♰ ܟܬܵܒܼܵܐ ܕܝܼܠܝܼܕܘܼܬܹܗ ܕܝܼܫܘܿܥ ܡܫܝܼܚܵܐ: ܒܪܘܿܢܹܗ ܕܕܵܘܝܼܕ: ܒܪܘܿܢܹܗ ܕܐܲܒܼܪܵܗܵܡ: ܐܲܒܼܪܵܗܵܡ ܡܘܼܠܸܕܠܹܗ ܠܐܝܼܣܚܵܩ: ܐܝܼܣܚܵܩ ܡܘܼܠܸܕܠܹܗ ܠܝܲܥܩܘܿܒܼ: ܝܲܥܩܘܿܒܼ ܡܘܼܠܸܕܠܹܗ ܠܝܼܗܘܼܕܵܐ ܘܠܐܲܚܘܿܢ̈ܘܵܬܘܼܗܝ: ܝܼܗܘܼܕܵܐ ܡܘܼܠܸܕܠܹܗ ܠܦܲܪܨ ܘܠܙܲܪܚ ܡ̣ܢ ܬܵܡܲܪ. ܦܲܪܨ ܡܘܼܠܸܕܠܹܗ ܠܚܸܨܪܘܿܢ: ܘܚܸܨܪܘܿܢ ܡܘܼܠܸܕܠܹܗ ܠܐܵܪܵܡ. ܐܵܪܵܡ ܡܘܼܠܸܕܠܹܗ ܠܥܲܡܝܼܢܵܕܵܒܼ. ܥܲܡܝܼܢܵܕܵܒܼ ܡܘܼܠܸܕܠܹܗ ܠܢܸܚܫܘܿܢ. ܢܸܚܫܘܿܢ ܡܘܼܠܸܕܠܹܗ ܠܣܲܠܡܘܿܢ. ܣܲܠܡܘܿܢ ܡܘܼܠܸܕܠܹܗ ܠܒܵܥܲܙ ܡ̣ܢ ܪܵܚܵܒܼ. ܒܵܥܵܙ ܡܘܼܠܸܕܠܹܗ ܠܥܘܼܒܼܝܼܕ ܡ̣ܢ ܪܥܘܿܬ. ܥܘܿܒܼܝܼܕ ܡܘܼܠܸܕܠܹܗ ܠܐܝܼܫܲܝ. ܐܝܼܫܲܝ ܡܘܼܠܸܕܠܹܗ ܠܕܵܘܝܼܕ ܡܲܠܟܵܐ. ܕܵܘܝܼܕ ܡܘܼܠܸܕܠܹܗ ܠܫܠܹܝܡܘܿܢ ܡ̣ܢ ܒܲܟܼܬܹܗ ܕܐܘܿܪܝܼܵܐ. ܫܠܹܝܡܘܿܢ ܡܘܼܠܸܕܠܹܗ ܠܸܪܚܸܒܼܥܲܡ: ܪܚܸܒܼܥܲܡ ܡܘܼܠܸܕܠܹܗ ܠܐܲܒܼܝܼܵܐ، ܐܲܒܼܝܼܵܐ ܡܘܼܠܸܕܠܹܗ ܠܐܵܣܵܐ: ܐܵܣܵܐ ܡܘܼܠܸܕܠܹܗ ܠܝܵܗܘܿܫܵܦܵܛ: ܝܵܗܘܼܫܵܦܵܛ ܡܘܼܠܸܕܠܹܗ ܠܝܘܿܪܵܡ: ܝܘܿܪܵܡ ܡܘܼܠܸܕܠܹܗ ܠܥܘܿܙܝܼܵܐ: ܥܘܿܙܝܼܵܐ ܡܘܼܠܸܕܠܹܗ ܠܝܘܿܬܵܡ: ܝܘܿܬܵܡ ܡܘܼܠܸܕܠܹܗ ܠܐܵܚܵܙ: ܐܵܚܵܙ ܡܘܼܠܸܕܠܹܗ ܠܚܹܙܲܩܝܵܐ: ܚܹܙܲܩܝܵܐ ܡܘܼܠܸܕܠܹܗ ܠܡܢܲܫܹܐ: ܡܢܲܫܹܐ ܡܘܼܠܸܕܠܹܗ ܠܐܲܡܘܿܢ: ܐܲܡܘܿܢ ܡܘܼܠܸܕܠܹܗ ܠܝܘܿܫܝܼܵܐ: ܝܘܿܫܝܼܵܐ ܡܘܼܠܸܕܠܹܗ ܠܝܘܿܟܲܢܝܵܐ ܘܠܐܲܚܘܿܢ̈ܘܵܬܘܼܗܝ ܒܓܵܠܘܼܬܵܐ ܕܒܵܒܸܠ. ܘܡ̣ܢ ܒܵܬ݇ܪ ܓܵܠܘܼܬܵܐ ܕܒܵܒܸܠ. ܝܘܿܟܲܢܝܵܐ ܡܘܼܠܸܕܠܹܗ ܠܫܹܠܲܬܐܹܝܠ: ܘܫܹܠܲܬܐܹܝܠ ܡܘܼܠܸܕܠܹܗ ܠܙܘܼܪܒܵܒܸܠ: ܘܙܘܼܪܒܵܒܸܠ ܡܘܼܠܸܕܠܹܗ ܠܐܲܒܼܝܼܘܿܕ ܐܲܒܼܝܼܘܿܕ ܡܘܼܠܸܕܠܹܗ ܠܐܸܠܝܵܩܝܼܡ: ܐܸܠܝܵܩܝܼܡ ܡܘܼܠܸܕܠܹܗ ܠܥܵܙܘܿܪ: ܥܵܙܘܿܪ ܡܘܼܠܸܕܠܹܗ ܠܙܵܕܘܿܩ: ܙܵܕܘܿܩ ܡܘܼܠܸܕܠܹܗ ܠܐܲܟܼܝܼܢ: ܐܲܟܼܝܼܢ ܡܘܼܠܸܕܠܹܗ ܠܐܹܠܝܼܘܿܕ: ܐܹܠܝܼܘܿܕ ܡܘܼܠܸܕܠܹܗ ܠܐܹܠܝܼܥܵܙܲܪ: ܐܹܠܝܼܥܵܙܲܪ ܡܘܼܠܸܕܠܹܗ ܠܡܵܬܲܢ: ܡܵܬܲܢ ܡܘܼܠܸܕܠܹܗ ܠܝܲܥܩܘܿܒܼ: ܝܲܥܩܘܿܒܼ ܡܘܼܠܸܕܠܹܗ ܠܝܵܘܣܸܦ ܓܲܒܼܪܵܗ̇ ܕܡܲܪܝܲܡ: ܕܡܸܢܵܗ̇ ܦܝܼܫܠܹܗ ܝܠܝܼܕܵܐ ܝܑܼܫܘܿܥ ܕܦܝܵܫܵܐ ܝܠܹܗ ܩܸܪܝܵܐ ܡܫܝܼܚܵܐ. ܗܲܕܟܼܵܐ ܟܠܲܝܗܝ ܫܲܪ̈ܒܼܵܬܵܐ: ܡ̣ܢ ܐܲܒܼܪܵܗܵܡ ܗܲܠ ܠܕܵܘܝܼܕ ܐܲܪܒܲܥܸܣܲܪ ܫܲܪ̈ܒܼܵܬܵܐ. ܘܡ̣ܢ ܕܵܘܝܼܕ ܗܲܠ ܠܣܠܵܒܬܵܐ ܕܒܵܒܸܠ ܐܲܪܒܲܥܣܲܪ ܫܲܪ̈ܒܼܵܬܵܐ. ܘܡ̣ܢ ܣܠܵܒܬܵܐ ܕܒܵܒܸܠ ܗܲܠ ܠܡܫܝܼܚܵܐ ܐܲܪܒܲܥܸܣܲܪ ܫܲܪ̈ܒܼܵܬܵܐ. ܐܝܼܢܵܐ ܡܵܘܠܵܕܵܐ ܕܝܼܫܘܿܥ ܡܫܝܼܚܵܐ ܗܲܕܟܼܵܐ ܝܗ݇ܘܵܐ: ܟܲܕ ܛܠܝܼܒܬܵܐ ܝܗ݇ܘܵܐ ܡܲܪܝܲܡ ܝܸܡܹܗ ܠܝܵܘܣܸܦ: ܗܵܠܵܐ ܠܵܐ ܡܫܵܘܬܦܹܐ ܦܝܼܫܠܵܗ̇ ܡܫ݇ܟ̰ܝܼܚܬܵܐ ܒܛܝܼܢܬܵܐ ܡ̣ܢ ܪܘܼܚܵܐ ܕܩܘܼܕܫܵܐ: ܐܝܼܢܵܐ ܝܵܘܣܸܦ ܒܲܥܠܵܗ̇ ܟܹܐܢܵܐ ܝܗ݇ܘܵܐ: ܘܠܵܐ ܒܣܝܼܡܠܵܐܠܹܗ ܕܥܵܒܼܸܕܠܵܗ̇ ܐܸܫܟܵܪܵܐ: ܘܬܘܼܚܡܸܢܹܗ ܕܒܛܸܫܘܵܐ ܫܵܪܹܐܠܵܗ̇: ܐܝܼܢܵܐ ܟܲܕ ܐܲܢܹܐ ܬܘܼܚܡܸܢܹܗ: ܦܝܼܫܠܹܗ ܚܸܙܝܵܐ ܐܸܠܹܗ ܡܲܠܲܐܟܼܵܐ ܕܡܵܪܝܵܐ ܒܚܸܠܡܵܐ ܘܐ݇ܡܝܼܪܹܗ ܐܸܠܹܗ: ܝܵܘܣܸܦ ܒܪܘܿܢܵܐ ܕܕܵܘܝܼܕ: ܠܵܐ ܙܲܕܥܸܬ ܠܸܫܩܵܠܵܐ ܠܡܲܪܝܲܡ ܒܲܟܼܬܘܼܟܼ: ܣܵܒܵܒ ܗ̇ܘ ܕܦܵܐܸܫ ܝܠܝܼܕܵܐ ܒܝܼܵܗ̇ ܡ̣ܢ ܪܘܼܚܵܐ ܕܩܘܼܕܫܵܐ ܝܠܹܗ: ܐܝܼܢܵܐ ܒܸܕ ܝܲܠܕܵܐ ܒܪܘܿܢܵܐ: ܘܒܸܕ ܩܵܪܸܬ ܫܸܡܹܗ ܝܑܼܫܘܿܥ. ܣܵܒܵܒ ܗ̇ܘ ܒܸܕ ܡܲܚܹܐ ܠܥܲܡܹܗ ܡ̣ܢ ܚܛܝܼܵܬܲܝ̈ܗܝ. ܐܝܼܢܵܐ ܐܵܗܵܐ ܟܠܵܗ̇ ܕܗ݇ܘܹܐܠܵܗ̇: ܕܦܵܐܸܫ ܬܘܼܡܸܡܵܐ ܡܸܢܕܝܼ ܕܦܝܼܫܠܹܗ ܐ݇ܡܝܼܪܵܐ ܡ̣ܢ ܡܵܪܝܵܐ ܒܝܲܕ ܢܒܼܝܼܵܐ: ܕܗܵܐ ܒܬܘܼܠܬܵܐ ܒܸܬ ܒܲܛܢܵܐ ܘܒܸܬ ܝܲܠܕܵܐ ܒܪܘܿܢܵܐ: ܘܒܸܬ ܩܵܪܝܼ ܫܸܡܹܗ ܥܲܡܵܢܘܼܐܹܝܠ: ܕܦܝܵܫܵܐ ܝܠܹܗ ܡܬܘܼܪܓܸܡܵܐ ܥܲܡܲܢ ܐܲܠܵܗܲܢ. ܐܝܼܢܵܐ ܟܲܕ ܩܝܼܡܠܹܗ ܝܵܘܣܸܦ ܡ̣ܢ ܫܸܢܬܹܗ: ܥܒܼܝܼܕܠܹܗ ܕܲܐܟܼܝܼ ܕܦܩܝܼܕܠܹܗ ܐܸܠܹܗ ܡܲܠܲܐܟܼܹܗ ܕܡܵܪܝܵܐ: ܘܠܘܼܒܠܵܐܠܹܗ ܠܒܲܟܼܬܹܗ: ܘܠܵܐ ܝܕܝܼܥܐܠܹܗ ܗܲܠ ܕܝܠܝܼܕܠܵܗ̇ ܠܒܪܘܿܢܵܗ̇ ܒܘܼܟܼܪܵܐ، ܘܩܪܹܐܠܵܗ̇ ܫܸܡܹܗ ܝܑܼܫܘܿܥ.

♱♱♱♱♱♱♱♱♱♱♱♱♱♱♱♱♱♱♱♱

ܐَܚܪܢَܐ ܠܗ ܠܕܘܟܼܪܢܐ ܕܡܪܬܿܝ ܡܪܝܡ

ܕܡܬܩܪܐ ܒܐܝܪ

ܝܘܚܢܢ ܒ: 12، ܡܬܝ ܝܓ: 53‐57، ܝܒ: 46‐50

ܝܘܚܢܢ ܝܛ: 26‐28، ܡܬܝ ܐ: 46‐57

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܒܵܬܲܪ ܐܵܗܵܐ ܨܠܹܐܠܹܗ ܝܑܼܫܘܿܥ ܠܟܦܵܪܢܵܚܘܿܡ: ܗ̇ܘ ܘܝܸܡܹܗ ܘܐܲܚܘܿܢ̈ܘܵܬܘܼ̈ܗܝ ܘܬܲܠܡܝܼܕ̈ܘܼܗܝ. ܘܬܵܡܵܐ ܗ݇ܘܹܐܠܗ݇ܘܿܢ ܚܲܕ݇ܟܡܵܐ ܝܵܘܡܵܢܹ̈ܐ. ܘܫܘܼܢܹܐܠܹܗ ܡ̣ܢ ܬܵܡܵܐ ܝܑܼܫܘܿܥ ܘܐ݇ܬܹܐܠܹܗ ܠܡܕܝܼܢ݇ܬܹܗ: ܘܡܵܠܸܦ ܗ݇ܘܵܐ ܠܗ݇ܘܿܢ ܓܵܘ ܟܢܘܼܫܝܵܬܲܝ̈ܗܝ: ܕܲܐܟܼܝܼ ܕܥܲܓ̰ܒܝܼ ܗ݇ܘܵܘ ܘܐܲܡܪܝܼ: ܐܵܗܵܐ ܡܐܲܝܟܵܐ ܠܹܗ ܗܵܕܹܐ ܚܸܟܼܡܬܵܐ ܘܚܲܝܠܹ̈ܐ؟ ܠܹܐ ܝܗ݇ܘܵܐ ܐܵܗܵܐ ܒܪܘܿܢܵܐ ܕܢܲܓܵܪܵܐ؟ ܠܵܐ ܝܸܡܹܗ ܦܝܵܫܵܐ ܝܠܵܗ̇ ܩܪܝܼܬܵܐ ܡܲܪܝܲܡ؟ ܘܐܲܚܘܿܢܘܵܬܘܼ̈ܗܝ ܝܲܥܩܘܿܒܼ ܘܝܘܿܣܹܐ ܘܫܸܡܥܘܿܢ ܘܝܼܗܘܼܕܵܐ؟ ܘܚܲܬܘܵܬܹ̈ܗ ܟܠܲܝܗܝ ܠܵܐ ܗܵܐ ܠܘܵܬܲܢ ܝܢܵܐ؟ ܡܐܲܝܟܵܐ ܠܹܗ ܠܐܵܗܵܐ ܟܠܲܝܗܝ ܐܲܢܹܐ؟ ܘܟܲܦܪܝܼ ܗ݇ܘܵܘ ܒܝܼܹܗ. ܐܝܼܢܵܐ ܟܲܕ ܗ̇ܘ ܡܵܠܘܼܦܹܐ ܗ݇ܘܵܐ ܠܟܸܢܫܹ̈ܐ: ܐ݇ܬܹܐܠܗ݇ܘܿܢ ܝܸܡܹܗ ܘܐܲܚܘܿܢܘܵܬܘܼ̈ܗܝ ܟܠܹܐܠܗ݇ܘܿܢ ܠܒܼܲܕܲܪ: ܘܒܥܵܝܵܐ ܕܗܲܡܙܸܡܝܼ ܥܲܡܹܗ: ܐܝܼܢܵܐ ܐ݇ܡܝܼܪܹܗ ܐܸܠܹܗ ܚܲܕ݇ ܐ݇ܢܵܫܵܐ: ܗܵܐ ܝܸܡܘܼܟܼ ܘܐܲܚܘܿܢܘܵܬܘܼ̈ܟܼ ܟܸܠܝܹܐ ܝܢܵܐ ܠܒܼܲܕܲܪ: ܘܒܥܵܝܵܐ ܝܢܵܐ ܕܗܲܡܙܸܡܝܼ ܥܲܡܘܼܟܼ: ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܝܼܪܹܗ ܠܡ̇ܢ ܕܐ݇ܡܝܼܪܹܗ ܐܸܠܹܗ: ܡܵܢܝܼ ܝܠܵܗ̇ ܝܸܡܝܼ ܘܡܵܢܝܼ ܝܢܵܐ ܐܲܚܘܿܢܘܵܬ̈ܝܼ؟ ܘܦܘܼܫܛܵܐܠܹܗ ܐܝܼܕܹܗ ܠܘܵܬ ܬܲܠܡܝܼ̈ܕܘܼܗܝ ܘܐ݇ܡܝܼܪܹܗ: ܗܵܐ ܝܸܡܝܼ ܘܗܵܐ ܐܲܚܘܿܢ̈ܘܵܬܝܼ. ܐܝܼܢܵܐ ܟܠ ܐ݇ܢܵܫܵܐ ܕܥܵܒܼܸܕ ܨܸܒܼܝܵܢܹܗ ܕܒܵܒܝܼ ܕܒܲܫܡܲܝܵܐ: ܗ̇ܘ ܝܼܠܹܗ ܐܲܚܘܿܢܝܼ ܘܚܵܬܝܼ ܘܝܸܡܝܼ. ܘܟܲܕ ܐܲܢܹܐ ܗܲܡܙܘܼܡܹܐ ܝܗ݇ܘܵܐ: ܡܘܼܪܸܡܠܵܗ̇ ܚܕܵܐ ܒܲܟܼܬܵܐ ܩܵܠܘܼܗ̇ ܡ̣ܢ ܟܸܢܫܵܐ ܘܐ݇ܡܝܼܪܵܗ̇ ܐܸܠܹܗ: ܛܘܼܒܼܵܐ ܠܟܲܪ݇ܣܵܐ ܕܩܲܡ ܛܲܥܢܵܐ ܠܘܼܟܼ: ܘܠܒܸܙܵܙܹ̈ܐ ܕܩܲܡ ܡܲܐܡܨܝܼܠܘܼܟܼ: ܐܵܡܸܪ ܐܸܠܵܗ̇ ܗ̇ܘ: ܛܘܼܒܼܵܐ ܠܐܵܢܝܼ ܕܫܲܡܥܝܼ ܗܹܡܸܙܡܵܢ ܕܐܲܠܵܗܵܐ ܘܢܲܛܪܝܼܠܵܗ̇: ܐܝܼܢܵܐ ܝܑܼܫܘܿܥ ܚܸܙܝܵܐ ܠܹܗ ܠܝܸܡܹܗ ܘܠܗ̇ܘ ܬܲܠܡܝܼܕܵܐ ܕܡܲܚܸܒ ܗ݇ܘܵܐ ܕܟܸܠܝܵܐ: ܘܐ݇ܡܝܼܪܹܗ ܠܝܸܡܹܗ: ܒܲܟܼܬܵܐ ܗܵܐ ܒܪܘܿܢܹܟܼܝ: ܘܐ݇ܡܝܼܪܹܗ ܠܗ̇ܘ ܬܲܠܡܝܼܕܵܐ ܗܵܐ ܝܸܡܘܼܟ: ܘܡ̣ܢ ܗ̇‌ܝ ܣܵܥܵܬ ܠܘܼܒܠܵܐܠܹܗ ܗ̇ܘ ܬܲܠܡܝܼܕܵܐ ܠܘܵܬܹܗ. ܘܐ݇ܡܝܼܪܵܗ̇ ܡܲܪܝܲܡ ܓܲܪܘܘܼܣܹܐ ܝܠܵܗ̇ ܓܵܢܝܼ ܠܡܵܪܝܵܐ: ܘܚܕܹܐ ܠܵܗ̇ ܪܘܼܚܝܼ ܒܐܲܠܵܗܵܐ ܡܲܚܝܼܵܢܝܼ: ܕܚܝܼܪܹܗ ܒܡܲܟܝܼܟܼܘܼܬܵܐ ܕܐܲܡܬܹܗ: ܣܵܒܵܒ ܗܵܐ ܡ̣ܢ ܐܵܕܝܼܵܐ: ܛܘܼܒܼܵܐ ܒܸܬ ܝܲܗ݇ܒܼܝܼ ܠܝܼ ܟܠܲܝܗܝ ܫܲܪ̈ܒܼܵܬܹܐ: ܕܥܒܼܝܼܕܠܹܗ ܠܟܸܣܠܝܼ ܫܘܼܓَܼܠܹ̈ܐ ܓܘܼܪܹܐ ܗ̇ܘ ܕܚܲܝܠܵܢܵܐ ܝܠܹܗ ܘܩܲܕܝܼܫܵܐ ܫܸܡܹܗ: ܘܚܢܵܢܹܗ ܠܕܵܪܹ̈ܐ ܘܫܲܪ̈ܒ̣ܵܬܵܐ: ܥܲܠ ܐܵܢܝܼ ܕܙܲܕܥܝܼ ܡܸܢܹܗ: ܥܒܼܝܼܕܠܹܗ ܙܵܟܼܘܼܬܵܐ ܒܕܪܵܥܹܗ ܘܒܘܼܪܒܸܙܠܹܗ ܠܚܬܝܼܪܹ̈ܐ ܒܪܸܥܝܵܢܵܐ ܕܠܸܒܲܝܗܝ. ܚܘܼܪܙܸܦܠܹܗ ܠܙܲܪ̈ܒܵܢܹ̈ܐ ܡ̣ܢ ܟܘܼܪ̈ܣܵܘܵܬܹܐ: ܘܡܘܼܪܸܡܠܹܗ ܠܡܲܟܝܼܟܼܹ̈ܐ. ܟܦܝܼܢܹ̈ܐ ܡܘܼܣܒܼܝܼܥܠܹܗ ܛܵܒܼܵܬܹ̈ܐ: ܘܥܲܬܝܼܪܹ̈ܐ ܫܪܹܐܠܹܗ ܣܦܝܼܩܵܐܝܼܬ: ܗܘܼܝܸܪܹܗ ܠܝܼܣܪܵܝܸܠ ܥܲܒܼܕܹܗ: ܘܕܟܼܝܼܪܹܗ ܚܢܵܢܹܗ: ܐܲܝܟܼ ܕܗܘܼܡܙܸܡܠܹܗ ܥܲܡ ܐܲܒܼܵܗܲܝ̈ܢ: ܥܲܡ ܐܲܒܼܪܵܗܵܡ ܘܥܲܡ ܙܲܪܥܹܗ ܠܥܵܠܲܡ. ܐܝܼܢܵܐ ܥܘܼܪܩܸܠܵܗ̇ ܡܲܪܝܲܡ ܠܘܵܬ ܐܹܠܝܼܫܒܼܲܥ ܐܲܝܟܼ ܬܠܵܬܵܐ ܝܲܪ̈ܚܹܐ. ܘܕܥܝܼܪܵܗ̇ ܠܒܲܝܬܵܗ̇.

♱♱♱♱♱♱♱♱♱♱♱♱♱

ܕܘܟܼܪܢܐ ܕܡܪܬܿܝ ܡܪܝܡ ܕܗܘ݁ܐ ܒܩܝܛܐ

ܠܘܩܐ ܐ: 26 ‐ 57

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♱♱♱♱♱♱♱♱♱♱♱♱♱

ܚܕܒܫܒܐ ܕܬܼܪܝܢ ܕܒܬܼܪ ܕܝܠܕܐ

ܠܘܩܐ ܒ: 21 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܘܟܲܕ ܬܘܼܡܸܡܠܗ݇ܘܿܢ ܬܡܵܢܝܵܐ ܝܵܘܡܵܢܹ̈ܐ ܕܦܵܐܸܫ ܓܙܝܼܪܵܐ ܝܲܠܵܕ݇ܐ: ܦܝܼܫܠܹܗ ܩܸܪܝܵܐ ܫܸܡܹܗ ܝܑܼܫܘܿܥ: ܕܦܝܼܫܠܹܗ ܩܸܪܝܵܐ ܡ̣ܢ ܡܲܠܲܐܟܼܵܐ ܡ̣ܢ ܩܵܕ݇ܡ ܕܦܵܐܸܫ ܗ݇ܘܵܐ ܒܛܝܼܢܵܐ ܒܟܲܪ݇ܣܵܐ. ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܬܲܕܟܼܝܼܬܲܝܗܝ: ܐܲܝܟܼ ܢܵܡܘܿܣܵܐ ܕܡܘܼܫܹܐ: ܩܲܡ ܡܲܤܩܝܼܠܹܗ ܠܐܘܿܪܸܫܠܸܡ ܕܡܲܩܪܹܒ̣ܝܼܠܹܗ ܩܵܕ݇ܡ ܡܵܪܝܵܐ: ܐܲܝܟܼ ܕܟܬܝܼܒܼܵܐ ܝܠܹܗ ܒܢܵܡܘܿܣܵܐ ܕܡܵܪܝܵܐ: ܕܟܠ ܕܸܟܼܪܵܐ ܦܲܬܚܵܢܵܐ ܕܡܲܪܒܥܵܐ: ܩܲܕܝܼܫܵܐ ܕܡܵܪܝܵܐ ܦܵܐܸܫ ܩܸܪܝܵܐ. ܘܕܝܲܗ݇ܒܼܝܼ ܕܸܒܼܚܬܵܐ ܕܲܐܟܼܝܼ ܕܝܼܠܹܗ ܐ݇ܡܝܼܪܵܐ ܒܢܵܡܘܿܣܵܐ ܕܡܵܪܝܵܐ: ܙܵܘܓܵܐ ܕܫܘܿܦܢܝܼܢܹ̈ܐ ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ. ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܓܵܘ ܐܘܿܪܸܫܠܸܡ ܫܸܡܹܗ ܝܼܗ݇ܘܵܐ ܫܸܡܥܘܿܢ: ܘܐܵܗܵܐ ܐ݇ܢܵܫܵܐ ܟܹܐܢܵܐ ܝܗ݇ܘܵܐ ܘܙܲܕܝܼܩܵܐ، ܘܒܸܣܦܵܪܵܐ ܝܗ݇ܘܵܐ ܠܝܲܗ݇ܒܼܵܠܬܵܐ ܕܠܸܒܵܐ ܕܝܑܼܣܪܵܝܸܠ: ܘܪܘܼܚܵܐ ܕܩܘܼܕܫܵܐ ܐܝܼܬ ܗ݇ܘܵܐ ܥܲܠܘܼܗܝ: ܘܦܝܼܫܬܵܐ ܝܗ݇ܘܵܐ ܐ݇ܡܝܼܪܬܵܐ ܐܸܠܹܗ ܡ̣ܢ ܪܘܼܚܵܐ ܕܩܘܼܕܫܵܐ: ܕܠܹܐ ܚܵܙܹܐ ܡܵܘܬܵܐ: ܗܲܠ ܕܚܵܙܹܐ ܠܡܫܝܼܚܹܗ ܕܡܵܪܝܵܐ: ܐܵܗܵܐ ܐܸܬܝܵܐ ܗ݇ܘܵܐ ܒܪܘܼܚܵܐ ܠܗܲܝܟܠܵܐ: ܘܟܲܕ ܡܲܥܒܼܘܼܪܹܐ ܝܗ݇ܘܵܘ ܐܲܒܼܵܗܘܼ̈ܗܝ ܠܝܼܫܘܿܥ ܛܲܠܝܵܐ: ܕܥܲܒܼܕܝܼ ܚܠܵܦ ܕܝܼܹܗ ܕܲܐܟܼܝܼ ܕܦܩܝܼܕܵܐ ܝܠܹܗ ܒܢܵܡܘܿܣܵܐ: ܫܩܸܠܝܼܹܗ ܥܲܠ ܕܪ̈ܵܥܘܼܗܝ: ܘܒܘܼܪܸܟܼܠܹܗ ܠܐܲܠܵܗܵܐ ܘܐ݇ܡܝܼܪܹܗ: ܡ̣ܢ ܐܵܕܝܼܵܐ ܡܵܪܝܼ ܫܪܝܼܠܹܗ ܠܥܲܒܼܕܘܼܟܼ: ܐܲܝܟܼ ܗܹܡܸܙܡܵܢܘܼܟܼ ܒܫܠܵܡܵܐ: ܕܗܵܐ ܚܙܹܐܠܗ݇ܘܿܢ ܥܲܝ̈ܢܝܼ ܚܢܵܢܘܼܟܼ: ܗ̇ܘ ܕܗܘܼܕܸܪܘܼܟܼ ܒܦܲܪܨܘܿܦܵܐ ܕܟܠܲܝܗܝ ܐܸܡܘܵܬܹ̈ܐ: ܢܘܼܗܪܵܐ ܠܓܸܠܝܵܢܵܐ ܕܥܲܡܡܹ̈ܐ: ܘܚܸܩܪܵܐ ܠܥܲܡܘܼܟܼ ܝܑܼܣܪܵܝܹܠ. ܐܝܼܢܵܐ ܝܵܘܣܸܦ ܘܝܸܡܹܗ ܥܲܓ̰ܒܝܼ ܗ݇ܘܵܘ ܥܲܠ ܐܲܝܢܝܼ ܕܦܲܝܫܝܼ ܗ݇ܘܵܘ ܗܘܼܡܙܸܡܹܐ ܒܘܼܬ ܕܝܼܘܼܗܝ: ܘܒܘܼܪܟܼܵܝܠܹܗ ܫܸܡܥܘܿܢ: ܘܐ݇ܡܝܼܪܹܗ ܠܡܲܪܝܲܡ ܝܸܡܹܗ: ܗܵܐ ܐܵܗܵܐ ܡܘܼܬܒܼܵܐ ܝܠܹܗ ܠܢܦܲܠܬܵܐ ܘܠܩܝܵܡܬܵܐ ܕܪܵܒܵܐ ܒܝܼܣܪܵܝܹܠ: ܘܠܐܵܬܵܐ ܕܡܲܩܪܵܨܘܼܬܵܐ: ܘܒܓܵܢܵܐ ܕܝܼܹܟܼܝ ܒܸܕ ܥܲܒܼܪܵܐ ܪܘܼܡܚܵܐ: ܐܲܝܟܼ ܕܦܲܝܫܝܼ ܓܸܠܝܹܐ ܚܘܼܫܵܒܼܹ̈ܐ ܕܠܸܒܵܘܵܬܹ̈ܐ ܕܪܵܒܵܐ. ܘܐܝܼܢܵܐ ܚܲܢܵܐ ܢܒܼܝܼܬܵܐ ܒܪܵܬܹܗ ܕܦܢܘܼܐܹܝܠ ܡ̣ܢ ܫܲܒܼܛܵܐ ܕܐܵܫܹܝܪ: ܐܵܦ ܗ̇‌ܝ ܥܒܼܝܼܪܬܵܐ ܝܗ݇ܘܵܐ ܒܫܸܢܹ̈ܐ: ܘܫܲܒܼܥܵܐ ܫܸܢܹ̈ܐ ܚܝܹܐܠܵܗ̇ ܥܲܡ ܓܲܒܼܪܘܼܗ̇ ܡ̣ܢ ܒܬܘܼܠܘܼܬܵܗܿ: ܘܗ݇ܘܹܐܠܵܗ̇ ܐܲܪܡܲܠܬܵܐ ܐܲܝܟܼ ܬܡܵܢܝܼ ܘܐܲܪܒܲܥ ܫܸܢܹ̈ܐ: ܘܠܹܐ ܦܵܪܩܵܐ ܗ݇ܘܵܐ ܡ̣ܢ ܗܲܝܟܠܵܐ: ܘܒܨܵܘܡܵܐ ܘܒܨܠܘܿܬܵܐ ܦܵܠܚܵܐ ܗ݇ܘܵܐ ܒܐܝܼܡܵܡܵܐ ܘܒܠܸܠܝܵܐ: ܘܐܘܼܦ ܗ̇‌ܝ ܩܝܼܡܠܵܗ̇ ܒܗ̇‌ܝ ܣܵܥܵܬ ܘܫܘܼܟܸܪܵܗ̇ ܠܡܵܪܝܵܐ: ܘܗܲܡܙܸܡܵܐ ܗ݇ܘܵܐ ܒܘܼܬ ܕܝܼܘܼܗܝ ܥܲܡ ܟܠ ܐ݇ܢܵܫܵܐ ܕܒܸܣܦܵܪܵܐ ܝܗ݇ܘܵܐ ܠܦܘܼܪܩܵܢܵܐ ܕܐܘܿܪܸܫܠܸܡ. ܘܟܲܕ ܬܘܼܡܸܡܠܗ݇ܘܿܢ ܟܠ ܡܸܢܕܝܼ ܐܲܝܟܼ ܕܒܢܵܡܘܿܣܵܐ ܕܡܵܪܝܵܐ: ܕܥܝܼܪܗ݇ܘܿܢ ܠܓܠܝܼܠܵܐ ܠܢܵܨܪܲܬ ܡܕܝܼܢ݇ܬܲܝܗܝ. ܐܝܼܢܵܐ ܝܲܠܵܕ݇ܐ ܓܲܪܘܸܣ ܗ݇ܘܵܐ ܘܦܵܐܸܫ ܗ݇ܘܵܐ ܚܘܼܝܠܸܢܵܐ ܒܪܘܼܚܵܐ: ܘܦܵܐܸܫ ܗ݇ܘܵܐ ܡܸܠܝܵܐ ܚܸܟܼܡܬܵܐ: ܘܛܲܝܒܘܼܬܵܐ ܕܐܲܠܵܗܵܐ ܐܝܼܬ ܗ݇ܘܵܐ ܥܲܠܘܼܗܝ. ܘܐ݇ܢܵܫܘܼ̈ܗܝ ܒܟܠ ܫܹܢ݇ܬܵܐ ܟܹܐ ܐܵܙܝܼܠ݇ ܗ݇ܘܵܘ ܠܐܘܿܪܸܫܠܸܡ ܒܥܲܕܥܹܐܕܵܐ ܕܦܸܨܚܵܐ. ܘܟܲܕ ܗ݇ܘܹܐܠܹܗ ܒܲܪ ܬܪܸܥܣܲܪ ܫܸܢܹ̈ܐ: ܣܝܼܩܠܗ݇ܘܿܢ ܠܥܲܕܥܹܐܕܵܐ ܕܲܐܟܼܝܼ ܕܐܝܼܬ ܗ݇ܘܵܘ ܠܗ݇ܘܿܢ ܥܵܕܵܬ. ܘܟܲܕ ܬܘܼܡܸܡܠܗ݇ܘܿܢ ܝܵܘܡܵܢܹ̈ܐ ܕܥܝܼܪܗ݇ܘܿܢ: ܐܝܼܢܵܐ ܝܑܼܫܘܿܥ ܛܲܠܝܵܐ ܦܝܼܫܠܹܗ ܒܐܘܿܪܸܫܠܸܡ: ܘܝܵܘܣܸܦ ܘܝܸܡܹܗ ܠܵܐ ܝܕܝܼܥܠܗ݇ܘܿܢ: ܣܵܒܵܒ ܒܸܚܫܵܒܼܵܐ ܝܗ݇ܘܵܘ ܕܥܲܡ ܚܲܒܼܪ̈ܵܘܵܬܲܝܗܝ ܝܼܠܹܗ: ܘܟܲܕ ܐ݇ܬܹܐ ܠܗ݇ܘܿܢ ܐܘܼܪܚܵܐ ܕܚܲܕ݇ ܝܵܘܡܵܐ: ܛܹܥܠܗ݇ܘܿܢ ܒܵܬ݇ܪܹܗ ܠܘܵܬ ܐ݇ܢܵܫܲܝ̈ܗܝ ܘܠܘܵܬ ܡܿܢ ܕܟܹܐ ܝܲܕܸܥ ܗ݇ܘܵܐ ܠܗ݇ܘܿܢ: ܘܠܵܐ ܡܘܼܫ݇ܟ̰ܸܚܠܗ݇ܘܿܢ ܐܸܠܹܗ: ܘܕܥܝܼܪܗ݇ܘܿܢ ܡܸܢ݇ܕܪܹܫ݇ ܠܐܘܿܪܸܫܠܸܡ ܘܛܵܥܝܼ ܗ݇ܘܵܘ ܒܵܬ݇ܪܹܗ: ܘܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ ܡܘܼܫ݇ܟ̰ܸܚܠܗ݇ܘܿܢ ܐܸܠܹܗ ܓܵܘ ܗܲܝܟܠܵܐ ܟܲܕ ܝܬܝܼܒܼܵܐ ܒܐܵܪܵܠܸܓܼ ܕܡܲܠܦܵܢܹ̈ܐ: ܒܸܫܡܵܥܵܐ ܡܸܢܲܝܗܝ ܘܒܵܩܘܼܪܲܝܗܝ: ܘܟܠܲܝܗܝ ܐܵܢܝܼ ܕܫܲܡܥܝܼ ܗ݇ܘܵܘ ܠܹܗ ܥܲܓ̰ܒܝܼ ܗ݇ܘܵܘ ܒܚܸܟܼܡܬܹܗ ܘܒܓ̰ܘܼܘܵܒܘܼ̈ܗܝ: ܘܟܲܕ ܚܙܹܐܠܗ݇ܘܿܢ ܐܸܠܹܗ ܥܘܼܓ̰ܸܒܠܗ݇ܘܿܢ: ܘܐ݇ܡܝܼܪܵܗ̇ ܐܸܠܹܗ ܝܸܡܹܗ: ܒܪܘܿܢܝܼ ܩܵܡܘܼܕܝܼ ܥܒܼܝܼܕܠܘܼܟܼ ܗܲܕܟܼܵܐ ܐܸܠܲܢ: ܕܗܵܐ ܐܵܢܵܐ ܘܒܵܒܘܼܟܼ ܪܵܒܵܐ ܒܥܹܩܘܼܝ ܗ݇ܘܹܐܠܲܢ ܒܸܛܲܥܝܵܐ ܒܵܬ݇ܪܘܼܟܼ: ܐܵܡܸܪ ܐܸܠܲܝܗܝ: ܩܵܡܘܼܕܝܼ ܒܸܛܵܥܵܐ ܝܬܘܿܢ ܗ݇ܘܵܘ ܒܵܬ݇ܪܝܼ؟ ܠܹܐ ܝܵܕܥܝܼܬܘܿܢ ܕܓܵܘ ܒܲܝܬܵܐ ܕܒܵܒܝܼ ܘܵܠܹܐ ܠܝܼ ܕܗܵܘܸܢ؟ ܐܝܼܢܵܐ ܐܵܢܝܼ ܠܵܐ ܦܘܼܪܡܹܐ ܠܗ݇ܘܿܢ ܠܗܹܡܸܙܡܵܢ ܕܐ݇ܡܝܼܪܹܗ ܐܸܠܲܝܗܝ: ܘܨܠܹܐܠܹܗ ܥܲܡܲܝܗܝ ܘܐ݇ܬܹܐܠܹܗ ܠܢܵܨܪܲܬ: ܘܫܵܠܸܡ ܗ݇ܘܵܐ ܐܸܠܲܝܗܝ: ܐܝܼܢܵܐ ܝܸܡܹܗ ܢܲܛܪܵܐ ܗ݇ܘܵܐ ܟܠܲܝܗܝ ܗܹܡܸܙܡܵܢܹ̈ܐ ܒܠܸܒܵܗ̇. ܐܝܼܢܵܐ ܝܑܼܫܘܿܥ ܓܲܪܘܸܣ ܗ݇ܘܵܐ ܒܩܵܘܡܬܹܗ ܘܒܚܸܟܼܡܬܹܗ ܠܘܵܬ ܐܲܠܵܗܵܐ ܘܒܢܲܝ̈ܢܵܫܵܐ.

♱♱♱♱♱♱♱♱♱♱♱♱♱

ܥܐܕܐ ܕܕܢܚܐ

ܡܬܝ ܓ: 1 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ
ܟܪܘܙܘܬܼܐ ܕܡܬܝ.

♰ ܐܝܼܢܵܐ ܒܐܵܢܝܼ ܝܵܘܡܵܢܹ̈ܐ ܐ݇ܬܹܐ ܠܹܗ ܝܘܿܚܲܢܵܢ ܡܲܥܡܕܵܢܵܐ ܘܡܲܟܪܸܙ ܗ݇ܘܵܐ ܓܵܘ ܒܲܪܝܼܵܐ ܕܝܼܗܘܼܕ ܘܐܵܡܸܪ: ܬܲܘܸܒܘܿܢ ܩܘܼܪܒܸܢܵܗ̇ ܡܲܠܟܘܼܬܵܐ ܕܫܡܲܝܵܐ: ܣܵܒܵܒ ܐܵܗܵܐ ܝܠܹܗ ܗ̇ܘ ܕܝܼܠܹܗ ܐ݇ܡܝܼܪܵܐ ܒܝܲܕ ܐܹܫܲܥܝܵܐ ܢܒܼܝܼܵܐ: ܩܵܠܵܐ ܕܩܵܪܹܐ ܒܒܲܪܝܼܵܐ: ܗܲܕܪܘܿܢ ܐܘܼܪܚܹܗ ܕܡܵܪܝܵܐ ܘܡܲܫܘܲܝܡܘܿܢ ܠܲܫܒܼܝܼܠܘܼ̈ܗܝ: ܐܝܼܢܵܐ ܐܵܗܵܐ ܝܘܿܚܲܢܲܢ. ܠܒܼܝܼܫܬܹܗ ܝܑܼܗَܘܵܐ ܕܣܲܥܪܵܐ ܕܓܘܼܡܠܹ̈ܐ: ܘܐܲܣܲܪ ܚܲܨܹ̈ܐ ܕܓܸܠܕܵܐ ܥܲܠ ܚܲܨܘܼܗܝ، ܘܡܹܐܟܼܘܼܠܬܹܗ ܩܲܡܨܹ̈ܐ ܘܕܸܒܼܫܵܐ ܕܒܲܪܝܼܵܐ: ܗܿܝܓܵܗ̇ ܦܲܠܛܵܐ ܗ݇ܘܵܐ ܠܘܵܬܹܗ: ܐܘܿܪܸܫܠܸܡ ܘܟܠܵܗ̇ ܝܼܗܘܼܕ: ܘܟܠܹܗ ܐܲܬܪܵܐ ܕܚܵܕܸܪ̈ܘܵܢܹܐ ܕܝܘܿܪܕܢܲܢ: ܘܥܲܡܕܝܼ ܗ݇ܘܵܘ ܡܸܢܹܗ ܒܝܘܿܪܕܢܲܢ ܢܲܗܪܵܐ: ܟܲܕ ܡܵܘܕܘܼܝܹܐ ܒܚܛܝܼܵܬܲܝ̈ܗܝ. ܐܝܼܢܵܐ ܟܲܕ ܚܙܹܐܠܹܗ ܪܵܒܵܐ ܡ̣ܢ ܦܪ̈ܝܼܫܹܐ ܘܡ̣ܢ ܙܲܕܘܼܩܵܝܹ̈ܐ ܕܒܹܐܬܵܝܵܐ ܠܸܥܡܵܕܵܐ: ܐ݇ܡܝܼܪܹܗ ܐܸܠܲܝܗܝ: ܙܲܪܥܵܐ ܕܐܵܟܼܸܕܢܹ̈ܐ ܡܵܢܝܼ ܡܘܼܕܸܥܠܹܗ ܐܸܠܵܘܟܼܘܿܢ ܠܸܥܪܵܩܵܐ ܡ̣ܢ ܟܲܪܒܵܐ ܕܒܹܐܬܵܝܵܐ ܝܠܹܗ: ܥܒܼܘܼܕܘܿܢ ܗܲܕܟܼܵܐ ܛܥܘܿܢܝܵܬܹ̈ܐ ܕܚܲܫܚܝܼ ܠܬܝܵܒܼܘܼܬܵܐ: ܘܠܵܐ ܚܲܫܒܼܝܼܬܘܿܢ ܘܐܲܡܪܝܼܬܘܿܢ ܒܓܵܢܵܘܟܼܘܿܢ: ܕܒܵܒܵܐ ܐܝܼܬܠܲܢ ܐܲܒܼܪܵܗܵܡ: ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܒܡܵܨܹܐ ܐܲܠܵܗܵܐ ܡ̣ܢ ܐܲܢܹܐ ܟܹܐܦܹ̈ܐ ܠܡܲܩܘܼܡܹܐ ܒܢܘܿܢܹ̈ܐ ܠܐܲܒܼܪܵܗܵܡ: ܐܝܼܢܵܐ ܗܵܐ ܢܲܪܥܵܐ ܡܘܼܬܒܼܵܐ ܝܠܹܗ ܥܲܠ ܥܸܩܪܵܐ ܕܐܝܼܠܵܢܹ̈ܐ: ܗܲܕܟܼܵܐ ܟܠ ܐܝܼܠܵܢܵܐ ܕܠܵܐ ܥܵܒܼܸܕ ܛܥܘܘܼܢܝܵܬܹ̈ܐ ܛܵܒܼܹ̈ܐ: ܒܸܕ ܦܵܐܸܫ ܩܸܛܥܝܵܐ ܘܪܘܼܦܵܐ ܓܵܘ ܢܘܼܪܵܐ: ܐܵܢܵܐ ܡܲܥܡܘܼܕܹܐ ܝܘܸܢ ܐܸܠܵܘܟܼܘܿܢ ܒܡܝܼܵܐ ܠܸܬܝܵܒܼܘܬܵܐ: ܐܝܼܢܵܐ ܗ̇ܘ ܕܡ̣ܢ ܒܵܬ݇ܪ ܡܸܢܝܼ ܒܹܐܬܵܝܵܐ ܝܠܹܗ: ܒܘܼܫ ܚܲܝܠܵܢܵܐ ܝܠܹܗ ܡܸܢܝܼ. ܗ̇ܘ ܕܠܹܐܚܲܫܚܸܢ ܐܵܢܵܐ ܨܵܘܠܘܼ̈ܗܝ ܠܸܫܩܵܠܵܐ: ܗ̇ܘ ܒܸܕ ܡܲܥܡܸܕ ܠܵܘܟܼܘܿܢ ܒܪܘܼܚܵܐ ܕܩܘܼܕܫܵܐ ܘܒܢܘܼܪܵܐ: ܗ̇ܘ ܕܝܼܠܵܗ̇ ܪܘܼܦ̮݇ܫܬܵܐ ܒܐܝܼܕܹܗ ܘܡܕܲܟܼܹܘܼܝܹܐ ܒܸܕܪ̈ܵܬܘܼܗܝ: ܘܚܸܛܹ̈ܐ ܒܸܕ ܟܵܦܸܫ ܠܐܲܢܒܵܪ̈ܘܼܗܝ: ܘܬܸܒܼܢܵܐ ܒܡܵܩܸܕ ܒܢܘܼܪܵܐ ܕܠܹܐ ܕܵܥܸܟܼ: ܗܲܝܓܵܗ̇ ܐ݇ܬܹܐܠܹܗ ܝܑܼܫܘܿܥ ܡ̣ܢ ܓܠܝܼܠܵܐ ܠܝܘܿܪܕܢܲܢ ܠܘܵܬ ܝܘܿܚܲܢܲܢ ܕܥܵܡܸܕ ܡܸܢܹܗ: ܐܝܼܢܵܐ ܝܘܿܚܲܢܲܢ ܡܲܟܠܹܐ ܗ݇ܘܵܐ ܠܹܗ ܘܐܵܡܸܪ: ܐܵܢܵܐ ܝܘܸܢ ܣܢܝܼܩܵܐ ܕܡܸܢܘܼܟܼ ܦܲܝܫܸܢ ܥܡܝܼܕܵܐ، ܘܐܲܢ݇ܬ ܠܟܸܣܠܝܼ ܐ݇ܬܹܐܠܘܟܼ؟ ܐܝܼܢܵܐ ܝܑܼܫܘܿܥ ܓ̰ܘܼܘܸܒܠܹܗ ܘܐ݇ܡܝܼܪܹܗ ܐܸܠܹܗ: ܫܒܼܘܿܩ ܐܵܕܝܼܵܐ، ܣܵܒܵܒ ܗܲܕܟܼܵܐ ܘܵܠܹܐ ܐܸܠܲܢ ܕܬܲܡܸܡܵܚ ܟܠܵܗ̇ ܟܹܐܢܘܼܬܵܐ: ܘܗܿܝܓܵܗ̇ ܫܒ̣ܝܼܩܠܹܗ. ܐܝܼܢܵܐ ܟܲܕ ܥܡܝܼܕܠܹܗ ܝܑܼܫܘܿܥ ܒܗ̇‌ܝ ܥܸܕܵܢܵܐ ܣܸܝܼܩܠܹܗ ܡ̣ܢ ܡܝܼܵܐ: ܘܦܝܼܫܠܵܗ̇ ܦܬܝܼܚܬܵܐ ܐܸܠܹܗ ܫܡܲܝܵܐ: ܘܚܙܹܐܠܹܗ ܪܘܼܚܵܐ ܕܐܲܠܵܗܵܐ ܕܒܸܨܠܵܝܵܐ ܐܲܝܟܼ ܝܵܘܢܵܐ ܘܐ݇ܬܹܐܠܵܗ̇ ܥܲܠܘܼܗܝ. ܘܗܵܐ ܩܵܠܵܐ ܡ̣ܢ ܫܡܲܝܵܐ ܕܒܹܐܡܵܪܵܐ: ܐܵܗܵܐ ܝܑܼܠܹܗ ܒܪܘܿܢܝܼ ܚܲܒܝܼܒܼܵܐ ܕܒܝܼܹܗ ܒܣܸܡܠܵܐ ܠܝܼ.

♱♱♱♱♱♱♱♱♱♱♱♱♱

ܕܘܟܼܪܢܐ ܕܡܪܝ ܝܘܚܢܢ ܡܥܡܕܢܐ

ܡܪܩܘܣ ܘ: 14 ‐ 30

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ
ܟܪܘܙܘܬܼܐ ܕܡܪܩܘܣ.

♰ ܐܝܼܢܵܐ ܒܗ̇ܘ ܙܲܒܼܢܵܐ ܫܡܝܼܥܠܹܗ ܗܹܪܘܿܕܸܣ ܡܲܠܟܵܐ ܒܘܼܬ ܝܑܼܫܘܿܥ. ܣܵܒܵܒ ܦܝܼܫܵܐ ܝܗ݇ܘܵܐ ܝܕܝܼܥܵܐ ܫܸܡܹܗ ܐܸܠܹܗ ܘܐ݇ܡܝܼܪܹܗ: ܝܘܿܚܲܢܵܢ ܡܲܥܡܕܵܢܵܐ ܩܝܼܡܠܹܗ ܡ̣ܢ ܓܵܘ ܡܝܼܬܹ̈ܐ، ܒܘܼܬ ܐܵܗܵܐ ܚܲܝܠܹ̈ܐ ܦܝܵܫܵܐ ܝܢܵܐ ܦܠܝܼܚܹܐ ܒܝܼܹܗ: ܐ݇ܚܹܪ̈݇ܢܹܐ ܐܲܡܪܝܼ ܗ݇ܘܵܘ: ܕܐܹܠܝܼܵܐ ܝܠܹܗ: ܘܐ݇ܚܹܪ̈ܢܹܐ ܕܢܒܼܝܼܵܐ ܝܠܹܗ ܐܲܝܟܼ ܚܲܕ݇ ܡ̣ܢ ܢܒܼܝܼܹ̈ܐ. ܐܝܼܢܵܐ ܟܲܕ ܫܡܝܼܥܠܹܗ ܗܹܪܘܿܕܸܣ ܐ݇ܡܝܼܪܹܗ: ܝܘܿܚܲܢܵܢ ܗ̇ܘ ܕܐܵܢܵܐ ܩܛܝܼܥܠܝܼ ܪܹܫܹܗ: ܗ̇ܘ ܩܝܼܡܠܹܗ ܡ̣ܢ ܓܵܘ ܡܝܼܬܹ̈ܐ. ܣܵܒܵܒ ܗܹܪܘܿܕܸܣ ܫܘܼܕܪܵܐ ܝܼܗ݇ܘܵܐ ܕܒܼܝܼܩܵܐ ܠܝܘܿܚܲܢܵܢ ܘܕܸܪܝܹܗ ܓܵܘ ܒܹܝܬ ܐܲܣܝܼܪܹ̈ܐ: ܒܘܼܬ ܗܹܪܘܿܕܝܼܵܐ ܒܲܟܼܬܵܐ ܕܦܝܼܠܝܼܦܘܿܣ ܐܲܚܘܿܢܹܗ: ܗ̇‌ܝ ܕܫܩܝܼܠܵܐܠܹܗ ܣܵܒܵܒ ܝܘܿܚܲܢܲܢ ܐܵܡܸܪ ܗ݇ܘܵܐ ܠܗܹܪܘܿܕܸܣ: ܕܠܹܐ ܝܠܵܗ̇ ܒܕܲܤܬܘܼܪ ܐܸܠܘܼܟܼ ܕܫܲܩܠܸܬ ܒܲܟܼܬܵܐ ܕܐܲܚܘܿܢܘܼܟ. ܐܝܼܢܵܐ ܗ̇‌ܝ ܗܹܪܘܿܕܝܼܵܐ ܐܲܟܼܠܵܐ ܗ݇ܘܵܐ ܓܸܙܡܹ̈ܐ ܥܲܠܹܗ: ܘܒܲܣܡܵܐ ܗ݇ܘܵܐ ܠܵܗ̇ ܠܡܲܩܛܵܠܬܹܗ، ܘܠܹܐ ܡܲܨܝܵܐ ܗ݇ܘܵܐ: ܣܵܒܵܒ ܗܹܪܘܿܕܸܣ ܟܹܐ ܙܵܕܸܥ ܗ݇ܘܵܐ ܡ̣ܢ ܝܘܿܚܲܢܵܢ: ܒܗ̇‌ܝ ܕܝܵܕܸܥ ܗ݇ܘܵܐ ܕܓܲܒܼܪܵܐ ܙܲܕܝܼܩܵܐ ܘܩܲܕܝܼܫܵܐ ܝܠܹܗ: ܘܢܵܛܸܪ ܗ݇ܘܵܐ ܠܹܗ: ܘܪܵܒܵܐ ܟܹܐ ܫܵܡܸܥ ܗ݇ܘܵܐ ܠܹܗ ܘܥܵܒܼܸܕ ܗ݇ܘܵܐ: ܘܒܲܣܝܼܡܵܐܝܼܬ ܟܹܐ ܫܵܡܸܥ ܗ݇ܘܵܐ ܠܹܗ. ܘܗ݇ܘܹܐ ܠܵܗ̇ ܚܲܕ݇ ܝܵܘܡܵܐ ܝܕܸܥܝܵܐ ܟܲܕ ܗܹܪܘܿܕܸܣ ܒܒܹܝܬ ܝܲܠܕܹܗ ܥܒܒ̣ܝܼܕܠܹܗ ܚܫܵܡܝܼܬܵܐ ܠܪܵܘܪ̈ܒܼܵܢܘܼܗܝ ܘܟܝܼܠܝܼܵܪ̈ܟܹܐ، ܘܠܪܹ̈ܫܵܢܹܐ ܕܓܠܝܼܠܵܐ: ܘܥܒܼܝܼܪܵܐ ܒܪܵܬܵܐ ܕܗܹܪܘܿܕܝܼܵܐ ܪܩܝܼܕܠܵܐ: ܘܫܦܝܼܪܵܗ̇ ܠܗܹܪܘܿܕܸܣ ܘܠܐܲܝܢܝܼ ܕܝܼܗ݇ܘܵܘ ܝܬܝܼܒܼܹܐ ܥܲܡܹܗ. ܘܐ݇ܡܝܼܪܹܗ ܡܲܠܟܵܐ ܠܛܠܝܼܬܵܐ: ܛܠܘܿܒܝ ܡܸܢܝܼ ܡܸܢܕܝܼ ܕܒܲܣܡܵܐ ܠܹܟܼܝ: ܘܒܸܕ ܝܲܗܒܼܸܢ ܐܸܠܹܟܼܝ: ܘܝ݇ܡܹܐܠܹܗ ܐܸܠܵܘܿܗ݁: ܕܡܸܢܕܝܼ ܕܛܲܠܒܵܬܝ ܒܸܬ ܝܲܗܒܼܸܢܹܟܼܝ ܗܲܠ ܠܦܲܠܓܵܗ̇ ܕܡܲܠܟܘܼܬܝܼ: ܐܝܼܢܵܐ ܗ̇‌ܝ ܦܠܝܼܛܠܵܗ̇ ܘܐ݇ܡܝܼܪܵܗ̇ ܠܝܸܡܵܗ݁: ܡܘܿܕܝܼ ܛܲܠܒܵܢܝ ܡܸܢܹܗ؟ ܐ݇ܡܝܼܪܵܗ̇ ܐܸܠܵܗ̇: ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ: ܗܲܪ ܒܗ̇‌ܝ ܥܸܕܵܢܵܐ ܥܒܼܝܼܪܵܗ̇ ܒܡܲܠܝܵܙܬܵܐ ܠܘܵܬ ܡܲܠܟܵܐ ܘܐ݇ܡܝܼܪܵܗ̇ ܐܸܠܹܗ: ܒܲܥܝܵܢܝ ܒܐܵܗܵܐ ܣܵܥܵܬ ܕܝܲܗ݇ܒܼܸܬܠܝܼ ܥܲܠ ܦܝܼܢܟܼܵܐ ܪܹܫܹܗ ܕܝܘܿܚܲܢܵܢ ܡܲܥܡܕܵܢܵܐ. ܘܦܫܝܼܡܠܹܗ ܡܲܠܟܵܐ ܪܵܒܵܐ: ܐܝܼܢܵܐ ܒܘܼܬ ܡܵܘܡܵܬܹ̈ܐ: ܘܒܘܼܬ ܐܵܢܝܼ ܕܝܑܼܗ݇ܘܵܘ ܝَܬܝܼܒܹ̈ܐ: ܠܵܐ ܒܣܝܼܡܠܵܐ ܠܹܗ ܕܡܲܚܦܸܠ ܡܸܢܵܗ̇: ܐܸܠܵܐ ܒܗ̇‌ܝ ܥܸܕܵܢܵܐ ܫܘܼܕܸܪܹܗ ܡܲܠܟܵܐ ܓ̰ܲܠܵܕ: ܘܦܩܝܼܕܠܹܗ ܕܡܲܝܬܹܗ ܪܹܫܹܗ ܕܝܘܿܚܲܢܵܢ. ܘܐ݇ܙܝܼܠܹܗ ܩܛܝܼܥܠܹܗ ܪܹܫܹܗ ܕܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ: ܘܡܘܼܬܹܐܠܹܗ ܒܦܝܼܢܟܼܵܐ ܘܝܘܼܗ݇ܒܼܸܠܹܗ ܠܛܠܝܼܬܵܐ: ܘܗ̇‌ܝ ܛܠܝܼܬܵܐ ܝܘܼܗ݇ܒܼܸܠܵܗ̇ ܠܝܸܡܵܗܿ: ܘܫܡܝܼܥܠܗ݇ܘܿܢ ܬܲܠܡܝܼܕܘܼ̈ܗܝ: ܘܐ݇ܬܹܐܠܗ݇ܘܿܢ ܘܫܩܝܼܠܗ݇ܘܿܢ ܫܠܲܕܹܗ ܘܡܘܼܬܒܼܵܐ ܠܗ݇ܘܿܢ ܓܵܘ ܒܹܝܬ ܩܒܼܘܼܪܵܐ.

♱♱♱♱♱♱♱♱♱♱♱♱♱

ܡܬܝ ܝ: 1‐5، ܝܘ: 13‐19 ܝ: 5‐15. ܡܪܩܘܣ ܘ: 12‐13،

ܚܕܒܫܒܐ ܕܫܬܐ ܕܒܬܼܪ ܕܢܚܐ

ܝܘܚܢܢ ܓ: 22 ‐ ܕ: 4

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܒܵܬܲܪ ܐܲܢܹܐ ܐ݇ܬܹܐܠܹܗ ܝܑܼܫܘܿܥ ܘܬܲܠܡܝܼ̈ܕܘܼܗܝ ܠܐܲܪܥܵܐ ܕܝܼܗܘܼܕ: ܘܬܵܡܵܐ ܚܵܕܸܪ ܗ݇ܘܵܐ ܥܲܡܲܝܗܝ ܘܡܲܥܡܸܕ ܗ݇ܘܵܐ: ܐܝܼܢܵܐ ܐܵܦ ܝܘܿܚܲܢܵܢ ܡܲܥܡܸܕ ܗ݇ܘܵܐ ܒܥܹܝܢ ܝܘܿܢ ܕܥܲܠ ܓܹܒܵܐ ܕܫܵܠܝܼܡ ܣܵܒܵܒ ܕܪܵܒܵܐ ܡܝܼ̈ܵܐ ܐܝܼܬ ܗ݇ܘܵܐ ܬܵܡܵܐ. ܘܐܵܬܝܼ ܗ݇ܘܵܘ ܘܥܲܡܕܝܼ ܗ݇ܘܵܘ. ܣܵܒܵܒ ܗܵܠܵܐ ܠܹܐ ܗ݇ܘܵܐ ܢܦܝܼܠܵܐ ܝܘܿܚܲܢܲܢ ܓܵܘ ܒܹܝܬ ܐܲܣܝܼܪܹ̈ܐ. ܐܝܼܢܵܐ ܗ݇ܘܹܐܠܹܗ ܕܘܼܪܵܫܵܐ ܠܚܲܕ݇ ܡ̣ܢ ܬܲܠܡܝܼܕܹ̈ܐ ܕܝܘܿܚܲܢܵܢ ܥܲܡ ܚܲܕ݇ ܝܗ݇ܘܼܕܵܝܵܐ ܥܲܠ ܕܲܟܼܵܝܬܵܐ: ܘܐ݇ܬܹܐܠܗ݇ܘܿܢ ܠܘܵܬ ܝܘܿܚܲܢܵܢ ܘܐ݇ܡܝܼܪܗ݇ܘܿܢ ܐܸܠܹܗ: ܪܲܒܝܼܵܢ ܗ̇ܘ ܕܥܲܡܘܼܟܼ ܝܼܗَܘܵܐ ܒܡܲܪܙܵܐ ܕܝܘܿܪܕܢܲܢ، ܕܐܲܢ݇ܬ ܤܗܝܼܕܠܘܼܟ ܥܲܠܘܼܗܝ، ܗܵܐ ܐܵܦ ܗ̇ܘ ܡܲܥܡܘܼܕܹܐ ܝܠܹܗ، ܘܪܵܒܵܐ ܒܹܐܬܵܝܵܐ ܝܢܵܐ ܠܘܵܬܹܗ: ܓ̰ܘܼܘܸܒܠܹܗ ܝܘܿܚܲܢܵܢ ܘܐ݇ܡܝܼܪܹܗ ܐܸܠܲܝܗܝ: ܠܹܐ ܡܵܨܹܐ ܒܲܪܢܵܫܵܐ ܡ̣ܢ ܓܵܢܹܗ ܠܸܫܩܵܠܵܐ ܡܸܢܕܝܼ. ܐܸܠܵܐ ܐܸܢ ܦܵܐܸܫ ܝܘܼܗ݇ܒܼܵܐ ܐܸܠܹܗ ܡ̣ܢ ܫܡܲܝܵܐ: ܐܲܚܬܘܿܢ ܣܵܗܕܹ̈ܐ ܝܼܬܘܿܢ ܐܸܠܝܼ ܕܐ݇ܡܝܼܪܝܼ: ܕܐܵܢܵܐ ܠܹܐ ܝܘܸܢ ܡܫܝܼܚܵܐ: ܐܸܠܵܐ ܫܠܝܼܚܵܐ ܝܘܸܢ ܕܩܵܕ݇ܡܵܐ ܩܵܕ݇ܡܘܼܗܝ: ܡ̇ܢ ܕܐܝܼܬܠܹܗ ܟܲܠܬܵܐ ܚܲܬܢܵܐ ܝܠܹܗ: ܐܝܼܢܵܐ ܪܵܚܡܹܗ ܕܚܲܬܢܵܐ ܗ̇ܘ ܕܟܵܠܹܐ ܘܡܲܨܝܸܬ ܐܸܠܹܗ، ܚܲܕܘܼܬܵܐ ܪܲܒܬܵܐ ܟܹܐ ܚܵܕܹܐ ܒܘܼܬ ܩܵܠܹܗ ܕܚܲܬܢܵܐ. ܗܲܕܟܼܵܐ ܗܵܕܹܐ ܚܲܕܘܼܬܵܐ ܕܝܼܠ݇ܝܼ ܗܵܐ ܬܘܼܡܸܡܠܵܗ̇. ܠܗ̇ܘ ܘܵܠܹܐ ܝܼܠܵܗ̇ ܠܸܗܘܵܝܵܐ ܒܘܼܫ ܪܲܒܵܐ، ܘܐܸܠܝܼ ܠܸܒܨܵܪܵܐ. ܣܵܒܵܒ ܗ̇ܘ ܕܡ̣ܢ ܠܥܸܠ ܐ݇ܬܹܐܠܹܗ، ܠܥܸܠ ܡ̣ܢ ܟܠ ܝܼܠܹܗ. ܘܗ̇ܘ ܕܡ̣ܢ ܐܲܪܥܵܐ، ܡ̣ܢ ܐܲܪܥܵܐ ܝܠܹܗ ܘܡ̣ܢ ܐܲܪܥܵܐ ܒܸܬ ܗܲܡܙܸܡ. ܗ̇ܘ ܕܡ̣ܢ ܫܡܲܝܵܐ ܐ݇ܬܹܐܠܹܗ، ܠܥܸܠ ܡ̣ܢ ܟܠ ܝܼܠܹܗ، ܘܡܸܢܕܝܼ ܕܚܙܹܐܠܹܗ ܘܫܡܝܼܥܠܹܗ ܒܸܣܗܵܕܵܐ ܝܠܹܗ، ܘܣܵܗܕܘܼܬܹܗ ܟ̰ܘܼ ܐ݇ܢܵܫܵܐ ܠܹܐ ܝܠܹܗ ܩܵܒܘܼܠܹܐ: ܐܝܼܢܵܐ ܗ̇ܘ ܕܩܵܒܸܠ ܣܵܗܕܘܼܬܹܗ: ܚܬܝܼܡܠܹܗ ܕܐܲܠܵܗܵܐ ܫܲܪܝܼܪܵܐ ܝܠܹܗ: ܣܵܒܵܒ ܐܲܝܢܝܼ ܕܐܲܠܵܗܵܐ ܩܲܡ ܫܵܕܸܪܹܗ، ܗܹܡܸܙܡܵܢܹ̈ܐ ܕܐܲܠܵܗܵܐ ܒܸܕ ܗܲܡܙܸܡ: ܣܵܒܵܒ ܠܹܐ ܝܗ݇ܘܵܐ ܒܟܝܼܘܼܠܵܐ ܝܘܼܗ݇ܒܼܸܠܹܗ ܐܲܠܵܗܵܐ ܪܘܼܚܵܐ: ܒܵܒܵܐ ܟܹܐ ܡܲܚܸܒ ܠܒܪܘܿܢܵܐ، ܘܟܠ ܡܸܢܕܝܼ ܝܘܼܗ݇ܒ̣ܵܐ ܝܠܹܗ ܒܐܝܼܕܵܬܘܼ̈ܗܝ، ܡ̇ܢ ܕܡܗܲܝܡܸܢ ܒܒܪܘܿܢܵܐ ܐܝܼܬܠܹܗ ܚܲܝܹ̈ܐ ܕܠܥܵܠܲܡ، ܘܡ̇ܢ ܕܠܵܐ ܡܲܨܝܸܬ ܠܒܪܘܿܢܵܐ ܠܹܐ ܚܵܙܹܐ ܚܲܝܹ̈ܐ. ܐܸܠܵܐ ܟܲܪܒܹܗ ܕܐܲܠܵܗܵܐ ܒܸܬ ܥܲܪܩܸܠ ܥܲܠܘܼܗܝ. ܐܝܼܢܵܐ ܝܕܝܼܥܠܹܗ ܝܑܼܫܘܿܥ ܕܫܡܝܼܥܠܗ݇ܘܿܢ ܦܪ̈ܝܼܫܹܐ ܕܥܒܼܝܼܕܠܹܗ ܪܵܒܵܐ ܬܲܠܡܝܼܕܹ̈ܐ: ܘܡܲܥܡܘܼܕܹܐ ܝܗ݇ܘܵܐ ܒܘܼܫ ܡ̣ܢ ܝܘܿܚܲܢܵܢ. ܟܲܕ ܝܑܼܫܘܿܥ ܒܓܵܢܹܗ ܠܹܐ ܡܲܥܡܸܕ ܗ݇ܘܵܐ ܐܸܠܵܐ ܬܲܠܡܝܼ̈ܕܘܼܗܝ. ܘܫܒܼܝܼܩܵܐ ܠܹܗ ܠܝܼܗܘܼܕ ܘܐ݇ܬܹܐܠܹܗ ܡܸܢ݇ܕܪܹܫ݇ ܠܓܠܝܼܠܵܐ.

♱♱♱♱♱♱♱♱♱♱♱♱♱

ܕܘܟܼܪܢܐ ܕܡܪܝ ܐܒܼܐ ܩܬܼܘܠܝܩܐ: ܕܗ̤ܘ ܚܕ ܦܪܨܘܦܐ

ܡܬܝ ܟܕ: 45 ‐ ܟܗ: 1‐24

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♰ ܘܐ݇ܡܝܼܪܹܗ ܝܑܼܫܘܿܥ ܠܬܲܠܡܝܼܕܘܼ̈ܗܝ: ܝܵܐ ܪܲܒ ܡܵܢܝܼ ܝܼܠܹܗ ܪܹܓܵܐ ܡܗܲܝܡܢܵܐ ܘܚܲܟܝܼܡܵܐ ܕܡܘܼܩܝܼܡܠܹܗ ܡܵܪܹܗ ܥܲܠ ܒܢܲܝ̈ ܒܲܝܬܹܗ، ܕܝܲܗ݇ܒܼܸܠܗ݇ܘܿܢ ܡܹܐܟܼܘܿܠܬܵܐ ܒܥܸܕܵܢܘܼܗܿ؟ ܛܘܼܒܼܵܐ ܠܗ̇ܘ ܪܹܓܵܐ ܕܐܵܬܹܐ ܡܵܪܹܗ ܡܵܫ݇ܟ̰ܸܚܠܹܗ ܕܒܸܥܒܼܵܕܵܐ ܗܲܕܟܼܵܐ. ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܒܸܬ ܡܲܩܝܼܡܠܹܗ ܥܲܠ ܟܠ ܕܐܝܼܬܠܹܗ: ܐܝܼܢܵܐ ܐܸܢ ܐܵܡܸܪ ܗ̇ܘ ܪܹܓܵܐ ܒܝܼܫܵܐ ܒܠܸܒܹܗ: ܕܡܵܪܝܼ ܒܸܕ ܥܲܪܩܸܠ ܠܹܐܬܵܝܵܐ: ܘܫܵܪܹܐ ܠܸܡܚܵܝܵܐ ܠܚܲܒܼܪ̈ܵܘܵܬܹܗ: ܘܗܵܘܹܐ ܒܹܐܟܼܵܠܵܐ ܘܒܸܫܬܵܝܵܐ ܥܲܡ ܪ̈ܵܘܵܝܹܐ: ܒܸܕ ܐܵܬܹܐ ܡܵܪܹܗ ܕܗ̇ܘ ܪܹܓܵܐ ܒܝܵܘܡܵܐ ܕܠܹܐ ܤܵܦܸܪ ܘܒܣܵܥܵܬ ܕܠܹܐ ܝܵܕܸܥ: ܘܒܸܬ ܦܲܠܹܐܓَܼܠܹܗ ܘܒܸܕ ܡܲܬܝܼܒܼ ܣܵܗ݇ܡܹܗ ܥܲܡ ܢܲܣܒܲܝ̈ ܒܐܲܦܹ̈ܐ: ܬܵܡܵܐ ܒܸܬ ܗܵܘܹܐ ܒܸܟܼܝܵܐ ܘܚܲܪܚܲܟ̰ܬܵܐ ܕܟܵܟܹ̈ܐ. ܗܿܝܓܵܗ̇ ܒܸܕ ܕܲܡܝܵܐ ܡܲܠܟܘܼܬܵܐ ܕܫܡܲܝܵܐ ܠܥܸܣܪܵܐ ܒܬܘܼܠܵܬܹ̈ܐ. ܐܵܢܝܼ ܕܫܩܝܼܠܗ݇ܘܿܢ ܠܲܡܦܹܝܕܲܝ̈ܗܝ ܘܦܠܝܼܛܠܗ݇ܘܿܢ ܠܐܘܼܪܚܹܗ ܕܚܲܬܢܵܐ ܘܟܲܠܬܵܐ: ܐܝܼܢܵܐ ܚܲܡܸܫ ܡܸܢܲܝܗܝ ܚܲܟܝܼ̈ܡܵܬܵܐ ܗ݇ܘܵܘ ܘܚܲܡܸܫ ܣܲܟ݂̈ܠܵܬܵܐ: ܘܐܵܢܝܼ ܣܲܟ݂̈ܠܵܬܵܐ ܫܩܝܼܠܗ݇ܘܿܢ ܠܲܡܦܹܝ̈ܕܲܝܗܝ، ܘܠܵܐ ܫܩܝܼܠܗ݇ܘܿܢ ܥܲܡܲܝܗܝ ܡܸܫܚܵܐ: ܐܝܼܢܵܐ ܐܵܢܝܼ ܚܲܟܝܼ̈ܡܵܬܵܐ ܫܩܝܼܠܗ݇ܘܿܢ ܡܸܫܚܵܐ ܒܡܵܐܢܹ̈ܐ ܥܲܡ ܠܲܡܦܹܝܕܲܝ̈ܗܝ: ܐܝܼܢܵܐ ܟܲܕ ܥܘܼܪܩܸܠܹܗ ܚܲܬܢܵܐ، ܢܝܼܡܠܗ݇ܘܿܢ ܟܠܲܝܗܝ ܘܕܡܝܼܟܼܠܗ݇ܘܿܢ. ܘܒܦܸܠܓܹܗ ܕܠܸܠܝܵܐ ܗ݇ܘܹܐܠܵܗ̇ ܡܲܩܘܲܚܬܵܐ: ܗܵܐ ܚܲܬܢܵܐ ܒܹܐܬܵܝܵܐ ܝܠܹܗ: ܦܠܘܼܛܘܿܢ ܠܐܘܼܪܚܹܗ. ܗܲܝܓܵܗ̇ ܩܝܼܡܠܗ݇ܘܿܢ ܟܠܲܝܗܝ ܐܵܢܝܼ ܒܬܘܼܠܵܬܹ̈ܐ، ܘܬܘܼܪܸܨܠܗ݇ܘܿܢ ܠܲܡܦܹܝܕܲܝ̈ܗܝ: ܐܝܼܢܵܐ ܐ݇ܡܝܼܪܗ݇ܘܿܢ ܐܵܢܝܼ ܣܲܟܼܠܵܬ̈ܵܐ ܠܚܲܟܝܼܡܵܬ̈ܵܐ: ܗܲܒَܼܠܘܿܢ ܠܲܢ ܡ̣ܢ ܡܸܫܚܵܘܟܼܘܿܢ: ܕܗܵܐ ܕܥܝܼܟܼܠܗ݇ܘܿܢ ܠܲܡܦܹܝ̈ܕܲܝܢ: ܓ̰ܘܼܘܸܒܠܗَܘܿܢ ܐܵܢܝܼ ܚܲܟܝܼܡܵܬܹ̈ܐ ܘܐ݇ܡܝܼܪܗ݇ܘܿܢ: ܩܵܘܡܵܐ ܠܵܐ ܡܵܠܹܐ ܐܸܠܲܢ ܘܐܸܠܵܘܟܼܘܿܢ: ܐܸܠܵܐ ܙܹܠ݇ܡܘܿܢ ܠܘܵܬ ܐܵܢܝܼ ܕܡܙܲܒܢܝܼ. ܘܙܒܼܘܼܢܘܿܢ ܠܵܘܟܼܘܿܢ. ܘܟܲܕ ܐ݇ܙܝܼܠܗ݇ܘܿܢ ܠܸܙܒܼܵܢܵܐ، ܐ݇ܬܹܐܠܹܗ ܚܲܬܢܵܐ: ܘܐܲܝܢܝܼ ܕܡܗܘܼܕܪܹܐ ܝܗ݇ܘܵܘ ܥܒܼܝܼܪܗ݇ܘܿܢ ܥܲܡܹܗ ܠܒܹܝܬ ܚܠܘܼܠܵܐ، ܘܦܝܼܫܠܹܗ ܕܒܼܝܼܪܵܐ ܬܲܪܥܵܐ: ܐܝܼܢܵܐ ܒܚܲܪܬܵܐ ܐ݇ܬܹܐܠܗ݇ܘܿܢ ܐܵܦ ܐܵܢܝܼ ܒܬܘܼܠܵܬܹ̈ܐ ܐ݇ܚܹܪ̈݇ܢܹܐ ܘܐܵܡܪܝܼ: ܡܵܪܲܢ: ܡܵܪܲܢ: ܦܬܘܿܚ ܐܸܠܲܢ: ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐ݇ܡܝܼܪܹܗ ܐܸܠܲܝܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܠܹܐ ܝܵܕܥܸܢܵܘܟܼܘܿܢ: ܗܲܕܟܼܵܐ ܦܘܼܫܘܿܢ ܪܥܝܼܫܹܐ ܕܠܹܐ ܝܵܕܥܝܼܬܘܿܢ ܠܗ̇ܘ ܝܵܘܡܵܐ ܘܠܵܐ ܠܣܵܥܵܬ. ܣܵܒܵܒ ܐܲܝܟܼ ܓܲܒܼܪܵܐ ܕܥܒܼܝܼܕܠܹܗ ܣܵܦܵܪ: ܩܪܹܐܠܹܗ ܠܪܹ̈ܓܵܘܵܬܘܼܗܝ ܘܣܘܼܦܹܐܠܹܗ ܐܸܠܲܝܗܝ ܡܸܢܕܝܼܹܗ: ܐܝܼܬ ܕܝܘܼܗ݇ܒܼܹܠܹܗ ܐܸܠܹܗ ܚܲܡܫܵܐ ܟܲܟܪܹ̈ܐ، ܘܐܝܼܬ ܕܬܸܪܬܹܝ، ܘܐܝܼܬ ܕܚܲܕ݇. ܐ݇ܢܵܫܵܐ ܐ݇ܢܵܫܵܐ ܐܲܝܟܼ ܚܲܝܠܹܗ: ܘܙܝܼܠܹܗ ܒܣܵܦܵܪ. ܐܝܼܢܵܐ ܐ݇ܙܝܼܠܹܗ ܗ̇ܘ ܕܫܩܝܼܠܹܗ ܚܲܡܫܵܐ ܟܲܟܪܹ̈ܐ، ܘܥܒܼܝܼܕܠܹܗ ܬܲܓܵܪܘܼܬܵܐ ܒܝܼܵܝܗܝ ܘܩܢܹܐܠܹܗ ܚܲܡܫܵܐ ܐ݇ܚܹܪ̈݇ܢܹܐ: ܘܗܲܕܟܼܵܐ ܐܘܿܦ ܗ̇ܘ ܕܬܹܪܬܹܝ، ܩܢܹܐ ܠܹܗ ܬܪܹܝ ܐ݇ܚܹܪ̈݇ܢܹܐ. ܐܝܼܢܵܐ ܗ̇ܘ ܕܫܩܝܼܠܹܗ ܚܲܕ݇، ܐ݇ܙܝܼܠܹܗ ܚܦܝܼܪܹܗ ܒܐܲܪܥܵܐ ܘܛܘܼܫܹܐܠܹܗ ܙܘܼܙܵܐ ܕܡܵܪܹܗ: ܐܝܼܢܵܐ ܡ̣ܢ ܒܵܬ݇ܪ ܙܲܒܼܢܵܐ ܪܵܒܵܐ، ܐ݇ܬܹܐ ܠܹܗ ܡܵܪܲܝܗܝ ܕܐܵܢܝܼ ܪܹ̈ܓܵܘܵܬܹܐ، ܘܫܩܝܼܠܹܗ ܡܸܢܲܝܗܝ ܚܸܫܒܘܼܢܵܐ: ܘܩܘܼܪܒܸܢܹܗ ܗ̇ܘ ܕܫܩܝܼܠܵܐ ܝܗ݇ܘܵܐ ܚܲܡܫܵܐ ܟܲܟܪܹ̈ܐ، ܘܡܘܼܩܪܸܒܼܠܹܗ ܚܲܡܫܵܐ ܐ݇ܚܹܪ̈݇ܢܹܐ ܘܐ݇ܡܝܼܪܹܗ: ܡܵܪܝܼ ܚܲܡܫܵܐ ܟܲܟܪܹ̈ܐ ܝܘܼܗ݇ܒܼܸܠܘܼܟܼ ܐܸܠܝܼ، ܗܵܐ ܚܲܡܫܵܐ ܐ݇ܚܹܪ̈݇ܢܹܐ ܩܢܹܐܠܝܼ ܥܲܠܲܝܗܝ: ܐܵܡܸܪ ܐܸܠܹܗ ܡܵܪܹܗ: ܟ̰ܲܝܒܘܼ ܪܹܓܵܐ ܛܵܒܼܵܐ ܘܡܗܲܝܡܢܵܐ: ܥܲܠ ܚܲܕ݇ܟ̰ܵܐ ܡܗܘܼܡܢܵܐ ܗ݇ܘܹܐܠܘܼܟܼ ܥܲܠ ܪܵܒܵܐ ܒܸܬ ܡܲܩܝܼܡܸܢܘܼܟܼ: ܥܒܼܘܿܪ ܠܚܲܕܘܼܬܵܐ ܕܡܵܪܘܟܼ: ܘܩܘܼܪܒܸܢܹܗ ܗ̇ܘ ܕܬܸܪܬܹܝ ܟܲܟܪ̈ܘܼܗܝ ܘܐ݇ܡܝܼܪܹܗ: ܡܵܪܝܼ ܬܸܪܬܹܝ ܟܲܟܪܹ̈ܐ ܝܘܗ݇ܒܼܸܠܘܼܟܼ ܐܸܠܝܼ: ܗܵܐ ܬܸܪܬܹܝ ܐ݇ܚܹܪ̈݇ܢܹܐ ܩܢܹܐܠܝܼ ܥܲܠܲܝܗܝ: ܐܵܡܸܪ ܐܸܠܹܗ ܡܵܪܹܗ: ܟ̰ܲܝܒܘܼ ܪܹܓܵܐ ܛܵܒܼܵܐ ܘܡܗܲܝܡܢܵܐ: ܥܲܠ ܚܲܕ݇ܟ̰ܵܐ ܡܗܘܼܡܢܵܐ ܗ݇ܘܹܐܠܘܼܟܼ: ܥܲܠ ܪܵܒܵܐ ܒܸܬ ܡܲܩܝܼܡܸܢܘܼܟܼ ܥܒܼܘܿܪ ܠܚܲܕܘܼܬܵܐ ܕܡܵܪܘܟܼ.

♱♱♱♱♱♱♱♱♱♱♱♱♱

ܕܘܟܼܪܢܐ ܕܡܪܝ ܐܣܛܦܢܘܣ: ܘܕܡܪܝ ܐܒܼܐ ܒܚܕܐ ܥܪܘܒܼܬܐ

ܡܬܝ ܝܐ: 20 ‐ ܫܘܠܡܐ، ܟܕ: 45 ‐ ܫܘܠܡܐ،

ܝܘܚܢܢ ܗ: 19 ‐ ܫܘܼܠܵܡܵܐ

ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܘܐ݇ܡܸܪܹܗ ܝܑܼܫܘܿܥ ܠܟܸܢܫܹ̈ܐ ܕܝܘܼܗَܕܵܝܹ̈ܐ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܠܹܐ ܡܵܨܹܐ ܒܪܘܿܢܵܐ ܥܵܒܼܸܕ ܡܸܢܕܝܼ ܡ̣ܢ ܓܵܢܹܗ: ܐܸܠܵܐ ܡܸܢܕܝܼ ܕܚܵܙܹܐ ܠܒܵܒܵܐ ܕܒܸܥܒܼܵܕܵܐ: ܣܵܒܵܒ ܐܲܝܢܝܼ ܕܒܵܒܵܐ ܥܵܒܼܸܕ: ܐܲܢܹܐ ܐܵܦ ܒܪܘܿܢܵܐ ܐܲܝܟܼ ܕܝܼܹܗ ܟܹܐ ܥܵܒܼܸܕ: ܣܵܒܵܒ ܒܵܒܵܐ ܟܹܐ ܡܲܚܸܒ ܠܒܪܘܿܢܹܗ: ܘܟܠ ܡܸܢܕܝܼ ܕܥܵܒܼܸܕ ܟܹܐ ܡܲܚܙܹܐ ܠܹܗ: ܘܕܒܘܼܫ ܙܵܘܕܵܐ ܡ̣ܢ ܐܲܢܹܐ ܥܒܼܵܕܹ̈ܐ ܟܹܐ ܡܲܚܙܹܐ ܠܹܗ ܕܐܲܚܬܘܿܢ ܥܲܓ̰ܒܝܼܬܘܿܢ: ܣܵܒܵܒ ܕܲܐܟܼܝܼ ܕܒܵܒܵܐ ܡܲܩܸܡ ܡܝܼܬܹ̈ܐ ܘܡܲܚܹܐܠܗ݇ܘܿܢ: ܗܲܕܟܼܵܐ ܐܵܦ ܒܪܘܿܢܵܐ ܠܐܲܝܢܝܼ ܕܒܲܣܡܵܐܠܹܗ ܒܸܬ ܡܲܚܹܐ: ܣܵܒܵܒ ܠܹܐ ܒܵܒܵܐ ܕܵܐܸܢ ܠܐ݇ܢܵܫܵܐ: ܐܸܠܵܐ ܟܠܵܗ̇ ܕܝܵܢܬܵܐ ܝܘܼܗ݇ܒܼܵܐܠܹܗ ܠܒܪܘܿܢܵܐ: ܕܟܠ ܐ݇ܢܵܫܵܐ ܡܝܵܩܸܪ ܠܒܪܘܿܢܵܐ ܐܲܝܟܼ ܕܡܝܵܩܸܪ ܠܒܵܒܵܐ: ܗ̇ܘ ܕܠܵܐ ܡܝܵܩܸܪ ܠܒܪܘܿܢܵܐ: ܠܹܐ ܡܝܵܩܸܪ ܠܒܵܒܵܐ ܕܩܲܡ ܫܵܕܸܪܹܗ: ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܡܵܢ ܕܫܵܡܸܥ ܗܹܡܸܙܡܵܢܝܼ، ܘܡܗܲܝܡܸܢ ܠܡ̇ܢ ܕܫܘܼܕܪܸܢܹܗ: ܐܝܼܬܠܹܗ ܚܲܝܹ̈ܐ ܕܠܥܵܠܲܡ، ܘܠܕܝܵܢܬܵܐ ܠܹܐ ܐܵܬܹܐ، ܐܸܠܵܐ ܫܘܼܢܹܐܠܹܗ ܡ̣ܢ ܡܵܘܬܵܐ ܠܚܲܝܹ̈ܐ: ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܒܸܬ ܐܲܬܝܵܐ ܣܵܥܵܬ ܐܵܦ ܐܵܕܝܼܵܐ ܝܼܠܵܗ̇: ܐܝܼܡܵܢ ܕܡܝܼܬܹ̈ܐ ܒܸܬ ܫܲܡܥܝܼ ܩܵܠܹܗ ܕܒܪܘܿܢܹܗ ܕܐܲܠܵܗܵܐ: ܘܐܵܢܝܼ ܕܫܲܡܥܝܼ ܒܸܬ ܚܲܝܼܝܼ، ܣܵܒܵܒ ܕܲܐܟܼܝܼ ܕܠܒܵܒܵܐ ܐܝܼܬ ܚܲܝܹ̈ܐ ܒܩܢܘܿܡܹܗ: ܗܲܕܟܼܵܐ ܝܘܼܗܒܼܸܠܹܗ ܐܵܦ ܠܒܪܘܿܢܵܐ: ܕܗܵܘܝܼ ܚܲܝܹ̈ܐ ܒܩܢܘܿܡܹܗ: ܕܝܘܼܗ݇ܒܼܸܠܹܗ ܫܘܼܠܛܵܢܵܐ ܐܸܠܹܗ ܕܗܵܘܹܐ ܒܸܥܒܼܵܕܵܐ ܐܵܦ ܕܝܵܢܬܵܐ: ܕܝܼܠܹܗ ܒܪܘܿܢܹܗ ܕܐ݇ܢܵܫܵܐ: ܠܵܐ ܥܲܓ̰ܒܝܼܬܘܿܢ ܒܐܵܗܵܐ: ܕܒܹܐܬܵܝܵܐ ܝܠܵܗ̇ ܣܵܥܵܬ: ܐܝܼܡܵܢ ܕܟܠܲܝܗܝ ܐܲܝܢܝܼ ܕܓܵܘ ܩܲܒܼܪ̈ܵܘܵܬܹܐ ܝܢܵܐ ܒܸܬ ܫܲܡܥܝܼ ܩܵܠܹܗ: ܘܒܸܬ ܦܲܠܛܝܼ. ܐܲܝܢܝܼ ܕܥܒܼܸܕܠܗ݇ܘܿܢ ܛܵܒܼܵܬܹ̈ܐ ܠܩܝܵܡܬܵܐ ܕܚܲܝܹ̈ܐ: ܘܐܲܝܢܝܼ ܕܥܒܼܸܕܠܗ݇ܘܿܢ ܒܝܼܫܵܬܹ̈ܐ ܠܩܝܵܡܬܵܐ ܕܕܝܵܢܬܵܐ: ܠܹܐ ܡܵܨܸܢ ܡ̣ܢ ܓܵܢܝܼ ܡܸܢܕܝܼ ܠܸܥܒܼܵܕܵܐ: ܐܸܠܵܐ ܕܲܐܟܼܝܼ ܕܫܲܡܥܸܢ ܟܹܐ ܕܲܝܢܸܢ: ܘܕܝܵܢܬܝܼ ܗܲܩ ܝܼܠܵܗ̇: ܣܵܒܵܒ ܠܹܐ ܒܵܥܸܢ ܨܸܒܼܝܵܢܵܐ ܕܓܵܢܝܼ، ܐܸܠܵܐ ܨܸܒܼܝܵܢܵܐ ܕܡ̇ܢ ܕܫܘܼܕܪܸܢܹܗ: ܐܸܢ ܐܵܢܵܐ ܝܲܗܒܼܸܢ ܣܵܗܕܘܼܬܵܐ ܥܲܠ ܓܵܢܝܼ. ܣܵܗܕܘܼܬܝܼ ܠܹܐ ܝܠܵܗ̇ ܫܲܪܝܼܪܬܵܐ: ܚܲܕ݇ ܐ݇ܚܹܪ݇ܢܵܐ ܝَܠܹܗ ܗ̇ܘ ܕܝܵܗ݇ܒܼܸܠ ܣܵܗܕܘܼܬܵܐ ܥܲܠܝܼ: ܘܒܝܼܕܵܥܵܐ ܝܼܘܸܢ ܕܫܲܪܝܼܪܬܵܐ ܝܠܵܗ̇ ܣܵܗܕܘܼܬܹܗ ܕܒܤܗܵܕܵܐ ܝܠܹܗ ܥܲܠܝܼ. ܐܲܚܬܘܿܢ ܫܘܼܕܸܪܵܘܟܼܘܿܢ ܠܘܵܬ ܝܘܿܚܲܢܵܢ، ܘܣܗܸܕܠܹܗ ܥܲܠ ܫܪܵܪܵܐ: ܐܝܼܢܵܐ ܐܵܢܵܐ ܠܹܐ ܝܘܸܢ ܡ̣ܢ ܒܲܪܢܵܫܵܐ ܒܸܫܩܵܠܵܐ ܣܵܗܕܘܼܬܵܐ: ܐܸܠܵܐ ܐܲܢܹܐ ܒܹܐܡܵܪܵܐ ܝܘܸܢ ܕܐܲܚܬܘܿܢ ܚܲܝܝܼܬܘܿܢ: ܗ̇ܘ ܝܼܗ݇ܘܵܐ ܫܪܵܓَܼܝܵܐ ܕܟܹܐ ܠܵܗܹܐ ܘܡܲܢܗܸܪ: ܘܐܲܚܬܘܿܢ ܒܣܸܡܠܵܐ ܠܵܘܟܼܘܿܢ ܕܚܕܵܐ ܣܵܥܵܬ ܥܲܒܼܕܝܼܬܘܿܢ ܗ݇ܘܵܐ ܫܘܼܒܼܗܵܪܵܐ ܒܢܘܼܗܪܹܗ: ܐܝܼܢܵܐ ܐܵܢܵܐ ܐܝܼܬܠܝܼ ܣܵܗܕܘܼܬܵܐ ܕܒܘܼܫ ܪܲܒܬܵܐ ܡ̣ܢ ܕܝܘܿܚܲܢܵܢ: ܣܵܒܵܒ ܥܒܼܵܕܹ̈ܐ ܕܝܘܼܗ݇ܒܼܸܠܹܗ ܐܸܠܝܼ ܒܵܒܝܼ ܕܬܲܡܸܡܸܢܘܿܢ: ܐܵܢܝܼ ܥܒܼܵܕܹ̈ܐ ܕܒܸܥܒܼܵܕܲܝܗܝ ܝܘܸܢ ܒܸܣܗܵܕܵܐ ܝܢܵܐ ܥܲܠܝܼ ܕܒܵܒܵܐ ܫܘܼܕܪܸܢܹܗ: ܘܒܵܒܵܐ ܕܫܘܼܕܪܸܢܹܗ ܗ̇ܘ ܣܗܸܕܠܹܗ ܥܲܠܝܼ، ܩܵܠܹܗ ܗܝܼܟ̰ ܠܵܐ ܫܡܸܥܠܵܘܟܼܘܿܢ: ܘܠܵܐ ܚܸܙܘܹܗ ܚܙܹܐܠܵܘܟܼܘܿܢ: ܘܗܲܡܙܲܡܬܹܗ ܠܹܐ ܝܠܵܗ̇ ܥܲܪܩܘܼܠܹܐ ܓܵܘܵܘܟܼܘܿܢ: ܣܵܒܵܒ ܕܒܗ̇ܘ ܕܗ̇ܘ ܫܘܼܕܸܪܹܗ ܠܹܐ ܝܬܘܿܢ ܗܲܡܘܼܢܹܐ: ܨܲܚܨܹܝܡܘܿܢ ܟܬܵܒܼܹ̈ܐ ܕܒܝܼܵܝܗܝ ܒܤܲܒ̣ܪܵܐ ܝܬܘܿܢ ܕܚܲܝܹ̈ܐ ܕܠܥܵܠܲܡ ܐܝܼܬܠܵܘܟܼܘܿܢ: ܘܐܵܢܝܼ ܒܣܵܗܕܝܼ ܥܲܠܝܼ. ܘܠܹܐ ܝܬܘܿܢ ܒܥܵܝܵܐ ܕܐܵܬܝܼܬܘܿܢ ܠܘܵܬܝܼ: ܕܚܲܝܹ̈ܐ ܕܠܥܵܠܲܡ ܗܵܘܝܼ ܠܵܘܟܼܘܿܢ: ܫܘܼܒܼܚܵܐ ܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܩܵܒܘܼܠܹܐ: ܐܸܠܵܐ ܩܲܡ ܝܲܕܥܸܢܵܘܟܼܘܿܢ ܕܚܘܼܒܹܗ ܕܐܲܠܵܗܵܐ ܠܲܝܬ ܒܝܼܵܘܟܼܘܿܢ: ܐܵܢܵܐ ܐ݇ܬܹܐܠܝܼ ܒܫܸܡܹܗ ܕܒܵܒܝܼ، ܘܐܲܚܬܘܿܢ ܠܹܐ ܝܬܘܿܢ ܡܩܵܒܘܼܠܹܐ ܐܸܠܝܼ: ܘܐܸܢ ܚܲܕ݇ ܐ݇ܚܹܪ݇ܢܵܐ ܐܵܬܹܐ ܒܫܸܡܵܐ ܕܓܵܢܹܗ: ܠܗ̇ܘ ܒܸܬ ܩܲܒܠܝܼܬܘܿܢ: ܕܲܐܟܼܝܼ ܒܡܵܨܝܼܬܘܿܢ ܠܡܗܲܝܡܘܼܢܹܐ: ܕܫܘܼܒܼܚܵܐ، ܚܲܕ̣݇ ܡ̣ܢ ܗ̇ܘ ܐ݇ܚܹܐܪ݇ܢܵܐ ܡܩܵܒܘܼܠܹܐ ܝܬܘܿܢ: ܘܫܘܼܒܼܚܵܐ ܕܡ̣ܢ ܚܲܕ݇ ܐܲܠܵܗܵܐ ܠܹܐ ܝܬܘܿܢ ܒܥܵܝܵܐ: ܩܵܡܘܿ ܒܸܚܫܵܒܼܵܐ ܝܬܘܿܢ ܕܐܵܢܵܐ ܒܡܵܚܸܢ ܕܲܪܩܘܼܒ̣ܠܵܘܟܼܘܿܢ ܩܵܕ݇ܡ ܒܵܒܵܐ؟ ܐܝܼܬ ܡ̇ܢ ܕܡܵܚܹܐ ܕܲܪܩܘܼܒ̣ܠܵܘܟܼܘܿܢ: ܡܘܼܫܹܐ ܗ̇ܘ ܕܒܗܝܼܒܼܝܼ ܝܬܘܿܢ ܒܝܼܹܗ: ܣܵܒܵܒ ܐܸܢ ܒܡܘܼܫܹܐ ܗܵܘܹܝܬܘܿܢ ܗ݇ܘܵܘ ܗܘܼܡܸܢܹܐ: ܐܘܿܦ ܒܝܼܝܼ ܒܸܬ ܗܲܡܸܢܝܼܬܘܿܢ ܗ݇ܘܵܘ: ܣܵܒܵܒ ܡܘܼܫܹܐ ܒܘܼܬ ܕܝܠܼ݇ܝܼ ܟܬܝܼܒܼܠܹܗ: ܐܸܢ ܠܟܬܵܒܼܹ̈ܐ ܕܗ̇ܘ ܠܹܐ ܝܬܘܿܢ ܗܲܡܘܼܢܹܐ: ܕܲܐܟܼܝܼ ܠܟܬܵܒܼܹ̈ܐ ܕܝܠܼ݇ܝܼ ܒܸܬ ܗܲܡܸܢܝܼܬܘܿܢ؟

ܐܪܒܥܒܿܫܒܐ ܕܦܠܓܗ ܕܨܘܡܐ

ܝܘܚܢܢ ܘ: 51 ‐ 70

ܝܘܚܢܢ ܝܐ: 1 ‐ 47

ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܐܝܼܢܵܐ ܒܗ̇ܘ ܙܲܒܼܢܵܐ ܐܝܼܬ ܗ݇ܘܵܐ ܚܲܕ݇ ܕܡܸܪܥܝܵܐ ܗ݇ܘܵܐ: ܠܲܥܵܙܲܪ ܡ̣ܢ ܡܵܬܵܐ ܕܒܹܝܬ ܥܲܢܝܵܐ: ܐܲܚܘܿܢܵܗ̇ ܕܡܲܪܝܲܡ ܘܕܡܵܪܬܵܐ: ܐܝܼܢܵܐ ܐܵܗܵܐ ܡܲܪܝܲܡ، ܝܼܠܵܗ̇ ܗ̇‌ܝ ܕܡܫܝܼܚܠܵܗ̇ ܒܒܸܣܡܵܐ ܐܲܩ̈ܠܵܬܹܐ ܕܝܼܫܘܿܥ ܘܡܫܹܐܠܵܗ̇ ܒܟܵܘܣܘܼܗܿ: ܐܲܚܘܿܢܵܐ ܕܐܵܗܵܐ ܗ݇ܘܵܐ ܠܲܥܵܙܲܪ ܕܝܼܗَܘܵܐ ܡܸܪܥܝܵܐ: ܫܘܼܕܸܪܗ݇ܘܿܢ ܬܸܪ̈ܘܲܢܬܲܝܗܝ ܚܲܬܘܵܬܹ̈ܗ ܠܘܵܬ ܝܑܼܫܘܿܥ ܘܐܲܡܪܝܼ: ܡܵܪܲܢ: ܗܵܐ ܗ̇ܘ ܕܡܲܚܸܒܸܬܠܹܗ ܡܸܪܥܝܵܐ ܝܠܹܗ: ܐܝܼܢܵܐ ܝܑܼܫܘܿܥ ܐ݇ܡܸܪܹܗ: ܐܵܗܵܐ ܡܲܪܥܵܐ ܠܹܐ ܝܠܹܗ ܕܡܵܘܬܵܐ: ܐܸܠܵܐ ܚܠܵܦ ܬܸܫܒܘܿܚܬܵܐ ܕܐܲܠܵܗܵܐ ܕܦܵܐܸܫ ܡܫܘܼܒܚܵܐ ܒܪܘܿܢܹܗ ܕܐܲܠܵܗܵܐ ܒܣܵܒܵܒ ܕܝܼܹܗ: ܐܝܼܢܵܐ ܡܲܚܸܒ ܗ݇ܘܵܐ ܝܑܼܫܘܿܥ ܠܡܵܪܬܵܐ ܘܠܡܲܪܝܲܡ ܘܠܠܲܥܵܙܲܪ. ܘܟܲܕ ܫܡܸܥܠܹܗ ܕܡܸܪܥܝܵܐ ܝܠܹܗ: ܥܘܼܪܩܸܠܹܗ ܒܗ̇‌ܝ ܕܘܼܟܬܵܐ ܕܝܼܗَܘܵܐ ܬܪܹܝ ܝܵܘܡܵܢܹ̈ܐ. ܘܡ̣ܢ ܒܵܬ݇ܪ ܗܵܕܵܐ ܐ݇ܡܸܪܹܗ ܠܬܲܠܡܝܼܕܘܼ̈ܗܝ: ܬܹܐܡܘܿܢ ܐܵܙܵܠ݇ܚ ܡܸܢ݇ܕܪܹܫ݇ ܠܝܼܗܘܼܕ. ܐܲܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܪܲܒܲܢ: ܐܵܕܝܼܵܐ ܝܗ݇ܘܼܕܵܝܹ̈ܐ ܒܥܵܝܵܐ ܗ݇ܘܵܘ ܠܸܪܓ̰ܵܡܘܼܟܼ. ܘܡܸܢ݇ܕܪܹܫ݇ ܒܸܬ ܐܵܙܸܠ݇ܬ ܠܬܵܡܵܐ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܠܵܐ ܬܪܸܥܣܲܪ ܣܵܥܲܬܹ̈ܐ ܐܝܼܬ ܒܝܵܘܡܵܐ؟ ܘܐܸܢ ܐ݇ܢܵܫܵܐ ܚܵܕܸܪ ܒܐܝܼܡܵܡܵܐ ܠܹܐ ܬܲܪܩܸܠ: ܣܵܒܵܒ ܕܒܸܬ ܚܵܙܹܐ ܢܘܼܗܪܹܗ ܕܐܵܗܵܐ ܥܲܠܡܵܐ: ܐܝܼܢܵܐ ܐܸܢ ܐ݇ܢܵܫܵܐ ܒܠܸܠܝܵܐ ܚܵܕܸܪ ܒܸܬ ܬܲܪܩܸܠ: ܣܵܒܵܒ ܕܠܲܝܬ ܒܝܼܹܗ ܒܲܗܪܵܐ: ܐܲܢܹܐ ܐ݇ܡܸܪܹܗ ܝܑܼܫܘܿܥ: ܘܡ̣ܢ ܒܵܬ݇ܪ ܗܵܕܵܐ ܐ݇ܡܸܪܹܗ ܐܸܠܲܝܗܝ: ܠܲܥܵܙܲܪ ܪܵܚܡܵܢ ܕܡܸܟܼܠܹܗ: ܐܸܠܵܐ ܒܹܐܙܵܠܵܐ ܝܘܸܢ ܕܡܲܪܥܸܫܸܢܹܗ: ܐܲܡܪܝܼ ܐܸܠܹܗ ܬܲܠܡܝܼܕܘܼ̈ܗܝ: ܡܵܪܲܢ: ܐܸܢ ܕܡܝܼܟܼܵܐ ܝܠܹܗ ܒܸܬ ܒܵܤܸܡ: ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܥܲܠ ܡܵܘܬܹܗ: ܘܐܵܢܝܼ ܚܫܸܒܼܠܗ݇ܘܿܢ ܕܥܲܠ ܕܡܲܟܼܬܵܐ ܕܫܸܢܬܵܐ ܐ݇ܡܸܪܹܗ: ܗܿܝܓܵܗ̇ ܓܲܠܝܵܐܝܼܬ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܠܲܥܵܙܲܪ ܡܝܼܬܠܹܗ: ܘܒܸܚܕܵܝܵܐ ܝܘܸܢ ܕܠܵܐ ܗ݇ܘܹܐ ܠܝܼ ܬܵܡܵܐ: ܒܘܼܬ ܕܝܼܵܘܟܼܘܿܢ ܕܗܲܡܸܢܝܼܬܘܿܢ: ܐܸܠܵܐ ܐܵܙܸܠ݇ܚ ܠܬܵܡܵܐ: ܐܵܡܸܪ ܬܐܘܿܡܵܐ ܕܦܵܐܸܫ ܐ݇ܡܝܼܪܵܐ ܬܐܵܡܵܐ ܠܬܲܠܡܝܼܕܹ̈ܐ ܚܲܒܼܪ̈ܵܘܵܬܘܼܗܝ: ܐܵܙܵܠ݇ܚ ܐܘܿܦ ܐܲܚܢܲܢ ܡܲܝܬܵܚ ܥܲܡܹܗ. ܘܐ݇ܬܹܐܠܹܗ ܝܑܼܫܘܿܥ ܠܒܹܝܬ ܥܲܢܝܵܐ: ܘܡܘܼܫ݇ܟ̰ܸܚܠܹܗ ܕܐܲܪܒܥܵܐ ܝܵܘܡܵܢܹ̈ܐ ܗ݇ܘܵܐ ܐܸܠܹܗ ܕܝܼܗَܘܵܐ ܓܵܘ ܒܹܝܬ ܩܒܼܘܼܪܵܐ. ܐܝܼܢܵܐ ܒܹܝܬ ܥܲܢܝܵܐ ܝܼܗَܘܵܐ ܥܲܠ ܓܹܒܵܐ ܕܐܘܿܪܸܫܠܸܡ: ܟܲܕ ܪܸܚܩܵܐ ܡܸܢܵܗ̇ ܐܲܝܟ ܚܲܡܫܲܥܣܲܪ ܐܸܣܛ̈ܕܵܘܵܬܵܐ: ܘܪܵܒܵܐ ܡ̣ܢ ܝܗ݇ܘܼܕܵܝܹ̈ܐ ܐܸܬܝܹܐ ܗ݇ܘܵܘ ܠܘܵܬ ܡܵܪܬܵܐ ܘܡܲܪܝܲܡ ܕܝܲܗ݇ܒܼܝܼܠܗ݇ܘܿܢ ܠܸܒܵܐ ܒܘܼܬ ܐܲܚܘܿܢܲܝܗܝ: ܐܝܼܢܵܐ ܡܵܪܬܵܐ ܟܲܕ ܫܡܸܥܠܵܗ̇ ܕܝܼܫܘܿܥ ܐ݇ܬܹܐܠܹܗ:ܦܠܸܛܠܵܗ̇ ܠܐܘܼܪܚܹܗ: ܐܝܼܢܵܐ ܡܲܪܝܲܡ ܝܬܝܼܒܼܬܵܐ ܗ݇ܘܵܐ ܒܒܲܝܬܵܐ: ܘܐ݇ܡܸܪܵܗ̇ ܡܵܪܬܵܐ ܠܝܼܫܘܿܥ: ܡܵܪܝܼ ܐܸܢ ܗܵܘܸܬ ܗ݇ܘܵܐ ܠܲܐܟܼܵܐ ܠܹܐ ܡܵܐܸܬ ܗ݇ܘܵܐ ܐܲܚܘܿܢܝܼ: ܐܸܠܵܐ ܐܘܿܦ ܐܵܕܝܼܵܐ ܒܝܼܕܵܥܵܐ ܝܘܲܢܝ ܕܟܡܵܐ ܕܛܲܠܒܸܬ ܡ̣ܢ ܐܲܠܵܗܵܐ ܒܸܬ ܝܲܗ݇ܒܼܸܠܘܼܟܼ. ܐܵܡܸܪ ܐܸܠܵܗ̇ ܝܑܼܫܘܿܥ: ܒܸܬ ܩܵܐܸܡ ܐܲܚܘܿܢܹܟܼܝ. ܐܲܡܪܵܐ ܐܸܠܹܗ ܡܵܪܬܵܐ: ܒܝܼܕܵܥܵܐ ܝܘܲܢܝ ܕܒܸܬ ܩܵܐܸܡ ܒܢܘܼܚܵܡܵܐ ܒܝܵܘܡܵܐ ܐ݇ܚܵܪܵܝܵܐ: ܐܵܡܸܪ ܐܸܠܵܗ̇ ܝܑܼܫܘܿܥ: ܐܵܢܵܐ ܝܘܸܢ ܢܘܼܚܵܡܵܐ ܘܚܲܝܹ̈ܐ: ܘܡ̇ܢ ܕܡܗܲܝܡܸܢ ܒܝܼܝܼ، ܐܵܦܸܢ ܡܵܐܸܬ ܒܸܬ ܚܵܝܹܐ: ܘܟܠ ܕܚܵܝܵܐ ܝܠܹܗ ܘܡܗܲܝܡܸܢ ܒܝܼܝܼ، ܠܥܵܠܲܡ ܠܹܐ ܡܵܐܸܬ. ܡܗܲܝܡܘܼܢܹܐ ܝܘܲܬܝ ܐܵܗܵܐ؟ ܐܲܡܪܵܐ ܐܸܠܹܗ: ܗܹܐ ܡܵܪܝܼ، ܐܵܢܵܐ ܡܗܲܝܡܘܼܢܹܐ ܝܘܲܢܝ، ܕܐܲܢ݇ܬ ܝܼܘܸܬ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܕܐܵܬܹܐ ܠܥܵܠܡܵܐ: ܘܟܲܕ ܐ݇ܡܸܪܵܗ̇ ܐܲܢܹܐ: ܐ݇ܙܸܠܵܗ̇ ܩܪܹܐܠܵܗ̇ ܠܡܲܪܝܲܡ ܚܵܬܵܗ̇ ܒܛܸܫܘܵܐ: ܘܐ݇ܡܸܪܵܗ̇ ܐܸܠܵܗ̇: ܪܵܒܝܼܵܢ ܐ݇ܬܹܐܠܹܗ ܘܒܸܩܪܵܝܹܟܼܝ ܝܼܠܹܗ: ܘܡܲܪܝܲܡ ܟܲܕ ܫܡܸܥܠܵܗ̇: ܩܸܡܠܵܗ̇ ܓ̰ܲܠܕܹܐ ܘܐܲܬܝܵܐ ܗ݇ܘܵܐ ܠܘܵܬܹܗ: ܐܝܼܢܵܐ ܝܑܼܫܘܿܥ ܗܵܠܵܐ ܠܹܐ ܗ݇ܘܵܐ ܐܸܬܝܵܐ ܠܡܵܬܵܐ: ܐܸܠܵܐ ܒܗ̇‌ܝ ܕܘܼܟܬܵܐ ܗ݇ܘܵܐ ܕܬܦܸܩܠܵܗ̇ ܒܝܼܹܗ ܡܵܪܬܵܐ: ܐܝܼܢܵܐ ܐܘܿܦ ܐܵܢܝܼ ܝܗ݇ܘܼܕܵܝܹ̈ܐ ܕܝܼܗ݇ܘܵܘ ܥܲܡܵܗ̇ ܒܒܲܝܬܵܐ ܕܒܼܝܼܵܗ݇ܒܼܘܼܗ̇ ܗ݇ܘܵܘ ܠܸܒܵܐ، ܕܚܙܹܐܠܗ݇ܘܿܢ ܠܡܲܪܝܲܡ ܕܓ̰ܲܠܕܹܐ ܩܸܡܠܵܗ̇ ܦܠܸܛܠܵܗ̇: ܐ݇ܙܸܠܗ݇ܘܿܢ ܒܲܬܪܵܗܿ: ܣܵܒܵܒ ܚܫܸܒܼܠܗ݇ܘܿܢ ܕܠܩܲܒܼܪܵܐ ܒܹܐܙܵܠܵܐ ܗ݇ܘܵܐ ܠܸܒܟܼܵܝܵܐ: ܐܝܼܢܵܐ ܗ̇‌ܝ ܡܲܪܝܲܡ ܟܲܕ ܐ݇ܬܹܐܠܵܗ̇ ܐܲܝܟܵܐ ܕܝܼܗَܘܵܐ ܝܑܼܫܘܿܥ ܘܚܙܹܐܠܵܗ̇ ܐܸܠܹܗ: ܢܦܸܠܵܗ̇ ܥܲܠ ܐܲܩܠܵܬܹ̈ܗ ܘܐܵܡܪܵܐ ܐܸܠܹܗ: ܐܸܢ ܗܵܘܸܬ ܗ݇ܘܵܐ ܠܲܐܟܼܵܐ ܡܵܪܝܼ، ܠܹܐ ܡܵܐܸܬ ܗ݇ܘܵܐ ܐܲܚܘܿܢܝܼ: ܐܝܼܢܵܐ ܝܑܼܫܘܿܥ ܟܲܕ ܚܸܙܝܵܐܠܹܗ ܕܒܸܒܟܼܵܝܵܐ: ܘܠܐܵܢܝܼ ܝܗ݇ܘܼܕܵܝܹ̈ܐ ܕܐ݇ܬܹܐܠܗ݇ܘܿܢ ܥܲܡܵܗ̇ ܕܒܸܒܟܼܵܝܵܐ: ܚܘܼܠܸܢܹܗ ܒܪܘܿܚܹܗ ܘܡܘܼܫܥܸܫܵܐܠܹܗ ܓܵܢܹܗ ܘܐ݇ܡܸܪܹܗ: ܐܲܝܟܵܐ ܡܘܼܬܝܼܒܼܠܵܘܟܼܘܿܢ ܐܸܠܹܗ؟ ܘܐܲܡܪܝܼ ܐܸܠܹܗ: ܡܵܪܲܢ ܬܵܐ ܚܙܝܼ. ܘܐܵܬܝܼ ܗ݇ܘܵܘ ܕܸܡܥܹ̈ܐ ܕܝܼܫܘܿܥ: ܘܐܲܡܪܝܼ ܗ݇ܘܵܘ ܝܗ݇ܘܼܕܵܝܹ̈ܐ: ܚܙܹܐܡܘܿܢ ܟܡܵܐ ܡܲܚܸܒ ܗ݇ܘܵܐ ܠܹܗ: ܐܝܼܢܵܐ ܐ݇ܢܵܫܹ̈ܐ ܡܸܢܲܝܗܝ ܐ݇ܡܸܪܗ݇ܘܿܢ: ܠܹܐ ܡܵܨܹܐ ܗ݇ܘܵܐ ܐܵܗܵܐ ܕܦܬܸܚܠܹܗ ܥܲܝ̈ܢܹܗ ܕܗ̇ܘ ܣܸܡܝܵܐ ܕܥܵܒܼܸܕ ܕܐܘܿܦ ܐܵܗܵܐ ܠܵܐ ܡܵܐܸܬ؟ ܐܝܼܢܵܐ ܝܑܼܫܘܿܥ ܟܲܕ ܦܝܵܫܵܐ ܫܥܝܼܫܵܐ ܒܹܝܬ݇ܠܹܗ ܘܐܸܠܹܗ: ܐ݇ܬܹܐܠܹܗ ܠܒܹܝܬ ܩܒܼܘܼܪܵܐ: ܘܐܵܗܵܐ ܒܹܝܬ ܩܒܼܘܼܪܵܐ ܝܼܗَܘܵܐ ܡܥܲܪܬܵܐ ܘܟܹܐܦܵܐ ܡܘܼܬܝܼܒܼܬܵܐ ܗ݇ܘܵܐ ܥܲܠ ܬܲܪܥܹܗ. ܘܐ݇ܡܸܪܹܗ ܝܑܼܫܘܿܥ: ܫܩܘܼܠܗ݇ܘܿܢ ܐܵܗܵܐ ܟܹܐܦܵܐ: ܐܲܡܪܵܐ ܐܸܠܹܗ ܡܵܪܬܵܐ ܚܵܬܹܗ ܕܗ̇ܘ ܡܝܼܬܵܐ: ܡܵܪܝܼ:ܡ̣ܢ ܓ̰ܲܠܕܹܐ ܣܸܪܝܵܐ ܝܠܹܗ: ܣܵܒܵܒ ܗܵܐ ܐܲܪܒܥܵܐ ܝܵܘܡܵܢܹ̈ܐ ܝܢܵܐ ܐܸܠܹܗ: ܐܵܡܸܪ ܐܸܠܵܗ̇ ܝܑܼܫܘܿܥ: ܠܵܐ ܐ݇ܡܸܪܝܼ ܐܸܠܹܟܼܝ ܕܐܸܢ ܡܗܲܝܡܢܵܬܝ ܒܸܬ ܚܲܙܝܵܬܝ ܫܘܼܒܼܚܹܗ ܕܐܲܠܵܗܵܐ؟ ܘܫܩܸܠܗ݇ܘܿܢ ܗ̇‌ܝ ܟܹܐܦܵܐ: ܘܝܼܫܘܿܥ ܡܘܼܪܸܡܠܹܗ ܥܲܝܢܘܼ̈ܗܝ ܠܥܸܠ ܘܐ݇ܡܸܪܹܗ: ܒܵܒܵܐ ܡܵܘܕܘܼܝܹܐ ܝܘܸܢ ܐܸܠܘܼܟܼ ܕܩܲܡ ܫܲܡܥܸܬܠܝܼ، ܘܐܵܢܵܐ ܟܹܐ ܝܲܕܥܸܢ ܕܒܟܠ ܙܲܒܼܢܵܐ ܟܹܐ ܫܲܡܥܸܬܠܝܼ، ܐܸܠܵܐ ܡܸܛܠ ܐܵܗܵܐ ܟܸܢܫܵܐ ܕܟܸܠܝܵܐ ܝܠܹܗ، ܒܹܐܡܵܪܵܐ ܝܘܸܢ ܐܲܢܹܐ: ܕܗܲܡܸܢܝܼ ܕܐܲܢ݇ܬ ܫܘܼܕܪܸܢܘܼܟܼ: ܘܟܲܕ ܐ݇ܡܸܪܹܗ ܐܲܢܹܐ: ܩܪܹܐܠܹܗ ܒܩܵܠܵܐ ܪܵܡܵܐ: ܠܲܥܵܙܲܪ ܬܵܐ ܠܒܼܲܕܲܪ: ܘܦܠܸܛܠܹܗ ܗ̇ܘ ܡܝܼܬܵܐ ܟܲܕ ܐ݇ܣܝܼܪܹܐ ܐܝܼܕܘܼ̈ܗܝ ܘܐܲܩ̈ܠܘܼܗܝ ܒܩܸܛܥܵܛܹ̈ܐ ܕܓ̰ܘܼܠܵܐ: ܘܦܲܐܬܘܵܬܘܼ̈ܗܝ ܐ݇ܣܝܼܪܹܐ ܒܝܵܠܸܚܬܵܐ. ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܫܪܹܐܡܘܿܢ ܠܹܗ ܘܫܒܼܘܼܩܘܿܢ ܐܵܙܸܠ. ܘܪܵܒܵܐ ܡ̣ܢ ܝܗ݇ܘܼܕܵܝܹ̈ܐ ܕܐ݇ܬܹܐ ܠܗ݇ܘܿܢ ܠܘܵܬ ܡܲܪܝܲܡ: ܟܲܕ ܚܙܹܐܠܗ݇ܘܿܢ ܡܸܢܕܝܼ ܕܥܒܼܸܕܠܹܗ ܝܑܼܫܘܿܥ ܗܘܼܡܸܢܗ݇ܘܿܢ ܒܝܼܹܗ. ܘܐ݇ܢܵܫܹ̈ܐ ܡܸܢܲܝܗܝ ܐ݇ܙܸܠܗ݇ܘܿܢ ܠܘܵܬ ܦܪ̈ܝܼܫܹܐ ܘܐ݇ܡܸܪܗ݇ܘܿܢ ܐܸܠܲܝܗܝ ܟܠ ܡܸܢܕܝܼ ܕܗ݇ܘܹܐܠܹܗ.

(((

ܡܬܝ ܟܚ: 1 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♰ ܐܝܼܢܵܐ ܒܪܲܡܫܵܐ ܒܫܲܒܬܵܐ ܕܝܼܠܵܗ̇ ܙܪܵܩܵܐ ܕܚܲܕܒܫܲܒܵܐ. ܐ݇ܬܹܐܠܵܗ̇ ܡܲܪܝܲܡ ܡܲܓܼܕܠܵܝܬܵܐ ܘܡܲܪܝܲܡ ܐ݇ܚܹܪ݇ܬܵܐ ܕܚܵܙܝܼ ܩܲܒܼܪܵܐ. ܘܗܵܐ ܫܥܵܫܵܐ ܪܲܒܵܐ ܗ݇ܘܹܐܠܹܗ. ܣܵܒܵܒ ܡܲܠܲܐܟܼܵܐ ܕܡܵܪܝܵܐ ܨܠܹܐܠܹܗ ܡ̣ܢ ܫܡܲܝܵܐ. ܘܩܘܼܪܒܸܢܹܗ ܡܘܼܚܕܸܪܹܗ ܟܹܐܦܵܐ ܡ̣ܢ ܬܲܪܥܵܐ. ܘܝܵܬܸܒܼ ܗ݇ܘܵܐ ܥܲܠܘܼܗ̇. ܐܝܼܢܵܐ ܚܸܙܘܹܗ ܝܼܗَܘܵܐ ܐܲܝܟܼ ܒܲܪܩܵܐ. ܘܠܒܼܝܼܫܬܹܗ ܚܘܵܪܬܵܐ ܐܲܝܟܼ ܬܲܠܓܵܐ. ܘܡ̣ܢ ܙܕܘܿܥܬܹܗ ܫܥܸܫܠܗ݇ܘܿܢ ܐܲܝܢܝܼ ܕܒܸܢܛܵܪܵܐ ܗ݇ܘܵܘ. ܘܗ݇ܘܹܐܠܗ݇ܘܿܢ ܐܲܝܟܼ ܡܝܼܬܹ̈ܐ. ܐܝܼܢܵܐ ܓ̰ܘܼܘܸܒܠܹܗ ܡܲܠܲܐܟܼܵܐ ܘܐ݇ܡܸܪܹܗ ܠܢܸܫܹ̈ܐ: ܐܲܚܬܘܿܢ ܠܵܐ ܙܲܕܥܝܼܬܘܿܢ. ܣܵܒܵܒ ܒܝܼܕܵܥܵܐ ܝܘܸܢ ܕܠܝܼܫܘܿܥ ܕܦܸܫܠܹܗ ܙܩܝܼܦܵܐ ܒܥܵܝܵܐ ܝܬܘܿܢ. ܠܹܐ ܝܠܹܗ ܠܲܐܟܼܵܐ. ܣܵܒܵܒ ܩܸܡܠܹܗ ܕܲܐܟܼܝܼ ܕܐ݇ܡܸܪܹܗ. ܬܹܐܡܘܿܢ ܚܙܹܐܡܘܿܢ ܕܘܼܟܬܵܐ ܕܡܘܼܬܒܼܵܐ ܗ݇ܘܵܐ ܒܝܼܵܗ̇ ܡܵܪܲܢ. ܘܙܹܠ݇ܡܘܿܢ ܓ̰ܲܠܕܹܐ، ܐ݇ܡܘܼܪܘܿܢ ܠܬܲܠܡܝܼܕܘܼ̈ܗܝ: ܕܩܸܡܠܹܗ ܡ̣ܢ ܒܹܝܬ ܡܝܼܬܹ̈ܐ. ܘܗܵܐ ܒܸܬ ܩܵܕܸܡܠܵܘܟܼܘܿܢ ܠܓܠܝܼܠܵܐ. ܬܵܡܵܐ ܒܸܬ ܚܵܙܝܼܬܘܿܢ ܠܹܗ. ܗܵܐ ܐ݇ܡܸܪܝܼ ܐܸܠܵܘܟܼܘܿܢ. ܘܐ݇ܙܸܠܗ݇ܘܿܢ ܓ̰ܲܠܕܹܐ ܡ̣ܢ ܩܲܒܼܪܵܐ ܒܙܕܘܿܥܬܵܐ ܘܒܚܲܕܘܼܬܵܐ ܪܲܒܬܵܐ. ܘܪܚܸܛܠܗ݇ܘܿܢ ܕܐܲܡܪܝܼ ܠܬܲܠܡܝܼܕܘܼ̈ܗܝ. ܘܗܵܐ ܝܑܼܫܘܿܥ ܬܦܸܩܠܹܗ ܒܝܼܵܝܗܝ. ܘܐ݇ܡܸܪܹܗ ܐܸܠܲܝܗܝ: ܫܠܵܡܵܐ ܐܸܠܵܘܟܼܘܿܢ: ܐܝܼܢܵܐ ܐܵܢܝܼ ܩܘܼܪܒܸܢܗ݇ܘܿܢ ܕܒܼܸܩܠܗ݇ܘܿܢ ܐܲܩܠܵܬܘܼ̈ܗܝ، ܘܣܓܼܸܕܠܗ݇ܘܿܢ ܐܸܠܹܗ. ܗܿܝܓܵܗ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܠܵܐ ܙܲܕܥܝܼܬܘܿܢ ܐܸܠܵܐ ܙܹܠ݇ܡܘܿܢ ܐ݇ܡܘܼܪܘܿܢ ܠܐܲܚܘܼܢ̈ܘܵܬܝܼ ܕܐܵܙܠ݇ܝܼ ܠܓܠܝܼܠܵܐ. ܘܬܵܡܵܐ ܒܸܬ ܚܵܙܝܼ ܠܝܼ. ܐܝܼܢܵܐ ܟܲܕ ܐ݇ܙܸܠܗ݇ܘܿܢ. ܐ݇ܬܹܐܠܗ݇ܘܿܢ ܐ݇ܢܵܫܹ̈ܐ ܡ̣ܢ ܕܐܵܢܝܼ ܢܵܛܘܿܪܹ̈ܐ ܠܡܕܝܼܢ݇ܬܵܐ. ܘܐ݇ܡܸܪܗ݇ܘܿܢ ܠܪ̈ܲܒܲܝ ܟܵܗܢܹ̈ܐ ܟܠ ܡܸܢܕܝܼ ܕܗ݇ܘܹܐܠܹܗ. ܘܓ̰ܡܸܥܠܗ݇ܘܿܢ ܥܲܡ ܩܲܫܝܼܫܹ̈ܐ. ܘܥܒܼܸܕܠܗ݇ܘܿܢ ܪܵܐܝ ܘܝܘܼܗ݇ܒܼܸܠܗ݇ܘܿܢ ܠܵܐ ܚܲܕ݇ܟ̰ܵܐ ܙܘܼܙܵܐ ܩܵܐ ܢܵܛܘܿܪܹ̈ܐ. ܘܐ݇ܡܸܪܗ݇ܘܿܢ ܐܸܠܲܝܗܝ: ܐ݇ܡܘܼܪܘܿܢ ܕܬܲܠܡܝܼܕܘܼ̈ܗܝ ܐ݇ܬܹܐܠܗܘܿܢ ܘܓܢܸܒܼܠܗ݇ܘܿܢ ܐܸܠܹܗ ܒܠܸܠܝܵܐ ܟܲܕ ܐܲܚܢܲܢ ܕܡܝܼܟܼܹ̈ܐ. ܘܐܸܢ ܦܸܫܠܵܗ̇ ܫܡܸܥܬܵܐ ܐܵܗܵܐ ܩܵܕ݇ܡ ܗܸܓܼܡܘܼܢܵܐ ܐܲܚܢܲܢ ܒܸܬ ܦܲܪܦܸܠܵܚ ܒܝܼܹܗ. ܘܐܸܠܵܘܟܼܘܿܢ ܕܠܵܐ ܠܵܘܡܵܐ ܒܸܬ ܥܲܒܼܕܵܚ. ܐܝܼܢܵܐ ܐܵܢܝܼ ܟܲܕ ܫܩܸܠܗ݇ܘܿܢ ܙܘܼܙܵܐ. ܥܒܼܸܕܠܗ݇ܘܿܢ ܕܲܐܟܼܝܼ ܕܩܲܡ ܡܲܠܦܝܼܠܗ݇ܘܿܢ. ܘܦܠܸܛܠܵܗ̇ ܐܵܗܵܐ ܗܲܡܙܲܡܬܵܐ ܓܵܘ ܝܗ݇ܘܼܕܵܝܹ̈ܐ ܗܲܠ ܐܸܕܝܘܿܡ ܝܵܘܡܵܐ. ܐܝܼܢܵܐ ܚܕܲܥܣܲܪ ܬܲܠܡܝܼܕܹ̈ܐ ܐ݇ܙܸܠܗ݇ܘܿܢ ܠܓܠܝܼܠܵܐ ܠܛܘܼܪܵܐ. ܐܲܝܟܵܐ ܕܥܒܼܝܼܕܵܐ ܗ݇ܘܵܐ ܘܲܥܕܵܐ ܥܲܡܲܝܗܝ ܝܑܼܫܘܿܥ. ܘܟܲܕ ܩܲܡ ܚܵܙܝܼܠܹܗ، ܣܓܼܸܕܠܗ݇ܘܿܢ ܐܸܠܹܗ. ܐܝܼܢܵܐ ܡܸܢܲܝܗܝ ܦܸܫܠܗ݇ܘܿܢ ܒܫܸܟ. ܘܩܘܼܪܒܸܢܹܗ ܝܑܼܫܘܿܥ ܘܗܘܼܡܙܸܡܠܹܗ ܥܲܡܵܝܗܝ ܘܐ݇ܡܸܪܹܗ ܐܸܠܲܝܗܝ: ܦܸܫܠܹܗ ܝܘܼܗ݇ܒܼܵܐ ܐܸܠܝܼ ܫܘܼܠܛܵܢܵܐ ܒܫܡܲܝܵܐ ܘܒܐܲܪܥܵܐ. ܕܲܐܟܼܝܼ ܕܩܲܡ ܫܵܕܸܪܝܼ ܒܵܒܝܼ ܐܘܿܦ ܐܵܢܵܐ ܫܵܕܘܼܪܹܐ ܝܼܘܸܢ ܐܸܠܵܘܟܼܘܿܢ. ܗܲܕܟܼܵܐ ܙܹܠ݇ܡܘܿܢ ܬܲܠܡܸܕܘܿܢ ܟܠܲܝܗܝ ܥܲܡܡܹ̈ܐ. ܘܡܲܥܡܸܕܘܿܢ ܠܗ݇ܘܿܢ ܒܫܸܡܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. ܘܡܲܠܦܘܿܢ ܠܗ݇ܘܿܢ ܕܢܲܛܪܝܼ ܟܠܡܸܢܕܝܼ ܕܦܩܝܼܕܠܝܼ ܐܸܠܵܘܟܼܘܿܢ. ܘܗܵܐ ܐܵܢܵܐ ܥܲܡܵܘܟܼܘܿܢ ܝܼܘܸܢ ܟܠܲܝܗܝ ܝܵܘܡܵܢܹ̈ܐ ܗܲܠ ܠܫܘܼܠܵܡܹܗ ܕܥܵܠܡܵܐ.

♱♱♱♱♱♱♱♱♱♱♱♱♱

ܩܪܝܢܐ ܕܨܦܪܐ ܕܩܝܡܬܐ

(ܒܬܼܪ ܒܪܟܼܘ ܟܠܗܘܢ...)

ܠܘܩܐ ܟܕ: 1 ‐ 12

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܐܝܼܢܵܐ ܒܚܲܕܒܫܲܒܵܐ ܒܨܲܦܪܵܐ ܗܵܠܵܐ ܚܸܫܟܵܐ. ܐ݇ܬܹܐܠܗ݇ܘܿܢ ܠܒܹܝܬ ܩܒܼܘܼܪܵܐ. ܘܡܘܼܬ݇ܝܹܐܠܗ݇ܘܿܢ ܗܹܪ̈ܘܿܡܹܐ ܐܵܢܝܼ ܕܗܘܼܕܪܲܝܗܝ ܗ݇ܘܵܘ. ܘܐܝܼܬ ܗ݇ܘܵܘ ܥܲܡܵܝܗܝ ܒܲܟܼܬܵܬܹ̈ܐ ܐ݇ܚܹܪ̈݇ܢܹܐ. ܘܡܘܼܫ݇ܟ̰ܸܚܠܗ݇ܘܿܢ ܟܹܐܦܵܐ ܕܡܘܼܚܕܸܪܬܵܐ ܡ̣ܢ ܒܹܝܬ ܩܒܼܘܼܪܵܐ. ܘܥܒܼܸܪܗ݇ܘܿܢ، ܘܠܵܐ ܡܘܼܫ݇ܟ̰ܸܚܠܗ݇ܘܿܢ ܠܦܲܓܼܪܵܐ ܕܝܼܫܘܿܥ. ܘܗ݇ܘܹܐܠܵܗ̇ ܕܟܲܕ ܐܵܢܝܼ ܬܡܝܼܗܹܐ ܥܲܠ ܕܐܵܗܵܐ. ܗܵܐ ܬܪܹܝ ܓܲܒܼܪܹ̈ܐ ܟܠܹܐܠܗ݇ܘܿܢ ܠܥܸܠ ܡܸܢܲܝܗܝ ܘܡܲܒܪܸܩܵܐ ܗ݇ܘܵܐ ܠܒܼܝܼܫܬܲܝܗܝ. ܘܗ݇ܘܹܐܠܗ݇ܘܿܢ ܒܙܕܘܿܥܬܵܐ، ܘܡܘܼܟܸܦܠܗ݇ܘܿܢ ܦܵܐܬܘܵܬܲܝ̈ܗܝ ܒܐܲܪܥܵܐ. ܘܐܲܡܪܝܼ ܐܸܠܲܝܗܝ: ܩܵܡܘܼܕܝܼ ܒܸܛܥܵܝܵܐ ܝܬܘܿܢ ܒܵܬܲܪ ܚܵܝܵܐ ܓܵܘ ܡܝܼܬܹ̈ܐ؟ ܠܹܐ ܝܠܹܗ ܠܲܐܟܼܵܐ. ܩܝܼܡܵܐ ܝܠܹܗ. ܕܟܼܘܼܪܘܿܢ ܕܗܘܼܡܙܸܡܠܹܗ ܥܲܡܵܘܟܼܘܿܢ ܟܲܕ ܗ̇ܘ ܓܵܘ ܓܠܝܼܠܵܐ، ܘܐ݇ܡܝܼܪ ܗ݇ܘܵܐܠܹܗ: ܕܗܕܝܼܪܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ ܕܦܵܐܸܫ ܣܘܼܦܝܵܐ ܒܐܝܼܕܵܬܹ̈ܐ ܕܐ݇ܢܵܫܹܐ ܚܲܛܵܝܹ̈ܐ. ܘܒܸܬ ܦܵܐܸܫ ܨܠܝܼܒܼܵܐ ܘܠܝܵܘܡܵܐ ܕܬܠܵܬܵܐ ܒܸܬ ܩܵܐܸܡ. ܘܐܵܢܝܼ ܕܟܼܸܪܗ݇ܘܿܢ ܠܗܹܡܸܙܡܵܢܘܼ̈ܗܝ، ܘܕܥܸܪܗ݇ܘܿܢ ܡ̣ܢ ܩܲܒܼܪܵܐ. ܘܡܝܼܪܝܼܠܗ݇ܘܿܢ ܟܠܲܝܗܝ ܐܲܢܹܐ ܠܲܚܕܲܥܣܲܪ ܘܠܫܲܪܟܵܐ. ܐܝܼܢܵܐ ܝܼܗ݇ܘܵܘ: ܡܲܪܝܲܡ ܡܲܓܼܕܠܵܝܬܵܐ. ܘܝܘܿܚܲܢ ܘܡܲܪܝܲܡ ܝܸܡܹܗ ܕܝܲܥܩܘܿܒܼ ܘܫܲܪܟܵܐ ܕܥܲܡܲܝܗܝ، ܐܵܢܝܼ ܕܐ݇ܡܸܪܗ݇ܘܿܢ ܠܫܠܝܼܚܹ̈ܐ. ܘܦܸܫܠܗ݇ܘܿܢ ܚܸܙܝܹܐ ܒܥܲܝܢܲܝܗܝ ܐܲܢܹܐ ܗܹܡܸܙܡܵܢܹ̈ܐ ܐܲܝܟܼ ܒܲܛܝܼܠܹ̈ܐ، ܘܠܵܐ ܗܘܼܡܸܢܗ݇ܘܿܢ ܐܸܠܲܝܗܝ. ܐܝܼܢܵܐ ܫܸܡܥܘܿܢ ܩܸܡܠܹܗ ܘܪܚܸܛܠܹܗ ܠܩܲܒܼܪܵܐ. ܘܓܘܼܫܸܩܠܹܗ ܘܚܙܹܐܠܹܗ ܟܸܬܵܢܹ̈ܐ ܕܡܘܼܬܒܼܹܐ ܠܚܘܼܕܲܝܗܝ. ܘܐ݇ܙܸܠܹܗ ܟܲܕ ܥܵܓ̰ܘܼܒܹܐ ܒܓܵܢܹܗ ܥܲܠ ܡܸܢܕܝܼ ܕܗ݇ܘܹܐܠܹܗ.

♱♱♱♱♱♱♱♱♱♱♱♱♱

ܚܕܒܫܒܐ ܪܒܐ ܕܩܝܡܬܐ

ܝܘܚܢܢ ܟܟ: 1 ‐ 19

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܐܝܼܢܵܐ ܒܚܲܕܒܫܲܒܵܐ ܒܨܲܦܪܵܐ ܗܵܠܵܐ ܚܸܫܟܵܐ، ܐ݇ܬܹܐܠܵܗ̇ ܡܲܪܝܲܡ ܡܲܓܼܕܠܵܝܬܵܐ ܠܒܹܝܬ ܩܒܼܘܼܪܵܐ، ܘܚܙܹܐܠܵܗ̇ ܟܹܐܦܵܐ ܕܫܩܝܼܠܬܵܐ ܡ̣ܢ ܩܲܒܼܪܵܐ. ܘܪܚܸܛܠܵܗ̇ ܘܐ݇ܬܹܐܠܵܗ̇ ܠܘܵܬ ܫܸܡܥܘܿܢ ܟܹܐܦܵܐ، ܘܠܘܵܬ ܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ ܕܡܲܚܸܒ ܗ݇ܘܵܐܠܹܗ ܝܑܼܫܘܿܥ. ܘܐܲܡܪܵܐ ܐܸܠܲܝܗܝ: ܕܫܩܸܠܗ݇ܘܿܢ ܠܡܵܪܲܢ ܡ̣ܢ ܗ̇ܘ ܒܹܝܬ ܩܒܼܘܼܪܵܐ. ܘܠܹܐ ܝܘܲܢܝ ܒܝܼܕܵܥܵܐ ܐܲܝܟܵܐ ܡܘܼܬܸܒܼܠܗ݇ܘܿܢ ܐܸܠܹܗ. ܘܦܠܸܛܠܸܗ ܫܸܡܥܘܿܢ ܘܗ̇ܘ ܬܲܠܡܝܼܕܵܐ ܐ݇ܚܹܪ݇ܢܵܐ. ܘܐܵܬܝܼ ܗ݇ܘܵܘ ܠܒܹܝܬ ܩܒܼܘܼܪܵܐ. ܘܪܵܚܛܝܼ ܗ݇ܘܵܘ ܬܸܪܘܲܝܗܝ ܡܐܸܚܕܵܕܹܐ. ܐܝܼܢܵܐ ܗ̇ܘ ܬܲܠܡܝܼܕܵܐ ܪܚܸܛܠܹܗ ܩܕܸܡܠܹܗ ܠܫܸܡܥܘܼܢ. ܘܐ݇ܬܹܐܠܹܗ ܩܲܕ݇ܡܵܝܵܐ ܠܒܹܝܬ ܩܒܼܘܼܪܵܐ. ܘܓܘܼܫܸܩܠܹܗ ܚܙܹܐܠܹܗ ܟܸܬܵܢܹ̈ܐ ܟܲܕ ܡܘܼܬܒܼܹܐ. ܐܝܼܢܵܐ ܥܒܼܵܪܵܐ ܠܵܐ ܥܒܼܸܪܹܗ. ܐܝܼܢܵܐ ܐ݇ܬܹܐܠܹܗ ܫܸܡܥܘܿܢ ܒܵܬ݇ܪܹܗ، ܘܥܒ̣ܸܪܹܗ ܠܒܹܝܬ ܩܒ̣ܘܼܪܵܐ، ܘܚܙܹܐܠܹܗ ܟܸܬܵܢܹ̈ܐ ܟܲܕ ܡܘܼܬܒ̣ܹܐ، ܘܝܵܠܸܚܬܵܐ ܗ̇‌ܝ ܕܚܠܝܼܨܬܵܐ ܗ݇ܘܵܐ ܒܪܹܫܹܗ، ܠܵܐ ܥܲܡ ܟܸܬܵܢܹ̈ܐ. ܐܸܠܵܐ ܟܲܕ ܟܪܝܼܟܼܬܵܐ ܘܡܘܼܬܸܒܼܬܵܐ ܠܚܕܵܐ ܕܸܦܢܵܐ ܒܚܕܵܐ ܕܘܼܟܵܐ. ܗܿܝܓܵܗ ܥܒܼܸܪܹܗ ܐܘܿܦ ܗ̇ܘ ܬܲܠܡܝܼܕܵܐ ܕܐ݇ܬܹܐܠܹܗ ܩܲܕ݇ܡܵܝܵܐ ܠܒܹܝܬ ܩܒܼܘܼܪܵܐ، ܘܚܙܹܐܠܹܗ ܘܗܘܼܡܸܢܹܗ. ܣܵܒܵܒ ܗܵܠܵܐ ܠܹܐ ܝܲܕܥܝܼ ܗ݇ܘܵܘ ܡ̣ܢ ܟܬܵܒܼܹ̈ܐ. ܕܗܕܝܼܪܵܐ ܗ݇ܘܵܐ ܠܸܩܝܵܡܵܐ ܡ̣ܢ ܓܵܘ ܡܝܼܬܹ̈ܐ. ܘܐ݇ܙܸܠܗ݇ܘܿܢ ܐܵܢܝܼ ܬܲܠܡܝܼܕܹ̈ܐ ܡܸܢ݇ܕܪܹܫ݇ ܠܕܘܼܟܬܲܝܗܝ. ܐܝܼܢܵܐ ܡܲܪܝܲܡ ܟܠܹܝܬܵܐ ܗ݇ܘܵܐ ܠܘܵܬ ܩܲܒܼܪܵܐ ܘܒܟܼܵܝܵܐ. ܘܟܲܕ ܒܟܼܵܝܵܐ ܓܘܼܫܸܩܠܵܗ̇ ܒܩܲܒܼܪܵܐ. ܘܚܙܹܐܠܵܗ̇ ܬܪܹܝ ܡܲܠܲܐܟܼܹ̈ܐ ܒܓ̰ܘܼܠܹ̈ܐ ܚܘܵܪܹ̈ܐ ܕܒܸܬܝܵܒܼܵܐ ܚܲܕ݇ ܡ̣ܢ ܠܵܪܹܫܹܗ ܘܚܲܕ݇ ܡ̣ܢ ܐܲܩܠܵܬ̈ܘܼܗܝ. ܐܲܝܟܵܐ ܕܡܘܼܬܒܼܵܐ ܗ݇ܘܵܐ ܦܲܓܼܪܹܗ ܕܝܼܫܘܿܥ. ܘܐܲܡܪܝܼ ܐܸܠܵܗ̇: ܒܲܟܼܬܵܐ: ܩܵܡܘܼܕܝܼ ܝܘܲܬܝ ܒܟܼܵܝܵܐ؟ ܐܲܡܪܵܐ ܐܸܠܲܝܗܝ: ܕܫܩܸܠܗ݇ܘܿܢ ܠܡܵܪܝܼ. ܘܠܹܐ ܝܘܲܢܝ ܒܝܼܕܵܥܵܐ ܐܲܝܟܵܐ ܡܘܼܬܸܒܼܠܗ݇ܘܿܢ. ܐܵܗܵܐ ܐ݇ܡܸܪܵܗ̇. ܘܕܥܸܪܵܗ̇ ܠܒܵܬ݇ܪܵܐ، ܘܚܙܹܐܠܵܗ̇ ܠܝܼܫܘܿܥ ܕܟܸܠܝܵܐ. ܘܠܹܐ ܗ݇ܘܵܐ ܒܝܼܕܵܥܵܐ ܕܝܼܫܘܿܥ ܝܠܹܗ. ܐܵܡܸܪ ܐܸܠܵܗ̇ ܝܑܼܫܘܿܥ: ܒܲܟܼܬܵܐ: ܩܵܡܘܼܕܝܼ ܒܟܼܵܝܵܐ ܗ݇ܘܲܬܝ. ܘܠܡܵܢܝܼ ܒܥܵܝܵܐ ܝܘܲܬܝ؟ ܐܝܼܢܵܐ ܗ̇‌ܝ ܚܫܸܒܼܠܵܐ ܕܓܲܢܵܢܵܐ ܝܠܹܗ، ܘܐܲܡܪܵܐ ܐܸܠܹܗ: ܡܵܪܝܼ ܐܸܢ ܐܲܢ݇ܬ ܫܩܸܠܘܼܟܼ ܐܸܠܹܗ، ܐ݇ܡܘܿܪ ܐܸܠܝܼ ܐܲܝܟܵܐ ܡܘܼܬܸܒܼܠܘܼܟܼ. ܒܐܵܙܲܠ݇ܢܝ ܫܲܩܠܲܢܹܗ؟ ܐܵܡܸܪ ܐܸܠܵܗ̇ ܝܑܼܫܘܿܥ: ܡܲܪܝܲܡ. ܘܕܥܸܪܵܗ̇ ܘܐ݇ܡܸܪܵܗ̇ ܐܸܠܹܗ ܥܸܒܼܪܵܐܝܼܬ: ܪܲܒܘܼܠܝܼ. ܕܐܲܬܝܵܐ ܠܹܐܡܵܪܵܐ ܡܲܠܦܵܢܵܐ. ܐܵܡܸܪ ܐܸܠܵܗ̇ ܝܑܼܫܘܿܥ: ܠܵܐ ܩܲܪܒܸܢܵܬܝ ܐܸܠܝܼ. ܣܵܒܵܒ ܗܵܠܵܐ ܠܹܐ ܝܘܸܢ ܣܝܼܩܵܐ ܠܘܵܬ ܒܵܒܝܼ. ܐܝܼܢܵܐ ܙܹܠ݇ܝ ܠܘܵܬ ܐܲܚܘܿܢ̈ܘܵܬܝܼ، ܘܐ݇ܡܘܿܪܝ ܐܸܠܲܝܗܝ: ܒܹܣܵܠ݇ܩܵܐ ܝܘܸܢ ܠܘܵܬ ܒܵܒܝܼ ܘܒܵܒܵܘܟܼܘܿܢ، ܘܐܲܠܵܗ‌ܝܼ ܘܐܲܠܵܗܵܘܟܼܘܿܢ. ܗܿܝܓܵܗ̇ ܐ݇ܬܹܐܠܵܗ̇ ܡܲܪܝܲܡ ܡܲܓܼܕܠܵܝܬܵܐ. ܘܡܘܼܫܚܸܕܠܵܗ̇ ܠܬܲܠܡܝܼܕܹ̈ܐ ܕܚܙܹܐܠܵܗ̇ ܠܡܵܪܲܢ. ܘܕܐܲܢܹܐ ܐ݇ܡܸܪܹܗ ܐܸܠܵܗ̇.

♱♱♱♱♱♱♱♱♱♱♱♱♱

ܬܪܝܢܒܿܫܒܐ ܕܫܒܬܼ ܫܒ̈ܐ

ܝܘܚܢܢ ܝܕ: 18 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܠܹܐ ܫܵܒܼܩܸܢܵܘܟܼܘܿܢ ܝܵܬܘܼܡܹ̈ܐ. ܣܵܒܵܒ ܒܸܬ ܐܵܬܸܢ ܠܟܸܣܠܵܘܟܼܘܿܢ ܚܲܕ݇ܟ̰ܵܐ ܐ݇ܚܹܪ݇ܢܵܐ. ܘܥܵܠܡܵܐ ܠܹܐ ܚܵܙܹܐ ܠܝܼ. ܐܝܼܢܵܐ ܐܲܚܬܘܿܢ ܒܸܬ ܚܵܙܝܼܬܘܿܢ ܠܝܼ، ܕܐܵܢܵܐ ܚܵܝܵܐ ܝܘܸܢ: ܐܘܿܦ ܐܲܚܬܘܿܢ ܒܸܬ ܚܲܝܝܼܬܘܿܢ. ܒܗ̇ܘ ܝܵܘܡܵܐ ܒܸܬ ܝܲܕܥܝܼܬܘܿܢ ܕܐܵܢܵܐ ܒܒܵܒܝܼ ܝܘܸܢ: ܘܐܲܚܬܘܿܢ ܒܝܼܝܼ ܝܬܘܿܢ. ܘܐܵܢܵܐ ܒܝܼܵܘܟܼܘܿܢ ܝܘܸܢ. ܡ̇ܢ ܕܐܝܼܬ ܠܘܵܬܹܗ ܦܘܿܩ̈ܕܵܢܝܼ، ܘܢܵܛܸܪܗ݇ܘܿܢ. ܗ̇ܘ ܝܼܠܹܗ ܕܟܹܐ ܡܲܚܸܒܠܝܼ. ܐܝܼܢܵܐ ܗ̇ܘ ܕܡܲܚܸܒܠܝܼ. ܒܸܬ ܦܵܐܸܫ ܡܘܼܚܸܒܵܐ ܡ̣ܢ ܒܵܒܝܼ. ܘܐܵܢܵܐ ܒܸܬ ܡܲܚܸܒܸܢܹܗ، ܘܒܸܬ ܡܲܚܙܸܢ ܐܸܠܹܗ ܓܵܢܝܼ. ܐܵܡܸܪ ܐܸܠܹܗ ܝܼܗܘܼܕܵܐ. ܠܹܐ ܗ݇ܘܵܐ ܣܟܼܲܪܝܘܼܛܵܐ: ܡܵܪܝܼ: ܡܘܿܕܝܼ ܝܠܹܗ ܕܐܸܠܲܢ ܗܕܝܼܪܵܐ ܝܘܸܬ ܠܡܲܚܙܘܼܝܹܐ ܓܵܢܘܼܟܼ ܘܠܵܐ ܠܥܵܠܡܵܐ؟ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܹܗ: ܡ̇ܢ ܕܡܲܚܸܒܠܝܼ ܗܹܡܸܙܡܵܢ̈ܝܼ ܢܵܛܸܪ. ܘܒܵܒܝܼ ܒܸܬ ܡܲܚܸܒܠܹܗ. ܘܠܘܵܬܹܗ ܒܸܬ ܐܵܬܸܚ. ܘܐܵܘܵܢܵܐ ܠܘܵܬܹܗ ܒܸܬ ܥܲܒܼܕܵܚ. ܐܝܼܢܵܐ ܗ̇ܘ ܕܠܵܐ ܡܲܚܸܒܠܝܼ. ܗܹܡܸܙܡܵܢ̈ܝܼ ܠܹܐ ܢܵܛܸܪ. ܘܗܹܡܸܙܡܵܢ ܐܵܗܵܐ ܕܒܸܫܡܵܥܵܐ ܝܼܬܘܿܢ ܠܹܐ ܗ݇ܘܵܐ ܕܝܼܠ݇ܝܼ. ܐܸܠܵܐ ܕܒܵܒܵܐ ܕܩܲܡ ܫܵܕܸܪܝܼ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܟܲܕ ܠܘܵܬܵܘܟܼܘܿܢ ܝܘܸܢ. ܐܝܼܢܵܐ ܗ̇ܘ ܦܵܪܸܩܠܹܝܛܵܐ ܪܘܼܚܵܐ ܕܩܘܼܕܫܵܐ. ܗ̇ܘ ܕܡܫܵܕܸܪ ܒܵܒܵܐ ܒܫܸܡܝܼ. ܗ̇ܘ ܒܸܬ ܡܵܠܸܦܠܵܘܟܼܘܿܢ ܟܠ ܡܸܢܕܝܼ. ܘܗ̇ܘ ܒܸܬ ܡܲܕܟܼܸܪܵܘܟܼܘܿܢ ܟܠ ܡܸܢܕܝܼ ܕܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܫܠܵܡܵܐ ܒܸܫܒܼܵܩܵܐ ܝܘܸܢ ܐܸܠܵܘܟܼܘܿܢ، ܫܠܵܡܵܐ ܕܝܼܠ݇ܝܼ ܒܝܼܵܗ݇ܒܵܐ ܝܘܸܢ ܐܸܠܵܘܟܼܘܿܢ. ܠܹܐ ܗ݇ܘܵܐ ܕܲܐܟܼܝܼ ܕܝܲܗ݇ܒܼܸܠ ܥܵܠܡܵܐ ܐܵܢܵܐ ܒܝܼܵܗ݇ܒܼܵܐ ܝܘܸܢ ܐܸܠܵܘܟܼܘܿܢ. ܠܵܐ ܦܵܐܸܫ ܫܓ̣ܝܼܫܵܐ ܠܸܒܵܘܟܼܘܿܢ ܘܠܵܐ ܙܵܕܸܥ. ܫܡܸܥܠܵܘܟܼܘܿܢ ܕܐܵܢܵܐ ܐ݇ܡܸܪܝܼ ܐܸܠܵܘܟܼܘܿܢ، ܕܒܹܐܙܵܠܵܐ ܝܘܸܢ ܘܒܸܬ ܐܵܬܸܢ ܠܟܸܣܠܵܘܟܼܘܿܢ. ܐܸܢ ܗܵܘܹܝܬܘܿܢ ܡܲܚܘܼܒܹܐ ܐܸܠܝܼ. ܒܸܬ ܗܵܘܹܝܬܘܿܢ ܒܸܚܕܵܝܵܐ ܕܒܹܐܙܵܠܵܐ ܝܘܸܢ ܠܘܵܬ ܒܵܒܝܼ ܕܒܵܒܝܼ ܒܘܼܫ ܓܘܼܪܵܐ ܝܠܹܗ ܡܸܢܝܼ. ܘܐܵܕܝܼܵܐ ܗܵܐ ܐ݇ܡܸܪܝܼ ܐܸܠܵܘܟܼܘܿܢ. ܗܵܠܵܐ ܠܵܐ ܗ݇ܘܵܝܵܐ. ܕܐܝܼܡܵܢ ܕܗ݇ܘܹܐܠܹܗ ܗܲܡܸܢܝܼܬܘܿܢ. ܡ̣ܢ ܐܵܕܝܼܵܐ ܠܹܐ ܗܲܡܙܸܡܸܢ ܥܲܡܵܘܟܼܘܿܢ ܪܵܒܵܐ. ܣܵܒܵܒ ܒܸܬ ܐܵܬܹܐ ܐܲܪܟܘܼܢܵܐ ܕܥܵܠܡܵܐ. ܘܒܝܼܝܼ ܠܲܝܬܠܹܗ ܡܸܢܕܝܼ. ܐܸܠܵܐ ܕܝܵܕܸܥ ܥܵܠܡܵܐ ܕܡܲܚܘܼܒܹܐ ܝܘܸܢ ܠܒܵܒܝܼ. ܘܕܲܐܟܼܝܼ ܕܩܲܡ ܦܵܩܸܕܠܝܼ ܒܵܒܝܼ ܗܲܕܟܼܵܐ ܒܸܥܒܼܵܕܵܐ ܝܘܸܢ. ܩܘܼܡܘܿܢ ܐܵܙܵܠ݇ܚ ܡܐܲܟܼܵܐ.

♱♱♱♱♱♱♱♱♱♱♱♱♱

ܬܠܬܼܒܿܫܒܐ ܕܫܒܬܼ ܫܒ̈ܐ

ܠܘܩܐ ܟܕ: 13 ‐ 26

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܒܵܬܲܪ ܐܲܢܹܐ ܘܗܵܐ ܬܪܹܝ ܡ̣ܢ ܬܲܠܡܝܼ̈ܕܹܐ ܕܝܼܫܘܿܥ ܒܝܼܹܗ ܒܗ̇ܘ ܝܵܘܡܵܐ ܒܹܐܙܵܠܵܐ ܗ݇ܘܵܘ ܠܡܵܬܵܐ ܕܫܸܡܘܼܗ̇ ܥܲܡܵܐܘܿܣ. ܘܪܸܚܩܵܐ ܡ̣ܢ ܐܘܿܪܸܫܠܸܡ ܫܬܝܼ ܐܸܣܛ̈ܕܵܘܵܬܵܐ. ܘܐܵܢܝܼ ܗܲܡܙܘܼܡܹܐ ܗ݇ܘܵܘ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ. ܒܘܼܬ ܟܠܲܝܗܝ ܐܲܢܹܐ ܕܩܘܼܘܸܡܠܗ݇ܘܿܢ. ܘܟܲܕ ܐܵܢܝܼ ܗܲܡܙܘܼܡܹܐ ܗ݇ܘܵܘ، ܘܒܸܕܪܵܫܵܐ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ، ܐ݇ܬܹܐܠܹܗ ܝܑܼܫܘܿܥ ܘܡܸܛܝܵܝܠܹܗ. ܘܐܵܙܸܠ ܗ݇ܘܵܐ ܥܲܡܲܝܗܝ. ܘܥܲܝܢܲܝ̈ܗܝ ܕܒܼܝܼܩܹܐ ܗ݇ܘܵܘ ܕܠܵܐ ܝܲܕܥܝܼܠܹܗ. ܘܐ݇ܡܸܪܹܗ ܐܸܠܲܝܗܝ: ܡܘܿܕܝܼ ܝܢܵܐ ܐܲܢܹܐ ܗܹܡܸܙܡܵܢܹ̈ܐ ܕܗܲܡܙܘܼܡܹܐ ܝܬܘܿܢ ܚܲܕ݇ ܥܲܡ ܗ̇ܘ ܐ݇ܚܹܪ݇ܢܵܐ. ܟܲܕ ܒܹܐܙܵܠܵܐ ܝܬܘܿܢ ܘܦܫܝܼܡܹܐ؟ ܘܓ̰ܘܼܘܸܒܠܹܗ ܚܲܕ݇ ܡܸܢܲܝܗܝ ܕܫܸܡܹܗ ܩܲܠܝܘܿܦܵܐ ܘܐ݇ܡܸܪܹܗ ܐܸܠܹܗ: ܝܵܐ ܪܲܒ ܐܲܢ݇ܬ ܒܢܲܦ̮ܫܘܼܟܼ ܢܘܼܟܼܪܵܝܵܐ ܝܘܸܬ ܡ̣ܢ ܐܘܿܪܸܫܠܸܡ. ܕܠܹܐ ܝܘܸܬ ܒܝܼܕܵܥܵܐ ܡܸܢܕܝܼ ܕܗ݇ܘܹܐܠܹܗ ܓܵܘܵܗ̇ ܒܐܵܢܝܼ ܝܵܘܡܵܢܹ̈ܐ؟ ܐܵܡܸܪ ܐܸܠܲܝܗܝ: ܡܘܿܕܝܼ؟ ܐܲܡܪܝܼ ܐܸܠܹܗ ܒܘܼܬ ܝܑܼܫܘܿܥ ܗ̇ܘ ܕܡ̣ܢ ܢܲܨܪܵܬ. ܓܲܒܼܪܵܐ ܕܝܼܗَܘܵܐ ܢܒܼܝܼܵܐ. ܘܚܲܝܠܵܢܵܐ ܗ݇ܘܵܐ ܒܗܹܡܸܙܡܵܢ ܘܒܥܒܼܵܕܹ̈ܐ ܩܵܕ݇ܡ ܐܲܠܵܗܵܐ ܘܩܵܕ݇ܡ ܟܠܹܗ ܥܲܡܵܐ. ܘܣܘܼܦܹܐܠܗ݇ܘܿܢ ܐܸܠܹܗ ܪ̈ܲܒܲܝ ܟܵܗܢܹ̈ܐ ܘܩܲܫܝܼܫܹ̈ܐ ܠܕܝܼܘܵܢ ܕܡܵܘܬܵܐ ܘܙܩܸܦܠܗ݇ܘܿܢ ܐܸܠܹܗ. ܐܝܼܢܵܐ ܐܲܚܢܲܢ ܒܤܲܒ̣ܪܵܐ ܝܘܲܚ ܗ݇ܘܵܐ ܕܗ̇ܘ ܝܼܠܹܗ ܕܗܕܝܼܪܵܐ ܗ݇ܘܵܐ ܕܦܵܪܸܩ ܠܝܼܣܪܵܝܸܠ. ܘܗܵܐ ܬܠܵܬܵܐ ܝܵܘܡܵܢܹ̈ܐ ܗܵܐ ܡ̣ܢ ܕܐܲܢܹܐ ܟܠܲܝܗܝ ܗ݇ܘܹܐܠܗ݇ܘܿܢ. ܐܸܠܵܐ ܐܘܿܦ ܒܲܟܼܬܵܬܹ̈ܐ ܡܸܢܲܢ ܩܲܡ ܥܲܒܼܕܝܼܠܲܢ ܗܝܼܪܹܐ. ܣܵܒܵܒ ܩܕܝܼܡܹܐ ܗ݇ܘܵܘ ܠܒܹܝܬ ܩܒܼܘܼܪܵܐ، ܘܟܲܕ ܠܵܐ ܡܘܼܫ݇ܟ̰ܸܚܠܗ݇ܘܿܢ ܦܲܓܼܪܹܗ، ܐ݇ܬܹܐܠܗ݇ܘܿܢ ܒܹܐܡܵܪܵܐ ܐܸܠܲܢ: ܕܡܲܠܲܐܟܼܹ̈ܐ ܚܙܹܐܠܲܢ ܬܵܡܵܐ: ܘܒܹܐܡܵܪܵܐ ܥܲܠܘܼܗܝ ܕܚܵܝܵܐ ܝܠܹܗ. ܘܐܘܿܦ ܐ݇ܢܵܫܹ̈ܐ ܡܸܢܲܢ ܐ݇ܙܸܠܗ݇ܘܿܢ ܠܒܹܝܬ ܩܒܼܘܼܪܵܐ: ܘܡܘܼܫ݇ܟ̰ܸܚܠܗ݇ܘܿܢ ܗܲܕܟܼܵܐ ܐܲܝܟܼ ܡܸܢܕܝܼ ܕܐ݇ܡܸܪܗ݇ܘܿܢ ܒܲܟܼܬܵܬܹ̈ܐ. ܐܝܼܢܵܐ ܐܸܠܹܗ ܠܵܐ ܚܙܹܐܠܗ݇ܘܿܢ. ܗܿܝܓܵܗ ܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܝܵܐ ܙܲܒܘܼ̈ܢܹܐ ܕܪܸܥܝܵܢܵܐ ܘܝܲܩܘܼܪܹ̈ܐ ܕܠܸܒܵܐ ܠܡܗܲܝܡܘܼܢܹܐ ܒܟܠܲܝܗܝ ܐܲܝܢܝܼ ܕܗܘܼܡܙܸܡܠܗ݇ܘܿܢ ܢܒܼܝܼܹ̈ܐ، ܠܹܐ ܗ݇ܘܵܐ ܐܲܢܹܐ ܗܕܝܼܪܵܐ ܕܣܲܝܒܸܪ ܗ݇ܘܵܐ ܡܫܝܼܚܵܐ، ܘܕܥܵܒܼܸܪ ܠܬܸܫܒܘܿܚܬܹܗ. ܘܫܵܪܹܐ ܗ݇ܘܵܐ ܡ̣ܢ ܡܘܼܫܹܐ ܘܡ̣ܢ ܟܠܲܝܗܝ ܢܒܼܝܼܹ̈ܐ. ܘܦܵܫܸܩ ܗ݇ܘܵܐ ܠܗ݇ܘܿܢ ܒܘܼܬ ܓܵܢܹܗ ܡ̣ܢ ܟܠܲܝܗܝ ܟܬܵܒܼܹ̈ܐ. ܘܩܘܼܪܒܸܢܗ݇ܘܿܢ ܠܗ̇‌ܝ ܡܵܬܵܐ ܕܒܹܐܙܵܠܵܐ ܗ݇ܘܵܘ ܐܸܠܵܗ̇، ܘܗܿܘ ܡܲܚܫܘܼܒܼ ܗ݇ܘܵܐ ܠܗ݇ܘܿܢ ܕܐܲܝܟܼ ܠܕܘܼܟܵܐ ܪܸܚܩܵܐ ܒܹܐܙܵܠܵܐ ܗ݇ܘܵܐ. ܘܩܲܡ ܡܲܠܝܸܨܝܼܠܹܗ ܘܐܲܡܪܝܼ ܐܸܠܹܗ: ܦܘܼܫ ܠܘܵܬܲܢ: ܣܵܒܵܒ ܕܝܵܘܡܵܐ ܐܵܕܝܼܵܐ ܟܝܵܦܵܐ ܝܠܹܗ ܠܚܲܫܟܘܼܢܹܐ. ܘܥܒܼܸܪܹܗ ܕܦܵܐܸܫ ܠܘܵܬܲܝܗܝ. ܘܗ݇ܘܹܐܠܵܗ̇ ܕܟܲܕ ܝܬܸܒܼܠܹܗ ܥܲܡܲܝܗܝ ܫܩܸܠܹܗ ܠܲܚܡܵܐ ܘܒܘܼܪܸܟܼܠܹܗ ܘܩܨܹܐܠܹܗ. ܘܝܘܼܗ݇ܒܼܸܠܹܗ ܐܸܠܲܝܗܝ. ܘܒܗ̇‌ܝ ܥܕܵܢܵܐ ܦܸܫܠܗ݇ܘܿܢ ܦܬܝܼܚܹܐ ܥܲܝܢܲܝ̈ܗܝ. ܘܝܕܸܥܠܗ݇ܘܿܢ ܐܸܠܹܗ. ܘܗ̇ܘ ܦܸܫܠܹܗ ܫܩܝܼܠܵܐ ܡܸܢܲܝܗܝ. ܘܐܲܡܪܝܼ ܗ݇ܘܵܘ ܚܲܕ݇ ܠܗ̇ܘ ܐ݇ܚܹܪ݇ܢܵܐ: ܠܹܐ ܗ݇ܘܵܐ ܠܸܒܲܢ ܝܲܩܘܼܪܵܐ ܒܓܵܘܲܢ، ܟܲܕ ܗܲܡܙܘܼܡܹܐ ܥܲܡܲܢ ܒܐܘܼܪܚܵܐ ܘܦܵܫܘܼܩܹܐ ܐܸܠܲܢ ܡ̣ܢ ܟܬܵܒܼܹ̈ܐ؟ ܘܩܸܡܠܗ݇ܘܿܢ ܒܗ̇‌ܝ ܣܵܥܵܬ ܘܕܥܸܪܗ݇ܘܿܢ ܠܐܘܿܪܸܫܠܸܡ، ܘܡܘܼܫ݇ܟ̰ܸܚܠܗ݇ܘܿܢ ܠܚܲܕܸܥܣܲܪ ܕܓ̰ܸܡܥܝܹܐ ܘܐܲܝܢܝܼ ܕܥܲܡܲܝܗܝ. ܟܲܕ ܒܹܐܡܵܪܵܐ: ܕܫܲܪܝܼܪܵܐܝܼܬ ܩܸܡܠܹܗ ܡܵܪܲܢ. ܘܦܸܫܠܹܗ ܚܸܙܝܵܐ ܠܫܸܡܥܘܿܢ. ܘܐܘܼܦ ܐܵܢܝܼ ܗܘܼܩܹܐܠܗ݇ܘܿܢ ܐܲܝܢܝܼ ܕܗ݇ܘܹܐܠܗ݇ܘܿܢ ܒܐܘܼܪܚܵܐ. ܘܕܲܐܟܼܝܼ ܦܸܫܠܹܗ ܝܕܸܥܝܵܐ ܐܸܠܲܝܗܝ ܟܲܕ ܩܨܹܐܠܹܗ ܠܲܚܡܵܐ.

♱♱♱♱♱♱♱♱♱♱♱♱♱

ܐܪܒܥܒܿܫܒܐ ܕܫܒܬܼ ܫܒ̈ܐ

ܝܘܚܢܢ ܝܗ: 1 ‐ 26

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܐܵܢܵܐ ܝܼܘܸܢ ܓܸܦܬܵܐ ܕܫܪܵܪܵܐ. ܘܒܵܒܝܼ ܝܼܠܹܗ ܦܲܠܵܚܵܐ. ܟܠ ܦܲܥܘܵܐ ܕܒܝܼܝܼ ܛܥܘܿܢܝܵܬܹ̈ܐ ܠܵܐ ܝܲܗ݇ܒܼܸܠ. ܒܸܬ ܫܵܩܸܠܹܗ. ܘܐܲܝܢܝܼ ܕܝܲܗ݇ܒܼܸܠ ܛܥܘܿܢܝܵܬܹ̈ܐ ܒܸܬ ܡܕܵܟ݂ܹܐ ܠܹܗ ܕܛܥܘܿܢ̈ܝܵܬܹܐ ܪܵܒܵܐ ܡܲܝܬܹܐ. ܐܲܚܬܘܿܢ ܡ̣ܢ ܓ̰ܲܠܕܹܐ ܕܸܟܼܝܹܐ ܝܬܘܿܢ، ܡܸܛܠ ܗܹܡܸܙܡܵܢ ܕܗܘܼܡܙܸܡܠܝܼ ܥܲܡܵܘܟܼܘܿܢ. ܥܲܪܩܸܠܗ݇ܘܿܢ ܒܝܼܝܼ. ܘܐܵܢܵܐ ܒܝܼܵܘܟܼܘܿܢ. ܕܲܐܟܼܝܼ ܕܦܲܥܘܵܐ ܠܹܐ ܡܵܨܹܐ ܕܝܲܗ݇ܒܼܸܠ ܛܥܘܿܢ̈ܝܵܬܹܐ ܡ̣ܢ ܓܵܢܹܗ، ܐܸܢ ܠܵܐ ܡܥܲܪܩܸܠ ܒܓܸܦܬܵܐ. ܗܲܕܟܼܵܐ ܐܵܦܠܵܐ ܐܲܚܬܘܿܢ، ܐܸܢ ܠܵܐ ܥܲܪܩܸܠܝܼܬܘܿܢ ܒܝܼܝܼ. ܐܵܢܵܐ ܝܘܸܢ ܓܸܦܬܵܐ ܘܐܲܚܬܘܿܢ ܦܲܥܘܵܢܹ̈ܐ. ܡ̇ܢ ܕܡܥܲܪܩܸܠ ܒܝܼܝܼ ܘܐܵܢܵܐ ܒܝܼܹܗ. ܐܵܗܵܐ ܒܸܬ ܡܲܝܬܹܐ ܛܥܘܿܢܝ̈ܵܬܹܐ ܪܵܒܵܐ. ܣܵܒܵܒ ܕܠܵܐ ܐܵܢܵܐ: ܠܹܐ ܡܵܨܝܼܬܘܿܢ ܠܸܥܒܼܵܕܵܐ ܡܸܢܕܝܼ. ܐܝܼܢܵܐ ܐܸܢ ܐ݇ܢܵܫܵܐ ܠܵܐ ܡܥܲܪܩܸܠ ܒܝܼܝܼ، ܒܸܬ ܦܵܐܸܫ ܪܘܼܦܝܵܐ ܠܒܼܲܕܲܪ. ܐܲܝܟܼ ܦܲܥܘܵܐ ܕܒܵܪܸܙ. ܘܒܸܬ ܠܲܩܛܝܼܠܹܗ ܕܵܪܝܼܠܹܗ ܒܢܘܼܪܵܐ ܕܝܵܩܸܕ. ܐܝܼܢܵܐ ܐܸܢ ܥܲܪܩܸܠܝܼܬܘܿܢ ܒܝܼܝܼ، ܘܗܲܡܙܸܡ̈ܝܵܬܝܼ ܥܲܪܩܸܠܝܼ ܒܝܼܵܘܟܼܘܿܢ، ܟܠܡܸܢܕܝܼ ܕܒܲܣܡܵܐ ܠܵܘܟܼܘܿܢ ܠܸܛܠܵܒܵܐ ܒܸܬ ܗܵܘܹܐ ܠܵܘܟܼܘܿܢ. ܒܐܵܗܵܐ ܒܸܬ ܦܵܐܸܫ ܡܫܘܼܒܚܵܐ ܐܲܒܼܵܐ. ܕܛܥܘܿܢ̈ܝܵܬܹܐ ܪܵܒܵܐ ܡܲܝܬ݇ܝܼܬܘܿܢ. ܘܗܵܘܹܝܬܘܿܢ ܬܲܠܡܝܼ̈ܕܝܼ. ܕܲܐܟܼܝܼ ܕܩܲܡ ܡܲܚܸܒܠܝܼ ܒܵܒܝܼ، ܐܘܿܦ ܐܵܢܵܐ ܩܲܡ ܡܲܚܒܸܢܵܘܟܼܘܿܢ. ܥܲܪܩܸܠܗ݇ܘܿܢ ܒܡܲܚܲܒܬܵܐ ܕܝܼܠ݇ܝܼ. ܐܸܢ ܦܘܼܩ̈ܕܵܢܝܼ ܢܲܛܪܝܼܬܘܿܢ، ܒܸܬ ܥܲܪܩܸܠܝܼܬܘܿܢ ܒܚܘܼܒܵܐ ܕܝܼܠ݇ܝܼ. ܕܲܐܟܼܝܼ ܕܐܵܢܵܐ ܢܛܸܪܝܼ ܦܘܼܩܕܵܢܹ̈ܐ ܕܒܵܒܝܼ، ܘܡܥܲܪܩܘܼܠܹܐ ܝܘܸܢ ܒܚܘܼܒܹܗ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ، ܕܚܲܕܘܼܬܝܼ ܗܵܘܝܵܐ ܒܝܼܵܘܟܼܘܿܢ. ܘܬܲܡܸܡܵܐ ܚܲܕܘܼܬܵܘܟܼܘܿܢ. ܐܵܗܵܐ ܝܠܹܗ ܦܘܼܩܕܵܢܝܼ، ܕܡܲܚܸܒܝܼܬܘܿܢ ܚܲܕ݇ ܠܗ̇ܘ ܐ݇ܚܹܪ݇ܢܵܐ، ܕܲܐܟܼܝܼ ܕܐܵܢܵܐ ܩܲܡ ܡܲܚܸܒܸܢܵܘܟܼܘܿܢ. ܚܘܼܒܵܐ ܕܒܘܼܫ ܓܘܼܪܵܐ ܡ̣ܢ ܐܵܗܵܐ ܠܲܝܬ، ܕܐ݇ܢܵܫܵܐ ܡܲܬܸܒܼ ܓܵܢܹܗ ܚܠܵܦ ܪ̈ܲܚܡܘܼܗܝ. ܐܲܚܬܘܿܢ ܪ̈ܲܚܡܝܼ ܝܬܘܿܢ، ܐܸܢ ܥܲܒܼܕܝܼܬܘܿܢ ܟܠ ܡܸܢܕܝܼ ܕܦܵܩܘܼܕܹܐ ܝܘܸܢ ܐܸܠܵܘܟܼܘܿܢ. ܡ̣ܢ ܐܵܕܝܼܵܐ ܠܹܐ ܩܵܪܸܢܵܘܟܼܘܿܢ ܥܲܒܼܕܹ̈ܐ. ܣܵܒܵܒ ܕܥܲܒܼܕܵܐ ܠܹܐ ܝܵܕܸܥ ܡܘܿܕܝܼ ܟܹܐ ܥܵܒܼܸܕ ܡܵܪܹܗ. ܐܝܼܢܵܐ ܪ̈ܲܚܡܝܼ ܩܲܡ ܩܵܪܸܢܵܘܟܼܘܿܢ. ܣܵܒܵܒ ܕܟܠ ܕܫܡܸܥܠܝܼ ܡ̣ܢ ܒܵܒܝܼ ܡܘܕܸܥܠܝܼ ܐܸܠܵܘܟܼܘܿܢ. ܠܹܐ ܗ݇ܘܵܐ ܐܲܚܬܘܿܢ ܓܘܼܒܹܐܠܵܘܟܼܘܿܢ ܐܸܠܝܼ. ܐܸܠܵܐ ܐܵܢܵܐ ܩܲܡ ܓܵܒܸܢܵܘܟܼܘܿܢ. ܘܩܲܡ ܡܲܬܒܼܸܢܵܘܟܼܘܿܢ ܕܐܘܿܦ ܐܲܚܬܘܿܢ ܐܵܙܝܼܠ݇ܬܘܿܢ ܡܲܝܝܼܬܘܿܢ ܛܥܘܿܢܝܵܬܹ̈ܐ. ܘܛܥܘܿܢ̈ܝܵܬܵܘܟܼܘܿܢ ܥܲܪܩܸܠܝܼ. ܕܟܠܡܸܢܕܝܼ ܕܛܲܠܒܝܼܬܘܿܢ ܡ̣ܢ ܒܵܒܝܼ ܒܫܸܡܝܼ ܒܸܬ ܝܲܗ݇ܒܼܸܠܵܘܟܼܘܿܢ. ܐܲܢܹܐ ܦܩܵܕܵܐ ܝܘܸܢ ܐܸܠܵܘܟܼܘܿܢ، ܕܡܲܚܸܒܝܼܬܘܿܢ ܚܲܕ݇ ܠܗ̇ܘ ܐ݇ܚܹܪ݇ܢܵܐ. ܘܐܸܢ ܥܵܠܡܵܐ ܣܵܢܹܐܠܵܘܟܼܘܿܢ. ܝܕܸܥܡܘܿܢ ܕܡܩܵܕ݇ܡ ܕܝܼܵܘܟܼܘܿܢ ܐܸܠܝܼ ܣܢܹܐܠܹܗ. ܐܸܢ ܡ̣ܢ ܥܵܠܡܵܐ ܗܵܘܹܝܬܘܿܢ ܗ݇ܘܵܘ، ܥܵܠܡܵܐ ܠܕܝܼܹܠ݇ܗ ܒܸܬ ܡܲܚܸܒ ܗ݇ܘܵܐ. ܐܸܠܵܐ ܠܹܐ ܝܬܘܿܢ ܡ̣ܢ ܥܵܠܡܵܐ. ܣܵܒܵܒ ܐܵܢܵܐ ܩܲܡ ܓܵܒܸܢܵܘܟܼܘܿܢ ܡ̣ܢ ܥܵܠܡܵܐ، ܒܘܼܬ ܕܐܵܗܵܐ ܒܸܣܢܵܝܵܘܟܼܘܿܢ ܝܼܠܹܗ ܥܵܠܡܵܐ. ܕܟܼܘܼܪܘܿܢ ܗܹܡܸܙܡܵܢ ܕܐܵܢܵܐ ܐ݇ܡܸܪܝܼ ܐܸܠܵܘܟܼܘܿܢ: ܕܠܲܝܬ ܥܲܒܼܕܵܐ ܕܒܘܼܫ ܓܘܼܪܵܐ ܡ̣ܢ ܡܵܪܹܗ. ܐܸܢ ܐܸܠܝܼ ܪܕܸܦܠܗ݇ܘܿܢ ܐܘܿܦ ܐܸܠܵܘܟܼܘܢ ܒܸܬ ܪܲܕܦܝܼ. ܘܐܸܢ ܗܲܡܙܲܡܬܝܼ ܢܛܸܪܗ݇ܘܿܢ، ܐܘܿܦ ܕܕܝܼܵܘܟܼܘܿܢ ܒܸܬ ܢܲܛܪܝܼ. ܐܸܠܵܐ ܟܠܲܝܗܝ ܐܲܢܹܐ ܒܸܬ ܥܲܒܼܕܝܼ ܒܝܼܵܘܟܼܘܿܢ ܡܸܛܠ ܫܸܡܵܐ ܕܝܼܠ݇ܝܼ. ܕܠܹܐ ܝܢܵܐ ܒܝܼܕܵܥܵܐ ܠܡ̇ܢ ܕܩܲܡ ܫܵܕܸܪܝܼ. ܐܸܢ ܐܵܢܵܐ ܠܵܐ ܗܵܘܸܢ ܗ݇ܘܵܐ ܐܸܬܝܵܐ ܗܘܼܡܙܸܡܵܐ ܥܲܡܲܝܗܝ، ܠܲܝܬ ܗ݇ܘܵܐ ܠܗ݇ܘܿܢ ܚܛܝܼܬܵܐ. ܐܝܼܢܵܐ ܐܵܕܝܼܵܐ ܠܲܝܬ ܠܗ݇ܘܿܢ ܥܸܠܬܵܐ ܒܘܼܬ ܚܛܝܼܵܬܲܝ̈ܗܝ. ܡ̇ܢ ܕܐܸܠܝܼ ܣܵܢܹܐ. ܐܘܿܦ ܠܒܵܒܝܼ ܒܸܬ ܣܵܢܹܐ. ܘܐܸܢ ܥܒܼܵܕܹ̈ܐ ܠܵܐ ܗܵܘܸܢ ܗ݇ܘܵܐ ܥܒܼܝܼܕܵܐ ܩܵܕ݇ܡ ܥܲܝ̈ܢܲܝܗܝ ܐܲܝܢܝܼ ܕܐ݇ܢܵܫܵܐ ܐ݇ܚܹܪ݇ܢܵܐ ܠܵܐ ܥܒܼܝܼܕܠܹܗ، ܠܲܝܬ ܗ݇ܘܵܐ ܠܗ݇ܘܿܢ ܚܛܝܼܬܵܐ. ܐܝܼܢܵܐ ܐܵܕܝܼܵܐ ܘܚܙܹܐܠܗ݇ܘܿܢ ܘܣܢܹܐܠܗ݇ܘܿܢ ܐܘܿܦ ܐܸܠܝܼ ܐܘܿܦ ܠܒܵܒܝܼ . ܕܦܲܝܫܵܐ ܬܘܼܡܸܡܬܵܐ ܗܹܡܸܙܡܵܢ ܕܟܬܝܼܒܼܬܵܐ ܝܠܵܗ̇ ܒܢܵܡܘܿܣܲܝܗܝ ܕܣܢܹܐܠܗ݇ܘܿܢ ܐܸܠܝܼ ܡܲܓܲܢ.

♱♱♱♱♱♱♱♱♱♱♱♱♱

ܡܬܝ ܟܟ: 17 ‐ 29

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♱♱♱♱♱♱♱♱♱♱♱♱♱

ܚܕܒܫܒܐ ܕܐܪܒܿܥܐ ܕܩܝܡܬܐ

ܝܘܚܢܢ ܝܘ: 16 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܕܒܹܐܙܵܠܵܐ ܝܘܸܢ ܠܘܵܬ ܒܵܒܵܐ. ܘܐ݇ܡܸܪܗ݇ܘܿܢ ܬܲܠܡܝܼܕܘܼ̈ܗܝ ܚܲܕ݇ ܠܗ̇ܘ ܐ݇ܚܹܪ݇ܢܵܐ: ܡܘܿܕܝܼ ܝܠܵܗ̇ ܐܵܗܵܐ ܕܐ݇ܡܸܪܹܗ ܐܸܠܲܢ: ܕܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܘܕܒܹܐܙܵܠܵܐ ܝܘܸܢ ܠܘܵܬ ܒܵܒܝܼ؟ ܘܐܲܡܪܝܼ ܗ݇ܘܵܘ: ܡܘܿܕܝܼ ܝܠܵܗ̇ ܐܵܗܵܐ ܚܲܕ݇ܟ̰ܵܐ ܕܐ݇ܡܸܪܹܗ؟ ܠܹܐ ܝܘܲܚ ܒܝܼܕܵܥܵܐ ܡܘܿܕܝܼ ܗܲܡܙܘܼܡܹܐ ܝܠܹܗ. ܐܝܼܢܵܐ ܝܑܼܫܘܿܥ ܝܕܸܥܠܹܗ ܕܒܥܵܝܵܐ ܗ݇ܘܵܘ ܕܡܒܲܩܪܝܼܠܹܗ. ܘܐ݇ܡܸܪܹܗ ܐܸܠܲܝܗܝ: ܥܲܠ ܕܐܵܗܵܐ ܒܸܕܪܵܫܵܐ ܝܬܘܿܢ ܥܲܡ ܐܸܚܕܵܕܹܐ. ܕܐ݇ܡܸܪܝܼ ܐܸܠܵܘܟܼܘܿܢ: ܕܚܲܕ݇ܟ̰ܵܐ ܘܠܹܐ ܚܵܙܝܼܬܘܿܢ ܠܝܼ. ܘܡܸܢ݇ܕܪܹܫ݇ ܚܲܕ݇ܟ̰ܵܐ ܘܒܸܬ ܚܵܙܝܼܬܘܿܢ ܠܝܼ. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ:ܕܐܲܚܬܘܿܢ ܒܸܬ ܒܵܟܼܝܼܬܘܿܢ ܘܠܝܵܝܝܼܬܘܿܢ. ܘܥܵܠܡܵܐ ܒܸܬ ܚܵܕܹܐ. ܘܐܲܚܬܘܿܢ ܒܸܬ ܦܲܫܡܝܼܬܘܿܢ. ܐܸܠܵܐ ܦܵܫܲܡܬܵܘܟܼܘܿܢ ܠܚܲܕܘܼܬܵܐ ܒܸܬ ܗܵܘܝܵܐ. ܒܲܟܼܬܵܐ ܐܝܼܡܵܢ ܕܝܲܠܕܵܐ ܟܹܐ ܦܲܫܡܵܐ ܣܵܒܵܒ ܕܡܛܹܐܠܹܗ ܝܵܘܡܵܐ ܕܡܵܘܠܵܕܵܗܿ. ܐܝܼܢܵܐ ܐܝܼܡܵܢ ܕܝܼܠܸܕܠܵܗ̇ ܒܪܘܿܢܵܐ. ܠܹܐ ܕܲܟܼܪܵܐ ܐܘܼܠܨܵܢܘܼܗ̇ ܡܸܛܠ ܚܲܕܘܼܬܵܐ ܕܦܸܫܠܹܗ ܝܠܝܼܕܵܐ ܒܲܪܢܵܫܵܐ ܒܥܵܠܡܵܐ. ܐܘܿܦ ܐܲܚܬܘܿܢ ܐܵܕܝܼܵܐ ܦܫܵܡܵܐ ܝܬܘܿܢ. ܐܝܼܢܵܐ ܡܸܢ݇ܕܪܹܫ݇ ܒܸܬ ܚܵܙܸܢܵܘܟܼܘܿܢ. ܘܒܸܬ ܚܵܕܹܐ ܠܸܒܵܘܟܼܘܿܢ. ܘܐ݇ܢܵܫܵܐ ܠܹܐ ܫܵܩܸܠܵܗ̇ ܚܲܕܘܼܬܵܘܟܼܘܿܢ ܡܸܢܵܘܟܼܘܿܢ. ܘܒܗ̇ܘ ܝܵܘܡܵܐ ܡܸܢܝܼ ܠܹܐ ܛܲܠܒܝܼܬܘܿܢ ܡܸܢܕܝܼ. ܬܪܘܿܨܵܐ ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܟܠ ܡܸܢܕܝܼ ܕܛܲܠܒܝܼܬܘܿܢ ܡ̣ܢ ܒܵܒܝܼ ܒܫܸܡܝܼ. ܒܸܬ ܝܲܗ݇ܒܼܸܠܵܘܟܼܘܿܢ. ܗܲܠ ܐܵܕܝܼܵܐ ܠܵܐ ܛܠܸܒܠܵܘܟܼܘܿܢ ܡܸܢܕܝܼ ܒܫܸܡܝܼ. ܛܠܘܼܒܘܿܢ ܘܒܸܬ ܫܲܩܠܝܼܬܘܿܢ ܕܗܵܘܝܵܐ ܚܲܕܘܼܬܵܘܟܼܘܿܢ ܟܵܡܝܼܠ. ܐܲܢܹܐ ܒܡܲܬܠܹ̈ܐ ܗܘܼܡܙܸܡܠܝܼ ܥܲܡܵܘܟܼܘܿܢ. ܐܝܼܢܵܐ ܒܸܬ ܐܲܬܝܵܐ ܣܵܥܲܬ ܐܝܼܡܵܢ ܕܠܹܐ ܗܲܡܙܸܡܸܢ ܥܲܡܵܘܟܼܘܿܢ ܒܡܲܬܠܹ̈ܐ. ܐܸܠܵܐ ܒܐܸܫܟܵܪܵܐ ܒܸܬ ܡܲܕܥܸܢܵܘܟܼܘܿܢ ܒܘܼܬ ܒܵܒܵܐ. ܒܗ̇ܘ ܝܵܘܡܵܐ ܕܛܲܠܒܝܼܬܘܿܢ ܒܫܸܡܝܼ. ܘܠܹܐ ܝܘܸܢ ܒܹܐܡܵܪܵܐ ܐܸܠܵܘܟܼܘܿܢ: ܕܐܵܢܵܐ ܒܸܬ ܛܲܠܒܸܢ ܡ̣ܢ ܒܵܒܵܐ ܒܘܼܬ ܕܝܼܵܠَܘܟܼܘܿܢ. ܣܵܒܵܒ ܗ̇ܘ ܒܵܒܵܐ ܟܹܐ ܡܲܚܸܒܠܵܘܟܼܘܿܢ ܕܐܲܚܬܘܿܢ ܩܲܡ ܡܲܚܸܒܝܼܬܘܿܢ ܠܝܼ، ܘܗܘܼܡܸܢܵܘܟܼܘܿܢ ܕܐܵܢܵܐ ܡ̣ܢ ܠܘܵܬ ܒܵܒܵܐ ܦܠܸܛܠܝܼ. ܦܠܸܛܠܝܼ ܡ̣ܢ ܠܘܵܬ ܒܵܒܵܐ ܘܐ݇ܬܹܐܠܝܼ ܠܥܵܠܡܵܐ. ܘܡܸܢ݇ܕܪܹܫ݇ ܒܸܬ ܫܲܒ̣ܩܸܢ ܠܥܵܠܡܵܐ. ܘܒܸܬ ܐܵܙܸܠ݇ܢ ܠܘܵܬ ܒܵܒܵܐ. ܐܲܡܪܝܼ ܐܸܠܹܗ ܬܲܠܡܝܼ̈ܕܘܼܗܝ: ܗܵܐ ܐܵܕܝܼܵܐ ܓܲܠܝܵܐܝܼܬ ܗܲܡܙܘܼܡܹܐ ܝܘܸܬ. ܘܠܵܐ ܚܲܕ݇ ܡܲܬܠܵܐ ܒܹܐܡܵܪܵܐ ܝܘܸܬ. ܐܵܕܝܼܵܐ ܒܝܼܕܵܥܵܐ ܝܘܲܚ ܕܟܠ ܡܸܢܕܝܼ ܐܲܢ݇ܬ ܝܲܕܥܸܬ. ܘܠܹܐ ܝܘܸܬ ܣܢܝܼܩܵܐ ܕܐ݇ܢܵܫܵܐ ܒܵܩܸܪܘܼܟܼ. ܒܐܵܗܵܐ ܡܗܲܝܡܘܼܢܹܐ ܝܘܲܚ ܕܡ̣ܢ ܐܲܠܵܗܵܐ ܦܠܸܛܠܘܼܟܼ. ܐܵܡܸܪ ܐܸܠܲܝܗܝ ܝܑܼܫܘܿܥ ܗܲܡܸܢܘܿܢ. ܕܗܵܐ ܒܸܬ ܐܲܬܝܵܐ ܣܵܥܵܬ، ܘܐܵܕܝܼܵܐ ܐ݇ܬܹܐܠܵܗ̇. ܕܒܸܬ ܦܲܝܫܝܼܬܘܿܢ ܒܘܼܪܒܸܙܹܐ ܐ݇ܢܵܫܵܐ ܠܕܘܼܟܬܹܗ. ܘܒܸܬ ܫܲܒܼܩܝܼܬܘܿܢ ܠܝܼ ܠܚܘܿܕܝܼ. ܘܠܹܐ ܝܘܸܢ ܠܚܘܿܕܝܼ. ܕܒܵܒܵܐ ܥܲܡܝܼ ܝܠܹܗ. ܐܲܢܹܐ ܐ݇ܡܸܪܝܼ ܐܸܠܵܘܟܼܘܿܢ ܕܒܝܼܝܼ ܗܵܘܹܐ ܠܵܘܟܼܘܿܢ ܫܠܵܡܵܐ. ܒܥܵܠܡܵܐ ܒܸܬ ܗܵܘܹܐ ܠܵܘܟܼܘܿܢ ܐܘܼܠܨܵܢܵܐ. ܐܸܠܵܐ ܦܘܼܫܘܿܢ ܠܸܒܵܢܹ̈ܐ ܐܵܢܵܐ ܓܼܠܝܼܒܹܗ ܝܘܸܢ ܠܥܵܠܡܵܐ.

♱♱♱♱♱♱♱♱♱♱♱♱♱

ܚܕܒܫܒܐ ܕܚܡܫܐ ܕܩܝܡܬܐ

ܝܘܚܢܢ ܟܐ: 1 ‐ 15

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܒܵܬ݇ܪ ܕܐܲܢܹܐ ܡܘܼܚܙܝܼܵܐ ܠܹܗ ܓܵܢܹܗ ܡܸܢ݇ܕܪܹܫ݇ ܝܑܼܫܘܿܥ ܠܬܲܠܡܝܼ̈ܕܘܼܗܝ ܥܲܠ ܝܵܡܵܐ ܕܛܹܒܵܪܝܼܘܿܣ. ܐܝܼܢܵܐ ܗܲܕܟܼܵܐ ܡܘܼܚܙܝܼܵܐ ܠܹܗ. ܡܐܸܚܕܵܕܹܐ ܗ݇ܘܵܘ ܫܸܡܥܘܿܢ ܟܹܐܦܵܐ ܘܬܐܘܿܡܵܐ ܕܟܹܐ ܦܵܐܸܫ ܩܸܪܝܵܐ ܬܐܵܡܵܐ. ܘܢܲܬܢܝܼܐܹܝܠ ܗ̇ܘ ܕܡ̣ܢ ܩܲܛܢܹܐ ܕܓܠܝܼܠܵܐ ܘܒܢܘܿܢܹ̈ܐ ܕܙܲܒܼܕܲܝ ܘܬܪܹܝ ܐ݇ܚܹܪ̈݇ܢܹܐ ܡ̣ܢ ܬܲܠܡܝܼܕܹ̈ܐ. ܐܵܡܸܪ ܐܸܠܲܝܗܝ ܫܸܡܥܘܿܢ ܟܹܐܦܵܐ: ܐܵܢܵܐ ܒܸܬ ܐܵܙܸܠ݇ܢ ܨܲܝܕܸܢ ܢܘܼܢܹ̈ܐ: ܐܲܡܪܝܼ ܐܸܠܹܗ: ܘܐܵܦ ܐܲܚܢܲܢ ܒܸܬ ܐܵܬܸܚ ܥܲܡܘܼܟܼ. ܘܦܠܸܛܠܗ݇ܘܿܢ ܘܣܸܩܠܗ݇ܘܿܢ ܠܓܵܡܝܼ ܘܒܗ̇ܘ ܠܸܠܝܵܐ ܡܸܢܕܝܼ ܠܵܐ ܨܸܕܠܗ݇ܘܿܢ. ܐܝܼܢܵܐ ܟܲܕ ܗ݇ܘܹܐܠܹܗ ܨܲܦܪܵܐ. ܟܠܹܐ ܠܹܗ ܝܑܼܫܘܿܥ ܥܲܠ ܡܲܪܙܵܐ ܕܝܵܡܵܐ. ܘܬܲܠܡܝܼ̈ܕܹܐ ܠܵܐ ܝܕܸܥܠܗ݇ܘܿܢ ܕܝܼܫܘܿܥ ܝܠܹܗ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܛܠܵܝܹ̈ܐ ܐܝܼܬܠܵܘܟܼܘܿܢ ܡܸܢܕܝܼ ܠܹܐܟܼܵܠܵܐ؟ ܐܵܡܪܝܼ ܐܸܠܹܗ : ܠܵܐ. ܐܵܡܸܪ ܐܸܠܲܝܗܝ: ܕܪܹܝܡܘܿܢ ܓܲܪܕܵܘܟܼܘܿܢ ܡ̣ܢ ܓܹܒܵܐ ܝܲܡܝܼܢܵܝܵܐ ܕܓܵܡܝܼ. ܘܒܸܬ ܡܲܫ݇ܟ̰ܚܝܼܬܘܿܢ. ܘܕܪܹܐܠܗ݇ܘܿܢ ܘܠܵܐ ܡܨܹܐܠܗ݇ܘܿܢ ܠܸܓܪܵܫܹܗ ܠܓܲܪܕܵܐ ܡ̣ܢ ܒܘܼܫܵܝܝܼ ܕܢܘܼܢܹ̈ܐ ܕܕܒܼܸܩܠܹܗ. ܘܐ݇ܡܸܪܹܗ ܗ̇ܘ ܬܲܠܡܝܼܕܵܐ ܕܡܲܚܸܒ ܗ݇ܘܵܐ ܠܹܗ ܝܑܼܫܘܿܥ ܠܟܹܐܦܵܐ: ܐܵܗܵܐ ܡܵܪܲܢ ܝܠܹܗ. ܐܝܼܢܵܐ ܫܸܡܥܘܿܢ ܟܲܕ ܫܡܸܥܠܹܗ ܕܡܵܪܲܢ ܝܠܹܗ. ܫܩܸܠܹܗ ܟܘܼܬܝܼܢܹܗ ܡܚܹܐܠܹܗ ܒܚܲܨܘܼ̈ܗܝ. ܣܵܒܵܒ ܫܘܼܠܚܵܝܵܐ ܗ݇ܘܵܐ. ܘܪܘܼܦܹܐܠܹܗ ܓܵܢܹܗ ܒܝܵܡܵܐ. ܕܐܵܬܹܐ ܠܘܵܬ ܝܑܼܫܘܿܥ. ܐܝܼܢܵܐ ܬܲܠܡܝܼ̈ܕܹܐ ܐ݇ܚܹܪ̈݇ܢܹܐ ܒܓܵܡܝܼ ܐ݇ܬܹܐܠܗ݇ܘܿܢ. ܣܵܒܵܒ ܠܹܐ ܗ݇ܘܵܘ ܪܵܒܵܐ ܪܸܚܩܵܐ ܡ̣ܢ ܐܲܪܥܵܐ ܐܸܠܵܐ ܐܲܝܟܼ ܬܪܹܝ ܡܵܐܐ ܝܲܡܝܼܢܹ̈ܐ. ܘܓܲܪܫܝܼ ܗ݇ܘܵܘ ܠܹܗ ܠܗ̇ܘ ܓܲܪܕܵܐ ܕܢܘܼܢܹ̈ܐ. ܟܲܕ ܣܸܩܠܗ݇ܘܿܢ ܠܐܲܪܥܵܐ. ܚܙܹܐܠܗ݇ܘܿܢ ܓܘܼܡܪܹ̈ܐ ܟܲܕ ܡܘܼܬܒܼܹܐ ܘܢܘܼܢܵܐ ܟܲܕ ܡܘܼܬܸܒܼܬܵܐ ܥܲܠܲܝܗܝ ܘܠܲܚܡܵܐ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܡܲܝܬܹܡܘܿܢ ܡ̣ܢ ܐܵܢܝܼ ܢܘܼܢܹ̈ܐ ܕܨܝܼܕܠܵܘܟܼܘܿܢ ܐܵܕܝܼܵܐ. ܘܣܸܠَܩܠܹܗ ܫܸܡܥܘܿܢ ܟܹܐܦܵܐ. ܘܓܪܸܫܠܹܗ ܠܓܲܪܕܵܐ ܠܐܲܪܥܵܐ. ܟܲܕ ܡܸܠܝܵܐ ܢܘܼܢܹ̈ܐ ܓܘܼܪܹ̈ܐ ܡܵܐܐ ܘܚܲܡܫܝܼ ܘܬܠܵܬܵܐ. ܘܒܟܠܹܗ ܐܵܗܵܐ ܝܘܼܩܪܵܐ ܠܵܐ ܓ̰ܕܸܩܠܹܗ ܗ̇ܘ ܓܲܪܕܵܐ. ܘܐ݇ܡܸܪܹܗ ܐܸܠܲܝܗܝ ܝܑܼܫܘܿܥ: ܐ݇ܬܹܐܡܘܿܢ ܐ݇ܟܼܘܼܠܘܿܢ ܫܵܪܘܼܬܵܐ. ܐܝܼܢܵܐ ܐ݇ܢܵܫܵܐ ܡ̣ܢ ܬܲܠܡܝܼ̈ܕܹܐ ܠܵܐ ܩܘܼܫ̰ܕܸܪܹܗ ܕܒܵܩܸܪ ܗ݇ܘܵܐ ܠܹܗ ܡܵܢܝܼ ܝܠܹܗ. ܕܒܝܼܕܵܥܵܐ ܗ݇ܘܵܘ ܕܡܵܪܲܢ ܝܼܠܹܗ. ܐܝܼܢܵܐ ܩܘܼܪܒܸܢܹܗ ܝܑܼܫܘܿܥ. ܘܫܩܸܠܹܗ ܠܲܚܡܵܐ ܘܢܘܼܢܹ̈ܐ ܘܝܘܼܗ݇ܒܼܸܠܹܗ ܐܸܠܲܝܗܝ. ܐܵܗܵܐ ܓܵܗܵܐ ܕܬܠܵܬ ܦܸܫܠܹܗ ܚܸܙܝܵܐ ܝܑܼܫܘܿܥ ܠܬܲܠܡܝܼܕܘܼ̈ܗܝ. ܟܲܕ ܩܸܡܠܹܗ ܡ̣ܢ ܓܵܘ ܡܝܼܬܹ̈ܐ.

♱♱♱♱♱♱♱♱♱♱♱♱♱

ܚܕܒܫܒܐ ܕܫܬܐ ܕܩܝܡܬܐ

ܝܘܚܢܢ ܝܙ: 1 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܒܵܬ݇ܪ ܕܐܲܢܹܐ ܡܘܼܪܸܡܠܹܗ ܝܑܼܫܘܿܥ ܥܲܝ̈ܢܘܼܗܝ ܠܫܡܲܝܵܐ ܘܐ݇ܡܸܪܹܗ: ܒܵܒܝܼ: ܐ݇ܬܹܐܠܵܗ̇ ܣܵܥܵܬ. ܫܵܒܸܚ ܒܪܘܿܢܘܼܟܼ ܕܒܪܘܿܢܘܼܟܼ ܫܵܒܸܚܠܘܼܟܼ. ܕܲܐܟܼܝܼ ܕܝܘܼܗ݇ܒܼܸܠܘܼܟܼ ܐܸܠܹܗ ܫܘܼܠܛܵܢܵܐ ܥܲܠ ܟܠ ܒܸܣܪܵܐ. ܕܟܠ ܡܸܢܕܝܼ ܕܝܘܼܗ݇ܒܼܸܠܘܼܟܼ ܐܸܠܹܗ، ܝܲܗ݇ܒܼܸܠܹܗ ܚܲܝܹ̈ܐ ܕܠܥܵܠܲܡ. ܐܝܼܢܵܐ ܐܲܢܹܐ ܝܢܵܐ ܚܲܝܹ̈ܐ ܕܠܥܵܠܲܡ. ܕܝܲܕܥܝܼܠܘܼܟܼ ܕܐܲܢ݇ܬ ܝܼܘܸܬ ܐܲܠܵܗܵܐ ܕܫܪܵܪܵܐ ܒܲܠܚܘܼܕܘܼܟ. ܘܡ̇ܢ ܕܫܘܼܕܸܪܘܼܟܼ ܝܑܼܫܘܿܥ ܡܫܝܼܚܵܐ. ܐܵܢܵܐ ܩܲܡ ܫܲܒܚܸܢܘܼܟܼ ܒܐܲܪܥܵܐ. ܥܒܼܵܕܵܐ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ ܕܥܲܒܼܕܸܢ ܬܘܼܡܸܡܠܝܼ. ܘܐܵܕܝܼܵܐ ܫܵܒܸܚܠܝܼ ܐܲܢ݇ܬ ܒܵܒܝܼ ܠܘܵܬܘܼܟܼ، ܒܗ̇ܘ ܫܘܼܒܼܚܵܐ ܕܐܝܼܬ ܗ݇ܘܵܐ ܠܝܼ ܠܘܵܬܘܼܟܼ ܡ̣ܢ ܩܵܕ݇ܡ ܕܗܵܘܹܐ ܗ݇ܘܵܐ ܥܵܠܡܵܐ. ܡܘܼܕܸܥܠܝܼ ܫܸܡܘܼܟܼ ܠܒܢܲܝ̈ܢܵܫܵܐ: ܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܡ̣ܢ ܥܵܠܡܵܐ. ܕܝܼܠَܘܼܟܼ ܝܼܗ݇ܘܵܘ، ܘܐܸܠܝܼ ܝܘܼܗ݇ܒܼܲܝܠܘܼܟܼ ܘܢܛܸܪܗ݇ܘܿܢ ܗܹܡܸܙܡܵܢܘܼܟܼ. ܐܵܕܝܼܵܐ ܝܕܸܥܠܝܼ ܕܟܠ ܡܸܢܕܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܡ̣ܢ ܠܘܵܬܘܼܟܼ ܝܼܠܹܗ. ܕܗܹܡܸܙܡܵܢܹ̈ܐ ܕܝܘܼܗܒܼܸܠܘܼܟܼ ܐܸܠܝܼ. ܝܘܼܗ݇ܒܼܸܲܝܠܝܼ ܐܸܠܲܝܗܝ. ܘܐܵܢܝܼ ܩܘܼܒܸܠܗ݇ܘܿܢ ܘܝܕܸܥܠܗ݇ܘܿܢ ܫܲܪܝܼܪܵܐܝܼܬ ܕܡ̣ܢ ܠܘܵܬܘܼܟܼ ܦܠܸܛܠܝܼ. ܘܗܘܼܡܸܢܗ݇ܘܿܢ ܕܐܲܢ݇ܬ ܫܘܼܕܪܸܢܘܼܟܼ. ܘܐܵܢܵܐ ܒܘܼܬ ܕܝܼܵܠَܝܗܝ ܒܸܛܠܵܒܵܐ ܝܘܸܢ. ܠܹܐ ܗ݇ܘܵܐ ܒܘܼܬ ܥܵܠܡܵܐ ܒܸܛܠܵܒܵܐ ܝܘܸܢ. ܐܸܠܵܐ ܒܘܼܬ ܕܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܕܕܝܼܘܼܟܼ ܝܢܵܐ. ܘܟܠ ܡܸܢܕܝܼ ܕܝܼܠܹܗ ܕܝܼܠَܝܼ، ܕܝܼܠَܘܼܟܼ ܝܠܹܗ. ܘܕܝܼܘܼܟܼ ܕܝܼܠَܝܼ ܝܠܹܗ. ܘܦܝܵܫܵܐ ܝܘܸܢ ܡܫܘܼܒܚܵܐ ܒܝܼܵܝܗܝ. ܘܡ̣ܢ ܐܵܕܝܼܵܐ ܠܹܐ ܝܘܸܢ ܒܓܵܘ ܥܵܠܡܵܐ، ܘܐܲܢܹܐ ܓܵܘ ܥܵܠܡܵܐ ܝܢܵܐ. ܘܐܵܢܵܐ ܠܘܵܬܘܼܟܼ ܒܹܐܬܵܝܵܐ ܝܘܸܢ. ܒܵܒܵܐ ܩܲܕܝܼܫܵܐ. ܢܛܘܼܪܗ݇ܘܿܢ ܒܫܸܡܘܼܟܼ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ. ܕܗܵܘܝܼ ܚܲܕ݇ ܕܲܐܟܼܝܼ ܕܐܲܚܢܲܢ ܝܼܘܸܚ. ܟܲܕ ܥܲܡܵܝܗܝ ܗ݇ܘܹܐܠܝܼ ܓܵܘ ܥܵܠܡܵܐ، ܐܵܢܵܐ ܢܛܝܼܪܵܝܠܝܼ ܒܫܸܡܘܼܟܼ. ܠܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ ܢܛܸܪܝܼ. ܘܐ݇ܢܵܫܵܐ ܡܸܢܲܝܗܝ ܠܵܐ ܛܠܸܩܠܹܗ، ܐܸܠܵܐ ܒܪܘܿܢܹܗ ܕܐܲܒܼܕܵܢܵܐ ܕܦܵܐܸܫ ܬܘܼܡܸܡܵܐ ܟܬܵܒܼܵܐ. ܐܝܼܢܵܐ ܐܵܕܝܼܵܐ ܠܘܵܬܘܼܟ ܒܹܐܬܵܝܵܐ ܝܘܸܢ ܘܐܲܢܹܐ ܡܗܲܡܙܘܼܡܹܐ ܝܘܸܢ ܓܵܘ ܥܵܠܡܵܐ، ܕܗܵܘܝܵܐ ܚܲܕܘܼܬܝܼ ܟܵܡܝܼܠ ܒܝܼܵܝܗܝ. ܐܵܢܵܐ ܝܘܼܗ݇ܒܼܸܠܝܼ ܐܸܠܲܝܗܝ ܗܹܡܸܙܡܵܢܘܼܟܼ، ܘܥܵܠܡܵܐ ܣܸܢܝܵܝܠܹܗ. ܕܠܹܐ ܗ݇ܘܵܘ ܡ̣ܢ ܥܵܠܡܵܐ. ܕܲܐܟܼܝܼ ܕܐܵܢܵܐ ܠܵܐ ܗ݇ܘܹܐ ܠܝܼ ܡ̣ܢ ܥܵܠܡܵܐ. ܠܹܐ ܗ݇ܘܵܐ ܕܫܲܩܠܸܬܠܗ݇ܘܿܢ ܡ̣ܢ ܥܵܠܡܵܐ ܒܸܛܠܵܒܵܐ ܝܘܸܢ، ܐܸܠܵܐ ܕܢܲܛܪܸܬܠܗ݇ܘܿܢ ܡ̣ܢ ܒܝܼܫܵܐ. ܣܵܒܵܒ ܠܹܐ ܝܢܵܐ ܡ̣ܢ ܥܵܠܡܵܐ، ܕܵܐܟܼܝܼ ܕܐܵܢܵܐ ܠܹܐ ܝܘܸܢ ܡ̣ܢ ܥܵܠܡܵܐ. ܒܵܒܵܐ ܩܵܕܸܫܠܗ݇ܘܿܢ ܒܲܫܪܵܪܘܼܟܼ. ܕܗܹܡܸܙܡܵܢ ܕܝܼܠَܘܼܟܼ ܫܪܵܪܵܐ ܝܠܵܗ̇. ܕܲܐܟܼܝܼ ܕܐܸܠܝܼ ܫܘܼܕܸܪܘܼܟܼ ܠܥܵܠܡܵܐ. ܐܘܿܦ ܐܵܢܵܐ ܫܘܼܕܪܵܝܠܝܼ ܠܥܵܠܡܵܐ. ܒܘܼܬ ܕܝܼܵܠَܝܗܝ ܐܵܢܵܐ ܡܩܲܕܘܼܫܹܐ ܝܘܸܢ ܓܵܢܝܼ. ܕܗܵܘܝܼ ܐܘܼܦ ܐܵܢܝܼ ܡܩܘܼܕܫܹܐ ܒܲܫܪܵܪܵܐ. ܘܠܹܐ ܗ݇ܘܵܐ ܒܘܼܬ ܕܐܲܢܹܐ ܐܲܚܟ̰ܝܼ ܒܸܛܠܵܒܵܐ ܝܘܸܢ. ܐܸܠܵܐ ܐܘܿܦ ܒܘܼܬ ܐܲܝܢܝܼ ܕܡܗܲܝܡܢܝܼ ܒܝܼܝܼ ܒܗܲܡܙܲܡܬܲܝܗܝ، ܕܟܠܲܝܗܝ ܗܵܘܝܼ ܚܲܕ݇. ܕܲܐܟܼܝܼ ܕܐܲܢ݇ܬ ܒܵܒܝܼ ܒܝܼܝܼ ܝܘܸܬ ܘܐܵܢܵܐ ܒܝܼܘܼܟܼ. ܕܐܵܦ ܐܵܢܝܼ ܗܵܘܝܼ ܚܲܕ݇ ܒܝܼܵܢ. ܕܗܲܝܡܸܢ ܥܵܠܡܵܐ ܕܐܲܢ݇ܬ ܫܘܼܕܪܸܢܘܼܟܼ. ܘܐܵܢܵܐ ܫܘܼܒܼܚܵܐ ܕܝܘܼܗ݇ܒܼܸܠܘܼܟܼ ܐܸܠܝܼ، ܝܘܼܗ݇ܒܼܸܠܝܼ ܐܸܠܲܝܗܝ. ܕܗܵܘܝܼ ܚܲܕ݇ ܕܲܐܟܼܝܼ ܕܐܲܚܢܲܢ ܚܲܕ݇ ܝܼܘܲܚ. ܐܵܢܵܐ ܒܝܼܵܝܗܝ ܘܐܲܢ݇ܬ ܒܝܼܝܼ. ܕܗܵܘܝܼ ܓܡܝܼܪܹܐ ܠܚܲܕ݇. ܘܕܝܲܕܸܥ ܥܵܠܡܵܐ ܕܐܲܢ݇ܬ ܫܘܼܕܪܸܢܘܼܟܼ: ܘܕܡܘܼܚܸܒܝܼܠܘܼܟܼ ܕܲܐܟܼܝܼ ܕܐܘܿܦ ܐܸܠܝܼ ܡܘܼܚܸܒܠܘܼܟܼ. ܒܵܒܵܐ: ܐܵܢܝܼ ܕܝܘܼܗ݇ܒܼܸܠܘܼܟܼ ܐܸܠܝܼ، ܒܣܵܡܝܼ ܝܠܵܗ̇ ܕܕܘܼܟܬܵܐ ܕܐܝܼܘܸܢ: ܐܘܿܦ ܐܵܢܝܼ ܗܵܘܝܼ ܥܲܡܝܼ. ܕܗܵܘܝܼ ܒܸܚܙܵܝܵܐ ܫܘܼܒܼܚܵܐ ܕܝܼܠَܝܼ ܗ̇ܘ ܕܝܘܼܗ݇ܒܼܸܠܘܼܟܼ ܐܸܠܝܼ. ܕܡܘܼܚܸܒܸܢܘܼܟܼ ܡ̣ܢ ܩܵܕ݇ܡ ܒܸܢܝܲܬܹ̈ܗ ܕܥܵܠܡܵܐ. ܒܵܒܝܼ ܟܹܐܢܵܐ. ܘܥܵܠܡܵܐ ܠܵܐ ܩܲܡ ܝܲܕܸܥܠܘܼܟܼ. ܐܝܼܢܵܐ ܐܵܢܵܐ ܩܲܡ ܝܲܕܥܸܢܘܼܟܼ. ܘܐܵܢܝܼ ܝܕܸܥܠܗ݇ܘܿܢ ܕܐܲܢ݇ܬ ܫܘܼܕܪܸܢܘܼܟܼ. ܘܡܘܼܕܸܥܠܝܼ ܐܸܠܲܝܗܝ ܫܸܡܘܼܟܼ ܘܡܲܕܘܼܥܹܐ ܝܘܸܢ. ܕܚܘܼܒܵܐ ܗ̇ܘ ܕܡܘܼܚܸܒܠܘܼܟܼ ܐܸܠܝܼ ܗܵܘܹܐ ܒܝܼܵܝܗܝ. ܘܐܵܢܵܐ ܗܵܘܸܢ ܒܝܼܵܝܗܝ.

♱♱♱♱♱♱♱♱♱♱♱♱♱

ܚܡܫܒܿܫܒܐ
ܕܥܐܕܐ ܩܕܝܫܐ ܕܣܘܠܩܗ ܕܡܪܢ

ܠܘܩܐ ܟܕ: 36 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܘܟܲܕ ܐܲܢܹܐ ܗܲܡܙܘܼܡܹܐ ܗ݇ܘܵܘ ܬܲܠܡܝܼ̈ܕܹܐ. ܝܑܼܫܘܿܥ ܟܠܹܐܠܹܗ ܒܲܝܢܵܬܲܝܗܝ ܘܐ݇ܡܸܪܹܗ ܐܸܠܲܝܗܝ: ܫܠܵܡܵܐ ܥܲܡܵܘܟܼܘܿܢ. ܐܵܢܵܐ ܝܘܸܢ ܠܵܐ ܙܲܕܥܝܼܬܘܿܢ. ܘܐܵܢܝܼ ܚܓ̰ܝܼܠܗ݇ܘܿܢ ܘܗܘܹܐܠܗ݇ܘܿܢ ܒܙܕܘܿܥܬܵܐ. ܣܵܒܵܒ ܒܸܚܫܵܒܼܵܐ ܗ݇ܘܵܘ ܕܪܘܼܚܵܐ ܒܸܚܙܵܝܵܐ ܝܢܵܐ. ܐܵܡܸܪ ܐܸܠܲܝܗܝ ܝܑܼܫܘܿܥ: ܩܵܡܘܿܕܝ ܦܝܵܫܵܐ ܝܬܘܿܢ ܫܥܝܼܫܹܐ. ܘܩܵܡܘܼܕܝܼ ܒܹܣܵܠَܩܵܐ ܝܢܵܐ ܚܘܼܫܵܒܼܹ̈ܐ ܥܲܠ ܠܸܒܵܘܵܬܵܘ̈ܟܼܘܢ؟ ܚܙܹܐܡܘܿܢ ܐܝܼܕܵܬ̈ܝܼ ܘܐܲܩ̈ܠܵܬܝܼ ܕܐܵܢܵܐ ܝܘܸܢ. ܕܩܘܼܪܘܿܢ ܒܝܼܝܼ ܘܝܕܹܥܡܘܿܢ: ܕܪܘܼܚܵܐ ܒܸܣܪܵܐ ܘܓܲܪ̈ܡܹܐ ܠܲܝܬܠܵܗ̇، ܐܲܝܟܼ ܕܒܸܚܙܵܝܵܐ ܝܬܘܿܢ ܕܐܵܢܵܐ ܐܝܼܬ ܠܝܼ. ܘܟܲܕ ܐܲܢܹܐ ܐ݇ܡܸܪܹܗ: ܡܘܼܚܙܹܐ ܠܹܗ ܐܸܠܲܝܗܝ ܐܝܼܕܵܬܘܼ̈ܗܝ ܘܐܲܩܠܵܬܘܼ̈ܗܝ. ܘܟܲܕ ܗܲܠ ܐܵܕܝܼܵܐ ܠܹܐ ܗ݇ܘܵܘ ܗܲܡܘܼܢܹܐ ܡ̣ܢ ܚܵܕܘܼܬܲܝܗܝ ܘܦܝܵܫܵܐ ܗ݇ܘܵܘ ܬܡܝܼܗܹܐ. ܐ݇ܡܸܪܹܗ ܐܸܠܲܝܗܝ: ܐܝܼܬܠܵܘܟܼܘܿܢ ܡܸܢܕܝܼ ܠܲܐܟܼܵܐ ܠܹܐܟܼܵܠܵܐ؟ ܐܝܼܢܵܐ ܐܵܢܝܼ ܝܘܼܗ݇ܒܼܸܠܗ݇ܘܿܢ ܐܸܠܹܗ ܚܲܕ݇ ܩܸܛܥܵܐ ܡ̣ܢ ܢܘܼܢܵܐ ܛܘܼܘܵܝܬܵܐ: ܘܡ̣ܢ ܫܵܢܵܐ ܕܕܸܒܼܫܵܐ. ܘܫܩܸܠܹܗ ܐ݇ܟܼܸܠܹܗ ܩܵܕ݇ܡ ܥܲܝ̈ܢܲܝܗܝ. ܘܐ݇ܡܸܪܹܗ ܐܸܠܲܝܗܝ: ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܗܘܼܡܙܸܡܠܝܼ ܥܲܡܵܘܟܼܘܿܢ ܟܲܕ ܠܟܸܣܠܵܘܟܼܘܿܢ ܝܼܘܸܢ ܗ݇ܘܵܐ. ܕܘܵܠܹܐ ܝܼܠܵܗ ܕܦܵܐܸܫ ܬܘܼܡܸܡܵܐ ܟܠ ܡܸܢܕܝܼ ܕܟܬܝܼܒܼܵܐ ܝܠܹܗ ܒܢܵܡܘܿܣܵܐ ܕܡܘܼܫܹܐ: ܘܒܢܒܼܝܹ̈ܐ ܘܒܡܲܙܡܘܼܪܹ̈ܐ ܒܘܼܬ ܕܝܼܠَܝܼ. ܗܿܝܓܵܗ ܦܬܸܚܠܹܗ ܪܸܥܝܵܢܲܝܗܝ ܠܦܲܪܡܘܼܝܹܐ ܟܬܵܒܼܹ̈ܐ. ܘܐ݇ܡܸܪܹܗ ܐܸܠܲܝܗܝ: ܕܗܲܕܟܼܵܐ ܟܬܝܼܒܼܵܐ ܝܠܹܗ: ܘܗܲܕܟܼܵܐ ܘܵܠܹܐ ܗ݇ܘܵܐ ܕܩܵܒܸܠ ܚܲܫܵܐ ܡܫܝܼܚܵܐ. ܘܕܩܵܐܸܡ ܡ̣ܢ ܓܵܘ ܡܝܼܬܹ̈ܐ ܠܝܵܘܡܵܐ ܕܬܠܵܬܵܐ. ܘܕܦܲܝܫܵܐ ܡܘܼܟܪܸܙܬܵܐ ܒܫܸܡܹܗ ܬܝܵܒܼܘܼܬܵܐ ܠܫܘܼܒܼܩܵܢܵܐ ܕܚܛܝܼܵܬܹ̈ܐ ܓܵܘ ܟܠܲܝܗܝ ܥܲܡܡܹ̈ܐ. ܘܫܘܼܪܵܝܵܐ ܗܵܘܹܐ ܡ̣ܢ ܐܘܿܪܸܫܠܸܡ. ܘܐܲܚܬܘܿܢ ܝܼܬܘܿܢ ܣܵܗܕܹ̈ܐ ܕܐܲܢܹܐ. ܘܐܵܢܵܐ ܒܸܬ ܫܲܕܪܸܢ ܥܲܠܵܘܟܼܘܿܢ ܩܵܘܠܵܐ ܕܒܵܒܝܼ. ܐܝܼܢܵܐ ܐܲܚܬܘܿܢ ܥܲܪܩܸܠܗ݇ܘܿܢ ܒܐܘܿܪܸܫܠܸܡ ܡܕܝܼܢ݇ܬܵܐ. ܗܲܠ ܕܠܲܒܼܫܝܼܬܘܿܢ ܚܲܝܠܵܐ ܡ̣ܢ ܪܵܘܡܵܐ. ܘܦܘܼܠܛܵܝܠܹܗ ܗܲܠ ܠܒܹܝܬ ܥܲܢܝܵܐ. ܘܡܘܼܪܸܡܠܹܗ ܐܝܼܕܵܬ̈ܘܼܗܝ ܘܒܘܼܪܟܼܵܝܠܹܗ. ܘܗ݇ܘܹܐܠܵܗ̇ ܟܲܕ ܒܲܪܘܼܟܼܵܝܗܝ ܗ݇ܘܵܐ. ܦܸܫܠܹܗ ܦܪܝܼܫܵܐ ܡܸܢܲܝܗܝ ܘܣܸܠَܩܠܹܗ ܠܫܡܲܝܵܐ. ܐܝܼܢܵܐ ܐܵܢܝܼ ܣܓܼܸܕܠܗ݇ܘܿܢ ܐܸܠܹܗ. ܘܕܥܸܪܗ݇ܘܿܢ ܠܐܘܿܪܸܫܠܸܡ ܒܚܲܕܘܼܬܵܐ ܪܲܒܬܵܐ. ܘܒܟܠ ܙܲܒܼܢܵܐ ܒܗܲܝܟܠܵܐ ܗ݇ܘܵܘ. ܟܲܕ ܫܵܒܘܼܚܹܐ ܘܡܒܲܪܘܼܟ݂ܹܐ ܠܐܲܠܵܗܵܐ. ܐܵܡܹܝܢ.

♱♱♱♱♱♱♱♱♱♱♱♱♱

ܚܕܒܫܒܐ ܕܒܼܬܪ ܣܘܠܩܐ

ܡܪܩܘܣ ܝܘ: 2 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܪܩܘܣ.

♰ ܐܝܼܢܵܐ ܒܨܲܦܪܵܐ ܒܚܲܕܒܫܲܒܵܐ ܐ݇ܬܹܐܠܗ݇ܘܿܢ ܠܒܹܝܬ ܩܒܼܘܼܪܵܐ. ܟܲܕ ܙܪܸܩܠܵܗ̇ ܫܸܡܫܵܐ. ܘܐܲܡܪܝܼ ܗ݇ܘܵܘ ܒܓܵܢܲܝܗܝ: ܐܝܼܢܵܐ ܡܵܢܝܼ ܒܸܬ ܡܲܚܕܸܪ ܩܵܬܵܢ ܟܹܐܦܵܐ ܡ̣ܢ ܬܲܪܥܵܐ ܕܒܹܝܬ ܩܒܼܘܼܪܵܐ؟ ܘܚܸܪܗ݇ܘܿܢ ܚܙܹܐܠܗ݇ܘܿܢ ܕܗ̇‌ܝ ܟܹܐܦܵܐ ܡܘܼܚܕܸܪܬܵܐ. ܣܵܒܵܒ ܪܵܒܵܐ ܓܘܼܪܬܵܐ ܗ݇ܘܵܐ. ܘܥܒܼܸܪܗ݇ܘܿܢ ܠܒܹܝܬ ܩܒܼܘܼܪܵܐ. ܘܚܙܹܐܠܗ݇ܘܿܢ ܚܲܕ݇ ܥܠܲܝܡܵܐ ܕܒܸܬܝܵܒܼܵܐ ܡ̣ܢ ܝܲܡܝܼܢܵܐ، ܘܩܛܝܼܘܵܐ ܓ̰ܘܼܒܵܐ ܚܘܵܪܬܵܐ ܘܥܘܼܓ̰ܸܒܠܗ݇ܘܿܢ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܠܵܐ ܙܲܕܥܝܼܬܘܿܢ، ܠܝܼܫܘܿܥ ܢܲܨܪܵܝܵܐ ܐܲܚܬܘܿܢ ܒܥܵܝܵܐ ܝܬܘܿܢ. ܗ̇ܘ ܕܦܸܫܠܹܗ ܙܩܝܼܦܵܐ. ܩܸܡܠܹܗ. ܠܹܐ ܝܠܹܗ ܠܲܐܟܼܵܐ. ܗܵܐ ܕܘܼܟܬܵܐ ܐܲܝܟܵܐ ܕܡܘܼܬܒܼܵܐ ܗ݇ܘܵܐ. ܐܸܠܵܐ ܙܹܠ݇ܡܘܼܢ ܐ݇ܡܘܼܪܘܿܢ ܠܬܲܠܡܝܼܕܘܼ̈ܗܝ ܘܠܟܹܐܦܵܐ. ܕܗܵܐ ܒܸܬ ܩܵܕܸܡܠܵܘܟܼܘܿܢ ܠܓܠܝܼܠܵܐ. ܬܵܡܵܐ ܒܸܬ ܚܵܙܝܼܬܘܿܢ ܠܹܗ ܕܲܐܟܼܝܼ ܕܐ݇ܡܸܪܹܗ ܐܸܠܵܘܟܼܘܿܢ. ܘܟܲܕ ܫܡܸܥܠܗ݇ܘܿܢ ܥܪܸܩܠܗ݇ܘܿܢ ܘܦܠܸܛܠܗ݇ܘܿܢ ܡ̣ܢ ܩܲܒܼܪܵܐ. ܣܵܒܵܒ ܕܒܼܝܼܩܲܝܗܝ ܗ݇ܘܵܐ ܥܘܼܓ̰ܵܒܵܐ ܘܪܲܬܪܲܬܬܵܐ. ܘܠܐ݇ܢܵܫܵܐ ܡܸܢܕܝܼ ܠܵܐ ܐ݇ܡܸܪܗ݇ܘܿܢ. ܣܵܒܵܒ ܙܸܕܥܝܹܐ ܗ݇ܘܵܘ. ܐܝܼܢܵܐ ܒܨܲܦܪܵܐ ܒܚܲܕ݇ܒܫܲܒܵܐ ܩܸܡܠܹܗ: ܘܦܸܫܠܹܗ ܚܸܙܝܵܐ ܩܲܕ݇ܡܵܝܬܵܐ ܠܡܲܪܝܲܡ ܡܲܓܼܕܠܵܝܬܵܐ. ܗ̇‌ܝ ܕܫܲܒܼܥܵܐ ܫܹܐܕܹ̈ܐ ܦܘܼܠܛܵܐ ܗ݇ܘܵܐ ܡܸܢܵܗ̇. ܘܗ̇‌ܝ ܐ݇ܙܸܠܵܗ̇ ܡܘܼܫܚܸܕܠܵܗ̇ ܠܐܵܢܝܼ ܕܥܲܡܹܗ ܗ݇ܘܵܘ. ܕܝܼܗ݇ܘܵܘ ܒܬܵܥܙܝܼ ܘܒܟܼܵܝܵܐ. ܘܐܵܢܝܼ ܟܲܕ ܫܡܸܥܠܗ݇ܘܿܢ ܕܐ݇ܡܸܗ݇ܘܿܢ: ܕܚܵܝܵܐ ܝܠܹܗ ܘܦܸܫܠܹܗ ܚܸܙܝܵܐ ܐܸܠܲܝܗܝ. ܠܵܐ ܗܘܼܡܸܢܗ݇ܘܿܢ ܐܸܠܲܝܗܝ: ܒܵܬ݇ܪ ܕܐܲܢܹܐ: ܦܸܫܠܹܗ ܚܸܙܝܵܐ ܠܬܪܹܝ ܡܸܢܲܝܗܝ ܒܕܵܡܵܝܬܵܐ ܐ݇ܚܹܪ݇ܬܵܐ. ܟܲܕ ܒܸܚܕܵܪܵܐ ܘܒܹܐܙܵܠܵܐ ܠܚܕܵܐ ܡܵܬܵܐ. ܘܐܵܢܝܼ ܐ݇ܙܸܠܗ݇ܘܿܢ ܐ݇ܡܸܪܗ݇ܘܿܢ ܠܫܲܪܟܵܐ. ܐܵܦܠܵܐ ܠܐܵܢܝܼ ܗܘܼܡܸܢܗ݇ܘܿܢ. ܐܝܼܢܵܐ ܒܐ݇ܚܲܪܬܵܐ ܦܸܫܠܹܗ ܚܸܙܝܵܐ ܠܲܚܕܲܥܣܲܪ ܟܲܕ ܝܬܝܼܒܼܹܵܐ. ܘܠܸܡܠܹܗ ܠܒܵܨܘܼܪܘܼܬܵܐ ܕܗܲܝܡܵܢܘܼܬܲܝܗܝ. ܘܠܩܲܫܝܘܼܬܵܐ ܕܠܸܒܲܝܗܝ. ܕܠܐܵܢܝܼ ܕܚܙܹܐܠܗ݇ܘܿܢ ܐܸܠܹܗ ܕܩܝܼܡܵܐ ܠܵܐ ܗܘܼܡܸܢܗ݇ܘܿܢ. ܘܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܿܢ ܠܥܵܠܡܵܐ ܟܠܹܗ. ܘܡܲܟܪܸܙܘܿܢ ܤܒ̣ܲܪܬܝܼ ܒܟܠܵܗ̇ ܒܪܝܼܬܵܐ. ܐܲܝܢܝܼ ܕܡܗܲܝܡܸܢ ܘܥܵܡܸܕ ܚܵܝܹܐ. ܘܐܲܝܢܝܼ ܕܠܵܐ ܡܗܲܝܡܸܢ ܗܵܘܹܐ ܚܲܝܵܒܼܵܐ. ܐܝܼܢܵܐ ܐܲܢܹܐ ܢܝܼܫܲܢܩܹ̈ܐ ܠܐܲܝܢܝܼ ܕܡܗܲܝܡܸܢܝܼ ܒܸܬ ܬܲܒܥܝܼ: ܒܫܸܡܝܼ ܫܹܐܕܹ̈ܐ ܒܸܬ ܦܲܠܛܝܼ. ܘܒܠܸܫܵܢܹ̈ܐ ܚܲܕ̈ܬܹܐ ܒܸܬ ܗܲܡܙܸܡܝܼ. ܘܚܘܵܘܵܬܹ̈ܐ ܒܸܬ ܫܲܩܠܝܼ. ܘܐܸܢ ܣܲܡܵܐ ܕܡܵܘܬܵܐ ܫܵܬܝܼ ܠܹܐ ܚܲܙܕܸܓܠܗ݇ܘܿܢ. ܘܐܝܼ̈ܕܵܬܲܝܗܝ ܒܸܬ ܡܲܬܒܼܝܼ ܥܲܠ ܡܸܪ̈ܥܝܹܐ ܘܒܸܬ ܒܲܣܡܝܼ. ܐܝܼܢܵܐ ܝܑܼܫܘܿܥ ܡܵܪܲܢ:ܡ̣ܢ ܒܵܬ݇ܪ ܕܗܘܼܡܙܸܡܠܹܗ ܥܲܡܵܝܗܝ. ܣܸܠَܩܠܹܗ ܠܫܡܲܝܵܐ. ܘܝܬܸܒܼܠܹܗ ܡ̣ܢ ܝܲܡܝܼܢܵܐ ܕܐܲܠܵܗܵܐ. ܐܝܼܢܵܐ ܐܵܢܝܼ ܦܠܸܛܠܗ݇ܘܿܢ ܘܡܘܼܟܪܸܙܠܗ݇ܘܿܢ ܒܟܠ ܕܘܼܟܵܐ، ܘܡܵܪܲܢ ܗܲܝܸܪ ܗ݇ܘܵܐ ܠܗ݇ܘܿܢ. ܘܡܲܩܘܹܐ ܗ݇ܘܵܐ ܗܹܡܸܙܡܵܢܲܝܗܝ ܒܢܝܼܫܲܢܩܹ̈ܐ ܕܥܲܒܼܕܝܼ ܗ݇ܘܵܘ.

ܚܕܒܫܒܐ ܕܥܐܕܐ ܕܦܢܛܩܘܣܛܐ

ܝܘܚܢܢ ܝܕ: 15‐18، 25‐27 ܝܗ: 26 ‐ ܝܘ: 16

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܐܸܢ ܡܲܚܸܒܝܼܬܘܿܢ ܠܝܼ، ܦܘܼܩ̈ܕܵܢܝܼ ܢܛܘܼܪܘܿܢ. ܘܐܵܢܵܐ ܒܸܬ ܛܲܠܒܸܢ ܡ̣ܢ ܒܵܒܝܼ، ܘܐ݇ܚܹܪ݇ܢܵܐ ܦܵܪܲܩܠܹܝܛܵܐ ܒܸܬ ܝܲܗ݇ܒܼܸܠܵܘܟܼܘܿܢ. ܕܗܵܘܹܐ ܥܲܡܵܘܟܼܘܿܢ ܠܥܵܠܲܡ. ܪܘܼܚܵܐ ܕܫܪܵܪܵܐ ܗ̇ܘ ܕܥܵܠܡܵܐ ܠܹܐ ܡܵܨܹܐ ܠܩܵܒܲܠܬܹܗ، ܣܵܒܵܒ ܕܠܹܐ ܝܠܹܗ ܚܸܙܝܘܼܗܝ ܘܠܹܐ ܝܵܕܸܥܠܹܗ. ܐܝܼܢܵܐ ܐܲܚܬܘܿܢ ܝܲܕܥܝܼܬܘܿܢ ܠܹܗ. ܕܠܟܸܣܠܵܘܟܼܘܿܢ ܒܸܥܡܵܪܵܐ ܝܠܹܗ ܘܒܝܼܵܘܟܼܘܿܢ ܝܠܹܗ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܟܲܕ ܠܟܸܣܠܵܘܟܼܘܿܢ ܝܘܸܢ. ܐܝܼܢܵܐ ܐܵܗܵܐ ܦܵܪܲܩܠܹܝܛܵܐ ܪܘܼܚܵܐ ܕܩܘܼܕܫܵܐ، ܗ̇ܘ ܕܡܫܵܕܸܪ ܒܵܒܝܼ ܒܫܸܡܝܼ. ܗ̇ܘ ܒܸܬ ܡܵܠܸܦܠܵܘܟܼܘܿܢ ܟܠ ܡܸܢܕܝܼ. ܘܗ̇ܘ ܒܸܬ ܡܲܕܟܼܸܪܵܘܟܼܘܿܢ ܟܠ ܡܸܢܕܝܼ ܕܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܐܝܼܢܵܐ ܐܝܼܡܵܢ ܕܐ݇ܬܹܐܠܹܗ ܦܵܪܲܩܠܹܝܛܵܐ ܗ̇ܘ ܕܐܵܢܵܐ ܒܸܬ ܡܫܲܕܪܸܢܹܗ ܐܸܠܵܘܟܼܘܿܢ ܡ̣ܢ ܠܘܵܬ ܒܵܒܝܼ، ܪܘܼܚܵܐ ܕܫܪܵܪܵܐ، ܗ̇ܘ ܕܡ̣ܢ ܠܘܵܬ ܒܵܒܝܼ ܟܹܐ ܦܵܠܸܛ. ܗ̇ܘ ܒܸܬ ܣܵܗܸܕ ܥܲܠܝܼ. ܐܘܿܦ ܐܲܚܬܘܿܢ ܒܸܬ ܣܵܗܕܝܼܬܘܿܢ. ܕܡ̣ܢ ܫܘܼܪܵܝܵܐ ܥܲܡܝܼ ܝܬܘܿܢ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܕܠܵܐ ܟܵܦܪܝܼܬܘܿܢ. ܣܵܒܵܒ ܒܸܬ ܦܲܠܛܝܼܠܵܘܟܼܘܿܢ ܡ̣ܢ ܟܢܘܼܫܝܵܬܲܝ̈ܗܝ. ܘܒܸܬ ܐܲܬܝܵܐ ܣܵܥܵܬ ܕܟܠ ܕܩܵܛܸܠܵܘܟܼܘܿܢ، ܒܸܬ ܚܵܫܸܒܼ ܕܩܘܼܪܒܵܢܵܐ ܡܲܩܪܘܼܒܼܹܐ ܝܠܹܗ ܠܐܲܠܵܗܵܐ. ܘܐܲܢܹܐ ܒܸܬ ܥܲܒܼܕܝܼ ܣܵܒܵܒ ܕܠܵܐ ܠܒܵܒܝܼ ܝܕܸܥܠܗ݇ܘܿܢ، ܘܠܵܐ ܐܸܠܝܼ. ܐܲܢܹܐ ܗܘܼܡܙܸܡܠܝܼ ܥܲܡܵܘܟܼܘܿܢ ܕܐܝܼܡܵܢ ܕܐ݇ܬܹܐܠܵܗ̇ ܥܸܕܵܢܲܝܗܝ، ܕܲܟܼܪܝܼܬܘܿܢ ܠܗ݇ܘܿܢ ܕܐܵܢܵܐ ܐ݇ܡܸܪܝܼ ܐܸܠܵܘܟܼܘܿܢ. ܐܝܼܢܵܐ ܐܲܢܹܐ ܡ̣ܢ ܩܲܕ݇ܡܵܝܬܵܐ ܠܵܐ ܐ݇ܡܸܪܝܼ ܐܸܠܵܘܟܼܘܿܢ. ܕܥܲܡܵܘܟܼܘܿܢ ܝܘܸܢ ܗ݇ܘܵܐ. ܐܝܼܢܵܐ ܐܵܕܝܼܵܐ ܒܹܐܙܵܠܵܐ ܝܘܸܢ ܠܘܵܬ ܡ̇ܢ ܕܫܘܼܕܪܸܢܹܗ. ܘܐ݇ܢܵܫܵܐ ܡܸܢܵܘܟܼܘܿܢ ܠܹܐ ܝܠܹܗ ܒܵܩܘܼܪܝܼ: ܠܐܲܝܟܵܐ ܒܹܐܙܵܠܵܐ ܝܘܸܬ؟ ܣܵܒܵܒ ܐ݇ܡܸܪܝܼ ܐܸܠܵܘܟܼܘܿܢ ܐܲܢܹܐ. ܘܐ݇ܬܹܐܠܵܗ̇ ܦܵܫܲܡܬܵܐ ܘܡܠܹܐܠܵܗ̇ ܠܸܒܵܘܵܬܵܘ̈ܟܼܘܿܢ. ܐܸܠܵܐ ܐܵܢܵܐ ܫܪܵܪܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ: ܕܨܦܵܝܝܼ ܝܠܵܗ̇ ܐܸܠܵܘܟܼܘܿܢ ܕܐܵܢܵܐ ܐܵܙܸܠ݇ܢ. ܣܵܒܵܒ ܐܸܢ ܐܵܢܵܐ ܠܵܐ ܐܵܙܸܠ݇ܢ، ܦܵܪܲܩܠܹܝܛܵܐ ܠܹܐ ܐܵܬܹܐ ܠܟܸܣܠܵܘܟܼܘܿܢ. ܐܝܼܢܵܐ ܐܸܢ ܐܵܙܸܠ݇ܢ ܒܸܬ ܫܲܕܪܸܢܹܗ ܠܟܸܣܠܵܘܟܼܘܿܢ. ܘܐܝܼܡܵܢ ܕܐ݇ܬܹܐܠܹܗ، ܗ̇ܘ ܒܸܬ ܡܲܢܟܼܸܣ ܠܥܵܠܡܵܐ ܥܲܠ ܚܛܝܼܬܵܐ، ܘܥܲܠ ܙܲܕܝܼܩܘܼܬܵܐ. ܘܥܲܠ ܕܝܼܢܵܐ. ܥܲܠ ܚܛܝܼܬܵܐ: ܕܠܹܐ ܝܢܵܐ ܡܗܲܝܡܘܼܢܹܐ ܒܝܼܝܼ. ܐܝܼܢܵܐ ܥܲܠ ܙܲܕܝܼܩܘܼܬܵܐ، ܕܠܘܵܬ ܒܵܒܝܼ ܒܹܐܙܵܠܵܐ ܝܘܸܢ. ܘܡܸܢ݇ܕܪܹܫ݇ ܠܹܐ ܚܵܙܝܼܬܘܿܢ ܠܝܼ. ܐܝܼܢܵܐ ܥܲܠ ܕܝܼܘܵܢ. ܕܐܲܪܟܘܼܢܵܐ ܕܐܵܗܵܐ ܥܵܠܡܵܐ ܦܝܼܫܠܹܗ ܕܝܼܢܵܐ. ܡܸܢ݇ܕܪܹܫ݇ ܪܵܒܵܐ ܐܝܼܬܠܝܼ ܠܹܐܡܵܪܵܐ ܐܸܠܵܘܟܼܘܿܢ. ܐܸܠܵܐ ܠܹܐ ܡܵܨܝܼܬܘܿܢ ܠܸܕܒܼܵܩܵܐ ܐܵܕܝܼܵܐ. ܐܝܼܢܵܐ ܐܝܼܡܵܢ ܕܐ݇ܬܹܐܠܹܗ ܪܘܼܚܵܐ ܕܫܪܵܪܵܐ، ܗ̇ܘ ܒܸܬ ܕܵܒܸܪܵܘܟܼܘܿܢ ܒܟܠܹܗ ܫܪܵܪܵܐ. ܣܵܒܵܒ ܠܹܐ ܗܲܡܙܸܡ ܡ̣ܢ ܪܸܥܝܵܢܵܐ ܕܓܵܢܹܗ. ܐܸܠܵܐ ܟܠ ܕܫܵܡܸܥ ܗ̇ܘ ܒܸܬ ܗܲܡܙܸܡ. ܘܡܸܢܕܝܼܵܢܹ̈ܐ ܕܲܥܬܝܼܕ ܗ̇ܘ ܒܸܬ ܡܲܕܸܥܠܵܘܟܼܘܿܢ. ܘܗ̇ܘ ܒܸܬ ܫܵܒܸܚܠܝܼ. ܣܵܒܵܒ ܡ̣ܢ ܕܝܼܠ݇ܝܼ ܒܸܬ ܫܵܩܸܠ ܘܡܲܚܙܹܐ ܐܸܠܵܘܟܼܘܿܢ. ܟܠ ܡܸܢܕܝܼ ܕܐܝܼܬ ܠܒܵܒܝܼ ܕܝܼܠ݇ܝܼ ܝܠܹܗ. ܒܘܼܬ ܕܐܵܗܵܐ ܐ݇ܡܸܪܝܼ ܐܸܠܵܘܟܼܘܿܢ: ܕܡ̣ܢ ܕܝܼܠ݇ܝܼ ܒܸܬ ܫܵܩܸܠ ܘܡܲܚܙܹܐ ܐܸܠܵܘܟܼܘܢ.

♱♱♱♱♱♱♱♱♱♱♱♱♱

ܩܪܝܢܐ ܕܛܟܼܣܐ ܕܣܓܼܕܬܐ ܕܝܠܗ ܕܝܘܡܐ

ܕܡܬܩܪܐ ܒܡܕܒܿܚܐ.

ܝܘܚܢܢ ܕ: 3 ‐ 43

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܒܵܬ݇ܪ ܕܐܲܢܹܐ ܦܠܸܛܠܹܗ ܝܑܼܫܘܿܥ ܡ̣ܢ ܝܼܗܘܼܕ: ܘܐ݇ܬܹܐܠܹܗ ܡܸܢ݇ܕܪܹܫ݇ ܠܓܠܝܼܠܵܐ. ܐܝܼܢܵܐ ܘܵܠܹܐ ܗ݇ܘܵܐ ܐܸܠܹܗ ܕܐܵܬܹܐ ܥܵܒܼܸܪ ܡܓܵܘ ܒܹܝܬ ܫܵܡܪ̈ܵܝܹܐ. ܘܐ݇ܬܹܐܠܹܗ ܠܡܕܝܼܢ݇ܬܵܐ ܕܫܵܡܪ̈ܵܝܹܐ ܕܟܹܐ ܦܲܝܫܵܐ ܩܪܹܝܬܵܐ ܫܟܲܪ. ܥܲܠ ܓܹܒܵܐ ܕܡܵܬܵܐ ܕܝܘܼܗ݇ܒܼܘܼܗ̇ ܗ݇ܘܵܐ ܝܲܥܩܘܼܒܼ ܠܝܵܘܣܸܦ ܒܪܘܿܢܹܗ. ܘܐܝܼܬ ܗ݇ܘܵܐ ܬܵܡܵܐ ܥܲܝܢܵܐ ܕܡܝܼ̈ܵܐ ܕܝܲܥܩܘܼܒܼ. ܐܝܼܢܵܐ ܗ̇ܘ ܝܑܼܫܘܿܥ ܟܟ̰ܝܼܚܵܐ ܗ݇ܘܵܐ ܡ̣ܢ ܥܲܡܠܵܐ ܕܐܘܼܪܚܵܐ ܘܝܬܝܼܒܼܵܐ ܗ݇ܘܵܐ ܥܲܠ ܥܲܝܢܵܐ. ܘܣܵܥܵܬ ܫܬܵܐ ܗ݇ܘܵܐ. ܘܐ݇ܬܹܐܠܵܗ̇ ܚܕܵܐ ܒܲܟܼܬܵܐ ܡ̣ܢ ܫܲܡܪܹܝܢ ܕܡܲܠܝܵܐ ܡܝܼ̈ܵܐ. ܘܐ݇ܡܸܪܹܗ ܐܸܠܵܗ̇ ܝܑܼܫܘܿܥ: ܗܲܒَܼܠܝܼ ܡܝܼ̈ܵܐ ܕܫܵܬܸܢ. ܣܵܒܵܒ ܬܲܠܡܝܼܕܘܼ̈ܗܝ ܥܒܼܝܼܪܹܐ ܗ݇ܘܵܘ ܠܡܕܝܼܢ݇ܬܵܐ ܕܙܲܒܼܢܝܼܠܗ݇ܘܿܢ ܡܹܐܟܼܘܼܠܬܵܐ. ܐܲܡܪܵܐ ܐܸܠܹܗ ܗ̇‌ܝ ܒܲܟܼܬܵܐ ܫܵܡܪܵܝܬܵܐ: ܕܲܐܟܼܝܼ ܐܲܢ݇ܬ ܕܝܗ݇ܘܼܕܵܝܵܐ ܝܘܸܬ ܘܡܸܢܝܼ ܒܸܛܠܵܒܵܐ ܝܘܸܬ ܠܸܫܬܵܝܵܐ. ܕܝܼܘܲܢܝ ܒܲܟܼܬܵܐ ܫܵܡܪܵܝܬܵܐ؟ ܣܵܒܵܒ ܠܹܐ ܚܲܒܼܛܝܼ ܗ݇ܘܵܘ ܝܗ݇ܘܼܕܵܝܹ̈ܐ ܥܲܡ ܫܵܡܪ̈ܵܝܹܐ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܵܗ̇: ܐܸܢ ܗܵܘܝܵܬܝ ܗ݇ܘܵܐ ܒܝܼܕܵܥܵܐ ܡܵܘܗܲܒܼܬܵܐ ܕܐܲܠܵܗܵܐ، ܘܡܵܢܝܼ ܝܼܠܹܗ ܐܵܗܵܐ ܕܐ݇ܡܸܪܹܗ ܐܸܠܹܟܼܝ: ܗܲܒَܼܠ ܠܝܼ ܕܫܵܬܸܢ، ܐܲܢ݇ܬܝ ܒܸܬ ܛܵܠܒܵܬܝ ܗ݇ܘܵܐ ܡܸܢܹܗ. ܘܒܸܬ ܝܲܗ݇ܒܼܸܠ ܗ݇ܘܵܐ ܠܹܟܼܝ ܡܝܼ̈ܵܐ ܕܚܲܝܹ̈ܐ. ܐܵܡܪܵܐ ܐܸܠܹܗ ܗ̇‌ܝ ܒܲܟܼܬܵܐ: ܡܵܪܝܼ: ܠܵܐ ܕܵܘܠܵܐ ܐܝܼܬܠܘܼܟܼ ܘܒܹܪܵܐ ܥܲܡܝܼܩܵܐ ܝܠܹܗ، ܡܐܲܝܟܵܐ ܠܘܼܟܼ ܡܝܼ̈ܵܐ ܕܚܲܝܹ̈ܐ؟ ܩܵܡܘܿ ܐܲܢ݇ܬ ܒܘܼܫ ܓܘܼܪܵܐ ܝܘܸܬ ܡ̣ܢ ܒܵܒܲܢ ܝܲܥܩܘܼܒܼ. ܗ̇ܘ ܕܝܘܼܗ݇ܒܼܸܠܹܗ ܐܸܠܲܢ ܐܵܗܵܐ ܒܹܪܵܐ؟ ܘܗ̇ܘ ܡܸܢܹܗ ܫܬܹܐܠܹܗ ܘܒܢܘܿܢ̈ܘܼܗܝ ܘܦܸܣܩܹܗ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܵܗ̇: ܟܠ ܕܫܵܬܹܐ ܡ̣ܢ ܐܲܢܹܐ ܡܝܼ̈ܵܐ، ܡܸܢ݇ܕܪܹܫ݇ ܒܸܬ ܨܵܗܹܐ. ܐܝܼܢܵܐ ܟܠ ܕܫܵܬܹܐ ܡ̣ܢ ܡܝܼ̈ܵܐ ܕܐܵܢܵܐ ܝܲܗܒܼܸܢ ܐܸܠܹܗ، ܠܹܐ ܨܵܗܹܐ ܠܥܵܠܵܡ. ܐܸܠܵܐ ܐܵܢܝܼ ܡܝܼ̈ܵܐ ܕܐܵܢܵܐ ܕܝܲܗܒܼܸܢ ܐܸܠܹܗ، ܒܸܬ ܗܵܘܝܼ ܓܵܘܹܗ ܥܲܝܢܵܐ ܕܡܝܼ̈ܵܐ ܕܢܲܒܼܥܝܼ ܠܚܲܝܹ̈ܐ ܕܠܥܵܠܵܡ. ܐܲܡܪܵܐ ܐܸܠܹܗ ܗ̇‌ܝ ܒܲܟܼܬܵܐ: ܡܵܪܝܼ: ܗܲܒَܼܠܝܼ ܡ̣ܢ ܐܲܢܹܐ ܡܝܼ̈ܵܐ. ܕܠܵܐ ܡܸܢ݇ܕܪܹܫ݇ ܨܲܗܝܵܢܝ ܘܠܵܐ ܗܵܘܝܵܢܝ ܒܹܐܬܵܝܵܐ ܒܸܓܪܵܫܵܐ ܡ̣ܢ ܠܲܐܟܼܵܐ. ܐܵܡܸܪ ܐܸܠܵܗ̇ ܝܑܼܫܘܿܥ: ܙܹܠ݇ܝ. ܩܪܹܝ ܠܓܲܒܼܪܹܟܼܝ ܘܬܵܐܝ ܠܐܲܟܼܵܐ. ܐܲܡܪܵܐ ܐܸܠܹܗ: ܠܲܝܬܠܝܼ ܓܲܒܼܪܵܐ. ܐܵܡܸܪ ܐܸܠܵܗ̇ ܝܑܼܫܘܿܥ: ܨܦܵܝܝܼ ܐ݇ܡܸܪܵܟܼܝ: ܕܠܲܝܬܠܝܼ ܓܲܒܼܪܵܐ. ܣܵܒܵܒ ܚܲܡܫܵܐ ܓܲܒܼܪܹ̈ܐ ܗ݇ܘܹܐܠܗ݇ܘܿܢ ܐܸܠܹܟܼܝ. ܘܐܵܗܵܐ ܕܐܝܼܬܠܹܟܼܝ ܐܵܕܝܼܵܐ، ܠܹܐ ܝܠܹܗ ܓܲܒܼܪܹܟܼܝ. ܐܵܗܵܐ ܫܪܵܪܵܐ ܐ݇ܡܸܪܵܟܼܝ. ܐܲܡܪܵܐ ܐܸܠܹܗ ܗ̇‌ܝ ܒܲܟܼܬܵܐ: ܡܵܪܝ. ܒܸܚܙܵܝܵܐ ܝܘܲܢܝ ܕܢܒܼܝܼܵܐ ܝܘܸܬ. ܐܲܒܼܵܗܲܝ̈ܢ ܒܐܵܗܵܐ ܛܘܼܪܵܐ ܣܓܼܸܕܠܗ݇ܘܿܢ. ܘܐܲܚܬܘܿܢ ܒܹܐܡܵܪܵܐ ܝܬܘܿܢ ܕܒܐܘܿܪܸܫܠܸܡ ܝܼܠܵܗ̇ ܕܘܼܟܬܵܐ ܕܘܵܠܹܐ ܠܸܣܓܼܵܕܵܐ. ܐܵܡܸܪ ܐܸܠܵܗ̇ ܝܑܼܫܘܿܥ: ܒܲܟܼܬܵܐ: ܡܗܲܝܡܸܢ ܐܸܠܝܼ: ܕܒܸܬ ܐܲܬܝܵܐ ܣܵܥܵܬ. ܕܠܵܐ ܒܐܵܗܵܐ ܛܘܼܪܵܐ ܐܘܼܦܠܵܐ ܒܐܘܿܪܸܫܠܸܡ ܒܸܬ ܣܲܓܼܕܝܼܬܘܿܢ ܠܒܵܒܵܐ. ܐܲܚܬܘܿܢ ܒܸܤܓ݂ܵܕܵܐ ܝܬܘܿܢ ܠܡܸܢܕܝܼ ܕܠܹܐ ܝܬܘܿܢ ܒܝܼܕܵܥܵܐ، ܐܝܼܢܵܐ ܐܲܚܢܲܢ ܒܸܤܓ݂ܵܕܵܐ ܝܘܲܚ ܠܡܸܢܕܝܼ ܕܒܝܼܕܵܥܵܐ ܝܘܲܚ. ܕܚܲܝܹ̈ܐ ܡ̣ܢ ܝܗ݇ܘܼܕܵܝܹܐ ܝܢܵܐ. ܐܸܠܵܐ ܒܹܬ ܐܲܬܝܵܐ ܣܵܥܵܬ ܘܐܵܕܝܼܵܐ ܝܠܵܗ̇. ܐܝܼܡܵܢ ܕܣܵܓܼܘܼܕܹ̈ܐ ܫܲܪܝܼܪܹ̈ܐ ܣܵܓܼܕܝܼ ܠܒܵܒܵܐ ܒܪܘܼܚܵܐ ܘܒܫܪܵܪܵܐ. ܣܵܒܵܒ ܐܘܿܦ ܒܵܒܵܐ ܕܐܲܝܟܼ ܐܲܢܹܐ ܣܵܓܼܘܼܕܹܐ ܒܵܥܹܐ. ܣܵܒܵܒ ܐܲܠܵܗܵܐ ܪܘܼܚܵܐ ܝܠܹܗ. ܘܐܲܝܢܝܼ ܕܣܵܓܼܕܝܼܠܹܗ، ܒܪܘܼܚܵܐ ܘܒܫܪܵܪܵܐ ܘܵܠܹܐ ܕܣܵܓܼܕܝܼ. ܐܲܡܪܵܐ ܐܸܠܹܗ ܗ̇‌ܝ ܒܲܟܼܬܵܐ: ܒܝܼܕܵܥܵܐ ܝܘܲܢܝ ܕܡܫܝܼܚܵܐ ܒܸܬ ܐܵܬܹܐ. ܘܐܝܼܡܵܢ ܕܐ݇ܬܹܐܠܹܗ. ܗ̇ܘ ܒܸܬ ܡܵܠܸܦܠܲܢ ܟܠ ܡܸܢܕܝܼ. ܐܵܡܸܪ ܐܸܠܵܗ̇ ܝܑܼܫܘܿܥ: ܐܵܢܵܐ ܝܘܸܢ ܕܗܲܡܙܘܼܡܹܐ ܝܘܸܢ ܥܲܡܹܟܼܝ. ܘܟܲܕ ܗܲܡܙܘܼܡܹܐ. ܐ݇ܬܹܐܠܗ݇ܘܿܢ ܬܲܠܡ̈ܝܼܕܘܼܗܝ. ܘܥܲܓ̰ܒܝܼ ܗ݇ܘܵܘ ܕܥܲܡ ܒܲܟܼܬܵܐ ܗܲܡܙܘܼܡܹܐ ܠܹܗ. ܐܝܼܢܵܐ ܠܵܐ ܐ݇ܢܵܫܵܐ ܐ݇ܡܸܪܹܗ ܡܘܿܕܝܼ ܒܵܥܸܬ. ܝܲܢ ܡܘܿܕܝܼ ܗܲܡܙܘܼܡܹܐ ܝܘܸܬ ܥܲܡܵܗ̇. ܘܫܒܼܝܼܩܠܵܗ̇ ܒܲܟܼܬܵܐ ܩܘܼܠܬܘܼܗ̇. ܘܐ݇ܙܸܠܵܗ̇ ܠܡܕܝܼܢ݇ܬܵܐ. ܘܐܲܡܪܵܐ ܠܐ݇ܢܵܫܹ̈ܐ: ܬܵܘ ܚܙܵܘ ܚܲܕ݇ ܐ݇ܢܵܫܵܐ ܕܐ݇ܡܸܪܹܗ ܐܸܠܝܼ ܟܠ ܡܸܢܕܝܼ ܕܥܒܼܸܕܠܝܼ. ܒܲܠܟܵܐ ܐܵܗܵܐ ܝܠܹܗ ܡܫܝܼܚܵܐ؟ ܘܦܠܸܛܠܗ݇ܘܿܢ ܐ݇ܢܵܫܹܐ ܡ̣ܢ ܡܕܝܼܢ݇ܬܵܐ. ܘܐܵܬܝܼ ܗ݇ܘܵܘ ܠܘܵܬܹܗ. ܪܵܒܵܐ ܫܲܡܪ̈ܵܝܹܐ ܡ̣ܢ ܗ̇‌ܝ ܡܕܝܼܢ݇ܬܵܐ ܡܗܘܼܡܸܢܗ݇ܘܿܢ ܒܝܼܹܗ، ܡܸܛܠ ܗܲܡܙܲܡܬܵܐ ܕܗ̇‌ܝ ܒܲܟܼܬܵܐ ܕܝܲܗ݇ܒܼܵܐ ܗ݇ܘܵܐ ܣܵܗܕܘܼܬܵܐ: ܕܐ݇ܡܸܪܹܗ ܐܸܠܝܼ ܟܠ ܡܸܢܕܝܼ ܕܥܒܼܸܕܠܝܼ. ܘܟܲܕ ܐ݇ܬܹܐܠܗ݇ܘܿܢ ܠܘܵܬܹܗ ܐܵܢܝܼ ܫܵܡܪ̈ܵܝܹܐ. ܛܠܸܒܠܗ݇ܘܿܢ ܡܸܢܹܗ ܕܗܵܘܹܐ ܠܘܵܬܲܝܗܝ. ܘܗܘܹܐܠܹܗ ܠܘܵܬܲܝܗܝ ܬܪܹܝ ܝܵܘܡܵܢܹ̈ܐ. ܘܪܵܒܵܐ ܗܘܼܡܸܢܗ݇ܘܿܢ ܒܝܼܹܗ ܒܘܼܬ ܗܲܡܙܲܡܬܹܗ. ܘܐܲܡܪܝܼ ܗ݇ܘܵܘ ܠܗ̇‌ܝ ܒܲܟܼܬܵܐ: ܕܡ̣ܢ ܐܵܕܝܼܵܐ ܠܵܐ ܗܘܵܐ ܒܘܼܬ ܗܲܡܙܵܡܬܹܟܼܝ ܡܗܲܝܡܘܼܢܹܐ ܝܘܲܚ ܒܝܼܹܗ، ܣܵܒܵܒ ܐܲܚܢܲܢ ܫܡܸܥܠܲܢ ܘܝܕܸܥܠܲܢ. ܕܐܵܗܵܐ ܫܲܪܝܼܪܵܐܝܼܬ ܝܼܠܹܗ ܡܫܝܼܚܵܐ ܡܲܚܝܼܵܢܹܗ ܕܥܵܠܡܵܐ.

♱♱♱♱♱♱♱♱♱♱♱♱♱

ܥܪܘܒܼܬܐ ܕܕܗܒܼܐ

ܠܘܩܐ ܙ: 1 ‐ 24

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܒܗ̇ܘ ܙܲܒܼܢܵܐ ܥܒܼܸܪܹܗ ܝܑܼܫܘܿܥ ܠܟܦܲܪܢܵܚܘܿܡ. ܐܝܼܢܵܐ ܥܲܒܼܕܵܐ ܕܚܲܕ݇ ܩܸܢܛܪܘܼܢܵܐ ܚܸܪܒܵܐ ܡܸܪܥܝܵܐ ܗ݇ܘܵܐ ܐܲܝܢܝܼ ܕܝܲܩܝܼܪܵܐ ܗ݇ܘܵܐ ܠܘܵܬܹܗ. ܘܩܘܼܪܒܵܐ ܗ݇ܘܵܐ ܠܸܡܝܵܬܵܐ. ܘܫܡܸܥܠܹܗ ܒܘܼܬ ܝܑܼܫܘܿܥ. ܘܫܘܼܕܸܪܹܗ ܠܘܵܬܹܗ ܚܘܲܪ̈ܕܸܩܢܹܐ ܕܝܗ݇ܘܼܕܵܝܹ̈ܐ. ܘܛܵܠܸܒ ܗ݇ܘܵܐ ܡܸܢܹܗ ܐܲܝܟܼ ܕܐܵܬܹܐ ܡܲܚܹܐ ܠܪܹܓܹܗ. ܐܝܼܢܵܐ ܐܵܢܝܼ ܟܲܕ ܐ݇ܬܹܐܠܗ݇ܘܿܢ ܠܘܵܬ ܝܑܼܫܘܿܥ. ܛܵܠܒܝܼ ܗ݇ܘܵܘ ܡܸܢܹܗ ܚܦܝܼܛܵܐܝܼܬ ܘܐܲܡܪܝܼ: ܚܫܝܼܚܵܐ ܝܠܹܗ ܕܥܵܒܼܕܸܬ ܐܸܠܹܗ ܐܵܗܵܐ. ܣܵܒܵܒ ܟܹܐ ܡܲܚܸܒ ܠܥܲܡܲܢ. ܘܐܵܦ ܒܹܝܬ ܟܢܘܼܫܬܵܐ ܗ̇ܘ ܒܢܹܐܠܹܗ ܐܸܠܲܢ. ܐܝܼܢܵܐ ܝܑܼܫܘܿܥ ܒܹܐܙܵܠܵܐ ܗ݇ܘܵܐ ܥܲܡܲܝܗܝ. ܟܲܕ ܠܵܐ ܪܵܒܵܐ ܪܸܚܩܵܐ ܡ̣ܢ ܒܲܝܬܵܐ. ܫܘܼܕܸܪܹܗ ܩܸܢܛܪܘܿܢܵܐ ܪ̈ܲܚܡܘܼܗܝ ܠܘܵܬܹܗ، ܘܐ݇ܡܸܪܹܗ ܐܸܠܹܗ: ܡܵܪܝܼ: ܠܵܐ ܟܲܟ̰ܚܸܬ ܣܵܒܵܒ ܠܹܐ ܚܲܫܚܸܢ ܕܥܲܒܼܪܸܬ ܬܚܘܼܬ ܫܟܘܼܪܝܼ. ܒܘܼܬ ܕܐܵܗܵܐ ܕܠܹܐ ܝܘܸܢ ܚܫܝܼܚܵܐ، ܐܵܢܵܐ ܠܵܐ ܐ݇ܬܹܐܠܝܼ ܠܟܸܣܠܘܼܟܼ. ܐܸܠܵܐ ܐ݇ܡܘܿܪ ܒܗܹܡܸܙܡܵܢ ܘܒܸܬ ܦܵܐܸܫ ܒܣܝܼܡܵܐ ܝܲܠܕ݇ܝܼ. ܣܵܒܵܒ ܐܘܿܦ ܐܵܢܵܐ ܓܲܒܼܪܵܐ ܝܘܸܢ ܙܲܒܛ ܬܚܘܿܬ ܫܘܼܠܛܵܢܵܐ. ܘܐܝܼܬ ܬܚܘܿܬ ܐܝܼܕܝܼ ܣܲܪ̈ܒܵܙܹܐ، ܘܟܹܐ ܐܲܡܪܸܢ ܠܐܵܗܵܐ ܕܙܹܠ݇ ܘܟܹܐ ܐܵܙܸܠ، ܘܠܐ݇ܚܹܪ݇ܢܵܐ ܕܬܵܐ ܘܟܹܐ ܐܵܬܹܐ. ܘܠܪܹܓܝܼ ܕܥܒܼܘܼܕ ܐܵܗܵܐ ܘܟܹܐ ܥܵܒܼܸܕ. ܐܝܼܢܵܐ ܟܲܕ ܫܡܸܥܠܹܗ ܝܑܼܫܘܿܥ ܐܲܢܹܐ. ܥܘܼܓ̰ܸܒܠܹܗ ܒܝܼܹܗ. ܘܕܥܸܪܹܗ ܘܐ݇ܡܸܪܹܗ ܠܟܸܢܫܵܐ ܕܒܹܐܬܵܝܵܐ ܗ݇ܘܵܐ ܒܵܬ݇ܪܹܗ: ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܐܵܦܠܵܐ ܒܹܝܬ ܝܼܣܪܵܝܸܠ ܡܘܼܫ݇ܟ̰ܸܚܠܝܼ ܐܲܝܟܼ ܕܐܵܗܵܐ ܗܲܝܡܵܢܘܼܬܵܐ. ܘܕܥܸܪܗ݇ܘܿܢ ܐܵܢܝܼ ܕܦܸܫܠܗ݇ܘܿܢ ܫܘܼܕܪܹܐ ܠܒܲܝܬܵܐ، ܘܡܘܼܫ݇ܟ̰ܸܚܠܗ݇ܘܿܢ ܠܗ̇ܘ ܪܹܓܵܐ ܕܝܼܗَܘܵܐ ܡܸܪܥܝܵܐ ܟܲܕ ܒܣܝܼܡܵܐ. ܘܗ݇ܘܹܐܠܵܗ̇ ܠܝܵܘܡܵܐ ܕܒܵܬ݇ܪܹܗ: ܒܹܐܙܵܠܵܐ ܗ݇ܘܵܐ ܠܡܕܝܼܢ݇ܬܵܐ ܕܫܸܡܵܗ̇ ܢܵܐܹܝܢ. ܘܬܲܠܡܝܼܕܘܼ̈ܗܝ ܥܲܡܹܗ ܘܟܸܢܫܵܐ ܪܵܒܵܐ. ܘܟܲܕ ܩܘܼܪܒܸܢܹܗ ܠܬܲܪܥܵܐ ܕܡܕܝܼܢ݇ܬܵܐ. ܚܙܹܐܠܹܗ ܟܲܕ ܡܲܦܫܘܼܛܹܐ ܚܲܕ݇ ܡܝܼܬܵܐ ܕܝܼܗَܘܵܐ ܝܼܚܝܼܕܵܝܵܐ ܠܝܸܡܹܗ. ܘܗ̇‌ܝ ܝܸܡܹܗ ܐܲܪܡܲܠܬܵܐ ܗ݇ܘܵܐ. ܘܟܸܢܫܵܐ ܪܵܒܵܐ ܕܒܢܲܝ̈ ܡܕܝܼܢ݇ܬܵܐ ܥܲܡܵܗ̇. ܐܝܼܢܵܐ ܚܸܙܝܵܐܠܹܗ ܝܑܼܫܘܿܥ. ܘܪܘܼܚܸܡܠܹܗ ܥܲܠܘܼܗ̇ ܘܐ݇ܡܸܪܹܗ ܐܸܠܵܗ̇: ܠܵܐ ܒܲܟܼܝܵܬܝ. ܘܐ݇ܙܸܠܹܗ ܕܩܸܪܹܗ ܠܥܲܪܣܵܐ. ܘܐܵܢܝܼ ܕܫܩܝܼܠܘܼܗ̇ ܗ݇ܘܵܘ ܟܠܹܐܠܗ݇ܘܿܢ. ܘܐ݇ܡܸܪܹܗ: ܥܠܲܝܡܵܐ ܐܸܠܘܼܟܼ ܒܹܐܡܵܪܵܐ ܝܘܸܢ: ܩܘܼܡ. ܘܝܬܸܒܼܠܹܗ ܗ̇ܘ ܡܝܼܬܵܐ. ܘܫܘܼܪܹܐܠܹܗ ܠܡܗܲܡܙܘܼܡܹܐ. ܘܝܘܼܗ݇ܒܼܸܠܹܗ ܠܝܸܡܹܗ. ܘܕܒܼܸܩܠܵܗ̇ ܙܕܘܿܥܬܵܐ ܠܟܠܲܝܗܝ ܐ݇ܢܵܫܹ̈ܐ. ܘܫܲܒܚܝܼ ܗ݇ܘܵܘ ܠܐܲܠܵܗܵܐ ܘܐܲܡܪܝܼ: ܕܢܒܼܝܼܵܐ ܪܲܒܵܐ ܩܸܡܠܹܗ ܓܵܘܲܢ. ܘܣܘܼܚܒܸܪܹܗ ܐܲܠܵܗܵܐ ܠܥܲܡܹܗ. ܘܦܠܸܛܠܵܗ̇ ܒܘܼܬ ܕܝܼܠَܘܼܗܝ ܐܵܗܵܐ ܗܹܡܸܙܡܵܢ ܒܟܠܵܗ̇ ܝܼܗܘܼܕ ܘܒܟܠܹܗ ܐܲܬܪܵܐ ܕܚܵܕܸܪܘܵܢܲܝܗܝ. ܘܗܘܼܩܹܐܠܗ݇ܘܿܢ ܠܝܘܿܚܲܢܵܢ ܬܲܠܡܝܼܕܘܼ̈ܗܝ ܟܠܲܝܗܝ ܐܲܢܹܐ. ܘܩܪܹܐܠܹܗ ܝܘܿܚܲܢܲܢ ܠܬܪܹܝ ܡ̣ܢ ܬܲܠܡܝܼ̈ܕܘܼܗܝ. ܘܫܘܼܕܪܵܝܠܹܗ ܠܘܵܬ ܝܑܼܫܘܿܥ ܘܐ݇ܡܸܪܹܗ: ܐܲܢ݇ܬ ܝܼܘܸܬ ܗ̇ܘ ܕܐܵܬܹܐ ܝܲܢ ܠܚܲܕ݇ ܐ݇ܚܹܪ݇ܢܵܐ ܣܲܦܪܵܚ؟ ܘܐ݇ܬܹܐܠܗ݇ܘܿܢ ܠܘܵܬ ܝܑܼܫܘܿܥ. ܘܐܲܡܪܝܼ ܐܸܠܹܗ: ܝܘܿܚܲܢܵܢ ܡܲܥܡܕܵܢܵܐ ܩܲܡ ܫܵܕܸܪܲܢ ܠܘܵܬܘܼܟܼ ܘܒܹܐܡܵܪܵܐ: ܐܲܢ݇ܬ ܝܼܘܸܬ ܗ̇ܘ ܕܐܵܬܹܐ ܝܲܢ ܠܚܲܕ݇ ܐ݇ܚܹܪ݇ܢܵܐ ܣܲܦܪܵܚ؟ ܐܝܼܢܵܐ ܒܝܼܵܗ̇ ܒܗ̇‌ܝ ܣܵܥܵܬ ܪܵܒܵܐ ܒܘܼܣܸܡܠܹܗ ܡ̣ܢ ܟܘܼܪ̈ܗܵܢܹܐ ܘܡ̣ܢ ܡܲܚܘܵܬܹ̈ܐ ܘܡܼܢ ܪ̈ܘܼܚܹܐ ܒܝܼ̈ܫܵܬܵܐ. ܘܠܪܵܒܵܐ ܡ̣ܢ ܣܸܡܝܹ̈ܐ ܝܲܗ݇ܒܼܸܠ ܗ݇ܘܵܐ ܠܸܚܙܵܝܵܐ. ܘܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܙܹܠ݇ܡܘܼܢ. ܐ݇ܡܘܼܪܘܿܢ ܠܝܘܿܚܲܢܵܢ ܟܠ ܡܸܢܕܝܼ ܕܚܙܹܐܠܵܘܟܼܘܿܢ ܘܫܡܸܥܠܵܘܟܼܘܿܢ. ܕܣܸܡܝܹ̈ܐ ܒܸܚܙܵܝܵܐ ܝܢܵܐ. ܘܣܲܩܲܛܹ̈ܐ ܒܸܚܕܵܪܵܐ ܝܢܵܐ. ܘܓܲܪ̈ܒܼܵܢܹܐ ܦܝܵܫܵܐ ܝܢܵܐ ܕܘܼܟܼܝܹܐ. ܘܟܲܪܹ̈ܐ ܒܸܫܡܵܥܵܐ ܝܢܵܐ. ܘܡܝܼܬܹ̈ܐ ܒܸܩܝܵܡܵܐ ܝܢܵܐ. ܘܡܸܣܟܹܢܹ̈ܐ ܦܝܵܫܵܐ ܝܢܵܐ ܡܘܼܫܚܸܕܹܐ. ܘܛܘܼܒܼܵܐ ܠܡ̇ܢ ܕܠܵܐ ܟܵܦܸܪ ܒܝܼܝܼ.

♱♱♱♱♱♱♱♱♱♱♱♱♱

ܚܕܒܫܒܐ ܕܬܼܪܝܢ ܕܫܠܝܚ̈ܐ

ܠܘܩܐ ܙ: 31 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܠܡ̇ܢ ܗܲܕܟܼܵܐ ܡܲܕܡܸܢ ܠܐ݇ܢܵܫܹ̈ܐ ܕܐܵܗܵܐ ܫܲܪܒܬܵܐ. ܘܠܡ̇ܢ ܟܹܐ ܕܵܡܝܼ؟ ܟܹܐ ܕܵܡܝܼ ܠܛܠܵܝܹ̈ܐ ܕܟܹܐ ܝܲܬܒܼܝܼ ܒܫܘܼܩܵܐ. ܘܡܲܩܘܸܚܝܼ ܠܚܲܒܼܪ̈ܵܘܵܬܲܝܗܝ ܘܐܲܡܪܝܼ: ܙܡܸܪܲܢ ܐܸܠܵܘܟܼܘܿܢ ܘܠܵܐ ܪܩܸܕܠܵܘܟܼܘܿܢ. ܘܠܝܹܐܠܲܢ ܐܸܠܵܘܟܼܘܿܢ ܘܠܵܐ ܒܟ݂ܹܐܠܵܘܟܼܘܿܢ ܣܵܒܵܒ ܐ݇ܬܹܐܠܹܗ ܝܘܿܚܲܢܵܢ ܡܲܥܡܕܵܢܵܐ ܠܵܐ ܒܹܐܟܼܵܠܵܐ ܠܲܚܡܵܐ. ܘܠܵܐ ܒܸܫܬܵܝܵܐ ܚܲܡܪܵܐ. ܘܒܹܐܡܵܪܵܐ ܝܬܘܿܢ: ܫܹܐܕܵܐ ܐܝܼܬ ܒܝܼܹܗ. ܐ݇ܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܒܹܐܟܼܵܠܵܐ ܘܒܸܫܬܵܝܵܐ. ܘܒܹܐܡܵܪܵܐ ܝܬܘܿܢ: ܗܵܐ ܓܲܒܼܪܵܐ ܐܵܟܼܘܿܠܵܐ ܘܫܲܬܝܵܢܵܐ ܕܚܲܡܪܵܐ. ܘܪܵܚܡܵܐ ܕܡܵܟܼܣܹ̈ܐ ܘܕܚܲܛܵܝܹ̈ܐ. ܘܦܸܫܠܵܗ̇ ܡܘܼܟܫܸܛܬܵܐ ܚܸܟܼܡܬܵܐ ܡ̣ܢ ܟܠܲܝܗܝ ܒܢܘܿܢ̈ܘܼܗ̇. ܐܝܼܢܵܐ ܐ݇ܬܹܐܠܹܗ ܚܲܕ݇ ܡ̣ܢ ܦܪ̈ܝܼܫܹܐ ܘܛܠܸܒܠܹܗ ܡܸܢܹܗ ܕܐܵܟܼܸܠ ܥܲܡܹܗ. ܘܥܒܼܸܪܹܗ ܠܒܲܝܬܵܐ ܕܗ̇ܘ ܦܪܝܼܫܵܐ ܝܬܸܒܼܠܹܗ. ܘܚܕܵܐ ܒܲܟܼܬܵܐ ܚܲܛܵܝܬܵܐ ܐܝܼܬ ܗ݇ܘܵܐ ܓܵܘ ܗ̇‌ܝ ܡܕܝܼܢ݇ܬܵܐ. ܘܟܲܕ ܝܕܸܥܠܵܗ̇ ܕܓܵܘ ܒܲܝܬܵܐ ܕܗ̇ܘ ܦܪܝܼܫܵܐ ܝܬܝܼܒܼܵܐ ܝܠܹܗ. ܫܩܸܠܵܗ̇ ܫܵܛܝܼܦܬܵܐ ܕܒܸܣܡܵܐ. ܘܟܠܹܐܠܵܗ̇ ܠܒܸܣܬܪܹܗ ܠܘܵܬ ܐܲܩܠܵܬܹ̈ܗ ܘܒܲܟܼܝܵܐ ܗ݇ܘܵܐ. ܘܫܘܼܪܹܐܠܵܗ̇ ܡܲܬܪܘܼܝܹܐ ܐܲܩ̈ܠܵܬܹܗ ܒܕܸܡܥ̈ܘܼܗ̇ ܘܒܣܲܥܪܵܐ ܕܪܹܫܵܗ̇ ܡܲܫܝܵܐ ܗ݇ܘܵܐܠܗ݇ܘܿܢ. ܘܢܲܫܩܵܐ ܗ݇ܘܵܐ ܐܲܩܠܵܬ̈ܘܼܗܝ. ܘܡܵܫܚܵܐ ܗ݇ܘܵܐ ܠܗ݇ܘܿܢ ܒܒܸܣܡܵܐ. ܐܝܼܢܵܐ ܟܲܕ ܚܙܹܐܠܹܗ ܗ̇ܘ ܦܪܝܼܫܵܐ ܕܩܲܡ ܩܵܪܹܐ ܠܹܗ، ܚܫܸܒܼܠܹܗ ܒܓܵܢܹܗ ܘܐ݇ܡܸܪܹܗ: ܐܵܗܵܐ ܐܸܢ ܢܒܼܝܼܵܐ ܗ݇ܘܵܐ، ܒܸܬ ܝܵܕܸܥ ܗ݇ܘܵܐ ܡܵܢܝܼ ܝܼܠܵܗ̇، ܘܡܘܿܕܝܼ ܒܵܗ݇ܣܘܼܗ̇. ܕܚܲܛܵܝܬܵܐ ܝܠܵܗ̇ ܗ̇‌ܝ ܒܲܟܼܬܵܐ ܕܩܘܼܪܒܸܢܵܗ̇ ܐܸܠܹܗ. ܐܝܼܢܵܐ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܹܗ: ܫܸܡܥܘܿܢ ܐܝܼܬܠܝܼ ܚܲܕ݇ ܡܸܢܕܝܼ ܕܐܲܡܪܸܢ ܐܸܠܘܼܟܼ. ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܹܗ: ܐ݇ܡܘܿܪ ܪܵܒܝܼܝܼ. ܐܵܡܸܪ ܐܸܠܹܗ ܝܑܼܫܘܿܥ: ܬܪܹܝ ܕܲܝܢܵܢܹ̈ܐ ܐܝܼܬ ܗ݇ܘܵܘ ܠܚܲܕ݇ ܡܵܪܵܐ ܕܕܲܝܢܵܐ. ܚܲܕ݇ ܕܲܝܢܵܢܵܐ ܗ݇ܘܵܐ ܚܲܡܸܫܡܵܐܐ ܕܹܝܢܵܪܹ̈ܐ ܘܐ݇ܚܹܪ݇ܢܵܐ ܚܲܡܫܝܼ ܕܝܼܢܵܪܹ̈ܐ. ܘܕܠܲܝܬ ܗ݇ܘܵܐ ܠܗ݇ܘܿܢ ܠܸܦܪܵܥܵܐ. ܠܬܸܪܘܲܝܗܝ ܫܒܼܸܩܠܹܗ. ܗܲܕܟܼܵܐ ܐܲܝܢܝܼ ܡܸܢܲܝܗܝ ܒܘܼܫ ܙܵܘܕܵܐ ܒܸܬ ܡܲܚܸܒܠܹܗ؟ ܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ: ܒܸܚܫܵܒܼܵܐ ܝܘܸܢ ܗ̇ܘ ܕܦܸܫܠܹܗ ܫܒܼܝܼܩܵܐ ܐܸܠܹܗ ܪܵܒܵܐ. ܐܵܡܸܪ ܐܸܠܹܗ ܝܑܼܫܘܿܥ: ܬܪܝܼܨܵܐܝܼܬ ܕܸܢܘܼܟܼ. ܘܕܥܸܪܹܗ ܠܘܵܬ ܗ̇‌ܝ ܒܲܟܼܬܵܐ ܘܐ݇ܡܸܪܹܗ ܠܫܸܡܥܘܿܢ: ܒܸܚܙܵܝܘܼܗ̇ ܝܘܸܬ ܐܵܗܵܐ ܒܲܟܼܬܵܐ. ܠܒܲܝܬܘܼܟܼ ܥܒܼܸܪܝܼ. ܡܝܼ̈ܵܐ ܠܐܲܩܠܵܬ̈ܝܼ ܠܵܐ ܝܘܼܗ݇ܒܼܸܠܘܼܟܼ. ܐܝܼܢܵܐ ܐܵܗܵܐ ܒܕܸܡܥ̈ܘܼܗ̇ ܐܲܩܠܵܬ̈ܝܼ ܡܘܼܬܪܹܐܠܵܗ̇. ܘܒܟܵܘܣܘܼܗ̇ ܡܸܫܝܵܝܠܵܗ̇. ܐܲܢ݇ܬ ܠܵܐ ܢܫܝܼܩܸܢܘܼܟܼ. ܐܝܼܢܵܐ ܐܵܗܵܐ ܗܵܐ ܡ̣ܢ ܕܥܒܼܸܪܵܗ̇ ܠܵܐ ܫܠܹܐܠܵܗ̇ ܡ̣ܢ ܠܸܢܫܵܩܵܐ ܐܲܩܠܵܬ̈ܝܼ. ܐܲܢ݇ܬ ܡܸܫܚܵܐ ܠܪܹܫܝܼ ܠܵܐ ܡܫܝܼܚܠܘܼܟܼ. ܐܝܼܢܵܐ ܐܵܗܵܐ ܒܡܸܫܚܵܐ ܕܒܸܣܡܵܐ ܐܲܩܠܵܬ̈ܝܼ ܡܫܝܼܚܠܵܗ̇. ܒܘܼܬ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܘܼܟܼ. ܕܫܒܼܝܼܩܹܐ ܝܢܵܐ ܐܸܠܵܗ̇ ܚܛܝܼܵܬܘܼ̈ܗ̇ ܪܵܒܹܐ. ܣܵܒܵܒ ܕܡܘܼܚܸܒܠܵܗ̇ ܪܵܒܵܐ. ܐܝܼܢܵܐ ܗ̇ܘ ܕܚܲܕܟ̰ܵܐ ܦܵܐܸܫ ܫܒܼܝܼܩܵܐ ܐܸܠܹܗ. ܚܲܕ݇ܟ̰ܵܐ ܟܹܐ ܡܲܚܸܒ. ܘܐ݇ܡܸܪܹܗ ܠܗ̇‌ܝ ܒܲܟܼܬܵܐ: ܫܒܼܝܼܩܹܐ ܝܢܵܐ ܐܸܠܹܟܼܝ ܚܛܝܼܵܬܹܟܼ̈ܝ. ܐܝܼܢܵܐ ܫܘܼܪܹܐ ܠܗ݇ܘܿܢ ܐܵܢܝܼ ܕܝܼܗ݇ܘܵܘ ܝܬܝܼܒܼܹܐ ܒܹܐܡܵܪܵܐ ܓܵܘ ܓܵܢܲܝܗܝ: ܐܵܗܵܐ ܡܵܢܝܼ ܝܠܹܗ ܕܐܘܿܦ ܚܛܝܼܵܬܹ̈ܐ ܒܸܫܒܼܵܩܵܐ ܝܠܹܗ؟ ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܠܗ̇‌ܝ ܒܲܟܼܬܵܐ: ܗܲܝܡܵܢܘܼܬܹܟܼܝ ܒܸܬ ܡܲܚܝܼܵܠܹܟܼܝ ܙܹܠ݇ܝ ܒܫܠܵܡܵܐ.

♱♱♱♱♱♱♱♱♱♱♱♱♱

ܚܕܒܫܒܐ ܕܬܼܠܬܼܐ ܕܫܠܝܚ̈ܐ

ܠܘܩܐ ܝ: 23 ‐ ܫܘܠܡܐ

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܛܘܼܒܼܵܐ ܠܥܲܝ̈ܢܹܐ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܼܢ. ܣܵܒܵܒ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ ܕܪܵܒܵܐ ܢܒܼܝܼܹ̈ܐ ܘܡܲܠܟܹ̈ܐ ܒܣܸܡܠܵܐ ܠܗ݇ܘܿܢ ܕܚܵܙܝܼ ܡܸܢܕܝܼ ܕܐܲܚܬܘܿܢ ܒܸܚܙܵܝܵܐ ܝܬܘܿܢ. ܘܠܵܐ ܚܙܹܐܠܗ݇ܘܿܢ. ܘܠܸܫܡܵܥܵܐ ܡܸܢܕܝܼ ܕܐܲܚܬܘܿܢ ܒܸܫܡܵܥܵܐ ܝܬܘܿܢ، ܘܠܵܐ ܫܡܸܥܠܗ݇ܘܿܢ. ܘܗܵܐ ܚܲܕ݇ ܣܵܦܪܵܐ ܩܸܡܠܹܗ ܕܓ̰ܵܪܸܒܠܹܗ ܘܐ݇ܡܸܪܹܗ ܡܲܠܦܵܢܵܐ: ܡܘܿܕܝܼ ܥܲܒܼܕܸܢ ܕܝܲܪܬܸܢ ܚܲܝܹ̈ܐ ܕܠܥܵܠܲܡ؟ ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܐܸܠܹܗ: ܒܢܵܡܘܿܣܵܐ ܕܲܐܟܼܝܼ ܟܬܝܼܒܼܵܐ ܝܠܹܗ. ܕܲܐܟܼܝܼ ܟܹܐ ܩܵܪܸܬ؟ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܕܡܲܚܸܒܸܬ ܠܡܵܪܝܵܐ ܐܲܠܵܗܘܼܟܼ ܡ̣ܢ ܟܠܹܗ ܠܸܒܘܼܟܼ ܘܡ̣ܢ ܟܠܵܗ̇ ܓܵܢܘܼܟܼ ܘܡ̣ܢ ܟܠܹܗ ܚܲܝܠܘܼܟܼ ܘܡ̣ܢ ܟܠܹܗ ܪܸܥܝܵܢܘܼܟܼ. ܘܠܫܒܼܵܒܼܘܼܟܼ ܐܲܝܟܼ ܓܵܢܘܼܟܼ. ܐܵܡܸܪ ܐܸܠܹܗ ܝܑܼܫܘܿܥ ܬܪܝܼܨܵܐܝܼܬ ܐ݇ܡܸܪܘܼܟܼ. ܐܵܗܵܐ ܥܒܼܘܼܕ ܘܒܸܬ ܚܲܝܸܬ. ܐܝܼܢܵܐ ܐܵܗܵܐ ܟܲܕ ܒܥܹܐܠܹܗ ܠܡܲܟܫܘܼܛܹܐ ܓܵܢܘܼܗܝ. ܐ݇ܡܸܪܹܗ ܐܸܠܹܗ: ܘܡܵܢܝܼ ܝܠܹܗ ܫܒܼܵܒܼܝܼ؟ ܐܵܡܸܪ ܐܸܠܹܗ ܝܑܼܫܘܿܥ: ܚܲܕ݇ ܓܲܒܼܪܵܐ ܒܸܨܠܵܝܵܐ ܗ݇ܘܵܐ ܡ̣ܢ ܐܘܿܪܸܫܠܸܡ ܠܐܝܼܪܝܼܚܘܼ. ܘܢܦܸܠܗ݇ܘܿܢ ܥܲܠܘܼܗܝ ܠܸܤܛܵܝܹ̈ܐ ܘܩܲܡ ܫܲܠܚܝܼܠܹܗ ܘܩܲܡ ܡܵܚܝܼܠܹܗ، ܘܫܒܼܸܩܠܗ݇ܘܿܢ ܟܲܕ ܚܲܕ݇ܟ̰ܵܐ ܓܵܢܵܐ ܦܝܼܫܬܵܐ ܒܝܼܹܗ ܘܐ݇ܙܸܠܗ݇ܘܿܢ. ܘܩܘܼܘܸܡܠܵܗ̇ ܚܲܕ݇ ܟܵܗܢܵܐ ܒܸܨܠܵܝܵܐ ܗ݇ܘܵܐ ܒܗ̇‌ܝ ܐܘܼܪܚܵܐ ܘܚܙܹܐܠܹܗ ܘܥܒܼܸܪܹܗ. ܗܲܕܟܼܵܐ ܐܘܿܦ ܠܹܘܵܝܵܐ ܐ݇ܬܹܐܠܹܗ ܡܛܹܐܠܹܗ ܠܗ̇‌ܝ ܕܘܼܟܬܵܐ. ܘܚܙܹܐܠܹܗ ܘܥܒܼܸܪܹܗ. ܐܝܼܢܵܐ ܚܲܕ݇ ܐ݇ܢܵܫܵܐ ܫܵܡܪܵܝܵܐ ܟܲܕ ܒܸܛܪܵܝܵܐ ܗ݇ܘܵܐ ܐ݇ܬܹܐܠܹܗ ܐܲܝܟܵܐ ܕܝܼܗَܘܵܐ ܘܚܙܹܐܠܹܗ ܘܪܘܼܚܸܡܠܹܗ ܥܲܠܘܼܗܝ. ܘܩܘܼܪܒܸܢܹܗ ܘܐ݇ܣܸܪܹܗ ܒܪ̈ܝܼܢܵܬܹܗ. ܘܨܘܼܢܨܸܠܹܗ ܥܲܠܲܝܗܝ ܚܲܡܪܵܐ ܘܡܸܫܚܵܐ. ܘܡܘܼܬܸܒܼܠܹܗ ܥܲܠ ܚܡܵܪܹܗ. ܘܡܘܼܬ݇ܝܹܐܠܹܗ ܠܦܘܼܬܩܵܐ ܘܐ݇ܟܼܸܠܹܗ ܚܲܡ ܒܘܼܬ ܕܝܼܹܗ، ܘܠܨܲܦܪܵܐ ܕܝܵܘܡܵܐ ܦܘܼܠܸܛܠܹܗ ܬܪܹܝ ܕܹܝܢܵܪܹ̈ܐ. ܝܘܼܗ݇ܒܼܸܠܹܗ ܠܦܘܼܬܩܵܝܵܐ ܘܐ݇ܡܸܪܹܗ ܐܸܠܹܗ: ܐ݇ܟܼܘܼܠ ܚܲܡ ܒܘܼܬ ܕܝܼܹܗ. ܘܐܸܢ ܡܸܢܕܝܼ ܙܵܘܕܵܐ ܚܲܪܓ̰ܸܬ. ܐܝܼܡܵܢ ܕܕܵܝܪܸܢ ܒܸܬ ܝܲܗ݇ܒܼܸܢܘܼܟܼ. ܗܲܕܟܼܵܐ ܡܵܢܝܼ ܡ̣ܢ ܐܲܢܹܐ ܬܠܵܬܵܐ ܒܸܚܫܵܒܼܵܐ ܝܘܸܬ ܗ݇ܘܹܐܠܹܗ ܫܒܼܵܒܼܵܐ ܠܗ̇ܘ ܕܢܦܸܠܹܗ ܒܐܝܼܕܵܬܹ̈ܐ ܕܠܸܤܛܵܝܹ̈ܐ؟ ܐܝܼܢܵܐ ܗ̇ܘ ܐ݇ܡܸܪܹܗ: ܗ̇ܘ ܕܪܘܼܚܸܡܠܹܗ ܥܲܠܘܼܗܝ. ܐܵܡܸܪ ܐܸܠܹܗ ܝܑܼܫܘܿܥ: ܙܹܠ݇ ܐܘܿܦ ܐܲܢ݇ܬ ܗܲܕܟܼܵܐ ܗܵܘܸܬ ܒܸܥܒܼܵܕܵܐ. ܘܗ݇ܘܹܐܠܵܗ̇ ܟܲܕ ܐܵܢܝܼ ܒܹܐܙܵܠܵܐ ܗ݇ܘܵܐ ܒܐܘܼܪܚܵܐ. ܥܒܼܸܪܹܗ ܠܚܕܵܐ ܡܵܬܵܐ. ܘܚܕܵܐ ܒܲܟܼܬܵܐ ܕܫܸܡܘܼܗ̇ ܡܵܪܬܵܐ ܩܘܼܒܸܠܵܗ̇ ܐܸܠܹܗ ܒܒܲܝܬܵܐ. ܐܝܼܬ ܗ݇ܘܵܐ ܠܵܗ̇ ܚܵܬܵܐ ܕܫܸܡܘܼܗ̇ ܡܲܪܝܲܡ. ܘܐ݇ܬܹܐܠܵܗ̇ ܝܬܸܒܼܠܵܗ̇ ܠܘܵܬ ܐܲܩ̈ܠܵܬܹܗ ܕܡܵܪܲܢ. ܘܫܲܡܥܵܐ ܗ݇ܘܵܐ ܗܹܡܸܙܡܵܢܘܼ̈ܗܝ. ܐܝܼܢܵܐ ܡܵܪܬܵܐ ܒܠܝܼܓܬܵܐ ܗ݇ܘܵܐ ܒܚܸܠܡܵܬ ܪܵܒܵܐ. ܘܐ݇ܬܹܐܠܵܗ̇ ܐܲܡܪܵܐ ܐܸܠܹܗ: ܡܵܪܝܼ. ܠܹܐ ܝܘܸܬ ܒܚܲܡ ܕܚܵܬܝܼ ܩܲܡ ܫܲܒܼܩܵܐ ܠܝܼ ܠܚܘܼܕܝܼ ܠܸܥܒܼܵܕܵܐ ܚܸܠܡܵܬ. ܐ݇ܡܘܼܪ ܐܸܠܵܗ̇ ܕܡܗܲܝܸܪܵܐ ܠܝܼ. ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܵܗ̇: ܡܵܪܬܵܐ ܡܵܪܬܵܐ: ܒܚܲܡ ܝܘܲܬܝ ܘܫܓܼܝܼܫܬܵܐ ܥܲܠ ܪܵܒܵܐ ܡܸܢܕܝܼܵܢܹ̈ܐ. ܐܝܼܢܵܐ ܚܕܵܐ ܝܼܠܵܗ̇ ܕܠܵܙܸܡ ܝܼܠܵܗ̇. ܐܝܼܢܵܐ ܡܲܪܝܲܡ ܣܵܗ݇ܡܵܐ ܛܵܒܼܵܐ ܓܘܼܒܹܐܠܵܗ̇ ܩܵܐ ܓܵܢܘܼܗ̇. ܗ̇ܘ ܕܠܹܐ ܦܵܐܸܫ ܫܩܝܼܠܵܐ ܡܸܢܵܗܿ.

♱♱♱♱♱♱♱♱♱♱♱♱♱♱♱♱♱

ܚܕܒܫܒܐ ܕܐܪܒܥܐ ܕܫܠܝܚ̈ܐ

ܠܘܩܐ ܘ: 12 ‐ 47

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܐܝܼܢܵܐ ܗ݇ܘܹܐܠܵܗ̇ ܒܐܵܢܝܼ ܝܵܘܡܵܢܹ̈ܐ ܦܠܸܛܠܹܗ ܝܑܼܫܘܿܥ ܠܛܘܼܪܵܐ ܠܡܨܵܠܘܼܝܹܐ. ܘܬܵܡܵܐ ܡܘܼܥܒܼܸܪܹܗ ܠܸܠܝܵܐ ܒܨܠܘܿܬܹܗ ܕܐܲܠܵܗܵܐ. ܘܟܲܕ ܗ݇ܘܹܐ ܠܵܗ̇ ܩܲܝܕܵܡܬܵܐ. ܩܪܹܐܠܹܗ ܠܬܲܠܡܝܼܕܘܼ̈ܗܝ. ܘܓܘܼܒܹܐܠܹܗ ܡܸܢܲܝܗܝ ܬܪܸܥܣܲܪ. ܐܵܢܝܼ ܕܩܸܪܝܲܝܠܹܗ ܫܠܝܼܚܹ̈ܐ. ܫܸܡܥܘܿܢ ܗ̇ܘ ܕܫܘܼܡܸܗ ܠܹܗ ܟܹܐܦܵܐ، ܘܐܲܢܕܪܹܐܘܿܣ ܐܲܚܘܿܢܹܗ. ܘܝܲܥܩܘܿܒܼ ܘܝܘܿܚܲܢܵܢ. ܘܦܝܼܠܝܼܦܘܿܣ ܘܒܲܪ ܬܘܼܠܡܲܝ. ܘܡܲܬܲܝ ܘܬܐܘܿܡܵܐ. ܘܝܲܥܩܘܿܒܼ ܒܲܪ ܚܲܠܦܲܝ ܘܫܸܡܥܘܿܢ ܕܦܝܵܫܵܐ ܝܠܹܗ ܩܸܪܝܵܐ ܛܲܢܵܢܵܐ. ܘܝܼܗܘܼܕܵܐ ܒܲܪ ܝܲܥܩܘܿܒܼ. ܘܝܼܗܘܼܕܵܐ ܣܟ݂ܲܪܝܘܿܛܵܐ ܗ̇ܘ ܕܗ݇ܘܹܐܠܹܗ ܣܲܦܝܵܢܵܐ. ܘܨܠܹܐܠܹܗ ܥܲܡܵܝܗܝ ܝܑܼܫܘܿܥ. ܘܟܠܹܐܠܹܗ ܓܵܘ ܕܸܫܬܵܐ ܘܟܸܢܫܵܐ ܪܵܒܵܐ ܕܬܲܠܡܝܼ̈ܕܘܼܗܝ، ܘܣܘܼܓܼܐܵܐ ܕܟܸܢܫܵܐ ܕܥܲܡܵܐ. ܡ̣ܢ ܟܠܵܗ̇ ܝܼܗܘܼܕ ܘܡ̣ܢ ܐܘܿܪܸܫܠܸܡ ܘܡ̣ܢ ܡܲܪܙܵܐ ܕܝܵܡܵܐ ܕܨܘܼܪ ܘܕܨܲܝܕܵܢ، ܕܐ݇ܬܹܐ ܠܗ݇ܘܿܢ ܕܫܲܡܥܝܼ ܗܲܡܙܲܡܬܹܗ. ܘܕܦܲܝܫܝܼ ܒܘܼܣܡܹܐ ܡ̣ܢ ܟܘܼܪ̈ܗܵܢܲܝܗܝ. ܘܐܲܝܢܝܼ ܕܦܝܵܫܵܐ ܗ݇ܘܵܐ ܡܘܼܠܝܸܨܹܐ ܡ̣ܢ ܪ̈ܘܼܚܹܐ ܛܲܢ̈ܦܵܬܵܐ ܘܦܲܝܫܝܼ ܗ݇ܘܵܘ ܒܘܼܣܡܹܐ. ܘܟܠܹܗ ܟܸܢܫܵܐ ܒܥܵܝܵܐ ܗ݇ܘܵܘ ܠܸܕܩܵܪܵܐ ܒܝܼܹܗ. ܣܵܒܵܒ ܚܲܝܠܵܐ ܟܹܐ ܦܵܠܸܛ ܗ݇ܘܵܐ ܡܸܢܹܗ ܘܠܟܠܲܝܗܝ ܟܹܐ ܒܵܣܸܡ ܗ݇ܘܵܐ. ܘܡܘܼܪܸܡܠܹܗ ܥܲܝ̈ܢܘܼܗܝ ܥܲܠ ܬܲܠܡܝܼܕܘܼ̈ܗܝ ܘܐ݇ܡܸܪܹܗ: ܛܘܼܒܼܵܐ ܐܸܠܵܘܟܼܘܿܢ ܡܸܣܟܹܢܹ̈ܐ. ܕܕܝܼܵܘܟܼܘܿܢ ܝܼܠܵܗ̇ ܡܲܠܟܘܼܬܵܐ ܕܐܲܠܵܗܵܐ. ܛܘܼܒܼܵܐ ܐܸܠܵܘܟܼܘܿܢ ܐܵܢܝܼ ܕܟܲܦܢܝܼ ܐܵܕܝܼܵܐ ܐܵܕܝܼܵܐ ܕܒܸܬ ܣܲܒܼܥܝܼܬܘܿܢ. ܛܘܼܒܼܵܐ ܐܸܠܵܘܟܼܘܿܢ ܐܵܢܝܼ ܕܒܵܟܼܝܼ ܐܵܕܝܼܵܐ ܒܸܬ ܓܲܚܟܝܼܬܘܿܢ. ܛܘܼܒܼܵܐ ܐܸܠܵܘܟܼܘܿܢ ܐܝܼܡܵܢ ܕܣܵܢܹܝܠܵܘܟܼܘܿܢ ܒܢܲܝ̈ܢܵܫܵܐ. ܘܦܲܪܫܝܼܠܵܘܟܼܘܿܢ ܘܠܲܝܡܝܼܠܵܘܟܼܘܿܢ، ܘܦܲܠܛܝܼ ܫܸܡܵܘܟܼܘܿܢ ܐܲܝܟܼ ܒܝܼܫܹ̈ܐ ܡܸܛܠ ܒܪܘܿܢܹܗ ܕܐ݇ܢܵܫܵܐ. ܚܕܹܝܡܘܿܢ ܒܗ̇ܘ ܝܵܘܡܵܐ ܘܦܨܘܼܚܘܿܢ ܕܐܲܓܼܪܵܘܟܼܘܿܢ ܙܝܼܕܠܹܗ ܒܫܡܲܝܵܐ. ܣܵܒܵܒ ܗܲܕܟܼܵܐ ܟܹܐ ܥܲܒܼܕܝܼ ܗ݇ܘܵܘ ܐܲܒܼܵܗܵܬܲܝ̈ܗܝ ܠܢܒܼܝܼܹ̈ܐ. ܐܝܼܢܵܐ ܘܵܝ ܐܸܠܵܘܟܼܘܿܢ ܥܲܬܝܼܪܹ̈ܐ. ܕܩܘܼܒܸܠܵܘܟܼܘܿܢ ܝܲܗ݇ܒܼܲܠܬܵܐ ܕܠܸܒܵܘܟܼܘܿܢ. ܘܵܝ ܐܸܠܵܘܟܼܘܿܢ ܣܸܒܼܥܝܹ̈ܐ ܕܒܸܬ ܟܲܦܢܝܼܬܘܿܢ. ܘܵܝ ܠܐܵܢܝܼ ܕܓܲܚܟܝܼ ܐܵܕܝܼܵܐ ܕܒܸܬ ܒܵܟܼܝܼܬܘܿܢ ܘܒܸܬ ܥܲܒܼܕܝܼܬܘܿܢ ܬܵܥܙܝܼ. ܘܵܝ ܐܸܠܵܘܟܼܘܿܢ ܟܲܕ ܗܵܘܝܼ ܒܹܐܡܵܪܵܐ ܨܦܵܐܝܝܼ ܒܢܲܝ̈ܢܵܫܵܐ ܒܘܼܬ ܕܝܼܵܠَܘܟܼܘܢ، ܣܵܒܵܒ ܗܲܕܟܼܵܐ ܟܹܐ ܥܲܒܼܕܝܼ ܗ݇ܘܵܘ ܐܲܒܼܵܗܵܬܲܝ̈ܗܝ ܠܢܒܼܝܼܹ̈ܐ ܕܕܲܓܵܠܘܼܬܵܐ. ܐܝܼܢܵܐ ܐܸܠܵܘܟܼܘܿܢ ܕܒܸܫܡܵܥܵܐ ܝܢܵܐ ܒܹܐܡܵܪܵܐ ܝܘܸܢ: ܡܲܚܸܒܘܿܢ ܠܕܸܫܡܸܢܵܘܟܼܘܿܢ. ܘܥܒܼܘܼܕܘܿܢ ܨܦܵܝܘܼܬܵܐ ܠܐܲܝܢܝܼ ܕܣܵܢܝܼ ܐܸܠܵܘܟܼܘܿܢ. ܘܒܲܪܟܼܘܿܢ ܠܐܲܝܢܝܼ ܕܠܲܝܛܝܼ ܐܸܠܵܘܟܼܘܿܢ. ܘܨܵܠܹܝܡܘܿܢ ܒܘܼܬ ܐܲܝܢܝܼ ܕܠܲܒܠܝܼ ܐܸܠܵܘܟܼܘܿܢ ܒܚܲܝܠܵܐ. ܘܠܗ̇ܘ ܕܡܵܚܹܐ ܠܘܼܟܼ ܥܲܠ ܦܲܟܘܼܟ، ܡܲܚܕܸܪ ܐܸܠܹܗ ܗ̇ܘ ܐ݇ܚܹܪ݇ܢܵܐ. ܘܡ̣ܢ ܡ̇ܢ ܕܫܵܩܸܠ ܥܵܒܵܝܬܘܼܟܼ ܠܵܐ ܡܲܟܠܸܬ ܐܘܿܦ ܟܘܼܬܝܼܢܘܼܟܼ، ܠܟܠ ܕܛܵܠܸܒ ܡܸܢܘܼܟܼ ܗܲܒَܼܠܹܗ. ܘܡ̣ܢ ܡ̇ܢ ܕܫܵܩܸܠ ܕܕܝܼܠَܘܼܟܼ ܠܵܐ ܛܵܠܒܸܬܠܹܗ. ܘܕܲܐܟܼܝܼ ܕܒܲܣܡܵܐ ܠܵܘܟܼܘܿܢ ܕܥܲܒܼܕܝܼ ܒܢܲܝ̈ܢܵܫܵܐ ܩܵܬܵܘܟܼܘܿܢ. ܗܲܕܟܼܵܐ ܥܒܼܘܼܕܘܿܢ ܩܵܬܲܝܗܝ ܐܘܿܦ ܐܲܚܬܘܿܢ. ܣܵܒܵܒ ܐܸܢ ܡܲܚܸܒܝܼܬܘܿܢ ܠܐܲܝܢܝܼ ܕܡܲܚܸܒܝܼ ܠܵܘܟܼܘܿܢ. ܡܘܿܕܝܼ ܝܠܵܗ̇ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܠܐܲܝܢܝܼ ܕܡܲܚܸܒܝܼܠܗ݇ܘܿܢ ܟܹܐ ܡܲܚܸܒܝܼ. ܘܐܸܢ ܥܲܒܼܕܝܼܬܘܿܢ ܛܲܒܼܬܵܐ ܠܐܲܝܢܝܼ ܕܥܲܒܼܕܝܼ ܛܲܒܼܬܵܐ ܐܸܠܵܘܟܼܘܿܢ. ܡܘܿܕܝܼ ܝܼܠܵܗ̇ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܗܲܕܟܼܵܐ ܟܹܐ ܥܲܒܼܕܝܼ. ܘܐܸܢ ܝܲܗ݇ܒܼܝܼܬܘܿܢ ܒܕܲܝܢܵܐ ܠܡ̇ܢ ܕܣܲܦܪܝܼܬܘܿܢ ܕܦܲܝܫܝܼܬܘܿܢ ܦܸܪܥܝܹܐ ܡܸܢܹܗ. ܡܘܿܕܝܼ ܝܠܵܗ̇ ܛܲܒܼܬܵܘܟܼܘܿܢ؟ ܣܵܒܵܒ ܐܘܿܦ ܚܲܛܵܝܹ̈ܐ ܠܚܲܛܵܝܹ̈ܐ ܟܹܐ ܝܲܗܒܼܝܼ ܒܕܲܝܢܵܐ. ܕܗܲܕܟܼܵܐ ܦܲܝܫܝܼ ܦܸܪܥܝܹܐ. ܐܝܼܢܵܐ ܡܲܚܸܒܘܿܢ ܠܕܸܫܡܸܢܵܘ̈ܟܼܘܿܢ ܘܥܒܼܘܼܕܘܿܢ ܛܲܒܼܬܵܐ ܐܸܠܲܝܗܝ. ܘܗܲܒَܼܠܗܘܿܢ ܒܕܲܝܢܵܐ ܘܠܵܐ ܩܲܛܸܥܬܘܿܢ ܗܝܼܒܼܝܼ ܕܐ݇ܢܵܫܵܐ. ܘܒܸܬ ܗܵܘܹܐ ܪܵܒܵܐ ܐܲܓ݂ܪܵܘܟܼܘܿܢ ܘܒܸܬ ܗܵܘܹܝܬܘܿܢ ܒܢܘܿܢܹ̈ܐ ܕܪܵܡܵܐ. ܕܗ̇ܘ ܒܲܣܝܼܡܵܐ ܝܠܹܗ ܥܲܠ ܒܝܼܫܹ̈ܐ ܘܥܲܠ ܟܵܦܘܿܪܹ̈ܐ. ܗܲܕܟܼܵܐ ܗ݇ܘܹܝܡܘܿܢ ܡܪ̈ܲܚܡܵܢܹܐ. ܕܲܐܟܼܝܼ ܕܐܘܿܦ ܒܵܒܵܘܟܼܘܿܢ ܡܪܲܚܡܵܢܵܐ ܝܠܹܗ. ܠܵܐ ܕܵܝܢܝܼܬܘܿܢ ܕܠܵܐ ܦܲܝܫܝܼܬܘܿܢ ܕܝܼܢܹܐ. ܠܵܐ ܕܲܒ̣ܩܝܼܬܘܿܢ ܓܢܵܗܵܐ ܘܠܹܐ ܦܲܝܫܝܼ ܕܒ̣ܝܼܩܹܐ ܓܢܵܗܵܘܟܼܘܿܢ. ܦܲܚܠܘܿܢ ܒܸܬ ܦܲܝܫܝܼܬܘܿܢ ܦܘܼܚܠܹܐ. ܗܲܒَܼܠܘܿܢ ܘܒܸܬ ܦܵܐܸܫ ܝܘܼܗ݇ܒܼܵܐ ܐܸܠܵܘܟܼܘܿܢ. ܒܟܝܵܠܬܵܐ ܛܵܒܼܬܵܐ ܘܕܝܼܫܬܵܐ ܘܫܦܝܼܟܼܬܵܐ ܒܸܬ ܕܵܪܝܼ ܓܵܘ ܥܘܼܒܵܘܟܼܘܿܢ. ܣܵܒܵܒ ܒܗ̇‌ܝ ܟܝܵܠܬܵܐ ܕܟܵܝܠܝܼܬܘܿܢ ܒܸܬ ܦܵܐܸܫ ܟܝܼܠܵܐ ܐܸܠܵܘܟܼܘܿܢ. ܘܐ݇ܡܝܼܪܹܗ ܐܸܠܲܝܗܝ ܡܲܬܠܵܐ: ܩܵܡܘܿ ܒܡܵܨܹܐ ܣܲܡܝܵܐ ܠܣܲܡܝܵܐ ܠܠܵܒܘܼܠܹܐ؟ ܠܹܐ ܬܸܪܘܲܝܗܝ ܓܵܘ ܓܘܼܒܵܐ ܢܲܦܠܝܼ؟ ܠܲܝܬ ܬܲܠܡܝܼܕܵܐ ܕܒܘܼܫ ܓܘܼܪܵܐ ܡ̣ܢ ܪܵܒܝܼܹܗ. ܣܵܒܵܒ ܟܠ ܐ݇ܢܵܫܵܐ ܕܝܼܠܹܗ ܓܡܝܼܪܵܐ. ܒܸܬ ܗܵܘܹܐ ܐܲܝܟܼ ܪܵܒܝܼܹܗ. ܐܝܼܢܵܐ ܩܵܡܘܿܕܝܼ ܒܸܚܙܵܝܵܐ ܝܘܸܬ ܓܸܠܵܐ ܕܓܵܘ ܥܲܝܢܵܐ ܕܐܲܚܘܿܢܘܼܟܼ. ܐܝܼܢܵܐ ܩܵܪܝܼܬܵܐ ܕܓܵܘ ܥܲܝܢܘܼܟܼ ܠܹܐ ܝܠܵܗ̇ ܦܝܵܫܵܐ ܚܙܹܝܬܵܐ ܐܸܠܘܼܟܼ؟ ܝܲܢ ܕܲܐܟܼܝܼ ܒܡܵܨܸܬ ܠܹܐܡܵܪܵܐ ܠܐܲܚܘܿܢܘܼܟܼ: ܐܲܚܘܿܢܝܼ ܫܒܼܘܿܩ ܦܲܠܛܸܢ ܓܸܠܵܐ ܡ̣ܢ ܥܲܝܢܘܼܟܼ. ܕܗܵܐ ܩܵܪܝܼܬܵܐ ܕܒܥܲܝܢܘܼܟܼ ܠܹܐ ܝܠܵܗ̇ ܦܝܵܫܵܐ ܚܙܹܝܬܵܐ ܐܸܠܘܼܟܼ؟ ܢܵܣܸܒܼ ܒܐܲܦܹ̈ܐ. ܩܲܕ݇ܡܵܝܬܵܐ ܦܵܠܸܛ ܩܵܪܝܼܬܵܐ ܡ̣ܢ ܥܲܝܢܘܼܟܼ. ܘܗܿܝܓܵܗ ܒܸܬ ܦܲܝܫܵܐ ܚܙܹܝܬܵܐ ܐܸܠܘܼܟܼ ܠܦܵܠܘܼܛܹܐ ܓܸܠܵܐ ܡ̣ܢ ܥܲܝܢܵܐ ܕܐܲܚܘܿܢܘܼܟܼ. ܠܲܝܬ ܐܝܼܠܵܢܵܐ ܛܵܒܼܵܐ ܕܥܵܒܼܸܕ ܛܥܘܿܢܝܵܬܹ̈ܐ ܒܝܼܫܹ̈ܐ. ܐܘܿܦ ܠܵܐ ܐܝܼܠܵܢܵܐ ܒܝܼܫܵܐ ܕܥܵܒܼܸܕ ܛܥܘܿܢܝܵܬܹ̈ܐ ܛܵܒܼܹ̈ܐ. ܣܵܒܵܒ ܟܠ ܐܝܼܠܵܢܵܐ ܡ̣ܢ ܛܥܘܿܢܝܵܬܘܼ̈ܗܝ ܟܹܐ ܦܵܐܸܫ ܝܕܝܼܥܵܐ. ܣܵܒܵܒ ܠܹܐ ܠܵܩܛܝܼ ܡ̣ܢ ܟܝܼܬܒܼܹ̈ܐ ܬܹܐܢܹ̈ܐ. ܐܘܿܦ ܠܵܐ ܡ̣ܢ ܣܲܢܝܵܐ ܟܹܐ ܩܲܛܦܝܼ ܥܸܢܒܼܹ̈ܐ. ܓܲܒܼܪܵܐ ܛܵܒܼܵܐ ܡ̣ܢ ܚܸܙܝܼܢܹ̈ܐ ܛܵܒܼܹ̈ܐ ܕܓܵܘ ܠܸܒܹܗ ܟܹܐ ܦܵܠܸܛ ܛܵܒܼܵܬܹ̈ܐ. ܘܓܲܒܼܪܵܐ ܒܝܼܫܵܐ ܡ̣ܢ ܚܸܙܝܼܢܹ̈ܐ ܒܝܼܫܹܐ ܕܓܵܘ ܠܸܒܹܗ ܟܹܐ ܦܵܠܸܛ ܒܝܼ̈ܫܵܬܹܐ. ܣܵܒܵܒ ܡ̣ܢ ܙܵܘܕܘܼܢܝܘܼܬܵܐ ܕܠܸܒܵܐ ܟܹܐ ܗܲܡܙܸܡܝܼ ܣܸܦ̈ܘܵܬܹܐ. ܩܵܡܘܿܕܝܼ ܒܸܩܪܵܝܝܼ ܝܬܘܿܢ ܡܵܪܝܼ ܡܵܪܝܼ. ܘܡܸܢܕܝܼ ܕܒܹܐܡܵܪܹܐ ܝܘܸܢ ܐܸܠܵܘܟܼܘܿܢ ܠܹܐ ܝܬܘܿܢ ܒܸܥܒܼܵܕܵܐ؟.

♱♱♱♱♱♱♱♱♱♱♱♱♱

ܘܕܘܟܼܪܢܐ ܗَ̣ܘ ܕܬܪܥܣܪ ܫܠܝܚ̈ܐ.

ܚܕܒܫܒܐ ܕܬܼܠܬܼܐ ܕܩܝܛܐ

ܝܘܚܢܢ ܛ: 1 ‐ 39

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♰ ܘܟܲܕ ܦܠܸܛܠܹܗ ܝܑܼܫܘܿܥ ܡ̣ܢ ܗܲܝܟܠܵܐ، ܚܙܹܐܠܹܗ ܚܲܕ݇ ܓܲܒܼܪܵܐ ܣܸܡܝܵܐ ܕܡ̣ܢ ܟܲܪ݇ܣܵܐ ܕܝܸܡܹܗ: ܘܩܲܡ ܒܲܩܪܝܼܠܹܗ ܬܲܠܡܝܼܕܘܼ̈ܗܝ ܘܐܲܡܪܝܼ: ܪܲܒܲܢ ܡܵܢܝܼ ܚܛܹܐܠܹܗ: ܐܵܗܵܐ ܝܲܢ ܐܲܒܼܵܗܘܼ̈ܗܝ ܕܟܲܕ ܣܸܡܝܵܐ ܦܸܫܠܹܗ ܝܼܠܝܼܕܵܐ؟ ܐܵܡܸܪ ܐܸܠܲܝܗܝ ܝܑܼܫܘܿܥ: ܠܵܐ ܐܵܗܵܐ ܚܛܹܐܠܹܗ ܘܠܵܐ ܐܲܒܼܵܗܘܼ̈ܗܝ: ܐܸܠܵܐ ܕܦܲܝܫܝܼ ܚܸܙܝܹܐ ܒܝܼܹܗ ܦܘܼܠܚܵܢܹ̈ܐ ܕܐܲܠܵܗܵܐ: ܘܐܸܠܝܼ ܘܵܓ̰ܸܒ ܝܼܠܵܗ̇ ܠܸܥܒܼܵܕܵܐ ܥܒܼܵܕܹ̈ܐ ܕܡ̇ܢ ܫܘܼܕܪܸܢܹܗ ܗܵܠܵܐ ܕܐܝܼܡܵܡܵܐ ܝܠܹܗ: ܒܸܬ ܐܵܬܹܐ ܠܸܠܝܵܐ ܕܐ݇ܢܵܫܵܐ ܠܹܐ ܡܵܨܹܐ ܠܸܦܠܵܚܵܐ. ܟܡܵܐ ܕܓܵܘ ܥܵܠܡܵܐ ܝܘܸܢ، ܢܘܼܗܪܹܗ ܕܥܵܠܡܵܐ ܝܘܸܢ: ܘܟܲܕ ܐ݇ܡܸܪܹܗ ܐܲܢܹܐ: ܪܸܩܠܹܗ ܥܲܠ ܐܲܪܥܵܐ ܘܓܒܼܸܠܹܗ ܛܝܼܢܵܐ ܡ̣ܢ ܪܘܼܩܹܗ: ܘܠܛܸܫܠܹܗ ܥܲܠ ܥܲܝܢܹ̈ܐ ܕܗ̇ܘ ܣܸܡܝܵܐ: ܘܐ݇ܡܸܪܹܗ ܐܸܠܹܗ: ܙܹܠ݇ ܚܲܠܸܠ ܒܡܲܥܡܘܼܕܝܼܬܵܐ ܕܫܝܼܠܘܼܚܵܐ: ܐ݇ܙܸܠܹܗ ܚܘܼܠܸܠܹܗ ܘܐ݇ܬܹܐܠܹܗ ܟܲܕ ܒܸܚܙܵܝܵܐ: ܐܝܼܢܵܐ ܫܒܼܵܒܼܘܼ̈ܗܝ ܘܐܲܝܢܝܼ ܕܦܝܼܫܵܐ ܗ݇ܘܵܐ ܚܸܙܝܵܐ ܐܸܠܲܝܗܝ ܡ̣ܢ ܩܵܕ݇ܡܵܝܬܵܐ ܕܓܵܒܼܹܐ ܗ݇ܘܵܐ: ܐܲܡܪܝܼ ܗ݇ܘܵܘ: ܠܹܐ ܗ݇ܘܵܐ ܐܵܗܵܐ ܗ̇ܘ ܕܝܵܬܸܒܼ ܗ݇ܘܵܐ ܘܓܵܒܼܹܐ ܗ݇ܘܵܐ؟ ܐܝܼܬ ܕܐܲܡܪܝܼ ܗ݇ܘܵܘ: ܕܐܵܗܵܐ ܝܠܹܗ: ܘܐܝܼܬ ܕܐܲܡܪܝܼ ܗ݇ܘܵܘ: ܠܵܐ: ܐܸܠܵܐ ܕܡܵܝܵܐ ܒܸܕܡܵܝܵܐ ܝܠܹܗ ܐܸܠܹܗ: ܐܝܼܢܵܐ ܗ̇ܘ ܐܵܡܸܪ ܗ݇ܘܵܐ: ܕܐܵܢܵܐ ܝܘܸܢ: ܐܲܡܪܝܼ ܐܸܠܹܗ: ܕܲܐܟܼܝܼ ܦܸܫܠܗ݇ܘܿܢ ܦܬܝܼܚܹܐ ܥܲܝ̈ܢܘܼܟܼ؟ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܓܲܒܼܪܵܐ ܕܫܸܡܹܗ ܝܑܼܫܘܿܥ ܥܒܼܸܕܠܹܗ ܛܝܼܢܵܐ ܘܠܛܸܫܠܹܗ ܥܲܠ ܥܲܝ̈ܢܝܼ، ܘܐ݇ܡܸܪܹܗ ܐܸܠܝܼ: ܙܹܠ݇ ܚܲܠܸܠ ܒܡܝܼ̈ܵܐ ܕܫܝܼܠܘܼܚܵܐ: ܘܙܸܠܝܼ ܚܘܼܠܸܠܝܼ، ܘܚܙܹܐܠܝܼ. ܐܲܡܪܝܼ ܐܸܠܹܗ: ܐܲܝܟܵܐ ܝܠܹܗ؟ ܐܵܡܸܪ ܐܸܠܲܝܗܝ: ܠܹܐ ܝܘܸܢ ܒܝܼܕܵܥܵܐ. ܘܡܘܼܬ݇ܝܹܐ ܠܗ݇ܘܿܢ ܠܗ̇ܘ ܕܡ̣ܢ ܩܲܕ݇ܡܵܝܬܵܐ ܣܸܡܝܵܐ ܗ݇ܘܵܐ ܠܘܵܬ ܦܪ̈ܝܼܫܹܐ: ܐܝܼܢܵܐ ܫܲܒܬܵܐ ܗ݇ܘܵܐ ܟܲܕ ܥܒܼܸܕܠܹܗ ܛܝܼܢܵܐ ܝܑܼܫܘܿܥ ܘܦܬܝܼܚܠܹܗ ܐܸܠܹܗ ܥܲܝܢܘܼ̈ܗܝ: ܘܡܸܢ݇ܕܪܹܫ݇ ܒܘܼܩܸܪܗ݇ܘܿܢ ܡܸܢܹܗ ܦܪ̈ܝܼܫܹܐ: ܕܲܐܟܼܝܼ ܚܙܹܐܠܘܼܟܼ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܛܝܼܢܵܐ ܡܘܼܬܸܒܼܠܹܗ ܥܲܠ ܥܲܝ̈ܢܝܼ، ܘܚܘܼܠܸܠܝܼ ܘܚܙܹܐܠܝܼ. ܘܐܲܡܪܝܼ ܗ݇ܘܵܘ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ: ܐܵܗܵܐ ܓܲܒܼܪܵܐ ܠܹܐ ܝܠܹܗ ܡ̣ܢ ܐܲܠܵܗܵܐ ܕܫܲܒܬܵܐ ܠܹܐ ܝܠܹܗ ܒܸܢܛܵܪܵܐ: ܐܝܼܢܵܐ ܐ݇ܚܹܪ̈݇ܢܹܐ ܐܲܡܪܝܼ ܗ݇ܘܵܘ: ܕܲܐܟܼܝܼ ܒܡܵܨܹܐ ܓܲܒܼܪܵܐ ܚܲܛܵܝܵܐ ܐܲܢܹܐ ܢܝܼܫܲܢܩܹ̈ܐ ܠܸܥܒܼܵܕܵܐ؟ ܘܦܘܼܠܵܓܼܵܐ ܐܝܼܬ ܗ݇ܘܵܐ ܒܲܝܢܵܬܲܝܗܝ: ܐܲܡܪܝܼ ܡܸܢ݇ܕܪܹܫ݇ ܠܗ̇ܘ ܣܸܡܝܵܐ: ܐܲܢ݇ܬ ܡܘܿܕܝܼ ܒܹܐܡܵܪܵܐ ܝܘܸܬ ܥܲܠܘܼܗܝ ܕܦܬܸܚܠܹܗ ܐܸܠܘܼܟܼ ܥܲܝ̈ܢܘܼܟܼ؟ ܐܵܡܸܪ ܐܸܠܲܝܗܝ: ܐܵܢܵܐ ܒܹܐܡܵܪܵܐ ܝܘܸܢ ܕܢܒܼܝܼܵܐ ܝܠܹܗ: ܐܝܼܢܵܐ ܠܵܐ ܗܲܡܸܢܝܼ ܗ݇ܘܵܘ ܥܲܠܘܼܗܝ ܝܗ݇ܘܼܕܵܝܹ̈ܐ ܕܣܸܡܝܵܐ ܗ݇ܘܵܘ ܘܚܙܹܐܠܹܗ: ܗܲܠ ܕܩܪܹܐ ܠܗ݇ܘܿܢ ܠܐܲܒܼܵܗܹ̈ܐ ܕܗ̇ܘ ܕܚܙܹܐ ܠܹܗ: ܘܒܘܼܩܸܪܗ݇ܘܿܢ ܡܸܢܲܝܗܝ: ܐܸܢ ܐܵܗܵܐ ܝܠܹܗ ܒܪܘܿܢܵܘܟܼܘܿܢ، ܗ̇ܘ ܕܐܲܚܬܘܿܢ ܒܹܐܡܵܪܵܐ ܝܬܘܿܢ ܕܣܸܡܝܵܐ ܦܸܫܠܹܗ ܝܠܝܼܕܵܐ: ܕܲܐܟܼܝܼ ܐܵܕܝܼܵܐ ܒܸܚܙܵܝܵܐ ܝܠܹܗ؟ ܐܝܼܢܵܐ ܐܲܒܼܵܗܘܼ̈ܗܝ ܓ̰ܘܼܘܸܒܠܗ݇ܘܿܢ ܘܐ݇ܡܸܪܗ݇ܘܿܢ: ܒܝܼܕܵܥܵܐ ܝܘܲܚ ܕܐܵܗܵܐ ܝܠܹܗ ܒܪܘܿܢܲܢ، ܘܕܟܲܕ ܣܸܡܝܵܐ ܦܸܫܠܹܗ ܝܼܠܝܼܕܵܐ: ܐܝܼܢܵܐ ܕܲܐܟܼܝܼ ܐܵܕܝܼܵܐ ܒܸܚܙܵܝܵܐ ܝܠܹܗ ܝܲܢ ܡܵܢܝܼ ܦܬܝܼܚܠܹܗ ܐܸܠܹܗ ܥܲܝ̈ܢܘܼܗܝ: ܠܹܐ ܝܘܲܚ ܒܝܼܕܵܥܵܐ: ܐܘܿܦ ܗ̇ܘ ܥܒܼܝܼܪܵܐ ܝܠܹܗ ܒܫܸܢܹ̈ܐ، ܡܸܢܹܗ ܒܲܩܪܘܿܢ: ܗ̇ܘ ܡܒܵܕܵܠ ܕܓܵܢܹܗ ܒܗܲܡܙܸܡ: ܐܲܢܹܐ ܐ݇ܡܸܪܗ݇ܘܿܢ ܐܲܒܼܵܗܘܼ̈ܗܝ ܣܵܒܵܒ ܒܸܙܕܵܥܵܐ ܗ݇ܘܵܘ ܡ̣ܢ ܝܗ݇ܘܼܕܵܝܹ̈ܐ. ܣܵܒܵܒ ܩܸܛܥܝܹܐ ܗ݇ܘܵܘ ܝܗ݇ܘܼܕܵܝܹ̈ܐ ܕܐܸܢ ܐ݇ܢܵܫܵܐ ܡܵܘܕܹܐ ܒܝܼܹܗ ܕܡܫܝܼܚܵܐ ܝܠܹܗ ܒܸܬ ܦܲܠܛܝܼܠܹܗ ܡ̣ܢ ܟܢܘܼܫܬܵܐ: ܒܘܬ ܕܐܵܗܵܐ ܐܲܒܼܵܗ̈ܘܼܗܝ ܐ݇ܡܸܪܗ݇ܘܿܢ ܥܒܼܝܼܪܵܐ ܝܠܹܗ ܒܫܸܢܹ̈ܐ: ܒܲܩܪܘܿܢ ܡܸܢܹܗ: ܘܩܪܹܐܠܗ݇ܘܿܢ ܓܵܗܵܐ ܕܬܸܪܬܹܝ ܠܗ̇ܘ ܓܲܒܼܪܵܐ ܕܝܼܗَܘܵܐ ܣܸܡܝܵܐ ܘܐܲܡܪܝܼ ܐܸܠܹܗ: ܫܵܒܸܚ ܠܐܲܠܵܗܵܐ: ܣܵܒܵܒ ܐܲܚܢܲܢ ܒܝܼܕܵܥܵܐ ܝܘܸܚ ܕܐܵܗܵܐ ܓܲܒܼܪܵܐ ܚܲܛܵܝܵܐ ܝܠܹܗ: ܗ̇ܘ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܐܸܢ ܚܲܛܵܝܵܐ ܝܠܹܗ، ܠܹܐ ܝܲܕܥܸܢ: ܐܝܼܢܵܐ ܚܲܕ݇ ܡܸܢܕܝܼ ܝܲܕܥܸܢ: ܕܣܸܡܝܵܐ ܝܘܸܢ ܗ݇ܘܵܐ ܘܐܵܕܝܼܵܐ ܒܸܚܙܵܝܵܐ ܝܘܸܢ: ܡܸܢ݇ܕܪܹܫ݇ ܐܲܡܪܝܼ ܐܸܠܹܗ: ܡܘܿܕܝܼ ܥܒܸܕܠܹܗ ܐܸܠܘܼܟܼ، ܕܲܐܟܼܝܼ ܦܬܝܼܚܝܼܠܹܗ ܐܸܠܘܼܟܼ ܥܲܝ̈ܢܘܼܟܼ؟ ܐܵܡܸܪ ܐܸܠܲܝܗܝ: ܐ݇ܡܸܪܝܼ ܐܸܠܵܘܟܼܘܿܢ ܘܠܵܐ ܫܡܸܥܠܵܘܟܼܘܿܢ، ܩܵܡܘܿܕܝܼ ܡܸܢ݇ܕܪܹܫ݇ ܒܥܵܝܵܐ ܝܬܘܿܢ ܠܸܫܡܵܥܵܐ، ܩܵܡܘܿ ܐܘܿܦ ܐܲܚܬܘܿܢ ܒܥܵܝܵܐ ܝܬܘܿܢ ܠܸܗ݇ܘܵܝܵܐ ܬܲܠܡܝܼܕܹ̈ܐ ܐܸܠܹܗ؟ ܐܝܼܢܵܐ ܐܵܢܝܼ ܨܘܼܥܸܪܗ݇ܘܿܢ ܐܸܠܹܗ ܘܐܲܡܪܝܼ ܐܸܠܹܗ: ܐܲܢ݇ܬ ܝܼܘܸܬ ܬܲܠܡܝܼܕܹܗ ܕܗܿܘ: ܐܲܚܢܲܢ ܬܲܠܡܝܼܕܹ̈ܐ ܕܡܘܼܫܹܐ ܝܘܲܚ: ܘܒܝܼܕܵܥܵܐ ܝܘܲܚ ܕܥܲܡ ܡܘܼܫܹܐ ܐܲܠܵܗܵܐ ܗܘܼܡܙܸܡܠܹܗ. ܐܝܼܢܵܐ ܠܐܵܗܵܐ ܠܹܐ ܝܘܲܚ ܒܝܼܕܵܥܵܐ ܡ̣ܢ ܐܲܝܟܵܐ ܝܠܹܗ: ܓ̰ܘܼܘܸܒܠܹܗ ܗ̇ܘ ܓܲܒܼܪܵܐ ܘܐ݇ܡܸܪܹܗ ܐܸܠܲܝܗܝ: ܒܲܣ ܒܐܵܗܵܐ ܝܠܵܗ̇ ܠܥܵܓ̰ܘܼܒܹܐ: ܕܐܲܚܬܘܿܢ ܠܹܐ ܝܬܘܿܢ ܒܝܼܕܵܥܵܐ ܡ̣ܢ ܐܲܝܟܵܐ ܝܠܹܗ: ܘܥܲܝܢܹ̈ܐ ܕܕܝܼܠ݇ܝܼ ܦܬܝܼܚܝܼܠܹܗ: ܐܝܼܢܵܐ ܒܝܼܕܵܥܵܐ ܝܘܲܚ ܕܐܲܠܵܗܵܐ ܒܩܵܠܵܐ ܕܚܲܛܵܝܹ̈ܐ ܠܹܐ ܫܵܡܸܥ: ܐܸܠܵܐ ܠܡ̇ܢ ܕܙܵܕܸܥ ܡܸܢܹܗ ܘܥܵܒܼܸܕ ܨܸܒܼܝܵܢܹܗ: ܠܗ̇ܘ ܟܹܐ ܫܵܡܸܥ: ܡ̣ܢ ܥܵܠܲܡ ܠܵܐ ܦܝܼܫܠܵܗ̇ ܫܡܸܥܬܵܐ ܕܚܲܕ݇ ܐ݇ܢܵܫܵܐ ܦܬܸܚܠܹܗ ܥܲܝ̈ܢܹܐ ܕܚܲܕ݇ ܕܣܸܡܝܵܐ ܦܸܫܠܹܗ ܝܠܝܼܕܵܐ: ܐܸܢ ܐܵܗܵܐ ܠܵܐ ܗܵܘܹܐ ܗ݇ܘܵܐ ܡ̣ܢ ܐܲܠܵܗܵܐ: ܠܹܐ ܡܵܨܹܐ ܗ݇ܘܵܐ ܐܵܗܵܐ ܠܸܥܒܼܵܕܵܐ: ܓ̰ܘܼܘܸܒܠܗ݇ܘܿܢ ܘܐܲܡܪܝܼ ܐܸܠܹܗ: ܐܲܢ݇ܬ ܟܠܘܼܟܼ ܒܚܛܝܼܬܵܐ ܦܸܫܠܘܼܟܼ ܝܼܠܝܼܕܵܐ: ܘܐܲܢ݇ܬ ܡܵܠܘܼܦܹܐ ܝܘܸܬ ܐܸܠܲܢ؟ ܘܦܘܼܠܸܛܠܗ݇ܘܿܢ ܐܸܠܹܗ ܠܒܼܲܕܵܪ: ܘܫܡܸܥܠܹܗ ܝܑܼܫܘܿܥ ܕܦܘܼܠܸܛܠܗ݇ܘܿܢ ܐܸܠܹܗ ܠܒܼܲܕܵܪ: ܘܡܘܼܫ݇ܟ̰ܸܚܠܹܗ ܘܐ݇ܡܸܪܹܗ ܐܸܠܹܗ: ܐܲܢ݇ܬ ܗܲܡܘܼܢܹܐ ܝܘܸܬ ܒܒܪܘܿܢܹܗ ܕܐܲܠܵܗܵܐ؟ ܓ̰ܘܼܘܸܒܠܹܗ ܗ̇ܘ ܕܦܸܫܠܹܗ ܒܣܝܼܡܵܐ ܘܐ݇ܡܸܪܹܗ: ܡܵܢܝܼ ܝܼܠܹܗ ܡܵܪܝܼ ܕܗܲܡܸܢܸܢ ܒܝܼܹܗ؟ ܐܵܡܸܪ ܐܸܠܹܗ ܝܑܼܫܘܿܥ: ܚܸܙܝܘܼܗܝ ܝܘܸܬ، ܘܗ̇ܘ ܝܼܠܹܗ ܕܗܲܡܙܘܼܡܹܐ ܝܼܠܹܗ ܥܲܡܘܼܟܼ. ܐܝܼܢܵܐ ܗ̇ܘ ܐ݇ܡܸܪܹܗ: ܡܗܲܝܡܘܼܢܹܐ ܝܘܸܢ ܡܵܪܝܼ. ܘܢܦܸܠܹܗ ܣܓܼܸܕܠܹܗ ܐܸܠܹܗ.

♱♱♱♱♱♱♱♱♱♱♱♱♱

ܚܕܒܫܒܐ ܕܐܪܒܥܐ ܕܩܝܛܐ

ܡܪܩܘܣ ܙ: 1‐ 24.

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܪܩܘܣ.

♰ ܒܵܬ݇ܪ ܐܲܢܹܐ ܓ̰ܡܸܥܠܗ݇ܘܿܢ ܠܘܵܬ ܝܑܼܫܘܿܥ ܦܪ̈ܝܼܫܹܐ ܘܣܵܦܪܹ̈ܐ ܕܐ݇ܬܹܐ ܠܗ݇ܘܿܢ ܡ̣ܢ ܐܘܿܪܸܫܠܸܡ. ܘܚܙܹܐܠܗ݇ܘܿܢ ܐ݇ܢܵܫܹ̈ܐ ܡ̣ܢ ܬܲܠܡܝܼܕܘܼ̈ܗܝ ܕܒܹܐܟܼܵܠܵܐ ܠܲܚܡܵܐ ܟܲܕ ܠܵܐ ܚܲܠܘܼܠܹܐ ܐܝܼܕܵܬܲܝܗܝ ܘܩܒܼܸܠܗ݇ܘܿܢ: ܣܵܒܵܒ ܟܠܲܝܗܝ ܝܗ݇ܘܼܕܵܝܹ̈ܐ ܘܦܪ̈ܝܼܫܹܐ ܕܐܸܢ ܒܛܝܼܠܵܐܝܼܬ ܠܵܐ ܚܲܠܸܠܝܼ ܗ݇ܘܵܘ ܐܝܼܕܵܬܲܝ̈ܗܝ ܠܹܐ ܐܲܟܼܠܝܼ ܗ݇ܘܵܘ: ܣܵܒܵܒ ܕܕܒܼܝܼܩܹܐ ܝܢܵܐ ܣܲܦܝܵܢܘܼܬܵܐ ܕܩܲܫܝܼܫܹ̈ܐ. ܘܡ̣ܢ ܫܘܼܩܵܐ ܐܸܢ ܠܵܐ ܚܲܠܸܠܝܼ ܠܹܐ ܐܲܟܼܠܝܼ. ܘܪܵܒܵܐ ܐ݇ܚܹܪ̈݇ܢܹܐ ܐܝܼܬ ܐܲܝܢܝܼ ܕܩܘܼܒܸܠܗ݇ܘܿܢ ܕܢܲܛܪܝܼ. ܚܲܠܲܠܬܵܐ ܕܟܵܣܹ̈ܐ ܘܕܬܲܠܸܡܝܵܬܹ̈ܐ ܘܕܡܵܢܹ̈ܐ ܕܢܚܵܫܵܐ ܘܲܕܨܘܼܦܪܹ̈ܐ. ܘܩܲܡ ܒܲܩܪܝܼܠܹܗ ܣܵܦܪܹ̈ܐ ܘܦܪ̈ܝܼܫܹܐ: ܩܵܡܘܿܕܝܼ ܬܲܠܡܝܼܕܘܼܟܼ ܠܹܐ ܝܢܵܐ ܒܸܚܕܵܪܵܐ ܐܲܝܟܼ ܣܲܦܝܵܢܘܼܬܵܐ ܕܩܲܫܝܼܫܹ̈ܐ: ܐܸܠܵܐ ܟܲܕ ܠܵܐ ܚܘܼܠܸܠܹܐ ܐܝܼܕܵܬܲܝ̈ܗܝ ܒܹܐܟܼܵܠܵܐ ܝܢܵܐ ܠܲܚܡܵܐ؟ ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܲܝܗܝ: ܨܦܵܝ ܢܘܼܒܹܐܠܹܗ ܥܲܠܵܘܟܼܘܿܢ ܐܹܫܲܥܝܵܐ ܢܒܼܝܼܵܐ ܝܵܐ ܡܲܫܦܸܪ̈ܵܢܹܐ: ܐܲܝܟܼ ܕܟܬܝܼܒܼܵܐ ܝܠܹܗ: ܕܐܵܗܵܐ ܥܲܡܵܐ ܒܣܸܦܘܵܬܹ̈ܐ ܡܝܵܩܘܼܪܝܼ ܝܠܹܗ. ܐܝܼܢܵܐ ܠܸܒܲܝܗܝ ܪܵܒܵܐ ܪܸܚܩܵܐ ܝܠܹܗ ܡܸܢܝܼ. ܘܗܵܒܵܣ ܒܸܣܓܼܵܕܵܐ ܝܢܵܐ ܐܸܠܝܼ. ܟܲܕ ܡܵܠܘܼܦܹܐ ܝܢܵܐ ܝܘܼܠܦܵܢܹ̈ܐ ܕܦܘܼܩܕܵܢܹ̈ܐ ܕܒܢܲܝ̈ܢܵܫܵܐ: ܣܵܒܵܒ ܫܒܼܸܩܠܵܘܟܼܘܿܢ ܦܘܼܩܕܵܢܵܐ ܕܐܲܠܵܗܵܐ. ܘܕܒܼܝܼܩܹܐ ܝܬܘܿܢ ܣܲܦܝܵܢܘܼܬܵܐ ܕܒܢܲܝ̈ܢܵܫܵܐ. ܚܲܠܲܠܬܵܐ ܕܟܵܣܹ̈ܐ ܘܕܩܸܣܛܹ̈ܐ ܘܪܵܒܵܐ ܕܠܐܲܢܹܐ ܟܹܐ ܕܵܡܝܼ. ܐ݇ܡܸܪܹܗ ܐܸܠܲܝܗܝ: ܨܦܵܐܝܝܼ ܒܸܙܠܵܡܵܐ ܝܬܘܿܢ ܦܘܼܩܕܵܢܵܐ ܕܐܲܠܵܗܵܐ ܕܡܲܩܸܡܝܼܬܘܿܢ ܣܲܦܝܵܢܘܼܬܵܘܟܼܘܿܢ. ܣܵܒܵܒ ܡܘܼܫܹܐ ܐ݇ܡܸܪܹܗ: ܝܵܩܸܪ ܠܒܵܒܘܼܟܼ ܘܠܝܸܡܘܼܟܼ ܘܡ̇ܢ ܕܡܨܵܥܸܪ ܠܒܵܒܵܐ ܝܲܢ ܠܝܸܡܵܐ: ܡܵܘܬܵܐ ܡܵܐܸܬ: ܐܝܼܢܵܐ ܐܲܚܬܘܿܢ ܒܹܐܡܵܪܵܐ ܝܬܘܿܢ: ܐܸܢ ܐܵܡܸܪ ܓܲܒܼܪܵܐ ܠܒܵܒܹܗ ܝܲܢ ܠܝܸܡܹܗ: ܩܘܼܪܒܵܢܝܼ ܡܸܢܕܝܼ ܕܡܸܢܝܼ ܙܵܝܸܕܸܬ: ܘܠܹܐ ܝܬܘܿܢ ܒܸܫܒܼܵܩܹܗ ܕܥܵܒܼܸܕ ܡܸܢܕܝܼ ܩܵܐ ܒܵܒܹܗ ܝܲܢ ܩܵܐ ܝܸܡܹܗ: ܡܲܣܠܘܼܝܹܐ ܝܬܘܿܢ ܗܹܡܸܙܡܵܢ ܕܐܲܠܵܗܵܐ ܒܘܼܬ ܣܲܦܝܵܢܘܼܬܵܘܟܼܘܿܢ ܕܣܘܼܦܹܐ ܠܵܘܟܼܘܿܢ. ܘܪܵܒܵܐ ܕܟܹܐ ܕܵܡܝܼ ܠܐܲܢܹܐ ܒܸܥܒܼܵܕܵܐ ܝܬܘܿܢ: ܘܩܪܹܐܠܹܗ ܝܑܼܫܘܿܥ ܠܟܸܢܫܵܐ ܟܠܹܗ. ܘܐ݇ܡܸܪܹܗ ܐܸܠܲܝܗܝ: ܫܡܸܥܡܘܿܢ ܐܸܠܝܼ ܟܠܵܘܟܼܘܿܢ ܘܦܲܪܡܹܝܡܘܿܢ: ܠܲܝܬ ܡܸܢܕܝܼ ܕܠܒܼܲܕܲܪ ܡ̣ܢ ܒܲܪܢܵܫܵܐ ܝܠܹܗ ܘܥܵܒܼܸܪ ܓܵܘܹܗ، ܕܡܵܨܹܐ ܟ̰ܲܦܠܸܢܹܗ: ܐܸܠܵܐ ܡܸܢܕܝܼ ܕܦܵܠܸܛ ܡܸܢܹܗ ܗ̇ܘ ܟܹܐ ܟ̰ܲܦܠܸܢܹܗ ܠܒܲܪܢܵܫܵܐ: ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ: ܐܝܼܢܵܐ ܟܲܕ ܥܒܼܸܪܹܗ ܝܑܼܫܘܿܥ ܠܒܲܝܬܵܐ ܡ̣ܢ ܟܸܢܫܵܐ: ܒܘܼܩܸܪܗ݇ܘܿܢ ܡܸܢܹܗ ܬܲܠܡܝܼܕܘܼ̈ܗܝ ܥܲܠ ܗ̇ܘ ܡܲܬܠܵܐ ܐܵܡܸܪ ܐܸܠܲܝܗܝ: ܗܲܕܟܼܵܐ ܐܘܿܦ ܐܲܚܬܘܿܢ ܥܲܣܩܵܐ ܝܠܵܗ ܐܸܠܵܘܟܼܘܿܢ ܠܦܲܪܡܘܼܝܹܐ؟ ܠܹܐ ܝܲܕܥܝܼܬܘܿܢ ܕܟܠ ܡܸܢܕܝܼ ܕܡ̣ܢ ܠܒܼܲܕܲܪ ܥܵܒܼܸܪ ܓܵܘ ܒܲܪܢܵܫܵܐ ܠܹܐ ܡܵܨܹܐ ܟ̰ܲܦܠܸܢܹܗ: ܕܠܹܐ ܝܠܹܗ ܠܠܸܒܹܗ ܒܸܥܒܼܵܪܵܐ: ܐܸܠܵܐ ܠܟܲܪ݇ܣܹܗ. ܘܟܹܐ ܦܵܐܸܫ ܪܘܼܦܝܵܐ ܒܬܲܕܟܼܝܼܬܵܐ ܕܟܹܐ ܡܕܲܟܼܝܵܐ ܟܠܵܗ̇ ܡܹܐܟܼܘܠܬܵܐ: ܐܝܼܢܵܐ ܡܸܢܕܝܼ ܕܦܵܠܸܛ ܡ̣ܢ ܒܲܪܢܵܫܵܐ ܗ̇ܘ ܝܼܠܹܗ ܕܟ̰ܲܦܠܸܢ ܠܒܲܪܢܵܫܵܐ: ܣܵܒܵܒ ܡ̣ܢ ܠܓܵܘܵܝܹܐ ܡ̣ܢ ܠܸܒܵܐ ܕܒܢܲܝ̈ܢܵܫܵܐ ܟܹܐ ܦܲܠܛܝܼ ܚܘܼܫܵܒܼܹ̈ܐ ܒܝܼܫܹ̈ܐ: ܓܲܝܵܪܘܼܬܵܐ. ܙܲܢܝܘܼܬܵܐ. ܓܹܢܵܒܼܘܼܬܵܐ. ܩܸܛܠܵܐ. ܛܲܡܲܥܟܵܪܘܼܬܵܐ ܒܝܼܫܘܼܬܵܐ ܥܲܠܕܵܝܬܵܐ ܨܵܥܲܪܬܵܐ. ܥܲܝܢܵܐ ܒܝܼܫܬܵܐ. ܓܘܼܕܵܦܵܐ. ܫܲܒܼܗܪܵܢܘܼܬܵܐ. ܫܵܛܝܘܼܬܵܐ ܟܠܲܝܗܝ ܐܲܢܹܐ ܒܝܼܫܵܬܹ̈ܐ ܡ̣ܢ ܠܓܵܘܵܝܹܐ ܟܹܐ ܦܲܠܛܝܼ ܘܟܹܐ ܡܟ̰ܲܦܠܸܢܝܼ ܠܒܲܪܢܵܫܵܐ. ܡ̇ܢ ܕܐܝܼܬܠܹܗ ܢܲܬܝܵܬܹ̈ܐ ܕܫܵܡܸܥ ܫܵܡܸܥ.

♱♱♱♱♱♱♱♱♱♱♱♱♱

ܥܐܕܐ ܕܓܠܝܢܗ ܕܡܪܢ

ܕܥܠ ܛܘܪ ܬܒܼܘܪ.

ܡܬܝ ܝܘ: 24 ‐ ܝܙ: 10.

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♰ ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘܼܗܝ: ܡ̇ܢ ܕܒܲܣܡܵܐ ܠܹܗ ܕܐܵܬܹܐ ܒܵܬ݇ܪܝܼ ܟܵܦܸܪ ܒܓܵܢܹܗ ܘܫܵܩܸܠ ܙܩܝܼܦܹܗ ܘܐܵܬܹܐ ܒܵܬ݇ܪܝܼ : ܣܵܒܵܒ ܡ̇ܢ ܕܒܲܣܡܵܐ ܠܹܗ ܕܡܲܚܹܐ ܓܵܢܹܗ ܒܸܬ ܛܵܠܸܩܠܵܗ̇: ܘܡ̇ܢ ܕܛܵܠܸܩ ܓܵܢܹܗ ܒܣܵܒܵܒ ܕܝܼܠ݇ܝܼ ܒܸܬ ܡܵܫ݇ܟ̰ܸܚܠܵܗ̇: ܣܵܒܵܒ ܡܘܼܕܝܼ ܒܸܬ ܩܵܢܹܐ ܒܲܪܢܵܫܵܐ ܐܸܢ ܟܠܹܗ ܥܵܠܡܵܐ ܩܵܢܹܐ ܠܹܗ ܘܓܵܢܹܗ ܚܵܣܸܪ؟ ܝܲܢ ܡܘܿܕܝܼ ܒܸܬ ܝܲܗ݇ܒܼܸܠ ܒܲܪܢܵܫܵܐ ܡܒܵܕܵܠ ܕܓܵܢܹܗ؟ ܣܵܒܵܒ ܗܕܝܼܪܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ ܕܐܵܬܹܐ ܒܬܸܫܒܘܿܚܬܵܐ ܕܒܵܒܘܼܗܝ ܥܲܡ ܡܲܠܲܐܟܼܘܼ̈ܗܝ ܩܲܕܝܼܫܹ̈ܐ. ܘܗܿܝܓܵܗ̇ ܒܸܬ ܦܵܪܸܥ ܠܐ݇ܢܵܫܵܐ ܐ݇ܢܵܫܵܐ ܐܲܝܟܼ ܦܸܠܚܵܢܘܼܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟܼܘܿܢ. ܕܐܝܼܬ ܐ݇ܢܵܫܹ̈ܐ ܕܟܸܠܝܹܐ ܝܢܵܐ ܠܲܐܟܼܵܐ ܕܠܹܐ ܛܵܥܡܝܼ ܡܵܘܬܵܐ ܗܲܠ ܕܚܵܙܝܼ ܠܒܪܘܿܢܹܗ ܕܐ݇ܢܵܫܵܐ ܕܒܹܐܬܵܝܵܐ ܒܡܲܠܟܘܼܬܹܗ. ܘܡ̣ܢ ܒܵܬ݇ܪ ܫܬܵܐ ܝܵܘܡܵܢܹ̈ܐ ܠܘܼܒܸܠܹܗ ܝܑܼܫܘܿܥ ܠܟܹܐܦܵܐ ܘܠܝܲܥܩܘܿܒܼ ܘܠܝܘܿܚܲܢܵܢ ܐܲܚܘܿܢܹܗ: ܘܡܘܼܣܩܝܼܠܹܗ ܠܛܘܼܪܵܐ ܪܵܡܵܐ ܒܢܲܦ̮ܫܲܝܗܝ: ܘܦܸܫܠܹܗ ܫܘܼܚܠܸܦܵܐ ܝܑܼܫܘܿܥ ܩܵܕ݇ܡܵܝܗܝ: ܘܒܘܼܗܪܸܢܹܗ ܦܲܪܨܘܿܦܹܗ ܐܲܝܟܼ ܫܸܡܫܵܐ: ܐܝܼܢܵܐ ܓ̰ܘܼܠܘܼ̈ܗܝ ܚܘܸܪܗ݇ܘܿܢ ܐܲܝܟܼ ܢܘܼܗܪܵܐ: ܘܦܸܫܠܗ݇ܘܿܢ ܚܸܙܝܹܐ ܐܸܠܲܝܗܝ ܡܘܼܫܹܐ ܘܐܹܠܝܼܵܐ ܟܲܕ ܡܗܲܡܙܘܼܡܹܐ ܥܲܡܹܗ: ܐܝܼܢܵܐ ܓ̰ܘܼܘܸܒܠܹܗ ܟܹܐܦܵܐ ܘܐ݇ܡܸܪܹܗ ܠܝܼܫܘܿܥ: ܡܵܪܝܼ: ܨܦܵܝܝܼ ܝܠܵܗ̇ ܐܸܠܲܢ ܕܠܲܐܟܼܵܐ ܗܵܘܵܚ: ܘܐܸܢ ܐܲܢ݇ܬ ܒܵܥܸܬ ܒܸܬ ܥܲܒܼܕܵܚ ܠܲܐܟܼܵܐ ܬܠܵܬ ܡܛܲܠܠܹ̈ܐ: ܚܕܵܐ ܐܸܠܘܼܟܼ ܘܚܕܵܐ ܠܡܘܼܫܹܐ ܘܚܕܵܐ ܠܐܹܠܝܼܵܐ: ܘܗܵܠܵܐ ܗ̇ܘ ܡܗܲܡܙܘܼܡܹܐ: ܗܵܐ ܥܢܵܢܵܐ ܢܲܗܝܼܪܬܵܐ ܥܒܼܝܼܕܠܵܗ̇ ܛܸܠܵܢܝܼܬܵܐ ܥܲܠܲܝܗܝ: ܘܩܵܠܵܐ ܗ݇ܘܹܐ ܠܹܗ ܡ̣ܢ ܥܢܵܢܵܐ ܕܒܹܐܡܵܪܵܐ: ܐܵܗܵܐ ܝܼܠܹܗ ܒܪܘܿܢܝܼ ܚܲܒܝܼܒܼܵܐ ܕܒܝܼܹܗ ܒܣܸܡܠܵܐ ܠܝܼ، ܐܸܠܹܗ ܫܡܸܥܡܘܿܢ: ܘܟܲܕ ܫܡܸܥܠܗ݇ܘܿܢ ܬܲܠܡܝܼܕܹ̈ܐ ܢܦܸܠܗ݇ܘܿܢ ܥܲܠ ܦܲܐܬܘܵܬܲܝ̈ܗܝ. ܘܙܕܸܥܠܗ݇ܘܿܢ ܪܵܒܵܐ: ܘܩܘܼܪܒܸܢܹܗ ܠܘܵܬܲܝܗܝ ܝܑܼܫܘܿܥ ܘܕܩܸܪܹܗ ܒܝܼܵܝܗܝ ܘܐ݇ܡܸܪܹܗ: ܩܘܼܡܘܿܢ ܠܵܐ ܙܲܕܥܝܼܬܘܿܢ: ܘܡܘܼܪܸܡܠܗ݇ܘܿܢ ܥܲܝܢܲܝ̈ܗܝ. ܘܠܐ݇ܢܵܫܵܐ ܠܵܐ ܚܙܹܐ ܠܗ݇ܘܿܢ ܐܸܠܵܐ ܐܸܢ ܠܝܼܫܘܿܥ ܠܚܘܼܕܹܗ: ܘܟܲܕ ܒܸܨܠܵܝܵܐ ܡ̣ܢ ܛܘܼܪܵܐ ܦܩܝܼܕܵܝܠܹܗ ܝܑܼܫܘܿܥ ܘܐ݇ܡܸܪܹܗ ܐܸܠܲܝܗܝ: ܩܵܐ ܗܝܼܟ̰ ܐ݇ܢܵܫܵܐ ܠܵܐ ܐܲܡܪܝܼܬܘܿܢ ܐܵܗܵܐ ܚܸܙܘܵܐ. ܗܲܠ ܕܩܵܐܸܡ ܒܪܘܿܢܹܗ ܕܐ݇ܢܵܫܵܐ ܡ̣ܢ ܡܝܼܬܹ̈ܐ.

♱♱♱♱♱♱♱♱♱♱♱♱♱

ܚܕܒܫܒܐ ܕܚܡܫܐ ܕܩܝܛܐ

ܠܘܩܐ ܝܘ: 19 ‐ ܝܙ: 11.

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܠܘܩܐ.

♰ ܐ݇ܡܸܪܹܗ ܝܑܼܫܘܿܥ ܠܟܸܢܫܵܐ ܕܝܗ݇ܘܼܕܵܝܹ̈ܐ ܐܵܗܵܐ ܡܲܬܠܵܐ: ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܥܲܬܝܼܪܵܐ: ܘܟܹܐ ܠܵܒܼܸܫ ܗ݇ܘܵܐ ܟܸܬܵܢ ܘܐܲܪܓܘܵܢܵܐ. ܘܟܠܝܘܿܡ ܟܹܐ ܥܵܒܼܸܕ ܗ݇ܘܵܐ ܒܘܼܣܵܡܵܐ ܓܲܐܝܵܐܝܼܬ. ܘܐܝܼܬ ܗ݇ܘܵܐ ܚܲܕ݇ ܡܸܣܟܹܢܵܐ ܕܫܸܡܹܗ ܠܲܥܵܙܲܪ. ܕܸܪܝܵܐ ܗ݇ܘܵܐ ܠܘܵܬ ܬܲܪܥܹܗ ܕܗ̇ܘ ܥܲܬܝܼܪܵܐ: ܟܲܕ ܡܸܚܝܵܐ ܒܕܲܪ̈ܒܵܬܹܐ. ܘܫܲܗܒܼܸܬ ܗ݇ܘܵܐ ܕܡܵܐܠܹܗ ܟܲܪ݇ܣܹܗ ܡ̣ܢ ܦܲܪ̈ܬܘܼܚܹܐ ܕܢܲܦܠܝܼ ܗ݇ܘܵܘ ܡ̣ܢ ܦܵܬܘܿܪܹ̈ܐ ܕܗ̇ܘ ܥܲܬܝܼܪܵܐ: ܐܸܠܵܐ ܐܘܿܦ ܟܲܠܒܹ̈ܐ ܐܵܬܝܼ ܗ݇ܘܵܘ ܘܠܲܟܚܝܼ ܗ݇ܘܵܘ ܒܪ̈ܝܼܢܵܬܘܼܗܝ. ܐܝܼܢܵܐ ܗ݇ܘܹܐܠܵܗ̇ ܘܡܝܼܬܠܹܗ ܗ̇ܘ ܡܸܣܟܹܢܵܐ. ܘܩܲܡ ܠܲܒܠܝܼܠܹܗ ܡܲܠܲܐܟ݂ܹ̈ܐ ܠܥܘܼܒܹܗ ܕܐܲܒܼܪܵܗܲܡ. ܐܝܼܢܵܐ ܐܘܿܦ ܗ̇ܘ ܥܲܬܝܼܪܵܐ ܡܝܼܬܠܹܗ ܘܦܸܫܠܹܗ ܩܒܼܝܼܪܵܐ. ܘܟܲܕ ܓ̰ܲܢܓ̰ܘܼܪܹܐ ܓܵܘ ܫܝܘܿܠ: ܡܘܼܪܸܡܠܹܗ ܥܲܝܢܘܼ̈ܗܝ ܡ̣ܢ ܪܘܼܚܩܵܐ، ܘܚܙܹܐܠܹܗ ܠܐܲܒܼܪܵܗܲܡ ܘܠܠܲܥܵܙܲܪ ܒܥܘܼܒܹܗ: ܘܩܪܹܐܠܹܗ ܒܩܵܠܵܐ ܪܵܡܵܐ ܘܐ݇ܡܸܪܹܗ: ܒܵܒܝܼ ܐܲܒܼܪܵܗܲܡ: ܪܲܚܸܡ ܥܲܠܝܼ ܘܫܵܕܸܪ ܠܠܲܥܵܙܲܪ ܕܛܵܡܸܫ ܪܹܫܵܐ ܕܨܸܒܥܹܗ ܒܡܝܼ̈ܵܐ ܘܡܲܬܪܹܐ ܠܹܗ ܠܸܫܵܢܝܼ، ܕܗܵܐ ܓ̰ܲܢܓ̰ܘܼܪܹܐ ܝܘܸܢ ܓܵܘ ܐܵܗܵܐ ܫܲܠܗܝܼܒܼܝܼܬܵܐ. ܐܵܡܸܪ ܐܸܠܹܗ ܐܲܒܼܪܵܗܲܡ: ܒܪܘܿܢܝܼ: ܕܟܼܘܼܪ ܕܩܘܼܒܸܠܘܼܟܼ ܛܵܒܼܵܬܘܼܟܼ ܓܵܘ ܚܲܝܘܼܟܼ، ܘܠܲܥܵܙܲܪ ܒܝܼܫܵܬܹ̈ܗ: ܘܐܵܕܝܼܵܐ ܗܵܐ ܡܲܢܝܘܼܚܹܐ ܝܠܹܗ ܠܲܐܟܼܵܐ، ܘܐܲܢ݇ܬ ܓ̰ܲܢܓ̰ܘܼܪܹܐ. ܘܥܲܡ ܟܠܲܝܗܝ ܐܲܢܹܐ: ܗܵܘܬܵܐ ܪܲܒܬܵܐ ܡܘܼܬܝܼܒܼܬܵܐ ܝܠܵܗ̇ ܒܲܝܬ݇ܠܲܢ ܘܐܸܠܵܘܟܼܘܿܢ ܕܐܲܝܢܝܼ ܕܒܲܣܡܵܐ ܠܗ݇ܘܿܢ ܡ̣ܢ ܠܲܐܟܼܵܐ ܕܥܲܒܼܪܝܼ ܠܟܸܣܠܵܘܟܼܘܿܢ ܠܹܐ ܡܵܨܝܼ، ܘܐܘܿܦܠܵܐ ܕܡ̣ܢ ܬܵܡܵܐ ܕܥܲܒܼܪܝܼ ܠܘܵܬܲܢ: ܐܵܡܸܪ ܐܸܠܹܗ: ܡ̣ܢ ܐܵܕܝܼܵܐ ܒܸܛܠܵܒܵܐ ܝܘܸܢ ܡܸܢܘܼܟܼ ܒܵܒܝܼ: ܕܫܲܕܪܸܬ ܠܹܗ ܠܒܲܝܬܵܐ ܕܒܵܒܝܼ، ܣܵܒܵܒ ܚܲܡܫܵܐ ܐܲܚܘܿܢܘܵܬܹ̈ܐ ܐܝܼܬܠܝܼ. ܐܵܙܸܠ ܣܵܗܸܕ ܐܸܠܲܝܗܝ. ܕܠܵܐ ܐܵܦ ܐܵܢܝܼ ܐܵܬܝܼ ܠܗܵܕܹܐ ܕܘܼܟܬܵܐ ܕܓ̰ܘܼܢܓ̰ܵܪܵܐ: ܐܵܡܸܪ ܐܸܠܹܗ ܐܲܒܼܪܵܗܲܡ: ܐܝܼܬܠܗ݇ܘܿܢ ܡܘܼܫܹܐ ܘܢܒܼܝܼܹ̈ܐ: ܫܲܡܥܝܼ ܐܸܠܲܝܗܝ: ܐܝܼܢܵܐ ܗ̇ܘ ܐ݇ܡܸܪܹܗ ܐܸܠܹܗ: ܠܵܐ ܒܵܒܝܼ ܐܲܒܼܪܵܗܲܡ: ܐܸܠܵܐ ܐܸܢ ܐ݇ܢܵܫܵܐ ܡ̣ܢ ܡܝܼܬܹ̈ܐ ܐܵܙܸܠ ܠܟܸܣܠܲܝܗܝ ܒܸܬ ܬܲܘܸܒܝܼ. ܐܵܡܸܪ ܐܸܠܹܗ ܐܲܒܼܪܵܗܲܡ: ܐܸܢ ܠܡܘܼܫܹܐ ܘܠܢܒܼܝܼܹ̈ܐ ܠܵܐ ܫܲܡܥܝܼ، ܐܵܦ ܐܸܢ ܐ݇ܢܵܫܵܐ ܡ̣ܢ ܡܝܼܬܹ̈ܐ ܩܵܐܸܡ ܠܹܐ ܡܗܲܝܡܢܝܼ ܐܸܠܹܗ. ܘܐ݇ܡܸܪܹܗ ܝܑܼܫܘܿܥ ܠܬܲܠܡܝܼ̈ܕܘ̈ܗܝ: ܠܹܐ ܡܲܨܝܵܐ ܕܠܵܐ ܐܵܬܝܼ ܟܦܘܼܪ̈ܝܹܐ: ܐܝܼܢܵܐ ܘܵܝ ܠܗ̇ܘ ܕܒܐܝܼܕܹܗ ܐܵܬܝܼ، ܒܘܼܫ ܨܦܵܝܝܼ ܗ݇ܘܵܐ ܐܸܠܹܗ ܐܸܢ ܐܲܪܚܹܐ ܕܚܡܵܪܵܐ ܗܵܘܝܵܐ ܗ݇ܘܵܐ ܬܠܝܼܬܵܐ ܒܩܕܵܠܹܗ ܘܪܘܼܦܝܵܐ ܓܵܘ ܝܵܡܵܐ: ܡ̣ܢ ܕܡܲܟܦܸܪ ܠܚܲܕ݇ ܡ̣ܢ ܐܲܢܹܐ ܙܥܘܿܪܹ̈ܐ. ܗ݇ܘܹܝܡܘܿܢ ܗܸܫܝܵܪ ܒܓܵܢܵܘܟܼܘܿܢ. ܐܸܢ ܚܵܛܹܐ ܐܲܚܘܿܢܘܼܟܼ ܢܓ̰ܘܼ ܒܝܼܹܗ، ܘܐܸܢ ܬܲܘܸܒ ܫܒܼܘܿܩ ܠܹܗ. ܘܐܸܢ ܫܒܼܲܥ ܓܵܗܹ̈ܐ ܒܝܵܘܡܵܐ ܥܵܒܼܸܕ ܓܢܵܗܵܐ ܒܝܼܘܼܟܼ، ܘܫܒܼܲܥ ܓܵܗܹ̈ܐ ܒܝܵܘܡܵܐ ܕܵܥܸܪ ܠܘܵܬܘܼܟܼ ܘܐܵܡܸܪ: ܕܬܲܘܘܼܒܹܐ ܝܘܸܢ، ܫܒܼܘܿܩ ܠܹܗ: ܘܐ݇ܡܸܪܗ݇ܘܿܢ ܫܠܝܼܚܹ̈ܐ ܠܡܵܪܲܢ: ܡܲܙܝܸܕܠܲܢ ܗܲܝܡܵܢܘܼܬܵܐ. ܐܵܡܸܪ ܐܸܠܲܝܗܝ: ܐܸܢ ܐܝܼܬ ܗ݇ܘܵܐ ܠܵܘܟܼܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܲܠ: ܒܸܬ ܐܲܡܪܝܼܬܘܿܢ ܗ݇ܘܵܐ ܠܐܵܗܵܐ ܬܘܼܬܵܐ: ܦܘܼܫ ܥܩܝܼܪܵܐ ܘܦܘܼܫ ܢܨܝܼܒܼܵܐ ܒܝܲܡܵܐ: ܒܸܬ ܡܲܨܝܸܬ ܗ݇ܘܵܐ ܐܸܠܵܘܟܼܘܿܢ. ܐܝܼܢܵܐ ܡܵܢܝܼ ܡܸܢܵܘܟܼܘܿܢ ܕܐܝܼܬܠܹܗ ܥܲܒܼܕܵܐ ܕܛܵܪܹܐ ܦܬܵܢܵܐ. ܝܲܢ ܕܡܲܪܥܹܐ ܥܸܪ̈ܒܹܐ. ܘܐܸܢ ܐܵܬܹܐ ܡ̣ܢ ܚܲܩܠܵܐ: ܒܸܬ ܐܵܡܸܪ ܐܸܠܹܗ ܒܗ̇‌ܝ ܥܕܵܢܵܐ ܥܒܼܘܿܪ ܝܬܸܒܼ: ܐܸܠܵܐ ܒܸܬ ܐܵܡܸܪ ܐܸܠܹܗ. ܗܵܕܸܪ ܐܸܠܝܼ ܡܸܢܕܝܼ ܕܐܲܟܼܠܸܢ ܐ݇ܟ݂ܲܠ݇ܪܲܡܫܵܐ: ܘܐ݇ܣܘܿܪ ܚܲܨܘܼܟܼ ܥܒܼܘܼܕ ܠܝܼ ܚܸܠܡܵܬ ܗܲܠ ܕܐܲܟܼܠܸܢ ܘܫܵܬܸܢ. ܘܡ̣ܢ ܒܵܬ݇ܪ ܗܵܕܵܐ ܐܵܦ ܐܲܢ݇ܬ ܐܲܟܼܠܸܬ ܘܫܵܬܸܬ: ܩܵܡܘܿ ܛܥܵܢܬܵܐ ܕܡܸܢܬܵܐ ܒܸܬ ܩܵܒܸܠ ܗ̇ܘ ܥܲܒܼܕܵܐ ܕܥܒܼܸܕܠܹܗ ܡܸܢܕܝܼ ܕܦܸܫܠܹܗ ܦܩܝܼܕܵܐ ܐܸܠܹܗ؟ ܠܹܐ ܝܘܸܢ ܒܸܚܫܵܒܼܵܐ. ܗܲܕܟܼܵܐ ܐܘܿܦ ܐܲܚܬܘܿܢ: ܐܝܼܡܵܢ ܕܥܒܼܝܼܕܠܵܘܟܼܘܿܢ ܟܠܲܝܗܝ ܐܲܢܹܐ ܕܦܩܝܼܕܹܐ ܝܢܵܐ ܐܸܠܵܘܟܼܘܿܢ. ܐ݇ܡܘܼܪܘܿܢ ܕܥܲܒܼܕܹ̈ܐ ܒܲܛܝܼܠܹ̈ܐ ܝܘܲܚ. ܕܡܸܢܕܝܼ ܕܕܲܝܢܵܢܹ̈ܐ ܝܘܲܚ ܗ݇ܘܵܐ ܠܸܥܒܼܵܕܵܐ ܥܒܼܸܕܠܲܢ.

♱♱♱♱♱♱♱♱♱♱♱♱♱

ܥܪܘܒܼܬܐ ܕܚܡܫ ܕܩܝܛܐ

ܕܘܟܼܪܢܐ ܗ̣݇‌ܝ ܕܫܡܘܢܝ ܘܕܒܼܢܝ̈ܗ݁

ܡܬܝ ܟܟ: 17 ‐ 29

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♱♱♱♱♱♱♱♱♱♱♱♱♱

ܚܕܒܫܒܐ ܕܫܬܐ ܕܩܝܛܐ

ܠܘܩܐ ܝܙ: 5 ‐ 20

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ ܟܪܘܙܘܬܼܐ ܕܠܘܩܐ.

♰ ܐ݇ܡܸܪܗ݇ܘܿܢ ܫܠܝܼܚܹ̈ܐ ܠܡܵܪܲܢ: ܡܲܙܝܸܕܠܲܢ ܗܲܝܡܵܢܘܼܬܵܐ. ܐܵܡܸܪ ܐܸܠܲܝܗܝ: ܐܸܢ ܐܝܼܬ ܗ݇ܘܵܐ ܠܵܘܟܼܘܿܢ ܗܲܝܡܵܢܘܼܬܵܐ ܐܲܝܟܼ ܕܲܢܕܸܟܬܵܐ ܕܚܲܪܕܲܠ: ܒܸܬ ܐܲܡܪܝܼܬܘܿܢ ܗ݇ܘܵܐ ܠܐܵܗܵܐ ܬܘܼܬܵܐ: ܦܘܼܫ ܥܩܝܼܪܵܐ ܘܦܘܼܫ ܢܨܝܼܒܼܵܐ ܒܝܵܡܵܐ: ܒܸܬ ܡܲܨܝܸܬ ܗ݇ܘܵܐ ܐܸܠܵܘܟܼܘܿܢ. ܐܝܼܢܵܐ ܡܵܢܝܼ ܡܸܢܵܘܟܼܘܿܢ ܕܐܝܼܬܠܹܗ ܥܲܒܼܕܵܐ ܕܛܵܪܹܐ ܦܬܵܢܵܐ. ܝܲܢ ܕܡܲܪܥܹܐ ܥܸܪ̈ܒܹܐ. ܘܐܸܢ ܐܵܬܹܐ ܡ̣ܢ ܚܲܩܠܵܐ: ܒܸܬ ܐܵܡܸܪ ܐܸܠܹܗ ܒܗ̇‌ܝ ܥܕܵܢܵܐ ܥܒܼܘܿܪ ܝܬܸܒܼ، ܐܸܠܵܐ ܒܸܬ ܐܵܡܸܪ ܐܸܠܹܗ. ܗܵܕܸܪ ܐܸܠܝܼ ܡܸܢܕܝܼ ܕܐܲܟܼܠܸܢ ܐ݇ܟ݂ܲܠ݇ܪܲܡܫܵܐ: ܘܐ݇ܣܘܿܪ ܚܲܨܘܼܟܼ ܥܒܼܘܼܕ ܠܝܼ ܚܸܠܡܵܬ ܗܲܠ ܕܐܲܟܼܠܸܢ ܘܫܵܬܸܢ. ܘܡ̣ܢ ܒܵܬ݇ܪ ܗܵܕܵܐ ܐܵܦ ܐܲܢ݇ܬ ܐܲܟܼܠܸܬ ܘܫܵܬܸܬ: ܩܵܡܘܿ ܛܥܲܢܬܵܐ ܕܡܸܢܬܵܐ ܒܸܬ ܩܵܒܸܠ ܗ̇ܘ ܥܲܒܼܕܵܐ ܕܥܒܼܸܕܠܹܗ ܡܸܢܕܝܼ ܕܦܸܫܠܹܗ ܦܩܝܼܕܵܐ ܐܸܠܹܗ؟ ܠܹܐ ܝܘܸܢ ܒܸܚܫܵܒܼܵܐ. ܗܲܕܟܼܵܐ ܐܘܿܦ ܐܲܚܬܘܿܢ: ܐܝܼܡܵܢ ܕܥܒܼܝܼܕܠܵܘܟܼܘܿܢ ܟܠܲܝܗܝ ܐܲܢܹܐ ܕܦܩܝܼܕܹܐ ܝܢܵܐ ܐܸܠܵܘܟܼܘܿܢ. ܐ݇ܡܘܼܪܘܼܢ: ܕܥܲܒܼܕܹ̈ܐ ܒܲܛܝܼܠܹ̈ܐ ܝܘܲܚ. ܕܡܸܢܕܝܼ ܕܕܲܝܢܵܢܹ̈ܐ ܝܘܲܚ ܗ݇ܘܵܐ ܠܸܥܒܼܵܕܵܐ ܥܒܼܸܕܠܲܢ. ܘܗ݇ܘܹܐ ܠܵܗ̇ ܕܟܲܕ ܒܹܐܙܵܠܵܐ ܗ݇ܘܵܐ ܝܑܼܫܘܿܥ ܠܐܘܿܪܸܫܠܸܡ: ܒܸܥܒܼܵܪܵܐ ܗ݇ܘܵܐ ܡ̣ܢ ܓܵܘ ܒܹܝܬ ܫܵܡܪ̈ܵܝܹܐ ܠܓܠܝܼܠܵܐ: ܘܟܲܕ ܩܘܼܪܒܵܐ ܠܸܥܒܼܵܪܵܐ ܠܚܕܵܐ ܡܵܬܵܐ: ܬܦܸܩܠܗ݇ܘܿܢ ܒܝܼܹܗ ܥܸܣܪܵܐ ܐ݇ܢܵܫܹ̈ܐ ܓܲܪ̈ܒܼܵܢܹܐ: ܘܟܠܹܐ ܠܗ݇ܘܿܢ ܡ̣ܢ ܪܸܚܩܵܐ: ܘܡܘܼܪܸܡܠܗ݇ܘܿܢ ܩܵܠܲܝܗܝ ܒܹܐܡܵܪܵܐ: ܪܲܒܲܢ ܝܑܼܫܘܿܥ ܥܒܼܘܼܕ ܪ̈ܲܚܡܹܐ ܥܲܠܲܢ. ܘܟܲܕ ܚܸܙܝܲܝܠܹܗ ܐ݇ܡܸܪܹܗ ܐܸܠܲܝܗܝ. ܙܹܠ݇ܡܘܿܢ ܡܲܚܙܹܝܡܘܿܢ ܓܵܢܵܘܟܼܘܿܢ ܠܟܵܗܢܹ̈ܐ. ܘܟܲܕ ܒܹܐܙܵܠܵܐ ܦܸܫܠܗ݇ܘܿܢ ܕܘܼܟܼܝܹܐ. ܐܝܼܢܵܐ ܚܲܕ݇ ܡܸܢܲܝܗܝ ܟܲܕ ܚܙܹܐܠܹܗ ܕܦܸܫܠܹܗ ܕܘܼܟܼܝܵܐ، ܕܥܸܪܹܗ ܘܒܩܵܠܵܐ ܪܵܡܵܐ ܡܫܵܒܸܚ ܗ݇ܘܵܐ ܠܐܲܠܵܗܵܐ، ܘܢܦܸܠܹܗ ܥܲܠ ܦܲܐܬܘܵܬܘܼ̈ܗܝ ܩܵܕ݇ܡ ܐܲܩܠܵܬܹ̈ܐ ܕܝܑܼܫܘܿܥ: ܟܲܕ ܫܵܟܘܼܪܹܐ ܐܸܠܹܗ. ܘܐܵܗܵܐ ܫܵܡܪܵܝܵܐ ܗ݇ܘܵܐ: ܐܝܼܢܵܐ ܓ̰ܘܼܘܸܒܠܹܗ ܝܑܼܫܘܿܥ ܘܐ݇ܡܸܪܹܗ: ܠܵܐ ܗ݇ܘܵܘ ܥܸܣܪܵܐ ܐܵܢܝܼ ܕܦܸܫܠܗ݇ܘܿܢ ܕܘܼܟܼܝܹܐ؟ ܐܲܝܟܵܐܝܢܵܐ ܐܵܢܝܼ ܬܸܫܥܵܐ؟ ܩܵܡܘܼܕܝܼ ܠܵܐ ܬܹܐܠܗ݇ܘܿܢ ܕܝܲܗ݇ܒ̣ܝܼ ܬܸܫܒܘܼܚܬܵܐ ܠܐܲܠܵܗܵܐ: ܐܸܠܵܐ ܐܵܗܵܐ ܕܡ̣ܢ ܥܲܡܵܐ ܢܘܼܟܼܪܵܝܵܐ ܝܠܹܗ؟ ܘܐ݇ܡܸܪܹܗ ܐܸܠܹܗ: ܩܘܼܡ ܙܹܠ݇ ܗܲܝܡܵܢܘܼܬܘܼܟܼ ܩܲܡ ܡܲܚܝܼܵܐܠܘܼܟܼ.

♱♱♱♱♱♱♱♱♱♱♱♱♱

ܥܪܘܒܼܬܐ ܕܫܬܼ ܕܩܝܛܐ

ܘܕܘܼܟܼܪܵܢܵܐ ܗ̣݇ܘ ܕܡܵܪܝ ܫܸܡܥܘܿܢ ܒܲܪܨܲܒܵܥܹ̈ܐ

ܩܵܬܼܘܿܠܝܼܩܵܐ ܦܲܛܪܝܼܵܪܟܵܐ: ܘܕܐܲܒܼܵܗܵܬܵܐ

ܝܘܚܢܢ ܗ: 1 ‐ 19

ܐܘܢܓܠܝܘܢ ܩܕܝܫܐ ܕܡܪܢ ܝܼܫܘܥ ܡܫܝܚܐ

ܟܪܘܙܘܬܼܐ ܕܝܘܚܢܢ.

♱♱♱♱♱♱♱♱♱♱♱♱♱

ܡܬܝ ܟܒ: 41 ‐ ܟܓ: 23

ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ

ܟܪܘܙܘܬܼܐ ܕܡܬܝ.

♰ ܐܝܼܢܵܐ ܒܗ̇ܘ ܙܲܒܼܢܵܐ ܟܲܕ ܓ̰ܸܡܥܝܹܐ ܗ݇ܘܵܘ ܦܪ̈ܝܼܫܹܐ، ܒܘܼܩܪܵܝܠܹܗ ܝܑܼܫܘܿܥ ܘܐ݇ܡܸܪܹܗ: ܡܘܿܕܝܼ ܒܹܐܡܵܪܵܐ ܝܬܘܿܢ ܥܲܠ ܡܫܝܼܚܵܐ. ܒܪܘܿܢܵܐ ܕܡܵܢܝܼ ܝܠܹܗ؟ ܐܲܡܪܝܼ ܐܸܠܹܗ ܒܪܘܿܢܵܐ ܕܕܵܘܝܼܕ. ܐܵܡܸܪ ܐܸܠܲܝܗܝ: ܘܕܲܐܟܼܝܼ ܕܵܘܝܼܕ ܒܪܘܼܚܵܐ ܒܸܩܪܵܝܘܼܗܝ ܝܠܹܗ ܡܵܪܝܵܐ؟ ܣܵܒܵܒ ܐ݇ܡܸܪܹܗ: ܕܐ݇ܡܸܪܹܗ ܡܵܪܝܵܐ ܠܡܵܪܝܼ ܝܬܸܒܼܠܘܼܟܼ ܡ̣ܢ ܝܲܡܝܼܢܝܼ، ܗܲܠ ܕܡܲܬܒܼܸܢ ܕܸܫܡܸܢ̈ܘܼܟܼ ܬܚܘܼܬ ܐܲܩܠܵܬܘܼ̈ܟܼ. ܗܲܕܟܼܵܐ ܐܸܢ ܕܵܘܝܼܕ ܒܸܩܪܵܝܹܗ ܠܹܗ ܡܵܪܝܵܐ: ܕܲܐܟܼܝܼ ܝܑܼܠܹܗ ܒܪܘܿܢܹܗ؟ ܘܐ݇ܢܵܫܵܐ ܠܵܐ ܡܨܹܐܠܹܗ ܕܝܲܗ݇ܒܼܸܠ ܐܸܠܹܗ ܓ̰ܘܼܘܵܒ. ܘܡ̣ܢ ܗ̇ܘ ܝܵܘܡܵܐ ܐ݇ܢܵܫܵܐ ܠܵܐ ܩܘܼܫܕܸܪܹܗ ܡܸܢ݇ܕܪܹܫ݇ ܠܡܒܵܩܘܼܪܹܐ ܡܸܢܹܗ. ܗܿܝܓܵܗ ܝܑܼܫܘܿܥ ܗܘܼܡܙܸܡܠܹܗ ܥܲܡ ܟܸܢܫܹ̈ܐ ܘܥܲܡ ܬܲܠܡܝܼ̈ܕܘܼܗܝ ܘܐ݇ܡܸܪܹܗ ܐܸܠܲܝܗܝ: ܥܲܠ ܟܘܼܪܣܝܵܐ ܕܡܘܼܫܹܐ ܝܬܸܒܼܠܗ݇ܘܿܢ ܣܵܦܪܹ̈ܐ ܘܦܪ̈ܝܼܫܹܐ. ܗܲܕܟܼܵܐ ܟܠ ܡܸܢܕܝܼ ܕܐܲܡܪܝܼ ܐܸܠܵܘܟܼܘܿܢ ܕܢܲܛܪܝܼܬܘܿܢ، ܢܛܘܼܪܘܿܢ ܘܥܒܼܘܼܕܘܿܢ. ܐܝܼܢܵܐ ܐܲܝܟܼ ܥܒܼܵܕܲܝܗܝ ܠܵܐ ܥܲܒܼܕܝܼܬܘܿܢ. ܣܵܒܵܒ ܟܹܐ ܐܵܡܪܝܼ ܘܠܹܐ ܥܲܒܼܕܝܼ. ܘܟܹܐ ܐܲܣܪܝܼ ܟܵܪ̈ܵܬܹܐ ܝܲܩܘܼܪܹ̈ܐ. ܘܡܲܬܒܼܝܼ ܥܲܠ ܪ̈ܘܼܦ̮ܫܵܢܹܐ ܕܒܢܲܝ̈ܢܵܫܵܐ. ܐܝܼܢܵܐ ܐܵܢܝܼ ܒܨܸܒܥܲܝܗܝ ܠܹܐ ܒܵܥܝܼ ܕܩܲܪܒܸܢܝܼ ܐܸܠܲܝܗܝ. ܘܟܠܲܝܗܝ ܥܒܼܵܕܲܝ̈ܗܝ ܟܹܐ ܥܲܒܼܕܝܼ ܕܦܲܝܫܝܼ ܚܸܙܝܹܐ ܠܒܢܲܝ̈ܢܵܫܵܐ. ܣܵܒܵܒ ܟܹܐ ܡܲܦܬܝܼ ܬܸܦܹܠܲܝ̈ܗܝ (ܒܲܢܝܵܬܲܝ̈ܗܝ)، ܘܡܲܪܝܸܟܼܝܼ ܬܸܟ݂̈ܠܵܬܵܐ (ܓܕܵܠܹ̈ܐ) ܕܥܵܒܵܝܲܝ̈ܗܝ. ܘܡܲܚܸܒܝܼ ܕܝܵܬܒܼܝܼ ܒܪܹܫ ܣܡܵܟ݂ܹ̈ܐ ܒܲܚܫܵܡ̈ܝܵܬܵܐ. ܘܪܹܫ ܡܵܘܬܒܼܹ̈ܐ ܓܵܘ ܟܢܘܼܫܝܵܬܹ̈ܐ. ܘܫܠܵܡܵܐ ܒܫܘܼܩܹ̈ܐ. ܘܕܗܵܘܝܼ ܦܝܵܫܵܐ ܩܸܪܝܹܐ ܪܵܒܝܼ ܡ̣ܢ ܐ݇ܢܵܫܹ̈ܐ. ܐܝܼܢܵܐ ܐܲܚܬܘܿܢ ܠܵܐ ܦܲܝܫܝܼܬܘܿܢ ܩܸܪܝܹܐ ܪܵܒܝܼ. ܣܵܒܵܒ ܚܲܕ݇ ܝܼܠܹܗ ܪܵܒܝܼܵܘܟܼܘܿܢ. ܐܝܼܢܵܐ ܐܲܚܬܘܿܢ ܟܠܵܘܟܼܘܿܢ ܐܲܚܘܿܢܘܵܬܹ̈ܐ ܝܬܘܿܢ. ܘܒܵܒܵܐ ܠܵܐ ܩܵܪܝܼܬܘܿܢ ܠܵܘܟܼܘܿܢ ܒܐܲܪܥܵܐ، ܣܵܒܵܒ ܚܲܕ݇ ܝܼܠܹܗ ܒܵܒܵܘܟܼܘܿܢ ܕܒܲܫܡܲܝܵܐ. ܘܠܵܐ ܦܲܝܫܝܼܬܘܿܢ ܩܸܪܝܹܐ ܡܕܲܒܪ̈ܵܢܹܐ، ܣܵܒܵܒ ܕܚܲܕ݇ ܝܠܹܗ ܡܕܲܒܪܵܢܵܘܟܼܘܿܢ ܡܫܝܼܚܵܐ. ܐܝܼܢܵܐ ܗ̇ܘ ܕܝܼܠܹܗ ܓܘܼܪܵܐ ܓܵܘܵܘܟܼܘܿܢ، ܗܵܘܹܐ ܐܸܠܵܘܟܼܘܿܢ ܡܫܲܡܫܵܢܵܐ. ܣܵܒܵܒ ܡ̇ܢ ܕܡܵܪܸܡ ܓܵܢܹܗ ܒܸܬ ܦܵܐܸܫ ܡܘܼܡܟܸܟܼܵܐ. ܘܡ̇ܢ ܕܡܲܡܟܸܟܼ ܓܵܢܹܗ ܒܸܬ ܦܵܐܸܫ ܡܘܼܪܡܵܐ. ܘܵܝ ܐܸܠܵܘܟܼܘܿܢ ܣܵܦܪܹ̈ܐ ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ، ܕܟܹܐ ܐܲܟܼܠܝܼܬܘܿܢ ܒܵܬܹ̈ܐ ܕܐܲܪ̈ܡܸܠܝܵܬܹ̈ܐ ܒܥܸܠܬܵܐ ܕܟܹܐ ܡܲܪܝܸܟܼܝܼܬܘܿܢ ܨܠܵܘܵܬܵܘ̈ܟܼܘܿܢ. ܣܵܒܵܒ ܕܐܵܗܵܐ ܒܸܬ ܩܲܒܠܝܼܬܘܿܢ ܕܝܼܘܵܢ ܙܵܘܕܵܐ. ܘܵܝ ܐܸܠܵܘܟܼܘܿܢ ܣܵܦܪܹ̈ܐ ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ ܕܟܹܐ ܕܵܘܪܝܼܬܘܿܢ ܡܲܠܟܘܼܬܵܐ ܕܫܡܲܝܵܐ ܩܵܕ݇ܡ ܒܢܲܝ̈ܢܵܫܵܐ، ܣܵܒܵܒ ܐܲܚܬܘܿܢ ܠܹܐ ܥܲܒ̣ܪܝܼܬܘܿܢ، ܘܠܐܲܝܢܝܼ ܕܥܲܒ̣ܪܝܼ ܠܹܐ ܝܬܘܿܢ ܒܸܫܒܼܵܩܵܐ ܠܸܥܒ̣ܵܪܵܐ. ܘܵܝ ܐܸܠܵܘܟܼܘܿܢ ܣܵܦܪܹ̈ܐ ܘܦܪ̈ܝܼܫܹܐ ܢܲܣܒܲܝ̈ ܒܐܲܦܹ̈ܐ، ܕܟܹܐ ܚܲܕܪܝܼܬܘܿܢ ܝܵܡܵܐ ܘܒܸܪܙܵܐ ܠܫܲܚܠܘܼܦܹܐ ܚܲܕ݇ ܓܝܼܘܼܪܵܐ (ܢܘܼܟܼܪܵܝܵܐ)، ܘܐܝܼܡܵܢ ܕܗ݇ܘܹܐܠܹܗ، ܟܹܐ ܥܲܒܼܕܝܼܬܘܿܢ ܠܹܗ ܒܲܪ ܓܹܗܲܢܵܐ ܚܲܕ݇ ܒܬܪܹܝ ܥܲܠܵܘܟܼܘܿܢ. ܘܵܝ ܐܸܠܵܘܟܼܘܿܢ ܡܗܲܕܝܵܢܹ̈ܐ ܣܸܡܝܹ̈ܐ. ܕܟܹܐ ܐܲܡܪܝܼܬܘܿܢ ܡ̇ܢ ܕܝܵܡܹܐ ܒܗܲܝܟܠܵܐ ܠܹܐ ܝܠܵܗ̇ ܚܲܕ݇ ܡܸܢܕܝܼ، ܐܝܼܢܵܐ ܡ̇ܢ ܕܝܵܡܹܐ ܒܕܲܗܒܼܵܐ ܕܓܵܘ ܗܲܝܟܠܵܐ، ܟܹܐ ܗܵܘܹܐ ܚܲܝܵܒܼܵܐ. ܣܲܟܼܠܹ̈ܐ ܘܣܸܡܝܹ̈ܐ ܡܘܼܕܝܼ ܝܠܹܗ ܒܘܼܫ ܓܘܼܪܵܐ: ܕܲܗܒܼܵܐ ܝܲܢ ܗܲܝܟܠܵܐ ܕܗ̇ܘ ܕܟܹܐ ܡܩܵܕܸܫ ܠܕܲܗܒܼܵܐ؟ ܘܡ̇ܢ ܕܝܵܡܹܐ ܒܡܲܕܒܚܵܐ، ܠܹܐ ܝܠܵܗ̇ ܚܲܕ݇ ܡܸܢܕܝܼ، ܐܝܼܢܵܐ ܡ̇ܢ ܕܝܵܡܹܐ ܒܩܘܼܪܒܵܢܵܐ ܕܠܥܸܠ ܡܸܢܹܗ ܟܹܐ ܗܵܘܹܐ ܚܲܝܵܒܼܵܐ. ܣܲܟܼܠܹ̈ܐ ܘܣܸܡܝܹ̈ܐ. ܣܵܒܵܒ ܡܘܿܕܝܼ ܝܠܹܗ ܒܘܼܫ ܓܘܼܪܵܐ. ܩܘܼܪܒܵܢܵܐ ܝܲܢ ܡܲܕܒܚܵܐ ܕܟܹܐ ܡܩܵܕܸܫ ܠܩܘܼܪܒܵܢܵܐ؟ ܗܲܕܟܼܵܐ ܡ̇ܢ ܕܝܵܡܹܐ ܒܡܲܕܒܚܵܐ ܟܹܐ ܝܵܡܹܐ ܒܝܼܹܗ ܘܒܟܠ ܡܸܢܕܝܼ ܕܐܝܼܬ ܠܥܸܠ ܡܸܢܹܗ. ܘܡ̇ܢ ܕܝܵܡܹܐ ܒܗܲܝܟܠܵܐ، ܟܹܐ ܝܵܡܹܐ ܒܝܼܹܗ ܘܒܡ̇ܢ ܕܥܵܡܸܪ ܒܝܼܹܗ. ܘܡ̇ܢ ܕܝܵܡܹܐ ܒܫܡܲܝܵܐ. ܟܹܐ ܝܵܡܹܐ ܒܟܘܼܪܣܝܹܗ ܕܐܲܠܵܗܵܐ، ܘܒܡ̇ܢ ܕܝܵܬܸܒܼ ܠܥܸܠ ܡܸܢܹܗ.

♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱

ܫܠܸܡ̣ ܒܥܘܼܕܪܵܢ ܡܵܪܲܢ ܩܸܪ̈ܝܵܢܹܐ ܕܐܹܘܲܢܓܲܠܝܼܘܿܢ ܡܦܲܪܫܵܐ

ܕܚܘܼܕܼܪܵܐ ܕܟܼܠܵܗ̇ ܫܲܢ݇ܬܵܐ ܐܲܝܟܼ ܛܲܟܼܣܵܐ

ܕܕܲܝܪܵܐ ܥܸܠܵܝܬܵܐ. ܘܲܠܡܵܪܲܢ ܫܘܼܒܼܚܵܐ

ܐܲܡܝܼܢܵܐ: ܐܵܡܹܝܢ܀

♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱♱

The Liturgical Holy Gospel Readings According to the Lectionary of the Assyrian Church of the East
Web and Font Design by: Fr. Lawrance Namato

ܟܬܵܒܼܵܐ ܕܐܹܘܲܢܓܲܠܝܼܘܿܢ ܡܦܲܪܫܵܐ ܕܟܼܠܵܗ̇ ܫܲܢَܬܵܐ ܒܠܸܫܵܢܵܐ ܣܘܵܕܵܝܵܐܐܲܝܟܼ ܛܲܟܼܣܵܐ ܕܥܹܕܬܵܐ ܫܠܝܼܚܵܝܬܵܐ ܘܩܵܬܼܘܿܠܝܼܩܝܼ ܕܡܲܕܢ̱ܚܵܐ

The Liturgical Holy Gospel Readings According to the Lectionary

of the Assyrian Church of the East

ܚܕܒܫܒܐ ܩܕܡܝܐ ܕܣܘܒܪܐ

ܚܕܒܫܒܐ ܕܬܼܪܝܢ ܕܣܘܒܪܐ

ܚܕܒܫܒܐ ܕܬܼܠܬܼܐ ܕܣܘܒܪܐ

ܚܕܒܫܒܐ ܕܐܪܒܥܐ ܕܣܘܒܪܐ

ܚܕܒܫܒܐ ܩܕܡܝܐ ܕܒܬܼܪ ܝܠܕܐ

ܥܪܘܒܼܬܐ ܕܬܪܬܿܝܢ ܕܒܬܪ ܝܠܕܐ ܘܕܘܟܼܪܢܐ ܗَ̣‌ܝ ܕܡܪܬܿܝ ܡܪܝܡ ܒܬܘܠܬܐ ܩܕܝܫܬܐ ܕܗܘ̇ܐ ܒܣܬܘܐ.

ܐَܚܪܢَܐ ܠܗ ܠܕܘܟܼܪܢܐ ܕܡܪܬܿܝ ܡܪܝܡ ܕܡܬܩܪܐ ܒܐܝܪ

ܕܘܟܼܪܢܐ ܕܡܪܬܿܝ ܡܪܝܡ ܕܗܘ݁ܐ ܒܩܝܛܐ

ܚܕܒܫܒܐ ܕܬܼܪܝܢ ܕܒܬܼܪ ܕܝܠܕܐ

ܕܘܟܼܪܢܐ ܕܡܪܝ ܝܘܚܢܢ ܡܥܡܕܢܐ

ܚܕܒܫܒܐ ܩܕܡܝܐ ܕܒܬܼܪ ܕܢܚܐ

ܬܪܝܢܒܿܫܒܐ ܕܒܥܘܬܐ ܕܒܬܼܘܠܬܼ̈ܐ

ܬܠܬܒܿܫܒܐ ܕܒܥܘܼܬܐ ܕܒܬܼܘܠܬܼ̈ܐ

ܐܪܒܥܒܿܫܒܐ ܕܒܥܘܬܐ ܕܒܬܼܘܠܬܼ̈ܐ

ܕܘܟܼܪܢܐ ܕܦܛܪܘܣ ܘܦܘܠܘܣ

ܚܕܒܫܒܐ ܕܬܼܪܝܢ ܕܒܬܼܪ ܕܢܚܐ

ܕܘܟܼܪܢܐ ܕܐܪܒܥܐ ܐܘܢܓܠܣܛ̈ܐ

ܕܘܟܼܪܢܐ ܕܦܛܪܘܣ ܘܦܘܠܘܣ ܘܐܘܢܓܠܣ̈ܛܐ ܕܟܕ ܡܬܥ̱ܒܼܕ ܒܚܕܐ ܥܪܘܒܼܬܐ

ܕܘܟܼܪܢܐ ܕܡܪܝ ܐܣܛܦܢܘܣ

ܚܕܒܫܒܐ ܕܐܪܒܥܐ ܕܒܼܬܪ ܕܢܚܐ

ܕܘܟܼܪܢܐ ܕܡܠܦܢ̈ܐ ܝܘܢܝ̈ܐ

ܚܕܒܫܒܐ ܕܚܡܫܐ ܕܒܼܬܪ ܕܢܚܐ

ܬܪܝܢܒܿܫܒܐ ܕܒܥܘܬܼܐ ܕܢܝܢܘܝ̈ܐ

ܬܠܬܼܒܿܫܒܐ ܕܒܥܘܬܼܐ ܕܢܝܢܘܝ̈ܐ

ܐܪܒܥܒܿܫܒܐ ܕܒܥܘܬܼܐ ܕܢܝܢܘܝ̈ܐ

ܚܡܫܒܿܫܒܐ ܕܒܼܬܪ ܒܥܘܬܼܐ ܕܢܝܢܘܝ̈ܐ

ܕܘܟܼܪܢܐ ܕܡܠܦܢ̈ܐ ܣܘܪ̈ܝܝܐ

ܚܕܒܫܒܐ ܕܫܬܐ ܕܒܬܼܪ ܕܢܚܐ

ܕܘܟܼܪܢܐ ܕܡܪܝ ܐܒܼܐ ܩܬܼܘܠܝܩܐ: ܕܗ̤ܘ ܚܕ ܦܪܨܘܦܐ

ܕܘܟܼܪܢܐ ܕܡܪܝ ܐܣܛܦܢܘܣ: ܘܕܡܪܝ ܐܒܼܐ ܒܚܕܐ ܥܪܘܒܼܬܐ

ܚܕܒܫܒܐ ܕܫܒܼܥܐ ܕܒܬܼܪ ܕܢܚܐ

ܕܘܟܼܪܢܐ ܕܐܪܒܿܥܝܢ ܣܗܕ̈ܐ

ܚܕܒܫܒܐ ܕܬܡܢܝܐ ܕܒܬܼܪ ܕܢܚܐ

ܚܕܒܫܒܐ ܕܡܥܠܝ ܨܘܡܐ ܪܒܐ

ܬܪܝܢܒܿܫܒܐ ܕܫܒܿܬܼܐ ܩܕ݇ܡܝܬܐ ܕܨܘܡܐ

ܬܠܬܼܒܿܫܒܐ ܕܫܒܬܐ ܩܕܡܝܬܐ ܕܨܘܡܐ

ܚܡܫܒܿܫܒܐ ܕܫܒܿܬܐ ܩܕܡܝܬܐ ܕܨܘܡܐ

ܥܪܘܒܼܬܐ ܩܕܡܝܬܐ ܕܨܘܡܐ

ܥܪܘܒܼܬܐ ܕܬܪܬܿܝܢ ܕܨܘܡܐ

ܥܪܘܒܼܬܵܐ ܕܬܼܠܬܼ ܕܨܘܡܐ

ܚܕܒܫܒܐ ܕܐܪܒܥܐ ܕܨܘܡܐ

ܬܪܝܢܒܿܫܒܐ ܕܫܒܿܬܼܐ ܡܨܥܝܬܐ ܕܨܘܡܐ

ܬܠܬܼܒܿܫܒܐ ܕܫܒܿܬܼܐ ܡܨܥܝܬܐ ܕܨܘܡܐ

ܬܠܬܒܿܫܒܐ ܕܫܒܿܬܼܐ ܐ݇ܚܪܝܬܐ ܕܨܘܡܐ

ܐܪܒܥܒܿܫܒܐ ܕܫܒܿܬܼܐ ܐ݇ܚܪܝܬܐ ܕܨܘܡܐ

ܚܡܫܒܫܒܐ ܕܦܨܚܐ

ܩܪܝܢܐ ܕܠܠܝܐ ܕܥܪܘܒܼܬܐ ܕܚܫܐ

ܩܪܝܢܐ ܕܐܝܡܡܐ ܕܫܒܿܬܼܐ ܪܒܿܬܼܐ

ܩܪܝܢܐ ܕܐ݇ܪ̈ܙܐ ܕܫܒܿܬܼܐ ܪܒܿܬܼܐ

ܩܪܝܢܐ ܕܨܦܪܐ ܕܩܝܡܬܐ

ܚܕܒܫܒܐ ܪܒܐ ܕܩܝܡܬܐ

ܬܪܝܢܒܿܫܒܐ ܕܫܒܬܼ ܫܒ̈ܐ

ܬܠܬܼܒܿܫܒܐ ܕܫܒܬܼ ܫܒ̈ܐ

ܚܡܫܒܿܫܒܐ ܕܫܒܬܼ ܫܒ̈ܐ

ܥܪܘܒܼܬܐ ܕܡܘܕܝܢ̈ܐ

ܚܕܒܫܒܐ ܚܕܬܐ

ܕܘܟܼܪܢܐ ܕܡܪܝ ܓܝܘܪܓܝܣ ܣܗܕܐ ܘܢܨܝܚܐ

ܚܕܒܫܒܐ ܕܬܼܠܬܼܐ ܕܩܝܡܬܐ

ܕܘܟܼܪܢܐ ܕܪܒܢ ܗܘܪܡܝܙܕ

ܕܘܟܼܪܢܐ ܕܫܡܘܢܝܼ ܘܕܒܼܢܝ̈ܗ݁

ܚܕܒܫܒܐ ܕܐܪܒܿܥܐ ܕܩܝܡܬܐ

ܚܕܒܫܒܐ ܕܚܡܫܐ ܕܩܝܡܬܐ

ܚܕܒܫܒܐ ܕܫܬܐ ܕܩܝܡܬܐ

ܚܡܫܒܿܫܒܐ ܕܥܐܕܐ ܩܕܝܫܐ ܕܣܘܠܩܗ ܕܡܪܢ

ܩܪܝܢܐ ܕܛܟܼܣܐ ܕܣܓܼܕܬܐ ܕܝܠܗ ܕܝܘܡܐ

ܥܪܘܒܼܬܐ ܕܕܗܒܼܐ

ܚܕܒܫܒܐ ܕܬܼܪܝܢ ܕܫܠܝܚ̈ܐ

ܚܕܒܫܒܐ ܕܬܼܠܬܼܐ ܕܫܠܝܚ̈ܐ

ܚܕܒܫܒܐ ܕܚܡܫܐ ܕܫܠܝܚ̈ܐ

ܚܕܒܫܒܐ ܕܫܬܐ ܕܫܠܝܚ̈ܐ

ܚܕܒܫܒܐ ܕܫܒܼܥܐ ܕܫܠܝܚ̈ܐ

ܚܕܒܫܒܐ ܩܕܡܝܐ ܕܩܝܛܐ: ܘܡܬܼܩܪܐ ܢܘܣܪܕܝܠ

ܕܘܟܼܪܢܐ ܕܡܪܝ ܬܐܘܡܐ ܫܠܝܚܐ

ܥܪܘܒܬܐ ܩܕܡܝܬܐ ܕܩܝܛܐ

ܚܕܒܫܒܐ ܕܬܼܪܝܢ ܕܩܝܛܐ

ܥܪܘܒܼܬܐ ܕܬܼܪܬܝܢ ܕܩܝܛܐ

ܕܘܟܼܪܢܐ ܕܡܪܝ ܩܘܪܝܩܘܣ ܣܗܕܐ

ܟܬܵܒܼܵܐ ܕܐܹܘܲܢܓܲܠܝܼܘܿܢ ܡܦܲܪܫܵܐ ܕܟܼܠܵܗ̇ ܫܲܢَܬܵܐ ܒܠܸܫܵܢܵܐ ܣܘܵܕܵܝܵܐ
ܐܲܝܟܼ ܛܲܟܼܣܵܐ ܕܥܹܕܬܵܐ ܫܠܝܼܚܵܝܬܵܐ ܘܩܵܬܼܘܿܠܝܼܩܝܼ ܕܡܲܕܢ̱ܚܵܐ

ܥܪܘܒܼܬܐ ܕܬܪܬܿܝܢ ܕܒܬܪ ܝܠܕܐ

ܘܕܘܟܼܪܢܐ ܗَ̣‌ܝ ܕܡܪܬܿܝ ܡܪܝܡ ܒܬܘܠܬܐ ܩܕܝܫܬܐ ܕܗܘ̇ܐ ܒܣܬܘܐ.

ܐَܚܪܢَܐ ܠܗ ܠܕܘܟܼܪܢܐ ܕܡܪܬܿܝ ܡܪܝܡ

ܕܡܬܩܪܐ ܒܐܝܪ

ܕܘܟܼܪܢܐ ܕܦܛܪܘܣ ܘܦܘܠܘܣ

ܘܐܘܢܓܠܣ̈ܛܐ ܕܟܕ ܡܬܥ̱ܒܼܕ ܒܚܕܐ ܥܪܘܒܼܬܐ

ܩܪܝܢܐ
ܕܠܠܝܐ ܕܥܪܘܒܼܬܐ ܕܚܫܐ

ܕܘܟܼܪܢܐ
ܕܡܪܝ ܓܝܘܪܓܝܣ ܣܗܕܐ ܘܢܨܝܚܐ

ܚܡܫܒܿܫܒܐ
ܕܥܐܕܐ ܩܕܝܫܐ ܕܣܘܠܩܗ ܕܡܪܢ

ܥܪܘܒܼܬܐ
ܕܫܘܠܡ ܫܒܼܘܥ̈ܐ ܕܩܝܛܐ