܸܥܠܗ݇ܘܿܢ ܣܵܒܵܒ ܕܒܘܼܬ ܕܝܼܘܼܗ̇ ܛܵܥܘܼܝܹܐ ܗ݇ܘܼܵܘ ܒܵܬ݇ܪܹܗ. ܐܝܼܢܵܐ ܐܵܗܵܐ ܩܲܕܝܼܫܵܐ ܒܸܕܥܵܝܵܐ ܗ݇ܘܼܵܐ ܣܵܒܵܒ ܕܐ݇ܬܹܐܬܲܝܗܝ: ܘܕܡ̣ܢ ܡܵܪܲܢ ܝܼܠܵܗ̇ ܓܵܒܲܝܬܹܗ: ܠܹܐ ܡܵܨܹܐ ܗ݇ܘܼܵܐ ܕܟܵܠܹܐ ܗ݇ܘܼܵܐ ܕܲܪܩܘܼܒ̣ܠ ܕܦܘܼܩܕܵܢܵܐ ܕܡܵܪܹܗ: ܣܵܒܵܒ ܦܝܼܫܠܹܗ ܐ݇ܡܝܼܪܵܐ ܐܸܠܹܗ ܪܵܒܵܐ ܥܕܵܢܵܬܹ̈ܐ ܐܘܼܦ ܡ̣ܢ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܗܕܝܼܪܵܐ ܝ݇ܠܹܗ ܕܩܵܒܸܠ ܕܲܪܓ̣ܵܐ ܓܘܼܪܵܐ ܕܫܠܝܼܚܘܼܬܵܐ. ܐܘܼܦ ܡ̣ܢ ܩܵܕ݇ܡ ܚܲܕ݇ܟ̰ܵܐ ܝܵܘܡܵܢܹ̈ܐ ܦܝܼܫܠܹܗ ܐ݇ܡܝܼܪܵܐ ܐܸܠܹܗ ܪܵܒܵܐ ܓܵܗܹ̈ܐ: ܟܲܕ ܗܲܡܙܘܼܡܹܐ ܗ݇ܘܼܵܘ ܥܲܡ ܐܘܼܕܵܠܹܐ: ܕܗܵܐ ܡ̣ܢ ܐܵܕܝܼܵܐ ܩܘܼܪܒܵܐ ܝ݇ܠܵܗ̇ ܥܕܵܢܵܐ ܕܩܲܒܠܸܬܿ ܦܸܠܚܵܢܵܐ ܓܘܼܪܵܐ ܕܥܹܕܬܵܐ: ܘܡܕܲܒܪܵܢܘܼܬܵܐ ܕܡܲܪܥܝܼܬܹܗ ܕܡܫܝܼܚܵܐ. ܡܣܵܒܵܒ ܒܟܠܲܝܗܝ ܐܵܢܝܼ ܒܵܠܲܕ ܝܼܗܘܵܘ: ܕܡ̣ܢ ܦܘܼܩܕܵܢܵܐ ܕܪܘܼܚܵܐ ܩܲܕܝܼܫܵܐ ܠܐܵܗܵܐ ܦܝܼܫܠܹܗ ܦܪܝܼܫܵܐ: ܗܲܪ ܒܗ̇ܝ ܣܵܥܲܬ ܩܸܡܠܹܗ ܘܐ݇ܙܸܠܹܗ ܥܲܡܲܝܗܝ ܠܟܢܘܼܫܝܵܐ ܕܐܲܒ̣ܵܗܵܬܹ̈ܐ ܐܲܦܸܣܩܘܿܦܹ̈ܐ. ܘܟܲܕ ܓ̰ܡܥܝܼܬܵܐ ܗ݇ܘܼܵܐ ܟܠܵܗ̇ ܡܕܝܼܢ݇ܬܵܐ ܥܲܡ ܟܸܢܫܹ̈ܐ [ܓ̰ܵܡܵܥܲܬܹ̈ܐ] ܪܵܒܵܐ ܡ̣ܢ ܡܵܬܘܵܬܹ̈ܐ ܕܚܵܕܸܪ̈ܘܵܢܹܐ ܕܡܕܝܼܢ݇ܬܵܐ: ܐܵܢܝܼ ܕܒܸܣܦܵܪܵܐ ܗ݇ܘܼܵܘ ܐܝܼܡܵܢ ܒܸܬ ܗܵܘܹܐ ܡܵܪܝ ܝܲܥܩܘܿܒ̣ ܪܵܥܝܵܐ [ܐܲܦܸܣܩܘܿܦܵܐ] ܩܵܬܲܝܗܝ. ܘܟܠܲܝܗܝ ܒܵܠܲܕ ܝܼܗܘܼܵܘ ܒܨܦܵܝܘܼܬܵܐ ܕܐܵܗܵܐ ܐ݇ܢܵܫܵܐ: ܒܘܼܬ ܕܐܵܗܵܐ ܓܵܫܘܿܩܹܐ ܗ݇ܘܼܵܘ ܘܒܸܣܦܵܪܵܐ ܗ݇ܘܼܵܘ ܕܐܝܼܡܵܢ ܒܸܬ ܦܵܐܸܫ ܥܒ̣ܝܼܕܵܐ ܪܵܥܝܵܐ ܐܸܠܲܝܗܝ. ܐܝܼܢܵܐ ܐܲܒ̣ܵܗܵܬܹ̈ܐ ܦܘܼܩܸܕܠܗ݇ܘܿܢ ܠܩܲܕܝܼܫܵܐ ܕܝܵܬܸܒ̣. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ. ܕܡܘܼܕܝܼ ܝ݇ܠܵܗ̇ ܣܵܒܵܒ ܕܫܘܼܕܸܪܵܘܟ̣ܘܿܢ ܒܵܬ݇ܪܝܼ؟ ܐܲܢܹ̈ܐ ܫܘܼܪܹܐܠܗ݇ܘܿܢ ܠܹܐܡܵܪܵܐ ܐܸܠܹܗ: ܕܡ̣ܢ ܡܵܪܲܢ ܦܝܼܫܠܹܗ ܓܸܠܝܵܐ ܩܵܬܲܢ ܒܘܼܬ ܕܝܼܘܼܟܼ: ܕܩܲܒܠܸܬܿ ܦܘܼܠܚܵܢܵܐ ܕܐܲܦܸܣܩܘܿܦܘܼܬܵܐ ܕܐܵܗܵܐ ܡܕܝܼܢ݇ܬܵܐ. ܐܵܗܵܐ ܫܘܼܪܹܐܠܹܗ ܗܵܩܘܿܝܹܐ ܩܵܬܲܝܗܝ ܒܘܼܬ ܒܵܨܘܿܪܘܼܬܹܗ. ܕܠܹܐ ܡܵܨܸܢ ܠܐܵܗܵܐ ܠܸܥܒ̣ܵܕܵܐ. ܐܝܼܢܵܐ ܟܸܢܫܹ̈ܐ ܡܲܠܝܘܼܙܹܐ ܗ݇ܘܼܵܘ ܠܩܠܝܼܪ̈ܝܼܩܹܐ: ܕܠܵܐ ܦܵܝܫܝܼ ܡܘܼܥܝܸܩܹ̈ܐ ܝܲܢ ܡܘܼܟܠܝܼ̈ـܹܐ ܒܗܹܡܸܙܡܵܢ ܥܲܡܹܗ. ܘܒܗ̇ܝ ܥܕܵܢܵܐ ܩܸܡܠܗ݇ܘܿܢ ܘܥܒ̣ܪܘܿܢ ܠܗܲܝܟܠܵܐ: ܘܡܘܼܩܪܸܒ̣ܠܗ݇ܘܿܢ ܨܠܘܿܬܵܐ ܐܲܝܟܼ ܥܵܕܲܬ: ܘܡܘܼܕܸܥܠܗ݇ܘܿܢ ܠܩܲܕܝܼܫܵܐ ܡܵܪܝ ܝܲܥܩܘܿܒ̣ ܡܝܼܛܪܵܦܘܿܠܹܝܛܵܐ: ܗ݇ܘܹܐܠܵܗ̇ ܚܲܕܘܼܬܵܐ ܓܘܼܪܬܵܐ ܠܟܠܹܗ ܟܸܢܫܵܐ ܕܡܕܝܼܢ݇ܬܵܐ ܕܢܨܝܼܒ̣ܝܼܢ.
ܡܸܢ݇ܕܪܹܫ݇ ܩܘܼܘܸܡܠܵܗ̇ ܚܲܕ݇ ܡܲܛܠܲܒ ܒܲܝܢܵܬܲܝܗܝ: ܝܵܐ ܪܲܒ ܡ̣ܢ ܐܲܝܟܵܐ ܝ݇ܠܹܗ ܐܘܼܓ̰ܵܓ̣ܹܗ ܘܓܸܢܣܹܗ ܕܡܵܪܝ ܝܲܥܩܘܿܒ̣: ܗܸܟ̰ ܐ݇ܢܵܫܵܐ ܠܵܐ ܝ݇ܕܸܥܠܹܗ. ܐܝܼܢܵܐ ܦܝܼܫܠܹܗ ܒܘܼܩܪܵܐ ܡ̣ܢ ܟܸܢܫܵܐ ܕܡܕܝܼܢ݇ܬܵܐ ܟܲܕ ܐܵܢܝܼ ܦܨܝܼܚܹ̈ܐ ܥܲܡܹܗ ܡ̣ܢ ܐܲܝܟܵܐ ܝ݇ܠܹܗ ܡܵܪܝ ܝܲܥܩܘܿܒ̣ ܒܓܸܢܣܹܗ؟ ܘܠܹܐ ܗ݇ܘܼܵܐ ܒܣܵܡܹܗ ܕܡܲܕܸܥܠܗ݇ܘܿܢ: ܐܝܼܢܵܐ ܟܲܕ ܗ݇ܘܹܐܠܹܗ ܝܵܘܡܵܐ ܕܚܲܕܒܫܲܒܵܐ: ܐ݇ܬܹܐܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܥܲܡ ܕܐܵܢܝܼ ܐܲܚܘܿܢܘܵܬܹ̈ܐ ܝ݇ܕܸܥܝܹ̈ܐ ܡ̣ܢ ܓ̰ܵܡܵܥܲܬܹܗ: ܕܪܹܐܠܗ݇ܘܿܢ ܫܠܵܡܵܐ ܠܐܲܦܸܣܩܘܿܦܵܐ. ܐܝܼܢܵܐ ܒܥܕܵܢܵܐ ܕܥܒ̣ܸܪܘܿܢ ܝܼܗܘܵܐ ܨܲܦܪܵܐ ܒܝܵܘܡܵܐ ܕܚܲܕܒܫܲܒܵܐ: ܕܪܹܐܠܗ݇ܘܿܢ ܫܠܵܡܵܐ ܠܐܲܦܸܣܩܘܿܦܵܐ ܘܕܟܠܹܗ ܟܸܢܫܵܐ: ܫܘܼܪܹܐܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܫܵܟܘܿܪܹܐ ܠܐܲܠܵܗܵܐ ܕܡܘܼܩܸܡܠܹܗ ܠܥܹܕܬܹܗ ܚܲܕ݇ ܪܵܥܝܵܐ ܪܥܝܼܫܵܐ ܘܚܲܦܛܵܢܵܐ ܐܲܝܟܼ ܕܐܵܗܵܐ: ܟܲܕ ܐܵܡܸܪ ܗ݇ܘܼܵܐ ܠܟܠܹܗ ܟܸܢܫܵܐ ܕܡܕܝܼܢ݇ܬܵܐ: ܚܕܵܝܡܘܿܢ ܘܫܲܒܚܘܿܢ ܠܡܵܪܲܢ: ܕܩܲܡ ܡܲܚܫܸܚܠܵܗ̇ ܠܡܕܝܼܢ݇ܬܵܘܟ̣ܘܿܢ ܕܗܵܘܹܐ ܡܵܪܝ ܝܲܥܩܘܿܒ̣ ܒܝܼܘܼܗ̇ ܪܹܫܵܐ ܘܡܕܲܒܪܵܢܵܐ: ܕܝܼܗ݇ܘܼܵܐ ܓܸܢܣܹܗ ܘܐܘܼܓ̰ܵܓ̣ܹܗ ܡ̣ܢ ܐܘܼܓ̰ܵܓ̣ܹܗ ܕܩܲܕܝܼܫܵܐ ܡܵܪܝ ܝܲܥܩܘܿܒ̣ ܐܲܚܘܿܢܹܗ ܕܡܵܪܲܢ: ܗ̇ܘ ܕܗ݇ܘܹܐܠܹܗ ܐܲܦܸܣܩܘܿܦܵܐ ܓܵܘ ܐܘܿܪܸܫܠܸܡ ܒܝܵܘܡܵܢܹ̈ܐ ܕܫܠܝܼܚܹ̈ܐ ܩܲܕܝܼܫܹ̈ܐ: ܐܝܼܢܵܐ ܐܵܗܵܐ ܝ݇ܕܸܥܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܡ̣ܢ ܓܸܠܝܵܢܵܐ ܕܪܘܼܚܵܐ ܕܩܲܕܝܼܫܵܐ ܗ݇ܘܼܵܐ ܕܠܹܐ ܗ݇ܘܼܵܐ ܒܣܵܡܹܗ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܕܓܵܠܹܗ ܠܵܗ̇ ܓܵܢܹܗ: ܕܠܵܐ ܗܵܘܝܵܐ ܣܵܒܵܒ ܫܘܼܒ̣ܗܵܪܵܐ ܐܸܠܹܗ.
ܐܝܼܢܵܐ ܟܠܹܗ ܓ̰ܵܡܵܥܲܬ ܕܡܕܝܼܢ݇ܬܵܐ ܒܸܚܕܵܝܵܐ ܗ݇ܘܼܵܐ ܘܫܵܒܘܼܚܹܐ ܠܐܲܠܵܗܵܐ ܕܡܘܼܚܫܸܚܵܝܠܹܗ ܠܚܲܠܥܵܬ ܓܘܼܪܬܵܐ ܐܲܝܟܼ ܕܐܵܗܵܐ. ܐܝܼܢܵܐ ܒܘܼܫ ܙܵܘܕܵܐ ܒܸܚܕܵܝܵܐ ܗ݇ܘܼܵܘ: ܕܝܘܼܗ݇ܒ̣ܵܝܠܹܗ ܡܵܪܲܢ: ܕܗܵܘܹܐ ܥܘܼܡܪܵܐ ܕܐܲܚܘܿܢܘܵܬܹ̈ܐ ܩܲܕܝܼܫܹ̈ܐ ܠܩܲܪܝܼܒܘܼܬܵܐ ܕܡܕܝܼܢ݇ܬܲܝܗܝ: ܘܐܝܼܬܠܗ݇ܘܿܢ ܪܹܫܵܐ ܐܲܝܟܼ ܐܵܗܵܐ ܣܵܒ̣ܵܐ ܒܪܝܼ̣ܟ̣ܵܐ: ܕܩܸܢܝܵܐ ܝ݇ܠܹܗ ܠܸܒܵܢܘܼܬܵܐ ܥܲܡ ܡܵܪܹܗ ܐܲܝܟܼ ܦܲܛܪܘܿܣ ܘܦܵܘܠܘܿܣ ܫܠܝܼܚܹ̈ܐ: ܣܵܒܵܒ ܐܲܫܟܵܪܵܐ ܒܸܥܒ̣ܸܕܵܐ ܗ݇ܘܼܵܐ ܥܵܓ̰ܝܼܒܘܼܝܵܬܹ̈ܐ ܩܲܕܝܼܫܵܐ ܡܵܪܝ ܐܵܘܓܹܝܢ ܐܲܝܟܼ ܫܠܝܼܚܹ̈ܐ ܩܲܕܝܼܫܹ̈ܐ ܘܐܲܠܵܗܵܝܹ̈ܐ ܟܲܕ ܠܹܐ ܗ݇ܘܼܵܐ ܛܵܫܘܼܝܹܐ ܠܚܲܠܥܵܬ ܕܝܘܼܗ݇ܒ̣ܵܠܹܗ ܐܸܠܹܗ ܡܵܪܹܗ. ܐܝܼܢܵܐ ܐܝܼܬ ܗ݇ܘܼܵܐ ܚܲܕ݇ ܐ݇ܢܵܫܵܐ ܕܸܪܝܵܐ ܗ݇ܘܼܵܐ ܓܵܘ ܐܵܘܵܢܵܐ ܕܥܹܕܬܵܐ ܚܲܡܫܲܥܣܲܪ ܫܸܢܹ̈ܐ: ܘܫܦܝܼܠܹ̈ܐ ܗ݇ܘܼܵܘ ܟܠܲܝܗܝ ܗܲܕܵܡ̈ܘܼܗܝ. ܘܒܥܕܵܢܵܐ ܕܒܹܐܙܵܠܵܐ ܝܼܗ݇ܘܼܵܘ ܡܵܪܝ ܝܲܥܩܘܿܒ̣ ܘܡܵܪܝ ܐܵܘܓܹܝܢ ܠܚܸܠܡܲܬ ܕܐ݇ܪ̈ܵܙܹܐ ܩܲܕܝܼܫܹ̈ܐ: ܚܙܹܐܠܗ݇ܘܿܢ ܠܐܵܗܵܐ ܐ݇ܢܵܫܵܐ: ܝܘܼܗ݇ܒ̣ܸܠܹܗ ܦܣܵܣܵܐ ܡܵܪܝ ܐܵܘܓܹܝܢ ܠܡܵܪܝ ܝܲܥܩܘܿܒ̣ ܟܲܕ ܒܹܐܡܵܪܵܐ: ܕܡܲܩܪܸܒ̣ ܨܠܘܿܬܵܐ ܒܘܼܬ ܕܐܵܗܵܐ ܩܵܪܝܼܒܵܝܵܐ. ܒܓ̰ܲܠܕܘܼܬܵܐ ܦܘܼܩܸܕܠܹܐ ܠܡܫܲܡܫܵܢܵܐ ܕܡܲܩܝܼܡ ܫܠܵܡܵܐ: ܘܡܘܼܩܸܡܠܗ݇ܘܿܢ ܠܛܵܝܸܦܵܐ: ܒܪܸܟܠܗ݇ܘܿܢ ܬܸܪ̈ܘܲܝ ܒܨܠܘܿܬܵܐ: ܘܛܠܸܒܠܗ݇ܘܿܢ ܡ̣ܢ ܡܵܪܲܢ ܕܒܲܣܸܡܠܹܗ ܗ̇ܘ ܐ݇ܢܵܫܵܐ: ܕܦܵܐܸܫ ܚܩܝܼܪܵܐ ܡܵܪܲܢ ܒܐܵܗܵܐ ܡܕܝܼܢ݇ܬܵܐ ܒܲܝܢܵܬ ܚܲܢܦܹ̈ܐ ܘܝܼܗܘܼܕܵܝܹ̈ܐ. ܘܕܝܵܕܥܝܼ ܕܐܲܢ݇ܬܿ ܝ݇ܘܸܬܿ ܚܲܝܠܵܢܵܐ ܘܠܵܐ ܚܲܕ݇ ܐ݇ܚܹܪ݇ܢܵܐ. ܐܘܼܦ ܕܗܲܝܡܸܢܝܼ ܒܫܸܡܵܐ ܕܒܪܘܿܢܘܼܟܼ ܝܼܚܝܼܕܵܝܵܐ ܡܵܪܲܢ ܝܼܫܘܿܥ ܡܫܝܼܚܵܐ. ܕܦܠܸܚܠܹܗ ܒܐܝܼܕܵܐ ܕܫܠܝܼܚ̈ܘܼܟܼ ܩܲܕܝܼܫܹ̈ܐ ܒܬܲܪܥܵܐ ܕܗܲܝܟܠܵܐ ܓܵܘ ܐܘܿܪܸܫܠܸܡ: ܥܒ̣ܘܿܕ ܐܘܼܦ ܐܵܕܝܼܵܐ ܡܵܪܝܼ ܒܐܝܼܕܵܐ ܕܪܹ̈ܓܵܘܵܬܘܼܟܼ ܙܲܒܘܼܢܹ̈ܐ ܓܵܘ ܕܐܵܗܵܐ ܡܕܝܼܢ݇ܬܵܐ. ܕܦܵܐܸܫ ܡܘܼܟܪܸܙܵܐ ܒܝܼܘܼܗ̇ ܫܸܡܘܼܟܼ ܩܲܕܝܼܫܵܐ: ܘܦܵܐܸܫ ܪܝܼܡܵܐ ܚܲܝܠܹܗ ܕܨܠܝܼܒ̣ܘܼܟܼ. ܕܵܐܟ̣ܝܼ ܕܬܵܡܵܐ ܗ݇ܘܹܐܠܹܗ ܢܝܼܫܲܢܩܵܐ ܝ݇ܕܸܥܝܵܐ ܘܐܲܫܟܵܪܵܐ ܒܐܝܼܕܵܐ ܕܫܠܝܼܚ̈ܘܼܟܼ ܩܲܕܝܼܫܹ̈ܐ ܨܸܦܝܹ̈ܐ: ܦܝܼܫܠܹܗ ܟ̰ܥܝܼܡܵܐ ܦܘܼܡܹ̈ܐ ܕܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܒܥܕܵܢܵܐ ܕܦܲܟ̰ܦܘܼܟ̰ـܹܐ ܗ݇ܘܼܵܘ ܚܲܕ݇ ܥܲܡ ܕܗ̇ܘ ܐ݇ܚܹܪ݇ܢܵܐ: ܣܵܒܵܒ ܗ̇ܘ ܢܝܼܫܲܢܩܵܐ ܝ݇ܕܸܥܝܵܐ ܘܐܲܫܟܵܪܵܐ ܕܗ݇ܘܹܐܠܹܗ ܒܐܝܼܕܲܝܗܝ: ܦܝܼܫܠܵܗ̇ ܝ݇ܕܥܝܼܬܵܐ ܠܟܠܵܗ̇ ܡܕܝܼܢ݇ܬܵܐ ܕܐܘܿܪܫܠܸܡ: ܘܠܵܐ ܡܨܹܐܠܲܢ ܕܟܵܠܲܚ ܕܲܪܩܘܼܒ̣ܠ ܕܐܵܗܵܐ. ܘܝܼܗܘܼܕܵܝܹ̈ܐ ܒܸܢܚܵܦܵܐ ܗ݇ܘܼܵܘ: ܘܡܲܫܚܲܕܬܘܼܟܼ ܓܲܪܘܘܼܣܹܐ ܗ݇ܘܼܵܐ. ܗ̇ܝ ܐܘܼܦ ܐܵܕܝܼܵܐ ܡܵܪܝܼ ܒܸܬ ܦܵܠܸܚ ܚܲܝܠܹܗ ܕܨܠܝܼܒ̣ܘܼܟܼ ܙܲܟܵܝܵܐ: ܠܚܸܩܪܵܐ ܕܫܸܡܘܼܟܼ: ܘܠܪܝܵܡܬܵܐ ܕܪܹܫܵܐ ܕܛܵܝܸܦܘܼܟܼ. ܘܠܫܘܼܒ̣ܗܵܪܵܐ ܕܥܹܕܬܘܼܟܼ ܩܲܕܝܼܫܬܵܐ. ܘܟܲܕ ܬܘܼܡܸܡܠܗ݇ܘܿܢ ܨܠܘܿܬܲܝܗܝ ܘܩܸܡܠܗ݇ܘܿܢ: ܐ݇ܡܸܪܹܗ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܠܡܵܪܝ ܐܵܘܓܹܝܢ: ܩܲܪܒܸܢ ܘܪܫܘܿܡ ܢܝܼܫܲܢܩܵܐ ܕܨܠܝܼܒ̣ܵܐ ܥܲܠ ܟܠܲܝܗܝ ܗܲܕܵܡ̈ܘܼܗܝ ܐܝܼܢܵܐ ܐܵܗܵܐ ܩܲܕܝܼܫܵܐ ܒܸܕܪܵܫܵܐ ܗ݇ܘܼܵܐ: ܒܹܐܡܵܪܵܐ ܐܲܢ݇ܬܿ ܫܲܪܝܼ ܩܲܕ݇ܡܵܝܬܵܐ ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܡܘܼܣܒ̣ܸܥܠܹܗ ܚܝܼܵܠܹܗ ܟܲܕ ܒܹܐܡܵܪܵܐ ܕܐܲܢ݇ܬܿ ܕܒ̣ܘܿܩܠܹܗ ܒܐܝܼܕܹܗ ܕܝܲܡܝܼܢܵܐ: ܘܐܵܢܵܐ ܒܸܬ ܕܲܒ̣ܩܸܢ ܒܐܝܼܕܹܗ ܕܣܸܡܵܠܵܐ: ܗܵܝܓܵܗ ܩܘܼܪܒܸܢܘܿܢ ܬܸܪ̈ܘܲܝ ܩܲܕܝܼܫܹ̈ܐ: ܕܒ̣ܸܩܠܗ݇ܘܿܢ ܚܲܕ݇ ܡ̣ܢ ܐܵܗܵܐ ܓܹܒܵܐ ܘܚܲܕ݇ ܡ̣ܢ ܐܵܗܵܐ ܓܹܒܵܐ: ܘܪܫܸܡܠܗ݇ܘܿܢ ܢܝܼܫܲܢܩܵܐ ܕܨܠܝܼܒ̣ܵܐ. ܘܕܒ̣ܝܼܩܠܗ݇ܘܿܢ ܒܝܼـܹܗ ܟܲܕ ܒܹܐܡܵܪܵܐ: ܐ݇ܢܵܫܵܐ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܩܘܼܡ݇ ܚܕܘܿܪ. ܘܗܲܪ ܒܗ̇ܝ ܣܵܥܲܬ ܡܬܸܚܠܹܗ ܗܲܕܵܡ̈ܘܼܗܝ: ܘܫܵܦܵܩܲܬ ܠܒ̣ܸܫܠܵܗ̇ ܠܟܠܹܗ ܓܘܼܫܡܹܗ: ܘܫܘܸܪܹܗ ܘܩܸܡܠܹܗ ܥܲܠ ܐܲܩܠܵܬ̈ܘܼܗܝ. ܘܦܘܼܫܸܛܠܹܗ ܐܝܼܕܵܬ̈ܘܼܗܝ ܠܫܡܲܝܵܐ: ܘܡܫܵܒܘܼܚܹܐ ܗ݇ܘܼܵܐ ܠܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܐܝܼܢܵܐ ܛܵܝܸܦܵܐ ܟܲܕ ܚܙܹܐܠܗ݇ܘܿܢ: ܢܦܸܠܗ݇ܘܿܢ ܥܲܠ ܦܲܐܬܘܵܬܲܝ̈ܗܝ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܹ̈ܐ. ܘܒܩܵܠܵܐ ܪܵܡܵܐ ܡܫܲܒܚܝܼ ܗ݇ܘܼܵܘ ܠܐܲܠܵܗܵܐ ܘܐܵܡܪܝܼ: ܫܘܼܒ̣ܚܵܐ ܐܸܠܘܼܟܼ ܡܫܝܼܚܵܐ: ܕܒܟܠ ܥܕܵܢܵܐ ܟܹܐ ܥܵܒ̣ܕܸܬܿ ܠܥܹܕܬܘܼܟܼ ܒܝܼܲܕ ܚܲܝܠܹ̈ܐ ܥܲܓ̰ܒܵܢܹ̈ܐ ܘܒܓܲܢ݇ܒܵܪ̈ܘܼܝܵܬܹܐ ܕܒܸܦܠܵܚܵܐ ܝ݇ܘܸܬܿ ܒܐܝܼܕܵܐ ܕܩܲܕܝܼܫ̈ܘܼܟܼ. ܘܗܵܐ ܐܘܼܦ ܐܵܕܝܼܵܐ ܡܘܼܪܡܵܠܘܼܟܼ ܒܐܝܼܕܵܐ ܕܐܵܢܝܼ ܩܲܕܝܼܫܹ̈ܐ: ܫܵܟܘܿܪܹܐ ܝ݇ܘܲܚ ܐܸܠܘܼܟܼ: ܕܚܲܙܢܵܐ ܨܦܵܝܝܼ ܘܠܹܐ ܐܵܬܝܵܐ ܠܡܗܲܡܙܘܼܡܹܐ ܝܘܼܗ݇ܒ̣ܸܠܘܼܟܼ ܠܡܕܝܼܢ݇ܬܲܢ: ܕܒܝܼܘܼܗ̇ ܦܵܝܫܵܐ ܢܛܝܼܪܬܵܐ ܗܲܠ ܐܵܒܲܕ ܐܲܒܵܕܝܼܢ: ܐܵܡܹܝܢ. ܗܵܝܓܵܗ ܦܘܼܩܸܕܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܠܗ̇ܘ ܐ݇ܢܵܫܵܐ: ܕܫܵܩܸܠ ܠܒ̣ܸܫܬܹܗ ܘܕܵܪܹܐܠܵܗ̇ ܥܲܠ ܪܘܼܦ̮ܫܹܗ. ܘܫܩܸܠܹܗ ܘܠܒ̣ܝܼܫܵܠܹܗ ܘܐ݇ܣܸܪܹܗ ܬܲܣܡܵܐ ܕܚܵܨܹܗ: ܘܫܘܼܪܹܐܠܹܗ ܒܸܚܕܵܪܵܐ ܓܵܘ ܡܕܝܼܢ݇ܬܵܐ. ܘܡܲܟܪܘܼܙܹܐ ܚܲܝܠܹܗ ܕܐܲܠܵܗܵܐ: ܕܒܐܝܼܕܵܐ ܕܪܹ̈ܓܵܘܵܬܘܼܗܝ ܦܝܼܫܠܹܗ ܚܸܙܝܵܐ. ܐܝܼܢܵܐ ܝܼܗܘܼܕܵܝܹ̈ܐ ܒܥܕܵܢܵܐ ܕܫܡܸܥܠܗ݇ܘܿܢ ܐܲܢܹ̈ܐ ܡܸܢܲܝܗܝ ܥܲܓ̰ܒܝܼ ܗ݇ܘܼܵܘ ܥܲܠ ܡܸܢܕܝܼ ܕܥܒ̣ܸܕܠܗ݇ܘܿܢ ܐܵܢܝܼ ܩܲܕܝܼܫܹ̈ܐ ܒܫܸܡܹܗ ܕܝܼܫܘܿܥ ܢܵܨܪܵܝܵܐ: ܐܝܼܢܵܐ ܡܸܢܲܝܗܝ ܡܲܣܚܘܼܪܹܐ ܗ݇ܘܼܵܘ ܘܒܹܐܡܵܪܵܐ: ܕܐܵܗܵܐ ܠܹܐ ܝ݇ܠܵܗ̇ ܫܪܵܪܵܐ ܕܫܦܝܼܠܵܐ ܗ݇ܘܼܵܐ.
ܘܐܝܼܬ ܗ݇ܘܼܵܐ ܚܲܕ݇ ܐ݇ܢܵܫܵܐ [ܚܲܢܦܵܐ]: ܡ̣ܢ ܬܵܘܕܝܼܬܹܗ ܕܡܲܪܩܝܼܘܿܢ ܠܝܼܛܵܐ ܗ݇ܘܼܵܐ: ܐܵܗܵܐ ܪܵܒܵܐ ܡܸܚܝܵܐ ܗ݇ܘܼܵܐ ܕܲܪܩܘܼܒ̣ܠ ܛܵܝܸܦܵܐ ܕܟܪܸ̈ܣܛܝܵܢܹܐ. ܘܒܓܸܢܣܹܗ ܝܼܗܘܼܵܐ ܡ̣ܢ ܐܲܬܪܵܐ ܕܦܵܢܛܘܿܣ: ܘܚܲܕ݇ ܐ݇ܢܵܫܵܐ ܝ݇ܕܸܥܝܵܐ ܗ݇ܘܼܵܐ ܓܵܘ ܡܲܠܟܘܼܬܵܐ ܕܪ̈ܗܘܿܡܵܝܹܐ. ܘܐܵܚܘܿܢܹܗ ܕܐܵܗܵܐ ܝܼܗܘܵܐ ܗܵܟܸܡ ܕܡܕܝܼܢ݇ܬܵܐ. ܘܡ̣ܢ ܩܵܕ݇ܡ ܕܗܵܘܹܐ ܗ݇ܘܼܵܐ ܗܵܟܸܡ: ܡܲܠܟܵܐ ܩܘܼܣܛܲܢܛܝܼܢܘܿܣ ܦܲܪܦܘܼܠܹܐ ܗ݇ܘܼܵܐ ܒܝܼـܹܗ: ܕܥܡܘܿܕ ܘܗܘܝܼ ܟܪܸܣܛܝܵܢܵܐ. ܘܥܡܸܕܠܹܗ ܒܘܼܬ ܚܵܬܸܪ ܦܲܪܦܲܠܬܵܐ ܕܡܲܠܟܵܐ. ܐܝܼܢܵܐ ܟܲܕ ܗܵܠܵܐ ܠܸܒܹܗ ܝܑܼܗܘܼܵܐ ܒܵܬ݇ܪ ܡܲܪܩܝܼܘܿܢ: ܘܐܲܚܘܿܢܹܗ ܕܐܝܼܬ ܗ݇ܘܼܵܐ ܠܹܗ ܚܲܕ݇ ܓܸܦܝܼܬܵܐ ܓܵܘ ܒܲܝܬܹܗ: ܕܒ̣ܝܼܩܵܐ ܗ݇ܘܼܵܐ ܓܵܘܵܗ̇ ܟܘܼܡܪܹ̈ܐ [ܟܵܗܢܹ̈ܐ] ܕܡܲܪܩܝܼܘܿܢ: ܐܵܢܝܼ ܕܟܹܐ ܦܵܝܫܝܼ ܩܸܪ̈ܝܹܐ ܩܲܫܝܼܫܹ̈ܐ ܘܡܫܲܡܫܵܢܹ̈ܐ: ܪܵܒܵܐ ܟܹܐ ܡܗܲܝܡܸܢ ܗ݇ܘܼܵܐ ܒܚܸܪ̈ܫܲܝܗܝ. ܒܘܼܬ ܕܐܵܗܵܐ ܣܵܒܵܒ ܠܵܐ ܐ݇ܙܸܠܹܗ ܕܦܵܐܸܫ ܚܸܙܝܵܐ ܩܵܕ݇ܡ ܡܲܠܟܵܐ: ܟܡܵܐ ܦܲܪܦܘܼܠܹܗ ܗ݇ܘܼܵܐ ܒܝܼـܹܗ ܕܗܵܘܹܐ ܟܪܸܣܛܝܵܢܵܐ. ܘܐܵܗܵܐ ܐܝܼܬ ܗ݇ܘܼܵܐܠܹܗ ܚܲܕ݇ ܒܪܘܿܢܵܐ: ܦܟ̰ܝܼܠܹ̈ܐ ܗ݇ܘܼܵܘ ܐܝܼܕܵܬ̈ܘܼܗܝ ܘܐܲܩܠܵܬ̈ܘܼܗܝ ܡ̣ܢ ܟܵܪ݇ܣܵܗ̇ ܕܝܸܡܹܗ: ܘܒܪ̈ܝܼܙܹܐ ܗ݇ܘܼܵܘ ܗܲܕܵܡ̈ܘܼܗܝ ܗܲܠ ܠܒܸܪ̈ܟܵܟܘܼܗܝ. ܐܝܼܢܵܐ ܚܲܕ݇ ܝܵܠܕ݇ܐ ܗ݇ܘܼܵܐ ܫܲܦܝܼܪܵܐ: ܘܠܲܝܬ ܗ݇ܘܼܵܐ ܠܹܗ ܝܵܠܵܕ݇ܐ ܐ݇ܚܹܪ݇ܢܵܐ ܫܒ̣ܘܿܩ ܡܸܢܹܗ. ܐܝܼܢܵܐ ܐܵܗܵܐ ܒܥܕܵܢܵܐ ܕܫܡܸܥܠܹܗ ܒܘܼܬ ܕܐܵܗܵܐ ܥܵܓ̰ܝܼܒܘܼܬܵܐ ܕܦܝܼܫܠܵܗ̇ ܥܒ̣ܝܼܕܬܵܐ ܡ̣ܢ ܩܲܕܝܼܫܹ̈ܐ: ܛܠܸܒܠܹܗ ܡ̣ܢ ܕܗ̇ܘ ܐ݇ܢܵܫܵܐ ܕܦܝܼܫܠܹܗ ܒܣܝܼܡܵܐ ܒܗ̇ܝ ܣܵܥܲܬ. ܕܝܵܕܥܹܗ ܡܸܢܹܗ ܠܫܪܵܪܵܐ. ܐܝܼܢܵܐ ܗ̇ܘ ܟܲܕ ܥܒ̣ܸܪܹܗ ܩܵܕ݇ܡܘܼܗܝ: ܫܘܼܪܹܐܠܹܗ ܠܹܐܡܵܪܵܐ ܐܸܠܹܗ: ܩܵܕ݇ܡ ܒܢܘܿܢܹ̈ܐ ܕܒܲܝܬܹܗ ܘܩܵܕ݇ܡ ܟܠܲܝܗܝ ܡܲܪ̈ܩܝܘܿܢܹܐ ܐܵܢܝܼ ܕܓ̰ܸܡܥܝܹ̈ܐ ܗ݇ܘܼܵܘ ܓܵܘ ܒܲܝܬܹܗ: ܗܵܕܟ̣ܵܐ ܐܵܡܸܪ ܗ݇ܘܼܵܐ ܐܸܠܲܝܗܝ: ܚܲܡܫܲܥܣܲܪ ܫܢܹ̈ܐ ܐܵܗܵܐ ܡܲܪܥܵܐ ܐܝܼܬ ܗ݇ܘܼܵܐ ܠܝܼ. ܘܒܫܲܡܸܗ ܕܝܼܫܘܿܥ ܡܫܝܼܚܵܐ: ܘܒܢܝܼܫܲܢܩܵܐ ܕܨܠܝܼܒ̣ܵܐ: ܘܒܐܝܼܕܵܐ ܕܐܵܢܝܼ ܪܹ̈ܓܵܘܵܬܘܼܗܝ ܒܣܸܡܠܝܼ. ܩܸܡܠܹܗ ܚܲܕ݇ ܡ̣ܢ ܪ̈ܲܒܵܢܹܐ ܕܡܲܪ̈ܩܝܘܿܢܹܐ: ܕܫܸܡܹܗ ܝܼܗܘܼܵܐ ܡܲܪܩܝܼܘܿܢ: ܪܵܒܵܐ ܟܹܐ ܥܵܒ̣ܕܝܼ ܗ݇ܘܼܵܘ ܫܘܼܒ̣ܗܵܪܵܐ ܒܐܵܗܵܐ ܫܸܡܵܐ. ܐܝܼܢܵܐ ܪܹ̈ܫܲܝܗܝ ܓܸܪܥ݇ܝܵܐ ܗ݇ܘܼܵܐ: ܠܒ̣ܝܼܫܹ̈ܐ ܠܒ̣ܝܼܫܝܵܬܹ̈ܐ ܕܒܢܘܿܢܹ̈ܐ ܕܥܹܕܬܵܐ. ܕܦܵܝܫܝܼ ܚܸܙܝܹ̈ܐ ܒܠܒ̣ܸܫܬܵܐ ܕܦܹܐܪܹ̈ܐ ܘܕܙܲܕܝܼܩܹ̈ܐ: ܐܝܼܢܵܐ ܡ̣ܢ ܓܵܘܵܝ ܡܸܠܝܹ̈ܐ ܦܸܟ̰ܠܵܐ ܘܫܩܵܠܬܵܐ ܕܦܲܐܬܵܐ: ܘܕܹܐܒ̣̈ـܹܐ ܟ̰ܵܠܘܿܓ̰ܹ̈ܐ ܕܟܹܐ ܫܵܬܝܼ ܠܕܸܡܵܐ ܕܒܢܲܝ̈ܢܵܫܵܐ: ܘܒܸܪܚܵܛܵܐ ܝ݇ܢܵܐ ܒܵܬ݇ܪ ܦܸܠܚܵܢܵܢܹ̈ܐ ܕܒܢܲܝ̈ܢܵܫܵܐ ܠܛܘܼܠܩܵܢܵܐ ܥܲܡ ܓܘܼܪܲܝܗܝ ܣܵܛܵܢܵܐ. ܘܩܸܡܠܹܗ ܐܵܗܵܐ ܘܢܓ̰ܸܒ̣ܠܹܗ ܒܗ̇ܘ ܐ݇ܢܵܫܵܐ ܕܒܣܸܡܠܹܗ ܡ̣ܢ ܫܦܝܼܠܘܼܬܵܐ ܘܐ݇ܡܸܪܹܗ ܐܸܠܹܗ: ܠܵܐ ܗܵܐ ܟܪܸ̈ܣܛܝܵܢܹܐ ܩܲܡ ܡܲܠܦܝܼܠܘܼܟܼ ܐܵܗܵܐ ܐܘܼܪܚܵܐ ܟܲܕ ܠܹܐ ܝ݇ܘܸܬܿ ܗ݇ܘܼܵܐ ܫܦܝܼܠܵܐ؟ ܐܝܼܢܵܐ ܐܵܗܵܐ ܐ݇ܢܵܫܵܐ ܚܕܸܪܹܗ ܒܵܠܹܗ ܠܒܲܪܩܘܼܒ̣ܠܹܗ: ܘܪܫܸܡܠܹܗ ܥܲܠ ܓܵܢܹܗ ܢܝܼܫܲܢܩܵܐ ܕܨܠܝܼܒ̣ܵܐ: ܘܡܘܼܕܟ̣ܸܪܹܗ ܫܸܡܹܗ ܕܝܼܫܘܿܥ ܢܵܨܪܵܝܵܐ ܗ̇ܘ ܕܦܝܼܫܠܹܗ ܝ݇ܠܝܼܕܵܐ ܡ̣ܢ ܒܬܘܼܠܬܵܐ ܩܲܕܝܼܫܬܵܐ ܡܲܪܝܲܡ: ܘܐ݇ܡܸܪܹܗ ܒܲܪܩܘܼܒ̣ܠ ܕܡܲܪܩܝܼܘܿܢ ܚܲܪܵܫܵܐ: ܕܐܸܢ ܒܘܼܬ ܕܝܼܘܼܟܼ ܦܝܼܫܠܝܼ ܩܸܪܝܵܐ ܠܲܐܟ̣ܵܐ ܐܸܕܝܘܿܡ݇ ܝܵܘܡܵܐ: ܠܹܐ ܡܲܚܫܸܚܸܢ ܗ݇ܘܼܵܐ ܠܘܼܟܼ ܠܡܲܕܥܘܼܪܹܐ ܓ̰ܘܼܘܵܒ. ܐܝܼܢܵܐ ܡܣܵܒܵܒ ܕܟܹܐ ܝܵܕܥܸܢ ܘܒܵܠܲܕ ܝ݇ܘܸܢ ܕܚܲܕ݇ ܐ݇ܢܵܫܵܐ ܝ݇ܘܸܬܿ ܛܵܒ̣ܵܐ ܘܚܲܟܝܼܡܵܐ ܐܲܚܘܿܢܵܐ ܕܗܵܟܸܡ ܗ̇ܘ ܕܛܠܸܒܠܹܗ ܡܸܢܝܼ ܕܐܵܬܸܢ ܠܲܐܟ̣ܵܐ: ܘܕܝܵܕܥܹܗ ܡܸܢܝܼ ܠܫܪܵܪܵܐ: ܘܡ̣ܢ ܣܵܒܵܒ ܕܒܹܐܟ̣ܵܠܵܐ ܗ݇ܘܼܵܐ ܚܲܡ ܒܘܼܬ ܒܵܣܲܡܬܵܐ ܕܝܵܠܵܕ݇ܐ: ܕܚܵܙܹܐ ܚܲܝܠܹܗ ܕܐܲܠܵܗܵܐ ܒܐܝܼܕܵܬܹ̈ܐ ܕܩܲܕܝܼܫܹ̈ܐ: ܘܚܵܙܹܐ ܘܝܵܕܸܥ ܫܪܵܪܵܐ. ܕܵܐܟ̣ܝܼ ܕܐܲܚܢܲܢ ܒܝܼܕܲܥܝܵܐ ܝ݇ܘܲܚ: ܒܝܼܕܲܥܝܵܐ ܝ݇ܘܸܢ: ܗ̇ܘ ܒܸܬ ܫܵܒ̣ܸܩ ܠܕܵܓܵܠܘܼܬܵܘܟ̣ܘܿܢ ܘܚܸܠܛܘܼܢܝܵܘܟ̣ܘܿܢ: ܘܒܸܬ ܫܵܠܸܡ ܠܝܘܼܠܦܵܢܲܢ. ܘܒܸܬ ܪܲܚܩܸܢ ܡ̣ܢ ܥܲܝܢ̈ܘܼܗܝ ܚܸܫܟܵܐ ܕܚܸܠܛܘܼܢܝܵܐ. ܘܒܸܬ ܩܵܒܸܠ ܒܓܵܢܹܗ ܠܠܵܘܓ̰ܵܐ ܡ̣ܢ ܕܲܣܬܵܐ ܒܲܗܪܵܢܬܵܐ: ܕܦܝܼܫܠܹܗ ܓܸܠܝܵܐ ܒܥܕܵܢܵܬܹ̈ܐ ܐ݇ܚܵܪ̈ܵܝܹܐ: ܐܲܝܟܼ ܕܫܦܸܪܵܗ̇ ܐܸܠܹܗ: ܒܦܲܓ̣ܪܵܐ ܗ̇ܘ ܕܫܩܸܠܹܗ ܡ̣ܢ ܒܪܵܬܵܐ ܕܕܵܘܝܼܕ: ܘܐܵܗܵܐ ܗܕܝܼܪܵܐ ܝ݇ܠܹܗ ܕܛܵܪܸܕ ܠܚܸܠܛܘܼܢܝܵܘܟ̣ܘܿܢ.
ܘܒܗ̇ܝ ܥܕܵܢܵܐ ܡܘܼܕܸܥܪܹܗ ܦܲܐܬܹܗ ܡ̣ܢ ܠܟܸܣ ܗ̇ܘ ܚܲܪܵܫܵܐ: ܘܗܵܕܟ̣ܵܐ ܫܘܼܪܹܐܠܹܗ ܕܐܵܡܸܪ ܠܡܵܪܹܗ ܕܒܲܝܬܵܐ ܕܫܲܡܥܹܗ ܡܵܪܝ ܩܲܪܕܘܿܢ. ܗܵܕܟ̣ܵܐ ܦܝܵܫܵܐ ܗ݇ܘܼܵܐ ܩܸܪܝܵܐ ܗ̇ܘ ܐ݇ܢܵܫܵܐ ܐܲܚܘܿܢܹܗ ܕܗܵܟܸܡ: ܣܵܒܵܒ ܐܵܗܵܐ ܫܸܡܵܐ ܡܘܼܚܸܒܵܐ ܗ݇ܘܼܵܐ ܥܲܠܲܝܗܝ: ܕܗ̇ܘ ܝܗ݇ܘܼܵܐ ܪܹܫܵܐ ܓܘܼܪܵܐ ܕܚܸܠܛܘܼܢܝܲܝܗܝ: ܪܵܒܵܐ ܩܕܝܼܡܵܐ ܗ݇ܘܼܵܐ ܠܡܲܪܩܝܼܘܿܢ. ܓ̰ܘܼܘܸܒܠܹܗ ܘܐ݇ܡܸܪܹܗ ܠܩܲܪܕܘܿܢ ܘܟܠܲܝܗܝ ܒܢܲܝ̈ ܒܲܝܬܹܗ: ܐ݇ܡܸܪܹܗ: ܫܡܥܝܼ ܝܵܐ ܡܵܪܵܐ ܕܒܲܝܬܵܐ ܘܟܠܲܝܗܝ ܒܢܲܝ̈ ܒܲܝܬܵܐ. ܕܒܪܸܙܵܝܵܘܟ̣ܘܿܢ ܡܘܼܬ݇ܝܼܠܵܘܟ̣ܘܿܢ ܐܸܠܝܼ: ܕܐܘܼܦ ܓܵܘ ܒܲܝܬܵܘܟ̣ܘܿܢ ܡܘܼܟܪܸܙܠܹܗ ܚܲܝܠܹܗ ܕܡܵܪܲܢ ܕܒܝܼܝܼ ܦܝܼܫܠܹܗ ܚܸܙܝܵܐ: ܐܲܝܟܼ ܕܒܟܠܵܗ̇ ܡܕܝܼܢ݇ܬܵܐ ܡܘܼܟܪܸܙܠܝܼ ܕܐܵܢܵܐ ܝܑܼܘܸܢ ܕܒܫܪܵܪܵܐ ܗ̇ܝ ܕܐܘܼܦ ܠܹܐ ܝ݇ܠܵܗ̇ ܛܫܝܼܬܵܐ ܡ̣ܢ ܚܲܕ݇ܟܡܵܐ ܘܡ̣ܢ ܕܐܵܗܵܐ ܡܕܝܼܢ݇ܬܵܐ ܘܐܵܗܵܐ ܐܲܬܪܵܐ: ܕܦܝܼܫܠܝܼ ܩܘܼܒܠܵܐ ܒܥܕܵܢܵܐ ܕܩܲܡ ܚܵܙܹܐܠܝܼ ܪܘܼܦܝܵܐ ܝ݇ܘܸܢ ܗ݇ܘܼܵܐ ܥܲܠ ܬܲܪܥܵܐ ܕܥܹܕܬܵܐ ܒܡܲܪܥܵܐ ܕܫܸܦܠܘܼܬܵܐ ܩܵܐ ܡܸܬܚܵܐ ܕܚܲܡܫܲܥܣܲܪ ܫܸܢܹ̈ܐ: ܐܲܝܟܼ ܕܡ̣ܢ ܩܲܕ݇ܡܵܝܬܵܐ ܐ݇ܡܸܪܝܼ ܐܸܠܵܘܟ̣ܘܿܢ. ܘܐܵܕܝܼܵܐ ܒܪܸܙܵܝܵܐ ܕܡܵܪܲܢ ܘܒܐܝܼܕܵܐ ܕܐܲܢܹ̈ܐ ܡܚܘܼܣܝܹ̈ܐ ܩܘܼܒܸܠܝܼ ܨܵܚܘܿܬܵܐ: ܕܵܐܟ̣ܝܼ ܕܚܙܹܐܠܵܘܟ̣ܘܿܢ ܐܸܠܝܼ. ܐܝܼܢܵܐ ܐܲܢ݇ܬܿ ܡܵܪܝ ܩܲܪܕܘܿܢ: ܐܸܢ ܗ̇ܘ ܕܗܲܝܡܸܢ ܒܫܸܡܹܗ ܕܡܫܝܼܚܵܐ: ܗ̇ܘ ܕܗܘܼܨܸܠܵܗ̇ ܒܬܘܼܠܬܵܐ ܩܲܕܝܼܫܬܵܐ ܡܲܪܝܲܡ: ܘܩܲܪܒܸܢܸܬܿ ܠܟܸܣ ܕܵܐܢܝܼ ܪܹ̈ܓܵܘܵܬܘܼܗܝ [ܩܲܕܝܼܫܹ̈ܐ]: ܘܗܲܝܡܸܢܸܬܿ ܠܟܵܪܘܿܙܘܼܬܲܝܗܝ: ܒܓ̰ܲܠܕܘܼܬܵܐ ܠܒܪܘܿܢܘܼܟܼ ܒܵܣܲܡܬܵܐ ܒܸܬ ܫܲܩܠܸܬܿ: ܘܓܵܢܘܼܟܼ ܒܸܬ ܡܲܩܘܸܬܿ ܒܗܲܝܡܵܢܘܼܬܵܐ: ܘܠܚܸܠܛܘܼܢܝܵܐ ܕܐܵܢܝܼ ܕܲܓܵܠܹ̈ܐ ܘܥܲܠܕܝܼܵܢܹ̈ܐ ܠܒ̣ܲܕܲܪ ܡܸܢܘܼܟܼ ܪܲܦܸܬܿ: ܘܒܚܲܕܘܼܬܵܐ ܓܘܼܪܬܵܐ ܪܘܼܫܡܵܐ ܕܡܲܥܡܘܿܕܝܼܬܵܐ ܩܲܒܠܸܬܿ: ܘܒܸܬ ܗܵܘܹܝܬܿ ܚܲܕ݇ ܛܘܼܦ̮ܣܵܐ ܫܲܦܝܼܪܵܐ ܠܟܠܲܝܗܝ ܐܵܢܝܼ ܕܓܘܼܒܝܹ̈ܐ ܝ݇ܢܵܐ ܠܡܵܪܲܢ.
ܗܵܝܓܵܗ ܩܲܪܕܘܿܢ ܟܲܕ ܐܲܢܹ̈ܐ ܗܹܡܸܙܡܵܢܹ̈ܐ ܫܸܡܥܝܵܝܠܹܗ: ܚܲܕ݇ ܥܘܼܓ̰ܵܒܵܐ ܢܦܸܠܹܗ ܥܲܠܘܼܗܝ: ܘܚܲܕ݇ ܫܘܼܚܠܵܦܵܐ ܕܚܝܼܵܠ ܗ݇ܘܹܐܠܵܗ̇ ܐܸܠܹܗ: ܘܫܘܼܪܹܐܠܹܗ ܒܸܫܒ̣ܵܩܵܐ ܠܚܝܼܵܠܹܗ ܡ̣ܢ ܬܵܘܕܝܼܬܹܗ ܕܡܲܪܩܝܼܘܿܢ: ܡܘܼܫܬܵܪܝܼ ܗ݇ܘܼܵܐ ܘܡܲܚܘܼܒܹܐ ܕܫܲܡܥܹܗ ܠܡܲܫܚܲܕܬܹܗ ܕܡܫܝܼܚܵܐ. ܟܲܕ ܒܹܐܡܵܪܵܐ ܒܬܲܚܡܲܢܬܹܗ: ܐܲܢܹ̈ܐ ܐܸܢ ܕܠܵܐ ܗܵܘܹܐ ܚܲܕ݇ ܚܲܝܠܵܐ ܐܲܠܵܗܵܝܵܐ ܗ̇ܘ ܕܗܵܟܘܿܡܹܐ ܝ݇ܠܹܗ ܥܲܠ ܟܠ: ܠܹܐ ܡܵܨܝܵܐ ܕܦܵܝܫܝܼ ܥܒ̣ܝܼܕܹ̈ܐ. ܘܡܸܢ݇ܕܪܹܫ݇ ܢܝܼܫܲܢܩܵܐ ܕܐܲܫܟܵܪܵܐ ܗܵܘܝܵܐ ܐܸܠܝܼ: ܒܵܣܲܡܬܹܗ ܕܒܪܘܿܢܝܼ ܒܫܸܡܹܗ ܕܝܼܫܘܿܥ ܢܵܨܪܵܝܵܐ. ܗܵܝܓܵܗ ܐ݇ܡܸܪܹܗ ܐܸܠܹܗ ܡܲܪܩܝܼܘܿܢ ܚܲܪܵܫܵܐ: ܡܵܪܝܼ ܩܲܪܕܘܿܢ: ܩܵܡܘܿܕܝܼ ܦܬܵܠܵܐ ܝ݇ܠܹܗ ܠܸܒܘܼܟܼ ܡ̣ܢ ܡܲܪ̈ܩܝܼܘܿܢܵܝܹܐ؟ ܘܩܵܡܘܿܕܝܼ ܠܹܐ ܝ݇ܘܸܬܿ ܒܸܛܪܵܕܵܐ ܡ̣ܢ ܩܵܕ݇ܡܘܼܟܼ ܐܵܗܵܐ ܡܲܚܠܸܛܵܢܵܐ ܘܕܲܓܵܠܵܐ؟ ܐܝܼܢܵܐ ܩܲܪܕܘܿܢ ܫܥܸܫܠܹܗ ܪܹܫܹܗ ܚܲܕܟ̰ܵܐ: ܘܐ݇ܡܸܪܹܗ ܠܡܲܪܩܝܼܘܿܢ ܘܠܚܲܒ̣ܪ̈ܵܒ̣ܵܬܘܼܗܝ ܐܵܢܝܼ ܕܬܵܡܵܐ ܗ݇ܘܼܵܘ ܓ̰ܸܡܥܝܹ̈ܐ. ܗܲܠ ܐܵܕܝܼܵܐ ܠܹܐ ܝ݇ܘܸܢ ܒܝܼܕܲܥܝܵܐ ܐܸܢ ܐܵܗܵܐ ܦܝܵܫܵܐ ܝ݇ܠܵܗ̇ ܛܠܸܒܬܵܐ ܡܸܢܝܼ ܝܲܢ ܕܛܲܪܕܸܢܵܘܟ̣ܘܿܢ ܐܝܼܢܵܐ ܣܦܘܿܪܘܼܢ ܠܝܼ ܚܲܕ݇ܟ̰ܵܐ: ܗܲܠ ܕܨܲܚܨܸܢ ܘܦܲܪܡܸܢ ܠܫܪܵܪܵܐ: ܣܵܒܵܒ ܒܣܵܡܝܼ ܝ݇ܠܵܗ̇ ܕܝܵܕܥܸܢ ܠܫܪܵܪܵܐ ܘܒܸܬ ܫܵܪܸܢ ܕܗܵܘܸܢ ܢܘܼܟ̣ܪܵܝܵܐ ܠܗ̇ܘ ܕܝܑܼܠܹܗ ܕܲܓܵܠܵܐ. ܡܼܢ ܐܵܕܝܼܵܐ ܐܵܢܵܐ ܘܒܪܘܿܢܝܼ ܘܒܢܲܝ̈ ܒܲܝܬܝܼ ܒܸܬ ܐܵܙܲܠ݇ܚ ܠܥܹܕܬܵܐ: ܘܒܸܬ ܦܲܪܦܸܠܸܢ: ܕܡܲܕܸܥ ܠܝܼ ܐܸܕܝܘܿܡ݇ ܝܵܘܡܵܐ ܒܢܝܼܫܲܢܩܵܐ ܕܒܵܣܲܡܬܹܗ ܕܒܪܘܿܢܝܼ: ܕܐܵܗܵܐ ܝ݇ܠܹܗ ܐܲܠܵܗܵܐ ܕܫܪܵܪܵܐ.
ܘܗܲܪ ܒܗ̇ܝ ܣܵܥܲܬ ܩܸܡܠܹܗ ܩܲܪܕܘܿܢ ܥܲܡ ܚܲܒ̣ܪ̈ܵܘܵܬܘܼܗܝ ܘܪܹ̈ܓܵܘܵܬܘܼܝܗܝ ܘܟܠܲܝܗܝ ܒܢܲܝ̈ ܒܲܝܬܹܗ. ܘܐ݇ܙܸܠܗ݇ܘܿܢ ܠܥܹܕܬܵܐ: ܘܡܘܼܕܸܥܠܗ݇ܘܿܢ ܠܐܲܦܸܣܩܘܿܦܵܐ ܡܵܪܝ ܝܲܥܩܘܿܒ̣ ܘܠܩܲܕܝܼܫܵܐ ܡܵܪܝ ܐܵܘܓܹܝܢ: ܐ݇ܡܸܪܹܗ ܕܩܲܪܕܘܿܢ ܐܲܚܘܿܢܹܗ ܕܕܲܝܵܢܵܐ ܟܸܠܝܵܐ ܝ݇ܠܹܗ ܠܒ̣ܲܕܲܪ: ܘܒܣܵܡܵܐ ܝ݇ܠܵܗ̇ ܕܥܵܒ̣ܸܪ ܩܵܕ݇ܡܵܘܟ̣ܘܿܢ. ܐܝܼܢܵܐ ܐܲܢܹ̈ܐ ܦܘܼܩܸܕܠܗ݇ܘܿܢ ܐܸܠܹܗ ܕܥܵܒ̣ܸܪ. ܘܬܵܡܵܐ ܝܗ݇ܘܼܵܐ ܗܵܟܸܡ ܐܘܼܦ ܪܹ̈ܫܵܢܹܐ ܕܡܕܝܼܢ݇ܬܵܐ. ܐܝܼܢܵܐ ܐܵܗܵܐ ܩܲܪܕܘܿܢ ܥܒ̣ܸܪܹܗ ܘܟܠܹܐܠܹܗ ܩܵܕ݇ܡܲܝܗܝ: ܘܣܓ̣ܸܕܠܹܗ ܠܩܲܕܝܼܫܹ̈ܐ: ܘܢܫܸܩܠܹܗ ܐܝܼܕܵܬܲܝ̈ܗܝ ܘܐܲܩܠܵܬܲܝ̈ܗܝ. ܗ̇ܝ ܢܘܼܟ̣ܪܵܝܬܵܐ ܗ݇ܘܼܵܐ ܠܥܵܕܲܬܹܗ. ܘܡ̣ܢ ܒܵܬ݇ܪ ܕܝܼܘܗ݇ܒ̣ܸܠܹܗ ܫܠܵܡܵܐ ܠܩܕܝܼܫܹ̈ܐ ܘܠܟܠܲܝܗܝ ܟܸܢܫܵܐ: ܘܐ݇ܣܸܪܹܗ ܐܝܼܕܵܬ̈ܘܼܗܝ ܘܟܠܹܐܠܹܗ ܥܲܠ ܐܲܩܠܵܬ̈ܘܼܗܝ: ܟܲܕ ܒܹܐܡܵܪܵܐ ܒܩܵܠܵܐ ܪܵܡܵܐ: ܕܐܵܢܵܐ ܝܵܐ ܡܵܪ̈ܵܘܵܬܝܼ: ܐܲܝܟܼ ܒܬܲܚܡܵܢܝܵܬ̈ܝܼ ܕܗܲܠ ܐܵܕܝܼܵܐ ܕܒܫܪܵܪܵܐ ܕܒ̣ܝܼܩܵܐ ܝ݇ܘܸܢ ܗ݇ܘܼܵܐ: ܘܒܸܚܫܵܒ̣ܵܐ ܝ݇ܘܸܢ ܗ݇ܘܼܵܐ ܕܠܹܐ ܝ݇ܘܸܢ ܒܚܸܠܛܘܼܢܝܵܐ: ܘܟܹܐ ܚܲܫܒ̣ܸܢ ܗ݇ܘܼܵܐ ܕܗܲܝܡܵܢܘܼܬܵܐ ܕܡܲܪܩܝܼܘܿܢ ܕܗ̇ܝ ܝܑܼܠܵܗ̇ ܫܲܪܝܼܪܬܵܐ: ܘܪܵܒܵܐ ܓܵܗܹ̈ܐ ܐܘܼܦ ܡ̣ܢ ܐܝܼܩܵܪܵܐ ܕܡܲܠܟܘܼܬܝܼ ܦܝܼܫܠܝܼ ܡܘܼܟܠܝܼܵܐ: ܕܠܵܐ ܗܵܘܸܢ ܡܘܼܣܒ̣ܸܥܝܵܐ ܒܚܝܼܵܠ ܕܢܘܼܟ̣ܪܵܝܵܐ ܥܲܠ ܕܐܵܗܵܐ ܬܵܘܕܝܼܬܵܐ: ܟܲܕ ܒܩܝܼܪܵܬ ܘܙܕܥܘܿܬܵܐ ܕܐܲܠܵܗܵܐ ܥܒ̣ܝܼܕܵܐ ܠܝܼ. ܐܝܼܢܵܐ ܐܵܕܝܼܵܐ ܬܲܚܡܲܢܝܵܬܹ̈ܐ ܢܦܸܠܗ݇ܘܿܢ ܒܫܘܼܚܠܵܦܵܐ: ܐܲܝܟܼ ܒܲܝܢܵܬ ܬܪܹܝܢ ܫܒ̣ܝܼܠܹ̈ܐ ܒܹܝܦܲܠܓܵܐ ܟܸܠܝܵܐ ܝ݇ܘܸܢ. ܘܐܲܝܢܝܼ ܡܸܢܲܝܗܝ ܝ݇ܠܵܗ̇ ܐܘܼܪܚܵܐ ܕܫܪܵܪܵܐ: ܠܹܐ ܝ݇ܘܸܢ ܒܝܼܕܲܥܝܵܐ. ܘܡܸܢ݇ܕܪܹܫ݇ ܒܢܝܼܫܲܢܩܵܐ ܕܒܵܣܲܡܬܹܗ ܕܐܵܗܵܐ ܐ݇ܢܵܫܵܐ: ܐܝܼܢܵܐ ܐܵܕܝܼܵܐ ܚܝܼܵܠ̈ܝܼ ܢܦܸܠܗ݇ܘܿܢ ܒܫܘܼܚܠܵܦܹ̈ܐ: ܦܘܼܪܦܸܠܝܼ ܒܓܵܢܝܼ ܘܐ݇ܡܸܪܝܼ: ܕܝܑܼܠܹܗ ܩܵܬܵܟ̣ܝ ܒܵܣܲܡܬܹܗ ܕܐܵܗܵܐ ܝܵܠܵܕ݇ܐ ܚܲܕ݇ ܢܝܼܫܲܢܩܵܐ ܕܫܲܪܝܼܪܘܼܬܵܐ: ܘܦܘܼܪܦܸܠܝܼ ܒܐܲܠܵܗܵܐ ܒܚܝܼܵܠܝܼ ܟܲܕ ܒܹܐܡܵܪܵܐ ܝ݇ܘܸܢ ܗ݇ܘܼܵܐ ܝܵܐ ܐܲܠܵܗܵܐ ܛܵܒ̣ܵܐ ܘܡܪܲܚܡܵܢܵܐ: ܗ̇ܘ ܕܟܹܐ ܒܲܣܡܵܠܘܼܟܼ ܒܚܲܝܹ̈ܐ ܕܒܲܪܢܵܫܵܐ: ܐܲܢ݇ܬܿ ܡܲܚܙܝܼ ܠܝܼ ܫܪܵܪܵܐ ܕܗܲܝܡܵܢܘܼܬܵܐ. ܘܡܲܕܸܥܠܝܼ ܒܒܵܣܲܡܬܵܐ ܕܒܪܘܿܢܝܼ: ܐܲܝܢܝܼ ܝ݇ܠܵܗ̇ ܬܵܘܕܝܼܬܵܐ ܫܲܪܝܼܪܬܵܐ: ܕܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܦܝܼܫܠܵܗ̇ ܡܘܼܟܪܸܙܬܵܐ. ܝܲܢ ܐܸܢ ܗ̇ܝ ܕܡܘܼܟܪܸܙܠܹܗ ܩܲܪܕܘܿܢ: ܘܡܲܪܩܝܼܘܿܢ ܡ̣ܢ ܒܵܬ݇ܪܹܗ: ܘܠܵܐ ܠܒ̣ܸܫܠܹܗ ܦܲܓ̣ܪܵܐ: ܘܠܵܐ ܦܝܼܫܠܹܗ ܝ݇ܠܝܼܕܵܐ ܡ̣ܢ ܡܲܪܝܲܡ: ܘܠܲܝܬ ܩܝܵܡܬܵܐ ܕܒܢܲܝ̈ܢܵܫܵܐ. ܘܝܲܢ ܐܸܢ ܐܵܗܵܐ ܕܡܲܟܪܘܿܙܹܐ ܝ݇ܢܵܐ ܢܵܨܪ̈ܵܝܹܐ: ܕܠܒ̣ܸܫܠܹܗ ܦܲܓ̣ܪܵܐ: ܘܦܝܼܫܠܹܗ ܝ݇ܠܝܼܕܵܐ ܡ̣ܢ ܡܲܪܝܲܡ: ܘܒܸܬ ܩܵܝܡܝܼ ܥܲܢܝܼܕܹ̈ܐ: ܒܘܼܬ ܕܐܵܗܵܐ ܐܲܝܟܼ ܠܵܐ ܝܵܕܘܿܥܵܐ: ܐܸܕܝܘܿܡ݇ ܝܵܘܡܵܐ ܒܹܝܦܲܠܓܵܐ ܕܐܲܢܹ̈ܐ ܫܸܟܘܼܝܵܬܹ̈ܐ ܪܘܼܦܝܵܐ ܝ݇ܘܸܢ: ܟܲܕ ܠܲܝܬ ܠܝܼ ܢܝܼܫܲܢܩܵܐ ܐ݇ܚܹܪ݇ܢܵܐ: ܕܒܝܼܘܼܗ ܝܵܕܥܸܢ ܠܗܲܝܡܵܢܘܼܬܵܐ ܫܲܪܝܼܪܬܵܐ: ܫܒ̣ܘܿܩ ܡ̣ܢ ܒܵܣܲܡܬܵܐ ܕܐܵܗܵܐ ܝܵܠܵܕ݇ܐ. ܘܐܲܝܢܝܼ ܡܸܢܲܝܗܝ ܕܐܝܼܠܹܗ ܐܲܠܵܗܵܐ ܫܲܪܝܼܪܵܐ: ܕܒܐܝܼܕܵܐ ܕܪܹ̈ܓܵܘܵܬܘܼܗܝ ܦܝܵܫܵܐ ܝ݇ܠܹܗ ܚܸܙܝܵܐ ܒܵܣܲܡܬܵܐ ܕܗܲܕܵܡܹ̈ܐ ܣܲܩܲܬܹ̈ܐ: ܕܝܵܕܥܸܢ ܐܘܼܦ ܐܵܢܵܐ ܕܗܲܝܡܸܢܸܢ: ܕܐܵܗܵܐ ܝ݇ܠܹܗ ܐܲܠܵܗܵܐ ܫܲܪܝܼܪܵܐ: ܕܐܝܼܬܠܹܗ ܗܘܼܟܡܵܐ ܕܡܵܚܹܐ ܘܒܵܣܸܡ: ܒܘܼܬ ܕܐܵܗܵܐ ܐܘܼܦ ܕܦܵܝܫܵܐ ܝ݇ܕܸܥܬܵܐ ܐܸܠܝܼ ܗܲܝܡܵܢܘܼܬܵܐ: ܒܘܼܬ ܕܐܵܢܝܼ ܕܗܘܹܐܠܗ݇ܘܿܢ ܠܒܪܘܿܢܝܼ. ܘܒܸܬ ܒܵܣܸܡܠܝܼ ܐܸܕܝܘܿܡ݇ ܝܵܘܡܵܐ ܒܓܵܢܝܼ ܘܒܦܲܓ̣ܪܝܼ: ܘܒܸܬ ܥܵܒ̣ܸܕܠܝܼ ܐܵܙܲܕ ܡ̣ܢ ܫܸܟܘܼܬܵܐ ܕܒܝܼـܹܗ ܕܸܪܝܵܐ ܝ݇ܘܸܢ: ܘܡܲܕܸܥܠܝܼ ܐܘܼܪܚܵܐ ܕܫܪܵܪܵܐ. ܘܗܵܐ ܡܲܪ̈ܩܝܘܿܢܹܐ [ܡܲܚܪܸ̈ܒ̣ܵܢܹܐ] ܕܥܲܡܝܼ ܓ̰ܸܡܥܝܹ̈ܐ ܝ݇ܢܵܐ ܟܲܕ ܒܸܕܪܵܫܵܐ ܝ݇ܢܵܐ ܘܦܲܪܦܘܼܠܹܐ ܒܝܼܝܼ: ܕܠܵܐ ܡܲܚܠܸܛܝܼܠܘܼܟܼ ܓܠܝܼܠܵܝܹ̈ܐ: ܘܗܲܝܡܸܢܸܬܿ ܒܗ̇ܘ ܕܦܝܼܫܠܹܗ ܝ݇ܠܝܼܕܵܐ ܡ̣ܢ ܡܲܪܝܲܡ. ܕܠܹܐ ܡܵܨܝܼ ܒܲܣܡܝܼ ܠܣܲܩܲܬܹ̈ܐ: ܘܐܲܢ݇ܬܿ ܠܵܐ ܚܲܠܛܸܬܿ ܒܵܬ݇ܪܲܝܗܝ.
ܗܵܝܓܵܗ ܓ̰ܘܼܘܸܒܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܩܵܕ݇ܡ ܐܲܦܸܣܩܘܿܦܵܐ ܘܩܵܕ݇ܡ ܟܠܹܗ ܟܸܢܫܵܐ ܘܐ݇ܡܸܪܹܗ ܐܸܠܹܗ: ܕܐܲܚܢܲܢ ܒܗܹܡܸܙܡܵܢܹ̈ܐ ܕܠܵܐ ܝܘܼܬܪܵܢܵܐ ܠܹܐ ܕܲܪܫܲܚ: ܐܸܠܵܐ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܗ̇ܘ ܕܒܝܼـܹܗ ܡܗܲܝܡܘܼܢܹܐ ܝ݇ܘܲܚ: ܗ̇ܘ ܕܦܝܼܫܠܹܗ ܝ݇ܠܝܼܕܵܐ ܡ̣ܢ ܒܬܘܼܠܬܵܐ ܡܲܪܝܲܡ ܒܲܪ݇ܬ ܕܵܘܝܼܕ: ܐܲܝܟܼ ܒܪܵܐ ܩܵܠܵܐ ܕܢܒ̣ܝܼ̈ـܹܐ ܩܲܕܝܼܫܹ̈ܐ: ܘܩܘܼܪܒܸܢܹܗ ܠܚܲܫܵܐ ܕܙܩܝܼܦܵܐ ܒܘܼܬ ܦܘܼܪܩܵܢܲܢ. ܘܥܒ̣ܸܪܹܗ ܠܫܝܘܿܠ: ܘܥܒ̣ܸܕܠܹܗ ܗܝܼܒ̣ܝܼ ܠܐܵܕܵܡ ܘܠܟܠܲܝܗܝ ܝܵـܠ̈ܘܼܕ݇ܗܝ. ܘܩܛܸܠܹܗ ܠܡܵܘܬܵܐ ܘܫܡܸܛܠܹܗ ܠܩܸܫܬܹܗ: ܘܣܠܸܒܠܹܗ ܠܚܲܙܢܹܗ ܘܡܘܼܕܸܥܪܹܗ ܣܠܵܒܵܐ ܕܒܹܝܬ ܐܵܕܵܡ. ܘܩܸܡܠܹܗ ܡ̣ܢ ܓܵܘܵܐ ܕܡܝܼܬܹ̈ܐ ܡ̣ܢ ܒܵܬ݇ܪ ܬܠܵܬ݇ܐ ܝܵܘܡܵܢܹ̈ܐ: ܘܡܘܼܩܸܡܠܹܗ ܥܲܡܹܗ ܟܠܹܗ ܟܝܵܢܲܢ. ܘܚܕܸܪܹܗ ܥܲܡ ܬܲܠܡܝܼܕ̈ܘܼܗܝ ܐܲܪ̈ܒܥܝܼܢ ܝܵܘܡܵܢܹ̈ܐ: ܟܲܕ ܐ݇ܡܸܪܹܗ ܐܸܠܲܝܗܝ: ܒܸܬ ܐܵܙܸܠ݇ܢ ܕܗܲܕܪܸܢ ܐܸܠܵܘܟ̣ܘܿܢ ܕܘܼܟܬܵܐ ܘܥܒ̣ܝܼܕܵܝܠܹܗ ܗܸܫܝܲܪ ܕܠܵܐ ܪܲܚܩܸܢܝܼ ܡ̣ܢ ܐܘܿܪܸܫܠܸܡ: ܗܲܠ ܕܩܲܒܠܝܼ ܪܘܼܚܵܐ ܕܩܘܼܕܫܵܐ. ܘܦܘܼܩܕܵܝܠܹܗ: ܘܐ݇ܡܸܪܹܗ ܐܸܠܲܝܗܝ ܦܠܘܿܛܘܼܢ ܘܬܲܠܡܸܕܘܼܢ ܠܟܠܲܝܗܝ ܛܵܝܸܦܹ̈ܐ ܘܡܲܥܡܸܕܘܼܢ ܠܗ݇ܘܿܢ ܒܫܸܡܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. ܘܟܠ ܕܡܗܲܝܡܸܢ ܘܥܵܡܸܕ ܒܸܬ ܚܵܝܹܐ: ܘܗ̇ܘ ܕܠܵܐ ܡܗܲܝܡܸܢ ܒܸܬ ܗܵܘܹܐ ܓܘܼܢܗܵܟܲܪ. ܘܟܲܕ ܒܸܬ ܡܲܕܥܸܢܘܿܢ ܢܝܼܫܲܢܩܹ̈ܐ ܠܐܵܢܝܼ ܕܡܗܲܝܡܸܢܝܼ ܒܝܼܝܼ ܐܵܢܝܼ ܕܬܲܒܥܝܼ ܐܸܠܝܼ: ܒܫܸܡܝܼ ܫܹܐܕܹ̈ܐ ܒܸܬ ܦܵܠܛܝܼ: ܘܓܲܢ݇ܒܵܪ̈ܘܼܝܵܬܹܐ ܘܚܲܝ̈ܠܹܐ ܥܲܓ̰ܒܵܢܹ̈ܐ ܒܸܬ ܥܵܒ̣ܕܝܼܢ: ܘܚܘܼܘܵܘܵܬܹ̈ܐ ܒܸܬ ܫܵܩܠܝܼ: ܐܸܢ ܣܲܡܵܐ ܕܡܵܘܬܵܐ ܫܵܬܝܼ ܒܫܸܡܝܼ ܠܹܐ ܚܲܙܕܸܓܝܼܠܗ݇ܘܿܢ. ܘܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܟܠ ܡܸܢܕܝܼ ܕܛܲܠܒܲܚ ܒܨܠܘܿܬܵܐ ܒܸܬ ܫܲܩܠܲܚ. ܘܒܝܼܲܕ ܚܲܝܠܵܐ ܕܪܘܼܚܵܐ ܩܲܕܝܼܫܵܐ ܘܒܗܲܝܡܵܢܘܼܬܵܐ ܕܫܸܡܹܗ: ܕܠܵܐ ܙܕܥܘܿܬܵܐ ܠܪܹܫܵܐ ܕܚܘܼܘܵܐ ܠܝܼܛܵܐ ܒܸܬ ܕܵܝܫܲܚ: ܐܘܼܦ ܙܹܐ ܨܲܠܡܢܝܵܬܹ̈ܐ ܕܚܲܪܵܫܘܼܬܵܘܟ̣ܘܿܢ ܒܚܲܝܠܵܐ ܓܘܼܪܵܐ ܕܨܠܝܼܒ̣ܵܐ ܒܸܬ ܫܵܪܲܚ ܘܒܸܬ ܒܲܛܠܲܚ: ܐܝܼܢܵܐ ܐܲܚܬܘܿܢ ܝܵܐ ܟܵܗܢܹ̈ܐ ܕܨܵܢܵܡ: ܐܸܢ ܐܵܗܵܐ ܕܐܝܼܬ ܒܝܼܵܘܟ̣ܘܿܢ ܗܲܝܡܵܢܘܼܬܵܐ: ܩܪܝܼܡܘܿܢ ܒܫܸܡܵܐ ܕܐܲܠܵܗܵܘܟ̣ܘܿܢ: ܘܡܲܚܙܝܼܡܘܿܢ ܒܫܪܵܪܵܐ ܦܸܠܚܵܢܵܐ ܕܗܲܝܡܵܢܘܼܬܵܘܟ̣ܘܿܢ: ܒܒܵܣܲܡܬܹܗ ܕܐܵܗܵܐ ܝܵܠܵܕ݇ܐ. ܐܝܼܢܵܐ ܐܸܢ ܠܵܐ: ܗ̇ܝ ܕܩܘܼܘܸܡܠܵܗ̇ ܠܣܝܼܡܘܿܢ ܚܲܪܵܫܵܐ ܒܪܗܘܿܡܹܐ: ܗܲܪ ܗ̇ܝ ܐܘܼܦ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ ܒܸܬ ܩܵܘܘܸܡܵܐ. ܐܝܼܢܵܐ ܐܲܚܢܲܢ ܡܗܲܝܡܘܼܢܹܐ ܝ݇ܘܲܚ: ܕܠܹܐ ܗ݇ܘܼܵܐ ܥܲܠ ܚܲܝܠܲܢ ܕܐܝܼܬ ܗ݇ܘܼܵܐ ܠܲܢ ܗܝܼܒ̣ܝܼ: ܐܝܼܢܵܐ ܥܲܠ ܡܵܪܲܢ ܝܼܫܘܿܥ ܡܫܝܼܚܵܐ ܗ̇ܘ ܕܐ݇ܡܸܪܹܗ ܐܸܠܲܢ: ܟܠ ܡܸܢܕܝܼ ܕܛܲܠܒܝܼܬܘܿܢ ܒܨܠܘܿܬܵܐ: ܘܗܲܝܡܸܢܝܼܬܘܿܢ ܒܸܬ ܫܲܩܠܝܼܬܘܿܢ. ܘܟܠ ܡܸܢܕܝܼ ܕܛܲܠܒܝܼܬܘܿܢ ܡ̣ܢ ܒܵܒܝܼ ܒܫܸܡܝܼ ܒܸܬ ܝܵܗ݇ܒ̣ܸܠܵܘܟ̣ܘܿܢ. ܘܡܸܢ݇ܕܪܹܫ݇ ܐ݇ܡܸܪܹܗ ܐܸܠܲܢ: ܕܛܠܘܿܒܘܼܢ ܘܦܵܐܸܫ ܝܘܼܗ݇ܒ̣ܵܐ ܐܸܠܵܘܟ̣ܘܿܢ. ܘܐܘܼܦ ܐܵܕܝܼܵܐ ܡܗܲܝܡܘܼܢܹܐ ܝ݇ܘܲܚ: ܕܠܹܐ ܗ݇ܘܼܵܐ ܡ̣ܢ ܣܵܒܵܒ ܕܚܫܝܼܚܹ̈ܐ ܝ݇ܘܲܚ ܗ݇ܘܼܵܐ: ܐܝܼܢܵܐ ܒܘܼܬ ܕܐܵܗܵܐ ܟܸܢܫܵܐ ܕܟܸܠܝܵܐ ܝ݇ܠܹܗ: ܕܚܵܙܝܼ ܚܲܝܠܹܗ ܕܐܲܠܵܗܵܐ ܡܥܲܓ̰ܒܵܢܵܐ: ܘܕܸܥܪܝܼ ܡ̣ܢ ܚܸܠܛܘܼܢܝܵܐ ܕܣܛܵܢܵܐ ܠܝ݇ܕܥܵܝܬܵܐ ܕܫܪܵܪܵܐ. ܒܘܼܬ ܕܐܵܗܵܐ ܒܨܠܘܿܬܵܐ ܩܲܪܒܘܼܢܹ̈ܐ ܝ݇ܘܲܚ ܠܟܸܣ ܐܲܠܵܗܵܐ: ܘܡܸܢܹܗ ܒܸܛܠܵܒܵܐ ܝ݇ܘܲܚ ܕܩܵܕ݇ܡ ܟܠܲܝܗܝ ܕܦܵܪܸܩ ܐܵܗܵܐ ܝܵܠܵܕ݇ܐ ܡ̣ܢ ܐܵܗܵܐ ܡܲܪܥܵܐ. ܐܝܼܢܵܐ ܪܹ̈ܓܵܘܵܬܹܐ ܕܡܲܪ̈ܩܝܘܿܢܹܐ ܐ݇ܡܸܪܘܿܢ ܒܩܵܠܵܐ ܪܵܡܵܐ: ܕܐܲܚܢܲܢ ܠܹܐ ܡܵܨܲܚ ܕܒܲܣܡܲܚܠܹܗ: ܐܘܼܦ ܠܵܐ ܐܲܚܬܘܿܢ ܡܵܨܹܐܬܘܿܢ ܕܥܵܒ̣ܕܝܼܬܘܿܢ ܐܵܗܵܐ.
ܗܵܝܓܵܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܫܥܸܫܠܹܗ ܪܹܫܹܗ ܘܪܬܸܡܠܹܗ ܒܣܸܦ̈ܘܵܬܘܼܗܝ ܘܓܚܸܟܠܹܗ ܚܲܕ݇ܟ̰ܵܐ ܥܲܠܲܝܗܝ: ܘܐ݇ܡܸܪܹܗ ܠܒܵܒܵܐ ܕܝܵܠܵܕ݇ܐ: ܕܒܗܝܼܒ̣ܝܼ ܝ݇ܘܸܢ ܥܲܠ ܡܵܪܲܢ ܝܼܫܘܿܥ ܡܫܝܼܚܵܐ: ܕܥܲܡ ܡܲܨܠܵܝܬܹܗ ܠܥܡܵܕܵܐ ܩܲܕܝܼܫܵܐ: ܡܩܵܒܸܠ ܐܵܗܵܐ ܝܵܠܵܕ݇ܐ ܒܵܣܲܡܬܵܐ ܒܓܵܢܹܗ ܘܒܦܲܓ̣ܪܹܗ. ܒܗܝܼܒ̣ܝܼ ܗ݇ܘܼܵܐ ܐܵܗܵܐ ܩܲܕܝܼܫܵܐ ܥܲܠ ܡܵܪܹܗ: ܘܐܝܼܬ ܗ݇ܘܼܵܐ ܠܹܗ ܗܝܼܒ̣ܝܼ ܐܲܝܟܼ ܫܠܝܼܚܹ̈ܐ ܩܲܕܝܼܫܹ̈ܐ. ܗܵܝܓܵܗ ܓ̰ܘܼܘܸܒܠܹܗ ܒܵܒܹܗ ܕܝܵܠܵܕ݇ܐ ܐ݇ܡܸܪܹܗ ܠܩܲܕܝܼܫܹ̈ܐ: ܒܸܚܕܵܝܵܐ ܝ݇ܘܸܢ ܕܗܕܝܼܪܵܐ ܝ݇ܘܸܢ ܠܲܐܟ̣ܵܐ ܐܵܢܵܐ ܘܟܠܲܝܗܝ ܒܢܲܝ̈ ܒܲܝܬܝܼ: ܕܩܲܒܠܲܚ ܪܘܼܫܡܵܐ ܕܡܲܥܡܘܿܕܝܼܬܵܐ ܩܲܕܝܼܫܬܵܐ: ܗܵܕܟ̣ܵܐ ܒܣܵܡܝܼ ܠܵܗ̇ ܕܥܲܡܕܝܼܬܘܿܢ ܠܒܪܘܿܢܝܼ. ܒܗܝܼܒ̣ܝܼ ܗ݇ܘܼܵܐ ܗ̇ܘ ܐ݇ܢܵܫܵܐ ܒܓܵܢܹܗ: ܡ̣ܢ ܚܲܝܠܵܐ ܕܗܹܡܸܙܡܵܢܹ̈ܐ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܘܐܲܝܟܼ ܗ̇ܘ ܕܡ̣ܢ ܓ̰ܲܠܕܹܐ ܒܸܚܙܵܝܵܐ ܗ݇ܘܼܵܐ ܒܪܘܿܢܹܗ ܒܣܝܼܡܵܐ ܗ݇ܘܼܵܐ.
ܘܗܵܝܓܵܗ ܐ݇ܡܸܪܹܗ ܡܵܪܝ ܐܵܘܓܹܝܢ ܠܩܲܕܝܼܫܵܐ ܡܵܪܝ ܝܲܥܩܘܿܒ̣: ܘܦܘܼܩܸܕܠܹܗ ܠܚܲܕ݇ ܡ̣ܢ ܩܲܫܝܼܫܹ̈ܐ ܕܗܵܕܸܪ ܡܲܥܡܘܿܕܝܼܬܵܐ. ܗܵܝܓܵܗ ܒܫܘܼܪܵܝܵܐ ܩܸܡܠܹܗ ܡܵܪܝ ܐܵܘܓܹܝܢ ܕܐܵܙܸܠ ܗ݇ܘܼܵܐ ܠܥܹܕܬܵܐ. ܘܗܵܝܓܵܗ ܒܵܒܹܗ ܕܝܵܠܵܕ݇ܐ ܐ݇ܡܸܪܹܗ ܠܩܲܕܝܼܫܵܐ ܡܵܪܝ ܐܵܘܓܹܝܢ: ܕܠܹܐ ܝ݇ܠܵܗ̇ ܒܣܵܡܝܼ ܕܡ̣ܢ ܚܲܕ݇ ܐ݇ܢܵܫܵܐ ܐ݇ܚܹܪ݇ܢܵܐ ܦܵܐܸܫ ܥܡܝܼܕܵܐ: ܐܸܠܵܐ ܡ̣ܢ ܩܲܕܝܼܫܘܼܬܘܼܟܼ: ܘܒܗ̇ܝ ܥܕܵܢܵܐ ܩܸܡܠܹܗ ܣܵܒ̣ܵܐ ܡܵܪܝ ܐܵܘܓܹܝܢ ܒܚܲܕܘܼܬܵܐ ܓܘܼܪܬܵܐ ܘܦܘܼܩܸܕܠܹܗ ܠܡܫܲܡܫܵܢܵܐ: ܘܗܘܼܕܸܪܹܗ ܠܬܸܫܡܸܫܬܵܐ ܥܲܡ ܟܠܲܝܗܝ ܐܵܢܝܼ ܕܚܵܫܚܝܼܢ ܗ݇ܘܼܵܘ ܠܸܥܡܵܕܵܐ ܡܚܲܣܝܵܢܵܐ. ܩܘܼܪܒܸܢܹܗ ܐܵܗܵܐ ܣܵܒ̣ܵܐ [ܡܵܪܝ ܐܵܘܓܹܝܢ] ܘܗܘܼܡܙܸܡܠܹܗ ܒܘܼܬ ܣܝܵܡܐܝܼܕܵܐ ܕܬܲܠܡܝܼܕܹ̈ܐ ܡ̣ܢ ܒܵܬ݇ܪ ܕܐܵܗܵܐ ܥܡܵܕܵܐ. ܪܫܸܡܠܹܗ ܒܡܸܫܚܵܐ ܩܲܕܝܼܫܵܐ: ܘܒܪܸܟܠܹܗ ܒܨܠܘܿܬܵܐ: ܘܛܠܸܒܠܹܗ ܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ ܘܐ݇ܡܸܪܹܗ: ܝܵܐ ܐܲܠܵܗܵܐ ܗ̇ܘ ܕܟܹܐ ܒܲܣܡܵܐܠܹܗ ܒܚܲܝܲܝ̈ܗܝ ܕܒܢܲܝ̈ܢܵܫܵܐ: ܫܡܥܝܼ ܒܩܵܠܵܐ ܕܒܵܥܘܼܬܹܗ ܕܪܹܓܘܼܟܼ. ܘܗ̇ܝ ܕܥܒ̣ܸܕܠܘܼܟܼ ܒܐܝܼܕܹܗ ܕܩܲܕܝܼܫܵܐ ܦܲܛܪܘܿܣ ܒܪ̈ܗܘܿܡܹܐ ܒܡܲܩܲܡܬܹܗ ܕܗ̇ܘ ܡܝܼܬܵܐ: ܗܲܪ ܗ̇ܝ ܥܒ̣ܘܿܕ ܐܘܼܦ ܐܸܕܝܘܿܡ݇ ܝܵܘܡܵܐ ܒܢܝܼܫܲܢܩܵܐ ܕܒܵܣܲܡܬܹܗ ܕܐܵܗܵܐ ܝܵܠܵܕ݇ܐ. ܘܐܲܝܟܼ ܕܬܵܡܵܐ ܕܡܘܼܢܚܸܦܠܘܼܟܼ ܠܣܝܼܡܘܿܢ ܚܲܪܵܫܵܐ: ܘܓ̣ܠܸܒܠܘܼܟܼ ܒܪܹܓܘܼܟܼ: ܘܫܘܼܕܸܪܘܼܟܼ ܠܟܠܹܗ ܛܵܝܸܦܵܐ ܕܗܲܝܡܵܢܘܼܬܵܐ ܒܝܼܘܼܟܼ. ܗܵܕܟ̣ܵܐ ܐܘܼܦ ܐܸܕܝܘܿܡ݇ ܝܵܘܡܵܐ ܒܸܬ ܗܵܘܹܐ ܓ̣ܵܠܒܵܢܵܐ ܫܸܡܘܼܟܼ ܓܵܘ ܕܐܵܗܵܐ ܡܕܝܼܢ݇ܬܵܐ ܒܲܝܢܵܬ ܚܲܢܦܹ̈ܐ ܘܒܲܝܢܵܬ ܝܼܗܘܼܕܵܝܹ̈ܐ. ܘܒܸܬ ܢܵܚܦܝܼ ܟܠܲܝܗܝ ܒܢܘܿܢܹ̈ܐ ܕܚܸܠܛܘܼܢܝܵܐ ܘܕܘܼܓܠܵܐ: ܐܵܢܝܼ ܕܒܹܐܡܵܪܵܐ ܝ݇ܢܵܐ ܡܸܢܕܝܼ ܚܸܪܒܵܐ ܒܘܼܬ ܪܹ̈ܓܵܘܵܬܘܼܟܼ. ܗܲܪ ܒܗ̇ܝ ܣܵܥܲܬ ܗ̇ܘ ܩܸܡܠܹܗ ܡ̣ܢ ܨܠܘܿܬܹܗ: ܦܘܼܩܸܕܠܹܗ ܕܡܲܥܒ̣ܸܪܝܼܠܹܗ ܠܝܵܠܵܕ݇ܐ. ܘܛܥܸܢܹܗ ܚܲܕ݇ ܡܫܲܡܫܵܢܵܐ: ܘܡܘܼܬ݇ܝܼܠܹܗ ܩܵܕ݇ܡ ܩܲܕܝܼܫܵܐ: ܣܵܒܵܒ ܝܵܠܵܕ݇ܐ ܝܗ݇ܘܼܵܐ ܒܲܪ ܫܲܒ̣ܥܵܐ ܫܸܢܹ̈ܐ. ܘܫܩܸܠܹܗ ܩܲܕܝܼܫܵܐ ܡܸܫܚܵܐ ܘܡܫܚܸܠܹܗ ܠܟܠܹܗ ܓܘܼܫܡܹܗ: ܘܡܘܼܥܡܸܕܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܐܲܝܟܼ ܥܵܕܲܬ: ܒܫܸܡܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. ܘܛܥܸܢܹܗ ܡܫܲܡܫܵܢܵܐ ܘܡܘܼܣܸܩܠܹܗ ܡ̣ܢ ܡܝܼ̈ܵܐ ܕܡܲܥܡܘܿܕܝܼܬܵܐ. ܘܦܘܼܩܸܕܠܹܗ ܩܲܕܝܼܫܵܐ ܕܡܲܬܒ̣ܝܼܠܹܗ ܥܲܠ ܚܵܠܝܼ ܘܩܵܕ݇ܡ ܢܲܗܪܵܐ ܕܝܘܿܪܕܢܵܢ. ܘܦܝܼܫܠܗ݇ܘܿܢ ܫܥܝܼܫܹ̈ܐ ܡܫܲܡܫܵܢܹ̈ܐ ܘܙܕܸܥܠܗ݇ܘܿܢ ܕܚܙܹܐܠܗ݇ܘܿܢ ܠܫܘܼܚܠܵܦܵܐ ܕܗܲܕܵܡܹ̈ܐ ܕܝܵܠܵܕ݇ܐ: ܘܕܵܐܟ̣ܝܼ ܡ̣ܢ ܢܵܓܸܣܬܲܢ ܒܣܸܡܠܹܗ. ܐܝܼܢܵܐ ܐܸܣܛܲܦܵܢܘܿܣ ܪܹܫܵܐ ܕܡܫܲܡܫܵܢܹ̈ܐ: ܟܲܕ ܦܝܵܫܵܐ ܗ݇ܘܼܵܐ ܥܘܼܓ̰ܒܵܐ ܒܚܲܝܠܹܗ ܕܐܲܠܵܗܵܐ ܕܠܹܐ ܐܵܬܹܐ ܠܡܗܲܡܙܘܼܡܹܐ ܡܘܼܩܘܸܚܠܹܗ ܟܲܕ ܒܹܐܡܵܪܵܐ: ܫܲܒܚܘܿܢ ܘܡܵܘܕܹܡܘܿܢ ܠܫܵܦܵܩܲܬܹܗ ܕܡܵܪܲܢ ܕܫܘܼܕܸܪܹܗ ܒܵܣܲܡܬܵܐ ܠܝܵܠܵܕ݇ܐ: ܘܡܫܲܡܫܵܢܹ̈ܐ ܐܵܢܝܼ ܕܚܙܹܐܠܗ݇ܘܿܢ: ܒܗ̇ܝ ܣܵܥܲܬ ܢܦܸܠܗ݇ܘܿܢ ܥܲܠ ܦܲܐܬ̈ܘܵܬܲܝܗܝ: ܘܫܘܼܒܸܚܠܗ݇ܘܿܢ ܠܡܵܪܲܢ: ܕܚܲܝܠܹ̈ܐ ܕܐܲܝܟܼ ܕܐܵܢܝܼ ܒܐܝܼܕܵܐ ܕܪܹ̈ܓܵܘܵܬܘܼܗܝ ܡܲܚܙܘܼܝܹܐ ܗ݇ܘܼܵܐ.
ܐܝܼܢܵܐ ܛܵܝܸܦܵܐ ܕܟܸܠܝܵܐ ܗ݇ܘܼܵܐ ܘܒܸܣܦܵܪܵܐ: ܐܝܼܡܵܢ ܒܸܬ ܦܵܠܸܛ ܝܵܠܵܕ݇ܐ ܕܚܵܙܹܐܠܹܗ. ܘܡ̣ܢ ܒܵܬ݇ܪ ܕܡܘܼܠܒ̣ܸܫܠܗ݇ܘܿܢ ܓ̰ܘܼܠ̈ܘܼܗܝ: ܦܘܼܩܸܕܠܹܗ ܩܲܕܝܼܫܵܐ ܕܗܸܟ̰ ܐ݇ܢܵܫܵܐ ܠܵܐ ܛܵܥܸܢܹܗ: ܐܸܠܵܐ ܕܗ̇ܘ ܒܐܲܩܠܵܬ̈ܘܼܗܝ ܚܵܕܸܪ: ܘܕܒ̣ܸܩܠܹܗ ܩܲܕܝܼܫܵܐ ܒܐܝܼܕܹܗ: ܘܝܘܼܗ݇ܒ̣ܸܠܹܗ ܠܒܵܒܘܼܗܝ ܟܲܕ ܒܸܚܕܵܪܵܐ ܩܵܕ݇ܡ ܟܠܹܗ ܟܸܢܫܵܐ. ܐܝܼܢܵܐ ܛܵܝܸܦܵܐ ܫܘܼܪܹܐܠܗ݇ܘܿܢ ܒܸܚܠܵܨܵܐ ܠܐܘܼܕܵܠܹܐ: ܕܚܵܙܹܐܠܹܗ ܠܝܵܠܵܕ݇ܐ. ܐܝܼܢܵܐ ܡܲܪ̈ܩܝܘܿܢܹܐ ܒܥܕܵܢܵܐ ܕܚܙܹܐܠܗ݇ܘܿܢ ܠܐܵܗܵܐ ܥܵܓ̰ܝܼܒܘܼܬܵܐ: ܘܟܲܕ ܝ݇ܕܸܥܠܗ݇ܘܿܢ ܕܟܠܹܗ ܛܵܝܸܦܵܐ ܒܸܪܚܵܛܵܐ ܗ݇ܘܼܵܐ ܘܒܸܚܠܵܨܵܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܕܚܵܙܹܐ ܗ̇ܝ ܥܵܓ̰ܝܼܒܘܼܬܵܐ ܕܦܝܼܫܠܵܗ̇ ܥܒ̣ܝܼܕܬܵܐ: ܐܲܢܹ̈ܐ (ܡܲܪ̈ܩܝܘܿܢܵܐ) ܒܗ̇ܝ ܣܵܥܲܬ ܗ݇ܘܹܐܠܗ݇ܘܿܢ ܦܸܪܣܲܬ ܡܘܼܪܸܡܠܗ݇ܘܿܢ ܪܹ̈ܫܲܝܗܝ: ܘܡܘܼܪܸܡܠܗ݇ܘܿܢ ܫܸܦܘܼܠܵܠܹ̈ܐ ܕܠܒ̣ܝܼܫܬܲܝܗܝ. ܘܒܙܕܥܘܿܬܵܐ ܡ̣ܢ ܓ̰ܲܕܵܐ ܠܓ̰ܲܕܵܐ ܥܵܪܩܝܼ ܗ݇ܘܼܵܘ. ܘܗܵܕܟ̣ܵܐ ܒܸܪܚܵܛܵܐ ܗ݇ܘܼܵܘ ܘܓܵܫܘܿܩܹܐ ܒܵܬ݇ܪ ܚܵܨܲܝܗܝ: ܗܲܠ ܕܦܠܸܛܠܗ݇ܘܿܢ ܡ̣ܢ ܡܕܝܼܢ݇ܬܵܐ. ܣܵܒܵܒ ܒܸܚܫܵܒ̣ܵܐ ܗ݇ܘܼܵܘ: ܕܒܗ̇ܝ ܣܵܥܲܬ ܛܵܝܸܦܵܐ ܒܸܬ ܪܲܓ̰ܡܝܼܠܗ݇ܘܿܢ. ܘܩܘܼܘܸܡܠܵܗ̇ ܐܸܠܲܝܗܝ ܐܵܗܵܐ ܐܲܝܟܼ ܗ̇ܝ ܕܩܘܼܘܸܡܠܵܗ̇ ܠܣܝܼܡܘܿܢ ܚܲܪܵܫܵܐ ܓܵܘ ܪܗܘܿܡܹܐ: ܐܲܝܟܼ ܗܲܡܙܲܡܬܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ. ܐܝܼܢܵܐ ܛܵܝܸܦܵܐ ܛܵܥܘܿܝܹܐ ܗ݇ܘܼܵܘ ܒܵܬ݇ܪܲܝܗܝ ܒܟܠܵܗ̇ ܡܕܝܼܢ݇ܬܵܐ: ܟܲܕ ܠܵܐ ܡܘܼܫ݇ܟ̰ܸܚܠܗ݇ܘܿܢ: ܐ݇ܡܸܪܘܿܢ ܠܩܲܪܕܘܿܢ ܒܵܒܹܗ ܕܝܵܠܵܕ݇ܐ: ܐܸܢ ܛܵܫܝܼܠܵܗ̇ ܓܵܢܲܝܗܝ ܠܟܸܣܠܘܼܟܼ: ܦܲܠܛܸܬܿ ܠܗ݇ܘܿܢ ܩܵܕ݇ܡ ܟܸܢܫܵܐ: ܓ̰ܘܼܘܸܒܠܹܗ ܩܲܪܕܘܿܢ ܘܐ݇ܡܸܪܹܗ ܐܸܠܲܝܗܝ: ܕܡ̣ܢ ܩܵܕ݇ܡ ܥܕܵܢܵܐ ܩܵܕ݇ܡ ܩܲܕܝܼܫܵܐ ܕܟܸܠܝܹ̈ܐ ܝ݇ܘܲܚ ܗ݇ܘܼܵܐ: ܘܡܸܢ݇ܕܪܸܫ݇ ܠܵܐ ܚܸܙܝܵܝܠܝܼ: ܐܘܼܦ ܠܵܐ ܡܸܢ݇ܕܪܸܫ݇ ܒܣܵܡܝܼ ܗ݇ܘܼܵܐ ܕܚܵܙܸܢ ܗ݇ܘܼܵܐܠܗ݇ܘܿܢ. ܗܵܝܓܵܗ ܐ݇ܡܸܪܹܗ ܐܸܠܲܝܗܝ ܐܲܦܸܣܩܘܿܦܵܐ: ܒܢܘܿܢ̈ܝܼ ܠܵܐ ܣܲܩܕܝܼܬܘܿܢ ܘܦܲܫܡܝܼܬܘܿܢ: ܕܐܲܝܟܼ ܗܹܡܸܙܡܵܢܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ ܩܘܼܘܸܡܠܵܐ ܐܸܠܲܝܗܝ. ܗ̇ܝ ܕܗ݇ܘܹܐܠܵܗ̇ ܠܣܝܼܡܘܿܢ ܚܲܪܵܫܵܐ ܒܵܒܲܝܗܝ ܓܵܘ ܪܗܘܿܡܹܐ: ܗܵܕܟ̣ܵܐ ܗܲܪ ܗ̇ܝ ܩܘܼܘܸܡܠܵܗ̇ ܐܘܼܦ ܥܲܠܲܝܗܝ.
ܟܠܹܗ ܛܵܝܸܦܵܐ ܕܝܼܗܘܼܕܵܝܹ̈ܐ ܘܕܚܲܢܦܹ̈ܐ ܡܫܵܒܘܼܚܹܐ ܗ݇ܘܼܵܘ ܐܘܼܦ ܐܲܢܹ̈ܐ ܠܐܲܠܵܗܵܐ ܥܲܡ ܛܵܝܸܦܵܐ ܕܟܪܸ̈ܣܛܝܵܢܹܐ: ܘܐܵܡܪܝܼ ܗ݇ܘܼܵܘ: ܕܐܵܗܵܐ ܝ݇ܠܹܗ ܐܲܠܵܗܵܐ ܫܲܪܝܼܪܵܐ. ܘܟܠܲܝܗܝ ܒܸܛܠܵܒܵܐ ܗ݇ܘܼܵܘ ܟܲܕ ܦܲܪܦܘܼܠܹܐ ܒܝܼـܹܗ ܕܡܲܥܡܸܕܠܗ݇ܘܿܢ ܩܲܕܝܼܫܵܐ ܡܵܪܝ ܝܲܥܩܘܿܒ̣. ܐܘܼܦ ܫܡܘܼܐܹܝܠ ܒܲܪ ܚܲܢܵܢ ܝܼܗܘܼܕܵܝܵܐ: ܟܲܕ ܚܙܹܐܠܹܗ ܠܐܵܗܵܐ ܥܵܓ̰ܝܼܒܘܼܬܵܐ: ܡܫܵܒܸܚ ܗ݇ܘܼܵܐ ܘܓܲܪܘܸܣ ܗ݇ܘܼܵܐ ܠܫܵܦܵܩܲܬܹܗ ܕܐܲܠܵܗܵܐ. ܘܦܠܸܛܠܹܗ ܡ̣ܢ ܥܹܕܬܵܐ: ܘܒܓ̰ܲܠܕܘܼܬܵܐ ܪܚܸܛܠܹܗ ܠܒܲܝܬܹܗ: ܘܡܲܟܪܸܙ ܗ݇ܘܼܵܐ ܒܟܠܵܗ̇ ܡܕܝܼܢ݇ܬܵܐ ܟܲܕ ܒܹܐܡܵܪܵܐ: ܘܵܝ ܐܸܠܵܘܟ̣ܘܿܢ ܝܼܗܘܼܕܵܝܹ̈ܐ: ܒܡܵܢܝܼ ܟܦܸܪܵܘܟ̣ܘܿܢ: ܘܪܚܸܛܠܹܗ ܘܥܒ̣ܸܪܹܗ ܠܒܲܝܬܹܗ: ܣܵܒܵܒ ܐܝܼܬ ܗ݇ܘܼܵܐܠܹܗ ܚܕܵܐ ܒܪܵܬܵܐ ܝܲܟܲܢܬܵܐ ܕܬܡܵܢܝܵܐ ܫܸܢܹ̈ܐ ܐ݇ܣܝܼܪܬܵܐ ܗ݇ܘܼܵܐ ܒܣܵܛܵܢܵܐ: ܘܠܘܼܒܠܵܠܹܗ ܥܲܡ ܝܸܡܘܼܗ̇: ܘܡܘܼܬ݇ܝܵܠܹܗ ܩܵܕ݇ܡ ܩܲܕܝܼܫܵܐ ܡܵܪܝ ܐܵܘܓܹܝܢ. ܘܐ݇ܡܸܪܹܗ ܐܸܠܹܗ: ܕܗܲܠ ܐܸܕܝܘܿܡ݇ ܝܵܘܡܵܐ ܡܵܪܝܼ: ܐܘܼܦ ܐܵܢܵܐ ܥܲܡ ܝ݇ܗܘܼܕܵܝܹ̈ܐ ܕܲܪܩܘܼܒ̣ܠ ܫܸܡܹܗ ܕܡܫܝܼܚܵܐ ܟܹܐ ܟܵܠܸܢ ܗ݇ܘܼܵܐ. ܐܝܼܢܵܐ ܡ̣ܢ ܐܸܕܝܘܿܡ݇ ܝܵܘܡܵܐ ܡܒܵܬ݇ܪܹܗ ܒܸܥܒ̣ܵܕܵܐ ܝ݇ܘܸܢ ܩܵܘܠܵܐ ܩܵܕ݇ܡ ܫܸܡܹܗ ܕܡܫܝܼܚܵܐ: ܕܡܸܢ݇ܕܪܹܫ݇ ܠܹܐ ܕܵܥܪܸܢ ܒܵܬ݇ܪ ܡܲܣܠܵܝܬܲܝܗܝ ܕܝܼܗܘܼܕܵܝܹ̈ܐ: ܘܗܸܟ̰ ܐ݇ܢܵܫܵܐ ܡܸܢ݇ܕܪܸܫ݇ ܠܹܐ ܦܵܪܸܫܠܝܼ ܡ̣ܢ ܚܘܼܒܹܗ ܕܡܫܝܼܚܵܐ: ܐܸܠܵܐ ܒܝܼـܹܗ ܒܸܬ ܗܲܝܡܸܢܸܢ ܘܐܸܠܹܗ ܒܸܬ ܦܲܠܚܸܢ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܝܼ: ܐܵܢܵܐ ܘܟܠܲܝܗܝ ܒܢܲܝ̈ ܒܲܝܬܝܼ. ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܡܵܪܝܼ: ܘܦܲܪܦܘܼܠܹܐ ܝ݇ܘܸܢ ܠܚܲܣܝܘܼܬܘܼܟܼ: ܕܐܵܗܵܐ ܒܪܵܬܝܼ ܥܲܒ̣ܕܸܬܿ ܠܵܗ̇ ܐܵܙܲܕ ܡ̣ܢ ܚܲܝܠܹܗ ܕܣܵܛܵܢܵܐ: ܗܵܐ ܬܡܵܢܝܵܐ ܫܸܢܹ̈ܐ ܠܘܼܒܠܘܼܗ̇ ܠܹܗ. ܗܵܝܓܵܗ ܦܘܼܩܸܕܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܠܬܲܠܡܝܼܕܹܗ: ܕܡܲܝܬ݇ܝܼܠܹܗ ܚܢܵܢܵܐ. ܘܫܩܸܠܹܗ ܚܢܵܢܵܐ: ܘܪܫܸܡܠܹܗ ܥܲܠܘܼܗܝ ܨܠܝܼܒ̣ܵܐ ܐܲܦܸܣܩܘܿܦܵܐ ܘܩܲܕܝܼܫܵܐ ܡܵܪܝ ܐܵܘܓܹܝܢ. ܘܒܓ̰ܲܠܕܘܼܬܵܐ ܦܘܼܩܸܕܠܹܗ ܕܡܲܝܬ݇ܝܼܠܵܗܿ ܠܟܸܣܠܲܝܗܝ. ܘܕܒ̣ܝܼܩܵܠܹܗ ܒܵܒܘܼܗ̇: ܘܩܘܼܪܒܸܢܵܠܹܗ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܹ̈ܐ. ܘܩܸܡܠܹܗ ܣܵܒ̣ܵܐ ܡܵܪܝ ܐܵܘܓܹܝܢ ܥܲܠ ܐܲܩܠܵܬ̈ܘܼܗܝ. ܘܪܫܸܡܠܹܗ ܒܲܝܢܵܬ ܥܲܝܢ̈ܘܼܗ̇ ܒܢܝܼܫܲܢܩܵܐ ܕܨܠܝܼܒ̣ܵܐ. ܘܡܘܼܟܠܹܐܠܹܗ ܠܗ̇ܘ ܕܲܝܘܵܐ ܒܢܝܼܫܲܢܩܵܐ ܕܢܝܼܫܵܐ ܕܚܲܝܹ̈ܐ ܘܐ݇ܡܸܪܹܗ ܐܸܠܹܗ: ܡ̣ܢ ܦܘܼܩܕܵܢܹܗ ܕܐܵܗܵܐ ܫܠܝܼܚܵܐ ܩܲܕܝܼܫܵܐ: ܐܸܠܘܼܟܼ ܒܹܐܡܵܪܵܐ ܝ݇ܘܸܢ ܕܲܝܘܵܐ ܟ̰ܲܦܲܠ: ܦܠܘܿܛ ܡ̣ܢ ܕܐܵܗܵܐ ܒܪܵܬܵܐ: ܘܡܸܢ݇ܕܪܸܫ݇ ܠܲܝܬܠܘܼܟܼ ܗܘܼܟܡܵܐ ܒܗܹܡܸܙܡܵܢܹܗ ܚܲܝܬܵܐ ܕܡܫܝܼܚܵܐ ܕܩܲܪܒܸܢܸܬܿ ܐܸܠܵܗ̇. ܗܲܪ ܒܗ̇ܝ ܥܕܵܢܵܐ ܡܘܼܩܘܸܚܠܹܗ ܗ̇ܘ ܕܲܝܘܵܐ ܒܩܵܠܵܐ ܪܵܡܵܐ ܘܐ݇ܡܸܪܹܗ: ܐܘܿܗ ܐܘܿܗ ܡܸܢܵܘܟ̣ܘܿܢ ܬܲܠܡܝܼܕܹ̈ܐ ܕܝܼܫܘܿܥ ܢܵܨܪܵܝܵܐ: ܕܩܲܡ ܛܲܪܕܝܼܬܘܿܢ ܠܲܢ ܡ̣ܢ ܟܠܹܗ ܥܵܠܡܵܐ! ܬܪܹܝܢ ܬܲܠܡܝܼܕܹ̈ܐ ܐܝܼܬ ܗ݇ܘܼܵܐ ܠܝܼ ܓܵܘ ܕܐܵܗܵܐ ܡܕܝܼܢ݇ܬܵܐ: ܡܸܢܲܝܗܝ ܛܪܝܼܕܵܝܠܵܘܟ̣ܘܿܢ ܘܡܸܢܲܝܗܝ ܥܒ̣ܝܼܕܵܝܠܵܟ̣ܘܿܢ ܡܲܨܝܸܬܵܢܹ̈ܐ ܠܝܘܼܠܦܵܢܹ̈ܐ ܕܕܝܼܵܘܟ̣ܘܿܢ: ܐܘܼܦ ܠܵܐ ܓܵܘ ܐܵܗܵܐ ܥܘܼܡܪܵܐ ܙܥܘܿܪܵܐ ܩܲܡ ܪܲܦܝܼܬܘܿܢ ܠܝܼ ܕܦܵܝܫܸܢ ܘܫܵܠܸܢ. ܗܲܪ ܒܗ̇ܝ ܥܕܵܢܵܐ ܦܘܼܫܸܛܠܹܗ ܐܝܼܕܹܗ ܩܲܕܝܼܫܵܐ: ܘܪܫܝܼܡܵܠܹܗ ܒܢܝܼܫܲܢܩܵܐ ܕܨܠܝܼܒ̣ܵܐ ܬܪܹܝܢ ܓܵܗܹ̈ܐ. ܘܒܓ̰ܲܠܕܘܼܬܵܐ ܚܒ̣ܝܼܛܵܗ̇ ܠܹܗ ܗ̇ܘ ܕܲܝܘܵܐ: ܘܥܪܸܩܠܹܗ ܘܦܠܸܛܠܹܗ ܡܸܢܘܼܗ̇. ܗܵܝܓܵܗ ܕܒ̣ܝܼܩܵܠܹܗ ܐܵܗܵܐ ܩܲܕܝܼܫܵܐ ܘܡܘܼܩܸܡܵܠܹܗ: ܘܝܘܼܗ݇ܒ̣ܵܠܹܗ ܕܫܲܬܝܵܐ ܡ̣ܢ ܗ̇ܘ ܚܢܵܢܵܐ: ܕܦܵܝܫܵܐ ܚܘܼܠܸܢܬܵܐ ܘܠܸܒܲܢܬܵܐ: ܘܝܘܼܗ݇ܒ̣ܵܠܹܗ ܠܝܸܡܘܼܗ̇ ܟܲܕ ܒܣܝܼܡܬܵܐ ܐܝܼܢܵܐ ܟܠܹܗ ܟܸܢܫܵܐ ܐܵܢܝܼ ܕܐܲܢܹ̈ܐ ܚܸܙܝܵܝܠܗ݇ܘܿܢ ܡܫܲܒܚܝܼ ܗ݇ܘܼܵܘ ܠܫܸܡܹܗ ܕܡܫܝܼܚܵܐ.
ܐܝܼܢܵܐ ܚܲܕ݇ ܐ݇ܢܵܫܵܐ ܝܗ݇ܘܼܕܵܝܵܐ: ܗܲܪ ܒܗ̇ܝ ܥܕܵܢܵܐ ܢܦܸܠܹܗ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܹ̈ܐ: ܘܢܵܫܸܩ ܗ݇ܘܼܵܐ ܠܗ݇ܘܿܢ: ܘܦܲܪܦܸܠ ܗ݇ܘܼܵܐ ܒܝܼܲܝܗܝ ܕܡܲܥܡܸܕܝܼܠܹܗ. ܐܝܼܢܵܐ ܐܲܢܹ̈ܐ ܐ݇ܡܸܪܘܿܢ ܐܸܠܹܗ: ܒܸܬ ܦܵܝܫܸܬܿ ܥܡܝܼܕܵܐ ܘܩܲܪܕܘܿܢ ܥܲܡ ܟܸܢܫܵܐ ܪܵܒܵܐ ܕܗܕܝܼܪܵܐ ܗ݇ܘܼܵܐ ܕܦܵܐܸܫ ܥܡܝܼܕܵܐ ܐܸܕܝܘܿܡ݇ ܝܵܘܡܵܐ: ܐܵܕܝܼܵܐ ܟܦܘܿܪܘܼܢ ܒܣܵܛܵܢܵܐ: ܘܡܵܘܕܝܼܡܘܿܢ ܒܡܵܪܲܢ: ܘܗ݇ܘܝܼܡܘܿܢ ܒܫܵܗܲܪܬܵܐ ܓܵܘ ܥܹܕܬܵܐ ܟܠܹܗ ܠܲܝܠܹܐ: ܘܩܘܼܕܡܹܐ ܒܗܵܘܹܝܬܘܿܢ ܚܫܝܼܚܹ̈ܐ ܠܚܲܠܥܵܬ ܕܡܲܥܡܘܿܕܝܼܬܵܐ ܩܲܕܝܼܫܬܵܐ. ܗܵܝܓܵܗ ܗܵܟܸܡ ܩܸܡܠܹܗ ܘܡܵܘܕܝܼܠܹܗ ܩܵܕ݇ܡ ܩܲܕܝܼܫܹ̈ܐ ܟܠܹܗ ܫܪܵܪܵܐ: ܟܲܕ ܐܵܡܸܪ ܗ݇ܘܼܵܐ ܐܸܠܲܝܗܝ: ܕܐܘܼܦ ܐܵܢܵܐ ܗܲܠ ܐܸܕܝܘܿܡ݇ ܝܵܘܡܵܐ: ܝܵܐ ܪܹ̈ܓܵܘܵܬܹܐ ܕܐܲܠܵܗܵܐ ܚܲܝܵܐ: ܗܘܹܐܠܝܼ ܕܲܪܩܘܼܒ̣ܠ ܗܲܝܡܵܢܘܼܬܹܗ ܕܡܫܝܼܚܵܐ: ܘܒܪܸܦܝܘܼܬܵܐ ܕܒ̣ܝܼܩܘܼܗܝ ܝ݇ܘܸܢ ܗ݇ܘܼܵܐ: ܐܝܼܢܵܐ ܐܸܕܝܘܿܡ݇ ܝܵܘܡܵܐ ܗ݇ܘܹܐܠܝܼ ܩܘܼܝܵܐ ܒܗܲܝܡܵܢܘܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܘܝ݇ܕܸܥܠܝܼ ܕܐܵܗܵܐ ܝ݇ܠܹܗ ܐܲܠܵܗܵܐ ܕܐܲܠܵܗܹ̈ܐ ܘܡܲܠܟܵܐ ܕܡܲܠܟܹ̈ܐ: ܗ̇ܘ ܝܼܠܹܗ ܦܵܪܘܿܩܵܐ ܕܟܠܹܗ ܓܸܢܣܵܐ ܕܒܢܲܝ̈ܢܵܫܵܐ. ܠܐܵܗܵܐ ܦܠܵܫܵܐ ܥܲܓ̰ܒܵܢܵܐ: ܘܦܠܵܫܵܐ ܥܲܡ ܣܵܛܵܢܵܐ: ܐ݇ܙܸܠܗ݇ܘܿܢ ܐܲܢܹ̈ܐ ܩܲܕܝܼܫܹ̈ܐ. ܒܓ̣ܵܠܝܼܒܘܼܬܵܐ ܓܘܼܪܬܵܐ: ܟܲܕ ܩܛܝܼܪܹ̈ܐ ܗ݇ܘܼܵܘ ܟܠܝܼܠܹ̈ܐ ܕܚܸܩܪܵܐ ܕܡܘܼܬܒ̣ܵܝܠܹܗ ܡܫܝܼܚܵܐ: ܣܵܒܵܒ ܪܵܒܵܐ ܓܵܗܹ̈ܐ ܐ݇ܙܝܼܠܹ̈ܐ ܗ݇ܘܼܵܘ ܠܦܠܵܫܵܐ ܕܐܲܝܟܼ ܐܵܢܝܼ ܙܸܪ̈ܲܢܓܹܐ ܕܡܫܝܼܚܵܐ: ܘܒܓ̣ܵܠܝܼܒܘܼܬܵܐ ܓܘܼܪܬܵܐ ܐ݇ܙܸܠܗ݇ܘܿܢ ܥܲܡܹܗ. ܣܵܒܵܒ ܡܵܢܝܼ ܝ݇ܠܹܗ ܕܠܹܐ ܗ݇ܘܼܵܐ ܡܫܵܒܘܼܚܹܐ ܘܓܲܪܘܘܼܣܹܐ ܠܫܵܦܵܩܲܬܹܗ ܕܡܵܪܲܢ: ܟܲܕ ܒܸܚܙܵܝܵܐ ܗ݇ܘܼܵܐ ܠܚܲܝܠܹ̈ܐ ܥܲܓ̰ܒܵܢܹ̈ܐ: ܕܒܢܝܼܫܲܢܩܵܐ ܕܨܠܝܼܒ̣ܵܐ ܦܝܵܫܵܐ ܗ݇ܘܼܵܐ ܥܒ̣ܝܼܕܵܐ: ܒܐܝܼܕܵܐ ܕܐܵܗܵܐ ܕܲܣܬܵܐ ܬܪܲܝܵܢܝܼܬܵܐ ܘܚܩܝܼܪܬܵܐ: ܢܨܝܼܒ̣ܬܵܐ ܝ݇ܠܵܗ̇ ܥܲܠ ܛܘܼܪ̈ܵܢܹܐ ܢܒܼܝܼܵܝܹ̈ܐ: ܘܓܘܼܪܘܸܣܬܵܐ ܥܲܠ ܪ̈ܘܼܡܝܵܬܹܐ ܫܠܝܼܚܵܝܵܬܹ̈ܐ؟
ܣܵܒܵܒ ܠܹܐ ܗ݇ܘܼܵܐ ܐܲܚܟ̰ܝܼ ܬܲܫܥܝܼܬܵܐ ܕܦܸܠܚܢܵܢܹ̈ܐ ܕܩܲܕܝܼܫܵܐ ܡܵܪܝ ܝܲܥܩܘܿܒ̣ ܡܘܼܬܸܒ̣ܬܵܐ ܝ݇ܠܵܗ̇ ܐܸܠܲܢ ܕܗܵܩܲܚ ܠܩܸܣܲܬ: ܐܸܠܵܐ ܐܵܢܝܼ ܕܦܠܸܚܠܗ݇ܘܿܢ ܥܲܡ ܩܲܕܝܼܫܵܐ ܡܵܪܝ ܐܵܘܓܹܝܢ. ܣܵܒܵܒ ܚܲܝܠܹ̈ܐ ܓܘܼܪܹ̈ܐ ܦܠܸܚܠܹܗ ܐܲܠܵܗܵܐ ܒܐܝܼܕܹܗ ܕܐܵܗܵܐ ܩܲܕܝܼܫܵܐ: ܕܵܐܟ̣ܝܼ ܕܐܘܼܦ ܡܝܼܬܹ̈ܐ ܡܘܼܚܝܼܠܹܗ ܘܒܲܝܢܵܬ ܚܵܝܹ̈ܐ ܚܕܸܪܗ݇ܘܿܢ. ܕܐܸܢ ܒܸܬ ܗܲܝܸܪ ܡܵܪܲܢ ܠܙܲܒܘܼܢܘܼܬܲܢ: ܬܲܫܥܝܼܬܵܐ ܕܓ̣ܵܠܝܼܒܘܼܝܵܬ̈ܘܼܗܝ ܡܸܢܘܼܗ̇ ܘܐܸܠܘܼܗ̇ ܒܸܬ ܟܵܬܒ̣ܲܚ ܘܐܵܕܝܼܵܐ ܒܣܵܡܲܢ ܝ݇ܠܵܗ̇ ܕܟܵܬܒ̣ܲܚ ܬܲܫܥܝܼܬܵܐ ܕܦܸܠܚܵܢܵܢܹ̈ܐ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܘܓ̣ܵܠܝܼܒܘܼܝܵܬܹ̈ܐ ܕܥܒ̣ܸܕܠܹܗ ܡܵܪܲܢ ܒܐܝܼܕܵܬ̈ܘܼܗܝ.
ܘܒܵܬ݇ܪ ܗ̇ܘ ܝܵܘܡܵܐ: ܘܒܗ̇ܝ ܣܵܥܲܬ ܕܠܵܐ ܥܲܪܩܵܠܬܵܐ ܦܘܼܩܸܕܠܹܗ ܡܵܪܝ ܝܲܥܩܘܿܒ̣: ܘܗܘܼܕܸܪܘܿܢ ܡܲܥܡܘܿܕܝܼܬܵܐ. ܘܡܘܼܥܡܸܕܠܹܗ ܠܩܲܪܕܘܿܢ ܐܲܚܘܿܢܹܗ ܕܗܵܟܸܡ: ܘܫܡܘܼܐܹܝܠ ܒܪܘܿܢܵܐ ܕܚܲܢܵܢ ܝ݇ܗܘܼܕܵܝܵܐ: ܥܲܡ ܟܠܹܗ ܟܸܢܫܵܐ ܕܝܼܗܘܼܕܵܝܹ̈ܐ ܘܕܚܲܢܦܹ̈ܐ: ܕܝܼܗ݇ܘܼܵܘ ܐܲܝܟܼ ܐܲܠܦܵܐ ܘܬܪܹܝܡܐܵܐ ܓܵܢܵܬܹ̈ܐ: ܥܒ̣ܸܕܠܹܗ ܩܲܪܕܘܿܢ ܒܗ̇ܘ ܝܵܘܡܵܐ ܓܵܘ ܒܲܝܬܹܗ ܚܕܵܐ ܡܸܫܬܘܼܬܵܐ ܓܘܼܪܬܵܐ: ܘܐ݇ܬܹܐܠܹܗ ܠܒܲܝܬܹܗ ܥܲܡ ܨܠܝܼܒ̣ܹ̈ܐ ܘܫܪ̈ܵܓ̣݇ܝܵܬܹܐ: ܥܲܡ ܟܠܹܗ ܟܸܢܫܵܐ ܕܟܵܗܢܹ̈ܐ: ܘܥܒ̣ܸܪܹܗ ܘܨܘܼܠܹܐܠܹܗ ܨܠܘܿܬܵܐ ܓܵܘ ܒܲܝܬܹܗ. ܘܦܘܼܠܸܛܠܹܗ ܐܵܢܝܼ ܟܬܵܒ̣ܹ̈ܐ ܕܚܲܪ̈ܵܫܹܐ: ܘܡܘܼܬܒ̣ܵܝܠܹܗ ܓܵܘ ܢܘܼܪܵܐ. ܘܡܘܼܩܕܵܝܠܹܗ. ܘܪܵܒܵܐ ܛܵܝܸܦܵܐ ܒܹܐܬܵܝܵܐ ܗ݇ܘܼܵܐ ܟܠ ܝܵܘܡܵܐ ܘܦܵܐܸܫ ܗ݇ܘܼܵܐ ܬܘܼܠܡܸܕܵܐ ܠܡܵܪܲܢ. ܘܡ̣ܢ ܕܗܵܝܓܵܗ ܪܵܒܵܐ ܦܝܼܫܠܹܗ ܚܘܼܠܸܢܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣: ܬܘܼܚܡܸܢܹܐ ܕܒܵܢܹܐ ܥܹܕܬܵܐ: ܪܵܒܵܐ ܪܘܝܼܚܵܬܵܐ ܘܓܘܼܪܬܵܐ ܘܫܲܦܝܼܪܬܵܐ ܒܒܸܢܝܵܢܘܼܗ̇. ܣܵܒܵܒ ܙܥܘܿܪܬܵܐ ܗ݇ܘܼܵܐ ܥܹܕܬܵܐ ܕܐܝܼܬ ܗ݇ܘܼܵܐ ܠܗ݇ܘܿܢ ܒܗ̇ܘ ܙܲܒ̣ܢܵܐ. ܘܗܵܝܓܵܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܗܵܕܟ̣ܵܐ ܟܲܕ ܐܵܢܝܼ ܦܝܼܫܠܗ݇ܘܿܢ ܬܘܼܓܒܸܪܹ̈ܐ ܒܐܝܼܕܵܬ̈ܘܼܗܝ ܡ̣ܢ ܫܵܦܵܩܲܬ ܐܲܠܵܗܵܝܬܵܐ: ܣܘܼܦܝܵܝܠܹܗ ܠܐ݇ܢܵܫܹ̈ܐ ܐܵܢܝܼ ܕܟܠܲܝܗܝ ܦܝܼܫܠܗ݇ܘܿܢ ܬܘܼܠܡܸܕܹ̈ܐ ܠܫܵܦܵܩܲܬ ܕܡܵܪܲܢ: ܘܗ̇ܘ ܕܸܥܪܹܗ ܕܐܵܙܸܠ ܗ݇ܘܼܵܐ ܠܕܘܼܟܬܵܐ ܕܟܹܐ ܚܲܝܝܼ ܗܘܼܵܐ. ܘܗܵܝܓܵܗ ܐ݇ܡܸܪܹܗ ܐܸܠܹܗ ܦܵܘܠܘܿܣ ܗ̇ܘ ܕܝܑܼܠܹܗ ܩܲܪܕܘܿܢ: ܣܵܒܵܒ ܗܵܕܟ̣ܵܐ ܡܘܼܬܸܒ̣ܠܹܗ ܫܸܡܹܗ ܓܵܘ ܥܡܵܕܹܗ ܘܠܒܪܘܿܢܹܗ ܝܲܐܢܝܼ: ܘܐ݇ܡܸܪܹܗ ܐܸܠܹܗ: ܡܵܪܝܼ: ܐܝܼܡܵܢ ܦܵܩܘܿܕܹܐ ܝ݇ܘܸܬܿ ܕܐܵܙܲܠ݇ܚ ܐܵܢܵܐ ܘܒܪܘܿܢܝܼ: ܘܦܵܝܫܲܚ ܒܘܼܪ̈ܟ̣ܹܐ ܡ̣ܢ ܟܠܲܝܗܝ ܐܲܚܘܿܢܘܵܬܹ̈ܐ؟ ܗܵܝܓܵܗ ܩܲܕܝܼܫܵܐ ܐ݇ܡܸܪܹܗ ܐܸܠܹܗ: ܠܲܝܬ ܡܲܟܠܵܝܬܵܐ: ܟܠ ܐܝܼܡܵܢ ܕܒܲܣܡܵܠܘܼܟܼ ܠܹܐܬܵܝܵܐ ܬܵܐ. ܗܵܝܓܵܗ ܒܘܼܪܟ̣ܵܝܠܹܗ ܩܲܕܝܼܫܵܐ ܘܡܘܼܚܙܝܼܵܝܠܹܗ ܫܪܵܪܵܐ ܕܗܲܝܡܵܢܘܼܬܵܐ. ܘܝܘܼܗ݇ܒ̣ܵܝܠܹܗ ܚܲܝܠܵܐ ܒܡܲܠܦܵܢܘܼܬܵܐ ܘܒܗܹܡܸܙܡܵܢ. ܫܒ̣ܝܼܩܵܝܠܹܗ: ܘܐ݇ܙܸܠܹܗ ܠܛܘܼܪܵܐ ܠܕܘܼܟܬܵܐ ܕܚܲܝܘܼܬܹܗ.
ܘܡ̣ܢ ܒܵܬ݇ܪ ܥܸܣܪܵܐ ܝܵܘܡܵܢܹ̈ܐ: ܐܵܗܵܐ ܦܵܘܠܘܿܣ ܗܕܝܼܪܵܐ ܗ݇ܘܼܵܐ ܕܐܵܙܸܠ ܗ݇ܘܼܵܐ ܠܥܘܼܡܪܵܐ ܥܲܡ ܟܠܲܝܗܝ ܒܢܘܿܢܹ̈ܐ ܕܒܲܝܬܹܗ: ܘܥܲܡ ܒܲܟ̣ܬܹܗ ܡܲܪܝܲܡ. ܐܝܼܢܵܐ ܩܘܼܘܸܡܠܹܗ ܒܗ̇ܘ ܠܲܝܠܹܐ ܒܪܘܿܢܹܗ ܝܲܐܢܝܼ ܦܝܼܫܠܹܗ ܥܘܼܓ̰ܸܙܵܐ ܒܡܲܪܥܵܐ ܕܡܲܥܝܹ̈ܐ. ܐܵܗܵܐ ܦܘܼܩܸܕܠܹܗ ܕܡܲܬܒ̣ܝܼܠܹܗ ܥܲܠ ܚܲܕ݇ ܗܲܝܘܵܢ ܘܟܠ ܡܸܢܕܝܼ ܗܘܼܕܸܪܹܗ ܕܐܵܙܠ݇ܝܼ ܩܵܕ݇ܡܘܼܗܝ ܠܥܘܼܡܪܵܐ ܟܲܕ ܐܵܡܸܪ ܐܸܠܲܝܗܝ ܕܐܵܢܵܐ ܒܸܬ ܦܵܝܫܸܢ ܥܲܡ ܝܵܠܵܕ݇ܐ: ܗܲܠ ܕܚܲܕ݇ܟ̰ܵܐ ܫܵܩܸܠ ܢܵܦܲܣ: ܘܒܸܬ ܐܵܬܲܚ ܐܵܢܵܐ ܘܝܸܡܹܗ. ܒܢܲܝ̈ ܒܲܝܬܹܗ. ܥܒ̣ܸܕܠܗ݇ܘܿܢ ܐܲܝܟܼ ܕܦܘܼܩܸܕܠܹܗ ܐܸܠܲܝܗܝ. ܐܵܗܵܐ ܦܝܼܫܠܹܗ ܥܲܡ ܝܵܠܵܕ݇ܐ: ܟܲܕ ܒܸܣܦܵܪܵܐ ܗ݇ܘܼܵܐ ܕܓ̰ܲܠܕܹܐ ܒܸܬ ܦܵܐܸܫ ܒܣܝܼܡܵܐ ܝܵܠܵܕ݇ܐ: ܘܡܲܪܥܵܐ ܒܘܼܫ ܙܵܘܕܵܐ ܚܲܠܘܼܢܹܐ ܗ݇ܘܼܵܐ ܥܲܠܘܼܗܝ. ܐܝܼܢܵܐ ܐܵܗܵܐ ܒܸܚܫܵܒ̣ܵܐ ܗ݇ܘܼܵܐ: ܕܡ̣ܢ ܣܵܒܵܒ ܕܡܹܐܟ̣ܘܼܠܬܵܐ ܩܘܼܘܸܡܠܹܗ ܐܵܗܵܐ ܡܲܪܥܵܐ. ܐܝܼܢܵܐ ܝܵܠܕ݇ܐ ܒܘܼܫ ܙܵܘܕܵܐ ܦܝܵܫܵܐ ܗ݇ܘܼܵܐ ܥܘܼܓ̰ܸܙܵܐ ܡ̣ܢ ܡܲܪܥܵܐ. ܘܒܓ̰ܲܠܕܘܼܬܵܐ ܬܘܼܚܡܸܢܹܐ ܘܐ݇ܡܸܪܹܗ: ܐܵܗܵܐ ܦܸܠܚܵܢܵܐ ܕܣܵܛܵܢܵܐ ܝ݇ܠܹܗ: ܕܒܸܫܩܵܠܵܐ ܝ݇ܠܹܗ ܦܸܪܣܲܬ ܘܒܵܥܹܐ ܕܡܥܲܪܩܸܠܝܼ ܡ̣ܢ ܕܐܵܢܝܼ ܩܲܕܝܼܫܹ̈ܐ. ܘܒܓ̰ܲܠܕܘܼܬܵܐ ܦܘܼܩܸܕܠܹܗ ܕܡܲܬܒ̣ܝܼ ܠܹܗ ܥܲܠ ܚܡܵܪܵܐ ܘܝ݇ܬܸܒ̣ܠܹܗ: ܘܦܠܸܛܠܹܗ ܕܐܵܬܹܐ ܠܥܘܼܡܪܵܐ: ܗ̇ܘ ܘܒܲܟ̣ܬܹܗ ܐܲܝܟܼ ܥܸܣܪܵܐ ܐ݇ܢܵܫܹ̈ܐ ܡ̣ܢ ܒܢܲܝ̈ ܒܲܝܬܹܗ. ܘܦܘܼܩܸܕܠܹܗ ܠܚܲܕ݇ ܡ̣ܢ ܝܵܠ̈ܕ݇ܘܼܗܝ: ܕܛܵܥܸܢܹܗ ܠܝܵܠܵܕ݇ܐ ܩܵܕ݇ܡܘܼܗܝ ܥܲܠ ܗܲܝܘܵܢ: ܣܵܒܵܒ ܠܹܐ ܗ݇ܘܼܵܐ ܡܨܵܝܵܐ ܡ̣ܢ ܥܲܓ̰ܲܙܬܹܗ ܕܡܲܪܥܵܐ. ܕܐܲܚܟ̰ܝܼ ܝܵܬܸܒ̣ ܥܲܠ ܗܲܝܘܵܢ. ܟܲܕ ܪܘܼܚܩܸܢܘܿܢ ܚܲܕ݇ܟ̰ܵܐ ܡ̣ܢ ܡܕܝܼܢ݇ܬܵܐ: ܚܘܼܠܸܢܹܗ ܪܵܒܵܐ ܥܲܠܘܼܗܝ ܡܲܪܥܵܐ. ܐܝܼܢܵܐ ܒܵܒܘܼܗܝ ܟܲܕ ܚܙܹܐܠܹܗ ܕܩܘܼܪܒܵܐ ܗ݇ܘܼܵܐ ܠܡܵܘܬܵܐ: ܫܘܼܒܸܚܠܹܗ ܠܐܲܠܵܗܵܐ ܘܐ݇ܡܸܪܹܗ: ܕܡܵܪܲܢ ܝ݇ܠܹܗ ܐܸܢ ܟܹܐ ܡܲܚܹܐ ܘܐܸܢ ܟܹܐ ܡܲܡܝܸܬ. ܘܦܘܼܩܸܕܠܹܗ ܠܝܵܠ̈ܕ݇ܘܼܗܝ ܕܐܵܙܠ݇ܝܼ ܒܡܲܠܝܵܙܬܵܐ. ܡ̣ܢ ܩܵܕ݇ܡ ܕܡܵܐܸܬ ܝܵܠܵܕ݇ܐ. ܐܝܼܢܵܐ ܒܥܕܵܢܵܐ ܕܡܛܹܐܠܗ݇ܘܿܢ ܠܟܸܣ ܡܵܬܵܐ ܕܡܥܲܪܹ̈ܐ ܩܘܼܪܒܸܢܹܐ ܝܵܠܵܕ݇ܐ ܕܫܵܢܹܐ ܡ̣ܢ ܚܲܝܹ̈ܐ: ܛܠܸܒܠܹܗ ܕܫܵܬܹܐ ܡܝܼ̈ܵܐ. ܘܟܲܕ ܩܘܼܪܒܸܢܘܿܢ ܕܝܵܗ݇ܒ̣ܝܼܠܹܗ ܡܝܼ̈ܵܐ ܕܫܵܬܹܐ: ܗܲܪ ܒܗ̇ܝ ܣܵܥܲܬ ܟܸܦܠܹܗ ܡ̣ܢ ܓ̰ܘܼܢܓ̰ܵܪܵܐ ܨܠܹܐܠܗ݇ܘܿܢ ܕܸܡܥܹ̈ܐ ܕܥܲܝܢ̈ܘܼܗܝ ܘܡܝܼܬܠܹܗ. ܟܲܕ ܐܝܼܬ ܟܹܐ ܐܵܡܪܝܼ: ܕܡ̣ܢ ܟܵܐܪ ܕܚܲܪܵܫܘܼܬܵܐ ܦܝܼܫܠܹܗ ܩܛܝܼܠܵܐ ܡ̣ܢ ܡܲܪ̈ܩܝܘܿܢܹܐ. ܘܐܝܼܬ ܟܹܐ ܐܵܡܪܝܼ: ܕܫܬܹܐܠܹܗ ܚܲܡܪܵܐ ܒܠܲܝܠܹܐ: ܗ̇ܘ ܕܛܥܝܼܡܹܗ ܗ݇ܘܼܵܐ ܚܘܼܘܵܐ. ܘܐܸܢ ܗܵܕܟ̣ܵܐ ܘܐܸܢ ܗܵܕܟ̣ܵܐ: ܦܸܠܚܵܢܵܐ ܕܣܛܵܢܵܐ ܗ݇ܘܼܵܐ.
ܐܝܼܢܵܐ ܒܢܲܝ̈ ܒܲܝܬܹܗ ܦܲܪܦܘܼܠܹܐ ܗ݇ܘܼܵܘ ܒܝܼـܹܗ: ܕܕܵܥܪܝܼ ܠܡܕܝܼܢ݇ܬܵܐ ܘܛܲܡܪܝܼܠܹܗ. ܐܝܼܢܵܐ ܐܵܗܵܐ ܐ݇ܡܸܪܹܗ ܐܸܠܲܝܗܝ: ܡ̣ܢ ܩܵܕ݇ܡ ܚܵܙܹܐ ܝ݇ܢܵܐ ܠܩܲܕܝܼܫܵܐ ܡܵܪܝ ܐܵܘܓܹܝܢ ܥܲܡ ܟܠܵܗ̇ ܓ̰ܵܡܵܥܲܬ ܕܐܵܚܘܿܢܘܵܬ̈ܘܼܗܝ: ܠܹܐ ܦܵܐܸܫ ܛܘܼܡܪܵܐ. ܘܐ݇ܙܸܠܹܗ ܗ̇ܘ ܥܲܡ ܒܲܟ̣ܬܹܗ. ܘܐܵܙܠ݇ܝܼ ܗ݇ܘܼܵܘ ܒܐܲܩ̈ܠܵܬܲܝܗܝ. ܘܦܘܼܩܸܕܠܹܗ ܠܚܲܕ݇ ܡ̣ܢ ܝܵܠܹ̈ܕ݇ܐ: ܘܛܥܸܢܹܗ ܥܲܠ ܕܪ̈ܲܥܢܵܢܘܼܗܝ. ܘܟܲܕ ܐ݇ܙܸܠܗ݇ܘܿܢ: ܘܡܘܼܬܸܒ̣ܠܗ݇ܘܿܢ ܩܵܕ݇ܡ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܘܢܦܸܠܗ݇ܘܿܢ ܩܵܕ݇ܡ ܐܲܩܠܵܬ̈ܘܼܗܝ ܒܵܒܘܼܗܝ ܘܡܲܪܝܲܡ ܝܸܡܘܼܗܝ ܒܵܟ̣ܝܼ ܗ݇ܘܼܵܘ ܘܐܵܡܪܝܼ ܠܩܲܕܝܼܫܵܐ: ܗܵܐ ܕܠܵܐ ܚܫܸܚܠܲܢ ܕܥܲܡ ܒܪܘܿܢܲܢ ܒܚܲܕܘܼܬܵܐ ܕܐܵܬܲܚ ܠܟܸܣܠܵܘܟ̣ܘܿܢ. ܐܵܕܝܼܵܐ ܐܸܠܵܘܟ̣ܘܿܢ ܣܵܦܘܿܝܹܐ ܝ݇ܘܲܚ: ܡܸܢܕܝܼ ܕܒܲܣܡܵܠܵܘܟ̣ܘܿܢ ܥܒ̣ܘܿܕܘܼܢ ܐܸܠܹܗ. ܣܵܒܵܒ ܒܝܼܕܲܥܝܵܐ ܝ݇ܘܲܚ ܟܠ ܡܸܢܕܝܼ ܕܛܲܠܒܝܼܬܘܿܢ ܡ̣ܢ ܐܲܠܵܗܵܐ ܒܸܬ ܝܵܗ݇ܒ̣ܸܠܵܘܟ̣ܘܿܢ. ܐܝܼܢܵܐ ܐܵܗܵܐ ܩܲܕܝܼܫܵܐ ܚܲܕ݇ ܓ̰ܘܼܘܵܒ ܠܵܐ ܝܘܼܗ݇ܒ̣ܸܠܹܗ ܐܸܠܲܝܗܝ: ܡܣܵܒܵܒ ܕܒ̣ܝܼܩܬܘܼܗ ܗ݇ܘܼܵܐ ܦܵܫܲܡܬܵܐ ܓܘܼܪܬܵܐ: ܒܘܼܬ ܥܝܼܩܘܼܝܵܬܹ̈ܐ ܕܐܵܢܝܼ ܡܵܘܕܝܵܢܹ̈ܐ. ܣܵܒܵܒ ܒܝܼܕܵܥܝܵܐ ܗ݇ܘܼܵܐ ܕܗ݇ܘܹܐܠܹܗ ܐܲܬܪܵܐ ܠܕܘܼܪܵܫܵܐ ܠܐܵܢܝܼ ܡܲܪ̈ܩܝܘܿܢܹܐ ܐܘܼܦ ܠܚܲܢܦܹ̈ܐ ܘܠܝܼܗܘܼܕܵܝܹ̈ܐ ܚܲܒ̣ܪ̈ܵܘܵܬܲܝܗܝ: ܒܹܐܡܵܪܵܐ ܕܗܵܐ ܥܸܣܪܵܐ ܝܵܘܡܵܢܹ̈ܐ ܡ̣ܢ ܒܵܬ݇ܪ ܒܵܣܲܡܬܹܗ ܠܵܐ ܚܝܼܠܹܗ. ܐܝܼܢܵܐ ܫܡܸܥܠܹܗ ܗܵܟܸܡ ܐܲܚܘܿܢܹܗ ܕܦܵܘܠܘܿܣ ܒܘܼܬ ܡܵܘܬܵܐ ܕܝܵܠܵܕ݇ܐ ܒܡܲܠܝܵܙܬܵܐ ܕܪܟܸܒ̣ܠܹܗ ܥܲܠ ܣܘܼܣܵܐ ܘܐ݇ܬܹܐܠܹܗ ܠܥܘܼܡܪܵܐ: ܘܥܲܡܹܗ ܟܠܲܝܗܝ ܪܹ̈ܫܵܢܹܐ ܕܡܕܝܼܢ݇ܬܵܐ: ܕܛܲܡܪܝܼܠܹܗ ܠܝܵܠܵܕ݇ܐ.
ܐܝܼܢܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܦܘܼܩܸܕܠܹܗ ܕܡܵܚܹܐܠܹܗ ܢܵܩܘܿܫܵܐ ܕܓ̰ܲܡܥܝܼ ܣܵܒ̣ܹ̈ܐ ܥܲܡ ܟܠܵܗ̇ ܐܲܚܘܿܢܘܵܬܹ̈ܐ. ܦܝܼܫܠܗ݇ܘܿܢ ܓ̰ܸܡܥܝܹ̈ܐ ܟܠܲܝܗܝ ܐܲܚܘܿܢܘܵܬܹ̈ܐ: ܦܘܼܩܕܵܝܠܹܗ ܕܡܲܩܪܸܒ̣ܝܼ ܨܠܘܿܬܵܐ ܠܡܵܪܲܢ: ܘܦܲܪܦܸܠܝܼ ܒܝܼـܹܗ ܕܝܵܗ݇ܒ̣ܸܠܗ݇ܘܿܢ ܚܲܝܹ̈ܐ ܕܝܵܠܵܕ݇ܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܛܥܸܢܹܗ ܠܝܵܠܵܕ݇ܐ ܥܲܠ ܕܪ̈ܲܥܢܵܢܘܼܗܝ: ܘܡܘܼܬܸܒ̣ܠܹܗ ܠܥܸܠܸܠ ܡ̣ܢ ܕܲܪܓ̣ܵܐ [ܦܵܠܵܟܵܢܵܐ] ܒܬܲܪܥܵܐ ܕܩܲܢܟܹ̈ܐ: ܟܲܕ ܐܝܼܕܵܬ̈ܘܼܗܝ ܐ݇ܣܝܼܪܹ̈ܐ ܗ݇ܘܼܵܘ ܠܥܸܠܸܠ ܡ̣ܢ ܨܲܕܪܘܼܗܝ. ܘܒܪܸܟܠܹܗ ܩܲܕܝܼܫܵܐ ܒܨܠܘܿܬܵܐ ܘܗܵܕܟ̣ܵܐ ܐ݇ܡܸܪܹܗ: ܝܵܐ ܡܵܪܲܢ ܝܼܫܘܿܥ ܡܫܝܼܚܵܐ ܐܵܣܝܵܐ ܛܵܒ̣ܵܐ ܗ̇ܘ ܐ݇ܬܹܐܠܹܗ ܩܵܐ ܚܲܝܹ̈ܐ ܕܡܵܝܘܿܬܹ̈ܐ ܘܣܘܼܚܒܸܪܹܗ ܠܟܝܵܢܲܢ ܡܸܪܥܝܵܐ ܕܡܲܦܫܘܼܛܹܗ ܗ݇ܘܼܵܐ ܘܗ̇ܘ ܪܘܼܦܝܵܐ ܗ݇ܘܼܵܐ ܒܥܵܪ݇ܣܵܐ ܕܡܵܘܬܵܐ. ܘܡܘܼܩܸܡܠܹܗ ܡܼܢ ܢܦܲܠܬܹܗ: ܘܩܘܼܘܸܠܹܗ ܐܸܠܹܗ ܚܲܝܹ̈ܐ ܘܠܵܐ ܡܵܘܬܵܐ. ܘܗ̇ܘ ܩܵܠܵܐ ܚܵܝܵܐ ܕܡܘܼܩܘܸܚܠܹܗ ܒܥܘܼܡܩܵܐ ܕܫܝܘܿܠ: ܘܦܘܼܩܸܕܠܹܗ ܠܡܵܘܬܵܐ ܩܵܛܘܿܠܵܐ: ܕܡܲܕܥܸܪ ܠܠܵܥܵܙܲܪ ܡܝܼܬܵܐ ܡ̣ܢ ܒܵܬ݇ܪ ܐܲܪܒܥܵܐ ܝܵܘܡܵܢܹ̈ܐ. ܗܹܐ ܝܵܐ ܡܵܪܝܵܐ ܚܲܝܠܬܵܢܵܐ: ܫܡܸܥܝܼ ܒܩܵܠܵܐ ܕܪܹܓܘܼܟܼ ܐܸܕܝܘܿܡ ܝܵܘܡܵܐ: ܡܲܕܥܸܪܹܗ ܠܐܵܗܵܐ ܝܵܠܵܕ݇ܐ ܡܝܼܬܵܐ ܠܚܲܝܹ̈ܐ. ܘܗ̇ܝ ܕܥܒ̣ܸܕܠܘܼܟܼ ܒܐܝܼܕܵܐ ܕܪܹ̈ܓܵܘܵܬܘܼܟܼ ܐܹܠܝܼܵܐ ܘܐܹܠܝܼܫܲܥ: ܘܗ̇ܝ ܕܥܒ̣ܸܕܠܘܼܟܼ ܒܐܝܼܕܹܗ ܕܛܘܼܒ̣ܵܢܵܐ ܦܲܛܪܘܿܣ ܒܡܵܘܬܵܗ̇ ܕܛܒ̣ܝܼܬܵܐ ܩܵܕ݇ܡ ܟܠܹܗ ܟܸܢܫܵܐ ܕܩܲܪ̈ܝܼܒܵܝܹܐ: ܡܘܼܕܸܥܪܵܠܘܼܟܼ ܠܚܲܝܹ̈ܐ ܘܝܘܼܗ݇ܒ̣ܵܠܘܼܟܼ ܐܸܠܲܝܗܝ ܟܲܕ ܚܲܝܬܵܐ: ܘܐܘܼܦ ܐܵܕܝܼܵܐ ܕܥܵܒ̣ܸܕ ܚܲܝܠܘܼܟܼ ܒܡܲܩܝܵܡܬܵܐ ܕܐܵܗܵܐ ܝܵܠܵܕ݇ܐ. ܠܹܐ ܗ݇ܘܼܵܐ ܒܘܼܬ ܕܝܼܝܼ ܙܲܒܘܼܢ ܘܫܲܩܝܼ ܘܦ̰ܵܩܝܼܪܵܐ ܝܵܐ ܡܵܪܝܼ: ܐܸܠܵܐ ܒܘܼܬ ܫܸܡܘܼܟܼ ܕܦܵܐܸܫ ܚܩܝܼܪܵܐ: ܘܥܹܕܬܘܼܟܼ ܦܵܝܫܵܐ ܪܝܼܡܬܵܐ: ܘܓܲܪܘܸܣ ܚܲܝܠܹܗ ܕܨܠܝܼܒ̣ܘܼܟܼ ܙܲܟܵܝܵܐ ܒܟܠܲܝܗܝ ܛܵܝܸܦܹ̈ܐ ܘܡܸܠܲܬܹ̈ܐ ܘܠܸܫܵܢܹ̈ܐ. ܕܝܵܕܥܝܼܠܘܼܟܼ ܟܠܲܝܗܝ ܛܠܝܼܩܹ̈ܐ: ܕܐܵܕܝܼܵܐ ܕܠܹܐ ܝܵܕܥܝܼܠܘܼܟܼ: ܕܐܲܢ݇ܬܿ ܝ݇ܘܸܬܿ ܐܲܠܵܗܵܐ ܫܲܪܝܼܪܵܐ ܐܲܚܟ̰ܝܼ: ܕܟܹܐ ܡܲܚܹܐ ܘܟܹܐ ܡܲܡܝܸܬ: ܘܡܲܨܠܹܝܬܿ ܠܫܝܘܿܠ ܘܡܲܣܩܸܬܿ: ܘܓܲܪܘܸܣ ܫܸܡܘܼܟܼ ܒܝܼܝܼ ܘܒܝܵܠܵܕ݇ܐ ܘܒܟܠܲܝܗܝ ܩܵܪ̈ܝܵܢܹܐ ܕܫܸܡܘܼܟܼ ܠܐܵܒܲܕ ܐܲܒܵܕܝܼܢ: ܐܵܡܹܝܢ.
ܥܲܡ ܫܘܼܠܵܡܵܐ ܕܨܠܘܿܬܹܗ ܕܩܲܕܝܼܫܵܐ: ܫܘܼܪܹܐܠܗ݇ܘܿܢ ܕܸܡܥܹ̈ܐ ܕܥܲܝܢ̈ܘܼܗܝ ܒܸܫܦܵܚܵܐ ܥܲܠ ܐܲܪܥܵܐ. ܒܓ̰ܲܠܕܘܼܬܵܐ ܒܟ̣ܹܐܠܹܗ ܩܲܕܝܼܫܵܐ ܩܵܕ݇ܡ ܡܲܕܒ̱ܚܵܐ: ܫܥܸܫܠܹܗ ܝܵܠܵܕ݇ܐ ܐܝܼܕܹܗ ܥܲܠ ܨܲܕܪܘܼܗܝ ܬܪܹܝܢ ܓܵܗܹ̈ܐ ܘܕܸܥܪܹܗ ܩܲܕܝܼܫܵܐ ܠܟܸܣܠܹܗ: ܘܕܒ̣ܸܩܠܹܗ ܒܐܝܼܕܹܗ ܘܐ݇ܡܸܪܹܗ ܐܸܠܹܗ: ܒܪܘܿܢܝܼ ܝܲܐܢܝܼ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܩܘܼܡ݇. ܗܲܪ ܒܗܿܝ ܥܕܵܢܵܐ ܦܬܸܚܠܹܗ ܝܵܠܵܕ݇ܐ ܥܲܝܢ̈ܘܼܗܝ: ܘܓܘܼܫܸܩܠܹܗ ܒܩܲܕܝܼܫܵܐ ܘܒܟܠܹܗ ܟܸܢܫܵܐ. ܘܕܒ̣ܸܩܠܹܗ ܩܲܕܝܼܫܵܐ: ܘܡܘܼܬܸܒ̣ܠܹܗ ܥܲܠ ܦܵܠܵܟܵܢܵܐ: ܘܒܪܸܟܠܹܗ ܐܵܗܵܐ ܩܲܕܝܼܫܵܐ ܟܲܕ ܫܘܼܟܸܪܹܗ ܠܡܵܪܲܢ. ܘܩܸܡܠܹܗ ܘܓܪܸܫܠܹܗ ܒܐܝܼܕ̈ܘܼܗܝ: ܘܡܘܼܩܸܡܠܹܗ ܥܲܠ ܐܲܩܠܵܬ̈ܘܼܗܝ. ܐܝܼܢܵܐ ܗܵܟܹܡ ܘܟܠܲܝܗܝ ܐܵܢܝܼ ܕܥܲܡܹܗ: ܗ݇ܘܹܐܠܗ݇ܘܿܢ ܒܙܕܥܘܿܬܵܐ ܓܘܼܪܬܵܐ: ܘܒܸܫܥܵܫܵܐ ܗ݇ܘܼܵܘ ܡ̣ܢ ܠܵܘܓ̰ܹܗ ܕܩܲܕܝܼܫܵܐ. ܗ̇ܘ ܕܠܹܐ ܗ݇ܘܼܵܐ ܐܲܝܟܼ ܒܲܪܢܵܫܵܐ ܒܸܚܙܵܝܘܼܗܝ: ܐܸܠܵܐ ܐܲܝܟܼ ܡܲܠܲܐܟ̣ܵܐ ܕܐܲܠܵܗܵܐ ܗ݇ܘܼܵܐ. ܘܡܘܼܩܘܸܚܠܗ݇ܘܿܢ ܟܠܲܝܗܝ ܬܠܵܬ݇ܐ ܓܵܗܹ̈ܐ: ܩܲܕܝܼܫ ܩܲܕܝܼܫ ܩܲܕܝܼܫ ܐܲܢ݇ܬܿ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ: ܕܡܠܝܼܬܵܐ ܫܡܲܝܵܐ ܘܐܲܪܥܵܐ ܡ̣ܢ ܬܸܫܒܘܿܚܝܵܬ̈ܘܼܟܼ ܘܓܲܢ݇ܒܵܪ̈ܘܼܝܵܬܘܼܟܼ. ܘܕܒ̣ܸܩܠܹܗ ܩܲܕܝܼܫܵܐ ܠܝܵܠܵܕ݇ܐ: ܘܝܘܼܗ݇ܒ̣ܸܠܹܗ ܠܒܵܒܘܼܗܝ ܘܠܝܸܡܘܼܗܝ. ܘܐܲܢܹ̈ܐ ܟܲܕ ܦܲܪ̈ܦܘܼܠܹܐ ܗ݇ܘܼܵܘ ܒܩܲܕܝܼܫܵܐ: ܕܦܵܐܸܫ [ܝܵܠܵܕ݇ܐ] ܠܟܸܣܠܹܗ: ܐܝܼܢܵܐ ܐܵܗܵܐ ܐ݇ܡܸܪܹܗ: ܕܠܹܐ ܝ݇ܠܵܗ̇ ܚܫܸܚܬܵܐ ܠܝܵܠܵܕ݇ܐ ܒܐܲܢܹ̈ܐ ܫܸܢܹ̈ܐ ܕܝܑܼܠܹܗ ܕܗܵܘܹܐ ܓܵܘ ܥܘܼܡܪܵܐ. ܐܝܼܢܵܐ ܡܲܥܒ̣ܸܪܘܿܢ ܠܹܗ ܠܡܲܕܪܵܣܵܐ. ܕܬܵܡܵܐ ܝܵܠܸܦ ܝܘܼܠܦܵܢܵܐ ܗܲܠ ܕܡܵܛܹܐ ܠܫܸܢܹ̈ܐ ܕܓ̰ܘܲܢܩܘܼܬܵܐ: ܡ̣ܢ ܒܵܬ݇ܪ ܗܵܕܵܐ ܐܵܬܹܐ ܘܗܵܘܹܐ ܓܵܘ ܥܘܼܡܪܵܐ.
ܥܒ̣ܸܕܠܗ݇ܘܿܢ ܒܗ̇ܘ ܝܵܘܡܵܐ ܚܲܕ݇ ܡܸܫܬܘܼܬܵܐ ܓܘܼܪܬܵܐ: ܗܵܟܸܡ ܘܐܵܢܝܼ ܕܥܲܡܹܗ ܥܲܡ ܟܠܹܗ ܟܸܢܫܵܐ ܕܐܲܚܘܿܢܘܵܬܹ̈ܐ. ܨܸܡܠܗ݇ܘܿܢ ܗܲܠ ܠܪܲܡܫܵܐ ܘܠܵܐ ܛܥܸܡܠܗ݇ܘܿܢ ܗܸܟ̰ ܡܸܢܕܝܼ: ܟܲܕ ܡܫܵܒܘܼܚܹܐ ܗ݇ܘܼܵܘ ܘܓܲܪܘܘܼܣܹܐ ܠܐܲܠܵܗܵܐ ܒܡܲܙܡܘܿܪܹ̈ܐ ܘܒܣܓ̣ܵܕܝܵܬܹ̈ܐ ܘܒܚܘܼܒܵܐ: ܕܡܵܪܲܢ ܡܘܼܚܫܸܚܵܝܠܹܗ ܠܗ̇ܝ ܫܵܦܵܩܲܬ: ܕܐܲܝܟܼ ܕܐܵܗܵܐ ܥܘܼܡܪܵܐ ܗܵܘܹܐ ܓܵܘ ܦܢܝܼܬܲܝܗܝ. ܘܗܸܟ̰ ܐ݇ܢܵܫܵܐ ܠܵܐ ܛܥܸܡܠܹܗ ܡܸܢܕܝܼ ܒܗ̇ܘ ܪܲܡܫܵܐ: ܐܸܠܵܐ ܟܠܲܝܗܝ ܡܘܼܒܝܸܬܠܗ݇ܘܿܢ ܟܲܕ ܨܝܼܡܹ̈ܐ. ܡܘܼܥܒ̣ܸܪܘܿܢ ܗ̇ܘ ܠܲܝܠܹܐ ܟܲܕ ܟܠܲܝܗܝ ܓ̰ܸܡܥܝܹ̈ܐ ܗ݇ܘܼܵܘ ܒܚܸܩܪܵܐ ܒܬܸܫܒܘܿܚܝܵܬܹ̈ܐ ܘܒܙܡܲܪ̈ܝܵܬܹܐ ܕܪܘܼܚܵܐ ܩܲܕܝܼܫܵܐ: ܟܲܕ ܥܒ̣ܸܕܠܗ݇ܘܿܢ ܚܲܝܠܵܐ ܥܲܠ ܓܵܢܲܝܗܝ. ܕܗܲܠ ܕܫܲܪܸܟܝܼ ܒܐ݇ܪ̈ܵܙܹܐ ܩܲܕܝܼܫܹ̈ܐ: ܗܸܟ̰ ܚܲܕ݇ ܐ݇ܢܵܫܵܐ ܡܸܢܲܝܗܝ ܠܵܐ ܝܵܬܸܒܼ ܥܲܠ ܐܲܪܥܵܐ: ܥܲܓ̰ܒܝܼ ܗ݇ܘܼܵܘ: ܥܲܠ ܡܸܢܕܝܼ ܕܗ݇ܘܹܐܠܹܗ. ܒܪܹܫܵܢܘܼܬܲܝܗܝ ܟܸܠܝܵܐ ܗ݇ܘܼܵܐ ܐܵܓ̣ܘܿܢܸܣܛܵܐ ܙܸܪܲܢܓ ܘܣܵܒ̣ܵܐ ܠܸܒܵܢܵܐ: ܡܵܣܘܿܩܹܐ ܗܲܠܸܠܘܼܝܵܐ ܘܪܘܼܡܪܵܡܵܐ ܒܩܵܠܵܐ ܪܵܡܵܐ ܟܠܹܗ ܗ̇ܘ ܠܲܝܠܹܐ ܘܝܵܘܡܵܐ ܗܲܠ ܠܣܵܥܲܬ ܬܸܫܥܵܐ. ܘܟܲܕ ܫܩܸܠܗ݇ܘܿܢ ܩܘܼܪܒܵܢܵܐ: ܦܘܼܩܕܵܝܠܹܗ ܩܲܕܝܼܫܵܐ ܕܝܵܬܒ̣ܝܼ ܘܐܵܟ̣ܠܝܼ ܡܹܐܟ̣ܘܼܠܬܵܐ ܥܝܵܕܵܝܬܵܐ. ܘܟܲܕ ܒܹܐܟ̣ܵܠܵܐ ܗ݇ܘܼܵܘ ܗܘܹܐܠܗ݇ܘܿܢ ܡܥܵܓ̰ܘܼܒܹܐ: ܘܠܹܐ ܗ݇ܘܼܵܐ ܒܹܐܙܵܠܵܐ ܚܲܝܠܵܐ ܕܗ̇ܝ ܥܵܓ̰ܝܼܒܘܼܬܵܐ ܡ̣ܢ ܩܵܕ݇ܡ ܥܲܝܢܲܝ̈ܗܝ. ܗܵܝܓܵܗ ܦܝܼܫܠܗ݇ܘܿܢ ܒܘܼܪ̈ܟ̣ܹܐ ܡ̣ܢ ܩܲܕܝܼܫܵܐ: ܦܝܼܫܠܗ݇ܘܿܢ ܫܸܪ̈ܝܹܐ ܕܐܵܙܠ݇ܝܼ ܠܡܕܝܼܢ݇ܬܵܐ: ܟܲܕ ܝܘܼܗ݇ܒ̣ܵܝܠܹܗ ܥܵܩܸܠܕܵܪܘܼܬܵܐ ܕܗܹܡܸܙܡܵܢ ܐܘܼܦ ܨܠܵܘܵܬܹ̈ܐ. ܘܟܲܕ ܐ݇ܬܹܐܠܗ݇ܘܿܢ ܘܡܘܼܕܸܥܠܗ݇ܘܿܢ ܓܵܘ ܡܕܝܼܢ݇ܬܵܐ: ܒܓ̰ܲܠܕܘܼܬܵܐ ܟܠܵܗ̇ ܡܕܝܼܢ݇ܬܵܐ ܫܥܝܼܫܠܵܗ̇: ܓܲܒ̣ܪܹ̈ܐ ܘܒܲܟ̣ܬܵܬܹ̈ܐ: ܘܣܵܒ̣ܹ̈ܐ ܘܓ̰ܘܲܢܩܹ̈ܐ ܘܝܲܠܘܼܕܹ̈ܐ ܙܥܘܿܪܹ̈ܐ ܟܲܕ ܒܹܐܬܵܝܵܐ ܗ݇ܘܼܵܘ ܕܲܣܬܹ̈ܐ ܕܲܣܬܹ̈ܐ ܠܟܸܣ ܩܲܕܝܼܫܵܐ. ܟܡܵܐ ܡ̣ܢ ܡܸܪ̈ܥܝܹܐ ܒܵܣܘܿܡܹܐ ܗ݇ܘܼܵܐ: ܠܲܝܬ ܗ݇ܘܼܵܐ ܚܲܕ݇ ܐ݇ܢܵܫܵܐ ܕܡܵܨܹܐ ܗ݇ܘܼܵܐ ܕܚܲܓ̰ܒܸܢ ܗ݇ܘܼܵܐ ܠܗ݇ܘܿܢ. ܘܐܵܢܝܼ ܩܵܐ ܥܕܵܢܵܐ ܝܵܪܝܼܟ̣ܬܵܐ ܡܸܪ̈ܥܝܹܐ ܗ݇ܘܼܵܘ ܒܡܲܪ̈ܥܹܐ ܕܫܹܐܕܹ̈ܐ: ܒܓ̰ܲܠܕܘܼܬܵܐ ܥܒ̣ܸܪܘܿܢ ܘܟܠܹܐܠܗ݇ܘܿܢ ܩܵܕ݇ܡܘܼܗܝ: ܦܵܝܫܝܼ ܗ݇ܘܼܵܘ ܒܣܝܼܡܹ̈ܐ. ܘܐܘܼܦ ܫܸܡܵܢܲܝ̈ܗܝ ܕܟܠܲܝܗܝ ܠܹܐ ܝ݇ܘܸܢ ܒܝܼܕܲܥܝܵܐ:
ܐܝܼܢܵܐ ܗܵܟܸܡ ܗܲܪ ܒܗ̇ܝ ܥܕܵܢܵܐ ܟܬܸܒ̣ܠܹܗ ܘܡܘܼܕܸܥܠܹܗ ܠܩܘܼܣܛܲܢܛܝܼܢܘܿܣ ܡܲܠܟܵܐ ܒܘܼܬ ܟܠܲܝܗܝ ܢܝܼܫܲܢܩܹ̈ܐ ܩܲܕ݇ܡܵܝܹ̈ܐ ܕܥܒ̣ܸܕܠܹܗ ܐܲܠܵܗܵܐ ܒܐܝܼܕܹܗ ܕܩܲܕܝܼܫܵܐ: ܐܘܼܦ ܒܘܼܬ ܩܝܵܡܬܵܐ ܕܒܪܘܿܢܵܐ ܕܐܲܚܘܿܢܹܗ. ܐܝܼܢܵܐ ܡܲܠܟܵܐ ܩܘܼܣܛܲܢܛܝܼܢܘܿܣ ܒܥܕܵܢܵܐ ܕܩܘܼܒܸܠܹܗ ܐܸܓܲܪ̈ܝܵܬܹܐ ܘܩܸܪܝܵܝܠܹܗ: ܩܸܡܠܹܗ ܘܫܘܼܒܸܚܠܹܗ ܘܫܘܼܟܸܪܹܗ ܠܡܵܪܲܢ. ܘܗܵܕܟ̣ܵܐ ܟܬܸܒ̣ܠܹܗ ܐܸܓܲܪܬܵܐ ܩܵܐ ܗܵܟܸܡ: ܕܬܠܵܬ݇ܐ ܩܢܘܿܡܹ̈ܐ ܐܝܼܬ ܓܵܘ ܒܪܝܼܬܵܐ: ܘܐܲܝܟܼ ܣܬܘܿܢܹ̈ܐ ܡܘܼܩܸܡܵܝܠܹܗ ܡܵܪܲܢ ܒܐܲܪܒܥܵܐ ܓܹܒܵܢܹ̈ܐ: ܟܲܕ ܒܲܗܪܘܼܢܹܐ ܝ݇ܢܵܐ ܡ̣ܢ ܠܵܘܓ̰̈ـܹܐ ܫܡܲܝܵܢܹ̈ܐ ܐܵܢܝܼ ܕܙܪܸܩܠܗ݇ܘܿܢ ܒܐ݇ܢܵܫܘܼܬܲܢ: ܘܒܲܗܪܘܼܢܹܐ ܝ݇ܢܵܐ ܠܚܝܼܵܠܹ̈ܐ ܚܸܫܟܵܢܹ̈ܐ. ܘܫܩܝܼܠܹ̈ܐ ܝ݇ܢܵܐ ܘܪ̈ܘܼܦܝܹܐ ܡ̣ܢ ܚܝܼܵܠܹ̈ܐ ܘܬܲܚܡܲܢܝܵܬܹ̈ܐ ܚܸܫܟܵܢܹ̈ܐ ܘܠܟܠܲܝܗܝ ܚܲܫܹ̈ܐ ܒܝܼܫܹ̈ܐ: ܕܙܪܸܥܠܹܗ ܒܝܼܲܝܗܝ ܐܲܟܵܪܵܐ ܒܝܼܫܵܐ. ܘܦܵܠܚܝܼ ܗ݇ܘܼܵܘ ܘܕܵܟ̣ܝܼ ܗ݇ܘܼܵܘ ܚܲܩܠܵܬܹ̈ܐ ܕܓܵܢܵܬܲܝ̈ܗܝ: ܘܒܸܙܪܵܥܝܵܐ ܗ݇ܘܼܵܘ ܒܝܼܲܝܗܝ ܒܸܪܙܲܪܥܵܐ ܛܵܒ̣ܵܐ ܕܝܘܼܠܦܵܢܹܗ ܕܝܼܫܘܿܥ ܐܲܠܵܗܲܢ. ܗܵܕܟ̣ܵܐ ܐܲܢܹ̈ܐ ܬܠܵܬ݇ܐ ܐ݇ܢܵܫܹ̈ܐ ܕܥܵܓ̰ܝܼܒܘܼܬܵܐ: ܕܦܝܵܫܵܐ ܗ݇ܘܼܵܘ ܚܸܙܝܹ̈ܐ ܐܲܝܟܼ ܙܲܒܘܼܢܹ̈ܐ: ܐܲܢܹ̈ܐ ܒܸܛܪܵܕܵܐ ܗ݇ܘܼܵܘ ܘܙܲܒܘܼܢܹܐ ܗ݇ܘܼܵܘ ܠܡܲܫܪ̈ܝܵܬܹܐ ܕܓܲܢ݇ܒܵܪܹ̈ܐ ܘܝ݇ܕܸܥܝܹ̈ܐ: ܐܵܢܝܼ ܕܣܢܝܼܩܹ̈ܐ ܝ݇ܢܵܐ ܘܩܵܪ̈ܝܼܒܵܝܹܐ ܕܠܪܵܒܵܐ ܥܒ̣ܸܕܠܗ݇ܘܿܢ ܥܲܬܝܼܪܹ̈ܐ. ܒܐܵܢܝܼ ܬܠܵܬ݇ܐ ܦܵܠܵܫܹ̈ܐ ܡ̣ܢ ܥܕܵܢܵܐ ܕܒܵܠܲܕ ܝܼܗ݇ܘܼܵܐ ܒܝܼܲܝܗܝ ܡܲܠܟܘܼܬܲܢ: ܐܲܢܛܘܿܢܝܼܘܿܣ ܒܐܲܬܪܵܐ ܕܡܸܨܪܹܝܢ: ܘܐܹܠܲܪܝܘܿܢ ܒܣܦܲܪ ܝܲܡܵܐ: ܘܡܵܪܝ ܐܵܘܓܹܝܢ ܕܐ݇ܙܸܠܹܗ ܡ̣ܢ ܡܸܨܪܹܝܢ: ܘܐ݇ܬܹܐܠܹܗ ܘܚܝܼܠܹܗ ܓܵܘ ܦܢܝܼܬܵܘܟ̣ܘܿܢ ܘܒܘܼܗܪܸܢܵܠܹܗ. ܘܒܸܛܠܵܒܵܐ ܝ݇ܘܲܚ ܘܦܲܪܦܘܼܠܹܐ ܒܝܼـܹܗ ܕܨܵܠܹܐ ܨܠܘܿܬܵܐ ܩܵܕ݇ܡ ܡܵܪܲܢ: ܕܦܵܝܫܲܚ ܢܛܝܼܪܹ̈ܐ ܥܲܡ ܟܠܹܗ ܐܘܼܚܕܵܢܵܐ ܕܡܲܠܟܘܼܬܲܢ. ܘܒܝܵܘܡܵܐ ܕܙܲܪ̈ܩܝܼ ܪ̈ܲܚܡܘܼܗܝ ܕܫܸܡܫܵܐ ܕܙܲܕܝܼܩܘܼܬܵܐ ܕܝܼܫܘܿܥ ܡܫܝܼܚܵܐ: ܕܚܲܫܚܲܚ ܥܲܡܲܝܗܝ ܠܡܲܠܟܘܼܬܵܐ ܫܡܲܝܵܢܝܼܬܵܐ: ܒܨܠܵܘܵܬܲܝ̈ܗܝ ܫܸܡܥܝܹ̈ܐ ܠܟܸܣ ܐܲܠܵܗܵܐ. ܐܲܢܹ̈ܐ ܟܬܸܒ̣ܠܹܗ ܡܲܠܟܵܐ ܩܘܼܣܛܲܢܛܝܼܢܘܿܣ ܙܲܟܵܝܵܐ ܩܵܐ ܣܵܒ̣ܵܐ ܡܵܪܝ ܐܵܘܓܹܝܢ: ܕܨܵܠܹܐ ܨܠܘܿܬܵܐ ܒܘܼܬ ܡܲܠܟܘܼܬܹܗ.
ܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܓ̰ܸܡܥܝܹ̈ܐ ܗ݇ܘܼܵܘ ܠܟܸܣܠܹܗ ܥܸܣܪܝܼܢ ܘܬܸܫܥܵܐ ܩܲܫܝܼܫܹ̈ܐ: ܐܵܢܵܐ ܡܝܼܟ̣ܵܐܹܝܠ: ܘܡܵܪܝ ܝܲܗܒ̣: ܘܡܵܪܝ ܫܸܡܥܘܿܢ: ܘܡܵܪܝ ܬܐܘܿܡܵܐ: ܘܡܵܪܝ ܐܘܿܠܵܐ: ܘܡܵܪܝ ܛܵܒ̣ܵܐ: ܘܡܵܪܝ ܒܘܼܣܝܵܢܵܐ: ܘܡܵܪܝ ܕܵܢܝܼܐܹܝܠ: ܘܡܵܪܝ ܝܵܘܣܸܦ: ܘܡܵܪܝ ܐܝܼܣܚܵܩ: ܘܡܵܪܝ ܫܵܐܙܝܼ: ܘܡܵܪܝ ܐܘܿܠܘܿܓ̣: ܘܡܵܪܝ ܒܲܪ ܫܡܸܫ: ܘܡܵܪܝ ܚܲܒܝܼܒ: ܘܡܵܪܝ ܓܘܼܠܵܐ: ܘܡܵܪܝ ܡܘܼܫܹܐ: ܘܡܵܪܝ ܒܲܪ ܚܲܕܒܫܲܒܵܐ: ܘܡܵܪܝ ܕܘܼܡܝܵܢܵܐ: ܘܡܵܪܝ ܣܝܼܠܘܿܢܵܐ: ܘܡܵܪܝ ܛܸܛܘܿܣ: ܘܡܵܪܝ ܐܲܢܕܪܝܼܵܐ: ܘܡܵܪܝ ܒܲܪ ܒܵܥܘܼܬ: ܘܡܵܪܝ ܗܵܒܹܝܠ: ܘܡܵܪܝ ܐܹܫܲܥܝܵܐ: ܘܡܵܪܝ ܝܘܿܚܲܢܵܢ ܣܵܒ̣ܵܐ: ܘܡܵܪܝ ܛܘܼܒܝܼܢ: ܘܡܵܪܝ ܓܝܼܘܲܪܓܝܼܣ: ܘܡܵܪܝ ܩܕܵܠܵܐ: ܘܡܵܪܝ ܐܸܣܛܲܦܵܢܘܿܣ: ܥܲܡ ܫܲܪܟܵܐ ܕܟܠܵܗ̇ ܐܲܚܘܿܢܘܵܬܹ̈ܐ ܟܲܕ ܓ̰ܸܡܥܝܹ̈ܐ ܗ݇ܘܼܵܘ: ܦܘܼܪܦܸܠܲܢ ܒܝܼـܹܗ ܕܐܵܡܸܪܲܢ ܗܹܡܸܙܡܵܢ ܕܚܲܝܹ̈ܐ. ܣܵܒܵܒ ܐܝܼܬ ܗ݇ܘܼܵܐܠܹܗ ܐܵܗܵܐ ܥܵܕܲܬ: ܕܝܵܬܸܒ̣ ܗ݇ܘܼܵܐ ܒܝܵܘܡܵܐ ܕܚܲܕܒܫܲܒܵܐ ܡ̣ܢ ܒܵܬ݇ܪ ܬܸܫܒܘܿܚܝܵܬܹ̈ܐ ܕܨܲܦܪܵܐ: ܟܹܐ ܡܲܩܪܸܒ̣ ܗ݇ܘܼܵܐ ܗܹܡܸܙܡܵܢ ܕܚܲܝܠܵܐ ܠܐܲܚܘܿܢܘܵܬܹ̈ܐ. ܫܘܼܪܹܐܠܹܗ ܕܗܵܩܹܐ ܗ݇ܘܼܵܐ ܒܘܼܬ ܚܸܩܪܵܐ ܕܦܸܠܚܵܢܵܢ̈ܘܼܗܝ: ܘܒܘܼܬ ܒܝܼܫܬܹܗ ܘܡܲܪܝܼܪܘܼܬܹܗ ܕܣܵܛܵܢܵܐ. ܘܟܲܕ ܪܵܒܵܐ ܡܥܘܼܪܩܸܠܹܗ ܣܵܒ̣ܵܐ ܒܗܲܡܙܲܡܬܹܗ ܩܸܛܥܝܵܐ ܠܹܗ ܠܗܲܡܙܲܡܬܹܗ: ܟܲܕ ܗܵܠܵܐ ܠܹܐ ܗ݇ܘܼܵܐ ܦܪܸܩܬܵܐ ܗܹܡܸܙܡܵܢܹܗ. ܡ̣ܢ ܢܵܓܸܣܬܲܢ ܦܝܼܫܠܹܗ ܓ̰ܠܝܼܒ̣ܵܐ ܚܝܼܵܠܹܗ: ܥܘܼܪܩܸܠܹܗ ܚܕܵܐ ܣܵܥܲܬ. ܘܟܠܲܝܗܝ ܣܵܒ̣ܹ̈ܐ ܒܐܲܪܥܵܐ ܓܵܫܘܿܩܹܐ ܗ݇ܘܼܵܘ: ܠܲܝܬ ܗ݇ܘܼܵܐ ܚܲܕ݇ ܡ̣ܢ ܣܵܒ̣ܹ̈ܐ ܕܩܲܫܕܸܪ ܗ݇ܘܼܵܐ: ܕܡܵܪܸܡ ܗ݇ܘܼܵܐ ܥܲܝܢ̈ܘܼܗܝ ܘܓܵܫܸܩ ܗ݇ܘܼܵܐ ܒܣܵܒ̣ܵܐ. ܐܝܼܢܵܐ ܕܟܠܲܝܗܝ ܟܲܕ ܕܩܵܕ݇ܡ ܕܝܼܘܼܗܝ ܓ̰ܸܡܥܝܹ̈ܐ ܗ݇ܘܼܵܘ: ܒܐܲܪܥܵܐ ܓܵܫܘܿܩܹܐ ܗ݇ܘܼܵܘ. ܘܒܸܠܝܵܦܵܐ ܗ݇ܘܼܵܘ ܐܵܕܵܒܘܼܬܵܐ ܡ̣ܢ ܩܲܕܝܼܫܵܐ: ܡܣܵܒܵܒ ܬܲܠܡܝܼܕܹ̈ܐ ܕܝܼـܹܗ ܗ݇ܘܼܵܘ ܘܩܵܕ݇ܡ ܐܲܩܠܵܬ̈ܘܼܗܝ ܓܘܼܪ̈ܘܸܣܹܐ ܗ݇ܘܼܵܘ. ܟܲܕ ܪܵܒܵܐ ܒܫܸܬܩܵܐ ܟܠܹܐܠܗ݇ܘܿܢ: ܗܸܟ̰ ܚܲܕ݇ ܡ̣ܢ ܣܵܒ̣ܹ̈ܐ ܠܵܐ ܩܘܼܫܕܸܪܹܗ ܕܗܲܡܙܸܡ ܗ݇ܘܼܵܐ ܥܲܡܹܗ. ܣܵܒܵܒ ܒܸܠܝܵܦܵܐ ܗ݇ܘܼܵܘ ܡ̣ܢ ܢܸܣܝܵܢܵܐ: ܐܘܼܦ ܙܹܐ ܪܵܒܵܐ ܓܵܗܹ̈ܐ ܒܥܕܵܢܵܐ ܓ̰ܸܡܥܝܹ̈ܐ ܗ݇ܘܼܵܘ ܩܵܕ݇ܡ ܣܵܒ̣ܵܐ: ܟܹܐ ܦܵܐܸܫ ܗ݇ܘܼܵܐ ܓ̰ܠܝܼܒ̣ܵܐ ܚܝܼܵܠܹܗ ܩܵܐ ܪܵܒܵܐ ܥܕܵܢܵܐ. ܘܒܘܼܬ ܕܐܵܗܵܐ: ܫܒ̣ܘܿܩ ܡ̣ܢ ܒܚܲܕܒܫܲܒܵܐ ܘܐܲܪܒܲܥܒܫܲܒܵܐ: ܠܹܐ ܫܵܒ̣ܸܩ ܗ݇ܘܼܵܐ ܠܐ݇ܢܵܫܵܐ ܕܥܵܒ̣ܸܪ ܗ݇ܘܼܵܐ ܠܟܸܣܠܹܗ: ܐܸܠܵܐ ܐܸܢ ܐܵܢܲܢܩܹܐ.
ܘܟܲܕ ܩܵܐ ܪܵܒܵܐ ܥܕܵܢܵܐ ܥܘܼܪܩܸܠܹܗ: ܗܵܝܓܵܗ ܪܸܓ̣݇ܫܠܹܗ ܠܓܵܢܹܗ ܒܟ̣ܹܐܠܹܗ. ܗܵܝܓܵܗ ܫܘܼܪܹܐܠܝܼ ܐܵܢܵܐ ܡܝܼܟ̣ܵܐܹܝܠ ܒܸܛܠܵܒܵܐ ܡܸܢܹܗ: ܕܐܝܼܬ ܗ݇ܘܼܵܐ ܠܝܼ ܒܸܣܬܵܝܘܼܬܐ ܠܟܸܣ ܣܵܒ̣ܵܐ. ܦܘܼܪܦܸܠܝܼ ܒܝܼـܹܗ ܐܲܝܟܼ ܡ̣ܢ ܓܹܒܵܐ ܕܟܠܵܗ̇ ܐܲܚܘܿܢܘܵܬܹ̈ܐ: ܕܐܵܡܸܪܲܢ ܒܘܼܬ ܣܵܒܵܒ ܕܦܵܫܲܡܬܹܗ. ܐܝܼܢܵܐ ܗ̇ܘ ܣܵܒ̣ܵܐ ܩܲܕܝܼܫܵܐ ܟܲܕ ܒܸܟ̣ܝܵܐ ܗ݇ܘܼܵܐ: ܫܘܼܪܹܐܠܹܗ ܕܐܵܡܸܪܲܢ: ܕܚܙܹܐܠܝܼ ܚܲܕ݇ ܩܸܢܵܐ ܕܝܵܘܢܵܐ: ܘܦܠܸܛܠܹܗ ܡ̣ܢ ܚܕܵܐ ܡ̣ܢ ܒܸܥ̈ܘܼܗ̇ ܚܲܕ݇ ܚܘܼܘܵܐ ܙܥܘܿܪܵܐ: ܘܡ̣ܢ ܗ̇ܝ ܐ݇ܚܹܪ݇ܬܵܐ ܦܠܸܛܠܹܗ ܚܲܕ݇ ܙܲܥܝܵܐ ܕܛܲܝܪܵܐ. ܘܡ̣ܢ ܢܵܓܸܣܬܲܢ ܗ̇ܘ ܚܘܼܘܵܐ ܙܥܘܿܪܵܐ ܡܨܹܐܠܹܗ ܕܗܵܘܹܐ ܚܲܕ݇ ܬܲܢܝܼܢܵܐ ܓܘܼܪܵܐ: ܘܕܸܥܪܹܗ ܠܩܸܢܵܐ ܕܦܠܝܼܛܵܐ ܗ݇ܘܼܵܐ ܡܸܢܹܗ: ܘܒܣܵܡܵܐ ܗ݇ܘܼܵܐ ܕܛܵܪܸܕ ܗ݇ܘܼܵܐ ܠܙܲܥܝܵܐ ܕܛܲܝܪܵܐ ܕܒܲܪ ܙܵܘܓܹܗ: ܘܩܵܛܸܠ ܗ݇ܘܼܵܐ ܠܝܸܡܹܗ: ܐܝܼܢܵܐ ܝܸܡܹܗ ܒܚܲܝܠܵܐ ܦܪܸܩܠܵܗ̇ ܡ̣ܢ ܦܘܼܡܹܗ ܕܝܼـܹܗ: ܟܲܕ ܓܘܼܠܦܵܢܘܼܗ̇ ܫܠܝܼܓܹ̈ܐ ܗ݇ܘܼܵܘ. ܘܡܝܼܬܠܹܗ ܗ̇ܘ ܚܘܼܘܵܐ: ܘܦܠܸܛܠܗ݇ܘܿܢ ܡ̣ܢ ܟܵܪ݇ܣܹܗ ܪܵܒܵܐ ܚܘܼܘܵܘܵܬܹ̈ܐ ܪܵܒܵܐ ܙܥܘܿܪܹ̈ܐ: ܘܠܹܐ ܡܵܨܝܼ ܗ݇ܘܼܵܘ ܠܡܚܲܙܕܘܼܓܹܐ ܠܚܲܕ݇ ܡܸܢܕܝܼ. ܘܗܵܐ ܚܲܕ݇ ܐ݇ܢܵܫܵܐ ܟܸܠܝܵܐ ܗ݇ܘܼܵܐ ܠܥܸܠܸܠ ܡܸܢܲܝܗܝ: ܘܕܒ̣ܝܼܩܵܐ ܗ݇ܘܼܵܐ ܚܲܕ݇ ܩܵܛܝܼܵܐ ܕܢܘܼܪܵܐ ܒܐܝܼܕܹܗ: ܘܩܵܛܸܠ ܗ݇ܘܼܵܐ ܠܗ݇ܘܿܢ ܚܲܕ݇ܟ̰ܵܐ ܚܲܕ݇ܟ̰ܵܐ: ܗܵܝܓܵܗ ܐ݇ܡܸܪܹܗ ܐܸܠܲܢ ܩܲܕܝܼܫܵܐ: ܕܒܸܕܥܵܝܵܐ ܝ݇ܘܸܢ ܒܢܘܿܢ̈ܝܼ: ܕܗܕܝܼܪܵܐ ܝ݇ܠܹܗ ܕܸܫ̰ܡܸܢ ܕܡܲܩܝܸܡ ܪܕܘܼܦܝܵܐ ܥܲܠ ܥܹܕܬܵܐ. ܐܝܼܢܵܐ ܡܵܪܲܢ ܐܲܝܟܼ ܩܵܘܠܹܗ. ܠܹܐ ܫܵܒ̣ܸܩܠܵܗ̇ ܓܵܘ ܡܲܪܥܝܼܬܹܗ. ܐܸܠܵܐ ܒܸܬ ܚܲܪܙܸܦܠܹܗ ܠܗ̇ܘ ܬܲܢܝܼܢܵܐ ܦܲܪܡܝܼܵܢܵܐ: ܥܲܡ ܟܠܹܗ ܣܘܼܠܵܠܹܗ. ܘܒܵܬ݇ܪ ܚܲܕ݇ܟ̰ܵܐ ܥܕܵܢܵܐ ܨܦܸܚܠܹܗ ܐܵܪܝܼܘܿܣ ܫܓ̣ܘܼܫܝܵܐ ܓܵܘ ܥܹܕܬܵܐ: ܘܪܕܘܼܦܝܵܐ ܓܘܼܪܵܐ ܡܘܼܩܸܡܠܹܗ ܥܲܠ ܪ̈ܵܥܵܘܵܬܹܐ ܫܲܪܝܼܪܹ̈ܐ. ܐܸܢ ܐܵܗܵܐ ܗܵܩܸܢܵܗ̇ ܚܲܕ݇ ܟܸܟ̰ܚܵܐ ܓܘܼܪܵܐ ܒܸܬ ܗܵܘܹܐ ܠܫܲܡܥܵܢܹ̈ܐ. ܒܘܼܬ ܕܐܵܗܵܐ ܣܵܒܵܒ ܒܵܬ݇ܪ ܚܲܕ݇ܟ̰ܵܐ ܥܕܵܢܵܐ ܦܘܼܩܸܕܠܹܗ ܡܲܠܟܵܐ ܡܗܘܼܡܢܵܐ ܩܘܼܣܛܲܢܛܝܼܢܘܿܣ: ܕܦܵܝܫܝܼ ܓ̰ܸܡܥܝܹ̈ܐ ܟܠܲܝܗܝ ܐܲܒ̣ܗܵܬܹ̈ܐ ܥܲܡ ܡܲܠܦܵܢܹ̈ܐ ܘܝܼܚܝܼܕܵܝܹ̈ܐ: ܒܘܼܬ ܕܐܵܗܵܐ ܗܲܓ̰ܲܬ. ܘܓ̰ܡܸܥܠܗ݇ܘܿܢ ܟܠܲܝܗܝ ܐܲܦܸܣܩܘܿܦܹ̈ܐ. [ܡܵܪܝ ܝܲܥܩܘܿܒ̣ ܘܡܵܪܝ ܐܲܦܪܹܝܡ. ܘܫܘܼܪܹܐܠܗ݇ܘܿܢ ܒܦܸܠܚܵܢܵܐ ܕܣܘܼܢܗܵܕܘܿܣ ܒܩܛܥܵܝܬܵܐ ܕܕܝܼܘܵܢܹܗ ܕܐܵܪܝܼܘܿܣ ܕܡܝܼܬܠܹܗ ܒܠܘܿܛܝܼܬܵܐ ܦܝܼܠܹܗ ܬܦܝܼܢܵܐ ܓܵܘܹܗ].
ܐܝܼܢܵܐ ܠܹܐ ܝ݇ܠܵܗ̇ ܚܫܸܚܬܵܐ ܕܥܲܒ̣ܪܲܚ ܝܲܢ ܒܲܛܠܲܚ ܠܗܹܡܸܙܡ: ܕܩܵܕ݇ܡ ܕܐܵܗܵܐ ܩܸܣܲܬ ܡܘܼܬܒ̣ܵܠܲܢ: ܕܵܐܟ̣ܝܼ ܬܲܚܡܘܼܢܹܐ ܗ݇ܘܼܵܐ ܡܵܪܝ ܝܲܥܩܘܿܒ̣ ܕܒܵܢܹܐ ܥܹܕܬܵܐ. ܕܦܝܼܫܠܹܗ ܡܘܼܬܒ̣ܵܐ ܩܵܘܠܵܐ ܒܣܵܒ̣ܵܐ: ܘܐܲܝܟܼ ܕܒܓܸܠܝܵܢܵܐ ܡܘܼܕܸܥܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܐܵܢܝܼ ܕܗܕܝܼܪܹ̈ܐ ܝ݇ܢܵܐ ܠܗܘܵܝܵܐ. ܣܵܒܵܒ ܐ݇ܙܸܠ ܗ݇ܘܼܵܐ ܠܹܗ ܡ̣ܢ ܩܵܕ݇ܡ ܫܵܒ̣ܘܿܥܵܐ ܕܩܲܝܛܵܐ: ܕܚܵܙܹܐ ܠܣܵܒ̣ܵܐ ܘܠܟܲܠܝܗܝ ܐܲܚܘܿܢܘܵܬܹ̈ܐ. ܡܣܵܒܵܒ ܪܵܒܵܐ ܡܸܢܲܝܗܝ ܒܸܚܫܵܒ̣ܵܐ ܗ݇ܘܼܵܘ ܘܒܸܚܒ̣ܵܫܵܐ ܗ݇ܘܼܵܘ ܓܵܢܵܬܲܝ̈ܗܝ ܒܗ̇ܘ ܫܵܒ̣ܘܿܥܵܐ. ܠܹܐ ܦܵܠܛܝܼ ܗ݇ܘܼܵܘ ܡ̣ܢ ܟܘܼܠܘܼܚܝܵܬܲܝ̈ܗܝ. ܘܡ̣ܢ ܕܝ݇ܬܸܒ̣ܠܗ݇ܘܿܢ ܘܗܘܼܡܙܸܡܠܗ݇ܘܿܢ ܚܲܕ݇ܟ̰ܵܐ ܡܐܘܼܕܵܠܹܐ: ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܝܲܥܩܘܿܒ̣: ܐܝܼܬܠܲܢ ܚܕܵܐ ܬܲܚܡܲܢܬܵܐ: ܐܸܢ ܐܲܠܵܗܵܐ ܒܲܣܡܵܐ ܠܹܗ ܕܦܵܪܸܫ ܚܕܵܐ ܕܘܼܟܬܵܐ ܘܡܲܬܸܒ̣ ܒܸܢܝܵܬ ܕܥܹܕܬܵܐ ܚܲܕܬܵܐ. ܐܝܼܢܵܐ ܒܸܒܥܵܝܵܐ ܝ݇ܘܲܚ ܕܐܸܢ ܡܲܨܝܵܐ ܕܐܵܬܹܐܬܘܿܢ ܥܲܡܲܢ: ܕܒܘܼܫ ܙܵܘܕܵܐ ܡܲܢܬܝܼ ܗ݇ܘܼܵܐ ܐܲܠܵܗܵܐ ܠܐܵܗܵܐ ܦܸܠܚܵܢܵܐ ܒܨܠܵܘܵܬܵܘ̈ܟ̣ܘܿܢ. ܣܵܒܵܒ ܒܸܕܥܵܝܵܐ ܝ݇ܘܲܚ: ܕܟܠ ܡܸܢܕܝܼ ܕܛܲܠܒܝܼܬܘܿܢ ܡ̣ܢ ܡܵܪܲܢ ܒܸܬ ܦܵܐܸܫ ܝܘܼܗ݇ܒ̣ܵܐ ܐܸܠܵܘܟ̣ܘܿܢ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܦܘܼܪܦܸܠܹܗ ܒܝܼـܹܗ ܘܐ݇ܡܸܪܹܗ ܐܸܠܹܗ: ܕܐܵܕܝܼܵܐ ܐܵܙܲܠ݇ܚ ܥܲܡܵܘܟ̣ܘܿܢ ܠܹܐ ܡܵܨܲܚ: ܡܣܵܒܵܒ ܚܲܕ݇ ܫܵܒ̣ܘܿܥܵܐ ܝ݇ܠܹܗ ܠܹܐ ܝ݇ܠܵܗ̇ ܚܫܸܚܬܵܐ ܕܫܲܒ̣ܩܲܚ ܠܹܗ ܝܲܢ ܠܩܵܢܘܿܢܹܗ: ܐܝܼܢܵܐ ܒܸܬ ܐܵܬܹܐ ܠܟܸܣܠܘܼܟܼ ܚܲܕ݇ ܐܝܼܙܓܲܕܵܐ: ܚܲܕ݇ ܡ̣ܢ ܡܲܠܲܐܟ̣ܹ̈ܐ: ܘܗ̇ܘ ܒܸܬ ܡܵܫܸܚܠܵܗ̇ ܥܲܡܘܼܟܼ ܠܒܸܢܝܵܬ ܕܥܹܕܬܵܐ: ܘܒܸܬ ܪܵܫܸܡܠܹܗ ܟܠܹܗ ܒܸܢܝܵܢܘܼܗ̇: ܐܵܗܵܐ ܐܘܼܦ ܐܲܢ݇ܬܿ ܒܵܠܵܕ ܝ݇ܘܸܬܿ ܒܝܼܘܼܗ̇. ܘܒܗ̇ܝ ܕܘܼܟܬܵܐ ܕܒܝܼܘܼܗ̇ ܕܸܒ̣ܚܹ̈ܐ ܟ̰ܘܼܦܠܸܢܹ̈ܐ ܟܹܐ ܡܲܣܩܝܼ ܗ݇ܘܼܵܘ: ܘܕܸܒ̣ܚܹ̈ܐ ܕܚܛܝܼܬܵܐ ܡܲܩܪܸ̈ܒ̣ܝܼ ܗ݇ܘܼܵܘ: ܘܗܵܘܵܙܹ̈ܐ ܕܓܘܼܕܵܦܵܐ ܥܲܡ ܙܡܲܪ̈ܝܵܬܹܐ ܫܸܚܬܵܢܹ̈ܐ ܡܲܚܕܝܼܵܢܹ̈ܐ ܠܣܵܛܵܢܵܐ ܟܹܐ ܙܲܡܪ̈ܝܼ ܗ݇ܘܼܵܘ: ܘܪܸܩܕܵܐ ܕܚܛܝܼܬܵܐ ܘܬܵܦܲܚܬܵܐ ܕܕܸܡܵܐ ܡܲܟܪܸܒܵܢܵܐ ܕܩܵܕ݇ܡ ܨܵܢܵܡܹ̈ܐ ܟ̰ܲܦܵܠܹ̈ܐ ܘܟܹܐ ܪ̈ܲܩܕܝܼ ܗ݇ܘܼܵܘ: ܗܲܪ ܒܗ̇ܝ ܕܘܼܟܬܵܐ ܕܒܝܼܘܼܗ̇ ܟܠ ܬܵܗܵܪܹ̈ܐ ܕܟ̰ܲܦܵܠܘܼܬܵܐ ܕܐܲܝܟܼ ܕܐܵܢܝܼ ܟܹܐ ܦܵܝܫܝܼ ܗ݇ܘܼܵܘ ܫܸܡܥܝܹ̈ܐ: ܦܵܐܸܫ ܡܘܼܬܒ̣ܵܐ ܡܲܕܒ̱ܚܵܐ ܩܲܕܝܼܫܵܐ: ܘܐ݇ܪ̈ܵܙܹܐ ܩܲܕܝܼܫܹ̈ܐ ܦܵܝܫܝܼ ܥܒ̣ܝܼܕܹ̈ܐ ܚܸܠܡܲܬ: ܘܩܵܠܹ̈ܐ ܕܫܘܼܒ̣ܚܵܐ ܠܐܲܠܵܗܵܐ ܒܝܼܘܼܗ̇ ܒܸܬ ܡܲܣܩܝܼ: ܘܗܵܘܵܙܹ̈ܐ ܕܪܘܼܚܵܐ ܩܲܕܝܼܫܵܐ ܒܝܼܘܼܗ̇ ܦܵܝܫܝܼ ܨܘܼܠܝܹ̈ܐ. ܘܗ̇ܝ ܕܡ̣ܢ ܩܲܕ݇ܡܵܝܬܵܐ ܕܘܼܟܬܵܐ ܕܚܛܝܼܬܵܐ ܗ݇ܘܼܵܐ: ܕܗܵܘܝܵܐ ܕܘܼܟܬܵܐ ܕܫܪܵܝܬܵܐ ܕܐܲܠܵܗܵܐ. ܘܒܝܼܘܼܗ̇ ܦܵܐܸܫ ܦܠܝܼܚܵܐ ܘܒܝܼܘܼܗ̇ ܦܵܐܸܫ ܥܒ̣ܝܼܕܵܐ ܚܸܠܡܲܬ. ܡ̣ܢ ܟܠܹܗ ܛܵܝܸܦܵܐ ܩܲܕܝܼܫܵܐ ܕܦܪܝܼܩܵܐ ܝ݇ܠܹܗ ܒܕܸܡܹܗ ܕܝܼܫܘܿܥ ܡܲܠܟܵܐ ܙܲܟܵܝܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܐ݇ܡܸܪܹܗ: ܨܵܠܝܼܡܘܿܢ ܟܠܵܘܟ̣ܘܿܢ ܒܘܼܬ ܕܝܼܝܼ ܘܛܠܘܿܒܘܼܢ ܡ̣ܢ ܡܵܪܲܢ. ܕܐܵܢܝܼ ܗܹܡܸܙܡܵܢܹ̈ܐ ܕܐ݇ܡܝܼܪܵܝܠܵܘܟ̣ܘܿܢ ܗܵܕܟ̣ܵܐ ܦܵܝܫܝܼ ܬܘܼܡܸܡܹ̈ܐ.
ܘܩܸܡܠܹܗ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܐܲܦܸܣܩܘܿܦܵܐ ܘܐ݇ܙܸܠܹܗ ܠܡܕܝܼܢ݇ܬܵܐ: ܘܦܝܼܫܠܹܗ ܡܘܼܦܫܸܛܵܐ ܡ̣ܢ ܟܠܵܗ̇ ܐܲܚܘܿܢܘܵܬܹ̈ܐ ܗܲܠ ܠܒܲܝܬܵܐ ܕܨܠܘܿܬܵܐ. ܘܫܒ̣ܝܼܩܵܝܠܹܗ ܒܫܵܝܢܵܐ:ܘܫܒ̣ܝܼܩܵܝܠܹܗ ܕܕܵܥܪܝܼ ܠܟܘܼܠܘܼܚܝܵܬܲܝ̈ܗܝ. ܐܝܼܢܵܐ ܐܵܗܵܐ ܩܲܕܝܼܫܵܐ ܒܓ̰ܲܠܕܘܼܬܵܐ ܥܒ̣ܸܪܹܗ ܠܡܕܝܼܢ݇ܬܵܐ. ܘܒܵܩܸܪ ܗ݇ܘܼܵܐ ܡ̣ܢ ܐ݇ܢܵܫܹ̈ܐ ܡ̣ܢ ܩܠܹܝܪ̈ܝܼܩܹܐ ܕܥܹܕܬܵܐ ܘܐܘܼܦ ܡ̣ܢ ܘܲܙܝܼܪܹ̈ܐ ܕܓ̰ܸܡܥܝܹ̈ܐ ܗ݇ܘܼܵܘ ܩܵܕ݇ܡܘܼܗܝ ܬܵܡܵܐ: ܕܐܲܝܢܝܼ ܝ݇ܠܵܗ̇ ܗ̇ܝ ܕܘܼܟܬܵܐ ܕܒܹܐܡܵܪܵܐ ܝ݇ܬܘܿܢ ܕܒܵܢܲܚ ܒܝܼܘܼܗ̇ ܥܹܕܬܵܐ؟ ܐܲܢܹ̈ܐ ܐ݇ܡܸܪܘܿܢ ܬܠܵܬ݇ܐ ܘܐܲܪܒܥܵܐ ܕܘܼܟܵܢܹ̈ܐ. ܐܝܼܢܵܐ ܩܲܕܝܼܫܵܐ ܫܬܝܼܩܵܐ ܗ݇ܘܼܵܐ ܗܲܠ ܒܠܲܝܠܹܐ. ܟܲܕ ܗ݇ܘܹܐܠܵܗ̇ ܣܵܥܲܬ ܕܬܠܵܬ݇ܐ ܒܠܲܝܠܹܐ: ܩܸܡܠܹܗ ܩܲܕܝܼܫܵܐ ܘܫܩܸܠܹܗ ܚܲܕ݇ ܓܕܵܠܵܐ ܕܟܝܘܼܠܵܐ ܒܐܝܼܕܹܗ: ܘܦܠܸܛܠܹܗ ܠܒ̣ܲܕܲܪ ܡ̣ܢ ܩܸܠܹܝܬܹܗ. ܘܗܵܐ ܡܲܠܲܐܟ̣ܵܐ ܕܡܵܪܝܵܐ ܦܝܼܫܠܹܗ ܚܸܙܝܵܐ ܟܸܠܝܵܐ ܩܵܕ݇ܡܘܼܗܝ: ܒܕܵܡܲܝܬܵܐ ܕܚܲܕ݇ ܓ̰ܘܲܢܩܵܐ ܒܓ̰ܘܼܠܹ̈ܐ ܚܘܵܪܹ̈ܐ: ܘܩܘܼܪܒܸܢܹܗ ܘܕܪܹܐܠܹܗ ܫܠܵܡܵܐ ܐܸܠܹܗ ܩܲܕܝܼܫܵܐ. ܐܝܼܢܵܐ ܐܵܗܵܐ ܒܘܼܩܸܪܹܗ ܕܡܵܢܝܼ ܝ݇ܘܸܬܿ؟ ܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ: ܐܵܢܵܐ ܝ݇ܘܸܢ ܕܦܝܼܫܠܝܼ ܫܘܼܕܪܵܐ ܡ̣ܢ ܡܵܪܝܵܐ ܕܡܲܚܙܸܢܘܼܟܼ ܕܘܼܟܬܵܐ: ܘܕܵܒ̣ܩܸܢ ܥܲܡܘܼܟܼ ܟܝܘܼܠܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܐ݇ܡܸܪܹܗ ܐܸܠܹܗ: ܡܵܪܝܼ ܪ݇ܚܘܿܫ ܩܵܕ݇ܡ ܕܝܼܝܼ ܠܐܲܝܟܵܐ ܕܦܵܩܘܿܕܹܐ ܝ݇ܘܸܬܿ. ܐܵܗܵܐ ܩܲܕܝܼܫܵܐ ܙܕܸܥܠܹܗ ܡ̣ܢ ܚܸܙܘܹܗ ܕܡܲܠܲܐܟ̣ܵܐ: ܡܣܵܒܵܒ ܪܵܒܵܐ ܓܵܗܹ̈ܐ ܕܡܘܼܚܫܸܚܵܐ ܗ݇ܘܼܵܐ ܐܸܠܹܗ: ܘܟܹܐ ܗܲܡܙܸܡ ܗ݇ܘܼܵܐ ܥܲܡܲܝܗܝ ܒܒܸܣܬܵܝܘܼܬܵܐ ܕܠܵܐ ܙܕܥܘܿܬܵܐ. ܗܵܝܓܵܗ ܐ݇ܙܸܠܹܗ ܩܵܕ݇ܡܘܼܗܝ ܡܲܠܲܐܟ̣ܵܐ ܗܲܠ ܠܒܹܝܬܵܐ ܕܨܵܢܵܡܹ̈ܐ ܕܐܲܢܛܝܵܟ̣ܘܿܣ ܟܵܦܘܿܪܵܐ: ܘܐ݇ܡܸܪܹܗ ܐܸܠܹܗ: ܐܵܗܵܐ ܝ݇ܠܵܗ̇ ܕܘܼܟܬܵܐ ܕܥܹܕܬܵܐ. ܘܕܒ̣ܸܩܠܹܗ ܥܲܡܹܗ ܓܕܵܠܵܐ ܕܟܝܘܿܠܵܐ: ܘܡܫܸܚܠܹܗ ܟܠܲܝܗܝ ܒܸܢܝܵܬ̈ܘܼܗܝ: ܘܦܘܼܠܓ݇ܝܼܠܹܗ ܒܸܢܝܵܢ̈ܘܼܗ̇.
ܣܵܒܵܒ ܒܐܵܗܵܐ ܥܕܵܢܵܐ ܐ݇ܬܹܐܠܹܗ ܩܲܕܝܼܫܵܐ ܡܵܪܝ ܡܝܼܠܘܿܣ ܡ̣ܢ ܐܘܿܪܸܫܠܸܡ. ܘܟܲܕ ܚܙܹܐܠܹܗ ܠܩܲܕܝܼܫܵܐ ܡܵܪܝ ܝܲܥܩܘܿܒ̣ ܕܫܘܼܪܹܐܠܹܗ ܒܒܸܢܝܵܢܵܐ ܕܥܹܕܬܵܐ: ܦܝܼܫܠܹܗ ܡܸܠܝܵܐ ܡ̣ܢ ܚܲܕܘܼܬܵܐ. ܘܡܘܼܕܝܸܢܹܗ ܬܠܵܬܡܐܵܐ ܕܝܼܢܵܪܹ̈ܐ ܡ̣ܢ ܬܵܓ̰ܝܼܪܹ̈ܐ ܕܒܢܘܿܢܹ̈ܐ ܕܐܲܬܪܹܗ: ܘܝܘܼܗ݇ܒ̣ܵܝܠܹܗ ܒܘܼܪܸܟܬܵܐ ܒܒܸܢܝܵܢܵܐ. ܣܵܒܵܒ ܕܠܲܝܬ ܗ݇ܘܼܵܐ ܠܹܗ ܡܸܢܕܝܼ: ܫܒ̣ܘܿܩ ܡ̣ܢ ܚܘܼܛܪܵܐ ܘܐܹܘܲܢܓܲܠܝܼܘܿܢ. ܘܡ̣ܢ ܒܵܬ݇ܪ ܗܵܕܵܐ ܐ݇ܙܸܠܹܗ ܠܟܸܣ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܚܵܙܹܐܠܹܗ ܘܐܵܙܸܠ ܠܡܲܕܢܚܵܐ ܠܕܘܼܟܬܹܗ. ܐ݇ܙܸܠܹܗ ܒܝܵܘܡܵܐ ܕܚܲܕܒܫܲܒܵܐ: ܘܓ̰ܡܸܥܠܵܗ̇ ܟܠܵܗ̇ ܐܲܚܘܿܢܘܼܬܵܐ ܕܦܵܝܫܝܼ ܒܘܼܪ̈ܟ̣ܹܐ ܡ̣ܢ ܡܵܪܝ ܡܝܼܠܘܿܣ. ܘܡ̣ܢ ܒܵܬ݇ܪ ܕܕܪܹܐܠܗ݇ܘܿܢ ܫܠܵܡܵܐ ܠܐܘܼܕܵܠܹܐ: ܐ݇ܡܸܪܹܗ ܐܸܠܹܗ ܣܵܒ̣ܵܐ ܡܵܪܝ ܐܵܘܓܹܝܢ: ܫܠܵܡܵܐ ܐܸܠܘܼܟܼ ܐ݇ܢܵܫܵܐ ܕܐܲܠܵܗܵܐ: ܕܠܹܐ ܫܵܩܸܠ ܦܲܐܬܵܐ ܕܒܢܲܝ̈ܢܵܫܵܐ. ܣܵܒܵܒ ܗܵܐ ܒܹܐܙܵܠܵܐ ܝ݇ܘܸܬܿ ܠܡܲܕܢ̱ܚܵܐ: ܘܡܲܢܟ̣ܸܣܸܬܿ ܠܹܗ ܠܦܵܦܵܐ: ܗ̇ܘ ܕܗܘܝܼܵܐ ܠܹܗ ܦܵܛܲܪܝܵܪܟܵܐ ܒܡܲܕܢ̱ܚܵܐ: ܒܘܼܬ ܟܠܲܝܗܝ ܒܵܨܘܿܪ̈ܘܼܝܵܬܘܼܗܝ. ܡܣܵܒܵܒ ܠܹܐ ܡܩܵܒܸܠ ܠܡܲܢܟ̣ܵܣܬܘܼܟܼ ܘܠܩܝܼܪܲܬܘܼܟܼ ܒܙܕܥܘܿܬܵܐ ܕܐܲܠܵܗܵܐ: ܘܒܸܬ ܡܩܵܒܸܠ ܬܲܡܒܵܐ ܡ̣ܢ ܐܲܠܵܗܵܐ.
ܗܵܝܓܵܗ ܓ̰ܘܼܘܸܒܠܹܗ ܐܸܠܹܗ ܡܵܪܝ ܡܝܼܠܘܿܣ: ܕܫܠܵܡܵܐ ܐܸܠܘܼܟܼ ܣܵܒ̣ܵܐ ܕܥܵܓ̰ܝܼܒܘܼܬܵܐ: ܕܚܙܹܐܠܘܼܟܼ ܠܚܘܼܘܵܐ ܠܝܼܛܵܐ ܘܒܣܵܡܹܗ ܗ݇ܘܼܵܐ ܕܡܲܫܥܸܫ ܗ݇ܘܼܵܐ ܠܥܹܕܬܵܐ: ܘܓܘܼܫܸܩܠܘܼܟܼ ܒܛܘܼܠܩܵܢܵܐ ܕܝܵܠܵܕ݇ܘܼ̈ܗܝ ܠܝܼܛܹ̈ܐ. ܗܵܝܓܵܗ ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܡ̣ܢ ܐܲܝܟܵܐ ܝܵܕܥܸܬܿ ܐܲܚܘܿܢܝܼ: ܕܐܵܗܵܐ ܚܸܙܘܵܐ ܦܝܼܫܠܹܗ ܚܸܙܝܵܐ ܐܸܠܝܼ؟ ܗܵܝܓܵܗ ܐ݇ܡܸܪܹܗ ܐܸܠܹܗ ܡܵܪܝ ܡܝܼܠܘܿܣ: ܗ̇ܘ ܕܓܠܹܐܠܹܗ ܐܸܠܘܼܟܼ ܐܲܢܹ̈ܐ ܕܝܼܝܼ. ܐܵܗܵܐ ܡܘܼܕܸܥܠܹܗ ܐܸܠܝܼ ܐܲܢܹ̈ܐ ܕܝܼܘܼܟܼ. ܐܵܡܸܪ ܐܸܠܹܗ ܣܵܒ̣ܵܐ: ܛܘܼܒ̣ܵܐ ܐܸܠܘܼܟܼ ܐܲܚܘܿܢܲܢ ܡܵܪܝ ܡܝܼܠܘܿܣ: ܕܩܘܼܪܒܸܢܵܐ ܥܕܵܢܵܐ ܕܒܝܼـܹܗ ܒܸܬ ܗܵܘܹܝܬܿ ܕܸܒ̣ܚܵܐ ܓܵܘ ܐܲܬܪܵܐ ܕܦܵܪ̈ܣܵܝܹܐ: ܒܕܵܡܲܝܬܵܐ ܕܦܵܘܠܘܿܣ ܡ̣ܢ ܐܝܼܕܵܬܹ̈ܐ ܕܢܹܐܪܘܿܢ. ܐܝܼܢܵܐ ܒܸܬ ܡܲܢܟ̣ܸܣܸܬܿ ܠܟܵܦܘܿܪܹ̈ܐ: ܘܬܵܡܵܐ ܒܸܬ ܝܵܗ݇ܒ̣ܸܬܿ ܣܵܗܕܘܼܬܵܐ ܒܘܼܬ ܡܵܪܘܼܟܼ: ܘܒܸܬ ܫܲܩܠܸܬܿ ܟܠܝܼܠܵܐ ܕܓ̣ܵܠܝܼܒܘܼܬܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܡܝܼܠܘܿܣ ܒܵܠܵܕ ܝܼܗܘܼܵܐ ܒܐܵܢܝܼ ܕܐ݇ܡܸܪܹܗ ܐܸܠܹܗ ܣܵܒ̣ܵܐ ܙܲܗܝܵܐ. ܘܡ̣ܢ ܕܗ݇ܘܹܐܠܹܗ ܠܟܸܣܠܲܢ ܬܪܹܝܢ ܝܵܘܡܵܢܹ̈ܐ: ܘܫܒ̣ܸܩܠܹܗ ܒܫܲܝܢܵܐ ܠܣܵܒ̣ܵܐ ܘܠܟܠܵܗ̇ ܐܲܚܘܿܢܘܵܬܹ̈ܐ. ܘܦܠܸܛܠܲܢ ܡ̣ܢ ܥܘܼܡܪܵܐ: ܙܡܸܪܲܢ ܡܲܙܡܘܿܪܹ̈ܐ ܘܨܘܼܠܹܐܠܲܢ ܨܠܘܿܬܵܐ ܘܫܒ̣ܸܩܠܲܢ ܒܫܲܝܢܵܐ ܟܲܕ ܒܸܟ̣ܝܵܐ ܝ݇ܘܲܚ ܗ݇ܘܼܵܐ. ܘܐ݇ܡܸܪܹܗ ܐܸܠܲܢ ܕܨܵܠܝܼܡܘܿܢ ܨܠܘܿܬܵܐ ܒܘܼܬ ܕܝܼܝܼ ܕܚܲܫܚܸܢ ܕܚܵܙܸܢܵܘܟ̣ܘܿܢ ܩܵܕ݇ܡ ܡܵܪܲܢ. ܡܣܵܒܵܒ ܒܐܲܢܹ̈ܐ ܚܲܝܹ̈ܐ ܒܸܕܥܵܝܵܐ ܝ݇ܘܸܢ ܕܡܸܢ݇ܕܪܸܫ݇ ܕܠܹܐ ܚܵܙܝܼܬܘܿܢ ܠܝܼ. ܘܟܠܲܝܗܝ ܐܵܢܝܼ ܐܲܚܘܿܢܘܵܬܹ̈ܐ ܦܫܸܡܠܗ݇ܘܿܢ ܘܦܝܼܫܠܗ݇ܘܼܢ ܡܘܼܥܝܸܩܹ̈ܐ. ܘܡ̣ܢ ܒܵܬ݇ܪ ܕܫܒ̣ܸܩܠܹܗ ܘܐ݇ܙܸܠܹܗ ܡ̣ܢ ܠܟܸܣܠܲܢ: ܐ݇ܡܸܪܹܗ ܐܸܠܲܢ ܩܲܕܝܼܫܵܐ ܡܵܪܝ ܐܵܘܓܹܝܢ: ܓܲܫܩܘܿܢ ܒܢܘܿܢ̈ܝܼ ܒܐܵܗܵܐ ܩܲܕܝܼܫܵܐ ܙܸܪܲܢܓ ܘܠܸܒܵܢܵܐ: ܕܡܲܠܝܘܼܙܹܐ ܗ݇ܘܵܐ ܟܲܕ ܡܸܠܝܵܐ ܚܲܕܘܼܬܵܐ: ܕܐܵܙܸܠ ܘܩܵܒܸܠ ܓ̰ܘܼܢܓ̰ܵܪܵܐ ܒܘܼܬ ܡܵܪܹܗ!
ܐܝܼܢܵܐ ܒܥܕܵܢܵܐ ܕܐ݇ܙܸܠܹܗ ܡܵܪܝ ܡܝܼܠܘܿܣ ܠܡܕܝܼܢ݇ܬܵܐ ܕܒܹܝܬ ܐܵܪ̈ܵܡܵܝܹܐ: ܥܒ̣ܸܪܹܗ ܕܚܵܙܹܐܠܹܗ ܠܦܵܦܵܐ ܩܵܬܘܿܠܝܼܩܵܐ. ܘܡ̣ܢ ܕܚܙܹܐܠܹܗ: ܡܘܼܩܪܸܒ̣ܠܹܗ ܐܸܠܹܗ ܡܲܢܟ̣ܵܣܬܵܐ ܒܘܼܬ ܕܚܲܕ݇ܟܡܵܐ ܩܸܣܲܬܹ̈ܐ ܦܪ̈ܝܼܫܹܐ ܕܡܗܵܕܘܼܝܹܐ ܗ݇ܘܼܵܐ. ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܥܲܠ ܟܠܲܝܗܝ ܐܵܢܝܼ ܕܦܝܼܫܠܹܗ ܐ݇ܡܝܼܪܵܐ ܡ̣ܢ ܩܲܕܝܼܫܵܐ: ܒܹܐܡܵܪܵܐ ܡ̣ܢ ܐܲܝܟܵܐ ܐܲܢܹ̈ܐ ܒܹܐܡܵܪܵܐ ܝ݇ܘܸܬܿ ܐܸܠܝܼ؟ ܐܵܡܸܪ ܐܸܠܹܗ ܡܵܪܝ ܡܝܼܠܘܿܣ: ܨܲܚܨܝܼ ܓܵܘ ܐܹܘܲܢܓܲܠܝܼܘܿܢ ܘܒܸܬ ܡܲܕܥܝܼܠܘܼܟܼ. ܘܐܹܘܲܢܓܲܠܝܼܘܿܢ ܠܟܸܣ ܦܵܦܵܐ ܗ݇ܘܼܵܐ: ܡܘܼܪܸܡܠܹܗ ܐܝܼܕܹܗ ܘܡܸܚܝܵܐ ܠܹܗ ܠܐܹܘܲܢܓܲܠܝܼܘܿܢ ܘܐ݇ܡܸܪܹܗ ܐܸܠܹܗ: ܗܲܡܙܸܡ ܐܹܘܲܢܓܲܠܝܼܘܿܢ. ܗܵܝܓܵܗ ܐ݇ܡܸܪܹܗ ܩܲܕܝܼܫܵܐ ܡܝܼܠܘܿܣ ܟܲܕ ܒܸܢܓ̰ܵܘܵܐ ܒܦܵܦܵܐ: ܝܵܐ ܐ݇ܢܵܫܵܐ ܡܵܪܵܢܵܝܵܐ: ܠܡܵܪܘܼܟܼ ܒܸܡܚܵܝܵܐ ܝ݇ܘܸܬܿ؟ ܘܗܲܪ ܒܗ̇ܝ ܥܕܵܢܵܐ ܠܝܼܛܠܹܗ ܘܩܘܼܒܸܠܹܗ ܬܲܡܒܵܐ: ܘܒܪܸܙܠܵܐ ܕܸܦܢܹܗ ܕܝܲܡܝܼܢܵܐ: ܘܡܸܢ݇ܕܪܹܫ݇ ܠܵܐ ܒܣܸܡܠܹܗ.
ܐܝܼܢܵܐ ܩܲܕܝܼܫܵܐ ܡܵܪܝ ܡܝܼܠܘܿܣ ܐ݇ܙܸܠܹܗ ܠܐܲܬܪܹܗ: ܘܥܵܒ̣ܸܕ ܗ݇ܘܼܵܐ ܪܵܒܵܐ ܬܘܼܠܡܵܕܵܐ ܐܲܝܟܼ ܫܠܝܼܚܵܐ ܒܟܠ ܕܘܼܟܬܵܐ ܕܡܵܛܹܐ ܗ݇ܘܼܵܐ: ܘܒܵܣܲܡܝܵܬܹ̈ܐ ܓܘܼܪܹ̈ܐ ܒܸܥܒ̣ܵܕܵܐ ܗ݇ܘܼܵܐ ܡܵܪܲܢ ܠܒܢܲܝ̈ܢܵܫܵܐ ܒܐܝܼܕܵܬ̈ܘܼܗܝ. ܐܝܼܢܵܐ ܒܥܕܵܢܵܐ ܐ݇ܬܹܐܠܹܗ ܠܐܲܬܪܹܗ: ܩܒ̣ܸܠܗ݇ܘܿܢ ܐܸܠܹܗ ܡܓܼܘܼܫܵܝܹ̈ܐ ܩܵܕ݇ܡ ܗܵܟܸܡ ܒܹܐܡܵܪܵܐ ܡܲܥܡܘܿܕܹܐ ܝ݇ܠܹܗ ܠܟܠܹܗ ܐܲܬܪܵܐ. ܗܵܝܓܵܗ ܦܘܼܩܸܕܠܹܗ ܕܐܲܣܪܝܼ ܠܹܗ ܘܡܲܝܬ݇ܝܼܠܹܗ ܩܵܕ݇ܡܘܼܗܝ: ܟܲܕ ܐܝܼܕܵܬ̈ܘܼܗܝ ܘܐܲܩܠܵܬ̈ܘܼܗܝ ܐ݇ܣܝܼܪܹ̈ܐ ܗ݇ܘܼܵܘ ܒܦܪܸܙܠܵܐ. ܘܚܘܼܪܕܝܼܘܗܝ ܗ݇ܘܼܵܘ ܡܓ̣ܘܼܫܵܝܹ̈ܐ ܘܝܼܗܘܼܕܵܝܹ̈ܐ: ܒܸܩܒ̣ܵܠܵܐ ܗ݇ܘܼܵܘ ܐܸܠܹܗ ܟܲܕ ܒܹܐܡܵܪܵܐ: ܕܐܵܗܵܐ ܚܲܪܵܫܵܐ ܡܘܼܥܡܸܕܠܹܗ ܠܟܠܹܗ ܐܲܬܪܲܢ: ܘܡܘܼܕܸܥܪܹܗ ܠܒܢ̈ܘܿܢܲܢ ܘܠܒܢ̈ܵܬܲܢ ܡܸܢܲܢ. ܗܵܝܓܵܗ ܒܘܼܩܸܪܹܗ ܗ̇ܘ ܠܝܼܛܵܐ ܟܲܕ ܒܹܐܡܵܪܵܐ: ܕܡ̣ܢ ܦܘܼܩܕܵܢܵܐ ܕܡܵܢܝܼ ܡܲܥܡܘܿܕܹܐ ܝ݇ܘܸܬܿ ܠܡܓ̣ܘܼܫܵܝܹ̈ܐ ܘܠܝܼܗܘܼܕܵܝܹ̈ܐ؟ ܐܝܼܢܵܐ ܗ̇ܘ ܩܲܕܝܼܫܵܐ ܐ݇ܡܸܪܹܗ ܐܸܠܹܗ: ܕܐܵܢܵܐ ܒܚܲܝܠܵܐ ܠܐ݇ܢܵܫܹ̈ܐ ܠܹܐ ܝ݇ܘܸܢ ܠܘܼܒܠܵܐ. ܝܘܼܠܦܵܢܵܐ ܕܡܵܪܲܢ ܩܵܕ݇ܡܵܘܟ̣ܘܿܢ ܗܲܡܙܘܼܡܹܐ ܝ݇ܘܸܢ ܘܗܵܩܘܼܝܹܐ: ܘܐܲܢܹ̈ܐ ܒܪܸܙܵܝܲܝܗܝ ܒܸܥܡܵܕܵܐ ܝ݇ܢܵܐ. ܘܐܘܼܦ ܐܸܠܘܼܟܼ: ܐܸܢ ܐܵܗܵܐ ܒܣܵܡܘܼܟܼ ܝ݇ܠܵܗ̇ ܕܦܲܠܚܸܬܿ ܠܐܲܠܵܗܵܐ ܚܲܝܵܐ ܘܫܲܒܼܩܸܬܿ ܠܚܸܠܛܘܼܢܝܵܐ ܘܕܘܼܓܠܵܐ ܕܝܘܼܠܦܵܢܘܼܟܼ: ܒܗ̇ܝ ܥܕܵܢܵܐ ܒܸܬ ܡܲܥܡܸܕܸܢܘܼܟܼ. ܐܝܼܢܵܐ ܟܲܕ ܫܡܸܥܠܹܗ ܐܲܢܹ̈ܐ ܗܹܡܸܙܡܵܢܹ̈ܐ ܗ̇ܘ ܗܵܟܡܵܢܵܐ ܠܵܐ ܩܒܸܠܹܗ: ܐܸܠܵܐ ܫܩܸܠܹܗ ܚܲܕ݇ ܟܲܪܒܵܐ ܘܚܸܡܬܵܐ: ܘܩܸܡܠܹܗ ܥܲܠ ܐܲܩܠܵܬ̈ܘܼܗܝ: ܘܓܪܸܫܠܹܗ ܣܲܝܦܹܐ ܙܥܘܿܪܵܐ ܡ̣ܢ ܪܲܚܬܹܗ: ܘܡܚܹܐܠܹܗ ܠܩܲܕܝܼܫܵܐ ܡ̣ܢ ܒܵܬ݇ܪ ܚܵܨܹܗ: ܘܓ̰ܕܸܩܠܹܗ ܠܟܠܹܗ ܕܸܦܢܹܗ. ܘܩܸܡܠܹܗ ܡܸܢ݇ܕܪܸܫ݇ ܐܲܚܘܿܢܵܐ ܕܐܵܗܵܐ ܟܵܦܘܿܪܵܐ ܓܪܸܫܠܹܗ ܐܘܼܦ ܐܵܗܵܐ ܣܟܝܼܢܬܵܐ ܕܬܪܹܝܢ ܦܘܼܡܵܢܹ̈ܐ ܘܡܚܹܐܠܹܗ ܠܩܲܕܝܼܫܵܐ ܡ̣ܢ ܩܵܕ݇ܡܘܼܗܝ: ܡ̣ܢ ܥܸܛܡܹܗ ܘܗܲܠ ܠܨܲܕܪܹܗ. ܘܒܐܵܗܵܐ ܦܸܨܠܵܐ ܗ݇ܘܹܐܠܵܗ̇ ܫܩܵܠܬܵܐ ܕܟܠܝܼܠܵܐ ܕܐܵܗܵܐ ܐܲܬܠܹܝܛܵܐ [ܙܸܪܲܢܓ]. ܗܵܝܓܵܗ ܕܸܥܪܹܗ ܘܐ݇ܡܸܪܹܗ ܐܸܠܲܝܗܝ: ܟܲܕ ܗ̇ܘ ܢܦܝܼܠܵܐ ܥܲܠ ܐܲܪܥܵܐ ܩܵܕ݇ܡܲܝܗܝ ܘܐ݇ܡܸܪܹܗ: ܒܘܼܬ ܚܲܕ݇ ܬܲܡܒܵܐ ܩܲܡ ܡܵܚܝܼܬܘܿܢ ܠܝܼ ܒܟܲܪܒܵܐ ܒܝܼܫܵܐ ܕܕܝܼܵܘܟ̣ܘܿܢ: ܩܘܼܕܡܹܐ ܒܐܵܗܵܐ ܥܕܵܢܵܐ ܡܵܪܲܢ ܒܸܬ ܛܵܠܸܩܠܵܘܟ̣ܘܿܢ ܡ̣ܢ ܐܝܼܕܵܬܹ̈ܐ ܕܐܘܼܕܵܠܹܐ: ܗ݇ܘܹܐܠܵܗ̇ ܐܲܝܟܼ ܕܐ݇ܡܸܪܹܗ ܐܵܗܵܐ ܩܲܕܝܼܫܵܐ: ܘܩܘܼܕܡܹܐ ܗܲܪ ܒܗ̇ܝ ܥܕܵܢܵܐ: ܬܸܪ̈ܘܲܝ ܝ݇ܬܸܒ̣ܠܗ݇ܘܿܢ ܥܲܠ ܪܲܟܵܒ̣ܵܐ ܘܦܠܸܛܠܗ݇ܘܿܢ ܠܨܲܝܕܵܐ. ܘܗܵܐ ܦܝܼܫܠܵܗ̇ ܚܙܝܼܬܵܐ ܚܕܵܐ ܚܡܲܪܬܵܐ ܕܒܲܪܝܼܵܐ ܩܵܕ݇ܡܲܝܗܝ: ܘܪܚܸܛܠܗ݇ܘܿܢ ܬܸܪ̈ܘܲܝ ܒܵܬ݇ܪܘܼܗ̇: ܚܲܕ݇ ܡ̣ܢ ܕܐܵܗܵܐ ܓܹܒܵܐ ܘܗ̇ܘ ܐ݇ܚܹܪ݇ܢܵܐ ܡ̣ܢ ܗ̇ܘ ܓܹܒܵܐ ܐ݇ܚܹܪ݇ܢܵܐ. ܘܡܬܸܚܠܗ݇ܘܿܢ ܬܸܪ̈ܘܲܝ ܩܸܫܝܵܬܲܝ̈ܗܝ: ܘܚܕܸܪܗ݇ܘܿܢ ܦܲܐܬܲܝ̈ܗܝ ܚܲܕ݇ ܕܲܪܩܘܼܒ̣ܠ ܠܗ̇ܘ ܐ݇ܚܹܪ݇ܢܵܐ: ܘܪܘܼܦܝܼܠܗ݇ܘܿܢ ܬܸܪ̈ܘܲܝ ܡܐܘܼܕܵܠܹܐ ܒܓܹܐܪܹ̈ܐ ܦܝܼܫܠܗ݇ܘܿܢ ܕܘܼܪ̈ܒܸܢܹܐ: ܟܲܕ ܚܡܲܪܬܵܐ ܕܒܲܪܝܼܵܐ ܚܲܕ݇ ܡܸܢܕܝܼ ܠܵܐ ܡܛܹܐܠܹܗ ܐܸܠܵܗ̇. ܘܢܦܸܠܗ݇ܘܿܢ ܡ̣ܢ ܣܘܼܣܵܘܵܬܲܝ̈ܗܝ: ܘܫܡܸܛܠܗ݇ܘܿܢ ܩܸܫܝܵܬܲܝ̈ܗܝ. ܘܒܝܼܲܝܗܝ ܬܘܼܡܸܡܠܵܗ̇ ܗܹܡܸܙܡܵܢܹܗ ܕܢܒ̣ܝܼܵܐ ܕܐ݇ܡܸܪܹܗ: ܕܣܲܝܦܲܝܗܝ ܒܸܬ ܥܵܒ̣ܸܪ ܒܠܸܒܲܝܗܝ: ܘܩܸܫܝܵܬܲܝ̈ܗܝ ܒܸܬ ܫܲܡܛܝܼ. ܐܝܼܢܵܐ ܩܲܕܝܼܫܵܐ ܦܝܼܫܠܹܗ ܛܘܼܡܪܵܐ ܒܐܝܼܩܵܪܵܐ: ܘܩܘܼܒܸܠܹܗ ܟܠܝܼܠܵܐ ܕܓ̣ܵܠܝܼܒܘܼܬܵܐ: ܐܲܝܟܼ ܗܲܡܙܲܡܬܹܗ ܕܣܵܒ̣ܵܐ ܡܵܪܝ ܐܵܘܓܹܝܢ. ܐܝܼܢܵܐ ܐ݇ܬܹܐܠܗ݇ܘܿܢ ܬܵܓ̰ܝܼܪܹ̈ܐ ܡ̣ܢ ܬܵܡܵܐ: ܗܘܼܩܝܼܠܗ݇ܘܿܢ ܐܸܠܲܢ ܐܲܢܹ̈ܐ ܟܠܲܝܗܝ ܕܗܘܹܐܠܗ݇ܘܿܢ.
ܐܝܼܢܵܐ ܐܘܼܦ ܘܵܓ̰ܸܒ ܝ݇ܠܵܗ̇ ܠܵܐ ܫܲܒ̣ܩܲܚ: ܕܗ݇ܘܹܐܠܵܗ̇ ܒܐܝܼܕܹܗ ܕܩܲܕܝܼܫܵܐ ܡܵܪܝ ܝܲܥܩܘܿܒ̣. ܣܵܒܵܒ ܗ݇ܘܹܐܠܵܗ̇ ܠܹܗ ܚܲܕ݇ ܬܲܚܡܵܢܬܵܐ ܠܐܵܗܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܒܥܕܵܢܵܐ ܕܐܵܙܸܠ ܠܗ̇ܝ ܕܘܼܟܬܵܐ ܕܦܝܼܫܠܵܗ̇ ܫܪܝܼܬܵܐ ܒܝܼܘܼܗ̇ ܩܹܒ̣ܘܼܬܵܐ ܥܲܠ ܛܘܼܪ̈ܵܢܹܐ ܕܩܲܪܕܘܿ. ܕܨܵܠܹܐ ܨܠܘܿܬܵܐ ܘܦܲܪܦܸܠ ܒܡܵܪܲܢ: ܕܡܲܚܙܹܐ ܠܹܗ ܗ̇ܝ ܩܹܒ̣ܘܼܬܵܐ [ܓܵܡܝܼ ܕܢܘܼܚ] ܕܒܝܼܘܼܗ̇ ܗ݇ܘܹܐܠܵܗ̇ ܫܲܚܠܵܦܬܵܐ ܠܥܵܠܡܵܐ. ܘܐ݇ܙܸܠܹܗ ܠܟܸܣ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܦܲܪܦܸܠ ܗ݇ܘܼܵܐ ܒܝܼـܹܗ ܕܐܵܙܸܠ ܥܲܡܹܗ ܠܬܵܡܵܐ. ܐܝܼܢܵܐ ܡܵܪܝ ܐܵܘܓܹܝܢ ܐ݇ܡܸܪܹܗ ܐܸܠܹܗ: ܕܐܵܢܵܐ ܐܵܕܝܼܵܐ ܕܐܵܙܸܠ݇ܢ ܥܲܡܘܼܟܼ ܠܹܐ ܡܵܨܸܢ. ܐܝܼܢܵܐ ܐܲܢ݇ܬܿ ܠܵܐ ܡܲܚܦܸܠܸܬܿ ܝܲܢ ܥܲܪܩܸܠܸܬܿ: ܕܗܵܘܹܐ ܐܲܝܟܼ ܪܸܙܵܝܘܼܟܼ. ܗܵܐ ܒܸܬ ܫܵܕܸܪ ܡܵܪܲܢ ܥܲܡܘܼܟܼ ܡܲܠܲܐܟ̣ܵܐ: ܗ̇ܘ ܒܸܬ ܡܲܚܙܹܐܠܘܼܟܼ ܕܘܼܟܬܵܐ ܕܦܝܼܫܠܵܗ̇ ܛܘܼܡܸܪܬܵܐ ܒܝܼܘܼܗ̇ ܓܵܡܝܼ ܕܢܘܼܚ. ܘܒܸܬ ܦܵܫܸܛ ܐܝܼܕܹܗ ܒܠܸܒܵܗ̇ ܕܐܲܪܥܵܐ: ܘܒܸܬ ܡܵܣܸܩ ܡܸܢܘܼܗ̇ ܚܲܕ݇ ܕܲܦܵܐ ܩܵܬܘܼܟܼ ܐܲܝܟܼ ܠܒܘܼܪܸܟܬܵܐ. ܗܵܝܓܵܗ ܡܵܪܝ ܝܲܥܩܘܿܒ̣ ܩܸܡܠܹܗ ܘܐ݇ܙܸܠܹܗ ܬܵܡܵܐ. ܟܲܕ ܡܛܹܐܠܹܗ ܠܡܲܪ̈ܙܵܢܹܐ ܕܛܘܼܪܵܐ: ܗܵܐ ܡܲܠܲܐܟ̣ܵܐ ܒܹܐܙܵܠܵܐ ܗ݇ܘܼܵܐ ܩܵܕ݇ܡ ܕܩܲܕܝܼܫܵܐ: ܗܲܠ ܠܕܘܼܟܬܵܐ ܕܒܝܼܘܼܗ̇ ܦܝܼܫܠܵܗ̇ ܡܚܝܼܬܵܐ ܩܹܒ̣ܘܼܬܵܐ. ܗܵܝܓܵܗ ܡܘܼܕܸܥܠܹܗ ܘܐ݇ܡܸܪܹܐ ܐܸܠܹܗ: ܕܐܵܗܵܐ ܝ݇ܠܵܗ̇ ܕܘܼܟܬܵܐ ܕܒܝܼܵܗ̇ ܦܝܼܫܠܵܗ̇ ܡܘܼܬܸܒ̣ܬܵܐ ܩܹܒ̣ܘܼܬܵܐ. ܗܵܝܓܵܗ ܨܘܼܠܹܐܠܹܗ ܨܠܘܿܬܵܐ ܩܲܕܝܼܫܵܐ ܘܦܘܼܪܦܸܠܹܗ ܒܡܵܪܲܢ: ܕܝܵܗ݇ܒ̣ܸܠܹܗ ܚܲܕ݇ ܩܲܝܣܵܐ ܡܸܢܵܗ̇ ܕܩܹܒ̣ܘܼܬܵܐ: ܐܲܝܟܼ ܕܠܒܘܼܪܸܟܬܵܐ. ܘܡ̣ܢ ܡܲܥܒܕܵܢܘܼܬܵܐ ܕܐܲܠܵܗܵܐ ܦܝܼܫܠܹܗ ܡܘܼܫ݇ܟ̰ܚܵܐ ܕܲܦܵܐ ܩܵܕ݇ܡ ܕܩܲܕܝܼܫܵܐ: ܘܫܩܸܠܹܗ ܒܚܲܕܘܼܬܵܐ ܓܘܼܪܬܵܐ. ܗܵܝܓܵܗ ܬܘܼܚܡܸܢܹܗ ܩܲܕܝܼܫܵܐ: ܕܒܵܢܹܐ ܚܲܕ݇ ܕܲܝܪܵܐ ܬܵܡܵܐ: ܕܐܵܣܩܵܐ ܒܝܼܘܼܗ̇ ܬܸܫܒܘܿܚܬܵܐ ܠܡܵܪܲܢ. ܘܛܥܸܢܹܗ ܩܲܕܝܼܫܵܐ ܠܗ̇ܘ ܕܲܦܵܐ: ܘܐ݇ܬܹܐܠܹܗ ܒܚܲܕܘܼܬܵܐ ܠܟܸܣ ܡܵܪܝ ܐܵܘܓܹܝܢ. ܘܥܒ̣ܸܪܹܗ ܠܟܸܣܠܹܗ ܠܓܸܦܝܼܬܵܐ ܗ̇ܘ ܕܟܹܐ ܚܲܝܝܼ ܗ݇ܘܼܵܐ ܒܝܼـܹܗ: ܘܡܘܼܕܸܥܠܹܗ ܕܩܘܼܒܸܠܹܗ ܡܵܪܲܢ ܒܵܥܘܼܬܹܗ: ܘܐܘܼܦ ܦܝܼܫܠܵܗ̇ ܡܘܼܚܙܝܼܬܵܐ ܐܸܠܹܗ ܗ̇ܝ ܕܘܼܟܬܵܐ: ܘܝܘܼܗ݇ܒ̣ܸܠܹܗ ܐܸܠܹܗ ܕܲܦܵܐ ܡ̣ܢ ܩܹܒ̣ܘܼܬܵܐ. ܘܫܩܸܠܹܗ ܣܵܒ̣ܵܐ ܠܗ̇ܘ ܕܲܦܵܐ: ܘܚܬܸܡܠܹܗ ܠܗ̇ܘ ܐ݇ܪܵܙܵܐ ܒܡܣܲܝܒܪܵܢܘܼܬܵܐ ܕܐܲܠܵܗܵܐ ܕܦܝܼܫܠܹܗ ܥܒ̣ܝܼܕܵܐ ܩܵܐ ܪܵܒܵܐ ܫܸܢܹ̈ܐ: ܕܥܒ̣ܘܼܕ ܒܵܘܲܪ ܕܚܵܙܝܼ ܘܙܲܕܥܝܼ: ܘܕܵܥܪܝܼ ܡ̣ܢ ܒܝܼܫܘܼܬܲܝܗܝ ܕܐܵܢܝܼ ܕܵܘܪܹ̈ܐ ܩܲܕ݇ܡܵܝܹ̈ܐ: ܕܦܝܼܫܠܹܗ ܡܘܼܟܪܸܙܵܐ ܩܵܬܲܝܗܝ ܒܘܼܬ ܛܵܘܦܵܢܵܐ. ܘܫܩܸܠܹܗ ܡܵܪܝ ܐܵܘܓܹܝܢ ܚܲܕ݇ ܣܵܗ݇ܡܵܐ ܡ̣ܢ ܗ̇ܘ ܕܲܦܵܐ: ܘܥܒ̣ܸܕܠܹܗ ܨܠܝܼܒ̣ܵܐ ܘܡܘܼܬܸܒ̣ܠܹܗ ܓܵܘ ܩܸܠܵܝܬܹܗ. ܘܟܠ ܚܲܕ݇ ܡ̣ܢ ܐܲܚܘܿܢܘܵܬܹ̈ܐ ܦܲܪܦܸܠ ܗ݇ܘܼܵܐ ܒܝܼـܹܗ ܕܩܵܐ ܡܵܢܝܼ ܒܸܬ ܝܲܪܬܸܬܿܠܹܗ ܠܨܠܝܼܒ̣ܵܐ؟ ܐܝܼܢܵܐ ܐܵܗܵܐ ܠܵܐ ܝܘܼܗ݇ܒ̣ܸܠܹܗ ܠܗܸܟ̰ ܐ݇ܢܵܫܵܐ: ܐܸܠܵܐ ܛܘܼܡܸܪܹܗ ܓܵܘ ܥܘܼܡܪܵܐ ܘܗܸܟ̰ ܐ݇ܢܵܫܵܐ ܠܵܐ ܝ݇ܕܸܥܠܹܗ ܕܘܼܟܬܹܗ.
ܐܝܼܢܵܐ ܩܲܕܝܼܫܵܐ ܡܵܪܝ ܝܲܥܩܘܿܒ̣ ܒܢܹܐܠܹܗ ܘܡܘܼܩܸܡܠܹܗ ܬܵܡܵܐ ܚܲܕ݇ ܕܲܝܪܵܐ ܓܘܼܪܵܐ: ܘܐ݇ܬܹܐܠܹܗ ܘܦܘܼܪܦܸܠܹܗ ܒܩܲܕܝܼܫܵܐ ܡܵܪܝ ܐܵܘܓܹܝܢ: ܕܐܵܙܸܠ ܗ̇ܘ ܘܟܠܵܗ̇ ܐܲܚܘܿܢܘܵܬܹ̈ܐ ܩܵܐ ܩܘܼܕܵܫܵܐ ܕܗ̇ܝ ܕܘܼܟܬܵܐ ܕܕܲܝܪܵܐ. ܘܩܸܡܠܹܗ ܣܵܒ̣ܵܐ ܥܲܠ ܗܝܼܒ̣ܝܼ ܕܡܵܪܲܢ: ܘܥܲܡ ܪܵܒܵܐ ܐܲܚܘܿܢܘܵܬܹ̈ܐ: ܘܐ݇ܙܸܠܗ݇ܘܿܢ ܥܲܡܹܗ: ܘܟܲܕ ܡܛܹܐܠܗ݇ܘܿܢ ܠܟܸܣ ܢܲܗܪܵܐ ܕܕܸܩܠܲܬ: ܩܲܕܝܼܫܵܐ ܡܵܪܝ ܐܵܘܓܹܝܢ ܘܣܵܒ̣ܹ̈ܐ ܕܥܲܡܹܗ ܒܥܕܵܢܵܐ ܕܒܹܐܙܵܠܵܐ ܗ݇ܘܼܵܘ ܘܥܵܒ̣ܕܝܼ ܗ݇ܘܼܵܘ ܚܸܠܡܲܬ ܥܲܠ ܡܲܪܙܵܐ ܕܢܲܗܪܵܐ ܕܕܸܩܠܲܬ: ܘܗܵܐ ܚܲܕ݇ ܝܵܠܵܕ݇ܐ ܟܸܠܝܵܐ ܗ݇ܘܼܵܐ ܥܲܠ ܡܲܪܙܵܐ ܕܡܝܼ̈ܵܐ ܘܒܸܟ̣ܝܵܐ. ܐܝܼܢܵܐ ܐܵܗܵܐ ܣܵܒ̣ܵܐ ܐ݇ܙܸܠܹܗ ܠܟܸܣܠܹܗ ܘܐ݇ܡܸܪܹܗ ܐܸܠܹܗ: ܡ̣ܢ ܐܲܝܟܵܐ ܝ݇ܘܸܬܿ ܒܪܘܿܢܝܼ؟ ܘܒܘܼܬ ܡܘܼܕܝ݇ ܣܵܒܵܒ ܒܸܒܟ̣ܵܝܵܐ ܝ݇ܘܸܬܿ؟ ܐܝܼܢܵܐ ܐܵܗܵܐ ܝܵܠܵܕ݇ܐ ܠܵܐ ܒܣܸܡܠܵܠܹܗ ܕܓ̰ܵܘܘܸܒܠܹܗ: ܐܝܼܢܵܐ ܒܸܨܠܵܦܵܐ ܝ݇ܗܘܼܵܐ ܓܵܢܹܗ ܒܟܹܐܦܹ̈ܐ: ܘܒܸܫܝܵܦܵܐ ܗ݇ܘܼܵܐ ܪܹܫܹܗ ܒܐܲܪܥܵܐ. ܐܵܗܵܐ ܣܵܒ̣ܵܐ ܩܘܼܪܒܸܢܹܗ ܘܕܒ̣ܸܩܠܹܗ ܐܝܼܕܵܬ̈ܘܼܗܝ ܘܐ݇ܡܸܪܹܗ ܐܸܠܹܗ: ܒܪܘܿܢܝܼ ܠܵܐ ܨܲܦܠܸܦܸܬܿ ܓܵܢܘܼܟܼ ܒܟܹܐܦܹ̈ܐ. ܐܝܼܢܵܐ ܐ݇ܡܘܿܪ ܠܝܼ: ܡ̣ܢ ܐܲܝܟܵܐ ܝ݇ܘܸܬܿ؟ ܘܡܘܼܕܝܼ ܩܘܼܘܸܡܠܹܗ ܐܸܠܘܼܟܼ؟ ܥܒ̣ܘܼܕ ܒܵܘܲܪ ܡܵܨܸܢ ܕܗܲܝܸܪܸܢܘܼܟܼ. ܐܝܼܢܵܐ ܐܵܗܵܐ ܝܵܠܵܕ݇ܐ ܐ݇ܡܸܪܹܗ ܐܸܠܹܗ: ܡ̣ܢ ܐܲܝܟܵܐ ܡܵܨܹܝܬܿ ܕܗܲܝܸܪܬܿ ܠܝܼ؟ ܐܵܢܵܐ ܝܵܬܘܿܡܵܐ ܝ݇ܘܸܢ: ܘܒܵܒܵܐ ܠܲܝܬ ܠܝܼ. ܘܝܸܡܝܼ ܣܵܒ̣ܬܵܐ ܝ݇ܠܵܗ̇: ܘܠܹܐ ܡܵܨܝܵܐ ܦܵܠܚܵܐ. ܘܐܵܢܵܐ ܝܵܠܵܕ݇ܐ ܙܥܘܿܪܵܐ ܝ݇ܘܸܢ: ܕܵܐܟ̣ܝܼ ܕܒܸܚܙܵܝܵܐ ܝ݇ܘܸܬܿ: ܘܠܹܐ ܡܵܨܸܢ ܕܥܵܒ̣ܕܸܢ ܡܸܢܕܝܼ. ܘܦܠܸܛܠܝܼ ܐܵܢܵܐ ܘܐܲܚܘܿܢܝܼ ܕܓܘܼܪܵܐ ܡܸܢܝܼ: ܘܐ݇ܬܹܐܠܲܢ ܠܐܵܗܵܐ ܡܵܝܫܵܐ: ܕܩܲܛܥܲܚ ܚܲܕ݇ܟ̰ܵܐ ܩܲܝܣܹ̈ܐ: ܡܣܵܒܵܒ ܒܸܥܒ̣ܵܕܵܐ ܝ݇ܘܲܚ ܗ݇ܘܼܵܐ ܚܲܕ݇ ܒܲܝܬܵܐ ܩܵܬܲܢ: ܘܐ݇ܬܹܐܠܝܼ ܥܲܡܹܗ: ܕܗܵܘܸܢ ܐܲܝܟܼ ܚܲܕ݇ ܩܵܠܵܐ ܐܸܠܹܗ. ܘܦܠܸܛܠܹܗ ܚܲܕ݇ ܐܲܪܝܵܐ ܡ̣ܢ ܕܐܵܗܵܐ ܡܵܝܫܵܐ: ܘܩܲܡ ܫܵܒ̣ܸܩܠܝܼ ܣܵܒܵܒ ܕܝܑܼܘܸܢ ܗ݇ܘܼܵܐ ܙܥܘܿܪܵܐ: ܘܫܩܸܠܹܗ ܠܗ̇ܘ ܕܝܼܗܘܼܵܐ ܓ̰ܘܲܢܩܵܐ. ܘܕܒ̣ܸܩܠܹܗ ܒܦܘܼܡܹܗ: ܘܫܥܸܫܠܹܗ ܘܡܚܹܐܠܹܗ ܬܠܵܬ݇ܐ ܓܵܗܹ̈ܐ ܩܵܕ݇ܡܝܼ. ܘܦܬܸܚܠܹܗ ܦܘܼܡܹܗ ܘܕܒ̣ܸܩܠܹܗ ܒܩܕܵܠܹܗ: ܘܡܘܼܥܒ̣ܸܪܹܗ ܠܐܵܗܵܐ ܡܵܝܫܵܐ. ܘܒܵܥܹܢ ܝܲܢ ܩܲܛܠܸܢ ܓܵܢܝܼ ܒܟܹܦܹ̈ܐ: ܝܲܢ ܢܲܦܠܸܢ ܓܵܘ ܢܲܗܪܵܐ ܕܕܸܩܠܲܬ. ܕܗܵܐ ܡܓ̰ܲܢܓ̰ܘܼܪܹܐ ܝ݇ܘܸܢ: ܕܦܝܼܫܠܝܼ ܦܪܝܼܫܵܐ ܡ̣ܢ ܚܘܼܒܵܐ ܕܐܲܚܘܿܢܝܼ: ܘܕܒܸܕܟ̣ܵܪܵܐ ܝ݇ܘܸܢ ܕܵܐܟ̣ܝܼ ܗ݇ܘܹܐܠܹܗ ܩܸܛܠܹܗ: ܘܕܠܲܝܬ ܠܝܼ ܚܲܕ݇ ܐ݇ܢܵܫܵܐ ܕܐܵܟ̣ܠ ܚܲܡ ܕܝܼܝܼ ܘܕܝܸܡܝܼ ܣܵܒ̣ܬܵܐ.
ܗܵܝܓܵܗ ܩܲܕܝܼܫܵܐ ܟܲܕ ܫܡܸܥܠܹܗ ܐܲܢܹ̈ܐ ܗܹܡܸܙܡܵܢܹ̈ܐ: ܒܗ̇ܝ ܥܕܵܢܵܐ ܨܠܹܐܠܗ݇ܘܿܢ ܕܸܡܥܹ̈ܐ ܕܥܲܝܢ̈ܘܼܗܝ ܥܲܠ ܓ̰ܘܼܠ̈ܘܼܗܝ ܚܘܵܪܹ̈ܐ. ܗܵܝܓܵܗ ܐ݇ܡܸܪܹܗ ܣܵܒ̣ܵܐ ܠܗܿܘ ܝܵܠܵܕ݇ܐ: ܬܵܐ ܒܪܘܿܢܝܼ ܡܲܚܙܹܐܠܝܼ ܕܘܼܟܬܵܐ ܕܒܝܼܵܗ̇ ܥܒ̣ܸܪܹܗ ܗ̇ܘ ܐܲܪܝܵܐ. ܐܝܼܢܵܐ ܐܵܗܵܐ ܝܵܠܵܕ݇ܐ ܐ݇ܙܸܠܹܗ ܩܵܕ݇ܡܹܗ ܕܩܲܕܝܼܫܵܐ ܒܚܵܦܘܼܛܘܼܬܵܐ ܟܲܕ ܒܸܟ̣ܝܵܐ: ܡܲܚܘܼܒܹܐ ܗ݇ܘܼܵܐ ܕܐܵܦܸܢ ܕܐܲܚܟ̰ܝܼ ܕܚܵܙܹܐ ܫܠܲܕܹܗ ܕܐܲܚܘܿܢܹܗ: ܘܐ݇ܬܹܐܠܹܗ ܗܲܠ ܠܕܘܼܟܬܵܐ ܘܒܝܼܘܼܗ̇ ܒܪܝܼܟܵܐ ܗ݇ܘܼܵܐ ܐܲܪܝܵܐ. ܐܝܼܢܵܐ ܐܵܗܵܐ ܐܲܪܝܵܐ ܒܥܕܵܢܵܐ ܕܫܡܸܥܠܹܗ ܩܵܠܲܢ: ܡܘܼܪܸܡܠܹܗ ܪܹܫܹܗ: ܘܚܙܹܐܠܲܢ ܠܗ̇ܘ ܓ̰ܘܲܢܩܵܐ ܟܲܕ ܗ̇ܘ ܦܫܝܼܩܵܐ ܩܵܕ݇ܡܘܼܗܝ. ܘܗܲܪ ܒܗ̇ܝ ܣܵܥܲܬ ܐܲܪܝܵܐ ܓ̰ܘܸܓ̰ܠܹܗ: ܘܩܸܡܠܹܗ ܘܐ݇ܙܸܠܹܗ ܡ̣ܢ ܕܘܼܟܬܹܗ. ܐܝܼܢܵܐ ܝܵܠܵܕ݇ܐ ܟܲܕ ܚܙܹܐܠܹܗ ܫܠܲܕܹܗ ܕܐܲܚܘܿܢܹܗ: ܪܚܸܛܠܹܗ ܢܦܸܠܹܗ ܥܲܠܘܼܗ̇ ܟܲܕ ܒܸܟ̣ܝܵܐ ܒܡܲܪܝܼܪܘܼܬܵܐ: ܘܠܵܐ ܙܕܸܥܠܹܗ ܡ̣ܢ ܐܲܪܝܵܐ. ܡܣܵܒܵܒ ܒܹܐܡܵܪܵܐ ܗ݇ܘܼܵܐ ܒܓܵܢܹܗ: ܕܫܒ̣ܘܿܩ ܠܹܗ ܕܩܵܛܸܠ ܐܘܼܦ ܐܸܠܝܼ: ܘܠܵܐ ܦܵܝܫܸܢ ܦܪܝܼܫܵܐ ܡ̣ܢ ܐܲܚܘܿܢܝܼ. ܐܝܼܢܵܐ ܩܲܕܝܼܫܵܐ ܒܗ̇ܝ ܣܵܥܲܬ ܩܘܼܪܒܸܢܹܗ ܠܟܸܣ ܫܠܲܕܵܐ: ܟܲܕ ܒܸܡܫܵܝܵܐ ܠܕܸܡܥܹ̈ܐ ܕܥܲܝܢ̈ܘܼܗܝ ܒܓ̰ܘܼܠ̈ܘܼܗܝ: ܬܸܪܝܵܐ ܗ݇ܘܼܵܐ ܟܠܹܗ ܨܲܕܪܹܗ ܕܣܵܒ̣ܵܐ ܒܕܸܡܥܵܐ ܕܥܲܝܢܹ̈ܐ: ܗܵܕܟ̣ܵܐ ܟܠܲܝܗܝ ܐܲܚܘܿܢܘܵܬܹ̈ܐ ܡܘܼܬܪܝܼܵܐ ܗ݇ܘܼܵܘ ܓ̰ܘܼ̈ܠܲܝܗܝ ܡ̣ܢ ܦܵܫܲܡܬܵܐ: ܟܲܕ ܫܲܡܥܝܼ ܗ݇ܘܼܵܘ ܠܗܹܡܸܙܡܵܢܹ̈ܐ ܕܝܵܠܵܕ݇ܐ ܕܟܡܵܐ ܡܲܦܫܸܡܵܢܹ̈ܐ ܗ݇ܘܼܵܘ: ܘܚܵܙܝܼ ܗ݇ܘܼܵܘ ܠܫܠܲܕܹܗ ܕܓ̰ܘܲܢܩܵܐ ܟܲܕ ܢܦܝܼܠܵܐ: ܘܓܘܼܪ̈ܡܸܠܹܐ ܓ̰ܘܼܠ̈ܘܼܗܝ ܒܕܸܡܵܐ: ܓܘܼܫܸܩܠܹܗ ܩܲܕܝܼܫܵܐ ܒܟܠܹܗ ܓܘܼܫܡܹܗ ܕܓ̰ܘܲܢܩܵܐ: ܘܠܹܐ ܗ݇ܘܼܵܐ ܐ݇ܟ̣ܝܼܠܵܐ ܡܸܢܹܗ ܡܸܢܕܝܼ: ܐܸܠܵܐ ܕܸܡܹܗ ܫܸܬܝܵܐ ܗ݇ܘܼܵܐ: ܕܫܩܝܼܠܵܐ ܗ݇ܘܼܵܐ ܚܲܕ݇ܟ̰ܵܐ ܒܸܣܪܵܐ ܡ̣ܢ ܕܸܦܢܹܗ ܕܝܲܡܝܼܢܵܐ. ܘܡܸܚܝܵܐ ܗ݇ܘܼܵܐ ܒܩܕܵܠܹܗ: ܐܲܝܟܼ ܕܒܣܟܝܼܢܬܵܐ ܙܪܝܼܟ̰ܵܐ ܗ݇ܘܼܵܐ. ܗܵܝܓܵܗ ܗܲܪ ܒܗ̇ܝ ܣܵܥܲܬ ܢܦܸܠܹܗ ܩܲܕܝܼܫܵܐ ܥܲܠ ܦܲܐܬܘܵܬ̈ܘܼܗܝ ܘܐ݇ܡܸܪܹܗ ܐܸܠܲܢ: ܐܲܚܘܿܢܘܵܬ̈ܝܼ ܛܠܘܿܒܘܼܢ ܡ̣ܢ ܡܵܪܢ ܒܨܠܘܿܬܵܐ: ܕܡܲܕܸܥܪܹܗ ܐܵܗܵܐ ܓ̰ܘܲܢܩܵܐ ܠܚܲܝܹ̈ܐ: ܕܡܲܫܠܹܗ ܠܓ̰ܘܼܓ̰ܵܪܵܐ ܕܐܵܗܵܐ ܝܵܠܵܕ݇ܐ. ܘܡܘܼܬܸܒܼܠܹܗ ܪܹܫܹܗ ܩܲܕܝܼܫܵܐ ܥܲܠ ܕܸܦܢܵܐ ܕܗ̇ܝ ܫܠܲܕܵܐ ܘܡܨܵܠܹܐ ܗ݇ܘܼܵܐ ܨܠܘܿܬܵܐ ܘܐܵܡܸܪ: ܡܵܪܲܢ ܝܼܫܘܿܥ ܡܫܝܼܚܵܐ: ܛܵܒ̣ܵܐ ܕܚܲܙܢܹܗ ܠܹܐ ܒܵܨܸܪ: ܪ̈ܲܚܡܘܼܟܼ ܝܵܐ ܡܵܪܝܼ ܦܘܼܪ̈ܦܸܠܗ݇ܘܿܢ ܒܝܼܘܼܟܼ ܒܘܼܬ ܒܪܘܿܢܵܗ̇ ܕܐܲܪܡܸܠܬܵܐ ܟܲܕ ܗܸܟ̰ ܐ݇ܢܵܫܵܐ ܠܵܐ ܦܘܼܪܦܸܠܹܐ ܒܝܼܘܼܟܼ. ܡܘܼܕܸܥܪܘܼܟܼ ܠܚܲܝܹ̈ܐ ܘܝܘܼܗ݇ܒ̣ܸܠܘܼܟܼ ܠܝܸܡܹܗ: ܡܫܝܼܠܘܼܟܼ ܠܕܸܡܸܥܬܵܐ ܡ̣ܢ ܥܲܝܢ̈ܘܼܗ̇. ܘܡܘܼܚܙܹܐܠܘܼܟܼ ܚܲܝܠܘܼܟܼ: ܘܡܘܼܕܸܥܪܘܼܟܼ ܠܝܵܠܵܕ݇ܐ ܠܝ݇ܕܸܥܬܵܐ ܕܫܪܵܪܵܐ. ܘܡܵܨܹܝܬܿ ܐܘܼܦ ܐܵܕܝܼܵܐ ܡܵܪܝ ܕܡܲܩܸܡܸܬܿ ܠܹܗ ܐܵܗܵܐ ܓ̰ܘܲܢܩܵܐ. ܠܹܐ ܝ݇ܠܵܗ̇ ܒܘܼܬ ܕܝܼܝܼ ܙܲܒܘܼܢ: ܐܝܼܢܵܐ ܒܘܼܬ ܕܐܵܗܵܐ ܝܵܠܵܕ݇ܐ ܕܦܝܼܫܠܹܗ ܦܪܝܼܫܵܐ ܡ̣ܢ ܐܲܚܘܿܢܹܗ: ܘܓܘܼܒܝܼܠܹܗ ܡܵܘܬܵܐ ܡ̣ܢ ܓܸܒ ܚܲܝܹ̈ܐ: ܘܒܘܼܬ ܐܲܪܡܸܠܬܵܐ ܗ̇ܝ ܡܸܣܟܸܢܬܵܐ ܕܝܸܡܹܗ: ܕܠܵܐ ܡܵܛܹܐܠܵܗ̇ ܫܲܩܝܼܘܼܬܵܐ ܥܲܠ ܫܲܩܝܼܘܼܬܵܐ. ܡܲܕܥܸܪ ܡܵܪܝܼ ܠܐܵܗܵܐ ܓ̰ܘܲܢܩܵܐ ܠܚܲܝܹ̈ܐ: ܕܫܵܒܸܚ ܠܫܸܡܘܼܟܼ ܩܲܕܝܼܫܵܐ: ܘܕܵܥܪܝܼ ܐܵܢܝܼ ܕܛܠܝܼܩܹ̈ܐ ܝ݇ܢܵܐ ܠܣܓ̣ܵܕܬܵܐ ܕܝܼܘܼܟܼ. ܘܒܗ̇ܝ ܣܵܥܲܬ ܥܲܡ ܨܠܘܿܬܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܦܬܸܚܠܹܗ ܓ̰ܘܲܢܩܵܐ ܥܲܝܢ̈ܘܼܗܝ: ܘܚܙܹܐܠܹܗ ܠܐܲܚܘܿܢܹܗ ܟܲܕ ܢܦܝܼܠܵܐ ܥܲܠ ܨܲܕܪܹܗ: ܘܬܘܼܢܸܚܠܹܗ ܬܪܹܝ ܓܵܗܹ̈ܐ.
ܘܩܸܡܠܹܗ ܣܵܒ̣ܵܐ ܘܫܘܼܒܸܚܠܹܗ ܠܐܲܠܵܗܵܐ ܕܫܡܸܥܠܹܗ ܨܠܘܿܬܹܗ: ܦܘܼܩܸܕܠܹܗ ܠܐܲܚܘܿܢܘܵܬܹ̈ܐ ܕܣܲܢܕܝܼܠܹܗ ܘܐܘܼܦ ܡܲܬܒ̣ܝܼܠܹܗ ܠܗ̇ܘ ܓ̰ܘܲܢܩܵܐ. ܘܩܘܼܪܒܸܢܹܗ ܩܲܕܝܼܫܵܐ ܘܝ݇ܬܸܒ̣ܠܹܗ ܠܟܸܣܠܹܗ: ܘܦܘܼܫܸܛܠܹܗ ܐܝܼܕܹܗ ܪܫܸܡܠܹܗ ܢܝܼܫܲܢܩܵܐ ܕܨܠܝܼܒ̣ܵܐ. ܐܝܼܢܵܐ ܐܵܗܵܐ ܓ̰ܘܲܢܩܵܐ ܒܟ̣ܹܐܠܹܗ. ܘܐ݇ܡܸܪܹܗ ܐܸܠܹܗ ܣܵܒ̣ܵܐ: ܒܪܘܿܢܝܼ: ܠܵܐ ܙܲܕܥܸܬܿ: ܐܝܼܢܵܐ ܫܵܒܸܚ ܠܡܵܪܲܢ ܗ̇ܘ ܕܝܘܼܗ݇ܒ̣ܸܠܹܗ ܐܸܠܘܼܟܼ ܚܲܝܹ̈ܐ: ܕܐܵܗܵܐ ܐܲܚܘܿܢܘܼܟܼ ܠܵܐ ܦܵܐܸܫ ܒܢܲܦ̮ܫܹܗ. ܐܝܼܢܵܐ ܐܵܗܵܐ ܚܲܕ݇ܟ̰ܵܐ ܗܲܡܙܘܼܡܹܗ ܗ݇ܘܼܵܐ: ܣܵܒܵܒ ܠܹܐ ܗ݇ܘܼܵܐ ܡܨܵܝܵܐ ܕܗܲܡܙܸܡ ܗ݇ܘܼܵܐ. ܘܐܵܡܸܪ ܗ݇ܘܼܵܐ: ܡܵܘܕܘܼܝܹܐ ܝ݇ܘܸܢ ܒܡܵܪܲܢ ܝܼܫܘܿܥ ܡܫܝܼܚܵܐ: ܕܟܲܕ ܦܝܼܫܠܝܼ ܩܛܝܼܠܵܐ ܡ̣ܢ ܐܲܪܝܵܐ: ܘܦܘܼܪܸܩܠܝܼ ܠܐܲܚܘܿܢܝܼ ܡܸܢܹܗ. ܟܲܕ ܗܸܟ̰ ܐ݇ܢܵܫܵܐ ܠܲܝܬ ܗ݇ܘܼܵܐ ܠܟܸܣܠܝܼ: ܫܘܼܕܸܪܹܗ ܡܵܪܲܢ ܠܕܲܣܬܵܐ ܒܪܝܼܟ̣ܬܵܐ ܕܩܲܕܝܼܫܘܼܬܵܘܟ̣ܘܿܢ: ܛܠܸܒܠܵܘܟ̣ܘܿܢ ܡ̣ܢ ܡܵܪܲܢ ܘܕܸܥܪܝܼ ܠܚܲܝܹ̈ܐ. ܗܵܝܓܵܗ ܦܘܼܩܸܕܠܹܗ ܩܲܕܝܼܫܵܐ: ܕܫܲܩܠܝܼ ܠܹܗ ܘܦܲܠܛܝܼ ܠܹܗ ܡ̣ܢ ܡܵܝܫܵܐ. ܘܡܲܝܬ݇ܝܼ ܠܹܗ ܗܲܠ ܠܡܲܪܙܵܐ ܕܢܲܗܪܵܐ ܕܕܸܩܠܲܬ: ܘܚܘܼܠܸܠܗ݇ܘܿܢ. ܘܦܘܼܩܸܕܠܹܗ ܣܵܒ̣ܵܐ: ܘܡܘܼܬ݇ܝܼܠܗ݇ܘܿܢ ܐܸܠܹܗ ܡܸܫܚܵܐ ܕܒܘܼܪܸܟܬܵܐ ܕܐܝܼܬ ܗ݇ܘܼܵܐ ܥܲܡ ܐܲܚܘܿܢܵܐ. ܗ̇ܘ ܕܫܩܝܼܠܵܐ ܗ݇ܘܼܵܐ ܡ̣ܢ ܚܲܠܲܠܬܵܐ ܕܓܘܼܫܡܹܗ ܕܝܘܿܚܲܢܵܢ ܙܥܘܿܪܵܐ: ܘܡܫܸܚܠܹܗ ܠܩܕܵܠܹܗ ܘܠܗ̇ܝ ܕܘܼܟܬܵܐ ܕܫܸܚܬܹܗ. ܘܒܘܼܪܸܟ̣ܠܹܗ ܠܡܝܼ̈ܵܐ: ܘܝܘܼܗ݇ܒ̣ܸܠܹܗ ܐܸܠܹܗ ܕܫܵܬܹܗ. ܐܝܼܢܵܐ ܐܲܚܘܿܢܹܗ ܫܵܘܸܪ ܗ݇ܘܼܵܐ ܘܚܵܕܹܐ ܗ݇ܘܼܵܐ ܘܡܫܵܒܸܚ ܗ݇ܘܼܵܐ ܠܡܵܪܲܢ: ܘܢܵܫܸܩ ܗ݇ܘܼܵܐ ܠܐܲܩܠܵܬܹ̈ܐ ܘܠܓ̰ܘܼܠܹ̈ܐ ܕܩܲܕܝܼܫܹ̈ܐ.
ܐܝܼܢܵܐ ܚܲܕ݇ ܐ݇ܢܵܫܵܐ ܪܵܥܝܵܐ ܕܥܸܪ̈ܒܹܐ ܟܸܠܝܵܐ ܗ݇ܘܼܵܐ ܠܗ̇ܘ ܓܹܒܵܐ ܐ݇ܚܹܪ݇ܢܵܐ ܕܢܲܗܪܵܐ ܕܕܸܩܠܲܬ: ܘܣܢܝܼܕܵܐ ܗ݇ܘܼܵܐ ܥܲܠ ܚܘܼܛܪܹܗ ܒܥܕܵܢܵܐ ܕܥܒ̣ܸܕܠܹܗ ܗܸܓ̰ܘܼܡ ܐܲܪܝܵܐ ܥܲܠ ܝܵܠܵܕ݇ܐ. ܘܚܙܹܐܠܹܗ ܕܩܛܸܠܹܗ ܘܡܘܼܥܒ̣ܸܪܹܗ ܠܡܵܝܫܵܐ: ܘܚܙܹܐܠܹܗ ܕܠܲܝܬ ܗ݇ܘܼܵܐ ܚܲܕ݇ ܐ݇ܢܵܫܵܐ ܠܟܸܣܠܹܗ ܫܒ̣ܘܿܩ ܡ̣ܢ ܗ̇ܘ ܝܵܠܵܕ݇ܐ ܙܥܘܿܪܵܐ. ܘܫܒ̣ܸܩܠܹܗ ܠܦܸܣܩܵܐ ܕܥܸܪ̈ܒܘܼܗܝ: ܪܚܸܛܠܹܗ ܒܓ̰ܲܠܕܘܼܬܵܐ ܘܐ݇ܙܸܠܹܗ ܠܒܲܪܩܘܼܒ̣ܠ ܕܡܵܬܵܐ ܕܗ̇ܘ ܓ̰ܘܲܢܩܵܐ. ܘܗܲܪ ܒܗ̇ܝ ܥܕܵܢܵܐ ܡܘܼܫ݇ܟ̰ܸܚܠܹܗ ܚܲܕ݇ ܓܵܡܝܼ: ܘܥܒ̣ܸܪܹܗ ܓܵܘܵܗ̇: ܘܡܘܼܕܸܥܠܹܗ ܓܵܘ ܡܵܬܵܐ ܡܸܢܕܝܼ ܕܗ݇ܘܹܐܠܹܗ. ܘܦܠܸܛܠܗ݇ܘܿܢ ܪܵܒܵܐ ܐ݇ܢܵܫܹ̈ܐ ܡ̣ܢ ܡܵܬܵܐ ܕܐܵܬܝܼ ܕܛܲܡܪܝܼܠܹܗ ܗ̇ܘ ܓ̰ܘܲܢܩܵܐ: ܘܥܒ̣ܘܼܕ ܒܵܘܲܪ ܗ̇ܘ ܝܵܠܵܕ݇ܐ ܒܸܬ ܡܲܫ݇ܟ̰ܚܝܼܠܹܗ ܚܵܝܵܐ: ܘܐܵܬܝܼ ܗ݇ܘܼܵܘ ܒܣܲܝܦܹ̈ܐ ܘܒܓܹܐܪܹ̈ܐ. ܘܟܲܕ ܡܛܹܐܠܗ݇ܘܿܢ ܠܗ̇ܝ ܕܘܼܟܬܵܐ ܕܡܘܼܚܙܝܼܵܝܠܹܗ ܪܵܥܝܵܐ: ܘܚܙܹܐܠܗ݇ܘܿܢ ܠܕܲܣܬܵܐ ܕܩܲܕܝܼܫܹ̈ܐ ܓܘܼܒܝܹ̈ܐ [ܨܸܦܝܹ̈ܐ]: ܘܗ̇ܘ ܓ̰ܘܲܢܩܵܐ ܝ݇ܬܝܼܒ̣ܵܐ ܒܲܝܢܵܬܲܝܗܝ: ܘܫܘܼܠܚܵܝܵܐ: ܘܦܪܝܼܣܵܐ ܗ݇ܘܼܵܐ ܥܲܠܘܼܗܝ ܚܲܕ݇ ܡܲܥܦܪܵܐ ܐܲܚܟ̰ܝܼ: ܘܓ̰ܘܼܠ̈ܘܼܗܝ ܪ̈ܘܼܦܝܹܐ ܗ݇ܘܼܵܘ ܩܵܕ݇ܡܘܼܗܝ ܘܓܘܼܪ̈ܡܸܠܹܐ ܒܕܸܡܵܐ: ܒܲܩܪܝܼ ܗ݇ܘܼܵܘ ܡ̣ܢ ܐܲܚܘܿܢܹܗ ܘܡ̣ܢ ܩܲܕܝܼܫܹ̈ܐ: ܕܐܲܝܟܵܐ ܡܘܼܫ݇ܟ̰ܸܚܠܵܘܟ̣ܘܿܢ. ܗܵܝܓܵܗ ܗ̇ܘ ܐܲܚܘܿܢܵܐ ܙܥܘܿܪܵܐ ܗܘܼܩܝܼܠܹܗ ܐܸܠܲܝܗܝ ܠܫܪܵܪܵܐ ܟܠܲܝܗܝ ܩܸܣܲܬ. ܗܵܝܓܵܗ ܩܘܼܪܒܸܢܘܿܢ ܐܘܼܦ ܐܲܢܹ̈ܐ: ܘܡܘܼܚܙܹܐܠܗ݇ܘܿܢ ܒܩܕܵܠܹܗ ܕܨܠܝܼܦܵܐ ܗ݇ܘܼܵܐ. ܘܚܙܹܐܠܗ݇ܘܿܢ ܐܘܼܦ ܗ̇ܝ ܕܘܼܟܬܵܐ ܕܫܸܚܬܹܗ ܕܐ݇ܟ̣ܸܠܬܵܐ ܗ݇ܘܼܵܐ: ܘܠܹܐ ܗ݇ܘܼܵܐ ܦܠܝܼܛܵܐ ܡܸܢܘܼܗ̇ ܕܸܡܵܐ. ܘܒܓ̰ܲܠܕܘܼܬܵܐ ܢܦܸܠܗ݇ܘܿܢ ܥܲܠ ܦܲܐܬܲܝ̈ܗܝ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܹ̈ܐ: ܘܢܲܫܩܝܼ ܗ݇ܘܼܵܘ ܠܗ݇ܘܿܢ ܘܥܲܓ̰ܒܝܼ ܗ݇ܘܼܵܘ ܥܲܠ ܕܐܵܢܝܼ ܕܚܙܹܐܠܗ݇ܘܿܢ ܘܫܡܸܥܠܗ݇ܘܿܢ. ܐܝܼܢܵܐ ܐܝܼܬ ܗ݇ܘܼܵܐ ܡܸܢܲܝܗܝ ܚܲܢܦܹ̈ܐ ܗ݇ܘܼܵܘ: ܘܡܸܢܲܝܗܝ ܟܪܸ̈ܣܛܝܵܢܹܐ. ܐܝܼܢܵܐ ܐܵܢܝܼ ܕܚܲܢܦܹ̈ܐ ܗ݇ܘܼܵܘ ܥܘܼܓ̰ܸܒܠܗ݇ܘܿܢ ܘܐܵܡܪܝܼ ܗ݇ܘܼܵܘ: ܕܠܹܐ ܡܗܲܝܡܸܢܲܚ ܐܸܢ ܠܵܐ ܚܵܙܲܚ ܒܥܲܝ̈ܢܲܢ: ܕܗ݇ܘܹܐܠܵܗ̇ ܡܵܨܝܵܢܬܵܐ ܕܚܵܝܹܐ ܡܝܼܬܵܐ. ܐܝܼܢܵܐ ܟܪܸ̈ܣܛܝܵܢܹܐ ܒܸܚܕܵܝܵܐ ܗ݇ܘܼܵܘ ܒܩܲܕܝܼܫܹ̈ܐ ܐܲܝܟܼ ܐܲܣܟܵܪ ܕܡܲܠܲܐܟ̣ܹ̈ܐ. ܐܝܼܢܵܐ ܚܲܢܦܹ̈ܐ ܡܲܚܘܼܒܹܐ ܗ݇ܘܼܵܘ: ܕܐܝܼܡܵܢ ܐܘܼܦ ܐܵܢܝܼ ܒܸܬ ܚܲܫܚܝܼ ܠܡܲܥܡܘܿܕܝܼܬܵܐ ܟܲܕ ܒܹܐܡܵܪܵܐ ܗ݇ܘܼܵܘ: ܘܵܝ ܐܸܠܲܢ ܕܠܵܐ ܗܘܼܡܸܢܲܢ ܠܟܪܸ̈ܣܛܝܵܢܹܐ ܕܒܹܐܡܵܪܵܐ ܗ݇ܘܼܵܘ ܐܸܠܲܢ: ܕܡܫܝܼܚܵܐ ܗ̇ܘ ܝܑܼܠܹܗ ܐܲܠܵܗܵܐ ܫܲܪܝܼܪܵܐ. ܘܦܲܪܦܸܠܝܼ ܗ݇ܘܼܵܘ ܚܲܢܦܹ̈ܐ ܠܚܲܕ݇ ܡ̣ܢ ܐܲܚܘܿܢܘܵܬܹ̈ܐ: ܕܠܵܐ ܐܵܙܠ݇ܝܼ: ܗܲܠ ܕܥܵܒ̣ܪܝܼ ܠܡܵܬܲܝܗܝ. ܒܸܢܚܵܦܵܐ ܗ݇ܘܼܵܘ ܡ̣ܢ ܣܵܒ̣ܵܐ [ܡܵܪܝ ܐܵܘܓܹܝܢ] ܕܦܲܪܦܸܠܝܼ ܗ݇ܘܼܵܘ ܒܝܼـܹܗ ܒܘܼܬ ܕܐܵܗܵܐ: ܡܣܵܒܵܒ ܚܙܵܝܬܹܗ ܪܵܒܵܐ ܡܝܘܼܩܲܪܬܵܐ ܗ݇ܘܼܵܐ: ܘܦܲܪܨܘܿܦܹܗ ܚܩܝܼܪܵܐ ܗ݇ܘܼܵܐ: ܘܠܲܝܬ ܗ݇ܘܼܵܐ ܐ݇ܢܵܫܵܐ ܕܚܵܙܹܐ ܗ݇ܘܼܵܐ ܠܹܗ ܠܩܲܕܝܼܫܵܐ: ܕܠܵܐ ܒܬܲܚܡܲܢܬܹܗ ܗܵܘܹܐ ܗ݇ܘܵܐ ܒܸܢܚܵܦܵܐ ܡܸܢܹܗ: ܘܙܲܕܸܥ ܗ݇ܘܼܵܐ ܡ̣ܢ ܩܵܕ݇ܡܘܼܗܝ.
ܗܵܝܓܵܗ ܦܘܼܩܸܕܠܹܗ ܩܲܕܝܼܫܵܐ: ܕܛܲܥܢܝܼܠܹܗ ܗ̇ܘ ܓ̰ܘܲܢܩܵܐ: ܘܡܲܥܒ̣ܸܪܝܼܠܹܗ ܠܡܵܬܵܐ. ܘܐ݇ܡܸܪܹܗ ܐܸܠܲܝܗܝ: ܕܐܲܚܢܲܢ ܒܹܐܙܵܠܵܐ ܝ݇ܘܲܚ ܠܐܵܗܵܐ ܐܲܬܪܵܐ ܕܩܲܪܕܘܿ: ܣܵܒܵܒ ܠܬܵܡܵܐ ܩܲܡ ܩܵܪܝܵܐ ܠܲܢ ܐܘܼܪܚܵܐ ܕܐܵܙܲܠ݇ܚ. ܗܵܝܓܵܗ ܟܪܸ̈ܣܛܝܵܢܹܐ ܟܠܲܝܗܝ ܡܘܼܩܪܸܒ̣ܠܗ݇ܘܿܢ ܘܛܠܸܒܠܗ݇ܘܿܢ ܡܸܢܹܗ: ܒܹܐܡܵܪܵܐ ܕܬܵܡܵܐ ܥܵܒ̣ܪܝܼܬܘܿܢ ܢܲܗܪܵܐ ܕܕܸܩܠܲܬ ܒܡܵܬܲܢ. ܐܝܼܢܵܐ ܐܵܗܵܐ ܩܲܕܝܼܫܵܐ ܐ݇ܡܸܪܹܗ ܐܸܠܲܝܗܝ: ܕܡܵܪܲܢ ܗܘܼܕܸܪܵܐ ܝ݇ܠܹܗ ܐܸܠܲܢ ܡܸܢܕܝܼ ܕܥܵܒ̣ܪܲܚ ܒܝܼـܹܗ: ܘܟܲܕ ܚܙܹܐܠܗ݇ܘܿܢ ܕܠܹܐ ܝ݇ܠܹܗ ܡܲܨܝܘܼܬܹܐ ܐܸܠܲܝܗܝ: ܐܘܼܦ ܚܲܢܦܹ̈ܐ ܡܘܼܩܪܸܒ̣ܠܗ݇ܘܿܢ ܘܒܸܛܠܵܒܵܐ ܗ݇ܘܼܵܘ ܡܸܢܹܗ ܒܹܐܡܵܪܵܐ: ܒܵܒܲܢ: ܒܸܕܥܵܝܵܐ ܝ݇ܘܲܚ ܒܫܪܵܪܵܐ: ܕܡܫܝܼܚܵܐ ܐܲܠܵܗܵܐ ܝ݇ܠܹܗ ܫܲܪܝܼܪܵܐ. ܐܝܼܢܵܐ ܦܲܪܦܘܼܠܹܐ ܝ݇ܘܲܚ ܒܩܲܕܝܼܫܘܼܬܵܘܟ̣ܘܿܢ: ܕܥܵܒ̣ܪܝܼܬܘܿܢ ܠܡܵܬܲܢ. ܐܝܼܢܵܐ ܒܣܵܡܲܢ ܝ݇ܠܵܗ̇: ܕܡܸܢܵܘܟ̣ܘܿܢ ܩܲܒܠܲܚ ܪܘܼܫܡܵܐ ܕܡܲܥܡܘܿܕܝܼܬܵܐ ܩܲܕܝܼܫܬܵܐ. ܗܵܝܓܵܗ ܩܲܕܝܼܫܵܐ ܟܲܕ ܚܙܹܐܠܹܗ: ܕܦܝܼܫܠܹܗ ܦܬܝܼܚܵܐ ܐܸܠܹܗ ܬܲܪܥܵܐ ܓܘܼܪܵܐ ܕܡܸܠܝܵܐ ܝ݇ܠܹܗ ܝܘܼܬܪ̈ܵܢܹܐ ܕܛܥܘܿܢܝܵܬܹ̈ܐ ܪ̈ܘܼܚܵܢܵܝܹܐ: ܩܸܡܠܹܗ ܒܗ̇ܝ ܣܵܥܲܬ ܒܚܲܕܘܼܬܵܐ ܓܘܼܪܬܵܐ: ܘܕܸܥܪܹܗ ܕܐܵܙܸܠ ܥܲܡܲܝܗܝ: ܗ̇ܘ ܥܲܡ ܟܠܵܗ̇ ܕܲܣܬܵܐ ܕܐܲܚܘܿܢܘܵܬܹ̈ܐ. ܘܛܥܸܢܘܿܢ ܠܗ̇ܘ ܓ̰ܘܲܢܩܵܐ: ܘܡܘܼܬܸܒ̣ܠܗ݇ܘܿܢ ܥܲܠ ܚܡܵܪܵܐ ܕܝܼܗܘܼܵܐ ܥܲܡܲܝܗܝ: ܣܵܒܵܒ ܠܹܐ ܡܵܨܹܐ ܗ݇ܘܼܵܐ ܕܐܵܙܸܠ ܗ݇ܘܼܵܐ. ܩܕܸܡܠܹܗ ܚܲܕ݇ ܡ̣ܢ ܕܐܵܢܝܼ: ܡܘܼܕܸܥܠܹܗ ܓܵܘ ܡܵܬܵܐ ܡܸܢܕܝܼ ܕܗ݇ܘܹܐܠܹܗ: ܘܒܥܕܵܢܵܐ ܕܫܡܸܥܠܗ݇ܘܿܢ: ܓ̰ܡܸܥܠܗ݇ܘܿܢ ܓܲܒ̣ܪܹ̈ܐ ܘܒܲܟ̣ܬܵܬܹ̈ܐ: ܣܵܒ̣ܹ̈ܐ ܘܝܲܠܘܼܕܹ̈ܐ: ܘܦܠܸܛܠܗ݇ܘܿܢ ܒܲܪܩܘܼܒ̣ܠ ܕܩܲܕܝܼܫܹ̈ܐ. ܘܚܙܹܐܠܗ݇ܘܿܢ ܠܗ̇ܘ ܓ̰ܘܲܢܩܵܐ ܕܡܘܼܬܒ̣ܵܐ ܗ݇ܘܼܵܐ ܥܲܠ ܚܡܵܪܵܐ: ܘܠܓ̰ܘܼܠ̈ܘܼܗܝ ܟܲܕ ܓܘܼܪ̈ܡܸܠܹܗ ܒܕܸܡܵܐ. ܗܵܝܓܵܗ ܩܘܼܪܒܸܢܘܿܢ ܟܠܲܝܗܝ ܘܢܦܸܠܗ݇ܘܿܢ ܩܵܕ݇ܡ ܩܲܕܝܼܫܵܐ: ܘܢܵܫܩܝܼ ܗ݇ܘܼܵܘ ܐܲܩܠܵܬ̈ܘܼܗܝ ܘܓ̰ܘܼܠ̈ܘܼܗܝ: ܘܡܫܲܒܚܝܼ ܗ݇ܘܼܵܘ ܠܐܲܠܵܗܵܐ ܟܲܕ ܐܵܡܪܝܼܢ: ܕܐܸܕܝܘܿܡ݇ ܝܵܘܡܵܐ ܚܫܸܚܠܲܢ ܕܡܫܝܼܚܵܐ ܣܲܚܒܸܪܵܗ̇ ܠܡܕܝܼܢ݇ܬܲܢ.
ܐܝܼܬ ܗ݇ܘܼܵܐ ܐ݇ܢܵܫܹ̈ܐ ܣܵܒ̣ܹ̈ܐ ܒܝܼܲܝܗܝ ܝܼ݇ܕܝܼܥܝܹ̈ܐ ܒܥܵܠܡܵܐ: ܕܒܸܒܟ̣ܵܝܵܐ ܗ݇ܘܼܵܘ ܩܵܕ݇ܡ ܩܲܕܝܼܫܵܐ ܟܲܕ ܒܹܐܡܵܪܵܐ: ܕܘܵܝ ܐܸܠܲܢ ܕܡܘܼܥܒ̣ܸܪܲܢ ܝܵܘ̈ܡܵܢܲܢ ܒܡܸܢܕܝܼܵܢܹ̈ܐ ܒܲܛܝܼܠܹ̈ܐ ܕܠܵܐ ܝܘܼܬܪܵܢܵܐ: ܒܣܓ̣ܵܕܝܵܬܹ̈ܐ ܕܨܵܢܵܡܹ̈ܐ ܡܝܼܬܹ̈ܐ. ܐܝܼܢܵܐ ܥܒ̣ܸܪܹܗ ܩܲܕܝܼܫܵܐ ܘܦܘܼܩܕܵܝܠܹܗ: ܕܐܸܢ ܒܣܵܡܵܘܟ̣ܘܿܢ ܝ݇ܠܵܗ̇ ܕܗܵܘܹܝܬܘܿܢ ܟܪܸ̈ܣܛܝܵܢܹܐ: ܡ̣ܢ ܩܵܕ݇ܡ ܟܠ ܡܸܢܕܝܼ ܙܸܠ݇ܡܘܿܢ ܥܩܘܿܪܘܼܢ ܠܹܗ ܠܗ̇ܘ ܒܲܝܬܵܐ ܕܨܵܢܵܡܹ̈ܐ. ܐܝܼܢܵܐ ܟܵܗܢܵܐ ܕܗ̇ܘ ܒܲܝܬܵܐ [ܕܨܵܢܵܡܹ̈ܐ] ܡܲܩܘܘܼܚܹܐ ܗ݇ܘܼܵܐ ܘܒܸܩܪܵܝܵܐ: ܘܒܹܐܡܵܪܵܐ: ܕܐܵܕܝܼܵܐ ܟܠܵܗ̇ ܐܲܪܥܵܐ ܒܸܬ ܫܥܵܝܫܵܐ. ܘܟܲܕ ܥܩܸܪܗ݇ܘܿܢ ܠܟܠܹܗ ܒܲܝܬܵܐ: ܘܫܡܸܛܠܗ݇ܘܿܢ ܐܘܼܦ ܠܨܲܠܡܵܐ ܗ̇ܘ ܕܐܝܼܬ ܗ݇ܘܼܵܐ ܒܝܼـܹܗ: ܘܫܩܸܠܗ݇ܘܿܢ ܠܟܠܹܗ ܫܘܼܦܪܹܗ ܘܣܵܩܲܠܬܹܗ ܘܠܩܲܝܣ̈ܘܼܗܝ ܡܘܼܬܒ̣ܵܝܠܗ݇ܘܿܢ ܥܲܠ ܢܘܼܪܵܐ. ܘܚܙܹܐܠܹܗ ܟܵܗܢܵܐ: ܕܐܲܪܥܵܐ ܠܹܐ ܝ݇ܠܵܗ̇ ܒܸܫܥܵܫܵܐ: ܐܘܼܦ ܠܵܐ ܫܡܲܝ̈ܵܐ ܪܓܸܕܠܗ݇ܘܿܢ: ܒܗ̇ܝ ܣܵܥܲܬ ܩܘܼܪܒܸܢܹܗ ܠܟܸܣ ܩܲܕܝܼܫܵܐ: ܘܦܲܪܦܸܠ ܗ݇ܘܼܵܐ ܒܝܼـܹܗ ܟܲܕ ܒܹܐܡܵܪܵܐ: ܕܐܵܕܝܼܵܐ ܝ݇ܕܸܥܠܝܼ ܕܒܵܛܝܼܠܘܼܬܵܐ ܕܨܵܢܵܡ: ܘܠܲܝܬ ܠܹܗ ܚܲܝܠܵܐ ܠܡܗܲܝܘܼܪܹܐ. ܐܝܼܢܵܐ ܒܸܛܠܵܒܵܐ ܝ݇ܘܸܢ ܡ̣ܢ ܩܲܕܝܼܫܘܼܬܘܼܟܼ: ܐܘܼܦ ܐܸܠܝܼ ܥܵܒ̣ܕܸܬܿ ܟܪܸܣܛܝܵܢܵܐ. ܘܒܣܵܒܵܒ ܕܦܠܸܚܠܝܼ ܠܨܵܢܵܡܹ̈ܐ ܘܦܠܸܚܠܝܼ ܦܸܠܚܵܢܵܐ ܕܠܵܐ ܝܘܼܬܪܵܢܵܐ: ܘܒܸܬ ܕܵܥܪܸܢ ܘܦܲܠܚܸܢ ܠܡܫܝܼܚܵܐ: ܕܐܝܼܬ ܒܝܼـܹܗ ܚܲܝܠܵܐ ܠܡܗܲܝܘܼܪܹܐ ܠܐܵܢܝܼ ܕܒܸܦܠܵܚܵܐ ܝ݇ܢܵܐ ܐܸܠܹܗ ܒܕܘܼܙܘܼܬܵܐ. ܘܗܵܝܓܵܗ̇ ܡܘܼܥܡܸܕܠܹܗ ܩܲܕܝܼܫܵܐ ܥܲܡ ܟܠܹܗ ܛܵܝܸܦܵܐ. ܘܦܘܼܩܸܕܠܹܗ ܠܩܲܫܝܼܫܹ̈ܐ ܕܡܵܬܵܐ: ܕܐܵܟ̣ܠܝܼ ܚܲܡ ܕܝܼـܹܗ ܕܡܲܟܡܸܠܝܼ ܐܸܠܹܗ ܡ̣ܢ ܥܹܕܬܵܐ ܟܠܹܗ ܣܢܝܼܩܘܼܬܹܗ. ܐܝܼܢܵܐ ܐܵܗܵܐ ܟܵܗܢܵܐ ܛܠܸܒܠܹܗ ܡܸܢܹܗ ܕܩܲܕܝܼܫܵܐ ܕܦܵܐܸܫ ܬܘܼܠܡܸܕܵܐ ܐܸܠܹܗ: ܕܝܵܗ݇ܒ̣ܸܠܹܗ ܪܘܼܫܡܵܐ ܕܒܢܘܿܢܹ̈ܐ ܕܩܵܘܠܵܐ. ܗ̇ܘ ܩܲܕܝܼܫܵܐ ܟܬܵܒ̣ܹܗ ܓܵܘ ܐܝܼܕܵܬ̈ܘܼܗܝ ܗ݇ܘܼܵܐ: ܘܟܬܸܒ̣ܠܹܗ ܐܵܬܘܿܬܵܐ ܕܐܵܠܲܦ ܥܲܠ ܠܘܼܚܵܐ: ܘܣܘܼܦܝܼܠܹܗ ܠܩܲܫܝܼܫܵܐ ܕܡܵܠܸܦ ܠܹܗ. ܘܗ݇ܘܹܐܠܹܗ ܬܵܡܵܐ ܬܠܵܬ݇ܐ ܝܵܘܡܵܢܹ̈ܐ. ܘܡܘܼܥܡܸܕܠܹܗ ܠܟܠܲܝܗܝ ܚܲܢܦܹ̈ܐ ܕܗ̇ܝ ܡܵܬܵܐ. ܘܗܘܼܡܙܸܡܠܹܗ ܥܲܡܲܝܗܝ ܗܹܡܸܙܡܵܢ ܕܝܘܼܬܪܵܢܵܐ: ܘܦܘܼܩܕܵܝܠܹܗ ܕܢܵܛܪܝܼ ܠܗܲܝܡܵܢܘܼܬܵܐ ܒܕܸܟ̣ܝܘܼܬܵܐ ܘܒܩܲܕܝܼܫܘܼܬܵܐ. ܘܗܵܝܓܵܗ ܩܸܡܠܹܗ ܩܲܕܝܼܫܵܐ ܘܥܒ̣ܸܪܹܗ ܢܲܗܪܵܐ ܕܕܸܩܠܲܬ ܕܐܵܙܸܠ ܗ݇ܘܼܵܐ ܠܗ̇ܝ ܕܲܝܪܵܐ ܕܒܢܹܐܠܹܗ ܡܵܪܝ ܝܲܥܩܘܿܒ̣. ܘܐ݇ܬܹܐܠܗ݇ܘܿܢ ܥܲܡܹܗ ܐ݇ܢܵܫܹ̈ܐ ܡ̣ܢ ܕܗ̇ܝ ܡܵܬܵܐ: ܕܡܲܦܫܸܛܝܼܠܹܗ. ܘܗ̇ܘ ܓ̰ܘܲܢܩܵܐ ܠܹܐ ܗ݇ܘܼܵܐ ܒܸܦܪܵܩܵܐ ܡ̣ܢ ܩܲܕܝܼܫܵܐ: ܟܲܕ ܦܲܪܦܘܼܠܹܐ ܗ݇ܘܼܵܐ ܒܝܼـܹܗ. ܐܝܼܢܵܐ ܗ̇ܘ ܦܵܩܘܿܕܹܗ ܗ݇ܘܼܵܐ ܐܸܠܹܗ: ܕܐܵܟ̣ܸܠ ܚܲܡ ܕܝܸܡܸܗ ܘܐܲܚܘܿܢܹܗ. ܐܝܼܢܵܐ ܐ݇ܢܵܫܹ̈ܐ ܥܲܬܝܼܪܹ̈ܐ ܡ̣ܢ ܕܐܵܢܝܼ ܡܵܘܕܝܵܢܹ̈ܐ: ܦܘܼܪܦܸܠܗ݇ܘܿܢ ܒܩܲܕܝܼܫܵܐ ܟܲܕ ܒܹܐܡܵܪܵܐ ܐܸܠܹܗ: ܕܐܲܚܢܲܢ ܒܸܫܩܵܠܵܐ ܝ݇ܘܲܚ ܥܲܠ ܓܵܢܲܢ ܩܵܕ݇ܡ ܡܵܪܲܢ: ܕܒܸܬ ܐܵܟ̣ܠܲܚ ܚܲܡ ܕܝܸܡܹܗ ܘܐܲܚܘܿܢܹܗ: ܟܡܵܐ ܕܐܵܢܝܼ ܓܵܘ ܚܲܝܹ̈ܐ ܝ݇ܢܵܐ. ܘܐܵܗܵܐ ܚܘܼܫ ܗܵܘܹܐ ܥܲܡܘܼܟܼ ܐܲܝܟܼ ܕܒܣܵܡܵܐ ܝ݇ܠܵܗ̇: ܕܨܵܠܹܐ ܨܠܘܿܬܵܐ ܒܘܼܬ ܕܝܼܲܢ ܩܵܕ݇ܡ ܐܲܠܵܗܵܐ. ܗܵܝܓܵܗ ܠܘܼܒܸܠܹܗ ܩܲܕܝܼܫܵܐ ܠܗ̇ܘ ܓ̰ܘܲܢܩܵܐ ܥܲܡܹܗ.
ܘܡ̣ܢ ܕܦܪܸܩܠܗ݇ܘܿܢ ܩܘܼܕܵܫܵܐ ܕܕܲܝܪܵܐ: ܐ݇ܬܹܐܠܹܗ ܩܲܕܝܼܫܵܐ ܘܟܠܵܗ̇ ܐܲܚܘܿܢܘܵܬܹ̈ܐ ܥܲܡܹܗ: ܘܫܘܼܪܹܐܠܹܗ ܒܸܚܕܵܪܵܐ ܓܵܘ ܡܵܬܘܵܬܹ̈ܐ ܕܩܲܪܕܘܿ: ܘܡܲܥܡܸܕ ܗ݇ܘܼܵܐ ܠܚܲܢܦܹ̈ܐ: ܘܥܵܩܸܪ ܗ݇ܘܼܵܐ ܒܲܝܬܵܐ ܕܨܵܢܵܡܹ̈ܐ. ܘܐ݇ܬܹܐܠܹܗ ܩܲܕ݇ܡܵܝܬܵܐ ܠܡܵܬܵܐ ܕܡܲܪ̈ܙܵܢܹܐ ܕܛܘܼܪܵܐ: ܘܠܹܐ ܗ݇ܘܼܵܐ ܪܵܒܵܐ ܪܸܚܩܵܐ ܡ̣ܢ ܩܹܒ̣ܘܼܬܵܐ: ܘܫܸܡܘܼܗ̇ ܝܼܗܘܼܵܐ ܣܲܪܓܘܼܓܵܐ: ܗ̇ܝ ܕܒܝܼܘܼܗ̇ ܝ݇ܬܝܼܒ̣ܵܐ ܗ݇ܘܼܵܐ ܫܵܪܵܐܨܵܪ ܒܪܘܿܢܵܐ ܕܣܲܢܚܸܪܝܼܒ̣: ܟܲܕ ܥܪܸܩܠܹܗ ܡ̣ܢ ܡܕܝܼܢ݇ܬܵܐ ܕܢܝܼܢܘܹܐ. ܘܒܢܹܐܠܹܗ ܓܵܘܵܗ̇ ܒܲܝܬܵܐ ܕܨܵܢܵܡܹ̈ܐ ܕܒܵܒܹܗ: ܘܟܹܐ ܣܵܓ̣ܸܕ ܗ݇ܘܼܵܐ ܐܸܠܹܗ. ܘܙܲܪܥܹܗ ܢܛܝܼܪܵܐ ܗ݇ܘܼܵܐ ܐܵܗܵܐ ܣܘܼܠܵܠܹܗ: ܗܲܠ ܠܗ̇ܘ ܙܲܒ̣ܢܵܐ: ܕܒܝܼـܹܗ ܩܲܕܝܼܫܵܐ ܡܛܹܐܠܹܗ ܠܬܵܡܵܐ. ܣܵܒܵܒ ܫܸܡܥܝܹ̈ܐ ܗ݇ܘܼܵܘ ܒܘܼܬ ܥܵܓ̰ܝܼܒܘܼܝܵܬܹ̈ܐ ܕܦܠܸܚܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܒܐܵܢܝܼ ܝܵܘܡܵܢܹ̈ܐ: ܘܒܘܼܬ ܕܐܵܗܵܐ ܗܲܪ ܒܗ̇ܝ ܥܕܵܢܵܐ ܕܥܒ̣ܸܪܹܗ ܩܲܕܝܼܫܵܐ ܠܡܵܬܲܝܗܝ: ܦܠܸܛܠܗ݇ܘܿܢ ܠܒܲܪܩܘܼܒ̣ܠܹܗ ܘܩܘܼܒܸܠܗ݇ܘܿܢ ܒܚܲܕܘܼܬܵܐ ܓܘܼܪܬܵܐ: ܘܛܠܸܒܠܗ݇ܘܿܢ ܡܸܢܹܗ ܕܥܵܒ̣ܸܪ ܠܒܵܬܲܝ̈ܗܝ. ܥܒ̣ܪܘܿܢ ܠܒܵܬܲܝ̈ܗܝ ܩܲܕܝܼܫܵܐ ܥܲܡ ܟܠܲܝܗܝ ܣܵܒ̣ܹ̈ܐ ܕܥܲܡܹܗ ܘܗ̇ܘ ܓ̰ܘܲܢܩܵܐ ܕܚܝܼܠܹܗ: ܘܡܘܼܬܸܒ̣ܠܗ݇ܘܿܢ ܐܸܠܲܝܗܝ ܟܘܼܪ̈ܣܝܼـܹܐ. ܘܫܘܼܪܹܐܠܹܗ ܩܲܕܝܼܫܵܐ ܕܕܵܪܹܗ ܩܵܕ݇ܡܲܝܗܝ ܒܲܪܙܲܪܥܵܐ ܕܚܲܝܹ̈ܐ ܕܝܘܼܠܦܵܢܹܗ ܕܡܫܝܼܚܵܐ: ܗܲܪ ܒܗ̇ܝ ܣܵܥܲܬ ܙܪܸܩܠܹܗ ܒܲܗܪܹܗ ܕܡܫܝܼܚܵܐ ܒܚܝܼܵܠ ܕܟܠܲܝܗܝ ܐܵܢܝܼ ܕܒܸܫܡܲܥܝܵܐ ܗ݇ܘܼܵܘ ܡܲܠܦܵܢܘܼܬܹܗ. ܘܦܲܪܦܸܠܝܼ ܗ݇ܘܼܵܘ ܒܩܲܕܝܼܫܵܐ ܘܛܲܠܒܝܼ ܗ݇ܘܼܵܘ ܡܸܢܹܗ: ܕܠܵܐ ܐܵܙܸܠ ܡ̣ܢ ܠܟܸܣܠܲܝܗܝ: ܡ̣ܢ ܩܵܕ݇ܡ ܕܝܵܗ݇ܒ̣ܸܠܗ݇ܘܿܢ ܪܘܼܫܡܵܐ ܕܡܲܥܡܘܿܕܝܼܬܵܐ. ܗܵܝܓܵܗ ܛܠܸܒܠܹܗ ܩܲܕܝܼܫܵܐ ܕܘܼܟܬܵܐ ܕܒܵܢܹܗ ܒܝܼܘܼܗ̇ ܥܹܕܬܵܐ. ܐܝܼܢܵܐ ܐܲܢܹ̈ܐ ܡܘܼܚܙܹܐܠܗ݇ܘܿܢ ܐܸܠܹܗ ܚܲܕ݇ ܒܲܝܬܵܐ ܫܲܦܝܼܪܵܐ: ܒܸܢܝܵܢܹܗ ܡܣܘܼܩܠܵܐ ܝܼܗ݇ܘܵܐ ܘܥܒ̣ܸܪܹܗ ܘܦܪܸܫܠܹܗ ܒܝܼـܹܗ ܚܲܕ݇ ܕܘܼܟܬܵܐ: ܘܡܘܼܒܢܝܼܠܹܗ ܒܝܼܘܼܗ̇ ܡܲܕܒܚܵܐ: ܘܡܫܸܚܠܹܗ ܓܘܼܕܵܢ̈ܘܼܗܝ ܒܡܸܫܚܵܐ ܩܲܕܝܼܫܵܐ. ܗܲܪ ܒܗ̇ܝ ܥܕܵܢܵܐ ܗܘܼܕܸܪܘܿܢ ܐܸܠܹܗ ܟܠܲܝܗܝ ܡܵܐܢܹ̈ܐ ܕܬܸܫܡܸܬܵܐ ܕܡܲܥܡܘܿܕܝܼܬܵܐ: ܘܡܘܼܩܪܸܒ̣ܵܝܠܹܗ ܩܲܕܝܼܫܵܐ ܠܟܠܲܝܗܝ: ܘܐ݇ܡܸܪܹܗ ܐܸܠܲܝܗܝ ܒܘܼܬ ܣܝܵܡܝܼܕܵܐ: ܘܡܘܼܥܡܸܕܵܝܠܹܗ ܒܬܠܵܬ݇ܐ ܝܵܘܡܵܢܹ̈ܐ ܠܟܠܲܝܗܝ ܒܢܘܿܢܹ̈ܐ ܕܘܲܙܝܼܪܹ̈ܐ ܘܟܠܲܝܗܝ ܒܢܲܝ̈ ܒܲܝܬܲܝܗܝ ܘܠܟܠܵܗ̇ ܡܵܬܵܝܗܝ. ܘܥܒ̣ܸܕܠܗ݇ܘܿܢ ܥܹܐܕܵܐ ܓܘܼܪܵܐ ܬܠܵܬ݇ܐ ܝܵܘܡܵܢܹ̈ܐ: ܡܲܠܸܦ ܗ݇ܘܼܵܐ ܠܗ݇ܘܿܢ ܥܵܕܲܬܹ̈ܐ ܘܛܲܟ̣ܣܹ̈ܐ ܕܟܪܸ̈ܣܛܝܵܢܹܐ: ܘܦܘܼܩܕܵܝܠܹܗ ܕܝܵܗ݇ܒ̣ܝܼ ܒܢܘܿܢܲܝ̈ܗܝ ܠܒܲܝܬܵܐ ܕܝܘܼܠܦܵܢܵܐ: ܘܥܵܒ̣ܸܕ ܗ݇ܘܼܵܘ ܫܵܗܲܪܬܵܐ ܥܲܡܲܝܗܝ ܘܡܵܠܸܦ ܠܗ݇ܘܿܢ ܗܲܠ ܠܦܲܠܓܵܐ ܕܠܲܝܠܹܐ.
ܡܵܪ̈ܵܘܵܬܵܗ̇ ܕܐܵܗܵܐ ܡܵܬܵܐ ܐܝܼܬ ܗ݇ܘܼܵܐ ܠܗ݇ܘܿܢ ܚܕܵܐ ܚܵܬܵܐ: ܪܵܒܵܐ ܡܘܼܚܸܒܬܵܐ ܗ݇ܘܼܵܐ ܥܲܠܲܝܗܝ. ܕܐܝܼܬ ܗ݇ܘܼܵܐ ܠܵܗ̇ ܓ̰ܪܵܝܬܵܐ ܕܕܸܡܵܐ ܩܵܐ ܬܠܵܬ݇ܐ ܫܸܢܹ̈ܐ. ܗܵܕܟ̣ܵܐ ܢܦܸܠܬܵܐ ܗ݇ܘܼܵܐ ܒܐܵܗܵܐ ܡܲܪܥܵܐ: ܐܲܝܟܵܐ ܕܠܹܐ ܡܵܨܝܵܐ ܗ݇ܘܼܵܐ ܕܟܵܠܝܵܐ ܗ݇ܘܼܵܐ ܥܲܠ ܐܲܩܠܵܬ̈ܘܼܗ̇: ܐܝܼܢܵܐ ܛܵܥܢܵܐ ܟܹܐ ܛܵܥܢܝܼ ܗ݇ܘܼܵܐ ܠܵܗ̇. ܗܵܝܓܵܗ ܛܠܸܒܠܵܗ̇ ܡ̣ܢ ܐܲܚܘܿܢܘܵܬ̈ܘܼܗ̇: ܕܐܵܡܪܝܼ ܠܩܲܕܝܼܫܵܐ ܕܥܵܒ̣ܪܵܗ̇ ܠܟܸܣܠܹܗ. ܣܵܒܵܒ ܗܵܠܵܐ ܠܹܐ ܗ݇ܘܼܵܐ ܥܡܸܕܬܵܐ: ܟܹܐ ܐܵܡܪܵܐ ܗ݇ܘܼܵܐ ܒܚܝܼܵܠܘܼ̈ܗ̇: ܕܠܹܐ ܡܵܨܝܵܢ ܕܐܵܙܲܠ݇ܢ ܠܡܲܥܡܘܿܕܝܼܬܵܐ. ܟܲܕ ܐ݇ܙܸܠ݇ܗܘܿܢ ܐܲܚܘܿܢܘܵܬ̈ܘܼܗ̇ ܘܡܘܼܕܸܥܠܗ݇ܘܿܢ ܒܘܼܬ ܕܝܼܘܼܗ̇: ܦܘܼܩܸܕܠܹܗ ܕܥܵܒ̣ܪܵܗ̇ ܠܟܸܣܠܹܗ. ܘܒܥܵܕܵܢܵܐ ܕܥܒ̣ܸܪܵܗ̇: ܡܘܼܩܘܸܚܠܵܗ̇ ܘܐܵܡܪܵܗ̇: ܪܹܓܹܗ ܕܐܲܠܵܗܵܐ: ܪܲܚܸܡ ܥܲܠܝܼ. ܐܝܼܢܵܐ ܐܵܗܵܐ ܟܲܕ ܚܙܹܐܠܹܗ ܥܝܼܩܘܼܬܘܼܗ̇ ܘܓ̰ܘܼܢܓ̰ܵܪ̈ܘܼܗ̇: ܦܘܼܩܸܕܠܹܗ ܠܐܵܢܝܼ ܕܒ̣ܝܼܩܘܼܗ̇ ܗ݇ܘܼܵܘ: ܕܩܲܪܒܸܢܝܼܠܵܗ̇ ܠܟܸܣܠܹܗ: ܦܘܼܫܸܛܠܹܗ ܐܝܼܕܹܗ ܠܟܸܣܠܘܼܗ̇ ܘܪܫܸܡܠܹܗ ܥܲܠܘܼܗ̇ ܢܝܼܫܲܢܩܵܐ ܕܨܠܝܼܒ̣ܵܐ ܬܠܵܬܵܐ ܓܵܗܹ̈ܐ ܘܐ݇ܡܸܪܹܗ: ܒܲܟ̣ܬܵܐ ܒܵܣܘܼܡܵܟ̣ܝ ܝ݇ܠܹܗ ܡܵܪܲܢ ܝܼܫܘܿܥ ܡܫܝܼܚܵܐ. ܗܲܪ ܒܗ̇ܝ ܣܵܥܲܬ ܗܹܡܸܙܡܵܢܹܗ ܕܩܲܕܝܼܫܵܐ: ܦܝܼܫܠܵܗ̇ ܟܠܝܼܬܵܐ ܓ̰ܪܵܝܬܵܐ ܕܕܸܡܘܼܗ̇: ܘܒܵܬ݇ܪ ܕܗ̇ܘ ܝܵܘܡܵܐ ܡܘܼܥܡܸܕܵܠܹܗ. ܘܐ݇ܙܸܠܹܗ ܡ̣ܢ ܬܵܡܵܐ ܒܚܲܕܘܼܬܵܐ ܓܘܼܪܬܵܐ: ܟܲܕ ܣܘܼܦܝܵܝܠܹܗ ܠܫܵܦܵܩܲܬܹܗ ܕܡܵܪܲܢ. ܐܝܼܢܵܐ ܡܵܪܝ ܝܲܥܩܘܿܒ̣ ܥܒ̣ܸܪܹܗ ܠܐܲܬܪܵܐ ܕܩܲܪܕܘܿ ܓܵܘܵܝܬܵܐ: ܕܬܲܠܡܸܪ ܗ݇ܘܼܵܐ ܠܚܲܢܦܹ̈ܐ.
ܐܝܼܢܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܥܒ̣ܸܕܠܹܗ ܠܐ݇ܬܹܐܬܹܗ ܕܕܵܥܸܪ ܠܕܲܝܪܹܗ: ܘܡܛܹܐܠܹܗ ܠܢܲܗܪܵܐ ܕܕܸܩܠܲܬ ܒܦܲܠܓܵܐ ܕܠܲܝܠܹܐ. ܬܦܸܩܠܹܗ ܠܟܸܣ ܩܲܠܥܵܐ ܕܒܹܝܬ ܙܲܒ̣ܕܲܝ: ܘܠܲܝܬ ܗ݇ܘܼܵܐ ܓܵܡܝܼ ܒܗ̇ܘ ܓܹܒܵܐ ܕܒܝܼـܹܗ ܟܸܠܝܹ̈ܐ ܗ݇ܘܼܵܘ. ܘܡܘܼܪܸܡܠܹܗ ܐܝܼܕܹܗ ܣܵܒ̣ܵܐ ܡܵܪܝ ܐܵܘܓܹܝܢ ܘܡܘܼܬܒ̣ܵܠܹܗ ܥܲܠ ܪܘܼܦ̮ܫܹܗ ܕܗ̇ܘ ܝܵܠܵܕ݇ܐ ܕܕܒ̣ܝܼܩܵܐ ܗ݇ܘܼܵܐ ܡ̣ܢ ܦܘܼܡܹܗ ܕܐܲܪܝܵܐ: ܕܫܸܡܹܗ ܗ݇ܘܼܵܐ ܠܵܥܵܙܲܪ. ܣܵܒܵܒ ܗܵܕܟ̣ܵܐ ܩܸܪܝܹܗ ܗ݇ܘܼܵܐ: ܡ̣ܢ ܗ̇ܘ ܝܵܘܡܵܐ ܕܩܲܡ ܡܲܚܝܼܠܹܗ. ܘܫܘܼܪܹܐܠܹܗ ܕܐܵܙܸܠ ܗ݇ܘܼܵܐ ܥܲܠ ܡܝܼ̈ܵܐ: ܘܐ݇ܡܸܪܹܗ ܠܗ̇ܘ ܓ̰ܘܲܢܩܵܐ: ܪ݇ܚܘܿܫ ܥܲܡܝܼ ܥܲܠ ܡܝܼ̈ܵܐ. ܘܟܲܕ ܡܛܹܐܠܗ݇ܘܿܢ ܗܲܠ ܦܲܠܓܵܐ ܕܢܲܗܪܵܐ ܕܕܸܩܠܲܬ: ܕܸܥܪܹܗ ܩܲܕܝܼܫܵܐ ܘܓܘܼܫܸܩܠܹܗ ܒܵܬ݇ܪ ܚܲܨܹܗ: ܘܚܙܹܐܠܹܗ ܐܵܢܝܼ ܥܸܣܪܵܐ ܣܵܒ̣ܹ̈ܐ ܒܢܘܿܢܹ̈ܐ ܠܸܒܵܢܹ̈ܐ ܐܲܝܟܼ ܕܝܼـܹܗ ܒܹܐܙܵܠܵܐ ܒܵܬ݇ܪܹܗ: ܘܐ݇ܚܹܪ̈݇ܢܹܐ ܦܝܼܫܠܗ݇ܘܿܢ ܓܵܘ ܙܲܒܘܼܢܘܼܬܵܐ. ܗܵܝܓܵܗ ܐ݇ܡܸܪܹܗ ܐܸܠܲܝܗܝ ܩܲܕܝܼܫܵܐ: ܕܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܗ݇ܘܹܝܡܘܿܢ ܠܸܒܵܢܹ̈ܐ ܩܲܫܕܸܪܘܿܢ ܥܲܠ ܡܵܘܬܵܐ. ܐܝܼܢܵܐ ܐܲܢܹ̈ܐ: ܟܲܕ ܒܗܝܼܒ̣ܝܼ ܗ݇ܘܼܵܘ ܥܲܠ ܗܲܡܙܲܡܬܹܗ: ܫܘܼܪܹܐܠܗ݇ܘܿܢ ܒܸܚܕܵܪܵܐ ܥܲܠ ܡܝܼ̈ܵܐ ܒܚܲܝܠܹܗ ܕܡܵܪܲܢ: ܘܦܘܼܩܕܵܢܵܐ ܕܣܵܒ̣ܵܐ. ܘܡ̣ܢ ܒܵܬ݇ܪ ܕܥܒ̣ܸܪܘܿܢ ܟܠܲܝܗܝ: ܥܒ̣ܸܪܘܿܢ ܘܒܘܼܩܸܪܘܿܢ ܒܫܠܵܡܵܐ ܕܣܵܒ̣ܵܐ ܐܲܦܸܣܩܘܿܦܵܐ ܐܘܼܦ ܠܟܠܲܝܗܝ ܩܠܹܝܪ̈ܝܼܩܹܐ. ܐܝܼܢܵܐ ܠܵܐ ܦܝܼܫܠܵܗ̇ ܛܫܝܼܬܵܐ ܐܵܗܵܐ ܥܵܓ̰ܝܼܒܘܼܬܵܐ ܡ̣ܢ ܐܲܦܸܣܩܘܿܦܵܐ ܘܡ̣ܢ ܟܠܵܗ̇ ܡܕܝܼܢ݇ܬܹܗ. ܐܝܼܢܵܐ ܐܵܢܝܼ ܐ݇ܢܵܫܹ̈ܐ ܕܡܝܼܟ̣ܹ̈ܐ ܗ݇ܘܼܵܘ ܓܵܘ ܓܵܡܝܼ ܕܝܼܗܘܼܵܐ ܒܐܘܼܪܚܵܐ: ܐܲܢܹ̈ܐ ܚܙܹܐܠܗ݇ܘܿܢ ܘܗܘܼܩܝܼܠܗ݇ܘܿܢ ܟܠܲܝܗܝ ܐܵܢܝܼ ܕܗ݇ܘܹܐܠܗ݇ܘܿܢ.
ܐܝܼܢܵܐ ܐܵܗܵܐ ܩܲܕܝܼܫܵܐ ܡܘܼܕܸܥܠܹܗ ܠܐܲܦܸܣܩܘܿܦܵܐ ܡܸܢܕܝܼ ܕܗܕܝܼܪܵܐ ܝ݇ܠܹܗ ܕܗܵܘܹܐ: ܕܒܸܬ ܐܵܬܝܼ ܦܵܪ̈ܣܵܝܹܐ: ܘܒܓܝܼܢܵܒ̣ܘܼܬܵܐ ܒܸܬ ܠܲܒܠܝܼ ܠܩܲܕܝܼܫܘܼܬܵܘܟ̣ܘܿܢ: ܘܐܲܢ݇ܬܿ ܥܲܡ ܪܵܒܵܐ ܒܸܬ ܩܲܒܠܝܼܬܘܿܢ ܟܠܝܼܠܵܐ ܕܣܵܗܕܘܼܬܵܐ ܥܲܠ ܛܘܼܪ̈ܵܢܹܐ ܕܡܵܕܲܝ. ܘܗ݇ܘܹܐܠܵܗ̇ ܐܲܝܟܼ ܗܲܡܙܲܡܬܹܗ ܕܩܲܕܝܼܫܵܐ. ܘܡ̣ܢ ܒܵܬ݇ܪ ܚܲܕ݇ܟ̰ܵܐ ܥܕܵܢܵܐ: ܓ̰ܘܼܡܸܥܠܹܗ ܫܵܒ̣ܘܿܪ ܡܲܠܟܵܐ ܚܲܝܠܵܘܵܬ̈ܘܼܗܝ: ܕܐܵܬܹܐ ܘܕܵܒ̣ܸܩ ܗܘܼܟܡܵܐ ܕܪ̈ܗܘܼܡܵܝܹܐ. ܘܙܘܼܒܛܸܢܹܗ ܠܩܵܠܥܵܐ ܕܒܹܬ ܙܲܒܕܲܝ: ܘܦܘܼܠܸܛܠܹܗ ܡܸܢܹܗ ܐܲܝܟܼ ܥܸܣܪܵܐ ܐܲܠܦܹ̈ܐ ܓܵܢܵܬܹ̈ܐ ܒܣܠܵܒܵܐ: ܘܥܲܡ ܐܲܦܸܣܩܘܿܦܵܐ ܕܡܕܝܼܢ݇ܬܵܐ. ܘܫܩܸܠܗ݇ܘܿܢ ܟܠܝܼܠܵܐ ܐܲܦܸܣܩܘܿܦܵܐ ܥܲܡ ܪܵܒܵܐ ܐ݇ܚܹܪ̈݇ܢܹܐ ܥܲܠ ܛܘܼܪܵܐ ܕܡܲܕܲܝ. ܘܐ݇ܚܹܪ̈݇ܢܹܐ ܐܵܢܝܼ ܕܝܼܗ݇ܘܼܵܘ ܪܸ̈ܦܝܹܐ ܟܦܸܪܗ݇ܘܿܢ [ܣܪܸ̈ܒ̣ܠܗ݇ܘܿܢ]: ܘܡܘܼܬܒ̣ܵܝܠܗ݇ܘܿܢ ܒܡܵܬܘܵܬܹ̈ܐ ܕܡܵܕܵܝܹ̈ܐ. ܘܗܵܐ ܢܛܝܼܪܬܵܐ ܝ݇ܠܵܗ̇ ܓܸܦܝܼܬܲܝܗܝ ܕܐܵܢܝܼ ܣܵܗܕܹ̈ܐ ܩܲܕܝܼܫܹ̈ܐ ܗܲܠ ܐܸܕܝܘܿܡ݇ ܝܵܘܡܵܐ.
ܐܝܼܢܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܒܥܕܵܢܵܐ ܕܐܲܢܹ̈ܐ ܡܘܼܕܸܥܝܵܝܠܹܗ ܠܐܲܦܸܣܩܘܿܦܵܐ: ܩܸܡܠܹܗ ܘܐ݇ܙܸܠܹܗ ܘܐܲܚܘܿܢܘܵܬܹ̈ܐ ܥܲܡܹܗ. ܘܡ̣ܢ ܒܵܬ݇ܪ ܗ̇ܘ ܝܵܘܡܵܐ: ܫܘܼܪܹܐܠܹܗ ܕܥܵܒ̣ܸܪ ܗ݇ܘܼܵܐ ܓܵܘ ܐܲܬܪܵܐ ܕܒܹܝܬ ܥܸܒ̣ܪ̈ܵܝܹܐ. ܘܐܝܼܬ ܗ݇ܘܼܵܐ ܚܲܕ݇ ܒܲܝܬܵܐ ܕܨܵܢܵܡܹ̈ܐ ܡܫܲܡܗܵܐ ܒܐܲܬܪܵܐ ܕܒܹܝܬ ܥܸܒ̣ܪ̈ܵܝܹܐ: ܘܐ݇ܬܹܐܠܹܗ ܩܲܕܝܼܫܵܐ ܠܬܵܡܵܐ ܘܚܙܹܐܠܹܗ ܠܕܘܼܓܠܲܝܗܝ ܘܚܸܠܛܘܼܢܝܲܝܗܝ ܟܡܵܐ ܙܸܕܠܵܐ ܝܘܼܗ݇ܒ̣ܠܹܗ ܒܵܠܹܗ ܩܲܕܝܼܫܵܐ ܘܣܵܒ̣ܹ̈ܐ ܕܥܲܡܹܗ: ܘܥܒ̣ܸܪܘܿܢ ܠܗ̇ܘ ܗܲܝܟܠܵܐ ܕܨܵܢܵܡܹ̈ܐ. ܘܓ̰ܲܡܥܝܼ ܗ݇ܘܼܵܘ ܟܠܲܝܗܝ ܟܵܗܢܹ̈ܐ ܕܨܵܢܵܡܹ̈ܐ: ܘܒܥܕܵܢܵܐ ܕܥܒ̣ܸܪܘܿܢ ܥܲܡܹܗ ܒܸܚܕܵܝܵܐ ܘܒܹܐܡܵܪܵܐ ܠܐܘܼܕܵܠܵܐ: ܕܗܵܐ ܪܹ̈ܫܵܢܹܐ ܕܟܪܸ̈ܣܛܝܵܢܹܐ ܐ݇ܬܹܐܠܗ݇ܘܿܢ ܕܦܵܠܚܝܼܢ ܠܐܲܠ̈ܵܗܲܢ. ܐܝܼܢܵܐ ܐܵܗܵܐ ܩܲܕܝܼܫܵܐ ܦܘܼܠܸܛܠܹܗ ܚܲܕ݇ ܨܠܝܼܒ̣ܵܐ ܕܩܲܝܣܵܐ ܕܬܸܠܝܵܐ ܗ݇ܘܼܵܐ ܒܩܕܵܠܹܗ: ܘܡܘܼܬܸܒ̣ܠܹܗ ܠܟܸܣ ܗ̇ܘ ܨܲܠܡܵܐ. ܬܠܸܚܠܹܗ ܘܢܦܸܠܹܗ ܥܲܠ ܚܲܕ݇ ܟܹܐܦܵܐ ܢܓܝܼܪܬܵܐ: ܘܫܡܸܛܠܹܗ ܟܠܹܗ ܣܵܩܲܠܬܹܗ. ܐܝܼܢܵܐ ܒܥܕܵܢܵܐ ܕܚܙܹܐܠܗ݇ܘܿܢ: ܚܓ̰ܸܠܗ݇ܘܿܢ ܘܗ݇ܘܹܐܠܗ݇ܘܿܢ ܒܙܕܥܘܼܬܵܐ. ܘܦܘܼܪܦܸܠܗ݇ܘܿܢ ܒܩܲܕܝܼܫܵܐ ܟܲܕ ܐܵܡܪܝܼ: ܝܵܐ ܐ݇ܢܵܫܵܐ ܫܸܡܥܝܹ̈ܐ ܝ݇ܘܲܚ ܒܘܼܬ ܓܘܼܪܘܼܬܵܐ ܕܚܲܝܠܹܗ ܕܐܲܠܵܗܘܼܟܼ: ܘܒܘܼܬ ܥܵܓ̰ܝܼܒܘܼܝܵܬܹ̈ܐ ܕܦܝܼܫܠܗ݇ܘܿܢ ܦܠܝܼܚܹ̈ܐ ܒܐܝܼܕܵܬ̈ܘܼܟܼ: ܘܐܵܕܝܼܵܐ ܒܸܚܙܵܝܵܐ ܝ݇ܘܲܚ ܡܘܼܕܝܼ ܥܒ̣ܸܕܠܘܼܟܼ ܠܐܲܠܵܗܬܲܢ. ܦܲܪܦܘܼܠܹܐ ܝ݇ܘܲܚ ܒܝܼܘܼܟܼ ܕܥܵܒ̣ܕܸܬܿ ܠܲܢ ܟܵܗܢܹ̈ܐ ܠܐܲܠܵܗܘܼܟܼ: ܘܥܵܒ̣ܕܲܚ ܟܠܲܢ ܟܵܗܢܘܼܬܵܐ ܠܐܲܠܵܗܵܐ ܫܲܪܝܼܪܵܐ.
ܐܝܼܢܵܐ ܐܵܕܝܼܵܐ ܕܠܵܐ ܪܵܒܵܐ ܡܲܪܝܸܟ̣ܲܚ ܠܗܲܡܙܲܡܬܲܢ ܥܒ̣ܸܪܲܢ ܠܓܵܡܝܼ: ܟܲܕ ܡܲܕܥܘܼܝܹܐ ܝ݇ܘܲܚ ܠܟܠܲܝܗܝ ܐܵܢܝܼ ܕܗܕܝܼܪܹ̈ܐ ܝ݇ܢܵܐ ܕܬܲܦܩܝܼ ܒܐܵܗܵܐ ܬܲܫܥܝܼܬܵܐ: ܕܐܲܝܟܼ ܚܸܙܘܵܐ ܕܚܸܠܡܵܐ ܥܒ̣ܸܪܲܢ ܥܲܠ ܟܠܲܝܗܝ ܐܵܢܝܼ ܕܦܝܼܫܠܹܗ ܥܒ̣ܝܼܕܵܐ ܘܦܠܝܼܚܵܐ ܒܐܵܗܵܐ ܩܸܣܲܬ: ܟܲܕ ܫܒ̣ܸܩܠܲܢ ܒܵܣܲܡܬܵܐ ܕܡܸܪ̈ܥܝܹܐ ܥܲܡ ܢܝܼܫܲܢܩܹ̈ܐ ܘܥܵܓܝܼܒܘܼܝܵܬܹ̈ܐ ܕܠܵܐ ܩܝܼܵܣ ܕܦܝܼܫܠܹܗ ܦܠܝܼܚܵܐ ܒܐܝܼܕܵܬܹ̈ܐ ܕܩܲܕܝܼܫܵܐ. ܘܥܲܡ ܬܘܼܠܡܵܕܵܐ ܕܥܲܪ̈ܒ̣ܵܝܹܐ ܕܵܐܟ̣ܝܼ ܗ݇ܘܹܐܠܹܗ. ܐܝܼܢܵܐ ܡ̣ܢ ܣܵܒܵܒ ܕܦܘܼܩܕܵܢܵܐ ܕܡܲܠܟܘܼܬܵܐ ܡܲܠܝܘܼܙܹܐ ܗ݇ܘܼܵܐ ܐܸܠܲܢ: ܕܟܲܬܒ̣ܲܚ ܘܫܲܕܪܲܚܠܵܗ̇ ܠܬܲܫܥܝܼܬܹܗ ܕܩܲܕܝܼܫܵܐ: (ܠܐܵܗܵܐ ܬܲܫܥܝܼܬܵܐ ܐܲܠܵܗܵܝܬܵܐ: ܥܲܡ ܐܵܗܵܐ ܐܘܼܦ ܐܸܓܲܪܬܵܐ ܕܩܲܕܝܼܫܵܐ ܕܡ̣ܢ ܪ̈ܗܘܿܡܹܐ ܦܝܼܫܠܵܗ̇ ܫܘܼܕܸܪܬܵܐ ܒܘܼܬ ܕܐܵܗܵܐ ܬܲܫܥܝܼܬܵܐ.) ܒܘܼܬ ܗܵܕܟ̣ܵܐ ܚܲܕ݇ܟ̰ܵܐ ܡ̣ܢ ܓ̣ܵܠܝܼܒܘܼܝܵܬܹ̈ܐ ܕܩܲܕܝܼܫܵܐ ܡܘܼܬܸܒ̣ܠܲܢ ܓܵܘ ܬܲܫܥܝܼܬܹܗ. ܒܘܼܬ ܕܐܵܗܵܐ ܣܵܒܵܒ: ܡܘܼܬܸܒ̣ܠܲܢ ܩܲܕ݇ܡܵܝܹ̈ܐ ܐ݇ܚܵܪ̈ܵܝܹܐ ܘܐ݇ܚܵܪ̈ܵܝܹܐ ܩܲܕ݇ܡܵܝܹ̈ܐ. ܐܲܝܟܼ ܩܸܣܲܬ ܕܒܹܝܬ ܐܵܪܝܼܘܿܣ: ܕܐܝܼܡܵܢ ܦܠܸܛܠܗ݇ܘܿܢ ܐܸܠܲܢ ܩܸܣܲܬܹ̈ܐ ܕܗ݇ܘܹܐܠـܗ݇ܘܿܢ ܩܵـܕ݇ܡ ܕܝܼــܹܗ ܫܒ̣ܸܩܠܲܢ ܟܲܕ ܠܵܐ ܬܘܼܡܵܡܵܐ. ܒܘܼܬ ܕܐܵܗܵܐ ܣܵܒܵܒ ܒܸܛܠܵܒܵܐ ܝ݇ܘܲܚ ܗܲܝܲܪܬܵܐ ܕܨܠܵܘܵܬܹ̈ܗ ܕܩܲܕܝܼܫܵܐ ܡܵܪܝ ܐܵܘܓܹܝܢ ܣܵܒ̣ܵܐ ܒܪܝܼܟ̣ܵܐ ܥܲܡ ܣܵܒ̣ܹ̈ܐ ܥܲܓ̰ܒܵܢܹ̈ܐ ܕܥܲܡܹܗ: ܩܲܪܒܘܼܢܹ̈ܐ ܝ݇ܘܲܚ ܕܝܵܗ݇ܒ̣ܲܚ ܫܘܼܠܵܡܵܐ ܠܩܸܣܲܬܹܗ ܕܟܵܦܘܿܪܵܐ ܐܵܪܝܼܘܿܣ ܘܕܓ̣ܵܠܝܼܒܘܼܝܬܹ̈ܐ ܕܙܸܪ̈ܲܢܓܹܐ ܕܡܫܝܼܚܵܐ ܟܲܕ ܐܘܼܦ ܠܐܵܗܵܐ ܒܪܵܒܵܐ ܟܸܪܝܘܼܬܵܐ ܗ݇ܘܹܐܠܲܢ ܡܸܨܥܵܝܹ̈ܐ ܕܟܲܬܒ̣ܲܚ.
ܐܝܼܢܵܐ ܒܐܵܗܵܐ ܥܕܵܢܵܐ ܡܝܼܬܠܹܗ ܦܵܦܵܐ؛ (ܠܬܘܼܠܡܵܕܘܼܗܝ ܒܪܝܼܟ̣ܵܐ ܐܵܢܝܼ ܬܘܼܠܡܸܕܹܐ ܗ݇ܘܼܵܐ. ܡܘܼܥܡܸܕܵܝܠܹܗ ܠܟܠܲܝܗܝ ܐܲܬܪ̈ܵܘܵܬܹܐ ܕܒܹܝܬ ܩܲܪܕܘܿ ܘܠܣܸܢܥܵܪ ܘܠܩܲܪܕܝܼܢ ܘܗܲܠ ܛܘܼܪܵܐ ܥܸܠܵܝܵܐ ܕܣܝܼܣܢܝܼܵܐ: ܕܠܵܐ ܫܒ̣ܸܩܠܹܗ ܒܝܼܲܝܗܝ ܐܘܼܦ ܚܲܕ݇ ܨܵܢܵܡ ܕܠܵܐ ܫܡܸܛܠܹܗ: ܘܠܵܐ ܚܲܕ݇ ܚܲܢܦܵܐ ܘܝܼܗܘܼܕܵܝܵܐ ܕܠܵܐ ܡܘܼܥܡܸܕܠܹܗ. ܘܒܢܹܐܠܹܗ ܩܵܬܲܝܗܝ ܥܹܕܵܬܹ̈ܐ ܘܕܲܝܪܹ̈ܐ: ܟܲܕ ܟܬܸܒ̣ܠܹܗ ܠܐܲܦܸܣܩܘܿܦܹ̈ܐ ܕܐܵܟ̣ܠܝܼ ܚܲܡ ܕܝܼܲܝܗܝ ܘܕܡܗܘܼܡܢܹ̈ܐ ܒܟܠ ܡܸܢܕܝܼ ܕܠܵܙܸܡ ܝܼܗܘܼܵܐ ܐܸܠܲܝܗܝ. ܟܲܕ ܐܵܗܵܐ ܠܵܐ ܫܠܹܝܠܗ݇ܘܿܢ ܐܲܩܠܵܬ̈ܘܼܗܝ ܡ̣ܢ ܣܵܚܒܘܼܪܲܝܗܝ ܘܒܝܼܵܗ݇ܒ̣ܲܝܗܝ ܚܲܝܠܵܐ ܒܢܝܼܫܲܢܩܹ̈ܐ ܘܥܵܓ̰ܝܼܒܘܼܝܵܬܹ̈ܐ ܕܒܸܦܠܵܚܵܐ ܗ݇ܘܼܵܐ ܡܵܪܲܢ ܒܐܝܼܕܵܬ̈ܘܼܗܝ. ܚܫܸܒ̣ܠܲܢ ܒܸܬ ܝܵܗ݇ܒ̣ܲܚ ܚܘܼܬܵܡܵܐ ܠܩܸܣܲܬ ܕܟܵܦܘܿܪܵܐ ܐܵܪܝܼܘܿܣ: ܕܒܸܬ ܟܲܬܒ̣ܲܚ ܓ̣ܵܠܝܼܒܘܼܬܵܐ ܕܙܸܪ̈ܲܢܓܹܐ ܕܡܫܝܼܚܵܐ: ܟܲܕ ܐܘܼܦ ܠܵܐ ܠܐܵܗܵܐ: ܐܲܝܟܼ ܦܲܓ̣ܪܵܐ ܙܥܘܿܪܵܐ ܠܹܐ ܚܵܫܸܚ. ܐܝܼܢܵܐ ܒܘܼܬ ܕܐܵܗܵܐ ܕܒܸܬ ܟܲܬܒ̣ܲܚ ܘܒܐܲܝܢܝܼ ܙܲܒ̣ܢܵܐ ܡܝܼܬܠܹܗ ܡܵܪܝ ܦܵܦܵܐ.)
ܗ̇ܘ ܕܡܗܘܼܡܢܵܐ ܗ݇ܘܼܵܐ ܒܦܵܛܲܪܝܲܪܟܘܼܬܵܐ ܕܒܹܝܬ ܦܲܪ̈ܣܵܝܹܐ. ܘܩܸܡܠܹܗ ܒܵܬ݇ܪܹܗ ܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ: ܚܲܕ݇ ܐ݇ܢܵܫܵܐ ܚܲܝܠܵܢܵܐ ܘܠܸܒܵܢܵܐ: ܚܸܕܝܵܐ ܒܗܲܝܡܵܢܘܼܬܹܗ: ܘܠܚܲܪܬܵܐ ܐܘܼܦ ܗ̇ܘ ܗ݇ܘܹܐܠܹܗ ܣܵܗܕܵܐ [ܣܵܗܕܘܼܬܵܐ] ܨܦܵܝܝܼ ܘܫܲܦܝܼܪܬܵܐ:
ܘܗ݇ܘܹܐܠܹܗ ܢܵܘܪܵܐ ܛܵܒ̣ܵܐ ܠܡܲܪܥܝܼܬܹܗ. ܒܝܵܘܡܵܐ ܕܫܩܲܠܬܵܐ ܕܟܠܝܼܠܹܗ ܘܥܲܡܹܗ ܡܐܵܐ ܘܬܠܵܬ݇ܐ ܟܵܗܢܹ̈ܐ ܫܲܪܝܼܪܹ̈ܐ ܒܢܘܿܢܹ̈ܐ ܕܩܵܘܠܹܗ. ܘܐܵܕܝܼܵܐ ܒܸܬ ܫܲܒ̣ܩܲܚ ܠܩܸܣܲܬܹܗ ܕܐܵܗܵܐ ܐܲܬܠܹܝܛܵܐ [ܙܸܪܲܢܓ]. ܘܟܲܕ ܦܘܼܩܸܕܠܹܗ ܡܲܠܟܵܐ ܙܲܟܵܝܵܐ ܩܘܼܣܛܲܢܛܝܼܢܘܿܣ: ܕܓ̰ܲܡܥܝܼ ܟܠܲܝܗܝ ܐܲܒ̣ܵܗܵܬܹ̈ܐ ܐܲܦܸܣܩܘܿܦܹ̈ܐ: ܐܘܼܦ ܫܸܡܥܘܿܢ ܦܵܛܲܪܝܲܪܟܵܐ ܕܦܵܪܸܣ ܒܥܹܐܠܹܗ ܕܐܵܙܸܠ. ܟܲܕ ܠܵܐ ܡܨܹܐܠܹܗ ܕܐܵܙܸܠ: ܫܘܼܕܸܪܹܗ ܬܪܹܝܢ ܡ̣ܢ ܬܲܠܡܝܼܕ̈ܘܼܗܝ. ܘܒܥܕܵܢܵܐ ܕܡܛܹܐܠܗ݇ܘܿܢ ܒܲܪܩܘܼܒ̣ܠ ܥܘܼܡܪܵܐ: ܐ݇ܙܸܠܗ݇ܘܿܢ ܕܦܵܝܫܝܼ ܒܘܼܪܟ̣ܹܐ ܡ̣ܢ ܣܵܒ̣ܵܐ ܘܡ̣ܢ ܟܠܵܗ̇ ܐܲܚܘܿܢܘܵܬܹ̈ܐ. ܘܚܲܕ݇ ܡܸܢܲܝܗܝ ܡ̣ܢ ܩܵܕ݇ܡ ܥܸܣܪܝܼܢ ܝܵܘܡܵܢܹ̈ܐ ܗܘܹܐܠܹܗ ܟܲܪܪܵܐ ܒܬܸܪ̈ܘܲܝ ܢܵܬܝܵܬ̈ܘܼܗܝ. ܒܐܘܼܪܚܵܐ ܗ݇ܘܼܵܐ ܕܩܘܼܘܸܡܠܹܗ ܐܵܗܵܐ ܓܸܕܫܵܐ ܘܦܝܼܫܠܹܗ ܟܲܪܪܵܐ. ܘܒܥܕܵܢܵܐ ܕܦܝܼܫܠܗ݇ܘܿܢ ܒܘܼܪ̈ܟ̣ܹܐ ܡ̣ܢ ܩܲܕܝܼܫܵܐ ܡܵܪܝ ܐܵܘܓܹܝܢ: ܒܘܼܩܪܵܝܠܹܗ ܒܘܼܬ ܨܵܚܘܿܬܹܗ ܕܡܵܪܝ ܫܸܡܥܘܿܢ ܩܵܬܘܿܠܝܼܩܵܐ. ܘܗܵܝܓܵܗ ܩܪܹܐܠܹܗ ܠܗ̇ܘ ܕܗ݇ܘܹܐܠܹܗ ܟܲܪܪܵܐ: ܪܫܸܡܠܹܗ ܒܢܝܼܫܲܢܩܵܐ ܕܨܠܝܼܒ̣ܵܐ ܥܲܠ ܬܸܪ̈ܘܲܝ ܢܵܬܝܵܬ̈ܘܼܗܝ. ܘܗܲܪ ܒܗ̇ܝ ܣܵܥܲܬ ܐ݇ܙܸܠܹܗ ܡܸܢܹܗ ܡܲܪܥܵܐ: ܬܪܸܨܠܵܗ̇ ܫܡܥܵܝܬܹܗ: ܘܒܗܵܣܵܢܵܝܘܼܬܵܐ ܒܸܫܡܲܥܝܵܐ ܗ݇ܘܼܵܐ. ܘܥܵܓ̰ܸܒ ܗ݇ܘܼܵܐ ܗ̇ܘ ܩܲܫܝܼܫܵܐ ܕܒܣܸܡܠܹܗ: ܕܵܐܟ̣ܝܼ ܗ̇ܘ ܠܹܐ ܗ݇ܘܼܵܐ ܫܸܡܥܝܵܐ ܚܲܕ݇ ܡܸܢܕܝܼ ܒܘܼܬ ܢܵܬܝܵܬ̈ܘܼܗܝ. ܗ̇ܘ ܝܘܼܗ݇ܒ̣ܸܠܹܗ ܐܸܠܹܗ ܒܵܣܲܡܬܵܐ ܘܒܣܸܡܠܹܗ. ܣܵܒܵܒ ܫܸܡܥܝܵܐ ܗ݇ܘܼܵܐ ܒܘܼܬ ܥܵܓ̰ܝܼܒܘܼܝܵܬܹ̈ܐ ܕܐܵܗܵܐ ܐ݇ܢܵܫܵܐ. ܘܒܵܬ݇ܪ ܬܪܹܝܢ ܝܵܘܡܵܢܹ̈ܐ ܗܘܼܕܪܵܠܗ݇ܘܿܢ ܓܵܢܲܝܗܝ ܘܥܒ̣ܸܕܠܗ݇ܘܿܢ ܚܙܘܼܩܝܵܐ [ܣܵܦܲܪ]. ܕܐܵܙܠ݇ܝܼ ܠܟܢܘܼܫܝܵܐ ܕܐܲܒ̣ܵܗܵܬܹ̈ܐ ܩܲܕܝܼܫܹ̈ܐ: ܡܵܪܝ ܝܲܥܩܘܿܒ̣ ܥܲܡ ܕܐܵܢܝܼ ܩܲܫܝܼܫܹ̈ܐ. ܡܸܢ݇ܕܪܹܫ݇ ܩܲܕܝܼܫܵܐ ܐܵܘܓܹܝܢ ܛܠܸܒܠܹܗ ܡ̣ܢ ܟܢܘܼܫܝܵܐ. ܘܡ̣ܢ ܒܵܬ݇ܪ ܕܦܪܸܩܠܵܗ̇ ܟܠܵܗ̇ ܗܹܡܸܙܡܵܢ [ܩܸܣܲܬ] ܘܕܘܼܪܵܫܵܐ ܒܘܼܬ ܩܸܣܲܬܹ̈ܐ ܘܩܸܣܲܬܹ̈ܐ: ܗܵܝܓܵܗ ܐܘܼܦ ܒܢܚܸܦܬܹܗ ܕܐܵܪܝܼܘܿܣ ܟ̰ܲܦܲܠ ܦܝܼܫܠܵܗ̇ ܚܙܝܼܬܵܐ ܒܐܲܫܟܵܪܵܐ. ܒܣܵܒܵܒ ܕܠܵܐ ܡܲܪܝܵܟ̣ܬܵܐ ܕܥܕܵܢܵܐ: ܫܒ̣ܝܼܩܵܝܠܲܢ ܪܵܒܵܐ ܩܸܣܲܬܹ̈ܐ.
ܗܵܝܓܵܗ ܒܘܼܬ ܕܐܵܗܵܐ ܫܵܒ̣ܘܿܪ ܦܵܪܣܵܝܵܐ ܚܘܼܠܸܢܹܗ ܕܥܵܒ̣ܸܪ ܒܬܸܚܘܼܒ ܕܪ̈ܗܘܿܡܵܝܹܐ: ܘܥܒ̣ܸܪܹܗ ܠܢܲܗܪܵܐ ܕܕܸܩܠܲܬ ܕܐܵܬܹܐ ܗ݇ܘܼܵܐ ܠܢܨܝܼܒ̣ܝܼܢ. ܘܫܘܼܕܸܪܹܗ ܡܵܪܝ ܝܲܥܩܘܿܒ̣ ܘܪܹ̈ܫܵܢܹܐ ܕܡܕܝܼܢ݇ܬܵܐ ܠܟܸܣ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܩܘܼܡ݇ ܐܲܢ݇ܬܿ ܘܟܠܲܝܗܝ ܐܲܚܘܿܢܘܵܬܹ̈ܐ ܥܒ̣ܘܿܪܘܼܢ ܠܡܕܝܼܢ݇ܬܵܐ ܡ̣ܢ ܩܵܕ݇ܡ ܚܲܝܠܵܐ ܕܦܵܪ̈ܣܵܝܹܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܫܘܼܕܪܵܝܠܹܗ: ܕܒܚܲܝܠܵܐ ܐ݇ܢܵܫܵܝܵܐ ܫܵܒ̣ܘܿܪ ܠܹܐ ܡܵܨܹܐ ܠܸܕܒ̣ܵܩܵܐ ܠܡܕܝܼܢ݇ܬܵܘܟ̣ܘܿܢ: ܐܝܼܢܵܐ ܡ̣ܢ ܒܵܬ݇ܪ ܦܠܵܫܹܗ ܕܬܪܹܝܢ ܓܵܗܹ̈ܐ ܥܲܡܵܘܟ̣ܘܿܢ: ܒܸܬ ܝܵܗ݇ܒ̣ܝܼܬܘܿܢ ܠܵܗ̇ ܡܕܝܼܢ݇ܬܵܐ ܒܫܠܵܡܵܐ ܕܠܵܐ ܦܠܵܫܵܐ: ܘܡܸܢܘܼܗ̇ ܒܸܬ ܡܫܵܢܝܼܬܘܿܢ. ܐܝܼܢܵܐ ܨܵܠܝܼܡܘܿܢ ܨܠܘܿܬܵܐ ܘܛܠܘܿܒܘܼܢ ܡ̣ܢ ܡܵܪܲܢ: ܕܦܵܝܫܝܼܬܘܿܢ ܦܪ̈ܝܼܩܹܐ ܒܸܫܠܵܡܵܐ ܡ̣ܢ ܕܐܵܗܵܐ ܐܲܪܝܵܐ. ܐܝܼܢܵܐ ܡܲܠܝܵܢܬܵܐ ܝ݇ܠܵܗ̇ ܩܵܬܲܢ ܩܵܘܠܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܡܦܵܨܹܐ ܠܲܢ ܡ̣ܢ ܐܝܼܕܵܬ̈ܘܼܗܝ. ܡ̣ܢ ܒܵܬ݇ܪ ܕܐܲܢܹ̈ܐ ܗܹܡܸܙܡܵܢܹ̈ܐ ܒܚܲܕ݇ܟ̰ܵܐ ܝܵܘܡܵܢܹ̈ܐ: ܐ݇ܬܹܐܠܹܗ ܚܲܝܠܵܐ ܕܐܵܣܟܲܪ ܕܦܵܪ̈ܣܵܝܹܐ. ܘܚܘܼܪܕܝܼܵܠܗ݇ܘܿܢ ܡܕܝܼܢ݇ܬܵܐ: ܘܒܥܕܵܢܵܐ ܕܒܸܦܠܵܛܵܐ ܗ݇ܘܼܵܘ ܦܵܪ̈ܣܵܝܹܐ ܕܓܵܘ ܐܲܬܪܵܐ. ܕܓܲܢܒ̣ܝܼ ܗ݇ܘܼܵܘ ܘܡܲܝܬ݇ܝܼ ܗ݇ܘܼܵܘ ܡܹܐܟ̣ܘܼܠܬܵܐ ܩܵܐ ܓܵܢܲܝܗܝ: ܬܦܸܩܠܗ݇ܘܿܢ ܦܲܐܬܵܐ ܓܵܘ ܦܲܐܬܵܐ ܒܚܲܡܫܸܡܐܵܐ ܐ݇ܢܵܫܹ̈ܐ ܒܲܪܩܘܼܒ̣ܠ ܥܘܼܡܪܵܐ: ܘܒܥܹܐܠܗ݇ܘܿܢ ܕܣܲܠܒܝܼ ܗ݇ܘܼܵܘ ܠܗ݇ܘܿܢ. ܐܝܼܢܵܐ ܐܝܼܬ ܗ݇ܘܼܵܐ ܥܲܡܲܝܗܝ ܚܲܕ݇ ܐ݇ܢܵܫܵܐ ܕܒܵܠܲܕ ܝܼܗ݇ܘܼܵܐ ܒܥܘܼܡܪܵܐ. ܟܲܕ ܡܛܹܐܠܗ݇ܘܿܢ ܠܟܸܣ ܒܲܝܬܵܐ ܕܨܠܘܿܬܵܐ ܐ݇ܙܸܠܲܢ ܘܡܘܼܕܸܥܠܲܢ ܠܩܲܕܝܼܫܵܐ: ܘܐ݇ܙܸܠܹܗ ܥܲܡܲܢ ܗܲܠ ܠܗܲܝܟܠܵܐ ܕܥܘܼܡܪܵܐ. ܘܣܢܸܕܠܹܗ ܥܲܠ ܚܘܼܛܪܹܗ: ܘܓܘܼܫܸܩܠܹܗ ܒܝܼܲܝܗܝ: ܘܪܫܸܡܠܹܗ ܥܲܠܲܝܗܝ ܢܝܼܫܲܢܩܵܐ ܕܨܠܝܼܒ̣ܵܐ: ܘܚܬܝܼܡܵܝܠܹܗ: ܘܢܦܸܠܵܗ̇ ܥܲܠܲܝܗܝ ܥܲܝܒ̣ܵܐ ܥܵܡܘܼܪܬܵܐ ܘܐ݇ܢܵܫܵܐ ܠܚܲܒ̣ܪܹܗ ܠܹܐ ܗ݇ܘܼܵܐ ܒܸܚܙܵܝܵܐ: ܐܸܠܵܐ ܙܸܕܥܝܹ̈ܐ ܗ݇ܘܼܵܘ ܘܫܓ̣ܝܼܫܹ̈ܐ ܘܒܸܩܪܵܝܵܐ ܩܵܐ ܐܘܼܕܵܠܹܐ: ܐܘܼܦ ܣܘܼܣܵܘܵܬܲܝ̈ܗܝ ܫܓ̣ܝܼܫܹ̈ܐ ܗ݇ܘܼܵܘ: ܘܬܲܪܩܘܼܠܹܐ ܗ݇ܘܼܵܘ ܘܒܸܢܦܵܠܵܐ. ܕܵܐܟ̣ܝܼ ܕܩܘܼܘܸܡܠܵܗ̇ ܠܦܸܪܥܘܿܢ ܘܠܐܲܣܟܵܪ̈ܘܼܗܝ ܓܵܘ ܝܵܡܵܐ. ܘܡܘܼܙܕܸܥܠܹܗ ܓܵܘ ܚܸܫܟܵܐ ܕܛܘܼܠܩܵܢܵܐ ܕܗ̇ܘ ܚܸܫܟܵܐ: ܐܘܼܦ ܗܵܕܟ̣ܵܐ ܩܘܼܘܸܡܠܵܗ̇ ܠܐܵܬܘܿܪ̈ܵܝܹܐ.
ܐܝܼܢܵܐ ܩܲܕܝܼܫܹ̈ܐ ܓ̰ܸܡܥܝܹ̈ܐ ܗ݇ܘܼܵܘ ܟܠܲܝܗܝ ܡܐܘܼܕܵܠܹܐ ܓܵܘ ܗܲܝܟܠܵܐ ܒܨܠܘܿܬܵܐ ܩܵܕ݇ܡ ܐܲܠܵܗܵܐ. ܗܵܝܓܵܗ ܟܲܕ ܦܠܸܛܠܗ݇ܘܿܢ ܩܲܕܝܼܫܹ̈ܐ ܒܥܕܵܢܵܐ ܕܪܲܡܫܵܐ: ܘܚܸܙܝܵܝܠܗ݇ܘܿܢ ܕܫܓܼܝܼܫܹ̈ܐ ܗ݇ܘܼܵܘ ܘܟܟ̰ܝܼܚܹ̈ܐ: ܗܸܟ̰ ܚܲܕ݇ ܐ݇ܢܵܫܵܐ ܡܸܢܲܝܗܝ ܠܹܐ ܗ݇ܘܼܵܐ ܡܨܵܝܵܐ ܕܫܵܢܝܼ ܗ݇ܘܼܵܘ ܡ̣ܢ ܕܘܼܟܬܹܗ: ܗܵܕܟ̣ܵܐ ܦܝܼܫܠܗ݇ܘܿܢ ܗܲܠ ܠܪܲܡܫܵܐ: ܗܵܝܓܵܗ ܪܘܼܚܸܡܠܹܗ ܥܲܠܲܝܗܝ: ܘܥܒ̣ܸܪܘܿܢ ܘܦܘܼܪܦܸܠܗ݇ܘܿܢ ܒܣܵܒ̣ܵܐ ܕܫܵܪܹܐܠܗ݇ܘܿܢ ܟܲܕ ܒܹܐܡܵܪܵܐ ܐܸܠܹܗ: ܒܵܒܲܢ: ܗܲܒ̣݇ܠܗ݇ܘܿܢ ܦܣܵܣܵܐ ܐܲܢܹ̈ܐ ܐ݇ܢܵܫܹ̈ܐ ܕܐܵܙܠ݇ܝܼܢ ܡ̣ܢ ܠܲܐܟ̣ܵܐ ܡܣܵܒܵܒ ܩܘܼܪܒܵܐ ܝ݇ܢܵܐ ܠܡܵܘܬܵܐ ܒܘܼܫ ܡ̣ܢ ܠܚܲܝܹ̈ܐ: ܐܲܢܹ̈ܐ ܘܣܘܼܣܵܘܵܬܲܝ̈ܗܝ. ܗܵܝܓܵܗ ܩܲܕܝܼܫܵܐ ܦܘܼܪܦܸܠܹܗ ܒܡܵܪܲܢ: ܕܛܵܪܸܕܠܹܗ ܡܸܢܲܝܗܝ ܠܚܸܫܟܵܐ. ܗܲܪ ܒܗ̇ܝ ܣܵܥܲܬ ܦܝܼܫܠܹܗ ܦܬܝܼܚܵܐ ܩܵܕ݇ܡܲܝܗܝ ܠܓܹܒܵܐ ܕܡܲܥܪ̱ܒ̣ܵܐ ܐܲܝܟܼ ܬܲܪܥܵܐ ܕܢܘܼܗܪܵܐ: ܒܚܲܝܠܵܐ ܦܠܸܛܠܗ݇ܘܿܢ ܒܝܼـܹܗ: ܟܲܕ ܒܸܪܚܵܛܵܐ ܗ݇ܘܼܵܘ ܠܓܹܒܵܐ ܕܚܲܝܠܵܐ ܕܝܼܲܝܗܝ ܙܸܕܥܝܹ̈ܐ ܘܪܲܬܪܘܼܬܹܐ: ܟܲܕ ܫܡܸܛܠܗ݇ܘܿܢ ܒܬܲܪ̈ܩܲܠܝܵܬܹܐ ܐܲܢܹ̈ܐ ܘܣܘܼܣܵܘܵܬܲܝ̈ܗܝ. ܘܓܵܫܘܿܩܹܐ ܗ݇ܘܼܵܘ ܠܒܵܬ݇ܪ ܚܵܨܲܝܗܝ: ܣܵܒܵܒ ܒܸܚܫܵܒ̣ܵܐ ܗ݇ܘܼܵܘ ܕܒܓ̰ܲܠܕܘܼܬܵܐ ܒܸܬ ܡܵܛܹܐܠܗ݇ܘܿܢ ܗ̇ܘ ܚܸܫܟܵܐ. ܘܡܲܠܝܘܼܙܹܐ ܗ݇ܘܼܵܘ ܚܲܕ݇ ܠܗ̇ܘ ܐ݇ܚܹܪ݇ܢܵܐ: ܕܡܵܛܝܼ ܠܕܘܼܟܬܵܐ ܕܐܵܣܟܲܪ ܕܝܼܲܝܗܝ: ܡ̣ܢ ܩܵܕ݇ܡ ܐܵܬܹܐ ܗ̇ܘ ܬܲܡܒܵܐ ܥܲܠܲܝܗܝ. ܒܥܘܼܓ̰ܵܒܵܐ ܡܘܼܦܬܸܠܵܝܠܹܗ ܡܵܪܲܢ ܐܲܝܟܼ ܕܐܸܢ ܓܵܘ ܓܲܪܕܵܐ ܝܲܢ ܬܩܘܼܠܬܵܐ: ܘܡܸܚܝܵܝܠܹܗ ܒܨܠܵܘܵܬܹ̈ܐ ܕܩܲܕܝܼܫܵܐ ܐܲܝܟܼ ܒܝܼܲܕ ܟܹܐܦܹ̈ܐ ܕܒܲܪܕܵܐ: ܘܥܪܸܩܠܗ݇ܘܿܢ ܟܲܕ ܨܠܝܼܦܹ̈ܐ ܘܕܘܼܪ̈ܒܸܢܹܐ ܘܥܒ̣ܸܪܘܿܢ ܠܡܲܫܪܝܼܬܵܐ [ܠܕܘܼܟܬܵܐ ܕܐܵܣܟܲܪ]. ܘܫܥܸܫܠܹܗ ܟܠܹܗ ܚܲܝܠܵܐ ܕܡܲܫܪܝܼܬܵܐ ܒܥܕܵܢܵܐ ܚܸܙܝܵܝܠܗ݇ܘܿܢ: ܒܸܚܫܵܒ̣ܵܐ ܗ݇ܘܼܵܘ ܕܚܲܝܠܵܐ ܕܪ̈ܗܘܿܡܵܝܹܐ ܥܒ̣ܸܕܠܗ݇ܘܿܢ ܢܫܲܪܬܵܐ ܥܲܠܲܝܗܝ. ܣܵܒܵܒ ܟܠܹܗ ܟ̰ܲܟܲܝܗܝ ܫܡܝܼܛܵܐ ܗ݇ܘܼܵܐ ܘܒܸܫܥܵܫܵܐ ܗ݇ܘܼܵܘ: ܘܒܸܕܡܵܝܵܐ ܗ݇ܘܼܵܘ ܠܐ݇ܢܵܫܹ̈ܐ ܕܥܪܸܩܠܗ݇ܘܿܢ ܡ̣ܢ ܦܠܵܫܵܐ. ܐܵܗܵܐ ܥܵܓ̰ܝܼܒܘܼܬܵܐ ܩܲܕ݇ܡܵܝܬܵܐ ܕܥܒ̣ܸܕܠܹܗ ܡܵܪܲܢ: ܒܬܹܐܬܵܐ ܕܐܵܬܘܿܪ̈ܵܝܹܐ: ܒܐܝܼܕܵܬܹ̈ܗ ܕܩܲܕܝܼܫܵܐ ܡܵܪܝ ܐܵܘܓܹܝܢ. ܘܟܲܕ ܒܘܼܩܸܪܘܿܢ ܡ̣ܢ ܚܲܒ̣ܪ̈ܵܘܵܬܲܝܗܝ ܕܡܘܼܕܝܼ ܩܘܼܘܸܡܠܹܗ ܐܸܠܲܝܗܝ: ܘܗܘܼܩܝܼܠܗ݇ܘܿܢ ܟܠ ܫܪܵܪܵܐ. ܘܒܓ̰ܲܠܕܘܼܬܵܐ ܡܘܼܕܸܥܠܗ݇ܘܿܢ ܠܫܵܒ̣ܘܿܪ ܡܲܠܟܵܐ. ܐܝܼܢܵܐ ܟܲܕ ܫܡܸܥܠܹܗ ܐܵܗܵܐ ܐ݇ܢܵܫܵܐ ܩܸܫܝܵܐ: ܟܪܸܒܠܹܗ ܘܐ݇ܡܸܪܹܗ ܠܓܘܼܪ̈ܵܢܘܼܗܝ: ܕܠܗܸܟ̰ ܐ݇ܢܵܫܵܐ ܠܵܐ ܥܵܒ̣ܕܝܼܬܘܿܢ ܢܫܲܪܬܵܐ [هجوم]. ܗܲܠ ܕܫܲܩܠܲܚ ܠܵܗ̇ ܡܕܝܼܢ݇ܬܵܐ. ܘܗܵܝܓܵܗ ܒܸܬ ܡܲܨܠܲܚܠܗ݇ܘܿܢ ܡ̣ܢ ܬܵܡܵܐ ܠܐܵܢܝܼ ܣܵܓ̣ܕܵܢܹ̈ܐ ܠܨܠܝܼܒ̣ܵܐ. ܘܪܵܒܵܐ ܚܸܪܒܵܐ ܒܸܬ ܡܲܡܝܸܬܢܠܗ݇ܘܿܢ. ܐܝܼܢܵܐ ܟܠܹܗ ܐܵܣܟܲܪ ܕܗ̇ܝ ܡܲܫܪܝܼܬܵܐ: ܪܵܒܵܐ ܒܸܙܕܲܥܝܵܐ ܗ݇ܘܼܵܐ ܡ̣ܢ ܚܲܒܪܵܐ ܕܫܡܸܥܠܗ݇ܘܿܢ ܡ̣ܢ ܕܐܵܢܝܼ ܚܲܡܫܸܡܐܵܐ ܐ݇ܢܵܫܹ̈ܐ. ܐܵܢܝܼ ܕܗܘܹܐܠܵܗ̇ ܒܝܲܝܗܝ ܐܵܗܵܐ ܢܝܼܫܲܢܩܵܐ ܕܬܲܡܒܵܐ: ܟܵܪ̈ܘܿܙܹܐ ܕܡܵܪܲܢ ܥܒ̣ܝܕܹ̈ܐ ܗ݇ܘܼܵܘ ܒܟܠܵܗ̇ ܡܲܫܪܝܼܬܵܐ: ܘܙܲܕܥܝܼ ܗ݇ܘܼܵܘ ܠܸܦܠܵܛܵܐ ܠܓܹܒܵܐ ܕܐܵܗܵܐ ܦܢܝܼܬܵܐ. ܗܵܕܟ̣ܵܐ ܢܛܝܼܪܵܝܠܹܗ ܡܵܪܝܵܐ ܠܩܲܕܝܼܫܹ̈ܐ ܕܠܵܐ ܥܝܼܩܘܼܬܵܐ ܘܙܕܥܘܿܬܵܐ.
ܐܝܼܢܵܐ ܡ̣ܢ ܒܵܬ݇ܪ ܫܘܼܢܹܐܠܵܗ̇ ܐܵܣܟܲܪ ܕܫܵܒ̣ܘܿܪ ܡܲܠܟܵܐ: ܒܐ݇ܬܹܐܬܹܗ ܕܓܵܗܹܐ ܕܬܪܹܝܢ: ܘܠܵܐ ܡܨܹܐܠܹܗ ܕܥܵܒ̣ܸܪ ܠܡܕܝܼܢ݇ܬܵܐ: ܘܟܲܕ ܗܵܠܵܐ ܐܲܬܪ̈ܵܘܵܬܹܐ ܕܒܲܝܢܵܬ ܬܸܚܘܼܒܹ̈ܐ ܕܪ̈ܗܘܿܡܵܝܹܐ ܫܓ̣ܝܼܫܹ̈ܐ ܗ݇ܘܼܵܘ ܡ̣ܢ ܙܕܥܘܿܬܵܐ ܕܦܵܪ̈ܣܵܝܹܐ: ܚܲܕ݇ ܩܲܕܝܼܫܵܐ ܟܠ ܝܵܘܡܵܐ ܝܼܗ݇ܘܼܵܐ ܒܨܠܘܿܬܵܐ. ܘܒܕܸܡܥܹ̈ܐ ܕܥܲܝܢܹ̈ܐ ܦܲܪܦܘܼܠܹܗ ܗ݇ܘܼܵܐ ܩܵܕ݇ܡ ܡܵܪܲܢ ܒܘܼܬ ܛܵܝܸܦܵܐ ܕܟܸܪܸ̈ܣܛܝܵܢܹܐ: ܕܠܵܐ ܦܵܐܸܫ ܣܘܼܦܝܵܐ ܒܐܝܼܕܵܬܹ̈ܐ ܕܚܲܢܦܹ̈ܐ: ܗ݇ܘܹܐܠܹܗ ܒܚܲܕ݇ ܡ̣ܢ ܝܵܘܡܵܢܹ̈ܐ: ܐܲܝܟܼ ܕܬܘܼܢܝܼܠܹܗ ܐܸܠܲܢ ܗ̇ܘ ܣܵܒ̣ܵܐ ܘܐ݇ܡܸܪܹܗ ܟܲܕ ܗܘܹܐܠܵܗ̇ ܠܝܼ ܣܢܝܼܩܘܼܬܵܐ ܕܫܵܩܠܸܢ ܚܲܕ݇ܟ̰ܵܐ ܡ̣ܢ ܫܸܢܬܵܐ: ܘܚܙܹܐܠܝܼ ܗܵܐ ܟܸܠܝܵܐ ܝ݇ܘܸܢ ܗ݇ܘܼܵܐ ܓܵܘ ܚܲܕ݇ ܒܲܚܟ̰ܵܐ ܪܵܒܵܐ ܪܘܝܼܚܬܵܐ ܗ݇ܘܼܵܐ: ܘܓܵܘܵܗ̇ ܐܝܼܠܵܢܹ̈ܐ ܫܲܦܝܼܪܹ̈ܐ: ܘܝܵܘܢܵܬܹ̈ܐ ܬܘܼܪ̈ܨܹܐ ܗ݇ܘܼܵܘ ܩܸܢܵܬܹ̈ܐ ܒܝܼܲܝܗܝ. ܘܐܝܼܬ ܗ݇ܘܼܵܐ ܒܝܼـܹܗ ܚܕܵܐ ܥܹܕܬܵܐ ܓܘܼܪܬܵܐ ܘܪܘܝܼܚܬܵܐ: ܘܒܹܝܦܲܠܓܹܗ ܚܲܕ݇ ܐܝܼܠܵܢܵܐ ܓܘܼܪܵܐ: ܘܪܵܡܵܐ ܗ݇ܘܼܵܐ ܡ̣ܢ ܟܠܲܝܗܝ ܐܝܼܠܵܢܹ̈ܐ ܕܓܵܘ ܗ̇ܘ ܒܲܚܟ̰ܵܐ ܓܘܼܪܵܐ. ܘܬܪܹܝܢ ܦܲܥܘܵܢܹ̈ܐ ܡܸܢܹܗ ܒܘܼܪ̈ܛܸܢܘܿܢ: ܐܘܼܦ ܐܲܢܹ̈ܐ ܝܼܗ݇ܘܼܵܘ ܡ̣ܢ ܐܝܼܠܵܢܹ̈ܐ ܓܘܼܪܹ̈ܐ. ܘܚܙܹܐܠܝܼ ܕܨܠܹܐܠܹܗ ܡܲܠܲܐܟ̣ܵܐ ܡ̣ܢ ܫܡܲܝܵܐ. ܘܩܛܸܥܠܹܗ ܠܗ̇ܘ ܐܝܼܠܵܢܵܐ: ܘܛܥܸܢܹܗ ܟܲܕ ܒܸܙܡܵܪܵܐ ܒܬܸܫܒܘܿܚܝܵܬܹ̈ܐ ܐܲܠܵܗܵܝܹ̈ܐ: ܒܘܼܩܸܪܝܼ ܡܸܢܹܗ ܠܐܲܝܟܵܐ ܠܵܒܘܼܠܹܐ ܝ݇ܘܸܬܿ؟ ܐ݇ܡܸܪܹܗ ܐܸܠܝܼ ܒܸܬ ܢܲܨܒ̣ܸܢܹܗ ܓܵܘ ܒܲܚܟ̰ܵܐ ܕܐܲܠܵܗܵܐ. ܘܡ̣ܢ ܒܵܬ݇ܪ ܚܲܕ݇ܟ̰ܵܐ ܡܘܼܙܝܸܕܠܹܗ: ܘܩܛܸܥܠܹܗ ܠܚܲܕ݇ ܡ̣ܢ ܕܵܐܢܝܼ ܐ݇ܚܹܪ̈݇ܢܹܐ ܕܥܲܠ ܕܸܦܢܹܗ. ܘܗܲܪ ܒܗ̇ܝ ܕܵܡܲܝܬܵܐ ܛܥܸܢܹܗ ܘܠܘܼܒܸܠܹܗ. ܘܡ̣ܢ ܒܵܬ݇ܪ ܗܵܕܵܐ ܕܸܥܪܹܗ ܘܩܛܸܥܠܹܗ ܗ̇ܘ ܕܬܠܵܬ݇ܐ. ܐܝܼܢܵܐ ܐܵܢܵܐ ܒܘܼܩܸܪܝܼ ܡܸܢܹܗ: ܡܘܼܕܝܼ ܝ݇ܠܵܗ̇ ܣܵܒܵܒ: ܕܠܵܐ ܫܒ̣ܸܩܠܘܼܟܼ ܠܚܲܕ݇ ܡ̣ܢ ܕܐܵܢܝܼ ܐܝܼܠܵܢܹ̈ܐ؟ ܐܝܼܢܵܐ ܐܵܗܵܐ ܐ݇ܡܸܪܹܗ ܐܸܠܝܼ: ܕܦܵܝܫܝܼ ܓ̰ܸܡܥܝܹ̈ܐ ܓܘܼܒܝܹ̈ܐ ܡ̣ܢ ܩܵܕ݇ܡ ܕܟܲܪܒܵܐ ܕܗܕܝܼܪܵܐ ܝ݇ܠܹܗ.
ܘܡ̣ܢ ܒܵܬ݇ܪ ܕܐ݇ܙܸܠܹܗ ܡ̣ܢ ܠܟܸܣܠܝܼ: ܘܗܵܐ ܚܲܕ݇ ܬܲܢܝܼܢܵܐ ܓܘܼܪܵܐ ܓܘܼܫܸܩܠܹܗ ܠܓܵܘܵܝ ܡ̣ܢ ܣܝܵܓ̣݇ܝܹܗ ܕܗ̇ܘ ܒܲܚܟ̰ܵܐ: ܣܵܒܵܒ ܪܵܒܵܐ ܓܘܼܪܵܐ ܗ݇ܘܼܵܐ ܘܡܲܙܕܸܥܝܵܢܵܐ ܒܚܙܵܝܬܹܗ: ܘܫܥܸܫܠܹܗ ܗ̇ܘ ܣܝܵܓ̣݇ܝܵܐ ܡ̣ܢ ܩܵܕ݇ܡܘܼܗܝ. ܘܝܘܼܗ݇ܒ̣ܸܠܹܗ ܓܵܢܹܗ ܒܚܲܝܠܵܐ ܠܸܥܒ̣ܵܪܵܐ ܠܗ̇ܘ ܒܲܚܟ̰ܵܐ: ܘܥܪܸܩܠܗ݇ܘܿܢ ܟܠܲܝܗܝ ܝܵܘܢܵܬܹ̈ܐ ܡ̣ܢ ܩܵܕ݇ܡܘܼܗܝ: ܘܥܒ̣ܸܪܹܗ ܠܗܲܝܟܠܵܐ. ܘܪܚܸܛܠܹܗ ܒܵܬ݇ܪܲܝܗܝ: ܘܠܵܐ ܕܒ̣ܸܩܠܹܗ ܐܘܼܦ ܠܵܐ ܚܕܵܐ ܡܸܢܲܝܗܝ. ܘܝܘܼܗ݇ܒ̣ܸܠܹܗ ܓܵܢܹܗ ܒܚܲܝܠܵܐ ܕܥܵܒ̣ܸܪ ܠܗ̇ܝ ܥܹܕܬܵܐ: ܘܟܸܢܫܹ̈ܐ ܕܐܝܼܬ ܗ݇ܘܼܵܐ ܬܵܡܵܐ ܕܒ̣ܝܼܪܵܝܠܗ݇ܘܿܢ ܬܲܪ̈ܥܵܢܹܐ ܩܵܕ݇ܡܘܼܗܝ: ܘܝܑܼܗ݇ܘܼܵܘ ܒܸܒܟ̣ܵܝܵܐ ܘܒܙܕܥܘܿܬܵܐ ܓܘܼܪܬܵܐ. ܘܐ݇ܡܸܪܹܗ ܐܸܠܲܢ ܩܲܕܝܼܫܵܐ: ܘܐܲܝܟܼ ܕܗ̇ܘ ܕܐܵܢܵܐ ܒܚܘܼܠܡܝܼ ܡܨܵܠܘܼܝܹܐ ܝ݇ܘܸܢ ܗ݇ܘܼܵܐ ܨܠܘܿܬܵܐ ܒܘܼܬ ܕܗ̇ܘ ܛܵܝܸܦܵܐ: ܕܦܵܐܸܫ ܗ݇ܘܼܵܐ ܦܸܨܝܵܐ ܡ̣ܢ ܗ̇ܘ ܬܲܢܝܼܢܵܐ: ܗܵܐ ܡ̣ܢ ܢܵܓܸܣܬܲܢ ܚܲܕ݇ ܐ݇ܢܵܫܵܐ ܦܲܐܬܹܗ ܫܲܦܝܼܪܬܵܐ ܦܝܼܫܠܹܗ ܡܫ݇ܟ̰ܝܼܚܵܐ ܕܟܸܠܝܵܐ ܗ݇ܘܼܵܐ ܠܟܸܣ ܗ̇ܘ ܬܲܢܝܼܢܵܐ: ܘܗ̇ܘ ܟܹܐ ܠܵܒܸܠ ܗ݇ܘܼܵܘ ܠܹܗ ܠܐܲܝܟܵܐ ܕܟܹܐ ܒܲܣܡܵܐ ܗ݇ܘܼܵܐ ܠܹܗ: ܟܹܐ ܡܲܨܝܸܬܿ ܗ݇ܘܼܵܐ ܠܟܠ ܡܸܢܕܝܼ ܕܟܹܐ ܐܵܡܸܪ ܗ݇ܘܼܵܐ ܠܹܗ: ܘܕܒ̣ܝܼܩܵܐ ܗ݇ܘܼܵܐ ܒܐܝܼܕܹܗ ܕܝܲܡܝܼܢܵܐ ܨܠܝܼܒ̣ܵܐ ܕܕܲܗܒ̣ܵܐ. ܘܟܲܕ ܡܛܹܐܠܹܗ ܗ̇ܘ ܬܲܢܝܼܢܵܐ ܠܬܲܪܥܵܐ ܕܥܹܕܬܵܐ: ܡܘܼܟܠܹܐܠܹܗ ܗ̇ܘ ܐ݇ܢܵܫܵܐ. ܘܦܘܼܩܸܕܠܹܗ: ܕܐܵܙܸܠ ܒܲܪܩܘܼܒ̣ܠܹܗ ܠܚܲܕ݇ ܡܵܝܫܵܐ. ܘܗܵܐ ܚܲܕ݇ ܐܲܪܝܵܐ ܦܠܸܛܠܹܗ ܠܒܲܪܩܘܼܒ̣ܠܹܗ: ܘܗ̇ܘ ܬܲܢܝܼܢܵܐ ܒܚܲܝܠܵܐ ܝܘܼܗ݇ܒ̣ܸܠܹܗ ܒܵܠܹܗ ܠܓܹܒܵܐ ܕܝܼـܹܗ: ܘܠܵܐ ܡܨܹܐܠܹܗ ܐܲܪܝܵܐ ܕܟܵܠܹܐ ܕܲܪܩܘܼܒ̣ܠ ܚܲܝܠܹܗ: ܘܥܪܸܩܠܹܗ ܡ̣ܢ ܩܵܕ݇ܡܘܼܗܝ. ܘܥܒ̣ܸܪܹܗ ܬܲܢܝܼܢܵܐ ܠܗ̇ܘ ܡܵܝܫܵܐ: ܘܡܘܼܚܪܸܒ̣ܠܹܗ ܘܩܛܸܠܹܗ ܠܟܠ ܗܲܝܘܵܢܹ̈ܐ ܕܝܼܗ݇ܘܼܵܘ ܒܝܼـܹܗ: ܘܪܵܒܵܐ ܗܲܝܘܵܢܹ̈ܐ ܒܸܪܥܵܩܵܐ ܗ݇ܘܼܵܘ ܡ̣ܢ ܕܗ̇ܘ ܐ݇ܢܵܫܵܐ ܕܠܵܒܘܼܠܹܗ ܗ݇ܘܼܵܐ ܐܸܠܹܗ. ܟܲܕ ܡܛܹܐܠܹܗ ܠܡܲܪܒܘܼܥܝܼܬܹܗ [Lion’s Den] ܕܗ̇ܘ ܐܲܪܝܵܐ: ܚܙܹܐܠܝܼ ܗܵܐ ܚܲܕ݇ ܡܲܠܲܐܟ̣ܵܐ ܨܠܹܐܠܹܗ ܡ̣ܢ ܫܡܲܝܵܐ ܒܕܵܡܲܝܬܵܐ ܕܢܘܼܪܵܐ. ܘܡܚܹܐܠܹܗ ܠܗ̇ܘ ܬܲܢܝܼܢܵܐ ܒܪܘܼܡܚܵܐ: ܘܒܙܥܝܼܠܹܗ ܘܡܝܼܬܠܹܗ. ܘܕܸܥܪܹܗ ܗ̇ܘ ܐ݇ܢܵܫܵܐ ܕܠܵܒܘܼܠܹܗ ܗ݇ܘܼܵܐ ܐܸܠܹܗ ܒܚܲܕܘܼܬܵܐ ܓܘܼܪܬܵܐ: ܘܐ݇ܬܹܐܠܹܗ ܗܲܠ ܠܗ̇ܝ ܥܹܕܬܵܐ. ܘܗ̇ܘ ܟܸܢܫܵܐ ܕܒܥܹܕܬܵܐ ܦܠܸܛܠܗ݇ܘܿܢ ܒܲܪܩܘܼܒ̣ܠܹܗ ܒܚܲܕܘܼܬܵܐ ܓܘܼܪܬܵܐ: ܟܲܕ ܡܫܵܒܘܼܚܹܐ ܠܐܲܠܵܗܵܐ ܒܘܼܬ ܡܵܘܬܹܗ ܕܬܲܢܝܼܢܵܐ: ܘܚܙܹܐܠܝܼ ܐܵܢܝܼ ܝܵܘܢܵܬܹ̈ܐ ܟܠܲܝܗܝ ܕܦܠܸܛܠܗ݇ܘܿܢ ܡ̣ܢ ܠܩܸܢܲܝ̈ܗܝ. ܘܐܵܗܵܐ ܣܵܒ̣ܵܐ ܒܸܟ̣ܝܵܐ ܗ݇ܘܼܵܐ ܟܲܕ ܒܹܐܡܵܪܵܐ ܐܸܠܲܢ ܐܵܗܵܐ ܚܸܙܘܵܐ: ܒܹܐܡܵܪܵܐ ܗ݇ܘܼܵܐ: ܕܒܝܼܕܲܥܝܵܐ ܝ݇ܘܸܢ ܝܵܐ ܒܢܘܿܢ̈ܝܼ: ܕܪܕܘܼܦܝܵܐ ܓܘܼܪܵܐ ܗܕܝܼܪܵܐ ܝ݇ܠܹܗ ܕܡܲܩܸܡ ܣܵܛܵܢܵܐ ܥܲܠ ܥܹܕܬܵܐ. ܐܸܠܵܐ ܨܵܠܝܼܡܘܿܢ ܨܠܘܿܬܵܐ ܘܛܠܘܿܒܘܼܢ ܡ̣ܢ ܡܵܪܲܢ: ܕܡܲܥܒ̣ܸܪ ܠܟܲܪܒܵܐ ܕܬܲܢܝܼܢܵܐ ܗ̇ܘ ܠܝܼܛܵܐ ܡ̣ܢ ܛܵܝܸܦܹܗ.
ܘܡ̣ܢ ܒܵܬ݇ܪ ܚܲܕ݇ܟ̰ܵܐ ܥܕܵܢܵܐ: ܡܝܼܬܠܹܗ ܩܘܼܣܛܲܢܛܝܼܢܘܿܣ ܡܲܠܟܵܐ ܙܲܟܵܝܵܐ. ܘܗܘܼܟܸܡܠܹܗ ܒܪܘܿܢܹܗ ܒܵܬ݇ܪܹܗ: ܘܡܝܼܬܠܹܗ ܐܘܼܦ ܒܪܘܿܢܹܗ: ܘܗܘܼܟܸܡܠܹܗ ܒܵܬ݇ܪܹܗ ܩܘܼܣܛܘܿܣ ܐܲܚܘܿܢܹܗ ܩܵܐ ܚܲܕ݇ܟ̰ܵܐ ܥܕܵܢܵܐ: ܦܝܼܫܠܹܗ ܛܘܼܡܪܵܐ ܐܘܼܦ ܗ̇ܘ ܠܟܸܣ ܐܲܒ̣ܵܗ̈ܘܼܗܝ. ܘܡ̣ܢ ܒܵܬ݇ܪ ܗܵܕܵܐ ܗܘܼܟܸܡܠܹܗ ܝܘܿܠܝܵܢܘܿܣ ܟܵܦܘܿܪܵܐ ܘܠܝܼܛܵܐ: ܘܪܕܘܼܦܝܵܐ ܓܘܼܪܵܐ ܡܘܼܩܸܡܠܹܗ ܠܟܠܲܝܗܝ ܥܹܕܵܬܹ̈ܐ. ܡ̣ܢ ܕܐܵܗܵܐ ܟܠܲܝܗܝ ܩܸܡܠܹܗ ܝܘܿܒ̣ܝܵܢܘܿܣ ܡܗܘܼܡܢܵܐ: ܐܵܗܵܐ ܡܘܼܫܠܝܼܠܹܗ ܡ̣ܢ ܪܕܘܼܦܝܵܐ ܕܲܪܩܘܼܒ̣ܠ ܕܟܪܸ̈ܣܛܝܵܢܹܐ ܟܲܕ ܗܵܕܟ̣ܵܐ ܒܹܐܡܵܪܵܐ ܗ݇ܘܼܵܐ ܐܸܠܹܗ: ܕܩܲܕ݇ܡܵܝܬܵܐ ܘܵܓ̰ܸܒ ܝ݇ܠܵܗ̇ ܐܸܠܲܢ ܕܐܵܙܲܠ݇ܚ ܘܓ̣ܲܠܒܲܚ ܠܕܸܫ̰ܡܸܢܲܢ: ܘܒܵܬ݇ܪ ܗܵܕܵܐ ܟܠ ܡܸܢܕܝܼ ܕܒܲܣܡܵܐ ܠܘܼܟܼ ܥܵܒ̣ܕܸܬܿ. ܡܘܼܨܝܸܬܿܠܹܗ ܠܪܲܥܝܘܼܗܝ ܘܠܚܝܼܵܠܘܼܗܝ: ܘܫܩܸܠܹܗ ܐܵܣܟܵܪ̈ܘܼܗܝ ܘܐ݇ܙܸܠܹܗ ܠܒܹܝܬ ܦܵܪ̈ܣܵܝܹܐ. ܘܟܲܕ ܡܛܹܐܠܹܗ ܠܡܕܝܼܢ݇ܬܵܐ ܕܢܨܝܼܒ̣ܝܼܢ: ܐܲܦܸܣܩܘܿܦܵܐ ܘܐܵܢܝܼ ܕܥܲܡܹܗ ܥܲܡ ܐ݇ܢܵܫܹ̈ܐ ܐ݇ܚܹܪ̈݇ܢܹܐ: ܕܦܠܝܼܛܹ̈ܐ ܗ݇ܘܼܵܘ ܡ̣ܢ ܩܵܕ݇ܡ ܕܝܼܘܼܗܝ. ܘܝ݇ܬܝܼܒ̣ܹܐ ܗ݇ܘܼܵܘ ܓܵܘ ܚܕܵܐ ܓܸܦܝܼܬܵܐ. ܘܪܵܒܵܐ ܝܵܘܡܵܢܹ̈ܐ ܫܪܹܐܠܹܗ ܐܵܣܟܵܪܘܼܗܝ ܓܵܘ ܢܨܝܼܒ̣ܝܼܢ: ܘܐ݇ܙܸܠܹܗ ܡܗܲܝܡܢܵܐ ܝܘܿܒ̣ܝܵܢܘܿܣ: ܘܐ݇ܬܹܐܠܹܗ ܠܓܸܦܝܼܬܵܐ ܗ̇ܘ ܕܒܸܥܡܵܪܵܐ ܗ݇ܘܼܵܐ ܒܝܼـܹܗ ܡܵܪܝ ܐܵܘܓܹܝܢ. ܘܬܘܼܩܬܸܩܠܹܗ ܒܬܲܪܥܵܐ ܕܩܸܠܵܝܬܹܗ: ܘܥܒ̣ܸܪܹܗ ܠܟܸܣܠܹܗ. ܘܠܲܝܬ ܗ݇ܘܼܵܐ ܠܟܸܣ ܩܲܕܝܼܫܵܐ: ܫܒ̣ܘܿܩ ܡ̣ܢ ܬܪܹܝܢ ܡ̣ܢ ܬܲܠܡܝܼܕ̈ܘܼܗܝ: ܣܵܒܵܒ ܟܠܲܝܗܝ ܐܲܚܘܿܢܘܵܬܹ̈ܐ ܒܘܼܪ̈ܒܸܙܹܐ ܗ݇ܘܼܵܘ ܬܚܘܿܬ ܐܝܼܠܵܢܹ̈ܐ ܘܬܚܘܿܬ ܩܲܥܝܹ̈ܐ ܡܨܵܠܘܼܝܹܐ ܗ݇ܘܼܵܘ ܨܠܘܿܬܵܐ ܘܒܸܥܒ̣ܵܕܵܐ ܚܸܠܡܲܬ ܘܒܸܛܠܵܒܵܐ ܪ̈ܲܚܡܹܐ ܡ̣ܢ ܡܵܪܲܢ: ܕܒܵܛܸܠ ܠܚܲܝܠܹܗ ܕܟܵܦܘܿܪܵܐ ܡ̣ܢ ܥܹܕܬܹܗ ܩܲܕܝܼܫܬܵܐ. ܘܕܪܝܼܠܹܗ ܝܘܿܒ̣ܝܵܢܘܿܣ ܫܠܵܡܵܐ ܥܲܠ ܣܵܒ̣ܵܐ ܘܝ݇ܬܸܒ̣ܠܹܗ ܚܲܕ݇ܟ̰ܵܐ: ܦܘܼܪܦܸܠܹܗ ܒܣܵܒ̣ܵܐ ܕܦܵܠܸܛ ܡ̣ܢ ܟܘܼܠܘܼܚܬܹܗ: ܕܦܵܐܸܫ ܛܸܫܝܵܐ ܒܚܲܕ݇ ܡ̣ܢ ܕܘܼܟܵܢܹ̈ܐ ܡ̣ܢ ܩܵܕ݇ܡ ܟܵܦܘܿܪܵܐ. ܣܵܒܵܒ ܝܵܕܸܥ ܗ݇ܘܼܵܐ ܠܹܗ ܐܵܗܵܐ ܥܵܘܠܵܐ ܠܩܲܕܝܼܫܵܐ ܡܵܪܝ ܐܵܘܓܹܝܢ: ܘܫܸܡܥܝܵܐ ܗ݇ܘܼܵܐ ܒܘܼܬ ܥܵܓ̰ܝܼܒܘܼܝܵܬܹ̈ܐ ܕܥܒ̣ܸܕܠܹܗ ܡܵܪܲܢ ܒܐܝܼܕܵܬ̈ܘܼܗܝ. ܘܡ̣ܢ ܪܵܒܵܐ ܥܕܵܢܵܐ ܒܹܐܟ̣ܵܠܵܐ ܗ݇ܘܼܵܐ ܓܲܦܹ̈ܐ ܥܲܠ ܩܲܕܝܼܫܵܐ ܘܐܵܡܸܪ ܗ݇ܘܼܵܐ: ܕܐܝܼܡܵܢ ܕܡܵܛܸܢ ܠܬܵܡܵܐ: ܒܸܬ ܡܲܝܸܬ݇ܢܹܗ ܘܡܲܩܝܸܡܸܢ ܥܲܠܘܼܗܝ ܓ̰ܘܼܢܓ̰ܵܪܹ̈ܐ: ܘܡܲܩܒܸܠܸܢܹܗ ܡܸܢܕܝܼܵܢܹ̈ܐ ܚܸܪܒܵܐ: ܘܪܵܒܵܐ ܚܸܪܒܵܐ ܒܸܬ ܩܲܛܠܸܢܹܗ: ܕܚܵܙܸܢ ܐܸܢ ܒܸܬ ܐܵܬܹܐ ܡܫܝܼܚܵܐ ܕܦܵܪܸܩܠܹܗ ܡ̣ܢ ܐܝܼܕܵܬ̈ܝܼ ܣܵܒܵܒ ܫܡܸܥܠܹܗ ܕܪܵܒܵܐ ܡܬܲܠܡܘܼܕܹܐ ܗ݇ܘܼܵܐ ܐܵܗܵܐ ܠܟܪܸܣܛܝܵܢܘܼܬܵܐ: ܚܲܪܚܸܟ̃ ܗ݇ܘܼܵܐ ܠܗ݇ܘܿܢ ܟܵܟ̈ܘܼܗܝ ܥܲܠܹܗ. ܘܒܘܼܬ ܕܐܵܗܵܐ ܦܘܼܪܦܸܠܹܗ ܒܝܼـܹܗ ܝܘܿܒ̣ܝܵܢܘܿܣ. ܕܦܵܠܸܛ ܘܐܵܙܸܠ ܡ̣ܢ ܩܵܕ݇ܡܘܼܗܝ. ܐܝܼܢܵܐ ܐܵܗܵܐ ܐ݇ܡܸܪܹܗ ܐܸܠܹܗ: ܡܲܨܝܵܢܵܐ ܝ݇ܠܹܗ ܚܲܝܠܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܕܢܵܛܸܪܲܢ ܡ̣ܢ ܟܲܪܒܹܗ: ܠܲܐܟ̣ܵܐ ܘܓܵܘ ܒܹܝܦܲܠܓܵܐ ܕܡܲܫܪܝܼܬܹܗ. ܐܝܼܢܵܐ ܪ݇ܚܘܿܫ ܐܲܢ݇ܬܿ ܒܫܠܵܡܵܐ. ܘܠܵܐ ܙܲܕܥܸܬܿ ܡܸܢܹܗ ܕܒܸܬ ܡܲܒܨܸܪ ܡ̣ܢ ܐܝܼܩܵܪܘܼܟܼ: ܒܓ̰ܲܠܕܘܼܬܵܐ ܘܒܗܵܣܵܢܵܝܘܼܬܵܐ ܒܸܬ ܒܵܛܸܠ ܗܘܼܟܡܹܗ: ܘܦܵܝܫܵܐ ܬܘܼܣܠܸܡܬܵܐ ܡܲܠܟܘܼܬܹܗ ܒܐܝܼܕܵܬ̈ܘܼܟܼ. ܘܒܸܬ ܥܲܒ̣ܕܸܬܿ ܫܲܝܢܵܐ ܓܵܘ ܥܹܕܬܵܐ: ܒܚܲܝܠܹܗ ܕܨܠܝܼܒ̣ܵܐ ܗ̇ܘ ܕܒܝܼـܹܗ ܡܓܵܘܣܸܢܵܐ ܝ݇ܘܸܬܿ. ܐܵܗܵܐ ܟܵܦܘܿܪܵܐ ܡܘܼܒܨܸܪܹܗ ܠܝܘܿܒ̣ܝܵܢܘܿܣ ܡ̣ܢ ܐܝܼܩܵܪܹܗ: ܡܣܵܒܵܒ ܡܚܹܐܠܗ݇ܘܿܢ ܕܲܪܩܘܼܒ̣ܠܹܗ ܐ݇ܢܵܫܹ̈ܐ ܡ̣ܢ ܚܲܢܦܹ̈ܐ ܘܝܼܗܘܼܕܵܝܹ̈ܐ ܩܵܕ݇ܡܘܼܗܝ: ܐ݇ܡܸܪܘܿܢ ܐܸܠܹܗ: ܕܠܟܸܣ ܝܼܚܝܼܕܵܝܹ̈ܐ ܐ݇ܙܸܠܹܗ ܘܠܟܸܣ ܐܲܦܸܣܩܘܿܦܵܐ ܕܟܪܸ̈ܣܛܝܵܢܹܐ. ܘܐ݇ܙܸܠܹܗ ܠܚܕܵܐ ܓܸܦܝܼܬܵܐ: ܘܡܲܟܡܸܠ ܗ݇ܘܼܵܐ ܬܵܡܵܐ ܚܸܠܡܲܬ ܕܟܪܸ̈ܣܛܝܵܢܹܐ: ܘܒܸܣܓ̣ܵܕܵܐ ܗ݇ܘܼܵܐ ܠܨܠܝܼܒ̣ܵܐ. ܒܘܼܬ ܕܐܵܗܵܐ ܣܵܒܵܒ ܛܪܸܕܠܹܗ ܡ̣ܢ ܩܵܕ݇ܡܘܼܗܝ. ܘܒܵܬ݇ܪ ܕܐܵܗܵܐ ܒܡܲܥܒܕܵܢܘܼܬܵܐ ܕܫܵܦܵܩܲܬ ܐܲܠܵܗܵܝܬܵܐ: ܟܲܕ ܕܠܵܐ ܬܲܚܡܵܢܬܵܐ ܘܨܲܚܨܵܝܬܵܐ: ܕܸܥܪܹܗ ܘܡܘܼܟܠܹܐ ܠܹܗ ܥܲܠ ܦܸܠܚܵܢܹܗ: ܘܣܘܼܦܝܼܠܹܗ ܐܸܠܹܗ ܠܐܵܣܟܲܪ. ܘܗ̇ܘ ܐ݇ܙܸܠܹܗ ܠܡܕܝܼܢ݇ܬܵܐ ܕܦܵܪ̈ܣܵܝܹܐ: ܘܫܒ̣ܸܩܠܹܗ ܐܸܠܹܗ ܕܚܵܙܹܐܠܹܗ ܓܸܫܪܵܐ ܕܦܝܼܪܘܿܙ ܫܵܒ̣ܘܿܪ: ܕܐܵܙܸܠ ܘܥܵܒ̣ܸܪ ܠܢܲܗܪܵܐ ܕܕܸܩܠܲܬ. ܒܚܲܕ݇ ܡ̣ܢ ܝܵܘܡܵܢܹ̈ܐ ܐ݇ܬܹܐܠܹܗ ܝܘܿܒ̣ܝܵܢܘܿܣ ܡ̣ܢ ܦܝܼܪܘܼܙ ܫܵܒ̣ܘܿܪ ܠܟܸܣ ܩܲܕܝܼܫܵܐ ܥܲܡ ܒܢܲܝ̈ ܓܸܢܣܹܗ: ܟܲܕ ܦܫܝܼܡܵܐ ܘܒܸܥܒ̣ܵܕܵܐ ܬܵܙܝܼ: ܘܦܘܼܪܦܸܠܹܗ ܒܩܲܕܝܼܫܵܐ ܘܐ݇ܡܸܪܹܗ ܐܸܠܹܗ: ܕܨܵܠܝܼܡܘܿܢ ܨܠܘܿܬܵܐ ܝܵܐ ܒܵܒܲܢ ܒܘܼܬ ܥܵܠܡܵܐ ܘܛܠܘܿܒܘܿܢ ܡ̣ܢ ܡܵܪܲܢ ܕܫܵܡܸܛܠܹܗ ܠܪܹܫܹܗ ܕܥܵܘܠܵܐ. ܘܠܵܐ ܕܵܥܸܪ ܒܓ̣ܵܠܝܼܒܘܼܬܵܐ. ܣܵܒܵܒ ܪܵܒܵܐ ܒܹܐܟ̣ܵܠܵܐ ܝ݇ܠܹܗ ܓܲܦܹ̈ܐ ܥܲܠ ܥܹܕܬܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܐ݇ܡܸܪܹܗ ܐܸܠܹܗ: ܗ݇ܘܝܼ ܠܸܒܵܢܵܐ ܝܵܐ ܝܘܿܒ̣ܝܵܢܘܿܣ: ܡܣܵܒܵܒ ܕܩܘܼܪܒܵܐ ܝ݇ܠܹܗ ܡܵܘܬܹܗ ܕܥܵܘܠܵܐ: ܘܡ̣ܢ ܐܵܕܝܼܵܐ ܕܝܼܘܼܟܼ ܝ݇ܠܵܗ̇ ܓ̣ܵܠܝܼܒܘܼܬܵܐ ܘܡܲܠܟܘܼܬܵܐ.
ܗܵܐ ܒܐܵܢܝܼ ܝܵܘܡܵܢܹ̈ܐ ܦܝܼܫܠܹܗ ܫܘܼܕܪܵܐ ܡܸܢܹܗ ܕܟܵܦܘܿܪܵܐ ܝܘܿܠܝܵܢܘܿܣ ܚܲܕ݇ ܐܵܣܟܵܪܵܝܵܐ ܕܐܵܬܹܐ ܘܣܲܚܒܸܪ ܘܚܵܙܹܐ ܡܘܼܕܝܼ ܒܸܥܒ̣ܵܕܵܐ ܠܹܗ. ܗܵܝܓܵܗ ܦܝܼܫܠܹܗ ܡܘܼܟܠܝܼܵܐ ܡ̣ܢ ܚܲܝܠܵܐ ܕܨܠܘܿܬܵܐ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܡܣܵܒܵܒ ܩܵܐ ܪܵܒܵܐ ܝܵܘܡܵܢܹ̈ܐ ܒܪܝܼܟܵܐ ܗ݇ܘܼܵܐ ܣܵܒ̣ܵܐ: ܟܲܕ ܢܦܝܼܠܵܐ ܥܲܠ ܦܲܐܬܘܼܗܝ ܒܨܠܘܿܬܵܐ ܩܵܕ݇ܡ ܡܵܪܲܢ: ܠܵܐ ܐ݇ܟ̣ܝܼܠܵܐ ܘܠܵܐ ܫܸܬܝܵܐ ܘܠܵܐ ܕܡܝܼܟ̣ܵܐ ܘܠܵܐ ܫܸܠܝܵܐ ܡ̣ܢ ܒܵܥܘܼܬܵܐ. ܘܓ̰ܲܠܕܹܐ ܟܹܐ ܫܵܡܸܥ ܡܵܪܲܢ ܠܩܲܕܝܼܫ̈ܘܼܗܝ: ܘܥܒ̣ܸܕܠܹܗ ܫܩܲܠܬܵܐ ܕܬܘܼܥܠܲܝܗܝ ܒܓ̰ܲܠܕܘܼܬܵܐ. ܘܡ̣ܢ ܒܵܬ݇ܪ ܚܲܕ݇ܟ̰ܵܐ ܝܵܘܡܵܢܹ̈ܐ ܡܝܼܬܠܹܗ ܟܵܦܘܿܪܵܐ ܝܘܿܠܝܵܢܘܿܣ. ܣܵܒܵܒ ܦܝܼܫܠܹܗ ܫܘܼܕܪܵܐ ܚܲܕ݇ ܡ̣ܢ ܣܵܪ̈ܒܵܙܹܐ ܕܫܡܲܝܵܐ: [ܡܲܠܲܐܟ̣ܹ̈ܐ ܕܫܡܲܝܵܐ] ܕܥܸܨܠܹܗ ܣܟܝܼܢܬܵܐ ܒܕܸܦܢܹܗ ܘܩܛܸܠܹܗ. ܘܦܠܸܛܠܹܗ ܣܵܒ̣ܵܐ ܘܓ̰ܘܼܡܸܥܠܹܗ ܠܟܠܲܝܗܝ ܐܲܚܘܿܢܘܵܬܹ̈ܐ: ܟܲܕ ܦܨܝܼܚܵܐ ܘܒܸܚܕܵܝܵܐ ܘܡܫܵܒܘܼܚܹܐ ܠܐܲܠܵܗܵܐ ܘܡܲܫܚܘܼܕܹܐ ܐܸܠܲܝܗܝ ܘܒܹܐܡܵܪܵܐ: ܕܚܕܝܼܡܘܿܢ ܒܢܘܿܢ̈ܝܼ ܘܫܲܒܚܘܿܢ ܠܡܵܪܲܢ: ܕܫܩܸܠܹܗ ܠܗ̇ܘ ܟܵܦܘܿܪܵܐ ܡ̣ܢ ܒܹܝܦܲܠܓܵܐ: ܘܝܘܼܗ݇ܒ̣ܸܠܹܗ ܐܸܕܝܘܿܡ݇ ܝܵܘܡܵܐ ܠܥܹܕܬܹܗ ܩܲܕܝܼܫܬܵܐ ܫܲܝܢܵܐ ܘܫܠܵܡܵܐ. ܘܦܝܼܫܠܗ݇ܘܿܢ ܥܘܼܓ̰ܒܹ̈ܐ ܟܠܲܝܗܝ ܐܲܚܘܿܢܘܵܬܹ̈ܐ ܘܫܘܼܒܸܚܠܗ݇ܘܿܢ ܠܡܵܪܲܢ: ܘܫܘܼܕܸܪܘܿܢ ܘܡܘܼܕܸܥܠܗ݇ܘܿܢ ܓܵܘ ܡܕܝܼܢ݇ܬܵܐ: ܕܡܝܼܬܠܹܗ ܟܵܦܘܿܪܵܐ. ܣܵܒܵܒ ܒܝܼܕܲܥܝܵܐ ܗ݇ܘܼܵܘ ܟܠܲܝܗܝ ܐܲܚܘܿܢܘܵܬܹ̈ܐ: ܕܒܓܸܠܝܵܢܵܐ ܕܪܘܼܚܵܐ ܩܲܕܝܼܫܵܐ ܡܘܼܕܸܥܝܵܝܠܹܗ ܣܵܒ̣ܵܐ ܠܐܲܢܹ̈ܐ. ܘܡ̣ܢ ܒܵܬ݇ܪ ܗܵܕܵܐ ܨܘܼܚܨܝܼܠܗ݇ܘܿܢ ܬܲܠܡܝܼܕܹ̈ܐ: ܘܡܘܼܫ݇ܟ̰ܸܚܠܗ݇ܘܿܢ ܕܒܗ̇ܝ ܥܕܵܢܵܐ ܕܐ݇ܡܸܪܹܗ ܐܸܠܲܝܗܝ ܣܵܒ̣ܵܐ: ܡܝܼܬܠܹܗ ܗ̇ܘ ܟܵܦܘܿܪܵܐ. ܘܡ̣ܢ ܕܩܘܼܒܸܠܹܗ ܝܘܿܒ̣ܝܵܢܘܿܣ ܡܲܠܟܘܼܬܵܐ: ܡܘܼܕܸܥܠܹܗ ܠܫܵܒ̣ܘܿܪ ܡܲܠܟܵܐ ܒܘܼܬ ܨܦܵܝܘܼܬܵܐ ܕܩܲܕܝܼܫܵܐ. ܐܝܼܢܵܐ ܐܵܗܵܐ ܫܵܒ̣ܘܿܪ ܪܵܒܵܐ ܚܕܹܐܠܹܗ ܘܐ݇ܡܸܪܹܗ: ܕܟܡܵܐ ܕܒܸܚܙܵܝܵܐ ܝ݇ܘܸܢ ܐܸܠܹܗ ܪܵܒܵܐ ܒܘܼܫ ܦܝܵܫܵܐ ܠܹܗ ܡܝܘܼܩܪܵܐ ܡܸܢܝܼ.
ܗܲܪ ܒܗ̇ܝ ܥܕܵܢܵܐ ܥܪܸܩܠܹܗ ܡܵܐܢܝܼ ܚܲܪܵܫܵܐ ܠܓܹܒܵܐ ܕܡܲܥܪ̱ܒ̣ܵܐ: ܘܐ݇ܙܸܠܹܗ ܕܡܲܕܸܥ ܬܵܡܵܐ ܠܕܘܼܓܠܹܗ. ܘܐ݇ܡܸܪܹܗ ܐܸܠܲܢ ܣܵܒ̣ܵܐ ܡܵܪܝ ܐܵܘܓܹܝܢ: ܕܢܝܼܫܲܢܩܵܐ ܕܣܵܛܵܢܵܐ ܕܟܠܹܐܠܹܗ ܕܲܪܩܘܼܒ̣ܠܝܼ ܒܐܵܗܵܐ ܠܲܝܠܹܐ ܘܐ݇ܡܸܪܹܗ ܐܸܠܝܼ: ܕܗܵܐ ܡܵܐܢܝܼ ܦܵܠܵܚܵܐ ܕܝܼܝܼ ܥܒ̣ܸܪܹܗ ܠܦܢܝܼܬܵܐ ܕܪ̈ܗܘܿܡܵܝܹܐ: ܕܙܲܪܸܥ ܬܵܡܵܐ ܝܘܼܠܦܵܢܝܼ ܘܒܸܚܕܵܝܵܐ ܝ݇ܘܸܢ. ܘܐܵܢܵܐ ܐ݇ܡܸܪܝܼ ܐܸܠܹܗ: ܕܗ̇ܘ ܕܛܘܼܠܸܩܠܹܗ ܠܣܝܼܡܘܿܢ ܚܲܪܵܫܵܐ: ܗܲܪ ܗ̇ܘ ܒܸܬ ܛܵܠܸܩܠܹܗ ܬܵܡܵܐ: ܘܥܵܒ̣ܸܕܠܹܗ ܡܲܣܚܵܪܵܐ ܐܲܝܟܼ ܕܥܒ̣ܸܕܠܹܗ ܠܣܝܼܡܘܿܢ. ܬܪܹܝܢ ܒܢܘܿܢܹ̈ܐ ܕܫܵܒ̣ܘܿܪ ܡܪܸܥܠܗ݇ܘܿܢ: ܚܲܕ݇ ܡܸܢܲܝܗܝ ܟ̰ܲܪܟ̰ܘܼܪܹܐ ܗ݇ܘܼܵܐ ܡ̣ܢ ܫܹܐܕܵܐ. ܘܗ̇ܘ ܐ݇ܚܹܪ݇ܢܵܐ ܟܠܲܝܗܝ ܗܲܕܵܡ̈ܘܼܗܝ ܒܪ̈ܝܼܙܹܐ ܗ݇ܘܼܵܘ. ܐܝܼܢܵܐ ܡܵܐܢܝܼ ܫܩܝܼܠܵܝ ܗ݇ܘܼܵܐ ܠܬܸܪ̈ܘܲܝ ܒܢܘܿܢ̈ܘܼܗܝ: ܕܒܵܣܸܡ ܗ݇ܘܼܵܐ ܠܗ݇ܘܿܢ. ܘܟܲܕ ܩܘܼܪܒܸܢܹܗ ܩܲܕ݇ܡܵܝܬܵܐ ܠܟܸܣ ܗ̇ܘ ܓܘܼܪܵܐ ܕܒܪ̈ܝܼܙܹܐ ܗ݇ܘܼܵܘ ܗܲܕܵܡ̈ܘܼܗܝ: ܘܦܠܸܚܠܹܗ ܒܝܼـܹܗ ܒܚܲܪ̈ܫܹܐ ܐܲܝܟܼ ܬܪܹܝܢ ܝܵܘܡܵܢܹ̈ܐ: ܗܲܪ ܒܗ̇ܝ ܥܕܵܢܵܐ ܡܝܼܬܠܹܗ ܝܵܠܵܕ݇ܐ: ܐܝܼܢܵܐ ܡܵܐܢܝܼ ܥܪܸܩܠܹܗ ܠܡܲܥܪ̱ܒ̣ܵܐ ܥܲܡ ܐܲܕܲܝ ܬܲܠܡܝܼܕܹܗ. ܘܫܡܸܥܠܹܗ ܒܘܼܬ ܕܝܼـܹܗ ܫܵܒ̣ܘܿܪ ܡܲܠܟܵܐ: ܘܫܘܼܕܸܪܹܗ ܘܡܘܼܕܒ̣ܸܩܠܹܗ ܘܡܘܼܬ݇ܝܼܠܹܗ ܠܡܕܝܼܢ݇ܬܵܐ ܕܒܹܝܬ ܠܵܦܵܛ: ܘܐ݇ܣܸܪܹܗ ܓܵܘ ܒܹܝܬ ܐܲܣܝܼܪܹ̈ܐ. ܐܝܼܢܵܐ ܐܵܗܵܐ ܚܲܪܵܫܵܐ ܥܒ̣ܸܕܠܹܗ ܚܲܕ݇ ܢܝܼܫܲܢܩܵܐ ܕܣܸܪ ܥܲܡ ܬܲܠܡܝܼܕ̈ܘܼܗܝ: ܕܒܸܬ ܪܲܦܝܼܠܵܗ̇ ܓܵܢܹܗ ܡ̣ܢ ܫܘܼܪܵܐ ܘܒܸܬ ܥܵܪܸܩ. ܘܐܲܢܹ̈ܐ ܥܒ̣ܸܕܠܗ݇ܘܿܢ ܩܵܘܠܵܐ ܠܡܲܚܠܸܛܵܢܵܐ ܘܕܵܓܵܠܵܐ ܘܐ݇ܡܸܪܘܿܢ ܐܸܠܹܗ: ܕܦܸܠܵܢ ܕܘܼܟܬܵܐ ܒܸܬ ܪܲܦܵܚܠܗ݇ܘܿܢ ܩܵܬܘܼܟܼ ܠܓ̰ܘܼ̈ܠܘܼܟܼ: ܘܐܵܙܸܠ݇ܬܿ ܥܲܠܲܝܗܝ. ܘܟܲܕ ܐ݇ܬܹܐܠܹܗ ܒܠܲܝܠܹܐ ܒܡܲܠܝܵܙܬܵܐ: ܘܓܘܼܫܸܩܠܹܗ ܕܚܵܙܹܐ ܐܸܢ ܥܒ̣ܸܕܠܗ݇ܘܿܢ ܬܲܠܡܝܼܕ̈ܘܼܗܝ ܕܵܐܟ̣ܝܼ ܕܐ݇ܡܸܪܘܿܢ ܐܸܠܹܗ: ܘܗܵܐ ܕܲܣܬܵܐ ܕܟܲܠܒܹ̈ܐ ܦܝܼܫܠܵܗ̇ ܗܕܝܼܪܬܵܐ ܬܵܡܵܐ ܡ̣ܢ ܡܲܥܒܕܵܢܘܼܬܵܐ ܐܲܠܵܗܵܝܬܵܐ. ܛܠܸܩܠܵܗܿ ܚܙܵܝܬܹܗ ܡ̣ܢ ܚܲܝܠܵܐ ܐܲܠܵܗܵܝܵܐ: ܕܠܵܐ ܝܵܕܸܥ ܕܐܸܢ ܟܲܠܒܹ̈ܐ ܝ݇ܢܵܐ ܝܲܢ ܓ̰ܘܼܠܹ̈ܐ: ܕܗܵܘܹܐ ܡܲܣܚܵܪܵܐ ܐܲܝܟܼ ܪܵܒܝܼـܹܗ ܣܝܼܡܘܿܢ ܕܗ݇ܘܹܐܠܹܗ ܡܲܣܚܵܪܵܐ: ܐܲܝܟܼ ܗܲܡܙܲܡܬܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ. ܣܵܒܵܒ ܚܫܸܒ̣ܠܹܗ ܡܵܐܢܝܼ: ܕܓ̰ܘܼܠܹ̈ܐ ܝ݇ܢܵܐ. ܘܪܘܼܦܝܼܠܹܗ ܓܵܢܹܗ ܡ̣ܢ ܫܘܼܪܵܐ. ܘܢܦܸܠܹܗ ܥܲܠܲܝܗܝ. ܘܦܝܼܫܠܗ݇ܘܿܢ ܫܥܝܼܫܹ̈ܐ ܐܵܢܝܼ ܟܲܠܒܹ̈ܐ ܘܨܦܸܚܠܗ݇ܘܿܢ ܐܸܠܹܗ: ܘܦܘܼܬܦܸܬܠܗ݇ܘܿܢ ܠܟܠܹܗ ܒܸܣܪܹܗ. ܡܣܵܒܵܒ ܐܲܝܟܼ ܕܥܵܕܲܬ ܕܐܝܼܬ ܗ݇ܘܼܵܐ ܠܗ݇ܘܿܢ: ܕܟܹܐ ܪܲܦܝܼ ܗ݇ܘܼܵܘ ܠܗ݇ܘܿܢ ܫܠܲܕܹ̈ܐ. ܘܠܩܵܝܕܲܡܬܵܐ ܕܝܵܘܡܵܐ ܐ݇ܬܹܐܠܗ݇ܘܿܢ ܘܡܘܼܫ݇ܟ̰ܸܚܠܗ݇ܘܿܢ ܟܲܕ ܪܘܼܦܝܵܐ ܘܦܘܼܬܦܸܬܵܐ ܒܟܲܠܒܹ̈ܐ: ܘܦܘܼܩܸܕܠܹܗ ܫܵܒ̣ܘܿܪ ܕܢܲܫܛܝܼܠܹܗ ܓܸܠܕܹܗ: ܘܕܵܪ̈ܝܼ ܓܵܘܹܗ ܬܸܒ̣ܢܵܐ: ܘܬܵܠܹܐܠܹܗ ܥܲܠ ܫܘܼܪܵܐ: ܘܗܵܘܹܐ ܡܲܣܚܵܪܵܐ ܠܟܠܲܝܗܝ ܬܲܠܡܝܼܕ̈ܘܼܗܝ. ܐܲܢܹ̈ܐ ܝ݇ܢܵܐ ܕܩܘܼܘܸܡܠܗ݇ܘܿܢ ܠܗ̇ܘ ܚܲܪܵܫܵܐ: ܡ̣ܢ ܠܘܼܛܝܼܬܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ. ܐܲܝܢܝܼ ܕܗܵܘܹܐ ܗ݇ܘܼܵܐ ܗ̇ܘ ܕܠܵܝܸܛ ܗ݇ܘܼܵܐ ܠܹܗ ܐܵܗܵܐ ܩܲܕܝܼܫܵܐ: ܘܠܵܐ ܗܲܪ ܒܗ̇ܝ ܣܵܥܲܬ ܡܩܵܒܸܠ ܗ݇ܘܼܵܐ ܬܲܡܒܵܐ؟ ܝܲܢ ܡܵܢܝܼ ܗ݇ܘܼܵܐ ܕܗ݇ܘܹܐܠܹܗ ܡܸܪܥܝܵܐ ܕܡܨܵܠܹܐ ܗ݇ܘܼܵܐ ܨܠܘܿܬܵܐ ܒܘܼܬ ܕܝܼـܹܗ: ܘܠܵܐ ܗܲܪ ܒܗ̇ܝ ܥܕܵܢܵܐ ܡܩܵܒܸܠ ܗ݇ܘܼܵܐ ܒܵܣܲܡܬܵܐ؟ ܝܲܢ ܡܵܢܝܼ ܝ݇ܠܹܗ ܕܡܘܼܠܝܸܨܵܐ ܗ݇ܘܼܵܐ ܕܛܠܸܒܠܹܗ ܡ̣ܢ ܡܵܪܹܗ ܒܘܼܬ ܕܝܼـܹܗ: ܘܠܵܐ ܗܲܪ ܒܗ̇ܝ ܥܕܵܢܵܐ ܡܲܢܝܸܚ ܗ݇ܘܼܵܐ ܠܹܗ؟ ܣܵܒܵܒ ܠܹܐ ܗ݇ܘܼܵܐ ܡܨܵܝܵܐ ܠܸܫܵܢܝܼ ܙܲܒܘܼܢ: ܘܐܘܼܦ ܠܵܐ ܚܝܼܵܠܝܼ ܘܦܲܪܡܵܝܬܝܼ ܙܲܒܘܼܢ ܒܸܡܨܵܝܵܐ ܗ݇ܘܼܵܐ: ܘܠܹܐ ܗ݇ܘܼܵܐ ܙܹܐ ܡܵܨܝܵܐ ܩܵܠܵܡܝܼ ܒܘܼܪܵܐ ܕܗܲܡܙܲܡܬܝܼ: ܕܓܵܪܸܫ ܒܒܲܕܝܘܼܬܵܐ ܥܲܠ ܘܵܪܵܩܵܐ ܕܨܲܠܡܵܐ ܚܩܝܼܪܵܐ ܘܥܲܓ̰ܒܵܢܵܐ ܕܓ̣ܵܠܝܼܒܘܼܝܵܬܹ̈ܐ ܕܩܲܕܝܼܫܵܐ ܡܵܪܝ ܐܵܘܓܹܝܢ.
ܘܡ̣ܢ ܒܵܬ݇ܪ ܕܐܵܗܵܐ: ܐ݇ܙܸܠܹܗ ܫܵܒ̣ܘܿܪ ܘܐܵܣܟܵܪܘܼܗܝ ܠܡܕܝܼܢ݇ܬܵܐ ܕܢܨܝܼܒ̣ܝܼܢ: ܘܦܝܼܫܠܵܗ̇ ܬܘܼܣܠܸܡܬܵܐ ܐܸܠܹܗ ܡܕܝܼܢ݇ܬܵܐ ܕܠܵܐ ܦܠܵܫܵܐ ܐܸܠܵܐ ܒܫܠܵܡܵܐ: ܐܘܼܦ ܦܝܼܫܠܹܗ ܣܦܝܼܩܵܐ ܡܸܢܘܼܗ̇ ܟܠܹܗ ܚܲܝܠܵܐ ܕܪ̈ܗܘܿܡܵܝܹܐ: ܗܲܪ ܒܐܵܗܵܐ ܥܕܵܢܵܐ ܕܟ̣ܸܪܹܗ ܫܵܒ̣ܘܿܪ ܠܩܲܕܝܼܫܵܐ ܡܵܪܝ ܐܵܘܓܹܝܢ: ܕܵܐܟ̣ܝܼ ܕܐ݇ܡܸܪ ܗ݇ܘܼܵܐ ܠܹܗ ܝܘܿܒ̣ܝܵܢܘܿܣ ܘܐܘܼܦ ܐܵܢܝܼ ܚܲܡܫܸܡܵܐܐ ܐ݇ܢܵܫܹ̈ܐ ܐܵܢܝܼ ܕܦܝܼܫܠܗ݇ܘܿܢ ܕܒ̣ܝܼܩܹ̈ܐ ܓܵܘ ܚܸܫܟܵܢܘܼܬܵܐ. ܗܵܝܓܵܗ ܛܠܸܒܠܹܗ ܡ̣ܢ ܓܘܼܪ̈ܵܢܘܼܗܝ ܐ݇ܢܵܫܹ̈ܐ ܟܪܸ̈ܣܛܝܵܢܹܐ ܡ̣ܢ ܗܘܼܙܵܝܹ̈ܐ ܕܐܝܼܬ ܗ݇ܘܼܵܐ ܓܵܘ ܡܲܫܪܝܼܬܵܐ: ܘܫܘܼܕܪܵܝܠܹܗ ܠܟܸܣ ܩܲܕܝܼܫܵܐ ܒܚܵܦܘܼܛܘܼܬܵܐ: ܕܛܲܠܒܝܼ ܡܸܢܹܗ ܕܐܵܬܹܐ ܠܟܸܣܠܹܗ. ܘܦܘܼܩܕܵܝܠܹܗ: ܕܒܐܝܼܩܵܪܵܐ ܡܲܝܬ݇ܝܼܠܹܗ ܠܩܲܕܝܼܫܵܐ. ܐܲܢܹ̈ܐ ܐ݇ܙܸܠܗ݇ܘܿܢ ܘܛܠܸܒܠܗ݇ܘܿܢ ܡܸܢܹܗ ܐܲܝܟܼ ܗܲܡܙܲܡܬܹܗ ܕܡܲܠܟܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܗܲܪ ܒܗ̇ܝ ܥܕܵܢܵܐ ܐ݇ܬܹܐܠܹܗ: ܗ̇ܘ ܘܡ̣ܢ ܣܵܒ̣ܹ̈ܐ ܝ݇ܕܸܥܝܹ̈ܐ ܕܐܝܼܬ ܗ݇ܘܼܵܘ ܓܵܘ ܥܘܼܡܪܵܐ. ܘܫܘܼܕܸܪܹܗ ܬܠܵܬ݇ܐ ܐܲܚܘܿܢܘܵܬܹ̈ܐ ܡܼܢ ܩܵܕ݇ܡ ܕܝܼܘܼܗܝ ܘܐ݇ܡܸܪܹܗ: ܪ̈݇ܚܘܿܫܘܿܢ ܒܓ̰ܲܠܕܘܼܬܵܐ ܠܬܲܪܥܵܐ ܕܡܲܠܟܘܼܬܵܐ: ܕܥܒ̣ܘܼܕ ܒܵܘܲܪ ܡܲܠܝܸܙܵܢܵܐ ܝ݇ܠܹܗ ܦܘܼܩܕܵܢܵܐ ܕܡܲܠܟܵܐ. ܡܣܵܒܵܒ ܕܐܵܗܵܐ ܠܹܐ ܡܵܨܹܐ ܗ݇ܘܼܵܐ ܕܐܵܙܸܠ ܗ݇ܘܼܵܐ ܒܓ̰ܲܠܕܘܼܬܵܐ: ܐܘܼܦ ܠܵܐ ܒܣܵܡܵܐ ܗ݇ܘܼܵܐ ܕܝܵܬܸܒ̣ ܗ݇ܘܼܵܐ ܠܗܲܝܘܵܢ. ܘܒܘܼܬ ܚܵܬܸܪ ܕܐܝܼܩܵܪܵܐ ܕܡܲܠܟܵܐ: ܫܘܼܕܸܪܹܗ ܩܵܕ݇ܡ ܕܝܼܘܼܗܝ ܠܐܵܢܝܼ ܐܲܚܘܿܢܘܵܬܹ̈ܐ: ܕܓ̰ܵܘܘܸܒܝܼܠܹܗ ܟܠ ܡܸܢܕܝܼ ܕܦܵܝܫܝܼ ܒܘܼܩܪܹܐ: ܗܲܠ ܗ̇ܘ ܡܵܛܹܐ ܗ݇ܘܼܵܐ. ܐܝܼܢܵܐ ܐܲܢܹ̈ܐ ܐ݇ܙܸܠܗ݇ܘܿܢ ܒܚܵܦܘܼܛܘܼܬܵܐ: ܘܡܛܹܐܠܗ݇ܘܿܢ ܠܬܲܪܥܵܐ ܕܡܲܠܟܵܐ: ܘܥܒ̣ܸܪܘܿܢ ܪܹ̈ܓܵܘܵܬܘܼܗܝ ܘܡܘܼܕܸܥܠܗ݇ܘܿܢ ܩܸܣܲܬ ܕܩܲܕܝܼܫܹ̈ܐ: ܘܦܘܼܩܸܕܠܹܗ ܕܥܵܒ̣ܪܝܼ. ܥܒ̣ܸܪܘܿܢ ܩܵܕ݇ܡ ܡܲܠܟܵܐ ܘܣܓ̣ܸܕܠܗ݇ܘܿܢ: ܘܒܘܼܩܸܪܘܿܢ ܒܫܠܵܡܵܐ ܕܡܲܠܟܘܼܬܹܗ. ܐܝܼܢܵܐ ܡܲܠܟܵܐ ܪܵܒܵܐ ܡܝܘܼܩܪܵܝܠܹܗ: ܘܒܘܼܩܪܵܝܠܹܗ ܒܘܼܬ ܗ̇ܝ ܕܘܼܟܬܵܐ ܕܒܝܼܵܗ̇ ܒܸܚܵܝܵܐ ܝ݇ܢܵܐ ܐܲܝܟܵܐ ܝ݇ܠܵܗ̇. ܘܩܲܕܝܼܫܹ̈ܐ ܡܘܼܕܸܥܠܗ݇ܘܿܢ ܒܘܼܬ ܥܲܣܩܘܼܬܵܗ̇ ܕܕܘܼܟܬܵܐ: ܕܐܘܼܦ ܡܝܼ̈ܵܐ ܠܲܝܬ ܗ݇ܘܼܵܐ ܠܗ݇ܘܿܢ: ܐܝܼܢܵܐ ܡܼܢ ܡܝܼ̈ܵܐ ܕܡܸܛܪܵܐ ܕܟܹܐ ܫܵܬܝܼ ܗ݇ܘܼܵܘ: ܒܥܕܵܢܵܐ ܕܫܘܼܪܹܐܠܹܗ ܕܒܵܩܸܪ ܗ݇ܘܼܵܐ ܠܗ݇ܘܿܢ ܒܘܼܬ ܝܘܼܠܦܵܢܲܝܗܝ ܕܡܘܼܕܝܼ ܝ݇ܠܹܗ: ܥܒ̣ܸܪܘܿܢ ܩܵܕ݇ܡܘܼܗܝ ܪܵܒܵܐ ܡܓ̣ܘܼܫܵܝܹ̈ܐ: ܕܒܲܠܒܸܠܝܼ ܗ݇ܘܼܵܘ ܝܘܼܠܦܵܢܵܐ ܕܩܲܕܝܼܫܹ̈ܐ. ܗܵܝܓܵܗ ܩܲܕܝܼܫܹ̈ܐ ܐ݇ܡܸܪܘܿܢ ܠܡܲܠܟܵܐ: ܕܐܝܼܬ ܥܲܡܲܢ ܒܵܒܵܐ ܪܘܼܚܵܢܵܝܵܐ: ܘܗܵܐ ܒܸܬ ܐܵܬܹܐ ܠܫܠܵܡܵܐ ܕܡܲܠܟܘܼܬܵܘܟ̣ܘܿܢ: ܕܗ̇ܘ ܝܼܠܹܗ ܪܹܫܵܐ ܕܟܠܲܢ. ܟܠ ܡܸܢܕܝܼ ܕܒܵܥܹܝܬܿ ܐܲܢ݇ܬܿ: ܒܵܩܸܪܹܗ.
ܘܟܲܕ ܐ݇ܬܹܐܠܹܗ ܩܲܕܝܼܫܵܐ ܘܥܒ̣ܸܪܹܗ ܩܵܕ݇ܡ ܡܲܠܟܵܐ: ܘܚܙܹܐܠܹܗ ܫܵܒ̣ܘܿܪ ܙܕܸܥܠܹܗ ܡ̣ܢ ܚܙܵܝܬܹܗ ܕܦܲܐܬܹܗ ܘܪܵܒܵܐ ܦܝܼܫܠܹܗ ܡܝܘܼܩܪܵܐ ܥܲܠܘܼܗܝ. ܘܒܗ̇ܝ ܥܕܵܢܵܐ ܩܘܼܪܒܸܢܘܿܢ ܡܵܘܗܦܵܛܹ̈ܐ ܘܡܓ̣ܘܼܫܵܝܹ̈ܐ: ܘܕܪܹܐܠܗ݇ܘܿܢ ܫܠܵܡܵܐ ܥܲܠ ܩܲܕܝܼܫܵܐ: ܡܣܵܒܵܒ ܕܚܙܹܐܠܗ݇ܘܿܢ ܕܪܵܒܵܐ ܡܝܘܼܩܸܪܹܗ ܡܲܠܟܵܐ: ܦܝܼܫܠܗ݇ܘܿܢ ܡܸܚܝܹ̈ܐ ܒܓܹܐܪܹ̈ܐ ܕܒܲܚܸܠܵܢܘܼܬܵܐ: ܕܚܫܸܒ̣ܠܗ݇ܘܿܢ ܕܒܐܘܼܡܵܢܘܼܬܵܐ ܕܗܹܡܸܙܡܵܢܹ̈ܐ ܒܸܬ ܒܲܛܠܝܼ ܠܝܘܼܠܦܵܢܵܐ ܕܟܪܸ̈ܣܛܝܵܢܹܐ. ܗܵܝܓܵܗ ܫܘܼܪܹܐܠܗ݇ܘܿܢ ܕܒܲܠܒܸܠܝܼ ܝܘܼܠܦܵܢܵܐ ܥܲܡܹܗ ܕܣܵܒ̣ܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܪܫܸܡܠܹܗ ܨܠܝܼܒ̣ܵܐ ܥܲܠ ܦܘܼܡܹܗ: ܕܡܲܟܪܸܙ ܗ݇ܘܼܵܐ ܒܘܼܬ ܬܠܵܬ݇ܐ ܫܸܡܵܢܹ̈ܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܩܲܕܝܼܫܵܐ
(ܘܫܘܼܪܹܐܠܹܗ ܒܸܕܪܵܫܵܐ ܥܲܡ ܕܚܲܢܦܹ̈ܐ ܣܵܓ̣ܕܵܢܹ̈ܐ ܕܥܲܠ ܢܘܼܪܵܐ ܘܠܒܲܗܪܹ̈ܐ: ܒܢܘܿܢܹ̈ܐ ܕܚܲܪ̈ܵܫܹܐ: ܘܒܓܲܢ݇ܒܵܪܘܼܬܵܐ ܘܚܲܝܠܬܵܢܘܼܬܵܐ ܒܝܼܲܕ ܚܲܝܠܵܐ ܕܪܘܼܚܵܐ ܕܩܘܼܕܫܵܐ. ܘܟܲܕ ܥܒ̣ܸܕܠܗ݇ܘܿܢ ܢܫܵܪܬܵܐ ܥܲܠ ܩܲܕܝܼܫܵܐ ܒܟܠܲܝܗܝ ܠܲܦܹ̈ܐ ܕܚܲܢܦܘܼܬܵܐ: ܘܟܠܵܗ̇ ܕܘܼܓܠܵܐ ܕܟܲܠܕܵܝܘܼܬܵܐ [ܗ̄:ܕ̄. ܚܸܪ̈ܫܹܐ ܘܦܬܲܚܬܵܐ ܕܦܵܥܠ] ܘܟܠܵܗ̇ ܟܝܼܒ̣ܘܼܬܵܐ ܕܝܼܗܘܼܕܵܝܘܼܬܵܐ: ܒܕܵܡܲܝܬܵܐ ܕܢܘܼܪܵܐ ܡܲܩܕܵܢܵܐ. ܨܠܝܼܒ̣ܵܐ ܕܠܒ̣ܝܼܫܵܐ ܗ݇ܘܼܵܐ ܘܟ̰ܘܼܟܒܸܢܵܐ ܗ݇ܘܼܵܐ ܒܝܼـܹܗ ܘܒܣܓ̣ܵܕܬܹܗ ܐܲܠܵܗܵܝܬܵܐ ܩܲܕܝܼܫܬܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. ܘܒܐ݇ܟ̣ܵܠܬܵܐ ܕܚܲܡ ܕܐܲܠܵܗܵܐ ܥܲܠ ܪܹܫܹܗ ܪܲܦܪܘܼܦܹܐ ܗ݇ܘܼܵܐ ܒܕܵܡܲܝܬܵܐ ܕܠܵܘܓ̰ܹ̈ܐ ܕܫܸܡܫܵܐ ܠܐܵܗܵܐ ܓܹܒܵܐ ܘܠܐܵܗܵܐ ܓܹܒܵܐ. ܡܵܣܡܘܼܝܹܐ ܗ݇ܘܼܵܐ ܠܥܲܝܢ̈ܵܬܲܝܗܝ ܒܚܸܠܛܘܼܢܝܹ̈ܐ ܘܕܘܼܓܠܹ̈ܐ ܕܫܹܐܕܹ̈ܐ: ܟ̰ܵܝܒܘܼ ܠܣܬܘܿܢܵܐ ܕܢܘܼܗܪܵܐ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܩܲܡ ܚܲܪܕܝܼܠܹܗ ܓܲܪ̈ܕܵܒܘܼܠܹܐ ܕܚܸܫܟܵܢܘܼܬܵܐ ܕܒܢܘܿܢܹ̈ܐ ܕܐܵܬܘܿܪ: ܘܠܵܐ ܡܨܹܐܠܗ݇ܘܿܢ ܠܡܒܵܛܘܼܠܹܐ ܠܟܵܘܟ̣ܒ̣ܵܐ ܒܲܗܪܵܢܵܐ ܕܓܠܘܼܠܘܼܬܵܐ ܕܗܲܝܡܵܢܘܼܬܹܗ: ܟ̰ܵܝܒܘܼ ܠܚܸܩܪܵܐ ܪܘܼܚܵܢܵܝܵܐ ܘܒܵܒܵܐ ܕܒܢܘܿܢܹ̈ܐ ܪ̈ܘܼܚܵܢܵܝܹܐ ܬܲܠܡܝܼܕܹܗ ܕܡܫܝܼܚܵܐ: ܕܨܦܸܚܠܗ݇ܘܿܢ ܥܲܠܘܼܗܝ ܠܲܦܹ̈ܐ ܕܚܲܢܦܘܼܬܵܐ ܕܒܢܲܝ̈ ܦܵܪܸܣ: ܘܠܵܐ ܚܘܼܙܕܸܓܠܵܐ ܓܵܡܝܼ ܕܝܼـܹܗ ܡ̣ܢ ܠܲܦܹ̈ܐ ܩܸܫܝܹ̈ܐ ܕܒܢܘܿܢܹ̈ܐ ܕܐܵܬܘܿܪ ܘܕܢܸܡܪܘܿܕ: ܟ̰ܵܝܒܘܼ ܠܛܵܪܝܵܢܵܐ ܕܓܵܡܝܼ ܚܲܟܝܼܡܵܐ: ܕܢܦܸܠܵܗ̇ ܓܵܡܝܼ ܕܝܼـܹܗ ܒܲܝܢܵܬ ܓܵܙܲܪ̈ܝܵܬܹܐ ܥܲܣܩܹ̈ܐ ܕܦܵܪܸܣ: ܘܒܝܼܲܕ ܟ̰ܲܕܪܵܐ ܕܓܵܡܝܼ ܥܲܓ̰ܒܵܢܵܐ ܕܗܲܝܡܵܢܘܼܬܹܗ ܦܘܼܠܛܵܠܹܗ ܡ̣ܢ ܠܲܦܹ̈ܐ ܕܩܸܡܠܗ݇ܘܿܢ ܥܲܠܘܼܗܝ ܘܓ̣ܠܝܼܒܵܝܠܹܗ ܒܚܲܝܠܵܐ ܐܲܠܵܗܵܝܵܐ. ܘܝ݇ܕܸܥܠܗ݇ܘܿܢ ܟܠܲܝܗܝ ܛܵܝܹܦܹ̈ܐ: ܕܐܵܗܵܐ ܐܲܠܵܗܵܐ ܗ݇ܘܼܵܐ ܕܗܘܼܡܙܸܡܠܹܗ ܡ̣ܢ ܓܹܒܹܗ ܩܵܕ݇ܡ ܡܲܠܟܵܐ ܘܩܵܕ݇ܡ ܚܲܢܦܹ̈ܐ: ܒܘܼܬ ܕܗ̇ܝ ܠܵܐ ܙܕܸܥܠܗ݇ܘܿܢ.)
ܘܗܵܝܓܵܗ ܡܘܼܬܸܒ̣ܠܹܗ ܫܲܪܛ ܩܵܕ݇ܡ ܡܲܠܟܵܐ ܘܐ݇ܡܸܪܹܗ: ܕܛܵܦܲܚ ܢܘܼܪܵــܐ ܘܐܲܝܢܝܼ ܐܲܠܵܗܵܐ ܕܓ̰ܵܘܘܸܒ ܓܵܘ ܢܘܼܪܵܐ: ܗ̇ܘ ܝ݇ܠܹܗ ܐܲܠܵܗܵܐ ܫܲܪܝܼܪܵܐ. ܘܦܘܼܩܸܕܠܹܗ ܫܵܒ̣ܘܿܪ ܕܗܵܕܟ̣ܵܐ ܗܵܘܹܐ:
ܘܛܘܼܦܝܼܠܗ݇ܘܿܢ ܢܘܼܪܵܐ ܚܲܕ݇ ܢܘܼܪܵܐ ܓܘܼܪܵܐ ܩܵܕ݇ܡ ܡܲܠܟܵܐ. ܘܐ݇ܡܸܪܹܗ ܩܲܕܝܼܫܵܐ ܠܡܓ̣ܘܼܫܵܝܹ̈ܐ: ܒܝܼܕܲܥܝܵܐ ܝ݇ܘܸܢ ܕܐܲܚܬܘܿܢ ܠܢܘܼܪܵܐ ܒܸܣܓ̣ܵܕܵܐ ܝ݇ܬܘܿܢ: ܐܵܕܝܼܵܐ ܕܥܵܒ̣ܸܪ ܚܲܕ݇ ܡܸܢܵܘܟ̣ܘܿܢ ܘܟܵܠܹܐ ܓܵܘ ܕܐܵܗܵܐ ܢܘܼܪܵܐ. ܘܙܕܸܥܠܗ݇ܘܿܢ ܡܓ̣ܘܼܫܵܝܹ̈ܐ: ܘܠܵܐ ܡܨܹܐܠܗ݇ܘܿܢ ܕܩܲܪܒܸܢܝܼ ܠܟܸܣ ܢܘܼܪܵܐ. ܗܵܝܓܵܗ ܐܵܡܸܪ ܩܲܕܝܼܫܵܐ ܠܚܲܕ݇ ܡ̣ܢ ܐܲܚܘܿܢܘܵܬܹ̈ܐ ܕܐܝܼܬ ܗ݇ܘܼܵܐ ܥܲܡܹܗ ܥܒ̣ܘܿܪ ܐܲܢ݇ܬܿ ܐܲܚܘܿܢܵܐ ܘܟܠܝܼ ܓܵܘ ܕܐܵܗܵܐ ܢܘܼܪܵܐ. ܘܗܲܪ ܒܗ̇ܝ ܥܕܵܢܵܐ ܫܘܸܪܹܗ ܗ̇ܘ ܐܲܚܘܿܢܵܐ ܘܥܒ̣ܸܪܹܗ ܠܗ̇ܘ ܢܘܼܪܵܐ. ܘܟܠܹܐܠܹܗ ܒܹܝܦܲܠܓܹܗ: ܟܲܕ ܒܸܣܝܵܩܵܐ ܗ݇ܘܼܵܘ ܠܸܫܵܢܹ̈ܐ ܕܢܘܼܪܵܐ ܡ̣ܢ ܐܵܗܵܐ ܓܹܒܵܐ ܘܡ̣ܢ ܕܐܵܗܵܐ ܓܹܒܵܐ. ܘܠܵܐ ܚܘܼܙܕܸܓܠܹܐ ܗ̇ܘ ܐܲܚܘܿܢܵܐ ܒܡܸܢܕܝܼ: ܐܘܼܦ ܠܵܐ ܓ̰ܘܼܠܘܼ̈ܗܝ ܚܪܸ̈ܟ̣ܠܗ݇ܘܿܢ. ܘܟܠܹܐܠܹܗ ܓܵܘܹܗ ܩܵܐ ܪܵܒܵܐ ܥܕܵܢܵܐ. ܘܟܲܕ ܚܙܹܐܠܹܗ ܫܵܒ̣ܘܿܪ ܘܟܠܲܝܗܝ ܐܵܢܝܼ ܕܓ̰ܸܡܥܝܹ̈ܐ ܗ݇ܘܼܵܘ: ܫܘܼܒܸܚܠܗ݇ܘܿܢ ܠܐܲܠܵܗܵܐ: ܥܲܠ ܡܸܢܕܝܼ ܕܥܒ̣ܸܕܠܹܗ ܒܐܝܼܕܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ. ܐܝܼܢܵܐ ܫܵܒ̣ܘܿܪ ܒܥܕܵܢܵܐ ܐܲܢܹ̈ܐ ܚܸܙܝܵܝܠܹܗ: ܪܵܒܵܐ ܚܕܹܐܠܹܗ ܒܚܝܼܵܠܹܗ: ܘܗܘܼܡܸܢܹܗ ܠܟܠ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܐܸܠܹܗ ܒܘܼܬ ܩܲܕܝܼܫܵܐ.
ܗܵܝܓܵܗ ܦܘܼܩܸܕܠܹܗ ܡܲܠܟܵܐ: ܘܡܘܼܬ݇ܝܼܠܗ݇ܘܿܢ ܠܗ̇ܘ ܒܪܘܿܢܹܗ ܕܡܸܪܥܝܵܐ ܗ݇ܘܼܵܐ ܡ̣ܢ ܫܹܐܕܵܐ. ܘܦܘܼܪܦܸܠܹܗ ܒܩܲܕܝܼܫܵܐ ܘܐ݇ܡܸܪܹܗ ܐܸܠܹܗ: ܕܐܵܗܵܐ ܒܪܘܿܢܝܼ ܩܵܐ ܪܵܒܵܐ ܥܕܵܢܵܐ ܐܝܼܬܠܹܗ ܐܵܗܵܐ ܡܲܪܥܵܐ: ܘܐܲܚܘܿܢܹܗ ܩܛܸܠܹܗ ܡܵܐܢܝܼ ܚܲܪܵܫܵܐ. ܐܵܕܝܼܵܐ ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܕܨܵܠܸܬܿ ܨܠܘܿܬܵܐ ܘܛܲܠܒܸܬܿ ܡ̣ܢ ܐܲܠܵܗܘܼܟܼ: ܕܒܵܣܸܡܠܹܗ ܠܐܵܗܵܐ ܝܵܠܵܕ݇ܐ. ܣܵܒܵܒ ܝܵܕܥܲܚ: ܕܟܠ ܡܸܢܕܝܼ ܕܛܲܠܒܸܬܿ ܡ̣ܢ ܡܵܪܝܵܐ ܒܸܬ ܝܵܗ݇ܒ̣ܸܠܘܼܟܼ. ܘܦܘܼܩܸܕܠܹܗ ܩܲܕܝܼܫܵܐ: ܕܡܲܝܬ݇ܝܼܠܹܗ ܩܵܕ݇ܡܘܼܗܝ. ܘܒܥܕܵܢܵܐ ܕܩܘܼܒܸܢܘܿܢ ܡܲܩܘܸܚ ܗ݇ܘܼܵܐ ܗ̇ܘ ܕܲܝܘܵܐ ܘܐܵܡܸܪ ܗ݇ܘܼܵܐ: ܕܐܵܢܵܐ ܝ݇ܘܸܢ ܐܲܠܵܗܵܐ ܕܡܓ̣ܘܼܫܵܝܹ̈ܐ: ܩܵܡܘܿܕܝܼ ܐܸܕܝܘܿܡ݇ ܝܵܘܡܵܐ ܒܸܬ ܦܲܠܛܸܬܿ ܠܝܼ ܡ̣ܢ ܠܲܐܟ̣ܵܐ؟ ܝܵܐ ܣܵܒ̣ܵܐ ܪܹܓܹܗ ܕܝܼܫܘܿܥ ܢܵܨܪܵܝܵܐ: ܕܒܸܛܪܵܕܝܼ ܝ݇ܘܸܬܿ ܡ̣ܢ ܟܠܵܗ̇ ܐܲܪܥܵܐ: ܐܵܕܝܼܵܐ ܐܲܝܟܼ ܕܒܸܚܫܵܒ̣ܵܐ ܝ݇ܘܸܢ ܐܘܼܦ ܡ̣ܢ ܡܲܠܟܘܼܬܵܐ ܕܦܵܪ̈ܣܵܝܹܐ ܒܸܛܪܵܕܝܼ ܝ݇ܘܸܬܿ. ܐܝܼܢܵܐ ܐܵܗܵܐ ܩܲܕܝܼܫܵܐ ܒܘܼܩܸܪܹܗ ܡܸܢܹܗ: ܕܐܲܢ݇ܬܿ ܡܵܢܝܼ ܝ݇ܘܸܬܿ؟ ܘܐܵܗܵܐ ܣܵܛܵܢܵܐ ܟܲܕ ܦܝܼܫܠܹܗ ܡܘܼܥܝܸܩܵܐ ܡ̣ܢ ܚܲܝܠܵܐ ܕܨܠܘܿܬܹܗ ܕܛܘܼܒ̣ܵܢܵܐ: ܫܘܼܪܹܐܠܹܗ ܠܹܐܡܵܪܵܐ ܩܵܕ݇ܡ ܟܠܲܝܗܝ ܚܲܢܦܹ̈ܐ ܘܝܼܗܘܼܕܵܝܹ̈ܐ ܕܬܵܡܵܐ ܓ̰ܸܡܥܝܹ̈ܐ ܗ݇ܘܼܵܘ: ܕܐܵܢܵܐ ܝ݇ܘܸܢ ܗ̇ܘ ܕܡܘܼܚܠܸܛܠܝܼ ܠܐܵܕܵܡ ܓܵܘ ܦܲܪܕܵܝܣܵܐ. ܘܐܵܢܵܐ ܓܘܼܪܵܐ ܝ݇ܘܸܢ ܘܡܲܠܦܵܢܵܐ ܕܟܠܲܝܗܝ ܚܲܪ̈ܫܹܐ: ܘܐܘܼܦ ܡܓ̣ܘܼܫܵܝܹ̈ܐ ܐܸܠܝܼ ܟܹܐ ܦܵܠܚܝܼ: ܘܐܵܢܵܐ ܝ݇ܘܸܢ ܐܲܠܵܗܵܐ ܕܝܼܲܝܗܝ. ܟܠܲܝܗܝ ܐܲܢܹ̈ܐ ܕܗܲܡܙܘܼܡܹܐ ܗ݇ܘܼܵܐ ܒܦܘܼܡܵܐ ܕܝܵܠܵܕ݇ܐ ܒܠܸܫܵܢܵܐ ܦܵܪܣܵܝܵܐ ܗ݇ܘܼܵܐ. ܘܒܐܵܗܵܐ ܥܵܓ̰ܘܼܒܹܐ ܗ݇ܘܼܵܐ ܡܲܠܟܵܐ ܘܟܠܲܝܗܝ ܓܘܼܪ̈ܵܢܹܐ: ܕܩܲܕܝܼܫܵܐ ܒܵܩܸܪ ܗ݇ܘܼܵܐ ܒܠܸܫܵܢܵܐ ܣܘܼܪܝܵܝܵܐ: ܘܐܵܗܵܐ ܓ̰ܵܘܘܸܒ ܗ݇ܘܼܵܐ ܒܠܸܫܢܵܐ ܦܵܪܣܵܝܵܐ: ܘܐܵܗܵܐ ܝܵܠܵܕ݇ܐ ܠܹܐ ܝܵܕܸܥ ܗ݇ܘܼܵܐ ܠܸܫܵܢܵܐ ܣܘܼܪܝܵܝܵܐ. ܡܘܼܥܝܸܩܠܹܗ ܩܲܕܝܼܫܵܐ ܠܕܲܝܘܵܐ: ܗܲܠ ܕܡܵܘܕܝܼܠܹܗ ܩܵܕ݇ܡ ܚܲܢܦܹ̈ܐ ܡܲܚܠܸܛܵܢܹ̈ܐ ܒܟܠܵܗ̇ ܒܝܼܫܘܼܬܲܝܗܝ: ܕܡܲܢܚܸܦ ܗ݇ܘܼܵܐ ܠܡܓ̣ܘܼܫܵܝܹ̈ܐ ܘܠܝܼܗܘܼܕܵܝܹ̈ܐ ܕܐܝܼܬ ܗ݇ܘܼܵܐ ܬܵܡܵܐ. ܐܝܼܢܵܐ ܡܓ̣ܘܼܫܵܝܹ̈ܐ ܒܥܕܵܢܵܐ ܕܫܡܸܥܠܗ݇ܘܿܢ ܐܲܢܹ̈ܐ ܗܹܡܸܙܡܵܢܹ̈ܐ: ܪܵܒܵܐ ܦܝܼܫܠܗ݇ܘܿܢ ܢܚܝܼܦܹ̈ܐ: ܕܫܡܸܥܠܗ݇ܘܿܢ ܣܵܗܕܘܼܬܹܗ ܕܕܲܝܘܵܐ ܘܒܸܣܗܵܕܵܐ ܒܘܼܬ ܕܘܼܓܠܲܝܗܝ: ܘܒܘܼܬ ܫܪܵܪܵܐ ܕܝܘܼܠܦܵܢܹܗ ܕܝܼܫܘܿܥ. ܘܚܲܕ݇ ܡܸܢܕܝܼ ܠܵܐ ܡܨܹܐܠܹܗ݇ܘܿܢ ܕܗܲܡܙܸܡܝܼ: ܡܣܵܒܵܒ ܒܲܚܙܵܝܵܐ ܗ݇ܘܼܵܘ ܠܡܲܠܟܵܐ: ܕܪܵܒܵܐ ܒܸܚܕܵܝܵܐ ܗ݇ܘܼܵܐ ܒܟܠܲܝܗܝ ܐܵܢܝܼ ܥܵܓ̰ܝܼܒܘܼܝܵܬܹ̈ܐ: ܕܦܝܵܫܵܐ ܗ݇ܘܼܵܘ ܥܒ̣ܝܼܕܹ̈ܐ ܒܐܝܼܕܹܗ ܕܩܲܕܝܼܫܹ̈ܐ: ܘܒܸܣܦܵܪܵܐ ܗ݇ܘܼܵܐ ܠܒܵܣܲܡܬܵܐ ܕܒܪܘܿܢܹܗ.
ܗܵܝܓܵܗ ܩܘܼܪܒܸܢܹܗ ܩܲܕܝܼܫܵܐ ܘܪܫܸܡܠܹܗ ܥܲܠ ܗ̇ܘ ܕܲܝܘܵܐ ܒܢܝܼܫܲܢܩܵܐ ܕܨܠܝܼܒ̣ܵܐ: ܘܩܪܹܐܠܹܗ ܒܫܸܡܵܐ ܕܐܲܠܵܗܵܐ ܘܐ݇ܡܸܪܹܗ ܐܸܠܹܗ: ܐܸܠܘܼܟܼ ܒܹܐܡܵܪܵܐ ܝ݇ܘܸܢ ܝܵܐ ܟ̰ܲܦܲܠ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܗ̇ܘ ܕܛܒܸܥܠܹܗ ܠܸܓ̣ܝܘܿܢ ܪܹܫܵܘܟ̣ܘܿܢ ܓܵܘ ܝܵܡܵܐ: ܦܠܘܿܛ ܡ̣ܢ ܕܐܵܗܵܐ ܒܲܪܢܵܫܵܐ: ܘܡܸܢ݇ܕܪܸܫ݇ ܠܵܐ ܗܵܘܹܐܠܘܼܟܼ ܗܘܼܟܡܵܐ ܒܝܼـܹܗ: ܘܒܗ̇ܝ ܥܕܵܢܵܐ ܗ̇ܘ ܕܲܝܘܵܐ ܡܘܼܩܘܸܚܠܹܗ ܒܩܵܠܵܐ ܪܵܡܵܐ: ܟܲܕ ܡܓ̰ܲܢܓ̰ܘܼܪܹܐ ܗ݇ܘܼܵܐ ܒܬܲܣܡܵܬܹ̈ܐ ܒܛܸܫܘܵܐ ܒܹܐܡܵܪܵܐ ܗ݇ܘܼܵܐ ܠܩܲܕܝܼܫܵܐ: ܠܐܲܝܟܵܐ ܦܵܠܘܿܛܝܼ ܝ݇ܘܸܬܿ ܡ̣ܢ ܕܐܵܗܵܐ ܒܲܝܬܵܐ ܙܥܘܿܪܵܐ ܕܝܼܝܼ؟ ܐ݇ܡܸܪܹܗ ܐܸܠܹܗ ܐܵܗܵܐ ܩܲܕܝܼܫܵܐ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܡܸܢ݇ܕܪܸܫ݇ ܠܵܐ ܗܲܡܙܸܡܸܬܿ. ܒܗ̇ܝ ܥܕܵܢܵܐ ܡܚܹܐܠܹܗ ܠܝܵܠܵܕ݇ܐ ܥܲܠ ܐܲܪܥܵܐ. ܘܦܠܸܛܠܹܗ ܡܸܢܹܗ. ܘܡܚܹܐܠܹܗ ܥܲܠ ܬܲܪܥܵܐ ܕܒܲܝܬܵܐ: ܘܨܘܼܦܠܸܦܠܹܗ ܒܟܲܪܒܵܐ ܓܘܼܪܵܐ ܥܲܡ ܦܠܲܛܬܹܗ. ܪܵܒܵܐ ܦܝܼܫܠܹܗ ܥܘܼܓ̰ܒܵܐ ܒܝܼـܹܗ ܫܵܒ̣ܘܿܪ ܡܲܠܟܵܐ ܕܟܡܵܐ ܡܘܼܥܝܸܩܠܹܗ ܩܲܕܝܼܫܵܐ ܘܡܘܼܣܚܸܪܹܗ ܒܝܼـܹܗ ܩܵܕ݇ܡ ܚܲܢܦܹ̈ܐ ܒܢܘܿܢܹ̈ܐ ܕܐܵܢܝܼ ܬܲܒܥܵܢܹ̈ܐ ܥܲܠܘܼܗܝ. ܘܒܓ̰ܲܠܕܘܼܬܵܐ ܩܸܡܠܹܗ ܥܲܠ ܐܲܩܠܵܬ̈ܘܼܗܝ ܘܦܘܼܫܸܛܠܹܗ ܐܝܼܕܵܬ̈ܘܼܗܝ ܠܫܡܲܝ̈ܵܐ: ܘܡܫܵܒܘܼܚܹܐ ܗ݇ܘܼܵܐ ܒܩܵܠܵܐ ܪܵܡܵܐ ܒܠܸܫܵܢܵܐ ܦܵܪܣܵܝܵܐ ܘܒܹܐܡܵܪܵܐ: ܓܘܼܪܵܐ ܝ݇ܠܹܗ ܐܲܠܵܗܵܐ ܕܟܪܸ̈ܣܛܝܵܢܹܐ: ܘܠܲܝܬ ܒܸܫܡܲܝ̈ܵܐ ܘܒܐܲܪܥܵܐ ܐܸܠܵܐ ܐܸܢ ܗ̇ܘ ܝ݇ܠܹܗ. ܘܥܲܡܹܗ ܕܡܲܠܟܵܐ ܦܝܼܫܠܗ݇ܘܿܢ ܫܥܝܼܫܹ̈ܐ ܟܠܲܝܗܝ ܓܘܼܪ̈ܵܢܘܼܗܝ: ܘܩܸܡܠܗ݇ܘܿܢ ܥܲܠ ܐܲܩܠܵܬܲܝ̈ܗܝ ܘܐܘܼܦ ܡܓ̣ܘܼܫܵܝܹ̈ܐ: ܡܫܲܒܚܝܼ ܗ݇ܘܼܵܘ ܥܲܡ ܡܲܠܟܵܐ ܐܘܼܦ ܐܲܢܹ̈ܐ ܐܵܡܪܝܼ ܗ݇ܘܼܵܘ: ܓܘܼܪܵܐ ܝ݇ܠܹܗ ܐܲܠܵܗܵܐ ܕܟܪܸ̈ܣܛܝܵܢܹܐ. ܐܝܼܢܵܐ ܐܘܼܦ ܪܕܘܿܡܘܿܕܘܿܢ ܕܟܸܠܝܹ̈ܐ ܗ݇ܘܼܵܘ ܩܵܕ݇ܡ ܡܲܠܟܵܐ: ܦܘܼܫܸܛܠܗ݇ܘܿܢ ܐܝܼܕܵܬܲܝ̈ܗܝ ܠܫܡܲܝ̈ܵܐ ܥܲܡ ܕܡܲܠܟܵܐ ܟܲܕ ܐܲܢܹ̈ܐ ܐܘܼܦ ܠܹܐ ܗ݇ܘܼܵܘ ܓܵܫܘܿܩܹܐ ܐܲܚܟ̰ܝܼ ܒܦܘܼܡܲܝܗܝ ܘܣܸܦܘܵܬܲܝܗ̈ܝ ܒܸܫܥܵܫܵܐ ܗ݇ܘܼܵܘ: ܘܐܲܝܟܼ ܕܐܸܢ ܗ̇ܘ ܡܸܢܕܝܼ ܒܹܐܡܵܪܵܐ ܗ݇ܘܼܵܘ. ܣܵܒܵܒ ܒܝܼܕܲܥܝܵܐ ܗ݇ܘܼܵܘ ܐܸܢ ܠܵܐ ܩܵܝܡܝܼ ܗ݇ܘܼܵܘ: ܗܲܪ ܒܗ̇ܝ ܥܕܵܢܵܐ ܒܸܬ ܩܲܛܥܩܸܛܝܼ ܗ݇ܘܼܵܘ ܠܗ݇ܘܿܢ. ܡ̣ܢ ܙܕܥܘܿܬܲܝܗܝ ܐܵܗܵܐ ܥܒ̣ܸܕܠܗ݇ܘܿܢ ܘܠܹܐ ܗ݇ܘܼܵܘ ܒܣܵܡܲܝܗܝ ܕܒܸܫܪܵܪܵܐ ܡܵܘܕܝܼ ܗ݇ܘܼܵܘ. ܐܝܼܢܵܐ ܐܵܗܵܐ ܩܲܕܝܼܫܵܐ ܕܒ̣ܸܩܠܹܗ ܠܗ̇ܘ ܝܵܠܵܕ݇ܐ ܘܡܘܼܩܸܡܠܹܗ: ܘܩܘܼܪܒܸܢܹܗ ܩܵܕ݇ܡ ܐܲܒ̣ܵܗ̈ܘܼܗܝ ܟܲܕ ܒܣܝܼܡܵܐ. ܘܚܲܕܘܼܬܵܐ ܓܘܼܪܬܵܐ ܗ݇ܘܹܐܠܵܗ̇ ܠܫܵܒ̣ܘܿܪ ܒܗ̇ܘ ܝܵܘܡܵܐ: ܘܡܘܼܬܸܒ̣ܠܹܗ ܒܚܝܼܵܠܹܗ ܕܟܵܠܹܗ ܡ̣ܢ ܪܕܘܼܦܝܵܐ ܕܟܪܸ̈ܣܛܝܵܢܹܐ. ܣܵܒܵܒ ܡ̣ܢ ܩܵܕ݇ܡ ܗ̇ܘ ܝܵܘܡܵܐ: ܪܵܒܵܐ ܒܸܛܪܵܕܵܐ ܗ݇ܘܼܵܐ: ܘܪܵܒܵܐ ܩܲܕܝܼܫܹ̈ܐ ܒܸܩܛܵܠܵܐ ܗ݇ܘܼܵܐ.
ܐܝܼܢܵܐ ܡܓ̣ܘܼܫܵܝܹ̈ܐ ܦܫܝܼܡܹ̈ܐ ܗ݇ܘܼܵܘ ܒܡܸܢܕܝܼ ܕܥܒ̣ܸܕܠܗ݇ܘܿܢ: ܘܠܹܐ ܗ݇ܘܼܵܘ ܒܸܡܨܵܝܵܐ ܕܐܵܡܪܝܼ ܗ݇ܘܼܵܘ ܚܲܕ݇ ܡܸܢܕܝܼ ܕܲܪܩܘܼܒ̣ܠ ܚܲܝܠܵܐ ܕܥܵܓ̰ܝܼܒܘܼܝܵܬ̈ܘܼܗܝ ܡܘܼܫܬܸܩܵܝܠܹܗ: ܘܦܝܼܫܠܗ݇ܘܿܢ ܐ݇ܣܝܼܪܹ̈ܐ ܟܠܲܝܗܝ ܦܲܢ̈ܕܲܝܗܝ: ܦܠܸܛܠܗ݇ܘܿܢ ܡ̣ܢ ܬܵܡܵܐ ܟܲܕ ܢܚܝܼܦܹ̈ܐ. ܐܝܼܢܵܐ ܡܲܠܟܵܐ ܠܵܐ ܐ݇ܡܸܪܹܗ ܚܲܕ݇ ܡܸܢܕܝܼ ܐܸܠܲܝܗܝ: ܕܠܵܐ ܡܲܣܠܹܗ ܗ݇ܘܼܵܐ ܝܘܼܠܦܵܢܵܐ ܕܐܲܒ̣ܵܗ̈ܘܼܗܝ: ܣܵܒܵܒ ܪܵܒܵܐ ܡܝܘܼܩܪܵܐ ܗ݇ܘܼܵܐ ܗܹܪܹܣܝܼܣ ܕܡܓ̣ܘܼܫܵܝܹ̈ܐ ܠܟܸܣ ܦܵܪ̈ܣܵܝܹܐ: ܘܒܘܼܬ ܕܐܵܗܵܐ ܠܵܐ ܫܩܸܠܹܗ ܬܘܼܥܠܵܐ ܒܥܕܵܢܵܐ ܕܐܵܢܝܼ ܠܵܐ ܡܨܹܐܠܗ݇ܘܿܢ ܠܸܥܒ̣ܵܕܵܐ ܡܸܢܕܝܼ. ܐܝܼܢܵܐ ܩܵܐ ܩܲܕܝܼܫܵܐ ܘܠܐܲܚܘܿܢܘܵܬܹ̈ܐ ܕܥܲܡܹܗ ܪܵܒܵܐ ܒܸܚܩܵܪܵܐ ܗ݇ܘܼܵܐ ܘܡܝܵܩܘܼܪܹܐ ܘܒܹܐܡܵܪܵܐ: ܒܫܪܵܪܵܐ ܓܘܼܪܵܐ ܝ݇ܠܹܗ ܐܲܠܵܗܵܘܟ̣ܘܿܢ: ܘܐܲܚܬܘܿܢ ܝܑܼܬܘܿܢ ܪܹ̈ܓܵܘܵܬܹܐ ܕܐܲܠܵܗܵܐ ܥܸܠܵܝܵܐ. ܗܵܝܓܵܗ ܐ݇ܡܸܪܹܗ ܡܲܠܟܵܐ ܩܵܐ ܩܲܕܝܼܫܵܐ ܛܠܘܿܒ ܡܸܢܝܼ ܟܠ ܡܸܢܕܝܼ ܕܒܵܥܹܝܬܿ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܐܲܚܢܲܢ: ܝܵܐ ܡܵܪܝܼ ܡܲܠܟܵܐ: ܠܵܐ ܕܲܗܒ̣ܵܐ ܒܸܒܥܵܝܵܐ ܝ݇ܘܲܚ ܘܠܵܐ ܣܹܐܡܵܐ. ܐܝܼܢܵܐ ܐܵܗܵܐ ܒܸܛܠܵܒܵܐ ܝ݇ܘܲܚ ܡ̣ܢ ܐܘܼܚܕܵܢܵܐ ܕܡܲܠܟܘܼܬܘܼܟܼ: ܕܦܲܩܕܸܬܿ ܘܝܵܗ݇ܒ̣ܸܬܿ ܠܲܢ ܕܘܼܟܵܢܹ̈ܐ ܙܥܘܿܪܹ̈ܐ ܥܲܠ ܐܘܼܪ̈ܚܵܬܹܐ ܘܓ̰ܵܕܵܘܵܬܹ̈ܐ: ܕܒܵܢܲܚ ܒܝܼܲܝܗܝ ܥܘܼܡܪ̈ܵܢܹܐ ܘܕܲܝܪܹ̈ܐ: ܕܫܵܪܲܚ ܒܝܼܲܝܗܝ ܐܘܼܦ ܩܵܪ̈ܝܼܒܵܝܹܐ. ܘܗܲܒ̣݇ܠܲܢ ܡܨܵܝܬܵܐ: ܕܐܵܙܲܠ݇ܚ ܠܒܹܝܬ ܠܵܦܵܛ ܘܐܲܬܪܵܐ ܕܒܹܝܬ ܗܘܼܙܵܝܹ̈ܐ: ܕܒܵܢܲܚ ܥܘܼܡܪ̈ܵܢܹܐ ܘܕܲܝܪܹ̈ܐ: ܟܠ ܐܲܝܟܵܐ ܕܒܲܣܡܵܐ ܠܲܢ. ܗܲܪ ܒܗ̇ܝ ܥܕܵܢܵܐ ܝܘܼܗ݇ܒ̣ܸܠܹܗ ܦܘܼܩܕܵܢܵܐ: ܘܝܘܼܗ݇ܒ̣ܸܠܹܗ ܐܸܠܲܝܗܝ ܐܵܗܵܐ ܗܘܼܟܡܵܐ ܝܲܢ ܡܨܵܝܬܵܐ. ܘܐ݇ܙܸܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ ܠܥܘܼܡܪܵܐ ܩܲܕܝܼܫܵܐ ܒܓ̣ܵܠܝܼܒܘܼܬܵܐ ܘܒܚܲܕܘܼܬܵܐ ܓܘܼܪܬܵܐ.
ܘܡ̣ܢ ܒܵܬ݇ܪ ܚܲܕ݇ܟ̰ܵܐ ܝܵܘܡܵܢܹ̈ܐ: ܓ̰ܡܸܥܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ: ܘܦܠܸܛܠܗ݇ܘܿܢ ܡ̣ܢ ܥܘܼܡܪܵܐ: ܟܲܕ ܕܒ̣ܝܼܩܹ̈ܐ ܟܠ ܚܲܕ݇ ܨܠܝܼܒ̣ܹܗ ܒܐܝܼܕܹܗ: ܘܐ݇ܙܸܠܗ݇ܘܿܢ ܟܠܲܝܗܝ ܠܐܸܠܬܸܚܬܿ ܡ̣ܢ ܛܘܼܪܵܐ: [ܛܘܼܪܵܐ ܕܐܝܼܙܠܵܐ]: ܘܗܘܹܐܠܗ݇ܘܿܢ ܒܕܵܝܸܡܘܼܬܵܐ ܒܡܲܙܡܘܿܪܹ̈ܐ ܘܚܬܸܡܠܗ݇ܘܿܢ ܠܨܠܘܿܬܵܐ. ܘܐ݇ܬܹܐܠܗ݇ܘܿܢ ܟܠܲܝܗܝ ܘܦܝܼܫܠܗ݇ܘܿܢ ܒܘܼܪ̈ܟ̣ܹܐ ܡ̣ܢ ܩܲܕܝܼܫܵܐ ܡܵܪܝ ܐܵܘܓܹܝܢ: ܘܐ݇ܙܸܠܗ݇ܘܿܢ ܟܠ ܚܲܕ݇ ܡ̣ܢ ܐܲܚܘܿܢܘܵܬܹ̈ܐ: ܠܐܲܝܟܵܐ ܡܗܘܼܕܝܼܠܵܗ̇ ܘܡܘܼܚܙܹܐܠܵܗ̇ ܫܵܦܵܩܲܬ ܕܐܲܠܵܗܵܐ: ܕܡܲܬܒ̣ܝܼ ܒܸܢܝܲܬ ܕܕܲܝܪܹ̈ܐ ܘܕܥܘܼܡܪ̈ܵܢܹܐ: ܟܠ ܚܲܕ݇ ܡܸܢܲܝܗܝ ܐܲܝܟܵܐ ܕܒܸܒܥܵܝܵܐ ܗ݇ܘܼܵܐ. ܘܡܘܼܩܸܡܠܗ݇ܘܿܢ ܥܘܼܡܪ̈ܵܢܹܐ ܘܕܲܝܪܹ̈ܐ ܪܵܒܵܐ. ܒܕܵܡܲܝܬܵܐ ܕܠܵܘܓ̰̈ـܹܐ ܕܫܸܡܫܵܐ ܗ݇ܘܹܐܠܹܗ ܡܘܼܒܝܸܢܵܐ ܚܲܒܪܵܐ ܕܓ̣ܵܠܝܼܒܘܼܝܵܬܹ̈ܐ ܕܩܲܕܝܼܫܹ̈ܐ ܬܲܠܡܝܼܕܹ̈ܐ ܕܡܵܪܝ ܐܵܘܓܹܝܢ: ܐܵܢܝܼ ܕܦܠܸܛܠܗ݇ܘܿܢ ܥܲܡܹܗ ܡ̣ܢ ܬܸܚܘܼܒ ܕܐܵܓܹܒܛܘܿܣ: ܘܡ̣ܢ ܟܠ ܐܲܬܪܵܐ ܘܡܕܝܼܢ݇ܬܵܐ ܓ̰ܡܸܥܠܗ݇ܘܿܢ ܠܟܸܣܠܹܗ: ܐܲܢܹ̈ܐ ܗ݇ܘܼܵܘ: ܩܲܕܝܼܫܵܐ ܡܵܪܝ ܬܐܘܿܡܵܐ: ܘܡܵܪܝ ܓܘܼܪܝܵܐ: ܘܡܵܪܝ ܒܲܛܵܠܵܐ: ܘܡܵܪܝ ܓܝܼܘܲܪܓܝܼܣ: ܘܡܵܪܝ ܩܕܵܠܵܐ: ܘܡܵܪܝ ܕܵܕܵܐ: ܘܡܵܪܝ ܛܵܒ̣ܵܐ: ܘܡܵܪܝ ܝܘܿܐܵܢܝܼܣ: ܘܡܵܪܝ ܐܹܠܝܼܫܲܥ: ܘܡܵܪܝ ܣܪܵܦܝܼܘܿܢ: ܘܡܵܪܝ ܓܪܝܼܓ̣ܘܿܪܝܼܘܿܣ: ܘܡܵܪܝ ܝܵܗܘܿ: ܘܡܵܪܝ ܝܲܗ݇ܒ̣: ܘܡܵܪܝ ܫܸܡܥܘܿܢ ܕܐܸܣܛܘܿܢܹܗ: ܘܐܲܒܵܐ ܫܸܡܥܘܿܢ ܗܘܼܙܵܝܵܐ: ܘܡܵܪܝ ܐܘܿܠܘܿܓ̣: ܘܡܵܪܝ ܝܵܗܘܿܫܵܦܵܛ ܣܵܗܕܵܐ: ܘܡܵܪܝ ܡܝܼܠܝܼܢܘܿܣ ܣܵܗܕܵܐ: ܘܡܵܪܝ ܐܘܿܠܵܐ: ܘܡܵܪܝ ܝܵܘܣܸܦ ܒܘܼܣܢܵܝܵܐ: ܘܡܵܪܝ ܕܵܢܝܼܐܹܝܠ: ܘܡܵܪܝ ܓܲܒ̣ܪܘܿܢܵܐ: ܘܡܵܪܝ ܐܝܼܣܚܵܩ: ܘܡܵܪܝ ܫܵܐܙܝܼ: ܘܡܵܪܝ ܒܲܪ ܫܡܸܫ: ܘܡܵܪܝ ܚܲܒܝܼܒܵܐ: ܘܡܵܪܝ ܓܘܼܠܵܐ: ܘܡܘܼܫܹܐ: ܘܡܵܪܝ ܚܲܕܒܫܲܒܵܐ ܝܲܡܝܼܢܵܐ: ܘܡܵܪܝ ܣܝܼܠܘܵܢܵܐ (ܣܝܼܠܘܵܢܵܐ ܝܲܢ ܣܝܼܠܘܵܢܘܿܣ): ܘܡܵܪܝ ܛܸܛܘܿܣ: ܘܡܵܪܝ ܐܸܢܕܸܪܝܵܐ [ܐܢܕܪܹܐܵܐ]: ܘܡܵܪܝ ܐܘܼܒܹܝܠ ܒܲܪ ܒܵܥܘܼܬ: ܘܡܵܪܝ ܒܵܥܘܼܬ: ܘܡܵܪܝ ܒܸܢܝܵܡܹܝܢ: ܘܡܵܪܝ ܫܲܒܝܼ: ܘܡܵܪܝ ܝܘܿܚܲܢܵܢ ܐܲܦܡܵܝܵܐ [ܐܲܦܵܡܵܝܵܐ]: ܘܡܵܪܝ ܝܘܿܚܲܢܵܢ ܢܲܚܠܵܝܵܐ: ܘܡܵܪܝ ܝܘܿܚܲܢܵܢ ܕܝܼܠܘܿܡܵܝܵܐ: ܘܡܵܪܝ ܝܘܿܚܲܢܵܢ ܛܲܝܵܝܵܐ: ܘܡܵܪܝ ܓܝܼܘܲܪܓܝܼܣ ܕܛܘܼܒܲܝܢ: ܘܡܵܪܝ ܐܸܣܛܲܦܵܢܘܿܣ: ܘܡܵܪܝ ܡܲܠܟܵܐ: ܘܡܵܪܝ ܐܹܫܲܥܝܵܐ: ܘܡܵܪܝ ܝܵܪܹܬ: ܘܡܵܪܝ ܦܝܼܢܚܸܣ: ܘܡܵܪܝ ܐܲܚܵܐ: ܘܡܵܪܝ ܝܘܿܚܲܢܵܢ ܙܥܘܿܪܵܐ: ܘܡܵܪܝ ܝܘܿܚܲܢܵܢ ܕܲܟ̣ܡܘܼܠ: ܘܡܵܪܝ ܡܪܘܿܠܵܐ: ܘܡܵܪܝ ܡܝܼܟ̣ܵܐܝ: ܘܡܵܪܝ ܦܵܦܵܐ: ܘܪܲܒܲܢ ܣܲܠܵܪܵܐ: ܘܐܲܒ̣ܵܐ ܡܝܼܟ̣ܵܐ: ܘܡܵܪܝ ܩܵܘܡܵܐ: ܘܡܵܪܝ ܩܲܝܘܼܡܵܐ: ܘܡܵܪܝ ܐܲܒ̣ܪܵܗܵܡ: ܘܡܵܪܝ ܐܲܢܕܪܹܐܘܿܣ: ܘܐܲܒ̣ܵܐ ܦܘܿܠܵܐ: ܘܡܵܪܝ ܐܘܼܟܵܡܵܐ: ܘܡܵܪܝ ܫܠܹܝܡܘܿܢ: ܘܡܵܪܝ ܐܲܡܘܿܢ: ܘܡܵܪܝ ܠܘܼܩܵܐ: ܘܡܵܪܝ ܓܢܝܼܒ̣ܵܐ: ܘܡܵܪܝ ܒܵܒ̣ܲܝ ܣܵܦܪܵܐ: ܘܣܲܪܓܝܼܣ ܕܘܿܕܵܐ: ܘܡܵܪܝ ܫܲܠܝܼܛܵܐ: ܘܡܵܪܝ ܥܲܒ̣ܕܝܼܫܘܿܥ: ܘܡܵܪܝ ܝܘܿܚܲܢܵܢ ܒܲܪ ܟܲܠܕܘܼܢ: ܘܡܵܪܝ ܫܵܐܝܼܢ [ܫܵܗܝܼܢ]: ܘܡܵܪܝ ܐܲܒ̣ܘܼܢ: ܘܡܵܪܝ ܝܵܘܢܵܢ: ܘܡܵܪܬܝ ܬܸܩܠܵܐ ܚܵܬܹܗ ܕܡܵܪܝܼ ܡܵܪܝ ܐܵܘܓܹܝܢ ܛܘܼܒ̣ܵܢܵܐ: ܘܐܸܣܛܪܵܛܵܢܝܼܩܹܐ ܚܵܬܵܐ ܐ݇ܚܹܪ݇ܬܵܐ ܕܥܲܡܹܗ. ܐܲܢܹ̈ܐ ܝ݇ܢܵܐ ܕܡܘܼܫ݇ܟ̰ܸܚܠܝܼ ܘܪܫܸܡܠܝܼ ܒܐܵܗܵܐ ܬܲܫܥܝܼܬܵܐ: ܐܵܢܝܼ ܕܐܝܼܢܵܐ ܐܲܚܘܿܢܘܵܬܹ̈ܐ ܟܝܵܢܵܝܹ̈ܐ ܕܝܼـܹܗ: ܘܬܲܠܡܝܼܕܹ̈ܐ ܘܡܫܲܡܫܵܢܹ̈ܐ ܕܚܸܩܪܹܗ ܝܼܗ݇ܘܼܵܘ: ܟܠ ܚܲܕ݇ ܡܸܢܲܝܗܝ ܗܲܝܲܪ̈ܝܵܬܹܐ ܘܚܲܝܠܵܘܵܬܹ̈ܐ ܘܢܝܼܫܲܢܩܹ̈ܐ ܕܥܒ̣ܸܕܠܹܗ ܪܫܝܼܡܵܐ ܝ݇ܠܹܗ ܓܵܘ ܕܐܵܗܵܐ ܬܲܫܥܝܼܬܵܐ: ܫܲܒ̣ܥܝܼܢ ܘܬܪܹܝܢ ܛܘܼܒ̣ܵܢܹ̈ܐ. ܕܥܒ̣ܘܼܕ ܒܵܘܲܪ ܒܨܠܵܘܵܬܲܝ̈ܗܝ ܐܲܝܟܼ ܓ̰ܵܡܵܥܲܬ ܒܸܬ ܝܵܗ݇ܒ̣ܸܠ ܡܵܪܲܢ ܗܲܝܲܪܬܵܐ ܘܣܵܠܵܡܵܬܘܼܬܵܐ ܘܦܘܼܚܵܠܵܐ ܕܓܢܵܗܵܬܹ̈ܐ: ܐܸܠܲܢ ܘܠܟܠ ܕܦܵܐܸܫ ܡܓܵܘܣܸܢܵܐ ܒܨܠܵܘܵܬܲܝ̈ܗܝ: ܐܵܡܹܝܢ ܘܐܵܡܹܝܢ.
ܗܵܝܓܵܗ ܟܲܕ ܚܙܹܐܠܹܗ ܫܵܒ̣ܘܿܪ ܡܲܠܟܵܐ ܓ̣ܵܠܝܼܒܘܼܝܵܬܹ̈ܐ ܕܩܲܕܝܼܫܹ̈ܐ: ܘܥܵܓ̰ܝܼܒܘܼܝܵܬܹ̈ܐ ܕܦܠܸܚܠܹܗ ܡܵܪܲܢ ܒܐܝܼܕ̈ܵܬܲܝܗܝ: ܬܘܼܚܡܸܢܹܗ ܒܓܵܢܹܗ ܕܝܵܗ݇ܒ̣ܸܠܗ݇ܘܿܢ ܚܲܕ݇ ܡܸܢܕܝܼ: ܕܗܵܘܹܐ ܩܵܐ ܡܵܦܠܲܚܬܵܐ ܕܐܲܚܘܿܢܘܵܬܹ̈ܐ ܘܐܘܼܦ ܩܵܐ ܡܲܢܝܵܚܬܵܐ ܕܩܲܪ̈ܝܼܒܵܝܹܐ. ܘܫܘܼܕܸܪܹܗ ܩܪܹܐܠܹܗ ܠܩܲܕܝܼܫܵܐ ܡܵܪܝ ܐܵܘܓܹܝܢ: ܝܘܼܗ݇ܒ̣ܸܠܹܗ ܚܕܵܐ ܡܵܬܵܐ: ܕܫܡܘܼܗ̇ ܗܝܼܕܓܹܝܢ ܘܚܲܕ݇ ܐܲܪܚܹܐ ܐܝܼܬ ܗ݇ܘܼܵܐ ܠܟܸܣ ܗ̇ܝ ܡܵܬܵܐ: ܕܗܵܘܝܵܐ ܗ݇ܘܼܵܐ ܓܵܘܵܝܵܐ ܕܥܘܼܡܪܵܐ: ܘܗܵܘܝܵܐ ܠܹܗ ܫܲܪܝܼܟܘܼܬܵܐ ܒܨܠܵܘܵܬܲܝ̈ܗܝ. ܘܝܘܼܗ݇ܒ̣ܸܠܹܗ ܚܲܕ݇ ܟܬܵܒ̣ܵܐ ܡܸܚܝܵܐ ܒܚܲܬܡܵܐ: ܕܠܵܐ ܙܲܕܥܝܼ ܡ̣ܢ ܕܲܝܵܢܹ̈ܐ ܒܥܕܵܢܵܐ ܕܐܵܙܠ݇ܝܼܢ ܠܐܲܬܪ̈ܵܘܵܬܹܐ. ܘܕܠܵܐ ܡܲܟܠܹܐܠܗ݇ܘܿܢ ܐ݇ܢܵܫܵܐ ܕܒܵܢܝܼ ܠܗ݇ܘܿܢ ܥܹܕܵܬܹ̈ܐ ܘܕܲܝܪܹ̈ܐ: ܟܠ ܐܲܬܪܵܐ ܕܒܹܐܙܵܠܵܐ ܗ݇ܘܼܵܘ. ܘܟܲܕ ܫܩܝܼܠܹ̈ܐ ܗ݇ܘܼܵܘ ܢܝܼܫܲܢܩܹܗ ܕܡܲܠܟܵܐ: ܐ݇ܙܸܠܵܗ̇ ܐܵܗܵܐ ܕܲܣܬܵܐ ܒܪܝܼܟ̣ܬܵܐ ܐܲܠܵܗܵܝܬܵܐ: ܘܦܝܼܫܠܗ݇ܘܿܢ ܦܘܼܠܓ݇ܝܼ̈ـܹܐ ܠܟܠ ܐܲܬܪܵܐ ܘܡܕܝܼܢ݇ܬܵܐ. ܕܒܵܢܝܼ ܥܘܼܡܪ̈ܵܢܹܐ ܘܕܲܝܪܹ̈ܐ. ܘܐ݇ܙܸܠܹܗ ܩܲܕܝܼܫܵܐ ܠܥܘܼܡܪܵܐ: ܟܲܕ ܒܸܚܕܵܝܵܐ ܘܦܨܸܚܬܵܐ ܓܵܢܹܗ.
ܘܡ̣ܢ ܒܵܬ݇ܪ ܕܵܐܢܝܼ ܡܛܹܐܠܵܗ̇ ܓܵܡܝܼ ܕܦܸܠܚܵܢܵܢܹ̈ܐ ܕܩܲܕܝܼܫܵܐ ܡܵܪܝ ܐܵܘܓܹܝܢ ܠܒܲܢܕܲܪ ܕܦܠܵܛܬܵܐ ܕܓܵܢܵܐ: ܕܫܵܢܹܐ ܡ̣ܢ ܐܲܢܹ̈ܐ ܚܲܝܹ̈ܐ ܙܲܒ̣ܢܵܢܵܝܹ̈ܐ: ܠܥܵܠܡܵܐ ܕܡܸܠܝܵܐ ܝ݇ܠܹܗ ܟܠܹܗ ܙܲܪ̈ܝܼܦܘܼܝܵܬܹܐ ܘܚܲܕܘܼܝܵܬܹ̈ܐ: ܘܡܣܘܼܩܠܵܐ ܒܫܘܼܦܪܹ̈ܐ ܠܵܐ ܡܸܬܚܲܙܝܵܢܹ̈ܐ. ܘܦܝܼܫܠܹܗ ܓܸܠܝܵܐ ܠܩܲܕܝܼܫܵܐ ܡܵܪܝ ܐܵܘܓܹܝܢ ܓܸܠܝܵܢܵܐ ܕܦܠܵܛܬܵܐ ܕܓܵܢܹܗ: ܘܪܸܓ̣݇ܫܠܹܗ ܘܝ݇ܕܸܥܠܹܗ ܒܡܵܘܬܵܐ ܚܵܝܵܐ ܕܫܘܼܢܵܝܹܗ: ܘܩܪܹܐܠܹܗ ܠܟܠܲܝܗܝ ܐܲܚܘܿܢܘܵܬܹ̈ܐ ܘܦܘܼܩܕܵܝܠܹܗ ܘܐ݇ܡܸܪܹܗ ܐܸܠܲܝܗܝ: ܩܘܼܡܘܼܢ ܡܚܝܼܡܘܿܢ ܢܵܩܘܿܫܵܐ: ܕܓ̰ܲܡܥܝܼ ܟܠܲܝܗܝ ܐܲܚܘܿܢܘܵܬܹ̈ܐ ܘܐܵܬܝܼ ܠܬܸܫܡܸܫܬܵܐ ܕܐ݇ܪ̈ܵܙܹܐ. ܘܩܲܕܫܲܚ ܩܘܼܕܵܫܵܐ: ܚܵܕܲܚ ܒܦܲܓ̣ܪܹܗ ܘܕܸܡܹܗ ܕܡܵܪܲܢ. ܘܥܒ̣ܸܕܠܗ݇ܘܿܢ ܕܵܐܟ̣ܝܼ ܕܐ݇ܡܸܪܹܗ ܐܸܠܲܝܗܝ. ܟܲܕ ܚܕܹܐܠܗ݇ܘܿܢ ܒܐ݇ܪ̈ܵܙܹܐ ܩܲܕܝܼܫܹ̈ܐ ܒܚܲܒ̣ܪܵܒ̣ܘܼܬܵܐ ܕܐܘܼܕܵܠܹܐ ܗ݇ܘܼܵܘ. ܦܝܼܫܠܗ݇ܘܿܢ ܒܘܼܪ̈ܟ̣ܹܐ ܡ̣ܢ ܩܲܕܝܼܫܵܐ. ܗ݇ܘܹܐܠܗ݇ܘܿܢ ܐܵܙܲܕ ܟܠܲܝܗܝ ܕܐܵܙܠ݇ܝܼ ܗ݇ܘܼܵܘ ܠܩܸܠܵܝܬܲܝ̈ܗܝ: ܐܝܼܢܵܐ ܚܲܕ݇ ܡ̣ܢ ܬܲܠܡܝܼܕܹܗ ܗ̇ܘ ܟܹܐ ܥܵܒ̣ܸܕ ܗ݇ܘܼܵܐܠܹܗ ܚܸܠܡܲܬ. ܚܲܕ݇ ܐ݇ܢܵܫܵܐ ܨܦܵܝܝܼ ܗ݇ܘܼܵܐ. ܟܲܕ ܩܘܼܒܸܢܵܗ̇ ܥܕܵܢܵܐ ܕܡܵܘܬܹܗ ܕܣܵܒ̣ܵܐ. ܚܙܹܐܠܹܗ ܠܗ̇ܘ ܡܲܠܲܐܟ̣ܵܐ: ܕܦܩܝܼܕܵܐ ܗ݇ܘܼܵܐ ܡܼܢ ܐܲܠܵܗܵܐ ܕܫܵܩܸܠܵܗ̇ ܓܵܢܹܗ ܕܩܲܕܝܼܫܵܐ: ܟܲܕ ܟܸܠܝܵܐ ܗ݇ܘܼܵܐ ܥܲܠ ܐܲܩܠܵܬ̈ܘܼܗܝ: ܘܦܘܼܫܛܵܝ̈ܗܝ ܐܝܼܕܵܬ̈ܘܼܗܝ: ܘܒܸܛܠܵܒܵܐ ܕܩܵܒܸܠܵܗ̇ ܓܵܢܹܗ: ܘܒܥܕܵܢܵܐ ܕܚܙܹܐܠܹܗ ܬܲܠܡܝܼܕܹܗ ܐܵܗܵܐ ܚܸܙܘܵܐ: ܒܓ̰ܲܠܕܘܼܬܵܐ ܡܘܼܩܘܸܚܠܹܗ ܒܩܵܠܵܐ ܪܵܡܵܐ ܘܐ݇ܡܸܪܹܗ: ܬܵܝܡܘܿܢ ܐܲܚܘܿܢ̈ܘܵܬܝܼ ܦܘܼܫܘܼܢ ܒܘܼܪ̈ܟ̣ܹܐ ܡܼܢ ܩܲܕܝܼܫܵܐ: ܕܗܵܐ ܩܘܼܪܒܸܢܹܗ ܡܲܠܲܐܟ̣ܵܐ ܕܡܵܘܬܵܐ: ܘܫܘܼܪܹܐܠܹܗ ܕܩܲܛܸܥܠܹܗ ܠܐܝܼܠܵܢܵܐ ܕܚܲܝܹ̈ܐ: ܘܣܬܘܿܢܵܐ ܒܲܗܪܸܢܵܢܵܐ: ܘܒܵܒܵܐ ܪܘܼܚܵܢܵܝܵܐ ܕܟܠܲܢ. ܗܵܐ ܚܲܕ݇ܟ̰ܵܐ ܚܲܕ݇ܟ̰ܵܐ ܒܸܬ ܡܲܟ̰ܡܸܥܠܵܗ̇ ܠܫܪܵܓ̣݇ܝܵܐ: ܕܒܲܗܪܘܼܢܹܐ ܗ݇ܘܼܵܐ ܒܦܸܠܚܵܢܵܢ̈ܘܼܗܝ ܠܓܵܢܵܬܹ̈ܐ ܕܚܸܫܟܵܢܹ̈ܐ ܗ݇ܘܼܵܘ ܒܚܛܝܼܬܵܐ. ܘܒܓ̰ܲܠܕܝܘܼܬܵܐ ܪܚܸܛܠܗ݇ܘܿܢ ܟܠܲܝܗܝ ܐܲܚܘܿܢܘܵܬܹ̈ܐ: ܘܟܠ ܐ݇ܢܵܫܵܐ ܚܵܦܘܿܛܹܐ ܗ݇ܘܼܵܐ ܕܩܲܕ݇ܡܵܝܬܵܐ ܦܵܐܸܫ ܒܘܼܪܟ̣ܵܐ ܡܸܢܹܗ. ܘܐ݇ܬܹܐܠܗ݇ܘܿܢ ܟܠܲܝܗܝ ܘܟܠܹܐܠܗ݇ܘܿܢ ܩܵܕ݇ܡܘܼܗܝ: ܦܲܪܦܘܼܠܹܐ ܗ݇ܘܼܵܘ ܒܬܵܢܲܚܬܵܐ ܓܘܼܪܬܵܐ ܘܒܹܐܡܵܪܵܐ ܗ݇ܘܼܵܘ ܐܸܠܹܗ: ܕܒܵܒܲܢ: ܡ̣ܢ ܐܵܕܝܼܵܐ ܡܵܢܝܼ ܝ݇ܠܹܗ ܕܗܲܝܸܪܲܢ ܥܲܠ ܕܸܫ̰ܡܸܢܲܢ؟ ܘܵܝ ܐܸܠܲܢ ܒܵܒܲܢ: ܥܒ̣ܘܼܕ ܒܵܘܲܪ ܒܸܬ ܗܵܟܸܡ ܒܝܼܲܢ ܚܲܝܠܹܗ ܕܣܵܛܵܢܵܐ! ܘܟܲܕ ܝ݇ܕܸܥܠܗ݇ܘܿܢ ܟܠܲܝܗܝ ܕܩܘܼܪܒܸܢܵܐ ܥܕܵܢܵܐ ܕܦܠܵܛܬܵܐ ܕܓܵܢܹܗ: ܩܘܼܪܒܸܢܘܿܢ ܘܦܘܼܦܸܠܗ݇ܘܿܢ ܒܝܼـܹܗ: ܘܐܵܡܪܝܼ ܐܸܠܹܗ: ܨܵܠܝܼ ܒܘܼܬ ܕܝܼܲܢ ܒܵܒܲܢ ܘܥܲܠ ܟܠܹܗ ܥܵܠܡܵܐ. ܘܦܬܸܚܠܹܗ ܥܲܝܢܵܬ̈ܘܼܗܝ ܘܓܘܼܫܸܩܠܹܗ ܒܟܠܲܝܗܝ ܟܲܕ ܓ̰ܸܡܥܝܹ̈ܐ ܗ݇ܘܼܵܘ: ܘܪܫܸܡܠܹܗ ܥܲܠܲܝܗܝ ܢܝܼܫܲܢܩܵܐ ܕܨܠܝܼܒ̣ܵܐ: ܘܒܘܼܪܟ̣ܵܝܠܹܗ ܒܕܵܡܲܝܬܵܐ ܕܝܲܥܩܘܿܒ̣ ܠܒܢܘܿܢ̈ܘܼܗܝ: ܘܐܘܼܦ ܠܟܠ ܚܲܕ݇ ܡܸܢܲܝܗܝ ܒܫܸܡܹܗ ܒܸܩܪܵܝܵܐ ܗ݇ܘܼܵܐ ܘܡܒܵܪܘܼܟ̣ܹܐ ܗ݇ܘܼܵܐ.
ܘܡ̣ܢ ܗ̇ܘ ܕܡܘܼܫܦܸܚܠܹܗ ܨܠܵܘܵܬܹ̈ܐ ܘܒܘܼܪ̈ܟܵܬܹܐ ܥܲܠ ܟܠܲܝܗܝ ܐܲܚܘܿܢܘܵܬܹ̈ܐ: ܘܡܸܢ݇ܕܪܸܫ݇ ܡܘܼܠܝܸܨܠܗ݇ܘܿܢ ܐܲܚܘܿܢܘܵܬܹ̈ܐ ܘܐܵܡܪܝܼ ܐܸܠܹܗ: ܒܵܒܲܢ: ܨܵܠܝܼ ܒܘܼܬ ܥܵܠܡܵܐ ܘܒܘܼܬ ܓ̰ܘܼܢܓ̰ܵܪܹ̈ܐ ܕܒܸܬ ܬܲܦܩܝܼ ܒܝܼـܹܗ. ܐܵܗܵܐ ܩܲܕܝܼܫܵܐ ܡܘܼܫܡܸܥܠܹܗ ܠܒܵܥܘܼܬܵܐ ܕܒܢܘܿܢ̈ܘܼܗܝ ܨܘܼܠܹܐܠܹܗ ܘܐ݇ܡܸܪܹܗ: ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ ܕܟܹܐ ܝܵܬܸܒ̣ ܥܲܠ ܟܪ̈ܘܿܒ̣ܹܐ: ܫܡܸܥ ܩܵܠܹܗ ܕܪܹܓܘܼܟܼ ܙܲܒܘܼܢ: ܘܩܲܒܸܠ ܨܠܘܿܬܹܗ. ܕܵܐܟ̣ܝܼ ܕܐ݇ܡܸܪܹܗ ܦܘܼܡܘܼܟܼ ܩܲܕܝܼܫܵܐ: ܕܩܪܝܼܡܘܿܢ ܘܐܵܢܵܐ ܒܸܬ ܓ̰ܵܘܘܸܒܸܢ ܐܸܠܵܘܟ̣ܘܿܢ: ܘܬܲܩܬܸܩܘܿܢ ܘܐܵܢܵܐ ܒܸܬ ܦܲܬܚܸܢ ܐܸܠܵܘܟ̣ܘܿܢ: ܒܘܼܬ ܕܐܵܗܵܐ ܒܸܛܠܵܒܵܐ ܝ݇ܘܸܢ ܘܦܲܪܦܘܼܠܹܐ ܝ݇ܘܸܢ ܒܝܼܘܼܟܼ: ܕܫܲܡܥܸܬܿ ܘܦܵܨܹܝܬܿ ܠܗ݇ܘܿܢ ܓ̰ܲܠܕܹܐ ܠܟܠܲܝܗܝ ܐܵܢܝܼ ܕܕܲܟ̣ܪܝܼ ܫܸܡܘܼܟܼ ܩܲܕܝܼܫܵܐ ܘܫܸܡܹܗ ܕܪܹܓܘܼܟܼ ܙܲܒܘܼܢ. ܘܒܲܛܸܠ ܠܗ݇ܘܿܢ ܠܪܵܒܵܐ ܓ̰ܘܼܪ̈ܵܒܹܐ ܕܬܵܡܵܐ ܘܠܵܐ ܗܲܟܸܡ ܒܗ̇ܘ ܐܲܬܪܵܐ ܠܵܐ ܒܲܪܕܵܐ: ܘܠܵܐ ܩܲܡܨܵܐ: ܘܠܵܐ ܦܵܘܚܵܐ ܫܲܚܝܼܢܵܐ ܘܠܵܐ ܝܲܪܩܵܢܵܐ [ܗ̄:ܕ̄. ܡܲܪܥܵܐ ܕܟܹܐ ܛܵܦܸܐ ܒܙܪܘܼܥܬܵܐ]: ܘܠܵܐ ܕܸܫ̰ܡܸܢ ܡܲܚܪܸܒ̣ܵܢܵܐ: ܘܠܵܐ ܡܵܘܬܵܐ ܕܓ̰ܠܲܒ̣ܬܵܐ: ܘܠܵܐ ܩܛܥܵܝܬܵܐ ܕܒܢܘܿܢܹ̈ܐ ܘܒܢܵܬܹ̈ܐ: ܘܠܵܐ ܡܲܪ̈ܥܹܐ ܕܫܹܐܕܹ̈ܐ: ܕܦܵܐܸܫ ܚܩܝܼܪܵܐ ܫܸܡܘܼܟܼ ܩܲܕܝܼܫܵܐ ܒܲܝܢܵܬܲܝܗܝ. ܘܐܵܡܪܝܼ ܟܠܲܝܗܝ: ܐܵܡܹܝܢ.
ܘܦܘܼܫܸܛܠܹܗ ܐܝܼܕܵܬ̈ܘܼܗܝ ܘܐܲܩܠܵܬ̈ܘܼܗܝ: ܘܣܘܼܦܝܼܠܹܗ ܗ̇ܝ ܓܵܢܹܗ ܨܦܝܼܬܵܐ ܘܛܘܼܒ̣ܵܢܝܼܬܵܐ ܠܡܵܪܲܢ. ܗܲܪ ܒܗ̇ܝ ܥܕܵܢܵܐ ܦܝܼܫܠܹܗ ܡܸܠܝܵܐ ܗ̇ܘ ܒܲܝܬܵܐ ܪܹܝܚܵܐ ܗܲܢܝܼܐܵܐ ܘܒܲܣܝܼܡܵܐ: ܘܦܝܼܫܠܹܗ ܗ̇ܘ ܪܹܝܚܵܐ ܩܵܐ ܚܲܕ݇ ܥܕܵܢܵܐ ܝܵܪܝܼܟ̣ܬܵܐ. ܗܵܝܓܵܗ ܓ̰ܡܸܥܠܹܗ݇ܘܿܢ ܡ̣ܢ ܟܠܹܗ ܓܹܒܵܢܹ̈ܐ ܕܲܝܪ̈ܵܝܹܐ ܘܟܵܗܢܹ̈ܐ ܘܡܫܲܡܫܵܢܹ̈ܐ ܘܡܗܘܼܡܢܹ̈ܐ ܐܲܝܟܼ ܬܠܵܬ݇ܐ ܐܲܠܦܹ̈ܐ: ܘܥܒ̣ܸܕܠܗ݇ܘܿܢ ܘܲܥܕܵܐ ܟܠܲܝܗܝ ܣܵܒ̣ܹ̈ܐ ܒܢܲܝ̈ ܓ̰ܵܡܵܥܲܬܹܗ. ܗܵܝܓܵܗ ܡܫܘܼܡܸܫܠܲܢ ܘܛܘܼܡܸܪܲܢ ܒܐܝܼܩܵܪܵܐ ܓܘܼܪܵܐ ܟܲܕ ܒܸܟ̣ܝܵܐ ܝ݇ܘܲܚ ܗ݇ܘܼܵܘ ܘܒܸܠܝܵܝܵܐ: ܘܦܝܼܫܠܲܢ ܩܸܛܥܝܹ̈ܐ ܡ̣ܢ ܚܙܵܝܬܹܗ ܘܚܲܒ̣ܪܵܒ̣ܘܼܬܹܗ ܕܒܵܒܲܢ ܪܘܼܚܵܢܵܐ. ܘܗ݇ܘܹܐܠܲܢ ܝܵܬܘܿܡܹ̈ܐ. ܘܟܘܼܪܡܸܟ̣ܠܲܢ ܘܡܘܼܬܸܒ̣ܠܲܢ ܒܓܸܦܝܼܬܵܐ ܬܪܹܝܢ ܛܵܩܹ̈ܐ ܕܬܚܘܿܬ ܡܲܕܒ̱ܚܵܐ ܕܒܢܝܼ ܗ݇ܘܼܵܐ ܠܹܗ ܐܵܗܵܐ ܩܲܕܝܼܫܵܐ: ܕܝܼܠܵܗ̇ ܬܚܘܿܬ ܬܪܘܿܢܘܿܣ ܕܐ݇ܪ̈ܵܙܹܐ ܐܲܠܵܗܵܝܹ̈ܐ. ܗܵܕܟ̣ܵܐ ܗ݇ܘܹܐܠܹܗ ܡܵܘܬܹܗ ܝܲܥܢܹܐ ܫܩܲܠܬܵܐ ܕܟܠܝܼܠܹܗ ܠܝܵܘܡܵܢܹ̈ܐ ܒܝܲܪܚܵܐ ܕܢܝܼܣܵܢ ܥܸܣܪܝܼܢ ܘܚܲܕ݇ ܒܝܼـܹܗ: ܒܫܹܢ݇ܬܵܐ ܫܸܬܡܐܵܐ ܘܫܲܒ̣ܥܝܼܢ ܘܐܲܪܒܥܵܐ ܠܝܵܘܢܵܝܹ̈ܐ. ܟܲܕ ܦܲܪܦܘܼܠܹܐ ܝ݇ܘܲܚ: ܕܡܲܚܫܸܚܠܲܢ ܡܵܪܲܢ ܒܨܠܵܘܵܬܹ̈ܗ: ܕܵܐܟ̣ܝܼ ܕܚܕܸܪܲܢ ܥܲܡܹܗ ܓܵܘ ܕܐܵܗܵܐ ܥܵܠܡܵܐ ܥܵܒ̣ܘܿܪܵܐ: ܒܥܵܠܡܵܐ ܕܠܹܐ ܥܵܒ̣ܸܪ ܥܵܒ̣ܕܲܚ ܒܘܼܣܵܡܵܐ ܒܚܙܵܝܬܹܗ ܐܵܡܹܝܢ.
ܐܲܢܹ̈ܐ ܝ݇ܢܵܐ ܚܲܕ݇ܟ̰ܵܐ ܡ̣ܢ ܡܘܼܕܝܼ ܕܦܠܸܚܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܒܚܲܝܠܹܗ ܕܡܫܝܼܚܵܐ ܟܬܸܒ̣ܠܝܼ ܐܸܠܵܘܟ̣ܘܿܢ: ܝܵܐ ܡܲܚܸܒܵܢܹ̈ܐ ܕܡܫܝܼܚܵܐ: ܟܲܕ ܙܕܸܥܠܝܼ ܠܹܐܙܵܠܵܐ ܠܝܵܡܵܐ ܕܩܸܣܲܬ̈ܘܼܗܝ: ܥܒ̣ܘܼܕ ܒܵܘܲܪ ܠܹܐ ܡܵܨܸܢ ܠܹܐܙܵܠܵܐ ܘܦܵܝܫܸܢ ܚܢܝܼܩܵܐ: ܒܘܼܬ ܕܐܵܗܵܐ ܐܲܚܟ̰ܝܼ ܠܡܲܪ̈ܙܵܢܘܼܗܝ ܚܕܸܪܝܼ. ܘܐܲܝܟܼ ܐ݇ܢܵܫܵܐ ܕܒܸܥܒ̣ܵܪܵܐ ܝ݇ܠܹܗ ܠܟܲܪܡܵܐ ܕܒܛܥܘܼܢܝܵܬ̈ܘܼܗܝ ܪܵܒܵܐ ܘܥܵܡܘܼܪܹ̈ܐ ܒܪܹ̈ܝܚܲܝܗܝ ܗܲܢܝܼܐܵܐ: ܟܠ ܚܲܕ݇ ܡܸܢܲܝܗܝ ܒܸܫܩܵܠܵܐ ܗ݇ܘܼܵܘ ܡܸܢܲܝܗܝ ܚܲܕ݇ ܣܵܗ݇ܡܵܐ: ܕܗܵܘܹܐ ܠܹܗ ܒܲܣܝܼܡܘܼܬܵܐ ܡ̣ܢ ܚܸܠܝܘܼܬܲܝܗܝ. ܗܵܕܟ̣ܵܐ ܐܘܼܦ ܐܵܢܵܐ ܥܒ̣ܸܪܝܼ ܠܟܲܪܡܵܐ ܕܓ̣ܵܠܝܼܒܘܼܝܵܬܹ̈ܐ ܕܩܲܕܝܼܫܵܐ: ܓ̰ܘܼܡܸܥܠܝܼ ܚܲܕ݇ܟ̰ܵܐ ܡܠܘܿܐܵܐ ܡ̣ܢ ܪܵܒܵܐ: ܡܘܼܬܸܒ̣ܠܝܼ ܩܵܕ݇ܡܵܘܟ̣ܘܿܢ ܠܐܵܢܝܼ ܕܡܘܼܫܬܵܪܝܼ ܝ݇ܢܵܐ ܠܚܲܒܪܵܐ ܕܓ̣ܵܠܝܼܒܘܼܝܵܬ̈ܘܼܗܝ. ܡܣܵܒܵܒ ܕܠܵܐ ܝ݇ܕܸܥܠܝܼ ܕܟܲܬܒ̣ܸܢ ܒܣܸܕܪܵܐ ܚܫܝܼܚܵܐ ܠܟܠܲܝܗܝ ܐܵܢܝܼ ܕܥܒ̣ܸܕܠܹܗ ܩܲܕܝܼܫܵܐ ܒܩܘܼܪܒܵܐ ܘܒܪܸܚܩܵܐ: ܘܡܸܢ݇ܕܪܹܫ݇ ܠܹܐ ܥܲܒ̣ܕܼܢ ܝܘܼܩܪܵܐ ܥܲܠ ܫܲܡܥܵܢܹ̈ܐ: ܘܡ̣ܢ ܕܐܵܗܵܐ ܒܸܬ ܫܵܒ̣ܸܩܠܵܘܟ̣ܘܿܢ ܛܘܼܦ̮ܣܵܐ ܠܟܸܣ ܬܲܡܒܵܠܘܼܬܵܐ ܘܠܵܘܡܵܐ ܘܓܢܵܗܵܐ: ܘܐܲܢܹ̈ܐ ܕܟܬܝܼܒ̣ܵܝܠܝܼ ܡܸܢܲܝܗܝ ܝܼܗ݇ܘܼܵܘ ܕܫܩܝܼܠܵܝܠܝܼ ܡ̣ܢ ܦܘܼܡܵܐ ܕܐ݇ܢܵܫܹ̈ܐ ܫܲܪܝܼܪܹ̈ܐ: ܘܡܸܢܲܝܗܝ ܐܵܢܵܐ ܒܥܲܝܢ̈ܝܼ ܚܸܙܝܵܝܠܝܼ. ܡܣܵܒܵܒ ܩܵܐ ܪܵܒܵܐ ܥܕܵܢܵܐ ܗ݇ܘܹܐܠܝܼ ܥܲܡܹܗ ܐܵܢܵܐ ܡܝܼܟ̣ܵܐܹܝܠ. ܘܒܸܛܠܵܒܵܐ ܝ݇ܘܸܢ ܡ̣ܢ ܕܐܵܢܝܼ ܕܬܲܦܩܝܼ ܒܐܵܗܵܐ ܬܲܫܥܝܼܬܵܐ: ܕܠܵܐ ܫܵܒ̣ܩܝܼ ܠܚܝܼܵܠܲܝ̈ܗܝ ܕܐܵܬܝܼ ܠܟܸܣ ܠܵܐ ܗܲܝܡܵܢܘܼܬܵܐ. ܐܝܼܢܵܐ ܕܗܲܝܡܸܢܝܼ: ܕܗ̇ܘ ܕܥܒ̣ܸܕܠܹܗ ܒܐܝܼܕܵܬܹ̈ܐ ܕܫܠܝܼܚܹ̈ܐ ܩܲܕܝܼܫܹ̈ܐ ܟܠܲܝܗܝ ܐܵܢܝ ܕܟܬܝܼܒ̣ܹ̈ܐ ܝ݇ܢܵܐ: ܐܵܗܵܐ ܥܒ̣ܸܕܠܹܗ ܐܘܼܦ ܒܐܝܼܕܵܬܹ̈ܐ ܕܐܵܗܵܐ ܩܲܕܝܼܫܵܐ ܐܲܢܹ̈ܐ ܟܠܲܝܗܝ. ܐܝܼܢܵܐ ܐܵܢܵܐ ܡܝܼܟ̣ܵܐܹܝܠ ܕܡܛܹܐܠܝܼ ܠܒܲܢܕܲܪ ܕܬܲܫܥܝܼܬܹܗ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܕܚܫܸܚܠܝܼ ܒܨܠܵܘܵܬܹ̈ܗ ܕܡܲܬܒ̣ܸܢ ܩܵܕ݇ܡ ܫܲܡܥܵܢܹ̈ܐ ܦܸܠܣܵܐ ܕܗܲܡܙܲܡܬܝܼ ܡܸܣܟܸܢܬܵܐ ܒܸܛܠܵܒܵܐ ܝ݇ܘܸܢ ܡ̣ܢ ܟܠܲܝܗܝ ܐܵܢܝܼ ܕܬܲܦܩܝܼ ܒܐܵܗܵܐ ܬܲܫܥܝܼܬܵܐ: ܕܬܲܡܸܡܝܼ ܨܠܵܘܵܬܲܝ̈ܗܝ ܫܸܡܥܝܹ̈ܐ ܒܘܼܬ ܕܝܼܝܼ ܕܚܲܫܚܸܢ ܠܪ̈ܲܚܡܹܐ ܒܝܵܘܡܵܐ ܕܕܝܼܘܵܢ: ܐܵܡܹܝܢ.
ܐܝܼܢܵܐ ܨܠܵܘܵܬܹ̈ܗ ܕܩܲܕܝܼܫܵܐ ܡܵܪܝ ܐܵܘܓܹܝܢ ܘܕܡܵܪܝ ܝܲܥܩܘܿܒ̣ ܐܲܦܸܣܩܘܿܦܵܐ ܕܡܕܝܼܢ݇ܬܵܐ ܕܢܨܝܼܒ̣ܝܼܢ: ܘܕܡܵܪܝ ܡܝܼܠܘܿܣ ܐܲܦܸܣܩܘܿܦܵܐ ܘܣܵܗܕܵܐ ܕܡܘܼܕܟ̣ܸܪܝܼ ܒܐܵܗܵܐ ܬܲܫܥܝܼܬܵܐ: ܘܕܟܠܲܝܗܝ ܩܲܕܝܼܫܹ̈ܐ ܕܟܬܝܼܒ̣ܵܝܠܲܢ ܫܸܡܵܢܲܝ̈ܗܝ ܡ̣ܢ ܠܥܸܠܸܠ: ܕܨܠܵܘܵܬܲܝ̈ܗܝ ܗܵܘܝܼ ܥܲܠ ܟܠܹܗ ܥܵܠܡܵܐ ܡ̣ܢ ܩܝܼܵܣܘܼܗܝ: ܘܥܲܠ ܟܠܹܗ ܛܵܝܸܦܵܐ ܕܟܪܸ̈ܣܛܝܵܢܹܐ: ܘܥܲܠ ܐܵܢܝܼ ܕܒܘܼܬ ܫܸܡܹܗ ܕܡܫܝܼܚܵܐ ܕܓܵܒܘܼܝܹܐ ܝ݇ܢܵܐ ܐܵܗܵܐ ܦܸܠܚܵܢܵܐ ܫܲܦܝܼܪܵܐ ܕܝܼܚܝܼܕܵܝܘܼܬܵܐ ܒܟܵܡܝܼܠܘܼܬܵܐ ܥܵܒ̣ܕܝܼ ܠܹܗ ܚܸܠܡܲܬ: ܘܠܚܲܪܬܵܐ ܕܟܠܲܝܗܝ ܐܘܼܦ ܥܲܠ ܗ̇ܘ ܫܲܩܝܼ ܝ݇ܠܹܗ ܘܚܲܛܵܝܵܐ ܕܠܵܐ ܦܝܼܫܠܹܗ ܡܫ݇ܟ̰ܝܼܚܵܐ ܒܝܼـܹܗ ܐܘܼܦ ܠܵܐ ܚܲܕ݇ ܦܸܠܚܵܢܵܐ ܕܨܦܵܝܝܼ ܝ݇ܠܹܗ: ܘܕܟܬܸܒ̣ܠܹܗ ܠܐܵܗܵܐ ܬܲܫܥܝܼܬܵܐ: ܕܗܵܘܝܼ ܫܘܼܪܵܐ ܠܦܘܼܚܵܠܵܐ ܠܣܵܒܵܒ ܕܚܛ̈ܝܼܵܬܲܝܗܝ. ܐܹܝܢ ܘܐܵܡܹܝܢ. ܘܒܘܼܫ ܙܵܘܕܵܐ ܐܘܼܦ ܠܡܵܬܵܐ ܘܒܲܝܬܵܐ ܕܦܝܵܫܵܐ ܝ݇ܠܵܗ̇ ܩܪܝܼܬܵܐ ܐܵܗܵܐ ܬܲܫܥܝܼܬܵܐ ܕܓ̣ܵܠܝܼܒܘܼܝܵܬ̈ܘܼܗܝ ܕܩܲܕܝܼܫܵܐ ܡܵܪܝ ܐܵܘܓܹܝܢ: ܕܢܵܛܸܪܹܗ ܡܵܪܲܢ ܡ̣ܢ ܟܠܲܝܗܝ ܚܘܼܙܕܵܓܹ̈ܐ ܟܸܣܝܹ̈ܐ ܘܐܲܫܟܵܪܵܐ: ܘܠܐܵܢܝܼ ܘܠܒܢܘܿܢ̈ܘܼܗܝ ܘܠܟܠ ܡܸܢܕܝܼ ܕܐܝܼܬܠܗ݇ܘܿܢ: ܐܹܝܢ ܘܐܵܡܹܝܢ.
ܕܗܵܘܝܼ ܨܠܵܘܵܬܲܝ̈ܗܝ ܥܲܠ ܟܠܲܝܗܝ ܟܪܸ̈ܣܛܝܵܢܹܐ: ܕܝܵܗ݇ܒ̣ܸܠܗ݇ܘܿܢ (ܡܵܪܲܢ) ܦܘܼܚܵܠܵܐ ܕܚܛܝܼܵܬܹ̈ܐ: ܕܡܲܚܫܸܚܠܗ݇ܘܿܢ ܠܡܲܠܟܘܼܬܵܐ ܫܡܲܝܵܢܝܼܬܵܐ: ܒܝܼܲܕ ܨܠܵܘܵܬ̈ܵܗ̇ ܕܩܲܕܝܼܫܬܵܐ ܡܲܪܝܲܡ ܝܸܡܹܗ ܕܡܫܝܼܚܵܐ: ܘܕܟܠܲܝܗܝ ܩܲܕܝܼܫܹ̈ܐ. ܘܡܲܫܪܹܗ ܡܵܪܲܢ ܫܲܝܢܵܐ ܘܫܠܵܡܵܐ ܒܥܹܕܵܬܹ̈ܐ ܘܕܲܝܪܹ̈ܐ ܘܒܐܲܪܒܥܵܐ ܓܹܒܵܢܹ̈ܐ ܕܥܵܠܡܵܐ: ܠܥܵܠܲܡ ܥܵܠܡܝܼܢ: ܐܵܡܹܝܢ. ܚܬܸܡܠܵܗ̇ ܬܲܫܥܝܼܬܹܗ ܕܩܲܕܝܼܫܵܐ ܡܵܪܝܼ ܐܵܘܓܹܝܢ ܪܹܫܵܐ ܕܝܼܚܝܼܕܵܝܹ̈ܐ ܕܡܲܕܢ̱ܚܵܐ. ܨܠܘܿܬܹܗ ܥܲܡܲܢ. ܐܵܡܹܝܢ ܘܐܵܡܹܝܢ.
ܘܡܸܢ݇ܕܪܸܫ݇ ܐܘܼܦ ܦܝܼܫܠܗ݇ܘܿܢ ܥܘܼܓ̰ܒܹ̈ܐ ܣܵܘܓܘܼܠܝܼ ܒܚܸܩܪܹܗ ܕܩܲܕܝܼܫܵܐ: ܕܡ̣ܢ ܩܵܕ݇ܡ ܝܵܘܡܵܐ ܕܡܵܘܬܹܗ ܒܬܠܵܬ݇ܐ ܝܵܘܡܵܢܹ̈ܐ: ܫܘܼܕܸܪܹܗ ܐܲܠܵܗܵܐ ܠܓܲܒ̣ܪܝܹܠ ܡܲܠܲܐܟ̣ܵܐ ܡ̣ܢ ܫܡܲܝܵܐ ܠܟܸܣ ܩܲܕܝܼܫܵܐ: ܗ̇ܘ ܟܲܕ ܟܸܠܝܵܐ ܒܨܠܘܿܬܵܐ: ܘܐ݇ܡܸܪܹܗ: ܫܠܵܡܵܐ ܐܸܠܘܼܟܼ ܒܵܒܵܐ. ܡ̣ܢ ܫܡܲܝܵܐ ܨܠܹܐܠܹܗ ܐܸܠܘܼܟܼ ܫܠܵܡܵܐ: ܘܡܵܪܝܵܐ ܩܲܡ ܫܵܕܸܪܝܼ ܠܸܥܒ̣ܵܕܵܐ ܚܸܠܡܲܬ ܩܵܬܘܼܟܼ: ܘܠܲܝܬ ܨܠܘܿܬܵܐ ܘܒܵܥܘܼܬܵܐ ܘܡܲܚܲܒܬܵܐ ܫܲܪܝܼܪܬܵܐ ܩܵܕ݇ܡ ܐܲܠܵܗܵܐ ܙܵܘܕܵܐ ܡ̣ܢ ܕܗ̇ܝ ܕܝܼܘܼܟܼ. ܘܐܵܕܝܼܵܐ ܝܵܐ ܒܵܒܵܐ: ܚܙܝܼ ܚܲܝܠܵܐ ܐܲܝܢܝܼ ܕܡܸܢܲܝܗܝ ܗܵܘܝܼ ܦܠܝܼܚܹ̈ܐ ܓܵܘ ܥܘܼܡܪܘܼܟܼ ܘܒܓܲܪ̈ܡܘܼܟܼ ܩܲܕܝܼܫܹ̈ܐ: ܕܫܵܕܸܪ ܡܲܠܲܐܟ̣ܵܐ ܕܦܵܠܸܚܠܗ݇ܘܿܢ ܗܲܠ ܠܥܵܠܲܡ ܒܕܵܡܲܝܬܵܐ ܕܝܼܘܼܟܼ: ܗܵܝܓܵܗ ܛܘܼܒ̣ܵܢܵܐ ܓ̰ܘܼܘܸܒܠܹܗ ܠܡܲܠܲܐܟ̣ܵܐ: ܕܒܵܥܸܢ ܡܵܪܝܼ: ܡ̣ܢ ܒܵܬ݇ܪ ܕܡܘܼܫ݇ܟ̰ܸܚܠܝܼ ܪ̈ܲܚܡܹܐ ܒܥܲܝܢܹ̈ܐ ܕܡܵܪܝܵܐ ܐܲܠܵܗܵܐ: ܕܦܲܠܸܓ݇ܗ ܚܲܝܠܹ̈ܐ ܘܚܵܠܥܲܬܹ̈ܐ ܠܐܲܚܘܿܢܘܵܬܹ̈ܐ ܟܝܵܢܵܝܹ̈ܐ ܕܝܼܝܼ: ܘܠܬܲܠܡܝܼܕܹ̈ܐ ܐܵܢܝܼ ܕܥܒ̣ܸܕܠܗ݇ܘܿܢ ܚܸܠܡܲܬ ܩܵܬܝܼ. ܓ̰ܘܼܘܸܒܠܹܗ ܡܲܠܲܐܟ̣ܵܐ ܘܐ݇ܡܸܪܹܗ ܠܟܘܼܟ̣ܒ̣ܵܐ ܠܵܘܓ̰ܵܢܵܐ: ܕܓܘܼܒܝܼܠܹܗ ܠܚܲܝܠܹ̈ܐ ܕܡ̣ܢ ܓܲܪ̈ܡܹܐ ܡܝܲܬܪܹ̈ܐ ܕܝܼܘܼܟܼ ܕܦܵܝܫܝܼ ܦܠܝܼܚܹ̈ܐ: ܗܵܝܓܵܗ ܐܘܼܦ ܬܲܠܡܝܼܕ̈ܘܼܟܼ ܚܲܕ݇ ܚܲܕ݇ ܚܲܝܠܵܐ ܗܲܒ̣݇ܠܗ݇ܘܿܢ ܠܗ̇ܘ ܕܒܣܵܡܘܼܟܼ ܝ݇ܠܵܗ̇. ܘܛܠܸܒܠܹܗ ܡ̣ܢ ܐܲܠܵܗܵܐ ܥܸܠܵܝܵܐ ܘܚܩܝܼܪܵܐ ܘܐ݇ܡܸܪܹܗ: ܒܸܛܠܵܒܵܐ ܝ݇ܘܸܢ ܝܵܐ ܡܵܪܝܵܐ ܐܲܠܵܗܵܐ ܡ̣ܢ ܝܵܡܵܐ ܕܪ̈ܲܚܡܘܼܟܼ: ܕܟܠ ܐ݇ܢܵܫܵܐ ܕܡܓܵܘܣܸܢ ܒܫܸܡܘܼܟܼ ܘܩܵܪܹܐܠܹܗ ܠܪܹܓܘܼܟܼ: ܠܵܐ ܚܵܙܝܼ ܒܝܼܫܵܬܹ̈ܐ ܘܥܝܼܩܘܼܝܵܬܹ̈ܐ. ܘܡܝܼܬܹ̈ܐ ܐܵܢܝܼ ܕܡܝܼܬܹ̈ܐ ܝ݇ܢܵܐ ܘܦܝܵܫܵܐ ܝ݇ܢܵܐ ܡܘܼܬܒ̣ܹ̈ܐ ܓܵܘ ܥܘܼܡܪܵܐ ܕܝܼܝܼ ܘܓܵܘ ܡܘܼܠܟܵܢܹ̈ܐ ܕܚܵܕܸܪ̈ܘܵܢܹܐ ܘܕܥܲܠ ܫܸܡܝܼ ܦܝܵܫܵܐ ܝ݇ܢܵܐ ܦܪ̈ܝܼܫܹܐ: ܒܝܵܘܡܵܐ ܐ݇ܚܵܪܵܝܵܐ ܠܵܐ ܗܵܘܹܐ ܚܘܼܫܒܸܢܵܐ ܥܲܠܲܝܗܝ: ܘܓܢܵܗܵܬܲܝ̈ܗܝ ܘܚܛܝܼܵܬܲܝ̈ܗܝ ܦܵܝܫܝܼ ܦܘܼܚ̈ܠܹܐ: ܘܥܲܡ ܟܹܐܢܹ̈ܐ ܘܙܲܕܝܼܩܹ̈ܐ ܦܵܝܫܝܼ ܡܸܢܝܹ̈ܐ: ܘܠܪܵܘܡܵܐ ܕܫܡܲܝ̈ܵܐ ܦܵܝܫܝܼ ܪ̈ܝܼܡܹܐ: ܐ݇ܡܸܪܹܗ ܐܸܠܹܗ ܡܲܠܲܐܟ̣ܵܐ: ܒܸܬ ܝܵܗ݇ܒ̣ܸܢܘܼܟܼ ܡܸܢܕܝܼ ܕܒܥܹܐܠܘܼܟܼ. ܐܝܼܢܵܐ ܚܲܕ݇ ܚܲܝܠܵܐ ܐ݇ܚܹܪ݇ܢܵܐ ܓܵܒܝܼܠܘܼܟܼ: ܕܚܵܙܹܐ ܠܥܵܠܡܵܐ: ܕܗܲܝܡܸܢܝܼ ܒܢܲܝ̈ܢܵܫܵܐ ܕܝܑܼܘܸܬܿ ܒܐܵܗܵܐ ܥܵܠܡܵܐ ܡܫܝܼܚܵܐ ܕܬܪܹܝܢܓ̰ܘܼ̰ܘܼܘܸܒܠܹܗ ܗ̇ܘ ܩܲܕܝܼܫܵܐ ܘܐ݇ܡܸܪܹܗ ܐܸܠܹܗ: ܗ̇ܝ ܕܐܵܗܵܐ ܥܵܠܡܵܐ ܠܹܐ ܝ݇ܠܵܗ̇ ܠܵܙܸܡ ܐܸܠܝܼ: ܐܸܠܵܐ ܐܲܚܘܿܢܘܵܬ̈ܝܼ ܘܬܲܠܡܝܼܕ̈ܝܼ ܒܸܬ ܝܵܗܒ̣ܝܼ ܣܵܗܕܘܼܬܵܐ. ܘܡ̣ܢ ܕܐܵܗܵܐ ܫܡܸܥܠܹܗ ܡܲܠܲܐܟ̣ܵܐ: ܦܘܼܠܓ݇ܝܼܠܹܗ ܥܲܠܲܝܗܝ ܚܵܠܥܲܬܹ̈ܐ ܫܡܲܝܵܢܹ̈ܐ: ܕܵܐܟ̣ܝܼ ܟܠ ܚܲܕ݇ ܚܲܕ݇ ܡܸܢܲܝܗܝ ܚܲܝ̈ܠܘܼܗܝ ܘܬܲܫܥܝܼܬܘܼܗܝ ܒܸܣܗܵܕܵܐ ܝ݇ܢܵܐ ܒܘܼܬ ܕܝܼـܹܗ. ܘܗܵܝܓܵܗ ܡܝܼܬܠܹܗ ܣܬܘܿܢܵܐ ܫܲܪܝܼܪܵܐ ܕܝܼܲܢ. ܒܘܼܬ ܕܐܵܗܵܐ ܚܬܸܡܠܵܗ̇ ܬܲܫܥܝܼܬܹܗ ܕܡܵܪܝܼ ܡܵܪܝ ܐܵܘܓܹܝܢ ܩܲܕܝܼܫܵܐ ܘܠܐܲܠܵܗܵܐ ܫܘܼܒ̣ܚܵܐ ܘܫܵܟܲܪܬܵܐ ܠܥܵܠܲܡ ܥܵܠܡܝܼܢ: ܐܹܝܢ ܘܐܵܡܹܝܢ.
♱♱♱♱♱♱♱♱