ܬܫܥܝܬܐ
ܕܡܪܝ ܕܢܝܐܝܠ ܐܣܝܐ
ܡ̣ܢ ܟܬܒܼܐ ܕܫܪ̈ܒܐ ܕܣܗܕ̈ܐ
ܨܠܘܿܬܹܗ ܥܲܠ ܟܠܲܢ: ܐܵܡܹܝܢ.
ܣܵܘܓܘܼܠܝܼ ܘܵܓ̰ܸܒ ܝ݇ܠܵܗ̇ ܐܸܠܲܢ ܕܦܵܪܡܲܚ ܒܬܲܚܡܵܢܝܵܬܹ̈ܐ ܕܚܝܼ̈ܵܠܲܢ: ܓ̣ܵܠܝܼܒܘܼܬܵܐ ܕܩܲܕܝܼܫܹ̈ܐ ܝܼܗܘܼܵܐ ܚܕܵܐ ܕܵܡܲܝܬܵܐ ܕܢܝܼܫܲܢܩܵܐ ܕܘܲܣܝܲܬܹ̈ܐ ܕܐܲܠܵܗܵܐ: ܕܡܸܢܲܝܗܝ ܦܝܵܫܵܐ ܝ݇ܠܹܗ ܝ݇ܕܸܥܝܵܐ ܚܲܝܠܵܐ ܕܦܸܠܚܵܢܹܗ: ܣܵܘܓܘܼܠܝܼ: ܐܘܼܪܚܵܐ ܕܩܲܕܝܼܫܹ̈ܐ ܘܗܲܩܝܵܬ ܕܦܸܠܚܵܢܵܢܲܝ̈ܗܝ: ܕܘܼܡܝܵܐ ܝ݇ܠܹܗ ܕܟܸܢܫܹ̈ܐ [ܓ̰ܵܡܵܥܲܬܹ̈ܐ] ܕܡܲܠܲܐܟ̣̈ـܹܐ ܕܓܵܘ ܫܡܲܝܵܐ. ܡܣܵܒܵܒ ܕܚܲܕ ܝ݇ܠܹܗ ܪܘܼܚܵܐ ܩܲܕܝܼܫܵܐ: ܕܡܸܢܹܗ ܘܐܸܠܲܝܗܝ ܦܝܵܫܵܐ ܝ݇ܢܵܐ ܝܘܼܗ݇ܒ̣̈ـܹܐ: ܘܒܸܠܗܵܝܵܐ ܝ݇ܢܵܐ ܒܢܘܼܪܵܐ ܕܡܵܚܲܒܬܹܗ: ܘܒܸܬ ܡܵܛܝܼ ܠܟܸܣ ܒܪܘܿܢܵܐ ܒܝܼܲܕ ܕܲܪ̈ܓ̣ـܹܐ: ܐܲܝܟܼ ܗܲܡܙܲܡܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܘܡܸܢ݇ܕܪܹܫ݇ ܛܘܼܒ̣ܵܢܵܐ ܦܵܘܠܘܿܣ ܡܫܲܗܘܘܼܬܲܢ ܝ݇ܠܹܗ ܟܲܕ ܒܹܐܡܵܪܵܐ: ܛܠܘܿܒܘܼܢ ܘܬܲܚܡܸܢܘܿܢ ܒܘܼܬ ܕܐܵܢܝܼ ܕܝܑܼܢܵܐ ܠܥܸܠܸܠ: ܕܘܼܟܬܵܐ ܕܡܫܝܼܚܵܐ ܕܝ݇ܬܸܒ̣ܠܹܗ ܡܼܢ ܝܲܡܝܼܢܵܐ ܕܓܘܼܪܘܼܬܵܐ ܕܒܵܒܘܼܗܝ. ܘܡܸܢ݇ܕܪܹܫ݇ ܡܵܪܲܢ ܬܲܠܡܘܼܕܲܢ ܝ݇ܠܹܗ ܟܲܕ ܒܹܐܡܵܪܵܐ: ܠܵܐ ܛܲܠܒܝܼܬܘܿܢ ܝܲܢ ܒܵܥܹܝܬܘܿܢ ܚܸܩܪܵܐ ܕܒܢܲܝ̈ܢܵܫܵܐ: ܡܣܵܒܵܒ ܥܲܡܝܼ ܒܸܬ ܝܵܬܒ̣ܝܼܬܘܿܢ ܥܲܠ ܨܘܼܦܪܝܼ: ܘܒܸܬ ܐܵܟ̣ܠܝܼܬܘܿܢ ܘܫܵܬܝܼܬܘܿܢ ܓܵܘ ܡܲܠܟܘܼܬܝܼ: ܘܒܸܬ ܝܵܬܒ̣ܝܼܬܘܿܢ ܥܲܠ ܬܪܸܥܣܲܪ ܟܘܼܪ̈ܣܝܼܹܐ ܘܒܸܬ ܕܵܝܢܝܼܬܘܿܢ ܬܪܸܥܣܲܪ ܫܲܒ̣ܛܹ̈ܐ ܕܝܼܣܪܵܝܸܠ. ܘܟܲܕ ܗܲܪ ܐܲܢܹ̈ܐ ܗܹܡܸܙܡܵܢܹ̈ܐ ܫܡܸܥܠܗ݇ܘܿܢ ܩܲܕܝܼܫܹ̈ܐ: ܘܫܒ̣ܸܩܠܗ݇ܘܿܢ ܠܐܵܗܵܐ ܥܵܠܡܵܐ ܘܟܦܸܪܗ݇ܘܿܢ ܒܫܲܗܘܲܬܝܵܬ̈ܘܼܗܝ. ܘܡܘܼܪܝܸܙܠܗ݇ܘܿܢ ܠܐܘܼܪܚܵܐ ܘܬܘܼܡܸܙܠܗ݇ܘܿܢ ܪܵܗܛܵܐ [ܐ݇ܙܵܠܬܵܐ] ܕܦܸܠܚܵܢܵܢܲܝ̈ܗܝ ܓܵܘ ܕܐܵܗܵܐ ܡܵܝܕܲܢ ܪܘܼܚܵܢܵܝܬܵܐ: ܘܙܘܼܒܸܢܘܿܢ ܠܒܸܣܪ̈ܲܝܗܝ ܒܦܸܠܚܵܢܵܢܹ̈ܐ ܚܩܝܼܪܹ̈ܐ ܕܨܵܘܡܵܐ ܘܢܙܝܼܪܘܼܬܵܐ. ܘܟܦܸܪܗ݇ܘܿܢ ܒܓܸܢܣܵܐ ܦܲܓ̣ܪܵܢܵܝܵܐ: ܘܡܘܼܚܸܒܠܗ݇ܘܿܢ ܚܘܼܒܹܗ ܕܡܫܝܼܚܵܐ ܕܐ݇ܡܸܪܹܗ: ܡ̇ܢ ܕܠܵܐ ܣܵܢܹܐ ܠܟܠܹܗ ܓܸܢܣܹܗ ܘܐܘܼܦ ܠܓܵܢܹܗ: ܬܲܠܡܝܼܕܵܐ ܠܹܐ ܡܵܨܹܐ ܕܗܵܘܹܐ ܐܸܠܝܼ: ܘܒܘܼܬ ܕܗ̇ܝ ܩܲܕܝܼܫܹ̈ܐ ܕܦܝܼܫܠܗ݇ܘܿܢ ܡܸܚܝܹ̈ܐ ܠܙܩܝܼܦܵܐ ܒܗܲܕܵܡܲܝ̈ܗܝ ܒܝܼܲܕ ܫܵܗܲܪܬܵܐ ܘܪܥܵܫܬܵܐ ܘܟܠܵܝܬܵܐ ܠܲܝܠܵܝܵܐ ܩܵܐ ܒܘܼܬ ܚܵܬܸܪ ܕܥܵܠܡܵܐ: ܘܛܥܸܢܘܿܢ ܠܵܘܡܹܗ ܕܥܵܠܡܵܐ ܘܥܒ̣ܸܕܠܗ݇ܘܿܢ ܒܲܝܨܘܼܪ: ܫܘܼܗܒ̣ܸܬܵܝܠܵܗܿ ܗܲܡܙܲܡܬܹܗ ܕܡܵܪܲܢ ܕܐ݇ܡܸܪܹܗ: ܕܡܿܢ ܕܠܵܐ ܫܵܩܸܠ ܨܠܝܼܒ̣ܹܗ ܘܐܵܬܹܐ ܒܵܬ݇ܪܝܼ ܠܹܐ ܚܵܫܸܚ ܐܸܠܝܼ.
ܘܣܢܹܐܠܗ݇ܘܿܢ ܚܲܝܘܼܬܵܐ ܕܐ݇ܢܵܫܘܼܬܵܐ ܘܫܓ̣ܘܼܫܝܵܐ ܕܓܵܘ ܡܕܝܼܢܵܬܹ̈ܐ: ܘܡܘܼܚܸܒܠܗ݇ܘܿܢ ܕܗܵܘܝܼ ܒܸܚܲܝܵܐ ܓܵܘ ܒܲܪܝܼܵܐ: ܕܫܵܪܝܵܐ ܪܘܼܚܹܗ ܕܐܲܠܵܗܵܐ ܓܵܘ ܠܸܒܵܘܵܬܲܝ̈ܗܝ: ܘܒܝܼܲܕ ܓܘܼܠܦܵܢܹ̈ܐ ܕܨܠܵܘܵܬܲܝ̈ܗܝ ܩܵܕ݇ܡ ܬܪܘܿܢܘܿܣ ܕܫܟ̣ܸܢܬܵܐ ܕܓܘܼܪܘܼܬܹܗ ܥܒ̣ܸܪܘܿܢ. ܩܵܐ ܒܘܼܬ ܕܐܵܗܵܐ ܠܵܐ ܦܝܼܫܠܗ݇ܘܿܢ ܓܵܘ ܕܘܼܟܬܵܐ ܕܚܲܝܘܼܬܵܐ: ܗ̇ܝ ܕܝܼܗ݇ܘܼܵܐ ܝܵܡܵܐ ܕܚܢܵܩܵܐ: ܐܝܼܢܵܐ ܦܠܸܛܠܗ݇ܘܿܢ ܠܒ̣ܲܕܲܪ ܡܸܢܹܗ ܡܸܢ݇ܕܪܸܫ݇ ܫܡܸܥܠܗ݇ܘܿܢ ܠܦܵܘܠܘܿܣ ܕܡܲܩܘܘܼܚܹܐ ܗ݇ܘܼܵܐ ܘܒܹܐܡܵܪܵܐ: ܗ̇ܘ ܕܫܵܩܸܠ ܫܵܦܵܩܲܬܹܗ ܕܡܫܝܼܚܵܐ ܦܵܠܸܛ ܠܒ̣ܲܕܲܪ ܡܼܢ ܡܕܝܼܢ݇ܬܵܐ: ܡܣܵܒܵܒ ܡܵܪܲܢ ܠܒ̣ܲܕܲܪ ܡܼܢ ܡܕܝܼܢ݇ܬܵܐ ܓ̰ܘܼܢܓ̰ܸܪܹܗ. ܐܘܼܦ ܩܲܕܝܼܫܹ̈ܐ ܒܚܘܼܒܵܐ ܕܡܲܚܲܒܬܹܗ ܓ̰ܘܼܢܓ̰ܸܪܗ݇ܘܿܢ: ܘܠܵܐ ܣܒ̣ܸܥܠܵܗ̇ ܓܵܢܲܝܗܝ ܡܼܢ ܐܘܼܠܨܵܢܹ̈ܐ ܕܩܵܒܘܿܠܹܐ ܗ݇ܘܼܵܘ ܒܘܼܬ ܚܵܬܸܪ ܕܝܼـܹܗ. ܡܣܵܒܵܒ ܕܒܝܼܕܲܥܝܵܐ ܗ݇ܘܼܵܘ ܕܐܘܼܠܨܵܢܵܐ ܒܝܼܲܕ ܡܣܲܝܒܪܵܢܘܼܬܵܐ ܒܟܵܡܸܠ ܒܝܼܲܢ: ܘܡܣܲܝܒܪܵܢܘܼܬܵܐ ܘܓܵܫܲܩܬܵܐ: ܘܨܲܚܨܵܝܬܵܐ: ܨܲܚܨܵܝܬܵܐ ܗܝܼܒ̣ܝܼ: ܘܗܝܼܒ̣ܝܼ ܘܚܘܼܒܵܐ: ܘܚܘܼܒܹܗ ܕܡܫܝܼܚܵܐ ܡܲܫܦܸܚ ܥܲܠ ܠܸܒܵܘܵܬܲܝ̈ܗܝ: ܟܲܕ ܪܘܼܚܩܸܢܘܿܢ ܡܼܢ ܚܲܝܘܼܬܵܐ ܕܐ݇ܢܵܫܵܐ: ܘܡܘܼܟܡܸܠܗ݇ܘܿܢ ܠܗܹܡܸܙܡܵܢܹ̈ܐ ܕܕܵܘܝܼܕ ܕܒܸܙܡܵܪܵܐ ܗ݇ܘܼܵܐ: ܕܦܵܠܸܛ ܠܵܗ̇ ܓܵܢܝܼ ܡܼܢ ܒܹܝܬ ܐܲܣܝܼܪܹ̈ܐ ܕܫܲܟܪܸܢ ܠܫܸܡܘܼܟܼ: ܦܪܸܚܠܝܼ ܘܫܪܹܐܠܝܼ ܓܵܘ ܒܲܪܝܼܵܐ: ܘܣܦܸܪܝܼ ܠܡܿܢ ܕܦܵܪܸܩܠܝܼ ܡܼܢ ܦܵܘܚܵܐ ܕܓܲܪܕܵܒܘܼܠܹܐ. ܘܦܠܸܛܠܗ݇ܘܿܢ ܡܼܢ ܥܝܼܩܘܼܬܵܐ ܕܐ݇ܢܵܫܘܼܬܵܐ: ܘܫܘܼܪܝܼܠܗ݇ܘܿܢ ܒܦܸܠܚܵܢܵܐ ܕܟܵܪܡܵܐ ܝ݇ܕܸܥܝܵܐ ܡܼܢ ܨܲܦܪܵܐ ܕܝܵܠܕ݇ܘܼܬܵܐ: ܘܠܵܐ ܦܪܸܩܠܗ݇ܘܿܢ ܐܸܠܵܐ ܒܪܲܡܫܵܐ ܕܣܲܝܒܘܼܬܵܐ: ܘܫܩܸܠܗ݇ܘܿܢ ܝܘܼܩܪܹܗ ܕܝܵܘܡܵܐ ܘܚܸܡܹܗ: ܒܓ̰ܘܼܢܓ̰ܵܪܹ̈ܐ ܘܥܝܼܩܘܼܝܵܬܹ̈ܐ ܕܛܥܸܢܘܿܢ ܒܘܼܬ ܚܵܬܸܪ ܕܡܵܪܲܢ. ܘܒܦܪܲܩܬܵܐ ܕܝܵܘܡܵܐ ܫܩܸܠܗ݇ܘܿܢ ܗܵܩܵܐ ܕܦܸܠܚܵܢܵܢܲܝ̈ܗܝ ܚܲܕ݇ ܕܝܼܢܵܪ: ܕܐܝܼܠܹܗ ܚܲܕ݇ ܚܙܵܝܬܵܐ ܕܚܙܵܝܵܬܹ̈ܐ ܪ̈ܘܼܚܵܢܵܝܹܐ: ܚܙܵܝܬܵܐ ܚܩܸܪܬܵܐ ܕܐܲܠܵܗܵܐ: ܘܒܲܝܬܵܐ ܕܚܲܝܘܼܬܵܐ ܕܥܲܡ ܟܸܢܫܹ̈ܐ ܕܡܲܠܲܐܟ̣̈ـܹܐ ܕܢܘܼܗܪܵܐ. ܓܸܠܝܵܢܹ̈ܐ ܘܐ݇ܪ̈ܵܙܹܐ ܕܒܐܝܼܕܵܬܲܝ̈ܗܝ ܒܸܦܠܵܚܵܐ ܗ݇ܘܼܵܐ ܪܘܼܚܵܐ ܩܲܕܝܼܫܵܐ: ܘܙܵܒܸܛܘܼܬܵܐ ܕܟܠܲܝܗܝ ܟܝܵܢܹ̈ܐ ܕܒܸܪ̈ܝܵܬܹܐ: ܚܲܝܠܵܐ ܘܓ̣ܵܠܝܼܒܘܼܬܵܐ ܕܥܲܠ ܫܹܐܕܹ̈ܐ. ܐܵܢܝܼ ܕܪܵܒܵܐ ܡܸܢܲܝܗܝ ܕܐܝܼܢܵܐ ܕܝܼܢܵܪ ܕܡܲܠܟܘܼܬܵܐ: ܕܒܸܫܩܵܠܵܐ ܝ݇ܢܵܐ ܩܲܕܝܼܫܹ̈ܐ ܡܼܢ ܡܵܪܹܗ ܕܟܲܪܡܵܐ: ܘܒܸܐ݇ܣܝܵܪܵܐ ܝ݇ܢܵܐ ܟܠܝܼܠܹ̈ܐ ܠܵܐ ܚܲܪ̈ܒ̣ܵܢܹܐ ܒܙܸܪܲܢܓܘܼܬܵܐ ܕܥܲܡ ܡܫܝܼܚܵܐ: ܘܒܚܵܕܘܼܬܲܝܗܝ ܡܲܩܘܘܼܚܹܐ ܗ݇ܘܼܵܘ ܥܲܡ ܦܵܘܠܘܿܣ: ܕܐ݇ܙܵܠܬܲܢ ܬܘܼܡܸܡܠܲܢ: ܘܦܠܵܫܲܢ ܫܲܦܝܼܪܵܐ ܦܠܸܫܠܲܢ: ܘܗܲܝܡܵܢܘܼܬܵܐ ܕܠܵܐ ܠܲܟܵܐ ܢܛܸܪܲܢ. ܘܡܼܢ ܐܵܕܝܼܵܐ ܢܛܝܼܪܵܐ ܝ݇ܠܹܗ ܐܸܠܲܢ ܟܠܝܼܠܵܐ ܕܓ̣ܵܠܝܼܒܘܼܬܵܐ: ܗ̇ܘ ܕܝܼܠܹܗ ܡܫܝܼܚܵܐ ܕܦܲܪܸܥܠܲܢ ܒܝܵܘܡܵܐ ܐ݇ܚܵܪܵܝܵܐ. ܗܵܐ ܐܲܢܹ̈ܐ ܝ݇ܢܵܐ ܓ̰ܲܕܵܘܵܬܹ̈ܐ ܕܩܲܕܝܼܫܹ̈ܐ: ܒܝܼܲܝܗܝ ܒܹܐܙܵܠܵܐ ܝ݇ܢܵܐ ܠܡܲܠܟܘܼܬܵܐ. ܕܚܲܕ݇ ܡܸܢܲܝܗܝ ܝܼܗ݇ܘܼܵܐ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܐܵܗܵܐ ܕܒܘܼܬ ܕܝܼـܹܗ ܐܘܼܦ ܥܘܼܬܵܕܵܐ ܕܗܲܡܙܲܡܬܲܢ ܒܸܥܒ̣ܸܵܕܵܐ ܝ݇ܘܲܚ. ܗܲܪ ܒܐܵܗܵܐ ܣܵܪ̈ܒܵܙܹܐ ܕܣܵܪܒܵܙܘܼܬܵܐ ܪܘܼܚܵܢܵܝܬܵܐ ܡܘܼܢܬܝܼܠܗ݇ܘܿܢ: ܘܫܘܼܪܹܐܠܹܗ ܘܚܬܸܡܠܹܗ ܐܲܝܟܼ ܚܲܕ݇ ܟܲܫܝܼܪܵܐ: ܘܠܵܐ ܚܕܸܪܹܗ ܚܵܨܹܗ ܐܲܝܟܼ ܬܲܡܒܲܠ. ܐܝܼܢܵܐ ܐܲܝܟܼ ܚܲܕ݇ ܣܵܪܒܲܙ ܙܸܪܲܢܓ: ܦܠܸܫܠܹܗ ܘܓ̣ܠܸܒܠܹܗ ܠܕܸܫ̰ܡܸܢ̈ܘܼܗܝ: ܘܫܩܸܠܹܗ ܓ̣ܵܠܝܼܒܘܼܬܵܐ ܕܠܐܵܒܲܕ.
ܐܝܼܢܵܐ ܡܸܢ݇ܕܪܸܫ݇ ܘܵܓ̰ܸܒ ܝ݇ܠܵܗ̇ ܕܡܲܕܥܲܚ ܕܡܼܢ ܐܲܝܟܵܐ ܝ݇ܠܹܗ: ܒܓܸܢܣܹܗ ܝܑܼܗܘܼܵܐ ܡܼܢ ܐܲܬܪܵܐ ܕܬܹܒܼܵܐܝܼܣ ܕܓܵܘ ܡܸܨܪܹܝܢ. ܐܝܼܢܵܐ ܐܲܒ̣ܗ̈ܘܼܗܝ ܚܲܢܦܹ̈ܐ ܗ݇ܘܼܵܘ: ܘܒܘܼܬ ܕܐܵܗܵܐ ܒܪܘܿܢܲܝܗܝ ܡܼܢ ܙܥܘܿܪܘܼܬܹܗ ܡܘܼܥܒ̣ܸܪܘܿܢ ܠܡܲܕܪܵܣܵܐ ܕܝܘܼܠܦܵܢܵܐ ܕܚܲܢܦܘܼܬܵܐ. ܘܒܗ̇ܝ ܕܦܝܼܫܠܵܗ̇ ܡܠܝܼܬܵܐ ܟܠܵܗ̇ ܒܪܝܼܬܵܐ ܝ݇ܕܸܥܬܹܗ ܕܡܵܪܝܵܐ ܐܲܝܟܼ ܡܝܼ̈ܵܐ ܕܡܟܘܼܣܝܹ̈ܐ ܝ݇ܢܵܐ ܠܝܵܡܵܐ: ܐܲܝܟܼ ܗܹܡܸܙܡܵܢ ܕܢܒ̣ܝܼܵܐ: ܒܵܨܘܿܪܵܐ ܐܝܼܬ ܗ݇ܘܼܵܐ ܓܵܘ ܡܵܬܲܝܗܝ ܐܵܢܝܼ ܟܪܸ̈ܣܛܝܵܢܹ̈ܐ ܡܲܠܦܵܢܹ̈ܗ ܕܛܘܼܒ̣ܵܢܵܐ: ܐܘܼܦ ܙܹܐ ܚܕܵܐ ܥܹܕܬܵܐ ܙܥܘܿܪܬܵܐ ܐܝܼܬ ܗ݇ܘܼܵܐ ܠܗ݇ܘܿܢ. ܐܝܼܢܵܐ ܐܵܗܵܐ ܝܵܠܵܕ݇ܐ ܕܵܢܝܼܐܹܝܠ: ܒܗ̇ܝ ܕܦܪܝܼܫܵܐ ܗ݇ܘܼܵܐ ܡܼܢ ܙܥܘܿܪܘܼܬܹܗ ܠܣܵܪܒܵܙܘܼܬܵܐ ܐܲܠܵܗܵܝܬܵܐ: ܐܲܝܟܼ ܐܹܪܲܡܝܵܐ ܡܼܢ ܟܵܪ݇ܣܵܐ ܕܝܸܡܹܗ ܠܢܒ̣ܝܼܘܼܬܵܐ: ܒܕܵܝܸܡܘܼܬܵܐ ܟܹܐ ܫܵܒ̣ܸܩ ܗ݇ܘܼܵܐ ܠܡܲܕܪܵܣܵܐ ܕܚܲܢܦܘܼܬܵܐ: ܘܐܵܙܸܠ ܗ݇ܘܼܵܐ ܠܡܲܕܪ̈ܵܣܹܐ ܕܟܪܸ̈ܣܛܝܵܢܹܐ: ܘܝܵܠܸܦ ܗ݇ܘܼܵܐ ܡܲܙܡܘܿܪܹ̈ܐ: ܕܡܼܢ ܪܘܼܚܵܐ ܕܩܘܼܕܫܵܐ ܒܦܘܼܡܹܗ ܕܛܘܼܒ̣ܵܢܵܐ ܕܵܘܝܼܕ ܦܝܼܫܠܗ݇ܘܿܢ ܗܘܼܡܙܸܡܹ̈ܐ. ܐܝܼܢܵܐ ܟܲܕ ܥܒ̣ܸܪܹܗ ܥܲܠܘܼܗܝ ܚܲܕ݇ܟ̰ܵܐ ܥܕܵܢܵܐ: ܐܲܝܟܼ ܬܠܵܬ݇ܐ ܫܵܒ̣ܘܿܥܹ̈ܐ: ܗܵܝܓܵܗ ܐܵܢܝܼ ܚܲܒ̣ܪ̈ܵܘܵܬܘܼܗܝ ܕܥܲܡܹܗ ܒܸܠܝܵܦܵܐ ܗ݇ܘܼܵܘ: ܟܲܕ ܚܙܹܐܠܗ݇ܘܿܢ ܕܠܹܐ ܝ݇ܠܹܗ ܒܹܐܙܵܠܵܐ ܥܲܡܲܝܗܝ ܩܵܐ ܒܘܼܬ ܓܸܚܟܵܐ ܘܩܵܐ ܗܲܩܝܲܬܹ̈ܐ ܘܛܲܪ̈ܛܲܡܝܵܬܹܐ: ܟܠ ܐܝܼܡܵܢ ܓܘܼܪܹܗ ܕܡܲܕܪܵܣܵܐ ܫܵܪܝܼ ܗ݇ܘܼܵܐ ܠܡܲܕܪܵܣܵܐ ܕܟܪܸ̈ܣܛܝܵܢܹܐ ܘܐܵܙܸܠ ܗ݇ܘܼܵܐ: ܩܵܐ ܒܘܼܬ ܕܐܵܗܵܐ ܣܵܒܵܒ ܚܲܒ̣ܪ̈ܵܘܵܬܘܼܗܝ ܐ݇ܙܸܠܗ݇ܘܿܢ ܠܟܸܣ ܐܲܒ̣ܵܗ̈ܘܼܗܝ ܟܲܕ ܐܵܡܪܝܼܢ: ܕܒܪܘܿܢܵܘܟ̣ܘܿܢ ܡܸܗܪܸܣܛܘܿܣ ܘܗ݇ܘܹܐܠܹܗ ܟܪܸܣܛܝܵܢܵܐ: ܡܣܵܒܵܒ ܠܟܸܣܠܲܝܗܝ ܟܹܐ ܗܵܕܸܪ ܟܠ ܝܵܘܡܵܐ: ܘܒܟܬܵܒ̣ܲܝ̈ܗܝ ܟܹܐ ܩܵܪܹܗ ܠܲܝܠܹܐ ܘܝܵܘܡܵܐ. ܐܵܗܵܐ ܗ݇ܘܼܵܐ ܫܸܡܹܗ ܕܩܲܕܝܼܫܵܐ ܕܚܲܢܦܘܼܬܵܐ ܡܼܢ ܩܲܕ݇ܡܵܝܬܵܐ: ܘܐܵܗܵܐ ܫܸܡܹܗ ܕܵܢܝܼܐܹܝܠ ܡܼܢ ܒܵܬ݇ܪ ܕܩܘܼܒܸܠܹܗ ܡܲܥܡܘܿܕܝܼܬܵܐ. ܒܥܕܵܢܵܐ ܕܫܡܸܥܠܗ݇ܘܿܢ ܐܲܒ̣ܵܗ̈ܘܼܗܝ ܐܵܗܵܐ: ܩܪܹܐܠܗ݇ܘܿܢ ܠܟܸܣܠܲܝܗܝ ܘܡܚܹܐܠܗ݇ܘܿܢ ܒܩܸܫܝܘܼܬܵܐ. ܘܥܒ̣ܸܕܠܗ݇ܘܿܢ ܗܸܫܝܲܪ ܕܠܵܐ ܥܵܒ̣ܸܕ ܐܵܗܵܐ ܟܲܕ ܐܵܡܪܝܼ ܐܸܠܹܗ: ܕܐܲܢ݇ܬܿ ܒܵܥܹܝܬܿ ܘܥܲܒ̣ܕܸܬܿ ܠܲܢ ܠܵܘܡܵܐ ܒܲܝܢܵܬ ܚܲܒ̣ܪ̈ܵܘܵܬܲܢ ܚܲܢܦܹ̈ܐ؟ ܐܝܼܢܵܐ ܐܵܗܵܐ ܩܲܕܝܼܫܵܐ: ܡܣܵܒܵܒ ܒܕܵܝܸܡܘܼܬܵܐ ܒܸܪܬܵܚܵܐ ܗ݇ܘܼܵܐ ܒܚܘܼܒܹܗ ܕܡܫܝܼܚܵܐ: ܠܹܐ ܡܲܨܝܸܬ ܗ݇ܘܼܵܐ ܠܗܹܡܸܙܡܵܢܹ̈ܐ ܕܐܲܒ̣ܵܗ̈ܘܼܗܝ. ܐܝܼܢܵܐ ܟܠ ܝܵܘܡܵܐ ܟܹܐ ܐܵܙܸܠ ܗ݇ܘܼܵܐ ܒܨܲܦܪܵܐ ܘܒܪܲܡܫܵܐ ܠܥܹܕܬܵܐ ܩܲܕܝܼܫܬܵܐ: ܘܡܨܵܠܹܐ ܗ݇ܘܼܵܐ ܨܠܘܿܬܵܐ ܘܦܲܪܦܸܠ ܗ݇ܘܼܵܐ ܩܵܕ݇ܡ ܡܵܪܲܢ: ܕܦܵܨܝܼܠܹܗ ܡܼܢ ܚܲܢܦܘܼܬܵܐ: ܘܗܵܕܝܼܠܹܗ ܒܐܘܼܪܚܵܐ ܕܗܵܘܹܐ ܪܵܙܝܼ ܒܝܼـܹܗ ܪܸܙܵܝܹܗ.
ܘܒܠܲܝܠܹܐ ܕܚܲܕܒܫܲܒܵܐ ܒܛܸܫܘܵܐ ܟܹܐ ܟܵܠܝܼ ܗ݇ܘܼܵܐ ܘܡܨܵܠܝܼ ܗ݇ܘܼܵܐ ܨܠܘܿܬܵܐ: ܘܥܵܒ̣ܸܕ ܗ݇ܘܼܵܐ ܚܸܠܡܲܬ ܒܹܝܠܹܗ ܘܠܓܵܢܹܐ: ܟܲܕ ܟܹܐ ܥܵܒ̣ܸܕ ܗ݇ܘܼܵܐ ܣܓ̣ܵܕܝܵܬܹ̈ܐ. ܘܒܚܲܕ݇ ܡܼܢ ܠܲܝܠܵܘܵܬܹ̈ܐ ܛܒܸܥܠܹܗ ܒܫܸܢܬܵܐ ܥܲܡܘܼܩܬܵܐ: ܘܗ݇ܘܹܐܠܹܗ ܥܲܠܘܼܗܝ ܐܲܝܟܼ ܕܐܵܗܵܐ ܚܸܙܘܵܐ. ܚܙܹܐܠܹܗ ܠܡܵܪܲܢ ܝܼܫܘܿܥ ܒܚܸܩܪܵܐ ܓܘܼܪܵܐ ܘܠܵܘܓ̰ܵܐ ܕܠܹܐ ܐܵܬܹܐ ܠܡܗܲܡܙܘܼܡܹܐ: ܘܠܚܲܝܠܵܘܵܬܹ̈ܐ ܕܡܲܠܲܐܟ̣̈ـܹܐ ܕܟܸܠܝܹ̈ܐ ܗ݇ܘܼܵܘ ܩܵܕ݇ܡܘܼܗܝ. ܘܚܙܹܐܠܹܗ ܠܬܸܓ̣ܡܹ̈ܐ [ܦܸܨܠܹ̈ܐ] ܕܟܪܸ̈ܣܛܝܵܢܹܐ: ܕܥܲܡ ܕܡܲܠܲܐܟ̣̈ـܹܐ ܚܒ̣ܝܼܛܹ̈ܐ. ܘܚܙܹܐܠܹܗ ܠܚܲܢܦܹ̈ܐ. ܕܥܲܡ ܫܹܐܕܹ̈ܐ ܒܡܲܪܝܼܪܘܼܬܵܐ ܦܝܵܫܵܐ ܗ݇ܘܼܵܘ ܓ̰ܘܼܢܓ̰ܸܪܹ̈ܐ. ܘܫܡܸܥܠܹܗ ܩܵܠܵܐ ܡܼܢ ܫܡܲܝܵܐ ܕܡܲܩܘܘܼܚܹܐ ܗ݇ܘܼܵܐ ܘܗܵܕܟ̣ܵܐ ܒܹܐܡܵܪܵܐ ܗ݇ܘܼܵܐ: ܡܸܗܪܸܣܛܘܿܣ ܡܸܗܪܸܣܛܘܿܣ. ܘܓ̰ܘܼܘܸܒܠܹܗ ܐܵܗܵܐ ܘܐ݇ܡܸܪܹܗ: ܒܝܼܢܵܐ ܡܵܪܝܼ.. ܘܐ݇ܡܸܪܹܗ ܡܵܪܲܢ ܐܸܠܹܗ: ܡܸܢ݇ܕܪܸܫ݇ ܠܹܐ ܝ݇ܠܵܗ̇ ܚܫܸܚܬܵܐ ܕܦܵܐܸܫ ܩܸܪܝܵܐ ܫܸܡܘܼܟܼ ܡܸܗܪܸܣܛܘܿܣ: ܐܸܠܵܐ ܦܵܐܸܫ ܩܸܪܝܵܐ ܕܵܢܝܼܐܹܝܠ: ܗ̄:ܕ̄. ܕܝܼܢܵܐ ܕܐܲܠܵܗܵܐ: ܡܣܵܒܵܒ ܩܵܐ ܦܸܠܚܵܢܵܐ ܕܝܼܝܼ ܩܲܡ ܓܵܒܸܢܘܼܟܼ: ܪܥܸܫܠܹܗ ܡܼܢ ܫܸܢܬܹܗ: ܟܲܕ ܡܸܠܝܵܐ ܗ݇ܘܼܵܐ ܙܕܥܘܿܬܵܐ ܘܚܲܕܘܼܬܵܐ: ܥܲܠ ܡܸܢܕܝܼ ܕܚܙܹܐܠܹܗ ܘܫܡܸܥܠܹܗ. ܘܒܵܬ݇ܪ ܚܲܕ݇ܟ̰ܵܐ ܝܵܘܡܵܢܹ̈ܐ: ܡܸܢ݇ܕܪܹܫ݇ ܐ݇ܙܸܠܹܗ ܠܟܸܣ ܩܲܫܝܼܫܵܐ ܕܡܵܠܸܦ ܗ݇ܘܼܵܐ ܠܹܗ ܒܝܘܼܠܦܵܢܵܐ ܒܗܲܡܙܲܡܬܵܐ ܕܡܲܙܡܘܿܪܹ̈ܐ: ܗܘܼܩܝܼܠܹܗ ܠܚܸܙܘܵܐ ܩܵܕ݇ܡ ܕܝܼܘܼܗܝ. ܟܲܕ ܫܡܸܥܠܹܗ ܗ̇ܘ ܩܲܫܝܼܫܵܐ ܐܵܢܝܼ ܗܹܡܸܙܡܵܢܹ̈ܐ: ܝ݇ܕܸܥܠܹܗ ܕܗ̇ܘ ܝ݇ܠܹܗ ܡܵܐܢܵܐ ܓܘܼܒܝܵܐ ܗܕܝܼܪܵܐ ܝ݇ܠܹܗ ܕܡܸܢܹܗ ܗܵܘܹܐ: ܘܗܵܝܓܵܗ ܦܬܸܚܠܹܗ ܓܘܿܠܵܐ ܕܡܝܼ̈ܵܐ ܕܚܲܝܹ̈ܐ ܕܡܲܥܡܘܿܕܝܼܬܵܐ ܘܡܘܼܥܡܸܕܠܹܗ: ܘܡܘܼܬܸܒ̣ܠܹܗ ܫܸܡܵܐ ܕܵܢܝܼܐܹܝܠ: ܐܲܝܟܼ ܕܦܝܼܫܠܹܗ ܩܸܪܝܵܐ ܡܼܢ ܫܵܦܵܩܲܬ ܐܲܠܵܗܵܝܬܵܐ. ܒܲܣ ܐܵܗܵܐ ܫܸܡܵܐ. ܡܲܕܥܸܝܵܢܵܐ ܝ݇ܠܹܗ ܗܿܘ ܡܸܢܕܝܼ ܕܗܕܝܼܪܵܐ ܝ݇ܠܹܗ ܕܗܵܘܹܐ ܡܸܢܹܗ. ܐܘܼܦ ܙܹܐ ܕܕܵܢܝܼܐܹܝܠ ܢܒ̣ܝܼܵܐ ܦܝܼܫܠܹܗ ܓܘܼܒܝܵܐ ܒܓܸܠܝܵܢܹ̈ܐ: ܕܝܵܕܸܥ ܡܸܢܕܝܼܵܢܹ̈ܐ ܕܕܲܥܬܝܼܕ: ܘܡܲܚܙܹܐ ܡܸܢܕܝܼܵܢܹ̈ܐ ܛܸܫܝܹ̈ܐ: ܗܵܕܟ̣ܵܐ ܩܲܕܝܼܫܵܐ ܡܵܪܝ ܕܵܢܝܼܐܹܝܠ ܦܝܼܫܠܹܗ ܓܘܼܒܝܵܐ ܠܦܸܠܚܵܢܵܐ ܫܡܲܝܵܢܵܐ. ܘܡܼܢ ܒܵܬ݇ܪ ܕܥܡܸܕܠܹܗ ܘܠܒ̣ܸܫܠܹܗ ܠܡܫܝܼܚܵܐ ܡܼܢ ܡܝܼ̈ܵܐ ܕܡܲܥܡܘܿܕܝܼܬܵܐ: ܘܡܸܢ݇ܕܪܹܫ݇ ܠܵܐ ܐ݇ܙܸܠܹܗ ܠܒܲܝܬܵܐ ܕܨܵܢܵܡܹ̈ܐ ܘܠܵܐ ܙܹܐ ܠܝܘܼܠܦܵܢܵܐ ܕܚܲܢܦܘܼܬܵܐ. ܘܟܲܕ ܪܵܒܵܐ ܟܟ̰ܸܚܠܗ݇ܘܿܢ ܐܲܒ̣ܵܗ̈ܘܼܗܝ: ܠܐܵܗܵܐ ܕܗ̇ܘ ܠܵܐ ܡܘܼܨܝܸܬܿܠܹܗ ܐܸܠܲܝܗܝ. ܘܗ̇ܝ ܟܠ ܝܵܘܡܵܐ ܦܵܘܠܘܿܣ ܫܠܝܼܚܵܐ ܟܹܐ ܗܲܡܙܸܡ ܗ݇ܘܼܵܐ ܩܵܕ݇ܡܲܝܗܝ: ܕܣܵܒܵܒ ܕܠܵܐ ܬܘܼܚܡܸܢܵܘܟ̣ܘܿܢ ܒܓܵܢܵܘܟ̣ܘܿܢ ܕܝܵܕܥܝܼܬܘܿܢ ܠܐܲܠܵܗܵܐ: ܘܐܲܠܵܗܵܐ ܩܲܡ ܣܵܦܝܼܠܵܘܟ̣ܘܿܢ ܠܚܝܼܵܠ ܕܒܵܛܝܼܠܘܼܬܵܐ: ܕܡܫܲܚܠܸܦܝܼܬܘܿܢ ܣܓ̣ܵܕܬܹܗ ܕܐܲܠܵܗܵܐ ܕܠܹܐ ܦܵܐܸܫ ܚܪܝܼܒ̣ܵܐ: ܒܕܵܡܲܝܬܵܐ ܕܨܲܠܡܵܐ ܕܒܲܪܢܵܫܵܐ ܕܟܹܐ ܦܵܐܸܫ ܚܪܝܼܒ̣ܵܐ: ܘܟܲܕ ܒܐܲܢܹ̈ܐ ܘܒܐ݇ܚܹܪ̈݇ܢܹܐ ܕܐܲܝܟܼ ܕܐܵܢܝܼ ܟܹܐ ܡܲܢܟ̣ܸܣ ܗ݇ܘܼܵܐ ܠܗ݇ܘܿܢ: ܘܐܲܢܹ̈ܐ ܟܹܐ ܟܲܪܒܝܼ ܗ݇ܘܼܵܘ ܥܲܠܘܼܗܝ: ܘܒܐ݇ܟ̣ܵܠܬܵܐ ܕܓܲܦܹ̈ܐ ܕܡܲܦܠܘܼܚܹܐ ܗ݇ܘܼܵܘ ܠܟܸܣܠܹܗ. ܘܐܵܗܵܐ ܕܥܲܠ ܩܲܥܝܵܐ ܩܘܼܝܵܐ ܡܘܼܬܸܒ̣ܬܵܐ ܗ݇ܘܼܵܐ ܒܸܢܝܲܬܹܗ: ܘܠܹܐ ܦܵܝܫܵܐ ܗ݇ܘܼܵܐ ܫܥܝܼܫܬܵܐ ܡܼܢ ܐ݇ܟ̣ܵܠܬܵܐ ܕܓܲܦܲܝܗܝ: ܐܝܼܢܵܐ ܒܕܵܝܸܡܘܼܬܵܐ ܟܹܐ ܐܵܟ̣ܸܠ ܗ݇ܘܼܵܐ ܚܲܡ ܒܕܘܼܟ̣ܪܘܼܢܝܵܐ ܕܚܘܼܒܹܗ ܕܡܫܝܼܚܵܐ.
ܟܲܕ ܓܘܼܪܘܸܣܠܹܗ ܐܲܝܟܼ ܒܲܪ ܚܲܡܫܲܥܣܲܪ ܫܸܢܹ̈ܐ: ܡܘܼܠܝܸܨܠܗ݇ܘܿܢ ܐܲܒ̣ܵܗ̈ܘܼܗܝ ܕܛܲܠܒܝܼܠܹܗ ܒܲܟ̣ܬܵܐ: ܕܥܒ̣ܘܿܕ ܒܵܘܲܪ ܒܣܵܒܵܒ ܕܒܲܟ̣ܬܵܐ ܡܲܕܸܥܪܝܼܠܹܗ ܡܼܢ ܟܪܸܣܛܝܵܢܘܼܬܵܐ. ܐܝܼܢܵܐ ܟܲܕ ܚܙܹܐܠܹܗ ܝܵܠܕ݇ܐ ܕܵܢܝܼܐܹܝܠ ܚܝܼܵܠ ܕܐܲܒ̣ܵܗ̈ܘܼܗܝ: ܕܒܩܪܵܝܵܐ ܗ݇ܘܼܵܘ ܐܸܠܹܗ ܕܠܟܸܣ ܨܵܠܝܼܵܬܹ̈ܐ [ܟ̰ܘܼܪ̈ܘܼܬܡܹܐ] ܕܥܵܠܡܵܐ ܘܩܘܼܢܝܵܐ ܕܚܛܝܼܬܵܐ: ܩܸܡܠܹܗ ܘܐ݇ܙܸܠܹܗ ܠܟܸܣ ܗ̇ܘ ܩܲܫܝܼܫܵܐ ܕܛܵܫܝܼܠܹܗ: ܘܐ݇ܡܸܪܹܗ ܐܸܠܹܗ ܟܠ ܡܸܢܕܝܼ ܕܒܣܵܡܵܝ ܗ݇ܘܼܵܘ ܐܲܒ̣ܗ̈ܘܼܗܝ: ܕܫܲܩܠܝܼ ܠܹܗ ܒܲܟ̣ܬܵܐ ܘܫܲܪܟܵܐ. ܘܒܘܼܩܸܪܹܗ ܡܸܢܹܗ ܩܲܫܝܼܫܵܐ ܘܐ݇ܡܸܪܹܗ ܐܸܠܹܗ: ܕܐܲܢ݇ܬܿ: ܒܪܘܿܢܝܼ: ܡܘܼܕܝܼ ܒܣܵܡܘܼܟܼ ܝ݇ܠܵܗ̇؟ ܓ̰ܘܼܘܸܒܠܹܗ ܐܸܠܹܗ: ܕܒܣܵܡܝܼ ܝ݇ܠܵܗܿ ܕܗܵܘܸܢ ܕܲܝܪܵܝܵܐ ܓܵܘ ܕܲܝܪܵܐ ܣܵܒܵܒ ܡܘܼܕܝ݇ ܝܘܼܬܪܵܢܵܐ ܐܝܼܬ ܓܵܘ ܕܐܵܗܵܐ ܥܵܠܡܵܐ ܕܡܲܚܸܒܸܢܹܗ؟ ܘܡܸܢ݇ܕܪܹܫ̄ ܕܵܐܟ̣ܝܼ ܒܸܬ ܬܲܡܸܡܸܢ ܠܩܵܘܠܵܐ ܕܡܫܝܼܚܵܐ ܕܐ݇ܡܸܪܹܗ: ܕܟܠ ܡ̇ܢ ܕܠܵܐ ܫܵܒ̣ܸܩ ܠܒܵܒܘܼܗܝ ܘܠܝܸܡܘܼܗܝ ܘܫܵܩܸܠ ܨܠܝܼܒ̣ـܹܗ ܘܐܵܬܹܐ ܒܵܬ݇ܪܝܼ: ܠܹܐ ܚܵܫܸܚ ܕܗܵܘܹܐ ܐܸܠܝܼ ܬܲܠܡܝܼܕܵܐ؟ ܘܕܵܐܟ̣ܝܼ ܚܲܕ݇ ܐ݇ܢܵܫܵܐ ܡܩܵܒܸܠ ܚܲܕ݇ ܩܵܘܠܵܐ ܡܼܢ ܩܵܘ̈ܠܹܐ ܕܡܵܪܲܢ: ܘܡܲܨܝܵܢܵܐ ܝ݇ܠܹܗ ܠܸܢܛܵܪܵܐ ܦܘܼܩܕܵܢ̈ܘܼܗܝ: ܘܕܗܵܘܹܐ ܚܲܕ݇ ܐܵܘܵܢܵܐ ܠܚܘܼܒܹܗ: ܐܸܢ ܠܵܐ ܫܵܒ̣ܸܩ ܠܹܗ ܠܥܵܠܡܵܐ ܘܐܵܙܸܠ ܒܵܬ݇ܪܹܗ؟ ܘܐܸܢ ܐܲܢܹ̈ܐ ܠܵܐ ܥܵܒ̣ܸܕ: ܡܘܼܕܝ݇ ܝܘܼܬܪܵܢܵܐ ܒܸܬ ܗܵܘܹܐ ܠܐ݇ܢܵܫܵܐ؟ ܘܟܲܕ ܫܡܸܥܠܹܗ ܐܵܗܵܐ ܩܲܫܝܼܫܵܐ ܐܲܢܹ̈ܐ ܗܹܡܸܙܡܵܢܹ̈ܐ ܕܥܵܓ̰ܝܼܒܘܼܬܵܐ ܡܼܢ ܕܐܵܗܵܐ ܝܵܠܵܕ݇ܐ ܥܵܩܸܠܕܲܪ: ܥܘܼܓ̰ܸܒܠܹܗ ܒܦܲܪܡܵܝܬܹܗ: ܕܟܡܵܐ ܒܸܪܬܵܚܵܐ ܗ݇ܘܼܵܐ ܒܚܘܼܒܹܗ ܕܡܫܝܼܚܵܐ. ܘܝ݇ܕܸܥܠܹܗ ܐܵܗܵܐ ܩܲܫܝܼܫܵܐ: ܕܩܪܵܝܬܹܗ ܕܡܵܪܝ ܕܵܢܝܼܐܹܝܠ ܡܼܢ ܐܲܠܵܗܵܐ ܝ݇ܠܵܗ̇. ܘܗܵܝܓܵܗ ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܒܪܘܿܢܝܼ: ܐܸܢ ܕܐܵܗܵܐ ܡܘܼܬܸܒ̣ܬܵܐ ܝ݇ܠܵܗ̇ ܐܸܠܘܼܟܼ ܠܸܥܒ̣ܵܕܵܐ: ܠܲܐܟ̣ܵܐ ܠܹܐ ܫܲܒ̣ܩܝܼܠܘܼܟܼ ܐܲܒ̣ܵܗ̈ܘܼܟܼ ܠܸܗܘܵܝܵܐ ܒܩܘܼܪܒܵܝܘܼܬܲܝܗܝ. ܓ̰ܘܼܘܸܒܠܹܗ ܝܵܠܵܕ݇ܐ ܘܐ݇ܡܸܪܹܗ ܐܸܠܹܗ. ܠܐܲܝܟܵܐ ܒܸܬ ܝܵܗ݇ܒ̣ܸܬܿ ܠܝܼ ܪܵܥܝܼ ܕܐܵܙܸܠ݇ܢ؟ ܓ̰ܘܼܘܸܒܠܹܗ ܗ̇ܘ ܩܲܫܝܼܫܵܐ: ܕܪ݇ܚܘܿܫ ܠܛܲܒ̣ܢܹܝܣܛܵܐ ܠܕܲܝܪܵܐ ܕܒܹܝܬ ܦܵܟ̣ܘܿܡ. ܓ̰ܘܼܘܸܒܠܹܗ ܝܵܠܵܕ݇ܐ ܘܐ݇ܡܸܪܹܗ ܐܸܠܹܗ: ܕܠܹܐ ܝ݇ܘܸܢ ܒܝܼܕܲܥܝܵܐ ܕܵܐܟ̣ܝܼ ܒܸܬ ܐܵܙܸܠ݇ܢ ܠܗ̇ܝ ܕܲܝܪܵܐ: ܘܐܵܡܸܪ ܐܸܠܹܗ ܩܲܫܝܼܫܵܐ: ܕܐܝܼܡܵܢ ܕܐܵܬܝܼ ܕܲܝܪ̈ܵܝܹܐ ܠܒܵܙܲܪ: ܕܙܲܒܢܝܼ ܡܸܢܕܝܼܵܢܹ̈ܐ ܕܬܘܼܪ̈ܨܹܐ ܝ݇ܢܵܐ ܒܐܝܼܕܵܬܲܝ̈ܗܝ: ܪ݇ܚܘܿܫ ܥܲܡܲܝܗܝ. ܘܡܵܪܝܵܐ ܝ݇ܠܹܗ ܕܗ݇ܘܹܐܠܹܗ ܡܲܦܫܸܛܵܢܵܐ ܠܩܲܕܝܼܫ̈ܘܼܗܝ ܒܟܠ ܕܵܘܪܵܐ ܘܕܵܘܪܵܐ: ܐܵܗܵܐ ܒܸܬ ܐܵܙܸܠ ܥܲܡܘܼܟܼ ܘܒܸܬ ܡܲܕܪܸܙ ܐܵܗܵܐ ܐܘܼܪܚܵܐ ܕܡܘܼܬܸܒ̣ܬܵܐ ܝ݇ܠܵܗ̇ ܩܵܕ݇ܡܘܼܟܼ: ܗܲܠ ܕܡܲܟܡܸܠܸܬܿ ܪܸܙܵܝܹܗ ܕܐܲܠܵܗܵܐ ܕܐܸܠܹܗ ܝܘܼܗ݇ܒ̣ܸܠܘܼܟܼ ܓܵܢܘܼܟܼ.
ܘܡܼܢ ܒܵܬ݇ܪ ܚܲܕ݇ ܫܵܒ̣ܘܿܥܵܐ ܡܼܢ ܥܕܵܢܵܐ: ܡܘܼܫ݇ܟ̰ܸܚܠܹܗ ܝܵܠܵܕ݇ܐ ܕܵܢܝܼܐܹܝܠ ܐܲܚܘܿܢܘܵܬܹ̈ܐ ܓܵܘ ܫܘܼܩܵܐ [ܒܵܙܲܪ] ܡܼܢ ܕܲܝܪܹܗ ܕܐܲܒ̣ܵܐ ܒܵܟ̣ܘܿܡ: ܘܐ݇ܙܸܠܹܗ ܥܲܡܲܝܗܝ ܠܕܲܝܪܵܐ. ܘܒܵܬ݇ܪ ܚܲܕ݇ܟ̰ܵܐ ܝܵܘܡܵܢܹ̈ܐ: ܡܘܼܠܒ̣ܸܫܠܗ݇ܘܿܢ ܒܪܹܙܵܐ ܡܝܘܼܩܪܵܐ ܕܕܲܝܪܵܝܘܼܬܵܐ. ܘܡܼܢ ܐܵܕܝܼܵܐ ܫܘܼܪܹܐܠܹܗ ܐܲܬܠܹܝܛܵܐ [ܙܸܪܲܢܓ] ܡܵܪܝ ܕܵܢܝܼܐܹܝܠ ܦܵܠܵܚܹܗ ܕܡܫܝܼܚܵܐ ܡܵܠܘܿܦܹܐ ܓܵܢܹܗ ܒܦܸܠܚܵܢܵܐ ܪܘܼܚܵܢܵܝܵܐ: ܟܠܹܐܠܹܗ ܒܪܹܫܵܐ ܕܟܠܲܝܗܝ ܨܦܵܝܘܼܝܵܬܹ̈ܐ: ܒܡܵܨܝܲܬܵܐ ܘܒܫܸܠܝܘܼܬܵܐ: ܐܲܢܹ̈ܐ ܕܒܝܼܲܝܗܝ ܗ݇ܘܹܐܠܹܗ݇ܘܿܢ ܓ̣ܲܠܒܵܢܹ̈ܐ ܐܵܢܝܼ ܩܲܕ݇ܡܵܝܹ̈ܐ ܘܐ݇ܚܵܪ̈ܵܝܹܐ: ܘܒܘܼܬ ܕܝܼܲܝܗܝ ܒܸܣܗܵܕܵܐ ܝ݇ܠܹܗ ܫܠܝܼܚܵܐ: ܘܡܵܪܲܢ ܒܹܐܟ̣ܵܠܵܐ ܗ݇ܘܼܵܐ ܚܲܡ ܕܝܼܲܢ ܟܲܕ ܒܹܐܡܵܪܵܐ: ܕܒܡܵܢܝܼ ܒܸܬ ܥܲܡܪܸܢ: ܐܸܠܵܐ ܒܗ̇ܘ ܕܝܼܠܹܗ ܫܸܠܝܵܐ ܘܡܲܟܝܼܟ̣ܵܐ. ܘܗ̇ܝ ܐ݇ܚܹܪ݇ܬܵܐ ܕܐ݇ܡܸܪܹܗ ܦܵܘܠܘܿܣ ܒܘܼܬ ܡܵܪܲܢ: ܗ̇ܘ ܕܡܲܟܸܦ ܓܵܢܹܗ ܘܡܲܨܝܸܬ ܗܲܠ ܠܡܵܘܬܵܐ: ܐܝܼܢܵܐ ܡܵܘܬܵܐ ܕܙܩܝܼܦܵܐ: ܒܘܼܬ ܕܐܵܗܵܐ ܐܘܼܦ ܐܲܠܵܗܵܐ ܡܘܼܙܝܸܕܠܹܗ ܘܚܩܸܪܹܗ: ܘܝܘܼܗ݇ܒ̣ܸܠܹܗ ܫܸܡܵܐ ܒܘܼܫ ܨܦܵܝܝܼ ܡܼܢ ܟܠ ܫܸܡܵܢܹ̈ܐ. ܘܥܲܡ ܕܐܵܢܝܼ ܓܘܼܒܹܐܠܹܗ ܨܵܘܡܵܐ ܘܢܙܝܼܪܘܼܬܵܐ ܘܪܲܒܵܢܘܼܬܵܐ: ܘܫܒ̣ܘܿܩ ܡܼܢ ܚܲܕܒܫܲܒܵܐ ܠܚܲܕܒܫܲܒܵܐ ܠܹܐ ܐܵܟ̣ܸܠ ܗ݇ܘܼܵܐ ܡܹܐܟ̣ܘܼܠܬܵܐ: ܫܒ̣ܘܿܩ ܡܼܢ ܝܲܪܩܵܐ ܒܪܝܼܙܵܐ ܝܲܢ ܡܼܢ ܣܸܠܩܵܐ: ܝܲܢ ܟܲܪܒܵܐ (ܚܲܕ݇ ܦܸܨܠܵܐ ܕܓܸܠܵܐ ܝ݇ܠܹܗ) ܚܲܕܬܵܐ: ܘܐܝܼܬ ܗ݇ܘܼܵܐ ܓܵܘ ܗ̇ܘ ܕܲܝܪܵܐ ܪܵܒܵܐ ܐ݇ܢܵܫܹ̈ܐ ܟܡܝܼܠܹ̈ܐ: ܘܒܸܕܡܵܝܵܐ ܗ݇ܘܼܵܐ [ܕܵܢܝܼܐܹܝܠ] ܒܝܼܲܝܗܝ ܒܐܵܢܝܼ ܕܘܼܒܵܪܹ̈ܐ. ܕܐܵܕܵܒܘܼܬܵܐ ܘܓܵܫܲܩܬܵܐ ܒܥܲܝܢܹ̈ܐ ܟܘܼܦܹ̈ܐ: ܘܕܵܝܸܡ ܠܸܫܵܢܹܗ ܫܬܝܼܩܵܐ ܗ݇ܘܼܵܐ. ܐܸܢ ܠܵܐ ܦܵܐܸܫ ܗ݇ܘܼܵܐ ܒܘܼܩܪܵܐ: ܚܲܕ݇ ܒܘܼܩܵܪܵܐ ܡܼܢ ܚܲܕ݇ ܐ݇ܢܵܫܵܐ ܗܸܟ̰ ܠܹܐ ܗܲܡܙܸܡ ܗ݇ܘܼܵܐ. ܐܝܼܢܵܐ ܪܵܒܵܐ ܝ݇ܠܵܗ̇ ܠܸܟܬܵܒ̣ܵܐ ܒܘܼܬ ܫܵܗܲܪܬܹܗ ܘܣܓ̣ܵܕܝܵܬܹ̈ܗ. ܘܨܠܸܒ̣ܠܹܗ ܗܲܕܵܡ̈ܘܼܗܝ ܒܘܼܬ ܚܵܬܸܪ ܕܥܵܠܡܵܐ: ܘܐܵܗܵܐ ܦܝܼܫܠܹܗ ܡܸܚܝܵܐ ܠܙܩܝܼܦܵܐ: ܒܗ̇ܝ ܕܫܡܸܥܠܹܗ ܠܫܠܝܼܚܵܐ ܕܐ݇ܡܸܪܹܗ: ܕܐܵܢܵܐ ܙܩܝܼܦܵܐ ܝ݇ܘܸܢ ܠܥܵܠܡܵܐ: ܘܥܵܠܡܵܐ ܙܩܝܼܦܵܐ ܝ݇ܠܹܗ ܐܸܠܝܼ. ܘܒܘܼܬ ܐܘܼܪܚܵܐ ܕܦܸܠܚܵܢܵܢ̈ܘܼܗܝ ܟܡܝܼ̈ܠܹܐ ܘܬܪܝܼܨܘܼܬܵܐ ܕܓܵܢܹܗ. ܗ݇ܘܹܐܠܹܗ ܚܕܵܐ ܓܵܫܲܩܬܵܐ ܕܫܲܗܘܲܬܵܐ ܩܵܐ ܟܠܲܝܗܝ ܐܲܚܘܿܢܘܵܬܹ̈ܐ ܕܕܲܝܪܵܐ ܕܕܵܡܝܼ ܐܸܠܹܗ.
ܟܲܕ ܩܵܐ ܡܸܬܚܵܐ ܕܐܸܫܬܵܐ ܫܸܢܹ̈ܐ ܗ݇ܘܹܐܠܹܗ ܓܵܘ ܕܲܝܪܵܐ ܒܐܵܗܵܐ ܬܪܝܼܨܘܼܬܵܐ ܕܕܘܼܒܵܪܹ̈ܐ: ܒܘܼܗܪܸܢܵܐ ܥܲܝܢܵܐ ܟܣܝܼܬܵܐ ܕܚܝܼܵܠܹܗ ܒܚܸܙܘܹ̈ܐ ܕܓܵܫܲܩܝܵܬܹ̈ܐ ܫܡܲܝܵܢܵܝܹ̈ܐ: ܘܐܲܝܟܼ ܡܘܼܫܹܐ ܪܵܒܵܐ ܫܘܼܦܪܸܢܹܗ ܦܲܪܨܘܿܦܹܗ ܒܚܙܵܝܬܵܐ ܪܘܼܚܵܢܵܝܬܵܐ: ܒܘܼܬ ܕܐܵܗܵܐ ܒܘܼܚܸܠܹܗ ܒܝܼـܹܗ ܣܵܛܵܢܵܐ: ܨܦܸܚܠܹܗ ܥܲܠܘܼܗܝ ܪܵܒܵܐ ܦܠܵܫܹ̈ܐ ܕܬܗܵܪܹ̈ܐ ܬܗܵܪܹ̈ܐ: ܡܼܢ ܫܲܗܘܲܬܝܵܬܹ̈ܐ ܘܡܘܼܫܬܵܪܝܼܘܼܬܵܐ: ܕܣܲܢܣܘܼܠܹ̈ܐ ܝ݇ܢܵܐ ܠܟܸܣ ܕܐܵܗܵܐ ܥܵܠܡܵܐ. ܐܝܼܢܵܐ ܐܵܗܵܐ ܛܘܼܒ̣ܵܢܵܐ: ܠܟܠܲܝܗܝ ܐܵܢܝܼ ܒܚܲܝܠܵܐ ܕܗܲܝܲܪܬܹܗ ܕܡܵܪܲܢ ܒܸܫܪܵܝܵܐ ܗ݇ܘܼܵܐ ܘܦܵܪܘܿܩܹܐ ܗ݇ܘܼܵܐ ܡܸܢܹܗ: ܒܙܸܪܲܢܓܘܼܬܵܐ ܕܓܵܘ ܦܠܵܫܵܐ ܒܘܼܬ ܚܵܬܸܪ ܗܵܩܘܼܬܵܐ ܕܒܸܦܠܵܫܵܐ ܗ݇ܘܼܵܐ. ܐܝܼܢܵܐ ܟܲܕ ܡܼܢ ܕܐܵܗܵܐ ܠܵܐ ܗ݇ܘܹܐܠܹܗ ܓ̣ܵܠܒܵܢܵܐ: ܒܘܼܬ ܗ̇ܝ ܕܫܘܼܚܠܸܦܠܹܗ ܕܸܫ̰ܡܸܢ ܦܸܨܠܵܐ ܕܦܠܵܫܹܗ ܠܚܲܕ݇ ܡܸܢܕܝܼ ܐ݇ܚܹܪ݇ܢܵܐ: ܘܐܵܬܝܼ ܗ݇ܘܼܵܘ ܥܲܠܘܼܗܝ ܫܹܐܕܹ̈ܐ ܪܵܒܵܐ ܥܕܵܢܵܬܹ̈ܐ ܒܠܲܝܠܵܘܵܬܹ̈ܐ: ܘܒܡܚܵܝܵܬܹ̈ܐ ܕܦܝܵܫܵܐ ܗ݇ܘܼܵܘ ܡܘܼܦܠܸܚܹ̈ܐ ܥܲܡܹܗ. ܗܲܠ ܕܫܵܒ̣ܩܝܼ ܗ݇ܘܼܵܘ ܠܹܗ ܐܲܝܟܼ ܡܝܼܬܵܐ: ܐܝܼܢܵܐ ܐܵܗܵܐ ܕܠܸܒܹܗ ܕܒܗܝܼܒ̣ܝܼ ܗ݇ܘܼܵܐ ܘܐ݇ܣܝܼܪܵܐ ܠܟܸܣ ܐܲܠܵܗܵܐ: ܓܵܘ ܦܠܵܫܵܐ ܡܲܩܘܘܼܚܹܐ ܗ݇ܘܼܵܐ ܘܒܹܐܡܵܪܵܐ ܕܲܪܩܘܼܒ̣ܠ ܫܹܐܕܹ̈ܐ: ܕܒܸܬ ܩܵܐܸܡ ܐܲܠܵܗܵܐ ܘܒܸܬ ܒܲܪܒܸܙܠܗ݇ܘܿܢ ܟܠܲܝܗܝ ܕܸܫ̰ܡܸܢܘܼܗܝ: ܘܒܸܬ ܥܲܪܩܝܼ ܣܲܢܝܵܢ̈ܘܼܗܝ ܡܼܢ ܩܵܕ݇ܡܘܼܗܝ. ܘܗ̇ܝ ܐ݇ܚܹܪ݇ܬܵܐ: ܕܐܵܢܝܼ ܓܵܘ ܐܵܪܵܒܵܢܵܐ ܘܐܵܢܝܼ ܒܪܵܟܵܒ̣ܵܐ. ܘܐܲܚܢܲܢ ܒܫܸܡܹܗ ܕܡܵܪܝܵܐ ܐܲܠܵܗܲܢ ܒܸܬ ܚܲܠܸܢܢܲܚ: ܘܪܵܒܵܐ ܦܠܵܫܹ̈ܐ ܥܒ̣ܸܕܠܗ݇ܘܿܢ ܥܲܡܸܗ ܕܲܝܘܹ̈ܐ: ܐܵܢܝܼ ܕܠܵܐ ܡܲܠܝܸܨܵܐ ܠܝܼ ܕܟܲܬܒ̣ܸܢܘܿܢ. ܕܠܵܐ ܝܲܪܟ̣ܵܐ ܬܲܫܥܝܼܬܵܐ ܠܒ̣ܲܕܲܪ ܡܼܢ ܪܝܼܙܵܐ: ܘܡܲܣܩܸܕܵܐ ܠܣܩܝܼܕܹ̈ܐ ܘܬܲܡܒܵܠܹ̈ܐ.
ܡܼܢ ܒܵܬ݇ܪ ܕܗ݇ܘܹܐܠܹܗ ܓܵܘ ܕܲܝܪܵܐ ܕܒܹܝܬ ܦܵܟ̣ܘܿܡ ܐܲܝܟܼ ܥܸܣܪܵܐ ܫܸܢܹ̈ܐ: ܟܲܕ ܒܹܐ݇ܙܵܠܵܐ ܗ݇ܘܼܵܐ ܠܵܩܵܕ݇ܡܵܐ ܒܕܘܼܒܵܪܹ̈ܐ ܡܲܠܲܐܟ̣ܵܝܹ̈ܐ: ܩܪܹܐܠܵܗ̇ ܠܬܵܡܵܐ ܫܵܦܵܩܲܬ ܐܲܠܵܗܵܝܬܵܐ ܠܛܘܼܒ̣ܵܢܵܐ ܡܵܪܝ ܐܵܘܓܹܝܢ. ܘܟܲܕ ܚܝܼܠܹܗ ܬܵܡܵܐ ܩܵܐ ܚܲܕ݇ܟ̰ܵܐ ܥܕܵܢܵܐ: ܚܙܹܐܠܹܗ ܡܵܪܝ ܕܵܢܝܼܐܹܝܠ ܠܡܵܪܝ ܐܵܘܓܹܝܢ: ܘܦܝܼܫܠܹܗ ܒܘܼܪܟ̣ܵܐ ܡܸܢܹܗ. ܘܐܲܝܟܼ ܚܲܕ݇ ܡܼܢ ܫܠܝܼܚܹ̈ܐ ܩܲܕ݇ܡܵܝܹ̈ܐ ܒܸܥܒ̣ܵܕܵܐ ܗ݇ܘܼܵܐ ܡܵܪܲܢ ܒܐܝܼܕܵܬ̈ܘܼܗܝ ܢܝܼܫܲܢܩܹ̈ܐ ܘܥܵܓ̰ܝܼܒܘܼܝܵܬܹ̈ܐ: ܘܡܘܼܚܸܒܠܹܗ ܘܬܒܸܥܠܹܗ ܐܸܠܹܗ: ܘܡܘܼܚܸܒܠܹܗ ܡܵܪܝ ܐܵܘܓܹܝܢ ܠܡܵܪܝ ܕܵܢܝܼܐܹܝܠ ܡܼܢ ܟܠܹܗ ܠܸܒܹܗ: ܘܗܘܼܡܙܸܡܠܹܗ ܥܲܡܹܗ ܟܠܲܝܗܝ ܢܝܼܫܲܢܩܹ̈ܐ ܟܸܣܝܹ̈ܐ ܕܕܲܪܝܪܵܝܘܼܬܵܐ. ܘܡܘܼܚܙܹܐܠܹܗ ܟܠܵܗ̇ ܐܘܼܪܚܵܐ ܕܘܼܙ ܕܡܵܪܲܢ ܝܼܫܘܿܥ ܡܫܝܼܚܵܐ ܘܒܕܵܝܸܡܘܼܬܵܐ ܬܸܪ̈ܘܲܝ ܟܹܐ ܡܲܒܣܸܡܝܼ ܗܘܼܵܘ ܒܚܸܙܘܹ̈ܐ ܐܲܠܵܗܵܝܹ̈ܐ: ܘܟܠ ܓܸܠܝܵܢܹ̈ܐ ܕܡܼܢ ܪܘܼܚܵܐ ܕܩܘܼܕܫܵܐ ܦܝܵܫܵܐ ܗ݇ܘܼܵܘ ܓܸܠܝܹ̈ܐ ܐܸܠܲܝܗܝ: ܚܕܵܐ ܓ̰ܘܲܓ̰ܬܵܐ ܕܪܘܼܚܵܐ ܕܩܘܼܕܫܵܐ ܓ̰ܘܸܓ̰ܠܵܗ̇ ܒܩܲܕܝܼܫܵܐ ܡܵܪܝ ܐܵܘܓܹܝܢ: ܕܐܵܙܸܠ ܕܥܵܩܸܪ ܒܲܪܙܲܪܥܵܐ ܠܝܼܛܵܐ ܕܩܝܼܘܵܪܹ̈ܐ ܕܒܝܼܫܵܐ: ܕܙܲܪܥܹܗ ܒܝܼܘܼܗ̇ ܒܲܪܙܲܪܥܵܐ ܛܵܒ̣ܵܐ. ܗܹܡܸܙܡܵܢ ܕܚܲܝܹ̈ܐ ܕܝܘܼܠܦܵܢܹܗ ܕܡܫܝܼܚܵܐ. ܘܐ݇ܬܹܐܠܗ݇ܘܿܢ ܡܼܢ ܬܵܡܵܐ ܚܕܵܐ ܣܝܼܥܬܵܐ ܐܲܠܵܗܵܝܬܵܐ ܕܫܲܒ̣ܥܝܼ ܐ݇ܢܵܫܹ̈ܐ ܡܝܲܩܪܹ̈ܐ: ܕܟܠܲܝܗܝ ܗܲܝܟܠܹ̈ܐ ܕܪܘܼܚܵܐ ܗ݇ܘܼܵܘ. ܘܚܲܕ݇ ܡܼܢ ܕܐܵܢܝܼ ܫܲܒ̣ܥܝܼ ܐ݇ܢܵܫܹ̈ܐ ܐܲܠܵܗܵܝܹ̈ܐ ܝܼܗܘܼܵܐ ܡܵܪܝ ܕܵܢܝܼܐܹܝܠ: ܐܵܗܵܐ ܕܗܲܡܙܲܡܬܲܢ ܒܣܵܡܵܐ ܝ݇ܠܵܗ̇ ܠܡܗܵܩܘܼܝܹܐ ܒܘܼܬ ܕܝܼܘܼܗܝ ܘܒܕܵܡܲܝܬܵܐ ܕܐܵܢܝܼ ܫܲܒ̣ܥܝܼ ܣܵܒ̣̈ـܹܐ ܕܓܘܼܒܝܼܠܹܗ ܡܘܼܫܹܐ ܢܒ̣ܝܼܵܐ: ܘܡܘܼܒܨܸܪܹܗ ܡܼܢ ܪܘܼܚܵܐ ܕܝܼܗܘܼܵܐ ܥܲܠ ܗ̇ܘ ܡܲܟܝܼܟ̣ܵܐ: ܕܪܝܼܠܹܗ ܥܲܠܲܝܗܝ ܘܢܘܼܒܝܼܠܗ݇ܘܿܢ. ܘܚܙܹܐܠܗ݇ܘܿܢ ܠܡܵܪܝܵܐ ܓܵܘ ܛܘܼܪܵܐ: ܘܗܘܼܡܙܸܡܠܹܗ ܥܲܡܲܝܗܝ ܒܘܼܬ ܕܝܼܘܵܢܹ̈ܐ ܘܢܵܡܘܿܣܹ̈ܐ ܕܛܵܝܸܦܵܐ: ܗܵܕܟ̣ܵܐ ܓܘܼܒܝܼܠܹܗ ܡܵܪܝܵܐ ܠܣܵܒ̣ܵܐ ܙܲܗܝܵܐ ܡܵܪܝ ܐܵܘܓܹܝܢ ܪܹܫܵܐ ܕܣܝܼܥܬܵܐ: ܘܠܐܵܢܝܼ ܫܲܒ̣ܥܝܼܢ ܣܵܒ̣̈ـܹܐ ܕܥܲܡܹܗ. ܘܒܚܲܝܠܵܐ ܕܪܘܼܚܵܐ ܕܩܘܼܕܫܵܐ ܟ̰ܘܼܟܒܸܢܹ̈ܐ ܗ݇ܘܼܵܘ: ܘܥܒ̣ܸܪܘܿܢ ܠܐܲܬܪܵܐ ܕܡܲܕܢܚܵܐ. ܕܒܲܛܠܝܼܠܵܗ̇ ܚܲܢܦܘܼܬܵܐ ܕܚܸܠܛܘܼܢܝܵܐ ܕܙܪܸܥܠܹܗ ܣܵܛܵܢܵܐ ܓܵܘ ܒܲܢܝ̈ܢܵܫܵܐ: ܕܡܲܠܦܝܼܠܗ݇ܘܿܢ ܝܘܼܠܦܵܢܵܐ ܕܚܲܝܹ̈ܐ. ܘܕܒܵܢܝܼ ܒܝܼـܹܗ ܥܘܼܡܪ̈ܵܢܹܐ ܘܕܲܝܪܹ̈ܐ: ܕܗܵܘܝܼ ܠܒܲܢܕܲܪ ܘܒܲܝܬܵܐ ܕܡܲܢܝܵܚܬܵܐ ܠܟܸܪܸ̈ܣܛܝܵܢܹܐ.
ܐܝܼܢܵܐ ܟܲܕ ܗ݇ܘܹܐܠܹܗ ܪܕܘܼܦܝܵܐ [ܛܪܲܕܬܵܐ] ܒܐܲܬܪܵܐ ܕܡܲܥܪ̱ܒ̣ܵܐ ܩܵܐ ܚܲܕ݇ ܥܕܵܢܵܐ ܝܵܪܝܼܟ̣ܬܵܐ ܕܬܠܵܬ݇ܡܐܵܐ ܫܸܢܹ̈ܐ: ܘܒܘܼܫ ܙܵܘܕܵܐ ܥܲܠ ܛܵܝܸܦܵܐ ܕܟܪܸ̈ܣܛܝܵܢܹܐ ܡܼܢ ܡܲܠܟܹ̈ܐ ܚܲܢܦܹ̈ܐ ܘܟܵܦܘܿܪܹ̈ܐ: ܡܘܼܣܠܝܼܠܗ݇ܘܿܢ ܠܐܲܠܵܗܵܐ: ܡܼܢ ܕܵܐܢܝܼ ܣܵܒܵܒܹ̈ܐ: ܚܕܵܐ: ܕܦܵܐܸܫ ܚܸܙܝܵܐ ܠܟܸܣܠܹܗ ܚܘܼܒܵܐ ܕܫܲܪܝܼܪܹ̈ܐ: ܘܬܪܹܝܢ: ܒܘܼܬ ܢܚܸܦܬܹܗ ܕܣܵܛܵܢܵܐ: ܕܠܵܐ ܥܵܒ̣ܸܕ ܫܘܼܒ̣ܗܵܪܵܐ ܘܐܵܡܸܪ: ܣܵܒܵܒ ܕܟܪܸ̈ܣܛܝܵܢܹܐ ܕܐܝܼܬܠܗ݇ܘܿܢ ܫܲܝܢܵܐ ܘܫܠܵܡܵܐ ܡܗܲܝܡܘܼܢܹܐ ܝ݇ܢܵܐ ܒܐܲܠܵܗܵܐ. ܗܵܝܓܵܗ ܡܼܢ ܢܵܓܸܣܬܲܢ ܡܘܼܩܸܡܠܹܗ ܚܲܕ݇ ܪܸܡܙܵܐ ܐܲܠܵܗܵܝܵܐ ܠܡܲܠܟܵܐ ܩܘܼܣܛܲܢܛܝܼܢܘܿܣ ܙܲܟܵܝܵܐ: ܘܥܒ̣ܸܕܠܹܗ ܡܲܠܟܘܼܬܵܐ ܥܲܠ ܪ̈ܗܘܿܡܹܐ ܬܠܵܬܝܼܢ ܫܸܢܹ̈ܐ. ܘܒܘܼܛܸܠܹܗ ܪܕܘܼܦܝܵܐ ܡܼܢ ܡܗܘܼܡܢܹ̈ܐ: ܘܗܘܼܟܸܡܠܹܗ ܫܲܝܢܵܐ ܒܐܲܬܪܵܐ ܕܪ̈ܗܘܿܡܵܝܹܐ ܒܐܲܪܥܵܐ ܕܡܲܕܢ̱ܚܵܐ. ܒܫܹܢ݇ܬܵܐ ܕܐܸܫܬܸܡܐܵܐ ܘܚܲܡܫܝܼܢ ܘܚܲܡܫܵܐ ܕܡܲܠܟܘܼܬܹܗ ܕܐܵܠܸܟܣܲܢܕܪܘܿܣ: ܕܝܼܠܵܗ̇ ܫܹܢ݇ܬܵܐ ܕܬܪܹܝܡܐܵܐ ܘܬܸܫܥܝܼ ܘܬܸܫܥܵܐ ܡܼܢ [299] ܡܼܢ ܒܵܬ݇ܪ ܙܩܝܼܦܘܼܬܹܗ ܕܡܵܪܲܢ: ܕܝܑܼܠܵܗ̇ ܫܹܢ݇ܬܵܐ ܡܐܵܐ ܘܫܲܒ̣ܥܲܣܲܪ ܠܡܲܠܟܘܼܬܵܐ ܕܦܵܪ̈ܣܵܝܹܐ: ܕܗ̇ܝ ܕܝܼܠܵܗ̇ ܫܹܢ݇ܬܵܐ ܬܠܵܬܝܼܢ ܘܚܕܵܐ ܕܡܲܠܟܘܼܬܵܐ ܕܫܵܒ̣ܘܿܪ ܒܪܘܿܢܵܐ ܕܗܘܿܪܡܝܼܙܕ. ܘܡܼܢ ܒܵܬ݇ܪ ܕܡܝܼܬܠܹܗ ܛܘܼܒ̣ܵܢܵܐ ܩܘܼܣܛܲܢܛܝܼܢܘܿܣ ܡܲܠܟܵܐ ܡܗܘܼܡܢܵܐ: ܒܵܬ݇ܪ ܕܝܼـܹܗ ܗܘܼܟܸܡܠܘܿܢ ܬܠܵܬ݇ܐ ܒܢܘܿܢ̈ܘܼܗܝ: ܩܘܼܣܛܲܢܛܝܼܢܘܿܣ ܘܩܘܼܣܛܲܢܛܝܼܢ ܘܩܘܼܣܛܘܿܣ. ܘܫܘܼܪܝܼܠܹܗ ܫܵܒ̣ܘܿܪ ܠܹܐ݇ܙܵܠܵܐ ܒܐܵܣܟܵܪ̈ܵܘܵܬܹܐ ܥܲܠ ܐܲܪܥܵܐ ܕܪ̈ܗܘܿܡܵܝܹܐ: ܘܡܼܢ ܕܐܵܗܵܐ ܣܵܒܵܒ ܡܘܼܩܸܡܠܹܗ ܪܕܘܼܦܝܵܐ ܥܲܠ ܟܪܸ̈ܣܛܝܵܢܹܐ ܒܐܲܪܥܵܐ ܕܡܲܠܟܘܼܬܹܗ: ܐܲܪܒܥܝܼܢ ܫܸܢܹ̈ܐ ܛܪܸܕܠܹܗ ܠܛܵܝܸܦܹܗ ܕܐܲܠܵܗܵܐ ܕܒܟܠܵܗ̇ ܐܲܪܥܵܐ ܕܡܲܕܢ̱ܚܵܐ. ܡܘܼܟܠܹܐܠܹܗ ܫܵܒ̣ܘܿܪ ܡܲܠܟܵܐ ܠܦܠܵܫܵܐ: ܒܝܼܲܕ ܒܪܘܿܢܹܗ ܕܩܘܼܣܛܲܢܛܝܼܢܘܿܣ ܓܘܼܪܵܐ ܘܒܝܼܲܕ ܡܲܠܟܵܐ ܝܘܿܒܵܢܝܼܣ. ܐܝܼܢܵܐ ܟܲܕ ܡܝܼܬܠܹܗ ܩܘܼܣܛܘܿܣ ܒܪܘܿܢܹܗ ܕܩܘܼܣܛܲܢܛܝܢܘܿܣ ܓܘܼܪܵܐ ܘܗܘܼܟܸܡܠܹܗ ܒܵܬ݇ܪ ܕܝܼـܹܗ ܒܙܠܘܼܡܝܵܐ ܥܲܠ ܪ̈ܗܘܿܡܵܝܹ̈ܐ ܝܘܿܠܝܵܢܘܿܣ ܟܵܦܘܿܪܵܐ: ܘܡܘܼܩܸܡܠܹܗ ܪܕܘܼܦܝܵܐ ܥܲܠ ܟܪܸ̈ܣܛܝܵܢܹܐ ܛܵܝܸܦܹܗ ܕܐܲܠܵܗܵܐ ܒܐܲܪܥܵܐ ܕܡܲܥܪ̱ܒ̣ܵܐ. ܘܡܼܢ ܣܵܒܵܒ ܒܣܸܡܠܵܠܹܗ ܐܲܠܵܗܵܐ ܕܫܵܩܸܠ ܬܘܼܥܠܵܐ ܡܸܢܹܗ: ܘܫܵܩܸܠ ܬܘܼܥܠܵܐ ܟܵܦܘܿܪܵܐ ܡܼܢ ܟܵܦܘܿܪܵܐ: ܘܡܵܪܝܵܐ ܡܼܢ ܬܸܪ̈ܘܲܝ: ܫܘܼܢܹܐܠܹܗ ܝܘܿܠܝܵܢܘܿܣ ܡܼܢ ܐܲܪܥܵܐ ܕܪ̈ܗܘܿܡܵܝܹܐ ܒܓܲܢ݇ܒܵܪܘܼܬܵܐ ܘܒܚܸܩܪܵܐ ܪܵܒܵܐ ܥܲܡ ܪܵܒܵܐ ܐܲܠܦܹ̈ܐ ܕܐܵܣܟܵܪ̈ܵܘܵܬܹܐ: ܘܐ݇ܙܸܠܹܗ ܘܛܪܸܕܠܹܗ ܗܲܠ ܡܕܝܼܢ݇ܬܵܐ ܣܵܠܹܝܩ ܘܠܩܛܝܼܣܦܘܿܢ ܕܒܹܝܬ ܡܲܠܟܘܼܬܹܗ ܕܫܵܒ̣ܘܿܪ. ܘܣܠܸܒܠܗ݇ܘܿܢ ܟܠܲܝܗܝ ܚܲܙܢ̈ܘܼܗܝ ܘܣܘܼܦܝܼܠܹܗ ܒܐܝܼܕܵܬܹ̈ܐ ܕܪ̈ܗܘܿܡܵܝܹܐ. ܐܝܼܢܵܐ ܡܼܢ ܬܘܼܡܸܡܠܵܗ̇ ܥܕܵܢܵܐ ܕܚܲܝܹ̈ܐ ܕܝܘܿܠܝܵܢܘܿܣ ܟܵܦܘܿܪܵܐ: ܡܼܢ ܢܵܓܸܣܬܲܢ ܦܪܸܚܠܹܗ ܚܲܕ݇ ܓܹܐܪܵܐ ܓܵܘ ܗܵܘܵܐ ܡܼܢ ܐܝܼܕܵܐ ܐܲܠܵܗܵܝܬܵܐ: ܘܥܲܡܹܗ ܕܓܹܐܪܵܐ ܚܲܕ݇ ܩܵܠܵܐ ܟܲܕ ܒܹܐܡܵܪܵܐ ܗ݇ܘܼܵܐ: ܕܦܵܐܸܫ ܫܩܝܼܠܵܐ ܟܵܦܘܿܪܵܐ ܡܼܢ ܒܹܝܦܲܠܓܵܐ: ܕܗܵܘܹܐ ܫܲܝܢܵܐ ܒܲܝܢܵܬ ܡܲܠܟܘܼܝܵܬܹ̈ܐ. ܘܚܲܕ݇ ܒܵܬ݇ܪ ܩܵܠܵܐ ܡܚܹܐܠܹܗ ܠܟܵܦܘܿܪܵܐ ܝܘܿܠܝܵܢܘܿܣ ܒܓܹܐܪܵܐ ܡܼܢ ܫܡܲܝܵܐ ܓܵܘ ܒܸܙܹܗ ܕܝܲܡܝܼܢܵܐ. ܘܫܘܼܢܝܼܠܵܗ̇ ܓܵܢܹܗ ܡܼܢ ܦܲܓ̣ܪܹܗ: ܘܓܕܸܦܠܹܗ [ܘܨܘܼܥܸܪܹܗ] ܘܡܝܼܬܠܹܗ.
ܘܗܘܼܟܸܡܠܹܗ ܒܵܬ݇ܪܹܗ ܥܲܠ ܪ̈ܗܘܿܡܵܝܹܐ ܚܲܕ݇ ܡܲܠܟܵܐ ܡܗܘܼܡܢܵܐ: ܝܘܿܒ̣ܝܵܢܘܿܣ ܒܪܘܿܢܹܗ ܕܘܲܪܪܘܿܢܝܵܢܘܿܣ ܡܗܘܼܡܢܵܐ: ܘܗܘܹܐܠܹܗ ܫܲܝܢܵܐ ܒܲܝܢܵܬ ܡܲܠܟܘܼܝܵܬܹ̈ܐ ܘܒܲܝܢܵܬ ܪ̈ܗܘܿܡܵܝܹܐ ܠܦܵܪ̈ܣܵܝܹܐ: ܘܛܠܸܒܠܗ݇ܘܿܢ ܦܵܪ̈ܣܵܝܹܐ ܡ̣ܢ ܝܘܿܒ̣ܝܵܢܘܿܣ: ܕܝܵܗ݇ܒ̣ܸܠܵܗܿ ܐܸܠܲܝܗܝ ܢܨܝܼܒܼܝܼܢ. ܘܐܵܗܵܐ ܛܠܸܒܠܹܗ ܡܸܢܲܝܗܝ ܫܲܝܢܵܐ ܥܲܠ ܛܵܝܸܦܹܗ ܕܐܲܠܵܗܵܐ: ܘܥܒ̣ܸܕܠܗ݇ܘܿܢ ܚܲܕ݇ ܩܛܥܵܝܬܵܐ ܕܩܵܘܠܵܐ ܒܲܝܢܵܬ ܕܐܵܢܝܼ ܬܪܹܝܢ ܡܲܠܟܹ̈ܐ. ܕܦܝܼܫܠܵܗܿ ܝܘܼܗ݇ܒ̣ܸܠܬܵܐ ܢܨܝܼܒ̣ܝܼܢ ܠܦܵܪ̈ܣܵܝܹܐ ܩܵܐ ܡܐܵܐ ܫܸܢܹ̈ܐ. ܘܒܥܕܵܢܵܐ ܐ݇ܬܹܐܠܹܗ ܫܵܒ̣ܘܿܪ ܡܲܠܟܵܐ ܥܲܡ ܪ̈ܗܘܿܡܵܝܹܐ ܕܣܵܦܝܼܠܵܗ̇ ܠܢܨܝܼܒ̣ܝܼܢ: ܫܡܸܥܠܹܗ ܡܲܠܟܵܐ ܫܵܒ̣ܘܿܪ ܒܘܼܬ ܩܲܕܝܼܫܵܐ ܡܵܪܝ ܐܵܘܓܹܝܢ: ܕܟܹܐ ܚܵܝܝܼ ܗ݇ܘܼܵܐ ܓܵܘ ܛܘܼܪܵܐ ܕܐܝܼܙܠܵܐ ܕܠܥܸܠܸܠ ܡ̣ܢ ܢܨܝܼܒ̣ܝܼܢ. ܘܗܘܼܡܙܸܡܠܗ݇ܘܿܢ ܒܘܼܬ ܕܝܼـܹܗ ܕܚܲܕ݇ ܐ݇ܢܵܫܵܐ ܝ݇ܠܹܗ ܓܲܢ݇ܒܵܪܵܐ ܘܟܹܐ ܦܵܠܸܚ ܚܲܝ̈ܠܹܐ ܘܢܝܼܫܲܢܩܹ̈ܐ. ܘܫܘܼܕܸܪܹܗ ܒܵܬ݇ܪܹܗ ܕܐܵܬܹܐ ܘܒܵܣܸܡ ܠܬܪܹܝܢ ܒܢܘܿܢ̈ܘܼܗܝ: ܕܦܝܵܫܵܐ ܗ݇ܘܼܵܘ ܓ̰ܘܼܪ̈ܒܹܐ ܡ̣ܢ ܫܹܐܕܵܐ: ܐܵܢܝܼ ܕܡܘܼܥܒ̣ܸܪܵܝ ܗ݇ܘܼܵܘ ܡܵܐܢܝܼ ܗ̇ܘ ܕܲܓܵܠܵܐ ܘܡܲܚܠܸܛܵܢܵܐ: ܠܒ̣ܸܫܬܹܗ ܕܣܵܛܵܢܵܐ ܗ݇ܘܼܵܐ: ܘܒܘܼܬ ܕܐܵܗܵܐ ܕܩܲܡ ܢܲܫܛܝܼܠܹܗ ܓܸܠܕܹܗ ܘܡܠܹܐܠܗ݇ܘܿܢ ܬܸܒ̣ܢܵܐ: ܘܠܦܲܓ̣ܪܹܗ ܬܠܹܐܠܗܘܿܢ ܥܲܠ ܫܘܼܪܵܐ. ܘܡ̣ܢ ܒܵܬ݇ܪ ܗܵܕܵܐ ܫܠܲܕܹܗ ܗ݇ܘܹܐܠܵܗ̇ ܠܟܸܠܒܹ̈ܐ: ܐܲܝܟܼ ܕܗ̇ܝ ܕܐܝܼܙܒܸܠ ܡܘܼܣܠܝܼܬܵܐ. ܟܲܕ ܐ݇ܬܹܐܠܹܗ ܩܲܕܝܼܫܵܐ ܡܵܪܝ ܐܵܘܓܹܝܢ ܠܢܨܝܼܒ̣ܝܼܢ ܠܟܸܣ ܫܵܒ̣ܘܿܪ: ܐ݇ܡܸܪܹܗ ܐܸܠܹܗ ܡܲܠܟܵܐ ܒܘܼܬ ܓ̰ܘܼܪܵܒܵܐ ܕܒܢ̈ܘܿܢܘܿܗܝ. ܐܝܼܢܵܐ ܐܵܗܵܐ ܩܲܕܝܼܫܵܐ ܒܗܝܼܒܼܝܼ ܕܝܼـܹܗ ܥܲܠ ܐܲܠܵܗܵܐ ܗ݇ܘܼܵܐ ܓ̰ܘܼܘܸܒܠܹܗ ܠܡܲܠܟܵܐ: ܕܐܲܠܵܗܵܐ ܕܝܼܝܼ ܒܸܬ ܒܵܣܸܡܠܗ݇ܘܿܢ. ܟܲܕ ܩܸܡܠܹܗ ܘܨܘܼܠܝܼܠܹܗ ܥܲܠܲܝܗܝ: ܘܦܘܼܠܸܛܠܹܗ ܡܸܢܲܝܗܝ ܠܫܹܐܕܹ̈ܐ: ܐܵܢܝܼ ܕܡܘܼܥܒ̣ܸܪܵܝ ܗ݇ܘܼܵܘ ܒܝܼܲܝܗܝ ܡܵܐܢܝܼ. ܘܟܲܕ ܚܙܹܐܠܹܗ ܫܵܒ̣ܘܿܪ ܕܗ݇ܘܹܐܠܗ݇ܘܿܢ ܐܵܙܲܕ ܡ̣ܢ ܟܵܪ ܕܣܵܛܵܢܵܐ: ܐ݇ܡܸܪܹܗ ܩܲܕܝܼܫܵܐ ܡܵܪܝ ܐܵܘܓܹܝܢ: ܛܠܘܿܒ ܡܸܢܝܼ ܘܒܸܬ ܝܵܗ݇ܒ̣ܸܢܘܼܟܼ: ܟܠ ܡܸܢܕܝܼ ܕܒܵܥܹܝܬܿ. ܐ݇ܡܸܪܹܗ ܩܲܕܝܼܫܵܐ: ܠܵܐ ܕܲܗܒ̣ܵܐ ܘܠܵܐ ܣܹܐܡܵܐ ܒܛܲܠܒܸܢ ܡܸܢܘܼܟܼ: ܐܸܠܵܐ ܗܲܒ̣݇ܠ ܗܘܼܟܡܵܐ ܠܬܲܠܡܝܼܕ̈ܝܼ: ܕܐܵܙܠ݇ܝܼ ܗܲܠ ܠܐܲܪܥܵܐ ܕܗܘܼܟܡܘܼܟܼ: ܘܒܵܢܝܼ ܥܘܼܡܪ̈ܵܢܹܐ ܘܕܲܝܪܹ̈ܐ. ܝܘܼܗ݇ܒ̣ܸܠܹܗ ܡܲܠܟܵܐ ܦܘܼܩܕܵܢܵܐ ܠܟܠܹܗ ܡܲܠܟܘܼܬܹܗ: ܕܐܝܼܬܠܹܗ ܦܣܵܣܵܐ ܡܵܪܝ ܐܵܘܓܹܝܢ ܘܬܲܠܡܝܼܕ̈ܘܼܗܝ: ܕܟܠ ܕܘܼܟܬܵܐ ܕܒܲܣܡܵܠܗ݇ܘܿܢ ܕܒܵܢܝܼ ܥܘܼܡܪ̈ܵܢܹܐ ܘܕܲܝܪܹ̈ܐ: ܘܠܵܐ ܗܵܘܹܐ ܕܚܲܕ݇ ܐ݇ܢܵܫܵܐ ܕܡܲܟܠܹܐܠܗ݇ܘܿܢ. ܘܟܠ ܡ̇ܢ ܕܚܲܙܕܸܓܠܗ݇ܘܿܢ: ܗܲܕܵܡܵܐ ܗܲܕܵܡܵܐ ܒܸܬ ܦܵܐܸܫ ܩܸܛܥܝܵܐ: ܘܟܠ ܡܸܢܕܝܼ ܕܐܝܼܬܠܹܗ ܦܵܐܸܫ ܫܩܝܼܠܵܐ ܡܸܢܹܗ. ܘܗܵܝܓܵܗ ܫܘܼܕܸܪܹܗ ܡܵܪܝ ܐܵܘܓܹܝܢ ܠܬܲܠܡܝܼܕ̈ܘܼܗܝ ܠܟܠܵܗ̇ ܐܲܪܥܵܐ ܕܡܲܕܢ̱ܚܵܐ: ܕܒܵܢܝܼ ܥܘܼܡܪ̈ܵܢܹܐ ܘܕܲܝܪܹ̈ܐ. ܘܒܲܛܠܝܼ ܡܢܘܼܗܿ ܕܘܼܓܠܵܐ ܕܚܲܢܦܘܼܬܵܐ: ܘܗܵܘܝܼ ܐܲܟܵܪܹ̈ܐ ܟܲܫܝܼܪܹ̈ܐ ܕܙܲܪܥܝܼ ܒܲܪܙܲܪܥܵܐ ܛܵܒ̣ܵܐ ܕܝܘܼܠܦܵܢܵܐ ܕܚܲܝܹ̈ܐ ܕܡܵܪܲܢ.
ܐܲܢܹ̈ܐ ܕܐ݇ܡܝܼܪܵܝܠܲܢ ܒܐܵܗܵܐ ܕܘܼܟܬܵܐ: ܕܦܵܐܸܫ ܝ݇ܕܸܥܝܵܐ ܕܒܐܲܝܢܝܼ ܙܲܒܼܢܵܐ ܐ݇ܬܹܐܠܹܗ ܩܲܕܝܼܫܵܐ ܡܵܪܝ ܕܵܢܝܼܐܹܝܠ ܠܐܵܗܵܐ ܓܹܒܵܐ ܕܡܲܕܢ̱ܚܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܗ̇ܘ ܕܦܝܼܫܠܹܗ ܡܘܼܪܝܸܙܵܐ ܡ̣ܢ ܓܘܼܪܵܐ ܡܸܢܹܗ ܡܵܪܝ ܐܵܘܓܹܝܢ ܒܚܲܝܠܵܐ ܕܨܠܵܘܵܬܹ̈ܗ ܦܝܼܫܠܹܗ ܫܘܼܕܪܵܐ: ܘܪܵܒܵܐ ܚܲܝ̈ܠܹܐ ܘܢܝܼܫܲܢܩܹ̈ܐ ܥܒ̣ܸܕܠܹܗ ܡܵܪܲܢ ܒܐܝܼܕܵܬ̈ܘܼܗܝ: ܐܵܢܝܼ ܕܠܵܐ ܡܲܥܝܸܩܵܐ ܐܸܠܲܢ ܕܡܲܬܒ̣ܲܚ ܠܗ݇ܘܿܢ ܟܠܲܝܗܝ ܠܲܐܟ̣ܵܐ: ܐܝܼܢܵܐ ܚܲܕ݇ܟ̰ܵܐ ܡܸܢܲܝܗܝ ܡܘܼܬܒ̣ܵܝܠܲܢ. ܟܲܕ ܦܠܸܛܠܗ݇ܘܿܢ ܡ̣ܢ ܛܘܼܪܵܐ ܕܐܝܼܙܠܵܐ ܡܵܪܝ ܕܵܢܝܼܐܹܝܠ ܘܡܵܪܝ ܡܝܼܟ̣ܵܐܹܝܠ: ܘܐ݇ܬܹܐܠܗ݇ܘܿܢ ܘܚܝܼܠܗ݇ܘܿܢ ܠܥܸܠܸܠ ܡ̣ܢ ܩܲܠܥܵܐ ܕܥܸܒܼܪܵܝܵܐ: ܩܵܐ ܡܸܬܚܵܐ ܕܥܸܣܪܝܼܢ ܫܸܢܹ̈ܐ. ܡܣܵܒܵܒ ܒܗ̇ܘ ܙܲܒ̣ܢܵܐ ܠܲܝܬ ܗ݇ܘܼܵܐ ܕܘܼܟܬܵܐ ܕܚܲܝܘܼܬܵܐ ܕܐ݇ܢܵܫܵܐ: ܐܸܠܵܐ ܒܲܪܝܼܵܐ ܗ݇ܘܼܵܐ ܘܚܵܪܵܒܝܼ. ܘܥܒ̣ܸܕܠܹܗ ܡܵܪܲܢ ܚܲܝ̈ܠܹܐ ܓܘܼܪܹ̈ܐ ܒܐܝܼܕ̈ܵܬܘܼܗܝ: ܘܡ̣ܢ ܐܵܕܝܼܵܐ ܫܘܼܗܒ̣ܸܬܿܠܹܗ ܕܡܵܫ݇ܟ̰ܸܚ ܚܕܵܐ ܕܘܼܟܬܵܐ ܫܠܝܼܬܵܐ ܕܚܝܘܼܬܵܐ ܠܚܘܿܕܵܝܵܐ. ܘܡ̣ܢ ܕܐ݇ܬܹܐܠܹܗ ܘܡܛܹܐܠܹܗ ܠܘܲܥܕܵܐ ܕܕܘܼܟܬܵܐ: ܬܵܡܵܐ ܡܘܼܫ݇ܟ̰ܸܚܠܹܗ ܚܕܵܐ ܓܸܦܝܼܬܵܐ ܙܥܘܿܪܬܵܐ: ܡܣܵܒܵܒ ܗ̇ܘ ܚܙܹܐܠܹܗ ܠܕܘܼܟܬܵܐ ܫܠܝܼܬܵܐ ܝ݇ܠܵܗܿ ܡ̣ܢ ܫܓܼܘܼܫܝܵܐ ܘܕܝܵܫܬܵܐ ܕܐܲܩ̈ܠܹܐ ܕܐ݇ܢܵܫܘܼܬܵܐ. ܐܵܗܵܐ ܝ݇ܠܵܗܿ ܕܘܼܟܬܵܐ ܕܩܲܕܝܼܫܵܐ ܬܪܸܥܣܲܪ ܡܝܼ̈ܠܹܐ ܡ̣ܢ ܬܲܪ̈ܥܵܢܹܐ ܕܥܒ̣ܵܪܬܵܐ ܠܡܕܝܼܢ݇ܬܵܐ: ܘܐܝܼܬ ܗ݇ܘܼܵܐ ܚܕܵܐ ܕܘܼܟܬܵܐ ܕܛܫܝܼܬܵܐ ܗ݇ܘܼܵܐ ܡ̣ܢ ܚܕܲܪܬܵܐ ܕܐ݇ܢܵܫܘܼܬܵܐ: ܒܕܸܦܢܵܐ ܕܢܲܗܪܵܐ ܕܡܕܝܼܢ݇ܬܵܐ: ܒܲܪܩܘܼܒܼܠ ܚܕܵܐ ܡܵܬܵܐ ܕܫܡܘܼܗܿ ܝܼܗ݇ܘܼܵܐ ܒܹܝܬ ܩܲܝܛܵܐ. ܘܐ݇ܬܹܐܠܹܗ ܒܓܸܠܝܵܢܵܐ ܐܲܠܵܗܵܝܵܐ: ܘܥܒ̣ܸܪܹܗ ܘܝ݇ܬܸܒ̣ܠܹܗ ܓܵܘ ܕܐܵܗܵܐ ܓܸܦܝܼܬܵܐ: ܝ݇ܬܸܒ̣ܵܬܐ ܝ݇ܠܵܗܿ ܥܲܠ ܬܲܪ̈ܥܵܢܹܐ ܕܢܲܗܪܵܐ: ܕܒܐܲܬܪܵܐ ܕܒܹܝܬ ܢܘܼܗܲܕܪܵܢ [ܢܘܼܗܲܕܪܵܐ] ܘܚܝܼܠܹܗ ܒܗ̇ܝ ܓܸܦܝܼܬܵܐ ܥܸܣܪܝܼ ܘܬܪܹܝܢ ܫܸܢܹ̈ܐ: ܣܵܒܵܒ ܕܒܗܿܘ ܙܲܒ̣ܢܵܐ ܠܲܝܬ ܗ݇ܘܼܵܐ ܬܵܡܵܐ ܕܘܼܟܬܵܐ ܕܚܲܝܘܼܬܵܐ ܠܒܢܲܝ̈ܢܵܫܵܐ. ܐܝܼܢܵܐ ܥܲܠ ܟܠܹܗ ܢܲܗܪܵܐ ܟܹܐ ܡܲܓ̰ܝܸܢ ܗ݇ܘܼܵܐ ܙܵܠܵܐ ܘܐܲܪ̈ܒܵܢܹܐ: ܘܝܑܼܗ݇ܘܼܵܐ ܕܘܼܟܬܵܐ ܕܚܲܝܘܼܬܵܐ ܕܗܲܝܘܵܢܹ̈ܐ ܕܒܲܪܝܼܵܐ. ܘܐܵܗܵܐ ܩܲܕܝܼܫܵܐ ܟܹܐ ܦܵܠܸܛ ܗ݇ܘܼܵܐ ܡ̣ܢ ܥܕܵܢܵܐ ܠܥܕܵܢܵܐ: ܘܥܲܡܲܝܗܝ ܡܲܪܥܝܼ ܗ݇ܘܼܵܐ. ܘܗܲܝܘܵܢܹ̈ܐ ܠܹܐ ܐܵܙܠ݇ܝܼ ܗ݇ܘܼܵܘ ܡ̣ܢ ܠܟܸܣܠܹܗ: ܐܲܝܟܼ ܕܐܵܕܵܡ ܡ̣ܢ ܩܵܕ݇ܡ ܕܥܵܒ̣ܸܪ ܗ݇ܘܼܵܐ ܡ̣ܢ ܦܘܼܩܕܵܢܵܐ: ܟܠܲܝܗܝ ܗܲܝܘܵܢܹ̈ܐ ܕܐܵܬܝܼ ܗ݇ܘܼܵܘ ܕܩܵܪܹܐ ܗ݇ܘܼܵܐ ܠܗ݇ܘܿܢ ܫܸܡܵܢܹ̈ܐ.
ܘܐܵܡܪܝܼ ܒܚܲܕ݇ ܥܕܵܢܵܐ ܐ݇ܬܹܐܠܵܗܿ ܚܕܵܐ ܐܲܪܝܘܿܬܵܐ ܠܟܸܣ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܟܲܕ ܫܩܝܼܠܬܵܐ ܓܘܼܪܝܘܼܗ̇ ܒܦܘܼܡܘܼܗ̇: ܗ̇ܘ ܕܡ̣ܢ ܓ̰ܲܠܕܹܐ ܥܲܝܢܵܬ̈ܘܼܗܝ ܣܸܡܝܹ̈ܐ ܗ݇ܘܼܵܘ: ܘܡܘܼܬܸܒ̣ܠܹܗ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܵܐ. ܐܝܼܢܵܐ ܐܵܗܵܐ ܩܲܕܝܼܫܵܐ ܒܸܕܥܵܝܵܐ ܗ݇ܘܼܵܐ ܕܒܘܼܬ ܒܵܣܲܡܬܹܗ ܡܘܼܬ݇ܝܹܗ ܗ݇ܘܼܵܐ: ܘܡܘܼܬܸܒ̣ܠܹܗ ܐܝܼܕܹܗ ܥܲܠ ܥܲܝܢܹ̈ܐ ܕܓܘܼܪܝܵܐ ܘܐ݇ܡܸܪܹܗ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܦܵܝܫܝܼ ܦܬܝܼܚܹ̈ܐ ܐܲܢܹ̈ܐ ܥܲܝܢܹ̈ܐ. ܗܲܪ ܒܗ̇ܝ ܣܵܥܲܬ ܦܝܼܫܠܗ݇ܘܿܢ ܦܬܝܼܚܹ̈ܐ ܥܲܝܢܹ̈ܐ ܕܓܘܼܪܝܵܐ: ܘܩܸܡܠܹܗ ܘܐ݇ܙܸܠܹܗ ܐܵܗܵܐ ܘܝܸܡܹܗ ܟܲܕ ܦܨܝܼܚܹ̈ܐ ܗ݇ܘܼܵܘ ܘܚܸܕܝܹ̈ܐ. ܣܵܒܵܒ ܚܲܕ݇ ܝ݇ܠܹܗ ܚܲܝܠܵܐ ܕܪܘܼܚܵܐ ܕܩܘܼܕܫܵܐ: ܕܠܟܸܣ ܩܲܕ݇ܡܵܝܹ̈ܐ ܘܐ݇ܚܵܪ̈ܵܝܹܐ. ܐܵܗܵܐ ܗܲܪ ܗ̇ܝ ܝ݇ܠܵܗ̇ ܕܥܒ̣ܸܕܠܹܗ ܡܵܩܵܪܝܼܣ ܡܸܨܪܵܝܵܐ: ܒܥܕܵܢܵܐ ܕܐ݇ܬܹܐܠܵܗ̇ ܚܕܵܐ ܝܲܕܢܵܐ (ܚܲܕ݇ ܗܲܝܘܵܢ ܝ݇ܠܹܗ ܣܵܪܘܿܚܵܐ ܚܲܙܕܸܓܵܢܐ) ܘܡܘܼܬ݇ܝܼܠܵܗ̇ ܒܪܘܿܢܘܼܗ̇ ܟܲܕ ܣܸܡܝܵܐ ܗ݇ܘܼܵܐ: ܘܦܬܝܼܚܵܝܠܹܗ ܥܲܝܢ̈ܘܼܗܝ. ܘܟܲܕ ܒܣܸܡܠܵܐ ܠܵܗ̇ ܕܦܲܪܥܝܼܵܗ̇ ܠܹܗ ܗܵܩܹܗ: ܐ݇ܙܸܠܵܗ̇ ܠܟܸܣ ܪ̈ܵܥܵܘܵܬܹܐ: ܘܫܩܸܠܵܗ̇ ܡܸܢܲܝܗܝ ܬܝܼܟܵܟܹ̈ܐ ܕܠܲܚܡܵܐ ܘܡܘܼܬ݇ܝܼܠܵܗ̇ ܩܵܬܹܗ: ܗܵܕܟ̣ܵܐ ܐܘܼܦ ܐܲܪܝܘܼܬܵܐ ܥܒ̣ܸܕܠܵܗ̇ ܠܐܵܗܵܐ ܩܲܕܝܼܫܵܐ: ܠܹܐ ܗ݇ܘܼܵܐ ܐܲܚܟ̰ܝܼ ܬܝܼܟܵܟܹ̈ܐ ܕܠܲܚܡܵܐ ܡܘܼܬ݇ܝܼܠܵܗ̇ ܐܸܠܹܗ: ܐܸܠܵܐ ܐ݇ܙܸܠܵܗ̇ ܠܟܸܣ ܪ̈ܵܥܵܘܵܬܹܐ ܠܦܸܣܩܵܐ ܕܥܸܪ̈ܒܹܐ: ܘܫܩܸܠܵܗ̇ ܚܲܕ݇ ܥܸܪܒܵܐ ܟܲܕ ܗ̇ܘ ܚܲܝܵܐ ܘܡܘܼܬ݇ܝܼܠܵܗ̇ ܩܵܬܹܗ: ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܕܵܢܝܼܐܹܝܠ ܟܲܕ ܚܙܹܐܠܹܗ ܓܚܸܟܠܹܗ: ܟܲܕ ܦܨܝܼܚܵܐ ܐ݇ܡܸܪܹܗ ܩܵܐ ܗ̇ܝ ܐܲܪܝܘܿܬܵܐ: ܪ݇ܚܘܿܫ ܠܵܒܸܠܹܗ ܥܸܪܒܵܐ ܠܡܵܪܹܗ: ܡܣܵܒܵܒ ܠܹܐ ܝ݇ܠܹܗ ܠܵܙܸܡ ܐܸܠܝܼ: ܐܝܼܢܵܐ ܗ̇ܝ ܬܘܼܡܸܡܠܵܗ̇ ܠܗܲܡܙܲܡܬܹܗ ܕܩܲܕܝܼܫܵܐ ܘܠܵܐ ܐ݇ܟ̣ܸܠܵܗ̇: ܐܸܠܵܐ ܡܘܼܕܸܥܪܵܗ̇ ܘܠܘܼܒܸܠܵܗ̇ ܠܥܸܪܒܵܐ ܟܲܕ ܚܲܝܵܐ. ܘܡ̣ܢ ܣܵܒܵܒ ܩܸܛܥܝܵܐ ܗ݇ܘܼܵܐ ܘܦܪܝܼܫܵܐ ܡ̣ܢ ܚܙܵܝܬܵܐ ܕܒܢܲܝ̈ܢܵܫܵܐ: ܐܘܼܦ ܙܹܐ ܗ̇ܝ ܕܘܼܟܬܵܐ ܚܵܪܵܒܝܼ ܗ݇ܘܼܵܐ. ܘܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܒܸܥܒܼܵܪܵܐ ܗ݇ܘܼܵܘ ܗܲܝܘܵܢܹ̈ܐ ܒܥܕܵܢܵܐ ܕܦܲܠܓܵܐ ܕܝܵܘܡܵܐ ܕܫܵܬܝܼ ܗ݇ܘܼܵܘ ܡܝܼ̈ܵܐ: ܫܘܸܪܹܗ ܬܲܢܝܼܢܵܐ ܡ̣ܢ ܓܵܘ ܗ̇ܘ ܐܲܪܒܵܢܵܐ: ܘܕܒ̣ܸܩܠܹܗ ܠܒܪܘܿܢܵܗ̇ ܕܓ̣ܵܙܵܠܵܐ ܘܫܘܼܪܝܼܠܹܗ ܕܒܲܠܥܝܼܠܹܗ: ܐܝܼܢܵܐ ܗ̇ܝ ܡܲܩܘܘܼܚܹܐ ܗ݇ܘܼܵܐ ܒܬܵܢܲܚܬܵܐ ܓܘܼܪܬܵܐ. ܘܟܲܕ ܫܡܸܥܠܹܗ ܛܘܼܒ̣ܵܢܵܐ ܩܵܠܘܼܗ̇: ܚܫܸܒ̣ܠܹܗ ܕܥܒ̣ܘܼܕ ܒܵܘܲܪ ܐܲܪܝܵܐ ܗ݇ܘܼܵܐ ܕܦܘܼܬܦܸܬܠܹܗ ܠܒܪܘܿܢܘܼܗ̇: ܘܩܸܡܠܹܗ ܛܘܼܒ̣ܵܢܵܐ ܘܐ݇ܙܸܠܹܗ ܠܟܸܣܠܹܗ. ܘܒܥܕܵܢܵܐ ܕܚܙܹܐܠܹܗ ܠܗ̇ܘ ܬܲܢܝܼܢܵܐ ܕܒܠܸܥܠܹܗ ܠܒܪܘܿܢܵܐ ܕܓ̣ܵܙܵܠܵܐ: ܟܪܸܒܠܹܗ ܘܡܚܹܐܠܹܗ ܒܟܲܪܒܵܐ ܒܚܘܼܛܪܹܗ. ܘܦܝܼܫܠܹܗ ܓ̰ܕܝܼܩܵܐ ܡ̣ܢ ܪܹܫܹܗ ܗܲܠ ܠܬܘܼܦܪܹܗ [ܠܕܲܢܒ̣ܸܗ]: ܘܗܲܪ ܒܗܿܝ ܥܕܵܢܵܐ ܢܦܸܠܹܗ ܥܲܠ ܐܲܪܥܵܐ ܘܡܝܼܬܠܹܗ: ܘܐ݇ܡܸܪܹܗ ܐܵܗܵܐ ܩܲܕܝܼܫܵܐ: ܩܵܡܘܿܕܝܼ ܩܲܪܒܘܼܢܹܐ ܝ݇ܘܸܬܿ ܠܩܸܢܝܵܢܵܐ ܕܝܼܝܼ: ܟܲܕ ܠܹܐ ܝ݇ܘܸܬܿ ܗ݇ܘܼܵܐ ܦܩܝܼܕܵܐ؟ ܘܒܘܼܬ ܕܐܵܗܵܐ ܩܲܡ ܡܵܚܹܐܠܘܼܟܼ ܡܵܪܝܵܐ: ܣܵܒܵܒ ܒܸܕܡܵܝܵܐ ܝ݇ܠܵܗ̇ ܐܵܗܵܐ ܠܗ̇ܝ ܕܥܒ̣ܸܕܠܹܗ ܡܵܪܝ ܡܝܼܠܸܣ ܣܵܗܕܵܐ: ܘܒܗܲܡܙܲܡܬܹܗ ܡܝܼܬܠܹܗ ܗ̇ܘ ܬܲܢܝܼܢܵܐ ܕܟܹܐ ܚܵܝܝܼ ܗ݇ܘܼܵܐ ܓܵܘ ܓܸܦܝܼܬܵܐ ܕܚܲܕ݇ ܐܲܚܘܿܢܵܐ.
ܐܝܼܢܵܐ ܓܵܘ ܗ̇ܘ ܐܲܬܪܵܐ ܐܝܼܬ ܗ݇ܘܼܵܐ ܚܕܵܐ ܡܕܝܼܢ݇ܬܵܐ ܡ̣ܢ ܓܹܒܵܐ ܕܡܲܕܢ̱ܚܵܐ ܕܗ̇ܘ ܢܲܗܪܵܐ: ܘܫܸܡܘܼܗ̇ ܗ݇ܘܼܵܐ ܬܸܠܚܲܫ: ܘܪܵܒܵܐ ܦܪܝܼܬܵܐ ܗ݇ܘܼܵܐ ܒܛܵܝܸܦܵܐ ܘܒܫܘܼܦܪܵܐ ܕܒܸܢܝܵܢܵܐ ܘܒܘܼܪ̈ܟܵܬܹܐ ܦܸܪ̈ܝܹܐ. ܚܲܕ݇ ܐ݇ܢܵܫܵܐ ܐܝܼܬ ܗ݇ܘܼܵܐ ܓܵܘܵܗ̇ ܘܲܙܝܼܪ ܕܡܲܠܟܵܐ ܗ݇ܘܼܵܐ: ܘܫܸܡܹܗ ܚܲܫ ܝܼܗܘܼܵܐ. ܘܒܘܼܫ ܡܝܘܼܩܪܵܐ ܗ݇ܘܼܵܐ ܘܨܵܦܝܝܼ ܡ̣ܢ ܡܲܠܟܵܐ ܘܟܵܗܢܹ̈ܐ ܕܡܕܝܼܢ݇ܬܵܐ: ܘܪܵܒܵܐ ܕܸܒ̣ܚܹ̈ܐ ܘܕܸܡܵܐ ܕܟܹܐ ܡܲܪܝܸܣ ܗ݇ܘܼܵܐ ܠܫܹܐܕܹ̈ܐ. ܟܠ ܝܵܘܡܵܐ ܟܹܐ ܥܵܒ̣ܸܕ ܗ݇ܘܼܵܐ. ܘܠܹܐ ܗܵܘܹܐ ܗ݇ܘܼܵܐ ܠܹܗ ܒܢܘܿܢܹ̈ܐ: ܐܝܼܢܵܐ ܡ̣ܢ ܒܵܬ݇ܪ ܕܥܒ̣ܸܕܠܹܗ ܚܸܠܡܲܬ ܥܸܣܪܝܼܢ ܫܸܢܹ̈ܐ ܘܲܙܝܼܪܘܼܬܵܐ ܕܡܲܠܟܘܼܬܵܐ ܕܐܲܬܪܵܐ ܕܢܘܼܗܲܕܪ̈ܵܝܹܐ: ܡܣܵܒܵܒ ܕܲܝܵܢܵܐ ܕܗ̇ܝ ܡܕܝܼܢ݇ܬܵܐ ܗ݇ܘܼܵܐ: ܐܵܗܵܐ ܝܼܗ݇ܘܼܵܐ ܘܲܙܝܼܪ ܕܕܒ̣ܝܼܩܵܐ ܗ݇ܘܼܵܐ ܗܘܼܟܡܵܐ ܡ̣ܢ ܢܲܗܪܵܐ ܕܙܵܒ̣ܵܐ ܘܗܲܠ ܠܐܲܪܡܸܢ ܘܗܲܠ ܠܢܲܗܪܵܐ ܕܦܪܵܬ ܘܗܲܠ ܠܪܲܝ ܘܓܘܼܪܙܵܐܢ: ܘܟܠܹܗ ܐܵܗܵܐ ܐܘܼܚܕܵܢܵܐ ܓܘܼܪܵܐ ܬܚܘܿܬ ܐܝܼܕܵܬ̈ܘܼܗܝ ܗ݇ܘܼܵܐ: ܗܘܹܐܠܵܗ̇ ܠܹܗ ܚܕܵܐ ܒܪܵܬܵܐ: ܡܠܝܼܬܵܐ ܗ݇ܘܼܵܐ ܥܘܼܓ̰ܵܒܵܐ: ܕܥܲܝܢܹ̈ܐ ܠܲܝܬ ܗ݇ܘܼܵܐ ܠܵܗ̇ ܘܠܵܐ ܠܸܫܵܢܵܐ ܘܠܵܐ ܢܵܬܝܵܬܹ̈ܐ ܘܠܵܐ ܐܲܩܠܵܬܹ̈ܐ: ܐܘܼܦ ܠܵܐ ܦܲܐܬܵܐ ܕܒܲܪܢܵܫܵܐ ܩܢܝܼܬܵܐ ܗ݇ܘܼܵܐ: ܘܦܵܫܲܡܬܵܐ ܓܘܼܪܬܵܐ ܗ݇ܘܼܵܘ ܠܐܲܒ̣ܵܗ̈ܘܼܗܝ ܘܟܠܵܗ̇ ܡܕܝܼܢ݇ܬܵܐ. ܘܟܲܕ ܓܘܼܪܘܸܣܠܵܗ̇ ܒܪܵܬܵܐ: ܘܗܘܹܐܠܵܗ̇ ܐܲܝܟܼ ܒܪܵܬܵܐ ܒܲܪ ܬܪܸܥܣܲܪ ܫܸܢܹ̈ܐ: ܕܡܘܼܒܝܸܢܘܿܢ ܪ̈ܲܚܡܹܐ ܕܡܫܝܼܚܵܐ ܒܠܸܒܹܗ ܕܒܵܒܘܼܗ̇ ܡܲܠܟܵܐ. ܘܩܸܡܠܹܗ ܘܝ݇ܬܸܒ̣ܠܹܗ ܥܲܠ ܐܲܪܒܵܢܵܐ [ܟܵܠܸܣܟܵܐ] ܕܐܝܼܩܵܪܹܗ ܥܲܡ ܟܠܲܝܗܝ ܐܵܣܟܵܪ̈ܵܘܵܬܘܼܗܝ: ܕܣܲܚܒܸܪ ܗ݇ܘܼܵܐ ܠܕܘܼܟܵܢܹ̈ܐ ܕܡܲܠܟܘܼܬܹܗ: ܘܡܘܼܡܛܝܼܠܗ݇ܘܿܢ ܪ̈ܲܚܡܹܐ ܕܡܵܪܝܵܐ ܠܘܲܥܕܵܐ ܕܓܸܦܝܼܬܹܗ ܕܛܘܼܒ̣ܵܢܵܐ ܡܵܪܝ ܕܵܢܝܼܐܹܝܠ: ܘܚܙܹܐܠܗ݇ܘܿܢ ܗܲܝܘܵܢܹ̈ܐ ܐܵܢܝܼ ܒܸܚܲܝܵܐ ܗ݇ܘܼܵܘ ܒܗ̇ܝ ܕܘܼܟܬܵܐ. ܘܫܘܼܪܝܼܠܗ݇ܘܿܢ ܠܸܥܪܵܩܵܐ ܗܲܝܘܵܢܹ̈ܐ ܡ̣ܢ ܩܵܕ݇ܡ ܚܲܝܠܵܘܵܬܹ̈ܗ [ܐܵܣܟܵܪ̈ܵܘܵܬܹܗ] ܕܡܲܠܟܵܐ: ܘܚܘܼܪܕܝܼܠܗ݇ܘܿܢ ܐܸܠܲܝܗܝ ܡ̣ܢ ܟܠ ܓܹܒܵܢܹ̈ܐ ܚܲܕ݇ ܛܵܝܸܦܵܐ ܓܘܼܪܵܐ. ܘܡ̣ܢ ܕܚܙܹܐܠܗ݇ܘܿܢ ܐܵܢܝܼ ܓ̣ܵܙܵܠܹ̈ܐ ܘܗܲܝܘܵܢ ܕܒܲܪܝܼܵܐ ܕܠܲܝܬ ܦܘܼܪܩܵܢܵܐ ܕܓܵܢܵܐ ܡܸܢܲܝܗܝ: ܪܚܸܛܠܗ݇ܘܿܢ ܐܲܝܟܼ ܥܵܕܲܬܲܝܗܝ ܘܡܸܚܝܵܠܗ݇ܘܿܢ ܓܵܢܲܝܗܝ ܒܵܬ݇ܪ ܚܵܨܵܐ ܕܩܲܕܝܼܫܵܐ. ܕܦܵܨܝܼܠܗ݇ܘܿܢ ܡ̣ܢ ܕܐܵܗܵܐ ܥܝܼܩܘܼܬܵܐ ܕܡܛܝܼܠܵܗ̇ ܐܸܠܲܝܗܝ. ܐܝܼܢܵܐ ܐܲܢܹ̈ܐ ܐܵܣܟܵܪ̈ܵܝܹܐ ܚܲܕ݇ܟܡܵܐ ܡܸܢܲܝܗܝ ܕܪܹܐܠܗ݇ܘܿܢ ܒܓܹܐܪܹ̈ܐ ܠܬܪܹܝܢ ܓ̣ܵܙܵܠܹ̈ܐ. ܘܐܵܢܝܼ ܐ݇ܚܹܪ̈݇ܢܹܐ ܓ̰ܡܸܥܠܗ݇ܘܿܢ: ܘܟܠܹܐܠܗ݇ܘܿܢ ܠܟܸܣ ܓܸܦܝܼܬܵܐ ܕܛܘܼܒ̣ܵܢܵܐ. ܘܓܹܐܪܹ̈ܐ ܕܣܵܪ̈ܒܵܙܹܐ ܒܸܦܪܵܚܵܐ ܗ݇ܘܼܵܘ ܠܲܐܟ̣ܵܐ ܘܠܲܐܟ̣ܵܐ ܓܵܘ ܗܵܘܵܐ: ܟܲܕ ܗܸܟ̰ ܠܹܐ ܗ݇ܘܼܵܘ ܩܲܪܒܘܼܢܹܐ ܠܗܲܝܘܵܢܹ̈ܐ ܒܚܲܝܠܵܐ ܕܨܠܵܘܵܬܹ̈ܗ ܕܛܘܼܒ̣ܵܢܵܐ. ܐܝܼܢܵܐ ܐܵܗܵܐ ܘܲܙܝܼܪ ܒܥܕܵܢܵܐ ܕܚܙܹܐܠܹܗ ܐܲܢܹ̈ܐ: ܒܐ݇ܟ̣ܵܠܬܵܐ ܕܓܲܦܹ̈ܐ ܠܟܸܣ ܣܵܪ̈ܒܵܙܹܐ ܐ݇ܡܸܪܹܗ: ܚܙܝܼܡܘܿܢ ܐܘܼܦ ܚܕܵܐ ܡ̣ܢ ܕܐܲܢܹ̈ܐ ܗܲܝܘܵܢܹ̈ܐ ܠܹܐ ܒܵܥܹܝܢ ܦܵܝܫܵܐ ܚܠܝܼܨܬܵܐ. ܘܟܲܕ ܪܘܼܦܝܼܠܗ݇ܘܿܢ ܒܩܸܫܝܵܬܲܝ̈ܗܝ ܗܲܠ ܕܦܪܸܩܠܗ݇ܘܿܢ ܓܹܐܪ̈ܲܝܗܝ: ܘܗܵܝܓܵܗ ܐ݇ܡܸܪܹܗ ܐܸܠܲܝܗܝ: ܨܠܝܼܡܘܿܢ ܒܐܲܩܠܵܐ ܘܕܒ̣ܘܿܩܘܼܢ ܠܗ݇ܘܿܢ ܒܐܝܼܕܵܐ.
ܘܟܲܕ ܚܙܹܐܠܹܗ ܛܘܼܒ̣ܵܢܵܐ: ܕܗܵܐ ܡܛܹܐܠܵܗ̇ ܥܕܵܢܵܐ ܕܐܵܬܝܼ ܘܡܲܫ݇ܟ̰ܚܝܼܠܹܗ: ܦܠܸܛܠܹܗ ܡ̣ܢ ܓܵܘ ܓܸܦܝܼܬܹܗ: ܥܒ̣ܸܪܹܗ ܓܵܘ ܙܵܠܹ̈ܐ ܕܐܝܼܬ ܗ݇ܘܼܵܐ ܬܵܡܵܐ. ܘܟܲܕ ܩܘܼܪܒܸܢܹܗ ܚܲܕ݇ ܡ̣ܢ ܓܘܼܪ̈ܵܢܹܐ ܕܡܲܠܟܵܐ: ܘܓܘܼܫܸܩܠܹܗ ܒܡܵܝܫܵܐ: ܘܚܙܹܐܠܹܗ ܚܲܕ݇ ܐ݇ܢܵܫܵܐ ܕܠܒ̣ܝܼܫܵܐ ܗ݇ܘܼܵܐ ܓ̰ܘܼ̈ܠܹܐ ܟܘܼܡܹ̈ܐ ܘܚܘܼܪܕܝܼܘܼܗܝ ܗ݇ܘܼܵܘ ܗܲܝܘܵܢܹ̈ܐ. ܙܕܸܥܠܹܗ ܗ̇ܘ ܐ݇ܢܵܫܵܐ ܡ̣ܢ ܚܸܙܘܵܐ ܕܚܙܹܐܠܹܗ: ܡܣܵܒܵܒ ܕܒܗ̇ܘ ܙܲܒ̣ܢܵܐ ܠܹܐ ܦܵܝܫܝܼ ܗ݇ܘܼܵܘ ܡܫ݇ܟ̰ܝܼܚܹ̈ܐ ܝܼܚܝܼܕܵܝܹ̈ܐ ܐܸܠܵܐ ܚܲܕ݇ ܡ̣ܢ ܐܲܠܦܵܐ: ܐ݇ܬܹܐܠܹܗ ܘܡܘܼܕܸܥܠܹܗ ܠܡܲܠܟܵܐ ܒܘܼܬ ܡܸܢܕܝܼ ܕܚܙܹܐܠܹܗ. ܘܗܵܝܓܵܗ ܡܘܼܠܝܸܙܠܹܗ ܡܲܠܟܵܐ ܥܲܡ ܟܠܲܝܗܝ ܐܵܣܟܵܪ̈ܵܘܵܬܘܼܗܝ. ܘܟܲܕ ܐ݇ܬܹܐܠܹܗ ܘܟܠܹܐܠܹܗ ܠܥܸܠܸܠ ܡ̣ܢ ܕܘܼܟܬܵܐ ܕܟܹܐ ܚܵܝܝܼ ܗ݇ܘܼܵܐ ܛܘܼܒ̣ܵܢܵܐ. ܘܚܙܹܐܠܹܗ ܠܐ݇ܢܵܫܵܐ ܕܠܒ̣ܝܼܫܵܐ ܗ݇ܘܼܵܐ ܓ̰ܘܼܠܹ̈ܐ ܟܘܼܡܹ̈ܐ: ܘܗܲܝܘܵܢܹ̈ܐ ܚܘܼܪܕܝܼܘܼܗܝ ܗ݇ܘܼܵܘ. ܝܵܐ ܠܐܵܗܵܐ ܕܥܵܓ̰ܝܼܒܘܼܬܵܐ ܣܵܘܓܘܼܠ̈ܝܼ: ܕܒܕܵܡܲܝܬܵܐ ܕܝܘܿܚܲܢܵܢ ܒܲܪ ܥܲܩܪܹ̈ܐ: ܗܲܝܘܵܢܹ̈ܐ ܒܸܥܒ̣ܵܕܵܐ ܗ݇ܘܼܵܐ ܚܸܠܡܲܬ ܠܛܘܼܒ̣ܵܢܵܐ ܡܵܪܝ ܕܵܢܝܼܐܹܝܠ. ܘܟܲܕ ܚܙܹܐܠܹܗ ܩܲܕܝܼܫܵܐ ܠܡܲܠܟܵܐ ܕܡܛܹܐܠܹܗ ܠܟܸܣܠܹܗ: ܦܠܸܛܠܹܗ ܠܐܘܼܪܚܹܗ ܘܩܘܼܒܸܠܹܗ ܒܦܨܝܼܚܘܼܬܵܐ ܓܘܼܪܬܵܐ. ܘܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܐܸܠܹܗ: ܥܲܠ ܡܘܼܕܝ݇ ܕܵܡܲܝܬܵܐ ܐܵܗܵܐ ܕܠܒ̣ܝܼܫܵܐ ܝ݇ܘܸܬܿ؟ ܘܩܵܡܘܿܕܝܼ ܒܸܚܲܝܵܐ ܝ݇ܘܸܬܿ ܓܵܘ ܒܲܪܝܼܵܐ ܒܢܲܦ̮ܫܘܼܟܼ: ܘܫܒ̣ܝܼܩܵܐ ܝ݇ܘܸܬܿ ܠܕܘܼܟܬܵܐ ܕܚܲܝܘܼܬܵܐ ܕܒܢܲܝ̈ܢܵܫܵܐ؟ ܘܓ̰ܘܼܘܸܒܠܹܗ ܩܲܕܝܼܫܵܐ ܟܲܕ ܒܹܐܡܵܪܵܐ: ܕܟܬܵܒ̣ܵܐ ܕܝܼܲܢ ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ: ܕܟܠ ܡ̇ܢ ܕܠܵܐ ܫܵܒ̣ܸܩ ܥܵܠܡܵܐ ܘܐܵܬܹܐ ܒܵܬ݇ܪܝܼ: ܠܹܐ ܚܵܫܸܚ ܕܗܵܘܹܐ ܐܸܠܝܼ ܬܲܠܡܝܼܕܵܐ: ܐܵܡܸܪ ܐܸܠܹܗ ܡܲܠܟܵܐ: ܡܘܼܕܝܼ ܒܸܥܒ̣ܵܕܵܐ ܝ݇ܘܸܬܿ ܠܲܐܟ̣ܵܐ؟ ܐܵܡܸܪ ܐܸܠܹܗ ܛܘܼܒ̣ܵܢܵܐ: ܠܐܲܠܵܗܵܐ ܒܵܪܘܿܝܵܐ ܕܟܠ ܒܸܣܓ̣ܵܕܵܐ ܝ݇ܘܸܢ. ܐ݇ܡܸܪܹܗ ܐܸܠܹܗ: ܘܡܵܢܝܼ ܝ݇ܠܹܗ ܐܲܠܵܗܘܼܟܼ؟ ܐܵܡܸܪ ܐܸܠܹܗ ܩܲܕܝܼܫܵܐ: ܐܲܠܵܗܝܼ ܝܑܼܠܹܗ ܗ̇ܘ ܕܒܪܹܐܠܹܗ ܫܡܲܝܵܐ ܘܐܲܪܥܵܐ: ܘܡܲܠܲܐܟ̣̈ـܹܐ ܘܒܢܲܝ̈ܢܵܫܵܐ: ܘܗܲܝܘܵܢܹ̈ܐ ܘܛܲܝܪܹ̈ܐ: ܘܛܘܼܪ̈ܵܢܹܐ ܘܪ̈ܘܼܡܝܵܬܹܐ: ܘܐܝܼܠܵܢܹ̈ܐ ܥܲܡ ܒܲܚܟ̰ܵܢܹ̈ܐ: ܘܝܵܡܵܬܹ̈ܐ ܘܢܲܗܪ̈ܵܘܵܬܹܐ: ܘܟܠܲܝܗܝ ܒܸܪ̈ܝܵܬܹܐ ܕܡܲܩܘܘܼܚܹܐ ܗ݇ܘܼܵܘ ܘܒܹܐܡܵܪܵܐ: ܩܲܕܝܼܫ ܩܲܕܝܼܫ ܩܲܕܝܼܫܵܐ ܝ݇ܠܹܗ ܡܵܪܝܵܐ ܚܲܝܠܬܵܢܵܐ: ܕܡܸܠܝܹ̈ܐ ܝ݇ܢܵܐ ܫܡܲܝܵܐ ܘܐܲܪܥܵܐ ܡ̣ܢ ܬܸܫܒܘܿܚܝܵܬܹ̈ܗ: ܐ݇ܡܸܪܹܗ ܐܸܠܹܗ ܡܲܠܟܵܐ: ܐܲܝܟܵܐ ܝ݇ܠܹܗ ܐܲܠܵܗܘܼܟ؟ ܐ݇ܡܸܪܹܗ ܩܲܕܝܼܫܵܐ: ܗܵܐ ܓܵܘ ܫܡܲܝܵܐ ܝ݇ܠܵܗ̇ ܕܘܼܟܬܵܐ ܕܚܲܝܘܼܬܹܗ. ܐ݇ܡܸܪܹܗ ܐܸܠܹܗ ܡܲܠܟܵܐ: ܡ̣ܢ ܐܲܝܟܵܐ ܒܝܼܕܲܥܝܵܐ ܝ݇ܘܸܬܿ ܐܸܠܹܗ؟ ܓ̰ܘܼܘܸܒܠܹܗ ܛܘܼܒ̣ܵܢܵܐ: ܡ̣ܢ ܢܒ̣ܝܼ̈ـܹܐ ܘܫܠܝܼܚܹ̈ܐ: ܐ݇ܡܸܪܹܗ ܐܸܠܹܗ ܡܲܠܟܵܐ: ܡܵܢܝܼ ܐ݇ܢܵܐ ܢܒ̣ܝܼ̈ـܹܐ ܘܫܠܝܼܚܹ̈ܐ؟ ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܒܢܲܝ̈ܢܵܫܵܐ ܝ݇ܢܵܐ ܙܲܕܝܼܩܹ̈ܐ: ܕܦܝܼܫܠܹܗ ܓܸܠܝܵܐ ܥܲܠܲܝܗܝ ܪܘܼܚܵܐ ܕܩܘܼܕܫܵܐ: ܐ݇ܡܸܪܹܗ ܐܸܠܹܗ ܡܲܠܟܵܐ: ܡܘܼܕܝܼ ܝ݇ܠܵܗ̇ ܪܘܼܚܵܐ ܕܩܘܼܕܫܵܐ؟ ܐ݇ܡܸܪܹܗ ܐܸܠܹܗ ܛܘܼܒ̣ܵܢܵܐ: ܪܘܼܚܵܐ ܕܩܘܼܕܫܵܐ ܝܑܼـܠܵܗ̇ ܪܘܼܚܹܗ ܕܐܲܠܵܗܵܐ ܚܲܝܵܐ ܘܩܲܕܝܼܫܵܐ: ܕܦܝܵܫܵܐ ܝ݇ܠܵܗ̇ ܫܘܼܕܸܪܬܵܐ ܠܟܸܣ ܟܠ ܕܗ̇ܘ ܕܙܲܕܸܥ ܡܸܢܹܗ ܘܥܵܒ̣ܸܕ ܪܸܙܵܝܹܗ. ܐܵܡܸܪ ܐܸܠܹܗ ܡܲܠܟܵܐ: ܐܵܕܝܼܵܐ ܟܠ ܡܸܢܕܝܼ ܕܛܲܠܒܸܬܿ ܡ̣ܢ ܐܲܠܵܗܘܼܟܼ ܒܸܬ ܝܵܗ݇ܒ̣ܸܠܘܼܟܼ؟ ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܗܹܐ ܒܫܪܵܪܵܐ: ܕܟܠ ܕܡ̇ܢ ܕܛܵܠܸܒ ܡܸܢܹܗ ܒܗܲܝܡܵܢܘܼܬܵܐ ܒܸܬ ܝܵܗ݇ܒ̣ܸܠܹܗ: ܐ݇ܡܸܪܹܗ ܐܸܠܹܗ ܡܲܠܟܵܐ: ܡܲܚܙܝܼ ܠܝܼ ܕܵܐܟ̣ܝܼ؟ ܓ̰ܘܼܘܸܒܠܹܗ ܛܘܼܒ̣ܵܢܵܐ: ܕܩܘܼܪܒܵܐ ܝ݇ܠܹܗ ܦܘܼܪܩܵܢܹܗ ܠܙܲܕܥܵܢܹ̈ܐ ܕܡܸܢܘܼܗܝ: ܘܓ̰ܲܠܕܹܐ ܟܹܐ ܫܲܡܥܹܗ ܠܒܵܥܘܼܬܲܝܗܝ ܘܟܹܐ ܥܵܒ̣ܸܕ ܪܸܙܵܝܲܝܗܝ. ܐ݇ܡܸܪܹܗ ܐܸܠܹܗ ܡܲܠܟܵܐ: ܒܲܣ ܐܸܢ ܗܵܕܟ̣ܵܐ ܝ݇ܠܵܗ̇. ܐܝܼܬܠܝܼ ܚܕܵܐ ܒܪܵܬܵܐ ܫܦܝܼܠܬܵܐ: ܘܣܡܝܼܬܵܐ ܡ̣ܢ ܥܲܝܢ̈ܘܼܗ̇: ܘܫܬܝܼܩܬܵܐ ܝ݇ܠܵܗ̇ ܡ̣ܢ ܠܸܫܵܢܘܼܗ̇: ܘܟܲܪܪܹܐ ܡ̣ܢ ܢܲܬܝܵܬ̈ܘܼܗ̇. ܘܐܵܕܝܼܵܐ ܛܠܘܿܒ ܡ̣ܢ ܐܲܠܵܗܘܼܟܼ ܕܝܵܗ݇ܒ̣ܸܠܵܗ̇ ܨܵܚܘܿܬܵܐ: ܕܗܵܘܝܵܐ ܐܲܝܟܼ ܪܝܼܙܵܐ ܕܒܢܲܝ̈ܢܵܫܵܐ: ܘܐܵܢܵܐ ܡܗܲܝܡܘܼܢܹܐ ܝ݇ܘܸܢ ܒܐܲܠܵܗܘܼܟܼ. ܐ݇ܡܸܪܹܗ ܛܘܼܒ̣ܵܢܵܐ: ܐܲܝܟܵܐ ܝ݇ܠܵܗ̇ ܒܪܵܬܘܼܟܼ؟ ܐ݇ܡܸܪܹܗ ܡܲܠܟܵܐ: ܓܵܘ ܡܕܝܼܢ݇ܬܵܐ ܬܸܠܚܲܫ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܒܸܬ ܐܵܙܸܠ݇ܢ ܥܲܡܵܘܟ̣ܘܿܢ: ܕܚܵܙܸܢܵܗ̇ ܠܐܵܗܵܐ ܒܪܵܬܵܐ. ܘܛܥܸܢܘܿܢ ܠܩܲܕܝܼܫܵܐ ܘܡܘܼܬܸܒ̣ܠܗ݇ܘܿܢ ܥܲܠ ܚܲܕ݇ ܗܲܝܘܵܢ ܒܩܵܠܘܼܠܘܼܬܵܐ: ܘܐ݇ܙܸܠܗ݇ܘܿܢ ܟܠܲܝܗܝ ܡܐܘܼܕܵܠܹܐ ܠܡܕܝܼܢ݇ܬܵܐ ܕܬܸܠܚܲܫ.
ܐܝܼܢܵܐ ܡ̣ܢ ܕܥܒ̣ܸܪܹܗ ܛܘܼܒ̣ܵܢܵܐ ܠܡܕܝܼܢ݇ܬܵܐ: ܥܘܼܓ̰ܵܒܵܐ ܓܘܼܪܵܐ ܕܒ̣ܸܩܠܹܗ ܠܡܓ̣ܘܼܫܵܝܹ̈ܐ ܒܩܲܕܝܼܫܵܐ. ܡܣܵܒܵܒ ܕܒܲܗܪܹܗ ܕܡܫܝܼܚܵܐ ܨܘܼܢܨܸܠܹܗ ܗ݇ܘܼܵܐ ܥܲܠ ܦܲܪܨܘܿܦܹܗ: ܘܒܝܼـܹܗ ܒܸܛܪܵܕܵܐ ܗ݇ܘܼܵܐ ܠܚܘܼܠܛܘܼܢܝܵܐ ܕܫܹܐܕܹ̈ܐ ܘܕܡܓ̣ܘܼܫܵܝܹ̈ܐ. ܘܗܵܝܓܵܗ ܩܘܼܪܒܸܢܵܠܗ݇ܘܿܢ ܠܒܪܵܬܵܐ ܒܪܵܬܹܗ ܕܡܲܠܟܵܐ ܩܵܕ݇ܡ ܩܲܕܝܼܫܵܐ: ܘܟܲܕ ܟܸܠܝܹ̈ܐ ܗ݇ܘܼܵܘ ܡܲܠܟܵܐ ܘܟܠܲܝܗܝ ܓܘܼܪ̈ܵܢܘܼܗܝ ܥܲܡ ܚܲܝܠܵܘܵܬܹ̈ܗ. ܘܟܠܵܗ̇ ܡܕܝܼܢ݇ܬܵܐ ܘܡܵܬܘܵܬܹ̈ܐ ܐܵܢܝܼ ܕܩܘܼܪܒܵܐ ܗ݇ܘܼܵܘ: ܘܓ̰ܸܡܥܝܹ̈ܐ ܗ݇ܘܼܵܘ ܕܚܵܙܝܼ ܡܘܼܕܝܼ ܒܸܬ ܥܵܒ̣ܸܕ ܛܘܼܒ̣ܵܢܵܐ. ܘܗܵܝܓܵܗ ܩܘܼܪܒܸܢܹܗ ܠܟܸܣ ܒܪܵܬܵܐ: ܚܕܸܪܹܗ ܦܲܐܬܹܗ ܠܡܲܕܢ̱ܚܵܐ: ܘܡܨܵܠܝܼ ܗ݇ܘܼܵܐ ܨܠܘܿܬܵܐ ܘܐܵܡܸܪ: ܡܵܪܲܢ ܝܼܫܘܿܥ ܡܫܝܼܚܵܐ ܒܪܘܿܢܵܐ ܣܵܘܓܘܼܠ: ܕܡ̣ܢ ܒܵܒܵܐ ܦܝܼܫܠܘܼܟܼ ܫܘܼܕܪܵܐ: ܗ̇ܘ ܕܡܘܼܩܸܡܠܘܼܟܼ ܠܫܦܝܼܠܵܐ ܡ̣ܢ ܫܘܝܼܬܹܗ. ܘܦܬܸܚܠܹܗ ܥܲܝܢܹ̈ܐ ܕܣܸܡܝܵܐ ܕܡ̣ܢ ܟܵܪ݇ܣܵܐ ܕܝܸܡܹܗ ܒܪܘܼܩܬܘܼܟܼ ܩܲܕܝܼܫܬܵܐ. ܘܩܲܡ ܡܵܚܹܐܠܘܼܟܼ ܛܵܝܸܦܵܐ ܕܝܼܗܘܼܕܵܝܹ̈ܐ ܥܲܠ ܩܲܝܣܵܐ: ܘܡܝܼܬܠܘܼܟܼ ܘܦܝܼܫܠܘܼܟܼ ܩܒ̣ܝܼܪܵܐ ܒܠܸܒܵܗ̇ ܕܐܲܪܥܵܐ ܬܠܵܬ݇ܐ ܝܵܘܡܵܢܹ̈ܐ ܘܬܠܵܬ݇ܐ ܠܲܝܠܵܘܵܬܹ̈ܐ. ܘܩܸܡܠܘܼܟܼ ܡ̣ܢ ܩܲܒ̣ܪܵܐ ܒܚܸܩܪܵܐ: ܘܣܸܩܠܘܼܟܼ ܠܫܡܲܝܵܐ: ܘܝ݇ܬܸܒ̣ܠܘܼܟܼ ܡ̣ܢ ܝܲܡܝܼܢܵܐ ܕܒܵܒܘܼܟܼ ܓܵܘ ܫܡܲܝܹ̈ܐ ܥܸܠܵܝܹ̈ܐ. ܘܩܲܡ ܦܵܩܸܕܠܲܢ: ܕܛܠܘܿܒܘܼܢ ܘܒܸܬ ܦܵܐܸܫ ܝܘܼܗ݇ܒ̣ܵܐ ܐܸܠܵܘܟ̣ܘܿܢ: ܘܐܵܕܝܼܵܐ ܝܵܐ ܐܲܠܵܗܵܐ ܠܵܐ ܒܘܼܬ ܕܝܼܝܼ ܒܸܛܠܵܒܵܐ ܝ݇ܘܸܢ ܐܵܗܵܐ ܡܲܛܠܲܒ: ܐܸܠܵܐ ܒܘܼܬ ܓ̰ܵܡܵܥܲܬܹ̈ܐ ܐܵܢܝܼ ܕܓ̰ܸܡܥܝܹ̈ܐ ܝ݇ܢܵܐ ܘܟܸܠܝܹ̈ܐ ܝ݇ܢܵܐ ܩܵܕ݇ܡܘܼܟܼ ܕܐܲܢ݇ܬܿ ܝ݇ܘܸܬܿ ܐܲܠܵܗܵܐ ܒܢܲܦ̮ܫܘܼܟܼ. ܫܡܥܝܼ ܥܲܠܝܼ ܡܵܪܝܼ: ܘܗܲܒ̣݇ܠ ܨܵܚܘܿܬܵܐ ܠܐܵܗܵܐ ܒܪܵܬܵܐ ܘܦܵܝܫܵܐ ܒܣܝܼܡܬܵܐ: ܕܦܵܐܸܫ ܚܩܝܼܪܵܐ ܫܸܡܘܼܟܼ ܩܲܕܝܼܫܵܐ ܒܥܹܕܬܵܐ ܩܲܕܝܼܫܬܵܐ ܗ̇ܝ ܕܓܘܼܒܝܼܠܘܼܟܼ: ܐܵܕܝܼܵܐ ܘܒܟܠ ܥܕܵܢܵܐ ܘܠܥܵܠܲܡ ܥܵܠܡܝܼܢ. ܘܫܥܸܫܠܹܗ ܐܝܼܕܹܗ ܕܝܲܡܝܼܢܵܐ ܒܢܝܼܫܲܢܩܵܐ ܕܨܠܝܼܒ̣ܵܐ ܬܠܵܬ݇ܐ ܓܵܗܹ̈ܐ ܥܲܠ ܪܹܫܵܗܿ ܕܒܪܵܬܵܐ ܘܗܵܕܟ̣ܵܐ ܐ݇ܡܸܪܹܗ: ܒܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܪܵܬܵܐ ܩܘܼܡ݇ܝ݇. ܘܒܗ̇ܝ ܣܵܥܲܬ ܩܸܡܠܵܗ̇ ܥܲܠ ܐܲܩܠܵܬ̈ܘܼܗ̇ ܘܒܣܸܡܠܵܗ̇ ܒܟܵܡܝܼܠܘܼܬܵܐ: ܘܦܝܼܫܠܗ݇ܘܿܢ ܦܬܝܼܚܹ̈ܐ ܥܲܝܢ̈ܘܼܗ̇ ܘܚܙܹܐܠܵܗ̇: ܘܢܵܬܝܵܬ̈ܘܼܗ̇ ܘܫܡܸܥܠܵܗ̇: ܘܦܬܸܚܠܹܗ ܠܸܫܵܢܘܼܗ̇ ܘܗܘܼܡܙܸܡܠܵܗ̇ ܘܦܝܼܫܠܹܗ ܝܘܼܗ݇ܒ̣ܵܐ ܐܸܠܵܗܿ ܫܘܼܦܪܵܐ ܕܐܲܝܟܼ ܕܝܼـܹܗ ܠܵܐ ܦܝܼܫܠܹܗ ܚܸܙܝܵܐ ܓܵܘ ܥܵܠܡܵܐ.
ܘܒܗ̇ܝ ܣܵܥܲܬ ܢܦܸܠܗ݇ܘܿܢ ܩܵܕ݇ܡ ܐܲܩܠܵܬܹ̈ܐ ܕܩܲܕܝܼܫܵܐ ܡܵܪܝ ܕܵܢܝܼܐܹܝܠ ܟܲܕ ܣܵܓ̣ܕܝܼ ܗ݇ܘܼܵܘ ܐܸܠܹܗ ܘܟܠܲܝܗܝ ܟܸܢܫܹ̈ܐ ܕܡܕܝܼܢ݇ܬܵܐ ܥܲܡ ܡܲܠܟܵܐ ܘܚܲܝܠܵܘܬܹ̈ܗ: ܘܡܘܼܩܘܸܚܠܗ݇ܘܿܢ ܟܲܕ ܐܵܡܪܝܼ: ܕܐܵܗܵܐ ܝ݇ܠܹܗ ܪܹܓܹܗ ܕܐܲܠܵܗܵܐ ܚܲܝܵܐ: ܘܠܲܝܬ ܐܲܠܵܗܵܐ ܐ݇ܚܹܪ݇ܢܵܐ ܫܒ̣ܘܿܩ ܡ̣ܢ ܐܲܠܵܗܵܐ ܕܟܪܸ̈ܣܛܝܵܢܹܐ ܫܲܪܝܼܪܹ̈ܐ. ܗܵܝܓܵܗ ܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܠܟܲܠܝܗܝ ܚܲܝܠܵܘܵܬܹ̈ܗ ܘܠܟܠܲܝܗܝ ܟܸܢܫܹ̈ܐ ܐܵܢܝܼ ܕܬܵܡܵܐ ܝܼܗ݇ܘܼܵܘ: ܫܡܸܥܡܘܿܢ ܐܲܚܘܿܢܘܵܬ̈ܝܼ ܘܒܢܘܼܢ̈ܝܼ ܡܸܢܕܝܼ ܕܒܹܐܡܵܪܵܐ ܝ݇ܘܲܚ ܐܸܠܵܘܟ̣ܘܿܢ. ܕܒܐܵܗܵܐ ܟܠܹܗ ܙܲܒ̣ܢܵܐ ܕܲܥܒ̣ܲܪ: ܠܐܲܠܵܗܹ̈ܐ ܕܕܘܼܓ̈ܠܹܐ ܦܠܸܚܠܲܢ ܟܠܲܢ. ܘܐܵܕܝܼܵܐ ܕܝ݇ܕܸܥܠܲܢ ܠܐܲܠܵܗܵܐ ܫܲܪܝܼܪܵܐ: ܒܐܝܼܕܵܬܹ̈ܗ ܕܪܹܓܹܗ ܡܵܪܝ ܕܵܢܝܼܐܹܝܠ ܕܫܘܼܕܸܪܹܗ ܠܟܸܣܠܲܢ: ܐ݇ܬܵܝܡܘܿܢ ܟܠܲܢ ܕܦܵܝܫܲܚ ܬܘܼܠܡܸܕܹܗ ܐܸܠܹܗ: ܘܡܘܼܩܘܸܚܠܗ݇ܘܿܢ ܟܠܲܝܗܝ ܡ̣ܢ ܚܲܕ݇ ܦܘܼܡܵܐ: ܕܒܸܥܒ̣ܵܕܵܐ ܝ݇ܘܲܚ ܐܲܝܟܼ ܗܹܡܸܙܡܵܢܘܼܟܼ: ܘܒܸܫܠܵܡܵܐ ܝ݇ܘܲܚ ܠܪܵܥܝܘܼܟܼ: ܘܡܩܵܒܘܼܠܹܐ ܝ݇ܘܲܚ ܠܦܘܼܩܕܵܢܘܼܟܼ. ܘܐܵܕܝܼܵܐ ܠܲܝܬ ܐܲܠܵܗܵܐ: ܐܸܠܵܐ ܐܸܢ ܐܲܠܵܗܹܗ ܕܕܵܢܝܼܐܹܝܠ. ܘܩܸܡܠܹܗ ܛܘܼܒ̣ܵܢܵܐ ܡܵܪܝ ܕܵܢܝܼܐܹܝܠ ܟܲܕ ܚܸܕܝܵܐ ܘܦܨܝܼܚܵܐ: ܘܚܙܹܐܠܹܗ ܒܢܲܗܪܵܐ ܕܩܘܼܪܒܵܐ ܝ݇ܠܹܗ ܠܗ̇ܝ ܕܘܼܟܬܵܐ. ܚܕܵܐ ܕܘܼܟܬܵܐ ܗ݇ܘܼܵܐ ܕܟܹܐ ܚܵܫܚܵܐ ܗ݇ܘܼܵܐ ܠܡܲܥܡܘܿܕܝܼܬܵܐ. ܘܬܘܼܪܨܵܠܹܗ ܘܡܘܼܪܝܸܙܵܠܹܗ ܘܩܘܼܕܫܵܠܹܗ: ܘܕܪܹܐܠܹܗ ܒܝܼܘܼܗ̇ ܡܸܫܚܵܐ ܩܲܕܝܼܫܵܐ ܕܙܲܝܬܵܐ ܕܸܟ̣ܝܵܐ. ܘܓ̰ܡܸܥܠܗ݇ܘܿܢ ܡܲܠܟܵܐ ܘܟܠܲܝܗܝ ܚܲܝܠܵܘܵܬܹ̈ܐ ܡܐܘܼܕܵܠܹܐ: ܘܡܕܝܼܢ݇ܬܵܐ ܘܐܲܬܪܵܐ ܟܠܹܗ: ܓܲܒ̣ܪܹ̈ܐ ܘܒܲܟ̣ܬܵܬܹ̈ܐ ܘܓ̰ܘܲܢܩܹ̈ܐ ܘܝܵـܠܹ̈ܕ݇ܐ ܙܥܘܿܪܹ̈ܐ: ܘܩܘܼܒܸܠܗ݇ܘܿܢ ܡ̣ܢ ܐܝܼܕܵܬܹ̈ܐ ܕܩܲܕܝܼܫܵܐ ܡܲܥܡܘܿܕܝܼܬܵܐ ܩܲܕܝܼܫܬܵܐ. ܘܟܲܕ ܫܘܼܪܹܐܠܹܗ ܕܡܲܥܡܸܕܠܗ݇ܘܿܢ: ܩܲܕ݇ܡܵܝܬܵܐ ܡܲܠܟܵܐ ܥܡܸܕܠܹܗ ܘܗ̇ܝ ܒܪܵܬܹܗ ܕܦܝܼܫܠܵܗ̇ ܒܣܝܼܡܬܵܐ: ܚܲܕ݇ܟ̰ܵܐ ܚܲܕ݇ܟ̰ܵܐ ܟܠܲܝܗܝ ܥܡܸܕܠܗ݇ܘܿܢ: ܕܗܵܘܝܼ ܗ݇ܘܼܵܘ ܒܡܸܢܝܵܢܵܐ ܐܲܝܟܼ ܬܡܵܢܝܵܐ ܐܲܠܦܹ̈ܐ ܓܵܢܵܬܹ̈ܐ. ܘܡܘܼܣܚܝܼܵܝܠܹܗ ܘܚܘܼܠܠܵܝܠܹܗ: ܘܕܘܼܟ̣ܝܼܠܹܗ ܘܬܘܼܡܸܙܠܹܗ ܠܟܠܵܗ̇ ܫܸܚܬܲܝܗܝ. ܘܡܘܼܥܡܸܕܵܝܠܹܗ ܒܫܸܡܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ ܠܚܲܝܹ̈ܐ ܕܠܐܵܒܲܕ ܐܲܒܵܕܝܼܢ: ܐܵܡܹܝܢ. ܘܦܝܼܫܠܗ݇ܘܿܢ ܡܸܢܝܹ̈ܐ ܒܦܸܣܩܵܐ ܕܥܸܪܒܹܗ ܕܡܫܝܼܚܵܐ: ܘܗ݇ܘܹܐܠܵܗ̇ ܚܲܕܘܼܬܵܐ ܠܡܲܠܲܐܟ̣̈ـܹܐ ܘܠܒܢܲܝ̈ܢܵܫܵܐ. ܘܒܝܵܘܡܵܐ ܩܸܪܝܵܐ ܘܩܲܕܝܼܫܵܐ ܕܚܲܕܒܫܲܒܵܐ ܡܵܪܵܢܵܝܵܐ ܩܘܼܒܸܠܗ݇ܘܿܢ ܪܘܼܫܡܵܐ ܕܡܲܥܡܘܿܕܝܼܬܵܐ.
ܘܥܒ̣ܸܕܠܹܗ ܡܲܠܟܵܐ ܚܕܵܐ ܟ̰ܝܵܕܬܵܐ ܕܡܹܐܟ̣ܘܼܠܬܵܐ ܘܫܬܵܝܬܵܐ ܠܟܠܲܝܗܝ ܓܘܼܪ̈ܵܢܘܼܗܝ ܘܟܠܲܝܗܝ ܒܢܘܿܢܹ̈ܐ ܕܐܲܬܪܹܗ. ܘܡܘܼܩܘܸܚܠܹܗ ܒܚܲܕܘܼܬܵܐ ܘܦܨܝܼܚܘܼܬܵܐ ܟܲܕ ܐ݇ܡܸܪܹܗ ܠܡܵܪܝ ܕܵܢܝܼܐܹܝܠ: ܝܵܐ ܡܲܠܦܵܢܵܐ ܕܡ̣ܢ ܐܲܠܵܗܵܐ: ܘܪܹܓܵܐ ܓܘܼܪܵܐ ܕܡܵܪܵܗ̇ ܕܟܠܵܗܿ ܒܪܝܼܬܵܐ: ܩܘܼܡ݇ ܘܫܩܘܿܠܘܼܟܼ ܡܲܠܟܘܼܬܝܼ: ܘܗ݇ܘܝܼ ܡܲܠܟܵܐ ܘܡܵܪܵܐ ܘܡܕܲܒܪܵܢܵܐ ܕܟܠܲܢ. ܓ̰ܘܼܘܸܒܠܹܗ ܡܵܪܝ ܕܵܢܝܼܐܹܝܠ ܘܐ݇ܡܸܪܹܗ ܠܡܲܠܟܵܐ: ܡܲܠܟܵܐ ܚܝܝܼ ܠܥܵܠܲܡ: ܘܓܲܪܘܸܣ ܡܵܪܝܵܐ ܠܐܝܼܩܵܪܘܼܟܼ: ܘܙܲܒܛܸܢ ܕܸܫ̰ܡܸܢܘܼܟܼ ܬܚܘܿܬ ܐܲܩܠܵܬ̈ܘܼܟܼ ܠܥܵܠܲܡ: ܘܓܵܘ ܥܵܠܡܵܐ ܚܲܕ݇ܬܵܐ ܡܲܟܠܹܐܠܘܼܟܼ ܡ̣ܢ ܝܲܡܝܼܢܹܗ. ܐܵܢܵܐ ܝܵܐ ܡܵܪܝܼ ܡܘܼܕܝܼ ܒܸܬ ܥܲܒ̣ܕܸܢ ܒܡܲܠܟܘܼܬܵܐ ܥܵܒ̣ܪܵܢܬܵܐ: ܕܐܝܼܬܠܲܢ ܡܲܠܟܘܼܬܵܐ ܕܠܹܐ ܥܵܒ̣ܪܵܐ ܘܠܹܐ ܒܲܛܠܵܐ: ܡܣܵܒܵܒ ܩܲܡ ܦܵܩܸܕܠܲܢ ܡܵܪܲܢ ܒܡܲܫܚܲܕܬܹܗ ܡܲܚܝܼܵܢܝܼܬܵܐ: ܕܠܵܐ ܩܵܢܝܼܬܘܿܢ ܠܵܐ ܕܲܗܒ̣ܵܐ ܘܠܵܐ ܣܹܐܡܵܐ ܘܠܵܐ ܒܪܸܢܓ̰ ܒܟܸܣܝܵܬܵܘܟ̣̈ܘܿܢ: ܘܠܵܐ ܬܪܹܝܢ ܣܘܼܕܪ̈ܵܬܹܐ: ܘܠܵܐ ܓ̰ܲܢܬܵܐ ܘܠܵܐ ܩܵܛܝܼܵܐ: ܘܠܵܐ ܨܵܘܠܹ̈ܐ ܠܐܘܼܪܚܵܐ: ܕܵܐܟ̣ܝܼ ܐܲܚܢܲܢ ܒܸܬ ܛܲܠܒܲܚ ܡܲܠܟܘܼܬܵܐ ܥܵܒ̣ܘܿܪܬܵܐ؟ ܐܝܼܢܵܐ ܫܡܥܝܼ ܡܵܪܝܼ ܡܲܠܟܵܐ ܡܸܢܕܝܼ ܕܒܹܐܡܵܪܵܐ ܝ݇ܘܸܢ ܐܸܠܘܼܟܼ: ܐܵܗܵܐ ܡܲܠܟܘܼܬܘܼܟܼ ܡܵܪܝܵܐ ܓܲܪܘܸܣܠܵܗ̇ ܘܥܵܒ̣ܸܕܠܵܗ̇ ܥܲܠܘܼܟܼ ܡܒܘܼܪܸܟ̣ܬܵܐ: ܐܲܝܟܼ ܡܲܠܟܘܼܬܹܗ ܕܩܘܼܣܛܲܢܛܝܼܢܘܿܣ ܡܲܠܟܵܐ ܙܲܟܵܝܵܐ. ܘܐܵܢܵܐ ܡܵܪܝܼ ܡܲܠܟܵܐ ܚܕܵܐ ܡܲܛܠܲܒ ܐܝܼܬܠܝܼ ܠܟܸܣܠܘܼܟܼ: ܥܒ̣ܘܼܕ ܒܵܘܲܪ ܒܸܬ ܡܲܟܡܸܠܸܬܿ ܠܵܗ̇. ܘܓ̰ܘܼܘܸܒܠܹܗ ܡܲܠܟܵܐ ܚܲܫ ܘܐ݇ܡܸܪܹܗ: ܝܵܐ ܪܹܓܵܐ ܕܡܵܪܵܐ ܚܲܝܵܐ: ܛܠܘܿܒ ܡܸܢܝܼ: ܘܐܵܢܵܐ ܒܸܬ ܥܲܒ̣ܕܸܢ ܟܠ ܡܸܢܕܝܼ ܕܒܲܣܡܵܠܘܼܟܼ. ܐ݇ܡܸܪܹܗ ܩܲܕܝܼܫܵܐ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܟܠ ܡܸܢܕܝܼ ܕܟܹܐ ܡܲܚܸܒܠܹܗ ܐܲܠܵܗܵܐ: ܕܝܼܠܹܗ ܦܘܼܪܩܵܢܵܐ ܕܓܵܢܘܼܟܼ ܘܕܓܵܢ̈ܵܬܲܢ. ܐ݇ܡܸܪܹܗ ܡܲܠܟܵܐ: ܐܲܚܢܲܢ ܒܸܫܡܲܥܝܵܐ ܝ݇ܘܲܚ ܘܒܸܥܒ̣ܵܕܵܐ ܝ݇ܘܲܚ ܐܲܝܟܼ ܗܲܡܙܲܡܬܘܼܟܼ ܘܐܲܝܟܼ ܦܘܼܩܕܵܢܘܼܟܼ: ܘܓ̰ܘܼܘܸܒܠܹܗ ܡܵܪܝ ܕܵܢܝܼܐܹܝܠ ܘܐ݇ܡܸܪܹܗ ܠܡܲܠܟܵܐ: ܡܵܪܝܼ ܡܲܠܟܵܐ: ܐܵܗܵܐ ܝ݇ܠܵܗ̇ ܫܲܗܘܲܬܝܼ: ܕܒܵܢܹܝܬܿ ܒܐܵܗܵܐ ܡܕܝܼܢ݇ܬܵܐ ܚܲܕ݇ ܗܲܝܟܠܵܐ ܚܩܝܼܪܵܐ ܠܫܸܡܹܗ ܕܡܵܪܝܵܐ. ܘܗܵܘܹܐ ܠܕܘܼܟ̣ܪܘܼܢܝܘܼܟܼ ܩܵܕ݇ܡ ܡܵܪܝܵܐ: ܘܐܘܼܦ ܒܘܼܬ ܚܸܩܪܹܗ ܕܡܵܪܝܵܐ: ܠܕܵܘܪܹ̈ܐ ܕܐܵܬܝܼ ܒܵܬ݇ܪ ܕܝܼܘܼܟܼ ܠܐܵܒܲܕ. ܘܐܵܢܵܐ ܙܲܒܘܼܢ: ܒܵܢܹܝܬܿ ܩܵܬܝܼ ܚܲܕ݇ ܕܲܝܪܵܐ: ܝܲܥܢܹܐ ܚܲܕ݇ ܡܲܫܟܢܵܐ ܠܡܵܪܝܵܐ: ܒܗ̇ܝ ܕܘܼܟܬܵܐ ܕܡܢܘܼܗ̇ ܩܲܡ ܡܲܝܬ݇ܝܼܬܘܿܢ ܠܝܼ. ܘܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܠܩܲܕܝܼܫܵܐ: ܗܵܘܹܐ ܡܵܪܝܼ ܐܲܝܟܼ ܪܸܙܵܝܘܼܟܼ: ܘܦܘܼܩܕܵܢܘܼܟܼ ܦܵܐܸܫ ܬܘܼܡܸܡܵܐ ܒܟܠܵܗ̇ ܡܲܠܟܘܼܬܝܼ: ܘܐܵܢܵܐ ܘܟܠܹܗ ܒܲܝܬܝܼ ܬܲܠܡܝܼܕ̈ܘܼܟܼ ܝܑܼܘܲܚ ܘܡܲܟܡܸܠܵܢܹ̈ܐ ܕܪܸܙܵܝܘܼܟܼ. ܗܲܪ ܒܗ̇ܝ ܣܵܥܲܬ ܦܘܼܩܸܕܠܹܗ ܡܲܠܟܵܐ: ܕܦܵܐܸܫ ܝܘܼܗ݇ܒ̣ܵܐ ܐܸܠܹܗ ܐܲܪܥܵܐ ܠܒܸܢܝܵܢܵܐ ܟܠ ܐܲܝܟܵܐ ܕܒܲܣܡܵܐ ܠܹܗ.
ܘܩܸܡܠܹܗ ܛܘܼܒ̣ܵܢܵܐ ܘܚܕܸܪܹܗ ܚܘܼܕܪܵܢܵܐܝܼܬ ܓܵܘ ܡܕܝܼܢ݇ܬܵܐ ܟܠܵܗ̇: ܘܚܙܹܐܠܹܗ ܒܹܝܦܲܠܓܵܗ̇ ܕܡܕܝܼܢ݇ܬܵܐ ܚܕܵܐ ܕܘܼܟܬܵܐ ܫܲܦܝܼܪܬܵܐ: ܐܘܼܦ ܒܲܚܟ̰ܵܐ ܘܐܝܼܠܵܢܹ̈ܐ: ܘܗ̇ܝ ܕܘܼܟܬܵܐ ܕܡܲܠܟܵܐ ܗ݇ܘܼܵܐ. ܘܐ݇ܡܸܪܹܗ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܕܒܐܵܗܵܐ ܕܘܼܟܬܵܐ ܒܸܬ ܐܵܣܩܵܐ ܬܸܫܒܘܿܚܬܵܐ ܠܡܵܪܝܵܐ. ܘܡܘܼܕܸܥܠܹܗ ܠܡܲܠܟܵܐ ܒܘܼܬ ܗ̇ܝ ܕܘܼܟܬܵܐ: ܘܦܘܼܩܸܕܠܹܗ ܕܦܵܝܫܵܐ ܝܘܼܗ݇ܒ̣ܸܠܬܵܐ ܐܸܠܹܗ. ܘܐ݇ܬܹܐܠܗ݇ܘܿܢ ܦܵܠܵܚܹ̈ܐ ܘܒܲܢܵܝܹ̈ܐ ܘܐܘܼܡܵܢܹ̈ܐ ܘܐ݇ܢܵܫܹ̈ܐ ܕܠܵܐ ܡܸܢܝܵܢܵܐ: ܘܡ̣ܢ ܢܵܓܸܣܬܲܢ ܩܸܛܥܝܵܝܠܗ݇ܘܼܢ ܟܠܲܝܗܝ ܐܝܼܠܵܢܹ̈ܐ. ܘܫܩܸܠܹܗ ܛܘܼܒ̣ܵܢܵܐ ܚܲܒ̣ܠܵܐ ܕܟܝܘܼܠܵܐ: ܘܕܒ̣ܸܩܠܹܗ ܒܐܝܼܕܹܗ ܒܚܲܕ݇ ܪܹܫܵܐ ܘܡܲܠܟܵܐ ܒܪܹܫܵܐ ܐ݇ܚܹܪ݇ܢܵܐ. ܘܟܝܼܠܹܗ ܠܗܲܝܟܠܵܐ ܒܟܝܘܿܠܹ̈ܐ ܡܬܲܚܡܹܐ؛ ܥܲܡ ܩܲܢܟܹܐ ܘܒܹܝܬ ܡܲܥܡܘܿܕܝܼܬܵܐ ܘܒܹܝܬ ܕܝܵܩܘܿܢ ܘܒܹܝܬ ܣܵܗܕܹ̈ܐ: ܘܒܹܝܬ ܐܲܪ̈ܟܹܐ ܕܥܹܕܬܵܐ: ܘܒܹܝܬ ܐܲܦܸܣܩܘܿܦܝܼܘܿܢ ܥܲܡ ܬܠܵܬܐ ܕܵܪ̈ܵܬܹܐ ܦܸܬܝܹ̈ܐ. ܘܩܸܠܹܝܵܬܹ̈ܐ ܓܵܘܵܢܵܝܹ̈ܐ ܠܡܲܕܪ̈ܵܣܹܐ ܘܠܐܵܢܝܼ ܕܥܵܒ̣ܕܝܼ ܫܵܗܲܪܬܵܐ: ܘܕܵܪ̈ܵܬܹܐ ܩܵܐ ܩܵܪ̈ܝܼܒܵܝܹܐ ܘܡܸܣܟܹܢܹ̈ܐ: ܘܕܘܼܟܬܵܐ ܕܐܲܪ̈ܚܹܐ ܘܒܹܝܬ ܩܒ̣ܘܼܪܹ̈ܐ: ܘܟܠ ܡܸܢܕܝܼ ܕܟܹܐ ܚܵܫܸܚ ܠܥܹܕܬܵܐ. ܡ̣ܢ ܒܵܬ݇ܪ ܬܪܹܝܢ ܝܵܘܡܵܢܹ̈ܐ ܫܘܼܪܹܐܠܗ݇ܘܼܢ ܒܒܸܢܝܵܢܵܗ̇ ܕܥܹܕܬܵܐ. ܘܒܥܸܣܪܵܐ ܝܲܪ̈ܚܹܐ ܦܝܼܫܠܹܗ ܒܸܢܝܵܐ ܗܲܝܟܠܵܐ: ܦܝܼܫܠܵܗ̇ ܣܘܼܩܸܠܬܵܐ ܒܟܠܲܝܗܝ ܣܸܩ̈ܠܹܐ ܡܲܠܟܵܝܹ̈ܐ. ܘܗܵܕܟ̣ܵܐ ܐܘܼܦ ܙܹܐ ܕܲܝܪܹܗ ܕܡܵܪܝ ܕܵܢܝܼܐܹܝܠ ܕܥܲܠ ܬܲܪ̈ܥܵܢܹܐ ܕܢܲܗܪܵܐ: ܝ݇ܬܸܒ̣ܬܵܐ ܝ݇ܠܵܗ̇ ܒܲܪܩܘܼܒ̣ܠ ܡܵܬܵܐ ܕܫܸܡܵܗ̇ ܒܹܝܬ ܩܲܝܛܹ̈ܐ: ܦܝܼܫܠܵܗ̇ ܣܘܼܩܸܠܬܵܐ ܒܟܠܲܝܗܝ ܣܵܩܲܠܝܵܬܹ̈ܐ ܛܵܒ̣̈ـܹܐ ܘܫܲܦܝܼܪܹ̈ܐ. ܘܦܝܼܫܠܹܗ ܟܡܝܼܠܵܐ ܒܸܢܝܵܢܵܐ ܕܐܵܢܝܼ ܗܲܝܟ̈ܠܹܐ ܚܩܝܼܪܹ̈ܐ ܒܫܹܢ݇ܬܵܐ ܐܸܫܬܸܡܐܵܐ ܘܬܠܵܬܝܼܢ ܘܬܪܹܝܢ ܕܝܵܘܢܵܝܹ̈ܐ. ܘܦܘܼܩܸܕܠܹܗ ܡܲܠܟܵܐ: ܘܦܝܼܫܠܹܗ ܝܘܼܗ݇ܒ̣ܵܐ ܠܥܹܕܬܵܐ ܘܠܕܲܝܪܵܐ ܕܬܸܠܚܲܫ ܘܟܠܲܝܗܝ ܐܲܪ̈ܥܵܬܹܐ ܕܚܵܕܸܪ̈ܘܼܢܘܼܗ̇ ܥܲܡ ܫܘܼܩܹ̈ܐ [ܒܵܙܵܪܹ̈ܐ] ܘܓ̰ܵܕܵܘܵܬܹ̈ܐ ܕܐܵܢܝܼ ܕܩܘܼܪܒܵܐ ܝ݇ܢܵܐ ܠܥܹܕܬܵܐ: ܕܗܵܘܝܼ ܠܒܲܗܪܹ̈ܐ ܘܠܡܲܣܪ̈ܵܦܹܐ.
ܡ̣ܢ ܒܵܬ݇ܪ ܕܦܝܼܫܠܵܗ̇ ܡܘܼܟܡܸܠܬܵܐ ܡܲܛܠܵܒܹܗ ܕܩܲܕܝܼܫܵܐ: ܐܲܝܟܼ ܫܲܗܘܲܬܵܐ ܕܠܸܒܹܗ ܘܪܸܙܵܝܵܐ ܕܓܵܢܹܗ: ܦܝܼܫܠܹܗ ܡܸܠܝܵܐ ܡ̣ܢ ܚܲܕܘܼܬܵܐ ܘܦܨܝܼܚܘܼܬܵܐ. ܘܗܵܝܓܵܗ ܟܬܸܒ̣ܠܹܗ ܐܸܓܲܪܬܵܐ ܩܵܐ ܒܵܒܲܢ ܦܵܛܲܪܝܲܪܟܵܐ ܕܡܲܕܢ̱ܚܵܐ ܠܡܕܝܼܢ݇ܬܵܐ ܕܡܲܠܟܘܼܬܵܐ. ܕܫܸܡܘܼܗ̇ ܒܹܝܬ ܠܵܦܵܛ ܕܗܘܼܙܵܝܹ̈ܐ: ܘܫܘܼܕܸܪܹܗ ܒܝܼܲܕ ܚܲܕ݇ ܒܝܼܠܝܼܕܪܵܐ [ܫܠܝܼܚܵܐ؛ ܡܫܲܕܪܵܐ] ܩܵܠܘܿܠܵܐ ܠܐܲܬܪܵܐ ܕܥܝܼܠܵܡ ܒܩܵܠܘܿܠܘܼܬܵܐ. ܘܗܵܕܟ̣ܵܐ ܟܬܸܒ̣ܠܹܗ ܒܐܸܓܲܪܬܵܐ: ܠܪܲܒܵܐ ܕܥܸܠܠܵܢܹ̈ܐ ܘܪܹܫܵܐ ܕܪܹ̈ܫܵܢܹܐ: ܘܒܵܒܵܐ ܕܐܲܪ̈ܬܵܕܘܼܟܣܵܝܹܐ ܡܲܠܦܵܢܵܐ ܕܗܵܩܘܼܬܵܐ: ܘܦܵܛܲܪܝܲܪܟܵܐ ܕܟܘܼܪܣܝܵܐ ܫܠܝܼܚܲܝܵܐ: ܘܩܵܬܘܿܠܝܼܩܵܐ ܕܟܠܲܝܗܝ ܬܪ̈ܝܼܨܹܐ ܕܗܲܝܡܵܢܘܼܬܵܐ. ܟܲܕ ܐܵܗܵܐ ܐܸܓܲܪܬܵܐ ܩܵܕ݇ܡ ܩܲܕܝܼܫܘܼܬܘܼܟܼ ܒܸܬ ܟܵܠܝܵܐ: ܒܣܓ̣ܵܕܝܵܬܹ̈ܐ ܕܠܵܐ ܡܸܢܝܵܢܵܐ ܩܵܕ݇ܡ ܫܵܘܦܵܐ ܕܐܲܩܠܵܬ̈ܘܼܟܼ ܩܲܕܝܼܫܹ̈ܐ: ܡܲܩܪܘܼܒ̣ܹܐ ܝ݇ܘܲܚ ܩܵܕ݇ܡ ܬܪܘܿܢܘܿܣ ܕܥܲܠܘܼܗܝ ܟܹܐ ܦܵܝܫܵܐ ܚܩܝܼܪܬܵܐ ܐܲܒ̣ܵܗܘܼܬܘܼܟܼ ܥܸܠܲܝܬܵܐ: ܟܲܕ ܒܸܛܠܵܒܵܐ ܝ݇ܘܲܚ ܡ̣ܢ ܓܘܼܪܘܼܬܘܼܟܼ: ܕܫܲܕܪܸܬܿ ܪܵܥܝܵܐ ܠܐܵܗܵܐ ܐܲܬܪܵܐ ܕܡܲܫܵܚܵܛܘܼܬܲܢ: ܕܝܼܠܹܗ ܐܲܬܪܵܐ ܕܒܹܝܬ ܢܘܼܗܲܕܪܵܐ: ܠܡܕܝܼܢ݇ܬܵܐ ܫܸܡܘܼܗ̇ ܗ݇ܘܼܵܐ ܬܸܠܚܲܫ: ܕܦܝܼܫܠܵܗ̇ ܬܘܼܠܡܸܕܬܵܐ ܐܘܼܪܚܵܐ ܕܗܵܩܘܼܬܵܐ ܒܐܝܼܕܵܬܹ̈ܐ ܕܬܲܠܡܝܼܕܘܼܟܼ ܕܵܢܝܼܐܹܝܠ ܙܲܒܘܼܢ ܘܩܲܪܝܼܒܵܝܵܐ ܘܡܸܣܟܹܢܵܐ: ܘܟܲܕ ܥܒ̣ܸܪܵܗ̇ ܐܸܓܲܪܬܵܐ ܘܦܝܼܫܠܵܗ̇ ܩܪܝܼܬܵܐ ܩܵܕ݇ܡ ܪܹܫܵܐ ܕܟܵܗܢܹ̈ܐ: ܢܫܝܼܩܵܠܹܗ ܘܡܘܼܬܒ̣ܵܠܹܗ ܥܲܠ ܥܲܝܢ̈ܘܼܗܝ: ܘܫܘܼܪܹܐܠܹܗ ܒܸܟ̣ܝܵܐ ܒܬܵܢܲܚܬܵܐ. ܒܘܼܬ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܝܑܼܗܘܼܵܐ ܒܪܘܿܢܵܐ ܕܐܲܬܪܹܗ ܕܒܵܒܲܢ ܦܵܛܲܪܝܲܪܟܵܐ. ܘܟܬܸܒ̣ܠܹܗ ܐܸܓܲܪ̈ܝܵܬܹܐ ܠܟܠܲܝܗܝ ܥܹܕܵܬܹ̈ܐ ܕܚܵܕܝܼ ܥܲܡܹܗ: ܘܨܘܼܚܨܝܼܠܹܗ ܓܵܘ ܐܸܓܲܪ̈ܝܵܬܹ̈ܐ ܕܡܵܫ݇ܟ̰ܸܚ ܚܲܕ݇ ܪܵܥܝܵܐ ܕܟܹܐ ܙܲܕܸܥ ܡ̣ܢ ܐܲܠܵܗܵܐ. ܘܡܘܼܫ݇ܟ̰ܸܚܠܹܗ ܚܲܕ݇ ܐ݇ܢܵܫܵܐ ܟܡܝܼܠܵܐ ܘܓܲܢ݇ܒܵܪܵܐ ܘܫܲܗܘܸܬܵܢܵܐ ܒܨܸܦܝܘܼܬܵܐ: ܙܸܪܲܢܓ ܘܒܬܘܼܠܵܐ ܨܦܵܝܝܼ ܒܟܠܲܝܗܝ ܨܵܦܝܘܼܝܵܬܹ̈ܐ: ܕܫܸܡܹܗ ܗ݇ܘܵܐ ܡܝܼܠܸܣ. ܘܐܵܗܵܐ ܕܓܲܢ݇ܒܵܪܵܐ ܗ݇ܘܼܵܐ ܒܟܠܲܝܗܝ ܕܘܼܒܵܪܹ̈ܐ ܐܲܠܵܗܵܝܹ̈ܐ: ܘܩܲܕܝܼܫܵܐܝܼܬ ܦܝܼܫܠܹܗ ܩܸܪܝܵܐ ܡ̣ܢ ܪܘܼܚܵܐ ܕܩܘܼܕܫܵܐ: ܘܦܝܼܫܠܹܗ ܡܘܼܬܒ̣ܵܐ ܐܲܦܸܣܩܘܿܦܵܐ ܠܒܹܝܬ ܢܘܼܗܲܕܪܵܐ ܐܘܼܦ ܠܡܕܝܼܢ݇ܬܵܐ ܬܸܠܚܲܫ. ܐܵܗܵܐ ܗ݇ܘܹܐܠܹܗ ܒܘܼܟ̣ܪܵܐ ܕܪܹ̈ܫܵܢܹܐ ܕܟܵܗܢܹ̈ܐ: ܗ̇ܘ ܩܲܕ݇ܡܵܝܵܐ ܒܐܲܬܪܵܐ ܢܘܼܗܲܕܪܵܝܵܐ: ܘܒܝܵܘܡܵܐ ܩܲܕ݇ܡܵܝܵܐ ܕܥܒ̣ܸܪܹܗ ܠܡܕܝܼܢ݇ܬܵܐ ܚܲܣܝܵܐ ܡܵܪܝ ܡܝܼܠܸܣ: ܦܠܸܛܠܹܗ ܩܲܕܝܼܫܵܐ ܡܵܪܝ ܕܵܢܝܼܐܹܝܠ ܕܬܵܦܸܩ ܒܝܼـܹܗ: ܘܡܲܠܟܵܐ ܘܟܠܲܝܗܝ ܚܲܝܠܵܘܵܬܹ̈ܗ ܥܲܡ ܟܠܹܗ ܛܵܝܸܦܵܐ ܕܡܲܠܟܘܼܬܹܗ: ܘܩܘܼܒܸܠܗ݇ܘܿܢ ܒܚܲܕܘܼܬܵܐ ܓܘܼܪܬܵܐ ܘܒܐܝܼܩܵܪܵܐ ܕܚܫܝܼܚܵܐ ܝ݇ܠܹܗ ܐܸܠܹܗ. ܘܗ̇ܘ ܝܵܘܡܵܐ ܕܒܝܼـܹܗ ܗܕܸܪܹܗ ܝܑܼܗܘܼܵܐ ܚܲܕܒܫܲܒܵܐ ܕܒܵܬ݇ܪ ܝܲܠܕܹܗ ܕܡܵܪܲܢ. ܘܒܝܼـܹܗ ܒܗ̇ܘ ܝܵܘܡܵܐ ܩܸܡܠܹܗ ܠܩܘܼܕܵܫܹܗ ܕܗ̇ܘ ܗܲܝܟܠܵܐ ܓܘܼܪܵܐ ܘܚܩܝܼܪܵܐ: ܘܩܘܼܕܸܫܠܗ݇ܘܿܢ ܒܥܕܵܢܵܐ ܕܓܢܵܝܬܵܐ ܕܫܸܡܫܵܐ: ܘܦܘܼܠܓ̣݇ܝܼܠܗ݇ܘܿܢ ܒܝܼـܹܗ ܐ݇ܪܵܙܹܐ ܡܲܚܝܼܵܢܹ̈ܐ: ܦܲܓ̣ܪܹܗ ܕܡܫܝܼܚܵܐ ܦܵܪܘܿܩܲܢ. ܘܟܲܕ ܝ݇ܬܸܒ̣ܠܗ݇ܘܿܢ. ܘܡܘܼܒܣܸܡܠܗ݇ܘܿܢ ܒܚܲܒ̣ܪܵܒ̣ܘܼܬܵܐ ܕܥܲܡ ܐܘܼܕܵܠܹܐ: ܐܵܗܵܐ ܡܚܘܼܣܝܵܐ ܡܵܪܝ ܡܝܼܠܸܣ ܘܡܵܪܝ ܕܵܢܝܼܐܹܝܠ ܛܘܼܒ̣ܵܢܵܐ ܥܲܡ ܡܲܠܟܵܐ ܚܲܫ ܘܟܠܲܝܗܝ ܓܘܼܪ̈ܵܢܘܼܗܝ. ܘܡ̣ܢ ܒܵܬ݇ܪ ܚܲܕ݇ ܥܕܵܢܵܐ ܟܪܝܼܬܵܐ ܕܘܼܟ̣ܝܼܠܗ݇ܘܿܢ ܠܟܠܹܗ ܐܲܬܪܵܐ ܡ̣ܢ ܣܓ̣ܵܕܬܵܐ ܕܨܵܢܵܡܹ̈ܐ: ܘܡܠܹܐܠܗ݇ܘܿܢ ܠܟܠܹܗ ܡ̣ܢ ܡܗܘܼܡܢܹ̈ܐ ܫܲܪܝܼܪܹ̈ܐ ܘܡܲܚܸܒܵܢܹ̈ܐ ܕܐܲܠܵܗܵܐ.
ܘܡ̣ܢ ܒܵܬ݇ܪ ܚܲܕ݇ ܥܕܵܢܵܐ ܟܪܝܼܬܵܐ: ܩܲܕܝܼܫܵܐ ܡܵܪܝ ܕܵܢܝܼܐܹܝܠ ܡܘܼܟܡܸܠܹܗ ܦܠܵܫܹܗ. ܘܡܛܹܐܠܹܗ ܝܵܘܡܵܐ ܕܦܵܐܸܫ ܡܘܼܢܝܸܚܵܐ ܡ̣ܢ ܩܸܣܲܬ ܕܚܲܝ̈ܘܼܗܝ: ܘܫܩܸܠܹܗ ܟܠܝܼܠܵܐ ܒܚܸܩܪܵܐ ܕܣܵܗܕܘܼܬܵܐ ܛܵܒ̣ܬܵܐ ܕܝܼܫܘܿܥ ܡܫܝܼܚܵܐ. ܘܐ݇ܙܸܠܹܗ ܠܐܵܘܵܢܵܐ [ܠܡܲܢܙܸܠ] ܕܡܲܢܝܵܚܬܵܐ: ܘܚܒ̣ܸܛܠܹܗ ܥܲܡ ܩܲܕܝܼܫܹ̈ܐ ܚܲܒ̣ܪ̈ܵܘܵܬܘܼܗܝ. ܘܡ̣ܢ ܒܵܬ݇ܪ ܕܫܘܼܢܹܐܠܹܗ ܡ̣ܢ ܥܵܠܡܵܐ. ܘܐ݇ܙܸܠܹܗ ܐܲܦܸܣܩܘܿܦܵܐ ܘܡܲܠܟܵܐ ܘܟܵܗܢܹ̈ܐ ܘܩܠܝܼܪܘܿܣ ܘܟܠܹܗ ܛܵܝܸܦܵܐ ܡ̣ܢ ܩܝܼܵܣܘܼܗܝ. ܘܟܸܢܫܹ̈ܐ ܕܠܵܐ ܡܸܢܝܵܢܵܐ: ܘܡܫܘܼܡܸܫܠܗ݇ܘܿܢ ܬܠܵܬ݇ܐ ܝܵܘܡܵܢܹ̈ܐ: ܘܛܘܼܡܸܪܘܿܢ ܒܐܝܼܩܵܪܵܐ ܘܒܪܵܒܵܐ ܚܲܫܵܐ: ܘܡܘܼܬܸܒ̣ܠܗ݇ܘܿܢ ܓܵܘ ܒܹܝܬ ܣܵܗܕܹ̈ܐ ܕܝܼܠܵܗ̇ ܗ̇ܝ ܕܘܼܟܬܵܐ ܕܒܸܢܝܵܐܠܹܗ. ܘܦܝܵܫܵܐ ܝ݇ܠܹܗ ܡܘܼܟܡܸܠܵܐ ܕܘܼܟܼܪܵܢܹܗ ܒܚܲܕܒܫܲܒܵܐ ܩܲܕ݇ܡܵܝܵܐ ܕܝܲܪܚܵܐ ܕܐܝܼܵܪ: ܨܠܵܘܵܬܹ̈ܗ ܥܲܠ ܟܠܲܢ: ܐܵܡܹܝܢ.
ܐܝܼܢܵܐ ܐܵܗܵܐ ܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܠܹܐ ܗ݇ܘܼܵܐ ܐܲܚܟ̰ܝܼ ܓܵܘ ܚܲܝܘܼ̈ܗܝ ܥܒ̣ܸܕܠܹܗ ܚܲܝ̈ܠܹܐ ܘܢܝܼܫܲܢܩܹ̈ܐ: ܐܝܼܢܵܐ ܡ̣ܢ ܒܵܬ݇ܪ ܡܵܘܬܹܗ ܒܸܦܠܵܛܵܐ ܝ݇ܢܵܐ ܗܲܝܲܪ̈ܝܵܬܹܐ ܠܟܠ ܗ̇ܘ ܡܓܵܘܣܸܢ ܒܝܼـܹܗ. ܐܝܼܢܵܐ ܚܝܼܠܹܗ ܡܵܪܝ ܕܵܢܝܼܐܹܝܠ ܬܸܫܥܝܼܢ ܘܚܲܡܫܵܐ [95] ܫܸܢܹ̈ܐ. ܘܗ݇ܘܹܐܠܹܗ ܛܘܼܦ̮ܣܵܐ ܛܵܒ̣ܵܐ ܠܟܠܲܝܗܝ ܕܲܝܪ̈ܵܝܹܐ ܘܐܲܒ̣ܵܗܵܬܹ̈ܐ ܓܵܘ ܕܵܘܪܵܐ ܕܝܼـܹܗ. ܨܠܘܿܬܹܗ ܒܸܬ ܗܲܝܸܪܵܐ ܠܟܠܲܢ: ܐܵܡܹܝܢ. ܡܣܵܒܵܒ ܟܹܐ ܐܵܡܪܝܼ ܐܝܼܬ ܗ݇ܘܼܵܐ ܚܲܕ݇ ܡܫܲܡܫܵܢܵܐ ܓܵܘ ܐܲܬܪܵܐ ܕܒܹܝܬ ܝܲܙܕܝܼܢ: ܫܦܝܼܠܹ̈ܐ ܗ݇ܘܼܵܘ ܟܠܲܝܗܝ ܗܲܕܵܡ̈ܘܼܗܝ. ܘܩܵܐ ܚܲܕ݇ ܥܕܵܢܵܐ ܝܵܪܝܼܟ̣ܬܵܐ ܒܐܵܗܵܐ ܡܲܪܥܵܐ ܡܲܪܝܼܪܵܐ ܕܫܦܲܠܬܵܐ ܗ݇ܘܼܵܐ. ܘܡ̣ܢ ܒܵܬ݇ܪ ܗܵܕܵܐ ܒܚܲܕ݇ ܡ̣ܢ ܠܲܝܠܵܘܵܬܹ̈ܐ ܦܝܼܫܠܹܗ ܓܸܠܝܵܐ ܐܸܠܹܗ ܒܚܸܠܡܵܐ ܕܠܲܝܠܹܐ: ܕܐܸܢ ܐܵܗܵܐ ܕܐܵܙܸܠ݇ܬܿ ܠܕܲܝܪܹܗ ܕܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܗ̇ܝ ܕܝܑܼܠܵܗ̇ ܒܐܲܬܪܵܐ ܕܢܘܼܗܲܕܪܵܐ: ܥܲܠ ܕܲܝܪܵܐ ܕܒܸܢܝܵܐ ܗ݇ܘܼܵܐ ܠܝܲܙܕܝܼܢ: ܡ̣ܢ ܢܵܓܸܣܬܲܢ ܒܸܬ ܒܲܣܡܸܬ: ܐܝܼܢܵܐ ܒܥܕܵܢܵܐ ܕܪܥܸܫܠܹܗ ܡ̣ܢ ܫܸܢܬܹܗ: ܬܢܹܐܠܹܗ ܐܵܗܵܐ ܚܘܼܠܡܵܐ ܠܝܸܡܹܗ. ܗܵܝܓܵܗ ܫܩܸܠܵܗ̇ ܝܸܡܸܗ: ܘܡܛܹܐܠܗ݇ܘܿܢ ܠܕܲܝܪܹܗ ܕܩܲܕܝܼܫܵܐ. ܘܗ݇ܘܹܐܠܗ݇ܘܿܢ ܩܵܕ݇ܡ ܓܘܼܪܢܹܗ ܕܩܲܕܝܼܫܵܐ ܐܲܝܟܼ ܚܲܕ݇ ܫܵܒ̣ܘܿܥܵܐ: ܒܘܼܣܸܡܠܹܗ ܡܵܪܲܢ ܠܝܵܠܵܕ݇ܐ ܒܨܠܵܘܵܬܹ̈ܗ ܕܩܲܕܝܼܫܵܐ ܡܵܪܝ ܕܵܢܝܼܐܹܝܠ: ܘܐ݇ܙܸܠܗ݇ܘܿܢ ܠܕܘܼܟܬܵܐ ܕܚܲܝܘܼܬܲܝܗܝ ܟܲܕ ܚܸܕܝܹ̈ܐ ܘܦܨܝܼܚܹ̈ܐ: ܘܗܵܐ ܦܝܼܫܠܵܗ̇ ܡܘܼܙܒܸܛܬܵܐ ܠܟܸܣܠܲܢ: ܕܠܹܐ ܗ݇ܘܼܵܐ ܐܲܚܟ̰ܝܼ ܓܵܘ ܚܲܝܲܝ̈ܗܝ ܒܸܥܒ̣ܵܕܵܐ ܗ݇ܘܼܵܘ ܩܲܕܝܼܫܹ̈ܐ ܢܝܼܫܲܢܩܹ̈ܐ ܘܚܲܝ̈ܠܹܐ: ܐܝܼܢܵܐ ܒܵܬ݇ܪ ܡܵܘܬܲܝ̈ܗܝ ܗܲܪ ܐܵܗܵܐ ܟܹܐ ܥܵܒ̣ܕܝܼ ܗ݇ܘܼܵܘ. ܡܣܵܒܵܒ ܠܹܐ ܝ݇ܢܵܐ ܡܝܼܬܹ̈ܐ: ܐܸܠܵܐ ܚܵܝܹ̈ܐ ܝ݇ܢܵܐ ܠܐܲܠܵܗܵܐ.
ܘܗܵܝܓܵܗ ܡܲܠܟܵܐ ܛܵܒ̣ܵܐ ܘܡܗܘܼܡܢܵܐ ܚܲܫ: ܩܲܡ ܛܲܪܕܝܼܠܹܗ ܡܲܠܟܹ̈ܐ ܚܲܒ̣ܪ̈ܵܘܵܬܘܼܗܝ: ܡܣܵܒܵܒ ܕܫܡܸܥܠܗ݇ܘܿܢ ܕܗܘܹܐܠܹܗ ܟܪܸܣܛܝܵܢܵܐ. ܘܒܵܬ݇ܪ ܚܲܕ݇ ܥܕܵܢܵܐ ܝ݇ܕܸܥܠܗ݇ܘܿܢ: ܟܲܕ ܝܘܼܗ݇ܒ̣ܸܠܹܗ ܣܵܗܕܘܼܬܵܐ ܘܠܵܐ ܟܦܸܪܹܗ ܒܡܵܪܲܢ: ܘܩܛܸܥܠܗ݇ܘܿܢ ܠܪܹܫܹܗ ܒܣܲܝܦܵܐ: ܘܫܩܸܠܹܗ ܟܠܝܼܠܵܐ ܒܣܵܗܕܘܼܬܵܐ ܛܵܒ̣ܬܵܐ ܒܘܼܬ ܫܸܡܹܗ ܕܡܵܪܲܢ. ܘܗܵܝܓܵܗ ܩܸܡܠܹܗ ܟܠܹܗ ܛܵܝܸܦܵܐ ܘܐܲܦܸܣܩܘܿܦܹ̈ܐ ܘܟܵܗܢܹ̈ܐ: ܘܛܘܼܡܸܪܘܿܢ ܘܡܘܼܬܸܒ̣ܠܗ݇ܘܿܢ ܓܵܘ ܗܲܝܟܠܵܐ ܕܒܢܹܐܠܹܗ ܬܸܠܚܲܫ ܓܵܘ ܡܕܝܼܢ݇ܬܹܗ: ܒܬܪܹܝܢ ܒܝܲܪܚܵܐ ܬܲܡܘܼܙ. ܗܵܝܓܵܗ ܨܦܸܚܠܹܗ ܪܕܘܼܦܝܵܐ ܕܡܓ̣ܘܼܫܵܝܹ̈ܐ ܓܵܘ ܡܕܝܼܢ݇ܬܵܐ ܬܸܠܚܲܫ: ܘܫܘܼܪܹܐܠܹܗ ܡܵܪܝ ܡܝܼܠܸܣ ܒܸܕܪܵܫܵܐ ܥܲܡܲܝܗܝ ܘܡܘܼܢܚܸܦܵܝܠܹܗ. ܥܒ̣ܸܕܠܹܗ ܚܸܠܡܲܬ ܠܟܘܼܪܣܝܼ ܕܪܵܥܝܘܼܬܵܐ ܚܲܡܫܵܐ ܫܸܢܹ̈ܐ: ܘܚܘܼܠܸܢܢܘܿܢ ܥܲܠܘܼܗܝ ܓ̰ܘܼܪ̈ܵܒܹܐ ܡ̣ܢ ܒܢܘܿܢܹ̈ܐ ܕܓܹܒܵܐ ܕܣܸܡܵܠܵܐ. ܘܓ̰ܡܸܥܠܗ݇ܘܿܢ ܥܲܠ ܪܹܫܵܐ ܕܟܵܗܢܹ̈ܐ ܨܸܦܝܹ̈ܐ: ܐ݇ܢܵܫܹ̈ܐ ܩܸܫܝܹ̈ܐ ܘܥܸܨܝܹ̈ܐ: ܪܓ̰ܸܡܠܗ݇ܘܿܢ ܕܠܵܐ ܪ̈ܲܚܡܹܐ: ܘܫܩܸܠܹܗ ܟܠܝܼܠܵܐ ܘܩܢܹܐܠܹܗ ܟܠܝܼܠܵܐ ܕܓ̣ܵܠܝܼܒܘܼܬܵܐ. ܘܛܘܼܡܸܪܘܿܢ ܒܢܘܿܢ̈ܘܼܗܝ ܒܐܝܼܩܵܪܵܐ ܓܘܼܪܵܐ: ܘܡܘܼܬܸܒ̣ܠܗ݇ܘܿܢ ܓܵܘ ܗܲܝܟܠܹܗ ܒܒܲܝܬܵܐ ܕܣܵܗܕܹ̈ܐ: ܒܬܠܵܬ݇ܐ ܒܝܲܪܚܵܐ ܕܚܙܝܼܪܵܢ.
ܒܨܠܵܘܵܬܲܝ̈ܗܝ ܘܒܒܵܥܘܼܝܵܬܲܝ̈ܗܝ ܕܐܵܢܝܼ ܛܘܼܒܼܵܢܹ̈ܐ ܡܘܼܕܟ̣ܸܪܹ̈ܐ: ܡܵܪܝ ܕܵܢܝܼܐܹܝܠ ܐܵܣܝܵܐ: ܘܡܵܪܝ ܚܲܫ ܡܲܠܟܵܐ: ܘܡܵܪܝ ܡܝܼܠܸܣ ܐܲܦܸܣܩܘܿܦܵܐ: ܗܵܘܝܼ ܪ̈ܲܚܡܹܐ ܕܐܲܠܵܗܵܐ ܥܲܠ ܙܲܒܘܼܢܹ̈ܐ ܟܵܬܘܿܒ̣ܵܐ ܘܡܲܟܬܸܒ̣ܵܢܵܐ: ܘܥܲܠ ܩܲܪܝܵܢܵܐ ܡܗܝܼܪܵܐ: ܘܥܲܠ ܫܲܡܥܵܢܹ̈ܐ ܚܲܦܛܵܢܹ̈ܐ ܕܡܲܨܝܘܼܬܹܐ ܝ݇ܢܵܐ ܒܚܘܼܒܵܐ ܐܲܠܵܗܵܝܵܐ: ܘܥܲܠ ܟܠ ܕܫܘܼܪܸܟܠܹܗ ܐܸܢ ܒܗܹܡܸܙܡܵܢ ܘܐܸܢ ܒܦܸܠܚܵܢܵܢܹ̈ܐ: ܠܐܵܒܲܕ ܐܲܒܵܕܝܼܢ: ܐܹܝܢ ܘܐܵܡܹܝܢ.
ܚܬܸܡܠܵܐ ܒܚܲܝܠܵܐ ܕܡܵܪܲܢ ܬܲܫܥܝܼܬܵܐ ܕܡܵܪܝ ܕܵܢܝܼܐܹܝܠ ܘܕܡܵܪܝ ܡܝܼܠܸܣ ܘܡܲܠܟܵܐ ܚܲܫ. ܘܠܐܲܠܵܗܵܐ ܫܘܼܒ̣ܚܵܐ ܐܲܡܝܼܢܵܐ: ܐܵܡܹܝܢ.
♱♱♱♱♱♱♱♱♱♱♱♱