ܬܫܥܝܬܐ
ܕܡܪܝ ܡܝܟ̣ܐ
ܡ̣ܢ ܟܬܵܒ̣ܵܐ ܕܫܲܪ̈ܒܹܐ ܕܣܵܗܕܹ̈ܐ
ܬܲܫܥܝܼܬܵܐ ܕܡܵܪܝ ܡܝܼܟ̣ܵܐ
ܢܘܼܗܲܕܪܵܝܵܐ ܗ݇ܘܼܵܐ ܡܫܲܡܗܵܐ ܒܓܸܢܣܵܐ
ܒܪܘܿܢܵܐ ܕܚܲܕ݇ ܡ̣ܢ ܪܹ̈ܫܵܢܹܐ ܕܡܓ̣ܘܼܫܵܝܹ̈ܐ.
♱ ܡܲܦܲܩ ܪܘܼܚܵܐ ♱
ܠܵܐ ܡܲܢܫܸܬܿ ܠܝܼ: ܝܵܐ ܒܵܒܲܢ ܡܒܘܼܪܟ̣ܵܐ ܡܵܪܝ ܫܸܡܥܘܿܢ ܩܵܬܘܿܠܝܼܩܵܐ ܦܵܛܲܪܝܲܪܟܵܐ ܣܵܒ̣ܵܐ ܟܟ̰ܝܼܚܵܐ ܘܟܲܫܝܼܪܵܐ: ܐܲܝܟܼ ܐܝܼܘܿܒ̣ ܒܥܕܵܢܵܐ ܕܝܼܲܢ: ܕܵܝܢܘܼܟܼ ܕܝܑܼܠܹܗ ܥܲܠܝܼ ܠܹܐ ܝ݇ܠܹܗ ܦܝܼܫܵܐ ܦܸܪܥܝܵܐ ܗ݇ܘܹܐܠܘܼܟܼ ܚܲܦܛܵܢܵܐ ܠܦܬܲܚܬܵܐ ܕܥܲܝܢ̈ܝܼ ܘܠܡܲܢܬܵܝܬܵܐ ܠܬܲܠܡܲܕܬܝܼ ܒܐܲܠܵܗܵܐ. ܗ̇ܝ ܟܲܕ ܡܚܵܦܘܼܛܹܐ ܝ݇ܘܸܬܿ ܠܬܲܡܒܵܠܘܼܬܝܼ ܠܬܲܚܡܵܢܬܵܐ ܒܐܲܠܵܗܵܐ ܘܝ݇ܠܝܵܦܬܵܐ ܕܟܵܬܵܒ̣ܹ̈ܐ ܐܲܠܵܗܵܝܹ̈ܐ: ܐܵܢܝܼ ܕܒܝܼܲܝܗܝ ܡ̣ܢ ܙܥܘܿܪܘܼܬܘܼܟܼ ܝ݇ܠܸܦܠܘܼܟܼ ܠܚܲܝܹ̈ܐ. ܐܵܗܵܐ ܟܲܕ ܗ݇ܘܹܐܠܘܼܟܼ ܒܓܵܢܘܼܟܼ ܚܕܵܐ ܡܲܚܙܵܝܬܵܐ ܕܟܠ ܚܕܵܐ ܕܵܡܲܝܬܵܐ ܫܲܦܝܼܪܬܵܐ: ܒܦܸܠܚܵܢܵܐ ܘܠܵܐ ܒܗܹܡܸܙܡܵܢܹ̈ܐ. ܐܝܼܢܵܐ ܠܹܐ ܗ݇ܘܼܵܐ ܡ̣ܢ ܣܵܒܵܒ ܕܐܵܢܵܐ ܙܲܒܘܼܢ ܡܘܼܢܬܝܼܠܝܼ: ܗܵܒܲܣ ܝ݇ܠܹܗ ܟܸܟ̰ܚܘܼܟܼ ܠܟܸܣ ܐܲܠܵܗܵܐ. ܣܵܒܵܒ ܢܛܝܼܪܵܐ ܝ݇ܠܹܗ ܦܘܼܪܥܵܢܘܼܟܼ ܒܛܵܝܸܦܵܐ ܕܙܲܕܝܼܩܹ̈ܐ: ܐܲܝܟܼ ܕܐܝܼܬܠܹܗ ܪܸܙܵܝܵܐ ܗܵܕܟ̣ܵܐ ܒܸܬ ܦܵܐܸܫ ܡܩܘܼܒܠܵܐ. ܣܵܒܵܒ ܠܵܘܡܵܐ ܕܓܲܚܙܝܼ ܘܕܝܼܗܘܼܕܵܐ: ܠܹܐ ܗ݇ܘܼܵܐ ܒܹܐܙܵܠܵܐ ܒܵܬ݇ܪ ܐܹܠܝܼܫܲܥ ܘܠܵܐ ܙܹܐ ܒܵܬ݇ܪ ܡܵܪܲܢ: ܐܸܠܵܐ ܒܵܬ݇ܪ ܠܵܐ ܬܪܝܼܨܘܼܬܵܐ ܕܬܲܠܡܝܼܕܹ̈ܐ ܦܟ̰ܝܼܠܹ̈ܐ: ܐܝܼܢܵܐ ܠܓܘܼܪ̈ܵܢܹܐ ܕܫܪܵܪܵܐ ܚܕܵܐ ܡܲܚܙܵܝܬܵܐ ܝ݇ܠܵܗ̇ ܕܪ̈ܲܚܡܹܐ ܘܡܲܪܝܵܟ̣ܬܵܐ ܕܒܝܼܢܵܐ. ܗܵܕܟ̣ܵܐ ܗܲܪ ܗ̇ܝ ܝ݇ܠܵܗ̇ ܚܫܸܚܬܵܐ ܕܣܲܙܓܸܪܵܗ̇ ܪܸܙܵܝܵܐ ܕܝܼܝܼ ܘܕܝܼܘܼܟܼ. ܐܝܼܢܵܐ ܩܵܡܘܿܕܝܼ ܝܵܐ ܒܵܒܵܐ ܣܵܘܓܘܼܠ: ܐܘܼܦ ܠܵܐ ܒܟܵܡܝܼܠܘܼܬܵܐ ܩܛܸܥܠܘܼܟܼ ܗܝܼܒ̣ܝܼ ܕܚܲܛܵܝܘܼܬܝܼ: ܐܝܼܢܵܐ ܟܲܕ ܗ݇ܘܹܐܠܝܼ ܒܸܚܙܵܝܵܐ: ܕܵܐܟ̣ܝܼ ܒܕܵܝܸܡܘܼܬܵܐ ܗ݇ܘܹܐܠܝܼ ܒܸܚܕܵܝܵܐ ܘܗܲܡܙܘܼܡܹܐ ܒܪܸܬܚܵܐ ܕܚܘܼܒܵܐ: ܒܗܹܡܸܙܡܵܢܹ̈ܐ ܕܥܵܩܸܠܕܵܪܹ̈ܐ ܕܫܪܵܪܵܐ ܕܐܲܒ̣ܵܗܵܬܹ̈ܐ ܩܲܕܝܼܫܹ̈ܐ: ܐܵܢܝܼ ܕܪ̈ܫܝܼܡܹܐ ܝ݇ܢܵܐ ܓܵܘ ܟܬܵܒ̣ܲܝ̈ܗܝ: ܒܣܵܒܵܒ ܕܬܲܡܒܵܠܘܼܬܵܐ ܘܛܲܡܲܥܟܵܪܘܼܬܵܐ: ܗ݇ܘܹܐܠܝܼ ܢܘܼܟ̣ܪܵܝܵܐ ܟܡܝܼܠܵܐ ܠܝܲܪܬܘܼܬܲܝܗܝ. ܒܘܼܬ ܕܐܵܗܵܐ ܒܟܠ ܥܕܵܢܵܐ ܗ݇ܘܹܐܠܹܗ ܘܵܝܵܐ ܠܸܩܢܘܿܡܝܼ: ܗ݇ܘܹܐܠܝܼ ܛܸܫܝܵܐ ܠܡܲܩܘܵܝܬܵܐ ܕܫܸܦܠܘܼܬܝܼ ܗ݇ܘܹܐܠܝܼ ܒܹܐܡܵܪܵܐ: ܗܵܠܵܐ ܕܠܹܐ ܝ݇ܠܹܗ ܥܒ̣ܝܼܪܵܐ ܙܲܒ̣ܢܘܼܟܼ ܠܡܵܫ݇ܟ̰ܘܼܚܹܐ: ܐܸܢ ܒܝܼܕܲܥܝܵܐ ܝ݇ܠܹܗ ܐܲܠܵܗܵܐ ܦܝܵܫܵܐ ܝ݇ܘܸܬܿ ܗܘܼܝܸܪܵܐ. ܘܠܵܐ ܚܲܕ݇ ܐ݇ܚܹܪ݇ܢܵܐ: ܐܝܼܢܵܐ ܐܘܼܦ ܒܵܠܲܕ ܝ݇ܘܸܬܿ ܠܚܲܛܵܝܘܼܬܝܼ: ܕܐܸܢ ܡܲܨܝܵܐ ܘܗܵܠܵܐ ܐܲܢ݇ܬܿ ܓܵܘ ܚܲܝܹ̈ܐ ܕܙܲܒ̣ܢܵܐ ܝ݇ܘܸܬܿ: ܕܠܲܩܛܸܢ ܡ̣ܢ ܩܸܣܲܬܲܝ̈ܗܝ ܚܩܝܼܪܹ̈ܐ ܘܥܵܩܸܠܕܵܪܘܼܬܲܝܗܝ ܐܲܠܵܗܵܝܬܵܐ: ܕܡܲܬܒ̣ܸܢܘܼܟܼ ܓܵܘ ܟܬܵܒ̣ܵܐ: ܝܲܥܢܹܐ: ܕܚܵܙܹܝܬܿ ܕܚܵܕܸܬܿ ܩܵܕ݇ܡ ܫܘܼܢܵܝܘܼܟܼ ܕܠܟܸܣ ܡܵܪܲܢ. ܗܵܕܟ̣ܵܐ ܐܵܢܵܐ ܡܸܣܟܹܢܵܐ ܘܙܲܒܘܼܢ: ܘܟܲܕ ܠܲܝܬ ܠܝܼ ܚܲܕ݇ ܡܠܘܿܐܵܐ ܠܟܸܣ ܕܐܵܗܵܐ: ܘܠܵܐ ܕܘܼܪܵܫܵܐ ܘܠܵܐ ܣܘܼܙܓܵܪܵܐ ܕܪܸܙܵܝܵܐ ܕܚܵܠܥܲܬ ܕܐܲܠܵܗܵܐ.
ܒܚܲܒ̣ܠܹ̈ܐ ܦܝܵܫܵܐ ܝ݇ܘܸܢ ܗ݇ܘܼܵܐ ܓܪܝܼܫܵܐ ܒܚܝܼܵܠ: ܕܡܵܪܝܵܐ ܐܲܠܵܗܵܐ ܡܘܼܕܝܼ ܥܵܒ̣ܕܸܢ ܠܣܵܒ̣ܵܐ ܩܲܕܝܼܫܵܐ: ܒܣܵܒܵܒ ܕܠܵܐ ܟܫܝܼܪܘܼܬܝܼ؟ ܡ̣ܢ ܣܵܒܵܒ ܬܲܡܒܵܠܘܼܬܝܼ ܠܵܐ ܡܘܼܚܕܝܼܠܝܼ ܐܸܠܹܗ ܒܬܪܝܼܨܘܼܬܝܼ ܘܒܚܕܲܪ̈ܝܵܬܝܼ: ܘܒܦܲܓ̣ܪܝܼ ܠܵܐ ܥܒ̣ܸܕܠܝܼ ܪܵܙܝܼ ܐܸܠܹܗ. ܘܡܸܢ݇ܕܪܸܫ̄ ܐܵܗܵܐ ܕܗ̇ܘ ܟܹܐ ܒܵܥܹܐ ܕܝܑܼܠܵܗ̇ ܗܹܡܸܙܡܵܢܹ̈ܐ: ܟܡܵܐ ܓܵܗܹ̈ܐ ܠܟܸܣ ܐܵܢܝܼ ܕܠܹܐ ܝ݇ܢܵܐ ܕܸܟ̣ܝܹ̈ܐ ܡܘܼܫ݇ܟ̰ܸܚܬܵܐ ܝ݇ܠܵܗ̇. ܕܠܹܐ ܗ݇ܘܼܵܐ ܕܠܵܐ ܒܝܘܼܠܦܵܢܝܼ ܝܲܢ ܩܪܵܝܬܝܼ ܠܹܐ ܝ݇ܘܸܢ ܡܲܨܝܵܢܵܐ ܠܸܕܒ̣ܵܩܘܼܗ̇. ܐܝܼܢܵܐ ܟܲܕ ܒܐܵܢܝܼ ܩܵܐ ܪܵܒܵܐ ܥܕܵܢܵܐ ܦܝܵܫܵܐ ܝ݇ܘܸܢ ܗ݇ܘܼܵܐ ܓ̰ܘܼܢܓ̰ܸܪܵܐ ܐܲܝܟܼ ܕܒܝܼܕܲܥܝܵܐ ܝ݇ܠܵܗ̇ ܐܲܒ̣ܵܗܘܼܬܘܼܟܼ ܩܵܐ ܚܲܕ݇ ܥܕܵܢܵܐ ܝܵܪܝܼܟ̣ܬܵܐ: ܕܒܵܠܵܕܘܼܬܘܼܟܼ ܠܟܸܣܠܝܼ: ܡܘܼܩܘܝܼܠܘܼܟܼ ܬܲܚܡܵܢܬܵܐ ܡ̣ܢ ܓܵܘܵܐ ܕܐܵܗܵܐ ܙܲܒ̣ܢܵܐ. ܒܹܐܡܵܪܵܐ ܕܐܸܢ ܡܲܨܝܵܐ ܨܠܘܿܬܹܗ ܕܣܵܒ̣ܵܐ: ܡܲܬܪܝܼܵܐ ܠܒܵܪܘܿܙܘܼܬܵܐ ܕܚܝܼܵܠܘܼܟܼ: ܘܡܲܙܝܸܕܵܗ̇ ܒܝܼܘܼܟܼ ܛܥܘܿܢܝܵܬܹ̈ܐ ܕܦܲܪܡܵܝܬܵܐ: ܘܗܲܡܙܸܡܵܗ̇ ܒܝܼܘܼܟܼ ܒܚܲܝܠܵܐ ܕܫܵܦܵܩܲܬ: ܐܲܝܟܼ ܚܡܲܪܬܵܐ ܕܒܸܠܥܲܡ ܒܐܵܗܵܐ ܙܲܒ̣ܢܵܐ. ܒܘܼܬ ܚܲܕܘܼܬܹܗ ܕܩܲܕܝܼܫܵܐ: ܘܒܘܼܬ ܪܸܙܵܝܘܼܬܵܐ ܕܚܝܼܵܠܹܗ. ܡ̣ܢ ܐܵܕܝܼܵܐ ܝܵܐ ܒܵܒܵܐ ܣܲܪܲܣܬ: ܫܩܸܠܝܼ ܚܲܝܠܵܐ ܕܡܲܩܪܸܒ̣ܸܢ ܒܗܝܼܒ̣ܝܼ ܕܨܵܠܵܘܵܬ̈ܘܼܟܼ ܫܸܡܥܝܹ̈ܐ. ܠܡܹܐܙܵܠܬܵܐ ܕܐܘܼܪܚܵܐ ܕܗܸܟ̰ ܠܹܐ ܝ݇ܘܸܢ ܗ݇ܘܼܵܐ ܐ݇ܙܹܠܵܐ ܡ̣ܢ ܩܲܕ݇ܡܵܝܬܵܐ ܐܘܼܦ ܠܵܐ ܒܚܝܼܵܠ ܘܬܲܚܡܵܢܬܵܐ: ܗ݇ܘܝܼܬܵܐܠܵܗ̇ ܐܸܠܝܼ: ܟܲܕ ܡܘܼܬܸܒ̣ܠܝܼ ܩܵܕ݇ܡܝܼ ܬܪܹܝܢ ܬܲܚܡܵܢܝܵܬܹ̈ܐ: ܕܝܲܢ ܡܲܢܬܹܐ ܥܲܡܝܼ ܡܫܝܼܚܵܐ ܚܲܠܸܢܵܢܵܐ ܕܙܲܒܘܼܢܹ̈ܐ: ܕܥܵܒ̣ܕܸܢ ܪܵܙܝܼ ܠܫܲܗܘܲܬܘܼܟܼ: ܝܲܢ ܟܲܕ ܡܲܙܝܸܕܸܢ ܘܟܲܟ̰ܚܸܢ ܘܠܵܐ ܓܲܫܩܸܢ ܝܲܢ ܝܵܕܥܸܢ ܕܒܸܬ ܓܵܘܣܸܢܵܐ ܚܝܼܵܠܘܼܟܼ ܐܲܠܵܗܵܝܬܵܐ: ܕܐܲܝܟܼ ܕܡ̣ܢ ܚܝܼܵܠܝܼ ܠܵܐ ܥܘܼܪܩܸܠܝܼ ܝܲܢ ܦܝܼܫܠܝܼ: ܟܲܕ ܒܸܫܪܵܝܵܐ ܝ݇ܘܸܢ ܝܸܣܘܼܪܵܐ ܕܠܸܫܵܢܝܼ ܬܒ̣ܝܼܢܵܐ ܩܵܕ݇ܡ ܪ̈ܲܚܡܹܐ ܕܡܫܝܼܚܵܐ: ܕܐܲܢܹ̈ܐ ܒܸܬ ܡܵܚܝܼ: ܐܲܝܟܼ ܚܲܕ݇ ܡܲܚܝܵܢܵܐ ܕܩܝܼܬܵܪܵܐ ܒܡܸܙܝܵܬܹ̈ܐ ܕܩܝܼܬܵܪܵܐ ܕܠܵܐ ܪܓ̣݇ܝܵܫܬܵܐ. ܘܒܸܦܬܵܚܵܐ ܝ݇ܘܸܢ ܣܸܦܘܵܬ̈ܝܼ ܛܲܡܐܹ̈ܐ ܒܸܛܠܵܒܵܐ ܝ݇ܘܸܢ ܡ̣ܢ ܗ̇ܘ ܕܐ݇ܡܸܪܹܗ: ܛܠܘܿܒܘܿܢ ܒܸܬ ܦܵܐܸܫ ܝܘܼܗ݇ܒ̣ܵܐ ܐܸܠܵܘܟ̣ܘܿܢ: ܛܵܥܘܝܼܡܘܿܢ ܒܸܬ ܡܲܫ݇ܟ̰ܚܝܼܬܘܿܢ: ܬܲܩܬܸܩܘܿܢ ܘܒܸܬ ܦܵܐܸܫ ܦܬܝܼܚܵܐ ܐܸܠܵܘܟ̣ܘܿܢ: ܗܵܕܟ̣ܵܐ ܒܹܐܡܵܪܵܐ ܝ݇ܘܸܢ ܒܨܠܘܿܬܵܐ: ܝܵܐ ܐܲܠܵܗܹܗ ܕܒܵܒܝܼ ܡܵܪܝ ܫܸܡܥܘܿܢ: ܡܵܪܲܢ ܝܼܫܘܿܥ ܡܫܝܼܚܵܐ: ܗܲܡܙܸܢ ܒܝܼܝܼ ܐܵܢܝܼ ܕܥܵܒ̣ܕܝܼ ܪܵܙܝܼ ܠܪܸܙܵܝܵܐ ܕܡܵܪܘܼܬܘܼܟܼ ܘܡܲܚܕ̈ܝܼ ܠܩܲܕܝܼܫܘܼܟܼ: ܘܟܲܕ ܒܸܕܟ̣ܵܪܵܐ ܝ݇ܘܸܢ ܗ̇ܝ ܕܐ݇ܡܸܪܹܗ: ܐܲܝܟܼ ܕܐܸܠܝܼ ܒܸܥܒ̣ܵܕܵܐ ܝ݇ܘܸܬܿ ܐܲܝܟܼ ܒܪܘܿܢܵܐ ܡܲܨܝܸܬܵܢܵܐ: ܘܠܵܐ ܦܵܝܫܵܐ ܚܒ̣ܝܼܛܬܵܐ ܚܝܼܵܠܘܼܟܼ: ܐܲܝܟܼ ܗ̇ܘ ܕܒܩܲܫܕܲܪܬܵܐ ܩܲܫܕܘܼܪܹܐ ܝ݇ܘܸܬܿ ܥܲܠ ܐܵܢܝܼ ܕܩܘܼܪܒܵܐ ܝ݇ܘܸܬܿ ܐܸܠܲܝܗܝ: ܝܲܥܢܹܐ: ܠܝܘܼܬܪܵܢܵܐ ܕܐ݇ܚܹܪ̈݇ܢܹܐ.
«« ܫܠܸܡ ܡܲܦܲܩ ܪܘܼܚܵܐ »»
♱ ܬܲܫܥܝܼܬܵܐ ܕܩܲܕܝܼܫܵܐ ܕܡܵܪܝ ܡܝܼܟ̣ܵܐ ♱
ܡܫܵܪܹܐ ܝ݇ܢܵܐ ܡ̣ܢ ܠܲܐܟ̣ܵܐ ܒܬܲܫܥܝܼܬܵܐ ܕܓ̣ܵܠܝܼܒܘܼܝܵܬܹ̈ܐ ܕܡܵܪܝ ܡܝܼܟ̣ܵܐ ܛܘܼܒ̣ܵܢܵܐ. ܐܵܗܵܐ ܩܲܕܝܼܫܵܐ ܝܼܗܘܼܵܐ ܡ̣ܢ ܐܲܬܪܵܐ ܕܒܹܝܬ ܢܘܼܗܲܕܪܵܐ: ܡ̣ܢ ܐ݇ܢܵܫܹ̈ܐ ܝ݇ܕܸܥܝܹ̈ܐ ܘܡܵܪܵܐ ܕܫܡܵܐ ܗ݇ܘܼܵܘ: ܘܡ̣ܢ ܐ݇ܢܵܫܹ̈ܐ ܝ݇ܕܸܥܝܹ̈ܐ ܘܡܫܲܡܗܹ̈ܐ: ܘܪܹ̈ܫܵܢܹܐ ܕܡܓ̣ܘܼܫܵܝܹ̈ܐ ܗ݇ܘܼܵܐ: ܘܪܵܝܲܬܟܵܪܹ̈ܐ ܕܡܲܠܟܵܐ. ܥܡܸܕܠܗ݇ܘܿܢ ܐܲܒ̣ܵܗ̈ܘܼܗܝ ܘܗ݇ܘܹܐܠܗ݇ܘܿܢ ܟܪܸ̈ܣܛܝܵܢܹܐ: ܒܐܝܼܕܵܬܹ̈ܗ ܕܓܘܼܒܝܵܐ ܕܐܲܠܵܗܵܐ ܡܵܪܝ ܐܵܘܓܹܝܢ: ܪܹܫܵܐ ܕܣܝܼܥܬܵܐ ܕܫܲܒ̣ܥܝܼܢ ܘܬܪܹܝܢ ܩܲܕܝܼܫܹ̈ܐ: ܘܒܘܼܗܪܸܢܘܿܢ ܠܡܲܕܢ̱ܚܵܐ ܒܝܘܼܠܦܵܢܲܝܗܝ. ܘܡܘܼܕܸܥܪܘܿܢ ܐܸܠܲܝܗܝ ܡ̣ܢ ܚܸܠܛܘܼܢܝܵܐ ܘܕܘܼܓܠܵܐ ܕܨܵܢܵܡܹ̈ܐ. ܠܝܼ݇ܕܥܵܝܬܵܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ: ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. ܐܝܼܢܵܐ ܐܵܗܵܐ ܢܲܨܝܼܚܵܐ ܡܵܪܝ ܡܝܼܟ̣ܵܐ: ܡ̣ܢ ܒܵܬ݇ܪ ܦܝܼܫܠܹܗ ܬܘܼܠܡܸܕܵܐ ܠܩܲܕܝܼܫܵܐ ܡܵܪܝ ܐܵܘܓܹܝܢ: ܫܘܼܪܹܐܠܹܗ ܒܝܘܼܠܦܵܢܹ̈ܐ ܕܟܬܵܒ̣ܹ̈ܐ ܕܬܸܫܒܘܿܚܝܵܬܹ̈ܐ ܕܡܲܙܡܘܿܪܹ̈ܐ ܕܕܵܘܝܼܕ. ܘܗ݇ܘܹܐܠܹܗ ܓܵܘ ܥܹܕܬܵܐ ܡܸܬܚܵܐ ܕܪܵܒܵܐ ܥܕܵܢܵܐ ܒܝܘܼܠܦܵܢܵܐ ܐܲܠܵܗܵܝܵܐ: ܘܒܕܘܼܒܵܪܹ̈ܐ ܕܟܠ ܨܦܵܝܘܼܬܵܐ. ܘܡܣܵܒܵܒ ܕܐܲܒ̣ܵܗ̈ܘܼܗܝ ܪܵܒܵܐ ܕܵܘܸܠܬܵܐ ܩܸܢܝܹ̈ܐ ܗܘܼܵܘ: ܡܲܝܬ݇ܝܼ ܗ݇ܘܼܵܐ ܠܹܗ ܟܠ ܫܹܢ݇ܬܵܐ ܣܹܐܡܵܐ ܘܕܲܗܒ̣ܵܐ ܥܲܡ ܡܸܢܕܝܼܵܢܹ̈ܐ ܡܢܘܼܩܫܹ̈ܐ ܘܡܹܐܟ̣ܘܼܠܝܵܬܹ̈ܐ ܕܟܠ ܦܸܨܠܵܐ: ܐܝܼܢܵܐ ܐܵܗܵܐ ܐܲܝܟܼ ܦܘܼܩܕܵܢܵܐ ܕܡܵܪܲܢ: ܟܡܵܐ ܕܟܹܐ ܗܵܘܝܼ ܗ݇ܘܼܵܘ ܐܲܒ̣ܵܗ̈ܘܼܗܝ ܠܟܸܣܠܹܗ: ܟܹܐ ܐܵܟ̣ܸܠ ܗ݇ܘܼܵܐ ܘܫܵܬܹܐ ܗ݇ܘܼܵܐ: ܘܠܵܒ̣ܸܫ ܗ݇ܘܼܵܐ ܓ̰ܘܼܠܹ̈ܐ. ܘܐܝܼܡܵܢ ܕܐܵܙܠ݇ܝܼ ܗ݇ܘܼܵܘ ܡ̣ܢ ܠܟܸܣܠܹܗ: ܟܠ ܡܸܢܕܝܼ ܠܡܸܣܟܹܢܹ̈ܐ ܟܹܐ ܡܦܲܠܓ݇ܝܼ ܗ݇ܘܼܵܐ ܠܹܗ: ܘܐܲܚܟ̰ܝܼ ܠܲܚܡܹܗ ܒܟܵܡܝܼܠܘܼܬܵܐ ܩܵܐ ܣܢܝܼܩܘܼܬܹܗ ܟܹܐ ܫܵܒ̣ܸܩ ܗ݇ܘܼܵܐ. ܟܹܐ ܡܲܠܝܸܨ ܗ݇ܘܼܵܐ ܓܵܢܹܗ ܒܨܵܘܡܵܐ ܘܒܨܠܘܿܬܵܐ: ܘܒܩܪܵܝܬܵܐ ܕܟܬܵܒ̣ܹ̈ܐ ܐܲܠܵܗܵܝܹ̈ܐ.
ܘܟܲܕ ܗ݇ܘܹܐܠܹܗ ܚܲܟܝܼܡܵܐ ܒܟܬܵܒ̣ܹ̈ܐ ܡܸܬܚܵܐ ܕܥܸܣܪܝܼܢ ܫܸܢܹ̈ܐ: ܐ݇ܬܹܐܠܹܗ ܠܟܸܣ ܛܘܼܒ̣ܵܢܵܐ ܡܵܪܝܼ ܐܵܘܓܹܝܢ: ܘܩܘܼܒܸܠܹܗ ܠܪܝܼܙܵܐ ܢܵܓ̰ܸܒ ܕܝܼܚܝܼܕܵܝܘܼܬܵܐ: ܘܫܘܼܪܹܐܠܹܗ ܒܸܦܠܵܚܵܐ ܩܵܕ݇ܡ ܐܲܚܘܿܢܘܵܬܹ̈ܐ ܐܲܝܟܼ ܪܝܼܙܵܐ ܘܢܵܡܘܿܣܵܐ: ܘܟܹܐ ܥܵܒ̣ܸܕ ܗ݇ܘܼܵܐ ܪܵܙܝܼ ܠܐܲܚܘܿܢܘܵܬܹ̈ܐ ܒܟܠܲܝܗܝ ܕܐܵܢܝܼ ܕܡܘܼܪ̈ܝܸܙܹܐ ܗ݇ܘܼܵܘ ܐܸܠܲܝܗܝ. ܘܗ݇ܘܹܐܠܹܗ ܩܵܐ ܣܵܒ̣ܵܐ ܡܵܪܝ ܐܵܘܓܹܝܢ ܐܲܝܟܼ ܒܪܘܿܢܵܐ: ܘܡܲܫܡܸܥ ܗ݇ܘܼܵܐ ܒܟܠ ܡܸܢܕܝܼ ܕܟܹܐ ܡܵܠܸܦ ܗ݇ܘܼܵܐ ܠܹܗ ܘܐܵܡܸܪ ܗ݇ܘܼܵܐ ܐܸܠܹܗ. ܕܵܐܟ̣ܝܼ ܗ݇ܘܹܐܠܹܗ ܪܕܘܼܦܝܵܐ ܥܲܠ ܥܹܕܬܵܐ ܡ̣ܢ ܝܘܿܠܝܵܢܘܿܣ ܟܵܦܘܿܪܵܐ: ܘܟܠܲܝܗܝ ܡܓܵܘܣܸܢܘܿܢ ܒܥܪܵܩܬܵܐ ܡ̣ܢ ܟܲܪܒܹܗ ܕܥܵܘܵܠܵܐ: ܐܵܗܵܐ ܟܠܹܐܠܹܗ ܓܵܘ ܥܘܼܡܪܵܐ ܠܟܸܣ ܛܘܼܒ̣ܵܢܵܐ ܡܵܪܝ ܐܵܘܓܹܝܢ ܥܲܡ ܥܸܣܪܵܐ ܐܲܚܘܿܢܘܵܬܹ̈ܐ ܐ݇ܚܹܪ̈݇ܢܹܐ. ܘܟܲܕ ܐ݇ܙܸܠܹܗ ܐܵܗܵܐ ܩܲܕܝܼܫܵܐ ܠܡܕܝܼܢ݇ܬܵܐ ܕܢܨܝܼܒ̣ܝܼܢ: ܠܒܸܢܝܵܢܵܐ ܕܗܲܝܟܠܵܐ ܕܒܸܢܝܹܗ ܗ݇ܘܼܵܐ ܡܵܪܝ ܝܲܥܩܘܿܒ̣ ܐܲܦܸܣܩܘܿܦܵܐ ܕܢܨܝܼܒ̣ܝܼܢ: ܐܵܗܵܐ ܡܵܪܝ ܡܝܼܟ̣ܵܐ ܥܲܡܲܝܗܝ ܗ݇ܘܼܵܐ. ܘܟܲܕ ܐ݇ܙܸܠܗ݇ܘܿܢ ܛܘܼܒ̣ܵܢܵܐ ܡܵܪܝ ܝܲܥܩܘܿܒ̣ ܘܡܵܪܝ ܐܵܘܓܹܝܢ: ܕܒܵܢܝܼ ܘܩܲܕܫܝܼ ܠܗܲܝܟܠܵܐ ܕܒܢܹܐܠܹܗ ܓܵܘ ܩܹܒ̣ܘܼܬܵܐ: ܐܵܗܵܐ ܡܵܪܝ ܡܝܼܟ̣ܵܐ ܥܲܡܲܝܗܝ ܗ݇ܘܼܵܐ: ܒܗ̇ܝ ܪܵܒܵܐ ܟܹܐ ܡܲܚܸܒܝܼ ܗ݇ܘܼܵܘ ܠܹܗ ܒܚܸܠܡܲܬܹܗ.
ܐܝܼܢܵܐ ܡ̣ܢ ܕܦܠܸܚܠܹܗ ܥܲܡ ܐܲܚܘܿܢܘܵܬܹ̈ܐ ܩܵܐ ܡܸܬܚܵܐ ܕܥܸܣܪܵܐ ܫܸܢܹ̈ܐ: ܘܡܘܼܟܡܸܠܹܗ ܠܪܝܼܙܵܐ ܘܩܵܢܘܿܢܵܐ ܕܝܼܚܝܼܕܵܝܹ̈ܐ: ܐ݇ܙܸܠܹܗ ܠܩܸܠܵܝܬܵܐ. ܣܵܒܵܒ ܐܵܢܝܼ ܦܸܠܚܵܢܹ̈ܐ ܕܦܠܸܚܠܹܗ ܠܲܐܟ̣ܵܐ ܓܵܘ ܩܸܠܵܝܬܵܐ: ܠܹܐ ܡܵܨܹܐ ܦܘܼܡܵܐ ܠܡܬܵܢܘܼܝܹܐ ܒܘܼܬ ܦܸܠܚܵܢܵܢ̈ܘܼܗܝ: ܒܗ̇ܝ ܕܟܹܐ ܥܵܒ̣ܪܝܼ ܠܗܹܡܸܙܡܵܢ. ܐܝܼܢܵܐ ܐܵܢܝܼ ܝܼܚܝܼܕܵܝܹ̈ܐ ܚܲܒ̣ܪ̈ܵܘܵܬܘܼܗܝ ܬܵܢܘܼܝܹܐ ܗ݇ܘܼܵܘ. ܐܘܼܦ ܐܵܗܵܐ ܩܲܕܝܼܫܵܐ ܡܵܪܝ ܐܵܘܓܹܝܢ ܬܘܼܢܝܼܠܹܗ ܘܗܘܼܩܝܼܠܹܗ ܠܟܠ ܐ݇ܢܵܫܵܐ: ܒܗ̇ܝ ܕܡ̣ܢ ܫܵܦܵܩܲܬ ܕܪܘܼܚܵܐ ܕܩܘܼܕܫܵܐ ܗ݇ܘܹܐܠܹܗ ܥܵܩܸܠܕܲܪ: ܕܝܵܕܸܥ ܡܸܢܕܝܼܵܢܹ̈ܐ ܛܸܫܝܹ̈ܐ. ܐܝܼܢܵܐ ܦܸܠܚܵܢܹܗ ܓܵܘ ܓܸܦܝܼܬܵܐ ܐܵܗܵܐ ܗ݇ܘܹܐܠܹܗ: ܒܗ̇ܝ ܡܘܼܬܸܒ̣ܠܹܗ ܚܲܕ݇ ܬܸܚܘܼܒ ܥܲܠ ܓܵܢܹܗ ܒܫܘܼܪܵܝܵܐ ܕܦܸܠܚܵܢܵܢ̈ܘܼܗܝ: ܕܚܲܕ݇ ܓܵܗܹܐ ܒܸܬ ܐܵܟ̣ܸܠ ܟܠ ܬܠܵܬ݇ܐ ܝܵܘܡܵܢܹ̈ܐ: ܚܲܕ݇ ܓܸܪܕܲܝܵܐ ܝܲܢ ܬܲܚܲܪܬܵܐ ܕܠܲܚܡܵܐ ܐܲܚܟ̰ܝܼ. ܘܒܸܬ ܨܵܠܹܐ ܒܠܲܝܠܹܐ ܒܟܵܡܝܼܠܘܼܬܵܐ ܠܡܲܙܡܘܿܪܵܐ ܕܕܵܘܝܼܕ ܘܐܘܼܦ ܙܹܐ ܒܝܵܘܡܵܐ ܟܹܐ ܚܵܬܸܡ ܗ݇ܘܼܵܐ ܠܹܗ ܠܡܲܙܡܘܿܪܵܐ ܒܟܵܡܝܼܠܘܼܬܵܐ. ܘܐܝܼܡܵܢ ܕܚܲܕ݇ ܐ݇ܢܵܫܵܐ ܡ̣ܢ ܐܲܚܘܿܢܘܵܬܹ̈ܐ ܩܵܒܸܠ ܗ݇ܘܼܵܐ ܠܹܗ ܠܟܸܣܠܹܗ: ܝܲܢ ܡ̣ܢ ܐܲܒ̣ܵܗ̈ܘܼܗܝ ܘܐܵܢܝܼ ܕܩܘܼܪܒܵܐ ܝ݇ܢܵܐ ܥܲܠܘܼܗܝ: ܟܹܐ ܡܵܨܝܼ ܗ݇ܘܼܵܐ ܕܐܵܟ̣ܸܠ ܗ݇ܘܼܵܐ ܚܲܕ݇ ܡܸܢܕܝܼ: ܟܹܐ ܡܲܚܙܝܼ ܗ݇ܘܼܵܐ ܩܵܬܲܝܗܝ ܐܲܝܟܼ ܕܐܸܢ ܗܸܟ̰ ܝܵܘܡܵܐ ܠܹܐ ܨܵܐܸܡ ܗ݇ܘܼܵܐ. ܘܐܵܗܵܐ ܐܲܚܟ̰ܝܼ ܟܹܐ ܐܵܡܸܪ ܗ݇ܘܼܵܐ ܩܵܕ݇ܡ ܟܠ ܐ݇ܢܵܫܵܐ: ܕܐܵܢܵܐ ܠܹܐ ܝ݇ܘܸܢ ܒܕܵܡܲܝܬܵܐ ܕܐܲܒ̣ܵܗ̈ܝܼ ܚܲܛܵܝܹ̈ܐ. ܕܛܘܼܠܸܩܠܗ݇ܘܿܢ ܚܲܝܲܝ̈ܗܝ ܒܥܵܕܲܬܹ̈ܐ ܕܡܓ̣ܘܼܫܘܼܬܵܐ. ܣܢܵܝܬܵܐ ܠܐܲܠܵܗܵܐ ܘܥܲܠ ܒܢܲܝ̈ܢܵܫܵܐ. ܡܣܵܒܵܒ ܕܝܸܡܹܗ ܕܡܵܪܝ ܡܝܼܟ̣ܵܐ: ܕܘܼܟܬܵܐ ܕܚܵܬܹܗ ܕܒܵܒܘܼܗܝ ܝܼܗܘܼܵܐ: ܕܐܲܝܟܼ ܢܵܡܘܿܣܵܐ ܕܡܓ̣ܘܼܫܵܝܹ̈ܐ ܬܒܥܝܼܬܵܗ̇ ܗ݇ܘܼܵܐ ܘܐܲܚܘܿܢܵܗ̇ ܕܫܸܡܹܗ ܗ݇ܘܼܵܐ ܓܘܼܪܫܵܗ: ܒܵܒܹܗ ܕܢܲܨܝܼܚܵܐ ܡܵܪܝ ܡܝܼܟ̣ܵܐ. ܟܠ ܝܵܘܡܵܐ ܨܠܘܿܬܹܗ ܗܘܝܼܬܵܐ ܝ݇ܠܵܗ̇ ܩܵܕ݇ܡ ܐܲܠܵܗܵܐ ܘܦܲܪܦܲܠܬܹܗ ܒܩܲܕܝܼܫܹ̈ܐ: ܕܨܵܠܝܼܡܘܿܢ ܒܘܼܬ ܕܝܼܝܼ ܘܒܘܼܬ ܐܲܒ̣ܵܗ̈ܝܼ. ܐܵܢܝܼ ܕܡܘܼܚܪܸܒ̣ܠܗ݇ܘܿܢ ܠܪܝܼܙܵܐ ܘܬܒܸܥܠܗ݇ܘܿܢ ܠܗ̇ܘ ܕܠܹܐ ܝ݇ܠܹܗ ܒܩܵܢܘܿܢ. ܒܗ̇ܝ ܕܐܘܼܦ ܒܵܒܘܼܗܝ ܘܝܸܡܘܼܗܝ ܕܡܵܪܝ ܡܝܼܟ̣ܵܐ: ܡ̣ܢ ܕܩܘܼܒܸܠܗ݇ܘܿܢ ܪܘܼܫܡܵܐ ܕܡܲܥܡܘܿܕܝܼܬܵܐ ܘܗ݇ܘܹܐܠܗ݇ܘܿܢ ܟܪܸ̈ܣܛܝܵܢܹܐ: ܠܵܐ ܝ݇ܬܸܒ̣ܠܗ݇ܘܿܢ ܥܲܡ ܐܘܼܕܵܠܹܐ: ܘܠܵܐ ܥܒ̣ܸܪܘܿܢ ܠܒܲܝܬܵܐ ܘܝ݇ܬܸܒ̣ܠܗ݇ܘܿܢ ܡܐܘܼܕܵܠܹܐ. ܐܵܗܵܐ ܡܵܪܝ ܡܝܼܟ̣ܵܐ ܩܲܕܝܼܫܵܐ: ܡ̣ܢ ܝܵܘܡܵܐ ܕܩܘܼܒܸܠܹܗ ܡܲܥܡܘܿܕܝܼܬܵܐ ܒܪܸܙܵܝܘܼܗܝ ܠܵܐ ܡܘܼܦܠܸܚܠܹܗ ܡܸܫܚܵܐ: ܘܠܵܐ ܡܝܼ̈ܵܐ ܫܲܚܝܼܢܹ̈ܐ. ܘܠܵܐ ܡܹܐܟ̣ܘܼܠܬܵܐ: ܐܝܼܢܵܐ ܥܒ̣ܘܿܕ ܒܵܘܲܪ ܕܐܵܬܝܼ ܗ݇ܘܼܵܘ ܩܵܒܸܠ ܗ݇ܘܼܵܐ ܠܟܸܣܠܹܗ ܐ݇ܢܵܫܹ̈ܐ: ܟܹܐ ܥܵܒ̣ܸܕ ܗ݇ܘܼܵܐ ܡܹܐܟ̣ܘܼܠܬܵܐ ܩܵܐ ܪܲܗܵܬܘܼܬܵܐ ܘܪܵܙܝܼܘܼܬܵܐ ܕܐܵܢܝܼ ܐ݇ܢܵܫܹ̈ܐ. ܘܟܹܐ ܐܵܟ̣ܸܠ ܗ݇ܘܼܵܐ ܥܲܡܲܝܗܝ ܩܵܕ݇ܡ ܟܠ ܐ݇ܢܵܫܵܐ ܘܟܹܐ ܐܵܡܸܪ ܗ݇ܘܼܵܐ ܕܐܵܢܵܐ ܐ݇ܟ̣ܸܠܝܼ ܡ̣ܢ ܩܵܕ݇ܡ ܕܐܵܬܹܝܬܘܿܢ ܗ݇ܘܼܵܐ ܠܟܸܣܠܝܼ: ܒܗ̇ܝ ܕܠܹܐ ܡܵܨܸܢ ܠܸܨܝܵܡܵܐ.
ܐܝܼܢܵܐ ܠܒ̣ܸܫܬܹܗ: ܟܡܵܐ ܕܗ݇ܘܹܐܠܹܗ ܓܵܘ ܥܘܼܡܪܵܐ ܩܵܕ݇ܡ ܡܵܪܝ ܐܵܘܓܹܝܢ ܘܣܵܒ̣ܹ̈ܐ ܚܲܒ̣ܪ̈ܵܘܵܬܘܼܗܝ: ܨܘܼܕܪܵܐ ܕܣܲܥܪܵܐ ܝܼܗܘܼܵܐ ܥܲܠ ܓܘܼܫܡܹܗ: ܘܫܸܪ̈ܒ̣ܵܠܹܐ ܕܣܲܥܪܵܐ ܥܲܠ ܒܸܣܪܹܗ: ܘܠܥܸܠܸܠ ܡ̣ܢ ܠܒ̣ܸܫܝܵܬ̈ܘܼܗܝ ܫܲܦܝܼܪܹ̈ܐ: ܘܠܓܵܘܵܝ ܡܸܢܲܝܗܝ ܬܠܵܬ݇ܐ ܬܲܣܡܵܬܹ̈ܐ ܕܦܪܸܙܠܵܐ: ܒܩܕܵܠܹܗ ܘܒܨܲܕܪܹܗ ܘܥܲܠ ܚܵܨܹܗ. ܐܵܢܝܼ ܗܸܟ̰ ܐ݇ܢܵܫܵܐ ܠܵܐ ܝ݇ܕܸܥܠܹܗ: ܫܒ̣ܘܿܩ ܡ̣ܢ ܒܓܸܠܝܵܢܹܗ ܕܪܘܼܚܵܐ: ܐܲܝܟܼ ܬܘܼܢܝܼܠܗ݇ܘܿܢ ܣܵܒ̣ܹ̈ܐ ܒܘܼܬ ܕܝܼـܹܗ. ܟܲܕ ܗ݇ܘܹܐܠܹܗ ܓܵܘ ܥܘܼܡܪܵܐ ܡܸܬܚܵܐ ܕܥܸܣܪܝܼܢ ܘܬܡܵܢܝܵܐ ܫܸܢܹ̈ܐ: ܒܐܵܢܝܼ ܕܘܼܒܵܪܹ̈ܐ ܨܦܵܝܼܝܼ: ܟܲܕ ܠܹܐ ܥܵܒ̣ܸܪ ܗ݇ܘܼܵܐ ܘܠܵܐ ܙܹܐ ܦܵܠܸܛ ܗ݇ܘܼܵܐ ܡ̣ܢ ܓܸܦܝܼܬܹܗ: ܫܒ̣ܘܿܩ ܡ̣ܢ ܚܲܕܒܫܲܒܵܐ ܠܚܲܕܒܫܲܒܵܐ: ܕܫܲܪܸܟ ܗ݇ܘܼܵܐ ܒܐ݇ܪ̈ܵܙܹܐ ܩܲܕܝܼܫܹ̈ܐ ܕܦܲܓ̣ܪܹܗ ܘܕܸܡܹܗ ܕܡܵܪܲܢ: ܘܫܘܼܪܹܐܠܹܗ ܣܵܛܵܢܵܐ ܕܫܵܓ̣ܸܫܠܹܗ ܘܒܵܛܸܠܹܗ ܡ̣ܢ ܦܸܠܚܵܢܹܗ ܪܘܼܚܵܢܵܝܵܐ. ܫܘܼܪܹܐܠܹܗ ܡܲܪܝܘܼܙܹܐ ܥܲܡܹܗ ܦܠܵܫܵܐ: ܡ̣ܢ ܠܓܵܘܵܐ ܒܝܼܲܕ ܚܸܙܘܹ̈ܐ [ܚܸܪ̈ܫܹܐ]: ܣܸܢܝܹ̈ܐ ܘܓܘܼܢܓܸܙܹ̈ܐ: ܘܡ̣ܢ ܠܒ̣ܲܕܲܪ ܡܲܫܓ̣ܲܫܬܵܐ ܕܐ݇ܢܵܫܹ̈ܐ. ܘܡ̣ܢ ܣܵܒܵܒ ܕܐܵܗܵܐ ܛܘܼܒ̣ܵܢܵܐ ܡܵܪܝ ܡܝܼܟ̣ܵܐ ܒܛܸܫܘܵܐ ܟܹܐ ܦܵܠܸܚ ܗ݇ܘܼܵܐ ܠܡܫܝܼܚܵܐ: ܘܒܛܸܫܘܵܐ ܟܹܐ ܦܵܠܸܚ ܗ݇ܘܼܵܐ ܒܡܲܢܬܵܝܵܬܹ̈ܐ ܕܨܦܵܝܘܼܬܵܐ: ܟܹܐ ܐܵܬܝܼ ܗ݇ܘܼܵܐ ܣܵܛܵܢܵܐ ܠܟܸܣܠܹܗ ܘܚܲܝܠܵܘܵܬܹ̈ܗ ܕܒܝܼܫܵܐ: ܒܕܵܡܲܝܬܵܐ ܕܚܸܙܡܵܢ̈ܘܼܗܝ ܘܐܵܢܝܼ ܕܩܘܼܪܒܵܐ ܝ݇ܢܵܐ ܐܸܠܹܗ: ܐܲܝܟܼ ܕܒܘܼܬ ܕܝܼܲܝܗܝ ܒܸܬ ܗܵܕܸܪ ܨܘܼܦܪܵܐ ܘܒܸܬ ܐܵܟ̣ܸܠ ܘܫܵܬܹܗ: ܘܒܸܬ ܡܲܟܠܹܐܠܹܗ ܡ̣ܢ ܦܸܠܚܵܢܹܗ. ܐܝܼܢܵܐ ܟܲܕ ܦܘܼܪܡܝܼܠܹܗ ܠܗܹܡܸܙܡܵܢܹܗ ܕܡܵܪܲܢ ܩܵܐ ܫܸܡܥܘܿܢ: ܕܗܵܐ ܣܵܛܵܢܵܐ ܒܵܥܹܐ ܕܢܵܚܸܠܵܘܟ̣ܘܿܢ ܐܲܝܟܼ ܕܠܚܸܛܹ̈ܐ: ܡܘܼܩܪܸܒ̣ܠܹܗ ܨܠܘܿܬܵܐ ܠܐܲܠܵܗܵܐ: ܕܡܲܕܪܸܙܠܹܗ ܚܲܕ݇ ܐܘܼܪܚܵܐ ܠܒ̣ܲܕܲܪ ܡ̣ܢ ܚܲܝܘܼܬܵܐ ܕܐ݇ܢܵܫܘܼܬܵܐ: ܕܗܵܘܹܐ ܐܵܙܲܕ ܡ̣ܢ ܝܵܕܥܵܢܹ̈ܐ ܘܚܸܙܡܵܢܹ̈ܐ. ܘܫܒ̣ܸܩܠܹܗ ܘܐ݇ܙܸܠܹܗ ܡ̣ܢ ܕܘܼܟܬܵܐ ܕܚܲܝܘܼܬܹܗ ܒܗ̇ܘ ܛܘܼܪܵܐ: ܒܐܘܼܪܚܵܐ ܕܐ݇ܙܵܠܬܵܐ ܕܥܸܣܪܝܼܢ ܡܝܼܠܹ̈ܐ: ܐܲܝܟܵܐ ܕܗܸܟ̰ ܐ݇ܢܵܫܵܐ ܠܹܐ ܝܵܕܸܥ ܗ݇ܘܼܵܐ ܠܐܘܼܪܚܹܗ ܘܠܕܘܼܟܬܹܗ. ܘܒܥܕܵܢܵܐ ܕܝ݇ܕܸܥܠܗ݇ܘܿܢ ܐܲܚܘܿܢܘܵܬܹ̈ܐ ܒܫܘܼܢܵܝܹܗ ܕܡ̣ܢ ܠܟܸܣܠܲܝܗܝ: ܪܵܒܵܐ ܦܝܼܫܠܗ݇ܘܿܢ ܒܥܝܼܩܘܼܬܵܐ ܥܲܡ ܚܸܙܡܵܢ̈ܘܼܗܝ ܘܟܠ ܕܐܵܢܝܼ ܕܝܼܗܘܼܵܘ ܩܘܼܪܒܵܐ ܐܸܠܹܗ. ܗ̇ܝ ܕܒܐܵܗܵܐ ܥܕܵܢܵܐ ܡܝܼܬܠܗ݇ܘܿܢ ܒܵܒܘܼܗܝ ܘܝܸܡܘܼܗܝ: ܘܛܘܼܡܪܵܝܠܗ݇ܘܿܢ ܒܐܝܼܩܵܪܵܐ. ܘܦܘܼܠܓ݇ܝܼܠܗ݇ܘܿܢ ܟܠ ܡܸܢܕܝܼ ܕܐܝܼܬ ܗ݇ܘܼܵܐ ܠܗ݇ܘܿܢ ܩܵܐ ܥܘܼܡܪ̈ܵܢܹܐ ܘܕܲܝܪܹ̈ܐ ܘܡܸܣܟܹܢܹ̈ܐ: ܘܣܢܝܼܩܹ̈ܐ: ܘܥܒ̣ܸܕܠܹܗ ܓܵܢܹܗ ܡܲܨܝܵܢܵܐ: ܕܥܵܒ̣ܸܕ ܦܠܵܫܵܐ ܥܲܡ ܪ̈ܘܼܚܵܬܹܐ ܒܝܼܫܹ̈ܐ: ܕܠܵܐ ܡܲܪܚܸܩܝܼܠܹܗ ܡ̣ܢ ܐܘܼܪܚܵܐ ܕܡܹܐܙܲܠܬܹܗ ܕܡܛܵܝܬܵܐ ܠܫܡܲܝܵܐ: ܘܡܲܒܣܵܡܬܵܐ ܒܛܘܼܒ̣ܹ̈ܐ ܕܠܹܐ ܦܵܪܩܝܼ. ܘܡܘܼܫ݇ܟ̰ܸܚܠܹܗ ܬܵܡܵܐ ܚܕܵܐ ܓܸܦܝܼܬܵܐ ܒܹܝܦܲܠܓܵܐ ܕܩܲܥܝܵܐ: ܘܟܘܼܣܝܵܐ ܗ݇ܘܼܵܐ ܡ̣ܢ ܠܥܸܠܸܠ: ܕܠܵܐ ܗܲܝܘܵܢܹ̈ܐ ܒܝܼܫܹ̈ܐ ܩܲܛܠܝܼܠܹܗ. ܠܹܐ ܗ݇ܘܼܵܐ ܕܠܲܝܬ ܗ݇ܘܼܵܐ ܠܹܗ ܗܝܼܒ̣ܝܼـܹܗ ܥܲܠ ܡܵܪܹܗ: ܐܸܠܵܐ ܕܬܲܡܸܡ ܗ̇ܝ ܕܐ݇ܡܸܪܹܗ ܡܘܼܫܹܐ ܢܒ̣ܝܼܵܐ: ܕܟܠ ܙܲܕܸܥ: ܛܵܫܹܗ ܓܵܢܹܗ ܗ̇ܘ ܘܗܲܝܘܵܢܹ̈ܐ ܕܓܵܘ ܒܲܝܬܹܗ ܡ̣ܢ ܩܵܕ݇ܡ ܒܝܼܫܬܵܐ: ܘܒܗ̇ܝ ܕܢܒ̣ܝܼܵܐ ܐ݇ܡܸܪܹܗ: ܕܥܒ̣ܘܿܪ ܘܛܵܫܝܼ ܓܵܢܘܼܟܼ ܩܵܐ ܚܲܕ݇ܟ̰ܵܐ ܥܕܵܢܵܐ ܗܲܠ ܕܥܵܒ̣ܸܪ ܟܲܪܒܝܼ. ܘܟܲܕ ܥܒ̣ܸܕܠܹܗ ܣܸܬܪܵܐ ܐܲܝܟܼ ܓܵܪܹܐ ܠܓܸܦܝܼܬܵܐ ܐܲܝܟܼ ܕܗ̇ܘ ܕܒܸܪܝܵܐ ܗ݇ܘܼܵܐ. ܠܵܐ ܡܘܼܪܸܡܠܹܗ ܠܥܸܠܸܠ. ܐܝܼܢܵܐ ܒܥܕܵܢܵܐ ܕܟܵܠܝܼ ܗ݇ܘܼܵܐ ܒܨܠܘܿܬܵܐ ܒܓܵܘܹܗ: ܠܹܐ ܦܵܫܸܩ ܗ݇ܘܼܵܐ ܠܵܗ̇ ܩܘܼܡܬܹܗ: ܐܝܼܢܵܐ ܟܲܕ ܚܵܨܹܗ ܛܝܼܦܵܐ ܟܹܐ ܙܵܡܸܪ ܗ݇ܘܼܵܐ ܒܡܲܙܡܘܿܪܵܐ.
ܐܝܼܢܵܐ ܦܸܠܚܵܢܵܢ̈ܘܼܗܝ ܒܐܵܗܵܐ ܕܘܼܟܬܵܐ: ܘܠܟܠ ܦܸܠܚܵܢܵܢ̈ܘܼܗܝ ܕܨܦܵܝܘܼܬܵܐ ܟܹܐ ܥܵܒ̣ܪܝܼ ܗ݇ܘܼܵܘ: ܩܲܕ݇ܡܵܝܬܵܐ ܥܒ̣ܝܼܕܵܐ ܗ݇ܘܼܵܐ ܥܵܕܲܬ ܠܓܵܢܹܗ: ܕܡ̣ܢ ܚܲܕܒܫܲܒܵܐ ܠܚܲܕܒܫܲܒܵܐ ܚܲܕ݇ ܓܸܪܕܲܝܵܐ ܟܹܐ ܐܵܟ̣ܸܠ ܗ݇ܘܼܵܐ: ܡܣܵܒܵܒ ܕܘܼܟܬܹܗ ܥܝܼܩܬܵܐ ܗ݇ܘܼܵܐ: ܘܠܲܝܬ ܗ݇ܘܼܵܐ ܐ݇ܢܵܫܵܐ ܕܝܵܕܸܥ ܗ݇ܘܼܵܐ ܒܝܼـܹܗ. ܘܕܸܫ̰ܡܸܢ ܕܟܠܵܗ̇ ܐ݇ܢܵܫܘܼܬܵܐ ܠܵܐ ܦܬܸܠܵܗ̇ ܓܵܫܲܩܬܹܗ ܡ̣ܢ ܦܠܵܫܹ̈ܐ ܕܥܲܡܹܗ: ܘܟܹܐ ܗܵܕܸܪ ܗ݇ܘܼܵܐ ܨܘܼܦܪܹ̈ܐ ܟܲܕ ܡܸܠܝܹ̈ܐ ܡ̣ܢ ܛܲܥܡܵܬܹ̈ܐ: ܘܟܸܠܝܵܐ ܗ݇ܘܼܵܐ ܘܡܲܪܝܘܼܙܹܐ ܬܲܚܡܵܢܝܵܬܹ̈ܐ: ܘܐܵܡܸܪ ܗ݇ܘܼܵܐ ܐܸܠܹܗ: ܕܬܵܐ ܥܒ̣ܘܿܕ ܒܘܼܣܵܡܵܐ. ܘܟܲܕ ܐܵܗܵܐ ܒܝܼܲܕ ܡܲܙܡܘܿܪܹ̈ܐ ܘܒܨܠܵܘܵܬܹ̈ܐ ܝܼܗ݇ܘܼܵܐ: ܐ݇ܡܸܪܹܗ ܠܡܵܪܲܢ: ܕܠܵܐ ܪܲܦܸܬܠܝܼ ܘܠܵܐ ܫܲܒ̣ܩܸܬܿ ܠܝܼ ܝܵܐ ܐܲܠܵܗܝܼ ܘܦܵܪܘܿܩܝܼ. ܘܠܵܐ ܝܵܗ݇ܒ̣ܸܬܿ ܡܵܪܝܵܐ ܫܲܗܘܲܬܹܗ ܕܥܵܘܵܠܵܐ ܘܙܵܠܸܡ: ܘܐܘܼܦ ܠܵܐ ܪܸܙܵܝܹܗ. ܘܟܲܕ ܒܸܪܫܵܡܵܐ ܗ݇ܘܼܵܐ ܨܠܝܼܒ̣ܹܗ ܕܡܵܪܲܢ ܩܵܕ݇ܡܘܼܗܝ: ܛܵܠܸܩ ܗ݇ܘܼܵܐ ܒܝܼܫܵܐ ܘܟܠܲܝܗܝ ܬܲܚܡܵܢܝܵܬܹ̈ܐ. ܘܡ̣ܢ ܣܵܒܵܒ ܕܪܸܚܩܵܐ ܗ݇ܘܼܵܘ ܡܝܼ̈ܵܐ ܡ̣ܢ ܠܟܸܣܠܹܗ ܙܵܘܕܵܐ ܡ̣ܢ ܬܠܵܬ݇ܐ ܡܝܼܠܹ̈ܐ: ܟܠ ܝܲܪܚܵܐ ܚܕܵܐ ܩܵܕܵܠܵܐ ܝܲܢ ܬܵܠܸܡܬܵܐ ܕܡܝܼ̈ܵܐ ܒܢܲܦ̮ܫܹܗ ܟܹܐ ܡܲܝܬ݇ܝܼ ܗ݇ܘܼܵܐ ܠܹܗ. ܘܒܩܲܝܛܵܐ ܓܵܘ ܗ̇ܘ ܚܲܝܠܵܐ ܕܚܸܡܵܐ ܟܲܕ ܨܸܗܝܵܐ ܠܡܝܼ̈ܵܐ: ܐܵܬܝܼ ܗ݇ܘܼܵܐ ܗܿܘ ܕܸܫ̰ܡܸܢ ܟܲܕ ܕܒ̣ܝܼܩܵܐ ܒܐܝܼܕܹܗ ܟܝܘܼܠܵܐ ܚܲܕܬܵܐ: ܡܸܠܝܵܐ ܡ̣ܢ ܡܝܼ̈ܵܐ ܨܸܦܝܹ̈ܐ: ܘܫܲܗܘܸܬ ܗ݇ܘܼܵܐ ܠܹܗ ܘܐܵܡܸܪ ܗ݇ܘܼܵܐ: ܬܵܐ ܪܲܒܲܢ ܘܫܬܝܼ: ܒܗ̇ܝ ܟܹܐ ܝܵܕܥܸܢ ܕܨܸܗܝܵܐ ܝ݇ܘܸܬܿ. ܐܵܡܸܪ ܗ݇ܘܼܵܐ ܐܸܠܹܗ ܒܪܵܒܵܐ ܒܡܲܪܕܘܼܬܵܐ ܘܙܸܪܲܢܓܘܼܬܵܐ: ܡܵܪܝܵܐ ܗ̇ܘ ܕܦܘܼܠܸܛܠܹܗ ܡ̣ܢ ܟܹܐܦܵܐ ܓ̰ܪܵܝܬܵܐ ܕܡܝܼ̈ܵܐ: ܘܡܘܼܫܬܝܼܠܹܗ ܠܛܵܝܸܦܹܗ ܘܦܸܣܩܵܐ ܕܡܲܪܥܝܼܬܹܗ: ܘܒܡܲܢܢܵܐ ܬܘܼܪܣܝܼܠܹܗ ܠܒܢܘܿܢܹ̈ܐ ܕܝܼܣܪܵܝܸܠ: ܘܐܘܼܦ ܡ̣ܢ ܚܲܛܵܝܵܐ ܕܐܲܝܟܼ ܕܝܼܝܼ ܠܵܐ ܫܲܒ̣ܩܸܬܿ. ܙܵܡܸܪ ܗ݇ܘܼܵܐ ܒܡܲܙܡܘܿܪܵܐ: ܕܩܘܼܡ݇ ܗܲܝܸܪܝܼ ܘܦܵܪܸܩܠܝܼ ܒܘܼܬ ܪ̈ܲܚܡܘܼܟܼ. ܘܕܢܵܚܦܝܼ ܕܸܫ̰ܡܸܢ̈ܝܼ: ܘܠܵܐ ܢܵܚܦܸܢ ܐܵܢܵܐ: ܡܣܵܒܵܒ ܕܐܲܢ݇ܬܿ ܗܝܼܒ̣ܝܼ ܕܝܼܝܼ ܝ݇ܘܸܬܿ ܡܵܪܝܵܐ: ܘܠܵܐ ܢܵܚܦܝܼ ܐܵܢܝܼ ܕܒܗܝܼܒ̣ܝܼ ܝ݇ܢܵܐ ܒܝܼܘܼܟܼ.
ܐܝܼܢܵܐ ܒܚܲܕ݇ ܥܕܵܢܵܐ ܣܘܼܩܠܵܠܹܗ ܓܵܢܹܗ ܣܵܛܵܢܵܐ ܠܝܼܛܵܐ: ܘܐܵܬܝܼ ܗ݇ܘܼܵܐ ܠܟܸܣܠܹܗ ܒܕܵܡܲܝܬܵܐ ܕܒܲܟ̣ܬܵܐ ܫܲܦܝܼܪܬܵܐ ܒܓܵܫܲܩܬܘܼܗ̇. ܘܣܵܦܸܪ ܗ݇ܘܼܵܐ ܠܟܸܣ ܬܲܪܥܵܐ ܕܓܸܦܝܼܬܹܗ ܕܩܲܕܝܼܫܵܐ: ܘܟܠܹܗ ܠܲܝܠܹܐ ܬܲܩܬܘܼܩܹܐ ܗ݇ܘܼܵܐ ܒܹܐܡܵܪܵܐ ܐܸܠܹܗ: ܡܲܥܒ̣ܸܪܝܼ ܠܟܸܣܠܘܼܟܼ: ܕܠܵܐ ܐܵܟ̣ܠܝܼ ܠܝܼ ܗܲܝܘܵܢ̈ܐ: ܘܡܫܝܼܚܵܐ ܒܸܛܠܵܒܵܐ ܝ݇ܠܹܗ ܡܸܢܝܼ ܘܡܸܢܘܼܟܼ. ܐܝܼܢܵܐ ܐܵܗܵܐ ܩܲܕܝܼܫܵܐ ܡ̣ܢ ܨܠܘܿܬܹܗ ܠܹܐ ܗ݇ܘܼܵܐ ܒܸܫܒ̣ܵܩܵܐ: ܟܲܕ ܒܸܙܡܵܪܵܐ ܡ̣ܢ ܟܬܵܒ̣ܵܐ ܕܡܲܙܡܘܿܪܵܐ ܘܒܹܐܡܵܪܵܐ: ܒܸܬ ܢܵܚܦܝܼ ܐܵܢܝܼ ܕܡܲܣܠܘܼܝܹܐ ܝ݇ܢܵܐ ܠܓܵܢܝܼ: ܕܠܵܒ̣ܫܝܼ ܢܚܸܦܬܵܐ ܐܵܢܝܼ ܕܒܣܵܡܵܝܠܵܗ̇ ܠܒܝܼܫܬܝܼ: ܐܝܼܢܵܐ ܐܵܢܵܐ ܒܟܠ ܥܕܵܢܵܐ ܒܸܬ ܨܵܠܸܢ ܨܠܘܿܬܵܐ ܘܡܲܙܝܸܕܸܢ ܥܲܠ ܬܸܫܒܘܿܚܝܵܬ̈ܘܼܟܼ. ܐܝܼܢܵܐ ܠܵܐ ܡܨܹܐܠܹܗ ܣܵܛܵܢܵܐ ܒܚܲܝܠܵܐ ܕܬܲܚܡܵܢܝܵܬܹ̈ܐ ܠܩܲܕܝܼܫܵܐ ܡܵܪܝ ܡܝܼܟ̣ܵܐ: ܘܫܘܼܪܹܐܠܹܗ ܕܡܲܥܒ̣ܸܪ ܥܲܠܘܼܗܝ ܪܵܒܵܐ ܒܝܼܫܵܬܹ̈ܐ: ܕܡܲܟܠܹܐܠܹܗ ܠܩܲܕܝܼܫܵܐ ܡ̣ܢ ܦܸܠܚܵܢܹܗ. ܘܒܥܕܵܢܵܐ ܕܡܘܼܬܸܒ̣ܠܹܗ ܩܲܕܝܼܫܵܐ ܬܵܠܸܡܬܵܐ ܕܐܝܼܬ ܗ݇ܘܼܵܐ ܒܝܼـܹܗ ܡܝܼ̈ܵܐ: ܘܐܵܗܵܐ ܣܛܵܢܵܐ ܒܝܼܫܵܐ ܐܵܬܝܼ ܗ݇ܘܼܵܐ ܒܕܵܡܲܝܬܵܐ ܕܦܵܘܚܵܐ ܚܲܝܠܵܢܵܐ: ܘܬܵܦܸܚ ܗ݇ܘܼܵܐ ܠܗ݇ܘܿܢ ܠܡܝܼ̈ܵܐ ܕܛܘܼܒ̣ܵܢܵܐ. ܘܒܘܼܫ ܙܵܘܕܵܐ ܟܹܐ ܥܵܒ̣ܸܕ ܗ݇ܘܼܵܐ ܠܵܗ̇ ܐܵܗܵܐ ܒܝܵܘܡܵܐ ܕܚܲܕܒܫܲܒܵܐ ܩܲܕܝܼܫܵܐ: ܒܸܕܥܵܝܵܐ ܗ݇ܘܼܵܐ ܕܗܘܼܕܪܵܐ ܗ݇ܘܼܵܐ ܩܲܕܝܼܫܵܐ ܕܐܵܟ̣ܸܠ ܗ݇ܘܼܵܐ ܘܫܵܬܹܐ ܗ݇ܘܼܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܡܝܼܟ̣ܵܐ: ܟܲܕ ܒܸܚܙܵܝܵܐ ܗ݇ܘܼܵܐ: ܕܐܵܢܝܼ ܩܵܐ ܗܲܝܲܪܬܹܗ ܒܸܥܒ̣ܵܕܵܝ ܗ݇ܘܼܵܐ ܣܵܛܵܢܵܐ ܒܝܼܫܵܐ: ܩܲܕ ܠܵܐ ܐܵܟ̣ܸܠ ܗ݇ܘܼܵܐ ܘܠܵܐ ܫܵܬܹܐ ܗ݇ܘܼܵܐ ܗܲܠ ܠܚܲܕܒܫܲܒܵܐ ܐ݇ܚܹܪ݇ܢܵܐ: ܒܗ̇ܝ ܕܫܵܦܵܩܲܬ ܟܹܐ ܝܵܗ݇ܒ̣ܵܐ ܗ݇ܘܼܵܐ ܠܹܗ ܚܲܝܠܵܐ.
ܐܝܼܢܵܐ ܐܵܗܵܐ ܓܘܼܪܵܐ ܕܒܝܼܫܬܵܐ: ܒܐܵܗܵܐ ܪܵܒܵܐ ܟܪܸܒܠܹܗ: ܕܦܲܓ̣ܪܵܢܵܐ ܒܸܓ̣ܠܵܒܵܐ ܝ݇ܠܹܗ ܠܪܘܼܚܵܢܵܐ: ܘܨܵܠܝܼܵܬܹ̈ܗ [ܘܟ̰ܘܼܪ̈ܘܼܬܡܹܗ] ܕܠܟܸܣ ܩܲܕܝܼܫܵܐ ܡܵܪܝ ܡܝܼܟ̣ܵܐ: ܐܲܝܟܼ ܕܠܗܲܝܲܪܬܹܗ ܦܝܵܫܵܐ ܗ݇ܘܼܵܐ ܦܠܝܼܚܹ̈ܐ: ܒܗ̇ܝ ܕܡܲܙܝܘܼܕܹܐ ܗ݇ܘܼܵܐ ܟܠ ܝܵܘܡܵܐ ܒܘܼܬ ܦܸܠܚܵܢܵܢ̈ܘܼܗܝ ܐܲܠܵܗܵܝܹ̈ܐ. ܐܝܼܢܵܐ ܫܘܼܪܹܐܠܹܗ ܕܫܲܚܠܸܦ ܥܲܠܘܼܗܝ ܓ̰ܘܼܪ̈ܵܒܹܐ ܐ݇ܚܹܪ̈݇ܢܹܐ: ܕܡܲܫܓ̣ܸܫ ܠܚܝܼܵܠܹܗ ܘܫܵܝܸܦܠܹܗ. ܘܐ݇ܙܸܠܹܗ ܥܒ̣ܸܪܹܗ ܒܚܕܵܐ ܒܪܵܬܵܐ: ܘܫܘܼܪܹܐܠܹܗ ܕܗܲܡܙܸܡ ܒܝܼܘܼܗ̇ ܘܐܵܡܸܪ: ܘܐܸܢ ܒܵܥܹܝܬܘܿܢ ܕܦܲܠܛܸܢ ܡ̣ܢ ܠܲܐܟ̣ܵܐ: ܠܲܒܠܘܿܢ ܠܝܼ ܠܟܸܣ ܩܲܕܝܼܫܵܐ ܡܵܪܝ ܡܝܼܟ̣ܵܐ: ܗܵܝܓܵܗ ܒܸܬ ܦܲܠܛܸܢ. ܐܝܼܢܵܐ ܐܵܢܝܼ ܒܘܼܩܸܪܘܿܢ ܒܘܼܬ ܕܘܼܟܬܹܗ ܘܐ݇ܙܸܠܗ݇ܘܿܢ ܠܟܸܣܠܹܗ: ܘܦܲܪܦܸܠܝܼ ܗ݇ܘܼܵܘ ܘܛܵܠܒܝܼ ܗ݇ܘܼܵܘ ܡܸܢܹܗ: ܕܨܵܠܹܗ ܨܠܘܿܬܵܐ ܒܘܼܬ ܕܝܼܘܗ̇: ܕܗܵܘܝܵܐ ܐܵܙܲܕ ܡ̣ܢ ܟܵܪ ܕܒܝܼܫܵܐ. ܐܝܼܢܵܐ ܐܵܗܵܐ ܒܝܼܕܲܥܝܵܐ ܗ݇ܘܼܵܐ ܒܝܼܫܘܼܬܵܐ ܕܕܸܫ̰ܡܸܢܹ̈ܐ: ܒܸܙܕܲܥܝܵܐ ܗ݇ܘܼܵܐ ܡ̣ܢ ܕܐܵܗܵܐ ܕܠܵܐ ܦܵܠܸܛ ܐܵܗܵܐ ܚܲܒܪܵܐ ܒܘܼܬ ܕܝܼـܹܗ: ܘܡܲܥܝܸܩܝܼܠܹܗ ܪܵܒܵܐ. ܐܵܡܸܪ ܗ݇ܘܼܵܐ ܐܸܠܲܝܗܝ: ܪ݇ܚܘܿܫܘܿܢ ܠܟܸܐ ܩܲܕܝܼܫܵܐ ܡܵܪܝ ܐܵܘܓܹܝܢ ܘܚܲܒ̣ܪ̈ܵܘܵܬܘܼܗܝ: ܒܓ̰ܲܠܕܘܼܬܵܐ ܒܸܬ ܦܵܝܫܵܐ ܒܣܝܼܡܬܵܐ. ܐܝܼܢܵܐ ܟܲܕ ܐ݇ܙܸܠܗ݇ܘܿܢ ܒܲܠܩܘܼܒ̣ܠ ܥܘܼܡܪܹܗ ܕܩܲܕܝܼܫܵܐ: ܪܘܼܚܩܸܢܘܿܢ ܚܲܕ݇ܟ̰ܵܐ ܡܸܢܹܗ: ܡܘܼܩܪܸܒ̣ܠܹܗ ܨܠܘܿܬܵܐ ܠܐܲܠܵܗܵܐ ܒܘܼܬ ܕܝܼܲܝܗܝ: ܘܗ݇ܘܹܐܠܵܗ̇ ܐܵܙܲܕ ܡ̣ܢ ܟܵܪ ܕܣܵܛܵܢܵܐ. ܘܟܲܕ ܝ݇ܕܸܥܠܵܗ̇ ܒܝܼـܹܗ ܓ̰ܵܡܵܥܲܬ ܕܐ݇ܢܵܫܹ̈ܐ: ܫܘܼܪܝܼܠܗ݇ܘܿܢ ܠܹܐܙܵܠܵܐ ܠܟܸܣܠܹܗ. ܕܫܵܩܠܝܼ ܗܲܝܲܪ̈ܝܵܬܹܐ ܟܠ ܡ̇ܢ ܕܠܟܸܣܠܹܗ ܒܸܗܕܵܪܵܐ ܗ݇ܘܼܵܐ: ܟܠ ܡܸܢܕܝܼ ܕܣܢܝܼܩܵܐ ܗ݇ܘܼܵܐ. ܒܸܫܩܵܠܵܐ ܗ݇ܘܼܵܐ ܒܨܠܘܿܬܹܗ: ܒܚܲܝܠܵܐ ܕܐܲܠܵܗܵܐ ܕܒܹܐܙܵܠܵܐ ܗ݇ܘܼܵܐ ܥܲܡܹܗ. ܝܘܼܗ݇ܒ̣ܸܠܹܗ ܗܘܼܟܡܵܐ ܥܲܠ ܪ̈ܘܼܚܹܐ ܒܝܼܫܹ̈ܐ: ܘܠܸܡܦܵܠܘܿܛܹܐ ܕܲܝܘܹ̈ܐ.
ܘܟܲܕ ܫܘܼܪܹܐܠܗ݇ܘܿܢ ܕܡܲܥܝܘܼܩܹܐ ܐܸܠܹܗ: ܟܠ ܝܵܘܡܵܐ ܒܹܐܙܵܠܵܐ ܗ݇ܘܼܵܐ ܠܟܸܣܠܹܗ: ܫܒ̣ܸܩܠܹܗ ܘܐ݇ܙܸܠܹܗ ܡ̣ܢ ܬܵܡܵܐ: ܟܲܕ ܗܸܟ̰ ܐ݇ܢܵܫܵܐ ܠܵܐ ܪܸܓ̣݇ܫܠܹܗ ܒܝܼـܹܗ. ܘܐ݇ܙܸܠܹܗ ܠܐܘܿܪܸܫܠܸܡ: ܕܣܵܓ̣ܸܕ ܗ݇ܘܼܵܐ ܠܩܲܒ̣ܪܹܗ ܕܡܵܪܲܢ: ܘܣܵܓ̣ܸܕ ܗ݇ܘܼܵܐ ܒܕܘܼܟܵܢܹ̈ܐ ܐܵܢܝܼ ܕܦܠܸܚܠܹܗ ܒܝܼܲܝܗܝ ܡܵܪܲܢ ܥܵܓ̰ܝܼܒܘܼܝܵܬܹ̈ܐ. ܐܝܼܢܵܐ ܡܵܪܲܢ ܡܫܝܼܚܵܐ: ܐܲܝܟܼ ܩܵܘܠܹܗ ܕܠܟܸܣ ܬܲܠܡܝܼܕ̈ܘܼܗܝ: ܕܗܵܐ ܐܵܢܵܐ ܥܲܡܵܘܟ̣ܘܿܢ ܝ݇ܘܸܢ: ܗܵܕܟ̣ܵܐ ܫܵܦܵܩܲܬ ܒܹܐܙܵܠܵܐ ܗ݇ܘܼܵܐ ܥܲܡܹܗ. ܐܝܼܢܵܐ ܟܲܕ ܥܒ̣ܸܪܹܗ ܠܡܕܝܼܢ݇ܬܵܐ ܚܸܡܨ: ܒܣܸܡܠܵܠܹܗ ܕܣܵܓ̣ܸܕ ܓܵܘ ܗ̇ܘ ܗܲܝܟܠܵܐ: ܕܪܹܫܹܗ ܕܝܘܿܚܲܢܵܢ ܡܲܥܡ̱ܕܵܢܵܐ ܡܘܼܬܒ̣ܐ ܗ݇ܘܼܵܐ ܒܝܼـܹܗ. ܒܚܲܫܹܗ ܘܡܲܟܝܼܟ̣ܘܼܬܹܗ ܛܠܸܒܠܹܗ ܡ̣ܢ ܩܲܢܟܵܝܵܐ: ܕܡܲܚܙܝܼܠܹܗ ܠܪܹܫܹܗ ܕܨܸܦܝܵܐ ܕܢܵܫܸܩܠܹܗ: ܘܗ̇ܘ ܠܵܐ ܒܣܸܡܠܵܠܹܗ. ܘܟܲܕ ܐܵܗܵܐ ܐ݇ܙܸܠܹܗ ܘܣܓ̣ܸܕܠܹܗ ܩܵܕ݇ܡ ܗ̇ܘ ܣܲܢܕܘܼܩܵܐ: [ܩܹܒ̣ܘܼܬܵܐ]: ܡ̣ܢ ܓܵܢܹܗ ܦܝܼܫܠܹܗ ܦܬܝܼܚܵܐ ܐܸܠܹܗ. ܘܦܝܼܫܠܹܗ ܒܘܼܪܟ̣ܵܐ ܡܸܢܹܗ: ܘܦܝܼܫܠܵܗ̇ ܡܘܼܢܝܸܚܬܵܐ ܓܵܢܹܗ. ܘܒܘܼܬ ܕܐܵܗܵܐ ܝܵܘܣܸܦ ܬܘܼܢܝܼܠܹܗ ܐܸܠܲܢ: ܗ̇ܘ ܕܟܹܐ ܚܵܝܝܼ ܗ݇ܘܼܵܐ ܓܵܘ ܗܲܝܟܠܵܐ ܕܡܕܝܼܢ݇ܬܵܐ ܕܚܸܡܨ. ܘܪܵܒܵܐ ܚܲܝ̈ܠܹܐ ܥܒ̣ܸܕܠܹܗ ܐܲܠܵܗܵܐ ܒܐܝܼܕܵܬ̈ܘܼܗܝ ܬܵܡܵܐ. ܐܝܼܢܵܐ ܒܪܘܿܢܹܗ ܝܑܼܗ݇ܘܼܵܐ ܓܘܼܪܵܐ ܕܐܵܣܟܲܪ ܘܚܲܕ݇ ܐ݇ܢܵܫܵܐ ܡܫܲܡܗܵܐ ܗ݇ܘܼܵܐ ܬܵܡܵܐ: ܗ̇ܘ ܦܝܵܫܵܐ ܗ݇ܘܼܵܐ ܓ̰ܘܼܪܒܵܐ ܡ̣ܢ ܣܵܛܵܢܵܐ ܒܠܲܝܠܹܐ ܘܒܝܵܘܡܵܐ: ܒܥܕܵܢܵܐ ܕܚܙܹܐܠܹܗ ܛܘܼܒ̣ܵܢܵܐ ܡܵܪܝ ܡܝܼܟ̣ܵܐ ܠܥܝܼܩܘܼܬܹܗ ܕܝܵܠܵܕ݇ܐ: ܒܛܸܫܘܵܐ ܛܠܸܒܠܹܗ ܪ̈ܲܚܡܹܐ ܡ̣ܢ ܐܲܠܵܗܵܐ ܒܘܼܬ ܕܝܼـܹܗ: ܕܦܵܐܸܫ ܛܪܝܼܕܵܐ ܡܸܢܹܗ ܗ̇ܘ ܫܹܐܕܵܐ ܒܝܼܫܵܐ. ܟܲܕ ܡܲܩܘܸܚ ܗ݇ܘܼܵܐ ܫܹܐܕܵܐ: ܕܦܠܸܛܠܹܗ ܡ̣ܢ ܗ̇ܘ ܝܵܠܵܕ݇ܐ ܟܲܕ ܒܹܐܡܵܪܵܐ: ܕܘܵܝ ܡܸܢܘܼܟܼ ܡܝܼܟ̣ܵܐ ܢܘܼܗܲܕܪܵܝܵܐ: ܕܩܲܡ ܛܲܪܕܸܬܿ ܠܝܼ ܡ̣ܢ ܕܘܼܟܬܵܐ ܕܫܪܵܝܬܵܐ ܕܝܼܝܼ: ܕܗܵܐ ܥܸܣܪܝܼܢ ܫܸܢܹ̈ܐ ܒܝܼـܹܗ ܝ݇ܘܸܢ.
ܘܟܲܕ ܦܠܸܛܠܹܗ ܕܐܵܙܸܠ ܗ݇ܘܼܵܐ ܡ̣ܢ ܬܵܡܵܐ ܠܕܘܼܟܬܵܐ ܥܲܡܘܼܗܝ ܝܼܗ݇ܘܼܵܘ ܬܪܹܝܢ ܐ݇ܢܵܫܹ̈ܐ: ܕܐܵܙܠ݇ܝܼ ܗ݇ܘܼܵܘ ܨܵܠܝܼ ܗ݇ܘܼܵܘ ܨܠܘܿܬܵܐ ܓܵܘ ܐܘܿܪܸܫܠܸܡ. ܒܥܕܵܢܵܐ ܒܹܐܙܵܠܵܐ ܗ݇ܘܼܵܘ ܒܐܘܼܪܚܵܐ ܬܦܸܩܠܵܐ ܒܝܼܲܝܗܝ ܚܕܵܐ ܕܲܣܬܵܐ ܕܓ̰ܵܠܵܠܝܼ̈ـܹܐ: ܘܕܒ̣ܝܼܩܵܝܠܗ݇ܘܿܢ ܘܟܲܕ ܨܘܼܚܨܝܼܵܝܠܗ݇ܘܿܢ: ܘܠܵܐ ܡܘܼܫ݇ܟ̰ܸܚܠܗ݇ܘܿܢ ܥܲܡܲܝܗܝ ܚܲܕ݇ ܡܸܢܕܝܼ: ܐܵܡܪܝܼ ܐܸܠܲܝܗܝ ܕܓ̰ܵܣܘܼܣܹ̈ܐ ܝ݇ܬܘܿܢ ܕܒ̣ܝܼܩܵܝܠܗ݇ܘܿܢ ܝܲܚܣܝܼܪ ܠܟܸܣܠܲܝܗܝ. ܘܒܗ̇ܘ ܠܲܝܠܹܐ ܦܝܼܫܠܗ݇ܘܿܢ ܡܸܚܝܹ̈ܐ ܬܠܵܬ݇ܐ ܡ̣ܢ ܕܐܵܢܝܼ ܒܡܲܪܥܵܐ ܗ̇ܘ ܕܟܹܐ ܦܵܐܸܫ ܩܸܪܝܵܐ ܠܵܬܹܐܘܿܣ: ܗ̄:ܕ: [ܟܹܐܦܵܐ ܕܬܠܵܚܵܐ]: ܕܚܪܸܒ̣ܠܵܗ̇ ܕܘܼܟܬܵܐ ܕܬܝܵܒ̣ܬܲܝܗܝ [ܕܥܒ̣ܵܕܬܵܐ ܕܫܸܚܬܲܝܗܝ] ܠܐܸܣܛܘܼܡܟܲܝܗܝ: ܡ̣ܢ ܒܵܬ݇ܪ ܕܚܪܸܒ̣ܬܵܐ ܗ݇ܘܼܵܐ ܦܵܫܲܪܬܵܐ ܕܡܹܐܟ̣ܘܼܠܬܵܐ. ܒܸܦܠܵܛܵܐ ܗ݇ܘܼܵܐ ܡܹܐܟ̣ܘܼܠܬܵܐ ܒܦܘܼܡܲܝܗܝ. ܘܡܵܪܲܢ ܗ̇ܘ ܕܒܣܵܡܵܐ ܗ݇ܘܼܵܐ ܒܬܵܘܲܒܬܵܐ ܓܘܼܢܗܵܟܵܪܹ̈ܐ: ܡܘܼܚܙܝܼܠܹܗ ܠܚܲܕ݇ ܡܸܢܲܝܗܝ ܒܚܸܠܡܵܐ: ܕܒܝܼܲܕ ܨܠܘܿܬܹܗ ܕܡܵܪܝ ܡܝܼܟ̣ܵܐ ܒܸܬ ܗܵܘܹܐ ܦܘܼܪܩܵܢܵܐ ܠܚܲܒ̣ܪ̈ܵܒ̣ܵܬܘܼܗܝ. ܟܲܕ ܗ݇ܘܹܐܠܹܗ ܨܲܦܪܵܐ ܬܘܼܢܝܼܠܹܗ ܚܘܼܠܡܹܗ: ܘܩܕܸܡܠܗ݇ܘܿܢ ܘܦܘܼܠܛܵܝܠܗ݇ܘܿܢ ܡ̣ܢ ܝܲܚܣܝܼܪܘܼܬܲܝܗܝ. ܘܒܘܼܩܪܵܝܠܗ݇ܘܿܢ: ܕܐܲܝܢܝܼ ܡܸܢܵܘܟ̣ܘܿܢ ܦܝܵܫܵܐ ܝ݇ܠܹܗ ܩܸܪܝܵܐ ܡܝܼܟ̣ܵܐ؟ ܟܲܕ ܬܸܠܘܿܢܬܵܝ ܫܬܝܼܩܹ̈ܐ ܗ݇ܘܼܵܘ: ܒܗ̇ܝ ܕܚܲܒ̣ܪ̈ܵܘܵܬܲܝܗܝ ܠܹܐ ܗ݇ܘܼܵܘ ܒܝܼܕܲܥܝܵܐ ܠܫܸܡܹܗ ܘܡܘܼܡܝܼܵܝܠܗ݇ܘܿܢ ܒܫܸܡܹܗ ܕܡܫܝܼܚܵܐ. ܘܟܲܕ ܫܡܸܥܠܗ݇ܘܿܢ ܚܲܒܪܵܐ ܕܡܵܘܡܵܬܹ̈ܐ: ܓܠܹܐܠܹܗ ܐܸܠܲܝܗܝ ܘܐ݇ܡܸܪܹܗ: ܕܐܵܢܵܐ ܝ݇ܘܸܢ ܩܲܪܝܼܒܵܝܵܐ. ܘܩܘܼܪܒܸܢܘܿܢ ܘܢܦܸܠܗ݇ܘܿܢ ܥܲܠ ܐܲܩܠܵܬ̈ܘܼܗܝ: ܘܦܲܪܦܸܠܝܼ ܗ݇ܘܼܵܘ ܒܝܼـܹܗ ܒܕܸܡܥܹ̈ܐ ܕܥܲܝܢܹ̈ܐ ܕܬܵܢܲܚܝܵܬܹ̈ܐ: ܕܨܵܠܹܐ ܨܠܘܿܬܵܐ ܒܘܼܬ ܕܝܼܲܝܗܝ ܘܒܘܼܬ ܕܐܵܢܝܼ ܕܡܸܪ̈ܥܝܹܐ ܝ݇ܢܵܐ: ܕܦܲܪܩܝܼ ܡ̣ܢ ܗ̇ܘ ܡܲܪܥܵܐ ܣܸܪܝܵܐ. ܐܝܼܢܵܐ ܐܵܗܵܐ ܥܒ̣ܝܼܕܵܝܠܹܗ ܗܸܫܝܲܪ ܘܐ݇ܡܸܪܹܗ ܐܸܠܲܝܗܝ: ܕܠܵܐ ܗܵܘܝܼ ܡܸܢ݇ܕܪܹܫ̄ ܓ̰ܵܠܵܠܝܼ̈ـܹܐ: ܘܡܸܢ݇ܕܪܹܫ̄ ܠܵܐ ܓܵܢܒ̣ܝܼ ܡܸܢܕܝܼ: ܘܡܸܢ݇ܕܪܹܫ̄ ܠܵܐ ܚܲܙܕܸܓܝܼ ܠܐ݇ܢܵܫܵܐ. ܘܪܫܸܡܠܹܗ ܢܝܼܫܲܢܩܵܐ ܕܨܠܝܼܒ̣ܵܐ ܥܲܠ ܡܸܫܚܵܐ: ܘܡܫܝܼܚܵܝܠܹܗ. ܘܗܲܪ ܒܗ̇ܝ ܣܵܥܲܬ ܒܣܸܡܠܗ݇ܘܿܢ ܡ̣ܢ ܡܲܪܥܵܐ ܡܲܪܝܼܪܵܐ: ܘܐܲܝܟܼ ܩܵܘܠܲܝܗܝ ܠܟܸܣܠܹܗ ܠܵܐ ܦܠܸܛܠܗ݇ܘܿܢ ܒܓ̰ܵܠܵܠܝܼܘܼܬܵܐ. ܘܐ݇ܙܸܠܗ݇ܘܿܢ ܒܐܘܼܪܚܹܗ ܕܐܵܗܵܐ ܛܘܼܒ̣ܵܢܵܐ ܘܚܲܒ̣ܪ̈ܵܘܵܬܘܼܗܝ: ܗܲܠ ܕܥܒ̣ܸܪܘܿܢ ܠܐܘܿܪܸܫܠܸܡ. ܨܘܼܠܹܐܠܹܗ ܨܠܘܿܬܵܐ ܒܩܲܒ̣ܪܵܐ [ܕܡܵܪܲܢ]: ܘܣܓ̣ܸܕܠܹܗ ܒܐܵܢܝܼ ܕܘܼܟܵܢܹ̈ܐ: ܕܡܵܪܲܢ ܬܘܼܡܸܡܠܹܗ ܒܡܕܲܒܪܵܢܘܼܬܹܗ ܣܓ̣ܝܼܕܬܵܐ ܒܘܼܬ ܚܵܬܸܪ ܕܝܼܲܢ.
ܐܝܼܢܵܐ ܩܘܼܘܸܡܠܵܗ̇ ܬܵܡܵܐ ܐܝܼܬ ܗ݇ܘܼܵܐ ܚܲܕ݇ ܡܝܼܛܪܵܦܘܼܠܹܝܛܵܐ ܕܐܲܢܛܝܵܟ̣ܝܵܐ: ܐܘܼܦ ܗ̇ܘ ܐܸܬܝܵܐ ܗ݇ܘܼܵܐ ܕܣܵܓ̣ܸܕ ܗ݇ܘܼܵܐ. ܘܦܝܼܫܠܹܗ ܝ݇ܕܸܥܝܵܐ ܠܛܘܼܒ̣ܵܢܵܐ ܘܝ݇ܕܸܥܠܹܗ ܠܪܲܒܵܢܘܼܬܹܗ [ܗ̄:ܕ̄: ܕܝܼܠܹܗ ܪܲܒܲܢ]: ܫܩܸܠܹܗ ܥܲܡܹܗ ܘܠܘܼܒܸܠܹܗ ܠܩܸܠܵܝܬܹܗ. ܕܡܲܢܝܸܚ ܡ̣ܢ ܦܸܠܚܵܢܹܗ ܘܡ̣ܢ ܟܸܟ̰ܚܵܐ ܕܐܘܼܪܚܵܐ. ܟܲܕ ܗ݇ܘܹܐܠܹܗ ܠܟܸܣܠܹܗ ܩܵܐ ܡܸܬܚܵܐ ܕܚܲܕ݇ܟ̰ܵܐ ܝܵܘܡܵܢܹ̈ܐ: ܐ݇ܬܹܐܠܗ݇ܘܿܢ ܐ݇ܢܵܫܹ̈ܐ ܡ̣ܢ ܛܲܪܣܘܿܣ: ܕܛܵܠܒܝܼ ܗ݇ܘܼܵܘ ܡ̣ܢ ܡܵܪܝ ܦܵܠܵܘܝܵܢܘܿܣ ܕܣܵܝܸܡܠܗ݇ܘܿܢ ܚܲܕ݇ ܡܕܲܒܪܵܢܵܐ ܘܐܲܦܸܣܩܘܿܦܵܐ. ܐܵܗܵܐ ܩܲܕܝܼܫܵܐ ܡܵܪܝ ܦܵܠܵܘܝܵܢܘܿܣ ܡܘܼܬܸܒ̣ܠܹܗ ܥܲܠܲܝܗܝ ܩܵܘܠܵܐ ܒܲܝܢܵܬ ܕܝܼـܹܗ ܘܐܸܠܲܝܗܝ: ܟܲܕ ܠܵܐ ܡܘܼܕܸܥܠܗ݇ܘܿܢ ܠܩܲܕܝܼܫܵܐ ܡܵܪܝ ܡܝܼܟ̣ܵܐ. ܘܟܠܹܗ ܠܲܝܠܹܐ ܥܒ̣ܸܕܠܗ݇ܘܿܢ ܫܵܗܲܪܬܵܐ ܘܩܸܡܠܗ݇ܘܿܢ ܒܨܠܘܿܬܵܐ: ܒܥܕܵܢܵܐ ܕܐ݇ܪ̈ܵܙܹܐ ܦܪܸܫܠܹܗ ܘܥܘܼܝܸܢܠܹܗ ܡܵܪܝ ܦܵܠܵܘܝܵܢܘܿܣ. ܕܩܵܒܸܠ ܥܲܠ ܓܵܢܹܗ ܣܝܵܡܝܼܕܵܐ ܕܐܲܦܸܣܩܘܿܦܘܼܬܵܐ: ܘܗܵܘܹܐ ܡܕܲܒܪܵܢܵܐ ܠܛܲܪ̈ܣܘܿܣܵܝܹܐ. ܐܝܼܢܵܐ ܐܵܗܵܐ ܟܲܕ ܡܘܼܨܝܸܬܹܠܹܗ ܠܗܲܡܙܲܡܬܵܐ ܕܡܵܪܲܢ: ܠܹܐ ܡܨܹܐܠܹܗ ܕܥܵܒ̣ܸܪ ܥܲܠܘܼܗ̇: ܘܩܘܼܒܸܠܹܗ ܣܝܵܡܝܼܕܵܐ ܕܐܲܦܸܤܩܘܿܦܘܼܬܵܐ ܡ̣ܢ ܡܵܪܝ ܦܵܠܵܘܝܵܢܘܿܣ ܒܚܲܕܒܫܲܒܵܐ ܕܦܲܢܛܩܘܼܣܛܹܐ. ܘܗܘܹܐܠܹܗ ܬܵܡܵܐ ܬܠܵܬ݇ܐ ܝܵܘܡܵܢܹ̈ܐ ܡ̣ܢ ܒܵܬ݇ܪ ܣܝܵܡܝܼܕܵܐ: ܘܐܵܢܝܼ ܐ݇ܢܵܫܹ̈ܐ ܒܣܸܡܠܵܐ ܠܗ݇ܘܿܢ ܕܠܲܒܠܝܼܠܹܗ ܘܐܵܙܠ݇ܝܼ. ܘܩܸܡܠܹܗ ܒܦܲܠܓܵܐ ܕܠܲܝܠܹܐ ܕܚܲܡܸܫܒܫܲܒܵܐ ܘܐ݇ܙܸܠܹܗ ܠܓܹܒܵܐ ܕܛܘܼܪܵܐ ܕܣܝܼܢܲܝ: ܟܲܕ ܗܸܟ̰ ܐ݇ܢܵܫܵܐ ܠܵܐ ܪܸܓ̣݇ܫܠܹܗ ܒܝܼـܹܗ: ܘܟܲܕ ܪܥܸܫܠܗ݇ܘܿܢ ܐܵܢܝܼ ܒܩܵܝܕܲܡܬܵܐ: ܛܘܼܥܝܼܠܗ݇ܘܿܢ ܥܲܠܘܼܗܝ ܘܠܵܐ ܡܘܼܫ݇ܟ̰ܸܚܠܗ݇ܘܿܢ.
ܘܐܵܗܵܐ ܐ݇ܙܸܠܹܗ ܠܛܘܼܪܵܐ ܕܣܝܼܢܲܝ. ܘܨܘܼܠܹܐܠܹܗ ܨܠܘܿܬܵܐ ܒܗ̇ܘ ܗܲܝܟܠܵܐ: ܐܲܝܟܵܐ ܕܩܘܼܒܸܠܹܗ ܡܘܼܫܹܐ ܓܸܠܝܵܢܵܐ ܡ̣ܢ ܐܲܠܵܗܵܐ. ܗܵܝܓܵܗ ܐ݇ܬܹܐܠܹܗ ܠܒܲܪܝܼܵܐ ܕܐܸܣܛܹܩܹܐ: ܘܦܝܼܫܠܹܗ ܒܘܼܪܟ̣ܵܐ ܡ̣ܢ ܐܲܚܘܿܢܘܵܬܹ̈ܐ ܩܲܕܝܼܫܹ̈ܐ ܐܵܢܝܼ ܕܬܵܡܵܐ ܗ݇ܘܼܵܘ. ܘܥܒ̣ܸܪܹܗ ܡܸܢ݇ܕܪܹܫ݇ ܠܒܲܪܝܼܵܐ ܓܵܘܵܝܵܐ. ܬܵܡܵܐ ܡܘܼܫ݇ܟ̰ܸܚܠܹܗ ܚܕܵܐ ܓܸܦܝܼܬܵܐ ܥܝܼܩܬܵܐ ܘܚܝܼܠܹܗ ܒܝܼܘܼܗ̇. ܡܣܵܒܵܒ ܓܵܘ ܒܲܪܝܼܵܐ ܠܲܝܬ ܗ݇ܘܼܵܐ ܚܲܕ݇ ܡܸܢܕܝܼ ܕܐܵܟ̣ܸܠ ܗ݇ܘܼܵܐ: ܫܒ̣ܘܿܩ ܡ̣ܢ ܥܸܩܪܹ̈ܐ ܕܐܝܼܠܵܢܹ̈ܐ ܕܒܲܪܝܼܵܐ: ܪܵܒܵܐ ܙܲܗܡܲܬ ܝ݇ܗܘܼܵܐ ܚܲܝܘܼܬܵܐ ܬܵܡܵܐ: ܐܝܼܢܵܐ ܟܹܐ ܝܵܕܸܥ ܗ݇ܘܼܵܐ ܡ̣ܢ ܫܵܦܵܩܲܬ ܐܲܠܵܗܵܝܬܵܐ: ܟܹܐ ܝܵܕܸܥ ܗ݇ܘܼܵܐ ܠܗ݇ܘܿܢ ܐܵܢܝܼ ܥܸܩܪܹ̈ܐ ܕܐܝܼܠܵܢܹ̈ܐ: ܠܩܲܕ݇ܡܵܝܹ̈ܐ ܘܠܐ݇ܚܵܪ̈ܵܝܹܐ ܕܥܸܩܪܹ̈ܐ: ܘܗܘܝܼܬܵܐ ܗ݇ܘܼܵܐ ܩܵܬܹܗ ܐܲܝܟܼ ܥܵܕܲܬ ܒܝܼܲܝܗܝ. ܘܬܵܡܵܐ ܟܹܐ ܚܲܝܝܼ ܗ݇ܘܼܵܐ ܒܪܲܗܵܬܘܼܬܵܐ ܘܫܸܠܝܘܼܬܵܐ. ܘܫܘܼܪܹܐܠܹܗ ܒܦܸܠܚܵܢܵܢܹ̈ܐ ܓܘܼܪܹ̈ܐ. ܘܐ݇ܬܹܐܠܹܗ ܥܲܠܘܼܗܝ ܒܠܲܝܠܹܐ ܓܘܼܪܵܐ ܕܕܲܝܘܹ̈ܐ ܘܟܠܵܗ̇ ܕܲܣܬܵܐ ܕܫܹܐܕܹ̈ܐ: ܘܥܒ̣ܸܕܠܗ݇ܘܿܢ ܢܫܲܪܬܵܐ ܥܲܠܘܼܗܝ ܘܡܚܹܐܠܗ݇ܘܿܢ ܕܠܵܐ ܪ̈ܲܚܡܹܐ: ܘܟܲܕ ܗ݇ܘܹܐܠܹܗ ܢܦܝܼܠܵܐ ܥܲܠ ܐܲܪܥܵܐ ܚܲܡܫܵܐ ܝܵܘܡܵܢܹ̈ܐ ܠܲܝܠܹܐ ܘܝܵܘܡܵܐ ܡ̣ܢ ܡܚܵܝܵܬܹ̈ܐ ܕܦܝܼܫܠܹܗ ܡܸܚܝܵܐ: ܗܵܝܓܵܗ ܝ݇ܕܸܥܠܹܗ ܘܦܘܼܪܡܝܼܠܹܗ ܘܦܝܼܫܠܹܗ ܚܘܼܠܸܢܵܐ: ܘܫܘܼܪܹܐܠܹܗ ܒܦܸܠܚܵܢܵܐ ܕܙܲܕܝܼܩܘܼܬܵܐ. ܘܡ̣ܢ ܕܚܝܼܠܹܗ ܠܲܐܟ̣ܵܐ ܡܸܬܚܵܐ ܕܚܲܡܫܲܥܣܲܪ ܫܸܢܹ̈ܐ: ܟܲܕ ܒܸܦܠܵܚܵܐ ܠܐܲܠܵܗܵܐ ܒܕܸܡܥܹ̈ܐ ܕܥܲܝܢܹ̈ܐ ܘܒܬܵܢܲܚܝܵܬܹ̈ܐ: ܒܘܼܬ ܚܵܬܸܪ ܕܓܵܢܹܗ ܘܒܘܼܬ ܚܵܬܸܪ ܕܒܢܲܝ̈ܢܵܫܵܐ: ܦܝܼܫܠܹܗ ܚܸܙܝܵܐ ܐܸܠܹܗ ܠܸܓ̣ܝܘܿܢ [ܓ̰ܵܡܵܥܲܬ ܕܣܵܛܵܢܹ̈ܐ] ܘܚܲܕ݇ ܡܸܢܲܝܗܝ ܟܲܕ ܡܣܘܼܩܠܵܐ ܗ݇ܘܼܵܐ ܘܠܒ̣ܝܼܫܵܐ: ܘܚܸܠܡܲܬܟܵܪܹ̈ܐ ܒܸܥܒ̣ܵܕܵܐ ܗ݇ܘܼܵܘ ܚܸܠܡܲܬ ܠܥܸܠܸܠ ܡܸܢܹܗ ܘܡܝܵܩܘܼܪܹܗ ܟܲܕ ܒܹܐܡܵܪܵܐ ܐܸܠܹܗ: ܕܐܵܗܵܐ ܡܫܝܼܚܵܐ ܝ݇ܠܹܗ ܒܲܗܪܹܗ ܕܥܵܠܡܵܐ. ܘܐ݇ܡܸܪܹܗ ܐܸܠܹܗ: ܒܘܼܬ ܡܲܢܬܵܝܵܬ̈ܘܼܟܼ ܘܙܪ̈ܲܢܓܘܼܝܵܬܘܼܟܼ ܡܵܪܵܐ ܕܝܘܼܬܪܵܢܵܐ ܗܵܐ ܦܸܫܠܝܼ ܚܸܙܝܵܐ ܐܸܠܘܼܟܼ: ܕܦܲܪܥܸܢܘܼܟܼ ܒܘܼܬ ܦܘܼܠܚܵܢܵܢ̈ܘܼܟܼ. ܐܝܼܢܵܐ ܐܵܗܵܐ ܓ̰ܘܼܘܸܒܠܹܗ ܒܡܲܪܕܘܼܬܵܐ: ܕܪ݇ܚܘܿܫ ܡ̣ܢ ܒܵܬ݇ܪܝܼ ܣܵܛܵܢܵܐ: ܕܡܫܝܼܚܵܐ ܡܵܪܝܼ ܠܹܐ ܝ݇ܠܹܗ ܒܐܵܗܵܐ ܥܵܠܡܵܐ ܕܒܸܬ ܐܵܬܹܐ: ܐܝܼܢܵܐ ܒܥܵܠܡܵܐ ܕܲܥܬܝܼܕ. ܘܩܸܡܠܹܗ ܒܨܠܘܿܬܵܐ ܘܒܕܸܡܥܹ̈ܐ ܕܥܲܝܢܹ̈ܐ ܕܬܵܢܲܚܝܵܬܹ̈ܐ: ܟܲܕ ܒܸܛܠܵܒܵܐ ܡ̣ܢ ܡܵܪܲܢ. ܘܦܝܼܫܠܗ݇ܘܿܢ ܛܠܝܼܩܹ̈ܐ ܡ̣ܢ ܠܟܸܣܠܹܗ ܕܵܡܵܝܵܬܹ̈ܐ ܕܚܝܼܵܠܹ̈ܐ ܕܫܹܐܕܹ̈ܐ ܒܝܼܫܹ̈ܐ: ܘܚܲܕ݇ܟ̰ܵܐ ܡܘܼܢܝܸܚܠܹܗ ܡܸܢܲܝܗܝ: ܫܘܼܪܹܐܠܹܗ ܒܦܸܠܚܵܢܵܢܹ̈ܐ ܐܲܠܵܗܵܝܹ̈ܐ: ܘܡܘܼܬܸܒ̣ܠܹܗ ܥܲܠ ܓܵܢܹܗ ܕܠܵܐ ܕܵܡܸܟܼ ܒܠܲܝܠܹܐ ܘܒܝܵܘܡܵܐ: ܘܠܵܐ ܫܵܠܹܐ ܡ̣ܢ ܚܸܠܡܲܬ: ܕܦܵܪܸܩ ܡ̣ܢ ܓܸܚܟܹ̈ܐ ܒܲܛܝܼܠܹ̈ܐ ܕܣܵܛܵܢܵܐ. ܣܵܒܵܒ ܒܹܐܡܪܵܐ ܗ݇ܘܼܵܐ ܒܹܝܠܹܗ ܘܠܓܵܢܹܗ: ܕܣܵܒܵܒ ܕܚܛܝܼܵܬܹ̈ܐ ܕܐܲܒ̣ܵܗ̈ܝܼ ܘܕܝܼܝܼ ܩܲܘܘܼܡܹܐ ܝ݇ܢܵܐ ܐܸܠܝܼ ܐܲܢܹ̈ܐ ܟܠܲܝܗܝ. ܘܗ݇ܘܹܐܠܹܗ ܒܐܵܗܵܐ ܦܸܠܚܵܢܵܐ ܩܸܫܝܵܐ ܐܲܝܟܼ ܚܲܡܫܵܐ ܫܸܢܹ̈ܐ: ܘܡ̣ܢ ܒܵܬ݇ܪ ܕܫܡܸܥܠܹܗ ܡܵܪܲܢ ܨܠܵܘܵܬܹ̈ܗ: ܗ݇ܘܹܐܠܹܗ ܐܵܙܲܕ ܡ̣ܢ ܟܵܪ ܕܐܵܢܝܼ ܓܸܚܟܹ̈ܐ ܘܚܘܼܡܠܵܢܹ̈ܐ ܕܣܵܛܵܢܵܐ: ܗ݇ܘܹܐܠܹܗ ܒܪܲܗܵܬܘܼܬܵܐ. ܡܣܵܒܵܒ ܒܸܙܕܲܥܝܵܐ ܗ݇ܘܼܵܐ ܡ̣ܢ ܒܝܼܫܘܼܬܵܐ ܕܕܲܝܘܹ̈ܐ ܡܵܪ̈ܘܿܕܹܐ: ܪܵܒܵܐ ܡܲܙܝܘܼܕܹܐ ܗ݇ܘܼܵܐ ܥܲܠ ܦܸܠܚܵܢܹܗ: ܐܝܼܢܵܐ ܐܘܼܦ ܨܵܚܘܼܬܵܐ ܘܒܵܣܲܡܝܵܬܹ̈ܐ ܡܵܪܲܢ ܒܸܥܒ̣ܵܕܵܐ ܗ݇ܘܼܵܐ ܒܐܝܼܕܵܬ̈ܘܼܗܝ. ܒܗ̇ܝ ܕܚܫܸܚܠܹܗ ܠܚܵܠܥܲܬ ܥܸܠܵܝܬܵܐ ܕܟܵܡܝܼܠܘܼܬܵܐ ܕܕܘܼܒܵܪ̈ܘܼܗܝ ܘܬܲܚܡܵܢܝܵܬ̈ܘܼܗܝ.
ܐܝܼܢܵܐ ܡ̣ܢ ܡܵܪܲܢ ܦܝܵܫܵܐ ܗ݇ܘܼܵܐ ܝܘܼܗ݇ܒ̣ܵܐ ܓܸܠܝܵܢܵܐ ܒܘܼܬ ܕܝܼܘܼܗܝ: ܕܐܵܙܸܠ ܘܒܵܢܹܐ ܥܘܼܡܪܵܐ: ܕܗܵܘܹܐ ܣܸܬܪܵܐ ܠܩܵܪ̈ܝܼܒܵܝܹܐ ܘܒܹܝܬ ܓܵܘܣܵܐ ܠܐܵܢܝܼ ܕܐܝܼܢܵܐ ܡܘܼܥܝܸܩܹ̈ܐ: ܘܐܵܟ̣ܸܠ ܚܲܡ ܕܐܵܢܝܼ ܕܒܸܚܵܝܵܐ ܝ݇ܢܵܐ ܒܝܼـܹܗ: ܒܘܼܫ ܙܵܘܕܵܐ ܕܡܲܟܡܸܠ ܚܲܝܘܼ̈ܗܝ ܓܵܘ ܒܲܪܝܼܵܐ. ܘܦܝܼܫܠܹܗ ܬܠܵܬ݇ܐ ܝܵܘܡܵܢܹ̈ܐ: ܟܲܕ ܚܙܹܐܠܹܗ ܠܐܵܗܵܐ ܚܸܙܘܵܐ. ܡܣܵܒܵܒ ܒܸܙܕܲܥܝܵܐ ܗ݇ܘܼܵܐ: ܕܡܘܼܕܝܼ ܒܸܬ ܗܵܘܹܐ ܡ̣ܢ ܟܵܪ ܕܫܹܐܕܹ̈ܐ ܒܝܼܫܹ̈ܐ. ܘܡ̣ܢ ܒܵܬ݇ܪ ܬܠܵܬ݇ܐ ܝܵܘܡܵܢܹ̈ܐ: ܟܲܕ ܡܫܘܼܪܸܪܹܗ ܒܝܼـܹܗ ܒܚܸܙܘܵܐ: ܬܘܼܚܡܸܢܹܗ ܒܚܝܼܵܠܹܗ ܕܠܐܲܝܢܝܼ ܓܹܒܵܐ ܒܸܬ ܐܵܙܸܠ. ܘܐܘܼܦ ܡܵܪܲܢ ܡܘܼܕܪܸܙܵܠܹܗ ܠܡܹܐܙܲܠܬܹܗ: ܕܕܵܥܸܪ ܒܐܘܼܪܚܵܐ ܕܐ݇ܬܹܐܠܹܗ ܒܝܼܘܼܗ̇: ܗܲܠ ܐܲܝܟܵܐ ܕܒܲܣܡܵܐ ܪܵܙܝܼܘܼܬܵܐ ܕܫܵܦܵܩܲܬܹܗ ܕܐܲܠܵܗܵܐ. ܘܐ݇ܬܹܐܠܹܗ ܘܨܘܼܠܹܐܠܹܗ ܨܠܘܿܬܵܐ ܓܵܘ ܛܘܼܪܵܐ ܕܣܝܼܢܲܝ: ܐܘܼܦ ܒܩܲܒ̣ܪܹܗ ܕܡܵܪܲܢ ܘܒܟܠ ܕܘܼܟܵܢܹ̈ܐ ܩܲܕܝܼܫܹ̈ܐ. ܘܕܸܥܪܹܗ ܘܐ݇ܬܹܐܠܹܗ ܠܡܲܕܢ̱ܚܵܐ: ܗܲܠ ܡܕܝܼܢ݇ܬܵܐ ܠܕܵܪܵܐ: ܡܣܵܒܵܒ ܕܡܘܼܬܸܒ̣ܬܵܐ ܗ݇ܘܼܵܐ ܐܸܠܹܗ ܕܐܵܙܸܠ ܠܕܲܝܪܵܐ ܕܡܲܪܕܝܼܢ: ܕܫܵܩܸܠ ܒܘܼܪܟܬܵܐ ܡ̣ܢ ܫܟ̣ܝܼܢܬܵܐ ܕܓܲܪ̈ܡܹܐ ܕܒܹܝܬ ܡܵܪܝ ܐܵܘܓܹܝܢ. ܘܒܘܼܬ ܕܐܲܢܹ̈ܐ ܣܵܒ̣ܹ̈ܐ ܩܲܕܝܼܫܹ̈ܐ: ܕܡܝܼܬܹ̈ܐ ܗ݇ܘܼܵܘ: ܐܵܢܝܼ ܕܝܘܼܗ݇ܒ̣ܸܠܗ݇ܘܿܢ ܐܸܠܹܗ ܡܲܥܡܘܿܕܝܼܬܵܐ. ܘܐܘܼܦ ܡܘܼܠܒ̣ܸܫܠܗ݇ܘܿܢ ܪܝܼܙܵܐ ܢܵܓ̰ܸܒ ܕܝܼܚܝܼܕܵܝܘܼܬܵܐ: ܘܡܘܼܠܸܦܠܗ݇ܘܿܢ ܕܐܵܙܸܠ ܒܐܵܗܵܐ ܐܘܼܪܚܵܐ ܥܝܼܩܬܵܐ.
ܐܝܼܢܵܐ ܒܥܕܵܢܵܐ ܕܥܒ̣ܸܪܹܗ ܠܕܲܝܪܵܐ ܕܡܲܪܕܝܼܢ ܘܨܘܼܠܹܐܠܹܗ ܨܠܘܿܬܵܐ ܘܫܘܼܒܸܚܠܹܗ: ܦܝܼܫܠܹܗ ܚܸܙܝܵܐ ܐܸܠܹܗ ܡܲܠܲܐܟ̣ܵܐ ܕܐܲܠܵܗܵܐ ܟܲܕ ܒܹܐܡܵܪܵܐ ܐܸܠܹܗ: ܕܬܵܐ ܕܡܲܚܙܸܢܘܼܟܼ ܕܘܼܟܬܵܐ ܕܒܵܢܹܝܬܿ ܒܝܼܵܗ̇ ܕܲܝܪܵܐ. ܘܐ݇ܬܹܐܠܹܗ ܥܲܡܹܗ ܡܲܠܲܐܟ̣ܵܐ ܗܲܠ ܠܐܵܗܵܐ ܕܘܼܟܬܵܐ. ܕܒܝܼܵܗ̇ ܗ݇ܘܼܵܐ ܫܟ̣ܝܼܢܬܵܐ ܕܦܲܓ̣ܪܹܗ ܕܩܲܕܝܼܫܵܐ ܡܵܪܝ ܡܝܼܟ̣ܵܐ: ܠܐܲܠܩܘܿܫ ܡܵܬܹܗ ܕܢܵܚܘܿܡ ܢܒ̣ܝܼܵܐ: ܕܒܐܲܬܪܵܐ ܕܢܝܼܢܘܹܐ. ܘܐܘܼܦ ܙܹܐ ܡܘܼܚܙܹܐܠܹܗ ܐܸܠܹܗ ܡܲܠܲܐܟ̣ܵܐ ܚܘܼܛܪܵܐ ܚܲܝܠܵܢܵܐ ܕܢܨܝܼܒ̣ܵܐ ܗ݇ܘܼܵܐ ܒܐܵܗܵܐ ܐܲܪܥܵܐ: ܕܒܝܼܵܗ̇ ܒܢܹܐܠܹܗ ܒܲܝܬܵܐ ܩܲܕܝܼܫܵܐ ܡܵܪܝ ܡܝܼܟ̣ܵܐ. ܘܓ̰ܡܸܥܠܵܗ̇ ܟܠܵܗ̇ ܡܵܬܵܐ ܕܐܲܠܩܘܿܫ: ܟܵܗܢܹ̈ܐ ܘܡܫܲܡܫܵܢܹ̈ܐ: ܓܲܒ̣ܪܹ̈ܐ ܡܐܘܼܕܵܠܹܐ ܘܒܲܟ̣ܬܵܬܹ̈ܐ ܘܓ̰ܘܲܢܩܹ̈ܐ ܘܝܵܠܹ̈ܕ݇ܐ: ܕܦܵܝܫܝܼ ܒܘܼܪ̈ܟ̣ܹܐ ܡ̣ܢ ܩܲܕܝܼܫܘܼܬܹܗ ܕܣܵܒ̣ܵܐ ܘܡܸܣܟܹܢܵܐ ܢܲܨܝܼܚܵܐ ܡܵܪܝ ܡܝܼܟ̣ܵܐ. ܘܨܘܼܠܹܐܠܹܗ ܨܠܘܿܬܵܐ ܒܘܼܬ ܕܝܼܲܝܗܝ ܘܒܘܼܪܟ̣ܵܝܠܹܗ ܘܐ݇ܡܸܪܹܗ: ܡܵܪܝܵܐ ܒܸܬ ܒܲܪܸܟܼ ܠܛܵܝܸܦܹܗ ܒܫܠܵܡܵܐ: ܘܒܸܬ ܡܲܙܝܸܕ ܥܲܠܲܝܗܝ ܡܵܪܝܵܐ: ܥܲܠܵܘܟ̣ܘܿܢ ܘܥܲܠ ܒܢܘܿܢܵܘ̈ܟ̣ܘܿܢ. ܘܚܕܹܐܠܗ݇ܘܿܢ ܒܝܼـܹܗ ܪܵܒܵܐ. ܘܚܙܹܐܠܹܗ ܕܡܵܘܬܵܐ ܕܝܵܠܹ̈ܕ݇ܐ ܗܵܟܘܼܡܹܐ ܠܹܗ ܓܵܘ ܡܵܬܵܐ: ܗܲܠ ܕܓܵܘܵܐ ܕܵܪ̈ܵܬܹܐ ܪܘܼܦܹܐ ܗ݇ܘܼܵܘ ܫܠܲܕܹ̈ܐ ܠܲܝܬ ܗ݇ܘܼܵܘ ܐܵܢܝܼ ܕܩܲܒ̣ܪܝܼܠܗ݇ܘܿܢ: ܐ݇ܡܸܪܹܗ ܢܲܨܝܼܚܵܐ ܠܐܲܠܩܘܿܫܵܝܹ̈ܐ: ܐܸܢ ܕܵܥܪܝܼܬܘܿܢ ܡ̣ܢ ܦܸܠܚܵܢܵܢ̈ܵܘܟ̣ܘܿܢ ܒܝܼܫܹ̈ܐ: ܘܢܵܛܪܝܼܬܘܿܢ ܦܘܼܩܕܵܢܹ̈ܐ ܕܡܫܝܼܚܵܐ: ܘܚܵܕܪܝܼܬܘܿܢ ܒܐܘܼܪܚܹܗ ܕܠܵܐ ܠܵܘܡܵܐ: ܒܸܬ ܛܲܪܕܸܢܹܗ ܡܵܘܬܵܢܵܐ ܡ̣ܢ ܝܵܠܵܕ݇ܘܟ̣ܘܿܢ. ܘܒܟ̣ܹܐܠܗ݇ܘܿܢ ܛܵܝܸܦܵܐ ܩܵܕ݇ܡ ܩܲܕܝܼܫܵܐ ܘܐ݇ܡܸܪܘܿܢ: ܟܠܲܢ ܗ݇ܘܹܐܠܲܢ ܢܲܙܲܢܹ̈ܐ: ܡܘܼܟܪܸܒܠܲܢ ܠܐܲܠܵܗܵܐ ܘܡܵܪܲܢ ܝܼܫܘܿܥ ܒܘܼܬ ܦܸܠ̈ܚܵܢܵܢܲܢ ܒܝܼܫܹ̈ܐ: ܟܲܕ ܒܸܛܠܵܒܵܐ ܝ݇ܘܸܚ ܡ̣ܢ ܩܲܕܝܼܫܘܼܬܘܼܟܼ ܕܨܵܠܸܬ ܨܠܘܿܬܵܐ ܒܘܼܬ ܕܝܼܲܢ. ܘܡܘܼܬܸܒ̣ܠܹܗ ܢܲܨܝܼܚܵܐ ܒܸܪܟܵܐ ܘܨܘܼܠܹܐܠܹܗ ܨܠܘܿܬܵܐ ܩܵܕ݇ܡܲܝܗܝ ܠܟܸܣ ܐܲܠܵܗܵܐ: ܒܗ̇ܝ ܣܵܥܲܬ ܩܛܸܥܠܹܗ ܠܡܵܘܬܵܢܵܐ: ܘܡܘܼܟܠܹܐܠܹܗ ܡܲܠܲܐܟ̣ܵܐ ܩܸܛܠܵܐ ܡ̣ܢ ܝܵܠܹ̈ܕ݇ܐ ܐܲܠܩܘܿܫܵܝܹ̈ܐ. ܘܒܥܕܵܢܵܐ ܕܚܙܹܐܠܗ݇ܘܿܢ ܠܐܵܗܵܐ ܥܵܓ̰ܝܼܒܘܼܬܵܐ ܒܐܝܼܕܵܬܹ̈ܐ ܕܩܲܕܝܼܫܵܐ ܦܝܼܫܠܵܗ̇ ܦܠܝܼܚܬܵܐ: ܟܠܹܗ ܛܵܝܸܦܵܐ ܕܡܵܬܵܐ ܗܘܼܡܸܢܘܿܢ ܒܝܼـܹܗ: ܘܕܸܥܪܘܿܢ ܠܟܸܣ ܐܲܠܵܗܵܐ ܚܲܝܵܐ. ܘܓ̰ܡܸܥܠܗ݇ܘܿܢ ܟܸܢܫܹ̈ܐ ܪܵܒܵܐ ܡ̣ܢ ܐܲܬܪܵܐ ܕܢܝܼܢܘܹܐ ܐܵܢܝܼ ܕܡܸܪ̈ܥܝܹܐ ܝ݇ܢܵܐ ܘܐܵܢܝܼ ܕܒܪܸܢܕܵܪܹ̈ܐ: ܘܒܚܕܵܐ ܗܹܡܸܙܡܵܢ ܒܘܼܣܡܵܝܠܹܗ.
ܘܐܝܼܬ ܗ݇ܘܼܵܐ ܓܵܘ ܗ̇ܝ ܡܵܬܵܐ ܚܕܵܐ ܒܲܟ̣ܬܵܐ: ܦܝܵܫܵܐ ܗ݇ܘܼܵܐ ܓ̰ܘܼܢܓ̰ܸܪܬܵܐ ܡ̣ܢ ܫܲܒ̣ܥܵܐ ܫܹܐܕܹ̈ܐ. ܘܠܹܐ ܫܵܒ̣ܩܵܐ ܗ݇ܘܼܵܐ ܠܐ݇ܢܵܫܵܐ ܕܥܵܒ̣ܸܪ ܗ݇ܘܼܵܐ ܓܵܘ ܡܵܬܵܐ. ܕܠܵܐ ܨܲܦܠܸܦܵܗ̇ ܗ݇ܘܼܵܐ ܠܹܗ ܘܕܲܪܒܸܢܵܗ̇ ܗ݇ܘܼܵܐ ܠܹܗ ܒܟܹܐܦܹ̈ܐ: ܘܒܥܝܼܩܘܼܬܵܐ ܓܘܼܪܬܵܐ ܗ݇ܘܼܵܐ ܟܠܵܗ̇ ܗ̇ܝ ܡܵܬܵܐ ܒܣܵܒܵܒ ܕܝܼܘܼܗ̇: ܘܟܲܕ ܩܲܕܝܼܫܵܐ ܒܸܚܕܵܪܵܐ ܗ݇ܘܼܵܐ ܬܵܡܵܐ ܡ̣ܢ ܡܲܕܢ̱ܚܵܐ ܕܡܵܬܵܐ: ܡܘܼܩܘܸܚܠܗ݇ܘܿܢ ܘܐܵܡܪܝܼ ܐܸܠܹܗ: ܕܥܘܿܪ ܠܒܵܬ݇ܪ ܚܵܨܘܼܟܼ: ܕܠܵܐ ܡܲܣܩܸܕܵܠܘܼܟܼ ܘܡܲܥܝܸܩܵܠܘܼܟܼ ܐܵܗܵܐ ܒܲܟ̣ܬܵܐ: ܕܟܠ ܕܥܵܒ̣ܸܪ ܗ݇ܘܼܵܐ ܡ̣ܢ ܬܵܡܵܐ: ܒܟܹܐܦܹ̈ܐ ܟܹܐ ܪܲܓ̰ܡܵܐ ܗ݇ܘܼܵܐ ܠܹܗ ܐܵܗܵܐ ܒܲܟ̣ܬܵܐ: ܘܟܲܕ ܫܡܸܥܠܹܗ ܩܲܕܝܼܫܵܐ ܡܵܪܝ ܡܝܼܟ̣ܵܐ ܐܲܢܹ̈ܐ ܗܹܡܸܙܡܵܢܹ̈ܐ: ܡܘܼܕܪܸܙܠܹܗ ܠܡܹܐܙܲܠܬܹܗ ܗܲܠ ܠܟܸܣ ܗ̇ܝ ܒܲܟ̣ܬܵܐ. ܘܒܥܕܵܢܵܐ ܕܚܙܹܐܠܵܗ̇ ܠܩܲܕܝܼܫܵܐ: ܫܘܼܪܹܐܠܵܗ̇ ܒܸܪܓ̰ܵܡܹܗ ܒܟܹܐܦܹ̈ܐ. ܘܐܘܼܦ ܚܕܵܐ ܡܸܢܲܝܗܝ ܠܹܐ ܗ݇ܘܼܵܐ ܒܸܩܝܵܬܵܐ ܒܝܼܘܼܗܝ: ܐܝܼܢܵܐ ܗ̇ܘ ܡܲܠܲܐܟ̣ܵܐ ܕܝܼܗܘܼܵܐ ܥܲܡܹܗ: ܕܒ̣ܝܼܩܵܐ ܗ݇ܘܼܵܐ ܚܲܕ݇ ܡܵܕܵܠܵܐ ܕܢܘܼܪܵܐ: ܘܟܸܠܝܵܐ ܗ݇ܘܼܵܐ ܒܦܲܐܬܵܐ ܕܩܲܕܝܼܫܵܐ. ܘܩܘܼܪܒܸܢܹܗ ܗܲܠ ܠܟܸܣ ܗ̇ܝ ܒܲܟ̣ܬܵܐ. ܘܫܘܼܪܝܼܠܗ݇ܘܿܢ ܫܹܐܕܹ̈ܐ ܒܦܘܼܡܘܼܗ̇ ܒܹܐܡܵܪܵܐ: ܘܵܝ ܐܸܠܲܢ ܡܸܢܘܼܟܼ ܒܪܘܿܢܵܐ ܕܡܲܪܝܲܡ ܘܡ̣ܢ ܬܲܠܡܝܼܕ̈ܘܼܟܼ! ܐܲܚܢܲܢ ܝ݇ܘܵܚ ܐܵܢܝܼ ܫܲܒ̣ܥܵܐ ܕܛܪܝܼܕܵܝܠܘܼܟܼ ܡ̣ܢ ܡܲܪܝܲܡ: ܘܐܵܕܝܼܵܐ ܗܵܘ ܐܘܼܦ ܐܸܠܲܢ ܒܸܛܪܵܪܵܐ ܝ݇ܘܸܬܿ ܘܦܵܠܘܿܛܹܐ ܝ݇ܘܸܬܿ ܡ̣ܢ ܕܐܵܗܵܐ ܕܘܼܟܬܵܐ ܕܚܲܝܘܼܬܲܢ ܢܘܼܗܲܕܪܵܝܵܐ ܒܫܸܡܘܼܟܼ! ܘܓ̰ܡܸܥܠܵܗ̇ ܟܠܵܗ̇ ܡܵܬܵܐ: ܕܚܵܙܝܼ ܠܗ̇ܝ ܥܵܓ̰ܝܼܒܘܼܬܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܦܬܸܚܠܹܗ ܦܘܼܡܹܗ ܘܗܘܼܡܙܸܡܠܹܗ ܥܲܡ ܕܲܝܘܹ̈ܐ ܘܐ݇ܡܸܪܹܗ: ܒܗ̇ܘ ܚܲܝܠܵܐ ܕܐܲܠܵܗܵܘܟ̣ܘܿܢ ܕܩܲܡ ܬܵܠܸܚܠܵܘܟ̣ܘܿܢ ܘܛܵܪܸܕܠܵܘܟ̣ܘܿܢ ܠܐܵܗܵܐ ܦܢܝܼܬܵܐ ܡܵܘܡܘܼܝܹܐ ܝ݇ܘܸܢ ܐܸܠܵܘܟ̣ܘܿܢ: ܕܠܲܝܬܠܵܘܟ̣ܘܿܢ ܗܘܼܟܡܵܐ ܠܦܝܵܫܵܐ ܓܵܘ ܕܐܵܗܵܐ ܦܲܓ̣ܪܵܐ ܓ̰ܘܼܢܓ̰ܸܪܵܐ ܚܕܵܐ ܣܵܥܲܬ ܘܐܘܼܦ ܚܲܕ݇ ܥܕܵܢܵܐ. ܐܸܠܵܐ ܕܦܲܠܛܝܼܬܘܿܢ ܡܸܢܘܼܗ̇ ܓܘܼܫܡܵܐܝܼܬ ܩܵܕ݇ܡ ܟܠܹܗ ܐܵܗܵܐ ܟܸܢܫܵܐ ܕܟܸܠܝܵܐ ܝ݇ܠܹܗ: ܘܡܸܢ݇ܕܪܹܫ̄ ܠܹܐ ܗܲܟܡܝܼܬܘܿܢ ܥܲܠ ܕܐܵܗܵܐ ܡܸܣܟܸܢܬܵܐ. ܡ̣ܢ ܒܵܬ݇ܪ ܗܵܕܵܐ ܦܝܼܫܠܗ݇ܘܿܢ ܐ݇ܣܝܼܪܹ̈ܐ ܫܹܐܕܹ̈ܐ ܒܚܲܝܠܹܗ ܕܡܫܝܼܚܵܐ: ܘܡܸܚܝܵܐ ܠܗ݇ܘܿܢ ܥܲܠ ܐܲܪܥܵܐ: ܘܦܠܸܛܠܗ݇ܘܿܢ ܡܸܢܘܼܗ̇ ܫܲܒ̣ܥܘܿܢܬܲܝܗܝ ܚܲܕ݇ ܒܵܬ݇ܪ ܗ̇ܘ ܐ݇ܚܹܪ݇ܢܵܐ: ܒܕܵܡܲܝܬܵܐ ܕܟܘܼܫܵܝܹ̈ܐ ܨܵܘܵܢܹ̈ܐ ܒܚܙܵܝܬܵܐ. ܘܦܠܸܛܠܗ݇ܘܿܢ ܒܹܝܦܲܠܓܵܐ ܩܵܕ݇ܡ ܥܲܝܢܹ̈ܐ ܕܟܠ ܐ݇ܢܵܫܵܐ: ܘܡܸܢ݇ܕܪܹܫ̄ ܠܵܐ ܦܝܼܫܠܗ݇ܘܿܢ ܚܸܙܝܹ̈ܐ. ܘܟܠܹܐܠܵܗ̇ ܗ̇ܝ ܒܲܟ̣ܬܵܐ ܒܣܸܡܬܵܐ: ܟܲܕ ܠܵܐ ܡܘܼܣܚܸܪܘܿܢ ܒܝܼܘܼܗ̇ ܐܵܢܝܼ ܫܹܐܕܹ̈ܐ ܒܚܲܕ݇ ܡܸܢܕܝܼ. ܘܕܒ̣ܸܩܠܵܗ̇ ܙܕܥܘܿܬܵܐ ܘܪܲܬܪܲܬܵܐ ܠܟܠܲܝܗܝ ܐܵܢܝܼ ܕܚܙܹܐܠܗ݇ܘܿܢ: ܘܫܘܼܒܸܚܠܗ݇ܘܿܢ ܠܐܲܠܵܗܵܐ ܗ̇ܘ ܕܝܘܼܗ݇ܒ̣ܸܠܹܗ ܐܲܝܟܼ ܕܐܵܗܵܐ ܗܘܼܟܡܵܐ ܠܩܲܕܝܼܫ̈ܘܼܗܝ ܘܥܵܒ̣ܕܵܢܹ̈ܐ ܕܪܸܙܵܝܘܼܗܝ. ܘܡܘܼܬ݇ܝܼܠܗ݇ܘܿܢ ܠܟܸܣܠܹܗ ܐܘܼܦ ܪܵܒܵܐ ܐ݇ܢܵܫܹ̈ܐ ܡ̣ܢ ܕܐܵܗܵܐ ܐܲܬܪܵܐ ܕܘܼܪ̈ܒܸܢܹܐ ܗ݇ܘܼܵܘ ܘܨܘܼܦܠܸܦܹ̈ܐ ܒܬܵܗܵܪܹ̈ܐ ܕܡܲܪܥܵܐ: ܘܒܘܼܣܡܵܝܠܹܗ: ܘܕܲܝܘܹ̈ܐ ܦܘܼܠܸܛܠܹܗ.
ܘܡ̣ܢ ܣܵܒܵܒ ܕܪܵܒܵܐ ܡܸܣܟܹܢܵܐ ܗ݇ܘܼܵܐ: ܒܗ̇ܝ ܠܹܐ ܗ݇ܘܼܵܐ ܩܸܢܝܵܐ ܚܲܕ݇ ܡܸܢܕܝܼ: ܫܒ̣ܘܿܩ ܡ̣ܢ ܐܹܘܲܢܓܲܠܝܼܘܿܢ ܐܲܚܟ̰ܝܼ: ܟܠܹܐܠܹܗ ܗܲܠ ܕܗܵܕܸܪ ܡܠܘܿܐܵܐ ܩܵܐ ܒܸܢܝܵܢܵܐ. ܘܟܲܕ ܫܡܸܥܠܗ݇ܘܿܢ ܒܝܼـܹܗ ܐܵܢܝܼ ܚܲܝܵܢܹ̈ܐ ܕܡܕܝܼܢ݇ܬܵܐ ܕܚܵܕܸܪܘܵܢܹܗ: ܡܲܥܠ̱ܬܵܝܹ̈ܐ ܘܒ̣ܵܠܲܕ ܘܡܵܘܨܸܠ: ܓ̰ܡܸܥܠܗ݇ܘܿܢ ܘܐ݇ܬܹܐܠܗ݇ܘܿܢ ܠܟܸܣܠܹܗ: ܘܡܘܼܬ݇ܝܼܠܗ݇ܘܿܢ ܐܸܠܹܗ ܪܵܒܵܐ ܣܹܐܡܵܐ ܘܕܲܗܒ̣ܵܐ: ܠܒܸܢܝܵܢܵܐ ܕܐܵܗܵܐ ܕܘܼܟܬܵܐ ܩܲܕܝܼܫܬܵܐ. ܘܒܸܢܝܵܠܹܗ ܡ̣ܢ ܡܲܕܢ̱ܚܵܐ ܕܐܲܠܩܘܿܫ: ܡܘܼܟܡܸܠܹܗ ܒܗܲܝܲܪܬܵܐ ܕܫܵܦܵܩܲܬܹܗ ܕܡܵܪܲܢ ܘܩܸܡܠܹܗ ܘܐ݇ܬܹܐܠܹܗ ܚܲܕ݇ ܐܲܦܸܣܩܘܿܦܵܐ ܡ̣ܢ ܡܕܝܼܢ݇ܬܵܐ ܕܡܲܥܠ̱ܬܵܝܹ̈ܐ: ܕܩܵܕܸܫܠܹܗ ܕܲܝܪܵܐ ܕܩܲܕܝܼܫܵܐ ܡܵܪܝ ܡܝܼܟ̣ܵܐ. ܐܝܼܢܵܐ ܐܵܗܵܐ ܐܲܦܸܣܩܘܿܦܵܐ ܠܘܼܒܸܠܹܗ ܠܩܠܹܝܪܘܿܣ: ܘܐ݇ܙܸܠܹܗ ܘܩܘܼܕܸܫܠܹܗ ܠܒܲܝܬܵܐ ܕܝܼܠܹܗ ܕܩܲܕܝܼܫܵܐ: ܘܡܘܼܬܸܒ̣ܠܹܗ ܠܡܲܕܒ̱ܚܵܐ ܩܲܕܝܼܫܵܐ. ܘܡ̣ܢ ܒܵܬ݇ܪ ܕܒܢܹܐܠܹܗ ܠܥܘܼܡܪܵܐ: ܘܣܘܼܩܸܠܹܗ ܒܟܠ ܣܵܩܲܠܝܵܬܹ̈ܐ: ܘܙܒ̣ܸܢܹܗ ܚܲܩܠܵܬܹ̈ܐ ܡ̣ܢ ܡܲܕܢ̱ܚܵܐ ܘܡ̣ܢ ܡܲܥܪ̱ܒ̣ܵܐ ܕܐܲܠܩܘܿܫ. ܘܒܣܵܡܵܐ ܗ݇ܘܼܵܐ ܕܒܵܢܹܐܠܹܗ ܒܵܬܹ̈ܐ ܚܵܕܸܪܘܵܢܹܗ ܕܗܲܝܟܠܵܐ: ܕܗܵܘܝܼ ܒܹܝܬ ܘܲܥܕܵܐ [ܗ̄:ܕ̄: ܕܘܼܟܬܵܐ ܕܒܝܼܵܗ̇ ܓ̰ܲܡܥܝܼ ܐ݇ܢܵܫܹ̈ܐ] ܕܟܠ ܝܘܼܦܵܠܢܹ̈ܐ: ܘܡܘܼܬܸܒ̣ܠܹܗ ܒܝܼܲܝܗܝ ܡܲܠܦܵܢܹ̈ܐ. ܘܓ̰ܡܸܥܠܗ݇ܘܿܢ ܐܸܣܟܘܿܠܵܝܹ̈ܐ ܡ̣ܢ ܟܠ ܕܘܼܟܵܐ: ܕܦܵܝܫܝܼ ܚܘܼܡܝܹ̈ܐ ܘܕܝܵܠܦܝܼ: ܐܝܼܢܵܐ ܩܲܕܝܼܫܵܐ ܡܵܪܝ ܡܝܼܟ̣ܵܐ: ܟܹܐ ܝܵܗ݇ܒ̣ܸܠ ܗ݇ܘܼܵܐ ܠܗ݇ܘܿܢ ܠܲܚܡܵܐ ܘܡܝܼ̈ܵܐ ܘܠܒ̣ܸܫܬܵܐ: ܘܟܠ ܡܸܢܕܝܼ ܕܠܵܙܸܡ ܝܑܼܠܹܗ ܠܡܲܠܦܵܢܹ̈ܐ ܘܝܵܠܘܿܦܹ̈ܐ. ܟܲܕ ܙܸܕܠܗ݇ܘܿܢ ܘܦܪܝܼܠܗ݇ܘܿܢ ܒܢܘܿܢܹ̈ܐ ܕܐܲܠܩܘܿܫ ܒܝܼܲܕ ܨܠܵܘܵܬܹ̈ܗ: ܘܙܸܕܠܗ݇ܘܿܢ ܒܟܠ ܛܵܒ̣ܵܬܹ̈ܐ: ܡܵܬܘܵܬܹ̈ܐ ܕܚܵܕܸܪܘܵܢܹܗ ܕܩܲܕܝܼܫܵܐ ܐ݇ܬܹܐܠܗ݇ܘܿܢ ܕܦܵܝܫܝܼ ܒܘܼܪ̈ܟ̣ܹܐ ܡܸܢܹܗ.
ܘܟܲܕ ܚܝܼܠܹܗ ܬܵܡܵܐ ܩܲܕܝܼܫܵܐ ܡܵܪܝ ܡܝܼܟ̣ܵܐ ܩܵܐ ܡܸܬܚܵܐ ܚܲܡܫܲܥܣܲܪ ܫܸܢܹ̈ܐ: ܘܚܲܝܠܹ̈ܐ ܘܒܵܣܲܡܝܵܬܹ̈ܐ ܦܠܸܚܠܹܗ ܡܵܪܲܢ ܒܐܝܼܕܵܬ̈ܘܼܗܝ: ܘܚܲܒܪܵܐ ܕܓ̣ܵܠܝܼܒܘܼܝܵܬ̈ܘܼܗܝ ܦܪܸܣܠܹܗ ܠܟܠ ܕܘܼܟܬܵܐ ܘܡܕܝܼܢ݇ܬܵܐ: ܘܡܛܹܐܠܹܗ ܐܸܠܹܗ ܥܕܵܢܵܐ ܕܡܵܐܸܬ ܗ݇ܘܼܵܐ. ܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܝ݇ܬܝܼܒ̣ܵܐ ܗ݇ܘܼܵܐ ܓܵܘ ܓܸܦܝܼܬܹܗ ܓܵܘ ܕܲܝܪܵܐ: ܗ݇ܘܹܐܠܹܗ ܐܸܠܹܗ ܓܸܠܝܵܢܹܗ ܕܡܵܪܲܢ ܟܲܕ ܒܹܐܡܵܪܵܐ ܐܸܠܹܗ: ܫܠܵܡܵܐ ܐܸܠܘܼܟܼ ܪܹܓܝܼ ܡܝܼܟ̣ܵܐ: ܡ̣ܢ ܐܵܕܝܼܵܐ ܠܥܸܣܪܵܐ ܝܵܘܡܵܢܹ̈ܐ ܒܸܬ ܫܲܩܠܸܢܵܗ̇ ܓܵܢܘܼܟܼ ܠܡܲܢܙܝܼܠܹ̈ܐ ܕܦܸܪܕܲܝܣܵܐ: ܘܠܪܘܼܚܘܼܟܼ ܒܸܬ ܡܲܫܪܸܢܵܗ̇ ܒܛܵܒ̣ܵܬܹ̈ܐ ܕܡܲܠܲܐܟ̣ܹ̈ܐ ܕܢܘܼܗܪܵܐ. ܐܵܗܵܐ ܗ݇ܘܹܐܠܵܗ̇ ܠܟܸܣܠܹܗ ܬܠܵܬ݇ܐ ܓܵܗܹ̈ܐ. ܘܒܐܵܢܝܼ ܥܸܣܪܵܐ ܝܵܘܡܵܢܹ̈ܐ ܩܪܹܐܠܹܗ ܠܟܵܗܢܹ̈ܐ ܘܠܡܫܲܡܫܵܢܹ̈ܐ ܘܠܪܹ̈ܫܵܢܹܐ ܘܠܟܠܲܝܗܝ ܡܗܘܼܡܢܹ̈ܐ ܕܡܵܬܹܗ ܘܠܐܸܣܟܘܿܠܵܝܹ̈ܐ: ܘܥܒ̣ܝܼܕܵܝܠܹܗ ܪܲܗܲܬ ܘܡܘܼܢܝܸܚܵܝܠܹܗ ܒܗܹܡܸܙܡܵܢ ܕܝܵܗ݇ܒ̣ܵܠܬܵܐ ܕܠܸܒܵܐ: ܘܓܠܹܐܠܹܗ ܐܸܠܲܝܗܝ ܡܸܢܕܝܼܵܢܹ̈ܐ ܕܗܕܝܼܪܹ̈ܐ ܝ݇ܢܵܐ. ܘܐ݇ܡܸܪܹܗ: ܕܗܕܝܼܪܵܐ ܝ݇ܠܹܗ ܐܲܠܵܗܵܐ ܕܫܵܕܸܪ ܐܸܠܵܘܟ̣ܘܿܢ ܚܲܕ݇ ܐ݇ܢܵܫܵܐ ܗܵܘܢܹܗ ܥܸܠܵܝܵܐ ܘܓܘܼܪܵܐ: ܕܒܸܬ ܐܵܣܸܩ ܒܕܲܪܓ̣ܹܗ ܠܥܸܠܸܠ ܡ̣ܢ ܡܲܠܲܐܟ̣ܹ̈ܐ. ܘܒܸܬ ܚܲܝܹܗ ܓܵܘ ܕܐܵܗܵܐ ܛܘܼܪܵܐ ܥܲܠ ܓܹܒܵܘܟ̣ܘܿܢ: ܘܒܸܬ ܗܵܨܸܠ ܙܲܥܝܹ̈ܐ ܪ̈ܘܼܚܵܢܵܝܹ̈ܐ. ܘܟܠ ܡ̇ܢ ܕܩܵܪܹܐ ܠܫܸܡܹܗ: ܒܝܼܲܕ ܨܠܵܘܵܬܹ̈ܗ ܒܸܬ ܛܵܪܸܕ ܡܵܪܲܢ ܡܸܢܹܗ ܠܟܠ ܡܲܪܥܵܐ: ܘܒܸܬ ܗܵܘܹܐ ܠܹܗ ܗܘܼܟܡܵܐ ܥܲܠ ܟܠܵܗ̇ ܡܲܪܝܼܪܘܼܬܵܐ ܘܣܲܡܵܐ ܕܪܸܓ̰ܒܵܐ ܩܵܛܘܿܠܵܐ: ܒܸܬ ܦܵܐܸܫ ܡܫܘܼܡܗܵܐ ܐܵܗܵܐ ܛܘܼܪܵܐ ܐܘܿܪܸܫܠܸܡ ܥܸܠܵܝܬܵܐ. ܗܵܕܟ̣ܵܐ ܗ݇ܘܵܝܡܘܿܢ ܗܕܝܼܪܹ̈ܐ ܐܲܚܘܿܢܘܵܬ̈ܝܼ: ܘܦܠܘܿܛܘܿܢ ܠܐܘܼܪܚܹܗ ܒܦܨܝܼܚܘܼܬܵܐ ܕܦܲܐܬܘܵܬܹ̈ܐ: ܗ݇ܘܵܝܡܘܿܢ ܗܸܫܝܲܪ ܕܠܵܐ ܡܲܣܠܝܼܬܘܿܢ ܒܬܸܫܡܸܫܬܹܗ: ܕܒܝܼܲܕ ܒܵܥܘܼܬܹܗ ܒܸܬ ܝܵܗ݇ܒ̣ܸܠܵܘܟ̣ܘܿܢ ܡܵܪܝܵܐ ܟܠ ܒܘܼܪ̈ܟܵܬܹܐ. ܡܣܵܒܵܒ ܗ̇ܘ ܩܘܼܪܒܵܐ ܝ݇ܠܹܗ ܠܐܵܢܝܼ ܕܩܵܪܝܼܠܹܗ ܒܗܵܩܘܼܬܵܐ: ܘܟܹܐ ܥܵܒ̣ܸܕ ܪܸܙܵܝܵܐ ܕܐܵܢܝܼ ܕܟܹܐ ܙܲܕܥܝܼ ܡܸܢܹܗ: ܐܝܼܡܵܢ ܕܬܲܘܸܒܝܼ ܠܟܸܣܠܹܗ ܘܩܵܪܝܼܠܹܗ. ܐܲܝܟܼ ܕܠܟܸܣܠܝܼ ܥܒ̣ܸܕܠܹܗ: ܕܩܪܹܐܠܹܗ ܐܸܠܝܼ ܘܠܐܲܒ̣ܵܗ̈ܝܼ: ܘܩܲܡ ܥܵܒ̣ܸܕܠܝܼ ܡ̣ܢ ܒܢܘܿܢܹ̈ܐ ܕܝܼـܹܗ ܟܲܕ ܠܹܐ ܚܲܫܚܸܢ ܗ݇ܘܼܵܐ. ܘܐ݇ܡܸܪܹܗ ܐܸܠܲܝܗܝ ܒܝܵܘܡܵܐ ܕܐܲܪܒܲܥܒܫܲܒܵܐ ܕܚܙܹܐܠܹܗ ܓܸܠܝܵܢܵܐ ܕܒܘܼܬ ܡܵܘܬܹܗ: ܘܡܘܼܦܫܸܡܵܝܠܹܗ ܘܡܘܼܬܸܒ̣ܠܹܗ ܐܝܼܕܹܗ ܥܲܠܲܝܗܝ ܘܒܘܼܪܟ̣ܵܝܠܹܗ. ܘܩܸܡܠܹܗ ܘܨܘܼܠܹܐܠܹܗ ܨܠܘܿܬܵܐ ܥܲܠ ܕܲܝܪܹܗ ܘܥܲܠ ܡܵܬܹܗ ܘܚܲܝܵܢܹ̈ܐ ܕܓܵܘܵܗ̇: ܕܠܵܐ ܗܵܟܸܡ ܒܝܼܘܼܗ̇ ܕܸܫ̰ܡܸܢ: ܟܡܵܐ ܕܐܵܗܵܐ ܕܘܼܢܝܹܐ ܟܵܠܝܵܢܬܵܐ ܝ݇ܠܵܗ̇. ܕܠܵܐ ܗܵܘܝܵܐ ܒܵܨܘܿܪܬܵܐ ܘܣܢܝܼܩܬܵܐ: ܗܲܠ ܐ݇ܬܹܐܬܵܐ ܕܡܵܪܲܢ ܡ̣ܢ ܢܵܓܸܣܬܲܢ ܥܲܠ ܥܵܠܡܵܐ.
ܘܦܘܼܩܸܕܠܹܗ ܘܡܘܼܬ݇ܝܼܠܗ݇ܘܿܢ ܐܸܠܹܗ ܚܲܕ݇ ܢܲܪܵܓ݇ܐ ܚܦܸܪܹܗ ܩܲܒ̣ܪܵܐ. ܡ̣ܢ ܕܦܪܸܩܠܗ݇ܘܿܢ ܥܸܣܪܵܐ ܝܵܘܡܵܢܹ̈ܐ: ܒܝܵܘܡܵܐ ܕܥܪܘܼܒ̣ܬܵܐ ܕܝܼܠܵܗ̇ ܪܹܫܵܐ ܕܬܸܫܪܝܼܢ ܐ݇ܚܵܪܵܝܵܐ: ܡ̣ܢ ܒܵܬ݇ܪ ܕܫܘܼܪܸܟܠܹܗ ܛܘܼܒ̣ܵܢܵܐ ܘܐܲܚܘܿܢܘܵܬܹ̈ܐ ܕܥܲܡܹܗ ܒܐ݇ܪ̈ܵܙܹܐ ܩܲܕܝܼܫܹ̈ܐ: ܘܫܩܸܠܹܗ ܦܲܓ̣ܪܹܗ ܘܕܸܡܹܗ ܕܡܫܝܼܚܵܐ ܡܲܚܝܼܵܢܲܢ: ܘܣܘܼܦܝܼܠܹܗ ܓܵܢܹܗ ܠܐܲܠܵܗܵܐ: ܘܡܘܼܢܝܸܚܠܹܗ ܡ̣ܢ ܚܲܝܹ̈ܐ ܙܲܒ̣ܢܵܢܵܝܹ̈ܐ. ܘܓ̰ܡܸܥܠܗ݇ܘܿܢ ܡܲܠܲܐܟ̣ܹ̈ܐ ܕܢܘܼܗܪܵܐ ܘܛܲܟ̣ܣܹ̈ܐ ܫܡܲܝܵܢܵܝܹ̈ܐ ܘܪ̈ܘܼܚܵܢܵܝܹܐ: ܙܘܼܝܸܚܠܗ݇ܘܿܢ ܠܓܵܢܹܗ ܘܡܘܼܣܩܵܠܗ݇ܘܿܢ ܗܲܠ ܠܟܸܣ ܒܲܪܝܵܢܘܼܗ̇. ܟܲܕ ܡܝܼܬܠܹܗ ܩܲܕܝܼܫܵܐ ܡܵܪܝ ܡܝܼܟ̣ܵܐ: ܓ̰ܡܸܥܠܗ݇ܘܿܢ ܟܠܲܝܗܝ ܟܵܗܢܹ̈ܐ ܥܲܡ ܐܲܦܸܣܩܘܿܦܵܐ ܕܐܲܬܪܵܐ ܕܝܼـܹܗ: ܥܲܡ ܩܠܝܼܪ̈ܝܼܩܹܐ ܕܚܵܕܸܪܘܵܢܹܗ ܕܕܲܝܪܵܐ ܫܘܼܪܸܟܠܗ݇ܘܿܢ ܒܨܠܘܿܬܵܐ ܘܒܬܸܫܡܸܫܬܵܐ ܘܒܫܵܗܲܪܬܵܐ ܘܒܡܲܙܡܘܿܪܹ̈ܐ ܘܬܸܫܒܘܿܚܝܵܬܹ̈ܐ: ܬܠܵܬ݇ܐ ܝܵܘܡܵܢܹ̈ܐ ܘܬܠܵܬ݇ܐ ܠܲܝܠܵܘܵܬܹ̈ܐ. ܘܡܘܼܬܸܒ̣ܠܗ݇ܘܿܢ ܒܗ̇ܘ ܩܲܒ̣ܪܵܐ: ܕܚܦܝܼܪܵܐ ܗ݇ܘܼܵܐ ܩܲܕܝܼܫܵܐ ܒܐܝܼܕܵܬ̈ܘܼܗܝ. ܘܡ̣ܢ ܒܵܬ݇ܪ ܕܦܝܼܫܠܹܗ ܦܲܓ̣ܪܹܗ ܒܐܲܪܥܵܐ ܡܸܬܚܵܐ ܕܬܠܵܬ݇ܐ ܫܸܢܹ̈ܐ: ܦܝܼܫܠܹܗ ܚܸܙܝܵܐ ܠܒܢܘܿܢܹ̈ܐ ܕܗ̇ܘ ܐܲܬܪܵܐ. ܘܚܦܸܪܘܿܢ: ܘܚܙܹܐܠܗ݇ܘܿܢ ܠܦܲܓ̣ܪܹܗ ܕܝܼܠܹܗ ܐܲܝܟܼ ܓܲܪܡܵܐ ܕܦܝܼܠܵܐ ܘܐܲܝܟܼ ܡܲܪ̈ܓܵܢܝܵܬܹܐ: ܘܒܸܣܪܹܗ ܘܓܸܠܕܹܗ ܒܦܲܓ̣ܪܹܗ. ܘܡܘܼܣܸܩܠܗ݇ܘܿܢ ܡ̣ܢ ܐܲܪܥܵܐ: ܘܡܘܼܬܸܒ̣ܠܗ݇ܘܿܢ ܓܵܘ ܣܲܢܕܘܼܩܵܐ [ܩܹܒ̣ܘܼܬܵܐ] ܚܲܕܬܵܐ. ܘܥܒ̣ܸܕܠܗ݇ܘܿܢ ܕܘܼܟ̣ܪܵܢܵܐ ܒܝܼـܹܗ ܒܪܹܫܵܐ ܕܬܸܫܪܝܼܢ ܐ݇ܚܵܪܵܝܵܐ. ܦܠܸܛܠܹܗ ܛܘܼܒ̣ܵܢܵܐ ܡܵܪܝ ܡܝܼܟ̣ܵܐ ܡ̣ܢ ܥܵܠܡܵܐ: ܘܫܘܼܢܹܐܠܹܗ ܡ̣ܢ ܚܲܝܹ̈ܐ ܕܐܵܗܵܐ ܙܲܒ̣ܢܵܐ ܠܟܸܣ ܡܵܪܲܢ ܒܲܪ ܡܐܵܐ ܘܥܸܣܪܝܼܢ ܫܸܢܹ̈ܐ ܗ݇ܘܼܵܐ. ܘܩܘܼܒܸܠܹܗ ܡ̣ܢ ܡܵܪܹܗ ܪܲܗܒ̣ܘܼܢܵܐ ܕܦܸܠܚܵܢܵܢ̈ܘܼܗܝ: ܗܲܝܲܪ̈ܝܵܬܹܐ ܘܒܵܣܲܡܝܵܬܹ̈ܐ ܘܡ̣ܢ ܩܲܕܝܼܫܘܼܬܵܐ ܕܕܸܡܥܹ̈ܐ ܕܥܲܝܢ̈ܘܼܗܝ: ܟܠ ܡܲܛܠܵܒܹ̈ܐ ܝܘܼܗ݇ܒ̣ܸܠܹܗ ܡܵܪܲܢ ܒܐܝܼܕܵܬ̈ܘܼܗܝ: ܠܟܲܠܝܗܝ ܒܢܲܝ̈ܢܵܫܵܐ ܕܠܟܸܣܠܹܗ ܡܵܛܝܼ ܗ݇ܘܼܵܘ. ܘܟܠ ܕܡܓܵܘܣܸܢ ܒܨܠܵܘܵܬܹ̈ܗ. ܘܟܠܡܵܢ ܕܐܝܼܠܹܗ ܡܗܘܼܡܢܵܐ ܘܕܵܟ̣ܸܪܹܗ: ܒܸܬ ܫܵܩܸܠ ܡܸܢܹܗ ܗܲܝܲܪܬܵܐ ܘܨܵܚܘܼܬܵܐ ܟܵܡܝܼܠ: ܘܒܨܠܵܘܵܬܹ̈ܗ ܕܩܲܕܝܼܫܵܐ ܡܵܪܝ ܡܝܼܟ̣ܵܐ: ܘܒܨܠܵܘܵܬܹ̈ܐ ܕܟܠܲܝܗܝ ܩܲܕܝܼܫܹ̈ܐ ܚܲܒ̣ܪ̈ܵܘܵܬܹܗ: ܦܵܐܸܫ ܢܛܝܼܪܵܐ ܥܵܠܡܵܐ ܘܥܵܡܪ̈ܵܢܘܼܗܝ: ܐܵܡܹܝܢ. ܘܦܵܝܫܵܐ ܒܘܼܪܸܟܼܬܵܐ ܡܵܬܹܗ ܘܥܵܡܪ̈ܵܢܘܼܗܝ: ܘܗܵܟܸܡ ܡܵܪܲܢ ܫܲܝܢܹܗ ܘܫܠܵܡܹܗ ܟܠܲܝܗܝ ܝܵܘܡܵܢܹ̈ܐ ܕܥܵܠܡܵܐ: ܐܵܡܹܝܢ.
ܚܬܸܡܠܵܗ̇ ܬܲܫܥܝܼܬܵܐ.
♱ ܡܸܢ݇ܕܪܸܫ̄ ܦܲܪܦܵܠܬܵܐ ܠܟܸܣ ܐܲܠܵܗܵܐ ܘܠܟܸܣ ܟܠ ܐ݇ܢܵܫܵܐ ♱
ܘܵܝ ܐܸܠܝܼ ܐܲܚܘܿܢܘܵܬ̈ܝܼ ܘܣܵܘܓܘܼܠܝܼ: ܐܵܢܝܼ ܕܡܝܼܬܠܗ݇ܘܿܢ ܒܫܲܝܢܵܐ: ܘܐ݇ܙܸܠܗ݇ܘܿܢ ܠܟܸܣ ܐܲܠܵܗܵܐ. ܘܠܵܐ ܦܝܼܫܠܵܗ̇ ܐ݇ܣܸܪܬܵܐ ܚܝܼܵܠܲܝܗܝ ܟܠ ܟܠܵܢܵܐܝܼܬ ܒܬܲܚܡܵܢܬܵܐ ܕܡܲܛܠܵܒܹ̈ܐ ܕܥܵܠܡܵܐ: ܫܒ̣ܘܿܩ ܡ̣ܢ ܒܚܘܼܒܹܗ ܕܐܲܠܵܗܵܐ. ܐܝܼܢܵܐ ܐܵܢܵܐ ܪܥܸܫܠܝܼ ܘܠܵܐ ܗܘܼܕܪܵܐ ܠܝܼ ܓܵܢܝܼ ܘܠܵܐ ܫܩܸܠܝܼ ܘܩܢܝܼܠܝܼ ܒܚܝܼܵܠܝܼ: ܘܗܵܐ ܩܲܡ ܡܵܛܹܐܠܝܼ ܣܸܬܘܵܐ ܕܠܲܝܬ ܠܹܗ ܫܘܼܠܵܡܵܐ. ܘܐܵܢܵܐ ܟܲܕ ܫܘܼܠܚܵܝܵܐ ܝ݇ܘܸܢ ܟܲܕ ܠܹܐ ܝ݇ܘܸܢ ܗܘܼܕܪܵܐ ܓܵܢܝܼ: ܘܥܵܓ̰ܘܼܒܹܐ ܝ݇ܘܸܢ ܥܲܠ ܓܵܢܝܼ ܣܵܘܓܘܼܠܝܼ: ܕܵܐܟ̣ܝܼ ܟܠ ܝܵܘܡܵܐ ܒܸܚܛܵܝܵܐ ܝ݇ܘܸܢ ܘܟܠ ܝܵܘܡܵܐ ܬܲܒ̣ܘܼܒܹܐ ܝ݇ܘܸܢ. ܐܝܼܡܵܢ ܕܗ݇ܘܹܐܠܹܗ ܨܲܦܪܵܐ: ܒܸܛܠܵܩܵܐ ܝ݇ܘܸܢ ܘܒܸܗܘܵܝܵܐ ܝ݇ܘܸܢ ܓܘܼܢܗܵܟܲܪ: ܐܝܼܢܵܐ ܐܝܼܡܵܢ ܕܡܛܹܐܠܹܗ ܦܲܠܓܵܐ ܕܝܵܘܡܵܐ: ܒܹܐܡܵܪܵܐ ܝ݇ܘܸܢ: ܕܒܠܲܝܠܹܐ ܒܸܬ ܐܵܬܸܢ ܠܗܵܘܢܝܼ: ܘܒܪܲܡܫܵܐ ܒܸܬ ܦܲܪܦܸܠܸܢ ܕܗܵܘܹܐ ܦܵܚܘܿܠܵܐ ܕܚܛܝܼܵܬ̈ܝܼ. ܘܐܝܼܡܵܢ ܕܡܛܹܐܠܹܗ ܐܸܠܝܼ ܠܲܝܠܹܐ: ܘܐܵܢܵܐ ܛܸܒܥܝܵܐ ܒܫܸܢܬܵܐ. ܘܐܵܢܝܼ ܕܫܩܸܠܗ݇ܘܿܢ ܠܟܝܘܼܠܹ̈ܐ ܥܲܡܝܼ: ܗܵܐ ܒܸܥܒ̣ܵܕܵܐ ܝ݇ܢܵܐ ܬܵܓ̰ܝܼܪܘܼܬܵܐ ܘܒܸܩܢܵܝܵܐ ܝ݇ܢܵܐ ܒܠܲܝܠܹܐ ܘܒܝܵܘܡܵܐ: ܕܡܵܛܝܼ ܠܚܸܩܪܵܐ ܗ̇ܝ ܕܡ̣ܢ ܡܵܪܹܗ: ܘܗܵܘܝܼ ܪܹ̈ܫܵܢܹܐ ܕܥܸܣܪܵܐ ܡܕܝܼܢܵܬܹ̈ܐ. ܐܝܼܢܵܐ ܒܝܼܲܕ ܬܲܡܒܵܠܘܼܬܝܼ ܛܘܼܫܝܼܠܝܼ ܓܵܘ ܐܲܪܥܵܐ ܘܛܘܼܡܸܪܝܼ. ܘܡܵܪܝܼ ܩܘܼܪܒܸܢܹܗ ܠܹܐܬܵܝܵܐ: ܘܗܵܐ ܠܸܒܝܼ ܒܸܪܓܵܕܵܐ ܝ݇ܠܹܗ: ܘܕܸܡܥܹ̈ܐ ܕܥܲܝܢܹ̈ܐ ܒܸܫܦܵܚܵܐ ܝ݇ܢܵܐ ܒܒܸܟ̣ܝܵܐ ܟܠܲܝܗܝ ܝܵܘܡܵܢܹ̈ܐ ܕܒܬܲܡܒܵܠܘܼܬܝܼ ܒܒܵܛܝܼܠܘܼܬܵܐ ܥܒ̣ܸܪܘܿܢ: ܟܲܕ ܠܲܝܬܠܝܼ ܚܲܕ݇ ܓ̰ܘܼܘܲܒ ܠܟܸܣܠܹܗ. ܪܲܚܸܡ ܥܲܠܝܼ: ܕܐܲܢ݇ܬܿ ܝ݇ܘܸܬܿ ܒܢܲܦ̮ܫܘܼܟܼ ܕܠܵܐ ܚܛܝܼܵܬܹ̈ܐ: ܘܦܲܪܸܩܠܝܼ ܡܣܵܒܵܒ ܪܵܚܡܵܢܵܐ ܕܐ݇ܢܵܫܵܐ ܝ݇ܘܸܬܿ: ܘܡܣܵܒܵܒ ܕܫܒ̣ܘܿܩ ܡܸܢܘܼܟܼ ܕܝܼܘܸܬܿ ܒܵܒܵܐ ܡܒܘܼܪܟ̣ܵܐ: ܘܒܪܘܿܢܘܿܟܼ ܝܼܚܝܼܕܵܝܵܐ ܗ̇ܘ ܕܦܝܼܫܠܹܗ ܓܘܼܫܡܸܢܵܐ ܒܘܼܬ ܕܝܼܲܢ. ܪܘܼܚܵܐ ܕܩܘܼܕܫܵܐ ܡܲܚܝܼܵܢܵܐ ܕܟܠ. ܠܹܐ ܝܵܕܥܸܢ: ܘܒܐ݇ܚܹܪ̈݇ܢܹܐ ܗ݇ܘܹܐܠܵܗ̇ ܗܝܼܒ̣ܝܼ ܕܝܼܝܼ. ܘܡ̣ܢ ܐܵܕܝܼܵܐ ܕܟ̣ܘܿܪܝܼ ܝܵܐ ܡܲܚܸܒܵܢܵܐ ܕܐ݇ܢܵܫܵܐ: ܘܦܲܠܸܛ ܠܝܼ ܡ̣ܢ ܝܲܚܣܝܼܪܘܼܬܵܐ ܕܚܛܝܼܵܬ̈ܝܼ. ܣܵܒܵܒ ܕܝܼܘܼܟܼ ܝ݇ܢܵܐ ܬܸܪ̈ܘܵܝ ܡܵܪܵܐ ܛܵܒ̣ܵܐ: ܕܐܝܼܡܵܢ ܕܥܵܒ̣ܪܸܢ ܠܐܵܗܵܐ ܥܵܠܡܵܐ: ܘܐܝܼܡܵܢ ܕܡܸܢ݇ܕܪܸܫ̄ ܦܲܠܛܸܢ ܡܸܢܹܗ: ܘܕܟ̣ܘܿܪܝܼ ܕܝܑܼܘܸܢ ܕܠܵܐ ܓ̰ܘܼܘܲܒ. ܘܫܵܦܵܩܲܬܘܼܟܼ ܗ̇ܝ ܕܗ݇ܘܹܐܠܵܗ̇ ܒܘܼܬ ܕܐܵܗܵܐ ܥܵܠܡܵܐ. ܘܗܲܝܲܪܬܘܼܟܼ ܘܡܪܲܚܡܵܢܘܼܬܘܼܟܼ ܐܵܢܝܼ ܕܐܝܼܢܵܐ ܫܘܼܒ̣ܗܵܪܝܼ ܘܗܝܼܒ̣ܝܼ ܕܝܼܝܼ: ܐܲܢܹ̈ܐ ܒܸܬ ܗܵܘܝܼ ܣܸܬܪܵܐ ܥܲܠܝܼ ܒܛܠܵܢܝܼܬܵܐ ܕܓܘܼܠܦܵܢ̈ܘܼܟܼ: ܒܝܵܘܡܵܐ ܡܲܙܕܸܥܝܵܢܵܐ ܘܚܲܝܠܵܢܵܐ. ܘܒܘܼܬ ܕܐܵܗܵܐ ܦܲܪ̇ܦܘܼܠܹܐ ܝ݇ܘܸܢ ܒܝܼܘܼܟܼ ܝܵܐ ܡܵܪܵܐ ܡܪܲܚܡܵܢܵܐ: ܕܦܲܪܩܸܬܿ ܠܓܵܢܝܼ ܒܡܲܠܟܘܼܬܘܼܟܼ: ܘܡܲܚܫܸܚܠܝܼ ܕܫܲܒܚܸܢ ܐܸܠܘܼܟܼ ܥܲܡ ܟܠܲܝܗܝ ܐܵܢܝܼ ܕܫܦܸܪܘܿܢ ܠܪܸܙܵܝܘܼܟܼ. ܡܣܵܒܵܒ ܚܫܝܼܚܵܐ ܝ݇ܠܹܗ ܐܸܠܘܼܟܼ ܚܸܩܪܵܐ ܘܣܓ̣ܵܕܬܵܐ ܘܓܘܼܪܘܼܬܵܐ: ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ: ܠܥܵܠܲܡ ܥܵܠܡܝܼܢ: ܐܵܡܹܝܢ.
ܚܬܸܡܠܵܐ ܐܵܗܵܐ ܬܲܫܥܝܼܬܵܐ ܕܡܵܪܝ ܡܝܼܟ̣ܵܐ ܩܲܕܝܼܫܵܐ.
ܨܠܵܘܵܬܹ̈ܗ ܢܵܛܪ̈ܝܼܠܲܢ ܘܠܟܠܲܝܗܝ ܡܗܘܼܡܢܹ̈ܐ ܡ̣ܢ ܟܠܲܝܗܝ
ܚܘܼܙܕܵܓܹ̈ܐ ܘܥܸܨܝܹ̈ܐ: ܐܹܝܢ ܘܐܵܡܹܝܢ.
♱♱♱♱♱♱♱