ܬܲܫܥܝܼܬܵܐ ܕܓ̣ܵܠܝܒܘܝܵܬܹ̈ܐ ܡܥܲܓ̰ܒܵܢܹ̈ܐ
ܕܣܗܕܐ ܡܪܝ ܩܘܪܝܩܘܣ
ܘܕܝܸܡܹܗ ܝܘܿܠܹܝܛܹܐ:
ܕܗܘܹܐܠܗ݇ܘܿܢ ܣܵܗܕܹ̈ܐ ܒܝܵܘܡܵܢܹ̈ܐ ܡܲܟܣܸܡܝܵܢܘܿܣ
ܟܵܦܘܿܪܵܐ: ܒܝܲܪܚܵܐ ܬܲܡܘܼܙ ܒܚܲܡܫܲܥܣܲܪ ܒܝܼـܹܗ.
(ܒܫܹܢ݇ܬܵܐ: ܫܪܼ̈. 309 ܠܡܵܪܲܢ).
ܗ݇ܘܹܐܠܹܗ ܒܐܵܢܝܼ ܝܵܘܡܵܢܹ̈ܐ ܚܲܕ݇ ܪܕܘܿܦܝܵܐ [ܛܪܲܕܬܵܐ] ܥܲܠ ܟܪܸ̈ܣܛܵܝܵܢܹܐ: ܘܥܲܠ ܐܵܢܝܼ ܕܡܗܲܝܡܸܢܝܼ ܗ݇ܘܼܵܘ ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܐܝܼܬ ܗ݇ܘܼܵܐ ܚܕܵܐ ܒܲܟ̣ܬܵܐ ܓܵܘ ܡܕܝܼܢ݇ܬܵܐ ܕܐܝܼܩܵܢܘܿܢ: ܕܫܸܡܘܼܗ̇ ܝܼܗ݇ܘܼܵܐ ܝܘܿܠܹܝܛܹܐ: ܕܡ̣ܢ ܙܥܘܿܪܘܼܬܘܼܗ̇ ܬܒܥܝܼܬܵܐ ܗ݇ܘܼܵܐ ܠܙܕܥܘܿܬܵܐ ܕܐܲܠܵܗܵܐ. ܘܗܘܹܐ ܠܵܗ̇ ܚܲܝܠܵܢܬܵܐ ܒܗܲܝܡܵܢܘܼܬܘܼܗ̇: ܘܚܘܼܒܹܗ ܕܡܫܝܼܚܵܐ ܡܲܪܥܘܼܫܹܐ ܗ݇ܘܼܵܐ ܠܚܝܼܵܠܘܼܗ̇. ܘܟܲܕ ܫܡܸܥܠܵܗ̇ ܒܐ݇ܟ̣ܵܠܬܵܐ ܕܓܲܦܹ̈ܐ ܕܕܲܝܵܢܵܐ: ܘܪܕܘܼܦܝܵܐ ܒܸܩܝܵܡܵܐ ܗ݇ܘܼܵܐ ܥܲܠ ܪܹ̈ܓܵܘܵܬܹܐ ܕܡܫܝܼܚܵܐ: ܐܲܝܟܼ ܚܕܵܐ ܒܪܵܬܵܐ ܕܐ݇ܢܵܫܵܐ ܙܕܸܥܠܵܗ̇: ܡ̣ܢ ܙܕܥܘܿܬܘܼܗ̇ ܥܪܸܩܠܵܗ̇ ܘܪ݇ܚܸܫܠܵܗ̇ ܠܡܕܝܼܢ݇ܬܵܐ ܕܛܲܪܛܘܿܣ ܕܩܝܼܠܝܼܩܝܼܵܐ: ܘܬܵܡܵܐ ܗܘܹܐܠܵܗ̇. ܐܝܼܢܵܐ ܐܵܠܸܟܣܲܢܕܪܘܿܣ ܗܵܟܸܡ ܝܼܗ݇ܘܼܵܐ ܘܬܲܓܒܸܪܵܢܵܐ ܕܪܹܫܵܢܘܼܬܵܐ ܕܗ̇ܘ ܐܲܬܪܵܐ: ܘܐܲܝܟܼ ܚܲܕ݇ ܕܲܪܩܘܼܒ̣ܠܵܝܵܐ ܪ݇ܚܸܫܠܹܗ ܠܡܕܝܼܢ݇ܬܵܐ ܕܛܲܪܛܘܿܣ: ܐܲܝܟܵܐ ܕܛܘܼܒ̣ܵܢܝܼܬܵܐ ܝܼܗ݇ܘܼܵܐ: ܨܲܚܨܘܼܝܹܐ ܗ݇ܘܼܵܐ ܕܕܵܒ̣ܸܩ ܗ݇ܘܼܵܐ ܟܠ ܐܲܝܟܵܐ ܕܡܲܫ݇ܟ̰ܸܚ ܗ݇ܘܼܵܐ ܠܪܹ̈ܓܵܘܵܬܹܗ ܕܡܫܝܼܚܵܐ. ܐܝܼܢܵܐ ܚܲܕ݇ܟܡܵܐ ܡ̣ܢ ܐ݇ܢܵܫܹ̈ܐ ܕܐܝܼܢܵܐ ܕܡ̣ܢ ܚܲܒ̣ܪ̈ܵܘܵܬܹܗܝ ܘܗܲܝܸܪ̈ܵܢܹܗܝ ܘܦܵܠܵܚܹ̈ܐ ܕܣܵܛܵܢܵܐ. ܕܒ̣ܝܼܩܵܠܗ݇ܘܿܢ ܠܛܘܼܒ̣ܵܢܝܼܬܵܐ ܝܘܿܠܹܝܛܹܐ. ܘܡܘܼܟܠܝܼܵܠܗ݇ܘܿܢ ܩܵܕ݇ܡ ܕܲܝܵܢܵܐ ܟܲܕ ܒܸܡܚܵܝܵܐ ܕܲܪܩܘܼܒ̣ܠܘܼܗ̇ ܘܒܹܐܡܵܪܵܐ: ܕܐܵܗܵܐ ܒܲܟ̣ܬܵܐ ܒܚܸܪ̈ܫܘܼܗ̇ ܡܲܚܪܘܼܒ̣ـܹܐ ܝ݇ܠܵܗ̇ ܠܟܠܵܗ̇ ܡܕܝܼܢ݇ܬܵܐ: ܘܡܲܕܘܼܪܹܐ ܝ݇ܠܵܗ̇ ܠܟܠܲܝܗܝ ܒܢܲܝ̈ܢܵܫܵܐ ܕܠܵܐ ܥܵܒ̣ܕܝܼ ܕܸܒ̣ܚܹ̈ܐ ܠܐܲܠܵܗܹ̈ܐ: ܟܲܕ ܒܸܥܒ̣ܵܕܵܝ ܠܵܗ̇ ܘܡܲܣܒ̣ܘܼܥܝܹܐ ܠܚܝܼܵܠܲܝܗ̈ܝ ܒܘܼܬ ܐܲܠܵܗܹ̈ܐ. ܕܐܵܢܝܼ ܠܲܝܬ ܠܗ݇ܘܿܢ ܓܵܢܵܐ. ܐܝܼܢܵܐ ܐܵܠܸܟܣܲܢܕܪܘܿܣ ܒܥܕܵܢܵܐ ܕܫܸܡܥܝܲܝܗܝ ܠܹܗ: ܫܓ̣ܝܼܫܠܹܗ. ܘܓ̰ܘܼܘܸܒܠܹܗ ܘܐ݇ܡܸܪܹܗ ܩܵܐ ܛܘܼܒ̣ܵܢܝܼܬܵܐ: ܡ̣ܢ ܡܘܼܕܝ݇ ܛܵܝܸܦܵܐ ܝ݇ܘܵܬܝ؟ ܡ̣ܢ ܐܵܝܢܝܼ ܐܲܬܪܵܐ ܝ݇ܘܵܬܝ؟ ܘܡ̣ܢ ܐܵܝܢܝܼ ܡܕܝܼܢ݇ܬܵܐ ܝ݇ܘܵܬܝ؟ ܘܡܘܼܕܝܼ ܝ݇ܠܹܗ ܫܸܡܵܟ̣ܝ؟ ܐܝܼܢܵܐ ܩܲܕܝܼܫܬܵܐ ܓ̰ܘܼܘܸܒܠܵܗ̇ ܒܐܵܕܵܒܘܼܬܵܐ ܘܒܫܸܠܝܘܼܬܵܐ ܘܐ݇ܡܸܪܵܗ̇ ܠܕܲܝܵܢܵܐ: ܒܐܲܬܪܵܐ ܕܣܘܼܪܝܼܵܐ ܦܝܼܫܠܝܼ ܝܼ݇ܠܝܼܕܬܵܐ: ܘܡ̣ܢ ܪܹܫܵܢܹܐ ܕܡܕܝܼܢ݇ܬܵܐ ܐܝܼܩܵܢܘܿܢ ܝ݇ܘܵܢ ܒܪܵܬܵܐ ܣܘܼܢܩܠܹܝܛܝܼܩܘܿܣ: ܘܡ̣ܢ ܐܘܼܓ̰ܵܓ̣ ܓܘܼܪܵܐ ܘܨܦܵܝܝܼ ܝ݇ܘܵܢ. ܘܡܸܢܘܼܟܼ ܥܪܸܩܠܝܼ: ܐܝܼܢܵܐ ܒܡܕܲܒܪܵܢܘܼܬܵܐ ܕܐܲܠܵܗܵܐ ܒܐܝܼܕܵܬ̈ܘܼܟܼ ܢܦܸܠܝܼ: ܗܵܐ ܩܵܕ݇ܡܘܼܟܼ ܟܠܝܼܬܵܐ ܝ݇ܘܵܢ. ܐ݇ܡܸܪܹܗ ܕܲܝܵܢܵܐ: ܐܸܢ ܗܵܕܟ̣ܵܐ ܒܵܠܵܕ ܝ݇ܘܵܬܝ ܕܒܐܝܼܕܵܬ̈ܝܼ ܢܦܸܠܵܟ̣ܝ: ܓܵܒܝܼ ܩܵܐ ܓܵܢܵܟ̣ܝ ܚܲܕ݇ ܡܸܢܕܝܼ ܫܲܦܝܼܪܵܐ ܘܨܦܵܝܝܼ ܘܬܒܥܝܼ ܐܸܠܹܗ: ܘܪܲܚܩܸܢ ܡ̣ܢ ܕܘܼܓܠܵܐ ܘܚܘܼܠܛܘܼܢܝܵܐ. ܘܐ݇ܡܘܿܪ ܠܝܼ ܡܘܼܕܝܼ ܝ݇ܠܹܗ ܫܸܡܵܟ̣ܝ؟ ܐ݇ܡܸܪܵܗ̇ ܛܘܼܒ̣ܵܢܝܼܬܵܐ: ܟܪܸܣܛܝܵܢܬܵܐ ܝ݇ܘܵܢ. ܐ݇ܡܸܪܹܗ ܕܲܝܵܢܵܐ: ܗܸܟ̰ ܡܸܢܕܝܼ ܠܹܐ ܗܵܘܹܐ ܨܦܵܝܝܼ ܩܵܬܵܟ̣ܝ ܡ̣ܢ ܗܲܪܵܛܝܼܩܘܼܬܵܐ ܘܕܘܼܓܠܵܐ: ܐܝܼܢܵܐ ܐ݇ܡܘܿܪ ܠܝܼ ܡܘܼܕܝܼ ܝ݇ܠܹܗ ܫܸܡܵܟ̣ܝ: ܘܡܲܩܪܸܒ̣ ܘܥܒ̣ܘܿܕ ܕܸܒ̣ܚܵܐ ܠܐܲܠܵܗܹ̈ܐ: ܕܠܵܐ ܡܵܝܬܵܬܝ ܡܵܘܬܵܐ ܚܸܪܒܵܐ. ܓ̰ܘܼܘܸܒܠܵܗ̇ ܛܘܼܒ̣ܵܢܝܼܬܵܐ ܘܐ݇ܡܸܪܵܗ̇: ܟܪܸܣܛܝܵܢܬܵܐ ܝ݇ܘܸܢ. ܐܝܼܢܵܐ ܐܸܢ ܒܘܼܬ ܕܐܵܗܵܐ ܫܸܡܵܐ ܥܵܒ̣ܘܿܪܵܐ ܨܲܚܨܘܼܝܹܐ ܝ݇ܘܸܬܿ ܘܒܵܩܘܿܪܹܐ ܡܸܢܝܼ: ܝܘܿܠܹܝܛܹܐ ܟܹܐ ܦܵܝܫܲܢ ܩܪܝܼܬܵܐ. ܐ݇ܡܸܪܹܗ ܕܲܝܢܵܐ: ܗܵܕܟ̣ܵܐ ܓܵܒܝܼ ܠܵܟ̣ܝ ܗ̇ܝ ܕܝܼܠܵܗ̇ ܨܦܵܝܝܼ: ܘܡܲܩܪܸܒ̣ܝ ܘܥܒ̣ܘܿܕܝ ܕܸܒ̣ܚܵܐ ܠܐܲܠܵܗܹ̈ܐ: ܩܵܕ݇ܡ ܕܐܵܬܝܼ ܥܲܠܵܟ̣ܝ ܐܘܼܠܨܵܢܹ̈ܐ ܘܓ̰ܘܼܢܓ̰ܵܪܹ̈ܐ: ܕܗܕܸܪܬܵܐ ܝ݇ܘܵܬܝ ܕܩܲܒܠܵܬܝ: ܐܸܢ ܠܵܐ ܫܲܡܥܵܬܝ ܐܸܠܝܼ. ܐܝܼܢܵܐ ܛܘܼܒ̣ܢܝܼܬܵܐ ܐ݇ܡܸܪܵܗ̇: ܐܸܢ ܐܵܗܵܐ ܒܣܵܡܘܼܟܼ ܝ݇ܠܵܗ̇ ܠܸܥܒ̣ܵܕܵܐ: ܫܲܕܸܪ ܣܲܪ̈ܒܵܙܘܼܟܼ ܠܫܘܼܩܹ̈ܐ ܕܡܕܝܼܢ݇ܬܵܐ: ܘܛܵܥܘܝܼ ܒܵܬ݇ܪ ܚܲܕ݇ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ ܐܲܚܟ̰ܝܼ: ܗ̇ܘ ܒܸܬ ܐܵܡܸܪ ܕܐܵܗܵܐ ܝ݇ܠܹܗ ܡܵܪܝܵܐ. ܘܠܗ̇ܘ ܕܦܵܬܸܚ ܝܵܠܵܕ݇ܐ ܦܘܼܡܹܗ ܘܐܵܡܸܪ: ܐܸܠܹܗ ܒܸܬ ܦܵܠܚܲܚ. ܐܝܼܢܵܐ ܐܸܢ ܝܵܠܕ݇ܐ ܦܵܐܸܫ ܡܘܼܫ݇ܟ̰ܚܵܐ ܦܟ̰ܝܼܠܵܐ: ܘܒܡܲܣܠܵܝܬܹܗ ܐܵܡܸܪ ܕܐܝܼܢܵܐ ܐܲܠܵܗܹ̈ܐ: ܐܲܢ݇ܬܿ ܘܟܠܹܗ ܐܘܼܓ̰ܵܓ̣ܘܼ̈ܟܼ ܣܓ̣ܘܿܕܘܼܢ ܐܸܠܲܝܗܝ: ܐܝܼܢܵܐ ܐܵܢܵܐ ܠܡܵܪܝܵܐ ܐܲܠܵܗܝܼ ܒܣܵܓ̣ܕܵܢܵܐ.
ܗܵܝܓܵܗ ܕܲܝܵܢܵܐ ܙܵܠܸܡ ܫܘܼܕܸܪܹܗ ܠܣܲܪ̈ܒܵܙܘܼܗܝ ܠܟܠܵܗ̇ ܡܕܝܼܢ݇ܬܵܐ: ܕܛܵܥܘܝܼ ܗ݇ܘܼܵܘ ܠܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ. ܘܚܕܸܪܘܿܢ ܘܛܘܼܥܝܼܠܗ݇ܘܿܢ ܘܠܵܐ ܡܘܼܫ݇ܟ̰ܸܚܠܗ݇ܘܿܢ: ܡܣܵܒܵܒ ܟܠܲܝܗܝ ܐ݇ܢܵܫܹ̈ܐ ܕܐܝܼܬ ܗ݇ܘܼܵܘ ܠܗ݇ܘܿܢ ܒܢܘܿܢܹ̈ܐ ܒܗ̇ܝ ܩܘܼܡܬܵܐ ܘܫܸܢܹ̈ܐ ܕܒܸܒܥܵܝܵܐ ܗ݇ܘܼܵܐ ܕܲܝܵܢܵܐ: ܛܘܼܫܝܵܝܠܗ݇ܘܿܢ ܠܝܲܠܘܼܕܹ̈ܐ ܡ̣ܢ ܙܕܥܘܿܬܵܐ ܕܕܲܝܵܢܵܐ. ܐܝܼܢܵܐ ܦܠܸܛܠܗ݇ܘܿܢ ܦܵܠܵܚܹ̈ܐ ܕܙܠܘܼܡܝܵܐ ܠܒ̣ܲܕܲܪ ܡ̣ܢ ܫܘܼܪܹ̈ܐ ܕܡܝܼܕܢ݇ܬܵܐ: ܠܕܘܼܟܬܵܐ ܐܲܝܟܵܐ ܕܒܸܢܝܹܐ ܗ݇ܘܼܵܘ ܚܲܕ݇ ܒܲܝܬܵܐ ܩܵܐ ܫܠܝܼܚܹ̈ܐ ܥܲܠ ܫܸܡܹܗ ܕܡܵܪܝ ܦܲܛܪܘܿܣ ܘܦܵܘܠܘܿܣ: ܘܡܘܼܫ݇ܟ̰ܸܚܠܗ݇ܘܿܢ ܬܵܡܵܐ ܠܒܪܘܿܢܵܐ ܕܛܘܼܒ̣ܵܢܝܼܬܵܐ ܝܘܿܠܹܝܛܹܐ: ܘܒܘܼܩܸܪܘܿܢ ܒܘܼܬ ܕܝܼـܹܗ ܡ̣ܢ ܕܐ݇ܢܵܫܹ̈ܐ ܕܬܵܡܵܐ. ܐ݇ܡܸܪܘܿܢ ܐܸܠܲܝܗܝ ܐܵܢܝܼ ܐ݇ܢܵܫܹ̈ܐ: ܕܐܵܗܵܐ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ ܝ݇ܠܹܗ: ܒܵܨܘܿܪܵܐ ܬܠܵܬ݇ܐ ܝܲܪ̈ܚܹܐ. ܒܪܘܿܢܵܐ ܕܗ̇ܝ ܒܲܟ̣ܬܵܐ ܟܪܸܣܛܝܵܢܬܵܐ: ܕܝܼܠܵܗ̇ ܡ̣ܢ ܡܕܝܼܢܬܵܐ ܕܐܝܼܩܘܿܢ: ܕܡ̣ܢ ܐ݇ܟ̣ܵܠܬܵܐ ܕܓܲܦܹ̈ܐ ܕܕܲܝܵܢܵܐ ܥܪܸܩܠܵܗ̇ ܘܐ݇ܬܹܐܠܵܗ̇ ܠܲܐܟ̣ܵܐ. ܗܵܝܓܵܗ ܦܵܠܵܚܹ̈ܐ ܕܙܠܘܼܡܝܵܐ ܕܒ̣ܝܼܩܠܗ݇ܘܿܢ ܠܝܵܠܵܕ݇ܐ. ܘܡܘܼܬ݇ܝܼܠܗ݇ܘܿܢ ܠܟܸܣ ܕܲܝܵܢܵܐ ܟܲܕ ܒܹܐܡܵܪܵܐ ܩܵܐ ܓܵܢܲܝܗܝ: ܥܒ̣ܘܿܕ ܒܵܘܲܪ ܐܵܗܵܐ ܝܵܠܵܕ݇ܐ ܡܲܨܝܵܢܵܐ ܝ݇ܠܹܗ ܡܲܛܥܸܡ ܡܲܪܝܼܪ̈ܘܼܝܵܬܹܐ ܩܵܐ ܕܲܝܵܢܵܐ ܒܝܼـܲܕ ܗܹܡܸܙܡܵܢ̈ܘܼܗܝ.
ܐܝܼܢܵܐ ܟܲܕ ܐ݇ܬܹܐܠܹܗ ܝܵܠܵܕ݇ܐ ܘܟܠܹܐܠܹܗ ܩܵܕ݇ܡ ܟܘܼܪܣܝܼ ܕܕܲܝܵܢܵܐ. ܚܙܹܐܠܹܗ ܕܲܝܵܢܵܐ ܕܫܲܦܝܼܪܵܐ ܝ݇ܠܹܗ. ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܫܠܵܡܵܐ ܐܸܠܘܼܟܼ ܝܵܠܵܕ݇ܐ ܡܘܼܚܸܒܵܐ. ܓ̰ܘܼܘܸܒܠܹܗ ܩܲܕܝܼܫܵܐ ܘܐ݇ܡܸܪܹܗ: ܥܲܠܝܼ ܗܵܘܹܐ ܫܠܵܡܵܐ ܒܟܠ ܥܕܵܢܵܐ: ܐܝܼܢܵܐ ܥܲܠܘܼܟܼ ܠܵܐ ܗܵܘܹܐ ܫܠܵܡܵܐ. ܡܣܵܒܵܒ ܕܐ݇ܡܸܪܹܗ ܟܬܵܒ̣ܵܐ: ܕܠܲܝܬ ܫܠܵܡܵܐ ܠܟܵܦܘܿܪܹ̈ܐ: ܒܹܐܡܵܪܵܐ ܝ݇ܠܹܗ ܡܵܪܝܵܐ. ܐ݇ܡܸܪܹܗ ܕܲܝܵܢܵܐ: ܟܲܕ ܗܵܠܵܐ ܠܹܐ ܝ݇ܘܸܬܿ ܦܝܼܫܵܐ ܒܘܼܩܪܵܐ: ܗܵܐ ܫܘܼܪܝܼܠܘܼܟܼ ܠܡܲܕܘܼܪܹܐ ܓ̰ܘܼܘܵܒܝܼ؟ ܐ݇ܡܸܪܹܗ ܝܵܠܵܕ݇ܐ: ܒܚܲܝܠܵܐ ܕܗܹܡܸܙܡܵܢܹ̈ܐ ܓ̰ܲܘܘܼܒܹܐ ܝ݇ܘܸܢ ܐܸܠܘܼܟܼ: ܐܝܼܢܵܐ ܗܵܟܸܡ ܐ݇ܡܸܪܹܗ ܐܸܠܹܗ: ܡܘܼܕܝܼ ܝ݇ܠܹܗ ܫܸܡܘܼܟܼ ܝܵܠܵܕ݇ܐ؟ ܓ̰ܘܼܘܸܒܠܹܗ ܝܵܠܵܕ݇ܐ ܘܐ݇ܡܸܪܹܗ ܐܸܠܹܗ: ܟܪܸܣܛܝܵܢܵܐ ܝ݇ܘܸܢ. ܐܝܼܢܵܐ ܐܵܗܵܐ ܫܸܡܝܼ ܕܝܑܼܠܹܗ ܓܵܘ ܒܢܲܝ̈ܢܵܫܵܐ ܕܒܵܥܹܝܬܿ ܕܝܵܕܥܸܬܿ ܠܹܗ: ܕܝܸܡܝܼ ܡܘܼܬܸܒ̣ܬܹܗ ܠܵܗ̇ ܩܵܬܝܼ ܘܗ̇ܘ ܕܟܵܗܢܵܐ ܝܘܼܗ݇ܒ̣ܸܠܹܗ ܐܸܠܝܼ ܪܘܼܫܡܵܐ ܕܡܲܥܡܘܿܕܝܼܬܵܐ: ܩܘܼܪܝܵܩܘܿܣ ܒܡܵܪܝܵܐ ܦܝܼܫܠܝܼ ܩܸܪܝܵܐ. ܓ̰ܘܼܘܸܒܠܹܗ ܗܵܟܸܡ ܘܐ݇ܡܸܪܹܗ ܐܸܠܹܗ: ܡܲܨܝܸܬܿ ܐܸܠܝܼ ܘܥܒ̣ܘܿܕ ܕܸܒ̣ܚܵܐ ܠܐܲܠܵܗܹ̈ܐ: ܘܐܝܼܡܲܢ ܕܡܵܛܹܝܬܿ ܠܫܸܢܹ̈ܐ ܟܵܡܝܼܠ: ܒܸܬ ܥܲܒ̣ܕܸܢܘܼܟܼ ܓܘܼܪܵܐ ܕܟܵܗܢܹ̈ܐ ܕܐܲܠܵܗܹ̈ܐ. ܘܦܵܝܫܸܬܿ ܡܝܘܼܩܪܵܐ ܡ̣ܢ ܡܲܠܟܹ̈ܐ ܘܪܵܒܵܐ ܒܕܲܗܒ̣ܵܐ ܘܒܣܹܐܡܵܐ: ܘܒܸܬ ܗܵܘܹܝܬܿ ܬܪܲܝܵܢܵܐ ܠܡܲܠܟܵܐ. ܐܝܼܢܵܐ ܓ̰ܘܼܘܸܒܠܹܗ ܛܘܼܒ̣ܵܢܵܐ ܘܐ݇ܡܸܪܹܗ ܐܸܠܹܗ: ܪܲܚܩܸܢ ܡܸܢܝܼ ܦܵܠܵܚܵܐ ܕܣܵܛܵܢܵܐ ܘܡܲܩܝܼܡܵܢܵܐ ܕܕܘܼܓܠܵܐ: ܕܲܗܒ̣ܘܼܟܼ ܘܣܹܐܡܘܼܟܼ ܥܲܡܘܼܟܼ ܢܛܝܼܪܹ̈ܐ ܝ݇ܢܵܐ ܩܵܐ ܛܘܼܠܩܵܢܵܐ: ܕܚܫܸܒ̣ܠܘܼܟܼ ܕܚܵܠܥܲܬܹܗ ܕܐܲܠܵܗܵܐ ܒܛܝܼܡܵܐ ܕܣܹܐܡܵܐ ܟܹܐ ܦܵܝܫܵܐ ܙܒ̣ܝܼܢܬܵܐ. ܓ̰ܘܼܘܸܒܠܹܗ ܗܵܟܸܡ ܘܐ݇ܡܸܪܹܗ ܐܸܠܹܗ: ܡ̣ܢ ܡܵܢܝܼ ܝ݇ܠܸܦܠܘܼܟܼ ܕܐܵܡܪܸܬܿ ܠܝܼ ܐܲܢܹ̈ܐ ܗܹܡܸܙܡܵܢܹ̈ܐ؟ ܡ̣ܢ ܒܵܒܘܼܟܼ ܘܡ̣ܢ ܝܸܡܘܼܟܼ: ܝܲܢ ܡ̣ܢ ܐ݇ܢܵܫܹ̈ܐ ܐ݇ܚܹܪ̈݇ܢܹܐ؟ ܐ݇ܡܸܪܹܗ ܐܸܠܹܗ ܝܵܠܵܕ݇ ܩܲܕܝܼܫܵܐ: ܝܵܐ ܒܵܨܘܿܪܵܐ ܕܚܝܼܵܠ ܘܕܠܵܐ ܦܲܪܡܵܝܬܵܐ: ܡ̣ܢ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ ܒܵܩܘܿܪܹܐ ܝ݇ܘܸܬܿ: ܡ̣ܢ ܐܲܝܟܵܐ ܝ݇ܠܸܦܠܘܼܟܼ ܕܐܵܡܪܸܬܿ ܠܝܼ ܐܲܢܹ̈ܐ ܗܹܡܸܙܡܵܢܹ̈ܐ: ܡ̣ܢ ܒܵܒܘܼܟܼ ܝ݇ܠܸܦܠܘܼܟܼ ܝܲܢ ܡ̣ܢ ܝܸܡܘܼܟܼ؟ ܐܝܼܢܵܐ ܐܵܢܵܐ ܡ̣ܢ ܪܘܼܚܵܐ ܕܩܘܼܕܫܵܐ ܝ݇ܠܸܦܠܝܼ ܕܐܵܡܪܸܢ ܐܲܢܹ̈ܐ ܗܹܡܸܙܡܵܢܹ̈ܐ. ܣܵܒܵܒ ܠܹܐ ܝ݇ܘܸܬܿ ܚܫܝܼܚܵܐ ܕܫܲܡܥܸܬܿ ܠܗ݇ܘܿܢ: ܐܝܼܢܵܐ ܒܘܼܬ ܕܐܲܢܹ̈ܐ ܕܟܸܠܝܹ̈ܐ ܝ݇ܢܵܐ ܒܹܐܡܵܪܵܐ ܝ݇ܘܸܢ ܠܐܵܢܝܼ ܗܹܡܸܙܡܵܢܹ̈ܐ: ܕܫܲܡܥܝܼܠܗ݇ܘܿܢ ܘܢܲܚܦܝܼ: ܝܵܐ ܟ̰ܲܦܲܠ ܘܨܸܗܝܵܐ ܠܕܸܡܵܐ. ܘܟܲܕ ܫܡܸܥܠܹܗ ܠܐܲܢܹ̈ܐ ܗܹܡܸܙܡܵܢܹ̈ܐ: ܦܘܼܩܸܕܠܹܗ ܕܲܝܵܢܵܐ ܕܐܵܣܪܝܼܠܹܗ ܛܘܼܒ̣ܵܢܵܐ: ܘܓ̰ܲܢܓ̰ܸܪܝܼܠܹܗ ܓ̰ܘܼܢܓ̰ܵܪܹ̈ܐ ܡܲܪܝܼܪܹ̈ܐ. ܒܥܕܵܢܵܐ ܕܦܝܵܫܵܐ ܗ݇ܘܼܵܐ ܓ̰ܘܼܢܓ̰ܸܪܵܐ ܓܘܼܫܸܩܠܹܗ ܛܘܼܒ̣ܵܢܵܐ ܠܫܡܲܝܵܐ ܠܟܸܣ ܐܲܠܵܗܵܐ ܫܲܪܝܼܪܵܐ ܘܐ݇ܡܸܪܹܗ: ܡܵܘܕܘܼܝܹܐ ܝ݇ܘܸܢ ܐܸܠܘܼܟܼ ܝܵܐ ܡܵܪܝܵܐ ܥܲܡ ܟܠܵܗ̇ ܓܵܢܝܼ ܘܚܘܼܫܵܒ̣̈ܝܼ ܘܦܲܓ̣ܪ̈ܝܼ ܘܬܲܚܡܲܢܝܵܬ̈ܝܼ ܘܣܸܪܹ̈ܐ ܕܠܸܒܝܼ ܘܥܲܝܢ̈ܝܼ: ܝܵܗ݇ܒ̣ܵܢܵܐ ܨܠܘܿܬܵܐ ܠܙܲܕܥܵܢܹ̈ܐ ܕܡܸܢܹܗ. ܐܸܠܘܼܟܼ ܫܘܼܒ̣ܚܵܐ ܦܵܪܘܿܩܝܼ ܘܣܸܬܪܝܼ ܘܒܲܝܬܵܐ ܕܓܵܘܣܝܼ: ܐܲܢ݇ܬܿ ܝܼܘܸܬܿ ܡܲܠܟܵܐ ܕܡܲܠܟܹ̈ܐ ܕܠܹܐ ܡܵܐܸܬܿ: ܢܵܛܘܿܪܵܐ ܕܡܗܘܼܡܢ̈ܘܼܗܝ: ܐܸܠܘܼܟܼ ܬܸܫܒܘܿܚܬܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ.
ܟܲܕ ܨܵܠܘܿܝܹܐ ܗ݇ܘܼܵܐ ܨܠܘܿܬܵܐ ܛܘܼܒ̣ܵܢܵܐ ܩܘܼܪܝܵܩܘܿܣ: ܒܛܸܠܗ݇ܘܿܢ ܘܪ̈ܘܼܚܩܸܢܗ݇ܘܿܢ ܛܲܪ̈ܕܵܢܘܼܗܝ: ܘܡܘܼܬܸܒ̣ܠܗ݇ܘܿܢ ܠܨܲܒܝܼܵܐ ܥܲܠ ܐܲܪܥܵܐ: ܘܠܵܐ ܦܝܼܫܠܗ݇ܘܿܢ ܡܘܼܒܝܸܢܹ̈ܐ ܒܪ̈ܝܼܢܵܬܘܼܗܝ. ܘܟܲܕ ܚܙܹܐܠܹܗ ܕܲܝܵܢܵܐ ܟܪܸܒܠܹܗ: ܕܠܲܝܬ ܗ݇ܘܼܵܐ ܠܲܟܹ̈ܐ ܕܡܚܵܝܵܬܹ̈ܐ ܒܦܲܓ̣ܪܹܗ: ܘܪܵܒܵܐ ܦܝܼܫܠܹܗ ܥܘܼܓ̰ܒܵܐ. ܘܦܘܼܩܸܕܠܹܗ ܕܡܲܝܬ݇ܝܼܠܵܗ̇ ܠܝܸܡܹܗ ܝܘܿܠܹܝܛܹܐ. ܘܟܲܕ ܐ݇ܬܹܐܠܵܗ̇: ܓ̰ܘܼܘܸܒܠܹܗ ܕܲܝܵܢܵܐ ܘܐ݇ܡܸܪܹܗ ܐܸܠܵܗ̇: ܒܪܘܿܢܵܟ̣ܝ ܗܘܼܡܸܢܹܗ ܘܡܵܘܕܝܼܠܹܗ ܕܐܝܼܬ ܐܲܠܵܗܹ̈ܐ. ܐܝܼܢܵܐ ܐܵܗܵܐ ܛܘܼܒ̣ܵܢܝܼܬܵܐ ܐ݇ܡܸܪܵܗ̇: ܕܒܵܥܝܲܢ ܕܫܲܡܥܲܢ ܡ̣ܢ ܦܘܼܡܵܐ ܕܒܪܘܿܢܝܼ. ܘܦܘܼܩܸܕܠܹܗ ܕܲܝܵܢܵܐ: ܕܒܓ̰ܲܠܕܘܼܬܵܐ ܐܵܬܹܐ ܝܵܠܵܕ݇ܐ. ܘܟܲܕ ܚܙܹܐܠܵܗ̇ ܛܘܼܒ̣ܵܢܝܼܬܵܐ ܠܒܪܘܿܢܵܗ̇: ܓܘܼܫܸܩܠܵܗ̇ ܠܫܡܲܝܵܐ: ܘܫܘܼܒܸܚܠܵܗ̇ ܠܐܲܠܵܗܵܐ ܘܐ݇ܡܸܪܵܗ̇: ܡܵܘܕܘܼܝܹܐ ܝ݇ܘܵܢ ܐܸܠܘܼܟܼ ܐܲܠܵܗܵܐ ܕܡܸܠܝܵܐ ܝ݇ܠܹܗ ܪ̈ܲܚܡܹܐ: ܕܩܲܡ ܡܲܚܫܸܚܸܬܿ ܠܝܼ ܕܚܲܙܝܵܢܹܗ ܒܪܘܿܢܝܼ ܓܵܘ ܕܐܵܗܵܐ ܦܠܵܫܵܐ. ܐܲܠܵܗܵܐ ܕܡܬܸܚܠܹܗ ܫܡܲܝܵܐ ܒܣܝܼܛܹܗ: ܘܣܘܼܩܸܠܹܗ ܐܲܪܥܵܐ ܒܘܲܪ̈ܕܹܐ: ܘܡܘܼܬܸܒ̣ܠܹܗ ܠܫܸܡܫܵܐ ܘܠܣܲܗܪܵܐ ܐܲܝܟܼ ܪܸܙܵܝܹܗ: ܗܲܒ̣݇ܠ ܐܸܠܝܼ ܘܠܒܪܘܿܢܝܼ ܕܦܠܸܛܠܹܗ ܡ̣ܢ ܟܵܪ݇ܣܝܼ: ܟܠܝܼܠܵܐ ܕܠܵܐ ܟ̰ܵܡܸܟ̃: ܣܵܒܵܒ ܠܒ̣ܝܼܫܹ̈ܐ ܝ݇ܘܲܚ ܫܸܡܘܼܟܼ ܕܠܹܐ ܥܵܒ̣ܸܪ. ܐ݇ܬܹܐܠܹܗ ܚܲܕ݇ ܩܵܠܵܐ ܡ̣ܢ ܫܡܲܝܵܐ ܒܹܐܡܵܪܵܐ: ܗܘܝܼ ܚܲܝܠܵܢܬܵܐ ܝܘܿܠܹܝܛܹܐ: ܡܣܵܒܵܒ ܐܵܗܵܐ ܒܪܘܿܢܵܐ ܕܗܘܼܨܸܠܵܟ̣ܝ: ܓܘܼܪܵܐ ܝ݇ܠܹܗ ܡܸܢܵܟ̣ܝ ܘܡ̣ܢ ܪ̈ܵܒܹܐ: ܘܒܸܬ ܗܵܘܹܐ ܓܘܼܪܵܐ ܓܵܘ ܡܲܠܟܘܼܬܵܐ ܕܫܡܲܝܵܐ. ܐܝܼܢܵܐ ܐܵܗܵܐ ܒܪܘܿܢܵܟ̣ܝ ܒܸܬ ܡܲܕܥܸܪܵܟ̣ܝ ܠܝ݇ܕܥܵܝܬܵܐ ܕܫܪܵܪܵܐ: ܘܒܸܬ ܫܵܩܸܠܹܗ ܡܸܢܵܟ̣ܝ ܠܵܘܡܵܐ. ܘܓ̰ܘܼܘܸܒܠܵܗ̇ ܝܘܿܠܹܝܛܹܐ ܘܐ݇ܡܸܪܵܗ̇ ܠܒܪܘܿܢܵܗ̇: ܐ݇ܡܘܿܪ ܠܝܼ ܒܪܘܿܢܝܼ: ܩܵܡܘܿܕܝܼ ܒܸܙܕܲܥܝܵܐ ܝ݇ܘܸܬܿ: ܘܠܐܲܝܢܝܼ ܐܲܠܵܗܹ̈ܐ ܒܸܣܓ̣ܵܕܵܐ ܝ݇ܘܸܬܿ؟ ܓ̰ܘܼܘܸܒܠܹܗ ܝܵܠܵܕ݇ܐ ܘܐ݇ܡܸܪܹܗ ܠܝܸܡܹܗ: ܠܵܐ ܙܲܕܥܵܬܝ ܒܚܝܼܵܠܵܟ̣ܝ ܝܸܡܝܼ. ܡܣܵܒܵܒ ܝܼܫܘܿܥ ܡܫܝܼܚܵܐ ܐܝܼܬܠܲܢ ܗܲܝܸܪܵܢܵܐ: ܗ̇ܘ ܕܩܲܡ ܫܵܠܸܚܠܲܢ ܡ̣ܢ ܒܲܪܢܵܫܵܐ ܥܲܬܝܼܩܵܐ: ܘܩܲܡ ܡܲܠܒ̣ܸܫܠܲܢ ܠܒ̣ܝܼܫܬܵܐ ܩܲܕܝܼܫܬܵܐ. ܐ݇ܡܸܪܹܗ ܕܲܝܵܢܵܐ: ܗܵܕܟ̣ܵܐ ܒܣܸܡܠܵܐ ܠܵܘܟ̣ܘܿܢ ܕܒܝܼܲܕ ܒܝܼܫܘܼܬܵܐ ܦܲܠܛܝܼܬܘܿܢ ܡ̣ܢ ܥܵܠܡܵܐ؟ ܓ̰ܘܼܘܸܒܠܹܗ ܛܘܼܒ̣ܵܢܵܐ ܩܘܼܪܝܵܩܘܿܣ ܘܐ݇ܡܸܪܹܗ ܠܕܲܝܵܢܵܐ: ܐܲܢܹ̈ܐ ܚܲܝܹ̈ܐ ܕܩܘܼܘܸܠܘܼܟܼ ܩܵܬܲܢ: ܠܫܝܘܿܠ ܬܲܚܬܵܝܬܵܐ ܒܸܬ ܠܲܒܠܝܼܠܲܢ. ܐܝܼܢܵܐ ܐܲܢܹ̈ܐ ܚܲܝܹ̈ܐ ܕܩܘܼܘܸܠܹ̈ܐ ܝ݇ܢܵܐ ܩܵܬܲܢ: ܠܟܸܣ ܝܼܫܘܿܥ ܡܫܝܼܚܵܐ ܒܸܬ ܟ̰ܵܝܕܝܼܠܲܢ. ܐ݇ܡܸܪܹܗ ܕܲܝܵܢܵܐ: ܡܲܝܬ݇ܝܼܡܘܿܢ ܡܸܠܚܵܐ ܘܚܲܪܕܠܵܐ: ܘܕܲܩܕܸܩܘܿܢ ܠܗ݇ܘܿܢ: ܘܚܒ̣ܘܿܛܘܿܢ ܠܗ݇ܘܿܢ ܒܚܵܠܵܐ: ܘܕܪܵܝܡܘܿܢ ܠܗ݇ܘܿܢ ܓܵܘ ܢܵܚܝܼܪ̈ܲܝܗܝ ܕܩܲܕܝܼܫܹ̈ܐ. ܘܥܒ̣ܝܼܕܠܗ݇ܘܿܢ ܐܲܝܟܼ ܦܘܼܩܕܵܢܹܗ ܕܕܲܝܵܢܵܐ. ܘܓ̰ܘܼܘܸܒܠܹܗ ܛܘܼܒ̣ܵܢܵܐ ܘܐ݇ܡܸܪܹܗ: ܚܸܠܝܹ̈ܐ ܝ݇ܢܵܐ ܗܹܡܸܙܡܵܢ̈ܘܼܟܼ ܠܥܸܠܸܠ ܡ̣ܢ ܕܫܵܡܘܼܚܬܝܼ: ܒܘܼܫ ܡ̣ܢ ܕܸܒ̣ܫܵܐ ܠܦܘܼܡܵܐ: ܘܐܲܝܟܼ ܫ̰ܵܢܵܐ ܕܕܵܒܵܫܹ̈ܐ ܕܸܒ̣ܫܵܐ ܝ݇ܢܵܐ ܩܵܬܝܼ: ܐܲܝܟܼ ܕܟܬܝܼܒ̣ܵܐ ܝ݇ܠܹܗ ܒܚܲܙܩܝܼܐܹܝܠ ܢܒ̣ܝܼܵܐ: ܕܛܥܸܡܠܝܼ ܗܹܡܸܙܡܵܢܹ̈ܐ ܕܦܘܼܡܘܼܟܼ ܐܲܝܟܼ ܕܸܒ̣ܫܵܐ ܚܸܠܝܵܐ ܝ݇ܢܵܐ. ܡܘܼܕܝܼ ܒܸܚܫܵܒ̣ܵܐ ܝ݇ܘܸܬܿ ܘܬܲܚܡܘܼܢܹܐ ܝܵܐ ܕܲܝܵܢܵܐ: ܐܲܢ݇ܬܿ ܥܒ̣ܝܼܕܲܢ ܝ݇ܘܸܬܿ ܒܵܠܵܕ ܒܓ̰ܘܼܢܓ̰ܵܪܹ̈ܐ ܕܟܹܐ ܡܓ̰ܲܢܓ̰ܸܪܸܬܿ: ܕܟܲܦܪܲܚ ܒܐܲܠܵܗܵܐ ܗ̇ܘ ܕܩܘܼܪܒܵܐ ܝ݇ܠܹܗ ܐܸܠܲܢ ܘܟܹܐ ܗܲܝܸܪܲܢ؟ ܒܘܼܬ ܕܐܵܗܵܐ ܠܹܐ ܝ݇ܘܲܚ ܒܸܚܫܵܒ̣ܵܐ ܠܓ̰ܘܼܢܓ̰ܵܪ̈ܘܼܟܼ ܐܘܼܦ ܠܵܐ ܐ݇ܟ̣ܵܠܬܵܐ ܕܓܲܦܘܼܟܼ: ܐ݇ܡܸܪܹܗ ܕܲܝܵܢܵܐ: ܡܲܨܝܸܬܘܿܢ ܐܸܠܝܼ: ܕܠܵܐ ܡܵܝܬܘܼܬܘܿܢ. ܐ݇ܡܸܪܹܗ ܝܵܠܵܕ݇ܐ ܩܲܕܝܼܫܵܐ: ܡܵܘܬܘܼܟܼ ܩܵܬܲܢ ܚܲܝܹ̈ܐ ܝ݇ܢܵܐ. ܣܵܒܵܒ ܐܲܢ݇ܬܿ ܝ݇ܘܸܬܿ ܗ̇ܘ ܕܐ݇ܡܸܪܹܗ ܢܒ̣ܝܼܵܐ ܒܘܼܬ ܕܝܼـܹܗ: ܕܘܵܝ ܠܡ̇ܢ ܕܥܵܒ̣ܸܕ ܠܚܸܠܝܵܐ ܡܲܪܝܼܪܵܐ: ܘܡܲܪܝܼܪܵܐ ܚܸܠܝܵܐ. ܐ݇ܡܸܪܹܗ ܕܲܝܵܢܵܐ: ܝܵܐ ܩܲܪܩܲܦܬܵܐ ܒܝܼܫܬܵܐ: ܕܵܐܟ̣ܝܼ ܒܸܩܪܵܝܵܐ ܝ݇ܘܸܬܿ ܠܡܵܘܬܵܐ ܚܲܝܹ̈ܐ: ܘܠܚܲܝܹ̈ܐ ܡܵܘܬܵܐ؟ ܘܦܘܼܩܸܕܠܹܗ ܕܲܝܵܢܵܐ: ܡܲܝܬ݇ܝܸܡܘܿܢ ܐܲܪܒܲܥܣܲܪ ܣܟܸܢܝܵܬܹ̈ܐ ܕܦܪܸܙܠܵܐ: ܘܡܘܼܫܚܸܢܵܝܠܗ݇ܘܿܢ ܗܲܠ ܕܗ݇ܘܹܐܠܗ݇ܘܿܢ ܐܲܝܟܼ ܢܘܼܪܵܐ. ܘܦܘܼܩܸܕܠܹܗ: ܕܫܲܒ̣ܥܵܐ (ܣܟܝܼܢܝܵܬܹ̈ܐ) ܗܵܘܝܼ ܐܸܠܹܗ (ܠܝܵܠܵܕ݇ܐ) ܘܫܲܒ̣ܥܵܐ ܠܝܸܡܹܗ. ܘܐ݇ܡܸܪܹܗ ܕܲܝܵܢܵܐ: ܬܪܹ̈ܝܢ ܣܟܝܼܢܝܵܬܹ̈ܐ ܛܘܿܣܘܿܢ ܠܗ݇ܘܿܢ ܓܵܘ ܥܲܝܢܵܬ̈ܘܼܗܝ: ܘܬܪܹ̈ܝܢ ܣܟܝܼܢܝܵܬܹ̈ܐ ܛܘܿܣܘܿܢ ܠܗ݇ܘܿܢ ܓܵܘ ܫܵܡܘܼܚܬܹܗ: ܘܚܲܕ݇ ܣܟܝܼܢܬܵܐ ܛܘܿܣܘܿܢ ܠܵܗ̇ ܓܵܘ ܠܸܒܹܗ: ܗܵܕܟ̣ܵܐ ܐܘܼܦ ܠܝܸܡܹܗ ܥܒ̣ܸܕܠܗ݇ܘܿܢ. ܕܝܵܩܕܵܐ ܫܡܲܥܬܲܝܗܝ: ܘܦܵܐܸܫ ܟ̰ܸܡܥܝܵܐ ܒܲܗܪܲܝܗܝ: ܘܙܲܪܒܸܢ ܡܲܪܥܵܐ ܕܠܸܒܲܝܗܝ: ܘܗܵܕܟ̣ܵܐ ܕܡܵܝܬܝܼ. ܘܒܥܕܵܢܵܐ ܕܛܝܼܣܵܝܠܗ݇ܘܿܢ ܒܝܼܲܝܗܝ ܐܵܢܝܼ ܣܟܝܼܢܝܵܬܹ̈ܐ: ܟ̰ܡܸܥܠܗ݇ܘܿܢ ܘܗ݇ܘܹܐܠܗ݇ܘܿܢ ܩܲܪܝܼܪܹ̈ܐ ܒܢܝܼܫܲܢܩܵܐ ܕܡܫܝܼܚܵܐ: ܗܵܝܓܵܗ ܛܘܼܒ̣ܵܢܹ̈ܐ ܫܘܼܒܸܚܠܗ݇ܘܿܢ ܠܡܫܝܼܚܵܐ: ܐ݇ܡܸܪܹܗ ܕܲܝܵܢܵܐ: ܐ݇ܣܘܿܪܘܿܢ ܠܗ݇ܘܿܢ ܒܦܪܸ̈ܙܠܹܐ: ܘܠܲܒܠܵܝܡܘܿܢ ܠܗ݇ܘܿܢ ܠܒܹܝܬ ܐܲܣܝܼܪܹ̈ܐ: ܟܲܕ ܒܸܒܥܵܝܵܐ ܝ݇ܘܸܢ ܘܬܲܚܡܘܼܢܹܐ ܒܘܼܬ ܕܝܼܲܝܗܝ.
ܐܝܼܢܵܐ ܒܥܕܵܢܵܐ ܕܝܼܗܘܼܵܐ ܓܵܘ ܒܹܝܬ ܐܲܣܝܼܪܹ̈ܐ: ܘܐ݇ܣܝܼܪܵܝ ܗ݇ܘܼܵܘ ܒܦܪܸ̈ܙܠܹܐ: ܒܸܙܡܵܪܵܐ ܗ݇ܘܼܵܘ ܛܘܼܒ̣ܵܢܵܐ ܐܵܗܵܐ ܡܲܙܡܘܿܪܵܐ ܘܒܹܐܡܵܪܵܐ: ܐܲܠܵܗܵܐ ܕܚܸܩܪܝܼ ܠܵܐ ܫܲܬܩܸܬܿ. ܡܣܵܒܵܒ ܕܦܘܼܡܹܗ ܕܟܵܦܘܿܪܵܐ ܘܦܟ̰ܝܼܠܵܐ ܦܝܼܫܠܗ݇ܘܿܢ ܦܬܝܼܚܹ̈ܐ ܥܲܠܝܼ. ܗܘܼܡܙܸܡܠܗ݇ܘܿܢ ܥܲܡܝܼ ܒܠܸܫܵܢܵܐ ܕܲܓܵܠܵܐ ܘܒܩܵܠܵܐ ܕܣܢܹܐܬܵܐ. ܐܲܢ݇ܬܿ ܝܵܐ ܡܵܪܝܼ ܥܒ̣ܘܿܕ ܥܲܡܝܼ ܒܘܼܬ ܪ̈ܲܚܡܘܼܟܼ ܘܒܘܼܬ ܫܸܡܘܼܟܼ ܓܘܼܪܵܐ ܘܩܲܕܝܼܫܵܐ: ܕܠܵܒ̣ܫܝܼ ܢܚܸܦܬܵܐ ܐܵܢܝܼ ܕܥܒ̣ܸܕܠܗ݇ܘܿܢ ܢܫܲܪܬܵܐ ܥܲܠܲܢ: ܦܵܝܫܝܼ ܠܒ̣ܝܼܫܹ̈ܐ ܢܚܸܦܬܵܐ ܐܵܢܝܼ ܕܐܸܠܝܼ ܡܘܼܣܠܝܼܠܗ݇ܘܿܢ: ܘܐܲܢ݇ܬܿ ܥܒ̣ܘܿܕ ܥܲܡܝܼ ܢܝܼܫܲܢܩܵܐ ܕܪ̈ܲܚܡܘܼܟܼ. ܐܝܼܢܵܐ ܟܲܕ ܗ݇ܘܹܐܠܹܗ ܪܲܡܫܵܐ: ܒܸܙܡܵܪܵܐ ܗ݇ܘܼܵܐ ܛܘܼܒ̣ܵܢܵܐ ܓܵܘ ܒܹܝܬ ܐܲܣܝܼܪܹ̈ܐ ܘܒܹܐܡܵܪܵܐ: ܕܦܵܝܫܵܐ ܩܘܼܒܸܠܬܵܐ ܨܠܘܿܬܝܼ ܐܲܝܟܼ ܥܸܛܪܵܐ ܕܒܸܣܡܹ̈ܐ ܩܵܕ݇ܡܘܼܟܼ. ܡܣܵܒܵܒ ܕܐܲܢ݇ܬܿ ܝ݇ܘܸܬܿ ܡܵܪܝܵܐ ܗܝܼܒ̣ܝܼ ܕܝܼܝܼ: ܕܓܵܘ ܫܡܲܝܵܐ ܡܘܼܬܸܒ̣ܠܘܼܟܼ ܕܘܼܟܬܵܐ ܕܫܪܵܝܬܘܼܟܼ: ܠܹܐ ܩܲܪܒܸܢܵܐ ܐܸܠܘܼܟܼ ܒܝܼܫܬܵܐ. ܘܚܬܝܼܡܠܹܗ ܨܠܘܿܬܵܐ. ܘܒܥܕܵܢܵܐ ܕܗ݇ܘܹܐܠܹܗ ܦܲܠܓܹܗ ܕܠܲܝܠܹܐ: ܫܘܼܪܝܼܠܹܗ ܛܘܼܒ̣ܵܢܵܐ ܒܸܙܡܵܪܵܐ: ܡܵܪܝܵܐ ܦܬܘܿܚ ܠܝܼ ܣܸܦܘܵܬ̈ܝܼ: ܘܦܘܼܡܝܼ ܦܵܠܸܛ ܬܸܫܒܘܿܚܝܵܬܹ̈ܐ. ܓܵܘ ܦܲܠܓܵܐ ܕܠܲܝܠܹܐ ܩܝܼܡܠܝܼ ܕܫܲܟܪܸܢ ܐܸܠܘܼܟܼ ܒܘܼܬ ܕܝܼܘܵܢ̈ܘܼܟܼ ܙܲܕܝܼܩܵܐ: ܟܲܕ ܬܘܼܡܸܡܠܹܗ ܨܠܘܿܬܹܗ ܛܘܼܒ̣ܵܢܵܐ ܩܘܼܪܝܵܩܘܿܣ: ܫܓ̣ܸܫܠܹܗ ܣܵܛܵܢܵܐ ܘܟܪܸܒܠܹܗ ܥܲܠܘܼܗܝ: ܘܥܒ̣ܸܪܹܗ ܠܟܸܣܠܹܗ ܠܒܹܝܬ ܐܲܣܝܼܪܹ̈ܐ ܘܐ݇ܡܸܪܹܗ ܐܸܠܹܗ: ܝܵܠܵܕ݇ܐ: ܩܵܡܘܿܕܝܼ ܡܘܼܙܝܸܕܠܘܼܟܼ ܨܠܘܿܬܘܼܟܼ ܩܵܕ݇ܡ ܡܵܪܝܵܐ ܐܲܠܵܗܘܼܟܼ؟ ܘܡܵܪܝܵܐ ܠܵܐ ܫܸܡܥܝܵܐ ܠܹܗ ܨܠܘܿܬܘܼܟܼ: ܘܡܘܼܣܠܝܼܠܵܗ̇ ܩܵܬܹܗ ܒܩܵܠܵܐ ܕܒܵܥܘܼܬܘܼܟܼ. ܘܩܲܡ ܫܵܕܸܪ ܠܝܼ ܠܗܲܝܲܪܬܘܼܟܼ: ܘܩܲܡ ܦܵܩܸܕܠܝܼ ܕܐܵܡܪܸܢ ܐܸܠܘܼܟܼ: ܐܸܢ ܩܵܪܹܐܠܘܼܟܼ ܕܲܝܵܢܵܐ ܘܒܵܩܸܪܘܼܟܼ ܒܘܼܩܵܪܵܐ: ܓ̰ܲܘܘܸܒ ܠܹܗ ܕܠܵܐ ܙܕܥܘܿܬܵܐ ܘܕܠܵܐ ܕܘܼܪܵܫܵܐ: ܘܗܵܘܹܝܬܿ ܚܲܒ̣ܪܵܐ ܠܡܲܠܟܵܐ ܐܲܪܥܵܢܵܝܵܐ ܘܠܡܲܠܟܵܐ ܫܡܲܝܵܢܵܐ. ܐܝܼܢܵܐ ܩܲܕܝܼܫܵܐ ܒܓ̰ܲܠܕܘܼܬܵܐ ܝ݇ܕܸܥܠܹܗ ܦܟ̰ܝܼܠܘܼܬܵܐ ܕܒܝܼܫܵܐ ܘܐ݇ܡܸܪܹܗ ܐܸܠܹܗ: ܪܲܚܩܸܢ ܡܸܢܝܼ ܝܵܐ ܣܵܛܵܢܵܐ: ܡܣܵܒܵܒ ܠܲܝܬܠܘܼܟܼ ܕܘܼܟܬܵܐ ܝܲܢ ܗܘܼܟܡܵܐ ܒܩܲܕܝܼܫܹ̈ܐ ܕܡܫܝܼܚܵܐ: ܡܵܪܝܵܐ ܒܸܬ ܫܵܕܸܪܘܼܟܼ ܠܓܹܗܲܢܵܐ ܬܲܚܬܵܝܬܵܐ. ܘܐ݇ܡܸܪܹܗ ܣܵܛܵܢܵܐ ܠܛܘܼܒ̣ܵܢܵܐ: ܚܫܸܒ̣ܠܘܼܟܼ ܕܩܲܡ ܓ̣ܲܠܒܸܬܿ ܠܝܼ؟ ܘܟܹܐ ܥܲܒ̣ܪܸܢ ܘܟܹܐ ܫܵܪܸܢ ܓܵܘ ܚܝܼܵܠܹܗ ܕܕܲܝܵܢܵܐ: ܘܟܹܐ ܐܵܣܪܸܢܘܿܢ ܣܸܦܘܵܬܹ̈ܗܝ ܕܠܵܐ ܐܵܡܸܪ ܐܸܠܘܼܟܼ ܗܸܟ̰ ܡܸܢܕܝܼ: ܘܠܵܐ ܙܹܐ ܕܫܲܩܠܸܬܿ ܟܠܝܼܠܵܐ ܗ̇ܘ ܕܓܵܫܘܿܩܹܐ ܝ݇ܘܸܬܿ ܒܝܼـܹܗ. ܘܡܸܕܪܹܐ ܒܸܬ ܥܲܒ̣ܪܸܢ ܠܠܸܒܵܗ̇ ܕܝܸܡܘܼܟܼ ܘܡܛܲܠܩܸܢܵܗ̇ ܡ̣ܢ ܐܘܼܪܚܵܐ ܕܕܘܼܙܘܼܬܵܐ. ܗܵܝܓܵܗ ܐ݇ܡܸܪܹܗ ܛܘܼܒ̣ܵܢܵܐ ܩܘܼܪܝܵܩܘܿܣ: ܪܲܚܩܸܢ ܡܸܢܝܼ ܣܵܛܵܢܵܐ: ܕܡܵܪܝܵܐ ܩܲܡ ܡܲܢܚܸܦܠܘܼܟܼ. ܗܵܝܓܵܗ ܪܘܼܚܩܸܢܹܗ ܒܕܵܡܵܝܬܵܐ ܕܬܸܢܢܵܐ ܘܓܲܪܕܵܒܘܼܠܹܐ. ܘܐ݇ܡܸܪܹܗ ܛܘܼܒ̣ܵܢܵܐ ܠܝܸܡܹܗ: ܕܗܵܘܲܚ ܕܵܝܸܡ ܒܨܠܘܿܬܵܐ ܘܗܸܫܝܵܪܘܼܬܵܐ: ܕܠܵܐ ܐܵܬܹܐ ܓܹܢܵܒ̣ܵܐ ܘܓܵܢܸܒ̣ ܠܚܵܙܢ̈ـܲܢ. ܘܫܡܸܥܠܗ݇ܘܿܢ ܐܵܢܝܼ ܕܕܸܪ̈ܝܹܐ ܗ݇ܘܼܵܘ ܓܵܘ ܒܹܝܬ ܐܲܣܝܼܪܹ̈ܐ: ܘܙܕܸܥܠܗ݇ܘܿܢ ܪܵܒܵܐ ܡ̣ܢ ܐܲܠܵܗܵܐ. ܘܫܘܼܪܹܐܠܹܗ ܩܲܕܝܼܫܵܐ ܠܹܐܡܵܪܵܐ: ܪܲܚܸܡ ܥܲܠܲܢ ܝܵܐ ܐܲܠܵܗܵܐ ܐܲܝܟܼ ܫܵܦܵܩܲܬܘܼܟܼ: ܘܐܲܝܟܼ ܒܘܼܫܵܝܘܼܬܵܐ ܕܪ̈ܲܚܡܘܼܟܼ ܓܪܘܿܕܠܗ݇ܘܿܢ ܚܛ̈ܝܼܵܬܲܢ. ܡܲܙܝܸܕ ܘܚܲܠܸܠܲܢ ܡ̣ܢ ܥܵܘܠܲܢ: ܘܡ̣ܢ ܚܛ̈ܝܼܵܬܲܢ ܕܵܟ̣ܝܼܠܲܢ.
ܘܡ̣ܢ ܒܵܬ݇ܪ ܚܲܕ݇ܟܡܵܐ ܝܵܘܡܵܢܹ̈ܐ ܦܘܼܩܸܕܠܹܗ ܕܲܝܵܢܵܐ: ܕܡܲܝܬ݇ܝܼܠܗ݇ܘܿܢ ܠܩܲܕܝܼܫܹ̈ܐ ܡ̣ܢ ܒܹܝܬ ܐܲܣܝܼܪܹ̈ܐ: ܘܡܲܟܠܝܼܠܗ݇ܘܿܢ ܩܵܕ݇ܡܘܼܗܝ. ܐ݇ܡܸܪܹܗ ܕܲܝܵܢܵܐ ܠܛܘܼܒ̣ܵܢܵܐ: ܡ̣ܢ ܐܵܕܝܼܵܐ ܠܹܐ ܛܲܠܒܸܢ ܡܸܢܘܼܟܼ ܕܥܵܒ̣ܕܸܬܿ ܕܸܒ̣ܚܵܐ ܠܐܲܠܵܗ̈ܝܼ: ܐܝܼܢܵܐ ܐܲܚܟ̰ܝܼ ܐܵܗܵܐ ܗܹܡܸܙܡܵܢ ܒܸܬ ܐܵܡܪܸܢ: ܒܸܬ ܡܲܬܒ̣ܸܢ ܒܸܣܡܹ̈ܐ ܠܣܪܵܦܝܼܘܿܢ: ܘܒܸܬ ܦܲܚܠܸܢܘܼܟܼ ܕܐܵܙܸܠ݇ܬܿ ܠܐܲܝܟܵܐ ܕܒܵܥܹܝܬܿ. ܐܝܼܢܵܐ ܐܵܗܵܐ ܛܘܼܒ̣ܵܢܵܐ ܐ݇ܡܸܪܹܗ ܐܸܠܹܗ: ܝܵܐ ܚܲܒ̣ܪܵܐ ܕܕܲܝܘܹ̈ܐ ܘܚܲܒ̣ܪܵܐ ܕܣܵܛܵܢܵܐ ܘܚܸܠܡܵܬܟܲܪ ܕܟ̰ܲܦܵܠܹ̈ܐ: ܐܵܢܵܐ ܐܵܗܵܐ ܠܹܐ ܝ݇ܘܸܢ ܒܹܐܡܵܪܵܐ: ܐܝܼܢܵܐ ܒܸܬ ܨܵܠܸܢ ܨܠܘܿܬܵܐ ܕܦܵܐܸܫ ܬܠܝܼܚܵܐ ܐܵܗܵܐ ܒܲܝܬܵܐ ܕܨܵܢܵܡܹ̈ܐ: ܘܐ݇ܬܹܐܠܹܗ ܡܲܠܲܐܟ̣ܵܐ ܡ̣ܢ ܫܡܲܝܵܐ: ܘܬܠܸܚܠܹܗ ܠܒܲܝܬܵܐ ܕܨܵܢܵܡܹ̈ܐ: ܘܬܠܸܚܠܹܗ ܐܲܪܒܲܥܣܲܪ ܐܲܠܵܗܹ̈ܐ ܕܝܼܗ݇ܘܼܵܘ ܟܸܠܝܹ̈ܐ ܒܝܼـܹܗ. ܛܘܼܚܛܸܚܲܝܗܝ ܠܹܗ: ܘܥܒ̣ܝܼܕܲܝܗܝ ܠܹܗ ܐܲܝܟܼ ܥܘܼܦܪܵܐ: ܘܓܚܸܟܠܹܗ ܗ̇ܘ ܛܘܼܒ̣ܵܢܵܐ ܘܐ݇ܡܸܪܹܗ ܠܕܲܝܵܢܵܐ: ܓܵܫܸܩ ܒܐܲܠܵܗ̈ܘܼܟܼ: ܕܝܑܼܢܵܐ ܐܲܝܟܼ ܥܘܼܦܪܵܐ! ܣܵܒܵܒ ܐܲܠܵܗܵܐ ܕܝܼܝܼ ܟܪܸܒܠܹܗ ܥܲܠ ܐܲܠܵܗ̈ܘܼܟܼ. ܘܦܝܼܫܠܗ݇ܘܿܢ ܡܘܼܫ݇ܟ̰ܚܹܐ ܐܲܝܟܼ ܥܘܼܦܪܵܐ ܕܠܵܐ ܚܲܝܠܵܐ ܘܠܵܐ ܡܨܵܝܬܵܐ. ܡܣܵܒܵܒ ܐܲܠܵܗܝܼ ܙܲܪܒܵܢܵܐ ܝ݇ܠܹܗ ܘܓܲܢ݇ܒܵܪܵܐ: ܐܝܼܢܵܐ ܐܲܢ݇ܬܿ ܝܵܐ ܕܲܝܵܢܵܐ ܥܒ̣ܘܿܕ ܡܸܢܕܝܼ ܕܒܹܐܡܵܪܵܐ ܝ݇ܘܸܢ ܐܸܠܘܼܟܼ: ܫܩܘܿܠ ܠܐܵܗܵܐ ܥܘܼܦܪܵܐ ܕܐܲܠܵܗ̈ܘܼܟܼ. ܚܒ̣ܘܿܛ ܒܝܼـܹܗ ܡܸܠܚܵܐ ܘܡܸܫܚܵܐ ܘܐ݇ܣܘܿܪܘܿܢ ܓܵܘ ܟܸܬܵܢܹ̈ܐ ܢܲܩܕܹ̈ܐ [ܢܵܙܘܼܟܼ] ܫܲܒ̣ܥܵܐ ܝܵܘܡܵܢܹ̈ܐ: ܘܚܙܝܼ ܐܸܢ ܒܸܬ ܩܵܝܡܝܼ ܡ̣ܢ ܬܚܘܿܬܲܝܗܝ ܘܗܲܝܸܪܝܼ ܓܵܢܲܝܗܝ. ܣܵܒܵܒ ܠܹܐ ܡܵܨܝܼ ܕܗܲܝܸܪܝܼ ܠܒܲܪܢܵܫܵܐ. ܘܥܒ̣ܸܕܠܹܗ ܕܲܝܵܢܵܐ ܐܲܝܟܼ ܕܐ݇ܡܸܪܹܗ ܐܸܠܹܗ ܛܘܼܒ̣ܵܢܵܐ: ܘܠܲܝܬ ܗܸܟ̰ ܩܵܠܵܐ ܕܡܲܨܝܘܼܬܹܐ ܗ݇ܘܼܵܐ ܐܘܼܦ ܠܵܐ ܡܨܵܝܬܵܐ ܘܚܲܝܠܵܐ. ܘܦܘܼܩܸܕܠܹܗ ܕܲܝܢܵܐ ܕܐܵܡܸܪ ܠܩܲܝܢܵܝܵܐ [ܬܲܪܨܵܢܵܐ ܕܦܪܸܙܠܵܐ] ܕܬܵܪܸܨ ܗ݇ܘܼܵܐ ܡܵܐܢܹ̈ܐ [ܟ̰ܲܟܹ̈ܐ] ܩܵܐ ܓ̰ܘܼܢܓ̰ܵܪܵܐ. ܘܥܒ̣ܸܪܹܗ ܣܵܛܵܢܵܐ ܓܵܘ ܠܸܒܹܗ: ܘܠܵܐ ܫܒ̣ܸܩܠܹܗ ܕܐܵܡܸܪ ܚܲܕ݇ ܡܸܢܕܝܼ ܠܩܲܝܢܵܝܵܐ. ܗܵܝܓܵܗ ܩܲܕܝܼܫܵܐ ܐ݇ܡܸܪܹܗ ܠܩܲܝܢܵܝܵܐ: ܡܵܨܹܝܬܿ ܕܬܲܪܨܸܬܿ ܡܵܐܢܹ̈ܐ ܩܵܐ ܓ̰ܘܼܢܓ̰ܵܪܹ̈ܐ ܕܝܼܝܼ ܘܠܝܸܡܝܼ؟ ܣܵܒܵܒ ܐܵܗܵܐ ܕܲܝܵܢܵܐ ܠܹܐ ܝ݇ܠܹܗ ܒܵܠܲܕ ܒܡܸܢܕܝܼ. ܐ݇ܡܸܪܹܗ ܩܲܝܢܵܝܵܐ: ܦܵܩܸܕ ܠܝܼ ܝܵܠܵܕ݇ܐ ܡܸܢܕܝܼ ܕܒܵܥܹܝܬܿ: ܘܐܵܢܵܐ ܒܸܬ ܬܲܪܨܸܢ ܐܸܠܘܼܟܼ. ܘܐ݇ܡܸܪܗ ܛܘܼܒ̣ܵܢܵܐ ܠܩܲܝܢܵܝܵܐ: ܬܵܪܸܨ ܬܪܹ̈ܝܢ ܡܲܓܪ̈ܵܝܵܬܹܐ: ܕܗܵܘܹܐ ܟܠ ܚܲܕ݇ ܡܸܢܲܝܗܝ ܦܸܬܝܵܐ ܐܲܝܟܼ ܠܲܚܬܵܐ ܕܐܝܼܕܵܐ ܚܲܕ݇ ܩܵܬܝܼ ܘܚܲܕ݇ ܩܵܐ ܝܸܡܝܼ. ܘܬܵܪܸܨ ܣܟܝܼܢܝܵܬܹ̈ܐ: ܩܵܐ ܩܛܥܵܝܬܵܐ ܕܩܲܪܩܸܦܬܲܢ. ܘܬܵܪܸܨ ܚܲܨܝܼܢܹ̈ܐ: ܕܦܵܝܫܝܼ ܕܘܼܩܕܸܩܹ̈ܐ ܓܲܝ̈ـܲܢ [ܩܘܼܪܨܘܼܠܬܵܐ]. ܘܬܵܪܸܨ ܦܪܸ̈ܙܠܹܐ ܠܸܚܪܵܛܵܐ ܥܲܝܢ̈ـܲܢ ܘܒܸܒܸܠܝܵܬܹ̈ܐ ܕܥܲܝܢ̈ـܲܢ: ܘܦܪܸ̈ܙܠܹܐ ܐ݇ܚܹܪ̈݇ܢܹܐ ܕܫܲܠܓܝܼ ܟܵܟ̈ـܲܢ: ܘܬܵܪܸܨ ܦܪܸ̈ܙܠܹܐ ܐ݇ܚܹܪ̈݇ܢܹܐ: ܕܩܲܛܥܝܼ ܒܝܼܲܝܗܝ ܠܸܫܵܢ̈ـܲܢ. ܟܲܠܒܵܬܹ̈ܐ ܕܦܝܼܫܝܼ ܫܩܝܼܠܹ̈ܐ ܒܝܼܲܝܗܝ ܟܵܟ̈ـܲܢ ܘܓܲܪ̈ܣܝܼܠܲܢ. ܘܬܵܪܸܨ ܡܸܣܪܸ̈ܩܝܵܬܹܐ ܕܦܪܸܙܠܵܐ ܩܵܐ ܕܸܦܢ̈ܵܬܲܢ. ܘܬܵܪܸܨ ܩܵܘܕܹ̈ܐ ܠܐܝܼܕ̈ܵܬܲܢ ܘܐܲܩ̈ܠܵܬܲܢ. ܘܬܵܪܸܨ ܟܘܼܪܣܝܼ ܕܒܪܸܢܓ̰: ܘܥܒ̣ܘܿܕ ܒܝܼـܹܗ ܬܠܵܬ݇ܐ ܒܸܙܥܵܙܹ̈ܐ ܓܘܼܪܹ̈ܐ. ܘܬܵܪܸܨ ܣܸܟܵܟܹ̈ܐ ܒܪܵܡܘܼܬܹܗ ܕܟܘܼܪܣܝܼ: ܘܬܵܪܸܨ ܒܪ̈ܝܼܫܲܝܗܝ ܣܵܟܵܟܹ̈ܐ ܕܒܸܪܸܢܓ̰: ܘܟܬܘܿܒ̣ ܠܥܸܠܸܠ ܒܪ̈ܝܼܫܲܝܗܝ: ܬܠܝܼܬܵܝܘܼܬܵܐ ܕܠܹܐ ܦܵܝܫܵܐ ܦܘܼܠܓ̣݇ܝܼܬܵܐ. ܠܹܐ ܦܵܝܫܵܬܝ ܦܘܼܠܓ̣݇ܝܼܬܵܐ ܥܲܠ ܡ̇ܢ ܕܩܵܪܹܐܠܵܟ̣ܝ ܒܕܸܟ̣ܝܘܼܬܵܐ. ܬܵܪܸܨ ܬܪܹ̈ܝܢ ܩܘܼܟ̣ܠܹ̈ܐ )ܡܸܢܕܝܼ ܝ݇ܠܹܗ ܕܟܹܐ ܓܲܡܫܝܼ ܒܝܼܘܼܗ ܦܲܓ̣ܪܹ̈ܐ ܕܐ݇ܢܵܫܹ̈ܐ ܡܵܪܵܐ ܕܓܢܵܗܵܐ(. ܘܬܪܹ̈ܝܢ ܢܝܼܣܲܪ̈ܝܵܬܹܐ: ܘܬܵܪܸܨ ܐܲܪܒܥܵܐ ܛܸܓ̣ܢܹ̈ܐ [ܗ̄:ܕ̄. ܗ̇ܘ ܡܸܢܕܝܼ ܕܟܹܐ ܩܵܠܝܼ ܥܲܠܘܼܗ] ܘܕܘܼܟܬܵܐ ܓܘܼܪܬܵܐ ܕܡܲܫܚܲܢܬܵܐ. ܘܥܒ̣ܘܿܕ ܐܝܼܕܵܬܹ̈ܐ ܕܦܪܸܙܠܵܐ: ܕܦܵܝܫܝܼ ܚܸܙܝܹ̈ܐ ܒܝܼܲܝܗܝ ܡܵܐܢܹ̈ܐ ܕܝܼܲܢ ܓܵܘܵܢܵܐܝܼܬ ܐܲܢܹ̈ܐ ܡܵܐܢܹ̈ܐ ܬܵܪܸܨܠܗ݇ܘܿܢ ܩܵܬܲܢ ܩܵܐ ܓ̰ܘܼܢܓ̰ܵܪܹ̈ܐ: ܘܬܵܪܸܨ ܟܠ ܡܸܢܕܝܼ ܐܲܢ݇ܬܿ ܕܝܵܕܥܸܬܿ ܡ̣ܢ ܠܸܒܘܼܟܼ. ܗܵܝܓܵܗ ܟܲܕ ܫܡܸܥܠܹܗ ܩܲܝܢܵܝܵܐ ܐ݇ܡܸܪܹܗ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܡܵܪܝܼ ܕܲܝܵܢܵܐ: ܠܵܐ ܫܡܸܥܠܝܼ ܡ̣ܢ ܩܲܕ݇ܡܵܝܬܵܐ ܘܠܵܐ ܡ̣ܢ ܐܲܒ̣ܵܗ̈ܝܼ: ܓ̰ܘܼܢܓ̰ܵܪܹ̈ܐ ܡܲܪܝܼܪܹ̈ܐ ܐܲܝܟܼ ܕܐܲܢܹ̈ܐ. ܘܠܵܐ ܙܹܐ ܐܲܝܟܼ ܕܐܵܗܵܐ ܥܵܩܸܠܕܵܪܘܼܬܵܐ. ܘܠܹܐ ܡܵܨܸܢ ܬܲܪܨܸܢ ܐܲܝܟܼ ܕܐܲܢܹ̈ܐ ܡܵܐܢܹ̈ܐ: ܩܵܐ ܓ̰ܘܼܢܓ̰ܵܪܵܐ ܕܐܵܗܵܐ ܝܵܠܵܕ݇ܐ. ܐܝܼܢܵܐ ܫܵܕܸܪ ܠܡܕܝܼܢ݇ܬܵܐ ܕܛܲܥܘܝܼ ܒܵܬ݇ܪ ܐܘܼܡܵܢܹ̈ܐ [ܣܲܢܥܲܟܵܪܹ̈ܐ]: ܐܵܢܵܐ ܠܹܐ ܝܵܕܥܸܢ ܕܬܲܪܨܸܢ ܐܲܝܟܼ ܕܐܲܢܹ̈ܐ ܦܪܸ̈ܙܠܹܐ. ܘܫܘܼܕܸܪܹܗ ܕܲܝܵܢܵܐ: ܘܡܘܼܬ݇ܝܼܠܹܗ ܐܘܼܡܵܢܹ̈ܐ. ܥܒ̣ܸܕܠܗ݇ܘܿܢ ܩܵܘܠܵܐ ܒܗܹܡܸܙܡܵܢ ܕܒܸܬ ܬܲܪܨܝܼܠܗ݇ܘܿܢ ܐܲܢܹ̈ܐ ܡܵܐܢܹ̈ܐ ܒܡܸܬܚܵܐ ܕܐܲܪܒܥܝܼܢ ܝܵܘܡܵܢܹ̈ܐ.
ܘܫܘܼܕܸܪܹܗ ܕܲܝܵܢܵܐ ܠܝܵܠܵܕ݇ܐ ܠܒܹܝܬ ܐܲܣܝܼܪܹ̈ܐ: ܘܡܵܠܘܿܦܹܐ ܗ݇ܘܼܵܐ ܛܘܼܒ̣ܵܢܵܐ ܩܵܐ ܕܐܵܢܝܼ ܕܝܼܗ݇ܘܼܵܘ ܓܵܘ ܒܹܝܬ ܐܲܣܝܼܪܹ̈ܐ: ܕܗܵܘܝܼ ܗ݇ܘܼܵܘ ܒܡܸܢܝܵܢܵܐ ܕܐܲܪܒܲܥܡܵܐܐ ܘܬܠܵܬܝܼܢ ܓܲܒ̣ܪܹ̈ܐ. ܘܗܘܼܡܸܢܘܿܢ ܒܡܵܪܝܵܐ ܘܐ݇ܡܸܪܘܿܢ: ܣܲܪܲܣܬܘܼܬܵܐ ܡܵܪܝܵܐ ܝ݇ܠܹܗ ܠܐܵܒܲܕ: ܕܟܹܐ ܥܵܒ̣ܸܕ ܥܵܓ̰ܝܼܒܘܼܝܵܬܹ̈ܐ ܘܟܹܐ ܢܵܛܸـܪ ܠܐܵܢܝܼ ܕܟܹܐ ܡܗܲܝܡܸܢܝܼ ܒܝܼܘܼܗܝ. ܘܐܲܚܢܲܢ ܡܗܲܝܡܘܼܢܹܐ ܝ݇ܘܲܚ ܒܝܼܘܼܟܼ ܝܵܐ ܡܵܪܝܵܐ: ܕܦܘܼܛܪܸܡܠܲܢ ܠܒܲܝܬܵܐ ܕܚܲܝܹ̈ܐ ܕܫܵܦܵܩܲܬܘܼܟܼ. ܐܝܼܢܵܐ ܛܘܼܒ̣ܵܢܵܐ ܩܘܼܪܝܵܩܘܿܣ ܦܝܵܫܵܐ ܗ݇ܘܼܵܐ ܚܘܼܠܸܢܵܐ ܒܪܘܼܚܵܐ: ܡܣܵܒܵܒ ܫܪܹܐܠܵܗ̇ ܫܵܦܵܩܲܬ ܥܲܠ ܕܐܵܢܝܼ ܕܐܝܼܢܵܐ ܓܵܘ ܒܹܝܬ ܐܲܣܝܼܪܹ̈ܐ. ܘܫܘܼܕܸܪܹܗ ܕܲܝܢܵܐ ܡܘܼܬ݇ܝܵܝܠܗ݇ܘܿܢ ܠܡܵܐܢܹ̈ܐ: ܘܫܘܼܕܸܪܹܗ ܘܩܪܹܐܠܹܗ ܐܘܼܦ ܠܛܘܼܒ̣ܵܢܵܐ. ܘܐ݇ܡܸܪܹܗ ܩܵܐ ܝܵܠܵܕ݇ܐ: ܠܵܐ ܚܲܫܒ̣ܸܬܿ ܒܓܵܢܘܼܟܼ ܕܗܵܢܵܓܘܼܬܵܐ ܒܸܥܒ̣ܵܕܵܐ ܝ݇ܘܸܢ ܥܲܡܘܼܟܼ. ܐܝܼܢܵܐ ܝܵܠܵܕ݇ܐ ܩܲܕܝܼܫܵܐ ܐ݇ܡܸܪܹܗ: ܦܵܬܵܢܵܐ ܕܠܵܐ ܛܲܥܡܵܐ: ܩܵܡܘܿܕܝܼ ܒܹܐܟ̣ܵܠܵܐ ܝ݇ܘܸܬܿ ܓܲܦܹ̈ܐ ܥܲܠܝܼ؟ ܕܗܵܐ ܐܵܢܹ̈ܐ ܡܵܐܢܹ̈ܐ ܝ݇ܢܵܐ ܕܐ݇ܡܸܪܝܼ ܐܸܠܵܘܟ̣ܘܿܢ (ܕܦܵܝܫܝܼ ܬܘܼܪ̈ܨܹܐ). ܘܐ݇ܡܸܪܹܗ ܕܲܝܵܢܵܐ: ܐܵܗܵܐ ܚܲܪܵܫܵܐ ܝ݇ܠܹܗ. ܐ݇ܡܸܪܹܗ ܛܘܼܒ̣ܵܢܵܐ: ܐܸܢ ܡܐܵܐ ܐܲܝܟܼ ܕܐܲܢܹ̈ܐ ܥܲܒ̣ܕܸܬܿ: ܒܸܬ ܓ̣ܲܠܒܸܢ ܐܸܠܘܼܟܼ ܝܵܐ ܟܵܦܘܿܪܵܐ ܒܗܲܝܲܪܬܵܐ ܕܐܝܼܬܠܝܼ. ܠܹܐ ܝ݇ܘܸܢ ܒܸܙܕܲܥܝܵܐ ܡ̣ܢ ܐ݇ܟ̣ܵܠܬܵܐ ܕܓܲܦ̈ܘܼܟܼ: ܕܝܼܫܘܿܥ ܡܫܝܼܚܵܐ ܗܲܝܸܪܵܢܝܼ ܝ݇ܠܹܗ. ܐ݇ܡܸܪܹܗ ܕܲܝܵܢܵܐ: ܓܪܸܥܡܘܿܢ ܠܗ݇ܘܿܢ ܘܢܫܘܿܛܘܿܢ ܓܸܠܕܵܐ ܕܪܹ̈ܫܲܝܗܝ. ܘܓ̰ܲܡܸܥܡܘܿܢ ܓܘܼܡܪܹ̈ܐ ܕܢܘܼܪܵܐ: ܕܝܵܩܕܝܼ ܘܐܵܢܝܼ ܚܵܝܹ̈ܐ. ܘܒܓ̰ܲܠܕܘܼܬܵܐ ܟ̰ܡܸܥܠܗ݇ܘܿܢ ܐܵܢܝܼ ܓܘܼܡܪܹ̈ܐ ܕܢܘܼܪܵܐ: ܘܗ݇ܘܹܐܠܗ݇ܘܿܢ ܟܠܝܼܠܹ̈ܐ ܒܪܹ̈ܫܲܝܗܝ: ܠܲܓ̰ܠܸܓ̰ܝܼ ܗ݇ܘܼܵܘ ܐܲܝܟܼ ܠܵܘܓ̰̈ـܹܐ ܕܫܸܡܫܵܐ. ܘܦܝܼܫܠܹܗ ܦܬܝܼܚܵܐ ܒܹܝܬ ܐܲܣܝܼܪܹ̈ܐ ܒܢܝܼܫܲܢܩܵܐ ܕܥܸܠܵܝܵܐ: ܘܦܠܝܼܛܠܗ݇ܘܿܢ ܘܐ݇ܬܹܐܠܗ݇ܘܿܢ ܐܵܢܝܼ ܐܲܪܒܲܥܡܐܵܐ ܘܬܠܵܬܝܼܢ ܓܲܒ̣ܪܹ̈ܐ ܟܲܕ ܐܲܝܟܼ ܓ̰ܲܡܥ ܡܲܩܘܘܼܚܹܐ ܗ݇ܘܼܵܘ ܘܒܹܐܡܵܪܵܐ: ܡܵܘܕܘܼܝܹܐ ܝ݇ܘܲܚ ܒܐܲܠܵܗܵܐ ܥܸܠܵܝܵܐ. ܘܗ̇ܘ ܕܥܒ̣ܸܕܠܹܗ ܟܠ ܛܲܝܒܘܼܬܹܗ. ܐ݇ܡܸܪܹܗ ܕܲܝܵܢܵܐ: ܡܘܼܕܝܼ ܚܙܹܐܠܵܘܟ̣ܘܿܢ ܕܗܲܡܸܢܝܼܬܘܿܢ؟ ܐ݇ܡܸܪܘܿܢ ܛܘܼܒ̣ܵܢܹ̈ܐ: ܝܵܐ ܟܵܦܘܿܪܵܐ ܘܕܠܵܐ ܗܵܘܢܵܐ: ܠܹܐ ܝ݇ܘܸܬܿ ܒܸܚܙܵܝܵܐ ܠܟܠܝܼܠܹ̈ܐ ܕܢܲܨܝܼܚܹ̈ܐ ܕܡܘܼܬܒ̣ܵܐ ܝ݇ܢܵܐ ܒܪܹ̈ܫܲܝܗܝ: ܐܝܼܢܵܐ ܐܲܢ݇ܬܿ ܒܵܩܘܿܪܲܢ ܝ݇ܘܸܬܿ ܕܡܘܿܕܝܼ ܚܙܹܐܠܵܘܟ̣ܘܿܢ ܕܗܲܡܸܢܝܼܬܘܿܢ؟ ܘܦܘܼܩܸܕܠܹܗ ܕܲܝܵܢܵܐ: ܕܦܵܠܛܝܼܠܗ݇ܘܿܢ ܠܒ̣ܲܕܲܪ ܡ̣ܢ ܡܕܝܼܢ݇ܬܵܐ: ܘܫܵܩܠܝܼ ܠܪܹ̈ܫܲܝܗܝ: ܘܪܫܸܡܠܗ݇ܘܿܢ ܥܲܠ ܓܵܢܲܝܗܝ ܒܢܝܼܫܲܢܩܵܐ ܕܨܠܝܼܒ̣ܵܐ: ܘܫܩܸܠܗ݇ܘܿܢ ܛܘܼܒ̣ܵܢܹ̈ܐ ܟܠܝܼܠܵܐ ܕܓ̣ܵܠܝܼܒܘܼܬܵܐ ܒܐܲܪܒܲܥܣܲܪ ܒܟܵܢܘܿܢ ܩܲܕ݇ܡܵܝܵܐ.
ܗܵܝܓܵܗ ܐ݇ܡܸܪܹܗ ܕܲܝܵܢܵܐ. ܟܲܕ ܫܘܼܕܸܢܵܐ ܘܟܪܝܼܒܵܐ ܥܲܠ ܝܵܠܵܕ݇ܐ: ܘܦܘܼܩܸܕܠܹܗ ܠܚܸܠܡܲܬܟܵܪ̈ܘܼܗܝ. ܘܡܘܼܬ݇ܝܼܠܗ݇ܘܿܢ ܟܘܼܪܣܝܼ: ܘܛܝܼܣܠܗ݇ܘܿܢ ܣܸܟܬܵܐ ܒܪܘܼܦ̮ܫܘܼܗܝ ܕܝܲܡܝܼܢܵܐ: ܗܲܠ ܕܡܘܼܒܝܸܢܵܐ ܡ̣ܢ ܥܸܩܒܹܗ ܕܐܲܩܠܘܼܗܝ. ܘܛܝܼܣܠܗ݇ܘܿܢ ܣܸܟܬܵܐ ܒܪܘܼܦ̮ܫܹܗ ܕܣܸܡܵܠܵܐ ܗܲܠ ܠܥܸܩܒܹܗ ܕܐܲܩܠܘܼܗܝ. ܘܣܸܟܬܵܐ ܐ݇ܚܹܪ݇ܬܵܐ ܛܝܼܣܵܠܗ݇ܘܿܢ ܓܵܘ ܩܲܪܩܸܦܬܹܗ: ܗܲܠ ܡܘܼܒܸܝܢܵܐ ܡ̣ܢ ܒܪܵܐ ܓ̰ܘܼܪܬܹܗ [حالب]. ܗܵܝܓܵܗ ܐ݇ܡܸܪܹܗ ܕܲܝܵܢܵܐ: ܐܸܢ ܐܝܼܬܠܘܼܟܼ ܐܲܠܵܗܵܐ ܫܲܪܝܼܪܵܐ: ܕܐܵܬܹܐ ܦܵܠܸܛܠܘܼܟܼ ܡ̣ܢ ܐܝܼܕܵܬ̈ܝܼ. ܘܒܓ̰ܲܠܕܘܼܬܵܐ ܐ݇ܬܹܐܠܹܗ ܡܲܠܲܐܟ̣ܵܐ ܡ̣ܢ ܫܡܲܝܵܐ: ܫܡܝܼܛܵܝܠܹܗ ܣܸܟܵܟܹ̈ܐ ܡ̣ܢ ܝܵܠܵܕ݇ܐ: ܘܛܝܼܣܵܝܠܹܗ ܒܩܕܵܠܵܐ ܕܕܲܝܵܢܵܐ. ܡܘܼܩܘܸܚܠܹܗ ܕܲܝܵܢܵܐ ܘܐ݇ܡܸܪܹܗ: ܐܵܕܝܼܵܐ ܝ݇ܕܸܥܠܝܼ ܕܐܝܼܬ ܐܲܠܵܗܵܐ ܚܵܝܵܐ ܠܟܪܸ̈ܣܛܝܵܢܹܐ. ܘܐ݇ܡܸܪܹܗ ܠܛܘܼܒ̣ܵܢܵܐ: ܨܵܠܝܼ ܨܠܘܿܬܵܐ ܒܘܼܬ ܕܝܼܝܼ: ܘܡܲܢܝܸܚܸܢ: ܘܡܗܲܝܡܘܼܢܹܐ ܝ݇ܘܸܢ ܒܐܲܠܵܗܘܼܟܼ: ܐ݇ܡܸܪܹܗ ܐܸܠܹܗ ܛܘܼܒ̣ܵܢܵܐ: ܒܸܕܥܵܝܵܐ ܝ݇ܘܸܢ ܕܠܹܐ ܡܗܲܝܡܸܢܸܬܿ: ܐܝܼܢܵܐ ܡ̣ܢ ܣܵܒܵܒ ܕܐܵܢܝܼ ܕܐܝܼܢܵܐ ܐܵܕܝܼܵܐ ܕܩܲܘܘܼܡܹܐ ܝ݇ܢܵܐ ܕܣܲܪܲܣܬ ܒܸܗܘܵܝܵܐ ܝ݇ܢܵܐ ܒܸܬ ܗܵܘܹܝܬܿ ܪܲܗܲܬ ܘܡܲܢܝܸܚܸܬܿ. ܦܘܼܫܸܛܠܹܗ ܛܘܼܒ̣ܵܢܵܐ ܐܝܼܕܹܗ: ܘܡܘܼܪܡܵܝܠܹܗ ܣܸܟܵܟܹ̈ܐ ܡ̣ܢ ܩܕܵܠܹܗ ܕܕܲܝܵܢܵܐ. ܘܫܘܼܪܹܐܠܹܗ ܡܲܩܘܘܼܚܹܐ: ܘܡܫܵܒܘܼܚܹܐ ܘܒܹܐܡܵܪܵܐ: ܫܘܼܒ̣ܚܵܐ ܐܸܠܵܘܟ̣ܘܿܢ ܐܲܪܦܵܩ ܘܐܵܦܲܠܘܿܢ ܘܐܵܪܝܼܘܿܣ ܘܙܘܿܣ: ܕܒܘܼܬ ܕܝܼܲܝܗܝ ܐܝܼܬ ܫܠܵܡܵܐ ܓܵܘ ܕܘܼܢܝܹܐ: ܘܐܲܚܬܘܿܢ ܩܲܡ ܡܲܚܝܼܬܘܿܢ ܠܝܼ: ܐ݇ܡܸܪܹܗ ܛܘܼܒ̣ܵܢܵܐ ܐܸܠܹܗ: ܐܵܕܝܼܵܐ ܕܚܫܝܼܒ̣ܠܘܼܟܼ ܕܓ̣ܠܸܒܠܘܼܟܼ: ܒܸܬ ܥܵܒ̣ܕܸܬܿ ܗܘܼܟܡܵܐ ܒܐ݇ܚܵܪܬܵܐ.
ܘܦܘܼܩܸܕܠܹܗ ܕܲܝܵܢܵܐ: ܕܡܲܝܬ݇ܝܼ ܠܗ݇ܘܿܢ ܐܵܢܝܼ ܡܵܐܢܹ̈ܐ ܐ݇ܚܹܪ̈݇ܢܹܐ ܕܓ̰ܘܼܢܓ̰ܵܪܹ̈ܐ. ܘܡܲܬܒ̣ܝܼܠܗ݇ܘܿܢ ܩܵܕ݇ܡܲܝܗܝ. ܘܦܘܼܩܸܕܠܹܗ ܕܡܸܕܪܹܐ ܦܵܝܫܝܼ ܓ̰ܘܼܢܓ̰ܸܪܹ̈ܐ ܒܝܼܲܝܗܝ ܩܲܕܝܼܫܹ̈ܐ: ܘܐ݇ܡܸܪܹܗ: ܐܵܕܝܼܵܐ ܕܐܵܬܹܐ ܡܫܝܼܚܵܐ ܘܦܵܨܹܐܠܵܘܟ̣ܘܿܢ ܡ̣ܢ ܐܝܼܕܵܬ̈ܝܼ. ܒܝܼـܹܗ ܡܓ̰ܲܢܓ̰ܘܼܪܹܐ ܗ݇ܘܵܘ ܠܛܘܼܒ̣ܵܢܵܐ: ܡ̣ܢ ܪܹܫܹܗ ܘܗܲܠ ܠܛܸܦܪܹ̈ܐ ܕܐܲܩܠܵܬ̈ܘܼܗܝ. ܘܡܸܕܪܹܐ ܒܓ̰ܲܠܕܘܼܬܵܐ ܦܘܼܩܸܕܠܹܗ ܕܲܝܵܢܵܐ: ܕܡܲܝܬ݇ܝܼ ܠܗ݇ܘܿܢ ܡܵܐܢܹ̈ܐ ܐ݇ܚܹܪ̈݇ܢܹܐ ܕܓ̰ܘܼܢܓ̰ܵܪܵܐ: ܘܐ݇ܡܸܪܹܗ: ܡܲܝܬ݇ܝܼܡܘܿܢ ܣܟܝܼܢܝܵܬܹ̈ܐ: ܘܩܛܘܿܠܘܿܢ ܠܗ݇ܘܿܢ ܒܚܕܵܐ ܣܵܥܲܬ. ܘܡܘܼܬ݇ܝܼܠܗ݇ܘܿܢ ܣܟܝܼܢܝܵܬܹ̈ܐ: ܘܫܩܸܠܹܗ ܕܲܝܵܢܵܐ ܚܲܕ݇ ܡܸܢܲܝܗܝ ܘܐ݇ܡܸܪܹܗ: ܕܒܚܕܵܐ ܡܚܲܝܬܵܐ ܕܩܵܛܸܠ ܗ݇ܘܼܵܐ ܠܹܗ ܠܝܵܠܵܕ݇ܐ. ܐ݇ܬܹܐܠܵܗ̇ ܐܝܼܕܹܗ ܒܲܪܩܘܼܒ̣ܠ ܦܲܐܬܹܗ؛ ܘܡܚܹܐܠܵܗ̇ ܥܲܠ ܪܘܼܦ̮ܫܹܗ: ܘܐ݇ܙܸܠܹܗ ܘܢܦܸܠܹܗ. ܘܬܘܼܡܸܡܠܵܗ̇ ܗ̇ܝ ܕܟܬܝܼܒ̣ܵܬܵܐ ܝ݇ܠܵܗ̇: ܕܣܲܝܦܲܝܗܝ ܒܸܬ ܥܵܒ̣ܸܪ ܒܠܸܒܲܝܗܝ: ܩܸܫܝܵܬܲܝ̈ܗܝ ܒܸܬ ܫܲܡܛܝܼ̈. ܐ݇ܡܸܪܹܗ ܕܲܝܵܢܵܐ: ܚܲܝܹ̈ܐ ܕܐܲܠܵܗܹ̈ܐ: ܕܚܲܪܵܫܘܼܬܵܐ ܪܵܒܵܐ ܐܝܼܬ ܒܐܵܗܵܐ ܝܲܠܘܼܕܵܐ: ܝܵܠܵܕ݇ܐ ܩܲܕܝܼܫܵܐ ܐ݇ܡܸܪܹܗ: ܚܲܪܵܫܘܼܬܵܐ ܠܹܐ ܝܵܕܸܥ ܝ݇ܢܵܐ: ܐܝܼܢܵܐ ܚܲܝܠܹܗ ܝ݇ܠܹܗ ܕܡܫܝܼܚܵܐ ܗܲܝܘܼܪܝܼ. ܐ݇ܡܸܪܹܗ ܕܲܝܵܢܵܐ: ܡܲܝܬ݇ܝܼܡܘܿܢ ܠܝܼ ܩܘܼܟ̣ܠܵܝܹ̈ܐ: ܘܐ݇ܣܘܿܪܘܼܢ ܠܗ݇ܘܿܢ. ܘܡܘܼܬ݇ܝܼܠܗ݇ܘܿܢ ܩܘܼܟ̣ܠܵܝܹ̈ܐ: ܘܚܠܝܼܨܵܝܠܗ݇ܘܿܢ ܥܲܠ ܛܘܼܒ̣ܵܢܹ̈ܐ: ܗܲܠ ܕܩܘܼܪܒܵܐ ܗ݇ܘܼܵܘ ܦܲܓ̣ܪ̈ܲܝܗܝ ܠܦܝܵܫܵܐ ܓ̰ܕܝܼܩܵܐ ܠܬܵܠܬ݇ܐ ܣܵܗ݇ܡܵܢܹ̈ܐ. ܗܵܝܓܵܗ ܝܵܠܵܕ݇ܐ ܩܲܕܝܼܫܵܐ ܡܘܼܪܸܡܠܹܗ ܥܲܝܢ̈ܘܼܗܝ ܠܸܫܡܲܝܵܐ ܘܨܘܼܠܹܐܠܹܗ ܨܠܘܿܬܵܐ. ܘܗܵܕܟ̣ܵܐ ܐ݇ܡܸܪܹܗ: ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ: ܕܫܡܲܝܵܐ ܘܐܲܪܥܵܐ ܒܸܫܥܵܫܵܐ ܝ݇ܢܵܐ ܡ̣ܢ ܠܵܘܓ̰ܵܐ ܕܓܘܼܪܘܼܬܘܼܟܼ: ܗ̇ܘ ܕܚܲܝܠܵܢܵܐ ܝ݇ܠܹܗ ܘܩܲܕܝܼܫܵܐ ܫܸܡܹܗ: ܚܙܝܼ ܝܵܐ ܡܵܪܝܼ ܩܘܼܒܸܠܝܼ ܐܲܢܹ̈ܐ ܟܠܲܝܗܝ ܐܘܼܠܨܵܢܹ̈ܐ: ܕܫܲܩܠܸܢ ܟܠܝܼܠܵܐ ܕܓ̣ܵܠܝܼܒܘܼܬܵܐ: ܘܐܵܕܝܼܵܐ ܒܸܫܩܵܠܵܐ ܝ݇ܘܸܬܿ ܠܓܵܢܝܼ. ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ: ܚܙܝܼ ܕܩܘܼܒܸܠܝܼ ܐܲܢܹ̈ܐ ܟܠܲܝܗܝ: ܗܲܒ̣݇ܠ ܠܝܼ ܡܵܪܝܼ ܕܓ̣ܲܠܒܸܢܹܗ ܕܸܫ̰ܡܸܢ: ܘܕܸܥܪܸܢ ܘܡܲܫ݇ܟ̰ܚܸܢ ܚܲܕܘܼܬܵܐ ܩܵܕ݇ܡܘܼܟܼ: ܡܲܠܟܵܐ ܕܟܠܲܝܗܝ ܥܵܠܡܹ̈ܐ. ܗܵܝܓܵܗ ܩܵܠܵܐ ܚܲܝܠܵܢܵܐ ܐ݇ܬܹܐܠܹܗ ܡ̣ܢ ܫܡܲܝܵܐ ܐ݇ܡܸܪܹܗ ܐܸܠܹܗ: ܬܵܐܠܘܼܟܼ ܝܵܐ ܢܲܨܝܼܚܵܐ ܘܦܠܘܿܫ ܘܓ̣ܠܘܿܒ: ܘܫܩܘܿܠ ܗܵܩܘܼܬܹܗ ܕܦܠܵܫܘܼܟܼ: ܘܗܵܝܓܵܗ ܒܸܬ ܐܵܙܹܠ݇ܬܿ ܘܡܲܢܚܸܦܸܬܿ ܠܹܗ ܠܕܲܝܵܢܵܐ.
ܗܵܝܓܵܗ ܦܘܼܩܸܕܠܹܗ ܕܲܝܵܢܵܐ ܥܵܘܵܠܵܐ: ܘܡܘܼܬܸܒ̣ܠܹܗ ܢܝܼܣܲܪ̈ܝܵܬܹܐ ܥܲܠ ܦܲܓ̣ܪ̈ܲܝܗܝ ܕܢܲܨܝܼܚܹ̈ܐ. ܗܵܝܓܵܗ ܕܸܥܪܗ݇ܘܿܢ ܐܵܢܝܼ ܢܝܼܣܲܪ̈ܝܵܬܹܐ ܘܩܵܐ ܕܐܵܢܝܼ ܕܕܒ̣ܝܼܩܲܝܗܝ ܗ݇ܘܼܵܘ ܡܲܕܥܘܼܝܹܐ ܝܼܗ݇ܘܼܵܘ. ܣܵܒܵܒ ܠܹܐ ܗ݇ܘܼܵܘ ܒܝܼܕܵܥܝܵܐ: ܕܦܲܓ̣ܪ̈ܲܝܗܝ ܕܩܲܕܝܼܫܹ̈ܐ ܠܹܐ ܦܵܝܫܝܼ ܚܘܼܙܕܸܓܹܐ. ܐ݇ܡܸܪܹܗ ܝܵܠܵܕ݇ܐ ܩܲܕܝܼܫܵܐ: ܐܸܢ ܒܣܵܡܘܼܟܼ ܝ݇ܠܵܗ̇ ܕܢܲܣܪܸܬܿܠܲܢ: ܥܒ̣ܘܿܕܠܘܼܟܼ ܢܝܼܣܵܪܬܵܐ ܕܩܲܝܣܵܐ: ܘܗܵܝܓܵܗ ܢܲܣܪܸܬܿܠܲܢ. ܘܗܵܝܓܵܗ ܦܘܼܩܸܕܠܹܗ ܕܲܝܵܢܵܐ: ܘܗ݇ܘܹܐܠܹܗ ܗ̇ܘ ܡܸܢܕܝܼ ܕܐ݇ܡܸܪܹܗ ܩܲܕܝܼܫܵܐ: ܗܵܝܓܵܗ ܦܝܼܫܠܗ݇ܘܿܢ ܢܣܝܼܪܹ̈ܐ ܢܲܨܝܼܚܹ̈ܐ. ܘܒܥܕܵܢܵܐ ܕܦܝܼܫܠܗ݇ܘܿܢ ܢܣܝܼܪܹ̈ܐ ܩܲܕܝܼܫܹ̈ܐ: ܦܘܼܩܸܕܠܹܗ ܕܕܵܪܝܼ ܠܗ݇ܘܿܢ ܦܲܓ̣ܪ̈ܲܝܗܝ ܒܛܸܓ̣ܢܹ̈ܐ: ܕܩܵܠܝܼܠܗ݇ܘܿܢ ܒܡܸܠܚܵܐ ܘܡܸܫܚܵܐ: ܟܲܕ ܒܹܐܡܵܪܵܐ ܗ݇ܘܼܵܐ: ܐܲܝܟܼ ܕܦܘܼܩܸܕܠܹܗ ܒܘܼܬ ܐܲܠܵܗܹ̈ܐ ܕܝܼܲܢ ܕܦܵܝܫܝܼ ܡܘܼܪ̈ܟܸܟ̣ـܹܐ ܒܡܸܫܚܵܐ: ܗܵܕܟ̣ܵܐ ܐܘܼܦ ܐܲܚܬܘܿܢ ܥܒ̣ܘܿܕܘܿܢ. ܐܵܗܵܐ ܕܲܝܵܢܵܐ ܟܸܠܝܵܐ ܗ݇ܘܼܵܐ ܠܟܸܣ ܛܸܓ̣ܢܵܐ: ܗܲܠ ܕܗܘܹܐܠܗ݇ܘܿܢ ܦܲܓ̣ܪ̈ܲܝܗܝ ܕܣܵܗܕܹ̈ܐ ܐܲܝܟܼ ܩܸܛܡܵܐ. ܗܵܝܓܵܗ ܐ݇ܙܸܠܹܗ ܕܲܝܵܢܵܐ ܘܐ݇ܡܸܪܹܗ ܠܕܘܿܡܲܣܛܝܼܩܘܿܣ. ܒܪܵܒܵܐ ܟܸܟ̰ܚܵܐ ܘܦܠܵܫܵܐ ܓܘܼܪܵܐ ܪܘܼܦܝܼܠܲܢ ܠܐܵܗܵܐ ܝܵܠܵܕ݇ܐ: ܘܗ̇ܘ ܡ̣ܢ ܫܪܵܪܹܗ ܘܩܘܼܝܘܼܬܹܗ ܠܵܐ ܗ݇ܘܹܐܠܹܗ ܪܸܦܝܵܐ. ܘܦܘܼܩܸܕܠܹܗ ܡܸܕܪܹܐ ܕܪܲܦܝܼܠܹܗ ܩܵܐ ܟܲܠܒܹ̈ܐ. ܐܝܼܢܵܐ ܕܘܿܡܲܣܛܝܼܩܹܗ ܐ݇ܡܸܪܹܗ ܐܸܠܹܗ: ܐܲܝܟܼ ܩܵܐ ܕܫܲܦܪܵܐ ܠܐܵܙܵܕܘܼܬܘܼܟܼ ܐܵܗܵܐ ܥܒ̣ܸܕܠܘܼܟܼ. ܗܵܝܓܵܗ ܐ݇ܬܹܐܠܹܗ ܐܹܘܣܹܒ̣ܝܼܣ ܕܫܵܪܹܗ ܒܕܝܼܘܵܢ ܥܲܡ ܥܸܣܪܵܐ ܐܵܠܦܹ̈ܐ ܘܚܲܡܫܸܡܐܵܐ ܓܵܢܵܬܹ̈ܐ: ܘܚܲܡܫܸܡܐܵܐ ܐ݇ܚܹܪ̈݇ܢܹܐ ܐ݇ܙܸܠܗ݇ܘܿܢ ܒܵܬ݇ܪܹܗ. ܗܵܝܓܵܗ ܡܫܝܼܚܵܐ ܟܲܕ ܡܘܼܚܙܹܐܠܹܗ ܠܝܵܠܵܕ݇ܐ ܟܠܵܗ̇ ܡܲܠܟܘܼܬܵܐ: ܨܠܹܐܠܹܗ ܥܲܠ ܛܸܓ̣ܢܵܐ: ܘܫܩܝܼܠܲܝܗܝ ܠܗ݇ܘܿܢ ܦܲܓ̣ܪ̈ܲܝܗܝ ܕܩܲܕܝܼܫܹ̈ܐ ܡ̣ܢ ܛܸܓ̣ܢܵܐ: ܘܚܘܼܕܸܬܵܝܠܹܗ. ܘܝܘܼܗ݇ܒ̣ܸܠܹܗ ܒܝܼܲܝܗܝ ܪܘܼܚܵܐ ܕܚܲܝܹ̈ܐ ܘܚܲܝܠܵܐ ܫܡܲܝܵܢܵܐ: ܘܐ݇ܡܸܪܹܗ ܐܸܠܲܝܗܝ: ܪ݇ܚܘܿܫܘܿܢ ܘܡܲܢܚܸܦܘܼܢ ܠܕܲܝܵܢܵܐ ܟܵܦܘܿܪܵܐ. ܐܝܼܢܵܐ ܒܥܕܵܢܵܐ ܕܐ݇ܬܹܐܠܗ݇ܘܿܢ ܠܟܢܘܼܫܬܵܐ: ܠܵܐ ܦܝܼܫܠܵܗ̇ ܡܘܼܫ݇ܟ̰ܸܚܬܵܐ ܝܘܿܠܹܝܛܹܐ ܕܥܵܒ̣ܪܵܗ̇ ܗ݇ܘܼܵܐ ܒܲܝܢܵܬ ܪܸܒܘܼܬܵܐ [ܥܸܣܪܵܐ ܐܵܠܦܹ̈ܐ] ܓܵܢܵܬܹ̈ܐ ܕܓ̰ܸܡܥܝܹ̈ܐ ܗ݇ܘܼܵܘ. ܗܵܝܓܵܗ ܐ݇ܡܸܪܹܗ ܩܲܕܝܼܫܵܐ ܩܵܐ ܝܸܡܹܗ. ܝܸܡܝܼ ܫܒ̣ܘܿܩ ܠܝܼ ܥܲܠ ܐܲܪܥܵܐ. ܐܝܼܢܵܐ ܒܥܕܵܢܵܐ ܕܚܝܼܠܹܗ ܝܵܠܵܕ݇ܐ ܥܲܠ ܐܲܪܥܵܐ: ܠܒ̣ܝܼܫܠܹܗ ܚܲܝܠܵܐ ܡ̣ܢ ܪܘܼܚܵܐ ܕܩܘܼܕܫܵܐ: ܦܪܝܼܫܠܹܗ ܠܛܵܝܸܦܵܐ: ܘܕܒ̣ܝܼܩܵܠܹܗ ܠܝܸܡܹܗ ܒܐܝܼܕܘܼܗ̇: ܘܡܘܼܟܠܝܼܵܐ ܠܹܗ ܩܵܕ݇ܡ ܟܘܼܪܣܝܼ ܕܕܝܼܘܵܢ ܕܕܲܝܵܢܵܐ. ܘܐ݇ܡܸܪܹܗ ܐܸܠܹܗ: ܝܵܐ ܕܲܝܵܢܵܐ ܟܵܦܘܿܪܵܐ: ܒܝܼܕܵܥܝܵܐ ܝ݇ܘܸܬܿ ܐܸܠܲܢ ܕܡܵܢܝܼ ܝܑܼܘܲܚ؟ ܙܕܸܥܠܹܗ ܕܲܝܵܢܵܐ ܘܐ݇ܡܸܪܹܗ: ܕܠܹܐ ܝܵܕܥܸܢܵܘܟ̣ܘܿܢ: ܪ̈݇ܚܘܿܫܘܿܢ ܡܼܢ ܩܵܕ݇ܡܝܼ. ܗܵܝܓܵܗ ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܝܵܐ ܚܸܠܡܲܬܟܵܪܹܗ ܕܣܵܛܵܢܵܐ ܘܕܟܠܵܗ̇ ܐܵܣܟܵܪܹܗ: ܒܹܐܡܵܪܵܐ ܝ݇ܘܸܬܿ ܕܠܹܐ ܝܵܕܥܸܢܵܘܟ̣ܘܿܢ ܕܠܵܐ ܗܲܡܸܢܝܼ ܐܵܢܝܼ ܕܐܝܼܢܵܐ ܠܟܸܣܠܘܼܟܼ: ܠܹܐ ܝ݇ܘܲܚ ܐܲܚܢܲܢ ܐܵܢܝܼ ܕܩܲܡ ܢܲܣܪܸܬܿܠܲܢ ܘܩܲܡ ܩܵܠܸܬܿܠܲܢ: ܗܵܝܓܵܗ ܦܵܪܘܿܩܲܢ ܢܘܼܚܸܡܠܹܗ ܥܲܠܲܢ ܘܩܲܡ ܡܲܩܝܼܡܠܲܢ ܡ̣ܢ ܓܵܘ ܡܝܼܬܹ̈ܐ؟ ܘܒܓ̰ܲܠܕܘܼܬܵܐ ܡܘܼܩܘܸܚܠܗ݇ܘܿܢ ܐܵܢܝܼ ܪܲܒܘܼܬܵܐ ܕܓܵܢܵܬܹ̈ܐ ܘܐ݇ܡܸܪܘܿܢ: ܓܘܼܪܵܐ ܝ݇ܠܹܗ ܐܲܠܵܗܹܗ ܕܐܵܗܵܐ ܝܵܠܵܕ݇ܐ: ܕܗ̇ܘ ܕܢܘܼܚܸܡܠܹܗ ܘܡܘܼܩܸܡܠܹܗ ܡ̣ܢ ܓܵܘ ܡܝܼܬܹ̈ܐ.
ܗܵܝܓܵܗ ܕܲܝܵܢܵܐ ܡܘܼܩܘܸܚܠܹܗ ܘܐ݇ܡܸܪܹܗ: ܠܵܐ ܙܲܕܥܝܼܬܘܿܢ: ܐܲܢܹ̈ܐ ܟܠܲܝܗܝ ܒܕܘܼܓܠܵܐ ܦܝܼܫܠܗ݇ܘܿܢ ܦܠܝܼܚܹ̈ܐ: ܐܝܼܢܵܐ ܐܸܢ ܠܲܝܬܘܿܢ ܡܗܲܝܡܘܼܢܹܐ ܐܸܠܝܼ: ܒܸܬ ܛܲܠܒܸܢ ܡܸܢܲܝܗܝ ܚܲܕ݇ ܢܝܼܫܲܢܩܵܐ. ܕܐܸܢ ܗ̇ܘ ܡܵܨܹܐ ܕܐܵܡܸܪ: ܗܵܝܓܵܗ ܒܸܬ ܝܵܕܸܥ ܟܠ ܐ݇ܢܵܫܵܐ ܕܣܲܪܲܣܬ ܗ݇ܘܼܵܐ ܕܗܘܹܐܠܵܗ̇. ܐܝܼܢܵܐ ܩܲܕܝܼܫܵܐ ܩܘܼܪܝܵܩܘܿܣ ܐ݇ܡܸܪܹܗ: ܛܠܘܿܒ ܡ̣ܢ ܐܲܠܵܗܵܐ ܗ̇ܘ ܕܟܹܐ ܝܵܗ݇ܒ̣ܸܠ ܘܠܹܐ ܡܲܒܨܸܪ. ܐ݇ܡܸܪܹܗ ܕܲܝܵܢܵܐ: ܐܸܢ ܣܲܪܲܣܬ ܝ݇ܠܵܗ̇ ܩܝܼܡܠܵܘܟ̣ܘܿܢ ܡ̣ܢ ܓܵܘܵܐ ܕܡܝܼܬܹ̈ܐ: ܕܦܵܝܫܵܐ ܫܠܝܼܚܬܵܐ ܨܵܘܸܠܬܵܐ ܡ̣ܢ ܐܲܩܠܵܬ̈ܝܼ: ܘܗܵܘܝܵܐ ܚܲܕ݇ ܗܲܝܘܵܢ ܟ̰ܵܠܘܼܓ̰ܬܵܐ: ܡܸܕܪܹܐ ܕܸܥܪܵܗ̇ ܘܗܵܘܝܵܐ ܐܲܝܟܼ ܡ̣ܢ ܩܲܕ݇ܡܵܝܬܵܐ: ܕܗܲܝܡܸܢܲܚ ܕܐܘܼܦ ܐܲܚܬܘܿܢ ܩܝܼܡܠܵܘܟ̣ܘܿܢ ܡ̣ܢ ܓܵܘ ܡܝܼܬܹ̈ܐ. ܐܝܼܢܵܐ ܝܵܠܵܕ݇ܐ ܩܲܕܝܼܫܵܐ ܨܘܼܠܹܐܠܹܗ ܨܠܘܿܬܵܐ: ܘܗܵܕܟ̣ܵܐ ܐ݇ܡܸܪܹܗ ܓܵܘ ܨܠܘܿܬܹܗ: ܝܵܐ ܡܵܪܝܵܐ ܚܲܝܠܬܵܢܵܐ: ܕܒܥܵܩܸܠܕܵܪܘܼܬܘܼܟܼ ܒܪܹܐܠܘܼܟܼ ܫܡܲܝܵܐ: ܘܐܲܢ݇ܬܿ ܒܪܹܐܠܘܼܟܼ ܠܒܲܪܢܵܫܵܐ: ܘܝܘܼܗ݇ܒ̣ܸܠܘܼܟܼ ܐܸܠܹܗ ܪܘܼܚܵܐ ܘܚܲܝܹ̈ܐ. ܘܐܲܢ݇ܬܿ ܡܵܪܝܼ ܗܲܒ̣݇ܠܹܗ ܡܲܛܠܵܒܹܗ ܕܐܵܗܵܐ ܕܲܝܵܢܵܐ ܬܲܦܚܵܢܵܐ ܕܕܸܡܵܐ: ܘܕܝܵܕܥܝܼ ܟܠ ܒܲܪܢܵܫܵܐ: ܕܐܲܢ݇ܬܿ ܝ݇ܘܸܬܿ ܐܲܠܵܗܵܐ ܒܢܲܦ̮ܫܘܼܟܼ: ܘܕܝܵܕܥܝܼ ܟܠܲܝܗܝ ܐܵܢܝܼ ܘܦܵܪܡܝܼ ܕܒܪܝܼܬܵܐ ܕܐܲܠܵܗܵܐ ܝ݇ܠܵܗ̇: ܘܗ̇ܘ ܕܟܹܐ ܒܵܢܹܐ ܒܲܝܬܵܐ: ܠܹܐ ܗ݇ܘܼܵܐ ܩܲܕ݇ܡܵܝܬܵܐ ܐܵܣܵܣܹ̈ܐ ܝܲܢ ܒܸܢܝܲܬܹ̈ܐ ܕܒܲܝܬܵܐ ܟܹܐ ܡܲܬܒ̣ܝܼ ܕܗܵܘܝܼ ܩܘܼܝܹ̈ܐ ܓܘܼܕܵܢ̈ܘܼܗܝ: ܗܵܝܓܵܗ ܟܹܐ ܥܵܒ̣ܸܕ ܓܵܪܹܐ ܕܒܲܝܬܵܐ: ܗ̇ܝ ܕܝܼܠܵܗ̇ ܫܡܲܝܵܐ. ܐܘܼܦ ܙܹܐ ܡܘܼܩܘܝܼܠܹܗ ܐܲܪܥܵܐ ܟܲܕ ܠܲܝܬ ܠܵܗ̇ ܠܵܐ ܐܸܣܛܘܿܢܹ̈ܐ ܘܠܵܐ ܓܘܼܕܵܢܹ̈ܐ ܘܠܵܐ ܡܸܢܕܝܼ ܐ݇ܚܹܪ݇ܢܵܐ ܕܛܵܥܸܢܵܗ̇. ܐܝܼܢܵܐ ܒܚܲܝܠܵܐ ܕܝܼـܹܗ ܬܠܝܼܬܵܐ ܝ݇ܠܵܗ̇ ܫܡܲܝܵܐ: ܗܵܝܓܵܗ ܒܪܹܐܠܹܗ ܠܐܲܪܥܵܐ. ܗ̇ܘ ܝ݇ܠܹܗ ܕܒܸܪܝܲܝܗܝ ܠܹܗ: ܫܘܼܠܸܚܠܹܗ ܕܲܝܵܢܵܐ ܠܨܵܘܸܠܬܵܐ: ܘܗܘܹܐܠܵܗ̇ ܚܕܵܐ ܓܲܡܸܫܬܵܐ ܓܘܼܪܬܵܐ: ܘܦܠܸܛܠܹܗ ܡܸܢܘܼܗ̇ ܚܲܕ݇ ܓܸܕܝܵܐ ܕܥܸܙܹ̈ܐ. ܗܵܝܓܵܗ ܡܘܼܩܘܸܚܠܗ݇ܘܿܢ ܪܲܒܘܼܬܵܐ ܕܓܵܢܵܬܹ̈ܐ ܟܲܕ ܒܹܐܡܵܪܵܐ: ܙܲܕܝܼܩܵܐ ܝ݇ܘܸܬܿ ܡܵܪܝܵܐ ܘܛܵܒ̣ܵܐ ܬܪ̈ܘܿܨܵܐ ܝ݇ܢܵܐ ܕܝܼܘܵܢ̈ܘܼܟܼ. ܗܵܝܓܵܗ ܕܲܝܵܢܵܐ ܐ݇ܡܸܪܹܗ ܐܸܠܲܝܗܝ: ܠܵܐ ܙܲܕܥܝܼܬܘܿܢ: ܣܵܒܵܒ ܐܵܢܝܼ ܒܚܲܪܵܫܘܼܬܵܐ ܥܒ̣ܝܼܕܲܝܗܝ ܠܹܗ ܝܵܠܵܕ݇ܐ. ܗܵܝܓܵܗ ܐ݇ܡܸܪܹܗ ܩܲܕܝܼܫܵܐ: ܕܡܲܝܬ݇ܝܲܚ ܡܹܐܟ̣ܘܼܠܬܵܐ ܘܡܲܬܒ̣ܲܚ ܩܵܕ݇ܡ ܬܵܘܪܵܐ: ܘܐܵܟ̣ܸܠ ܥܲܡܹܗ ܓܸܕܝܵܐ ܕܥܸܙܹ̈ܐ: ܐ݇ܡܸܪܹܗ ܕܲܝܵܢܵܐ: ܕܦܵܐܸܫ ܦܪܝܼܡܵܐ ܬܵܘܪܵܐ ܥܲܡ ܓܸܕܝܵܐ: ܕܗܵܘܝܵܐ ܚܕܵܐ ܟ̰ܝܵܕܬܵܐ ܕܡܹܐܟ̣ܘܼܠܬܵܐ ܩܵܐ ܪܲܒܘܼܬܵܐ ܕܓܵܢܵܬܹ̈ܐ: ܕܠܵܐ ܣܵܢܩܝܼ ܚܲܕ݇ ܡܸܢܕܝܼ ܐ݇ܚܹܪ݇ܢܵܐ ܠܹܐܟ̣ܵܠܵܐ: ܕܝܵܕܥܝܼ ܟܠ ܐ݇ܢܵܫܵܐ ܕܫܪܵܪܵܐ ܝ݇ܢܵܐ ܐܵܢܝܼ ܕܟܠܲܝܗܝ ܕܗܘܹܐܠܗ݇ܘܿܢ. ܐܝܼܢܵܐ ܟܲܕ ܗܘܹܐܠܵܗ̇ ܡܹܐܟ̣ܘܼܠܬܵܐ ܕܟ̰ܝܵܕܬܵܐ ܝ݇ܬܸܒ̣ܠܗ݇ܘܿܢ ܐܵܢܝܼ ܪܲܒܘܼܬܵܐ ܕܓܵܢܵܬܹ̈ܐ. ܘܐ݇ܟ̣ܸܠܗ݇ܘܿܢ ܘܣܒ̣ܸܥܠܗ݇ܘܿܢ: ܘܙܝܼܕܠܗ݇ܘܿܢ ܥܸܣܪܵܐ ܩܘܼܦܹ̈ܐ [ܣܵܠܹ̈ܐ ܝܲܢ ܩܲܠܝܵܬܹ̈ܐ] ܡ̣ܢ ܓܸܕܝܵܐ: ܘܐܲܪܒܥܵܐ ܡ̣ܢ ܬܵܘܪܵܐ: ܕܝܵܕܥܝܼ ܟܠ ܐ݇ܢܵܫܵܐ: ܕܐܵܢܝܼ ܕܒܵܨܘܿܪܹ̈ܐ ܝ݇ܢܵܐ: ܒܘܼܫ ܪܵܒܵܐ ܝ݇ܢܵܐ ܡ̣ܢ ܕܐܵܢܝܼ ܕܐܝܼܢܵܐ ܪ̈ܵܒܹܐ. ܐܝܼܢܵܐ ܐܸܢ ܦܵܐܸܫ ܡܘܼܬܒ̣ܵܐ ܠܲܚܡܵܐ ܟܲܕ ܠܹܐ ܝ݇ܠܹܗ ܡܒܘܼܪܟ̣ܵܐ: ܘܐܵܟ̣ܠܝܼ ܡܸܢܹܗ ܚܲܡܫܲܥܣܲܪ ܘܠܹܐ ܣܵܒ̣ܥܝܼ. ܘܐܸܢ ܡܒܘܼܪܟ̣ܵܐ ܝ݇ܠܹܗ: ܘܐܵܟ̣ܠܝܼ ܡܸܢܹܗ ܥܸܣܪܝܼܢ ܒܸܬ ܣܵܒ̣ܥܝܼ ܘܒܙܵܝܕܝܼ. ܐܝܼܢܵܐ ܕܲܝܵܢܵܐ ܐ݇ܡܸܪܹܗ ܩܵܐ ܚܸܠܡܲܬܟܵܪ̈ܘܼܗܝ ܒܥܕܵܢܵܐ ܕܚܙܹܐܠܹܗ ܕܙܝܼܕܠܹܗ ܒܸܣܪܵܐ: ܫܩܘܿܠܘܿܢ ܠܹܗ ܘܪܲܦܹܡܘܿܢ ܠܹܗ ܓܵܘ ܝܵܡܵܐ: ܕܠܵܐ ܚܵܙܝܼ ܐ݇ܢܵܫܹ̈ܐ ܐ݇ܚܹܪ̈݇ܢܹܐ ܘܡܗܲܝܡܸܢܝܼ.
ܘܦܘܼܩܸܕܠܹܗ ܕܩܵܪܹܐܠܹܗ ܠܐܵܣܝܵܐ: ܘܟܲܕ ܐ݇ܬܹܐܠܹܗ ܐܵܣܝܵܐ: ܘܐ݇ܡܸܪܹܗ ܐܸܠܹܗ ܕܲܝܵܢܵܐ: ܩܛܸܥܠܹܗ ܠܹܫܵܢܹܗ ܕܐܵܗܵܐ ܝܵܠܵܕ݇ܐ: ܣܵܒܵܒ ܐܵܢܵܐ ܠܹܐ ܡܵܨܹܝܢ ܕܩܲܒܠܸܢ ܠܗܹܡܸܙܡܵܢ̈ܘܼܗܝ. ܘܟܲܕ ܩܛܸܥܠܹܗ ܐܵܣܝܵܐ ܠܠܹܫܵܢܹܗ: ܐ݇ܡܸܪܹܗ ܩܲܕܝܼܫܵܐ ܩܵܐ ܕܲܝܵܢܵܐ: ܚܫܸܒ̣ܠܘܼܟܼ ܕܩܛܸܥܠܘܼܟܼ ܠܹܫܵܢܝܼ ܕܠܵܐ ܗܲܡܙܸܡܲܢ؟ ܗܵܐ ܦܝܼܫܠܹܗ ܝܘܼܗ݇ܒ̣ܵܐ ܩܵܬܝܼ ܡ̣ܢ ܓܹܒܹܗ ܠܹܫܵܢܵܐ ܪܘܼܚܵܢܵܝܵܐ. ܗ̇ܘ ܕܠܵܐ ܐܲܢ݇ܬܿ ܘܠܵܐ ܙܹܐ ܒܵܒܘܼܟܼ ܡܨܹܐܠܵܘܟ̣ܘܿܢ ܕܝܵܕܥܝܼܬܘܿܢ ܠܹܗ. ܗܵܝܓܵܗ ܐ݇ܡܸܪܹܗ ܕܲܝܵܢܵܐ ܩܵܐ ܐܵܣܝܵܐ: ܩܵܡܘܿܕܝܼ ܠܵܐ ܡ̣ܢ ܓܵܘܵܐ ܩܛܸܥܠܘܼܟܼ ܠܹܫܵܢܹܗ ܒܥܵܩܸܠܕܵܪܘܼܬܵܐ؟ ܐ݇ܡܸܪܹܗ ܐܸܠܹܗ ܐܵܣܝܵܐ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܡܵܪܝܼ ܕܲܝܵܢܵܐ. ܗܵܐ ܠܹܫܵܢܵܐ ܕܝܵܠܵܕ݇ܐ ܝܑܼܠܹܗ ܡܘܼܬܒ̣ܵܐ ܓܵܘ ܐܝܼܕܵܬ̈ܝܼ: ܗܲܒ̣݇ܠ ܦܘܼܩܕܵܢܵܐ: ܕܡܲܝܲܬ݇ܚ ܚܲܕ݇ ܚܙܘܼܪܵܐ: ܘܩܲܛܥܲܚܠܹܗ ܠܹܫܵܢܹܗ. ܐܸܢ ܡܵܨܹܐ ܚܙܘܼܪܵܐ ܠܸܚܝܵܐ ܙܵܘܕܵܐ: ܒܸܬ ܗܵܘܹܝܢ ܓܘܼܢܗܵܟܲܪ ܕܡܵܝܬܸܢ ܩܵܕ݇ܡܘܼܟܼ. ܟܲܕ ܡܘܼܬ݇ܝܼܠܗ݇ܘܿܢ ܠܚܙܘܼܪܵܐ ܘܩܛܸܥܠܗ݇ܘܿܢ ܠܹܫܵܢܹܗ. ܒܗ̇ܝ ܣܵܥܲܬ ܢܦܸܠܹܗ ܘܡܝܼܬܠܹܗ. ܗܵܝܓܵܗ ܐܵܣܝܵܐ ܦܠܸܛܠܹܗ ܡ̣ܢ ܩܵܕ݇ܡ ܕܲܝܵܢܵܐ ܕܠܵܐ ܗܸܟ̰ ܙܕܥܘܿܬܵܐ ܥܲܡ ܐܹܘܣܹܒ̣ܝܼܣ (ܐܸܣܟܘܿܠܸܣܬܝܼܩܵܐ): ܘܥܲܡ ܕܹܡܛܪܝܼܘܿܣ ܣܩܘܼܢܬܸܕܪܘܿܣ: ܐܵܢܝܼ ܕܗܘܼܡܸܢܘܿܢ ܒܐܲܠܵܗܵܐ. ܘܦܠܸܛܠܗ݇ܘܿܢ ܡ̣ܢ ܩܵܕ݇ܡܘܼܗܝ ܟܲܕ ܒܲܚܕܵܝܵܐ ܒܡܵܪܝܵܐ ܡܫܝܼܚܵܐ ܘܒܹܐܡܵܪܵܐ: ܐܲܠܵܗܵܐ ܕܟܪܸ̈ܣܛܝܵܢܹܐ ܗ̇ܘ ܕܩܲܡ ܡܲܕܸܥܪܲܢ ܠܟܸܣܠܹܗ: ܒܪ̈ܝܼܟ̣ـܹܐ ܝ݇ܢܵܐ ܦܸܠܚܵܢܵܢ̈ܘܼܗܝ ܕܦܝܼܫܠܗ݇ܘܿܢ ܚܸܙܝܹ̈ܐ ܠܙܲܒܘܼܢܘܼܬܲܢ.
ܐܝܼܢܵܐ ܕܲܝܵܢܵܐ ܐ݇ܡܸܪܹܗ ܠܩܲܕܝܼܫܵܐ: ܒܲܣ ܐܸܢ ܠܹܐ ܝ݇ܠܵܗ̇ ܒܣܵܡܘܼܟܼ ܕܥܵܒ̣ܕܸܬܿ ܕܸܒ̣ܚܵܐ ܠܐܲܠܵܗܹ̈ܐ: ܐܲܚܟ̰ܝܼ ܐܵܗܵܐ ܥܒ̣ܘܿܕ: ܛܥܘܿܡ ܡ̣ܢ ܕܐܵܗܵܐ ܒܸܣܪܵܐ ܕܕܸܒ̣ܚܵܐ: ܘܡ̣ܢ ܚܲܡܪܵܐ ܕܕܸܒ̣ܚܵܐ ܫܵܬܝܼ: ܦܵܝܫܸܬܿ ܦܸܨܝܵܐ ܡ̣ܢ ܕܐܵܢܹ̈ܐ ܓ̰ܘܼܢܓ̰ܵܪܹ̈ܐ. ܐ݇ܡܸܪܹܗ ܝܵܠܵܕ݇ܐ ܩܲܕܝܼܫܵܐ: ܠܵܐ ܬܘܼܚܡܸܢܘܼܟܼ ܒܓܵܢܘܼܟܼ ܝܵܐ ܚܸܠܡܲܬܟܵܪܹܗ ܕܣܵܛܵܢܵܐ: ܕܡ̣ܢ ܫܘܼܪܵܝܵܐ ܠܵܐ ܥܒ̣ܸܪܹܗ ܠܦܘܼܡܝܼ ܡܸܢܕܝܼ ܕܛܲܡܐܵܐ ܝ݇ܠܹܗ ܝܲܢ ܟ̰ܘܼܦܠܸܢܵܐ. ܐ݇ܡܸܪܹܗ ܕܲܝܵܢܵܐ: ܦܬܘܿܚܘܿܢ ܦܘܼܡܲܝܗܝ: ܘܕܪܵܝܡܘܿܢ ܓܵܘܲܝܗܝ ܡ̣ܢ ܗ̇ܘ ܒܸܣܪܵܐ ܘܗ̇ܘ ܚܲܡܪܵܐ: ܒܥܕܵܢܵܐ ܕܕܪܵܝܠܗ݇ܘܿܢ: ܐ݇ܡܸܪܹܗ ܐܸܠܹܗ ܕܲܝܵܢܵܐ: ܐ݇ܙܸܠܵܗ̇ ܦܨܝܼܚܘܼܬܘܼܟܼ ܩܘܼܪܝܵܩܘܿܣ ܠܟܸܣ ܐܲܠܵܗܘܼܟܼ. ܐܝܼܢܵܐ ܝܵܠܵܕ݇ܐ ܩܲܕܝܼܫܵܐ ܐ݇ܡܸܪܹܗ: ܠܵܐ ܚܵܕܸܬܿ ܕܸܫ̰ܡܸܢ ܕܫܪܵܪܵܐ: ܝܵܐ ܣܵܢܝܵܢܵܐ ܠܐܵܢܝܼ ܡܲܚܸܒܵܢܹ̈ܐ ܕܐܲܠܵܗܵܐ ܥܸܠܵܝܵܐ: ܢܘܼܟ̣ܪܵܝܵܐ ܕܝܵܬܹܩܹܐ [ܕܘܲܣܝܲܬ] ܫܡܲܝܵܢܝܼܬܵܐ: ܢܘܼܟ̣ܪܵܝܵܐ ܕܦܸܠܚܵܢܹ̈ܐ ܕܐܲܠܵܗܵܐ: ܐܸܢ ܒܪܸܙܵܝܵܐ ܕܝܼܝܼ ܥܒ̣ܝܼܕܠܝܼ ܐܵܗܵܐ: ܓܘܼܢܗܵܟܲܪ ܝ݇ܘܸܢ ܩܵܕ݇ܡ ܐܲܠܵܗܵܐ. ܐܝܼܢܵܐ ܐܸܢ ܕܠܵܐ ܪܸܙܵܝܵܐ ܕܝܼܝܼ ܗ݇ܘܹܐܠܵܗ̇ ܐܵܗܵܐ: ܗܕܝܼܪܵܐ ܝ݇ܠܹܗ ܩܵܬܝܼ ܟܠܝܼܠܵܐ ܕܓ̣ܵܠܝܼܒܘܼܬܵܐ. ܐ݇ܡܸܪܹܗ ܕܲܝܵܢܵܐ: ܡܲܝܬ݇ܝܼܡܘܿܢ ܠܹܗ ܠܡܵܪܸܓܠܵܐ ܓܘܼܪܵܐ: ܕܪܹܐܡܘܿܢ ܓܵܘܹܗ ܩܝܼܪ ܘܒܪܸܢܓ̰ ܘܢܸܦ̮ܛܵܐ ܘܫܲܡܥܵܐ ܘܟܝܼܒܪܝܼܬ ܘܟܘܼܦܪܵܐ ܘܦܪܸܙܠܵܐ ܕܦܵܫܸܪ: ܘܡܲܠܗܝܼܡܘܿܢ ܢܘܼܪܵܐ ܬ݇ܚܘܿܬܲܝܗܝ ܩܲܝܣܹ̈ܐ ܘܦܲܥܘܹ̈ܐ ܕܐܝܼܠܵܢܵܐ. ܟܲܕ ܡܘܼܠܗܝܼܠܗ݇ܘܿܢ ܬ݇ܚܘܿܬܲܗܝ ܗܲܠ ܕܗܘܹܐܠܹܗ ܡܵܪܸܓܠܵܐ ܐܲܝܟܼ ܠܲܗܵܐ ܕܢܘܼܪܵܐ: ܐ݇ܡܸܪܘܿܢ ܚܸܠܡܲܬܟܵܪܹ̈ܐ ܩܵܐ ܕܲܝܵܢܵܐ: ܗܲܒ̣݇ܠ ܦܘܼܩܕܵܢܵܐ ܡܵܪܝܼ ܕܡܲܝܬ݇ܝܼܠܗ݇ܘܿܢ ܐܵܢܝܼ ܐ݇ܢܵܫܹ̈ܐ: ܣܵܒܵܒ ܗܵܐ ܐܵܕܝܼܵܐ ܡܵܪܸܓܠܵܐ ܒܸܠܗܵܝܵܐ ܝ݇ܠܹܗ ܒܘܼܫ ܙܵܘܕܵܐ ܡ̣ܢ ܕܦܵܐܸܫ ܗ݇ܘܼܵܐ ܡܘܼܠܗܝܼܵܐ: ܘܩܵܠܹܗ ܕܡܵܪܸܓܠܵܐ ܒܹܐܙܵܠܵܐ ܗ݇ܘܼܵܐ ܐܲܝܟܼ ܩܵܠܵܐ ܕܪܵܘܕܵܢܵܐ ܘܕܒܸܪܩܵܐ ܕܟܹܐ ܡܲܒܪܸܩܝܼ ܒܘܼܫ ܡ̣ܢ ܫܸܡܫܵܐ: ܘܪܸܬܚܵܐ ܕܒܸܪܬܵܚܵܐ ܗ݇ܘܼܵܐ ܒܸܫܘܵܪܵܐ ܗ݇ܘܼܵܐ ܒܘܼܫ ܡ̣ܢ ܚܲܡܫܲܥܣܲܪ ܝܲܡܝܼܢܹ̈ܐ ܠܥܸܠܸܠ ܡ̣ܢ ܪܹܫܹܗ ܕܡܵܪܸܓܠܵܐ. ܐܝܼܢܵܐ ܐܲܢ݇ܬܿ ܕܲܝܵܢܵܐ ܫܵܕܸܪ ܕܡܲܝܬ݇ܝܼܠܗ݇ܘܿܢ ܠܐܵܢܝܼ ܓܲܒ̣ܪܹ̈ܐ. ܘܦܘܼܩܸܕܠܹܗ ܕܲܝܵܢܵܐ: ܘܫܘܼܕܸܪܘܿܢ ܘܡܘܼܬ݇ܝܵܝܠܗ݇ܘܿܢ ܠܪܲܒܘܼܬܵܐ ܕܓܵܢܵܬܹ̈ܐ ܕܚܵܙܝܼ ܠܡܵܘܬܵܐ ܕܩܲܕܝܼܫܹ̈ܐ ܒܥܕܵܢܵܐ ܕܦܵܝܫܝܼ ܪ̈ܘܼܦܝܹܐ ܓܵܘ ܡܵܪܸܓܠܵܐ.
ܐܝܼܢܵܐ ܝܘܿܠܹܝܛܹܐ ܟܲܕ ܚܙܹܐܠܵܗ̇ ܠܡܵܪܸܓܠܵܐ: ܕܢܘܼܪܵܐ ܒܸܣܝܵܩܵܐ ܡ̣ܢ ܓܵܘܵܗ̇: ܙܕܸܥܠܵܗܿ: ܘܒܵܥܝܵܐ ܗ݇ܘܼܵܐ ܕܟܵܦܪܵܐ ܗ݇ܘܼܵܐ ܒܗ̇ܝ ܚܲܙܢܵܐ ܕܗܕܸܪܬܵܐ ܝܼܗ݇ܘܼܵܐ ܩܵܬܘܼܗ̇. ܘܟܲܕ ܝ݇ܕܸܥܠܹܗ ܒܪܘܿܢܘܼܗ̇ ܐ݇ܡܸܪܹܗ ܩܵܬܘܼܗ̇: ܝܸܡܝܼ: ܠܵܐ ܙܲܕܥܵܬܝ ܘܠܵܐ ܫܲܥܫܵܬܝ ܡ̣ܢ ܩܵܕ݇ܡ ܦܲܐܬܵܐ ܕܡܵܪܸܓܠܵܐ: ܕܥܝܼܝ ܝܸܡܝܼ: [ܕܗ̇ܘ ܕܦܘܼܨܝܼܠܹܗ] ܠܒܹܝܬܿ ܚܲܢܲܢܝܵܐ ܡ̣ܢ ܐܵܬܘܿܢܵܐ ܕܢܘܼܪܵܐ: ܡܲܨܝܵܢܵܐ ܝ݇ܠܹܗ ܠܡܦܵܨܵܝܬܲܢ ܡ̣ܢ ܐܵܗܵܐ ܡܵܪܸܓܠܵܐ: ܐܝܼܢܵܐ ܐܸܢ ܒܣܵܡܵܟ̣ܝ ܝ݇ܠܵܗ̇ ܝܸܡܝܼ: ܘܥܲܪܩܵܬܝ ܡ̣ܢ ܬܲܥܠܵܡܝܵܬܹ̈ܐ ܐܲܪ̈ܥܵܢܵܝܵܬܹܐ: ܕܠܵܐ ܢܘܼܪܵܐ ܡܲܟ̰ܡܸܥ ܠܝܵܪܬܘܼܬܵܟ̣ܝ. ܠܵܐ ܗܵܕܟ̣ܵܐ ܝܸܡܝܼ: ܣܵܒܵܒ ܗܵܐ ܐܵܕܝܼܵܐ ܐܲܠܵܗܲܢ ܟܸܠܝܵܐ ܝ݇ܠܹܗ ܠܟܸܣܠܲܢ ܘܒܸܬ ܗܲܝܸܪܲܢ. ܣܵܒܵܒ ܗ̇ܘ ܦܘܼܪܩܵܠܹܗ ܠܫܘܿܫܲܢ ܡܼܢ ܐܝܼܕܵܐ ܕܕܸܫ̰ܡܸܢ̈ܘܼܗ̇: ܗ̇ܘ ܒܸܬ ܦܵܪܸܩ ܐܘܼܦ ܐܸܠܲܢ ܡ̣ܢ ܕܐܵܗܵܐ ܡܵܪܸܓܠܵܐ. ܡܸܕܪܹܐ ܗ̇ܘ ܕܦܘܼܪܸܩܠܹܗ ܠܕܵܢܝܼܐܹܝܠ ܡ̣ܢ ܓܵܘ ܓܘܼܒܵܐ ܕܐܲܪ̈ܝܹܐ: ܡܸܕܪܹܐ ܗ̇ܘ ܒܸܬ ܗܲܝܸܪܲܢ ܘܦܵܪܸܩܠܲܢ. ܐܸܢ ܒܣܵܡܘܼܟܼ ܝ݇ܠܵܗ̇ ܡܵܪܝܵܐ: ܓܵܘ ܕܐܵܗܵܐ ܡܵܪܸܓܠܵܐ ܗܲܒ̣݇ܠܲܢ ܓ̣ܵܠܝܼܒܘܼܬܵܐ ܕܐܝܼܘܿܒ̣ ܡܗܲܝܡܢܵܐ: ܗ̇ܘ ܕܐܘܼܦ ܓܵܘ ܦܠܵܫܵܐ ܛܘܼܠܸܩܠܹܗ ܒܢܘܿܢ̈ܘܼܗܝ ܘܒܢܵܬ̈ܘܼܗܝ ܘܟܠ ܡܸܢܕܝܼ ܕܩܸܢܝܵܐ ܗ݇ܘܼܵܐ ܥܲܡ ܟܠܹܗ ܦܲܓ̣ܪܹܗ. ܘܟܲܕ ܦܲܓ̣ܪܹܗ ܦܝܵܫܵܐ ܗ݇ܘܼܵܐ ܚܪܝܼܒ̣ܵܐ. ܗܸܟ̰ ܡܸܢܕܝܼ ܠܵܐ ܐ݇ܡܸܪܹܗ ܫܒ̣ܘܿܩ ܡ̣ܢ ܕܐ݇ܡܸܪܹܗ ܕܡܵܪܝܵܐ ܝܘܼܗ݇ܒ̣ܸܠܹܗ ܘܡܵܪܝܵܐ ܫܩܸܠܹܗ: ܘܗܵܘܹܐ ܒܪܝܼܟ̣ܵܐ ܫܸܡܹܗ ܕܡܵܪܝܵܐ: ܘܐܵܕܝܼܵܐ ܝܸܡܝܼ: ܐܘܼܦ ܐܲܚܢܲܢ ܒܗ̇ܝ ܕܵܡܲܝܬܵܐ ܒܸܬ ܗܵܘܲܚ ܚܲܝܠܵܢܹ̈ܐ ܘܫܲܩܠܲܚ ܟܠܝܼܠܵܐ ܕܓ̣ܵܠܝܼܒܘܼܬܵܐ. ܠܹܐ ܗ݇ܘܼܵܐ ܚܲܕ݇ܟ̰ܵܐ ܕܦܝܼܫܠܵܗ̇ ܡܘܼܩܪܸܒ̣ܬܵܐ ܦܲܪܦܵܠܬܵܐ ܕܒܪܘܿܢܵܐ ܠܟܸܣ ܝܸـܡܵܐ: ܐܝܼـܢܵܐ ܩܲـܕܝܼܫܵܐ ܡܘܼܪܸܡܠܹـܗ ܥܲܝܢ̈ܘܼܗܝ ܠܫܡܲܝܵܐ ܘܐ݇ܡܸـܪܹܗ: ܝܵـܐ ܡܵܪܝܵــܐ؛ ܐܸܢ ܒܸܦܪܵܫܵܐ ܝ݇ܘܸܬܿ ܠܚܸܕܲܡܬܘܼܟܼ ܡ̣ܢ ܝܵܪܬܘܼܬܘܼܟܼ: ܐܘܼܦ ܐܵܢܵܐ ܫܘܿܦܠܝܼ ܡ̣ܢ ܟܬܵܒ̣ܘܼܟܼ: ܠܵܐ ܝܵܐ ܡܵܪܝܼ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܡܵܪܲܢ ܝܼܫܘܿܥ ܡܫܝܼܚܵܐ: ܠܵܐ ܥܵܒ̣ܕܸܬܿ ܐܵܗܵܐ ܥܲܡ ܪܹܓܘܼܟܼ. ܐܝܼܢܵܐ ܐܸܢ ܒܣܵܡܘܼܟܼ ܝ݇ܠܵܗ̇ ܡܵܪܝܵܐ ܐܲܠܵܗܵܐ: ܕܡܲܚܪܸܒ̣ܸܬܿ ܠܹܗ ܟܲܪܡܵܐ ܘܡܲܩܕܸܬܿ ܠܹܗ ܚܲܩܠܵܐ. ܘܙܲܪܥܵܐ ܕܝܼܘܼܟܼ ܡܲܢܦܸܠܸܬܿ ܠܹܗ: ܠܵܐ ܗܵܕܟ̣ܵܐ ܝܵܐ ܡܵܪܝܼ: ܣܵܒܵܒ ܐܲܢ݇ܬܿ ܦܘܼܩܸܕܠܘܼܟܼ: ܕܥܸܩܪܵܐ ܕܐܝܼܠܵܢܵܐ ܦܵܐܸܫ ܩܸܛܥܝܵܐ: ܘܛܲܪ̈ܦܘܼܗܝ ܓ̰ܲܡܥܸܬܠܘܿܢ ܠܟܸܣܠܘܼܟܼ. ܠܵܐ ܗܲܕܟ̣ܵܐ ܝܵܐ ܡܵܪܝܼ: ܐܸܠܵܐ ܡܲܝܬ݇ܝܼܠܹܗ ܩܲܝܣܵܐ ܠܟܸܣܠܘܼܟܼ: ܗ̇ܘ ܕܐܝܼܬ ܒܝܼـܹܗ ܦܸܠܚܵܢܵܐ: ܘܛܲܪ̈ܦܘܼܗܝ ܕܪܹܐܠܗ݇ܘܿܢ ܒܢܘܼܪܵܐ. ܡܵܪܝܵܐ ܥܒ̣ܘܿܕ ܐܵܗܵܐ ܥܲܡ ܪܹܓܘܼܟܼ: ܐܸܢ ܠܵܐ ܟܠܲܝܗܝ ܐܵܢܝܼ ܕܗܘܼܡܸܢܘܿܢ ܒܝܼܘܼܟܼ ܒܸܬ ܟܲܦܪܝܼ: ܘܒܸܬ ܗܵܘܝܼ ܒܹܐܡܵܪܵܐ: ܐܸܢ ܐܝܼܬ ܗ݇ܘܼܵܐ ܠܗ݇ܘܿܢ ܐܲܠܵܗܵܐ: ܗ̇ܘ ܒܸܬ ܗܲܝܸܪ ܗ݇ܘܼܵܐ ܠܗ݇ܘܿܢ ܓܵܘ ܢܘܼܪܵܐ: ܠܹܐ ܥܵܪܩܝܼ ܗ݇ܘܼܵܘ ܡܸܢܘܼܗ̇. ܠܵܐ ܥܵܒ̣ܕܸܬܿ ܐܵܗܵܐ ܡܵܪܝܼ: ܕܠܵܐ ܥܵܒ̣ܸܕ ܫܘܼܒ̣ܗܵܪܵܐ ܕܸܫ̰ܡܸܢ ܘܐܵܡܸܪ: ܗܵܐ ܡܘܼܕܸܥܪܵܝܠܝܼ ܡ̣ܢ ܓܘܼܪܘܼܬܵܐ ܕܬܠܝܼܬܵܝܘܼܬܵܐ. ܘܓ̣ܠܸܒܠܝܼ ܠܩܲܕܝܼܫܹ̈ܐ: ܘܓ̣ܠܸܒܠܝܼ ܐܲܝܟܼ ܚܲܕ݇ ܥܸܙܵܐ ܡ̣ܢ ܡܲܪܥܝܼܬܵܐ ܘܒܘܼܪܒܸܙܵܠܝܼ. ܝܵܐ ܡܵܪܝܵܐ: ܗܲܒ̣݇ܠ ܪܘܼܚܵܐ ܕܝ݇ܕܸܥܬܵܐ ܒܝܸܡܝܼ: ܟܲܕ ܐܲܢܹ̈ܐ ܐ݇ܡܝܼܪܵܝܠܹܗ: ܐ݇ܬܹܐܠܵܗ̇ ܪܘܼܚܵܐ ܕܩܘܼܕܫܵܐ ܠܟܸܣܠܘܼܗ̇ (ܝܘܿܠܹܝܛܹܐ): ܘܒܗ̇ܝ ܥܕܵܢܵܐ ܥܪܸܩܠܹܗ ܣܵܛܵܢܵܐ ܡ̣ܢ ܠܟܸܣܠܘܼܗ̇. ܗܵܝܓܵܗ ܐ݇ܡܸܪܵܗ̇ ܩܵܐ ܒܪܘܿܢܘܼܗ̇: ܬܵܐܠܘܼܟܼ ܒܪܘܿܢܝܼ: ܕܐܵܕܝܼܵܐ ܗ݇ܘܹܐܠܘܼܟܼ ܒܵܒܵܐ ܩܵܬܝܼ ܓܵܘ ܡܲܠܟܘܼܬܵܐ ܕܫܡܲܝܵܐ. ܬܵܐ ܒܪܘܿܢܝܼ ܕܓ̣ܵܠܒܲܚ ܓܵܘ ܕܐܵܗܵܐ ܦܠܵܫܵܐ ܕܗܕܝܼܪܵܐ ܝ݇ܠܹܗ ܩܵܬܲܢ: ܣܵܒܵܒ ܐܵܕܝܼܵܐ ܠܹܐ ܚܵܙܝܲܢ ܡܵܪܸܓܠܵܐ ܕܒܸܪܬܵܚܵܐ ܝ݇ܠܵܗ̇: ܡܣܵܒܵܒ ܗ̇ܘ ܒܝܼܫܵܐ ܕܥܒ̣ܝܼܕܵܐ ܗ݇ܘܼܵܐ ܒܘܼܨܵܐ ܒܝܼܝܼ: ܐ݇ܙܸܠܹܗ ܡ̣ܢ ܠܟܸܣܠܝܼ. ܗܵܐ ܒܸܚܙܵܝܵܐ ܝ݇ܘܵܢ ܠܡܵܪܸܓܠܵܐ ܐܲܝܟܼ ܛܠܘܼܠܵܐ ܕܟܹܐ ܡܲܪܝܸܣ ܒܥܕܵܢܵܐ ܕܨܲܦܪܵܐ ܥܲܠ ܓܘܼܫܡܝܼ.
ܐܝܼܢܵܐ ܐܲܢܹ̈ܐ ܗܹܡܸܙܡܵܢܹ̈ܐ ܗܲܡܙܘܼܡܹܐ ܗ݇ܘܼܵܐ ܩܲܕܝܼܫܵܐ: ܒܗ̇ܝ ܥܕܵܢܵܐ ܫܘܸܪܗ݇ܘܿܢ ܘܥܒ̣ܸܪܗ݇ܘܿܢ ܘܟܠܹܐܠܗ݇ܘܿܢ ܓܵܘ ܡܵܪܸܓܠܵܐ ܕܢܘܼܪܵܐ. ܘܡܘܼܝܵܬ݇ܝܠܗ݇ܘܿܢ ܐܵܢܝܼ ܓܝܼܓ̣ܠܹ̈ܐ [ܬܘܿܦܵܦܹ̈ܐ] ܘܐܵܢܝܼ ܡܲܛܒܸܥܵܢܹ̈ܐ. ܘܐܵܢܝܼ ܩܘܼܡܬܵܝ ܩܘܼܛܪܸ̈ܢܹܐ: ܘܕܪܹܐܠܗ݇ܘܿܢ ܡܝܼ̈ܵܐ: ܘܠܵܐ ܚܘܼܙܕܸܓܠܵܐ ܡܵܪܸܓܠܵܐ ܠܢܲܨܝܼܚܹ̈ܐ: ܘܦܪܸܩܠܹܗ ܡܸܢܹܗ ܪܸܬܚܹܗ ܕܡܵܪܸܓܠܵܐ. ܫܘܼܪܹܠܹܗ ܛܘܼܒ̣ܵܢܵܐ ܠܡܨܵܠܘܿܝܹܐ ܐܵܗܵܐ ܨܠܘܿܬܵܐ: ܒܥܕܵܢܵܐ ܕܟܸܠܝܵܐ ܗ݇ܘܼܵܐ ܓܵܘ ܡܵܪܸܓܠܵܐ. ܘܠܹܫܵܢܵܐ ܕܝܼـܹܗ: ܕܐܵܗܵܐ ܗ݇ܘܼܵܐ ܦܘܼܫܵܩܹܗ: ܕܐܵܗܵܐ ܝ݇ܠܹܗ ܬܲܪܥܹܗ ܕܡܵܪܝܵܐ: ܕܙܲܕܝܼܩܹ̈ܐ ܒܸܬ ܥܵܒ̣ܪܝܼ ܒܝܼـܹܗ. ܘܡܸܕܪܹܐ ܐ݇ܡܸܪܹܗ: ܕܟܲܕ ܡܨܵܠܘܿܝܹܐ ܝ݇ܘܸܢ ܠܐܲܠܵܗܝܼ: ܬܘܼܪܸܨܠܵܗ̇ ܝܸܡܝܼ ܩܵܬܝܼ ܐܵܗܵܐ ܓ̰ܘܼܒܒܵܐ: ܘܣܘܼܩܠܵܠܵܗ̇ ܒܡܲܪ̈ܓܲܢܝܵܬܹܐ. ܐܝܼܢܵܐ ܝܸܡܝܼ ܝܑܼܠܵܗ̇ ܥܹܕܬܵܐ: ܘܡܲܪ̈ܓܲܢܝܵܬܹܐ ܝܑܼܢܵܐ ܗܹܡܸܙܡܵܢܹ̈ܐ ܐܲܠܵܗܵܝܹ̈ܐ ܘܝܘܼܠܦܵܢܵܐ ܕܪܘܼܚܵܐ ܕܩܘܼܕܫܵܐ. ܘܒܢܝܼܫܲܢܩܵܐ ܕܐܸܓܲܪܬܵܐ ܕܪܘܼܚܵܐ ܦܝܼܫܠܵܗ̇ ܫܘܼܕܸܪܬܵܐ ܠܡܕܝܼܢ݇ܬܵܐ ܚܸܫܟܵܢܬܵܐ: ܕܐܲܝܟܵܐ ܕܐܘܼܦ ܠܵܐ ܒܲܗܪܵܐ ܐܝܼܬ ܗ݇ܘܼܵܐ ܬܵܡܵܐ: ܘܠܵܐ ܫܸܡܫܵܐ ܘܠܵܐ ܣܲܗܪܵܐ ܘܠܵܐ ܟܘܼܟ̣ܒ̣̈ـܹܐ. ܘܟܲܕ ܐ݇ܬܹܐܠܝܼ ܠܡܕܝܼܢ݇ܬܵܐ ܕܫܸܡܘܼܗ̇ ܝܼܗ݇ܘܼܵܐ ܠܡܸܢܸܬܹܐܘܿܣ: ܘܡܘܼܫ݇ܟ̰ܸܚܠܝܼ ܐܸܘܩܸܢܛܘܿܪܘܿܣ ܘܗܹܘܦܸܩܝܼܛܪܘܿܢ ܘܬܹܐܘܿܣܦܝܼܣ ܚܲܪܵܫܬܵܐ ܘܒܘܼܫܵܝܘܼܬܵܐ ܕܕܵܝܘܹ̈ܐ. ܘܐܲܢܹ̈ܐ ܒܥܹܐܠܗ݇ܘܿܢ ܕܛܲܠܩܝܼܠܲܢ: ܘܗ̇ܝ ܐܸܓܲܪܬܵܐ ܩܲܡ ܛܲܪܕܵܠܗ݇ܘܿܢ ܡ̣ܢ ܩܵܕ݇ܡܝܼ. ܡ̣ܢ ܒܵܬ݇ܪ ܗܵܕܵܐ ܐ݇ܬܹܐܠܝܼ ܠܒܵܒܸܠ: ܠܢܲܗܪܵܐ ܕܟܹܐ ܦܵܐܸܫ ܩܸܪܝܵܐ ܕܚܝܼܠܵܐ [ܡܲܙܕܸܥܝܵܢܵܐ] ܕܠܹܐ ܡܵܨܝܼ ܒܢܲܝ̈ܢܵܫܵܐ ܕܥܵܒ̣ܪܝܼܠܹܗ: ܐܸܠܵܐ ܒܝܵܘܡܵܐ ܕܫܲܒܬܵܐ. ܡܣܵܒܵܒ ܐܘܼܦ ܐܸܠܹܗ ܦܩܝܼܕܵܐ ܠܹܗ: ܕܢܵܛܸܪ ܝܵܘܡܵܐ ܕܚܲܕܒܫܲܒܵܐ. ܘܓܵܘ ܗ̇ܘ ܢܲܗܪܵܐ ܕܟܹܐ ܦܵܠܸܛ ܗ݇ܘܼܵܐ [ܚܝܼܙܵܐ]. ܗܸܟ̰ ܐ݇ܢܵܫܵܐ ܠܹܐ ܡܵܨܹܐ ܗ݇ܘܼܵܐ ܕܚܵܙܹܐ ܗ݇ܘܼܵܐ ܡܝܼ̈ܵܐ ܕܗ̇ܘ ܢܲܗܪܵܐ. ܘܟܲܕ ܥܒ̣ܸܪܝܼ ܠܢܲܗܪܵܐ ܘܐ݇ܬܹܐܠܝܼ ܠܗ̇ܝ ܡܕܝܼܢ݇ܬܵܐ ܕܝܼܠܵܗ̇ ܝܲܡܬܵܐ ܕܩܲܒ̣ܝܵܐ: ܡܘܼܫ݇ܟ̰ܸܚܠܝܼ ܬܵܡܵܐ ܐܲܦܝܼܩܘܿܕܸܣ ܘܐܘܼܦ ܐܸܣܦܝܼܣ ܘܚܲܝܠܵܐ ܕܫܹܐܕܹ̈ܐ ܪ̈ܵܒܹܐ ܘܬܲܢܝܼܢܹ̈ܐ ܓܘܼܪܹ̈ܐ. ܘܡܲܠܟܵܐ ܕܪܸ̈ܓ̰ܒܹܐ ܕܐܲܪܥܵܐ: ܕܡܘܼܬܒ̣ܵܐ ܝܼܗ݇ܘܼܵܐ ܕܲܢܒ̣ـܹܗ [ܬܘܼܦܪܹܗ] ܓܵܘ ܦܘܼܡܹܗ: ܒܐܘܼܪܚܵܐ ܕܚܘܼܘܵܘܹ̈ܐ ܠܵܩܵܕ݇ܡܵܐ ܒܸܪܚܵܛܵܐ ܗ݇ܘܼܵܐ. ܐܝܼܢܵܐ ܟܵܟ̈ܘܼܗܝ ܐܲܝܟܼ ܣܲܝܦܵܐ ܚܲܪ̈ܘܼܦܹܐ ܗ݇ܘܼܵܘ: ܘܥܸܠܵܬ̈ܘܼܗܝ ܕܒܪܸܢܓ̰ ܝܼܗ݇ܘܼܵܘ: ܘܚܵܨܹܗ ܕܦܪܸܙܠܵܐ: ܘܛܸܦܪ̈ܵܬܘܼܗܝ ܕܢܸܫܪܵܐ: ܘܡܲܪܒܥܹܗ ܐܲܝܟܼ ܣܟܝܼܢܝܵܬܹ̈ܐ ܚܲܪ̈ܘܼܦܹܐ ܗ݇ܘܼܵܘ: ܘܡܹܐܟ̣ܘܼܠܬܹܗ ܙܵܠܹ̈ܐ ܗ݇ܘܼܵܐ ܘܓܸܠܠܵܐ ܕܬܵܘܪܹ̈ܐ. ܘܡ̣ܢ ܢܵܚܝܼܪܹܗ ܒܸܦܠܵܛܵܐ ܗ݇ܘܼܵܐ ܗܵܘܓܵܐ: ܐܲܝܟܼ ܬܸܢܢܵܐ. ܐܝܼܡܲܢ ܕܦܵܬܸܚܠܹܗ ܦܘܼܡܹܗ. ܫܲܒ̣ܥܵܐ ܝܵܘܡܵܢܹ̈ܐ ܩܵܒܸܠ ܗ݇ܘܼܵܐ ܠܹܗ ܠܢܲܗܪܵܐ ܕܝܘܿܪܕܢܵܢ: ܘܠܹܐ ܬܵܥܠܸܡ ܗ݇ܘܼܵܐ ܡ̣ܢ ܦܘܼܡܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܠܡܲܠܲܐܟ̣̈ـܹܐ ܡ̣ܢ ܫܡܲܝܵܐ ܒܝܼܲܕ ܚܲܫܹ̈ܐ ܛܘܼܠܩܵܝܠܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܠܐܵܕܵܡ ܩܲܕ݇ܡܵܝܵܐ ܡܘܼܚܠܸܛܠܹܗ: ܘܡ̣ܢ ܦܸܪܕܵܝܣܵܐ ܦܘܼܠܛܵܝܠܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܠܗܝܼܠܹܗ ܠܲܗܵܐ ܕܢܘܼܪܵܐ ܠܩܵܐܹܝܢ ܕܩܵܛܸܠ ܠܐܲܚܘܿܢܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܙܝܸܕܵܠܹܗ̇ ܠܒܝܼܫܬܵܐ ܕܐ݇ܢܵܫܵܐ: ܕܡܲܝܬ݇ܝܹܗ ܐܲܠܵܗܵܐ ܛܘܼܦܵܢܵܐ ܥܲܠ ܐܲܪܥܵܐ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܩܘܼܪܡܸܟ̰ܠܹܗ ܠܸܒܵܘܵܬܹ̈ܐ ܕܓܲܢ݇ܒܵܪܹ̈ܐ. ܐܵܗܵܐ ܝ݇ܠܹܗ ܬܲܢܝܼܢܵܐ: ܗ̇ܘ ܕܡܘܼܪܥܸܫܵܠܹܗ ܠܐܵܗܵܐ ܟܠܵܗ̇ ܒܝܼܫܬܵܐ. ܐܵܗܵܐ ܝ݇ܠܹܗ ܬܲܢܝܼܢܵܐ: ܗ̇ܘ ܕܗܘܼܕܸܪܹܗ ܐܘܼܪܚܵܐ ܠܒܲܟ̣ܬܵܐ ܕܓܘܼܪܵܐ ܕܦܘܼܠܝܼܣܹ̈ܐ ܥܲܠ ܝܵܘܣܸܦ. ܐܵܗܵܐ ܝ݇ܠܹܗ ܬܲܢܝܼܢܵܐ: ܗ̇ܘ ܕܡܘܼܩܫܝܼܠܹܗ ܠܸܒܵܐ ܕܒܢܲܝ̈ ܝܼܣܪܵܝܸܠ: ܘܡܘܼܚܙܹܐܠܹܗ ܩܵܬܲܝ ܕܥܵܒ̣ܕܝܼܠܗ݇ܘܿܢ ܚܲܕ݇ ܨܵܢܵܡ ܒܦܸܨܠܵܐ ܕܡܘܼܓ̰ܵܐ ܘܣܵܓ̣ܕܝܼ ܐܸܠܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܩܫܝܼܠܹܗ ܠܸܒܲܝܗܝ: ܕܠܵܐ ܩܲܒܠܝܼ ܦܘܼܩܕܵܢܹ̈ܐ ܕܐܲܠܵܗܵܐ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܓ̰ܪܸܛܠܹܗ ܠܕܵܘܝܼܕ ܒܒܲܪ݇ܬܼ ܫܒܲܥ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܥܒ̣ܸܕܠܹܗ ܠܫܠܹܝܡܘܿܢ ܪܹܓܹܗ ܕܐܵܙܸܠ ܒܵܬ݇ܪ ܚܸܠܛܘܼܢܝܵܐ ܕܠܸܒܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܠܝܘܿܪܲܒ̣ܥܲܡ ܡܘܼܚܠܸܛܠܹܗ ܕܥܵܒ̣ܸܕ ܚܲܕ݇ ܡܘܼܓ̰ܵܐ ܕܨܵܢܵܡ ܘܣܵܓ̣ܸܕ ܐܸܠܹܗ ܛܵܝܸܦܵܐ: ܕܠܵܐ ܣܵܓ̣ܸܕ ܠܐܲܠܵܗܵܐ ܓܵܘ ܐܘܿܪܸܫܠܸܡ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܥܪܸܩܠܹܗ ܠܐܹܠܝܼܵܐ ܡ̣ܢ ܩܵܕ݇ܡ ܐܝܼܙܒܸܠ. ܐܵܗܵܐ ܝ݇ܠܹܗ ܬܲܢܝܼܢܵܐ: ܕܡܘܼܚܙܹܐܠܹܗ ܠܡܢܲܫܹܐ ܕܡܲܩܝܼܡ ܩܵܝܹܡܬܵܐ ܕܨܵܢܵܡܹ̈ܐ ܓܵܘ ܒܲܝܬܵܐ ܕܡܵܪܝܵܐ. ܐܵܗܵܐ ܝ݇ܠܹܗ ܬܲܢܝܼܢܵܐ. ܗ̇ܘ ܕܟܠܲܝܗܝ ܨܵܢܵܡܹ̈ܐ ܩܘܼܝܸܡܵܝܠܹܗ. ܐܵܗܵܐ ܝ݇ܠܹܗ ܬܲܢܝܼܢܵܐ: ܗ̇ܘ ܕܦܬܝܼܚܠܹܗ ܚܲܝܠܵܐ ܕܓ̰ܘܼܢܓ̰ܵܪܹ̈ܐ ܡܲܚܪܸ̈ܒܼܵܢܹܐ ܘܡܲܫܓ̣ܸܫܵܢܹ̈ܐ ܕܗܵܩܘܼܬܵܐ ܕܒܢܲܝ̈ܢܵܫܵܐ. ܐܵܗܵܐ ܥܕܵܢܵܐ ܕܩܲܡ ܚܵܙܹܐܠܝܼ: ܒܵܥܹܐ ܗ݇ܘܼܵܐ ܕܡܵܚܹܐ ܗ݇ܘܼܵܐ ܠܝܼ ܘܬܲܥܠܸܡ ܗ݇ܘܼܵܐ ܠܝܼ: ܐܝܼܢܵܐ ܐܸܓܲܪܬܝܼ ܟ̰ܸܡܥܠܵܗ̇ ܠܦܘܼܡܹܗ. ܗܵܝܓܵܗ ܦܵܪܘܿܩܲܢ ܨܠܹܐܠܹܗ ܥܲܡ ܡܲܠܲܐܟ̣̈ܘܼܗܝ: ܘܡܘܼܩܸܕܠܹܗ ܠܗ̇ܘ ܬܲܢܝܼܢܵܐ ܓܘܼܪܵܐ. ܘܛܪܸܕܠܹܗ ܡ̣ܢ ܩܵܕ݇ܡܝܼ ܘܠܟܠܲܝܗܝ ܚܲܝܠܹܗ ܒܝܼܫܵܐ. ܘܓ̰ܘܼܡܸܥܠܹܗ ܟܠܹܗ ܬܸܓ̣ܡܵܐ ܕܦܝܼܫܠܹܗ ܡ̣ܢ ܝܼܣܪܵܝܸܠ. ܘܡܘܼܥܡܸܪܵܝܠܹܗ ܓܵܘ ܗ̇ܝ ܡܕܝܼܢ݇ܬܵܐ. ܕܦܵܝܫܝܼ ܚܸܙܝܹ̈ܐ ܡܚܘܼܝܸܕܹ̈ܐ ܡܐܸܚܕܵܕܹܐ. ܐܝܼܢܵܐ ܐܝܼܬ ܗ݇ܘܼܵܐ ܓܵܘ ܗ̇ܝ ܡܕܝܼܢ݇ܬܵܐ ܐܵܗܵܐ ܢܝܼܫܲܢܩܵܐ: ܐܝܼܬ ܗ݇ܘܼܵܐ ܚܕܵܐ ܐܸܣܩܘܼܦܬܵܐ ܕܦܪܸܙܠܵܐ ܘܬܲܪܥܵܐ ܕܦܪܸܙܠܵܐ: ܕܗܵܘܹܐ ܗ݇ܘܼܵܐ ܪܵܡܘܿܬܲܝܗܝ ܬܠܵܬܡܐܵܐ ܝܲܡܝܼܢܹ̈ܐ ܒܝܲܡܝܼܢܹ̈ܐ ܕܓܲܢ݇ܒܵܪܹ̈ܐ. ܘܒܝܵܘܡܵܢܹ̈ܐ ܐ݇ܚܵܪ̈ܵܝܹܐ ܐܲܝܟܼ ܕܦܝܼܫܠܹܗ ܐ݇ܡܝܼܪܵܐ. ܟܹܐ ܛܵܠܸܩ ܗ݇ܘܼܵܐ ܗ̇ܘ ܦܪܸܙܠܵܐ ܘܗ̇ܝ ܐܸܣܩܘܼܦܬܵܐ: ܡ̣ܢ ܦܵܣܘܿܥܝܵܬܹ̈ܐ ܕܕܝܵܫܵܐ ܕܐ݇ܢܵܫܹ̈ܐ ܕܟܹܐ ܥܵܒ̣ܪܝܼ ܗ݇ܘܼܵܘ ܥܲܠܘܼܗܝ: ܗܲܠ ܕܠܵܐ ܦܝܼܫܠܹܗ ܡ̣ܢ ܗ̇ܘ ܦܪܸܙܠܵܐ ܒܗ̇ܝ ܕܘܼܟܬܵܐ: ܘܚܕܲܪܬܘܼܗ̇ ܟܹܐ ܥܵܒ̣ܵܪܵܐ ܠܐܘܼܪܚܵܐ ܕܚܲܝܹ̈ܐ.
ܟܲܕ ܐ݇ܬܹܐܠܝܼ ܠܡܕܝܼܢ݇ܬܵܐ ܕܡܲܠܟܘܼܬܵܐ: ܬܘܼܡܸܡܵܝܠܝܼ ܠܨܠܵܘܵܬ̈ܝܼ. ܐܝܼܢܵܐ ܣܵܛܵܢܵܐ ܫܩܸܠܠܹܗ ܚܕܵܐ ܕܵܡܲܝܬܵܐ ܕܒܲܟ̣ܬܵܬܹ̈ܐ: ܫܘܼܪܹܐܠܹܗ ܒܸܒܟ̣ܵܝܵܐ ܘܦܲܪܦܘܼܠܹܗ ܘܒܛܠܵܒܵܐ ܘܒܹܐܡܵܪܵܐ: ܘܵܝ ܐܸܠܝܼ ܕܩܲܡ ܓ̣ܵܠܒܠܝܼ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ! ܘܵܝ ܐܸܠܝܼ ܕܗܘܹܐܠܝܼ ܓܸܚܟܵܐ: ܡ̣ܢ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ ܦܝܼܫܠܝܼ ܓ̣ܠܝܼܒܵܐ! ܘܵܝ ܐܸܠܝܼ: ܡ̣ܢ ܐܵܕܝܼܵܐ ܐܲܝܟܵܐ ܒܸܬ ܫܵܢܸܢ ܬܵܢܵܦ̈ܝܼ: ܠܐܲܝܟܵܐ ܒܸܬ ܦܲܠܚܸܢ ܟܦܘܿܪܝܵܐ ܠܹܐ ܝ݇ܘܸܢ ܒܝܼܕܵܥܝܵܐ. ܡ̣ܢ ܐܵܕܝܼܵܐ ܒܛܸܠܠܵܗ̇ ܡܲܠܦܵܢܘܼܬܝܼ: ܦܝܼܫܠܵܗ̇ ܓܘܼܢܗܵܟܵܪܘܼܬܝܼ ܘܦܝܼܫܠܝܼ ܚܘܼܪܙܸܦܵܐ. ܢܚܸܦܠܝܼ ܡ̣ܢ ܝܵܠܵܕ݇ܐ ܒܲܪ ܬܠܵܬ݇ܐ ܫܸܢܹ̈ܐ: ܘܦܝܼܫܠܝܼ ܓ̣ܠܝܼܒܵܐ. ܘܵܝ ܐܸܠܝܼ: ܡ̣ܢ ܐܵܕܝܼܵܐ ܩܲܡ ܡܲܛܝܵܐ ܠܝܼ ܒܝܼܫܬܵܐ: ܘܵܝ ܐܸܠܝܼ ܡ̣ܢ ܕܐܵܗܵܐ ܝܵܠܵܕ݇ܐ! ܠܘܲܝ ܡ̣ܢ ܕܐܵܗܵܐ ܓ̰ܘܲܢܩܵܐ: ܘܠܵܐ ܡ̣ܢ ܝܵܠܵܕ݇ܐ ܡܘܼܣܠܝܼܵܐ. ܡ̣ܢ ܐܵܕܝܼܵܐ ܡܘܼܕܝܼ ܥܲܒ̣ܕܸܢ؟ ܥܲܒ̣ܪܸܢ ܒܣܵܒ̣ܵܐ؟ ܣܵܒ̣ܵܐ ܒܸܬ ܓܵܫܸܩ ܒܗ̇ܘ ܓ̰ܘܲܢܩܵܐ: ܘܠܹܐ ܫܲܡܸܥ ܐܸܠܝܼ. ܥܲܒ̣ܪܸܢ ܒܓ̰ܘܲܢܩܵܐ؟ ܠܹܐ ܡܵܨܸܢ ܕܡܲܙܕܸܥܢܹܗ: ܐܲܝܟܼ ܕܡܘܼܦܟ̰ܸܠܠܝܼ ܠܫܸܡܥܘܿܢ ܕܝܼܠܹܗ ܫܲܬܐܸܣܬܵܐ ܕܥܹܕܬܵܐ. ܥܲܒ̣ܪܸܢ ܒܝܵܠܵܕ݇ܐ؟ ܒܘܼܫ ܙܥܘܿܪܵܐ ܡ̣ܢ ܕܐܵܗܵܐ ܠܲܝܬ: ܥܲܒ̣ܪܸܢ ܒܗܲܝܘܵܢ ܕܠܹܐ ܗܲܡܙܸܡܵܗ̇. ܡܘܼܕܝܼ ܥܲܒ̣ܕܸܢ؟ ܩܵܐ ܓܘܼܢܗܵܟܵܪܘܼܬܵܐ ܕܓܵܢܝܼ ܒܸܥܒ̣ܸܕܵܐ ܝ݇ܘܸܢ. ܘܕܝܼܘܵܢ ܥܲܠ ܓܵܢܝܼ ܡܲܚܙܘܼܝܹܐ ܝ݇ܘܸܢ: ܐܵܦܸܢ ܡ̣ܢ ܩܵܕ݇ܡ ܦܲܐܬܘܵܬܹ̈ܗܝ ܒܸܬ ܦܵܝܫܸܢ ܦܸܨܝܵܐ. ܐܵܡܸܪ ܕܲܝܵܢܵܐ: ܒܸܚܙܵܝܵܐ ܝ݇ܬܘܿܢ ܟܡܵܐ ܝ݇ܠܵܗ̇ ܚܲܪܵܫܘܼܬܹܗ ܕܐܵܗܵܐ ܝܵܠܵܕ݇ܐ؟ ܣܵܒܵܒ ܩܲܕ݇ܡܵܝܬܵܐ ܗܘܼܩܝܼܠܹܗ ܩܵܬܲܢ ܡܸܢܕܝܼܵـܢܹ̈ܐ ܟܸܣܝܹ̈ܐ: ܐܵܢܝܼ ܕܡ̣ܢ ܫܘܼܪܵܝܵܐ ܠܹܐ ܝ݇ܘܲܚ ܫܸܡܥܝܲܝܗܝ: ܗܵܝܓܵܗ ܪܘܼܚܵܐ ܕܝܼܠܵܗ̇ ܒܝܼـܹܗ ܩܵܕ݇ܡܲܢ ܝ݇ܠܵܗ̇.
ܗܵܝܓܵܗ ܩܲܕܝܼܫܵܐ ܡܵܪܝ ܩܘܼܪܝܵܩܘܿܣ ܨܘܼܠܹܐܠܹܗ ܨܠܘܿܬܵܐ: ܘܦܠܸܛܠܹܗ ܡ̣ܢ ܡܵܪܸܓܠܵܐ ܕܡܝܼ̈ܵܐ ܩܲܪܝܼܪܹ̈ܐ. ܘܫܩܸܠܹܗ ܓܵܘ ܐܝܼܕܹܗ ܘܡܘܼܪܝܸܣܠܹܗ ܥܲܠ ܪܲܒܘܼܬܵܐ ܕܓܵܢܵܬܹ̈ܐ: ܘܗ݇ܘܹܐܠܗ݇ܘܿܢ ܩܵܐ ܡܲܥܡܘܿܕܝܼܬܵܐ ܡܚܲܣܝܵܢܬܵܐ ܠܦܘܼܚܵܠܵܐ ܕܚܛܝܼܵܬܹ̈ܐ. ܘܦܠܸܛܠܹܗ ܪܸܬܚܵܐ ܡ̣ܢ ܡܵܪܸܓܠܵܐ: ܘܩܛܸܠܠܹܗ ܡ̣ܢ ܣܵܪ̈ܒܵܙܹܐ ܐܵܢܝܼ ܕܟܸܠܝܹ̈ܐ ܗ݇ܘܼܵܘ ܐܲܪܒܥܝܼܢ ܓܲܒ̣ܪܹ̈ܐ. ܗܵܝܓܵܗ ܐ݇ܡܸܪܹܗ ܕܲܝܵܢܵܐ: ܐܵܪܵܐ [do] ܐܘܼܦ ܠܢܘܼܪܵܐ ܒܸܓ̣ܠܵܒܵܐ ܗ݇ܘܼܵܐ ܚܲܪܵܫܘܼܬܵܐ؟ ܩܘܼܪܒܸܢܹܗ ܕܲܝܵܢܵܐ ܕܚܵܙܹܐ ܠܗ̇ܘ ܡܵܪܸܓܠܵܐ: ܘܫܩܸܠܠܹܗ ܩܲܕܝܼܫܵܐ ܩܘܼܪܝܵܩܘܿܣ ܒܬܠܵܬ݇ܐ ܨܸܒܥܵܬܹ̈ܗ ܡܝܼ̈ܵܐ ܡ̣ܢ ܗ̇ܘ ܡܵܪܸܓܠܵܐ: ܘܡܘܼܪܝܸܣܠܹܗ ܥܲܠ ܐܝܼܕܹܗ ܕܕܲܝܵܢܵܐ: ܗܲܪ ܒܗ̇ܝ ܥܕܵܢܵܐ ܦܝܼܫܠܵܗ̇ ܢܫܝܼܛܬܵܐ: ܐܲܚܟ̰ܝܼ ܓܲܪ̈ܡܹܐ ܦܝܼܫܠܗ݇ܘܿܢ ܒܝܼܘܼܗ̇. ܗܵܝܓܵܗ ܐ݇ܡܸܪܹܗ ܕܲܝܵܢܵܐ: ܝܵܠܵܕ݇ܐ ܐܵܕܝܼܵܐ ܝ݇ܕܸܥܠܝܼ ܒܫܪܵܪܵܐ ܐܲܠܵܗܵܐ ܝ݇ܠܹܗ ܒܝܼܘܼܟܼ: ܐܲܚܟ̰ܝܼ ܡܵܪܝܼ ܩܲܡ ܗܲܝܸܪܝܼ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܩܘܼܪܝܵܩܘܿܣ: ܝܵܕܸܥ ܝ݇ܢܵܐ ܕܠܹܐ ܡܗܲܝܡܸܢܸܬܿ: ܣܵܒܵܒ ܠܲܝܬ ܠܘܼܟܼ ܣܵܗ݇ܡܵܐ ܘܠܵܐ ܝܵܪܬܘܼܬܵܐ ܓܵܘ ܡܲܠܟܘܼܬܵܐ ܕܐܲܠܵܗܵܐ. ܐܝܼܢܵܐ ܒܘܼܬ ܕܐܵܢܝܼ ܕܐܵܕܝܼܵܐ ܡܗܘܼܡܢܹ̈ܐ ܝ݇ܢܵܐ ܒܸܬ ܒܲܣܡܸܢܘܼܟܼ. ܐܝܼܢܵܐ ܩܲܕܝܼܫܵܐ ܩܘܼܪܝܵܩܘܿܣ ܨܘܼܠܹܐܠܹܗ ܨܠܘܿܬܵܐ: ܗܲܪ ܒܗ̇ܝ ܥܕܵܢܵܐ ܒܣܸܡܠܵܗ̇ ܐܝܼܕܵܐ ܕܕܝܵܢܵܐ: ܟܲܕ ܠܐܲܠܵܗܹ̈ܐ ܕܝܼـܹܗ ܡܫܵܒܘܼܚܹܐ ܗ݇ܘܼܵܐ ܘܒܹܐܡܵܪܵܐ: ܡܵܘܕܘܼܝܹܐ ܝ݇ܘܸܢ ܐܸܠܵܘܟ̣ܘܿܢ ܝܵܐ ܐܲܠܵܗܹ̈ܐ: ܙܹܝܘܿܣ ܘܐܵܦܲܠܘܿܢ ܘܐܝܼܪܓ̣ܘܿܢܵܐ: ܕܒܘܼܬ ܕܝܼܵܘܟ̣ܘܿܢ ܒܸܟܠܵܝܵܐ ܝ݇ܠܹܗ ܥܵܠܡܵܐ. ܘܫܘܼܒ̣ܚܵܐ ܐܸܠܘܼܟܼ ܡܫܝܼܚܵܐ: ܒܲܪܝܵܢܵܐ ܕܟܠܲܝܗܝ ܒܸܪ̈ܝܵܬܹܐ. ܐܝܼܢܵܐ ܝܵܠܵܕ݇ܐ ܩܲܕܝܼܫܵܐ ܐ݇ܡܸܪܹܗ ܐܸܠܹܗ: ܩܲܕ݇ܡܵܝܬܵܐ ܒܫܹܐܕܹ̈ܐ ܡܵܘܕܝܼܠܘܼܟܼ: ܒܵܬ݇ܪ ܗܵܕܵܐ ܒܡܫܝܼܚܵܐ. ܠܹܐ ܡܵܨܹܐ ܪܹܓܵܐ ܕܦܵܠܸܚ ܠܬܪܹ̈ܝܢ ܡܵܪ̈ܵܘܵܬܹܐ: ܕܠܵܐ ܠܚܲܕ݇ ܡܲܚܸܒ ܘܠܗ̇ܘ ܐ݇ܚܹܪ݇ܢܵܐ ܣܵܢܹܐ. ܠܵܐ ܥܲܒ̣ܕܸܬܿ ܐܲܝܟܼ ܕܥܒ̣ܸܕܠܗ݇ܘܿܢ ܒܢܲܝ̈ ܝܼܣܪܵܝܸܠ ܒܝܵܘܡܵܢܹ̈ܐ ܕܐܵܚܵܙ ܡܲܠܟܵܐ: ܐܵܢܝܼ ܕܡ̣ܢ ܐܲܠܵܗܵܐ ܟܹܐ ܙܵܕܥܝܼ ܗ݇ܘܼܵܘ: ܘܠܨܵܢܵܡܹ̈ܐ ܕܸܒ̣ܚܵܐ ܟܹܐ ܥܵܒ̣ܕܝܼ ܗ݇ܘܼܵܘ.
ܗܵܝܓܵܗ ܐ݇ܙܸܠܹܗ ܕܲܝܵܢܵܐ ܠܚܕܵܐ ܕܘܼܟܬܵܐ ܕܡܘܼܬܸܒ̣ܬܵܐ ܗ݇ܘܼܵܐ ܒܝܼܵܗ̇ ܚܲܕ݇ ܟܹܐܦܵܐ: ܕܫܲܒ̣ܥܝܼ ܓܲܒ̣ܪܹ̈ܐ ܠܹܐ ܗ݇ܘܼܵܘ ܡܨܵܝܵܐ ܕܡܲܚܕܸܪܝܼܠܵܗ̇. ܘܦܘܼܩܸܕܠܹܗ ܕܲܝܵܢܵܐ: ܕܦܵܐܸܫ ܚܦܝܼܪܵܐ ܓܵܘ ܟܹܐܦܵܐ ܟܝܘܼܠܵܐ ܕܪܹ̈ܫܹܐ ܕܩܲܕܝܼܫܹ̈ܐ ܗܲܠ ܕܘܼܟܬܵܐ ܕܐ݇ܣܵܪܬܵܐ ܕܚܵܨܲܝܗܝ [ܗ̄:ܕ̄. ܬܲܢܓܲܝܗܝ]. ܘܦܘܼܩܸܕܠܹܗ ܕܕܵܪܝܼ ܓܵܘ ܗ̇ܝ ܟܹܐܦܵܐ ܦܪܸ̈ܙܠܹܐ: ܘܟܵܣܹܐܠܗ݇ܘܿܢ ܒܪܸܨܸܨ ܘܒܪܸܢܓ̰. ܘܗܵܘܹܐ ܛܸܓ̣ܢܵܐ [windmill] ܡ̣ܢ ܠܥܸܠܸܠ ܒܕܵܡܲܝܬܵܐ ܕܩܵܐܟ̣ܵܢ: ܘܟܹܐܦܵܐ ܡ̣ܢ ܠܐܸܠܬܸܚܬ: ܕܦܵܝܫܝܼ ܩܸܛܥܝܹ̈ܐ ܛܘܼܒ̣ܵܢܹ̈ܐ. ܗܵܝܓܵܗ ܡܲܠܲܐܟ̣ܵܐ ܕܡܵܪܝܵܐ: ܫܩܸܠܠܹܗ ܠܓܘܼܒܝܹ̈ܐ ܕܐܲܠܵܗܵܐ ܡ̣ܢ ܗ̇ܝ ܟܹܐܦܵܐ: ܘܗ̇ܝ ܟܹܐܦܵܐ ܕܸܥܪܵܗ̇ ܘܩܛܸܠܠܵܗ̇ ܚܲܡܫܸܡܐܵܐ ܓܵܢܵܬܹ̈ܐ. ܗܵܝܓܵܗ ܐ݇ܡܸܪܹܗ ܕܲܝܵܢܵܐ: ܕܐܸܢ ܒܣܲܝܦܵܐ ܠܵܐ ܩܲܛܠܸܢܠܗ݇ܘܿܢ: ܓ̰ܘܼܢܓ̰ܵܪܹ̈ܐ ܚܲܕ݇ ܡܸܢܕܝܼ ܠܹܐ ܥܵܒ̣ܕܝܼܠܗ݇ܘܿܢ. ܗܵܝܓܵܗ ܝܘܼܗ݇ܒ̣ܸܠܹܗ ܗܘܼܟܡܵܐ ܒܘܼܬ ܛܘܼܒ̣ܵܢܹ̈ܐ: ܕܒܓ̰ܲܠܕܘܼܬܵܐ ܒܣܲܝܦܵܐ ܦܝܵܫܝܼ ܡܝܼܬܹ̈ܐ. ܐܝܼܢܵܐ ܒܥܕܵܢܵܐ ܕܐ݇ܬܹܐܠܹܗ ܩܲܕܝܼܫܵܐ ܠܓܵܘܵܝ ܡ̣ܢ ܡܲܝܕܵܢ ܠܟ̰ܝܵܕܬܵܐ ܕܦܝܼܫܠܹܗ ܟ̰ܝܼܕܵܐ ܥܲܡ ܝܸܡܹܗ: ܗܵܝܓܵܗ ܡܲܠܲܐܟܹ̈ܐ ܟܘܼܪܡܸܟ̣ܠܗ݇ܘܿܢ ܠܦܲܓ̣ܪ̈ܲܝܗܝ ܕܩܲܕܝܼܫܹ̈ܐ ܡ̣ܢ ܟܠܲܝܗܝ ܓܹܒܵܢܲܝܗܝ: ܘܨܠܹܐܠܹܗ ܦܵܪܘܿܩܲܢ ܠܸܫܡܲܥܝܵܐ ܗܹܡܸܙܡܵܢܹ̈ܐ ܕܢܲܨܝܼܚܹ̈ܐ. ܐܝܼܢܵܐ ܐܲܠܵܗܵܐ ܕܩܸܪܹܗ ܠܸܒܵܘܵܬܹ̈ܐ ܗ݇ܘܹܐܠܹܗ ܪܵܙܝܼ ܒܨܠܘܿܬܵܐ ܕܝܵܠܵܕ݇ܐ: ܐܝܼܢܵܐ ܒܘܼܫ ܙܵܘܕܵܐ ܕܠܵܐ ܗܲܝܡܵܢܘܼܬܵܐ ܕܒܢܲܝ̈ܢܵܫܵܐ.
ܩܲܕܝܼܫܵܐ ܩܘܼܪܝܵܩܘܿܣ ܚܙܹܐܠܹܗ ܠܦܵܪܘܿܩܲܢ ܘܒܘܼܫܵܝܘܼܬܵܐ ܕܡܲܠܲܐܟ̣̈ـܹܐ ܐܵܢܝܼ ܕܒܹܐܬܵܝܵܐ ܗ݇ܘܼܵܘ ܠܟܸܣܠܹܗ ܘܒܸܣܓܼܵܕܵܐ ܠܝܼܫܘܿܥ ܦܵܪܘܿܩܲܢ ܘܐ݇ܡܸܪܹܗ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܝܵܐ ܡܵܪܝܼ: ܟܠ ܐܝܼܡܲܢ ܕܡܨܵܠܘܼܝܹܐ ܝ݇ܘܸܢ ܩܵܕ݇ܡܘܼܟܼ ܡܲܫܡܥܝܼ ܘܩܲܒܸܠ ܒܵܥܘܼܬܝܼ. ܐܸܢ ܠܵܐ ܫܲܡܥܸܬܿ ܐܸܠܝܼ: ܓܪܘܿܕܠܝܼ ܡ̣ܢ ܟܬܵܒ̣ܘܼܟܼ ܕܚܲܝܹ̈ܐ ܕܟܬܸܒ̣ܠܘܼܟܼ. ܐ݇ܡܸܪܹܗ ܐܸܠܹܗ ܡܵܪܲܢ: ܟܡܵܐ ܕܡܵܨܹܝܬܿ ܐܲܢ݇ܬܿ ܛܠܘܿܒ. ܐ݇ܡܸܪܹܗ ܣܵܗܕܵܐ ܩܲܕܝܼܫܵܐ: ܦܲܓ̣ܪܝܼ ܠܵܐ ܪܲܦܸܬܠܹܗ ܥܲܠ ܐܲܪܥܵܐ. ܐܝܼܢܵܐ ܟܠ ܕܡܨܵܠܹܐ ܕܥܵܒ̣ܸܕ ܕܘܼܟ̣ܪܵܢܝܼ ܒܩܲܕܝܼܫܘܼܬܵܐ: ܘܡ̣ܢ ܪܲܡܫܵܐ ܘܗܲܠ ܨܲܦܪܵܐ ܥܵܒ̣ܸܕ ܫܵܗܲܪܬܵܐ: ܗ̇ܘ ܝܵܘܡܵܐ ܕܐܵܢܵܐ ܒܝܼـܹܗ ܗ݇ܘܹܐܠܝܼ ܣܵܗܕܵܐ: ܗܲܒ̣݇ܠ ܠܹܗ ܗܵܩܵܐ ܘܦܘܼܪܥܵܢܵܐ ܛܵܒ̣ܵܐ ܒܫܡܲܝܵܐ: ܠܗ̇ܘ ܕܥܒ̣ܸܕܠܹܗ ܕܘܼܟ̣ܪܵܢܝܼ ܒܩܲܕܝܼܫܘܼܬܵܐ. ܘܐܵܢܝܼ ܕܡ̣ܢ ܪܲܡܫܵܐ ܘܗܲܠ ܠܨܲܦܪܵܐ ܒܸܥܒ̣ܵܕܵܐ ܝ݇ܢܵܐ ܫܵܗܲܪܬܵܐ ܒܝܵܘܡܵܐ ܕܒܝܼـܹܗ ܗ݇ܘܹܐܠܝܼ ܣܵܗܕܵܐ: ܒܫܵܦܵܩܲܬܘܼܟܼ ܝܵܐ ܚܲܢܵܢܵܐ ܒܲܪܸܟܼ ܠܒܵܬܲܝܗ̈ܝ. ܘܟܠ ܕܒܵܢܹܐ ܒܲܝܬܵܐ ܕܣܵܗܕܹ̈ܐ ܒܫܸܡܵܐ ܕܝܼܝܼ: ܠܵܐ ܩܲܪܒܸܢ ܒܗ̇ܝ ܕܘܼܟܬܵܐ: ܠܵܐ ܡܵܘܬܵܢܵܐ ܕܐ݇ܢܵܫܘܼܬܵܐ ܘܠܵܐ ܕܗܲܝܘܵܢ: ܘܠܵܐ ܟܸܦܢܵܐ ܕܠܲܚܡܵܐ ܘܠܵܐ ܨܗܵܝܬܵܐ ܕܡܝܼ̈ܵܐ: ܘܠܵܐ ܒܵܨܘܿܪܘܼܬܵܐ ܕܙܕܥܘܿܬܵܐ ܕܐܲܠܵܗܵܐ: ܘܠܵܐ ܥܵܒ̣ܸܪ ܬܵܡܵܐ ܕܲܝܘܵܐ ܒܝܼܫܵܐ. ܒܥܕܵܢܵܐ ܕܟܹܐ ܐܵܬܹܐ ܕܠܵܒܸܠܠܹܗ ܦܲܓ̣ܪܹܗ ܡ̣ܢ ܕܵܝܘܵܐ ܒܝܼܫܵܐ: ܘܗ̇ܘ ܥܵܒ̣ܸܪ ܠܒܲܝܬܵܐ ܕܣܵܗܕܹ̈ܐ: ܦܵܠܸܛ ܡܸܢܹܗ ܕܲܝܘܵܐ. ܘܡܸܕܪܹܐ ܠܵܐ ܩܲܪܒܸܢ ܐܸܠܹܗ. ܘܡܸܕܪܹܐ ܐ݇ܡܸܪܹܗ: ܝܵܐ ܡܵܪܲܢ ܗܲܒ̣݇ܠ ܠܐܵܢܝܼ ܕܒܸܟܬܵܒ̣ܵܐ ܝ݇ܢܵܐ ܐܲܢܹ̈ܐ ܬܲܫܥܝܼܵܬܹ̈ܐ ܦܘܼܪܥܵܢܵܐ ܕܗܵܩܵܐ ܓܵܘ ܡܲܠܟܘܼܬܵܐ ܕܫܡܲܝܵܐ. ܘܟܠ ܐܵܢܝܼ ܕܩܵܪܝܼ ܐܵܗܵܐ ܓ̣ܵܠܝܼܒܘܼܬܵܐ: ܗܲܒ̣݇ܠ ܠܗ݇ܘܿܢ ܗܵܩܵܐ ܒܝܵܘܡܵܐ ܐ݇ܚܵܪܵܝܵܐ: ܐܝܼܡܲܢ ܕܦܲܪܚܸܬܿ ܥܲܠ ܥܲܝܒ̣ܵܬܹ̈ܐ ܕܫܡܲܝܵܐ: ܘܦܝܵܫܵܐ ܝ݇ܘܸܬܿ ܚܸܙܝܵܐ ܠܟܠܲܝܗܝ ܐܘܼܓ̰ܵܓ̣̈ـܹܐ ܒܦܲܓ̣ܪܵܐ ܗ̇ܘ ܕܠܒ̣ܝܼܫܠܘܼܟܼ ܡܸܢܲܢ: ܘܣܪܸܒ̣ܠܘܼܟ ܒܟܲܦܪ̈ܵܢܹܐ ܠܝܼܛܹ̈ܐ ܕܟܦܸܪܗ݇ܘܿܢ ܒܝܼܘܼܟܼ: ܦܪܝܼܫܵܐܝܼܬ ܐܘܼܦ ܠܐܵܢܝܼ ܕܒܸܥܒ̣ܵܕܵܐ ܝ݇ܢܵܐ ܐܵܗܵܐ ܕܘܼܟ̣ܪܵܢܵܐ ܘܒܙܕܥܘܿܬܵܐ ܕܐܲܠܵܗܵܐ: ܥܒ̣ܘܿܕ ܠܗ݇ܘܿܢ ܕܪܲܚܩܸܢܝܼ ܡܸܢܲܝܗܝ ܟܠܲܝܗܝ ܚܲܝܠܵܘܵܬܹ̈ܗܝ ܕܒܝܼܫܵܐ: ܘܠܵܐ ܦܵܝܫܝܼ ܟ̰ܸܡܥܝܹ̈ܐ ܫܪ̈ܵܓ̣݇ܝܵܬܲܝܗܝ ܡ̣ܢ ܦܸܠܚܵܢܵܐ ܛܵܒ̣ܵܐ ܠܐܵܒܲܕ. ܒܲܪܸܟܼ ܒܪ̈ܲܚܡܘܼܟܼ ܦܸܠܚܵܢܵܐ ܕܐܝܼܕܲܝ̈ܗܝ: ܘܕܫܵܪܝܵܐ ܒܘܼܪܸܟܬܵܐ ܫܡܲܝܵܢܝܼܬܵܐ ܓܵܘ ܗ̇ܘ ܒܲܝܬܵܐ. ܐܝܼܢܵܐ ܟܠ ܕܢܵܕܸܪ ܢܸܕܪܵܐ ܘܥܵܒ̣ܸܕܠܹܗ ܒܫܸܡܝܼ: ܘܐܸܢ ܒܵܢܹܐ ܒܲܝܬܵܐ ܕܣܵܗܕܹ̈ܐ: ܘܒܸܣܦܵܪܵܐ ܝ݇ܠܹܗ ܠܗܲܝܲܪܬܵܐ: ܗܲܒ̣݇ܠܹܗ ܗܵܩܵܐ ܛܵܒ̣ܵܐ ܓܵܘ ܫܡܲܝܵܐ. ܝܵܐ ܡܵܪܝܵܐ ܐܸܢ ܐܝܼܬ ܐ݇ܢܵܫܵܐ ܪܵܒܵܐ ܝ݇ܢܵܐ ܚܛܝܼܵܬ̈ܘܼܗܝ: ܐܲܝܟܼ ܓܵܡܝܼ ܕܡ̣ܢ ܝܘܼܩܪܵܐ ܪܵܒܵܐ ܒܹܝܢܲܬ ܠܲܦܹ̈ܐ ܛܒܥܝܼܬܵܐ ܝ݇ܠܵܗ̇: ܘܗ̇ܘ ܡܵܛܹܐ ܠܩܘܼܦܪܵܢܵܐ ܕܒܲܝܬܵܐ ܕܣܵܗܕܹ̈ܐ: ܘܥܵܒ̣ܸܕ ܫܵܗܲܪܬܵܐ ܓܵܘܹܗ ܫܲܒ̣ܥܵܐ ܝܵܘܡܵܢܹ̈ܐ ܘܨܵܐܸܡ ܨܵܘܡܵܐ ܘܨܵܠܹܐ: ܘܛܵܠܸܒ ܡ̣ܢ ܟܠܹܗ ܠܸܒܹܗ ܘܡ̣ܢ ܟܠܵܗ̇ ܓܵܢܹܗ: ܐܲܢ݇ܬܿ ܝܵܐ ܡܵܪܝܼ ܒܪ̈ܲܚܡܘܼܟܼ ܕܐܝܼܢܵܐ ܪܵܒܵܐ ܦܲܚܠܸܬ ܠܗ݇ܘܿܢ ܚܛܝܼܵܬ̈ܘܼܗܝ ܪ̈ܵܒܹܐ. ܐ݇ܡܸܪܹܗ ܐܸܠܹܗ ܡܫܝܼܚܵܐ ܡܵܪܲܢ: ܟܠ ܡܸܢܕܝܼ ܕܛܠܸܒܠܘܼܟܼ ܝܘܼܗ݇ܒ̣ܸܠܝܼ ܐܸܠܘܼܟܼ: ܣܵܒܵܒ ܡܘܼܬܸܒ̣ܠܝܼ ܬܠܵܬܡܐܵܐ ܡܲܠܲܐܟ̣̈ـܹܐ ܕܗܵܘܝܼ ܠܥܸܠܸܠ ܩܵܐ ܣܵܗܕܘܼܬܵܐ ܕܝܼܘܼܟܼ. ܘܩܲܒܠܝܼ ܒܵܥܘܼܝܵܬܹ̈ܐ ܕܒܢܲܝ̈ܢܵܫܵܐ: ܘܒܗܲܝܲܪ̈ܝܵܬܹܐ ܕܕܝܼܘܼܟܼ. ܕܝܵܕܥܸܬܿ ܕܡ̣ܢ ܝܲܡܝܼܢܝܼ ܒܸܬ ܟܵܠܹܝܬܿ ܥܲܡ ܪܹܫܵܐ ܕܡܲܠܲܐܟ̣̈ـܹܐ: ܘܒܸܬ ܝܵܗ݇ܒ̣ܸܬܿ ܗܲܝܲܪܬܵܐ ܠܟܠ ܕܩܵܪܹܐܠܘܼܟܼ. ܕܦܲܓ̣ܪܘܼܟܼ ܡܘܼܬܸܒ̣ܠܝܼ ܥܲܠ ܡܲܪܟܲܒ̣ܬܵܐ [ܟܵܠܸܣܟܵܐ: ܐܵܪܵܒܵܢܵܐ] ܕܫܡܲܝܵܐ: ܘܠܹܐ ܦܵܐܸܫ ܡܘܼܫ݇ܟ̰ܚܵܐ ܒܲܪܢܵܫܵܐ ܓܵܘ ܒܸܪ̈ܝܹܐ ܕܒܲܟ̣ܬܵܬܹ̈ܐ ܕܓܘܼܪܵܐ ܝ݇ܠܹܗ ܡܸܢܘܼܟܼ: ܐܸܠܵܐ ܐܸܢ ܝܘܿܚܲܢܵܢ ܡܲܥܡܸܕܵܢܵܐ. ܘܐܲܢ݇ܬܿ ܝܵܠܵܕ݇ܐ ܩܲܕܝܼܫܵܐ: ܡ̣ܢ ܡܘܼܠܟܵܢܵܐ [ܩܵܘܠܵܐ] ܦܝܼܫܠܘܼܟܼ ܝܼ݇ܠܝܼܕܵܐ. ܐܝܼܢܵܐ ܡܵܪܲܢ ܟܲܕ ܐܲܢܹ̈ܐ ܗܘܼܡܙܸܡܠܹܗ ܥܲܡܹܗ: ܒܘܼܪܒܸܙܵܝܠܹܗ ܠܡܲܠܲܐܟ̣̈ـܹܐ ܠܒܘܼܫܵܝܘܼܬܵܐ ܕܐܵܢܝܼ ܐ݇ܢܵܫܹ̈ܐ. ܐܝܼܢܵܐ ܥܕܵܢܵܐ ܝܼܗ݇ܘܼܵܐ ܣܵܥܲܬ ܐܸܫܬܵܐ ܒܠܲܝܠܹܐ: ܘܗܘܹܐܠܹܗ ܒܲܗܪܵܐ ܒܗ̇ܘ ܠܲܝܠܹܐ: ܘܗܸܟ̰ ܐ݇ܢܵܫܵܐ ܠܵܐ ܚܙܹܐܠܹܗ ܫܒ̣ܘܿܩ ܡ̣ܢ ܕܐܵܢܝܼ ܣܵܗܕܹ̈ܐ.
ܫܩܸܠܠܹܗ ܩܲܕܝܼܫܵܐ ܡܵܪܝ ܩܘܼܪܝܵܩܘܿܣ ܥܲܡ ܝܸܡܹܗ ܟܠܝܼܠܵܐ ܕܣܵܗܕܘܼܬܵܐ ܒܦܲܠܓܵܐ ܕܠܲܝܠܹܐ: ܕܚܲܡܫܲܥܣܲܪ ܒܝܲܪܚܵܐ ܕܬܲܡܘܼܙ: ܘܦܝܼܫܠܗ݇ܘܿܢ ܛܘܼܡܪܹ̈ܐ ܒܝܼܲܕ ܐ݇ܢܵܫܹ̈ܐ ܡܚܘܼܣܝܹ̈ܐ ܘܩܲܕܝܼܫܹ̈ܐ: ܕܘܼܟ̣ܪܵܢܲܝܗܝ ܠܒܘܼܪܸܟܬܵܐ. ܨܠܵܘܵܬܲܝ̈ܗܝ ܕܩܲܕܝܼܫܹ̈ܐ ܗܵܘܝܼ ܥܲܠ ܟܠܲܝܗܝ ܥܵܠܡܵܐ: ܘܥܲܠ ܩܵܪܘܿܝܵܐ ܘܥܲܠ ܫܲܡܥܵܢܵܐ: ܘܥܲܠ ܟܲܬܒ̣ܵܢܵܐ ܘܥܲܠ ܡܲܟܬܸܒ̣ܵܢܵܐ: ܘܥܲܠ ܓ̰ܵܡܵܥܲܬ ܟܠܹܗ ܐܵܢܝܼ ܕܙܘܼܝܸܚܠܗ݇ܘܿܢ ܕܘܼܟ̣ܪܵܢܵܐ ܕܩܲܕܝܼܫܹ̈ܐ: ܘܥܲܠ ܕܲܝܪܵܐ ܕܒܝܼـܹܗ ܡܘܼܬܸܒ̣ܬܵܐ ܝ݇ܠܵܗ̇ ܚܲܙܢܵܐ ܕܓܲܪ̈ܡܲܝܗܝ: ܐܵܕܝܼܵܐ ܘܒܟܠ ܙܲܒ̣ܢܵܐ ܘܠܐܵܒܲܕ ܐܲܒܵܕܝܼܢ: ܐܵܡܹܝܢ.
ܚܬܸܡܠܵܗ̇ ܠܸܟܬܵܒ̣ܵܐ ܬܲܫܥܝܼܬܵܐ ܕܓ̣ܵܠܝܼܒܘܼܝܵܬܹ̈ܐ ܐܲܠܵܗܵܝܹ̈ܐ ܕܩܲܕܝܼܫܵܐ ܡܵܪܝ ܩܘܼܪܝܵܩܘܿܣ ܣܵܗܕܵܐ ܢܲܨܝܼܚܵܐ ܘܕܝܸܡܹܗ ܝܘܿܠܹܝܛܹܐ: ܕܗܘܹܐܠܗ݇ܘܿܢ ܣܵܗܕܹ̈ܐ ܒܝܵܘܡܵܢܹ̈ܐ ܕܨܸܗܝܵܐ ܠܕܸܡܵܐ ܡܲܟܣܸܡܝܵܢܘܿܣ ܟܵܦܘܿܪܵܐ. ܘܠܡܵܪܲܢ ܣܓ̣ܝܼܕܹ̈ܐ ܝ݇ܢܵܐ ܪ̈ܲܚܡܘܼܗܝ ܫܘܼܒ̣ܚܵܐ ܘܐܝܼܩܵܪܵܐ ܘܫܵܟܲܪܬܵܐ ܘܣܓ̣ܵܕܬܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ܀
♱♱♱♱♱♱♱♱♱