ܬܫܥܝܬܐ ܕܡܪܝ ܫܡܥܘܢ ܒܪ ܨܒܥ̈ܐ ܘܚܒܼܪ̈ܘܬܗ ܣܗܕ̈ܐ

ܡ݂ܢ ܟܬܼܵܒܼܵܐ ܕܫܲܪܒܵܐ ܕܣܵܗܕܹ̈ܐ

ܕܫܩܝܼܠܬܵܐ ܝܠܵܗ̇ ܡ݂ܢ ܐܲܨܲܚܬܵܐ ܕܓܘܿܠܬܵܦܵܐ (ܐܘܼܪܡܝܼ)

ܒܫܹܢ݇ܬܵܐ ܕܐܸܡܐܵܐ ܘܐܸܫܒܲܥܣܲܪ ܠܡܲܠܟܘܼܬܼܵܐ ܕܦܲܪ̈ܣܵܝܹ̈ܐ: ܗܵܝ ܕܝܼܠܵܗ݁ ܫܹܢ݇ܬܵܐ ܬܠܵܬܝܼܢ ܘܚܕܵܐ ܕܫܵܒܼܘܿܪ ܡܲܠܟܵܐ ܕܡܲܠܟܹ̈ܐ: ܗܘܹܐܠܵܗ݁ ܐܵܗܵܐ ܙܵܒܛܲܢܬܵܐ ܘܣܢܵܝܬܵܐ ܥܲܠ ܛܵܝܸܦܲܢ. ܘܒܝܹܗ ܒܐܵܗܵܐ ܙܲܒܼܢܵܐ: ܫܸܡܥܘܿܢ ܝܼܗܘܵܐ ܐܲܦܸܣܩܘܿܦܵܐ ܕܡܕܝܼܢܵܬܹ̈ܐ ܕܣܠܝܼܩ ܘܲܩܛܝܼܣܦܘܿܢ: ܕܡܫܘܼܡܗܵܐ ܝܼܗ݇ܘܵܐ ܒܲܪ ܨܲܒܵܥܹ̈ܐ: ܐܝܼܢܵܐ ܒܐܵܗܵܐ ܫܸܡܵܐ ܫܲܦܝܼܪܵܐ ܦܝܼܫܠܹܗ ܩܸܪܝܵܐ: ܡ݂ܢ ܣܵܒܵܒ ܕܐܲܒܼܵܗ̈ܘܼܗܝ ܟܹܐ ܡܨܒܼܝܼܥ ܝܼܗ݇ܘܵܐ ܓ̰ܘܼܠܹ̈ܐ ܒܚܕܵܐ ܕܵܡܲܝܬܵܐ ܢܘܼܟܼܪܵܝܬܵܐ ܕܓ̰ܘܼܠܵܐ ܕܡܲܠܟܘܼܬܼܵܐ ܟܵܦܘܿܪܬܵܐ: ܘܫܸܡܥܘܿܢ ܨܒܸܥܠܹܗ ܩܵܐ ܓܵܢܹܗ ܒܕܸܡܵܐ ܠܒܸܫܬܵܐ ܕܡܲܠܟܘܼܬܼܵܐ ܩܲܕܝܼܫܬܵܐ: ܐܵܗܵܐ ܒܪܸܙܵܝܹܗ ܒܥܸܠܹܗ ܕܝܵܗ݇ܒܸܠ ܓܵܢܹܗ ܠܡܵܘܬܵܐ ܒܘܼܬ ܚܵܬܸܪ ܐܲܠܵܗܹܗ ܘܛܵܝܸܦܹܗ: ܒܥܕܵܢܵܐ ܕܚܙܹܐܠܹܗ ܐܲܢܹܐ ܕܠܵܐ ܒܕܘܼܙܘܼܬܼܵܐ ܒܸܦܠܵܚܵܐ ܝܼܗ݇ܘܵܘ ܓܵܘ ܥܸܕܬܹܗ ܕܐܲܠܵܗܵܐ: ܝܘܼܗ݇ܒܸܠܹܗ ܓܵܢܹܗ ܠܩܸܛܠܵܐ ܐܲܝܟܼ ܝܼܗܘܼܕܵܐ ܡܲܩܒܲܝ ܒܥܕܵܢܵܐ ܕܥܝܼܩܘܼܬܼܵܐ ܕܛܵܝܸܦܹܗ.

ܝܵܐ ܠܟܵܗܢܵܐ ܘܟܵܗܢܵܐ: ܝܼܗܘܼܕܵܐ ܘܫܸܡܥܘܿܢ: ܚܲܕ݇ ܡܸܢܲܝܗܝ ܦܘܿܪܸܩܠܹܗ ܛܵܝܸܦܹܗ ܒܸܦܠܵܫܵܐ: ܘܗܵܘ݁ ܐ݇ܚܹܪ݇ܢܵܐ ܦܘܼܪܸܩܠܹܗ ܛܵܝܸܦܹܗ ܒܡܵܘܬܹܗ. ܚܲܕ݇ ܡܸܢܵܝܗܝ ܟܲܕ ܓܼܠܸܒܠܹܗ ܘܦܝܼܫܠܹܗ ܚܩܝܼܪܵܐ: ܘܗܘ݁ ܐ݇ܚܹܪ݇ܢܵܐ ܟܲܕ ܙܲܒܘܼܢ ܝܼܗ݇ܘܵܐ ܗ݇ܘܹܐܠܹܗ ܢܲܨܝܼܚܵܐ: ܝܼܗܘܼܕܵܐ ܟܲܕ ܩܛܸܠܹܗ ܥܒܼܸܕܠܹܗ ܪܘܼܡܪܵܡܵܐ ܠܛܵܝܸܦܹܗ: ܘܫܸܡܥܘܿܢ ܟܲܕ ܦܝܵܫܵܐ ܝܼܗ݇ܘܵܐ ܩܛܝܼܠܵܐ ܥܒܼܸܕܠܹܗ ܐܵܙܲܕ ܠܛܵܝܸܦܹܗ. ܐܲܢܹܐ ܝܼܗ݇ܘܵܘ ܓܘܼܪ̈ܵܢܹܐ ܕܟܵܗܢܹ̈ܐ ܘܟܘܼܡܪܹ̈ܐ: ܠܒܼܝܼܫܹ̈ܐ ܨܘܼܕܪܵܐ ܕܒܹܝܬܼ ܩܘܼܕܫܵܐ. ܙܲܕܝܼܩܵܐܝܼܬܼ ܚܸܠܡܲܬܟܵܪܹ̈ܐ ܕܡܲܕܒܚܵܐ ܝܼܗ݇ܘܵܘ: ܨܸܦܝܹ̈ܐ ܘܡܝܲܩܪ̈ܵܢܹܐ ܕܚܸܠܡܲܬ. ܒܕܘܼܙܘܬܵܐ ܡܘܼܥܡܸܕܹ̈ܐ ܒܡܝܼ̈ܵܐ. ܒܓ̰ܘܼܪܵܬ ܡܲܚܙܝܼܵܢܹ̈ܐ ܫܲܪܒܲܬ ܕܥܸܢܒܹ̈ܐ. ܒܙܕܘܼܥܬܵܐ ܡܚܲܦܛܵܢܹ̈ܐ ܠܛܵܝܸܦܵܝ: ܒܙܕܘܼܥܬܵܐ ܡܲܠܒܸܫܵܢܹ̈ܐ ܕܟ̰ܲܟܵܐ. ܓܲܢ݇ܒܵܪܵܐܝܼܬܼ ܩܵܪ̈ܝܵܢܹܐ ܠܡܵܘܬܵܐ: ܒܙܸܪܲܢܓܘܼܬܵܐ ܟ̰ܵܝܕܵܢܹ̈ܐ ܠܩܸܛܠܵܐ ܒܗܝܼܒܼܝܼ ܪ̈ܵܚܛܵܢܹܐ ܠܣܲܝܦܵܐ: ܒܓܼܵܠܝܼܒܘܼܬܵܐ ܩܵܕܡܵܢܹ̈ܐ ܠܣܲܝܦܵܐ. ܒܚܸܩܪܵܐ ܥܡܝܼܕܹ̈ܐ ܒܕܸܡܵܐ: ܒܚܲܕܘܼܬܵܐ ܫܸܬܝܹ̈ܐ ܟܵܣܵܐ. ܛܵܒܼܵܐܝܼܬܼ ܡܦܲܠܓ݇ܝܼܵܢܹ̈ܐ ܕܕܲܫܢܹ̈ܐ: ܘܵܓ̰ܝܼܒܘܼܬܼܵܐ ܝܵܗ݇ܒܼܵܢܹ̈ܐ ܕܟܠܝܼܠܹ̈ܐ. ܒܗܸܫܪܵܘܼܬܼܵܐ ܦܲܠܚܵܢܹ̈ܐ ܕܦܘܼܩܕܵܢܵܐ ܕܡܵܪܵܝ: ܕܸܟܼܝܵܐܝܼܬܼ ܢܵܛܪ̈ܵܢܹܐ ܕܢܵܡܘܿܣܵܐ ܕܐܲܠܵܗܵܝ. ܒܗܵܩܘܼܬܼܵܐ ܕܚܲܕ݇ ܡܘܼܟܡܸܠܹܗ: ܒܗܵܝ ܕܓܵܢܵܐ ܒܘܼܬ ܓܵܢܵܐ ܩܛܸܠܹܗ ܘܦܝܼܫܠܹܗ ܩܛܝܼܠܵܐ ܘܦܪܸܩܠܹܗ. ܘܗܵܘ ܐ݇ܚܹܪܹ݇ܢܵܐ ܒܡܲܓ̰ܒܘܼܪܘܼܬܵܐ ܦܠܸܚܠܹܗ: ܒܘܼܬ ܗܵܝ ܕܐ݇ܡܸܪܹܗ ܡ݂ܢ ܕܡܵܚܝܼܠܘܼܟܼ ܥܲܠ ܟ̰ܲܢܘܼܟܼ: ܐܵܗܵܐ ܩܕܵܠܹܗ ܦܘܼܫܸܛܠܹܗ ܠܣܲܝܦܵܐ. ܚܲܕ݇ ܟܲܕ ܒܸܫܩܵܠܵܐ ܝܼܗ݇ܘܵܐ ܬܘܼܥܠܵܐ ܦܝܼܫܠܹܗ ܫܩܝܼܠܵܐ ܬܘܼܥܠܵܐ ܡܸܢܹܗ: ܘܐ݇ܚܹܪ݇ܢܵܐ ܟܲܕ ܡܲܟܝܼܟܼܵܐ ܗ݇ܘܵܐ ܦܝܼܫܠܹܗ ܡܲܟܝܼܟܼܵܐ. ܚܲܕ݇ ܒܟܵܗܢܘܼܬܼܵܐ ܠܡܝܼܬܹ̈ܐ ܓܵܘ ܫܝܘܿܠ ܡܚܵܣܘܿܝܹܐ ܝܼܗ݇ܘܵܐ: ܘܗܵܘ ܐ݇ܚܪܹ݇ܢܵܐ ܒܟܘܼܡܪܘܼܬܹܗ ܠܡܝܼܬܹ̈ܐ ܓܵܘ ܚܛܝܼܬܼܵܐ ܡܢܵܚܘܿܡܹܐ ܝܼܗܘܵܐ. ܚܲܕ݇ ܬܦܸܩܠܹܗ ܒܦܠܵܫܵܐ ܐܲܫܟܵܪܵܐ ܒܩܸܛܠܵܐ: ܗܵܘ ܐ݇ܚܪܹ݇ܢܵܐ ܬܦܸܩܠܹܗ ܒܦܠܵܫܵܐ ܛܸܫܝܵܐ ܒܩܸܛܠܵܐ. ܝܵܐ ܩܸܛܠܵܐ ܕܩܲܕܝܼܫܹ̈ܐ ܟܡܵܐ ܓܘܼܪܵܐ ܝܼܘܸܬ: ܒܘܼܫ ܙܵܘܕܵܐ ܕܦܵܪܘܿܩܲܢ ܒܝܼܘܿܟܼ ܫܩܸܠܹܗ ܓܼܵܠܝܼܒܘܼܬܵܐ ܓܠܝܼܬܵܐ ܒܘܼܬ ܚܛܝܼܬܵܐ ܛܫܝܼܬܵܐ. ܘܐܘܼܦ ܝܼܗܘܼܕܵܐ ܟܲܕ ܦܝܼܫܠܹܗ ܪܝܼܡܵܐ ܒܓܼܵܠܝܼܒܘܼܬܵܐ: ܒܝܼܘܼܟܼ ܨܠܝܼܠܹܗ ܓܘܼܪܵܐ ܕܟܵܗܢܹ̈ܐ ܕܟܵܠܹܗ ܕܦܵܐܹܫ ܡܚܘܼܣܝܵܐ ܒܕܸܡܵܐ ܕܓܵܢܹܗ. ܘܐܘܼܦ ܫܸܡܥܘܿܢ ܟܲܕ ܢܦܸܠܹܗ ܒܓܼܵܠܝܼܒܘܼܬܵܐ: ܩܸܡܠܹܗ ܟܲܕ ܒܝܼܘܼܟܼ ܦܵܐܹܫ ܓܸܢܝܵܐ ܘܦܵܐܹܫ ܕܸܟܼܝܵܐ ܓܘܼܪܵܐ ܕܟܵܗܢܹ̈ܐ ܒܡܲܝ̈ܵܐ ܕܩܢܘܿܡܹܗ. ܝܼܗܘܼܕܵܐ ܗ݇ܘܹܐܠܹܗ ܚܲܝܠܵܢܵܐ ܒܐܹܝܠ ܐܲܠܵܗܵܐ ܕܪ̈ܘܼܚܵܬܹܐ: ܡܘܼܕܸܪܹܗ ܡܲܕܲܐܬܵܐ (tax ) ܕܛܵܝܸܦܹܗ ܡ݂ܢ ܐܝܼܕܹ̈ܐ ܕܡܲܠܟܵܐ ܕܝܵܘܵܢ ܘܕܣܘܼܪܝܼܵܐ. ܘܫܸܡܥܘܿܢ ܓܼܠܸܒܠܹܗ ܒܝܼܫܘܿܥ ܒܪܘܿܢܹܗ ܕܐܲܠܵܗܵܐ: ܘܪܘܼܚܩܢܹܗ ܡܲܕܲܐܬܵܐ ܕܛܵܝܸܦܹܗ ܡ݂ܢ ܙܵܒܸܛܘܼܬܼܵܐ ܕܡܲܠܟܵܐ ܕܦܵܪܸܣ ܘܕܣܘܼܪܝܼܵܐ. ܐܲܢܹܐ ܝ݇ܢܵܐ ܪ̈ܵܥܵܘܵܬܹܐ ܫܲܪܝܼܪܹ̈ܐ: ܘܲܡܕܲܒܪ̈ܵܢܹܐ ܚܲܟܝܼܡܹ̈ܐ: ܕܝܘܼܗ݇ܒܸܠܗ݇ܘܿܢ ܓܵܢܵܝ ܒܘܼܬ ܦܸܣܩܵܝ ܕܠܵܐ ܛܲܠܩܵܐ. ܐܲܢܹܐ ܛܘܼܠܸܩܠܗ݇ܘܿܢ ܠܡܵܫ݇ܟ̰ܲܚܬܘܼܗ݁: ܒܓܼܵܠܝܼܒܘܼܬܵܝ ܒܸܬ ܦܵܝܫܵܐ ܗ݇ܘܵܐ ܡܘܼܫ݇ܓ̰ܸܚܬܵܐ ܛܘܸܠܩܵܢܘܼܗ݁. ܦܝܼܫܠܗ݇ܘܿܢ ܕܝܼܫܹ̈ܐ ܒܫܵܦܵܩܲܬ ܕܡܲܪܥܝܼܬܵܝ: ܕܠܵܐ ܐܵܟܼܠܵܐ ܗܵܝ ܡ݂ܢ ܓܸܠܵܐ ܕܕܝܼܫܵܐ ܗ݇ܘܵܐ ܒܫܵܘܦܵܐ ܕܐܲܩܠܹ̈ܐ ܕܢܘܼܟܼܪ̈ܵܝܹܐ. ܘܦܝܼܫܠܗ݇ܘܿܢ ܓ̰ܘܼܢܓ̰ܸܪܹ̈ܐ ܒܡܲܚܲܒܬܵܐ ܕܥܸܪ̈ܒܵܝ: ܕܠܵܐ ܫܵܬܝܼ ܡܝܼ̈ܵܐ ܚܒܼܝܼܛܹ̈ܐ ܕܐܲܩܠܵܐ ܕܟܵܦܘܿܪܹ̈ܐ.

(ܗܵܕܟܼܵܐ ܒܸܫܒܼܵܩܵܐ ܝ݇ܘܲܚ ܠܬܲܫܥܝܼܬܵܐ ܩܲܕ݇ܡܵܝܬܵܐ ܕܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ ܘܚܲܒܼܪ̈ܵܘܵܬܹܗ ܣܵܗܕܹ̈ܐ: ܘܡܲܬܘܼܒܹܐ ܝ݇ܘܲܚ ܗ̇ܝ ܬܪܲܝܵܢܝܼܬܼܵܐ ܕܫܩܝܼܠܬܵܐ ܝ݇ܠܵܗ̇ ܡ݂ܢ ܐܲܨܲܚܬܵܐ ܕܓܘܿܠܬܵܦܵܐ (ܐܘܼܪܡܝܼ) ܘܡ݂ܢ ܗ̇ܝ ܕܡܘܿܢܣܲܝܢܘܿܪ ܐܒ݁ܒ݁ܝܵܠܘܿܣ ܕܠܘܼܥܘܲܝܢ)

ܡܸܢ݇ܕܪܹܫ݇ ܒܫܸܡܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܒܸܟܬܵܒܼܵܐ ܝ݇ܘܸܢ ܣܵܗܕܘܼܬܼܵܐ ܕܡܵܪܝ ܫܸܡܥܘܿܢ ܪܹܫܵܐ ܕܐܲܦܸܣܩܘܿܦܹ̈ܐ ܕܥܸܕܬܵܐ ܕܡܲܕܢܚܵܐ: ܘܕܐܲܦܸܣܩܘܿܦܹ̈ܐ (ܘܩܲܫܝܼܫܹ̈ܐ ܘܲܡܫܲܡܫܵܢܹ̈ܐ ܘܒܢܲܝ̈ ܛܵܝܸܦܵܐ ܘܡܗܘܼܡܢܹ̈ܐ ܐܵܢܝܼ ܕܗܘܹܐܠܗܘܿܢ ܣܵܗܕܹ̈ܐ ܥܲܡܹܗ. ܕܘܼܟܼܪܘܼܢܝܵܝ ܠܒܘܼܪܸܟܬܵܐ: ܘܐܲܚܢܲܢ ܦܵܝܫܲܚ ܗܘܼܝܸܪܹܗ ܒܨܠܵܘܵܬ̈ܵܝ. ܐܵܡܹܝܢ.

ܒܹܐܬܵܝܵܐ ܝ݇ܘܲܚ ܐܵܕܝܼܵܐ ܠܟܸܣ ܬܲܫܥܝܼܬܵܐ ܡܓܘܼܒܝܼܬܵܐ ܘܩܸܣܲܬ ܕܩܸܛܠܹܗ ܕܣܵܗܕܵܐ ܩܲܕܝܼܫܵܐ ܕܐܲܠܵܗܵܐ: ܡܵܪܝ ܫܸܡܥܘܿܢ ܪܹܫܵܐ ܕܐܲܦܸܣܩܘܿܦܹ̈ܐ ܘܩܵܬܘܿܠܝܼܩܹ̈ܐ ܕܥܹܕܬܵܐ ܕܡܲܕܢܚܵܐ: ܕܐܵܗܵܐ ܩܲܕ݇ܡܵܝܵܐ ܗܘܹܐܠܹܗ ܓܼܵܠܒܵܢܵܐ ܒܐܲܪܥܵܐ ܕܡܲܕܢܚܵܐ ܒܣܵܗܕܘܼܬܼܵܐ ܛܵܒܼܬܵܐ ܕܐܲܠܵܗܵܐ. ܘܲܕܓܲܕܝܲܗ݇ܒܼ ܘܕܣܵܒܼܝܼܢܵܐ ܐܲܦܸܣܩܘܿܦܹ̈ܐ ܕܒܹܬܼ ܠܵܦܵܛ: ܘܝܘܿܚܲܢܵܢ ܐܲܦܸܣܩܘܿܦܵܐ ܕܗܘܿܪܡܝܼܙ ܕܐܵܪܕܲܫܼܪ: ܘܕܒܼܘܿܠܝܼܕܲܥ ܐܲܦܸܣܩܘܿܦܵܐ ܕܦܪܵܬܼ ܘܡܲܝܫܵܢ: ܘܕܝܘܿܚܲܢܵܢ ܐܲܦܸܣܩܘܿܦܵܐ ܕܐܲܬܪܵܐ ܕܡܲܝܫܵܢ: ܘܬܸܫܥܝܼܢ ܘܫܲܒܼܥܵܐ (97) ܩܲܫܝܼܫܹ̈ܐ ܘܲܡܫܲܡܫܵܢܹ̈ܐ: ܘܕܓܼܘܼܗܫܬܵܐܙܵܕ ܪܹܫܵܐ ܕܡܗܲܝܡܢܹ̈ܐ: ܕܝܼܗ݇ܘܵܐ ܕܲܪܓܹܗ ܐܲܪܙܒܸܕ: (ܘܕܦܘܿܣܝܼ ܩܲܪܘܼܓܼܒܸ݁ܕ:) ܕܝܼܗܘܵܐ ܕܲܪܓܹܗ ܪܹܫܵܐ ܕܐܘܼܡܵܢܹ̈ܐ: (ܗܘܼܣܬܵܟܵܪܹ̈ܐ) ܘܕܒܪܵܬܹܗ ܒܲܪ݇ܬܼ ܩܝܵܡܵܐ: ܕܥܲܡܹܗ ܕܛܘܼܒܼܵܢܵܐ ܫܸܡܥܘܿܢ ܫܩܸܠܗ݇ܘܿܢ ܟܠܝܼܠܵܐ ܒܣܵܗܕܘܼܬܼܵܐ ܛܵܒܼܬܵܐ ܕܐܲܠܵܗܵܐ. (ܘܟܠܵܝ ܣܵܗܕܹ̈ܐ ܕܫܩܝܼܠܗ݇ܘܿܢ ܟܠܝܼܠܵܐ ܕܣܵܗܕܘܼܬܼܵܐ ܥܲܡ ܫܸܡܥܘܿܢ ܥܲܠ ܡܲܪܙܵܐ ܕܬܹܠܵܐ ܒܫܹܢ݇ܬܵܐ ܐܸܫܬܸܡܵܐܐ ܘܚܲܡܫܝܼ ܘܚܲܡܫܵܐ ܕܝܵܘܢܵܝܹ̈ܐ.)

 ܣܵܒܵܒ ܒܡܹܐܡܪܲܢ ܩܲܕ݇ܡܵܝܵܐ ܒܹܐܡܵܪܵܐ ܝ݇ܘܲܚ: ܕܡ݂ܢ ܕܗܘܼܟܸܡܠܹܗ ܩܘܼܣܛܲܢܛܝܼܢܘܿܣ ܘܗܲܠ ܠܡܵܘܬܹܗ: ܕܒܸܥܒܼܵܕܵܐ ܝ݇ܢܵܐ ܬܠܵܬܼܝܼܢ ܘܬܠܵܬܼܵܐ ܫܸܢܹ̈ܐ ܕܗܘܼܟܸܡܠܹܗ ܥܲܠ ܪ̈ܗܘܿܡܵܝܹܐ: ܡ݂ܢ ܐܲܪܥܵܐ ܕܡܲܥܪܒܼܵܐ (ܦܝܼܫܠܗ݇ܘܿܢ ܡܸܫܝܹ̈ܐ ܣܵܗܕܹ̈ܐ: ܣܵܒܵܒ ܒܗܵܝ ܥܸܕܵܢܵܐ ܕܢܲܨܝܼܚܵܐ ܩܘܼܣܛܲܢܛܝܼܢܘܿܣ ܡܝܼܬܠܹܗ: ܫܘܿܪܝܼܠܹܗ ܫܵܒܼܘܿܪ ܡܲܠܟܵܐ ܕܦܵܪ̈ܣܵܝܹܐ ܠܡܲܥܝܘܼܩܹܐ ܠܛܵܝܸܦܵܐ ܕܟܪܸ̈ܣܛܝܵܢܹܐ: ܘܠܡܲܠܝܘܿܨܹܐ ܘܠܸܛܪܵܕܵܐ ܠܟܵܗܢܹ̈ܐ ܘܠܛܵܝܸܦܵܐ: ܘܠܸܩܵܪܵܐ ܥܹܕܵܬܹ̈ܐ ܕܟܠܹܗ ܐܘܼܚܕܵܢܹܗ. ܐܝܼܢܵܐ ܐܲܠܵܗܵܐ ܡܘܼܣܠܝܼܠܹܗ ܕܗܵܟܸܡ ܒܝܲܢ ܪܕܘܼܦܝܵܐ. ܕܠܵܐ ܗܵܘܹܐ ܫܵܘܦܵܐ ܠܣܵܛܵܢܵܐ: ܘܠܒܢܲܝ̈ܢܵܫܵܐ ܕܐܝܼܢܵܐ ܦܵܠܵܚܹ̈ܐ ܘܚܸܠܡܲܬܟܵܪܹ̈ܐ ܩܵܬܘܼܗܝ: ܠܐܹ݇ܡܵܪܵܐ: ܕܐܲܠܵܗܵܐ ܝܼܠܹܗ ܕܥܒܼܸܕܠܹܗ ܫܲܝܢܵܐ ܠܛܵܝܸܦܵܐ ܕܡܲܙܝܸܕ ܘܡܲܦܪܹܐ ܕܓܲܪܘܸܣܠܵܗ݁ ܥܸܕܬܹܗ ܕܲܡܫܝܼܚܵܐ. ܡܲܠܟܹ̈ܐ ܗܘܼܝܸܪܠܗ݇ܘܿܢ ܘܡܘܼܪܡܵܠܗ݇ܘܿܢ: ܗܵܐ ܒܬܸܪܘܲܝ ܓܹܒܵܢܹ̈ܐ ܫܲܝܢܵܐ ܗܵܟܘܿܡܹܐ ܝܼܗܘܵܐ: ܠܲܝܬ ܗ݇ܘܵܐ ܗܵܘ ܕܛܵܪܹܕ ܗ݇ܘܵܐ ܘܠܵܐ ܙܸܐ ܗܵܘ ܕܡܲܠܝܸܨ ܗ݇ܘܵܐ. ܐܲܝܟܼ ܕܡܚܝܼܠܗ݇ܘܿܢ ܕܲܠܩܘܼܒܼܠ ܕܛܘܼܒܼܵܢܵܐ ܐܝܼܘܿܒܼ ܠܟܸܣ ܐܲܠܵܗܵܐ ܘܐ݇ܡܸܪܗ݇ܘܿܢ: ܕܠܹܐ ܝ݇ܠܵܗ݁ ܗܵܒܲܣ ܕܐܝܼܘܿܒܼ ܒܸܙܕܲܥܝܵܐ ܝ݇ܠܹܗ ܡܸܢܘܼܟܼ. ܗܵܐ ܐܲܢ݇ܬ ܫܪܝܼܠܘܼܟܼ ܐܝܼܕܘܼܟܼ ܥܲܠܘܼܗܝ ܘܥܲܠ ܒܲܝܬܹܗ ܘܥܲܠ ܒܢܘܿܢ̈ܵܘܗܝ ܘܥܲܠ ܟܠ ܡܸܢܕܝܼ ܕܐܝܼܬܠܹܗ ܒܟܠ ܕܘܼܟܵܐ: ܘܒܘܼܪܸܟܼܠܘܼܟܼ ܦܸܠܚܵܢܵܐ ܕܐܝܼܕ̈ܘܼܗܝ: ܘܙܝܼܕܠܹܗ ܡܵܐܠܹܗ ܒܐܲܪܥܵܐ. ܐܝܼܢܵܐ ܦܲܫܸܛ ܐܝܼܕܘܼܟܼ ܘܩܲܪܒܸܢ ܠܟܛܠ ܡܸܢܕܝܼ ܕܐܝܼܬܠܹܗ: ܩܵܕ݇ܡ ܦܲܐܬܘܼܟܼ ܒܸܬ ܨܵܥܸܪܘܼܟܼ. ܐܝܼܢܵܐ ܐܲܝܟܼ ܕܐܲܢܹܐ ܠܹܐ ܐܵܡܲܪ ܠܟܸܣ ܐܲܠܵܗܵܐ: ܕܐܲܢ݇ܬ ܡܝܘܼܩܪܵܝܠܘܼܟܼ ܠܟܪܸ̈ܣܛܝܵܢܹܐ ܒܐܵܗܵܐ ܥܵܠܡܵܐ: ܡܵܢܵܝ ܝܼܗ݇ܘ݂ܵܘ ܡܲܠܟܹ̈ܐ ܡܸܢܵܝ ܓܘܼܪ̈ܵܢܹܐ ܡܸܢܵܝ ܗܲܟܡܵܢܹ̈ܐ: ܡܸܢܵܝ ܕܲܝܵܢܹ̈ܐ: ܡܸܢܵܝ ܡܕܲܒܪ̈ܵܢܹܐ: ܒܘܼܬ ܕܐܵܗܵܐ ܦܪܝܼܠܗ݇ܘܿܢ: ܘܒܘܼܬ ܕܐܵܗܵܐ ܙܝܼܕܠܗ݇ܘܿܢ ܒܐܲܪܥܵܐ: ܘܗ݇ܘܹܐܠܗ݇ܘܿܢ ܚܲܝܠܵܢܹ̈ܐ ܪܵܒܵܐ ܪܵܒܵܐ. ܫܲܝܢܵܐ ܘܲܫܠܵܡܵܐ ܡܘܼܢܬܝܼܵܝܠܹܗ ܙܵܝܕܝܼ: ܝܘܼܗ݇ܒܼܵܝܠܹܗ ܕܘܼܟܬܵܐ ܕܫܠܵܡܵܐ ܕܗܵܘܝܼ ܚܲܝܠܵܢܹ̈ܐ. ܡܵܢܝܼ ܝ݇ܠܹܗ ܕܠܵܐ ܦܵܐܹܫ ܓܪܝܼܫܵܐ ܒܵܬ݇ܪ ܡܲܠܟܵܐ؟ ܡܵܢܝܼ ܝ݇ܠܹܗ ܕܠܵܐ ܦܵܐܹܫ ܠܘܼܒܠܵܐ ܒܵܬܲܪ ܪܹ̈ܫܵܢܹܐ؟ ܡܵܢܝܼ ܝ݇ܠܹܗ ܕܠܵܐ ܡܲܚܸܒ ܡܫܲܡܗܘܼܬܵܐ ܕܥܵܠܡܵܐ؟ ܡܵܢܝܼ ܝ݇ܠܹܗ ܕܠܹܐ ܡܲܚܸܒ ܪ̈ܗܬܘܼܝܵܬܹܐ ܘܠܲܙܲܬܹ̈ܐ: ܘܡܵܢܝܼ ܝ݇ܠܹܗ ܕܠܹܐ ܥܵܫܸܩ ܒܵܬ݇ܪ ܕܵܘܸܠܬܵܐ؟ ܡܵܢܝܼ ܝ݇ܠܹܗ ܕܠܹܐ ܡܲܚܸܒ ܠܚܸܩܪܵܐ ܕܐܵܗܵܐ ܥܵܠܡܵܐ ܫܲܗܘܸܬܵܢܵܐ؟ ܡܵܢܝܼ ܝ݇ܠܹܗ ܕܓܵܒܹܗ ܩܵܐ ܓܵܢܹܗ ܥܝܼܩܘܼܝܵܬܹ̈ܐ ܘܚܲܫܹ̈ܐ ܡ݂ܢ ܓܸܒ ܢܝܵܚܹ̈ܐ (ܪ̈ܲܗܵܬܘܼܝܵܬܹܐ): ܘܓ̰ܘܼܢܓ̰ܵܪܹ̈ܐ ܡ݂ܢ ܓܸܒ ܒܘܪܣܵܡܹ̈ܐ؟ ܡܵܢܝܼ ܝ݇ܠܹܗ ܗܵܘ ܓܵܒܹܐ ܩܵܐ ܓܵܢܹܗ ܡܲܣܠܵܝܬܵܐ ܡ݂ܢ ܓܸܒ ܐܝܼܩܵܪܵܐ: ܘܢܚܸܦܬܵܐ ܡ݂ܢ ܓܸܒ ܚܸܩܪܵܐ؟

ܗܲܕܟܼܵܐ ܕܠܵܐ ܗܵܘܹܐ ܫܵܘܦܵܐ ܠܣܵܛܵܢܵܐ ܕܦܵܠܹܚ ܒܐܲܢܹܐ: ܒܘܘܼܬ ܕܐܵܗܵܐ ܡܘܼܚܦܸܠܹܗ ܐܲܠܵܗܵܐ ܣܓܼܝܼܕܵܐ ܕܟܠ ܒܥܵܩܸܠܕܵܪܘܼܬܹܗ: ܕܗܵܘܹܐ ܪܕܘܼܦܝܵܐ ܒܐܲܪܥܵܐ ܕܪ̈ܗܘܿܡܵܝܹܐ ܩܵܐ ܬܠܵܬܼܡܐܵܐ ܫܸܢܹ̈ܐ. ܘܓܘܼܫܸܩܠܗ݇ܘܿܢ ܡܗܘܼܡܢܹ̈ܐ ܒܝܲܕ ܪܕܘܼܦܝܵܐ: ܦܝܼܫܠܹܗ ܓܸܠܝܵܐ ܫܪܵܪܵܐ ܕܪ̈ܕܝܼܦܹܐ: ܘܦܝܼܫܠܹܗ ܓ̰ܥܝܼܡܵܐ ܦܘܼܡܵܐ ܕܣܵܛܵܢܵܐ. ܗܵܝܓܵܗ ܝܘܼܗ݇ܒܸܠܹܗ ܐܸܠܵܝ ܐܲܠܵܗܵܐ ܫܲܝܢܵܐ ܘܪܲܗܵܬܘܼܬܵܐ: ܫܘܼܕܪܵܝܠܹܗ ܡܲܠܲܐܟܼܵܐ ܕܫܠܵܡܵܐ: ܠܡܲܠܟܵܐ ܙܲܟܵܝܵܐ ܩܘܼܣܛܲܢܛܵܢܝܼܢܘܿܣ: ܘܡܘܼܫܪܝܼܝܵܠܹܗ ܒܢܝܵܚܵܐ: ܒܐܲܢܹܐ ܦܝܼܫܠܹܗ ܫܡܝܼܛܵܐ ܘܕܘܼܩܕܸܩܵܐ ܣܵܛܵܢܵܐ: ܠܹܐ ܗ݇ܘܵܐ ܕܠܹܐ ܗ݇ܘܵܐ ܡܨܵܝܵܐ ܕܡܘܼܚܦܸܠܹܗ ܡ݂ܢ ܣܵܓܼܕܵܢܵܘ̈ܗܝ ܕܦܵܝܫܝܼ ܛܪ̈ܝܼܕܹܐ. ܕܗܵܐ ܐܵܕܝܼܵܐ ܦܘܿܩܸܕܠܹܗ ܪܸܡܙܹܗ ܝܲܢ ܢܝܼܫܲܢܩܹܗ: ܘܡ݂ܢ ܓܵܘ ܚܸܫܟܵܐ ܘܚܘܼܒܼܝܼܵܐ ܚܸܫܟܵܢܵܐ ܘܐܘܼܠܨܵܢܹ̈ܐ ܘܪ̈ܕܘܼܦܝܹܐ ܙܪܸܩܠܹܗ ܡ݂ܢ ܢܵܓܸܣܬܵܢ ܒܲܗܪܵܐ ܚܩܝܼܪܵܐ: ܘܒܝܲܕ ܠܵܘܓ̰ܵܘܗܝ ܫܝܼܦܠܹܗ ܠܚܸܫܟܵܐ ܕܠܲܝܠܹܗ ܕܪܕܘܼܦܝܵܐ. ܟܲܕ ܬܠܵܬܝܼܢ ܘܬܠܵܬܵܐ ܫܸܢܹ̈ܐ ܒܟܠ ܕܘܼܟܵܐ ܕܒܼܝܼܩܵܐ ܗ݇ܘܵܐ ܒܬܸܪ̈ܘܵܝ ܓܹܒܵܢܹ̈ܐ: ܐܵܢܝܼ ܕܝܼܗ݇ܘܵܘ ܬܚܘܿܬ ܗܘܼܟܡܵܐ ܕܡܲܠܟܵܐ ܟܪܸܣܛܝܵܢܹܐ: ܘܒܸܦܠܚܵܢܵܢܹ̈ܐ ܕܡܲܠܟܵܐ ܚܲܢܦܵܐ: ܟܲܕ ܗܵܠܵܐ ܕܘܼܟܼܪܘܼܢܝܹܗ ܕܗܵܘ ܪܕܘܼܦܝܵܐ ܩܲܕ݇ܡܵܝܵܐ ܠܹܐ ܝ݇ܠܹܗ ܥܒܼܝܼܪܵܐ: ܐܸܠܵܐ ܒܚܝܼܵܠ ܕܚܲܙܝܵܢ̈ܘܼܗܝ ܝܼܗ݇ܘܵܐ: ܕܥܒܼܘܿܕ ܒܵܘܲܪ ܒܸܬ ܥܵܒܸܪ ܕܵܘܪܵܐ ܘܒܸܬ ܐܵܬܹܐ ܐ݇ܚܹܪ݇ܢܵܐ: ܒܸܬ ܓܵܪܹܕܠܹܗ ܝܲܢ ܡܵܫܝܼܠܹܗ ܕܘܼܟܼܪܘܼܢܝܹܗ ܕܪܕܘܼܦܝܵܐ: ܕܗܵܝ ܗܲܓܵܓܘܼܬܵܐ ܕܙܲܥܝܼܠܵܗ݁ ܐܵܗܵܐ ܣܵܛܵܢܵܐ ܓܵܘ ܕܘܼܢܝܹܐ: ܡܘܿܚܦܸܠܹܗ ܐܲܠܵܗܵܐ ܚܲܟܝܼܡܵܐ ܒܟܠ: ܘܒܵܬ݇ܪ ܬܠܵܬܝܼܢ ܘܬܠܵܬܵܐ ܫܸܢܹ̈ܐ ܕܫܲܝܢܵܐ ܕܝܼܗ݇ܘܵܐ ܪܕܘܼܦܝܵܐ ܠܡܗܘܼܡܢ̈ـܹܐ: ܟܲܕ ܐ݇ܢܵܫܹ̈ܐ ܒܝܼܫܹ̈ܐ ܪܸܙܵܝܵܝ ܒܝܼܫܵܐ ܕܲܠܩܘܼܒܼܠ ܐܲܠܵܗܵܐ ܡܲܚܙܘܿܝܹܐ ܝ݇ܢܵܐ: ܐܵܗܵܐ ܒܥܵܩܸܠܕܵܪܘܼܬܹܗ ܕܠܹܐ ܦܵܝܫܵܐ ܝ݇ܕܝܼܥܬܵܐ: ܡ݂ܢ ܥܘܼܡܩܵܐ ܓܘܼܪܵܐ ܕܒܝܼܫܘܼܬܵܝ: ܛܲܝܒܘܼܬܼܵܐ ܘܥܵܩܸܠܕܵܪܘܼܬܼܵܐ ܕܲܡܕܲܒܪܵܢܘܼܬܹܗ ܡܲܚܙܘܿܝܹܐ ܝ݇ܠܹܗ ܒܟܠ ܥܸܕܵܢܵܐ: ܘܚܲܝܠܵܐ ܕܝܼܹܗ ܕܠܹܐ ܝܼܗ݇ܘܵܐ ܙܲܒܘܼܢ ܒܝܲܕ ܙܲܒܘܼܢܘܼܬܵܐ ܕܦܲܓܼܪܵܐ ܕܪ̈ܝܼܓܵܘܵܬܘܼܗ݁ܝ ܡܲܚܙܘܼܝܹܐ ܝ݇ܠܹܗ ܐܲܝܟܼ ܕܡܘܼܚܠܸܦܠܹܗ ܡ݂ܢ ܝܵܘܣܸܦ ܕܦܵܐܹܫ ܡܙܘܼܒܢܵܐ ܒܪܝܼܓܵܒܼܘܼܬܼܵܐ: ܣܵܒܵܒ ܚܲܝܹ̈ܐ ܓܘܼܫܡܵܢܵܝܹ̈ܐ ܒܓ̰ܵܡܥܲܝܬܵܐ ܕܕܲܚܠܵܐ ܩܵܐ ܪܵܒܵܐ ܛܵܝܸܦܹ̈ܐ ܬܘܼܓܒܹܪܹܗ. ܗܲܕܟܼܵܐ ܐܘܼܦ ܒܥܸܕܵܢܵܐ ܦܝܼܫܠܹܗ ܙܘܼܒܢܵܐ ܡܫܝܼܚܵܐ ܠܚܲܫܵܐ: ܒܝܲܕ ܛܝܼܡ̈ܘܼܗܝ ܐܵܙܵܕܘܼܝܵܬܹ̈ܐ ܝܘܼܗ݇ܒܸܠܹܗ ܠܪܝܼܓܵܒܼܘܼܬܲܢ: ܕܡܙܲܒܢܵܐ ܗ݇ܘܵܐ ܠܲܚܛܝܼܬܼܵܐ. ܘܒܚܲܫܹܗ ܒܘܼܛܸܠܹܗ ܚܲܫܲܢ: ܘܒܡܵܘܬܹܗ ܩܛܸܠܹܗ ܠܡܵܘܬܲܢ: ܘܒܝܲܕ ܙܲܒܘܼܢܘܼܬܼܵܐ ܕܙܩܝܼܦܘܼܬܹܗ ܦܝܼܫܠܹܗ ܓܸܠܝܵܐ ܚܲܝܠܹܗ. ܗܲܕܟܼܵܐ ܐܘܼܦ ܒܝܲܕ ܪܕܝܼܦܘܼܬܵܐ ܕܪ̈ܝܼܓܵܘܵܬܘܼܗܝ ܦܝܵܫܵܐ ܝ݇ܠܹܗ ܝ݇ܕܸܥܝܵܐ ܫܪܵܪܹܗ: ܘܒܝܲܕ ܐܘܼܠܨܵܢܵܝ̈ ܦܝܵܫܵܐ ܝ݇ܠܵܗ ܡܘܩܘܝܼܬܵܐ ܗܲܝܡܵܢܘܼܬܹܗ: ܘܒܝܲܕ ܓ̰ܘܼܢܓ̰ܵܪ̈ܲܝ ܦܝܵܫܵܐ ܝ݇ܠܵܗ ܡܘܼܟܪܸܙܬܵܐ ܝ݇ܕܸܥܬܹܗ: ܘܒܝܲܕ ܡܵܘܬܵܝ ܦܝܵܫܵܐ ܝ݇ܢܵܐ ܓܸܠܝܹ̈ܐ ܚܲܝܘܼ̈ܗܝ: ܘܒܝܲܕ ܩܝܼܪܲܬܵܝ ܦܝܵܫܵܐ ܝ݇ܠܹܗ ܡܘܼܚܙܝܼܵܐ ܚܲܝܠܹܗ: ܒܐܲܢܹܐ ܟܠܵܝ ܦܝܵܫܵܐ ܝ݇ܠܹܗ ܦܪܝܼܣܵܐ ܕܘܼܓܠܵܐ: ܘܦܝܵܫܵܐ ܝ݇ܠܹܗ ܩܘܼܪܦܸܚܵܐ ܣܵܛܵܢܵܐ: ܘܦܝܵܫܵܐ ܝ݇ܠܹܗ ܟ̰ܥܝܼܡܵܐ ܦܘܼܡܵܐ ܕܣܵܛܵܢܵܐ: ܐܲܢܹܐ ܝ݇ܢܵܐ ܕܐ݇ܡܝܼܪܵܝ ܠܝܼ ܒܟܸܪܝܘܼܬܼܵܐ: ܕܠܵܐ ܐ݇ܢܵܫܵܐ ܚܵܫܸܒܼ ܡ݂ܢ ܕܐܵܢܝܼ ܕܬܲܦܩܝܼ ܒܐܲܢܹܐ ܬܲܫܥܝܼܵܬܹ̈ܐ: ܘܚܵܫܸܒܼ ܘܐܵܡܸܪ: ܕܠܹܐ ܝ݇ܠܵܗ݁ ܠܵܚܘܼܡܬܵܐ ܝܲܢ ܚܫܝܼܚܬܵܐ ܕܡܲܚܦܸܠ ܡܸܢܲܢ ܐܲܠܵܗܵܐ: ܕܦܵܝܫܲܚ ܣܘܼܦܝܹܐ ܒܐܝܼܕܵܐ ܕܪ̈ܵܕܘܿܦܹܐ.

ܡ݂ܢ ܐܵܕܝܼܵܐ ܫܵܪܲܚ ܒܬܲܫܥܝܼܬܵܐ ܕܪ̈ܕܘܼܦܝܹܐ ܘܩܸܛܠܹ̈ܐ ܕܣܵܗܕܹ̈ܐ ܩܲܕܝܼܫܹ̈ܐ: ܐܵܢܝܼ ܕܡ݂ܢ ܠܥܸܠܸܠ ܡܘܼܕܟܸܪܲܢ ܠܫܸܡܵܢܲܝ̈: ܒܫܹܢ݇ܬܵܐ ܐܸܬܸܡܵܐܐ ܘܚܲܡܫܝܼܢ ܘܚܲܡܫܵܐ ܕܡܲܠܟܘܼܬܼܵܐ ܕܐܵܠܸܟܣܲܢܕܪܘܿܣ: ܕܝܼܠܵܗ݁ ܫܹܢ݇ܬܵܐ ܬܪܹܝܡܵܐܐ ܘܬܸܫܥܝܼܢ ܘܐܸܫܬܵܐ ܕܡ݂ܢ ܒܵܬ݇ܪ ܙܩܝܼܦܘܼܬܹܗ ܕܡܵܪܲܢ: ܕܝܼܠܵܗ ܫܹܢ݇ܬܵܐ ܐܸܡܵܐܐ ܘܐܫܒܲܥܣܲܪ ܫܸܢܹ̈ܐ ܕܦܵܪ̈ܣܵܝܹܐ: ܕܝܼܠܵܗ݁ ܫܹܢ݇ܬܵܐ ܬܠܵܬܝܼܢ ܘܚܕܵܐ ܕܫܵܒܼܘܿܪ ܡܲܠܟܵܐ ܒܘܿܢܵܐ ܕܗܘܿܪܡܝܼܙܕ: (340 ܕܡܵܪܲܢ) ܡ݂ܢ ܒܵܬ݇ܪ ܕܡܝܼܬܠܹܗ ܛܘܼܒܼܵܢܵܐ ܩܘܼܣܛܲܢܛܝܼܢܘܼܣ ܡܲܠܟܵܐ ܕܪ̈ܗܘܿܡܵܝܹܐ: ܫܵܒܼܘܿܪ ܡܲܠܟܵܐ ܡܘܼܫ݇ܟ̰ܚܠܹܗ ܩܵܐ ܓܵܢܹܗ ܦܸܪܣܲܬ ܕܩܲܫܕܸܪ ܗ݇ܘܵܐ ܒܒܢܘܿܢ̈ܘܼܗܝ ܐܵܢܝܼ ܕܝܼܗ݇ܘܵܘ ܓ̰ܘܵܢܩܹ̈ܐ: ܒܕܵܝܸܡܘܼܬܵܐ ܟܹܐ ܠܵܒܸܠ ܗ݇ܘܵܐ ܠܗ݇ܘܿܢ ܓܵܘ ܐܵܣܟܲܪ ܥܲܠ ܐܲܪܥܵܐ ܕܪ̈ܗܘܿܡܵܝܹܐ . ܘܡ݂ܢ ܕܐܵܗܵܐ ܣܵܒܵܒ ܒܘܼܫ ܙܵܘܕܵܐ ܩܘܼܫܕܸܪܹܗ ܒܣܢܹܐܬܵܐ ܕܲܠܩܘܼܒܼܠ ܪܹ̈ܓܵܘܵܬܹܐ ܕܐܲܠܵܗܵܐ ܕܒܐܲܬܪܵܐ ܕܡܲܠܟܘܼܬܹܗ ܘܒܣܵܡܵܐ ܝܼܗ݇ܘܵܐ ܘܒܸܒܥܵܝܵܐ ܕܦܵܐܹܫ ܦܪܝܼܣܵܐ ܣܵܒܵܒ ܠܪܕܘܼܦܝܵܐ ܕܡܗܘܼܡܢܹ̈ܐ. ܡܘܼܠܚܸܡܠܹܗ ܚܲܕ݇ ܦܲܢܕܵܐ: ܕܙܵܒܸܛܠܗ݇ܘܿܢ ܒܡܲܕܵܐܬܵܐ ((tax ܬܪܹܝܢ ܛܵܩܹ̈ܐ ܠܟܠܵܝ ܟܪܸ̈ܣܛܝܵܢܹܐ ܐܵܢܝܼ ܕܐܝܼܢܵܐ ܒܐܘܼܚܕܵܢܵܐ ܕܦܵܪ̈ܣܵܝܹܐ: ܗܵܕܟܼܵܐ ܟܬܸܒܼܠܹܗ ܟܬܵܒܼܵܐ ܡ݂ܢ ܒܹܝܬܼ ܗܘܼܙܵܝܹ̈ܐ ܩܵܐ ܫܲܠܝܼܛܵܢܹ̈ܐ (ܗܲܟܡܵܢܹ̈ܐ) ܕܒܹܝܬܼ ܐܵܪ̈ܵܡܵܝܹܐ: ܕܒܓ̰ܲܠܕܘܼܬܼܵܐ ܐܝܼܡܲܢ ܕܚܵܙܝܼܬܘܿܢ ܐܵܗܵܐ ܦܘܼܩܕܵܢܵܐ ܕܝܼܲܢ ܐܲܠܵܗܹ̈ܐ: ܓܵܘ ܐܵܗܵܐ ܟܬܵܒܼܵܐ ܕܐܲܫܛܵܪܵܐ ܕܡܸܢܲܢ ܦܝܼܫܠܹܗ ܫܘܼܕܪܵܐ: ܕܒܼܘܿܩܘܼܢ ܠܹܗ ܫܸܡܥܘܿܢ ܪܹܫܵܐ ܕܢܲܨܪ̈ܵܝܹܐ: ܘܠܵܐ ܪܲܦܝܼܬܘܿܢ ܠܹܗ: ܗܵܠ ܕܦܵܐܹܫ ܐܸܫܛܵܪܵܐ ܚܬܝܼܡܵܐ ܒܚܲܬܡܵܐ: ܘܩܲܒܸܠ ܥܲܠ ܓܵܢܹܗ: ܪܹܫܵܐ ܕܟܸܣܦܵܐ ܬܪܹܝܢ ܛܵܩܹ̈ܐ ܘܡܲܕܲܐܬܼܵܐ ܬܪܹܝܢ ܛܵܩܹ̈ܐ: ܘܡ݂ܢ ܟܠܲܝܗܝ ܛܵܝܸܦܵܐ ܕܢܵܨܪ̈ܵܝܹܐ: ܘܗܵܘ ܕܝܼܠܹܗ ܝ݇ܬܝܼܒܼܵܐ ܒܐܲܪܥܵܐ ܕܝܲܢ ܘܗܘܼܟܡܲܢ: ܕܟܹܐ ܫܵܩܹܠ ܘܝܵܗ݇ܒܸܠ: ܡܣܵܒܵܒ ܐܸܠܲܢ ܐܲܠܵܗܹ̈ܐ ܩܵܒܘܿܠܹܐ ܝ݇ܘܲܚ ܥܝܼܩܘܼܝܵܬܹ̈ܐ ܕܦܠܵܫܵܐ: ܘܩܵܐ ܕܐܵܢܝܼ ܪܲܗܬܘܼܬܵܐ ܘܒܘܼܣܵܡܵܐ. ܘܒܐܲܪܥܵܐ ܕܝܲܢ ܝ݇ܬܝܼܒܹܐ ܝ݇ܢܵܐ: ܘܝܼܢܵܐ ܒܢܘܿܢܹ̈ܐ ܕܬܵܘܕܝܼܬܹܗ ܕܩܹܣܲܪ ܕܸܫܡܸܢܲܢ. ܐܲܢܹܐ ܝܢܵܐ ܕܦܝܼܫܠܹܗ ܟܬܝܼܒܼܵܐ ܡ݂ܢ ܫܵܒܼܘܿܪ ܡܲܠܟܵܐ ܡ݂ܢ ܒܹܝܬܼ ܗܘܼܙܵܝܹ̈ܐ: ܩܵܐ ܫܲܠܝܼܛܵܢܹ̈ܐ ܕܒܹܝܬܼ ܐܵܪ̈ܵܡܵܝܹܐ. ܘܒܥܕܵܢܵܐ ܕܟܬܵܒܼܵܐ ܕܡܲܠܟܵܐ ܡܛܹܐܠܹܗ ܠܟܸܣܠܵܝ: ܕܒܸܩܠܗ݇ܘܿܢ ܫܸܡܥܘܿܢ ܒܲܪ ܨܲܒܵܥܹ̈ܐ: ܘܐܲܢܹܐ ܕܡ݂ܢ ܡܲܠܟܵܐ ܦܝܼܫܠܹܗ ܟܬܝܼܒܼܵܐ ܩܪܝܼܠܗ݇ܘܿܢ ܩܵܕ݇ܡܘܼܗܝ: ܘܛܵܠܒܝܼ ܗ݇ܘܵܐ ܡܸܢܹܗ ܕܥܵܒܸܕ ܐܵܢܝܼ ܕܦܝܼܫܠܹܗ ܟܬܝܼܒܼܵܐ.

ܐܝܼܢܵܐ ܐܵܗܵܐ ܩܲܕܝܼܫܵܐ ܫܸܡܥܘܿܢ ܓ̰ܘܼܘܸܒܠܹܐ ܐܸܠܵܝ ܒܡܲܟܝܼܟܼܘܼܬܼܵܐ ܓܘܼܪܬܵܐ: ܟܲܕ ܠܵܐ ܣܩܝܼܕܵܐ ܘܠܵܐ ܙܸܐ ܫܓܼܝܼܫܵܐ ܘܒܓ̰ܘܼܪܐܵܬ ܐ݇ܡܸܪܹܗ: ܐܵܢܵܐ ܠܡܲܠܟܵܐ ܕܡܲܠܟܹ̈ܐ ܟܸܐ ܣܵܓܼܕܸܢ: ܘܠܦܘܼܩܕܵܢܹܗ ܟܹܐ ܡܝܵܩܪܸܢ ܒܟܠܹܗ ܚܲܝܠܝܼ. ܐܝܼܢܵܐ ܒܘܼܬ ܕܐܲܢܹܐ ܕܦܝܵܫܵܐ ܝ݇ܠܹܗ ܛܠܝܼܒܵܐ ܡܸܢܝܼ ܡ݂ܢ ܦܘܼܩܕܵܢܹܗ: ܒܸܚܫܵܒܼܵܐ ܝ݇ܘܸܢ ܕܐܘܼܦ ܐܲܚܬܘܿܢ ܒܲܠܕ ܝ݇ܬܘܿܢ: ܕܐܲܢܹܐ ܠܵܐ ܗ݇ܘܹܐܠܗ݇ܘܿܢ ܕܝܼܝܼ: ܕܛܲܠܒܲܢ ܡܲܕܲܐܬܼܵܐ ܡ݂ܢ ܛܵܝܸܦܵܐ ܕܡܫܝܼܚܵܐ ܡܵܪܝܼ: ܣܵܒܵܒ ܗܘܼܟܡܲܢ ܠܹܐ ܝ݇ܠܹܗ ܥܲܠܵܝ ܒܐܵܢܝܼ ܕܦܝܵܫܵܐ ܝ݇ܢܵܐ ܚܸܙܝܹ̈ܐ: ܐܸܠܵܐ ܒܕܠܹܐ ܝ݇ܢܵܐ ܦܝܵܫܵܐ ܚܸܙܝܹ̈ܐ. ܗ.ܕ ܒܗܲܝܡܵܢܘܼܬܼܵܐ ܕܡܵܪܲܢ: ܘܒܫܪܵܪܵܐ ܕܝܘܼܠܦܵܢܲܢ: ܒܗܸܡܙܡܵܢ ܕܡܲܟܝܼܟܼܘܼܬܵܐ ܕܟܹܐ ܡܵܠܦܵܐ ܙܕܘܼܥܬܵܐ ܕܐܲܠܵܗܵܐ: ܒܦܲܪܦܲܠܬܵܐ ܕܐܵܕܵܒܘܼܬܵܐ ܘܠܹܐ ܡܲܚܪܸܒܼܵܐ ܚܝܼܵܠ ܕܫܵܡܥܵܢܹ̈ܐ: ܘܕܵܝܸܡ ܒܨܠܵܘܵܬܗܹܐ ܕܸܟܼܝܹ̈ܐ: ܒܫܵܗܲܪܬܵܐ ܥܵܡܘܿܪܬܵܐ: ܒܒܵܥܘܼܬܵܐ ܘܬܵܢܲܚܬܵܐ: ܒܡܲܩܘܵܚܬܵܐ ܚܲܝܠܵܢܬܵܐ: ܒܚܘܼܒܵܐ ܫܦܝܼܚܵܐ ܕܠܟܸܣ ܐܲܠܵܗܵܐ: ܟܲܕ ܒܸܛܠܵܒܵܐ ܝ݇ܘܲܚ ܪ̈ܲܚܡܹܐ ܥܲܠ ܡܲܠܟܵܐ ܘܥܲܠ ܟܠܵܝ ܣܲܪ̈ܒܵܙܘܼܗܝ: ܘܥܲܠ ܟܠܲܝܗܝ ܬܸܚܘܼܒ̈ܘܼܗܝ. ܕܦܵܝܫܝܼ ܒܛܝܼܠܹ̈ܐ ܦܠܵܫܹ̈ܐ: ܘܙܵܝܸܕ ܫܲܝܢܵܐ ܒܕܘܼܢܝܹܐ: ܣܵܒܵܐ ܐܸܢ ܫܘܼܠܛܵܢܵܐ ܥܵܠܡܵܢܵܝܵܐ ܕܒܼܝܼܩܵܐ ܝ݇ܘܲܚ: ܠܹܐ ܗ݇ܘܵܐ ܒܐܲܢܹܐ ܕܘܼܒܵܪܹ̈ܐ ܒܸܚܕܵܪܵܐ ܝ݇ܘܲܚ: ܐܸܠܵܐ ܒܪܝܼܙܵܐ ܕܐܸܣܟܝܼܡܵܝ ܥܵܠܡܵܢܵܝܵܐ ܗ݇ܘܝܼܠܲܢ ܒܲܚܕܵܪܵܐ. ܐܝܼܢܵܐ ܥܲܡ ܕܐܲܢܹܐ ܠܫܘܼܠܛܵܢܵܘܟܼܘܿܢ ܘܠܵܐܙܵܕܘܼܬܵܘܟܼܘܿܢ ܦܲܪܦܘܼܠܹܐ ܝ݇ܘܸܢ ܕܒܸܛܠܵܒܵܐ ܝ݇ܘܸܢ ܕܝܵܠܦܸܢ ܕܐܲܢܹܐ ܕܦܝܵܫܵܐ ܝ݇ܢܵܐ ܛܠܝܼܒܹ̈ܐ ܡܸܢܲܢ ܐܲܝܟܼ ܡܘܼܕܝܼ ܦܝܵܫܵܐ ܝ݇ܢܵܐ ܛܠܝܼܒܹ̈ܐ ܡܸܢܲܢ؟ ܐܸܢ ܐܲܝܟܼ ܥܲܬܝܼܪܹ̈ܐ: ܟܠ ܐ݇ܢܵܫܵܐ ܒܵܠܲܕ ܝ݇ܠܹܗ ܕܡܸܣܟܹܢܹ̈ܐ ܝ݇ܘܲܚ ܡ݂ܢ ܕܵܘܸܠܬܵܐ ܕܙܘܼܙܵܐ ܒܵܨܘܿܪܹ̈ܐ ܝ݇ܘܲܚ. ܘܐܸܢ ܐܲܝܟܼ ܒܲܛܝܼܠܹ̈ܐ ܝ݇ܘܲܚ: ܐܘܼܦ ܐܵܗܵܐ ܪ݇ܓܼܝܼܫܹܐ ܝ݇ܬܘܿܢ: ܕܠܲܝܬ ܒܝܲܢ ܚܲܕ݇ ܐ݇ܢܵܫܵܐ ܕܒܲܛܝܼܠܵܐ ܝ݇ܠܹܗ ܡ݂ܢ ܦܸܠܚܵܢܵܐ ܕܡܲܠܟܵܐ: ܡ݂ܢ ܣܵܒܵܒ ܟܠܲܢ ܬܚܘܼܬ ܪܝܼܙܵܐ ܕܡܲܕܲܐܬܵܐ ܚܘܼܫܒܸܢܹ̈ܐ ܝ݇ܘܲܚ. ܘܐܸܢ ܐܲܝܟܼ ܕܸܫܡܸܢܹ̈ܐ: ܥܒܼܘܿܕ ܒܵܘܲܪ ܕܐܝܼܬܼ ܓܵܘܵܘܟܼܘܿܢ ܐ݇ܢܵܫܹ̈ܐ ܕܒܵܠܲܕ ܝ݇ܢܵܐ. ܕܕܘܼܣܬܹ̈ܐ ܝ݇ܘܲܚ ܕܟܠܵܝ ܒܢܲܝ̈ܢܵܫܵܐ: ܒܘܼܫ ܙܵܘܕܵܐ ܕܡܲܠܟܵܐ ܕܡܲܠܟܹ̈ܐ: ܐܝܼܢܵܐ ܟܬܝܼܒܼܵܐ ܝ݇ܠܹܗ ܕܡܵܚܸܒܲܚ ܠܣܵܢ̈ܝܵܢܲܢ: ܘܨܵܠܲܚ ܨܠܘܿܬܼܵܐ ܒܘܼܬ ܕܸܫܡܸܢܲܢ: ܘܠܡܵܢ ܕܠܵܝܸܛܠܲܢ: ܘܐܲܢܹܐ ܒܸܛܠܵܒܹܐ ܝ݇ܠܹܗ ܡܸܢܲܢ ܢܵܡܘܿܣܹܗ ܕܐܲܠܵܗܵܐ ܘܡܵܠܘܿܦܹܐ ܝ݇ܠܹܗ. ܟܡܵܐ ܒܘܼܫ ܙܵܘܕܵܐ ܘܵܓ̰ܸܒ ܝ݇ܠܵܗ ܕܡܲܚܒܸܚ ܠܗܘܼܟܡܵܘܟܼܘܿܢ: ܘܟܹܐ ܨܵܠܲܚ ܨܠܘܿܬܵܐ ܒܘܼܬ ܡܲܠܟܵܐ: ܕܐܲܠܵܗܵܐ ܥܵܒܸܕܠܲܢ ܙܲܒܛ ܘܡܲܨܝܸܬܵܢܹ̈ܐ ܠܡܲܠܟܘܼܬܹܗ: ܘܡܲܬܸܒܼܠܲܢ ܒܐܲܪܥܵܐ ܕܗܘܼܟܡܹܗ؟ ܣܵܒܵܒ ܟܵܬ̈ܵܒܲܢ ܗܲܕܟܼܵܐ ܦܵܩܘܿܕܹܐ ܝ݇ܢܵܐ ܐܸܠܲܢ: ܕܟܠ ܓܵܢܵܐ ܠܗܘܼܟܡܵܐ ܕܓܘܼܪܘܼܬܵܐ ܦܵܝܫܵܐ ܙܲܒܛ: ܕܠܲܝܬ݁ ܗܘܼܟܡܵܐ ܕܠܹܐ ܝ݇ܠܹܗ ܡ݂ܢ ܐܲܠܵܗܵܐ: ܘܐܵܢܝܼ ܕܩܵܝܡܝܼ ܕܲܠܩܘܼܒܼܠܵܝ: ܕܝܼܘܵܢ ܒܸܬ ܫܵܩܠܝܼ: ܘܡܸܢ݇ܕܪܹܫ݇ ܟܹܐ ܨܵܠܲܚ ܨܠܘܿܬܵܐ ܒܘܼܬ ܡܲܠܟܹ̈ܐ ܘܓܘܼܪ̈ܵܢܹܐ ܕܦܘܼܩܕܹܐ ܝ݇ܢܵܐ ܐܸܠܲܢ: ܣܵܒܵܒ ܒܐܹܡܵܪܵܐ ܝ݇ܠܹܗ ܐܸܠܲܢ ܚܲܕ݇ ܡ݂ܢ ܡܲܠܦܵܢܲܢ: ܕܩܵܕ݇ܡ ܟܠ ܡܸܢܕܝܼ ܗܵܘܝܼܬܘܿܢ ܡܲܩܪܘܿܒܹܐ ܨܠܘܿܬܵܐ ܒܘܼܬ ܡܲܠܟܹ̈ܐ ܘܓܘܼܪ̈ܵܢܹܐ: ܒܲܣ ܐܝܼܡܲܢ ܕܒܸܟܬܵܒܼܵܐ ܝ݇ܢܵܐ ܩܵܬܲܢ ܘܦܵܩܘܿܕܹܐ ܝ݇ܢܵܐ: ܕܵܐܟܼܝܼ ܡܵܨܲܚ ܕܗܵܘܲܚ ܣܸܢܝܹ̈ܐ ܘܕܸܫܡܸܢܹ̈ܐ ܕܡܲܠܟܵܐ ܕܡܲܠܟܹ̈ܐ: ܕܦܵܝܫܝܼ ܡܘܼܫ݇ܟ̰ܚܹܐ ܕܲܠܩܘܼܒܼܠ ܕܐܲܠܵܗܵܐ: ܗܵܘ݁ ܕܐܲܢܹܐ ܒܝܲܕ ܡܲܠ̈ܦܵܢܲܢ ܦܘܼܩܸܕܠܹܗ ܐܸܠܲܢ.

ܗܲܕܟܼܵܐ ܟܲܕ ܐܵܢܝܼ ܦܝܼܫܠܗ݇ܘܿܢ ܐ݇ܡܝܼܪܹܐ ܡ݂ܢ ܛܘܼܒܼܵܢܵܐ ܫܸܡܥܘܿܢ: ܓ̰ܘܼܘܸܒܠܹܗ ܪܹܫܵܐ ܕܫܲܠܝܼܛܵܢܹ̈ܐ (ܕܗܲܟܡܵܢܹ̈ܐ) ܕܬܵܡܵܐ ܓ̰ܸܡܥܝܹܐ ܝܼܗ݇ܘܵܘ ܘܐ݇ܡܸܪܹܗ ܐܸܠܹܗ: ܪܵܒܵܐ ܫܲܦܝܼܪܹ̈ܐ ܝ݇ܢܵܐ ܘܥܵܩܸܠܕܵܪܹ̈ܐ ܗܸܡܙܡܵܢ̈ܘܼܟܼ ܫܸܡܥܘܿܢ: ܐܝܼܢܵܐ ܘܵܓ̰ܸܒ ܝܼܠܵܗ݁ ܕܬܲܒܥܸܬ ܠܗܸܡܙܡܵܢ̈ܘܼܟܼ ܒܦܸܠܚܵܢܵܐ: ܒܸܕܟܼܵܪܵܐ ܝ݇ܘܸܢ ܕܐ݇ܡܸܪܘܼܟܼ: ܕܐܵܗܵܐ ܦܵܩܘܿܕܹ̈ܐ ܝ݇ܢܵܐ ܟܬܼ̈ܵܒܲܢ: ܕܟܠ ܓܵܢܵܐ ܠܗܘܼܟܡܹ̈ܐ ܕܓܘܼܪܘܼܬܵܐ ܦܵܝܫܵܐ ܙܲܒܛ. ܕܠܲܝܬ݁ ܗܘܼܟܡܵܐ ܕܠܹܐ ܝܗَܘܵܐ ܡ݂ܢ ܐܲܠܵܗܵܐ. ܒܲܣ ܟܠ ܫܘܼܠܛܵܢܵܐ ܡ݂ܢ ܐܲܠܵܗܵܐ ܝ݇ܠܹܗ: ܗܲܕܟܼܵܐ ܗ݇ܘܝܼ ܙܲܒܛ ܠܫܵܒܼܘܿܪ ܡܲܠܟܵܐ ܡܵܪܵܗ݁ ܕܟܠܵܗ݁ ܐܲܪܥܵܐ: ܗ݁ܘ ܕܐܘܼܦ ܟܝܵܢܹܗ ܡ݂ܢ ܐܲܠܵܗܵܐ ܝ݇ܠܹܗ. ܘܓܪܘܿܫܠܹܗ ܕܪܵܥܢܵܐ ܗ݁ܘ ܐܸܫܛܵܪܵܐ: ܘܩܲܒܸܠ ܠܝܼܵܗ݇ܒܼܵܐ ܗ݁ܝ ܡܲܕܲܐܬܵܐ: ܐܲܝܟܼ ܡܸܢܕܝܼ ܕܦܵܩܘܿܕܹܐ ܝ݇ܠܹܗ ܡܲܠܟܵܐ ܕܡܲܠܟܹ̈ܐ. ܘܠܵܐ ܗܵܘܝܼܬܘܿܢ ܕܲܠܩܘܼܒܼܠ ܕܟܬܵܒܼܵܘܟܼ݁ܘܿܢ: ܐܵܢܝܼ ܕܒܸܦܩܵܕܹܐ ܝ݇ܢܵܐ ܐܸܠܵܘܟܼܘܿܢ ܕܗܵܘܝܼܬܘܿܢ ܡܲܨܝܸܬܵܢܹ̈ܐ ܠܫܲܠܝܼܛܵܢܹ̈ܐ. ܐܸܢ ܠܫܘܼܠܛܵܢܵܐ ܕܵܝܢܵܢܹ̈ܐ ܝ݇ܬܘܿܢ ܕܗܵܘܝܼܬܘܿܢ ܙܲܒܛ: ܟܡܵܐ ܒܘܼܫ ܙܵܘܕܵܐ ܠܡܲܠܟܵܐ ܕܡܲܠܟܹ̈ܐ ܓ̰ܘܼܘܸܒܠܹܗ ܩܲܕܝܼܫܵܐ ܫܸܡܥܘܿܢ ܘܐ݇ܡܸܪܹܗ: ܠܲܝܬ݁ ܠܲܢܕܦܵܠܛܲܚ ܡ݂ܢ ܟܬܼ̈ܵܒܲܢ ܠܕܘܼܟܬܵܐ ܐ݇ܚܹܪ݇ܬܵܐ. ܣܵܒܵܒ ܡܘܿܠܦܵܚܠܗ݇ܘܿܢ ܟܬ̈ܵܒܲܢ ܕܗܵܘܲܚ ܙܲܒܛ: ܘܩܵܡ ܡܲܚܙܝܼܠܲܢ ܐܘܼܦ ܟܝܼܘܼܠܵܐ ܕܙܵܒܸܛܘܼܬܼܵܐ. ܒܘܼܬ ܕܐܵܗܵܐ ܣܵܒܵܒ ܗܵܕܟܼܵܐ ܩܵܡ ܡܲܠܦܝܼܠܲܢ ܟܬ̈ܵܒܲܢ: ܕܦܪܸܥܘܿܢ ܠܟܠ ܐ݇ܢܵܫܵܐ ܐܲܝܟܼ ܕܵܝܢܵܢܵܐ ܝ݇ܠܹܗ: ܕܡܲܕܵܐܬܵܐ: ܣܵܒܵܒ ܕܠܹܐ ܝ݇ܠܹܗ ܟܬܝܼܒܼܵܐ ܦܵܐܹܫ ܝܘܼܗ݇ܒܼܵܐ ܡܲܕܲܐܬܼܵܐ ܬܪܹܝ ܛܵܩܹ̈ܐ: ܕܵܐܟܼܝܼ ܐܵܕܝܵܐ ܝܵܗ݇ܒܲܚ ܬܪܹܝܢ ܛܵܩܹ̈ܐ ܡܲܕܲܐܬܵܐ؟ ܡ݂ܢ ܐ݇ܡܸܪܹܗ ܛܘܼܒܼܵܢܵܐ ܫܸܡܥܘܿܢ ܐܲܢܹܐ ܗܸܡܙܡܵܢܹ̈ܐ (ܓܵܘ ܐܲܨܲܚܬܵܐ ܕܡܘܿܢܣܲܝܢܘܿܪ ܐܲܒ݁ܒ݁ܝܵܠܘܿܣ ܠܲܝܬ݁ ܡܵܪܝ: ܒܗܵܝ ܚܕܵܐ ܕܘܼܟܬܵܐ ܡܲܬܘܼܒܹܐ ܝ݇ܢܵܐ ܡܵܪܝ ܫܸܡܥܘܿܢ:). ܐ݇ܡܸܪܘܿܢ ܐܸܠܹܗ ܫܲܠܝܼܛܵܢܹ̈ܐ: ܚܙܝܼ ܡܘܼܕܝܼ ܒܸܦܠܵܚܵܐ ܝ݇ܘܸܬ ܒܓܵܢܘܼܟܼ: ܟܲܕ ܕܲܠܩܘܼܒܼܠ ܦܘܼܩܕܵܢܵܐ ܕܡܲܠܟܵܐ ܕܡܲܠܟܹ̈ܐ ܒܸܟܠܵܝܵܐ ܝ݇ܘܸܬ: ܘܗܵܘ ܐܸܫܛܵܪܵܐ ܠܹܐ ܝ݇ܘܸܬ ܒܸܓܪܵܫܹܗ ܕܪܵܥܢܵܐ ܘܫܲܪܘܼܪܹܗ: ܘܠܹܐ ܝ݇ܘܸܬ ܡܩܵܒܘܿܠܹܐ ܡܲܕܲܐܬܵܐ ܬܪܹܝܢ ܛܵܩܹ̈ܐ: ܕܝܵܗ݇ܒܸܬ ܠܡܲܠܟܵܐ ܕܡܲܠܟܹ̈ܐ ܡ݂ܢ ܪܹ̈ܓܵܘܵܬܘܼܗܝ ܢܵܨܪ̈ܵܝܹܐ: ܣܵܒܵܒ ܐܲܢ݇ܬ ܒܵܠܲܕ ܝ݇ܘܸܬ: ܕܡܸܢ݇ܕܪܸܫ݇ ܠܲܝܬ݁ ܦܸܪܣܲܬ ܠܡܲܠܟܵܐ ܕܡܲܠܟܹ̈ܐ: ܕܪܵܚܸܡ ܥܲܠ ܡܿܢ ܕܫܵܡܸܛ ܪܸܙܵܝܹܗ. ܗܲܕܟܼܵܐ ܬܲܚܡܸܢ ܘܦܲܪܡܝܼ ܒܘܼܬ ܕܐܲܢܹܐ: ܘܚܙܝܼ ܡ݂ܢ ܓܸܒ ܡܲܚܲܒܬܘܼܟܼ ܩܲܕ݇ܡܵܝܬܵܐ: ܡܲܟܪܘܼܒܹܐ ܗ݇ܘܸܬ ܠܡܲܠܟܵܐ ܕܡܲܠܟܹ̈ܐ: ܐܲܝܟܼ ܚܲܕ݇ ܕܸܫܡܲܢ ܣܵܢܝܵܢܵܐ ܕܓܵܢܵܐ ܒܦܘܼܩܕܵܢܹܗ ܒܸܬ ܡܲܫܦܸܚܠܹܗ ܕܸܡܘܼܟܼ ܐܲܝܟܼ ܡܝܼ̈ܵܐ: ܐܵܗܵܐ ܝ݇ܠܹܗ ܫܵܒܼܘܿܪ ܡܲܠܟܵܐ: ܕܡܘܼܫܥܸܫܠܹܗ ܚܲܒܪܹܗ ܠܟܠܵܝ ܛܵܝܸܦܹ̈ܐ. ܘܐܲܢ݇ܬ ܝܼܘܸܬ ܣܵܪܒܲܙ ܕܝܹܗ: ܕܵܐܟܼܝܼ ܒܸܬ ܩܲܫܕܸܪܸܬ݁ ܘܟܵܠܹܝܬ݁ ܕܲܠܩܘܼܒܼܠ ܦܘܼܩܕܵܢܹܗ؟ ܐܝܼܢܵܐ ܡܨܝܸܬ݁ ܠܗܸܡܸܙ̈ܡܵܢܲܢ: ܘܟܠܝܼ ܒܕܵܘܣܬܘܼܬܘܟܼ ܘܚܲܒܼܪܘܼܬܘܼܟܼ: ܘܥܒܼܘܿܕ ܠܹܗ ܗܵܘ ܐܸܫܛܵܪܵܐ: ܘܠܵܐ ܟܠܝܼ ܕܲܠܩܘܼܒܼܠ ܦܘܼܩܕܵܢܵܐ ܕܡܲܠܟܵܐ ܙܲܪܒܵܢܵܐ.

ܐ݇ܡܸܪܹܗ ܢܲܨܝܼܚܵܐ ܫܸܡܥܘܿܢ ܫܡܸܥܠܵܘܟܼܘܿܢ ܐܲܢܹܐ ܕܩܲܕ݇ܡܵܝܬܵܐ ܐ݇ܡܸܪܝܼ. ܘܗܲܪ ܐܲܢܹܐ ܕܫܡܸܥܠܵܘܟܼܘܿܢ ܟܬܘܿܒܼܡܘܿܢ ܠܗ݇ܘܿܢ ܘܡܲܕܸܥܡܘܿܢ ܠܗ݇ܘܿܢ ܩܵܐ ܡܲܠܟܵܐ: ܦܘܼܩܕܵܢܹܗ ܒܸܥܒܼܵܪܵܐ ܝ݇ܠܹܗ ܙܵܘܕܵܐ ܡ݂ܢ ܚܲܝܠܲܢ: ܠܹܐ ܡܵܨܲܚ ܩܵܒܠܲܚ ܡܲܕܲܐܬܵܐ ܬܪܹܝ ܛܵܩܹ̈ܐ ܥܲܠ ܓܵܢܲܢ: ܡ݂ܢ ܣܵܒܵܒ ܕܡܸܣܟܹܢܹ̈ܐ ܝ݇ܘܲܚ. ܐܝܼܢܵܐ ܚܲܝܘܼܬܲܢ ܘܡܵܐ̈ܠܲܢ ܩܵܕ݇ܡܘܼܗܝ ܡܘܼܬܒܹ̈ܐ ܝ݇ܢܵܐ ܘܒܐܲܪܥܵܐ ܕܝܼܘܿܗܝ ܝ݇ܘܲܚ. ܦܵܩܘܿܕܹܐ ܝ݇ܘܲܚ ܠܗܘܼܟܡܵܘܟܼܘܿܢ: ܕܫܵܩܠܝܼܬܘܿܢ ܠܗ݇ܘܿܢ ܡܸܢܲܢ. ܘܐܲܚܢܲܢ ܒܚܲܕܘܼܬܵܐ ܟܠ ܡܸܢܕܝܼ ܕܩܢܝܼܠܲܢ: ܩܵܕ݇ܡܘܼܗܝ ܒܸܫܒܼܵܩܵܐ ܝ݇ܘܲܚ. ܡ݂ܢ ܣܵܒܵܒ ܕܦܲܓܼܪ̈ܲܢ ܘܡܵܐ̈ܠܲܢ ܘܒ̈ܵܬܲܢ ܘܟܠ ܡܸܢܕܝܼ ܕܐܝܼܬܠܲܢ: ܫܒܼܘܿܩ ܡ݂ܢ ܓܵܢ̈ܵܬܲܢ ܕܝܲܢ ܝܼܢܵܐ: ܐܲܚܟ̰ܝܼ ܐܲܝܟܼ ܓܘܼܪ̈ܵܢܹܐ ܘܗܲܟܡܵܢܹ̈ܐ ܕܥܵܠܡܵܐ ܠܹܐ ܝ݇ܠܹܗ ܦܵܩܘܿܕܹܐ ܐܸܠܲܢ ܕܗܵܘܲܚ ܥܲܠ ܐܲܚܘܼܢ̈ܘܵܬܲܢ ܕܐܝܼܢܵܐ ܛܵܝܸܦܵܐ ܕܐܲܠܵܗܵܐ. ܡ݂ܢ ܣܵܒܵܒ ܕܗܘܼܟܡܲܢ ܠܹܐ ܗ݇ܘܵܐ ܡ݂ܢ ܗܘܼܟܡܵܐ ܕܐܵܗܵܐ ܥܵܠܡܵܐ ܩܲܒܸܠܲܢ: ܘܗܘܼܟܡܲܢ ܠܹܐ ܗ݇ܘܵܐ ܡ݂ܢ ܐܲܪܥܵܐ: ܡܣܵܒܵܒ ܗܘܼܟܡܲܢ ܫܡܲܝܵܢܵܐ ܝ݇ܠܹܗ. ܗܲܕܟܼܵܐ ܠܹܐ ܝ݇ܠܹܗ ܦܵܩܘܿܕܹܐ ܐܸܠܲܢ ܕܡܲܟܝܼܟܹ̈ܐ ܕܗܵܘܲܚ ܟܵܪ̈ܘܿܒܹܐ: ܘܠܵܐ ܐܸܠܲܢ ܕܒܲܣܝܼܡܹ̈ܐ ܗܵܘܲܚ ܩܸܫܝܹ̈ܐ: ܘܗ݁ܝ ܕܐ݇ܡܵܪܵܘܟܼܘܿܢ ܐܸܠܝܼ: ܕܥܒܼܘܿܕ ܒܵܘܲܪ ܕܚܲܕܪܵܐ ܡܲܚܲܒܬܹܗ ܕܡܲܠܟܵܐ ܕܠܟܸܣܠܘܼܟܼ ܠܣܢܵܝܬܵܐ: ܒܣܵܒܵܒ ܕܠܵܐ ܡܲܨܝܵܬܘܼܟܼ: ܘܫܲܦܸܚ ܕܸܡܘܼܟܼ ܐܲܝܟܼ ܡܝܼ̈ܵܐ: ܐܵܢܵܐ ܫܪܵܪܵܐ ܒܐܹܡܵܪܵܐ ܝ݇ܘܸܢ ܩܵܕ݇ܡ ܗܘܼܟܡܵܘܟܼܘܿܢ: ܒܸܚܕܵܝܹܐ ܝ݇ܘܸܢ ܐܸܢ ܟܵܠܹܐ ܡܲܠܟܵܐ ܒܚܘܼܒܹܗ ܕܠܟܸܣܠܝܼ: ܐܝܼܢܵܐ ܐܸܢ ܐܵܗܵܐ ܕܫܵܒܸܩܠܝܼ ܒܚܘܼܒܹܗ ܕܐܲܠܵܗܝܼ. ܘܒܸܬ ܙܵܝܕܵܐ ܡܲܨܝܲܬܝܼ ܠܦܘܼܩܕܵܢܹܗ ܕܡܲܠܟܝܼ ܘܐܲܠܵܗܝܼ. ܘܚܲܝ̈ܝܼ ܣܵܘܓܘܿܠ ܝ݇ܢܵܐ ܐܸܠܝܼ. ܐܸܢ ܐܵܗܵܐ ܫܵܒܸܩܠܝܼ ܒܡܲܟܝܼܟܼܘܼܬܝܼ ܘܒܝܘܼܠܦܵܢܹܗ ܕܡܵܪܝܼ. ܐܝܼܢܵܐ ܐܸܢ ܒܝܲܕ ܡܲܚܲܒܬܹܗ ܒܣܵܡܵܐ ܝ݇ܠܵܗ݁ ܕܡܲܪܚܸܩܠܝܼ ܡ݂ܢ ܚܘܼܒܹܗ ܕܐܲܠܵܗܝܼ: ܘܥܵܒܸܕܠܝܼ ܣܸܢܝܵܐ ܩܵܬܹܗ: ܘܝܵܗ݇ܒܸܠܝܼ ܪܵܥܝܼ ܕܡܵܨܝܸܬܸܢ ܠܪܸܙܵܝܹܗ: ܟܲܕ ܒܸܗܘܵܝܵܐ ܝ݇ܘܸܢ ܕܲܠܩܘܼܒܼܠ ܠܪܸܙܵܝܹܗ ܘܦܘܼܩܕܵܢܹܗ ܕܡܵܪܝܼ. ܘܟܲܕ ܡܲܟܫܘܼܛܹܐ ܝ݇ܠܹܗ ܐܸܠܝܼ ܚܲܝ̈ܝܼ ܒܪܵܚܡܘܼܬܹܗ ܓܵܘ ܕܐܵܗܵܐ ܕܘܼܢܝܹܐ: ܒܣܵܡܹܗ ܝ݇ܠܵܗ ܕܡܵܡܝܸܬܠܝܼ ܡ݂ܢ ܚܲܝܹ̈ܐ ܫܲܪܝܼܪܹ̈ܐ: ܕܩܘܼܘܸܠܹܐ ܝ݇ܢܵܐ ܩܵܬܲܢ ܡ݂ܢ ܝܵܗ݇ܒܼܵܢܵܐ ܕܚܲܝܹ̈ܐ. ܗܵܘ ܕܝܼܠܹܗ ܚܵܝܵܐ ܘܡܲܚܝܼܵܢܵܐ: ܕܗܵܘ ܝܘܼܗ݇ܒܼܠܹܗ ܐܸܠܲܢ ܚܲܝܹ̈ܐ ܕܙܲܒܼܢܵܐ: ܘܩܘܼܘܸܠܹܗ ܐܸܠܲܢ ܚܲܝܹ̈ܐ ܕܗܕܝܼܪܹ̈ܐ ܝ݇ܢܵܐ: ܣܢܵܝܬܹܗ ܩܵܬܝܼ ܒܘܼܫ ܪܵܒܵܐ ܝܘܼܬܪܵܢܵܐ ܝ݇ܠܵܗ݁ ܡ݂ܢ ܡܲܚܲܒܬܹܗ ܒܐܵܗܵܐ ܥܵܠܡܵܐ: ܘܠܵܐ ܡܵܨܝܲܬܵܐ ܠܦܘܼܩܕܵܢ̈ܘܼܗܝ ܒܘܼܫ ܙܵܘܕܵܐ ܡ݂ܢ ܡܵܨܝܲܬܵܐ. ܘܒܗܲܝܼܪܠܝܼ ܘܒܸܬ ܗܘܝܼ ܡܲܗܢܝܵܢܹ̈ܐ ܩܵܬܝܼ ܟܠ ܦܵܨܠܵܐ ܕܡܵܘܬܹ̈ܐ ܒܘܼܬ ܚܵܬܸܪ ܕܐܲܠܵܗܝܼ ܙܛܵܝܸܦܹܗ: ܒܘܼܫ ܙܵܘܕܵܐ ܡ݂ܢ ܚܲܝܹ̈ܐ ܕܙܲܒܼܢܵܐ. ܐܝܼܢܵܐ ܟܲܕ ܐܲܢܹܐ ܗܸܡܹܙܡܵܢܹ̈ܐ ܕܡ݂ܢ ܛܘܼܒܼܵܢܵܐ ܫܸܡܥܘܿܢ ܦܝܼܫܠܹܗ݇ܘܿܢ ܗܘܼܡܙܸܡܹ̈ܐ ܩܵܕ݇ܡ ܫܲܠܝܼܛܵܢܹ̈ܐ. ܟܬܸܒܼܠܗ݇ܘܿܢ ܐܲܝܟܼ ܡܘܼܕܝܼ ܕܦܝܼܫܠܹܗ ܗܘܼܡܙܸܡܵܐ: ܫܘܼܕܸܪܘܿܢ ܩܵܐ ܡܲܠܟܵܐ ܫܵܒܼܘܿܪ ܠܒܹܝܬܼ ܗܘܼܙܵܝܹ̈ܐ ܒܝܲܕ ܠܲܒܠܵܢܵܐ ܕܟܬܵܒܹ̈ܐ. ܐܝܼܢܵܐ ܒܥܸܕܵܢܵܐ ܕܐܵܗܵܐ ܟܬܵܒܼܵܐ ܦܝܼܫܠܹܗ ܩܸܪܝܵܐ ܩܵܕ݇ܡ ܡܲܠܟܵܐ: ܦܝܼܫܠܹܗ ܡܸܠܝܵܐ ܡ݂ܢ ܟܲܪܒܹܗ ܓܘܼܪܵܐ. ܚܘܼܪܚܸܟ̰ܠܹܗ ܟܵܟ̈ܘܼܗܝ: ܘܐܝܼܕ̈ܵܘܗܝ ܡܚܝܼܠܹܗ ܚܕܵܐ ܠܗ݁ܝ ܐ݇ܚܹܪ݇ܬܵܐ ܘܐ݇ܡܸܪܹܗ: ܫܸܡܥܘܿܢ ܒܣܵܡܘܼܗܝ ܠܵܗ݁ ܕܠܬܲܠܡܝܼܕ̈ܘܗܝ ܘܠܛܵܝܸܦܘܼܗܝ ܕܥܵܒܸܕܠܗ݇ܘܿܢ ܥܸܨܝܹ̈ܐ ܥܲܠ ܡܲܠܟܘܼܬܝܼ: ܘܥܵܒܸܕܠܗ݇ܘܿܢ ܪܹ̈ܓܵܘܵܬܹܐ (ܣܲܪ̈ܒܵܙܹܐ) ܕܩܹܣܲܪ: ܗܵܘ ܕܝܼܠܹܗ ܒܪܘܿܢܵܐ ܕܬܵܘܕܝܼܬܵܝ: ܒܘܼܬ ܕܐܵܗܵܐ ܠܵܐ ܡܘܼܨܝܸܬܠܹܗ ܠܦܘܼܩܕܵܢܝܼ. ܐܝܼܢܵܐ ܒܥܸܕܵܢܵܐ ܕܐܲܢܹܐ ܚܲܒܪ̈ܵܢܹܐ ܡ݂ܢ ܡܲܠܟܵܐ ܦܝܼܫܠܗ݇ܘܿܢ ܗܘܼܡܙܸܡܹ̈ܐ: ܚܲܒܪܵܐ ܦܠܸܛܠܹܗ ܒܬܲܪܥܵܐ: ܘܦܝܼܫܠܗ݇ܘܿܢ ܝܕܸܥܝܹ̈ܐ ܗܹܡܸܙܡܵܢܹ̈ܐ ܕܗܘܼܡܙܸܡܠܹܗ ܡܲܠܟܵܐ ܒܘܼܬ ܫܸܡܥܘܿܢ ܘܒܘܼܬ ܛܵܝܸܦܵܐ ܕܟܪܸ̈ܣܛܝܵܢܹܐ ܩܵܐ ܟܠ ܐ݇ܢܵܫܵܐ. ܘܒܓ̰ܲܠܕܘܼܬܵܐ ܫܘܼܪܝܼܠܗ݇ܘܿܢ ܣܵܢܝܵܢܹ̈ܐ ܕܛܵܝܸܦܲܢ ܠܡܲܣܠܘܼܝܲܢ: ܘܠܹܐܡܵܪܵܐ ܒܘܼܬ ܫܸܡܥܘܿܢ ܘܒܘܼܬ ܛܵܝܸܦܵܐ ܕܟܪܸ̈ܣܛܝܵܢܹܐ ܗܹܡܸܙܡܵܢܹ̈ܐ ܕܲܠܩܘܼܒܼܠ ܩܵܕ݇ܡ ܡܲܠܟܵܐ ܘܩܵܕ݇ܡ ܓܘܼܪ̈ܵܢܘܼܗܝ.

ܐܝܼܢܵܐ ܝܼܗܘܼܕܵܝܹ̈ܐ ܚܲܕ݇ܟܡܵܐ ܐ݇ܢܵܫܹ̈ܐ ܝ݇ܘܵܐ ܟܠ ܥܸܕܵܢܵܐ ܕܲܠܩܘܼܒܼܠ ܛܵܝܸܦܵܢ ܝ݇ܢܵܐ: ܐܵܢܝܼ ܕܠܢܒܼܝܹ̈ܐ ܩܛܝܼܠܵܝܠܗ݇ܘܿܢ: ܘܠܡܫܝܼܚܵܐ ܙܩܸܦܠܗ݇ܘܿܢ ܘܠܫܠܝܼܚܹ̈ܐ ܪܓ̰ܸܡܠܗ݇ܘܿܢ: ܘܒܕܵܝܡܘܼܬܼܵܐ ܨܸܗܝܹ̈ܐ ܝ݇ܢܵܐ ܠܕܸܡܲܢ: ܡܘܼܫ݇ܟ̰ܸܚܠܗ݇ܘܿܢ ܩܵܐ ܓܵܢܲܝ ܦܸܪܣܲܬ ܠܸܡܚܵܝܵܐ ܕܲܠܩܘܼܒܼܠ. ܘܡ݂ܢ ܣܵܒܵܒ ܐܝܼܬ ܗ݇ܘܵܐܠܗ݇ܘܿܢ ܒܵܠܵܕܘܼܬܼܵܐ ܒܩܘܼܪܒܵܝܘܼܬܵܝ ܠܟܸܣ ܡܲܠܟܬܵܐ: ܣܵܒܵܒ ܡ݂ܢ ܬܵܘܕܝܼܬܵܝ ܝܼܗ݇ܘܵܐ: ܫܘܼܪܝܼܠܗ݇ܘܿܢ ܠܸܥܒܼܵܕܵܐ ܡܵܪܵܐ ܕܓܢܵܗܵܐ ܠܢܲܨܝܼܚܵܐ ܫܸܡܥܘܿܢ ܒܡܚܵܝܬܵܐ ܕܲܠܩܘܼܒܼܠܹܗ ܘܐܵܡܪܝܼ ܗ݇ܘܵܘ: ܕܐܸܢ ܐܲܢ݇ܬ ܡܲܠܟܵܐ ܕܡܲܠܟܹ̈ܐ ܡܵܪܵܐ ܕܟܠܵܗ݁ ܐܲܪܥܵܐ ܝ݇ܘܸܬ: ܕܟܹܐ ܫܲܕܪܸܬ ܐܸܓܲܪ̈ܝܵܬܹܐ ܓܘܼܪܹ̈ܐ ܘܥܵܩܸܠܕܵܪܹ̈ܐ ܕܡܲܠܟܘܼܬܘܼܟܼ: ܘܕܲܫܢܹ̈ܐ ܚܩܝܼܪܹ̈ܐ ܫܲܗܘܸܬܵܢܹ̈ܐ ܕܐܝܼܩܵܪܘܼܟܼ ܩܵܐ ܩܸܣܲܪ: ܠܹܐ ܗܵܘܝܼ ܡܝܘܼܩܪܹ̈ܐ ܒܥܲܝܢ̈ܘܼܗܷ: ܐܝܼܢܵܐ ܐܸܢ ܐܵܗܵܐ ܕܫܸܡܥܘܼܢ ܫܲܕܸܪܹܗ ܚܕܵܐ ܐܹܓܲܪܬܵܐ ܡܘܼܣܠܝܼܬܵܐ ܘܙܥܘܿܪܬܵܐ: ܒܸܬ ܩܵܐܹܡ ܘܣܵܓܹܕ ܐܸܠܵܗ݁: ܘܡܩܲܒܸܠ ܠܵܗ݁ ܒܬܸܪ̈ܘܝ ܐܝܼܕ̈ܘܼܗܝ: ܘܦܘܼܩܕܵܢܹܗ ܒܚܵܦܵܛܘܼܬܼܵܐ ܒܸܬ ܡܬܲܡܸܡܠܹܗ: ܘܥܲܡ ܕܐܲܢܹܐ ܟܠܵܝ: ܠܲܝܬ݁ ܐ݇ܪ̈ܵܙܹܐ ܓܵܘ ܡܲܠܟܘܼܬܘܼܟܼ:. ܐܝܼܢܵܐ ܐܸܢ ܐܵܗܵܐ ܟܵܬܸܒܼ ܘܡܲܕܥܹܐ ܠܩܸܣܲܪ: ܒܸܬ ܥܵܒܸܕܝܼܠܗ݇ܘܿܢ ܡܲܓ̰ܒܘܼܪ ܣܵܒܵܒ ܝܼܗܘܼܕܵܝܹ̈ܐ ܟܹܐ ܝܵܗ݇ܒܼܝܼ ܣܵܗܕܘܼܬܵܐ ܕܕܘܼܓܠܵܐ ܒܟܠ ܥܕܵܢܵܐ: ܐܲܝܟܼ ܕܝܼܗ݇ܒܸܠܗ݇ܘܿܢ ܣܵܗܕܘܬܵܐ ܕܕܘܼܓܠܵܐ ܒܘܼܬ ܡܵܪܲܢ: ܗܲܕܟܼܵܐ ܐܘܼܦ ܥܲܠ ܫܸܡܥܘܿܢ ܪܹܓܹܗ ܕܲܡܫܝܼܚܵܐ ܝܘܼܗ݇ܒܸܠܗ݇ܘܿܢ ܣܵܗܕܘܼܬܼܵܐ ܕܕܘܼܓܠܵܐ: ܐܝܼܢܵܐ ܐܵܢܝܼ ܕܝܘܼܗ݇ܒܸܠܗ݇ܘܿܢ ܣܵܗܕܘܼܬܼܵܐ ܕܕܘܼܓܠܵܐ ܒܘܼܬ ܡܵܪܲܢ ܦܝܼܫܠܗ݇ܘܿܢ ܡܘܼܣܸܠܝܹ̈ܐ: ܘܢܦܸܠܗ݇ܘܿܢ ܒܣܲܝܦܵܐ ܕܪ̈ܗܘܿܡܝܹܐ ܒܥܸܕܵܢܵܐ ܕܚܪܵܒܼܵܐ ܕܡܕܝܼܢ݇ܬܵܝ. ܘܐܘܼܦ ܐܵܢܝܼ ܕܝܘܼܗ݇ܒܸܠܗ݇ܘܿܢ ܣܵܗܕܘܼܬܼܵܐ ܡܘܼܩܘܸܚܠܗ݇ܘܿܢ: ܕܠܲܝܬ݁ ܡܲܠܟܵܐ ܐܸܠܵܐ ܐܸܢ ܩܹܣܲܪ: ܘܢܦܸܠܗ݇ܘܿܢ ܒܣܲܝܦܹܗ ܕܩܹܣܲܪ. ܘܗܵܝ ܠܲܐܟܼܵܐ ܥܒܼܸܕܠܗ݇ܘܿܢ ܫܘܼܒܼܗܵܪܵܐ ܒܫܵܒܼܘܿܪ ܡܲܠܟܵܐ: ܘܡܸܢܹܗ ܦܝܼܫܠܗ݇ܘܿܢ ܩܛܝܼܠܹ̈ܐ. ܘܡܘܼܕܝܼ ܝ݇ܠܵܗ݁ ܣܵܒܵܒ ܕܩܸܛܠܵܝ: ܘܵܓ̰ܸܒ ܝ݇ܠܵܗ݁ ܕܡܲܕܥܲܚ ܠܵܗ݁ ܒܟܸܪܝܘܼܬܼܵܐ: ܒܵܬ݇ܪ ܥܸܣܪܝܼܢ ܘܐܲܪܒܥܵܐ ܫܸܢܹ̈ܐ: ܒܥܸܢܵܐ ܕܡܝܼܬܠܗ݇ܘܿܢ ܩܘܼܣܛܘܿܣ ܘܩܘܼܣܛܲܢܛܝܼܢܘܿܣ ܒܢܘܿܢܹ̈ܐ ܕܩܘܿܣܛܲܢܛܝܼܢܘܿܣ ܪܲܒܵܐ: ܗܘܼܟܸܡܠܹܗ ܝܘܼܠܝܵܢܘܿܣ ܥܲܠ ܪ̈ܗܘܿܡܵܝܹܐ ܘܒܓ̰ܲܠܕܘܼܬܼܵܐ ܐܝܼܡܲܢ ܕܗ݁ܘ ܗܘܼܟܸܡܠܹܗ: ܥܒܼܸܕܠܹܗ ܕܸܒܼܚܵܐ ܠܨܵܢܵܡܹ̈ܐ: ܕܡܲܫܓܸܫܠܗ݇ܘܿܢ ܟܪܸ̈ܣܛܝܵܢܹܐ: ܘܡܕܵܓܸܠܗ݇ܘܿܢ ܗܹܡܸܙܡܵܢܹ̈ܐ ܕܲܡܫܝܼܚܵܐ ܗܵܘ ܕܢܘܼܒܝܼܠܹܗ ܒܘܼܬ ܚܪܵܒܼܵܐ ܕܐܘܿܪܸܫܠܸܡ ܘܐ݇ܡܵܪܹܗ: ܕܠܹܐ ܦܵܐܹܫ ܫܒܼܝܼܩܵܐ ܒܝܼܘܿܗ݁ ܟܹܐܦܵܐ ܥܲܠ ܟܹܐܦܵܐ ܕܠܹܐ ܦܵܐܹܫ ܬܠܝܼܚܵܐ: ܒܘܼܬ ܕܐܵܗܵܐ ܦܘܼܩܸܕܠܹܗ ܩܵܐ ܝܼܗܘܼܕܵܝܹ̈ܐ ܕܒܟܠܵܗ݁ ܐܵܢܝܼ ܕܐܝܼܢܵܐ ܒܗܘܼܟܡܹܗ ܕܐܵܙܠ݇ܝܼ ܠܝܼܗܘܼܕ: ܘܒܵܢܝܼ ܠܐܘܿܪܸܫܠܸܡ ܘܠܗܲܝܟܠܵܐ: ܘܡܲܩܸܪܒܼܝܼ ܕܸܒܼܚܹܗ ܐܲܝܟܼ ܦܘܼܩܕܵܢܹܗ ܕܢܵܡܘܿܣܵܐ ܘܪܵܒܵܐ ܐ݇ܙܸܠܗ݇ܘܿܢ: ܘܫܘܼܪܝܼܠܗ݇ܘܿܢ ܠܸܚܦܵܪܵܐ ܒܸܢܝܲܬܹ̈ܐ ܕܐܘܿܪܸܫܠܸܡ. ܒܥܕܵܢܵܐ ܕܐܲܢܹܐ ܦܝܵܫܵܐ ܝܼܗ݇ܘ̣ܵܘ ܦܠܝܼܚܹ̈ܐ: ܚܲܕ ܡ݂ܢ ܡܲܚܸܠܛܵܢܵܐ ܘܕܲܓܵܠܵܐ ܐ݇ܬܹܐܠܹܗ ܠܐܲܬܪܵܐ ܕܦܵܪ̈ܣܵܝܹܐ. ܘܡܲܟܼܪܸܙ ܗ݇ܘܵܐ ܠܟܠܵܝ ܝܼܗܘܼܕܵܝܹ̈ܐ ܘܐܵܡܸܪ: ܙܲܒܼܢܵܐ ܝ݇ܠܹܗ ܗ݁ܘ ܕܡܲܙܒܘܼܛܹܐ ܝ݇ܠܹܗ ܒܝܲܕ ܢܒܼܝܼܹ̈ܐ. ܕܐܵܢܵܐ ܡ݂ܢ ܐܲܠܵܗܵܐ ܦܝܼܫܠܝܼ ܦܘܼܩܕܵܐ: ܕܡܲܟܪܸܙܢ ܩܵܬܵܘܟܼܘܿܢ ܕܕܵܝܪܝܼܬܘܿܢ ܘܐܵܙܝܼܠ݇ܬܘܿܢ. ܐܝܼܢܵܐ ܐ݇ܬܹܐܠܹܗ ܗ݁ܘ ܡܲܚܠܸܛܵܢܵܐ ܐܘܼܦ ܠܡܵܚܘܿܙܹ̈ܐ (ܩܛܝܼܣܦܘܿܢ) ܕܒܹܝܬ ܐܵܪ̈ܵܡܵܝܹܐ: ܘܡܘܼܚܠܸܛܠܹܗ ܪܘܼܚܩܸܢܘܿܢ ܡ݂ܢ ܡܕܝܼܢ݇ܬܵܐ ܬܠܵܬܵܐ ܡܝܼܠܹ̈ܐ. ܐܝܼܢܵܐ ܒܥܸܕܵܢܵܐ ܕܦܝܼܫܠܵܗ݁ ܝ݇ܕܥܝܼܬܵܐ ܐܵܗܵܐ ܗܹܡܙܡܵܢ ܠܫܵܒܼܘܿܪ: ܫܘܼܕܸܪܹܗ ܚܲܝܠܵܘܵܬ̈ܘܼܗܝ: ܘܩܛܸܠܗ݇ܘܿܢ ܡܸܢܵܝ ܪܵܒܵܐ ܐܲܠܦܹ̈ܐ: ܗܲܕܟܼܵܐ ܕܗ݇ܘܹܐܠܵܗ݁ ܐܘܼܦ ܒܝܼܗܘܼܕܵܝܹ̈ܐ ܒܝܵܘܡܵܢܹ̈ܐ ܕܫܵܒܼܘܿܪ ܡܲܠܟܵܐ: ܒܟܸܪܝܘܼܬܵܐ ܐܲܝܟܼ ܡܸܢܕܝܼ ܕܡܨܝܼܠܲܢ ܘܪܫܸܡܠܲܢ. ܒܸܬ ܐܵܬܲܚ ܠܬܲܫܥܝܼܬܲܢ ܝܲܢ ܩܸܣܬܲܢ.

ܡ݂ܢ ܒܵܬ݇ܪ ܟܬܵܒܼܝܵܬܹ̈ܐ ܕܫܠܝܼܛܵܢܹ̈ܐ: ܒܘܼܬ ܛܘܼܒܼܵܢܵܐ ܫܸܡܥܘܿܢ ܦܝܼܫܠܹܗ ܟܬܝܼܒܹ̈ܐ. ܦܝܼܫܠܗ݇ܘܿܢ ܩܸܪ̈ܝܹܐ ܩܵܕ݇ܡ ܡܲܠܟܵܐ: ܗܲܕܟܼܵܐ ܡܸܢ݇ܕܪܸܫ݇ ܡܲܠܟܵܐ ܟܬܝܼܒܼܠܹܗ ܬܪܹܝܢ ܐܘܼܪ̈ܚܵܬܹܐ ܠܫܲܠܝܼܛܵܢܹ̈ܐ ܒܘܼܬ ܫܸܡܥܘܿܢ: ܒܓ̰ܲܠܕܘܼܬܵܐ ܐܝܼܡܲܢ ܕܚܵܙܝܼܬܘܿܢ ܠܹܗ ܐܵܗܵܐ ܟܬܵܒܼܵܐ ܕܝܲܢ ܐܲܠܵܗܹ̈ܐ: ܛܵܠܒܝܼܬܘܿܢ ܕܐܵܬܹܐ ܫܸܡܥܘܿܢ ܩܵܕ݇ܡܵܘܟܼܘܿܢ: ܘܐ݇ܡܘܿܪܘܿܢ ܐܸܠܹܗ ܡ݂ܢ ܦܘܼܩܕܵܢܲܢ: ܩܵܐ ܒܘܼܬ ܡܘܼܕܝܼ ܒܩܲܫܕܲܪܬܘܼܟܪ݂ ܚܲܝ̈ܘܼܟܼ ܘܚܲܝܹ̈ܐ ܕܒܢܘܿܢܹ̈ܐ ܕܝܘܼܠܦܵܢܘܼܪܟܼ ܛܵܠܘܿܩܸܐ ܝ݇ܘܸܬ: ܡܐܘܼܕܵܠܹܐ ܐܸܠܘܼܟܼ ܘܐܸܠܵܝ ܠܡܵܘܬܹ̈ܐ ܡܲܪܝܼܪܹ̈ܐ ܣܵܦܘܿܝܸܐ ܝ݇ܘܸܬ؟ ܣܵܒܵܒ ܒܪܵܡܘܼܬܘܼܟܼ ܘܒܫܘܼܒܼܗܵܪܘܼܟܼ: ܕܒܣܵܡܘܼܟܼ ܝ݇ܠܵܗ݁ ܠܛܵܝܸܦܘܼܟܼ ܥܵܒܼܕܸܬ݁ ܠܹܗ ܥܸܨܝܵܐ ܥܲܠܝܼ. ܡ݂ܢ ܐܵܕܝܼܵܐ ܒܸܬ ܡܲܢܚܸܦܢܵܘܟܼܘܿܢ: ܘܒܸܬ ܫܵܝܦܸܢܵܘܟܼܘܿܢ ܡ݂ܢ ܐܲܪܥܵܐ: ܘܪܲܚܩܸܢܢܵܘܟܼܘܿܢ ܡ݂ܢ ܒܹܝܬ݁ ܒܢܲܝ̈ܢܵܫܵܐ: ܐܸܢ ܐܵܗܵܐ ܕܠܵܐ ܡܲܟܡܸܠܝܼܬܘܿܢ ܠܦܘܼܩܕܵܢܝܼ. ܐܝܼܢܵܐ ܐܵܗܵܐ ܟܬܵܒܼܵܐ ܕܬܪܹܝܢ ܕܦܝܼܫܠܹܗ ܫܘܼܕܪܵܐ ܠܫܲܠܝܼܛܵܢܹ̈ܐ ܕܒܹܝܬܼ ܐܵܪ̈ܵܡܵܝܹܐ: ܡ݂ܢ ܒܹܝܬ݁ ܗܘܼܙܵܝܹ̈ܐ: ܘܒܥܸܕܵܢܵܐ ܐ݇ܬܹܐܠܹܗ ܟܬܵܒܼܵܐ ܡ݂ܢ ܫܲܠܝܼܛܵܢܹ̈ܐ: ܕܟܬܵܒܼܵܐ ܩܵܕ݇ܡܘܼܗܝ ܩܵܪܝܼܠܹܗ. ܘܩܪܝܼܠܗ݇ܘܿܢ ܟܬܵܒܼܵܐ ܕܡܲܠܟܵܐ ܩܵܕ݇ܡܘܼܗܝ: ܘܐ݇ܟܼܵܠܬܵܐ ܕܓܲܦܹ̈ܐ ܕܝܼܗ݇ܘܵܐ ܕܝܼܗܘܵܐ ܟܬܝܼܒܹ̈ܐ ܓܵܘ ܟܬܵܒܼܵܐ ܨܘܼܢܨܸܠܗ݇ܘܿܢ ܓܵܘ ܢܵܬܝܵܬ̈ܘܼܗܝ: ܘܒܘܼܬ ܡܸܢܕܝܼ ܕܫܡܸܥܠܹܗ ܡ݂ܢ ܟܬܵܒܼܵܐ ܕܡܲܠܟܵܐ: ܦܝܼܫܠܹܗ ܛܠܝܼܒܵܐ ܡܸܢܹܗ ܡܲܕܵܪܬܵܐ ܕܓ̰ܘܼܘܵܒ. ܠܵܐ ܦܵܝܫܸܬ ܫܥܝܼܫܵܐ ܝܵܐ ܚܲܝܠܵܢܵܐ: ܘܠܵܐ ܙܲܕܥܸܬ ܝܵܐ ܓܲܢ݇ܒܵܪܵܐ ܕܚܲܝܠܵܐ: ܘܠܵܐ ܚܲܓ̰ܠܸܬ ܝܵܐ ܦܵܠܵܫܵܐ ܕܡܫܝܼܚܵܐ: ܐܸܠܵܐ ܡܲܕܸܪ ܓ̰ܘܼܘܵܒܹܗ ܘܐ݇ܡܘܿܪ: ܗܹܡܸܙܡܵܢܝܼ ܩܲܕ݇ܡܵܝܬܵܐ ܘܐ݇ܚܵܪܵܝܬܵܐ ܕܝܝܼ ܚܕܵܐ ܝ݇ܠܵܗ݁. ܕܐܵܢܵܐ ܠܛܵܝܸܦܵܐ ܕܣܘܼܦܝܼܠܹܗ ܐܸܠܝܼ ܡܫܝܼܚܵܐ ܡܵܪܵܐ ܕܝܝܼ: ܒܫܪܵܪܵܐ ܠܡܲܕܵܐܬܵܐ ܠܹܐ ܡܲܟܡܸܠܲܢ: ܐܸܠܵܐ ܟܠ ܦܸܨܠܵܐ ܕܡܵܘܬܹ̈ܐ ܒܸܬ ܩܲܒܠܸܢ ܒܘܼܬ ܕܝܼܵܝ: ܕܵܐܟܼܝܼ ܕܡܫܝܼܚܵܐ ܕܦܝܼܫܠܹܗ ܡܸܚܝܵܐ ܥܲܠ ܙܩܝܼܦܵܐ ܒܘܼܬ ܚܵܬܸܪ ܛܵܝܸܦܹ̈ܐ ܕܒܟܠ ܐܲܬܪܵܐ ܘܒܟܠ ܐܘܼܚܕܵܢܵܐ ܕܡܲܠܟܘܼܝܵܬܹ̈ܐ: ܕܡܲܚܝܼܠܗ݇ܘܿܢ ܒܙܩܝܼܦܹܗ: ܗܲܕܟܼܵܐ ܐܘܼܦ ܐܵܢܵܐ ܒܸܬ ܡܵܝܬܸܢ ܒܘܼܬ ܛܵܝܸܦܹܗ ܐܵܢܝܼ ܕܐܝܼܢܵܐ ܓܵܘ ܕܐܵܗܵܐ ܡܲܠܟܘܼܬܼܵܐ: ܓܵܢܝܼ ܡܣܵܦܘܿܝܹܐ ܝ݇ܘܸܢ: ܕܠܵܐ ܡܵܝܬܝܼ ܡ݂ܢ ܫܪܵܪܹܗ ܕܲܡܫܝܼܚܵܐ. ܣܵܒܵܒ ܗܲܩܘܼܬܼܵܐ ܒܐܹܡܵܪܵܐ ܝ݇ܘܸܢ ܩܵܕ݇ܡ ܓܘܼܪܘܼܬܵܘܟܼܘܿܢ ܘܠܹܐ ܝ݇ܘܸܢ ܡܕܵܓܘܿܠܹܐ: ܨܦܵܝܝܼ ܝܼܠܵܗ݁ ܩܵܬܝܼ ܡܵܘܬܵܐ ܒܘܼܫ ܙܵܘܕܵܐ ܡ݂ܢ ܚܲܝܹ̈ܐ ܕܓ̰ܘܼܢܓ̰ܵܪܵܐ ܕܟܸܠܝܹ̈ܐ ܝ݇ܘܲܚ: ܘܒܗܲܝܸܪܵܐ ܠܝܼ ܕܠܵܐ ܚܵܙܹܝܢ ܒܲܗܪܵܐ ܕܐܵܗܵܐ ܥܵܠܡܵܐ: ܘܠܵܐ ܙܹܐ ܒܸܬ ܚܵܙܹܝܢ ܦܪ̈ܝܼܩܹܐ ܕܡܵܪܝܼ ܐܵܢܝܼ ܕܦܣܵܫܵܐ ܝ݇ܢܵܐ ܡܘܼܠܝܸܨܹ̈ܐ. ܚܵܣܠܝܼ ܕܚܵܣܚܸܢ ܚܲܝ̈ܝܼ ܡ݂ܢ ܡܵܘܬܵܐ: ܘܣܵܦܸܢ ܚܲܝܹ̈ܐ ܕܪܹ̈ܓܵܘܵܬܹܐ ܕܐܲܠܵܗܵܐ ܠܡܲܕܲܐܬܵܐ ܩܫܝܼܬܵܐ ܘܡܲܪܝܼܪܬܵܐ. ܚܵܣܠܝܼ ܕܚܵܙܹܝܢ ܒܫܘܼܚܠܵܦܵܐ ܕܐܲܚܘܿܢܘܵܬ̈ܝܼ ܘܒܙܵܒܲܢܬܵܐ ܕܒܢܘܿܢ̈ܝܼ. ܠܹܐ ܡܲܟܠܸܢ ܐܲܩ̈ܠܝܼ ܕܐܵܙܠ݇ܝܼ ܒܐܘܼܪܚܵܐ ܕܡܵܘܬܵܐ ܒܘܼܬ ܓܵܢܝܼ ܘܒܘܼܬ ܛܵܝܸܦܝܼ: ܘܐܘܼܦ ܠܵܐ ܡܲܟܠܸܢ ܓܵܢܝܼ ܦܵܝܫܸܢ ܕܒܼܝܼܚܵܐ ܒܘܼܬ ܫܪܵܪܝܼ ܘܒܘܼܬ ܗܲܝܡܵܢܘܼܬܵܐ ܕܒܢܘܿܢܹ̈ܐ ܕܝܘܼܠܦܵܢܝܼ. ܐܝܼܢܵܐ ܒܘܼܬ ܡܲܪܥܝܼܬܝܼ ܘܕܸܡܝܼ ܒܸܬ ܝܵܗ݇ܒܸܢ: ܘܩܕܵܠܝܼ ܬܚܘܿܬ ܣܲܝܦܵܐ ܒܘܸܬ ܦܸܣ̈ܩܝܼ ܒܸܬ ܡܲܟܸܦܸܢ. ܘܗ݁ܝ ܕܟܬܸܒܼܠܹܗ ܡܲܠܟܵܐ ܕܡܲܠܟܹ̈ܐ: ܕܒܸܬ ܩܵܛܠܸܢ ܠܚܲܒܼܪ̈ܵܘܵܬܘܼܟܼ ܥܲܡܘܼܟܼ. ܐܵܗܵܐ ܪܸܙܵܝܵܐ ܕܡܲܠܟܵܐ ܝ݇ܠܵܗ݁ ܘܐܝܼܬܠܹܗ ܗܘܼܟܡܵܐ ܥܲܠ ܪܹ̈ܓܵܘܵܬܘܼܗܝ: ܐܝܼܢܵܐ ܐܵܢܵܐ ܘܐܲܢܹܐ ܡܚܘܼܣܝܹ̈ܐ ܝ݇ܘܲܚ ܡ݂ܢ ܕܸܡܵܐ ܣܵܒܵܒ ܐܘܼܦ ܐܲܢܹܐ ܒܘܼܬ ܫܪܵܪܹܗ ܕܡܵܪܢ: ܟܸܠܝܹ̈ܐ ܐ݇ܢܵܐ: ܟܲܕ ܨܲܚܨܝܼ ܗ݇ܘܵܐ ܠܗ݇ܘܿܢ ܡܲܠܟܵܐ: ܘܝܵܠܸܦ ܗ݇ܘܵܐ ܒܘܼܬ ܫܪܵܪܵܝ.

ܐܝܼܢܵܐ ܒܥܸܕܵܢܵܐ ܕܗܲܟܡܵܢܹ̈ܐ ܫܡܸܥܠܗ݇ܘܿܢ ܠܓ̰ܘܼܘܵܒ ܕܟܬܵܒܼܵܐ ܕܬܪܹܝܢ ܕܥܒܼܸܕܠܹܗ ܛܘܼܒܼܵܢܵܐ ܫܸܡܥܘܿܢ ܟܬܸܒܼܠܗ݇ܘܿܢ ܘܡܘܼܕܸܥܠܗ݇ܘܿܢ ܩܵܐ ܡܲܠܟܵܐ: ܘܦܝܼܫܠܗ݇ܘܿܢ ܩܸܪ̈ܝܹܐ ܟܬܵܒܼܵܝ̈ ܩܵܕ݇ܡ ܡܲܠܟܵܐ: ܗܵܝܓܵܗ݁ ܐܲܝܟܼ ܐܲܪܝܵܐ ܣܪܝܼܚܵܐ: ܡܘܼܛܥܸܡܵܐ ܒܕܸܡܵܐ ܛܝܼܡܵܢܵܐ ܕܐ݇ܢܵܫܵܐ: ܟܲܪܒܵܐ ܓܘܼܪܵܐ ܨܘܼܢܨܸܠܹܗ ܒܕܸܡܹܗ. ܘܡܘܼܚܪܸܦܠܹܗ ܘܚܘܼܪܚܸܟ̰ܠܹܗ ܟܵܟ̈ܘܼܗܝ. ܘܟܪܸܒܠܹܗ ܠܩܸܛܠܵܐ: ܘܠܸܦܢܵܝܵܐ. ܒܘܼܪܒܸܪܹܗ ܒܩܵܠܹܗ ܓܘܼܪܵܐ ܘܩܸܫܝܵܐ: ܘܡܘܼܫܥܸܫܠܹܗ ܠܐܲܪܥܵܐ ܒܗܲܡܙܲܡܬܹܗ ܚܲܝܠܵܢܬܵܐ. ܘܦܘܼܩܕܵܢܹܗ ܒܘܼܬ ܟܵܗܢܹ̈ܐ ܘܠܹܘܵܝܹ̈ܐ: ܕܗܵܘܝܵܐ ܒܝܼܵܝ ܒܓ̰ܲܠܕܘܼܬܵܐ ܒܡܚܵܝܬܵܐ ܕܣܲܝܦܵܐ. ܘܥܸܕܵܬܹ̈ܐ ܦܵܝܫܝܼ ܥܩܝܼܪܹ̈ܐ ܘܩܘܼܕܫܵܐ ܦܵܐܹܫ ܠܘܼܟܸܢܵܐ: ܘܬܸܫܡܸܫܬܵܐ ܦܵܝܫܵܐ ܡܘܼܨܚܸܪܬܵܐ: ܘܫܸܡܥܘܿܢ ܪܹܫܵܐ ܕܚܲܪ̈ܵܫܹܐ ܦܵܐܹܫ ܕܒܼܝܼܩܵܐ: ܘܦܵܐܹܫ ܫܘܼܕܪܵܐ ܠܟܸܣܠܝܼ. ܡ݂ܢ ܣܵܒܵܒ ܗ݁ܘ ܡܘܼܣܠܝܼܠܹܗ ܠܡܲܠܟܘܼܬܝܼ: ܦܪܸܫܠܹܗ ܒܗ݁ܝ ܕܠܐܲܠܵܗܹܗ ܕܩܹܣܲܪ ܣܵܓܹܕ ܘܒܐܲܠܵܗܵܐ ܕܝܼܝܼ ܡܲܨܚܸܪ: ܐܝܼܢܵܐ ܡ݂ܢ ܢܵܓܸܣܬܵܢ ܦܝܼܫܠܹܗ ܫܘܼܕܪܵܐ ܟܬܵܒܼܵܐ ܕܬܠܵܬ݇ܐ ܡ݂ܢ ܫܵܒܼܘܿܪ ܡܲܠܟܵܐ ܕܒܹܝܬ ܗܘܼܙܵܝܹ̈ܐ: ܩܵܐ ܗܲܟܡܵܢܹ̈ܐ ܕܒܹܝܬܼ ܐܵܪ̈ܵܡܵܝܹܐ: ܗܵܕܟܼܵܐ ܟܬܝܼܒܼܵܐ ܗ݇ܘ̣ܵܐ: ܐܲܝܟܼ ܕܒܓ̰ܲܠܕܘܼܬܼܵܐ ܚܵܙܝܼܬܘܿܢ ܐܵܗܵܐ ܟܬܵܒܼܵܐ ܕܝܲܢ ܐܲܠܵܗܹ̈ܐ: ܠܫܸܡܥܘܿܢ ܓܘܼܪܵܐ ܕܢܵܨܪ̈ܵܝܹܐ ܕܒܼܘܿܩܘܿܢ ܠܹܗ ܘܐ݇ܣܘܿܪܘܿܢ ܠܹܗ: ܘܓ̰ܲܠܕܹܐ ܫܲܕܪܘܿܢ ܠܹܗ ܠܬܲܪܥܵܐ ܕܡܲܠܟܵܐ: ܘܥܩܘܿܪܘܼܢ ܠܵܗ݁ ܥܸܕܬܹܗ. ܐܲܢܹܐ ܝܼܗ݇ܘ̣ܵܘ ܕܦܝܼܫܠܗ݇ܘܿܢ ܟܬܝܼܒܹ̈ܐ ܡ݂ܢ ܡܲܠܟܵܐ. ܐܝܼܢܵܐ ܛܘܼܒܼܢܵܐ ܫܸܡܥܘܿܢ ܒܥܕܵܢܵܐ ܕܐܲܢܹܐ ܫܸܡܥܝܵܝ ܠܹܗ: ܠܵܐ ܚܓ̰ܸܠܹܗ ܘܠܵܐ ܙܹܐ ܦܝܼܫܠܹܗ ܫܥܝܼܫܵܐ. ܘܟܲܕ ܚܙܝܼܠܹܗ ܥܩܵܪܬܵܐ ܕܥܸܕܬܹܗ: ܠܵܐ ܦܝܼܫܠܹܗ ܒܨܝܼܪܵܐ ܚܝܼܵܠܹܗ: ܐܸܠܵܐ ܦܝܼܫܠܹܗ ܚܘܼܠܸܢܵܐ ܘܠܸܒܵܢܵܐ: ܘܝܘܼܗ݇ܒܸܠܹܗ ܚܸܩܪܵܐ ܠܐܲܠܵܗܵܐ. ܘܩܸܡܠܹܗ ܘܐ݇ܙܸܠܹܗ ܠܟܸܣ ܪܹ̈ܫܵܢܹܐ ܘܦܝܼܫܠܹܗ ܚܸܙܝܵܐ ܐܸܠܵܝ. ܡ݂ܢ ܩܵܕ݇ܡ ܕܐܲܢܹܐ ܕܵܒܼܩܝܼ ܝܼܗ݇ܘ̣ܵܘ ܠܹܗ. ܘܩܛܸܥܠܗ݇ܘܿܢ ܐܸܠܹܗ ܥܕܵܢܵܐ: ܘܡ݂ܢ ܐܵܕܝܼܵܐ ܠܵܬܠܬ݇ܐ ܝܵܘܡܵܢܹ̈ܐ ܒܸܬ ܐܵܙܸܠ݇ܬ ܠܬܲܪܥܵܐ ܕܡܲܠܟܵܐ. ܐܘܼܦ ܐܵܗܵܐ ܩܲܕܝܼܫܵܐ ܫܸܡܥܘܿܢ ܩܘܼܒܸܠܹܗ ܥܲܠ ܓܵܢܹܗ ܐܲܢܹܐ ܒܚܲܕܘܼܬܵܐ: ܡ݂ܢ ܢܵܓܸܣܬܲܢ ܗ݇ܘܹܐܠܹܗ ܚܲܕ݇ ܪܘܼܕܵܢܵܐ ܓܘܼܪܵܐ ܓܵܘ ܡܕܝܼܢܵܬܹ̈ܐ ܣܠܹܝܩ ܘܩܛܝܼܣܦܘܿܢ: ܒܥܕܵܢܵܐ ܕܐ݇ܬܹܐܠܗ݇ܘܿܢ ܛܵܪ̈ܘܿܕܹܐ ܠܸܥܩܵܪܵܐ ܥܸܕܬܵܐ: ܐܝܼܢܵܐ ܛܵܝܸܦܵܐ ܦܝܼܫܠܹܗܘ ܛܸܫܝܵܐ: ܘܦܸܣܩܵܐ ܦܝܼܫܠܹܗ ܚܘܼܡܝܵܐ: ܘܫܸܡܥܘܿܢ ܕܝܼܗܘܵܐ ܪܹܫܵܐ ܦܝܼܫܠܹܗ ܕܒܼܝܼܩܵܐ. ܘܗ݇ܘܹܐܠܹܗ ܐܲܬܪܵܐ ܩܵܐ ܒܝܼܫܹ̈ܐ: ܘܦܝܼܫܠܵܗ݁ ܡܠܝܼܬܵܐ ܥܸܕܬܵܐ ܥܘܼܪ̈ܠܹܐ ܡ݂ܢ ܓܹܒ ܩܵܠܵܐ ܕܨܠܘܿܬܵܐ ܘܕܙܲܗܝܘܼܬܵܐ ܦܝܵܫܵܐ ܗ݇ܘ̣ܵܐ ܫܸܡܥܝܵܐ ܒܗ݁ܝ ܥܕܵܢܵܐ ܩܵܠܵܐ ܕܫܓܼܘܼܫܝܵܐ ܘܙܕܥܘܼܬܵܐ: ܥܲܡ ܓܵܪܹܐ ܕܒܲܝܬܵܐ ܕܥܸܕܬܵܐ ܕܦܝܵܫܵܐ ܗ݇ܘܵܐ ܡܘܼܚܪܸܒܼܵܐ: ܘܡ݂ܢ ܓܸܒ ܥܸܛܪܵܐ ܕܒܸܣܡܹ̈ܐ: ܬܘܼܙ ܕܐܵܣܵܣܹ̈ܐ ܕܦܝܵܫܵܐ ܗ݇ܘ̣ܵܐ ܡܘܼܚܸܪܒܼܵܐ: ܘܡ݂ܢ ܓܸܒ ܥܸܛܪܵܐ ܕܒܸܣܡܹ̈ܐ: ܬܘܼܙ ܕܐܵܣܵܣܹ̈ܐ ܕܦܝܵܫܵܐ ܝܼܗ݇ܘ̣ܵܘ ܥܩܝܼܪܹ̈ܐ ܒܸܣܝܵܩܵܐ ܗ݇ܘ̣ܵܐ ܗܲܠ ܫܡܲܝܵܐ. ܘܗ݇ܘܹܐܠܹܗ ܫܥܵܫܵܐ ܓܘܼܪܵܐ ܘܪܲܬܪܲܬܵܐ ܠܟܠܵܝ ܥܹܕܵܬܹ̈ܐ ܕܒܟܠ ܕܘܼܟܬܵܐ.

ܘܒܐܲܢܹܐ ܟܠܹܗ ܠܵܐ ܗ݇ܘܹܐܠܗ݇ܘܿܢ ܪܸ̈ܦܝܹܐ ܪ̈ܵܥܵܘܵܬܹܐ: ܘܠܵܐ ܦܝܼܫܠܹܗ ܒܨܝܼܪܵܐ ܚܝܵܠ ܕܟܵܗܢܹ̈ܐ: ܘܠܵܐ ܙܸܐ ܒܨܸܪܹܗ ܫܪܵܪܵܐ ܕܛܵܝܸܦܵܐ: ܐܸܠܵܐ ܦܝܼܫܠܗ݇ܘܿܢ ܚܘܼܠܸܢܹ̈ܐ ܘܗ݇ܘܹܐܠܗ݇ܘܿܢ ܠܸܒܵܢܹ̈ܐ ܒܘܼܬ ܡܫܝܼܚܵܐ ܦܵܪܘܿܩܲܢ: ܘܙܘܼܪܒܸܢܘܿܢ ܕܲܠܩܘܼܒܼܠ ܪ̈ܵܕܘܿܦܹܐ: ܘܟܠ ܚܲܕ݇ ܐ݇ܢܵܫܵܐ ܡ݂ܢ ܒܢܘܿܢܹ̈ܐ ܘܠܵܐ ܪܲܚܩܸܢ ܗ݇ܘܵܐ. ܐܸܠܵܐ ܟܠ ܐ݇ܢܵܫܵܐ ܠܒܼܝܼܫܵܐ ܗ݇ܘ̣ܵܐ ܫܪܵܪܵܐ ܕܡܵܘܕܝܵܢܘܼܬܵܐ. ܘܕܵܒܼܩܝܼ ܝܼܗ݇ܘ̣ܵܘ ܪܘܼܡܚܵܐ ܕܨܠܝܼܒܹܗ ܕܝܼܫܘܿܥ. ܕܒܝܹܗ ܒܸܬ ܛܵܝܸܣ ܠܕܸܫܡܸܢܹ̈ܐ. ܘܓ̰ܘܼܡܸܥܠܹܗ ܛܘܼܒܼܵܢܵܐ ܫܸܡܥܘܿܢ ܠܟܠܹܗ ܛܵܝܸܦܵܐ. ܕܒܝܼܵܝ ܝܼܗ݃ܘ̣ܵܘ ܩܲܫܝܼܫܹ̈ܐ ܘܲܡܫܲܡܫܵܢܹ̈ܐ: ܘܗܘܼܡܙܸܡܠܹܗ ܥܲܡܵܝ ܘܝܘܼܗ݇ܒܼܵܝܠܹܗ ܓ̣ܘܼܪܐܵܬ ܘܐ݇ܡܸܪܹܗ ܐܸܠܵܝ: ܗ݇ܘܵܝܡܘܿܢ ܚܲܝܠܵܢܹ̈ܐ ܘܙܲܪ̈ܒܵܢܹܐ ܘܠܵܐ ܗܵܘܝܼܬܘܿܢ ܪܸ̈ܦܝܹܐ: ܠܐܵܗܵܐ ܦܝܼܫܠܵܘܟܼܘܿܢ ܩܸܪ̈ܝܹܐ (ܟ̰ܝܼܕܹ̈ܐ) ܘܓܘܼܒܝܼܠܵܘܟܼܘܿܢ ܩܵܐ ܓܵܢܵܘܟܼܘܿܢ: ܠܡܵܪܲܢ ܗ݇ܘܝܼܠܵܟܼܘܿܢ ܬܲܠܡܝܼܕܹ̈ܐ: ܓܲܫܩܘܿܢ ܒܒܵܨܘܼܪܘܼܬܹܗ ܒܘܼܬ ܕܝܼܵܘܟܼܘܿܢ: ܓܲܫܩܘܿܢ ܒܨܠܝܼܒܹܗ ܕܠܕܵܝܢܵܐ ܕܠܹܐ ܦܵܐܹܫ ܦܸܪܥܝܵܐ ܕܕܵܝܢܵܢܹ̈ܐ ܝ݇ܬܘܿܢ ܐܸܠܹܗ: ܣܵܒܵܒ ܡܵܢܝܼ ܝ݇ܠܹܗ ܕܡܵܨܹܐ ܕܦܲܪܥܸܐ ܕܵܝܢܵܐ: ܕܕܝܼܪܹܗ ܥܲܠܲܢ ܩܲܕܝܼܫܵܐ ܒܝܲܕ ܡܵܘܬܹܗ ܒܘܼܬ ܕܝܲܢ؟ ܗܲܕܟܼܵܐ ܒܸܬ ܦܲܪܥܲܚ ܠܹܗ ܐܲܝܟܼ ܚܲܝܠܲܢ: ܡܵܘܬܲܢ ܒܘܼܬ ܡܵܘܬܹܗ ܠܹܐ ܝ݇ܠܹܗ ܡܲܠܝܵܢܵܐ. ܓܲܫܩܘܿܢ ܒܢܒܼܝܹ̈ܐ ܐܵܢܝܼ ܕܩܛܝܼܠܹܐ ܝ݇ܢܵܐ ܘܒܫܠܝܼܚܹ̈ܐ ܐܵܢܝܼ ܕܪ̈ܓ̰ܝܼܡܹܐ ܝ݇ܢܵܐ: ܕܝܵܕܥܝܼܬܘܿܢ: ܕܐܲܠܵܗܵܐ ܠܹܐ ܝ݇ܠܹܗ ܙܲܒܘܼܢ: ܘܠܵܐ ܙܸܐ ܡܫܝܼܚܹܗ ܙܲܒܘܼܢ ܝܼܠܹܗ. ܐܸܠܵܐ ܒܣܵܡܵܐ ܗ݇ܘ̣ܵܐ ܕܡܲܚܙܸܐ ܚܲܝܠܹܗ ܒܙܲܒܘܪܢܹ̈ܐ: ܘܡܵܘܬܵܝ ܘܚܲܝ̈ܘܼܗܝ ܒܘܼܬ ܡܵܘܬܵܝ ܡܲܕܸܥ. ܐܸܢ ܡܲܪܡܝܼܬܘܿܢ ܥܲܝܢܹ̈ܐ ܕܠܸܒܵܘܵܬ̈ܵܘܟܼܘܿܢ ܠܟܸܣܠܹܗ: ܐܵܗܵܐ ܒܘܼܫ ܙܵܘܕܵܐ ܒܸܬ ܓܲܫܸܩ ܒܝܲܢ: ܘܝܵܗ݇ܒܸܠ ܚܲܝܠܵܐ ܠܙܲܒܘܼܢܘܼܬܲܢ: ܘܓܵܘ ܦܠܵܫܹ̈ܐ ܒܸܥܒܼܵܕܵܐ ܝ݇ܠܹܗ ܐܸܠܲܢ ܢܲܨܝܼܚܹ̈ܐ. ܐܘܼܦ ܐܵܗܵܐ ܣܵܘܓܘܼܠܝܼ ܗ݇ܘܝܼܠܵܘܟܼܘܿܢ ܒܵܠܲܕ: ܕܐܵܗܵܐ ܐܘܼܠܨܵܢܵܐ ܒܸܬ ܥܵܒܸܪ: ܘܒܸܬ ܐܵܬܝܼ ܙܲܒܼܢܹ̈ܐ ܕܡܲܢܝܵܚܬܵܐ. ܥܸܕܬܵܐ ܗܵܝ ܕܦܝܼܫܠܵܗ݁ ܥܩܝܼܪܬܵܐ: ܦܝܵܫܵܐ ܝ݇ܠܵܗ ܒܢܝܼܬܵܐ ܒܬܸܫܒܘܿܚܬܵܐ: ܘܣܘܼܩܸܠܬܵܐ ܒܟܠ ܫܘܼܦܪܹ̈ܐ: ܘܒܩܵܪܬܵܐ ܕܥܸܕܬܲܢ ܗ݁ܝ ܕܝܼܠܵܗ݁ ܒܐܲܪܥܵܐ: ܟܢܘܼܫܝܲܢ ܠܹܐ ܗܵܘܹܐ ܢܘܼܟܼܪܵܝܵܐ: ܡ݂ܢ ܣܵܒܵܒ ܒܸܢܝܵܢܵܐ ܕܝܲܢ ܝܼܠܹܗ ܓܵܘ ܫܡܲܝܵܐ ܕܠܹܐ ܝ݇ܠܹܗ ܥܒܼܝܼܕܵܐ ܝܲܢ ܬܘܼܪܨܵܐ ܒܐܝܼܕܵܬܹ̈ܐ ܐ݇ܢܵܫܵܝܹ̈ܐ. ܗ݁̈ܝ ܥܸܕܬܵܐ ܕܒܘܼܟܼܪܹ̈ܐ: ܠܹܐ ܝ݇ܠܵܗ݁ ܓܵܘ ܣܵܠܝܼܩ ܘܒܟܘܼܟܹ̈ܐ: ܐܸܠܵܐ ܓܵܘ ܐܘܿܪܸܫܠܸܡ ܕܒܫܡܲܝܵܐ. ܐܝܼܢܵܐ ܐܵܕܝܵܐ ܐܵܢܵܐ ܒܹܐܙܵܠܵܐ ܝ݇ܘܸܢ ܠܬܲܪܥܵܐ ܕܡܲܠܟܵܐ: ܘܠܸܐ ܝܵܕܥܸܢ ܡܘܼܕܝܼ ܒܸܬ ܩܵܘܘܸܡ ܡ݂ܢ ܒܵܬٔܪ ܕܝܝܼ: ܐܝܼܢܵܐ ܐܲܚܬܘܿܢ ܗܲܕܟܼܵܐ ܗܵܘܝܼܬܘܿܢ ܗܕܝܼܪܹ̈ܐ ܟܲܕ ܒܟܠ ܥܕܵܢܵܐ ܠܒܼܝܼܫܹ̈ܐ ܝ݇ܬܘܿܢ ܫܸܪܝܵܢܵܐ (ܡܵܕܵܠܵܐ) ܕܡܵܘܕܝܵܢܘܼܬܵܐ: ܕܐܸܢ ܐܵܗܵܐ ܦܠܵܫܵܐ ܡܘܼܪܝܸܙܵܐ ܝ݇ܠܹܗ ܕܲܠܩܘܼܒܼܠܵܘܟܼܘܿܢ: ܠܹܐ ܡܵܨܹܐ ܓܹܐܪܵܐ ܕܥܵܒܸܪ ܕܘܼܟܬܵܐ ܒܡܵܕܠܵܐ ܕܚܲܕ݇ ܚܲܕ݇ ܡܸܢܵܘܟܼܘܿܢ: ܐܸܠܵܐ ܓܹܐܪ̈ܵܝ ܦܵܝܫܝܼ ܫܡܝܼܛܹ̈ܐ ܒܡܵܕܵܠܵܘܟܼܘܿܢ.

ܡܸܢ݇ܕܪܸܫ݇ ܪܚܘܿܩܘܿܢ ܡ݂ܢ ܨܵܢܵܡܹ̈ܐ ܘܟ̰ܲܟܹ̈ܐ ܕܣܵܛܵܢܵܐ ܕܡܵܢܝܼܢܵܝܹ̈ܐ: ܘܡܲܪ̈ܩܝܘܿܢܹܐ: ܘܓܸܠܵܝܹ̈ܐ: ܘܡܲܢܩܵܪܹ̈ܐ: ܘܟܲܢܬܵܝܹ̈ܐ: ܘܡܲܝܕܵܝܹ̈ܐ: ܘܡ݂ܢ ܫܲܪܟܵܐ ܕܚܲܢܦܹ̈ܐ. ܘܦܪܘܿܫܘܿܢ ܠܵܗ݁ ܓܵܢܵܘܟܼܘܿܢ ܡ݂ܢ ܚܲܒܼܪܘܼܬܼܵܐ ܕܝܼܗܘܼܕܵܝܹ̈ܐ: ܐܵܢܝܼ ܕܐܝܼܢܵܐ ܕܸܫܡܸܢܹ̈ܐ ܕܒܵܒܵܐ: ܘܣܵܢܝܵܢܹ̈ܐ ܕܒܪܘܿܢܵܐ: ܘܕܲܠܩܘܼܒܼܠܵܝܹ̈ܐ ܕܪܘܼܚܵܐ ܕܩܘܼܕܫܵܐ: ܕܒܟܠ ܥܕܵܢܵܐ ܗ݇ܘܝܼܠܗ݇ܘܿܢ ܥܸܨܝܹ̈ܐ ܘܡܘܼܟܪܸܒܠܗ݇ܘܿܢ ܠܪܘܼܚܹܗ ܕܡܵܪܝܵܐ: ܐܲܝܟܼ ܕܒܸܣܗܵܕܵܐ ܝ݇ܠܹܗ ܐܹܫܲܥܝܵܐ ܢܒܼܝܼܵܐ. ܐܵܢܝܼ ܕܗܘܿܡܙܸܡܠܗ݇ܘܿܢ ܦܟ̰ܝܼܠܵܐ ܒܘܼܬ ܥܸܠܵܝܵܐ: ܐܲܝܟܼ ܕܒܸܣܗܵܕܵܐ ܝ݇ܠܹܗ ܩܲܕܝܼܫܵܐ ܕܵܘܝܼܕ ܡܙܲܡܪܵܢܵܐ. ܐܘܼܦ ܙܸܐ ܗܘܼܡܙܸܡܠܗ݇ܘܿܢ ܗܸܡܹܙܡܵܢܹ̈ܐ ܠܵܐ ܫܲܦܝܼܪܹ̈ܐ ܒܘܼܬ ܡܘܼܫܹܐ ܘܒܘܼܬ ܐܲܠܵܗܵܐ: ܐܲܝܟܼ ܡܘܼܕܝܼ

ܕܝ݇ܠܸܦܠܲܢ ܡ݂ܢ ܟܬܵܒܼܵܐ ܕܣܦܲܪ ܕܡܲܠܟܹ̈ܐ. ܐܵܢܝܼ ܕܩܛܸܠܗ݇ܘܿܢ ܠܢܒܼܝܼܹ̈ܐ: ܘܡܚܝܼܠܗ݇ܘܿܢ ܠܡܫܝܼܚܵܐ ܥܲܠ ܙܩܝܼܦܵܐ. ܘܪܓ̰ܸܡܠܗ݇ܘܿܢ ܠܫܠܝܼܚܹ̈ܐ. ܐܵܢܝܼ ܝ݇ܢܵܐ ܕܸܫܡܸܢܹ̈ܐ ܕܙܩܝܼܦܹܗ ܕܡܫܝܼܚܵܐ: ܘܒܲܚܸܠܵܢܹ̈ܐ ܒܦܘܼܪܩܵܢܵܐ ܕܓܸܢܣܵܐ ܕܒܢܲܝ̈ܢܵܫܵܐ. ܐܵܢܝܼ ܝ݇ܢܵܐ ܕܲܠܩܘܼܒܼܠ ܕܛܵܝܸܦܲܢ: ܘܣܵܦܝܵܢܹ̈ܐ ܕܪܹ̈ܓܵܘܵܬܹܐ ܕܐܲܠܵܗܵܐ. ܢܛܘܿܪܘܿܢ ܓܵܢܵܘܟܼܘܿܢ ܡ݂ܢ ܟܠܵܝ ܐܲܢܹܐ ܬܵܘܕܝܼܵܬܹ̈ܐ: ܐܲܝܟܼ ܩܲܕ݇ܡܵܝܬܵܐ ܐ݇ܡܸܪܝܼ ܐܸܠܵܘܟܼܘܿܢ. ܐܝܼܢܵܐ ܒܘܼܫ ܙܵܘܕܵܐ ܗ݇ܘܵܝܡܘܿܢ ܗܸܫܝܲܪ ܡ݂ܢ ܚܸܠܛܘܼܢܝܵܐ ܘܕܘܼܓܠܵܐ ܘܡ݂ܢ ܝܘܼܠܦܵܢܹܗ ܕܡܲܪܩܝܼܘܿܢ: ܣܵܒܵܒ ܐܲܢܹܐ ܬܸܪܘܵܝ ܕܲܣܬܹ̈ܐ: ܟܲܠܒܹ̈ܐ ܝ݇ܢܵܐ ܨܪ̈ܝܼܚܹܐ: ܐܝܼܢܵܐ ܠܝܼܗܘܼܕܵܝܹ̈ܐ: ܬܸܪܘܵܝ: ܢܒܼܝܼܹ̈ܐ ܘܫܠܝܼܚܹ̈ܐ: ܗܲܡܙܸܡܵܢܹ̈ܐ ܒܪܘܼܚܵܐ ܕܐܲܠܵܗܵܐ: ܩܸܪܝܵܝ ܠܗ݇ܘܿܢ ܟܲܠܒܹ̈ܐ. ܐܹܫܲܥܝܵܐ ܢܒܼܝܼܵܐ ܐ݇ܡܸܪܹܗ: ܟܲܠܒܹ̈ܐ ܝ݇ܢܵܐ ܛܲܡܲܥܟܵܪܹ̈ܐ ܕܓܵܢܵܝ. ܘܫܠܝܼܚܵܐ ܡܲܠܘܼܦܲܢ ܝ݇ܠܹܗ ܕܗܵܘܲܚ ܗܸܫܝܲܪ ܡܸܢܵܝ ܟܲܕ ܒܐܹܡܵܪܵܐ ܝ݇ܠܹܗ: ܗܘܵܝܡܘܿܢ ܗܸܫܝܲܪ ܡ݂ܢ ܟܲܠܒܹ̈ܐ. ܘܫܲܦܝܼܪܬܵܐ ܗ݇ܘ̣ܵܐ ܘܠܵܚܘܿܡܬܵܐ ܕܦܝܼܫܠܗ݇ܘܿܢ ܩܸܪ̈ܝܹܐ ܟܲܠܒܹ̈ܐ: ܣܵܒܵܒ ܨܪܸܚܠܗ݇ܘܿܢ ܥܲܠ ܢܒܼܝܼܹ̈ܐ ܘܩܛܝܼܠܵܝ ܠܗ݇ܘܿܢ. ܨܪܸܚܠܗ݇ܘܿܢ ܘܟܘܼܠܒܸܢܘܿܢ ܥܲܠ ܡܫܝܼܚܵܐ ܘܡܚܝܼܠܗ݇ܘܿܢ ܥܲܠ ܙܩܝܼܦܵܐ: ܘܨܪܸܚܠܗ݇ܘܿܢ ܥܲܠ ܫܠܝܼܚܹ݂̈ܐ ܘܪܓ̰ܝܼܡܵܝܠܗ݇ܘܿܢ. ܗܲܕܟܼܵܐ ܐܘܼܦ ܡܵܢܝܼܢܵܝܹ̈ܐ ܒܓܘܼܕܵܦܲܝ̈ ܒܸܢܝܵܨܵܐ ܝ݇ܢܵܐ ܠܦܲܓܼܪܹܗ ܕܡܫܝܼܚܵܐ: ܘܥܲܠܕܘܼܝܸܐ ܝ݇ܢܵܐ ܐܸܠܹܗ ܘܠܹܐ ܝ݇ܢܵܐ ܡܲܚܫܘܼܚܹܐ ܠܫܩܵܠܬܵܐ ܕܩܘܼܪܒܵܢܵܐ ܘܠܩܝܵܡܬܵܐ ܘܠܦܘܿܪܩܵܢܵܐ: ܐܘܼܦ ܥܲܠ ܒܲܪܝܵܢܵܐ ܕܦܲܓܼܪܹ̈ܐ ܘܓܵܢܵܬܹ̈ܐ ܩܘܼܫܕܸܪܘܿܢ ܒܨܪܝܼܚܘܼܬܵܝ: ܕܝܼܗ݇ܘ̣ܵܘ ܒܕܵܡܵܝܬܵܐ ܕܟܲܠܝܵܐ ܨܪܝܼܚܵܐ ܕܟܹܐ ܢܵܝܸܨ ܡܵܪܹܗ ܗܲܕܟܼܵܐ ܐܵܦ ܡܲܪ̈ܩܝܘܿܢܹܐ: ܕܠܵܐ ܡܨܝܼܠܗ݇ܘܿܢ ܕܚܲܙܕܸܓܝܼ ܠܡܵܪܵܝ ܘܠܒܲܪܝܵܢܵܝ: ܕܥܸܠܵܝܵܐ ܗ݇ܘܵܐ ܡ݂ܢ ܟܝܵܢܹܗ: ܗܵܐ ܒܝܲܕ ܕܓܘܼܕܵܦܲܝ̈ ܒܸܢܒܼܵܚܵܐ ܝ݇ܢܵܐ ܒܝܹܗ: ܗܲܕܟܼܵܐ ܐܲܢܹܐ ܕܐ݇ܡܸܪܝܪ ܐܸܠܵܘܟܼܘܿܢ ܘܩܵܡ ܥܵܒܼܕܸܢܵܘܟܼܘܿܢ ܗܸܫܝܲܪ: ܐܲܝܟܼ ܒܵܒܵܐ ܕܟܹܐ ܥܵܒܸܕ ܗܸܫܝܲܪ ܠܒܢܘܿܢ̈ܘܼܗܝ: ܢܛܘܿܪܘܿܢ ܦܘܼܩܕܵܢܹ̈ܐ ܕܡܵܪܲܢ: ܕܢܵܛܸܪܵܘܟܼܘܿܢ: ܡܲܚܒܘܿܢ ܠܡܵܢ ܕܗ݁ܘ ܩܵܡ ܡܲܚܸܒܠܲܢ: ܘܓܵܢܹܗ ܣܘܼܦܝܼܠܹܗ ܒܘܼܬ ܕܝܲܢ: ܕܡܲܚܝܼܠܲܢ ܒܝܲܕ ܡܵܘܬܹܗ: ܗ݇ܘܝܼܡܘܿܢ ܗܸܫܝܲܪ ܒܗܲܝܡܵܢܘܼܬܵܐ ܕܬܠܝܼܬܵܝܘܼܬܵܐ: ܕܒܵܒܵܐ ܘܕܒܪܘܿܢܵܐ ܘܕܪܘܼܚܵܐ ܕܩܘܼܕܫܵܐ: ܒܟܠܵܗ݁ ܓܵܢܵܘܟܼܘܿܢ: ܘܩܲܒܠܗ݇ܘܿܢ ܟܠ ܚܲܫܹ̈ܐ ܩܸܫܝܹ̈ܐ ܘܡܵܘܬܹ̈ܐ ܡܲܪܝܼܪܹ̈ܐ: ܒܘܼܬ ܚܵܬܸܪ ܕܐܵܗܵܐ ܗܲܝܡܵܢܘܼܬܼܵܐ. ܘܗܵܘܝܼܬܘܿܢ ܒܸܕܟܼܵܪܵܐ ܠܗ݁ܝ ܕܐ݇ܡܸܪܹܗ ܫܠܝܼܚܵܐ: ܣܲܪܸܣܬ ܝ݇ܠܵܗ݁ ܗܹܡܸܙܡܲܢ ܕܚܫܸܚܬܵܐ ܝ݇ܠܵܗ݁ ܠܩܵܒܲܠܬܘܼܗ݁: ܐܸܢ ܡܵܝܬܲܚ ܥܲܡ ܡܫܝܼܚܵܐ: ܐܘܼܦ ܥܲܡܹܗ ܒܸܬ ܚܵܝܲܚ. ܘܐܸܢ ܩܲܒܠܲܚ ܓ̰ܘܼܢܓ̰ܵܪܵܐ: ܐܘܼܦ ܥܲܡܹܗ ܒܸܬ ܥܵܒܼܕܵܚ ܡܲܠܟܘܼܬܼܵܐ. ܘܐܸܢ ܟܵܦܪܲܚ ܒܝܹܗ: ܐܘܼܦ ܗ݁ܘ ܒܸܬ ܟܵܦܸܪ ܒܝܲܢ. ܘܐܸܢ ܠܵܐ ܡܗܲܝܡܸܢܲܚ ܒܝܹܗ: ܗ݁ܘ ܒܗܲܝܡܵܢܘܼܬܹܗ ܒܸܬ ܟܵܠܹܐ. ܣܵܒܵܒ ܗ݁ܘ ܠܹܐ ܡܵܨܹܐ ܕܟܵܦܸܪ ܒܓܵܢܹܗ. ܐܲܢܹܐ ܩܵܡ ܥܵܒܼܕܸܢܵܟܼܘܿܢ ܗܸܫܝܲܪ ܒܐܵܗܵܐ ܙܲܒܼܢܵܐ. ܟܲܕ ܒܵܠܵܕ ܝ݇ܘܸܢ ܕܡܸܢ݇ܕܪܸܫ ܦܲܐܬܝܼ ܠܹܐ ܚܵܙܝܼܬܘܿܢ. ܡܣܵܒܵܒ ܒܘܼܬ ܚܵܬܸܪ ܛܵܝܸܦܵܐ ܕܡܫܝܼܚܵܐ: ܘܒܘܼܬ ܗܲܝܡܵܢܘܼܬܵܐ ܕܒܐܲܠܵܗܵܐ ܗܕܝܼܪܵܐ ܝ݇ܘܸܢ ܦܵܝܫܸܢ ܦܪܝܼܡܵܐ. ܘܠܕܐܵܗܵܐ ܡܵܢܝܼ ܝ݇ܠܹܗ ܕܡܲܚܫܸܚܠܝܼ: ܐܸܠܵܐ ܐܸܢ ܪ̈ܚܡܘܼܗܝ ܕܝܼܫܘܿܥ ܡܫܝܼܚܵܐ ܡܵܪܲܢ؟ ܗ݁ܘ ܒܸܬ ܗܵܘܹܐ ܥܲܡܵܘܟܼܘܿܢ: ܐܘܼܦ ܥܲܡܲܢ ܒܨܠܵܘܵܬ̈ܵܘܟܼܘܿܢ: ܠܥܵܠܲܡ ܥܵܠܡܝܼܢ: ܐܵܡܹܝܢ.

ܒܥܸܕܵܢܵܐ ܕܗ݁ܘ ܟܸܢܫܵܐ ܫܡܸܥܠܗ݇ܘܿܢ ܠܐܲܢܹ̈ܐ ܗܹܡܸܙܡܵܢܹ̈ܐ: ܟܠܵܝ ܒܵܟܼܝܼ ܝܼܗ݇ܘܵܘ ܒܚܲܫܵܐ ܒܘܼܬ ܦܘܼܪܫܵܢܹܗ ܕܪܵܥܝܵܐ ܪܥܝܼܫܵܐ: ܘܒܘܼܬ ܚܙܘܼܩܝܹܗ ܕܡܕܲܒܪܵܢܵܐ ܚܲܦܛܵܢܵܐ: ܒܘܼܬ ܫܘܼܢܵܝܵܐ ܕܚܲܝܠܵܢܵܐ ܘܨܵܚ: ܘܒܘܼܬ ܡܹܐܙܲܠܬܵܐ ܕܡܲܠܦܵܢܵܐ ܥܵܩܸܠܕܲܪ: ܘܒܘܼܬ ܦܸܠܚܵܢܹܗ ܕܙܲܕܝܼܩܵܐ ܘܩܲܕܝܼܫܵܐ: ܘܒܘܼܬ ܒܵܠܵܕܘܼܬܵܝ ܕܡ݂ܢ ܒܵܒܵܐ ܒܲܣܝܼܡܵܐ ܘܡܪܲܚܡܵܢܵܐ. ܘܟܠܵܝ ܘܵܝܵܐ ܝܵܗ݇ܒܼܝܼ ܝܼ݇ܘܵܘ ܠܓܵܢܵܝ ܟܲܕ ܐܵܡܪܝܼ: ܕܘܵܝ ܐܸܠܲܢ: ܕܫܸܡܥܘܿܢ ܟܹܐܦܵܐ ܦܝܵܫܵܐ ܝ݇ܠܹܗ ܫܩܝܼܠܵܐ ܡܸܢܲܢ: ܒܝܼܘܼܟܼ ܚܙܝܼܠܲܢ ܠܫܠܝܼܚܹ̈ܐ: ܡܵܢܝܼ ܝ݇ܠܹܗ ܕܝܵܗ݇ܒܸܠܲܢ ܐܲܦܸܣܩܘܿܦܵܐ ܐܲܝܟܼ ܕܝܘܼܟܼ؟ ܒܘܼܫ ܙܵܘܕܵܐ ܦܵܫܡܝܼ ܝ݇ܘ̣ܵܘ ܒܒܸܟܼܝܵܐ: ܕܫܡܸܥܠܗ݇ܘܿܢ ܡܸܢܹܗ ܘܐ݇ܡܸܪܹܗ: ܕܡܸܢ݇ܕܪܸܫ݇ ܦܲܐܬܝܼ ܠܹܐ ܚܵܙܝܼܬܘܿܢ: ܕܗܕܝܼܪܵܐ ܝ݇ܘܸܢ ܕܦܵܝܫܸܢ ܕܒܼܝܼܚܵܐ. ܗܵܝܓܵܗ݁ ܛܘܼܒܼܵܢܵܐ ܫܸܡܥܘܿܢ ܢܓ̰ܸܒܼܠܹܗ ܒܝܼܵܝ ܘܡܘܼܫܬܸܩܵܝܠܹܗ. ܩܘܼܪܒܢܵܝܠܹܗ ܠܟܸܣܠܹܗ: ܘܡܲܚܸܒ ܗ݇ܘܵܐ ܠܗ݇ܘܿܢ ܘܚܵܦܸܩ ܗ݇ܘܵܐ ܠܗ݇ܘܿܢ. ܘܨܘܼܠܝܼܠܹܗ ܨܠܘܿܬܵܐ ܘܡܘܿܪܸܡܠܹܗ ܐܝܼܕܹ̈ܗ ܘܒܘܼܪܟܼܵܝ ܠܹܗ ܘܐ݇ܡܸܪܹܗ: ܨܠܝܼܒܹܗ ܕܡܵܪܲܢ ܒܸܬ ܗܵܘܹܐ ܢܵܛܘܿܪܵܐ ܠܛܵܝܸܦܹܗ ܕܝܼܫܘܿܥ: ܘܫܠܵܡܹܗ ܕܐܲܠܵܗܵܐ ܒܸܬ ܗܵܘܹܐ ܥܲܡ ܪܹ̈ܓܵܘܵܬܹܐ ܕܐܲܠܵܗܵܐ: ܘܒܸܬ ܡܵܩܘܸܐ ܠܸܒܵܘܵܬ̈ܵܘܟܼܘܿܢ ܒܗܲܝܡܵܢܘܼܬܹܗ ܕܡܫܝܼܚܵܐ: ܒܥܝܼܩܘܼܬܵܐ ܘܒܡܲܢܝܵܚܬܵܐ: ܒܚܲܝܹ̈ܐ ܘܒܡܵܘܬܵܐ: ܘܐܵܕܝܼܵܐ ܘܟܠ ܥܸܕܵܢܵܐ ܘܠܥܵܠܲܡ ܥܵܠܡܝܼܢ. ܘܒܓ̰ܲܠܕܘܼܬܵܐ ܬܘܼܡܸܡܠܹܗ ܛܘܼܒܼܢܵܐ ܫܸܡܥܘܿܢ ܨܠܘܿܬܹܗ: ܘܐ݇ܙܸܠܹܗ ܠܒܹܝܬܼ ܗܘܼܙܵܝܹ̈ܐ: ܗ݁ܘ ܘܐ݇ܢܵܫܹ̈ܐ ܡ݂ܢ ܩܫܝܼܫܹ̈ܐ: ܕܐܵܙܠ݇ܝܼܢ ܠܬܲܪܥܵܐ ܕܡܲܠܟܵܐ: ܘܒܐܵܢܝܼ ܝܵܘܡܵܢܹ̈ܐ ܟܹܐ ܗܲܟܡܝܼ ܝܼܗ݇ܘ̣ܵܘ ܓܲܕܝܲܗ݇ܒܼ ܘܣܵܒܼܝܼܢܵܐ ܐܲܦܸܣܩܘܿܦܹ̈ܐ ܕܒܹܝܬܼ ܠܵܦܵܛ: ܘܝܘܿܚܲܢܵܢ ܐܲܦܸܣܩܘܿܦܵܐ ܕܗܘܿܪܡܝܼܙܕ ܐܲܪܕܫܝܼܪ: ܘܒܘܿܠܝܼܕܲܥ ܐܲܦܸܣܩܘܿܦܵܐ ܕܦܪܵܬ: ܘܝܘܿܚܲܢܵܢ ܐܲܦܸܣܩܘܿܩܵܐ ܕܐܲܬܪܵܐ ܕܡܲܝܫܵܢ: ܪܵܒܵܐ ܡ݂ܢ ܩܲܫܝܼܫܹ̈ܐ ܘܲܡܫܲܡܫܵܢܹ̈ܐ: ܘܦܝܼܫܠܗ݇ܘܿܢ ܐ݇ܣܝܼܪܹ̈ܐ ܘܐ݇ܬܹܐܠܗ݇ܘܿܢ ܠܬܲܪܥܵܐ ܕܡܲܠܟܵܐ ܠܒܹܝܬܼ ܗܘܼܙܵܝܹ̈ܐ ܒܐܲܬܼܪܵܐ ܕܠܹܕܵܢ: ܗܲܪ ܗ݁ܘ ܫܵܒܼܘܿܪ ܒܸܢܝܘܼܗܝ ܗ݇ܘ̣ܵܐ ܚܲܕܬܵܐܝܼܬ. ܘܪܵܒܵܐ ܝܲܚܣܝܼܪܹ̈ܐ ܡ݂ܢ ܥܪܲܒܼ ܘܡ݂ܢ ܫܝܼܓܼܵܪ ܘܡ݂ܢ ܒܹܝܬܼ ܙܲܒܼܕܲܝ ܘܐܲܪܙܘܿܢ ܘܩܲܪܕܘܿ ܘܐܲܪܡܸܢ ܘܡ݂ܢ ܕܘܼܟܵܢܹ̈ܐ ܦܪ̈ܝܼܫܹܐ ܡܘܼܬܸܒܼܵܝܠܹܗ ܒܝܹܗ. ܘܒܐܵܢܝܼ ܝܵܘܡܵܢܹ̈ܐ ܕܦܝܼܫܠܹܗ ܐ݇ܣܝܼܪܵܐ ܘܦܝܼܫܠܹܗ ܫܘܼܕܪܵܐ ܩܲܕܝܼܫܵܐ ܫܸܡܥܘܿܢ ܩܵܬܼܘܿܠܝܼܩܵܐ: ܡ݂ܢ ܒܹܝܬܼ ܐܵܪ̈ܵܡܵܝܹܐ ܒܐܲܬܼܪܵܐ ܕܠܹܕܵܢ.

ܐܝܼܢܵܐ ܐܘܼܦ ܡܚܝܼܠܗ݇ܘܿܢ ܕܲܠܩܘܼܒܼܠܹܗ ܕܚܲܕ݇ ܓܲܒܼܪܵܐ ܪܹܫܵܐ ܕܘܲܟܝܼܠܹ̈ܐ ܕܡܲܠܟܵܐ: ܕܝܼܗܘܵܐ ܕܲܪܓܹܗ ܐܲܪܙܒܸܕ. ܘܐ݇ܡܸܪܘܿܢ ܠܡܲܠܟܵܐ ܒܘܼܬ ܕܝܹܗ: ܕܟܪܸܣܛܝܵܢܵܐ ܝ݇ܠܹܗ. ܘܒܓ̰ܲܠܕܘܼܬܵܐ ܦܘܼܩܵܕܠܹܗ ܡܲܠܟܵܐ: ܘܦܝܼܫܠܹܗ ܩܸܪܝܵܐ ܩܵܕ݇ܡܘܼܗܝ. ܘܐ݇ܡܸܪܹܗ ܐܸܠܹܗ ܡܲܠܟܵܐ: ܓܘܼܗܫܬܵܐܙܵܕ: ܘܐ݇ܡܸܪܹܗ ܓܘܼܗܫܬܵܐܙܵܕ: ܗܵܐ ܐܵܢܵܐ ܪܹܓܘܼܟܼ ܡܲܠܟܵܐ ܚܵܝܹܐ ܠܥܵܠܲܡ: ܘܟܵܠܝܵܢܵܐ ܠܐܲܒܲܕ: ܘܐ݇ܡܸܪܹܗ ܡܲܠܟܵܐ: ܐܵܗܵܐ ܝ݇ܠܵܗ ܕܘܼܙܘܼܬܘܼܟܼ ܠܟܸܣܠܝܼ؟ ܠܹܐ ܝ݇ܘܸܬ ܗ݇ܘ̣ܵܐ ܓܘܼܪܵܐ ܕܟܠܵܝ ܘܲܟܝܼܠܹ̈ܐ؟ ܠܵܐ ܗܵܐ ܐܵܢܵܐ ܘܒܵܒܝܼ ܡܘܼܙܝܸܕܠܲܢ ܐܝܼܩܵܪܘܼܟܼ ܘܩܵܡ ܓܲܪܘܸܣܲܚܠܘܼܟܼ؟ ܓ̰ܘܼܘܸܒܠܹܗ ܓܘܼܗܫܬܵܐܵܙܕ ܘܐ݇ܡܸܪܹܗ: ܗܲܕܟܼܵܐ ܝ݇ܠܵܗ ܝܵܐ ܡܲܠܟܵܐ ܛܵܒܼܵܐ: ܐܲܝܟܼ ܡܘܼܕܝܼ ܕܒܐܹܡܵܪܵܐ ܝ݇ܠܹܗ ܡܲܠܟܵܐ. ܐܝܼܢܵܐ ܩܵܐ ܒܘܼܬ ܡܘܼܕܝܼ ܗܲܕܟܼܵܐ ܒܐܹܡܵܪܵܐ ܝ݇ܠܹܗ؟ ܐܵܡܸܪ ܐܸܠܹܗ ܡܲܠܟܵܐ݊ ܫܡܲܥܝܵܐ ܫܡܸܥܠܝܼ ܒܘܼܬ ܕܝܼܘܼܟܼ ܕܟܪܸ̈ܣܛܝܵܢܹܐ ܝ݇ܘܤܬ݁. ܐܵܡܸܪ ܐܸܠܹܗ ܓܘܼܫܬܵܐܙܵܕ: ܗܲܕܟܼܵܐ ܝ݇ܠܵܗ ݁ ܡܲܠܟܵܐ ܛܵܒܼܵܐ ܠܥܵܠܲܡ ܚܵܝܹܐ: ܗܵܕܟܼܵܐ ܝ݇ܠܵܗ݁ ܒܲܫܪܵܪܵܐ: ܐܲܝܟܼ ܕܫܡܸܥܠܘܼܟܼ ܡܲܠܟܵܐ ܕܡܲܠܟܹ̈ܐ: ܟܪܸܒܠܹܗ ܡܸܢܲܝܗܝ ܡܲܠܟܵܐ ܘܐ݇ܡܸܪܹܗ ܐܸܠܹܞ: ܐܵܕܝܵܐ ܐܸܢ ܥܵܒܼܕܸܬ݁ ܪܸܙܵܝܝܼ ܘܣܵܓܼܕܸܬ ܠܫܸܡܫܵܐ ܕܐܲܠܵܗܵܐ: ܘܐܸܢ ܠܵܐ: ܒܓ̰ܲܠܕܘܼܬܵܐ ܒܸܬ ܦܵܝܫܸܬ ܩܛܝܼܠܵܐ. ܘܚܘܼܕܪܝܼܠܗ݇ܘܿܢ ܐܸܠܹܗ ܓܘܼܪ̈ܵܢܹܐ ܕܡܲܠܟܵܐ ܘܟܠܵܝ ܡܗܘܼܡܢܹ̈ܐ ܚܲܒܼܪ̈ܘܵܬܘܼܗܝ: ܠܘܼܒܸܠܗ݇ܘܿܢ ܠܚܲܕ݇ ܓܸܒܵܐ: ܘܥܘܼܠܕܝܼܠܗ݇ܘܿܢ ܒܦܲܪܦܲܠܬܵܐ ܕܕܘܼܓܠܵܐ ܘܐ݇ܡܸܪܘܼܢ ܐܸܠܹܗ: ܥܒܼܘܿܕ ܪܸܙܵܝܵܐ ܕܡܲܠܟܵܐ ܩܵܐ ܚܲܕ݇ ܥܸܕܵܢܵܐ ܟܪܝܼܬܵܐ: ܡ݂ܢ ܒܵܬ݇ܪ ܗܵܕܵܐ ܟܠܝܼ ܒܬܵܘܕܝܼܬܘܼܟܼ: ܘܡܘܼܨܝܸܬܠܹܗ ܓܘܼܫܬܐܵܙܵܕ ܠܬܲܚܡܵܢܡܬܵܝ ܘܪܵܥܝܵܝ: ܘܦܝܼܫܠܹܗ ܕܒܼܝܼܩܵܐ ܓܵܘ ܓܲܪܕܵܐ ܕܥܲܠܕܵܝܬܵܝ: ܘܥܒܼܸܕܠܹܗ ܪܸܙܵܝܵܐ ܕܡܲܠܟܵܐ..

ܘܗ݇ܘܹܐܠܵܗ݁ ܚܲܕ݇ ܝܵܘܡܵܐ: ܘܡܛܝܼܠܹܗ ܢܲܨܝܼܚܵܐ ܫܸܡܥܘܿܢ ܠܒܹܝܬܼ ܗܘܼܙܵܝܹ̈ܐ ܠܐܲܬܪܵܐ ܕܠܹܕܵܢ. ܘܗܲܪ ܒܘܼܬ ܐܲܢܹܐ ܕܦܝܼܫܠܹܗ ܕܒܼܝܼܩܵܐ ܒܝܼܵܝ ܓܘܼܫܬܵܐܵܙܕ ܦܝܼܫܠܹܗ ܫܸܡܥܝܵܐ ܒܩܸܫܘܼܬܵܐ: ܘܟܲܕ ܫܡܸܥܠܹܗ ܓܘܼܫܬܐܵܙܵܕ: ܕܐ݇ܬܹܐܠܹܗ ܫܸܡܥܘܿܢ ܐܲܦܸܣܩܘܿܦܵܐ ܩܵܬܼܘܿܠܝܼܩܵܐ. ܘܥܒܸܪܘܿܢ ܘܐ݇ܡܸܪܘܿܢ ܠܫܸܡܥܘܿܢ: ܕܗܵܐ ܓܘܼܫܬܵܐܵܙܵܕ ܕܝܼܪܠܹܗ ܥܲܠ ܬܲܪܥܵܐ: ܘܒܣܵܡܵܐ ܝ݇ܠܵܗ݁ ܕܥܵܒܸܪ ܩܵܕ݇ܡܘܼܟܼ: ܘܐ݇ܡܸܪܹܗ ܫܸܡܥܘܿܢ: ܕܒܼܘܿܪܘܿܢ ܠܹܗ ܬܲܪܥܵܐ: ܘܠܵܐ ܫܵܒܼܩܝܼܬܘܿܢ ܠܹܗ ܕܥܵܒܸܪ ܠܟܸܣܠܝܼ: ܠܐܵܗܵܐ ܕܟܦܸܪܹܗ ܒܡܫܝܼܚܵܐ ܡܫܝܼܚܵܐ ܡܵܪܝܼ: ܘܫܒܸܩܠܹܗ ܠܐܲܠܵܗܵܐ ܕܗܲܩܘܼܬܵܐ ܕܝܼܗ݇ܘܵܐ ܕܫܪܵܪܵܐ. ܘܫܘܼܚܠܸܦܠܹܗ ܠܒܵܪܝܵܢܵܐ ܒܒܪܝܼܬܹܗ ܘܠܒܵܪܘܿܝܵܐ ܒܒܸܪ̈ܝܵܬܘܼܗܷ: ܘܠܡܲܠܟܵܐ ܕܡܲܠܟܘܼܬܹܗ ܠܐܵܒܲܕ: ܒܡܲܠܟܵܐ ܕܚܵܝܵܐ ܝ݇ܠܹܗ ܒܝܵܘܡܵܢ̈ܘܼܗܝ: ܘܠܡܵܪܵܐ ܕܡܲܠܲܐܟܹ̈ܐ ܒܐ݇ܢܵܫܹ̈ܐ ܕܒܸܣܪܵܐ: ܘܠܗ݁ܘ ܕܝܼܠܹܗ ܚܲܝܵܐ ܒܐܝܼܬܘܬܹܗ ܡ݂ܢ ܫܘܼܪܵܝܵܐ ܒܒܲܪܢܵܫܵܐ ܡܵܝܘܿܬܵܐ: ܘܠܗ݁ܘ ܕܠܹܐ ܝ݇ܠܹܗ ܪܸܓܼ݇ܫܵܢܵܐ ܒܚܲܫܵܐ ܘܠܵܐ ܫܲܚܠܸܦܵܢܵܐ: ܒܡܲܠܟܵܐ ܪܸܓܼ݇ܫܵܢܵܐ ܒܚܲܫܵܐ ܘܫܲܚܠܸܦܵܢܵܐ ܘܚܲܪܒܼܵܢܵܐ: ܫܘܼܕܸܪܹܗ ܓܘܼܫܬܵܙܵܕ ܠܫܸܡܥܘܿܢ ܘܐ݇ܡܸܪܹܗ: ܗܲܒܼܠ ܦܘܼܩܕܵܢܵܐ ܡܵܪܝܼ ܕܡܲܥܒܼܪܝܼܠܝܼ ܩܵܕ݇ܡܘܪܟܼ: ܘܐܵܢܵܐ ܦܲܪܦܘܿܠܸܐ ܝ݇ܘܸܢ ܒܐܲܒܼܵܗܘܼܬ̈ܘܼܟܼ: ܕܵܐܟܼܝܼ ܩܘܼܘܸܡܠܵܐ ܐܵܗܵܐ ܒܝܼܫܬܵܐ ܓܘܼܪܬܵܐ. ܗܲܪ ܐܲܢܹܐ ܗܹܡܸܙܡܵܢܹ̈ܐ ܦܝܼܫܠܗ݇ܘܿܢ ܐ݇ܡܝܼܪܹܐ ܩܵܐ ܫܸܡܥܘܿܢ: ܘܫܸܡܥܘܿܢ ܠܵܐ ܝܘܼܗ݇ܒܸܠܹܗ ܚܲܕ݇ ܢܝܼܫܲܢܩܵܐ ܕܥܵܒܸܪ ܩܵܕ݇ܡܘܼܗܝ. ܐܝܼܢܵܐ ܡܸܢ݇ܕܪܸܫ݇ ܫܘܼܕܸܪܹܗ ܓܘܼܫܬܐܵܙܵܕ ܓܵܗܵܐ ܕܬܪܹܝܢ ܘܐ݇ܡܸܪܹܗ ܐܸܠܹܗ: ܦܲܚܸܠ ܠܵܗ݁ ܚܛܝܼܬܝܼ ܐܵܗܵܐ ܓܵܗܹܐ: ܘܡܸܢ݇ܕܪܸܫ݇ ܠܹܐ ܥܵܒܼܕܸܢܵܗ݁: ܓ̰ܘܼܘܸܒܠܹܗ ܫܸܡܥܘܿܢ ܫܘܼܕܸܪܹܗ: ܠܹܐ ܦܲܚܠܸܐ ܐܸܠܘܼܟܼ ܠܚܛܝܼܬܵܐ: ܐܘܼܦ ܠܵܐ ܓܢܵܗܵܐ ܒܸܬ ܦܵܚܠܸܢܵܐ ܐܸܠܘܼܟܼ ܟܦܘܼܪܝܵܐ ܕܥܒܼܸܕܠܘܼܟܼ: ܘܠܵܐ ܚܛܝܼܬܵܐ: ܒܐܲܠܵܗܘܼܟܼ ܟܦܸܪܘܼܟܼ: ܡܵܢܝܼ ܝ݇ܠܹܗ ܕܦܵܚܠܘܼܟܼ؟ ܡ݂ܢ ܡܫܝܼܚܵܐ ܡܲܚܝܼܵܢܘܼܟܼ ܕܸܪܘܼܟܼ: ܡܵܢܝܼ ܝ݇ܠܹܗ ܡ݂ܢ ܒܢܲܝ̈ܢܵܫܵܐ ܡܵܝܘܿܬܹ̈ܐ ܕܡܵܨܹܐ ܕܡܲܚܸܐ ܡܝܼܬܘܼܬܘܼܟܼ؟ ܐܲܝܟܵܐ ܝ݇ܠܵܗ݁ ܗܲܝܡܵܢܘܼܬܘܼܟܼ: ܗ݁ܝ ܕܒܝܼܘܼܗ݁ ܕܵܝܸܡ ܝܼܗ݇ܘܵܐ ܢܘܼܩܙܵܐ ܕܫܘܼܦܪܘܼܟܼ؟ ܕܡ݂ܢ ܩܵܠܵܐ ܕܥܝܼܩܘܼܝܵܬܹ̈ܐ ܕܙܕܸܥܠܘܼܟܼ ܘܛܘܼܠܸܩܠܘܼܟܼ ܚܲܝ̈ܘܼܟܼ ܒܚܕܵܐ ܣܵܥܲܬ ܠܦܘܼܪܥܵܢܵܐ ܒܝܼܫܵܐ ܚܫܝܼܫܵܐ ܝ݇ܘܸܬ݁: ܣܵܒܵܒ ܙܕܸܥܠܵܗ݁ ܚܙܵܝܬܘܼܟܼ ܡ݂ܢ ܚܸܩܪܵܐ ܥܵܒܼܪܵܢܵܐ: ܘܠܵܐ ܙܕܸܥܠܘܼܟܼ ܡ݂ܢ ܗܵܘ݁ ܚܸܩܪܵܐ ܘܩܲܕܝܼܫܵܐ: ܕܝܼܠܹܗ ܡܲܠܟܵܐ ܛܸܫܝܵܐ ܕܟܠ ܥܵܠܡܹ̈ܐ: ܕܡ݂ܢ ܚܲܝܠܵܐ ܕܚܸܩܪܹܗ ܡܲܠܲܐܟܹ̈ܐ ܘܣܪ̈ܵܦܹܐ ܠܹܐ ܩܲܫܕܸܪܝܼ ܕܓܲܫܩܝܼ ܠܟܸܣܠܹܗ ܐܵܕܝܼܵܐ ܠܲܝܬ ܠܵܗ݁ ܦܸܪܣܲܬ ܕܚܲܝܵܐ ܡܝܼܬܘܼܬܘܼܟܼ: ܐܸܠܵܐ ܐܸܢ ܟܵܠܹܝܬ݁ ܒܕܘܼܟܬܵܐ ܕܢܦܸܠܘܼܟܼ: ܘܐܸܢ ܠܵܐ ܥܒܸܪܘܼܟܼ ܒܬܲܪܥܵܐ ܕܦܠܸܛܠܘܼܟܼ ܡܸܢܹܗ: ܘܐܸܢ ܠܵܐ ܒܕܘܼܟܬܵܐ ܕܦܝܼܫܠܘܼܟܼ ܙܲܒܘܼܢ. ܬܵܡܵܐ ܒܸܬ ܗܵܘܹܝܬ ܢܲܨܝܼܚܵܐ. ܐܝܼܢܵܐ ܩܵܐ ܕܝܼܝܼ ܝܼܠܵܗ݁ ܠܒܸܟܼܝܵܐ ܘܠܸܦܫܵܡܵܐ ܒܘܼܬ ܕܝܘܼܟܼ: ܘܩܵܬܝܼ ܐܸܕܝܘܼܡ݇ ܝܵܘܡܵܐ ܟܹܐ ܚܵܫܚܵܐ ܓ̰ܢܸܢܬܵܐ: ܘܵܝ ܐܸܠܝܼ ܫܡܵܛܘܼܟܼ ܒܪܘܿܢܵܐ ܕܛܵܝܸܦܝܼ: ܘܵܝ ܐܸܠܝܼ ܒܘܼܬ ܙܲܒܘܼܢܘܼܬܘܼܟܼ ܝܵܐ ܓܲܢ݇ܒܵܪܵܐ: ܘܵܝ ܐܸܠܝܼ ܒܘܼܬ ܢܚܸܦܬܘܼܟܼ ܝܵܐ ܡܝܲܩܪܵܐ: ܘܵܝ ܐܸܠܝܼ ܒܘܼܬ ܡܵܘܬܵܐ ܕܓܵܢܘܼܟܼ: ܘܵܝ ܐܸܠܝܼ ܥܲܠ ܡܲܪܓܵܢܝܼܬܘܼܟܼ ܕܛܠܝܼܩܠܵܗ݁. ܙܠ݇ܝܼ ܠܵܐ ܕܵܝܪܸܬ ܠܟܸܣܠܝܼ ܐܸܢ ܠܵܐ ܡܘܼܫ݇ܟ̰ܚܵܠܘܼܟܼ ܡܲܪܓܵܢܝܼܬܘܼܟܼ. ܣܵܒܵܒ ܠܲܝܬ݁ ܠܵܗ݁ ܛܝܼܡܵܐ: ܐܸܢ ܐ݇ܢܵܫܵܐ ܠܵܐ ܣܵܦܹܐ ܚܲܝ̈ܘܼܗܝ ܙܲܒܼܢܵܢܵܝܹ̈ܐ ܠܡܵܘܬܵܐ ܒܘܼܬ ܕܝܼܘܼܗ݁ (ܡܲܪܓܵܢܝܼܬܵܐ) ܡ݂ܢ ܣܵܒܵܒ ܕܐܘܼܦ ܗ݁ܝ ܒܕܸܡܹܗ ܕܝܼܫܘܿܥ ܡܵܪܝܼ ܙܒܼܝܼܢܬܵܐ ܝ݇ܠܵܗ݁.

ܐܝܼܢܵܐ ܟܲܕ ܐܲܢܹܐ ܫܡܸܥܠܹܗ ܓܘܼܫܬܐܵܙܵܕ: ܦܫܸܡܠܹܗ ܒܚܝܼܵܠܹܗ: ܘܬܘܼܚܡܸܢܹܗ ܕܦܵܐܹܫ ܟ̰ܘܼܟܒܸܢܵܐ ܒܬܝܵܒܼܘܼܬܵܐ. ܘܡ݂ܢ ܗ݁ܝ ܣܵܥܲܬ ܫܘܼܪܝܼܠܹܗ ܒܸܟܼܝܵܐ ܒܡܲܪܝܼܪܘܼܬܵܐ: ܒܕܵܡܲܝܬܵܐ ܕܫܸܡܥܘܿܢ ܟܹܐܦܵܐ ܟܲܕ ܩܘܼܘܸܡܠܵܗ݁ ܐܸܠܹܗ ܕܠܵܐ ܝ݇ܕܸܥܬܹܗ ܒܘܼܬ ܐܲܠܵܗܘܼܬܹܗ ܕܝܼܚܝܼܕܵܝܵܐ. ܘܐ݇ܙܸܠܹܗ ܠܒܲܝܬܹܗ ܘܫܘܼܘܝܼܠܹܗ ܣܲܩܵܐ ܘܪܘܼܦܝܼܠܹܗ ܥܲܠܘܼܗܝ ܩܸܛܡܵܐ: ܘܬܘܼܪܸܨܠܹܗ ܫܘܝܼܬܹܗ ܥܲܠ ܣܲܩܵܐ ܘܩܸܛܡܵܐ ܘܝܵܬܸܒܼ ܗ݇ܘ̣ܵܐ ܥܲܠܵܝ: ܕܒܸܩܠܹܗ ܬܵܙܝܼ ܥܲܠ ܓܵܢܹܗ: ܘܒܫܵܗܲܪܬܵܐ ܘܒܸܟܼܝܵܐ ܒܥܵܡܘܼܪܘܼܬܵܐ ܘܒܨܵܘܡܵܐ ܚܸܫܵܢܵܐ ܓܘܼܫܡܹܗ ܙܲܒܸܢ ܗ݇ܘܵܐ ܠܹܗ: ܟܲܕ ܡܲܩܘܘܼܚܹܐ ܘܒܐܹܡܵܪܵܐ: ܪܲܚܸܡ ܥܲܠܝܼ ܡܵܪܝܵܐ ܡ݂ܢ ܣܵܒܵܒ ܙܲܒܘܼܢ ܝ݇ܘܸܢ: ܒܲܣܸܡ ܠܝܼ ܝܵܐ ܡܵܪܝܵܐ ܡ݂ܢ ܣܵܒܵܒ ܫܥܸܫܠܗ݇ܘܿܢ ܓܲܪ̈ܡܝܼ: ܣܪ̈ܝܼܠܗ݇ܘܿܢ ܒܪ̈ܝܼܢܵܬܝܼ: ܥܲܡ ܫܲܪܟܵܐ ܕܗܹܡܸܙܡܵܢܹ̈ܐ ܕܡܲܙܡܘܿܪܹ̈ܐ: ܐܵܢܝܼ ܕܥܲܠ ܕܐܲܢܹܐ ܒܸܕܡܵܝܵܐ ܝܼܗ݇ܘ̣ܵܘ. ܡܓܵܒܘܿܝܹܐ ܗ݇݃ܘܵܐ ܘܒܐܹܡܵܪܵܐ ܩܵܐ ܡܸܬܚܵܐ ܬܪܹܝܢ ܝܵܘܡܵܢܹ̈ܐ. ܘܠܵܐ ܐ݇ܙܸܠܹܗ ܩܵܕ݇ܡ ܡܲܠܟܵܐ: ܘܐܘܼܦ ܠܵܐ ܒܕܘܼܟܬܵܐ ܕܝ݇ܬܝܵܒܼܬܹܗ ܒܹܝܠ ܚܲܒܼܪ̈ܒܼܵܬܘܼܗܝ. ܘܒܝܵܘܡܵܐ ܕܬܠܵܬܵܐ ܦܝܼܫܠܹܗ ܛܠܝܼܒܵܐ ܫܸܡܥܘܿܢ ܩܵܕ݇ܡ ܡܲܠܟܵܐ. ܡ݂ܢ ܣܵܒܵܒ ܦܝܼܫܠܹܗ ܐ݇ܡܝܼܪܵܐ ܩܵܕ݇ܡ ܡܲܠܟܵܐ ܡ݂ܢ ܪܹܫܵܐ ܕܡܓܼܘܼܫܝܹ̈ܐ: ܕܫܸܡܥܘܿܢ ܪܹܫܵܐ ܕܚܲܪ̈ܵܫܹܐ ܐ݇ܬܹܐܠܹܗ: ܘܦܝܼܫܠܹܗ ܛܠܝܼܒܵܐ ܫܸܡܥܘܿܢ ܩܵܕ݇ܡ ܡܲܠܟܵܐ. ܡ݂ܢ ܣܵܒܵܒ ܒܝܵܘܡܵܐ ܕܬܠܵܬ݇ܐ ܕܒܵܬ݇ܪ ܥܒܼܵܪܬܹܗ ܕܫܸܡܥܘܿܢ ܠܐܲܬܪܵܐ ܡܘܼܕܸܥܠܗ݇ܘܿܢ ܩܵܐ ܡܲܠܟܵܐ. ܘܒܥܕܵܢܵܐ ܕܫܡܸܥܠܹܗ ܓܘܼܗܫܵܐܙܵܕ ܕܦܝܼܫܠܹܗ ܛܠܝܼܒܵܐ ܫܼܸܡܥܘܿܢ: ܩܸܡܠܹܗ ܡ݂ܢ ܣܲܩܹܗ ܘܐ݇ܬܹܐܠܹܗ ܠܬܲܪܥܵܐ ܕܡܲܠܟܵܐ: ܕܥܒܼܘܿܕ ܒܵܘܲܪ ܬܵܡܵܐ ܒܸܬ ܗܵܘܝܼܠܹܗ ܦܸܪܣܲܬ ܕܚܵܙܝܼܠܹܗ ܘܗܲܡܙܸܡ ܥܲܡܹܗ.

ܦܘܼܩܸܕܠܹܗ ܡܲܠܟܵܐ: ܘܥܒܼܸܪܹܗ ܫܸܡܥܘܿܢ ܩܵܕ݇ܡܘܼܗܝ. ܘܒܥܕܵܢܵܐ ܕܥܒܼܸܪܹܗ: ܣܓܼܸܕܠܹܗ ܥܲܠ ܦܲܐܬܹܗ ܩܵܕ݇ܡܘܼܗܝ: ܘܐ݇ܡܸܪܹܗ ܡܲܠܟܵܐ ܩܵܐ ܫܸܡܥܘܿܢ: ܫܸܡܥܘܿܢ ܡܘܼܕܝܼ ܝ݇ܠܵܗ݁ ܐܵܗܵܐ ܥܸܨܝܘܼܬܵܐ ܕܡܘܼܚܙܝܼܠܘܼܟܼ ܥܲܠܝܼ؟ ܐܵܗܵܐ ܝ݇ܠܹܗ ܚܘܼܒܝܼ ܠܟܸܣܠܘܼܟܼ؟ ܐܵܗܵܐ ܝ݇ܠܹܗ ܐܝܼܩܵܪܵܐ ܕܡܝܘܼܩܪܵܐ ܝ݇ܘܸܢ ܗ݇ܘ̣ܵܐ ܠܟܸܣܠܘܼܟܼ؟ ܐܵܗܵܐ ܝ݇ܠܹܗ ܚܸܩܪܵܐ ܕܚܲܩܪܸܢ ܗ݇ܘܵܐ ܠܘܼܟܼ ܩܵܕ݇ܡ ܓܘܼܪ̈ܵܢܝܼ: ܘܐܵܡܪܸܢ ܗ݇ܘܵܐ ܒܘܼܬ ܕܝܼܘܼܟܼ: ܕܚܲܕ݇ ܐ݇ܢܵܫܵܐ ܝ݇ܠܹܗ ܥܵܩܸܠܕܲܪ ܘܒܲܗܪܵܢܵܐ. ܘܗܲܕܟܼܵܐ ܩܵܡ ܡܝܲܩܪܸܢܘܼܟܼ: ܐܘܼܦ ܨܦܵܝܝܼ ܩܵܡ ܥܵܒܼܕܸܢܘܪܟܼ ܩܵܕ݇ܡ ܡܓܼܘܼܫܵܝܹ̈ܐ: ܩܵܡܘܿܕܝܼ ܥܒܼܸܕܠܘܼܟܼ ܐܲܝܟܼ ܚܲܕ݇ ܕܸܫܡܲܢ ܕܟܹܐ ܥܵܒܸܕ: ܘܗ݇ܘܹܐܠܘܼܟܼ ܥܸܨܝܵܐ ܠܛܵܝܸܦܘܼܟܼ ܘܥܲܠܝܼ: ܘܠܦܘܼܩܕܵܢܵܐ ܕܦܘܼܩܸܕܠܝܼ ܠܵܐ ܡܘܼܨܝܼܬ݁ܠܵܘܟܼܘܿܢ؟ ܗܵܝܓܵܗ݁ ܡܸܢ݇ܕܪܸܫ݇ ܣܓܼܸܕܠܹܗ ܥܲܠ ܦܲܐܬܹܗ ܥܲܠ ܐܲܪܥܵܐ ܩܵܕ݇ܡ ܡܲܠܟܵܐ: ܘܐ݇ܡܸܪܹܗ ܠܡܲܠܟܵܐ: ܡܵܪܝܼ ܡܲܠܟܵܐ: ܡܵܢܝܼ ܝ݇ܠܹܗ ܐܵܗܵܐ ܕܡܘܼܣܠܝܼܵܐ ܝ݇ܠܹܗ ܠܦܘܼܩܕܵܢܵܐ ܕܡܲܠܟܵܐ؟ ܘܡܵܢܝܼ ܝ݇ܠܹܗ ܐܵܗܵܐ ܕܩܲܫܕܸܪ ܕܟܵܠܹܐ ܐܘܼܦ ܕܲܠܩܘܼܒܼܠ ܦܘܼܩܕܵܢܵܐ ܕܫܘܼܠ̈ܛܵܢܘܼܟܼ ܘܐܲܣܟܵܪ̈ܵܬܘܼܟܼ: ܐܸܢ ܠܵܐ ܗܵܘܝܼ ܦܘܼܩ̈ܕܵܢܵܝ ܐܲܝܟܼ ܪܸܙܵܝܵܐ ܕܐܲܠܵܗܵܐ؟ ܣܵܪܲܣܬܘܼܬܵܐ ܝܵܐ ܡܵܪܝܼ ܡܲܠܟܵܐ: ܘܦܝܼܫܠܝܼ ܚܩܝܼܪܵܐ ܡ݂ܢ ܛܲܝܒܘܼܬܘܼܟܼ. ܕܲܓܵܠܘܼܬܼܵܐ ܣܢܝܼܬܵܐ ܝ݇ܠܵܗ݁ ܩܵܕ݇ܡ ܐܲܠܵܗܵܐ ܘܩܵܕ݇ܡܘܼܟܼ: ܝܵܐ ܛܵܒܼܵܐ ܕܓܲܒܼܪܹ̈ܐ. ܐܝܼܢܵܐ ܒܘܼܬ ܚܸܩܪܵܐ ܕܝܼܘܼܟܼ. ܡ݂ܢ ܚܸܩܪܵܐ ܕܐܲܠܵܗܝܼ ܒܸܬ ܗܵܘܹܝܢ ܣܦܝܼܩܵܐ. ܘܒܘܼܬ ܐܝܼܩܵܪܘܼܟܼ: ܘܐܝܼܩܵܪܹܗ ܕܐܲܠܵܗܵܐ ܕܗܲܩܘܼܬܵܐ ܠܸܐ ܡܲܣܠܸܢ. ܗ݁ܘ ܝܼܠܹܗ ܐܲܠܵܗܵܐ ܕܩܵܡ ܚܵܩܸܪܘܼܟܼ ܘܩܵܡ ܓܲܪܘܸܣܠܘܼܟܼ: ܘܩܵܡ ܥܵܒܸܕܠܘܼܟܼ ܡܲܠܟܵܐ ܕܡܲܠܟܹ̈ܐ ܥܲܠ ܛܵܝܸܦܹ̈ܐ ܘܥܲܠ ܡܲܠܟܵܝ̈: ܘܝܘܼܗ݇ܒܸܠܹܗ ܒܐܝܼܕ̈ܘܼܟܼ ܐܵܗܵܐ ܗܘܼܟܡܵܐ ܓܘܼܪܵܐ ܘܚܲܝܠܵܢܵܐ ܘܥܵܓ̰ܒܵܢܵܐ: ܘܐܵܢܵܐ ܪܹܓܵܐ ܙܥܘܿܪܵܐ ܘܙܲܒܘܼܢ ܕܪܹ̈ܓܵܘܵܬܹܐ ܕܡܲܠܟܘܼܬܘܼܟܼ: ܩܵܐ ܡܘܼܕܝ݇ ܣܵܒܵܒ ܦܝܼܫܠܝܼ ܡܫܘܼܡܗܵܐ ܡܵܪܘܿܕܵܐ (ܥܸܨܝܵܐ) ܡ݂ܢ ܡܲܠܟܘܼܬܘܼܟܼ؟ ܐܵܡܸܪ ܐܸܠܹܗ ܡܲܠܟܵܐ: ܡ݂ܢ ܣܵܒܵܒ ܠܵܐ ܓ̰ܘܼܡܸܥܠܘܼܟܼ ܡ݂ܢ ܛܵܝܸܦܘܼܟܼ ܡܲܕܲܐܬܵܐ ܕܦܝܼܫܠܵܗ݁ ܦܩܝܼܕܬܵܐ ܡܸܢܲܢ ܐܲܠܵܗܹ̈ܐ. ܗܵܝܓܵܗ݁ ܓ̰ܘܼܘܸܒܠܹܗ ܛܘܼܒܼܵܢܵܐ ܫܸܡܥܘܿܢ ܘܐ݇ܡܸܪܹܗ ܩܵܐ ܡܲܠܟܵܐ: ܚܵܣܠܹܗ ܠܪܹܓܘܼܟܼ ܡܵܪܝܼ ܡܲܠܟܵܐ. ܕܗܵܘܹܐ ܙܵܠܘܿܡܵܐ ܥܲܠ ܛܵܝܸܦܵܐ ܡܲܟܝܼܟܼܵܐ ܕܐܲܠܵܗܵܐ: ܚܵܣܠܝܼ ܡܸܢ݇ܕܪܸܫ݇ ܠܡܲܠܟܘܼܬܘܼܟܼ ܡܝܘܼܩܲܪܬܵܐ: ܕܐܸܠܝܼ ܐ݇ܢܵܫܵܐ ܡܸܣܟܹܢܵܐ ܕܒܟܠ ܥܸܕܵܢܵܐ ܡܲܠܘܿܦܸܐ ܝ݇ܘܸܢ ܡܸܣܟܹܢܘܼܬܵܐ ܘܡܲܟܝܼܟܼܘܼܬܵܐ ܩܵܐ ܛܵܝܸܦܝܼ. ܡܵܠܘܿܦܹܐ ܝ݇ܘܸܢ ܐܸܠܵܝ ܕܡ݁ܢ ܡܵܚܹܐ ܥܲܠ ܟ̰ܲܢܘܼܟܼ ܩܲܪܒܸܢܹܗ ܗܵܘ ܐ݇ܚܹܪ݇ܢܵܐ: ܘܡ݁ܢ ܕܫܵܩܸܠ ܓ̰ܘܼܒܘܼܟܼ ܡܲܙܝܸܕ ܗܲܒܼܠ ܠܹܗ ܐܘܼܦ ܨܘܼܕܪܘܼܟܼ. ܕܦܵܩܘܿܕܝܼ ܝ݇ܘܸܬ ܕܗܵܘܹܝܢ ܐܸܠܵܝ ܡܲܠܝܸܨܵܢܵܐ ܘܟ̰ܵܠܘܿܓ̰ܵܐ: ܘܕܫܵܩܠܸܢ ܓ̰ܘܼܠܵܝ: ܘܫܲܠܚܸܢ ܨܘܼܕܪ̈ܵܬܵܝ: ܚܵܣܠܝܼ ܡܵܪܝܼ ܡܲܠܟܵܐ: ܕܐܵܗܵܐ ܕܩܵܘܸܡܵܐ ܝܲܢ ܕܦܵܝܫܵܐ ܝܘܼܗ݇ܒܸܠܬܵܐ ܐܸܠܝܼ.

ܐܝܼܢܵܐ ܒܥܸܕܵܢܵܐ ܕܐܲܢܹܐ ܐ݇ܡܸܪܹܗ ܫܸܡܥܘܿܢ: ܡ݂ܢ ܟܠ ܓܹܒܵܢܹ̈ܐ ܚܘܼܪܕܝܼܠܗ݇ܘܿܢ ܡܓܼܘܼܫܵܝܹ̈ܐ ܘܫܲܠܝܼܛܵܢܹ̈ܐ ܙܵܠܘܿܡܹ̈ܐ ܘܐܵܡܪܝܼ: ܕܐܵܗܵܐ ܕܡܲܕܲܐܬܵܐ ܠܵܐ ܒܣܸܡܠܵܐ ܠܹܗ ܕܩܲܒܸܠܠܵܗ݁ ܥܲܠ ܓܵܢܹܗ: ܒܣܵܡܵܐ ܝ݇ܠܵܗ݁ ܥܵܨܝܘܼܬܵܐ ܡܲܥܨܹܗ ܥܲܡܹܗ ܐܘܼܦ ܠܛܵܝܸܦܹܗ. ܓ̰ܘܼܘܸܒܠܹܗ ܢܲܨܝܼܚܵܐ ܫܸܡܥܘܿܢ ܘܐ݇ܡܸܪܹܗ ܐܸܠܵܝ: ܐܵܕܝܼܵܐ ܠܹܐ ܝ݇ܠܵܗ݁ ܡܲܠܝܵܢܬܵܐ ܩܵܬܵܘܟܼܘܿܢ ܕܐܲܚܬܘܿܢ ܒܸܙܠܵܡܵܐ ܝ݇ܬܘܿܢ ܘܒܸܓ̰ܠܵܒܵܐ ܝ݇ܬܘܿܢ ܘܒܸܙܠܵܡܵܐ ܠܡܸܣܟܹܢܹ̈ܐ: ܘܠܵܒܘܿܠܹܐ ܝ݇ܬܘܿܢ ܒܚܲܝܠܵܐ ܠܙܲܒܘܼܢܹ̈ܐ: ܐܝܼܢܵܐ ܐܘܼܦ ܐܸܠܲܢ ܒܢܝܼܪܵܐ ܕܩܸܫܝܘܼܬܵܐ ܕܙܠܘܿܡܝܵܘܟܼܘܿܢ ܒܣܵܡܵܘܟܼܘܿܢ ܝ݇ܠܵܗ݁ ܠܐܸܣܝܵܪܲܢ. ܩܵܡܘܿܕܝܼ ܦܝܵܫܵܐ ܝ݇ܠܵܗ݁ ܛܠܸܒܬܵܐ ܡܲܕܲܐܬܵܐ ܬܪܹܝܢ ܛܵܩܹ̈ܐ ܡܸܢܲܢ؟ ܐܸܢ ܐܲܝܟܼ ܥܲܬܝܼܪܹ̈ܐ. ܐܲܚܢܲܢ ܡܸܣܟܹܢܹ̈ܐ ܝ݇ܘܲܚ ܒܘܼܫ ܡ݂ܢ ܟܠܵܝ ܛܵܝܸܦܹ̈ܐ. ܐܵܡܪܝܼ ܐܸܠܹܗ ܡܓܼܘܼܫܵܝܹ̈ܐ: ܡ݂ܢ ܣܵܒܵܒ ܕܠܹܐ ܝ݇ܬܘܿܢ ܡ݂ܢ ܒܢܘܿܢܹ̈ܐ ܕܬܵܘܕܝܼܬܵܐ ܕܡܲܠܟܵܐ ܕܡܲܠܟܹ̈ܐ: ܕܝܼܠܹܗ ܟܝܵܢܹܗ ܡ݂ܢ ܐܲܠܵܗܹ̈ܐ. ܐܵܡܲܪ ܐܸܠܹܗ ܫܸܡܥܘܿܢ ܚܲܟܝܼܡܵܐ ܒܫܪܵܪܹܗ: ܘܗܵܐ ܐܸܢ ܒܘܼܬ ܗܲܝܡܵܢܘܼܬܲܢ: ܠܹܐ ܝ݇ܠܵܗ݁ ܘܵܓ̰ܸܒ ܡܲܕܲܐܬܵܐ ܦܵܐܹܫ ܛܠܝܼܒܵܐ: ܐܸܠܵܐ ܐܘܼܦ ܡܲܪܕܘܼܬܵܐ ܒܘܼܬ ܚܵܬܸܪ ܗܲܝܡܵܢܘܼܬܲܢ ܘܝܘܼܠܦܵܢܲܢ: ܐܝܼܢܵܐ ܒܘܼܬ ܫܪܵܪܹܗ ܕܝܘܼܠܦܵܢܲܢ: ܐܘܼܦ ܚܲܝܲܝ̈ܢ ܗܕܝܼܪܪܵܐ ܝ݇ܘܲܚ ܠܝܼܵܗ݇ܒܼܵܐ: ܘܠܵܐ ܐܲܚܟ̰ܝܼ ܡܵܐ̈ܠܲܢ: ܐܝܼܢܵܐ ܕܝܵܗ݇ܒܲܚ ܡܲܕܲܐܬܵܐ ܠܹܐ ܝ݇ܘܲܚ ܡܩܵܒܘܿܠܹܐ: ܡܣܵܒܵܒ ܗܘܼܟܡܲܢ ܠܹܐ ܝ݇ܠܹܗ ܥܵܠܡܵܢܵܝܵܐ: ܕܬܲܓܒܸܪܲܚ ܒܚܲܝܠܵܐ ܠܐܲܚܘܿܢ̈ܘܵܬܲܢ: ܐܸܠܵܐ ܗܘܼܟܡܲܢ ܝܼܠܹܗ ܡ݂ܢ ܐܲܠܵܗܵܐ: ܗ݁ܘ ܕܒܟܠܵܝ ܟ̈ܬܵܒܲܢ ܒܘܼܬ ܡܲܟܝܼܟܼܘܼܬܵܐ ܦܵܩܘܿܕܹܐ ܝ݇ܠܹܗ ܐܸܠܲܢ. ܡܵܠܘܿܦܲܢ ܝ݇ܢܵܐ ܕܝܵܗ݇ܒܲܚ ܠܡܸܣܟܹܢܹ̈ܐ: ܘܠܵܐ ܓ̰ܲܠܒܲܚ ܡ݂ܢ ܡܸܣܟܹܢܹ̈ܐ. ܘܡܲܢܝܸܚܲܚ ܠܡܘܿܠܝܸܨܹ̈ܐ: ܘܠܸܐ ܡܲܠܝܸܨܲܚ ܠܓ̰ܘܼܢܓ̰ܵܪܹ̈ܐ.

ܗܲܡܙܸܡ ܥܲܡܝܼ ܝܵܐ ܫܸܡܥܘܿܢ: ܕܡܵܪܵܐ ܕܝܼܘܸܟܼ ܝ݇ܘܸܢ: ܫܒܼܘܿܩ ܠܗ݇ܘܿܢ ܠܚܲܒܼܪ̈ܵܘܵܬܘܼܟܼ. ܠܹܐ ܗ݇ܘܵܐ ܠܐܵܗܵܐ ܦܝܼܫܠܘܼܟܼ ܩܸܪܝܵܐ: ܩܵܕ݇ܡܝܼ ܒܘܼܬ ܚܲܒܼܪ̈ܵܘܵܬܘܼܟܼ: ܐܸܠܵܐ ܕܝܵܗ݇ܒܹܬ ܐܸܠܝܼ ܓ̰ܘܼܘܵܒ ܕܒܘܼܩܵܪܵܐ ܡܸܢܘܼܟܼ: ܣܓܼܸܕܠܹܗ ܫܸܡܥܘܿܢ ܘܐ݇ܡܸܪܹܗ: ܕܗܲܡܙܸܡ ܡܵܪܝܼ ܡܲܠܟܵܐ ܡܸܢܕܝܼ ܕܒܣܵܡܹܗ ܝ݇ܠܵܗ݁ ܥܲܡ ܪܹܓܹܗ. ܐܵܡܸܪ ܐܸܠܹܗ ܡܲܠܟܵܐ: ܦܠܵܫܹܐ ܪ̈ܵܒܹܐ ܝ݇ܢܵܐ: ܘܕܘܼܪ̈ܵܫܹܐ ܥܵܡܘܿܪܹ̈ܐ ܝ݇ܢܵܐ: ܘܐܲܚܬܘܿܢ ܒܸܚܵܝܵܐ ܝ݇ܬܘܿܢ ܒܪܲܗܵܬܘܼܬܵܐ: ܘܐܝܼܬܘܿܢ ܕܲܠܩܘܼܒܼܠ ܕܝܼܝܼ ܒܗܲܝܡܵܢܘܼܬܵܘܟܼܘܿܢ: ܐܝܼܢܵܐ ܡܲܨܝܸܬ݁ ܠܦܘܼܩܕܵܢܝܼ ܐܲܢ݇ܬ ܘܛܵܝܸܦܘܼܟܼ: ܘܩܲܒܸܠ ܘܗܲܒܼܠ ܐܲܢ݇ܬ ܘܛܵܝܸܦܘܼܟܼ ܡܲܕܲܐܬܵܐ ܬܪܹܝܢ ܛܵܩܹ̈ܐ: ܘܙܠ݇ܝܼ ܠܒܲܝܬܘܼܟܼ. ܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ: ܒܓܘܼܫ̈ܡܲܢ ܪܹ̈ܓܵܘܵܬܹܐ ܝ݇ܢܵܐ ܕܡܲܠܟܘܼܬܘܼܟܼ: ܘܒ̈ܵܬܲܢ ܘܟܠ ܡܵܐ̈ܠܵܢ ܕܝܼܘܼܟܼ ܝ݇ܢܵܐ ܝܵܐ ܡܲܠܟܵܐ: ܡ݂ܢ ܣܵܒܵܒ ܕܠܲܝܬ݁ ܠܲܢ ܡܸܢܕܝܼ ܒܐܵܗܵܐ ܐܲܪܥܵܐ ܕܜܝܼܩܘܼܝܵܬܹ̈ܐ. ܕܦܲܩܸܕ ܡܵܪܝܼ ܡܲܠܟܵܐ ܐܸܢ ܐܵܗܵܐ ܒܸܬ ܗܵܘܹܝܬ݁ ܪܲܗܲܬ݁: ܘܫܵܩܠܝܼܠܗ݇ܘܿܢ. ܡ݂ܢ ܣܵܒܵܒ ܐܵܢܵܐ ܫܪܵܪܵܐ ܒܐܹܡܵܪܵܐ ܝ݇ܘܸܢ: ܕܠܛܲܝܸܦܝܼ ܡܲܠܝܸܨܢ: ܘܲܠܡܲܕܲܐܬܵܐ ܒܘܼܬ ܗܲܝܡܵܢܘܼܬܝܼ ܠܵܐ ܓ̰ܲܡܥܸܢܵܐ: ܐܲܦܸܢ ܕܦܵܩܕܵܐ ܡܲܠܟܘܼܬܘܼܟܼ ܙܲܪܒܵܢܛܬܵܐ ܠܸܢܫܵܛܵܐ ܓܸܠܕܝܼ ܡ݂ܢ ܦܲܓܼܪܝܼ. ܡ݂ܢ ܣܵܒܵܒ ܨܦܵܝܝܼ ܝ݇ܠܵܗ݁ ܩܵܬܝܼ ܕܦܵܐܹܫ ܫܠܝܼܚܵܐ ܓܸܠܕܝܼ ܡ݂ܢ ܦܲܓܼܪܝܼ. ܘܠܹܐ ܫܵܩܠܸܢ ܠܒܸܫܬܹܗ ܕܡܸܣܟܹܢܵܐ: ܘܡܲܠܝܸܨܢ ܦܪ̈ܝܼܩܹܐ ܕܡܵܪܝܼ. ܐܵܡܸܪ ܐܸܠܹܗ ܡܲܠܟܵܐ: ܒܲܣ ܒܸܬ ܦܲܚܠܸܢ ܠܡܲܕܲܐܬܵܐ: ܘܒܝܵܗ݇ܒܸܢܘܼܟܼ ܚܲܕ݇ ܪܵܥܝܼ ܕܡܗܲܝܸܪ ܠܚܲܝ̈ܘܼܟܼ. ܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ: ܒܕܘܼܙܘܼܬܵܐ ܕܟܠ ܕܦܲܩܕܵܠܝܼ ܡܲܠܟܘܼܬܼܘܼܟܼ ܕܡܗܲܝܸܪ ܠܚܲܝ̈ܝܼ: ܐܵܦܸܢ ܗܲܪ ܒܸܬ ܗܵܘܹܐ ܐܸܠܝܼ ܠܸܡܝܵܬܵܐ: ܠܹܐ ܪܲܦܸܢ ܗܹܡܸܙܡܵܢܘܼܟܼ ܥܲܠ ܐܲܪܥܵܐ. ܐܵܡܸܪ ܐܸܠܹܗ ܡܲܠܟܵܐ: ܩܘܼܕܡܹܐ ܐܲܝܟܼ ܕܦܲܩܕܸܢ ܐܸܠܘܼܟܼ ܗܲܕܟܼܵܐ ܥܒܼܘܿܕ: ܣܵܒܵܒ ܠܹܐ ܝ݇ܠܵܗ݁ ܒܣܵܡܝܼ ܒܩܸܛܠܘܼܟܼ: ܡ݂ܢ ܣܵܒܵܐ ܐܲܢ݇ܬ݁ ܚܲܕ݇ ܐ݇ܢܵܫܵܐ ܒܘܼܗܪܸܢܵܐ ܘܥܵܩܸܠܕܲܪ ܝܼܘܸܬ݁: ܐܲܝܟܼ ܕܐܘܼܦ ܪܵܒܵܐ ܓܵܗܹ̈ܐ ܡ݂ܢ ܩܵܕ݇ܡܵܝܬܐ ܐ݇ܡܸܪܝܼ. ܐܵܕܝܵܐ ܫܡܥܝܼ ܠܪܵܥܝܝܼ ܘܡܲܨܝܸܬ݁ ܠܦܘܼܩܕܵܢܝܼ: ܘܠܵܐ ܟܵܠܹܝܬ݁ ܒܩܸܫܝܘܼܬܵܐ: ܐܸܠܵܐ ܒܓ̰ܲܠܕܘܼܬܵܐ ܥܒܼܘܿܕܠܹܗ ܪܸܙܵܝܝܼ: ܘܣܓܼܘܿܪ ܠܢܘܼܪܵܐ ܕܫܸܡܫܵܐ: ܓ̰ܘܼܘܸܒܠܹܗ ܫܸܡܥܘܿܢ ܠܸܒܵܢܵܐ ܡܲܚܸܒܵܢܵܐ ܕܡܵܪܹܗ ܘܐ݇ܡܸܪܹܗ: ܐܵܗܵܐ ܝ݇ܠܹܗ ܪܵܥܝܼ ܕܲܡܗܲܝܸܪ ܠܚܲܝ̈ܝܼ ܕܩܘܼܘܸܠܘܼܟܼ ܐܸܠܝܼ ܡܵܪܝܼ ܡܲܠܟܵܐ؟ ܗܲܕܟܼܵܐ ܐܲܝܟܼ ܕܐܵܗܵܐ ܦܘܼܩܕܵܢܵܐ ܝܼܠܹܗ ܚܲܙܕܸܓܵܢܵܐ ܕܚܲܝ̈ܝܼ: ܘܠܹܐ ܗ݇ܘ̣ܵܐ ܡܗܲܝܸܪܵܢܵܐ: ܠܹܐ ܡܗܲܝܸܪܘܼܟܼ ܐܵܗܵܐ ܪܵܥܝܼ؟ ܐܵܡܸܪ ܐܸܠܹܗ ܫܸܡܥܘܿܢ: ܒܐܲܠܵܗܝܼ ܒܸܡܝܵܝܵܐ ܝ݇ܘܸܢ ܗ݁ܘ ܕܓܘܼܪܘܸܣܠܹܗ ܡܲܠܟܘܼܬܘܼܟܼ: ܕܠܲܝܬ݁ ܠܝܼ ܪܵܥܝܼ ܕܲܡܚܲܙܕܸܓ ܐܲܝܟܼ ܕܐܵܗܵܐ. ܐܵܡܸܪ ܐܸܠܹܗ ܡܲܠܟܵܐ: ܩܵܡ ܚܵܩܪܸܢܘܼܟܼ ܐܲܝܟܼ ܠܥܵܩܸܠܕܲܪ: ܘܐܵܕܝܼܵܐ ܐܲܝܟܼ ܣܲܟܼܠܵܐ ܦܝܵܫܵܐ ܝ݇ܘܸܬ݁ ܚܸܙܝܵܐ ܐܸܠܝܼ: ܕܟܸܠܝܵܐ ܝ݇ܘܸܬ݁ ܕܲܠܩܘܼܒܼܠ ܦܘܼܩܕܵܢܝܼ. ܣܵܒܵܒ ܐܵܗܵܐ ܢܲܙܵܢܘܼܬܵܐ ܝ݇ܠܵܗ݁: ܕܕܵܪܫܝܼ ܕܲܠܩܘܼܒܼܠ ܦܘܼܩܕܵܢܵܐ ܕܝܲܢ ܐܲܠܵܗܹ̈ܐ.

 ܓ̰ܘܼܘܸܒܠܹܗ ܫܸܡܥܘܿܢ ܚܩܝܼܪܵܐ ܘܐ݇ܡܸܪܹܗ: ܚܵܣܠܵܐ ܠܹܗ ܠܫܸܡܥܘܿܢ ܪܹܓܹܗ ܕܚܲܕ݇ ܐܲܠܵܗܵܐ ܚܲܝܲܐ ܘܫܲܪܝܼܪܵܐ: ܘܚܵܫܸܒܼ ܐܲܠܵܗܹ̈ܐ ܐ݇ܚܹܪܹ̈ܢܹܐ: ܘܣܵܓܸܕ ܠܫܸܡܫܵܐ ܘܠܣܲܗܪܵܐ ܕܗܕܝܼܪܵܐ ܝ݇ܠܹܗ ܕܒܲܛܸܠ ܪܲܗܛܵܝ (ܡܹܐܙܵܠܬܵܝ): ܝܲܢ ܠܢܘܼܪܵܐ ܕܟܠ ܝܵܘܡܵܐ ܟܼܹܐ ܡܵܝܬܵܐ ܘܟܼ̰ܵܡܥܵܐ ܘܛܲܠܩܵܐ ܡ݂ܢ ܩܲܝܣܹ̈ܐ ܕܒܝܼܵܝ ܛܦܝܼܬܵܐ ܝ݇ܠܵܗ݁: ܠܸܐ ܡܲܨܝܸܬܸܢ ܠܐܵܗܵܐ ܦܘܼܩܕܵܢܘܼܟܼ: ܡܵܪܝܼ ܡܲܠܟܵܐ: ܐܵܦܸܢ ܕܦܲܩܕܸܬ݁ ܕܟܠܵܝ ܓܲܪ̈ܡܝܼ ܒܢܘܼܪܵܐ ܝܵܩܕܝܼ. ܠܹܐ ܣܵܓܼܕܸܢ ܐܵܢܵܐ ܕܝܼܘܸܢ ܗܲܡܙܸܡܵܢܵܐ ܠܗ݁ܘ ܕܠܲܝܬ ܠܹܗ ܗܹܡܸܙܡܲܢ: ܘܐܵܢܵܐ ܚܵܝܵܐ ܠܡܵܝܘܿܬܼܵܐ. ܐܵܡܸܪ ܐܸܠܹܗ ܡܲܠܟܵܐ: ܐܸܢ ܒܘܼܬ ܢܘܼܪܵܐ ܕܡܵܝܘܿܬܵܐ ܝ݇ܠܹܗ ܠܹܐ ܣܵܓܼܕܸܬ݁ ܐܸܠܹܗ: ܒܲܣ ܐܘܼܦ ܠܐܲܠܵܗܘܼܟܼ ܠܵܐ ܣܵܓܼܕܸܬ݁. ܣܵܒܵܒ ܗܵܐ ܐܘܼܦ ܐܵܗܵܐ ܡܝܼܬܵܐ ܝ݇ܠܹܗ ܒܥܕܵܢܵܐ ܝܼܗܘܼܕܵܝܹ̈ܐ ܕܡܚܝܼܠܗ݇ܘܿܢ ܠܙܩܝܼܦܵܐ: ܚܫܘܿܒܼ ܠܵܗ݁ ܡܝܼܬܘܼܬܹܗ ܕܢܘܼܪܵܐ ܐܲܝܟܼ ܡܝܼܬܘܼܬܹܗ ܕܐܲܠܵܗܘܼܟܼ. ܒܥܕܵܢܵܐ ܕܫܡܸܥܠܹܗ ܐܲܢܹܐ ܢܲܨܝܼܚܵܐ ܫܸܡܥܘܿܢ ܥܘܼܓ̰ܸܒܠܹܗ ܘܐ݇ܡܸܪܹܗ: ܚܵܣܠܝܼ ܡܵܪܝܼ ܡܲܠܟܵܐ: ܕܐܲܠܵܗܵܐ ܗ݁ܘ ܒܸܬ ܓ̰ܲܢܓ̰ܸܪ ܝܲܢ ܡܵܐܸܬ. ܘܟܠ ܕܓ̰ܲܢܓ̰ܸܪ ܘܡܵܐܹܬ ܠܹܐ ܝ݇ܠܹܗ ܐܲܠܵܗܵܐ: ܡ݂ܢ ܣܵܒܵܒ ܕܟܝܵܢܵܐ ܐܲܠܵܗܵܝܵܐ ܒܘܼܫ ܪܵܡܵܐ ܝ݇ܠܹܗ ܡ݂ܢ ܓ̰ܘܼܢܓ̰ܵܪܹ̈ܐ ܐܘܼܦ ܡ݂ܢ ܡܵܘܬܵܐ. ܣܵܒܵܒ ܒܟܝܵܢܹܗ ܠܹܐ ܓ̰ܲܢܓ̰ܸܪ: ܐܘܼܦ ܠܵܐ ܒܡܸܢܕܝܼ ܐ݇ܚܼܪ݇ܢܵܐ. ܐܵܡܸܪ ܐܸܠܹܗ ܡܲܠܟܵܐ: ܒܐܵܗܵܐ ܗܵܐ ܦܝܼܫܠܘܼܟܼ ܡܘܼܫ݇ܟ̰ܚܵܐ ܕܲܓܵܠܵܐ: ܕܐ݇ܡܸܪܘܼܟܼ ܕܠܹܐ ܡܵܐܹܬ ܐܲܠܵܗܘܼܟܼ: ܐܵܡܲܪ ܐܸܠܹܗ ܩܲܕܝܼܫܵܐ ܫܸܡܥܘܿܢ: ܠܵܐ ܕܲܓܠܸܬ ܡܵܪܝܼ ܡܲܠܟܵܐ: ܐܵܡܲܪ ܐܸܠܹܗ ܡܲܠܟܵܐ: ܠܹܐ ܝ݇ܠܹܗ ܡܝܼܬܵܐ ܫܸܡܥܘܿܢ: ܒܕܘܼܙܘܼܬܵܐ ܡܝܼܬܠܹܗ ܝܼܫܘܿܥ ܘܚܝܼܠܹܗ ܘܩܸܡܠܹܗ: ܐܝܼܢܵܐ ܕܠܹܐ ܗ݇ܘ̣ܵܐ ܕܐܲܠܵܗܵܐ ܡܝܼܬܠܹܗ ܘܚܝܼܠܹܗ ܘܩܸܡܠܹܗ. ܐܵܡܲܪ ܐܸܠܹܗ ܡܲܠܟܵܐ: ܡܵܢܝܼ ܝ݇ܠܹܗ ܝܼܫܘܿܥ ܡܫܝܼܚܵܐ: ܗ݁ܘ ܕܐܲܚܬܘܿܢ ܒܐܹܡܵܪܵܐ ܝ݇ܬܘܿܢ؟ ܐܵܡܸܪ ܐܸܠܹܗ ܫܸܡܥܘܿܢ: ܐܲܠܵܗܵܐ ܝ݇ܠܹܗ ܘܒܲܪܢܵܫܵܐ. ܐܵܡܸܪ ܐܸܠܹܗ ܡܲܠܟܵܐ: ܕܵܐܟܼܝܼ ܗ݇ܘܹܐܠܹܗ ܐܲܠܵܗܵܐ؟ ܐܵܡܲܪ ܐܸܠܹܗ ܫܸܡܥܘܿܢ: ܡ݂ܢ ܣܵܒܵܒ ܕܒܣܸܡܠܵܐ ܠܹܗ ܐܲܠܵܗܵܐ ܕܡܲܕܸܪ ܠܒܢܲܝ̈ܢܵܫܵܐ ܡ݂ܢ ܚܸܠܛܘܼܢܝܵܐ: ܘܒܸܬ ܒܲܣܸܡ ܠܡܲܪ̈ܥܵܝ: ܘܐܵܢܝܼ ܐ݇ܢܵܫܹ̈ܐ ܕܠܵܐ ܡܨܹܝܠ݇ܘܿܢ ܕܚܵܙܝܼ ܠܐܲܠܵܗܵܐ ܒܸܬ ܚܵܝܝܼ. ܒܘܼܬ ܕܐܵܗܵܐ ܫܩܸܠܹܗ ܟܝܵܢܵܐ ܕܒܢܲܝ̈ܢܵܫܵܐ: ܡܘܼܠܸܦܠܹܗ ܘܥܒܼܸܕܠܹܗ ܛܵܒܼܵܬܹ̈ܐ ܠܒܢܲܝ̈ܢܵܫܵܐ: ܘܒܘܼܣܸܡܠܹܗ ܠܡܲܪ̈ܥܵܝ: ܘܡܘܼܕܸܪܵܝ ܠܹܗ ܡ݂ܢ ܚܸܠܛܘܼܢܝܵܐ ܕܨܵܢܵܡܹ̈ܐ: ܘܒܘܼܚܸܠܗ݇ܘܿܢ ܝܼܗܘܼܕܵܝܹ̈ܐ ܒܗ݁ܘ ܕܦܝܼܫܠܹܗ ܚܸܙܝܵܐ: ܘܠܵܐ ܒܗ݁ܘ ܕܠܵܐ ܦܵܐܹܫ ܚܸܙܝܵܐ: ܘܕܒܼܝܼܩܠܗ݇ܘܿܢ ܘܡܚܝܼܠܗ݇ܘܿܢ ܥܲܠ ܙܩܝܼܦܵܐ. ܡܘܼܬܸܒܼܠܹܗ ܓܵܢܹܗ ܕܡܵܐܹܬ: ܕܐܘܼܦ ܚܵܝܹܐ: ܕܝܵܗ݇ܒܸܠ ܡܲܙܒܲܛܬܵܐ ܘܡܲܚܙܵܝܬܵܐ ܕܩܝܵܡܬܵܐ ܠܟܠܵܝ ܒܢܲܝ̈ܢܵܫܵܐ. ܘܚܝܼܠܹܗ ܘܩܝܼܡܠܹܗ ܘܣܸܩܠܹܗ ܠܫܡܲܝܵܐ: ܘܗܕܝܼܪܵܐ ܝ݇ܠܹܗ ܕܐܵܬܹܐ ܘܡܲܩܝܸܡ ܠܡܝܼܬܹ̈ܐ. ܘܐܘܼܦ ܠܐܵܗܵܐ ܫܸܡܫܵܐ: ܕܐܵܕܝܼܵܐ ܕܦܵܩܘܿܕܹܐ ܝ݇ܘܸܬ݁ ܐܸܠܝܼ ܕܣܵܓܼܕܸܢ ܐܸܠܹܗ ܕܚܘܼܫܟܸܢܹܗ ܒܥܸܕܵܢܵܐ ܕܗ݁ܘ ܦܝܼܫܠܹܗ ܙܩܝܼܦܵܐ: ܕܡܲܢܚܸܣ ܩܵܐ ܝܼܗܘܼܕܵܝܹ̈ܐ: ܗܵܘ ܕܦܝܼܫܠܹܗ ܙܩܝܼܦܵܐ ܠܹܐ ܗ݇ܘ̣ܵܐ ܓܘܼܢܵܗܟܲܪ: ܐܸܠܵܐ ܕܦܵܐܹܫ ܣܓܼܝܼܕܵܐ. ܐܵܡܸܪ ܐܸܠܹܗ ܡܲܠܟܵܐ: ܗܲܠ ܐܵܕܝܼܵܐ ܗܲܕܟܼܵܐ ܫܡܸܥܠܝܼ: ܒܘܼܬ ܐܵܗܵܐ ܕܟܹܐ ܐܵܡܪܝܼ ܝܼܗ݇ܘܵܘ ܕܠܐܲܠܵܗܵܐ ܕܟܪܸ̈ܣܛܝܵܢܹܐ ܙܩܸܦܠܗ݇ܘܿܢ ܝܼܗܘܼܕܵܝܹ̈ܐ: ܐ݇ܡܸܪܹܗ ܩܲܕܝܼܫܵܐ ܫܸܡܥܘܿܢ: ܚܵܣܠܝܼ ܡܵܪܝܼ ܡܲܠܟܵܐ ܕܐܵܡܪܝܼ ܟܪܸ̈ܣܛܝܵܢܹܐ ܐܵܗܵܐ: ܡܲܪ̈ܩܝܘܿܢܹܐ ܝ݇ܢܵܐ ܕܟܹܐ ܐܵܡܪܝܼ: ܐܵܢܝܼ ܒܕܲܓܵܠܘܼܬܼܵܐ ܒܸܩܪܵܝܵܐ ܝܼܗ݇ܘܵܘ ܥܲܠ ܓܵܢܵܝ ܫܸܡܵܐ ܕܟܪܸ̈ܣܛܝܵܢܹܐ.

ܐܵܡܸܪ ܐܸܠܹܗ ܡܲܠܟܵܐ: ܐܸܢ ܠܢܘܼܪܵܐ ܡ݂ܢ ܣܵܒܵܒ ܡܵܝܘܿܬܵܐ ܝ݇ܠܹܗ ܠܹܐ ܝ݇ܘܸܬ݁ ܒܸܣܓܼܵܕܵܐ: ܒܲܣ ܣܓܼܘܿܕ ܠܫܸܡܫܵܐ ܕܠܵܐ ܡܵܝܬܵܐ. ܓ̰ܘܼܘܸܒܠܹܗ ܩܲܕܝܼܫܵܐ ܫܸܡܥܘܿܢ ܘܐ݇ܡܸܪܹܗ. ܕܵܐܟܼܝܼ ܠܫܸܡܫܵܐ ܒܸܬ ܣܵܓܼܕܸܢ ܗ݁ܝ ܕܠܸܐ ܟܵܠܝܵܐ ܒܗܘܼܟܡܘܿܗ݁: ܐܸܠܵܐ ܟܠ ܝܵܘܡܵܐ ܟܹܐ ܒܲܛܸܠ ܗܘܼܟܡܘܿܗ݁: ܘܟܹܐ ܥܵܒܸܪ ܚܵܫܟܵܐ ܒܫܵܘܦܘܼܗ݁: ܘܒܫܸܢܹ̈ܐ ܕܝܼܘܼܗ݁: ܒܥܕܵܢܵܐ ܟܹܐ ܝܵܪܟܼܵܗ݁: ܘܒܥܸܕܵܢܵܐ ܟܹܐ ܦܵܝܫܵܐ ܟܪܝܼܬܵܐ؟ ܘܡܸܢ݇ܕܪܸܫ݇ ܕܵܐܟܼܝܼ ܒܸܬ ܣܵܓܼܕܸܢ ܠܗ݁ܘ ܕܐܵܦܸܢ ܠܹܐ ܡܵܐܹܬ: ܐܝܼܢܵܐ ܝ݇ܕܸܥܬܵܐ ܘܦܲܪܡܵܝܬܵܐ ܘܗܲܡܙܲܡܬܵܐ ܠܲܝܬ ܠܹܗ؟ ܕܬܠܵܬܵܐ ܐܵܗܵܐ ܝ݇ܠܵܗ݁: ܕܵܐܟܼܝܼ ܒܸܬ ܚܵܫܒܲܚ ܕܡܵܐܹܬ: ܟܲܕ ܗ݁ܘ ܐܘܼܦ ܠܵܐ ܝ݇ܠܹܗ ܚܵܝܵܐ؟ ܒܘܼܬ ܕܐܲܢܹܐ ܕܦܝܵܫܵܐ ܝܼܗ݇ܘ̣ܵܘ ܗܘܼܡܙܸܡܹ̈ܐ ܟܪܸܒܠܹܗ ܡܲܠܟܵܐ: ܐܝܼܢܵܐ ܙܲܒܛܘܼܢܹܐ ܗ݇ܘ̣ܵܐ ܠܡܲܒܝܵܢܬܹܗ ܩܵܕ݇ܡ ܦܲܐܬܵܐ: ܐ݇ܡܸܪܹܗ ܩܵܐ ܫܸܡܥܘܿܢ: ܫܒܼܘܿܩ ܠܗ݇ܘܿܢ ܠܗܹܡܸܙܡܵܢܹ̈ܐ ܕܝܼܵܘܟܼܘܿܢ: ܘܥܒܼܘܿܕ ܐܵܢܝܼ ܕܩܵܡ ܦܲܩܕܸܢܘܼܟܼ: ܘܣܓܼܘܿܕ ܠܢܘܼܪܵܐ ܘܠܫܸܡܫܵܐ ܕܐܲܠܵܗܹ̈ܐ: ܘܚܝܝܼ ܕܠܵܐ ܡܲܝܬܸܬ݁. ܐܝܼܢܵܐ ܢܲܨܝܼܚܵܐ ܐ݇ܡܸܪܹܗ: ܫܡܸܥܠܘܼܟܼ ܡܵܪܝܼ ܡܲܠܟܵܐ ܡ݂ܢ ܪܹܓܘܼܟܼ: ܕܐܸܦܵܢ ܟܠܵܝ ܓܲܪ̈ܡܝܼ ܒܢܘܼܪܵܐ ܒܸܬ ܩܵܝܕܝܼ ܡ݂ܢ ܦܘܼܩܕܵܢܵܐ ܕܡܲܠܟܘܼܬܘܼܟܼ. ܐܵܢܵܐ ܠܸܐ ܥܵܒܼܕܸܢ: ܐ݇ܡܸܪܹܗ ܐܸܠܹܗ ܡܲܠܟܵܐ: ܐܵܕܝܼܵܐ ܫܸܡܥܘܿܢ ܒܐܵܗܵܐ ܦܸܪܣܲܬ ܝܼܠܵܗ݁ ܕܣܵܓܼܕܸܬ݁ ܠܢܘܼܪܵܐ ܘܫܸܡܫܵܐ: ܒܸܬ ܦܵܝܫܸܬ ܦܸܨܝܵܐ ܡ݂ܢ ܩܸܛܠܵܐ. ܘܠܹܐ ܦܵܝܫܸܬ ܣܘܼܦܝܵܐ ܠܡܵܘܬܵܐ: ܐܸܠܵܐ ܒܸܬ݁ ܚܵܝܸܬ݁. ܓ̰ܘܼܘܸܒܠܹܗ ܛܘܼܒܼܵܢܵܐ ܫܸܡܥܘܿܢ ܘܐ݇ܡܸܪܹܗ: ܒܘܼܫ ܨܦܵܝܝܼ ܝ݇ܠܹܗ ܩܸܛܠܵܐ ܐܸܠܝܼ ܒܘܼܬ ܐܲܠܵܗܵܐ ܡ݂ܢ ܟܠ ܚܲܝ̈ܝܲܢ. ܘܠܹܐ ܗ݇ܘ̣ܵܐ ܒܙܕܥܘܿܬܵܐ ܩܵܒܘܿܠܸܐ ܝ݇ܘܸܢ ܐܵܗܵܐ ܥܲܠܝܼ: ܐܸܠܵܐ ܒܚܲܕܘܼܬܵܐ ܡ݂ܢ ܟܠܹܗ ܠܸܒܵܐ. ܛܘܼܒܼܵܐ ܠܗܵܘ ܕܚܵܫܲܚ ܥܲܠ ܕܐܵܗܵܐ: ܝܲܢ ܒܘܼܬ ܐܲܠܵܗܵܐ ܦܵܐܹܫ ܡܘܼܣܠܝܼܵܐ ܝܲܢ ܡܘܼܠܝܸܨܵܐ ܓܵܘ ܒܹܝܬܼ ܐܲܣܝܼܪܹ̈ܐ: ܝܲܢ ܓ̰ܘܼܢܓ̰ܵܪܹ̈ܐ ܕܩܲܒܸܠ ܒܘܼܬ ܫܪܵܪܵܐ: ܐܝܼܢܵܐ ܒܘܼܫ ܙܵܘܕܵܐ ܛܘܼܒܼܵܐ ܠܗ݁ܘ ܕܒܘܼܬ ܐܲܠܵܗܵܐ ܦܵܐܹܫ ܩܛܝܼܠܵܐ: ܕܐܸܠܹܗ ܩܘܼܘܸܠܹܗ ܝ݇ܢܵܐ ܚܲܝܹ̈ܐ ܕܐܵܒܲܕ ܐܵܒܵܕܝܼܢ.

ܐ݇ܡܸܪܹܗ ܡܲܠܟܵܐ: ܠܹܐ ܗ݇ܘܹܐܠܵܗ݁ ܐܵܗܵܐ ܚܲܕ݇ ܥܵܩܸܠܕܵܪܘܼܬܵܐ ܝܵܐ ܫܸܡܥܘܿܢ ܕܟܸܠܝܵܐ ܝ݇ܘܸܬ݁ ܒܪܸܙܵܝܘܼܟܼ: ܘܪܵܒܵܐ ܒܸܬ ܦܵܝܫܝܼ ܩܛܝܼܠܹ̈ܐ ܥܲܡܘܼܟܼ. ܥܒܼܘܿܕ ܪ̈ܲܚܡܹܐ ܥܲܠ ܩܸܛܠܘܟܼ: ܘܥܲܠ ܩܸܛܠܵܐ ܕܐܲܠܦܹ̈ܐ ܕܗܕܝܼܪܹ̈ܐ ܝ݇ܢܵܐ ܕܛܲܠܸܩܝܼ. ܡ݂ܢ ܣܵܒܵܒ ܕܒܫܸܡܫܵܐ ܕܲܝܵܢܵܐ ܕܟܠܵܗ݁ ܐܲܪܥܵܐ ܒܸܡܝܵܝܵܐ ܝ݇ܘܸܢ. ܐܸܢ ܐܵܗܵܐ ܗܵܘܹܝܬ݁ ܥܸܨܝܵܐ ܥܲܠܝܼ ܕܠܵܐ ܡܲܨܝܲܬܘܼܟܼ. ܕܐܸܠܘܼܟܼ ܕܘܼܣܬܝܼ ܝܼܘܸܬ ܗ݇ܘ̣ܵܐ ܒܸܬ ܩܲܛܠܸܢ: ܘܡܸܢ݇ܕܪܸܫ݇ ܠܸܐ ܥܵܒܼܕܸܢ ܪ̈ܲܚܡܹܐ ܥܲܠ ܟܠ ܡ݁ܢ ܕܐܝܼܬ ܥܲܠܘܼܗܝ ܐܵܗܵܐ ܫܸܡܵܐ: ܗܲܕܟܼܵܐ ܡܲܟܠܝܼ ܠܲܢ ܡ݂ܢ ܕܸܡܘܼܟܼ: ܕܐܘܼܦ ܡ݂ܢ ܕܸܡܵܐ ܕܪܹ̈ܒܵܘܵܬܹܐ ܒܸܬ ܟܵܠܸܢ. ܘܐܸܢ ܠܵܐ ܥܵܒܼܕܸܬ ܪ̈ܲܚܡܹܐ ܥܲܠ ܓܵܢܘܼܟܼ ܒܘܼܬ ܩܸܫܝܘܼܬܵܐ ܕܠܸܒܘܼܟܼ: ܥܒܼܘܿܕ ܪ̈ܲܚܡܹܐ ܥܲܠ ܓܵܢܵܬܹ̈ܐ ܕܐ݇ܚܹܪܹ̈݇ܢܹܐ. ܓ̰ܘܼܘܸܒܠܹܗ ܠܸܒܵܢܵܐ ܫܸܡܥܘܿܢ ܘܐ݇ܡܸܪܹܗ: ܒܫܪܵܪܵܐ ܡܵܪܝܼ ܡܲܠܟܵܐ: ܕܫܝܼܕܵܢܵܐ ܝ݇ܠܹܗ ܡ݁ܢ ܕܠܵܐ ܪܲܚܸܡ ܥܲܠ ܓܵܢܹܗ ܘܥܲܠ ܓܵܢܵܬܹ̈ܐ ܕܐܲܚܘܿܢܘܵܬ̈ܝܼ: ܒܘܼܬ ܕܐܵܗܵܐ ܕܒܼܝܼܩܵܐ ܝ݇ܘܸܢ ܒܝܘܼܠܦܵܢܝܼ. ܣܵܒܵܒ ܐܵܗܵܐ ܕܝܘܼܠܦܵܢܲܢ ܡܲܠܘܿܦܹܐ ܝ݇ܠܹܗ: ܕܡܘܼܕܝܼ ܝ݇ܠܹܗ ܝܘܼܬܪܵܢܲܢ ܐܸܢ ܥܵܠܡܵܐ ܟܠܹܗ ܩܵܢܹܐ ܐ݇ܢܵܫܵܐ ܘܓܵܢܹܗ ܚܵܣܸܪܵܗ݁؟ ܝܲܢ ܡܘܼܕܝܼ ܒܸܬ ܝܵܗ݇ܒܸܠ ܐ݇ܢܵܫܵܐ ܒܵܕܲܠ ܓܵܢܹܗ؟ ܡ݂ܢ ܣܵܒܵܒ ܥܲܠ ܚܲܝܹ̈ܐ ܕܓܘܼܫ̈ܡܲܢ ܐܝܼܬܠܘܼܟܼ ܗܘܼܟܡܵܐ: ܡܵܪܝܼ ܡܲܠܟܵܐ: ܐܸܢ ܪܸܙܵܝܘܼܟܼ ܝ݇ܠܵܗ݁: ܫܩܘܿܠܘܿܢ ܡܸܢܲܢ ܒܩܵܠܘܼܠܘܼܬܵܐ: ܒܡܘܼܕܝ݇ ܡܵܘܬܵܐ ܕܪܵܙܝܼ ܝ݇ܘܸܬ ܒܝܹܗ. ܐܵܡܸܪ ܐܸܠܹܗ ܡܲܠܟܵܐ: ܐܵܦܸܢ ܐܲܢ݇ܬ ܐܵܕܝܼܵܐ ܒܣܲܟܼܠܘܼܬܵܐ ܠܹܐ ܪܲܚܡܸܬ݁ ܥܲܠ ܓܵܢܘܼܟܼ: ܐܝܼܢܵܐ ܒܢܘܿܢܹ̈ܐ ܕܝܘܼܠܦܵܢ̈ܘܼܟܼ ܒܸܙܕܲܥܝܵܐ ܝ݇ܢܵܐ ܒܝܲܕ ܡܵܘܬܘܼܟܼ. ܘܒܸܥܕܵܢܵܐ ܝ݇ܢܵܐ ܪܸܙܵܝܝܼ. ܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ ܐܸܠܹܗ: ܚܵܣܠܵܐ ܠܗ݇ܘܿܢ ܕܚܲܝܝܼ ܒܐܲܢܹܐ ܚܲܝܹ̈ܐ: ܘܗܵܘܝܼ ܟܘܼܦܹ̈ܐ ܡ݂ܢ ܚܲܝܹ̈ܐ ܕܗܕܝܼܪܹ̈ܐ ܝ݇ܢܵܐ ܩܵܬܝܼ: ܐܵܕܝܼܵܐ ܒܲܚܙܵܝܵܐ ܝ݇ܘܸܬ ܡܵܪܝܼ ܡܲܠܟܵܐ: ܕܩܸܢܝܹ̈ܐ ܝ݇ܢܵܐ ܫܪܵܪܵܐ ܡ݂ܢ ܐܲܠܵܗܵܝ: ܘܒܝܲܕ ܡܵܘܬܵܝ ܦܵܐܹܫ ܝ݇ܕܸܥܝܵܐ ܚܘܼܒܵܝ ܕܠܟܸܣ ܡܵܪܵܝ ܘܒܵܪܘܿܝܵܝ. ܡ݂ܢ ܣܵܒܵܒ ܕܒܬܵܓ̰ܘܼܟܼ ܡܝܘܼܩܪܵܐ ܘܡܫܲܡܗܵܐ. ܠܚܸܩܪܹܗ ܕܐܲܠܵܗܵܐ ܚܵܝܵܐ ܠܹܐ ܥܲܠܕܝܼ ܘܠܹܐ ܡܫܲܚܠܸܦܝܼ. ܐ݇ܡܸܪܹܗ ܡܲܠܟܵܐ: ܩܵܡܘܿܕܝܼ ܒܩܲܫܕܲܪܬܘܼܟܼ ܒܸܗܘܵܝܵܝܵܐ ܝ݇ܘܸܬ ܥܸܨܝܵܐ ܥܲܠܝܼ: ܘܒܸܬ ܡܲܚܪܸܒܼܢܹܗ ܫܘܼܦܪܘܼܟܼ ܫܲܗܘܸܬܵܢܵܐ ܒܣܲܝܦܵܐ: ܘܒܕܸܡܵܐ ܒܸܬ ܓܵܒܼܠܸܢܵܗ݁ ܩܘܼܡܬܘܼܟܼ ܣܩܸܠܬܵܐ؟ ܘܐܵܕܝܼܵܐ ܐܸܢ ܠܵܐ ܥܵܒܼܕܸܬ݁ ܠܝܼ ܐܝܼܩܵܪܵܐ ܩܵܕ݇ܡ ܓܘܼܪ̈ܵܢܝܼ: ܘܠܵܐ ܣܵܓܼܕܸܬ ܠܫܸܡܫܵܐ ܐܲܠܵܗܹܗ ܕܡܲܕܢܚܵܐ: ܩܘܼܕܡܹܐ ܒܥܕܵܢܵܐ ܟܪܝܼܬܵܐ ܒܸܬ ܦܵܐܹܫ ܚܪܝܼܒܼܵܐ ܫܘܼܦܪܘܼܟܼ. ܓ̰ܘܼܘܸܒܠܹܗ ܚܲܝܠܵܢܵܐ ܒܓܵܢܹܗ ܫܸܡܥܘܿܢ ܘܐ݇ܡܸܪܹܗ: ܐܵܢܵܐ ܠܫܸܡܫܵܐ ܠܵܐ ܣܵܓܼܕܸܢ. ܣܵܒܵܐ ܐܸܢ ܒܣܵܡܘܼܟܼ ܝܼܠܵܗ݁ ܚܲܝ̈ܝܼ: ܐܸܢ ܒܣܵܡܘܼܟܼ ܝ݇ܠܵܗ݁ ܐܸܕܝܘܿܡ݇ ܝܵܘܡܵܐ: ܘܐܸܢ ܪܵܙܝܼ ܝ݇ܘܸܬ ܩܘܼܕܡܹܐ ܫܩܘܿܠܗ݇ܘܿܢ ܡܸܢܝܼ. ܕܐ݇ܡܸܪܘܼܟܼ ܕܒܸܬ ܡܲܚܪܸܒܼܢܹܗ ܫܘܼܦܪܘܼܟܼ ܐܝܼܬܠܹܗ ܡܢܵܚܡܵܢܵܐ ܘܡܲܩܝܼܡܵܢܵܐ: ܘܟܹܐ ܝܵܗ݇ܒܸܠ ܫܘܼܦܪܵܐ ܚܩܝܼܪܵܐ ܕܠܹܐ ܐܵܬܹܐ ܠܡܗܲܡܙܼܡܹܐ ܠܟܘܼܦܘܼܬܹܗ ܟܹܐ ܡܲܡܟܸܟܼܵܐ.

ܗܵܝܓܵܗ݁ ܦܩܸܕܠܹܗ ܡܲܠܟܵܐ: ܕܦܵܐܹܫ ܐ݇ܣܝܼܪܵܐ ܗܲܠ ܨܲܦܪܵܐ. ܣܵܒܵܒ ܐ݇ܡܸܪܹܗ ܕܥܒܼܘܿܕ ܒܵܘܲܪ ܥܵܒܸܕ ܪܵܥܝܼ ܒܓܵܢܹܗ ܘܫܵܡܲܥ ܐܸܠܝܼ. ܘܗ݇ܘܹܐܠܵܗ݁ ܟܲܕ ܒܸܓܪܵܫܘܗܝ ܝܼܗ݇ܘ̣ܵܐ ܒܫܸܫܸܠܬܵܐ: ܘܦܲܠܛܝܼ ܗ݇ܘ̣ܵܘ ܠܹܗ ܒܬܲܪܥܵܐ ܕܡܲܠܟܵܐ: ܓܘܗܫܬܐܵܙܲܕ ܟܸܠܝܵܐ ܗ݇ܘ̣ܵܐ ܠܚܕ݇ ܓܸܒܵܐ. ܡ݂ܢ ܣܵܒܵܒ ܪܵܒܵܐ ܫܲܗܒܼܘܼܬܹܐ ܗ݇ܘ̣ܵܐ ܠܫܠܵܡܹܗ ܕܫܸܡܥܘܿܢ ܩܲܕܝܼܫܵܐ: ܩܘܼܫܕܸܪܹܗ ܘܩܘܼܪܒܸܢܹܗ ܘܣܓܼܸܕܠܹܗ ܩܵܕ݇ܡܘܼܗܝ. ܘܦܫܸܡܠܹܗ ܒܝܹܗ ܛܘܼܒܼܵܢܵܐ ܫܸܡܥܘܿܢ: ܦܬܸܠܹܗ ܦܲܐܬܹܗ ܡܸܢܹܗ ܘܐ݇ܡܸܪܹܗ: ܕܠܲܝܬ ܠܝܼ ܫܠܵܡܵܐ ܥܲܡ ܡ݁ܢ ܕܟܦܸܪܹܗ ܒܐܲܠܵܗܵܐ ܡܲܠܟܵܐ ܫܲܪܝܼܪܵܐ: ܒܘܼܬ ܬܵܘܕܝܼܬܵܐ ܘܐܝܼܩܵܪܵܐ ܘܩܘܼܘܸܠܹܗ ܡܲܠܟܵܐ ܫܵܒܼܘܿܪ: ܘܠܹܐ ܗܵܘܹܐ ܠܝܼ ܫܠܵܡܵܐ ܥܲܡ ܡ݁ܢ ܕܸܪܹܗ ܘܟܦܸܪܹܗ ܘܒܐܲܠܵܗܝܼ ܘܒܡܫܝܼܚܹܗ ܝܼܫܘܿܥ ܡܵܪܝܼ. ܘܒܗ݁ܝ ܥܸܕܵܢܵܐ ܓܘܼܫܬܐܵܙܵܕ ܠܝܹܐܠܹܗ ܠܝܵܝܬܵܐ ܓܘܼܪܬܵܐ ܘܪܵܒܵܐ ܡܲܪܝܼܪܬܵܐ: ܘܡܲܩܘܸܚ ܗ݇ܘ̣ܵܐ ܘܒܵܟܼܝܼ ܗ݇ܘ̣ܵܐ ܒܸܟܼܝܵܐ ܚܲܝܠܵܢܵܐ ܘܐܵܡܸܪ ܗ݇ܘ̣ܵܐ: ܘܵܝ ܠܝܼ ܡܘܼܕܝܼ ܩܘܼܘܸܡܠܹܗ ܐܸܠܝܼ: ܐܸܢ ܫܸܡܥܘܿܢ ܕܝܼܗ݇ܘ̣ܵܐ ܣܵܘܓܘܼܠܝܼ ܒܘܼܫ ܡ݂ܢ ܟܠ: ܘܟܹܐ ܡܲܚܸܒ ܗ݇ܘ̣ܵܐ ܠܝܼ ܐܲܝܟܼ ܓܵܢܹܗ: ܐܵܗܵܐ ܟܪܸܒܠܹܗ ܡܸܢܝܼ: ܒܲܣ ܟܡܵܐ ܒܘܼܫ ܙܵܘܕܵܐ ܐܲܠܵܗܵܐ ܒܸܬ ܟܵܪܸܒ ܡܸܢܝܼ. ܝܲܢ ܡܘܼܕܝܼ ܒܸܬ ܥܵܒܸܕ ܒܝܝܼ ܕܕܘܼܓܸܠܝܼ ܒܝܹܗ ܡܘܕܝ݇ ܠܵܙܸܡ ܗ݇ܘ̣ܵܐ ܩܵܬܝܼ ܣܲܩܵܐ ܗ݁ܘ ܕܝܼܠܹܗ ܓܵܘ ܒܲܝܬܵܐ؟ ܩܵܡܘܿܕܝܼ ܚܵܫܸܚ ܗ݇ܘ̣ܵܐ ܩܵܬܝܼ ܩܸܛܡܵܐ ܒܛܸܫܘܵܐ؟ ܝܼܫܘܿܥ ܕܟܦܸܪܝܼ ܒܝܹܗ: ܐܸܕܝܘܿܡ݇ ܝܵܘܡܵܐ ܸܬ ܡܵܘܕܸܢ ܒܝܹܗ ܩܵܕ݇ܡ ܗ݁ܘ ܕܟܦܸܪܝܼ ܒܝܹܗ. ܐܲܠܵܗܵܐ ܫܲܪܝܼܪܵܐ ܗ݇ܘ̣ܵܐ ܐܸܠܝܼ ܦܬܸܠܝܼ ܡ݂ܢ ܫܪܵܪܹܗ ܒܝܲܕ ܣܵܦ̈ܘܵܬܝܼ ܕܝܼܢܵܐ ܛܲܡܐܹ̈ܐ: ܕܐܸܕܝܘܿܡ݇ ܝܵܘܡܵܐ ܒܸܬ ܩܲܕܫܸܢܘܿܢ ܒܫܵܟܲܪܬܵܐ ܕܫܸܡܹܗ. ܘܒܓ̰ܲܠܕܘܼܬܵܐ ܘܒܩܵܠܘܼܠܘܼܬܵܐ ܐ݇ܙܸܠܹܗ ܠܒܲܝܬܹܗ: ܫܘܼܠܸܚܠܹܗ ܠܒܸܫܬܹܗ: ܘܠܒܸܫܠܹܗ ܓ̰ܘܼܠܹ̈ܐ ܟܘܼܡܹ̈ܐ ܕܬܵܙܝܼ: ܘܐ݇ܬܹܐܠܹܗ ܝ݇ܬܸܒܼܠܹܗ ܒܕܘܼܟܬܹܗ ܒܪܹܫܵܐ ܕܘܲܟܝܼܠܹ̈ܐ ܚܲܒܼܪ̈ܵܘܵܬܘܼܗܝ. ܣܵܒܵܒ ܨܦܵܝܝܼ ܟܹܐ ܝܵܕܲܥ ܗ݇ܘ̣ܵܐ ܠܵܗ݁ ܕܘܼܟܵܬܵܐ ܕܬܝܵܒܼܬܹܗ: ܐܘܼܦ ܬܲܠܡܸܕܵܢܹ̈ܐ ܕܫܵܒܼܘܿܪ ܡܲܠܟܵܐ ܘܟܠ ܐܵܢܝܼ ܕܒܸܚܙܵܝܵܐ ܝܼܗ݇ܘ̣ܵܘ ܐܸܠܹܗ: ܡ݂ܢ ܐܵܢܝܼ ܕܒܸܥܒܼܵܪܵܐ ܝܼܗ݇ܘ̣ܵܘ ܘܒܸܦܠܵܛܵܐ: ܥܲܓ̰ܒܝܼ ܗ݇ܘ̣ܵܘ ܒܝܹܗ. ܗܲܪ ܐܵܗܵܐ ܡ݂ܢ ܡܲܠܟܵܐ ܠܵܐ ܦܝܼܫܠܵܗ݁ ܛܫܝܼܬܵܐ. ܫܘܼܕܸܪܹܗ ܐܸܠܹܗ ܡܲܠܟܵܐ ܓ̰ܘܼܘܵܒ ܘܐ݇ܡܸܪܹܗ: ܡܘܼܕܝܪ ܝ݇ܠܵܗ݁ ܐܵܗܵܐ ܫܝܼܕܵܢܘܼܬܵܐ ܕܩܘܼܘܸܡܠܵܐ ܐܸܠܘܼܟܼ؟ ܘܐܵܢܵܐ ܚܵܝܵܐ ܝ݇ܘܸܢ ܘܟܸܠܝܵܐ ܒܐܲܩ̈ܠܝܼ: ܘܬܵܓ̰ܝܼ ܒܪܸܫܝܼ ܝ݇ܠܹܗ ܘܐܲܢ݇ܬ ܝ݇ܬܝܼܒܼܵܐ ܝ݇ܘܸܬ ܒܬܵܙܝܼ؟ ܡܵܢܝܼ ܝ݇ܠܹܗ ܡܝܼܬܵܐ ܓܵܘ ܒܲܝܬܘܼܟܼ؟ ܒܲܟܼܬܘܼܟܼ ܝܲܢ ܒܢܘܿܢ̈ܘܼܟܼ: ܕܗܵܐ ܦܫܝܼܡܵܐ ܝ݇ܘܸܬ؟ ܟܲܕ ܒܘܼܬ ܐܵܗܵܐ ܟܝܵܢܘܼܟܼ ܒܸܣܗܵܕܵܐ ܝ݇ܠܹܗ: ܠܲܝܬ ܠܘܼܟܼ ܠܵܐ ܒܵܟܼܬܵܐ ܘܠܵܐ ܙܸܐ ܒܢܘܿܢܹ̈ܐ. ܒܥܸܕܵܢܵܐ ܕܐܲܢܹܐ ܫܸܼܡܥܝܵܝ ܠܹܗ ܓܘܼܗܫܬܐܵܙܵܕ ܡ݂ܢ ܫܠܝܼܚܹ̈ܐ (ܫܘܼܕܪܹ̈ܐ) ܕܡܲܠܟܵܐ: ܓ̰ܘܼܘܸܒܠܹܗ ܘܐ݇ܡܸܪܹܗ: ܒܕܘܼܙܘܼܬܵܐ ܦܫܝܼܡܵܐ ܝ݇ܘܸܢ: ܡܣܵܒܵܒ ܗܹܡܸܙܡܲܢ ܕܒܸܐܡܵܪܵܐ ܝ݇ܘܸܬ ܝܵܐ ܓܘܼܗܫܬܐܵܙܵܕ؟ ܓ̰ܘܼܘܸܒܠܗ݇ܘܿܢ ܐ݇ܢܵܫܹ̈ܐ ܡ݂ܢ ܘܲܟܝܼܠܹ̈ܐ ܚܲܒܼܪ̈ܵܬܘܼܗܝ ܘܐ݇ܡܸܪܘܿܢ ܠܹܐ ܛܵܫܲܚ ܡ݂ܢ ܝ݇ܕܸܥܬܘܼܟܼ ܝܵܐ ܡܲܠܟܵܐ ܕܡܲܠܟܹ̈ܐ: ܕܗܵܐ ܬܠܵܬ݇ܐ ܝܵܘܡܵܢܹ̈ܐ: ܡ݂ܢ ܕܫܸܡܥܘܿܢ ܪܹܫܵܐ ܕܢܵܨܪ̈ܵܝܹܐ ܐ݇ܬܹܐܠܹܗ ܠܐܲܬܪܵܐ: ܠܹܐ ܝ݇ܠܹܗ ܐܸܬܝܵܐ ܓܘܼܗܫܬܐܵܙܵܕ ܠܬܲܪܥܵܐ ܕܡܲܠܟܵܐ: ܫܒܼܘܿܩ ܡ݂ܢ ܐܵܕܝܼܵܐ ܐܸܕܝܘܿܡ݇ ܝܵܘܡܵܐ: ܣܵܒܵܒ ܫܡܸܥܠܲܢ ܕܥܲܠ ܣܲܩܵܐ ܘܩܸܛܡܵܐ ܓܲܘ ܒܲܝܬܹܗ ܝܵܬܸܒܼ ܗ݇ܘ̣ܵܐ.

 ܘܟܲܕ ܐܲܢܹܐ ܚܲܒܪ̈ܵܢ݂ܹܐ ܫܸܡܥܝܵܝ ܠܹܗ ܡܲܠܟܵܐ: ܦܘܼܩܸܕܠܹܗ ܕܥܵܒܸܪ ܓܘܼܗܫܬܐܵܙܵܕ ܘܟܵܠܹܐ ܩܵܕ݇ܡܘܼܗܝ: ܕܡܸܢܹܗ ܝܵܕܲܥ ܒܘܼܬ ܕܐܵܗܵܐ ܗܲܓ̰ܲܬ: ܘܡܘܼܕܝܼ ܝ݇ܠܵܗ݁ ܣܵܒܵܒ ܕܚܲܫܹܗ. ܐܝܼܢܵܐ ܒܥܕܵܢܵܐ ܕܥܒܼܸܪܹܗ ܓܘܼܗܫܬܐܵܙܵܕ ܩܲܕ݇ܡ ܡܲܠܟܵܐ ܘܚܙܝܼܠܹܗ ܘܐ݇ܡܸܪܹܗ ܐܸܠܹܗ: ܕܲܝܘܵܐ ܐܝܼܬܠܘܼܟܼ ܕܐܵܗܵܐ ܚܲܫܵܐ ܒܝܼܫܵܐ ܒܸܥܒܼܵܕܵܐ ܝ݇ܘܸܬ ܠܡܲܠܟܘܼܬܝܼ؟ ܓ̰ܘܼܘܸܒܠܹܗ ܓܘܼܗܫܬܐܵܙܵܕ ܘܐ݇ܡܸܪܹܗ: ܗܲܕܟܼܵܐ ܠܵܐ ܐܵܡܸܪ ܡܵܪܝܼ ܡܲܠܟܵܐ: ܡ݂ܢ ܣܵܒܵܒ ܕܠܹܐ ܗ݇ܘܵܐ ܐܲܚܟ̰ܝܼ ܕܲܝܘܵܐ ܠܲܝܬ ܠܝܼ: ܐܸܠܵܐ ܐܘܼܦ ܒܥܵܩܸܠܕܲܪܘܼܬܵܐ ܕܣܲܝܒܘܼܬܝܼ: ܠܚܝܼܵܠܹ̈ܐ ܦܝܼܟܹ̈ܐ ܡܨܵܝܵܐ ܝ݇ܘܸܢ ܕܝܵܗ݇ܒܸܢ ܛܲܥܡܵܐ. ܐܵܡܸܪ ܐܸܠܹܗ ܡܲܠܟܵܐ: ܕܵܐܟܼܝܼ ܠܒܼܝܼܫܵܐ ܝ݇ܘܸܬ݁ ܓ̰ܘܼܠܹ̈ܐ ܟܘܼܡܹ̈ܐ ܐܲܝܟܼ ܫܝܼܕܵܢܹ̈ܐ: ܕܠܹܐ ܝ݇ܠܵܗ ܥܕܵܢܵܐ ܕܚܲܫܵܐ؟ ܘܐܘܼܦ ܙܹܐ ܫܘܼܕܸܪܘܼܟܼ ܐܸܠܝܼ ܓܘܼܢܵܗܟܲܪ ܝ݇ܘܸܢ ܠܡܵܘܬܵܐ. ܐܵܡܲܪ ܐܸܠܹܗ ܓܘܼܗܫܬܐܵܙܵܕ: ܒܕܘܼܙܘܼܬܵܐ ܓܘܼܢܵܗܟܲܪ ܝ݇ܘܸܢ ܗܲܠ ܡܵܘܬܵܐ. ܡ݂ܢ ܣܵܒܵܒ ܥܒܼܸܕܠܝܼ ܓܢܵܗܵܐ ܘܪܵܒܵܐ ܩܸܫܝܵܐ: ܘܣܲܟܼܠܘܼܬܵܐ ܥܒܼܸܕܠܝܼ ܪܵܒܵܐ ܓܘܼܪܬܵܐ: ܐܵܡܸܪ ܐܸܠܹܗ ܡܲܠܟܵܐ: ܘܗܲܕܟܼܵܐ ܓܘܼܪܬܵܐ ܝ݇ܠܵܗ݁ ܓܢܵܗܘܼܟܼ: ܕܥܲܠ ܣܲܩܵܐ ܘܩܸܛܡܵܐ ܝܵܬܒܸܬ݁؟ ܘܗܲܕܟܼܵܐ ܓܘܼܪܬܵܐ ܝ݇ܠܵܗ݁ ܣܲܟܼܠܘܼܬܘܼܟܼ: ܕܠܵܒܼܫܸܬ݁ ܟܘܼܡܵܐ؟ ܐܵܡܲܪ ܓܘܼܗܫܬܐܵܙܵܕ: ܗܹܐ ܡܵܪܝܼ ܡܲܠܟܵܐ: ܓܘܼܪܬܵܐ ܝ݇ܠܵܗ݁ ܓܢܵܗܝܼ: ܘܠܲܝܬ ܠܵܗ݁ ܒܵܣܲܡܬܵܐ: ܘܓܘܼܪܬܵܐ ܝ݇ܠܵܗ݁ ܣܲܟܼܠܘܼܬܝܼ: ܠܲܝܬ݁ ܠܵܗ݁ ܦܘܼܚܵܠܵܐ. ܘܩܸܛܠܵܐ ܩܛܸܠܝܼ ܒܪܸܙܵܝܝܼ. ܘܪܵܒܵܐ ܡܲܪܝܼܪܵܐ ܝ݇ܠܹܗ: ܐܵܡܸܪ ܐܸܠܹܗ ܡܲܠܟܵܐ: ܒܡܵܢܝܼ ܥܒܼܸܕܠܘܼܟܼ ܣܲܟܼܠܘܼܬܵܐ؟ ܐܵܡܸܪ ܐܸܠܹܗ ܓܘܼܗܫܬܐܵܙܵܕ: ܒܐܲܠܵܗܵܐ ܡܵܪܵܐ ܕܟܠ: ܡ݂ܢ ܣܵܒܵܒ ܕܫܘܼܚܠܸܦܠܝܼ ܒܒܪܝܼܬܹܗ. ܘܡܸܢ݇ܕܪܸܫ݁ ܐܵܡܲܪ ܐܸܠܹܗ ܡܲܠܟܵܐ: ܘܡܘܼܕܝܼ ܝ݇ܠܹܗ ܕܛܘܼܠܸܩܠܘܼܟܼ؟ ܐܵܡܲܪ ܐܸܠܹܗ ܓܘܼܗܫܬܐܵܙܵܕ: ܪܲܗܛܵܐ ܕܗܲܝܡܵܢܘܼܬܝܼ ܡ݂ܢ ܙܥܘܿܪܘܼܬܝܼ ܘܗܲܠ ܐܵܕܝܼܵܐ. ܐܵܡܸܪ ܐܹܠܹܗ ܡܲܠܟܵܐ: ܘܩܵܐ ܡܵܢܝܼ ܩܛܸܠܘܼܟܼ: ܐܵܡܲܪ ܐܸܠܹܗ ܓܘܼܗܫܬܐܵܙܵܕ: ܠܓܵܢܝܼ ܩܛܸܠܝܼ: ܡ݂ܢ ܣܵܒܵܒ ܣܓܸܕܠܝܼ ܠܫܸܡܫܵܐ. ܐܵܡܲܪ ܐܸܠܹܗ ܡܲܠܟܵܐ ܒܟܲܪܒܵܐ ܓܘܼܪܵܐ: ܕܠܹܗ ܗ݇ܘ̣ܵܐ ܒܗܲܩܘܼܬܵܐ ܕܣܓܸܕܠܘܼܟܼ ܠܫܸܡܫܵܐ؟ ܐܵܡܲܪ ܓܘܼܗܫܬܐܵܙܵܕ: ܠܵܐ ܠܹܐ ܗ݇ܘ̣ܵܐ ܒܗܲܩܘܼܬܵܐ ܣܓܸܕܠܝܼ: ܡ݂ܢ ܣܵܒܵܒ ܣܓܼܵܕܬܵܐ ܕܚܲܝܠܵܐ ܣܓܸܕܠܝܼ: ܒܘܼܬ ܕܐܵܗܵܐ ܘܐܘܼܦ ܐܵܢܵܐ ܥܲܠ ܕܐܵܗܵܐ ܦܫܝܼܡܵܐ ܝ݇ܘܸܢ: ܕܠܵܐ ܦܝܼܫܠܝܼ ܡܘܼܫ݇ܟ̰ܚܵܐ ܫܲܪܝܼܪܵܐ: ܠܵܐ ܠܟܸܣ ܐܲܠܵܗܵܐ ܒܲܪܝܵܢܝܼ: ܠܵܐ ܙܸܐ ܠܟܸܣܠܘܼܟܼ ܒܵܒܼܵܐ ܕܓܲܒܼܪܹ̈ܐ: ܒܐܲܠܵܗܵܐ ܕܘܼܓܸܠܝܼ: ܫܒܸܩܠܝܼ ܫܪܵܪܹܗ ܘܥܒܼܸܕܠܝܼ ܪܸܙܵܝܘܼܟܼ. ܘܒܝܼܘܼܟܼ ܡܲܠܟܵܐ ܕܘܼܓܸܠܝܼ: ܘܣܓܸܕܠܝܼ ܠܫܸܡܫܵܐ ܒܦܲܐܬܵܐ ܘܠܵܐ ܒܠܸܒܵܐ. ܐܝܼܢܵܐ ܟܲܕ ܫܡܸܥܠܹܗ ܡܲܠܟܵܐ ܐܲܢܹܐ ܗܹܡܸܙܡܵܢܹ̈ܐ: ܡܠܝܼܠܹܗ ܡ݂ܢ ܟܲܪܒܹܗ ܘܐ݇ܡܸܪܹܗ: ܐܵܗܵܐ ܝ݇ܠܵܗ݁ ܟܠܵܗ݁ ܦܵܫܲܡܬܘܼܟܼ ܝܵܐ ܣܵܒܼܵܐ ܣܲܟܼܠܵܐ؟ ܐܵܢܵܐ ܒܸܬ ܥܵܒܕܸܢ ܝ݇ܢܵܐ ܬܵܙܝܼܘܿܟܼ ܓ̰ܲܠܕܹܐ ܓܵܘ ܒܲܝܬܵܐ ܕܒܲܟܼܝܵܢܹ̈ܐ ܕܥܲܠܘܼܟܼ. ܘܐܸܢ ܗܲܪ ܒܐܵܗܵܐ ܚܝܼܵܠ ܟܵܦܘܿܪܬܵܐ ܟܸܠܝܵܐ ܝ݇ܘܸܬ݁: ܕܡܸܢܘܼܗ݁ ܠܹܐ ܦܲܪܩܸܬ. ܐ݇ܡܸܪܹܗ ܬܵܘܒܵܟܲܪ ܕܗܲܩܘܼܬܵܐ ܓܘܼܗܫܬܐܵܙܵܕ: ܐܸܢ ܒܲܣܡܵܐ ܠܹܗ ܡܲܠܟܵܐ ܛܵܒܼܵܐ ܕܡܲܨܝܸܬ݁ ܐܸܠܝܼ. ܘܐܸܢ ܫܵܠܹܝܬ݁ ܘܡܲܢܝܸܚܬ݁ ܗܲܝܡܸܢ ܠܡܵܘܡܵܬ̈ܝܼ: ܣܵܒܵܒ ܒܐܲܠܵܗܵܐ ܩܲܢܝܵܢܵܐ ܕܫܡܲܝܵܐ ܘܐܲܪܥܵܐ ܝ݇ܡܝܼܠܝܼ ܘܡܘܼܙܒܸܛܠܝܼ: ܕܒܘܼܫ ܙܵܘܕܵܐ ܡ݂ܢ ܕܦܠܸܚܠܝܼ ܪܸ̈ܙܵܝܘܼܟܼ ܘܥܒܼܸܕܠܝܼ ܦܘܼܩܕܵܢܘܼܟܼ: ܡܸܢ݇ܕܪܸܫ݇ ܠܹܐ ܥܵܒܼܕܸܢ ܟܦܘܼܪܝܼܵܐ ܝܲܢ ܣܪܲܒܼܬܵܐ ܡ݂ܢ ܐܲܠܵܗܝܼ.

ܐܵܡܸܪ ܐܸܠܹܗ ܡܲܠܟܵܐ: ܒܸܬ ܦܵܚܠܸܢ: ܠܓܘܼܗܫܬܐܵܙܵܕ: ܒܘܼܬ ܐܘܼܪ̈ܚܵܬܹܐ ܫܲܪܝܼܪܹ̈ܐ ܕܗ݇ܘܹܐܠܵܗ݁ ܠܘܼܟܼ ܥܲܡ ܒܵܒܝܼ ܘܛܵܝܸܦܝܼ ܗܲܠ ܐܵܕܝܼܵܐ. ܒܘܼܬ ܕܐܵܗܵܐ ܡܲܪܝܘܼܟܹܐ ܝ݇ܘܸܢ ܒܝܼܢܵܐ ܥܲܡܘܼܟܼ ܕܦܲܪܦܘܿܠܹܐ ܝ݇ܘܸܢ ܒܝܼܘܼܟܼ: ܕܠܵܐ ܟܵܠܹܝܬ݁ ܒܚܝܼܵܠ ܕܐܵܢܝܼ ܚܲܪ̈ܵܫܹܐ ܕܦܝܵܫܵܐ ܝ݇ܢܵܐ ܩܸܪ̈ܝܹܐ ܟܪܸ̈ܣܛܝܵܢܹܐ: ܘܐܲܚܟ̰ܝܼ ܠܵܐ ܛܲܠܩܸܬ݁ ܡ݂ܢ ܚܲܝܹ̈ܐ ܘܡ݂ܢ ܚܲܒܼܪܵܒܼܘܼܬܵܐ ܕܡܵܪܵܗ݁ ܕܟܠܵܗ݁ ܐܲܪܥܵܐ. ܓܘܼܗܫܬܐܵܙܵܕ ܣܓܼܸܕܠܹܗ ܘܐ݇ܡܸܪܹܗ: ܚܵܝܹܐ ܡܲܠܟܵܐ ܓܲܢ݇ܒܵܪܵܐ ܕܐܘܼܚܕܵܢܘܼܟܼ ܠܥܵܠܲܡ ܛܵܒܼܵܐ ܕܓܲܒܼܪܹ̈ܐ. ܐܝܼܢܵܐ ܐܵܗܵܐ ܕܐ݇ܡܸܪܘܼܟܼ ܐܸܠܝܼ: ܒܕܘܼܙܘܼܬܵܐ ܥܒܼܝܼܕܵܠܝܼ ܕܠܵܐ ܛܲܠܩܸܢ ܗ݇ܘ̣ܵܐ ܡ݂ܢ ܥܸܫܪܘܼܬܵܐ ܝܲܢ ܚܲܒܼܪܘܼܬܵܐ ܕܡܵܪܵܗ݁ ܕܟܠܵܗ݁ ܐܲܪܥܵܐ: ܕܝܼܠܹܗ ܐܲܠܵܗܵܐ ܕܫܪܵܪܵܐ: ܒܵܪܘܿܝܵܐ ܕܫܡܲܝܵܐ ܘܐܲܪܥܵܐ ܘܟܠ ܕܝܼܢܵܐ ܒܝܼܵܝ: ܗܲܝܡܸܢ ܥܲܠܝܼ ܡܵܪܝܼ ܡܲܠܟܵܐ: ܘܡܲܙܒܘܼܛܸܐ ܝ݇ܘܸܢ ܠܗܲܡܙܲܡܬܝܼ ܒܗܲܩܘܼܬܵܐ: ܠܲܝܬ ܐ݇ܢܵܫܵܐ ܕܦܵܪܸܫܠܝܼ ܡ݂ܢ ܚܲܒܼܪܘܼܬܵܐ ܕܡܵܪܵܗ݁ ܕܫܡܲܝܵܐ ܘܐܲܪܥܵܐ: ܠܵܐ ܐܲܢ݇ܬ ܡܵܪܝܼ ܡܲܠܟܵܐ: ܘܠܵܐ ܡܲܠܟܹ̈ܐ ܘܓܘܼܪ̈ܵܢܹܐ ܕܟܸܠܝܹ̈ܐ ܝ݇ܢܵܐ ܩܵܕ݇ܡܘܼܟܼ. ܒܘܼܬ ܒܸܬ ܐܵܡܪܸܢ ܝܵܐ ܡܲܠܟܹ̈ܐ ܘܓܘܼܪ̈ܵܢܹܐ؟ ܣܵܒܵܒ ܐܘܼܦ ܠܵܐ ܡܲܠܲܐܟܼ̈ܵܘܗܝ ܕܐܲܠܵܗܵܐ ܐܸܢ ܓ̰ܲܪܒܝܼ ܕܝܵܗ݇ܒܼܝܼ ܠܝܼ ܪܵܥܝܼ ܕܦܵܪܫܸܢ ܡ݂ܢ ܚܘܼܒܹܗ ܕܐܲܠܵܗܝܼ: ܠܸܐ ܡܵܨܝܼ ܕܡܲܟܸܦܝܼ ܠܚܝܼܵܠ̈ܝܼ ܫܲܪܝܼܪܹ̈ܐ: ܕܫܵܒܼܩܸܢ ܠܒܵܪܘܿܝܵܐ ܘܣܵܓܼܕܸܢ ܠܒܸܪ̈ܝܵܬܹܐ: ܐܵܡܸܪ ܐܸܠܹܗ ܡܲܠܟܵܐ: ܝܵܐ ܣܵܒܼܵܐ ܣܲܟܼܠܵܐ ܘܟܵܦܘܿܪܵܐ: ܩܵܡܘܿܕܝܼ ܐܵܢܵܐ ܠܒܸܪ̈ܝܵܬܹܐ ܒܸܣܓܼܵܕܵܐ ܝ݇ܘܸܢ؟ ܐܵܡܸܪ ܐܸܠܹܗ ܛܘܼܒܼܵܢܵܐ ܓܘܼܗܫܬܐܵܙܵܕ: ܫܪܵܪܵܐ ܦܵܩܘܿܕܹܐ ܝ݇ܘܸܬ ܕܐܵܡܪܸܢ: ܡܵܪܝܼ ܡܲܠܟܵܐ: ܝܲܢ ܕܘܼܓܠܵܐ؟ ܐ݇ܡܸܪܹܗ ܐܸܠܹܗ ܡܲܠܟܵܐ: ܐ݇ܡܘܿܪ ܫܪܵܪܵܐ: ܐܵܡܲܪ ܐܸܠܹܗ ܢܲܨܝܼܚܵܐ ܓܘܼܗܫܬܐܵܙܵܕ: ܐܸܢ ܒܸܣܓܼܵܕܵܐ ܝ݇ܘܸܬ ܠܒܪܝܼܬܵܐ ܕܐܝܼܬ ܒܝܼܘܿܗ݁ ܓܵܢܵܐ ܘܚܲܝܹ̈ܐ ܘܪܵܓ݇ܫܬܵܐ: ܘܠܵܐ ܠܒܹܪ̈ܝܵܬܹܐ ܚܲܪ̈ܫܹܐ ܕܠܲܝܬ ܒܝܼܵܝ ܓܵܢܵܐ ܘܠܵܐ ܙܸܐ ܦܲܪܡܵܝܬܵܐ: ܘܝܘܼܗ݇ܒܹܐ ܝ݇ܢܵܐ ܩܵܐ ܚܸܠܡܲܬ ܝܲܢ ܡܲܦܠܵܚܬܵܐ ܕܒܢܲܝ̈ܢܵܫܵܐ. ܗܵܝܓܵܗ݁ ܡܲܠܟܵܐ ܦܘܼܩܸܕܠܹܗ ܒܟܲܪܒܵܐ ܓܘܼܪܵܐ: ܕܦܵܝܫܵܐ ܫܩܝܼܠܬܵܐ ܩܲܪܩܸܦܬܵܐ ܡܸܢܹܗ. ܘܟܲܕ ܡܲܪܚܸܛܝܼ ܗ݇ܘ̣ܵܘ ܠܹܗ ܩܵܪ̈ܵܘܸܠܸܐ ܠܗ݁ܝ ܕܘܼܟܬܵܐ ܕܒܘܼܨܵܐ ܕܨܵܠܝܼܬܹܗ ܕܡܵܘܬܵܐ: ܐ݇ܡܸܪܹܗ ܓܘܼܗܫܬܐܵܙܵܕ ܒܩܵܠܵܐ ܪܵܡܵܐ ܠܘܲܙܝܼܪܹ̈ܐ ܕܡܲܠܟܵܐ ܘܠܐܵܢܝܼ ܕܕܒܼܝܼܩܹ̈ܐ ܗ݇ܘ̣ܵܘ ܐܸܠܹܗ: ܡܲܟܠܝܼܡܘܿܢ ܠܝܼ: ܟܠܝܼܠܗ݇ܘܿܢ. ܒܘܼܬ ܗܝܼܒܼܝܼ ܣܦܝܼܩܵܐ ܕܚܫܸܒܼܠܗ݇ܘܿܢ ܒܘܼܬ ܕܝܹܗ. ܘܩܪܝܼܠܹܗ ܠܚܲܕ݇ ܡ݂ܢ ܘܲܟܝܼܠܹ̈ܐ ܘܐ݇ܡܸܪܹܗ: ܐ݇ܡܘܿܪ ܩܵܐ ܡܲܠܟܵܐ: ܕܓܘܼܗܫܬܐܵܙܵܕ ܒܐܹܡܵܪܵܐ ܝ݇ܠܹܗ: ܕܐܝܼܬܠܝܼ ܗܲܡܙܲܡܬܵܐ ܕܐܵܡܪܸܢܵܗ݁ ܠܡܲܠܟܘܼܬܘܼܟܼ. ܘܐ݇ܙܸܠܹܗ ܗܵܘ ܘܲܟܝܼܠ. ܘܐ݇ܡܸܪܹܗ ܩܵܕ݇ܡ ܡܲܠܟܵܐ ܐܲܝܟܼ ܕܡ݂ܢ ܓܘܼܗܫܬܐܵܙܵܕ ܫܡܸܥܠܹܗ. ܒܥܕܵܢܵܐ ܕܡܲܠܟܵܐ ܫܡܸܥܠܹܗ ܠܐܵܗܵܐ ܗܲܡܙܲܡܬܵܐ ܚܕܝܼܠܹܗ ܚܲܕܘܼܬܵܐ ܓܘܼܪܬܵܐ: ܡ݂ܢ ܣܵܒܵܒ ܕܚܫܸܒܼܠܹܗ ܕܗ݇ܘܹܐܠܹܗ ܪܸܙܵܝܹܗ: ܘܦܘܼܩܸܕܠܹܗ ܡܲܠܟܵܐ: ܘܡܘܼܥܒܸܪܘܿܢ: ܘܟܲܕ ܥܒܼܸܪܹܗ ܓܘܼܗܫܬܐܵܙܵܕ ܘܣܓܼܸܕܠܹܗ ܘܐ݇ܡܸܪܹܗ: ܐܲܢ݇ܬ݁ ܒܝܼܕܵܥܝܵܐ ܝ݇ܘܸܬ ܡܵܪܝܼ ܡܲܠܟܵܐ: ܕܫܲܪܝܼܪܵܐ ܘܕܘܼܙ ܗ݇ܘܹܐܠܝܼ ܒܟܠܵܝ ܐ݇ܪ̈ܵܙܹܐ ܟܸܣܝܹ̈ܐ ܕܡܲܠܟܘܼܬܘܼܟܼ: ܘܗ݇ܘܹܐܠܝܼ ܫܲܪܝܼܪܵܐ ܥܲܡܘܼܟܼ ܝܵܐ ܛܵܒܼܵܐ ܕܓܲܒܼܪܹ̈ܐ ܘܠܵܐ ܐܲܚܟ̰ܝܼ ܥܲܡܘܼܟܼ: ܐܸܠܵܐ ܐܘܼܦ ܡ݂ܢ ܒܵܒܘܼܟܼ ܡ݂ܢ ܩܲܕ݇ܡܵܝܬܵܐ: ܕܵܐܟܼܝܼ ܡ݂ܢ ܝܸܡܘܼܟܼ ܡܲܠܟܬܵܐ ܫܸܡܥܝܵܐ ܝ݇ܘܸܬ ܝܵܐ ܡܲܠܟܵܐ ܛܵܒܼܵܐ. ܘܐܘܼܦ ܡܲܠܟܘܼܬܘܼܟܼ ܡ݂ܢ ܩܵܕ݇ܡ ܚܲܟ̰ܵܐ ܣܗܸܕܠܵܗ݁ ܟܲܕ ܐܵܡܪܵܗ݁: ܡܪܵܚܘܿܡܹܐ ܝ݇ܘܸܢ ܥܲܠܘܼܟܼ ܒܘܼܬ ܦܸܠܚܵܢܵܢܹ̈ܐ ܬܪ̈ܝܼܨܹܐ ܕܦܠܝܼܚܹ̈ܐ ܝ݇ܢܵܐ ܡܸܢܘܼܟܼ ܥܲܡ ܛܵܝܸܦܝܼ ܘܥܲܡ ܒܵܒܝܼ: ܘܒܘܼܬ ܕܐܵܗܵܐ ܡܲܪܝܘܼܟܸܐ ܝ݇ܘܸܢ ܒܝܼܢܝܼ ܥܲܡܘܼܟܼ. ܗܲܕܟܼܵܐ ܒܘܼܬ ܕܐܲܢܹܐ ܚܕܵܐ ܒܵܥܘܼܬܵܐ ܒܸܛܠܵܒܵܐ ܝ݇ܘܸܢ ܡܸܢܘܼܟܼ: ܕܦܵܩܕܵܐ ܡܪܲܚܡܵܢܘܼܬܘܼܟܼ ܘܦܵܝܫܵܐ ܟܡܝܼܠܬܵܐ ܒܵܥܘܼܬܝܼ. ܐܵܡܸܪ ܐܸܠܹܗ ܡܲܠܟܵܐ: ܡܘܼܕܝܼ ܝ݇ܠܹܗ ܕܒܸܛܠܵܒܵܐ ܝ݇ܘܸܬ݁؟ ܐܵܡܸܪ ܐܸܠܹܗ ܓܘܼܗܫܬܐܵܙܵܕ: ܕܦܵܩܕܵܐ ܡܪܲܚܡܵܢܘܼܬܘܼܟܼ: ܕܐܵܣܸܩ ܟܵܪܘܿܙܵܐ ܥܲܠ ܫܘܼܪܵܐ ܘܕܚܵܕܸܪ ܒܕܵܘܘܼܠܵܐ ܘܡܲܟܼܪܸܙ ܘܐܵܡܸܪ: ܘܓܘܼܗܫܬܐܵܙܵܕ ܒܸܬ ܦܵܐܹܫ ܩܛܝܼܠܵܐ: ܠܵܐ ܒܘܼܬ ܕܦܘܼܠܸܛܠܹܗ ܐ݇ܪܵܙܵܐ ܕܡܲܠܟܘܼܬܵܐ: ܐܘܼܦ ܠܵܐ ܒܡܸܢܕܝܼ ܕܣܲܟܼܠܘܼܬܵܐ ܐ݇ܚܸܪ݇ܬܵܐ ܦܝܼܫܠܹܗ ܡܘܼܫ݇ܟ̰ܚܵܬ: ܕܒܝܼܘܼܗ݁ ܗ݇ܘܹܐܠܹܗ ܓܘܼܢܵܗܟܲܪ ܡ݂ܢ ܢܵܡܘܿܣܹ̈ܐ ܠܡܵܘܬܵܐ: ܕܠܵܐ ܡ݂ܢ ܣܵܒܵܒ ܕܟܪܸܣܛܝܵܢܵܐ ܝ݇ܠܹܗ ܦܝܵܫܵܐ ܝ݇ܠܹܗ ܩܛܝܼܠܵܐ: ܘܦܘܼܩܸܕܠܹܗ ܡܲܠܟܵܐ ܕܒܸܬ ܥܵܒܸܕܠܹܗ ܪܸܙܵܝܹܗ ܐܸܢ ܒܸܬ ܣܵܓܹܕ ܠܫܸܡܫܵܐ: ܘܠܵܐ ܡܘܼܨܝܸܬܠܹܗ ܕܟܵܦܸܪ ܒܐܲܠܵܗܹܗ.

 ܣܵܒܵܒ ܬܘܼܚܡܸܢܹܐ ܣܵܒܼܵܐ ܚܲܟܝܼܡܵܐ: ܕܐܵܕܝܼܵܐ ܐܵܗܵܐ ܚܲܒܪܵܐ ܦܠܝܼܛܵܐ ܝ݇ܠܹܗ ܒܘܼܬ ܕܝܝܼ. ܓܘܼܗܫܬܐܵܙܵܕ ܟܦܸܪܹܗ ܒܐܲܠܵܗܹܗ. ܘܒܣܵܒܵܒܝܼ ܪܵܒܵܐ ܒܸܬ ܦܵܝܫܝܼ ܫܒܼܝܼܩܹ̈ܐ. ܘܐܸܢ ܐܵܕܝܼܵܐ ܦܝܵܫܵܐ ܝ݇ܘܸܢ ܩܛܝܼܠܵܐ. ܠܹܐ ܡܵܠܹܐ ܡܵܘܬܝܼ ܠܚܪܵܒܼܵܐ ܕܥܒܼܸܕܠܝܼ ܒܝܲܕ ܟܦܘܿܪܝܵܐ ܕܙܪܸܥܠܝܼ: ܐܝܼܢܵܐ ܐܸܢ ܐܵܗܵܐ ܦܵܝܫܵܐ ܝ݇ܕܝܼܥܬܵܐ ܠܟܠ ܐ݇ܢܵܫܵܐ ܒܝܲܕ ܟܵܪܘܿܙܵܐ: ܡܸܢ݇ܕܪܸܫ݇ ܒܣܵܒܵܒܝܼ ܒܸܬ ܩܵܢܝܼ ܚܲܝܠܵܐ ܐܵܢܝܼ ܕܦܝܼܫܠܗ݇ܘܿܢ ܪܸ̈ܦܝܹܐ: ܒܸܬ ܚܲܠܸܢܝܼ ܐܵܢܝܼ ܕܗ݇ܘܹܐܠܗ݇ܘܿܢ ܙܲܒܘܼܢ. ܘܒܸܬ ܝܵܕܸܥ ܟܠ ܐ݇ܢܵܫܵܐ: ܕܒܘܼܬ ܡܫܝܼܚܵܐ ܦܝܵܫܵܐ ܝ݇ܘܸܢ ܩܛܝܼܠܵܐ: ܓܲܫܩܘܼܢ ܒܣܵܒܼܵܐ ܚܲܟܝܼܡܵܐ: ܒܡܘܼܕܝ݇ ܦܵܢܕܵܐ ܫܲܦܝܼܪܬܵܐ ܥܒܼܸܕܠܹܗ؟ ܘܡܘܼܕܝ݇ ܥܕܵܢܵܐ؟ ܒܥܕܵܢܵܐ ܕܡܸܠܝܵܐ ܗ݇ܘ̣ܵܐ ܙܕܥܘܿܬܵܐ ܘܪܲܬܪܲܬܵܐ: ܒܥܕܵܢܵܐ ܕܙܕܥܘܿܬܵܐ ܘܪܓܘܼܕܵܐ: ܒܥܕܵܢܵܐ ܕܡܸܠܝܵܐ ܗ݇ܘ̣ܵܐ ܪܗܝܼܒܼܘܼܬܵܐ ܘܙܕܥܘܿܬܵܐ: ܕܐܘܼܦ ܗ݁ܘ ܒܲܪܢܵܫܵܐ ܕܝܵܕܸܥ ܡ݂ܢ ܩܵܕ݇ܡ ܥܕܵܢܵܐ: ܘܦܲܪܡܹܗ ܡ݂ܢ ܩܵܕ݇ܡ ܗ݁ܝ ܣܵܥܲܬ: ܐܲܚܟ̰ܝܼ ܡ݂ܢ ܚܲܒܪܵܐ ܕܡܵܘܬܵܐ ܒܸܬ ܡܲܫܓܸܫܠܹܗ ܒܙܕܥܘܿܬܵܐ. ܐܵܗܵܐ ܚܲܟܝܼܡܵܐ: ܬܲܚܡܵܢܬܵܐ ܚܲܟܝܼܡܬܵܐ ܕܚܫܝܼܚܬܵܐ ܝ݇ܠܵܗ݁ ܠܥܵܩܸܠܕܵܪܘܼܬܵܐ ܕܣܵܗܕܘܼܬܵܐ ܬܲܚܡܘܼܢܹܐ ܗ݇ܘ̣ܵܐ: ܣܵܒܵܒ ܕܪܵܒܵܐ ܝ݇ܢܵܐ ܣܵܒܵܒܹ̈ܐ ܕܒܸܩܪܵܝܵܐ ܝ݇ܢܵܐ ܠܩܸܛܠܵܐ: ܠܐܵܢܝܼ ܕܒܐܵܗܵܐ ܕܘܼܟܬܵܐ ܘܒܕܲܪܓܼܵܐ ܕܒܝܹܗ ܝ݇ܘܸܢ ܟܸܠܝܹ̈ܐ ܝ݇ܢܵܐ: ܘܒܩܝܼܘܲܢܕܝܼܢܘܿܣ ܡܠܝܼܬܵܐ ܝ݇ܠܵܗ݁: ܐܝܼܢܵܐ ܕܝܵܕܸܥ ܟܠ ܐ݇ܢܵܫܵܐ ܕܒܘܼܬ ܗܲܝܡܵܢܘܼܬܵܐ ܕܡܫܝܼܚܵܐ ܦܝܵܫܵܐ ܝ݇ܘܸܢ ܩܛܝܼܠܵܐ. ܝܵܐ ܠܣܵܒܼܵܐ ܥܵܩܸܠܕܲܪ ܡܘܼܕܝ݇ ܬܲܚܡܵܢܬܵܐ ܫܲܦܝܼܪܬܵܐ ܬܘܼܚܡܸܢܹܗ ܝܵܐ ܠܣܵܒܼܵܐ ܥܵܩܸܠܕܲܪ. ܡܘܼܕܝ݇ ܚܸܠܥܲܬ ܝܘܼܗ݇ܒܸܠܹܗ ܩܵܐ ܛܵܝܸܦܵܐ ܕܐܲܠܵܗܵܐ ܝܵܐ ܠܣܵܒܼܵܐ ܦܲܢܕܵܢܵܐ: ܡܘܼܕܝ݇ ܝܵܪܬܘܼܬܵܐ ܫܒܼܝܼܩܠܹܗ ܠܥܸܕܬܹܗ ܕܡܫܝܼܚܵܐ: ܝܵܐ ܠܣܵܒܼܵܐ ܕܠܵܐ ܒܛܸܠܹܗ ܚܝܼܵܠܹܗ. ܐܸܠܵܐ ܙܸܕܠܹܗ ܘܦܪܝܼܠܹܗ: ܘܒܛܲܥܡܹܗ ܡܘܼܡܠܸܚܠܹܗ ܚܝܼܵܠܹ̈ܐ ܦܵܚܹ̈ܐ ܕܠܵܐ ܡܸܠܚܵܐ: ܘܒܚܝܼܵܠܹܗ ܒܘܼܗܪܸܢܹܗ ܩܵܐ ܕܐܵܢܝܼ ܕܝ݇ܬܝܼܒܹ̈ܐ ܝ݇ܢܵܐ ܓܵܘ ܚܸܫܟܵܐ ܝܵܐ ܣܵܒܼܵܐ ܠܙܲܒܘܼܢ ܒܓܘܼܫܡܵܐ: ܕܚܘܼܠܸܢܹ̈ܐ ܠܚܘܼܫܵܒܹ̈ܐ ܕܙܲܒܘܼܢܹ̈ܐ ܝܵܐ ܒܲܪܙܲܪܥܵܐ: ܕܙܸܕܠܹܗ ܒܲܪܙܲܪܥܹܗ ܓܵܘ ܕܘܼܢܝܹܐ ܝܵܐ ܠܡܗܘܼܡܢܵܐ ܕܠܵܐ ܒܢܘܿܢܹ̈ܐ: ܕܙܝܼܕܠܗ݇ܘܿܢ ܒܢܘܿܢ̈ܘܼܗܝ ܓܵܘ ܡܲܥܡܵܪܵܐ (ܕܘܼܟܬܵܐ ܕܚܲܝܘܼܬܵܐ). ܝܵܐ ܠܡܗܘܼܡܢܵܐ ܕܠܵܐ ܛܥܘܿܢܝܵܬܹ̈ܐ. ܡܘܼܙܝܸܕܠܵܗ݁ ܡܵܘܕܝܵܢܘܼܬܹܗ ܛܥܘܿܢܝܵܬܹ̈ܐ ܓܵܘ ܒܪܝܼܬܵܐ: ܝܵܐ ܠܡܗܘܼܡܢܵܐ ܘܡܗܘܼܡܢܵܐ ܕܡܗܘܼܡܢܹ̈ܐ: ܢܲܡܲܪ ܒܵܨܘܿܪܵܐ ܕܗܲܕܵܡܵܐ: ܘܢܲܡܲܪ ܢܲܨܝܼܚܵܐ ܟܡܝܼܠܵܐ ܒܲܫܪܵܪܵܐ ܝܵܐ ܠܡܗܘܼܡܢܵܐ ܒܪܘܿܢܵܐ ܕܐܲܒܼܪܵܗܵܡ: ܘܒܕܵܡܲܝܬܹܗ ܩܢܝܼܠܹܗ ܘܠܵܐ ܗܘܼܨܠܵܝܠܹܗ ܝܵܐ ܠܡܗܘܼܡܢܵܐ ܕܝܘܼܗ݇ܒܸܠܵܗ݁ ܐܸܠܹܗ ܗܲܝܡܵܢܘܼܬܹܗ: ܕܟܝܵܢܹܗ ܠܵܐ ܝܘܼܗ݇ܒܸܠܹܗ ܐܸܠܹܗ. ܒܣܵܒܵܒܹܵܗ ܕܪܸ̈ܒܵܘܵܬܹܐ ܕܦܝܼܫܠܗ݇ܘܿܢ ܚܘܼܠܸܢܹܗ: ܐܲܢܹܐ ܗ݇ܘܹܐܠܗ݇ܘܿܢ ܐܸܠܹܗ ܒܢܘܿܢܹ̈ܐ: ܝܵܐ ܠܒܵܒܵܐ ܕܠܵܐ ܗܘܼܨܸܠܹܗ: ܝܵܐ ܠܒܢܘܿܢܹ̈ܐ ܕܠܵܐ ܦܝܼܫܠܗ݇ܘܿܢ ܝܼܠܝܼܕܹ̈ܐ ܙܠܸܡܠܵܗ݁ ܐܸܠܹܗ ܚܹܐܪܘܼܬܵܐ ܕܙܲܪܥܹܗ: ܘܚܹܐܪܘܼܬܵܐ ܕܣܘܼܠܵܠܹܗ ܙܠܸܡܠܵܗ݁ ܐܸܠܹܗ ܚܹܐܪܘܼܬܵܐ ܕܐܲܒܼܵܗ̈ܘܗܝ: ܘܚܹܐܪܘܼܬܵܐ ܕܣܘܼܠܵܠܵܐ ܕܓܵܢܹܗ. ܐܵܗܵܐ ܝ݇ܠܹܗ ܦܝܼܠܵܣܘܿܦܵܐ ܘܦܝܼܠܵܣܘܿܦܵܐ ܒܲܫܪܵܪܵܐ: ܘܩܵܐ ܡܵܫ݇ܟ̰ܵܚܬܵܐ ܕܦܝܼܠܵܣܘܿܦܘܼܬܹܗ ܬܒܥܝܼ ܠܐܵܗܵܐ ܦܘܼܠܚܵܢܵܐ ܕܥܘܼܓ̰ܵܒܵܐ: ܘܠܚܲܝܹ̈ܐ ܕܗܘܼܕܸܪܹܗ ܩܵܐ ܫܵܡܥܵܢ̈ܘܼܗܝ. ܘܠܹܐ ܝ݇ܠܵܗ݁ ܗܲܠ ܠܬܲܚܡܵܢܬܵܐ ܕܗܹܡܸܙܡܲܢ ܦܝܼܫܠܵܗ݁ ܡܘܼܫ݇ܟ̰ܸܚܬܵܐ ܦܝܼܠܵܣܘܿܦܘܼܬܹܗ: ܐܸܠܵܐ ܘܗܲܠ ܬܲܡܵܡܬܵܐ ܕܦܸܠܚܵܢܹ̈ܐ.

ܐܝܼܢܵܐ ܒܥܕܵܢܵܐ ܕܫܡܸܥܠܹܗ ܡܲܠܟܵܐ ܐܲܢܹܐ ܗܹܡܸܙܡܵܢܹ̈ܐ ܡ݂ܢ ܓܘܼܗܫܬܐܵܙܵܕ: ܒܘܼܫ ܙܵܘܕܵܐ ܚܕܝܼܠܹܗ. ܘܒܐ݇ܡܸܪܹܗ: ܪܵܒܵܐ ܡܸܢܵܝ ܐܵܢܝܼ ܕܫܵܡܥܝܼ ܠܹܗ ܐܵܗܵܐ ܚܲܒܪܵܐ ܕܩܸܛܠܵܐ ܒܸܬ ܬܵܪܨܝܼ: ܘܒܸܬ ܥܵܒܼܪܝܼ ܡ݂ܢ ܚܝܼܵܠ ܕܟܪܸ̈ܣܛܝܵܢܹܐ ܘܥܵܒܼܕܝܼ ܪܸܙܵܝܝܼ. ܓܘܼܗܫܬܐܵܙܵܕ ܕܐܲܢܹܐ ܩܲܕ݇ܡܵܝܵܐ ܬܘܼܚܡܸܢܹܗ: ܘܡܲܠܟܵܐ ܐܲܢܹܐ ܐ݇ܚܵܪ̈ܵܝܹܐ ܬܘܼܚܡܸܢܹܗ. ܕܫܪܝܼܠܵܗ݁ ܚܝܼܵܠܹܗ ܕܣܵܒܼܵܐ ܚܲܟܝܼܡܵܐ: ܠܚܝܼܵܠܹܗ ܕܡܲܠܟܵܐ ܣܲܟܼܠܵܐ. ܦܘܼܩܸܕܠܹܗ ܡܲܠܟܵܐ: ܘܡܘܼܟܪܸܙܠܗ݇ܘܿܢ ܒܕܵܘܘܼܠܵܐ ܐܲܝܟܼ ܕܒܵܥܹܐ ܗ݇ܘ̣ܵܐ ܢܲܨܝܼܚܵܐ ܓܘܼܗܫܬܐܵܙܵܕ. ܗܵܝܓܵܗ݁ ܩܵܡ ܩܲܪܒܸܢܝܼܠܹܗ ܩܵܕ݇ܡ ܗܲܦܸܙܕܵܩܹ̈ܐ ܕܡܲܠܟܵܐ. ܬܵܡܵܐ ܕܡܵܚܝܼܠܹܗ ܪܹܫܹܗ. ܘܒܥܸܕܵܢܵܐ ܕܩܘܼܪܒܸܢܹܗ ܠܕܘܼܟܬܵܐ ܕܒܝܼܵܗ݁ ܒܫܵܩܹܠ ܟܠܝܼܠܵܐ ܕܣܵܗܕܘܼܬܵܐ: ܒܪܸ̈ܟܠܹܗ ܥܲܠ ܒܸܪ̈ܟܵܟܘܼܗܝ ܘܣܓܼܸܕܠܹܗ ܠܐܲܠܵܗܵܐ ܕܲܠܩܘܼܒܼܠ ܡܲܕܢܚܵܐ: ܡܵܘܕܘܿܝܸܐ ܝ݇ܘܸܢ ܐܸܠܘܼܟܼ ܡܫܝܼܚܵܐ. ܩܵܐ ܡܲܕܸܪܬ݁ ܠܝܼ ܥܸܪܒܵܐ ܕܛܠܸܩܠܝܼ ܡ݂ܢ ܡܲܢܙܝܼܠܘܼܟܼ ܡܵܪܝܵܐ. ܘܩܵܐ ܡܲܫ݇ܟ̰ܚܸܬ ܠܝܼ ܒܝܲܕ ܪܵܥܝܘܼܟܼ ܪܥܝܼܫܵܐ ܘܟܲܫܝܼܪܵܐ ܫܸܡܥܘܿܢ ܕܦܠܸܛܠܹܗ ܠܗܵܘܵܪܝܼ: ܘܩܵܐ ܡܲܥܒܸܪܝܼ ܠܡܸܢܝܵܢܵܐ ܕܥܸܪ̈ܒܘܼܟܼ. ܫܲܡܝܼܢܹ̈ܐ (ܛܪ̈ܝܼܨܹܐ) ܕܗܵܘܹܝܢ ܒܪܘܿܢܵܐ ܠܫܠܝܼܚܹ̈ܐ: ܘܐܲܚܘܿܢܵܐ ܠܣܵܗܕܹ̈ܐ ܐܵܢܝܼ ܕܫܩܝܼܠܗ݇ܘܿܢ ܟܠܝܼܠܵܐ ܓܵܘ ܡܲܥܪܒܼܵܐ: ܘܕܵܡܲܝܬܵܐ ܛܵܒܼܬܵܐ ܠܛܵܝܸܦܘܼܟܼ ܐܵܢܝܼ ܕܓܵܘ ܡܲܕܢܚܵܐ. ܕܠܵܐ ܗܵܘܝܼ ܪܸ̈ܦܝܹܐ ܘܢܵܦܠܝܼ ܡ݂ܢ ܗܲܝܡܵܢܘܼܬܵܐ ܕܫܪܵܪܵܐ ܕܒܵܒܵܐ ܘܕܒܪܘܿܢܵܐ ܘܕܪܘܼܚܵܐ ܕܩܘܼܕܫܵܐ: ܐܲܠܵܗܵܐ ܕܗܲܩܘܼܬܵܐ ܘܡܲܠܟܵܐ ܕܚܸܩܪܵܐ. ܐܸܠܹܗ ܫܵܟܲܪܬܵܐ ܡ݂ܢ ܦܘܼܡܵܐ ܕܟܠܵܝ ܣܵܓܼܕܵܢܹ̈ܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ ܒܫܡܲܝܵܐ ܘܐܲܪܥܵܐ: ܐܵܕܝܼܵܐ ܘܒܟܠ ܥܕܵܢܵܐ ܘܠܐܵܒܲܕ ܐܲܒܵܕܝܼܢ: ܐܵܡܹܝܢ. ܘܕܸܪܹܗ ܡ݂ܢ ܨܠܘܿܬܹܗ ܟܲܕ ܦܲܪܨܘܿܦܹܗ ܦܨܝܼܚܵܐ: ܓܘܼܫܸܩܠܹܗ ܒܐܵܢܝܼ ܕܟܸܠܝܹ̈ܐ ܝܼܗ݇ܘ̣ܵܘ ܬܵܡܵܐ ܘܐ݇ܡܸܪܹܗ: ܚܵܕܲܚ ܐܸܕܝܘܿܡ݇ ܝܵܘܡܵܐ ܐܲܠܵܗܵܐ ܝܵܗ݇ܒܼܵܢܵܐ ܕܚܲܝܹ̈ܐ ܒܡܝܼܬܵܐ ܕܬܘܼܘܸܒܠܹܗ: ܘܦܵܨܚܲܚ ܡܫܝܼܚܹܗ ܒܛܠܝܼܩܵܐ ܕܦܝܼܫܠܹܗ ܡܫ݇ܟ̰ܝܼܚܵܐ: ܒܸܬ ܦܵܨܚܝܼ ܡܲܠܲܐܟܹ̈ܐ ܕܬܘܼܘܸܒܠܹܗ. ܒܹܬ ܚܵܕܹܐ ܘܒܸܬ ܫܵܟܸܪ ܒܟܠܹܗ ܠܸܒܹܗ ܕܒܵܒܲܢ ܪܘܼܚܵܢܵܐ ܡܵܪܝܼ ܫܸܡܥܘܿܢ ܩܵܬܼܘܿܠܝܼܩܵܐ: ܒܸܬ ܫܵܒܲܚ ܘܒܸܬ ܘܚܵܩܹܪ ܠܐܲܠܵܗܵܐ ܕܓܘܼܫܸܩܠܹܗ ܒܡܲܟܝܼܟܼܘܼܬܵܐ ܕܓܵܢܹܗ: ܘܠܒܪܘܿܢܹܗ ܘܒܘܼܪܒܸܙܠܹܗ ܡܵܐܠ̈ܘܼܗܝ ܕܗܲܝܡܵܢܘܼܬܹܗ ܡܘܼܕܸܪܹܗ ܠܟܸܣܠܹܗ. ܘܪܵܚܸܛ ܗ݇ܘ̣ܵܐ ܠܟܸܣܠܝܼ ܒܝܲܕ ܒܪܵܬ݇ ܩܵܠܵܐ ܕܡܵܘܕܝܵܢܘܼܬܝܼ: ܘܢܵܦܸܠ ܗ݇ܘ̣ܵܐ ܥܲܠ ܩܕܵܠܝܼ ܒܝܲܕ ܣܲܝܦܵܐ: ܘܚܵܦܸܩ ܗ݇ܘ̣ܵܐ ܠܝܼ ܒܝܲܕ ܩܛܥܵܝܬܵܐ ܕܪܹܫܝܼ: ܘܢܵܫܹܩ ܗ݇ܘ̣ܵܐ ܠܝܼ ܒܝܲܕ ܣܵܗܕܘܼܬܝܼ. ܟܲܕ ܐܲܢܹܐ ܐ݇ܡܝܼܪܵܝ ܠܹܗ: ܡܘܼܟܸܦܠܹܗ ܪܹܫܹܗ ܠܣܲܝܦܵܐ: ܗܲܕܟܼܵܐ ܦܝܼܫܠܹܗ ܬܘܼܡܸܡܵܐ ܒܣܵܗܕܘܼܬܵܐ ܛܵܒܼܬܵܐ. ܝܼܗ݇ܘܵܐ ܝܵܘܡܵܐ ܕܚܲܡܫܸܒܫܲܒܵܐ ܕܫܲܒܬܵܐ ܪܲܒܬܵܐ ܕܦܲܛܝܼܪܹ̈ܐ: ܒܬܸܠܬܲܥܣܲܪ ܒܢܝܼܣܵܢ ܒܲܕܣܲܗܪܵܐ.

ܐܵܗܵܐ ܝ݇ܠܹܗ ܡܗܘܼܡܢܵܐ ܒܪܘܿܢܵܐ ܕܕܵܢܝܼܐܹܝܠ ܡܗܘܼܡܢܵܐ: ܕܒܟܠܵܝ ܐܲܢܹܐ ܐܸܠܹܗ ܦܝܼܫܠܹܗ ܡܕܘܼܡܝܵܐ. ܗ݁ܘ ܥܒܼܸܕܠܹܗ ܚܸܠܡܲܬ ܠܕܲܪܝܵܘܵܫ: ܘܐܵܗܵܐ ܠܫܵܒܼܘܿܪ ܗ݁ܘ ܡܲܠܟܵܐ ܠܡܵܕܲܝ ܘܦܵܪܸܣ: ܘܐܵܗܵܐ ܡܲܠܟܵܐ ܠܦܵܪܸܣ ܘܡܵܕܲܝ. ܗܵܘ ܕܠܵܐ ܙܕܸܥܠܹܗ ܡ݂ܢ ܐܲܪ̈ܝܵܘܵܬܹܐ: ܘܠܵܐ ܙܸܐ ܐܵܗܵܐ ܫܥܸܫܠܹܗ ܘܚܓ̰ܸܠܹܗ ܡ݂ܢ ܣܲܝܦܵܐ: ܝܵܐ ܐܸܠܘܼܟܼ ܡܗܘܼܡܢܵܐ ܣܵܒܼܵܐ ܚܩܝܼܪܵܐ ܕܗ݇ܘܹܐܠܘܼܟܼ ܒܪܘܼܢܵܐ ܕܣܸܕܪܵܐ ܠܕܵܢܝܼܐܹܝܠ ܡܗܘܼܡܢܵܐ: ܕܚܲܕܸ݁ܬ ܥܲܡ ܚܲܢܲܢܝܵܐ ܡܗܘܼܡܢܵܐ: ܥܲܡ ܥܸܙܲܪܝܵܐ ܗܕܝܼܪܵܐ ܝ݇ܘܸܢ ܕܦܵܨܚܸܬ݁: ܥܲܡ ܡܝܼܫܵܐܹܝܠ ܦܵܝܫܸܬ݁ ܚܩܝܼܪܵܐ: ܕܚܲܕܸܬ݁ ܥܲܡ ܡܗܘܼܡܢܵܐ ܫܲܠܝܼܛܵܐ ܕܲܢܕܲܩ ܡܲܠܟܬܵܐ ܕܟܘܼܫܵܝܹ̈ܐ. ܥܲܡ ܚܸܡܫܘܼܢܬܵܝ ܗܵܘܹܝܬ݁ ܓܲܘ ܡܲܠܟܘܼܬܵܐ: ܦܵܪܣܵܐܝܼܬ ܦܝܼܫܠܹܗ ܩܤܪܝܵܐ ܫܸܡܘܼܟܼ: ܕܚܫܸܚܠܘܼܟܼ ܠܚܹܐܪܘܼܬܵܐ ܕܡܲܠܟܘܼܬܵܐ ܕܫܡܲܝܵܐ: ܐܸܠܘܼܟܼ ܦܝܵܫܵܐ ܝ݇ܠܹܗ ܝܘܼܗ݇ܒܼܵܐ ܫܸܡܵܐ ܒܘܼܫ ܨܦܵܝܝܼ ܢ݂ܢ ܒܢܘܿܢܹ̈ܐ ܘܡ݂ܢ ܒܢܵܬܹ̈ܐ: ܐܲܝܟܼ ܗܲܡܙܲܡܬܹܗ ܕܢܒܼܝܼܵܐ. ܐܸܠܘܼܟܼ ܦܝܵܫܵܐ ܝ݇ܠܹܗ ܝܘܼܗ݇ܒܼܵܐ ܕܘܼܟܬܵܐ ܓܵܘ ܒܲܝܬܹܗ ܘܒܫܘܼܪܹܗ ܕܡܵܪܝܵܐ: ܐܲܝܟܼ ܣܵܗܕܘܼܬܹܗ ܕܐܹܫܲܥܝܵܐ: ܐܸܠܘܼܟܼ ܦܝܵܫܵܐ ܝ݇ܠܹܗ ܝܘܼܗ݇ܒܼܵܐ ܠܫܸܡܵܐ ܕܠܹܐ ܦܵܪܹܩ ܠܥܵܠܲܡ ܥܵܠܡܝܼܢ: ܐܲܝܟܼ ܗܹܡܲܙܡܵܢܹܗ ܕܡܵܪܝܵܐ: ܐܵܗܵܐ ܝ݇ܠܵܗ݁ ܚܲܪܬܹܗ ܕܢܲܨܝܼܚܵܐ ܓܘܼܗܫܬܐܵܙܵܕ: ܐܵܗܵܐ ܝ݇ܠܵܗ݁ ܩܲܪܢܵܐ (ܫܵܝܦܘܼܪ) ܕܗܵܕܲܪܬܹܗ ܕܛܵܝܸܦܲܢ ܠܦܠܵܫܵܐ ܪܘܼܚܵܢܵܝܵܐ. ܐܵܗܵܐ ܝ݇ܠܹܗ ܣܵܗܕܵܐ ܫܲܪܝܼܪܵܐ ܕܐܲܪܥܵܐ ܕܡܲܕܢܚܵܐ. ܕܒܝܲܕ ܫܸܡܥܘܿܢ ܕܝܼܗ݇ܘܵܐ ܐܲܦܸܣܩܘܿܦܵܐ ܘܣܵܗܕܵܐ ܕܡܲܕܢܚܵܐ ܦܝܼܫܠܹܗ ܨܝܼܕܵܐ ܠܚܲܝܹ̈ܐ.

ܐܝܼܢܵܐ ܛܘܼܒܼܵܢܵܐ ܫܸܡܥܘܿܢ ܩܵܬܼܘܿܠܝܼܩܵܐ: ܒܥܸܕܵܢܵܐ ܕܦܠܸܛܠܹܗ ܡ݂ܢ ܩܵܕ݇ܡ ܡܲܠܟܵܐ: ܘܩܘܼܪܒܸܢܹܗ ܓܘܼܗܫܬܐܵܙܵܕ ܘܣܓܼܸܕܠܹܗ: ܘܫܡܸܥܠܹܗ ܡܸܢܹܗ ܐܵܢܝܼ ܗܹܡܸܙܡܵܢܹ̈ܐ ܕܡ݂ܢ ܥܸܠܸܠ ܪ̈ܫܝܼܡܹܐ ܝ݇ܢܵܐ: ܐ݇ܬܹܐܠܹܗ ܠܟܸܣ ܐܲܦܸܣܩܘܿܦܹ̈ܐ ܚܲܒܼܪ̈ܵܘܵܬܘܼܗܝ ܘܐܲܚܘܿܢܘܵܬ̈ܘܼܗܝ: ܐܵܢܝܼ ܕܫܸܡܵܢܵܝ̈ ܒܫܘܼܪܵܝܵܐ ܕܡܹܐܡܪ̈ܲܢ ܡܘܼܕܸܥܠܲܢ: ܘܠܟܸܣ ܩܲܫܝܼܫܹ̈ܐ ܘܲܡܫܲܡܫܵܢܹ̈ܐ ܡ݂ܢ ܟܠ ܕܘܼܟܵܐ ܘܕܘܼܟܵܐ ܕܥܲܡܵܝ ܐܲܣܝܼܪܹ̈ܐ ܝܼܗ݇ܘ̣ܵܘ: ܡ݂ܢ ܩܵܕ݇ܡ ܕܐܵܬܹܐ ܗ݇ܘ̣ܵܐ ܫܸܡܥܘܿܢ ܠܬܲܪܥܵܐ ܕܡܲܠܟܵܐ. ܐܵܢܝܼ ܒܚܲܝܠܵܐ ܓ̰ܘܼܪܐܵܬ ܘܒܚܲܕܘܼܬܵܐ ܘܗܵܕܲܪܬܵܐ: ܠܦܠܵܫܵܐ ܕܙܕܥܘܿܬܵܐ ܕܐܲܠܵܗܵܐ ܐ݇ܬܹܐܠܗ݇ܘܿܢ ܘܗ݇ܘܹܐܠܗ݇ܘܿܢ ܢܲܨܝܼܚܹ̈ܐ ܘܫܩܸܠܗ݇ܘܿܢ ܟܠܝܼܠܵܐ ܕܣܵܗܕܘܼܬܼܵܐ. ܘܒܥܸܕܵܐ ܕܚܙܝܼܠܗ݇ܘܿܢ ܐܸܠܹܗ: ܚܕܝܼܠܗ݇ܘܿܢ ܪܵܒܵܐ: ܕܚܙܝܼܠܗ݇ܘܿܢ ܠܒܵܒܵܐ ܐܲܦܸܣܩܘܿܦܹ̈ܐ. ܡ݂ܢ ܣܵܒܵܒ ܪܵܒܵܐ ܡܘܼܫܬܵܪܝܼ ܝܼܗ݇ܘ̣ܵܘ ܕܚܵܙܝܼ ܗ݇ܘ̣ܵܐܠܹܗ: ܡ݂ܢ ܫܡܸܥܠܗ݇ܘܿܢ ܕܥܒܼܸܪܹܗ ܠܐܲܬܪܵܐ. ܐܵܗܵܐ ܕܪܝܼܠܹܗ ܫܠܵܡܵܐ ܥܲܠܵܝ: ܘܢܫܝܼܩܵܝܠܹܗ ܟܠܵܝ. ܘܫܘܼܪܝܼܠܹܗ ܒܹܐܡܵܪܵܐ ܐܸܠܵܝ: ܡܘܼܕܝܼ ܐܵܡܪܸܢ ܠܥܵܩܸܠܕܵܪܘܼܬܵܘܟܼܘܿܢ ܘܠܝ݇ܕܝܥܬܵܘܟܼܘܿܢ؟ ܕܡ݂ܢ ܩܵܕ݇ܡ ܗܹܡܸܙܡܵܢܹ̈ܐ ܕܝܼܝܼ: ܐܲܚܬܘܿܢ ܦܸܠܚܵܢܵܢܹ̈ܐ ܬܘܼܡܸܡܵܝܠܵܘܟܼܘܿܢ: ܣܵܒܵܒ ܩܕܸܡܠܵܘܟܼܘܿܢ ܘܗ݇ܘܹܐܠܵܘܟܼܘܿܢ ܢܲܨܝܼܚܹ̈ܐ ܒܥܝܼܩܘܼܝܵܬܹ̈ܐ ܓܘܼܪܹ̈ܐ. ܡܘܼܕܝܼ ܡܲܕܟܸܪܢ ܠܚܝܼܵܠܵܘܟܼܘܿܢ: ܗ݁ܘ ܕܓܵܘ ܫܡܲܝܵܐ ܫܩܸܠܹܗ ܕܘܼܟܬܵܐ؟ ܡܘܼܕܝܼ ܗܵܩܹܢ ܒܘܼܬ ܚܕܵܪܵܘܟܼܘܿܢ: ܗ݁ܘ ܕܡ݂ܢ ܓ̰ܲܠܕܹܐ ܡ݂ܢ ܐܲܪܥܵܐ ܦܝܼܫܠܹܗ ܪܝܼܡܵܐ: ܓܵܘ ܫܡܲܝܵܐ ܝ݇ܠܹܗ ܡܲܢܙܝܼܠܹܗ؟ ܣܵܒܵܒ ܗܵܐ ܕܡ݂ܢ ܩܵܕ݇ܡ ܐ݇ܬܹܐܠܵܘܟܼܘܿܢ ܠܬܲܪܥܵܐ ܕܡܲܠܟܵܐ: ܗ݇ܘܝܼܠܵܘܟܼܘܿܢ ܟܵܡܝܼܠ ܒܣܵܗܕܘܼܬܵܘܟܼܘܿܢ: ܒܐܘܼܠܨܵܢܹ̈ܐ ܕܩܘܼܒܸܠܵܘܟܼܘܿܢ ܥܲܠ ܓܵܢܵܘܟܼܘܿܢ ܡ݂ܢ ܛܲܪ̈ܕܵܢܵܘܟܼܘܿܢ: ܘܚܙܝܼܠܵܘܟܼܘܿܢ ܒܥܲܝܢ̈ܵܬܵܟܼܘܿܢ ܥܩܲܪܬܵܐ ܕܥܸܕܬܵܘܵܬ̈ܵܟܼܘܿܢ: ܠܵܐ ܦܪܸܫܠܵܘܟܼܘܿܢ ܒܚܝܼܵܠܵܘܟܼܘܿܢ. ܐܘܼܦ ܐܵܕܝܼܵܐ ܐܲܚܘܿܢܘܵܬ̈ܝܼ: ܗ݇ܘܵܝܡܘܿܢ ܠܸܒܵܢܹ̈ܐ ܘܓܲܢ݇ܒܵܪܹ̈ܐ: ܗ݇ܘܵܝܡܘܿܢ ܚܲܝܠܵܢܹ̈ܐ ܒܗܝܼܒܼܝܼܵܘܟܼܘܿܢ ܒܟܠܹܗ ܠܸܒܵܘܟܼܘܿܢ. ܣܵܒܵܒ ܗ݁ܘ ܡ݂ܢ ܐܵܕܝܼܵܐ ܦܝܼܫܠܗ݇ܘܿܢ ܗܘܼܕܪܹ̈ܐ ܩܵܬܵܘܟܼܘܿܢ ܟܠܝܼܠܹ̈ܐ: ܬܲܪܥܵܐ ܕܒܹܝܬܼ ܡܸܫܬܘܼܬܵܐ ܦܬܝܼܚܵܐ ܝ݇ܠܹܗ ܩܵܕ݇ܡܲܢ. ܐ݇ܬܹܐܡܘܼܢ ܕܣܲܩܠܲܚ ܓܵܢܲܢ ܒܟܠܝܼܠܹ̈ܐ ܕܣܵܗܕܘܼܬܵܐ: ܐ݇ܬܹܐܡܘܼܢ ܕܥܵܒܼܪܲܚ ܠܒܹܝܬܼ ܡܸܫܬܘܼܬܵܐ ܕܐܲܠܵܗܵܐ: ܣܵܒܵܒ ܟܠܝܼܠܹ̈ܐ ܓܵܘ ܫܡܲܝܵܐ ܡܘܼܬܒܹܐ ܝ݇ܢܵܐ: ܐܝܼܢܵܐ ܐܘܼܪܚܵܐ ܕܠܵܒܠܵܐ ܠܬܵܡܵܐ ܥܝܼܩܬܵܐ ܝ݇ܠܵܗ݁. ܘܥܝܼܩܵܐ ܝ݇ܠܹܗ ܬܲܪܥܵܐ ܕܡܲܥܒܸܪ ܠܫܡܲܝܵܐ. ܘܥܝܼܩܬܵܐ ܝ݇ܠܵܗ݁ ܐܘܼܪܚܵܐ ܕܠܵܒܠܵܐ ܠܚܲܝܹ̈ܐ: ܘܒܵܨܘܿܪܹ̈ܐ ܝ݇ܢܵܐ ܐܵܢܝܼ ܕܐܵܙܠ݇ܝܼ ܒܝܼܘܼܗ݁: ܐ݇ܬܹܐܡܘܼܢ ܕܩܵܢܲܚ ܓܘܼܠܦܵܢܹ̈ܐ: ܥܵܒܼܕܲܚ ܩܵܠܘܿܠܵܐ ܪܸܚܛܲܢ. ܐ݇ܬܹܐܡܘܼܢ ܙܲܒܼܢܸܚ ܓܘܼܫ̈ܡܲܢ ܕܥܵܒܼܪܲܚ ܒܐܵܗܵܐ ܬܲܪܥܵܐ: ܘܐܵܙܲܠ݇ܚ ܒܐܵܗܵܐ ܐܘܼܪܚܵܐ ܕܪܵܝܡܲܚ ܠܐܵܗܵܐ ܪܵܘܡܵܐ. ܠܵܐ ܓܲܫܩܲܚ ܒܓܸܢܣܲܢ ܘܒܛܘܼܗܡܲܢ: ܠܵܐ ܓܲܫܩܲܚ ܒܐܲܚܘܿܢ̈ܘܵܬܲܢ ܘܚܸܙ̈ܡܵܢܲܢ: ܠܵܐ ܩܵܝܬܵܐ ܓܲܫܵܩ̈ܝܵܬܲܢ ܒܐܲܒܼܵܗܹ̈ܐ ܓܘܼܫܡܵܢܵܝܹ̈ܐ: ܐܸܠܵܐ ܐ݇ܬܹܐܡܘܼܢ ܕܓܵܫܩܲܚ ܒܕܵܣܬܹ̈ܐ ܕܡܲܠܲܐܟܹ̈ܐ: ܒܣܝܼܥܵܬܹ̈ܐ ܕܡܲܠܲܐܟܹ̈ܐ ܕܣܪ̈ܵܦܹܐ: ܒܦܸܨܠܹ̈ܐ ܕܡܲܠܲܐܟܹ̈ܐ ܕܟܪ̈ܘܼܒܹܐ: ܒܕܲܣܬܹ̈ܐ ܕܐܲܪܟܘܿܣ: ܒܕܲܣܬܵܐ ܡܲܠܲܐܟܹ̈ܐ ܕܡܵܪ̈ܵܘܵܬܼܵܐ. ܕܒܝܼܵܝ ܦܵܝܫܲܚ ܚܒܼܝܼܛܹ̈ܐ: ܐܸܢ ܐܵܗܵܐ ܕܡܲܟܡܸܠܸܚ ܠܹܗ ܠܦܠܵܫܲܢ. ܐ݇ܬܹܐܡܘܼܢ ܓܲܫܩܲܚ ܒܕܲܣܬܹ̈ܐ ܕܫܠܝܼܚܹ̈ܐ. ܘܒܕܲܣܬܹ̈ܐ ܕܬܲܠܡܝܼܕܹ̈ܐ. ܘܐܘܼܦ ܠܟܸܣ ܢܒܼܝܹ̈ܐ ܦܲܪܣܲܚ ܠܹܗ ܚܝܼ̈ܵܠܲܢ ܘܕܚܵܙܲܚ ܓܲܫܲܩܬܵܐ ܕܚ̈ܘܼܫܵܒܲܢ: ܕܡܸܢܵܝ ܕܩܛܝܼܠܹ̈ܐ ܝ݇ܢܵܐ: ܘܡܸܢܵܝ ܢܣܝܼܪܹ̈ܐ ܝ݇ܢܵܐ: ܘܡܸܢܵܝ ܪܓ̰ܝܼܡܹܐ ܝ݇ܢܵܐ. ܘܡܸܢܵܝ ܡܸܚܝܹ̈ܐ ܝ݇ܢܵܐ ܠܙܩܝܼܦܵܐ: ܘܡܸܢܵܝ ܦܝܼܫܹ̈ܐ ܝ݇ܢܵܐ ܫܘܼܢܝܹ̈ܐ ܒܦܘܼܡܵܐ ܕܣܲܝܦܵܐ: ܘܡܸܢܵܝ ܦܝܵܫܵܐ ܝ݇ܢܵܐ ܓ̰ܘܼܢܓ̰ܸܪܹ̈ܐ ܒܟܸܦܢܵܐ ܘܨܵܗܘܵܐ: ܘܡܘܼܠܝܸܨܹ̈ܐ ܝܼܗ݇ܘ̣ܵܘ ܘܓ̰ܘܼܢܓ̰ܸܪܹ̈ܐ: ܐ݇ܢܵܫܹ̈ܐ ܕܠܹܐ ܚܵܫܸܚ ܗ݇ܘ̣ܵܐ ܐܸܠܵܝ ܥܵܠܡܵܐ: ܘܐܸܢ ܐܵܗܵܐ ܒܲܣܡܵܐ ܝ݇ܠܹܗ ܕܝܼܗ݇ܘܵܐ ܟܲܫܝܼܪܵܐ: ܘܚܲܦܛܵܢܵܐ ܘܦܵܐܹܫ ܬܘܼܡܸܡܵܐ ܒܣܵܗܕܘܼܬܵܐ: ܥܲܡܵܝ ܫܲܪܘܼܟܹܐ ܝ݇ܘܲܚ ܒܒܘܼܣܵܡܵܐ ܕܛܵܒܼܵܬܹ̈ܐ ܕܗܕܝܼܪܹ̈ܐ ܝ݇ܢܵܐ: ܓܵܘ ܡܲܠܟܘܼܬܵܐ ܕܫܡܲܝܵܐ ܕܦܝܼܫܠܵܗ݁ ܗܘܼܕܸܪܬܵܐ ܩܵܬܲܢ ܒܝܲܕ ܡܫܝܼܚܵܐ. ܗ݁ܘ ܕܓ̰ܘܼܢܓ̰ܸܪܹܗ ܘܦܝܼܫܠܹܗ ܓ̰ܘܼܪܒܵܐ: ܒܘܼܬ ܕܐܵܗܵܐ ܡܵܨܸܐ ܕܗܲܝܸܪ ܠܐܵܢܝܼ ܕܦܝܵܫܵܐ ܝܒ݇ܢܵܐ ܓ̰ܘܼܪ̈ܒܹܐ: ܐܲܝܟܼ ܗܲܡܙܲܡܬܹܗ ܕܫܠܝܼܚܵܐ ܛܘܼܒܼܵܢܵܐ ܗ݁ܘ ܕܩܵܡ ܡܲܠܸܦܠܲܢ. ܐܸܢ ܐܵܗܵܐ ܕܓ̰ܲܢܓ̰ܲܪܲܚ ܒܘܼܬ ܚܵܬܸܪ ܫܸܡܹܗ: ܒܸܬ ܝܵܗ݇ܒܸܠܲܢ ܚܲܝܠܵܐ ܘܒܸܬ ܗܲܝܸܪܲܢ ܓܵܘ ܕܐܵܗܵܐ ܦܠܵܫܵܐ. ܘܗܵܘܲܚ ܟܵܡܝܼܠ ܒܣܵܗܕܘܼܬܹܗ ܕܡܫܝܼܚܵܐ: ܘܗܵܘܲܚ ܟܲܡܝܼܠ ܒܫܵܟܲܪܬܵܐ ܕܒܵܒܵܐ ܘܒܪܘܼܢܵܐ ܘܕܪܘܼܚܵܐ ܕܩܘܼܕܫܵܐ.

ܐܝܼܢܵܐ ܟܲܕ ܐܲܢܹܐ ܡ݂ܢ ܢܲܨܝܼܚܵܐ ܫܸܡܥܘܿܢ ܠܐܲܚܘܿܢܘܵܬ̈ܘܼܗܝ ܦܝܵܫܵܐ ܝܼܗ݇ܘ̣ܵܘ ܗܘܼܡܙܸܡܹ̈ܐ: ܡ݂ܢ ܢܵܓܸܣܬܵܢ ܥܒܼܸܪܹܗ ܚܲܕ݇ ܐ݇ܢܵܫܐ ܠܟܸܣܠܵܝ ܘܐ݇ܡܸܪܹܗ ܐܸܠܵܝ: ܚܕܝܼܡܘܿܢ ܝܵܐ ܛܘܼܒܼܵܢܹ̈ܐ: ܡ݂ܢ ܣܵܒܵܐ ܕܓܘܼܗܫܬܐܵܙܵܕ ܢܲܨܝܼܚܵܐ ܟܡܸܠܹܗ ܒܣܵܗܕܘܼܬܵܐ ܘܫܩܸܠܹܗ ܟܠܝܼܠܵܐ. ܦܝܼܫܠܗ݇ܘܿܢ ܡܥܘܼܓ̰ܒܹܐ ܟܠܵܝ ܡܵܘܕܝܵܢܹ̈ܐ ܒܡܸܢܕܝܼ ܕܫܡܸܥܠܗ݇ܘܿܢ. ܘܬܘܼܢܝܼܠܗ݇ܘܿܢ ܐܸܠܵܝ ܟܠܵܝ ܐܵܢܝܼ ܕܗ݇ܘܹܐܠܗ݇ܘܿܢ: ܐܝܼܢܵܐ ܒܥܸܕܵܢܵܐ ܕܐܲܢܸܐ ܫܡܸܥܠܗ݇ܘܿܢ: ܚܕܝܼܠܗ݇ܘܿܢ ܚܲܕܘܼܬܵܐ ܪܵܒܵܐ ܓܘܼܪܬܵܐ. ܘܩܸܡܠܹܗ ܫܸܡܥܘܿܢ ܠܫܵܟܘܿܪܹܐ ܒܨܠܘܿܬܵܐ ܠܐܲܠܵܗܵܐ: ܒܘܼܬ ܕܐܵܢܝܼ ܕܦܝܼܫܠܹܗ ܥܒܼܝܼܕܵܐ ܠܟܸܣ ܚܩܝܼܪܵܐ ܓܘܼܗܫܬܐܵܙܵܕ. ܘܐ݇ܡܸܪܹܗ ܩܵܐ ܟܠܵܝ ܐܲܚܘܿܢܘܵܬ݁ܘܼܗܝ ܐܵܢܝܼ ܕܝܼܗ݇ܘܵܘ ܓܵܘ ܒܹܝܬܼ ܐܲܣܝܼܪܹ̈ܐ: ܐ݇ܬܹܐܡܘܼܢ ܫܲܒܲܚܲܚ ܠܡܵܪܝܵܐ: ܐ݇ܬܹܐܡܘܼܢ ܙܲܡܪܲܚ ܠܐܲܠܵܗܲܢ ܦܵܪܘܿܩܵܐ: ܐ݇ܬܹܐܡܘܼܢ ܫܵܟܪܲܚ ܠܡܫܝܼܚܵܐ ܘܡܲܣܲܩ ܪܘܼܡܪܵܡܵܐ ܠܫܸܡܹܗ ܕܥܸܠܵܝܵܐ: ܒܘܼܬ ܚܲܕܘܼܬܵܐ ܓܘܼܪܬܵܐ ܕܥܒܼܸܕܠܹܗ ܐܸܠܲܢ ܐܲܠܵܗܵܐ: ܘܡܘܼܕܸܪܹܗ ܥܸܪܒܵܐ ܕܛܠܸܩܠܹܗ ܡ݂ܢ ܩܸܛܥܵܐ ܠܕܵܝܪܹܗ ܕܲܡܫܝܼܚܵܐ: ܘܠܙܘܼܙܵܐ ܕܛܠܸܩܠܹܗ ܡ݂ܢ ܥܸܕܬܵܐ ܠܩܸܛܪܵܐ ܕܗܸܫܝܵܪܘܼܬܹܗ: ܘܠܒܪܘܿܢܵܐ ܕܒܘܼܪܒܸܙܠܹܗ ܡܵܐܠ̈ܘܼܗܝ ܕܒܲܝܬܵܐ ܕܒܵܒܘܼܗܝ ܠܚܲܝܘܼܬܵܐ ܕܓܵܢܹܗ. ܘܫܘܼܪܝܼܠܹܗ ܫܸܡܥܘܿܢ ܒܨܠܘܿܬܵܐ ܠܹܐܡܵܪܵܐ: ܣܓܼܝܼܕܵܐ ܝ݇ܠܹܗ ܗܝܼܒܼܝܘܼܟܼ ܐܲܠܵܗܲܢ: ܘܚܩܝܼܪܵܐ ܝ݇ܠܹܗ ܚܲܝܠܘܼܟܼ ܒܵܪܘܿܝܲܢ: ܙܝܼܕܵܐ ܝ݇ܠܹܗ ܗܘܼܟܡܘܼܟܼ ܦܵܪܘܿܩܲܢ: ܕܲܠܡܝܼܬܹ̈ܐ ܡܲܚܘܼܝܸܐ ܝ݇ܘܸܬ݁. ܘܠܢܦܝܼܠܹ̈ܐ ܡܲܩܝܘܿܡܹܐ ܝ݇ܘܸܬ݁: ܘܠܕܠܵܐ ܗܝܼܒܼܝܼ. ܗܝܼܒܼܝܼ ܒܸܥܒܼܵܕܵܐ ܝ݇ܘܸܬ݁: ܕܐܵܗܵܐ ܕܐ݇ܚܵܪܵܝܵܐ ܗ݇ܘ̣ܵܐ ܠܚܫܵܒܼܬܝܼ. ܗ݇ܘܹܐܠܹܗ ܩܲܕ݇ܡܵܝܵܐ ܠܪܸܙܵܝܝܼ. ܘܐܵܕܝܼܵܐ ܕܢܘܼܟܼܪܵܝܵܐ ܗ݇ܘ̣ܵܐ ܠܦܸܠܚܵܢܝܼ: ܗ݇ܘܹܐܠܹܗ ܚܫܝܼܚܵܐ ܠܦܸܠܚܵܢܝܼ. ܘܐܵܗܵܐ ܕܪܸܚܩܵܐ ܗ݇ܘ̣ܵܐ ܠܫܪܵܪܝܼ: ܗ݇ܘܹܐܠܹܗ ܩܘܼܪܒܵܐ ܠܗܲܝܡܵܢܘܼܬܝܼ. ܘܐܵܗܵܐ ܕܦܠܝܼܛܵܐ ܗ݇ܘ̣ܵܐ ܚܸܫܟܵܐ ܒܲܪܵܝܵܐ: ܗ݇ܘܹܐܠܹܗ ܝ݇ܬܝܼܒܼܵܐ ܒܓܢܘܿܢܵܐ. ܘܐܵܗܵܐ ܕܪܘܼܦܝܼܠܹܗ ܪܸܙܵܝܹܗ ܠܒܲܕܲܪ ܡܸܢܝܼ: ܗܵܐ ܡܘܼܥܒܸܪܝܼ ܡܵܘܕܝܵܢܘܼܬܹܗ ܠܓܵܘܵܝ ܡܸܢܝܼ. ܡ݂ܢ ܩܵܕ݇ܡ ܩܵܡܸܢ ܗ݇ܘ̣ܵܐ ܐܸܠܹܗ ܩܵܕܸܡܠܝܼ: ܘܡ݂ܢ ܩܵܡ ܕܫܵܒܼܩܸܢ ܗ݇ܘ̣ܵܐܠܹܗ ܩܵܡ ܡܵܛܝܼܠܝܼ. ܦܬܸܚܠܹܗ ܫܘܼܪܹܗ ܕܡܵܘܬܵܐ ܡܲܙܕܸܥܝܵܢܵܐ ܘܩܵܡ ܡܲܚܕܝܼܠܝܼ: ܒܝܹܗ ܦܝܼܫܠܵܗ݁ ܚܙܝܼܬܵܐ ܐܘܼܪܚܵܐ ܕܚܲܝܹ̈ܐ ܘܩܵܡ ܡܲܦܨܸܚܠܝܼ. ܗܘܹܐܠܹܗ ܡܗܲܕܝܵܢܵܐ ܠܐܲܩ̈ܠܝܼ ܓܵܘ ܫܒܼܝܼܠܵܐ ܥܝܼܩܵܐ: ܘܡܘܼܕܪܸܙܠܹܗ: ܘܦܘܼܠܸܛܠܹܗ ܠܐܲܩ̈ܠܝܼ ܒܐܘܼܪܚܵܐ ܕܥܝܼܩܘܼܬܵܐ: ܝܵܐ ܪܵܒ ܩܵܡܘܿܕܝܼ ܦܝܵܫܵܐ ܝ݇ܘܸܢ ܡܘܼܥܝܸܩܵܐ؟ ܘܠܐܲܝܢܝܼ ܡܸܢ݇ܕܪܸܫ݇ ܡܥܲܪܩܘܿܠܸܐ ܝ݇ܘܸܢ؟ ܗܲܝܡܵܢܬܹܗ ܫܒܸܩܠܹܗ ܐܸܠܝܼ ܕܩܘܼܡ݇ ܠܘܼܟܼ: ܘܓܲܫܲܩܬܹܗ ܫܘܼܕܸܪܹܗ ܕܐ݇ܬܵܠܘܼܟܼ: ܟܲܕ ܐܵܡܸܪ ܐܸܠܝܼ ܒܚܲܕܘܼܬܵܐ: ܕܠܲܝܬܠܘܼܟܼ ܫܸܡܥܘܿܢ ܡܸܢ݇ܕܪܸܫ݇ ܠܵܘܡܵܐ ܒܵܬ݇ܪ ܕܝܼܝܼ: ܘܡܸܢ݇ܕܪܸܫ݇ ܠܹܐ ܟܵܠܹܝܬ݁ ܒܬܲܪܥܵܐ ܕܒܲܝܬܵܐ ܕܫܪܵܝܬܘܼܟܼ: ܘܠܵܐ ܙܸܐ ܦܲܐܬܘܵܬ̈ܝܼ ܒܸܬ ܦܵܫܡܝܼ ܒܟܲܪܒܘܼܟܼ ܥܲܠܝܼ: ܥܒܼܘܿܪ ܒܚܲܕܘܼܬܵܐ ܠܟܸܣܠܝܼ ܠܒܲܝܬܵܐ ܕܗܘܼܕܸܪܝܼ ܩܵܐ ܓܵܢܝܼ: ܘܩܵܐ ܡܲܢܝܵܚܬܵܐ ܗܘܼܕܸܪܝܼ ܩܵܐ ܓܵܢܝܼ. ܕܦܵܨܚܲܚ ܒܣܘܼܗܒܲܬ ܕܚܲܒܼܪܵܒܼܘܼܬܵܐ ܕܐܸܚܕܵܕܹ̈ܐ ܒܐܲܬܪܵܐ ܕܢܘܼܗܪܵܐ: ܣܵܒܵܒ ܕܐܘܼܦ ܒܗ݁ܘ ܥܵܠܡܵܐ ܥܝܼܩܘܼܝܵܬܹ̈ܐ ܥܲܡ ܐܸܚܕܵܕܹ̈ܐ ܗܵܘܲܚ ܦܨܝܼܚܹ̈ܐ: ܒܦܲܓܼܪܵܐ ܐܘܼܦ ܒܪܘܼܚܵܐ: ܗܲܕܟܼܵܐ ܡܘܼܕܝܼ ܝ݇ܠܵܗ݁ ܥܝܼܩܘܼܬܵܐ ܕܫܲܡܥܸܢܹܗ؟ ܡܘܼܕܝܼ ܝ݇ܠܵܗ݁ ܥܲܪܩܵܠܬܵܐ ܕܡܵܛܸܢ ܐܸܠܹܗ؟ ܚܲܕܘܼܬܝܼ ܝܼܠܵܗ݁ ܒܥܸܕܵܢܵܐ ܕܡܲܙܕܸܥ ܠܝܼ ܠܩܸܛܠܵܐ ܚܲܕܘܼܬܝܼ ܝ݇ܠܵܗ݁ ܕܒܗ݁ܝ ܣܵܥܲܬ ܕܝܼܘܼܗ݁ ܡܲܪܚܸܛܝܼ ܠܝܼ ܠܡܵܘܬܵܐ ܒܘܼܫ ܙܵܘܕܵܐ ܕܦܲܪܩܸܢ ܡ݂ܢ ܥܝܼܩܘܪܝܵܬܹ̈ܐ ܕܚܘܼܪ̈ܕܝܹܐ ܝ݇ܢܵܐ ܠܛܵܝܸܦܵܐ ܕܡܫܝܼܚܵܐ ܡܵܪܝܼ: ܘܡ݂ܢ ܓ̰ܘܼܪ̈ܵܒܹܐ ܕܡܛܝܼܠܗ݇ܘܿܢ ܠܡܗܘܼܡܢܹ̈ܐ ܕܝܼܫܘܿܥ ܦܵܪܘܿܩܝܼ.

ܘܒܪܸܟܠܹܗ ܘܫܘܼܪܝܼܠܹܗ ܒܹܐܡܵܪܵܐ ܒܡܲܩܘܲܚܬܵܐ: ܡܵܪܲܢ ܝܼܫܘܿܥ: ܗܲܒܼܠܝܼ ܟܠܝܼܠܵܐ ܕܣܲܗܕܘܼܬܵܐ. ܡ݂ܢ ܣܵܒܵܒ ܓܠܝܼܬܵܐ ܝ݇ܠܵܗ݁ ܐܸܠܘܼܟܼ. ܕܒܟܠܹܗ ܠܸܒܝܼ ܛܠܸܒܠܝܼ: ܐܲܢ݇ܬ݁ ܟܹܐ ܓܲܫܩܸܬ݁ ܠܡܸܢܕܝܵܢܹ̈ܐ ܛܸܫܝܹ̈ܐ ܘܟܹܐ ܝܵܕܥܸܬ݁: ܕܒܟܠܵܗ݁ ܓܵܢܝܼ ܩܵܡ ܡܲܚܒܸܢܘܼܟܼ. ܝܵܐ ܨܲܚܨܝܼܵܢܵܐ ܕܠܸܒܵܐ ܡܸܢܘܪܟܼ ܐܵܗܵܐ ܟܠܝܼܠܵܐ: ܘܛܠܸܒܠܝܼ ܡܸܢܘܼܟܼ ܐܵܗܵܐ ܒܵܥܘܼܬܵܐ: ܗܲܒܼܠܝܼ ܕܚܵܙܹܝܢܹܗ ܠܣܲܝܦܵܐ ܕܚܵܕܸܢ: ܗܲܒܼܠܝܼ ܕܡܲܢܝܸܚܸܢ ܓܵܘ ܡܲܠܟܘܼܬܘܼܟܼ ܘܗܵܘܹܝܢ ܪܲܗܲܬ ܒܚܸܩܪܘܼܟܼ. ܗܲܒܼܠܝܼ ܕܡܸܢ݇ܕܪܸܫ݇ ܠܵܐ ܚܲܝܸܢ ܓܵܘ ܕܐܵܗܵܐ ܥܵܠܡܵܐ. ܗܲܒܼܠܝܼ ܡܸܢ݇ܕܪܸܫ݇ ܠܵܐ ܚܵܙܸܝܢ ܒܒܼܝܼܫܵܬܹ̈ܗ ܕܛܵܝܸܦܝܼ. ܗܲܒܼܠܝܼ ܕܠܹܐ ܚܵܙܸܝܢ ܥܸܕܬܵܘܵܬ̈ܘܼܟܼ ܕܥܩܝܼܪܹ̈ܐ ܝ݇ܢܵܐ: ܘܡܲܕܒܚ̈ܘܼܟܼ ܕܬܠܝܼܚܹܐ ܝ݇ܢܵܐ: ܘܟܬܵܒܼܘܼܟܼ ܩܲܕܝܼܫܹ̈ܐ ܕܓ̰ܕܝܼܩܹ̈ܐ ܝ݇ܢܵܐ: ܘܬܸܫܡܸܫܬܘܼܟܼ ܕܒܡܲܣܠܝܼܵܢܹ̈ܐ ܦܝܵܫܵܐ ܝ݇ܠܵܗ݁ ܡܘܼܣܚܸܪܬܵܐ: ܘܩܘܼܕܵܫ̈ܘܼܟܼ ܕܕܝܼܫܹ̈ܐ ܝ݇ܢܵܐ: ܘܛܵܝܸܦܘܼܟܼ ܕܡܘܼܠܝܸܨܵܐ ܝ݇ܠܹܗܢ ܘܓ̰ܘܼܢܓ̰ܪܵܐ ܒܟܠ ܐܲܬܪ̈ܵܘܵܬܹܐ: ܘܗܲܒܼܠܝܼ ܕܠܹܐ ܚܵܝܸܢ ܘܚܵܙܸܝܢ ܙܲܒܘܼܢܹ̈ܐ ܟܲܕ ܦܝܵܫܵܐ ܟ̰ܘܼܦܠܸܢܹ̈ܐ: ܘܐܵܢܝܼ ܕܐܝܼܢܵܐ ܥܝܼܩܹ̈ܐ ܕܠܸܒܵܐ ܒܸܕܝܵܪܵܐ ܡ݂ܢ ܫܪܵܪܵܐ. ܗܲܒܼܠܝܼ ܕܠܵܐ ܚܵܙܸܝܢ ܠܡܲܪ̈ܥܝܵܬܝܼ ܥܵܡܘܿܪܹ̈ܐ ܟܲܕ ܦܝܵܫܵܐ ܝ݇ܢܵܐ ܓ̰ܕܝܼܩܹ̈ܐ ܡ݂ܢ ܕܹܐܒܹ̈ܐ ܙܵܠܘܿܡܹ̈ܐ ܗܲܒܼܠܝܼ ܕܠܸܐ ܚܲܝܸܢ ܘܚܵܙܹܝܢ ܠܪܵܒܵܐ ܡܲܚܸܒܵܢܹ̈ܐ ܕܕܘܼܓܠܵܐ: ܕܗܵܐ ܕܦܝܼܫܠܗ݇ܘܿܢ ܡܘܼܫ݇ܟ̰ܚܹ̈ܐ ܐܸܕܝܘܿܡ݇ ܝܵܘܡܵܐ ܥܒܼܝܼܕܹ̈ܐ ܐܸܠܝܼ ܣܵܢܝܵܢܹ̈ܐ. ܘܠܵܐ ܡܲܙܝܸܕܸܢ ܠܲܚܙܵܝܵܐ ܣܵܘܓܘܼܠ̈ܝܼ ܕܐܵܗܵܐ ܙܲܒܼܢܵܐ: ܕܥܵܒܼܪܸܢ ܠܙܲܒܼܢܵܐ (ܕܝܵܘܡܵܐ ܕܕܝܼܘܵܢ) ܗܲܒܼܠܝܼ ܕܠܵܐ ܚܲܝܸܢ ܘܚܵܙܸܝܢ ܠܛܵܝܸܦܵܐ ܛܲܡܐܵܐ ܘܡܲܚܝܵܢܹ̈ܐ ܕܙܩܝܼܦܵܐ: ܕܡܲܣܚܘܼܪܹ̈ܐ ܝ݇ܢܵܐ ܒܛܵܝܸܦܘܼܟܼ ܩܲܕܝܼܫܵܐ: ܘܓܲܪܘܤܣܝܼ ܥܲܠ ܪܹ̈ܓܘܵܬܘܼܟܼ ܗܲܒܼܠܝܼ ܡܵܪܝܼ ܕܦܵܝܫܵܐ ܡܘܼܟܡܸܠܬܵܐ ܡܵܘܕܝܵܢܘܼܬܝܼ ܒܣܵܗܕܘܼܬܵܐ: ܗܲܒܼܠܝܼ ܡܵܪܝܼ ܒܓܲܢ݇ܒܵܪܘܼܬܵܐ ܕܟܵܠܸܢ ܒܪܹܫܵܐ ܕܟܠܵܗ݁ ܡܲܕܢܚܵܐ: ܘܗܵܘܹܝܢ ܒܕܵܡܲܝܬܵܐ ܛܵܒܼܬܵܐ ܠܟܠܹܗ ܛܵܝܸܦܘܼܟܼ ܕܒܐܘܼܚܕܵܢܵܐ ܕܐܵܗܵܐ ܡܲܠܟܘܼܬܵܐ ܙܲܪܒܲܢܬܵܐ. ܣܵܒܵܒ ܐܵܢܵܐ ܦܝܼܫܠܝܼ ܩܸܪܝܵܐ ܒܪܹܫܵܐ ܕܟܠܵܝ ܐܲܚܘܿܢ̈ܘܵܬܝܼ ܘܛܵܝܸܦܘܼܟܼ ܕܒܐܵܗܵܐ ܐܘܼܚܕܵܢܵܐ: ܘܐܵܢܵܐ ܒܸܬ ܡܵܝܬܸܢ ܒܪܹܫܵܐ ܕܟܠܵܝ: ܟܲܕ ܒܝܼܗ݇ܒܼܵܐ ܝ݇ܘܸܢ ܕܸܡܝܼ ܒܘܼܬ ܕܝܼܵܝ: ܕܩܵܢܸܢ ܚܲܝ̈ܝܼ ܥܲܡܵܝ: ܐܵܢܝܼ ܕܠܲܝܬ݁ ܒܝܼܵܝ ܚܲܕ݇ ܬܲܚܡܵܢܬܵܐ ܘܠܵܐ ܙܸܐ ܚܲܡ ܥܝܼܩܬܵܐ ܕܬܲܚܡܵܢܬܵܐ: ܠܲܝܬ݁ ܒܝܼܵܝ ܘܠܵܐ ܗ݁ܘ ܕܡܲܠܝܸܨ ܘܠܵܐ ܙܸܐ ܕܦܵܐܹܫ ܡܘܼܠܝܸܨܵܐ: ܠܲܝܬ݁ ܒܝܼܵܝ ܕܙܵܠܸܡ ܘܠܵܐ ܙܸܐ ܙܠܝܼܡܵܐ: ܘܐܲܢ݇ܬ ܡܵܪܝܼ ܗܘܼܕܸܪܘܼܟܼ ܠܓܘܼܒ̈ܝܘܼܟܼ ܠܥܵܠܡܵܐ: ܘܐܸܠܘܼܟܼ ܒܸܣܦܵܪܵܐ ܝ݇ܠܵܗ݁ ܓܵܢܝܼ. ܗܲܒܼܠܝܼ ܡܵܪܝܼ ܕܡܵܝܬܸܢ ܡ݂ܢ ܕܐܲܢܹܐ ܚܲܝܹ̈ܐ: ܕܒܝܼܵܝ ܓܘܼܕܵܦܹ̈ܐ ܕܡܲܠܟܹ̈ܐ ܒܸܫܥܵܫܝܼ ܝ݇ܠܹܗ: ܘܙܠܘܼܡܝܵܐ ܕܗܲܟܡܵܢܹ̈ܐ ܒܘܼܬ ܫܸܡܘܼܟܼ ܥܸܠܵܝܵܐ ܡܲܙܕܥܘܼܝܹܐ ܝ݇ܠܹܗ ܐܸܠܝܼ. ܬܲܪ̈ܩܵܠܝܵܬܹܐ ܕܐܲܩ̈ܠܵܬܝܼ ܒܝܼܘܼܟܼ ܒܸܬ ܡܲܢܝܸܚ ܝܵܐ ܡܫܝܼܚܵܐ ܡܸܫܚܵܐ ܕܕܘܼܗܵܢܲܢ: ܥܝܼܩܘܼܝܵܬܹ̈ܐ ܕܠܸܒܝܼ ܒܝܼܘܼܟܼ ܒܸܬ ܦܵܝܫܝܼ ܫܝܼܦܹ̈ܐ: ܝܵܐ ܝܼܫܘܿܥ ܟܵܣܵܐ ܕܦܘܼܪܩܵܢܲܢ: ܫܵܩܝܼܵܬܹ̈ܐ ܕܕܸܡܥܹ̈ܐ ܕܥܲܝܢ̈ܝܼ ܒܝܼܘܼܟܼ ܒܸܬ ܟܵܠܝܼ. ܝܵܐ ܝܵܗ݇ܒܼܵܢܵܐ ܕܠܸܒܵܢܵܐ ܠܚܲܕ̈ܘܼܝܵܬܲܢ.

ܐܝܼܢܵܐ ܐܲܦܸܣܩܘܿܦܹ̈ܐ ܘܡܫܲܡܫܵܢܹ̈ܐ: ܕܥܲܡܹܗ ܝܼܗ݇ܘ̣ܵܘ ܕܒܼܝܼܩܹ̈ܐ ܝܼܗ݇ܘ̣ܵܘ ܓܵܘ ܒܹܝܬܼ ܐܲܣܝܼܪܹ̈ܐ. ܥܘܼܓ̰ܸܒܠܗ݇ܘܿܢ ܒܓ̰ܘܼܪܐܵܬ ܕܚܝܼܵܠܹܗ ܕܩܲܕܝܼܫܵܐ: ܒܚܵܦܘܿܛܘܼܬܹܗ ܕܒܸܨܠܘܿܬܵܐ. ܘܦܝܵܫܵܐ ܝܼܗ݇ܘ̣ܵܘ ܡܥܘܼܓ̰ܒܹ̈ܐ ܒܡܵܪܲܡܬܵܐ ܘܡܬܲܚܬܵܐ ܕܐܝܼܕ̈ܘܼܗܝ ܠܫܡܲܝܵܐ: ܩܵܐ ܟܡܵܐ ܥܕܵܢܵܐ ܣܦܸܪܹܗ. ܘܓܲܫܩܝܼ ܝܼܗ݇ܘ̣ܵܘ ܒܦܲܪܨܘܿܦܹܗ ܕܦܝܼܫܠܹܗ ܫܘܼܚܠܸܦܵܐ ܡ݂ܢ ܕܝܼܗܘܵܐ ܐܲܝܟܼ ܥܵܕܲܬ: ܘܫܩܝܼܠܵܐ ܗ݇ܘ̣ܵܐ ܠܕܵܡܲܝܬܵܐ ܕܘܲܪܕܵܐ. ܡܘܼܟܡܸܠܹܗ ܨܠܘܿܬܵܐ ܕܫܵܟܲܪܬܵܐ ܠܟܸܣ ܐܲܠܵܗܵܐ: ܘܓ̰ܘܼܘܸܒܠܗ݇ܘܿܢ ܟܠܵܝ ܘܐ݇ܡܸܪܘܿܢ: ܐܵܡܹܝܢ. ܘܕܸܪܹܗ ܠܟܸܣ ܐܲܚܘܿܢܘܵܬ̈ܘܼܗܝ: ܘܒܘܼܪܟܼܵܝ ܠܹܗ: ܘܡ݂ܢ ܒܵܬ݇ܪ ܕܒܘܼܪܟܼܵܝ ܠܹܗ ܐ݇ܡܸܪܹܗ ܐܸܠܵܝ: ܚܕܝܼܡܘܿܢ ܒܡܵܪܲܢ ܐܲܚܘܿܢ̈ܘܵܬܝܼ. ܡܸܢ݇ܕܪܸܫ݇ ܐ݇ܡܸܪܹܗ ܐܸܠܵܝ ܚܕܝܼܡܘܿܢ: ܘܗ݇ܘܵܝܡܘܿܢ ܠܸܒܵܢܹ̈ܐ ܘܡܲܪܡܘܿܢ ܪܹܫܵܘܟܼܘܿܢ: ܡ݂ܢ ܣܵܒܵܒ ܡܛܹܐܠܹܗ ܙܲܒܼܢܵܐ ܕܦܘܿܪܩܵܢܲܢ: ܘܐܲܚܢܲܢ ܩܘܼܕܡܹܐ ܒܝܵܘܡܵܐ ܕܚܲܫܹܗ ܕܡܵܪܲܢ ܦܝܵܫܵܐ ܝ݇ܘܲܚ ܩܛܝܼܠܹ̈ܐ. ܘܪܵܒܵܐ ܗܘܼܡܙܸܡܠܹܗ ܥܲܡܵܝ ܡ݂ܢ ܟܬܵܒܹ̈ܐ.

ܘܡ݂ܢ ܒܵܬ݇ܪ ܕܫܠܝܼܠܹܗ ܡ݂ܢ ܡܲܠܦܵܢܘܼܬܹܗ ܐ݇ܡܸܪܹܗ ܐܸܠܵܝ: ܩܘܼܡܘܼܢ ܐ݇ܬܹܐܡܘܿܢ ܫܲܒܚܲܚ ܠܡܵܪܝܵܐ. ܘܙܲܡܪܲܚ ܠܐܲܠܵܗܲܢ ܦܵܪܘܿܩܵܐ. ܕܦܘܼܪܸܩܠܹܗ ܠܪܹܓܹܗ ܓܘܼܗܫܬܐܵܙܵܕ ܡ݂ܢ ܡܵܘܬܵܐ: ܘܡ݂ܢ ܐܝܼܕܵܐ ܕܫܝܘܿܠ ܦܘܼܨܝܼܠܹܗ ܢܩܲܕܡܲܚ ܠܓܸܒܵܐ ܕܝܹܗ ܒܫܵܟܲܪܬܵܐ: ܒܝܲܕ ܚܢܵܢܹܗ ܩܵܡ ܩܵܕܸܡܠܹܗ ܓ̰ܲܠܕܹܐ: ܘܦܘܼܪܸܩܠܹܗ ܡ݂ܢ ܫܘܼܠܛܵܢܵܐ ܕܚܸܠܛܘܼܢܝܵܐ. ܘܡ݂ܢ ܐܝܼܕܵܐ ܕܕܵܝܘܹ̈ܐ ܦܘܼܪܸܩܠܹܗ: ܘܡ݂ܢ ܚܸܫܟܵܐ ܕܚܘܝܼܵܐ ܕܣܵܛܵܢܵܐ. ܘܡܘܼܬ݇ܝܼܠܹܗ ܠܢܘܼܗܪܹܗ ܗ݁ܘ ܕܡܸܢܹܗ ܦܠܸܛܠܹܗ: ܘܡܘܼܡܛܝܼܠܹܗ ܠܡܲܠܟܘܼܬܵܐ ܕܒܪܘܿܢܹܗ ܝܼܫܘܿܥ ܗ݁ܝ ܕܡܸܢܘܿܗ݁ ܦܝܼܫܠܹܗ ܛܪܝܼܕܵܐ: ܘܚܫܝܼܚܫܠܹܗ ܠܣܵܗ݇ܡܵܐ ܗ݁ܝ ܕܡܛܝܼܠܵܗ݁ ܠܩܲܕܝܼܫܹ̈ܐ ܒܐܲܬܪܵܐ ܕܢܘܼܗܪܵܐ. ܐ݇ܬܹܐܡܘܼܢ ܥܵܒܼܕܲܚ ܕܘܼܟܼܪܵܢܹܗ ܒܚܲܕܘܼܬܵܐ: ܘܚܵܒܼܛܲܚ ܦܸܨܚܹܗ ܒܦܸܨܚܹܗ ܕܡܫܝܼܚܵܐ: ܘܦܲܓܼܪܵܐ ܘܕܸܡܵܐ ܕܦܵܐܪܹܗ ܕܐܲܠܵܗܵܐ ܟܹܐ ܫܵܩܹܠ ܚܛܝܼܬܹܗ ܕܥܵܠܡܵܐ ܥܵܒܼܕܲܚ ܒܘܼܣܵܡܵܐ. ܕܐܵܗܵܐ ܕܡܘܼܚܙܝܼܠܹܗ ܐܸܠܲܢ ܒܐ݇ܪܵܙܵܐ. ܕܩܵܡ ܡܲܠܸܦ ܠܲܢ ܐ݇ܪܵܙܵܐ ܕܕܒܼܝܼܚܘܼܬܵܐ ܕܦܲܓܼܪܹܗ: ܠܹܐ ܗ݇ܘ̣ܵܐ ܡ݂ܢ ܝܼܗܘܼܕܵܝܹ̈ܐ: ܐܸܠܵܐ ܡ݂ܢ ܪܹ̈ܓܵܘܵܬܘܼܗܝ ܩܲܕܝܼܫܹ̈ܐ ܦܝܵܫܵܐ ܝ݇ܠܹܗ ܕܒܼܝܼܚܵܐ ܓܵܘ ܥܹܕܵܬܹ̈ܐ: ܘܩܸܡܠܗ݇ܘܿܢ ܒܨܠܘܿܬܵܐ: ܘܐ݇ܪ̈ܵܙܹܐ ܥܲܠ ܐܝܼܕ̈ܵܬܲܝ ܩܘܼܪܒܸܢܘܿܢ ܠܒܹܝܬܼ ܐܲܣܝܼܪܹ̈ܐ: ܡܣܵܒܵܒ ܡܵܐ̈ܢܹܐ ܕܬܸܫܡܸܫܬܵܐ ܗܸܟ̰ ܐ݇ܢܵܫܵܐ ܠܹܐ ܗ݇ܘ̣ܵܐ ܡܨܵܝܵܐ ܕܡܸܥܒܸܪ ܗ݇ܘ̣ܵܐ ܠܗ݇ܘܿܢ: ܡ݂ܢ ܙܕܥܘܿܬܵܐ ܕܪ̈ܵܕܘܿܦܹܐ: ܗܲܕܟܼܵܐ ܚܒܸܛܠܗ݇ܘܿܢ ܦܸܨܚܵܐ ܒܦܸܨܚܵܐ: ܘܕܘܼܟܼܪܵܢܵܐ ܒܕܘܼܟܼܪܵܢܵܐ: ܘܐ݇ܡܸܪܹܗ ܩܲܕܝܼܫܵܐ ܫܸܡܥܘܿܢ: ܐܵܗܵܐ ܐ݇ܪܵܙܵܐ ܕܦܲܓܼܪܹܗ ܕܡܵܪܲܢ: ܣܵܘܓܘܼܠܝܼ: ܕܝܼܗ݇ܘ̣ܵܐ ܐܸܠܲܢ ܚܲܒܼܪܵܐ: ܗܲܠ ܝܵܘܡܵܐ ܕܩܲܒܠܲܚ ܠܓܸܠܝܵܢܹܗ: ܒܥܕܵܢܵܐ ܕܐܵܬܹܐ ܥܲܠ ܥܲܝܒܼܵܬܹ̈ܐ ܕܫܡܲܝܵܐ ܥܲܡ ܚܲܝܠܵܐ ܕܡܲܠܲܐܟܼܵܘ̈ܗܝ ܕܩܲܒܠܲܚ ܓܸܠܝܵܢܹܗ: ܘܡܲܕܸܪ ܓܵܢ̈ܵܬܲܢ ܠܦܲܓܼܪ̈ܲܢ: ܘܐܸܠܵܝ ܡܢܲܚܸܡ ܡ݂ܢ ܥܘܼܦܪܵܐ. ܘܠܵܒܸܠ ܘܡܲܣܸܩܠܲܢ ܥܲܡܹܗ ܠܫܡܵܝܵܐ: ܘܡܲܒܣܸܡ ܠܲܢ ܒܚܙܵܝܬܹܗ ܫܵܗܘܸܬܵܢܬܵܐ: ܘܫܲܪܸܟܠܲܢ ܒܚܸܩܪܹܗ: ܘܡܲܚܕܝܼܠܲܢ ܒܡܲܠܟܘܼܬܵܐ ܕܫܡܲܝܵܐ ܠܥܵܠܲܡ ܥܵܠܡܝܼܢ: ܐܵܡܹܝܢ. ܘܓ̰ܘܼܘܸܒܠܗ݇ܘܿܢ ܟܠܵܝ ܩܲܕܝܼܫܹ̈ܐ ܕܥܲܡܹܗ ܘܐ݇ܡܸܪܘܿܢ: ܐܵܡܹܝܢ.

ܘܡܸܢ݇ܕܪܸܫ݇ ܫܘܼܪܝܼܠܗ݇ܘܿܢ ܒܨܠܘܿܬܵܐ ܕܟܠܹܗ ܠܲܝܠܹܐ: ܗܲܠ ܡܗ݇ܘܿܪܹܫܵܐ ܕܥܪܘܼܒܼܬܵܐ ܕܚܲܫܹܗ ܕܡܵܪܲܢ: ܘܒܡܲܙܡܘܿܪܹ̈ܐ ܘܒܡܲܕܪ̈ܵܫܹܐ ܘܒܬܸܫܒܘܿܚܝܵܬܹ̈ܐ ܡܘܼܥܒܼܪܘܿܢ ܒܟܠܵܝܬܵܐ ܥܲܠ ܐܲܩ̈ܠܵܬܵܝ. ܘܠܵܐ ܓܼܠܝܼܒܵܝܠܵܗ݁ ܫܸܢܬܵܐ ܒܫܓܲܫܬܘܼܗ̈: ܘܠܵܐ ܡܘܼܥܝܸܩܠܵܗ݁ ܐܸܠܵܝ ܬܲܚܡܵܢܬܵܐ ܒܒܵܛܲܠܝܵܬ̈ܘܼܗ݁. ܐܸܠܵܐ ܟܠܵܝ ܒܸܛܠܵܒܵܐ ܗ݇ܘ̣ܵܘ ܟܲܕ ܒܪ̈ܝܼܟܹܐ ܥܲܠ ܒܸܪ̈ܟܵܟܵܝ: ܕܗܲܒܼܠܲܢ ܡܵܪܲܢ ܕܒܐܵܗܵܐ ܝܵܘܡܵܐ ܕܚܲܫܘܼܟܼ: ܕܒܝܹܗ ܐܘܼܦ ܐܲܚܢܲܢ ܕܩܲܒܠܲܚ ܚܲܫܵܐ: ܘܛܲܥܡܲܚ ܠܹܗ ܠܐܵܗܵܐ ܟܵܣܵܐ ܕܡܵܘܬܵܐ ܒܘܼܬ ܫܸܡܘܼܟܼ: ܕܐܵܡܪܝܼ ܕܵܘܪܹ̈ܐ ܕܐܵܬܝܼ ܡ݂ܢ ܒܵܬ݇ܪܲܢ: ܕܫܸܡܥܘܿܢ ܘܐܲܚܘܿܢܘܵܬ̈ܘܼܗܝ ܡܘܼܨܝܸܬܠܗ݇ܘܿܢ ܠܝܼܫܘܿܥ: ܘܐܲܝܟܼ ܝܼܫܘܿܥ ܒܥܪܘܼܒܼܬܵܐ ܕܐܲܪܒܲܥܣܲܪ ܦܝܼܫܠܗ݇ܘܿܢ ܦܪ̈ܝܼܡܹܐ.

ܒܨܲܦܪܵܐ ܝܵܘܡܵܐ ܕܥܪܘܼܒܼܬܵܐ ܒܣܵܥܵܬ ܚܕܵܐ: ܦܝܼܫܠܗ݇ܘܿܢ ܛܠܝܼܒܹ̈ܐ ܟܠܵܝ ܡ݂ܢ ܒܹܝܬ݁ ܐܲܣܝܼܪܹ̈ܐ ܠܬܲܪܥܵܐ ܕܕܲܪܬܵܐ ܕܡܲܠܟܵܐ. ܫܘܼܕܸܪܠܹܗ ܡܲܠܟܵܐ ܠܫܸܡܥܘܿܢ ܘܠܟܠܵܝ ܐܲܚܘܿܢܘܵܬ̈ܘܼܗܝ ܒܐܹܡܵܪܵܐ ܣܓܼܘܿܕܘܼܢ ܠܐܵܗܵܐ ܫܸܡܫܵܐ ܕܒܝܲܕ ܙܪܵܩܹܗ ܒܸܚܝܵܐ ܝ݇ܠܹܗ ܥܵܠܡܵܐ: ܘܒܹܚܵܝܵܐ ܝ݇ܬܘܿܢ. ܫܘܼܕܸܠܹܗ ܫܸܡܥܘܿܢ ܠܡܲܠܟܵܐ ܡ݂ܢ ܦܘܼܡܵܐ ܕܟܠܵܝ ܛܘܼܒܼܵܢܹ̈ܐ ܕܥܲܡܹܗ: ܘܐ݇ܡܸܪܹܗ ܠܘܲܙܝܼܪ ܕܡܲܠܟܵܐ: ܩܵܡܘܿܕܝܼ ܣܵܓܼܕܲܚ ܠܗܵܘ ܠܹܐ ܚܵܙܸܐ ܠܣܓܼܵܕܬܲܢ؟ ܩܵܡܘܿܕܝܼ ܨܵܠܲܚ ܠܗ݁ܘ ܕܠܵܐ ܫܵܡܸܥ ܨܠܘܿܬܲܢ؟ ܘܩܵܡܘܿܕܝܼ ܫܵܒܚܲܚ ܠܗ݁ܘ ܠܹܐ ܝ݇ܠܹܗ ܒܝܼܕܲܥܝܵܐ ܐܘܼܦ ܠܵܐ ܒܢܘܼܗܪܹܗ؟ ܚܵܣܠܝܼ ܘܠܹܐ ܗܵܘܝܵܐ ܐܵܗܵܐ ܠܟܪܸ̈ܣܛܝܵܢܹܐ: ܕܡܲܩܪܸܒܼܝܼ ܣܓܼܵܕܬܵܐ ܕܒܸܪܝܵܢܵܐ ܠܒܸܪܝܵܐ. ܘܫܲܚܠܸܦܝܼ ܠܒܲܪܝܵܢܵܐ ܒܒܪܝܼܬܹܗ. ܐܵܦܸܢ ܒܟܠ ܥܝܼܩܘܼܝܵܬܹ̈ܐ ܦܵܝܫܲܚ ܡܘܼܥܝܸܩܹ̈ܐ: ܘܒܟܠ ܦܸܨܠܵܐ ܕܡܵܘܬܹ̈ܐ ܡܵܝܬܲܚ: ܐܲܚܢܲܢ ܡ݂ܢ ܐܲܠܵܗܵܐ ܠܵܐ ܕܵܝܪܲܚ. ܘܕܐ݇ܡܸܪܹܗ ܡܵܪܝܼ ܡܲܠܟܵܐ: ܕܒܸܙܪܵܩܹܗ ܕܫܸܡܫܵܐ ܟܹܐ ܚܵܝܹ ܥܵܠܡܵܐ: ܥܵܠܡܵܐ ܠܹܐ ܗ݇ܘ̣ܵܐ ܒܸܙܪܵܩܹܗ ܕܫܸܡܫܵܐ ܟܹܐ ܚܵܝܹܐ. ܕܵܐܟܼܝܼ ܡܵܨܹܐ ܕܝܵܗ݇ܒܸܠ ܚܲܝܹ̈ܐ: ܗ݁ܘ ܕܒܓܵܢܹܗ ܠܹܐ ܝ݇ܠܹܗ ܚܵܝܵܐ؟ ܣܵܒܵܒ ܥܵܠܡܵܐ ܟܹܐ ܚܵܝܹܐ ܒܪܸܡܙܹܗ ܕܐܲܠܵܗܵܐ: ܕܝܼܠܹܗ ܚܵܝܵܐ ܒܐܝܼܬܘܼܬܹܗ. ܐܝܼܢܵܐ ܗܵܐ ܐܘܼܦ ܣܸܡܝܹ̈ܐ ܕܠܹܐ ܚܵܙܝܼ ܠܫܸܡܫܵܐ ܒܸܚܵܝܵܐ ܝ݇ܢܵܐ. ܐܝܼܢܵܐ ܘܵܓ̰ܸܒ ܝܼܗ݇ܘܵܐ ܠܫܸܡܫܵܐ: ܐܸܢ ܩܢܝܼܬܵܐ ܝ݇ܠܵܗ݁ ܦܲܪܡܵܝܬܵܐ: ܕܩܲܒܠܵܗ݁ ܫܵܟܲܪܬܵܐ ܕܥܲܝܢܹ̈ܐ. ܐܸܢ ܥܲܝܢܵܐ ܠܵܐ ܗ݇ܘܹܐܠܵܗ݁ ܒܲܗܪܵܢܬܵܐ: ܦܵܝܕܵܐ ܕܒܲܗܪܵܐ ܕܫܸܡܫܵܐ ܒܘܼܫ ܙܵܘܕܵܐ ܝܠܵܗ݁ ܐܝܼܢܵܐ ܐܲܢܹܐ ܕܦܝܼܫܠܗ݇ܘܿܢ ܐ݇ܡܝܼܪܹ̈ܐ ܡ݂ܢ ܩܲܕܝܼܫܹ̈ܐ: ܩܵܐ ܡܲܠܟܵܐ ܦܝܼܫܠܗ݇ܘܿܢ ܐ݇ܡܝܼܪܹܐ. ܕܡܸܢ݇ܕܪܸܫ݇. ܫܘܼܕܸܪܹܗ ܐܸܠܵܝ ܡܲܠܟܵܐ ܒܐܹܡܵܪܵܐ: ܡܲܨܝܸܬܘܿܢ ܠܡܸܢܕܝܼ ܕܦܵܩܘܿܕܹܐ ܝ݇ܘܸܢ ܐܸܠܵܘܟܼܘܿܢ ܘܥܒܼܘܿܕܘܿܢ ܪܸܙܵܝܝܼ: ܘܐܵܢܵܐ ܒܸܬ ܓܲܪܘܸܣܸܢ ܪܹܫܵܢܘܼܬܵܘܟܼܘܿܢ ܘܡܲܙܝܸܕܸܢ ܐܝܼܩܵܪܵܘܟܼܘܿܢ. ܫܘܼܕܸܪܹܗ ܩܲܕܝܼܫܵܐ ܫܸܡܥܘܿܢ ܘܩܲܕܝܼܫܹ̈ܐ ܕܥܲܡܹܗ ܠܡܲܠܟܵܐ ܘܐ݇ܡܸܪܘܿܢ: ܐܲܢ݇ܬ݁ ܡܵܪܝܼ ܡܲܠܟܵܐ ܦܲܪܡܘܿܝܸܐ ܝ݇ܘܸܬ݁: ܐܸܢ ܐܵܗܵܐ ܪܲܒ݁ܚܲܝܠܵܐ ܕܡܸܢܘܼܟܼ ܦܝܵܫܵܐ ܝ݇ܠܹܗ ܫܘܼܕܪܵܐ ܠܦܠܵܫܵܐ: ܘܓܵܘ ܪܝܼܙܵܐ ܕܐܵܣܟܵܪ̈ܵܝܹܐ ܒܝܲܕ ܙܕܥܘܿܬܵܐ ܕܡ݂ܢ ܡܵܘܬܵܐ: ܘܒܣܵܒܵܒ ܕܡܲܚܲܒܬܹܗ ܠܚܲܝܹ̈ܐ ܒܸܬ ܡܲܚܙܸܐ ܚܵܨܹܗ: ܘܕܵܝܼܪ ܡ݂ܢ ܪܝܼܙܵܐ ܕܐܲܣܟܪ̈ܵܝܹܐ ܠܒܵܬ݇ܪܹܗ: ܠܩܸܛܠܵܐ ܐܲܢ݇ܬ݁ ܒܸܬ ܣܵܦܸܬ݁ ܠܹܗ. ܘܐܸܢ ܗ݁ܘ ܕܡ݂ܢ ܣܸܕܪܹ̈ܐ ܕܐܲܣܟܵܪ̈ܘܵܬܘܼܟܼ: ܒܸܕܝܵܪܵܐ ܝ݇ܠܹܗ ܡ݂ܢ ܦܠܵܫܵܐ ܠܩܸܛܠܵܐ ܦܝܵܫܵܐ ܝ݇ܠܹܗ ܣܘܼܦܝܵܐ: ܗ݁ܘ ܕܕܵܝܸܪ ܡ݂ܢ ܐܲܠܵܗܵܐ. ܕܲܝܵܢܵܐ ܕܡܝܼܬܹ̈ܐ ܘܕܚܵܝܹ̈ܐ: ܘܡܲܕܸܪ ܚܵܨܹܗ ܓܵܘ ܦܠܵܫܵܐ ܒܘܼܬ ܫܪܵܪܵܐ ܕܗ݁ܘ ܕܝܼܠܹܗ ܡܲܠܟܵܐ ܕܟܠܵܝ ܛܵܝܸܦܹ̈ܐ ܘܡܲܠܟܹ̈ܐ: ܕܡܲܠܟܘܼܬܹܗ ܡܲܠܟܘܼܬܵܐ ܕܥܵܠܲܡ ܝ݇ܠܵܗ݁: ܝܵܐ ܪܲܒ ܠܐܲܝܢܝܼ ܡܵܘܬܵܐ ܒܸܬ ܚܵܫܲܚ ܦܘܼܪܥܵܢܵܐ ܕܟܦܘܼܪܝܹܗ؟ ܡ݂ܢ ܣܵܒܵܐ ܙܕܸܥܠܹܗ ܡ݂ܢ ܚܙܵܝܬܵܐ ܕܒܢܲܝ̈ܢܵܫܵܐ ܘܠܵܐ ܓܘܼܫܸܩܠܹܗ ܒܐܲܠܵܗܵܐ: ܗ݁ܘ ܕܒܪܸܡܙܵܐ ܕܓܲܫܲܩܬܹܗ ܟܹܐ ܫܵܥܫܝܼ ܫܡܲܝܵܐ ܘܐܲܪܥܵܐ ܘܟܠ ܕܐܝܼܢܵܐ ܒܝܼܵܝ: ܗ݁ܘ ܐܵܦ ܠܵܐ ܚܸܠܡܲܬܟܵܪ̈ܘܼܗܝ ܕܢܘܼܪܵܐ ܡܵܨܝܼ ܠܓܵܫܘܿܩܹܗ ܒܐܝܼܩܵܪܵܐ ܕܓܘܼܪܘܼܬܹܗ. ܡ݂ܢ ܕܐܵܗܵܐ ܐܲܠܵܗܵܐ. ܘܵܓ̰ܸܒ ܝ݇ܠܵܗ݁ ܠܡܵܪܝܼ ܡܲܠܟܵܐ ܠܸܙܕܥܵܝܵܐ: ܘܠܵܐ ܡ݂ܢ ܒܢܲܝ̈ܢܵܫܵܐ ܡܵܝܘܿܬܹ̈ܐ: ܘܠܐܵܗܵܐ ܡܵܪܵܐ ܕܫܡܲܝܵܐ ܘܕܐܲܪܥܵܐ ܘܵܓ̰ܸܒ ܝ݇ܠܵܗܥ ܠܸܣܓܼܵܕܵܐ ܘܠܡܫܵܒܘܿܚܹܐ: ܘܠܵܐ ܠܫܸܡܫܵܐ ܗ݁ܘ ܕܟܠ ܝܵܘܡܵܐ ܚܸܫܟܵܐ ܡܟܵܣܘܿܝܹܐ ܝ݇ܠܹܗ ܐܸܠܹܗ. ܘܐܸܢ ܐܝܼܬ ܗ݇ܘ̣ܵܐ ܒܝܹܗ ܦܲܪܡܵܝܬܵܐ: ܚܫܸܚܬܵܐ ܝܗ݇ܘ̣ܵܐ ܐܸܠܹܗ ܕܩܲܒܸܠ ܗ݇ܘ̣ܵܐ ܨܦܵܝܘܼܬܲܢ. ܕܒܘܼܬ ܕܝܲܢ ܒܘܼܗܪܸܢܹܗ ܐܲܠܵܗܵܐ: ܘܝܘܼܗ݇ܒܸܠܹܗ ܓܵܘ ܪܩܝܼܥܵܐ ܕܫܡܲܝܵܐ ܠܒܲܗܪܘܿܢܹܐ ܥܲܠ ܐܲܪܥܵܐ. ܘܒܘܼܬ ܚܵܬܸܪ ܐܝܼܩܵܪܵܐ ܘܪܹܫܵܢܘܼܬܵܐ ܕܩܘܼܘܸܠܘܼܟܼ ܐܸܠܲܢ: ܐܝܼܠܹܗ ܓܵܘ ܚܲܙܢܵܐ ܫܡܲܝܵܢܵܐ ܕܟܠ ܚܲܙܢܹ̈ܐ: ܐܵܢܝܼ ܕܒܘܼܫ ܨܦܵܝܝܝܼ ܝ݇ܢܵܐ ܡ݂ܢ ܟܠܵܝ ܐܝܼܩܵܪܹ̈ܐ ܘܢܝܵܚܹ̈ܐ ܥܵܒܼܘܿܕܹ̈ܐ: ܘܟܲܕ ܒܘܼܬ ܐܲܠܵܗܵܐ ܦܝܵܫܵܐ ܝ݇ܘܲܚ ܩܛܝܼܠܹ̈ܐ: ܗܵܝܓܵܗ݁ ܦܝܵܫܵܐ ܝ݇ܘܲܚ ܩܸܪ̈ܝܹܐ ܪܹ̈ܫܵܢܹܐ ܕܙܲܕܝܼܩܘܪܬܵܐ: ܘܡܕܲܒܪ̈ܵܢܹܐ ܕܗܲܩܘܪܬܵܐ.

ܐܝܼܢܵܐ ܟܲܕ ܐܲܢܹܐ ܕܦܝܼܫܠܗ݇ܘܿܢ ܐ݇ܡܝܼܪܹܐ ܡ݂ܢ ܛܘܼܒܼܵܢܵܐ ܫܸܡܥܘܿܢ ܘܡ݂ܢ ܩܲܕܝܼܫܹ̈ܐ ܚܲܒܼܪ̈ܘܵܬܘܼܗܝ: ܩܵܕܡ ܡܲܠܟܵܐ ܦܝܼܫܠܗ݇ܘܿܢ ܐ݇ܡܝܼܪܹܐ. ܗܵܝܓܵܗ݁ ܦܘܼܩܸܕܠܹܗ ܡܲܠܟܵܐ ܒܘܼܬ ܢܲܨܝܼܚܵܐ ܫܸܡܥܘܿܢ: ܕܒܢܲܦ̮ܫܹܗ ܥܵܒܸܪ ܠܟܸܣܠܹܗ. ܐܝܼܢܵܐ ܝܼܗ݇ܘ̣ܵܐ ܣܵܥܲܬ ܬܠܵܬܵܐ: ܡܘܼܪܚܸܛܠܗ݇ܘܿܢ ܒܙܕܥܘܼܬܵܐ ܘܡܘܼܥܒܸܪܗ݇ܘܿܢ ܩܵܕ݇ܡ ܡܲܠܟܵܐ: ܘܒܥܸܕܵܢܵܐ ܕܥܒܼܸܪܹܗ ܩܵܕ݇ܡ ܡܲܠܟܵܐ: ܣܓܼܸܕܠܹܗ ܥܲܠ ܦܲܐܬܹܗ ܩܵܕ݇ܡܘܼܗܝ. ܐܵܡܸܪ ܐܸܠܹܗ ܡܲܠܟܵܐ: ܫܸܡܥܘܿܢ ܥܸܨܝܵܐ: ܒܡܘܿܕܝ݇ ܚܝܼܵܠ ܟܠܝܼܠܘܼܟܼ ܐܸܕܝܘܿܡ݇ ܝܵܘܡܵܐ: ܕܦܵܝܫܸܬ݁ ܠܟܸܣܠܲܢ ܒܕܵܘܣܬܘܼܬܵܐ: ܝܲܢ ܒܸܬ ܫܲܕܪܸܢܘܼܟܼ ܠܫܝܘܿܠ ܒܕܸܫܡܸܢܵܝܘܼܬܵܐ؟ ܐ݇ܡܸܪܹܗ ܩܲܕܝܼܫܵܐ ܫܸܡܥܘܿܢ: ܚܝܼ ܡܲܠܟܵܐ ܚܝܼ: ܐܵܢܵܐ ܪܹܓܘܼܟܼ ܒܚܝܼܵܠ ܗܲܝܸܪܵܢܬܵܐ ܟܠܝܼܠܝܼ. ܐܵܡܸܪ ܐܸܠܹܗ ܡܲܠܟܵܐ: ܒܐܲܝܢܝܼ؟ ܐ݇ܡܸܪܹܗ ܛܘܼܒܼܵܢܵܐ ܫܸܡܥܘܿܢ: ܕܨܦܵܝܝܼ ܝ݇ܠܹܗ ܐܸܠܝܼ ܡܵܘܬܵܐ: ܒܘܼܫ ܙܵܘܕܵܐ ܡ݂ܢ ܚܲܝܹ̈ܐ ܕܒܟܦܘܼܪܝܵܐ ܡ݂ܢ ܐܲܠܵܗܵܐ: ܐܵܡܸܪ ܐܸܠܹܗ ܡܲܠܟܵܐ: ܘܐܲܝܟܵܐ ܝ݇ܠܵܗ݁ ܡܲܚܲܒܬܘܼܟܼ ܕܠܟܸܣܠܝܼ؟ ܐܵܡܲܪ ܐܸܠܹܗ ܫܸܡܥܘܿܢ: ܒܕܘܼܙܘܼܬܵܐ ܟܹܐ ܡܲܚܒܸܢܘܼܟܼ ܘܒܟܠ ܥܕܵܢܵܐ ܒܘܼܬ ܡܲܠܟܘܼܬܘܼܟܼ ܐܵܢܵܐ ܘܛܵܝܸܦܝܼ ܟܹܐ ܡܨܵܠܲܚ: ܐܲܝܟܼ ܕܦܵܩܘܿܕܹ̈ܐ ܝ݇ܢܵܐ ܐܸܠܲܢ ܟ̈ܬܵܒܲܢ: ܐܝܼܢܵܐ ܙܵܘܕܵܐ ܝ݇ܠܵܗ݁ ܡܲܚܲܒܬܵܐ ܕܐܲܠܵܗܝܼ: ܒܘܼܫ ܡ݂ܢ ܡܲܚܲܒܬܘܼܟܼ ܡܲܠܟܵܐ: ܣܵܒܵܒ ܕܠܹܐ ܕܵܡܝܵܐ ܡܲܚܲܒܬܵܐ ܕܡܲܠܟܵܐ ܥܲܡ ܡܲܚܲܒܬܹܗ ܕܐܲܠܵܗܵܐ: ܐܲܝܟܼ ܕܠܹܐ ܕܵܡܹܐ ܙܥܘܿܪܵܐ ܕܟܵܘܟܼܒܹ̈ܐ ܥܲܡ ܫܸܡܫܵܐ. ܟܲܕ ܬܸܪ̈ܘܲܝ ܪܵܒܵܐ ܒܲܗܪ̈ܵܢܹܐ ܝ݇ܢܵܐ. ܗܲܕܟܼܵܐ ܟܲܕ ܗ݁ܝ ܡܲܚܲܒܬܵܐ ܕܕܝܼܘܼܟܼ. ܡܲܠܟܵܐ ܡܲܚܲܒܬܵܐ ܟܹܐ ܐܵܡܪܵܗ݁: ܘܗ݁ܝ ܡܲܚܲܒܬܵܐ ܕܐܲܠܵܗܵܐ ܟܹܐ ܩܵܪܝܵܐ: ܦܪܝܼܫܬܵܐ ܝ݇ܠܵܗ݁ ܡܲܚܲܒܬܹܗ ܡ݂ܢ ܡܲܚܲܒܬܘܼܟܼ. ܠܡܲܠܟܘܼܬܘܼܟܼ ܐܲܝܟܼ ܕܠܡܲܠܟܵܐ ܟܹܐ ܡܲܚܸܒܸܢ: ܘܐܲܝܟܼ ܕܠܡܿܢ ܕܝܼܠܹܗ ܐܵܟܼܠܵܢܵܐ ܕܚܲܡ ܕܡܲܠܟܘܼܬܹܗ. ܐܝܼܢܵܐ ܠܐܲܠܵܗܵܐ ܐܲܝܟܼ ܕܠܐܲܠܵܗܵܐ: ܘܡܵܪܵܐ ܘܒܵܪܘܿܝܵܐ ܘܝܲܗ݇ܒܼܵܢܵܐ ܕܚܲܝ̈ܝܲܢ. ܘܲܡܢܲܛܪܵܢܵܐ ܘܬܲܓܒܸܪܵܢܵܐ ܘܬܲܪܣܝܼܵܢܵܐ ܘܐܘܼܦ ܡܢܲܚܡܵܢܵܐ: ܘܟܹܐ ܝܵܗ݇ܒܸܠ ܚܸܩܪܵܐ ܠܡܲܚܸܒܵܢ̈ܘܼܗܝ ܘܠܐܵܢܝܼ ܕܟܹܐ ܢܵܛܪܝܼ ܦܘܼܩܕܵܢ̈ܘܼܗܝ.

 ܐܵܡܸܪ ܐܸܠܹܗ ܡܲܠܟܵܐ: ܣܓܼܘܿܕ ܩܵܐ ܚܲܕ݇ ܥܕܵܢܵܐ ܠܫܸܡܫܵܐ: ܘܡܸܢ݇ܕܪܸܫ݇ ܠܵܐ ܣܵܓܼܕܸܬ݁: ܘܒܸܬ ܦܵܨܸܢܘܼܟܼ ܡ݂ܢ ܡܓܼܘܼܫܵܝܹ̈ܐ ܕܒܸܒܥܵܝܵܐ ܝ݇ܢܵܐ ܓܵܢܘܼܟܼ. ܐܝܼܢܵܐ ܟܲܕ ܫܡܸܥܠܹܗ ܛܘܼܒܼܵܢܵܐܫܸܡܥܘܿܢ ܥܘܼܓ̰ܸܒܠܹܗ ܘܐ݇ܡܸܪܹܗ: ܐܘܿܗ ܡܵܪܝܼ ܡܲܠܟܵܐ ܠܵܐ ܦܵܝܫܵܐ ܫܡܝܼܥܬܵܐ ܐܵܗܵܐ ܓܵܘ ܕܘܼܢܝܹܐ: ܘܠܵܐ ܦܵܝܫܵܐ ܬܘܼܢܝܼܬܵܐ ܐܵܗܵܐ ܓܵܘ ܒܪܝܼܬܵܐ: ܘܠܵܐ ܦܵܝܫܵܐ ܗܘܼܡܙܸܡܬܵܐ ܐܵܗܵܐ ܓܵܘ ܥܵܡܲܪܬܵܐ: ܕܚܘܼܪܵܝ ܕܠܵܐ ܓܵܚܟܝܼ ܒܝܼܘܿܗ݁ ܕܸܫܡܸܢ̈ܝܼ: ܘܠܵܐ ܦܵܨܚܝܼ ܒܝܼܘܿܗ݁ ܣܵܢܝܵܢ̈ܝܼ ܕܡܲܣܠܵܝܬܵܐ ܘܐܵܡܪܝܼ: ܕܫܸܡܥܘܿܢ ܦܬܸܠܹܗ ܒܵܠܹܗ ܡ݂ܢ ܐܲܠܵܗܹܗ ܘܣܓܼܸܕܠܹܗ ܠܫܸܡܫܵܐ ܡ݂ܢ ܣܵܒܵܒ ܙܕܸܥܠܹܗ ܡ݂ܢ ܡܵܘܬܵܐ: ܘܙܕܸܥܠܹܗ ܡ݂ܢ ܩܸܛܠܵܐ: ܘܡܘܼܚܸܒܠܹܗ ܠܚܲܝܹ̈ܐ ܕܙܲܒܼܢܵܐ. ܐܵܡܸܪ ܐܸܠܹܗ ܡܲܠܟܵܐ: ܝ݇ܕܥܝܼ ܫܸܡܥܘܿܢ: ܕܒܘܼܬ ܡܲܚܒܬܝܼ ܕܠܟܸܣܠܘܼܟܼ ܡܘܼܪܝܸܟܼܠܝܼ ܒܝܼܢܝܼ ܥܲܡܘܼܟܼ. ܘܪܵܥܝܘܼܟܼ ܠܵܐ ܡܫܡܸܥܬ݁ ܠܝܼ: ܡ݂ܢ ܐܵܕܝܼܵܐ ܐܲܢ݇ܬ݁ ܟܹܐ ܝܵܕܥܸܬ݁. ܐܵܡܲܪ ܫܸܡܥܘܿܢ: ܡܵܪܝܼ ܡܲܠܟܵܐ: ܩܵܐ ܕܝܼܝܼ ܐܲܝܟܼ ܕܐܲܢܹܐ ܪ̈ܵܥܝܹܐ ܪܵܒܵܐ ܝ݇ܢܵܐ. ܐܝܼܢܵܐ ܐܸܢ ܦܲܩܕܸܬ݁ ܕܩܲܛܠܝܼ ܠܝܼ ܒܘܼܬ ܫܪܵܪܹܗ ܕܐܲܠܵܗܝܼ: ܗܵܝܓܵܗ݁ ܒܸܬ ܦܵܝܫܵܐ ܚܙܝܼܬܵܐ ܩܵܬܝܼ ܒܸܦܠܚܵܢܹ̈ܐ ܕܡܲܚܲܒܬܘܼܟܼ ܠܟܸܣܠܝܼ: ܡ݂ܢ ܣܵܒܵܒ ܡܲܚܲܒܬܵܐ ܕܡܲܠܟܵܐ: ܒܸܬ ܥܵܒܼܵܕܵܗ݁ ܠܝܼ ܗܵܙܸܪ ܠܣܢܹܐܬܵܐ ܕܡ݂ܢ ܐܲܠܵܗܵܐ: ܠܵܐ ܚܵܫܚܵܐ ܐܸܠܝܼܿ: ܐܝܼܢܵܐ ܒܥܕܵܢܵܐ ܕܫܡܸܥܠܹܗ ܐܲܢܹܐ ܡܲܠܟܵܐ: ܦܝܼܫܠܹܗ ܡܥܘܼܓ̰ܒܵܐ ܒܓ̰ܘܼܪܐܲܬܹܗ. ܓܘܼܫܸܩܠܹܗ ܒܡܲܠܟܹ̈ܐ ܘܓܘܼܪ̈ܵܢܹܐ ܘܘܲܙܝܼܪܹ̈ܐ ܕܝ݇ܬܝܼܒܹܐ ܝܼܗ݇ܘ̣ܵܘ ܩܵܕ݇ܡܘܼܗܝ: ܘܐ݇ܡܸܪܹܗ ܐܸܠܵܝ ܟܲܕ ܡܬܵܢܘܼܚܹܐ: ܒܐܲܠܵܗܵܐ ܒܸܡܝܵܡܵܐ ܝ݇ܘܸܻܢ ܘܒܫܸܡܫܵܐ ܕܲܝܵܢܵܐ ܕܗܲܩܘܼܬܵܐ. ܚܙܝܼܠܝܼ ܛܵܝܸܦܹ̈ܐ ܢܘܼܟܼܪ̈ܵܝܹܐ ܘܐܲܪ̈ܥܵܬܹܐ ܕܪܸܚܩܵܐ ܝ݇ܢܵܐ ܘܒܢܘܿܢܹ̈ܐ ܕܐܲܬܪܲܢ ܥܲܡܲܢ ܝ݇ܢܵܐ: ܠܸܐ ܝ݇ܘܸܢ ܚܸܙܝܵܐ ܫܘܼܦܪܵܐ ܕܦܲܪܨܘܿܦܵܐ ܘܫܸܟܠܵܐ ܕܩܘܼܡܬܵܐ ܡ݂ܢ ܩܵܕ݇ܡܵܝܬܵܐ ܐܲܝܟܼ ܕܐܵܗܵܐ ܕܒܸܚܙܵܝܵܐ ܝ݇ܘܸܢ. ܘܚܙܵܝܡܘܿܢ ܕܵܐܟܼܝܼ ܠܹܐ ܝ݇ܠܹܗ ܒܹܐܬܵܝܵܐ ܡܘܼܚܲܒܢܵܐ ܕܓܵܢܹܗ: ܘܒܘܼܬ ܕܐܵܗܵܐ ܚܸܠܛܘܼܢܝܵܐ ܕܕܒܼܝܼܩܵܐ ܝ݇ܠܹܗ ܒܝܼܘܼܗ݁: ܓ̰ܘܼܘܸܒܠܗ݇ܘܿܢ ܟܠܵܝ ܘܐ݇ܡܸܪܘܿܢ ܡܵܪܝܼ ܡܲܠܟܵܐ ܠܵܐ ܓܲܫܸܩ ܒܫܘܼܦܪܵܐ ܕܦܲܓܼܪܹܗ: ܐܸܠܵܐ ܓܲܫܸܩ ܒܫܘܼܦܪܵܐ ܕܪܵܒܵܐ ܓܵܢܵܬܹ̈ܐ ܕܐܝܼܢܵܐ ܡ݂ܢ ܝܘܼܠܦܵܢܲܢ ܕܟܹܐ ܚܵܪܸܒܼ ܘܛܵܠܸܩ.

ܗܵܝܓܵܗ݁ ܦܠܸܛܠܹܗ ܦܘܼܩܕܵܢܵܐ ܒܘܼܬ ܕܝܹܗ ܘܒܘܼܬ ܟܠܵܝ ܐܲܚܘܿܢܘܵܬ̈ܘܼܗܝ: ܕܒܣܲܝܦܵܐ ܦܵܝܫܝܼ ܡܸܚܝܹ̈ܐ: ܘܗ݁ܘ ܝܵܘܡܵܐ ܕܥܪܘܼܒܼܬܵܐ ܗ݇ܘ̣ܵܐ: ܘܣܵܥܲܬ ܕܐܸܫܬܵܐ. ܘܒܥܸܕܵܢܵܐ ܕܒܝܹܗ ܡܵܪܲܢ ܦܠܸܛܠܹܗ ܠܓ̰ܘܼܢܓ̰ܵܪܵܐ ܕܨܠܝܼܒܼܵܐ: ܒܝܹܗ ܡܸܢ݇ܕܪܸܫ݇ ܦܠܸܛܠܗ݇ܘܿܢ ܐܘܼܦ ܐܲܢܹ̈ܐ ܢܲܨܝܼܚܹ̈ܐ ܠܩܸܛܠܵܐ: ܘܦܠܸܛܠܹܗ ܡܸܢ݇ܕܪܸܫ݇ ܪܲܝܸܣ ܕܕܝܼܘܵܢ: ܘܒܘܼܩܪܵܝܠܹܗ ܠܕܲܣܬܵܐ ܕܡܵܘܕܝܵܢܹ̈ܐ ܕܥܲܡ ܩܲܕܝܼܫܵܐ ܫܸܡܥܘܿܢ: ܘܐ݇ܡܸܪܹܗ ܐܸܠܵܝ: ܒܣܵܓܼܕܝܼܬܘܿܢ ܠܫܸܡܫܵܐ ܐܲܠܵܗܵܐ: ܘܥܵܒܼܕܝܼܬܘܿܢ ܪܸܙܵܝܵܐ ܕܫܵܒܼܘܿܪ ܡܲܠܟܵܐ ܕܡܲܠܟܹ̈ܐ ܘܡܵܪܵܐ ܕܟܠܵܗ݁ ܐܲܪܥܵܐ ܘܚܵܝܝܼܬܘܿܢ ܓ̰ܘܼܘܸܒܠܗ݇ܘܿܢ ܟܠܵܝ ܒܩܵܠܵܐ ܪܵܡܵܐ ܘܐ݇ܡܸܪܘܿܢ: ܒܫܲܪܝܼܪܘܼܬܵܐ ܒܸܥܒܼܵܕܵܐ ܝ݇ܘܲܚ ܪܸܙܵܝܵܐ ܕܡܲܠܟܵܐ ܕܡܲܠܟܹ̈ܐ ܡܵܪܵܐ ܕܟܠܵܗ݁ ܐܲܪܥܵܐ: ܕܐܵܗܵܐ ܝܼܠܹܗ ܡܲܠܟܵܐ ܠܥܵܠܲܡ. ܪܲܝܸܣ ܓܘܼܪܵܐ ܟܲܕ ܫܡܸܥܠܹܗ ܐܲܢܹܐ ܚܕܝܼܠܹܗ: ܘܐ݇ܡܸܪܹܗ ܐܸܠܵܝ: ܣܓܼܘܿܕܘܼܢ ܠܫܸܡܫܵܐ. ܓܚܸܟܠܗ݇ܘܿܢ ܛܘܼܒܼܵܢܹ̈ܐ ܥܲܠܘܼܗܝ ܒܩܵܠܵܐ ܪܵܡܵܐ ܘܐ݇ܡܸܪܘܿܢ ܐܸܠܹܗ: ܠܹܐ ܗ݇ܘ̣ܵܐ ܕܐ݇ܡܸܪܘܼܟܼ ܥܵܒܼܕܲܚ ܪܸܙܵܝܵܐ ܕܡܲܠܟܵܐ ܕܟܠܵܗ݁ ܐܲܪܥܵܐ؟ ܐܘܼܦ ܐܵܕܝܼܵܐ ܒܸܥܒܼܵܕܵܐ ܝ݇ܘܲܚ ܘܠܫܸܡܫܵܐ ܠܹܐ ܝ݇ܘܲܚ ܒܸܣܓܼܵܕܵܐ. ܐܵܡܲܪ ܐܸܠܵܝ ܪܹܫܵܐ ܕܕܲܝܵܢܹ̈ܐ: ܘܡܵܢܝܼ ܝ݇ܠܹܗ ܡܲܠܟܵܐ ܕܡܲܠܐܟܹ̈ܐ ܘܡܵܪܵܐ ܕܟܠܵܗ݁ ܐܲܪܥܵܐ: ܐܸܠܵܐ ܐܸܢ ܫܵܒܼܘܿܪ ܡܲܠܟܵܐ ܕܡܲܠܟܹ̈ܐ؟ ܐܵܡܪܝܼ ܐܸܠܹܗ ܩܲܕܝܼܫܹ̈ܐ: ܕܲܓܵܠܘܼܬܵܐ ܓܠܝܼܬܵܐ ܗܘܼܡܙܸܡܠܘܼܟܼ. ܡܲܠܟܵܐ ܘܡܵܪܵܐ ܕܟܠܵܗ݁ ܐܲܪܥܵܐ ܐܲܠܵܗܵܐ ܝ݇ܠܹܗ: ܒܲܪܝܵܢܵܐ ܕܫܡܲܝܵܐ ܘܐܲܪܥܵܐ: ܘܕܟܠ ܐܵܢܝܼ ܕܐܝܼܢܵܐ ܒܝܼܵܝ: ܘܐܵܗܵܐ ܝ݇ܠܹܗ ܡܲܠܟܵܐ ܕܡܲܠܟܹ̈ܐ ܠܥܵܠܲܡ. ܐܝܼܢܵܐ ܫܵܒܼܘܿܪ ܡܲܢܙܸܠ ܕܐܲܪܥܵܐ ܕܒܼܝܼܩܵܐ ܝ݇ܠܹܗ: ܘܐܸܕܝܘܿܡ݇ ܝܵܘܡܵܐ ܝܼܠܹܗ ܘܩܘܼܕܡܹܐ ܠܹܐ ܝ݇ܠܹܗ ܥܲܠ ܦܲܐܬܵܐ ܕܐܲܪܥܵܐ. ܐܝܼܢܵܐ ܐܸܢ ܫܵܒܘܿܪ ܡܲܠܟܵܐ ܝܼܠܹܗ ܡܵܪܵܐ ܕܐܲܪܥܵܐ: ܚܘܼܫ ܦܲܩܸܕܠܵܗ݁ ܕܡܲܓ̰ܝܸܢܵܗ݁ ܐܲܪܥܵܐ ܙܪܘܼܥܬܵܐ ܕܠܵܐ ܒܲܪܙܲܪܥܵܐ ܘܦܸܠܚܵܢܵܐ ܕܐܲܟܪܵܕܲܪ ܘܡܸܛܪܵܐ ܕܡ݂ܢ ܥܵܝܒܵܬܼܹ̈ܐ. ܘܦܲܩܸܕܠܵܗ݁ ܕܡܲܓ̰ܝܸܢܵܗ݁ ܐܝܼܠܵܢܹ̈ܐ ܕܠܹܐ ܝ݇ܢܵܐ ܢܨܝܼܒܹ̈ܐ. ܐܝܼܢܵܐ ܕܠܵܐ ܡܲܟܟ̰ܸܚܲܚܠܘܼܟܼ ܒܪܵܒܵܐ ܡܸܢܕܝܵܢܹ̈ܐ: ܫܡܸܥ ܡܸܢܲܢ ܒܟܸܪܝܘܼܬܵܐ. ܚܲܣܠܵܐ ܠܲܢ ܡ݂ܢ ܐܲܠܵܗܵܐ ܕܦܵܝܫܵܐ ܡܘܼܫ݇ܓ̰ܸܚܬܵܐ ܠܟܸܣܠܲܢ: ܕܣܵܓܼܕܲܚ ܠܫܸܡܫܵܐ ܝܲܢ ܠܚܕܵܐ ܡ݂ܢ ܒܸܪ̈ܝܵܬܹܐ: ܘܦܲܬܠܲܚ ܡ݂ܢ ܐܲܠܵܗܲܢ. ܓ̰ܘܼܘܸܒܠܹܗ ܪܹܫܵܐ ܕܕܝܼܘܵܢ ܘܐ݇ܡܸܪܹܗ ܐܸܠܵܝ: ܚܙܵܝܡܘܼܢ ܡܘܼܕܝܼ ܒܸܥܒܼܵܕܵܐ ܝ݇ܬܘܿܢ: ܣܵܒܵܒ ܩܸܛܥܝܵܐ ܝ݇ܠܹܗ ܥܲܠܵܘܟܼܘܿܢ ܡܵܘܬܵܐ ܡ݂ܢ ܩܵܕ݇ܡ ܡܲܠܟܵܐ: ܐܝܼܢܵܐ ܓ̰ܘܼܘܸܒܠܹܗ ܐܲܢܹ̈ܐ ܩܲܕܝܼܫܹ̈ܐ ܘܐܵܡܪܝܼ: ܫܵܦܲܩܲܬ ܝܼܠܵܗ݁ ܕܗܵܘܝܵܐ ܒܝܲܢ: ܐܸܢ ܐܵܗܵܐ ܦܘܼܩܕܵܢܵܐ ܕܐ݇ܡܸܪܘܼܟܼ: ܒܦܸܠܚܵܢܵܐ ܦܵܐܹܫ ܡܘܼܟܡܸܠܵܐ ܠܟܸܣܠܲܢ. ܘܚܲܝ̈ܝܲܢ ܕܒܐܲܠܵܗܵܐ: ܡ݂ܢ ܣܵܒܵܒ ܡܵܘܬܵܐ ܕܒܘܼܬ ܐܲܠܵܗܵܐ: ܩܵܬܲܢ ܒܸܬ ܦܵܝܫܝܼ ܝܘܼܗ݇ܒܹܐ. ܐܝܼܢܵܐ ܕܥܝܼ: ܐܘܼܦ ܡܲܠܟܵܐ ܥܲܡܘܼܟܼ ܝ݇ܠܹܗ: ܕܠܫܸܡܫܵܐ ܠܹܐ ܣܵܓܼܕܲܚ: ܘܒܐܲܠܵܗܲܢ ܠܹܐ ܟܵܦܪܲܚ.

ܐܝܼܢܵܐ ܗܲܪ ܐܲܢܹܐ ܗܹܡܸܙܡܵܢܹ̈ܐ ܪܹܫܵܐ ܕܕܵܝܵܢܹ̈ܐ ܡܘܼܕܸܥܠܹܗ ܩܵܐ ܡܲܠܟܵܐ. ܘܦܘܼܩܸܕܠܹܗ ܡܲܠܟܵܐ: ܕܟܠܵܝ ܦܵܝܫܝܼ ܩܵܕ݇ܡ ܢܲܨܝܼܚܵܐ ܫܸܡܥܘܿܢ: ܕܥܒܼܘܿܕ ܒܵܘܲܪ ܡ݂ܢ ܚܙܵܝܬܵܐ ܕܩܸܛܠܵܐ ܕܪ̈ܒܹܐ: ܒܸܬ ܪܲܒܹܗ ܐܝܼܕܵܐ ܡ݂ܢ ܚܝܼܵܠܹܗ. ܐܝܼܢܵܐ ܒܥܸܕܵܢܵܐ ܕܦܘܿܠܛܵܝ ܠܗ݇ܘܿܢ ܠܩܲܕܝܼܫܹ̈ܐ ܕܠܵܒܠܝܼ ܝܼܗ݇ܘ̣ܵܘ ܠܗ݇ܘܿܢ: ܗ݇ܘܹܐܠܹܗ ܪܵܒܵܐ ܫܓܼܘܼܫܝܵܐ ܓܵܘ ܐܲܬܼܪܵܐ ܕܠܹܕܵܢ: ܕܒܸܚܙܵܝܵܐ ܝܼܗ݇ܘ̣ܵܘ ܪܵܒܵܐ ܕܲܣܬܹ̈ܐ ܕܲܣܬܹ̈ܐ ܕܡܵܘܕܝܵܢܹ̈ܐ ܛܘܼܒܼܵܢܹ̈ܐ ܕܡܘܼܠܝܸܨܹ̈ܐ ܝܼܗ݇ܘ̣ܵܘ ܘܓ̰ܘܼܢܓ̰ܸܪܹ̈ܐ. ܡ݂ܢ ܣܵܒܵܒ ܓ̰ܘܼܢܓ̰ܵܪܹ̈ܐ ܕܩܘܼܒܸܠܗ݇ܘܿܢ: ܦܲܪܨܘܿܦܵܝ ܟܝܼܡܵܐ ܝܼܗ݇ܘ̣ܵܘ: ܐܝܼܢܵܐ ܠܸܒܵܢܹ̈ܐ ܝܼܗ݇ܘ̣ܵܘ ܚܝܼܵܠܵܝ ܘܗܹܡܸܙܡܵܢ̈ܵܝ. ܗܲܕܟܼܵܐ ܟܠܵܝ ܦܲܠܛܝܼ ܗ݇ܘ̣ܵܐ ܠܗ݇ܘܿܢ: ܘܐܵܙܸܠ ܗ݇ܘ̣ܵܐ ܒܪܹܫܵܝ ܛܘܼܒܼܵܢܵܐ ܫܸܡܥܘܿܢ ܐܲܝܟܼ ܓܘܼܪܵܐ ܕܚܲܝܠܵܐ ܘܠܸܒܵܢܵܐ ܘܒܐܘܼܪܚܵܐ ܘܒܩܵܠܵܐ ܪܵܡܵܐ ܝܵܗ݇ܒܸܠ ܗ݇ܘ̣ܵܐ ܠܗ݇ܘܿܢ ܓ̰ܘܼܪܐܵܬ ܟܲܕ ܒܐܹܡܵܪܵܐ: ܗ݇ܘܵܝܡܘܿܢ ܚܲܝܠܵܢܹ̈ܐ ܒܐܲܠܵܗܵܐ ܐܲܚܘܿܢܘܵܬ̈ܝܼ ܘܠܵܐ ܙܵܕܥܝܼܬܘܿܢ. ܗܵܐ ܡܵܪܲܢ ܒܝܼܗ݇ܒܼܵܐ ܠܹܗ ܐܸܠܵܘܟܼܘܿܢ ܠܸܒܵܐ ܟܲܕ ܒܐܹܡܵܪܵܐ: ܗ݇ܘܵܝܡܘܿܢ ܠܸܒܵܢܹ̈ܐ: ܐܵܢܵܐ ܓܼܠܸܒܠܝܼ ܠܥܵܠܡܵܐ. ܒܘܼܬ ܡܢܲܚܡܵܢܵܐ ܒܸܡܝܵܬܵܐ ܝ݇ܘܲܚ: ܘܒܘܼܬ ܡܫܝܼܚܵܐ ܦܝܵܫܵܐ ܝ݇ܘܲܚ ܩܛܝܼܠܹ̈ܐ. ܘܐܵܗܵܐ ܝ݇ܠܹܗ ܩܵܝܡܬܲܢ ܘܚܲܝ̈ܝܲܢ: ܐܲܝܟܼ ܕܗ݁ܘ ܐ݇ܡܸܪܹܗ: ܐܵܢܵܐ ܝ݇ܘܸܢ ܩܝܵܡܬܵܐ ܘܢܘܼܚܵܡܵܐ ܘܚܲܝܹ̈ܐ. ܘܡ݁ܢ ܕܲܡܗܲܝܡܸܢ ܒܝܼܝܼ: ܐܵܦܸܢ ܕܡܵܐܹܬ ܒܸܬ ܚܵܝܹܐ. ܗܲܕܟܼܵܐ ܟܡܵܐ ܒܘܼܫ ܙܵܘܕܵܐ: ܗ݁ܘ ܒܘܼܬ ܫܸܡܹܗ ܩܲܕܝܼܫܵܐ ܘܚܩܝܼܪܵܐ ܐܵܦܸܢ ܦܵܝܫܲܚ ܩܛܝܼܠܹ̈ܐ ܐܝܼܢܵܐ ܒܸܬ ܚܲܝܲܚ. ܗܲܕܟܼܵܐ ܟܠܵܝ ܦܠܸܛܠܗ݇ܘܿܢ ܘܐ݇ܬܹܐܠܗ݇ܘܿܢ ܠܒܲܕܲܪ ܡ݂ܢ ܡܕܝܼܢ݇ܬܵܐ ܕܐܲܬܪܵܐ ܕܠܹܕܵܢ. ܘܪܵܒܵܐ ܐܲܠܦܹ̈ܐ: ܡ݂ܢ ܟܵܦܘܿܪܹ̈ܐ ܘܡ݂ܢ ܟܪܸ̈ܣܛܝܵܢܹܐ ܝܲܚܣܝܼܪܹ̈ܐ: ܚܲܪܕܝܼ ܝܼܗ݇ܘ̣ܵܘ ܠܗ݇ܘܿܢ. ܩܵܐ ܒܘܼܬ ܚܙܵܝܬܵܐ ܕܥܲܓ̰ܝܼܒܘܼܬܵܐ ܕܟܸܢܫܹ̈ܐ ܕܐ݇ܢܵܫܹ̈ܐ ܐܲܠܵܗܵܝܹ̈ܐ ܕܦܝܵܫܵܐ ܝܼܗ݇ܘ̣ܵܘ ܩܛܝܼܠܹ̈ܐ ܒܘܼܬ ܐܲܠܵܗܵܐ. ܘܥܲܝܢܹ̈ܐ ܕܟܠ ܐ݇ܢܵܫܵܐ ܓܲܫܘܼܩܹܐ ܝܼܗ݇ܘ̣ܵܘ. ܘܙܕܥܘܼܬܵܐ ܪܘܼܚܩܸܢܬܵܐ ܗ݇ܘ̣ܵܐ ܡܸܢܵܝ: ܘܦܨܝܼܚܹ̈ܐ ܝܼܗ݇ܘ̣ܵܘ ܘܒܓܸܟܚܵܐ.

ܘܦܵܨܸܚ ܗ݇ܘ̣ܵܐ ܦܲܪܨܘܿܦܹܗ ܕܛܘܼܒܼܵܢܵܐ ܫܸܡܥܘܿܢ ܘܒܟܠܲܗ݁ ܗ݁ܝ ܙܕܥܘܿܬܵܐ ܐܵܗܵܐ ܡ݂ܢ ܡܲܠܦܵܢܘܼܬܹܗ ܠܵܐ ܫܠܝܼܠܹܗ. ܘܫܘܼܪܝܼܠܹܗ ܒܝܼܵܗ݇ܒܼܝܼ ܠܸܒܵܐ: ܡ݂ܢ ܕܒܵܬ݇ܪ ܕܡܛܝܼܠܗ݇ܘܿܢ ܠܗ݁ܝ ܕܘܼܟܬܵܐ ܕܒܝܼܘܿܗ݁ ܦܵܝܫܝܼ ܦܪ̈ܝܼܡܹܐ: ܘܠܹܐܡܵܪܵܐ: ܠܵܐ ܙܲܕܥܝܼܬܘܿܢ ܐܲܚܘܿܢܘܵܬ̈ܝܼ ܡ݂ܢ ܐܵܢܝܼ ܕܟܹܐ ܩܵܛܠܝܼ ܦܲܓܼܪܵܐ: ܐܝܼܢܵܐ ܓܵܢܵܐ ܠܸܐ ܡܵܨܝܼ ܠܸܩܛܵܠܵܐ. ܕܟܼܘܿܪܘܿܢ ܕܐ݇ܡܸܪܹܗ ܩܵܐ ܫܲܪܝܼܪܹ̈ܐ: ܕܟܠ ܛܵܠܸܩ ܓܵܢܹܗ ܒܘܼܬ ܕܝܼܝܼ ܒܸܬ ܡܲܫ݇ܟ̰ܸܠܵܗ݁ ܠܚܲܝܹ̈ܐ ܕܠܥܵܠܲܡ. ܕܟܼܘܿܪܘܿܢ ܠܗܲܡܙܲܡܬܹܗ ܕܡܲܠܦܵܢܵܐ ܕܗܲܩܘܼܬܵܐ ܕܐ݇ܡܸܪܹܗ: ܕܚܘܼܒܵܐ ܓܘܼܪܵܐ ܕܡ݂ܢ ܐܵܗܵܐ ܠܲܝܬ. ܕܐ݇ܢܵܫܵܐ ܕܡܲܬܸܒܼ ܓܵܢܹܗ ܒܘܼܬ ܕܘܼܣܬ̈ܘܼܗܝ. ܣܵܒܵܐ ܐܵܗܵܐ ܝܼܫܘܿܥ ܒܘܼܬ ܕܝܲܢ ܣܸܢܝܹ̈ܐ ܡܘܼܬܸܒܼܠܹܗ ܓܵܢܹܗ: ܕܐܲܚܢܲܢ ܗܵܘܲܚ ܚܲܦܛܵܢܹ̈ܐ ܒܘܼܬ ܝܼܫܘܿܥ ܡܲܚܸܒܵܢܲܢ ܡܲܬܒܸܚ ܓܵܢܲܢ. ܘܐܸܢ ܐܵܗܵܐ ܩܵܛܘܿܠܹ̈ܐ ܕܝܲܢ ܒܛܢܵܢܵܐ ܕܚܸܠܛܘܼܢܝܵܐ ܡܵܡܝܘܼܬܲܢ ܝ݇ܢܵܐ. ܘܠܹܐ ܗ݇ܘ̣ܵܐ ܐܲܝܟܼ ܕܸܫܡܸ̈ܢܲܢ. ܗܵܡܙܲܡܬܹܗ ܝܼܗ݇ܘ̣ܵܐ ܩܵܬܲܢ ܝܵܗ݇ܒܼܵܠܬܵܐ ܕܠܸܒܵܐ ܕܩܲܕ݇ܡܵܝܬܵܐ ܕܐ݇ܡܸܪܹܗ ܡܵܪܲܢ: ܕܒܸܬ ܐܵܬܝܼ ܝܵܘܡܵܢܹ̈ܐ: ܕܟܠ ܕܩܵܛܸܠܵܘܟܼܘܿܢ: ܕܒܸܬ ܚܵܫܸܒܼ ܩܘܼܪܒܵܢܵܐ ܡܲܩܪܘܼܒܿܐ ܝ݇ܠܹܗ ܠܐܲܠܵܗܵܐ. ܘܡܸܢ݇ܕܪܸܫ݇ ܐܸܢ ܐܵܗܵܐ ܐܲܝܟܼ ܕܣܸܢܝܹ̈ܐ ܘܛܵܪ̈ܘܿܕܹܐ ܐܵܗܵܐ ܕܒܸܥܒܼܵܕܵܐ ܝ݇ܢܵܐ. ܝܵܗ݇ܒܼܘܿܠܹܐ ܠܹܗ ܐܸܠܲܢ ܠܸܒܵܐ ܗ݁ܘ ܦܸܬܼܓܼܵܡܵܐ ܕܐ݇ܡܸܪܹܗ: ܕܐܸܢ ܐܵܗܵܐ ܕܐܸܠܝܼ ܣܢܝܼܢܠܗ݇ܘܿܢ: ܐܘܼܦ ܐܸܠܵܘܟܼܘܿܢ ܒܸܬ ܣܵܢܝܼ. ܘܐܸܢ ܠܝܼ ܛܪܸܕܠܗ݇ܘܿܢ. ܐܘܼܦ ܐܸܠܵܘܟܼܘܿܢ ܒܸܬ ܛܲܪܕܝܼ. ܕܟܼܘܿܪܘܿܢ ܠܗܹܡܸܙܡܵܢܹ̈ܐ ܕܒܪܘܼܚܵܐ ܦܝܼܫܠܗ݇ܘܿܢ ܗܘܼܡܙܸܡܹ̈ܐ ܡ݂ܢ ܫܠܝܼܚܵܐ ܓܘܼܒܝܵܐ ܦܵܘܠܘܿܣ: ܒܐܹܡܵܪܵܐ ܝ݇ܠܹܗ ܒܸܚܫܵܒܼܵܐ ܝ݇ܘܸܢ: ܕܠܸܐ ܚܲܫܚܝܼ ܓ̰ܘܼܢܓ̰ܵܪܹ̈ܐ ܕܐܵܗܵܐ ܙܲܒܼܢܵܐ: ܠܚܸܩܪܵܐ ܕܗ݁ܘ ܕܗܕܝܼܪܵܐ ܝ݇ܠܹܗ ܕܦܵܐܹܫ ܓܸܠܝܵܐ ܒܝܲܢ. ܘܡܸܢ݇ܕܪܸܫ݇: ܐܸܢ ܥܲܒܼܕܲܚ ܚܲܫܵܐ ܥܲܡܹܗ: ܐܘܼܦ ܥܲܡܹܗ ܒܸܬ ܦܵܝܫܲܚ ܚܩܝܼܪܹ̈ܐ. ܘܡܸܢ݇ܕܪܸܫ݇: ܕܐܸܢ ܡܵܘܕܸܬ ܒܦܘܼܡܘܼܟܼ ܒܡܵܪܲܢ ܝܼܫܘܿܥ. ܘܗܲܝܡܸܢܬ݁ ܒܠܸܒܘܼܟܼ ܕܐܲܠܵܗܵܐ ܡܘܼܩܸܡܠܹܗ ܡ݂ܢ ܒܹܝܬܼ ܡܝܼܬܹ̈ܐ: ܒܸܬ݁ ܚܵܝܹܝܬ݁. ܘܡܸܢ݇ܕܪܸܫ݇. ܕܠܲܝܬ ܐ݇ܢܵܫܵܐ ܕܠܓܵܢܹܗ ܡܲܚܸܐ: ܘܠܵܐ ܐ݇ܢܵܫܵܐ ܡܸܢܲܢ ܕܠܓܵܢܹܗ ܡܲܡܝܸܬ݁. ܣܵܒܵܒ ܐܸܢ ܒܸܚܵܝܵܐ ܝ݇ܘܲܚ ܠܡܵܪܲܢ ܒܸܚܵܝܵܐ ܝ݇ܘܲܚ ܘܐܸܢ ܒܸܡܝܵܬܵܐ ܝ݇ܘܲܚ: ܠܡܵܪܲܢ ܒܸܡܝܵܬܵܐ ܝ݇ܘܲܚ. ܘܗܲܕܟܼܵܐ ܐܸܢ ܒܸܚܵܝܵܐ ܗ݇ܘܲܚ ܘܐܸܢ ܒܸܡܝܵܬܵܐ ܝ݇ܘܲܚ ܕܡܵܪܲܢ ܝ݇ܘܲܚ. ܒܘܼܬ ܕܐܵܗܵܐ ܐܘܼܦ ܡܫܝܼܚܵܐ ܡܝܼܬܠܹܗ ܘܚܝܼܠܹܗ ܘܩܸܡܠܹܗ: ܕܐܵܗܵܐ ܒܸܬ ܗܵܘܹܐ ܡܵܪܝܵܐ ܠܡܝܼܬܹ̈ܐ ܘܠܚܲܝܹ̈ܐ.

ܕܟܼܘܿܪܘܿܢ ܐܲܚܘܿܢܘܵܬ̈ܝܼ ܠܫܠܝܼܚܹ̈ܐ ܛܘܼܒܼܵܢܹ̈ܐ: ܕܐܲܝܟܼ ܗܲܡܙܲܡܬܵܐ ܕܦܵܘܠܘܿܣ ܓܘܼܒܝܵܐ: ܝܼܗ݇ܘ̣ܵܘ ܬܹܐܛܪܘܼܢ (ܡܲܚܙܵܝܬܵܐ) ܠܥܵܠܡܵܐ ܠܡܲܠܲܐܟܹ̈ܐ ܘܠܒܢܲܝ̈ܢܵܫܵܐ. ܟܦܝܼܢܹ̈ܐ ܝܼܗ݇ܘ̣ܵܘ ܘܨܸܗܝܹ̈ܐ ܐܲܝܟܼ ܕܝܼܬܘܿܢ ܐܲܚܬܘܿܢ. ܫܘܼܠܚܵܝܹ̈ܐ ܝܼܗ݇ܘ̣ܵܘ ܟܲܕ ܦܵܠܚܝܼ ܝܼܗ݇ܘ̣ܵܘ ܒܐܝܼܕ̈ܵܬܝ: ܕܵܐܟܼܝܼ ܕܐܘܼܦ ܐܲܚܬܘܿܢ. ܘܦܝܵܫܵܐ ܝܼܗ݇ܘ̣ܵܘ ܡܘܼܣܠܝܹ̈ܐ ܘܡܒܵܪܘܿܟܹܐ ܝܼܗ݇ܘ̣ܵܘ: ܗ݇ܘܹܐܠܗ݇ܘܿܢ ܛܪ̈ܝܼܕܹܐ ܘܡܩܵܒܘܿܠܸܐ ܝܼܗ݇ܘ̣ܵܘ: ܨܵܥܒܼܘܼܪܵܝ ܝܼܗ݇ܘ̣ܵܘ: ܘܒܸܛܠܵܒܵܐ ܝܼܗ݇ܘ̣ܵܘ ܡܸܢܵܝ. ܐܲܝܟܼ ܟܵܢܘܿܫܬܵܐ ܕܥܵܠܡܵܐ ܝܼܗ݇ܘ̣ܵܘ: ܘܙܸܒܠܵܐ ܕܟܠ ܐ݇ܢܵܫܵܐ ܗܲܠ ܐܵܕܝܼܵܐ: ܐܲܝܟܼ ܣܵܗܕܘܼܬܹܗ ܕܫܠܝܼܚܵܐ. ܡܸܢ݇ܕܪܸܫ݇ ܫܡܸܥܠܗ݇ܘܿܢ ܐܸܠܹܗ ܟܲܕ ܒܐܹܡܵܪܵܐ: ܡ݂ܢ ܐܵܕܝܼܵܐ ܙܲܒܼܢܵܐ ܡܘܼܫܓܸܫܠܹܗ ܐܸܠܹܗ: ܕܐܸܢ ܠܹܐ ܝܼܗ݇ܘ̣ܵܘ ܒܸܚܕܵܝܵܐ: ܣܵܒܵܒ ܒܸܥܒܼܵܪܵܐ ܝܼ݇ܘܵܘ ܐܸܠܹܗ ܐܸܣܟܹܡܹܗ ܕܐܵܗܵܐ ܥܵܠܡܵܐ. ܕܟܼܘܿܪܘܼܢ ܠܗ݁ܝ ܕܐ݇ܡܸܪܹܗ: ܕܗܲܕܟܼܵܐ ܪܚܘܿܛܘܿܢ: ܕܡܵܛܝܼܬܘܿܢ ܡܣܵܒܵܒ ܕܟܠ ܐ݇ܢܵܫܵܐ ܕܥܵܒܸܕ ܦܠܵܫܵܐ: ܡ݂ܢ ܟܠ ܡܸܢܕܝܼ ܗܵܘܹܐ ܡܣܲܝܒܪܵܢܵܐ. ܘܐܲܢܹܐ ܒܸܪܚܵܛܵܐ ܝ݇ܢܵܐ ܕܫܵܩܠܝܼ ܟܠܝܼܠܵܐ ܕܚܵܪܸܒܼ. ܐܝܼܢܵܐ ܐܲܚܢܲܢ ܗ݁ܘ ܕܠܹܐ ܚܵܪܸܒܼ. ܘܡܲܩܘܸܚ ܗ݇ܘ̣ܵܐ ܘܐܵܡܸܪ: ܕܐܵܢܵܐ ܗܲܕܟܼܵܐ ܒܸܪܚܵܛܵܐ ܝ݇ܘܸܢ: ܠܹܐ ܗ݇ܘ̣ܵܐ ܐܲܝܟܼ ܡܸܢܕܝܼ ܕܠܹܐ ܗ݇ܘ̣ܵܐ ܝ݇ܕܸܥܝܵܐ. ܘܗܲܕܟܼܵܐ ܦܠܵܫܵܐ ܝ݇ܘܸܢ: ܠܵܐ ܐܲܝܟܼ ܕܗ݁ܘ ܡ݂ܢ ܗܵܘܵܐ ܒܸܦܠܵܫܵܐ ܝ݇ܠܹܗ: ܐܸܠܵܐ ܦܲܓܼܪܝܼ ܝ݇ܠܹܗ ܕܒܸܙܒܵܛܵܐ ܝ݇ܘܸܢ: ܥܒܼܘܿܕ ܒܵܘܲܪ ܐܵܢܵܐ ܕܠܐ݇ܚܹܪ̈݇ܢܹܐ ܡܘܼܟܪܸܙܠܝܼ: ܐܵܢܵܐ ܒܓܵܢܝܼ ܒܸܬ ܡܲܣܠܸܢܹܗ. ܫܘܪܝܼܠܹܗ ܒܐܹܡܵܪܵܐ: ܐܲܠܵܗܵܐ ܫܲܪܝܼܪܵܐ ܝ݇ܠܹܗ: ܕܠܹܐ ܫܵܒܸܩܠܵܘܟܼܘܿܢ ܕܦܵܝܫܝܼܬܘܿܢ ܓ̰ܘܼܪ̈ܒܹܐ ܙܵܘܕܵܐ ܡ݂ܢ ܡܸܢܕܝܼ ܕܡܵܨܹܝܬܘܿܢ. ܐܸܠܵܐ ܕܥܵܒܸܕ ܠܓ̰ܘܼܪܵܒܵܘܟܼܘܿܢ ܦܠܵܛܵܐ (ܐܘܼܪܚܵܐ): ܕܵܐܟܼܝܼ ܡܵܨܹܝܬܘܿܢ ܠܡܩܵܒܘܿܠܹܐ. ܫܡܸܥܡܘܿܢ ܒܥܸܕܵܢܵܐ ܒܹܐܡܵܪܵܐ ܝ݇ܠܹܗ: ܦܘܼܫܘܼܢ ܡܕܘܼܡܝܸܐ ܐܸܠܝܼ: ܕܵܐܟܼܝܼ ܕܐܘܼܦ ܐܵܢܵܐ ܒܡܫܝܼܚܵܐ. ܣܵܒܵܒ ܐܵܗܵܐ ܦܝܼܫܠܹܗ ܕܒܼܝܼܚܵܐ ܒܕܵܡܲܝܬܵܐ ܕܡܫܝܼܚܵܐ: ܐܘܼܦ ܐܲܚܢܲܢ ܦܵܝܫܲܚ ܦܪ̈ܝܼܡܹܐ ܐܲܝܟܼ ܕܝܹܗ. ܡܲܨܸܝܬܘܿܢ ܐܸܠܹܗ ܟܲܕ ܒܐܹܡܵܪܵܐ ܝ݇ܠܹܗ: ܕܐܸܢ ܒܐܲܢܹ̈ܐ ܚܲܝܹ̈ܐ ܐܲܚܟ̰ܝܼ ܡܣܲܝܒܪܲܚ ܒܡܫܝܼܚܵܐ: ܒܸܗܘܵܝܵܐ ܝ݇ܘܲܚ ܫܲܩܝܼ ܒܘܼܫ ܡ݂ܢ ܟܠܵܝ ܒܢܲܝ̈ܢܵܫܵܐ. ܣܵܒܵܒ ܩܸܪܝܵܐ ܝ݇ܠܹܗ ܐܸܠܵܘܟܼܘܿܢ ܘܡܫܘܼܪܸܪܸܐ ܐܸܠܵܘܟܼܘܿܢ ܓ̰ܘܼܪܐܲܬ ܡܲܕܥܘܼܝܹܐ ܝ݇ܠܹܗ ܒܘܼܬ ܡܝܼܬܹ̈ܐ: ܟܲܕ ܒܸܩܪܵܝܵܐ ܝ݇ܠܹܗ ܐܸܠܵܝ ܕܕܡܝܼܟܹ̈ܐ ܝ݇ܢܵܐ: ܕܝܵܕܥܝܼܬܘܿܢ ܡܵܘܬܵܐ ܫܸܢܬܵܐ ܝ݇ܠܹܗ: ܡܫܝܼܚܵܐ ܩܸܡܠܹܗ ܡ݂ܢ ܓܵܘܵܐ ܕܡܝܼܬܹ̈ܐ: ܘܗ݇ܘܹܐܠܹܗ ܫܘܼܪܵܝܵܐ ܕܡܝܼܬܹ̈ܐ. ܥܲܡ ܫܲܪܟܵܐ ܕܐ݇ܚܹܪ̈݇ܢܹܐ. ܘܡܸܢ݇ܕܪܸܫ݇: ܕܐܸܢ ܕܡܗܲܝܡܸܢܲܚ ܕܝܼܫܘܿܥ ܡܝܼܬܠܹܗ ܘܚܝܼܠܹܗ ܘܩܸܡܠܹܗ: ܗܵܕܟܼܵܐ ܐܘܼܦ ܐܲܠܵܗܵܐ ܩܵܐ ܕܐܵܢܝܼ ܒܸܬ ܡܲܝܬܹ݇ܗ ܥܲܡܹܗ. ܡܲܨܝܸܬܲܚ ܐܸܠܹܗ ܕܵܐܟܼܝܼ ܒܸܐ݇ܣܝܵܪܲܢ ܝܼܠܹܗ ܒܫܪܵܪܵܐ ܟܲܕ ܒܐܹܡܵܪܵܐ: ܗܘܵܝܡܘܿܢ ܪ̈ܥܝܼܫܹܐ ܘܟܠܹܝܡܘܿܢ ܒܗܲܝܡܵܢܘܼܬܵܐ: ܗ݇ܘܵܝܡܘܿܢ ܓܲܢ݇ܒܵܪܹ̈ܐ ܘܗܘܝܡܘܿܢ ܡܲܚܸܒܵܢܹ̈ܐ: ܫܲܒܚܲܚ ܐܲܚܘܿܢܘܵܬ̈ܝܼ ܠܐܲܠܵܗܵܐ: ܒܐܵܗܵܐ ܥܕܵܢܵܐ ܕܒܝܹܗ ܕܦܝܵܫܵܐ ܝ݇ܘܲܚ ܕܒܼܝܼܚܹ̈ܐ (ܦܪ̈ܝܼܡܹܐ). ܘܐܵܡܪܲܚ. ܡܒܘܼܪܟܼܵܐ ܝ݇ܠܹܗ ܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܒܵܒܵܐ ܕܪ̈ܲܚܡܹܐ: ܘܐܲܠܵܗܵܐ ܟܠܵܗ݁ ܝܵܗ݇ܒܼܵܠܬܵܐ ܕܠܸܒܵܐ: ܗ݁ܘ ܕܩܵܡ ܝܵܗ݇ܒܸܠܲܢ ܠܸܒܵܐ ܒܟܠܵܝ ܥܝܼܩ̈ܘܼܝܵܬܲܢ: ܕܐܘܼܦ ܐܲܚܢܲܢ ܡܵܨܲܚ ܝܵܗ݇ܒܲܚ ܠܸܒܵܐ ܠܐܵܢܝܼ ܕܐܝܼܢܵܐ ܒܟܠ ܥܝܼܩܘܼܝܵܬܹ̈ܐ: ܒܗ݁ܝ ܝܵܗ݇ܒܼܵܠܬܵܐ ܕܠܸܒܵܐ ܕܦܝܵܫܵܐ ܝ݇ܘܲܚ ܝܘܼܗ݇ܒܹܐ ܡ݂ܢ ܐܲܠܵܗܵܐ. ܘܕܵܐܟܼܝܼ ܕܒܝܲܢ ܒܸܙܝܵܕܵܐ ܝ݇ܢܵܐ ܓ̰ܘܼܢܓ̰ܵܪܹ̈ܐ ܕܡܫܝܼܚܵܐ: ܗܲܕܟܼܵܐ ܒܝܲܕ ܡܫܝܼܚܵܐ ܦܵܐܹܫ ܙܝܼܕܵܐ ܝܵܗ݇ܒܼܵܠܬܵܐ ܕܠܸܒܵܐ ܕܝܲܢ. ܕܵܟܼܪܲܚ ܠܗ݁ܝ ܒܲܪܬ݇ ܩܵܠܵܐ: ܕܒܝܼܘܿܗ݁ ܠܓܘܼܫ̈ܡܲܢ ܫܓ݂݇ܝܼܪܵܐ ܗ݇ܘ̣ܵܐ ܒܢܘܼܪܵܐ ܕܪܘܼܚܵܐ ܕܩܘܼܕܫܵܐ: ܡܵܐܢܵܐ ܕܛܝܼܢܵܐ ܒܸܩܪܵܝܵܐ ܝ݇ܠܹܗ ܟܲܕ ܒܐܹܡܵܪܵܐ: ܐܝܼܬܠܲܢ ܐܵܗܵܐ ܚܲܙܢܵܐ ܒܡܵܐܢܵܐ ܕܛܝܼܢܵܐ ܕܪܸ̈ܒܘܵܬܹܐ ܕܚܲܝܠܵܐ ܡ݂ܢ ܐܲܠܵܗܵܐ ܒܸܬ ܗܵܘܝܵܐ: ܘܠܵܐ ܡܸܢܲܢ. ܘܓܲܠܝܵܐܝܼܬܼ ܡܲܚܙܘܼܝܸܐ ܝ݇ܠܹܗ ܚܲܝܠܹܗ ܕܐܲܠܵܗܵܐ ܒܝܲܢ ܟܲܕ ܒܐܸܡܵܪܵܐ: ܒܟܠ ܝܘܵܡܵܐ ܦܝܵܫܵܐ ܝ݇ܘܲܚ ܚܘܼܪ̈ܙܸܦܸܐ: ܐܝܼܢܵܐ ܠܹܐ ܗ݇ܘܲܚ ܛܠܝܼܩܹ̈ܐ. ܡ݂ܢ ܣܵܒܵܒ ܡܝܼܬܼܘܼܬܹܗ ܕܝܼܫܘܿܥ ܒܦܲܓܼܪܲܢ ܫܩܝܼܠܵܐ ܝ݇ܘܲܚ: ܕܚܲܝܹ̈ܐ ܕܝܼܫܘܿܥ ܒܦܲܓܼܪ̈ܲܢ ܦܝܵܫܵܐ ܝ݇ܢܵܐ ܓܸܠܝܹ̈ܐ. ܣܵܒܵܒ ܐܸܢ ܐܲܚܢܲܢ ܚܵܝܹ̈ܐ: ܠܡܵܘܬܵܐ ܦܵܝܫܲܚ ܣܘܼܦܝܹܐ ܒܘܼܬ ܝܼܫܘܿܥ: ܗܲܕܟܼܵܐ ܚܲܝܹ̈ܐ ܕܝܼܫܘܿܥ ܒܸܬ ܦܵܝܫܝܼ ܓܸܠܝܹ̈ܐ ܓܵܘ ܕܐܵܗܵܐ ܦܲܓܼܪܲܢ ܕܡܵܐܹܬ: ܟܲܕ ܐܲܚܢܲܢ ܒܝܼܕܲܥܝܵܐ ܝ݇ܘܲܚ ܕܗ݁ܘ ܡܘܼܩܸܡܠܹܗ ܠܡܵܪܲܢ ܝܼܫܘܿܥ: ܐܘܼܦ ܐܸܠܲܢ ܒܝܲܕ ܝܼܫܘܿܥ ܒܸܬ ܩܵܝܡܲܚ: ܘܥܲܡܵܘܟܼܘܿܢ ܩܲܪܒܸܢܲܚ ܠܟܸܣܠܹܗ: ܡܸܢ݇ܕܪܸܫܣ݇ ܡܲܙܝܘܼܕܹܐ ܝ݇ܠܹܗ ܘܒܹܐܡܵܪܵܐ: ܒܘܼܬ ܐܵܗܵܐ ܠܲܝܬ ܠܲܢ ܟ̰ܲܟܵܐ: ܣܵܒܵܒ ܐܵܦܸܢ ܒܲܪܢܵܫܵܐ ܒܲܪܵܝܵܐ ܒܸܬ ܚܵܪܸܒܼ: ܐܝܼܢܵܐ ܡ݂ܢ ܓܵܘܵܝܵܐ ܒܸܬ ܚܲܕܸܬ ܡ݂ܢ ܝܵܘܡܵܐ ܠܝܵܘܡܵܐ. ܣܵܒܵܒ ܥܝܼܩܘܼܬܵܐ ܕܐܵܗܵܐ ܙܲܒܼܢܵܐ ܟܲܕ ܪܵܒܵܐ ܒܵܨܘܿܪܵܐ ܝ݇ܠܹܗ ܘܚܲܟ̰ܵܐ: ܚܸܩܪܵܐ ܓܘܼܪܵܐ ܕܠܵܐ ܩܝܼܵܣ ܠܐܵܒܲܕ ܐܲܒܵܕܝܼܢ ܗܘܼܕܪܵܐ ܝ݇ܠܹܗ ܐܸܠܲܢ. ܕܠܹܐ ܚܵܕܲܚ ܒܐܲܢܹܐ ܕܦܝܵܫܵܐ ܚܸܙܝܹ̈ܐ: ܐܸܠܵܐ ܒܐܲܢܹܐ ܕܠܹܐ ܝ݇ܢܵܐ ܦܝܵܫܵܐ ܚܸܙܝܹ̈ܐ: ܐܝܼܢܵܐ ܐܵܢܝܼ ܕܦܝܵܫܵܐ ܝ݇ܢܵܐ ܚܸܙܝܹ̈ܐ ܙܲܒܼܢܵܢܵܝܹ̈ܐ ܝ݇ܢܵܐ: ܐܝܼܢܵܐ ܐܵܢܝܼ ܕܠܹܐ ܝ݇ܢܵܐ ܦܝܵܫܵܐ ܚܸܙܝܹ̈ܐ ܐܲܒܵܕܝܼܢܵܝܹ̈ܐ ܝ݇ܢܵܐ. ܣܵܒܵܒ ܒܝܼܕܲܥܝܵܐ ܝ݇ܘܲܚ ܕܐܸܢ ܒܲܝܬܲܢ ܕܒܐܵܗܵܐ ܕܘܼܟܬܵܐ ܕܦܲܓܼܪܵܐ ܦܝܵܫܵܐ ܝ݇ܠܹܗ ܫܸܪܝܵܐ: ܐܝܼܢܵܐ ܐܝܼܬܠܲܢ ܒܸܢܝܵܢܵܐ ܕܡ݂ܢ ܐܲܠܵܗܵܐ: ܒܲܝܬܵܐ ܕܠܵܐ ܦܸܠܚܵܢܵܐ ܕܐܝܼܕܵܬܹ̈ܐ ܓܵܘ ܫܡܲܝܵܐ ܠܐܵܒܲܕ. ܒܸܬ ܫܵܡܥܲܚܠܹܗ ܕܵܐܟܼܝܼ ܒܝܼܵܗ݇ܒܼܵܐ ܝ݇ܠܹܗ ܠܸܒܵܐ ܠܫܘܼܢܵܝܵܐ ܕܡ݂ܢ ܦܲܓܼܪܵܐ: ܐܵܗܵܐ ܫܠܝܼܚܵܐ ܕܥܵܓ̰ܝܼܒܘܼܬܵܐ ܒܹܐܡܵܪܵܐ ܝ݇ܠܹܗ: ܟܡܵܐ ܕܓܵܘ ܦܲܓܼܪܵܐ ܫܸܪ̈ܝܹܐ ܝ݇ܘܲܚ: ܡܵܘܬܵܢܹ̈ܐ ܝ݇ܘܲܚ ܠܟܸܣ ܡܵܪܲܢ. ܘܟܲܕ ܡܚܵܦܘܿܛܹܐ ܗ݇ܘ̣ܵܐ ܕܡܲܕܥܹܗ ܒܘܼܬ ܓܵܢܹܗ: ܕܒܘܼܬ ܕܐܵܗܵܐ ܦܝܼܫܵܐ ܝ݇ܠܹܗ ܝ݇ܕܸܥܝܵܐ ܕܝܼܠܹܗ ܚܸܠܡܲܬ݁ܟܵܪܵܐ ܕܐܲܠܵܗܵܐ: ܒܐܹܡܵܪܵܐ ܝ݇ܠܹܗ: ܒܟܠ ܡܸܢܕܝܼ ܡܲܚܙܲܚ ܓܵܢܲܢ ܕܡܫܲܡܫܵܢܹ̈ܐ ܕܐܲܠܵܗܵܐ ܝ݇ܘܲܚ: ܒܪܵܒܵܐ ܡܣܲܝܒܪܵܢܘܼܬܵܐ: ܒܥܝܼܩܘܼܝܵܬܹ̈ܐ: ܓܵܘ ܩܝܼܘܿܢܕܝܼܢܘܼܣܹ̈ܐ: ܓܵܘ ܕܘܼܣܵܚܹ̈ܐ: ܓܵܘ ܓ̰ܘܼܢܓ̰ܵܪܹ̈ܐ: ܓܵܘ ܫܓܼܘܼܫܝܹ̈ܐ: ܘܒܟܸܟ̰ܚܵܐ: ܒܫܵܗܲܪܬܵܐ: ܒܨܵܘܡܵܐ: ܒܕܸܟܼܝܘܼܬܵܐ: ܒܝ݇ܕܸܥܬܵܐ: ܒܡܲܪܝܵܟܼܬܵܐ ܕܒܝܼܢܵܐ: ܒܒܲܣܝܼܡܘܼܬܵܐ: ܒܪܘܼܚܵܐ ܕܩܘܼܕܫܵܐ: ܒܚܘܼܒܵܐ ܕܠܵܐ ܦܸܟ̰ܠܵܐ: ܒܗܲܡܙܲܡܬܵܐ ܕܗܲܩܘܼܬܵܐ: ܒܚܲܝܠܵܐ ܕܐܲܠܵܗܵܐ: ܒܟ̰ܲܟܵܐ ܕܙܲܕܝܼܩܘܼܬܵܐ ܕܒܝܲܡܝܼܢܵܐ ܘܒܣܸܡܵܠܵܐ: ܒܚܸܩܪܵܐ ܘܒܝܲܨܪܘܼܬܵܐ: ܒܚܸܩܪܵܐ ܘܡܲܣܠܵܝܬܵܐ. ܐܲܝܟܼ ܡܲܚܠܸܛܵܢܹ̈ܐ: ܘܫܲܪܝܼܪܹ̈ܐ. ܐܲܝܟܼ ܠܵܐ ܝ݇ܕܸܥܝܹ̈ܐ: ܘܝ݇ܕܸܥܝܹ̈ܐ ܝ݇ܘܲܚ. ܐܲܝܟܼ ܕܐܲܝܟܼ ܡܝܼܬܹܐ ܝ݇ܘܲܚ. ܐܲܝܟܼ ܕܦܝܵܫܵܐ ܝ݇ܘܲܚ ܬܘܼܠܡܹ̈ܐ: ܘܠܹܐ ܝ݇ܘܲܚ ܒܸܡܝܵܬܵܐ: ܐܲܝܟܼ ܕܦܫܝܼܡܸܐ ܝ݇ܘܲܚ. ܘܒܟܠ ܥܕܵܢܵܐ ܒܸܚܕܵܝܵܐ ܝ݇ܘܲܚ. ܐܲܝܟܼ ܡܸܣܟܹܢܹ̈ܐ: ܠܪܵܒܵܐ ܒܸܥܒܼܵܕܵܐ ܝ݇ܘܲܚ ܥܲܬܝܼܪܹ̈ܐ. ܐܲܝܟܼ ܗܸܟ ܡܸܢܕܝܼ ܠܲܝܬܠܲܢ. ܘܟܠ ܡܸܢܕܝܼ ܕܒܼܝܼܩܹ̈ܐ ܝ݇ܘܲܚ.

ܕܟܼܘܿܪܘܿܢ ܠܹܗ ܐܲܚܘܿܢܘܵܬ̈ܝܼ ܠܐܵܗܵܐ ܛܘܼܒܼܵܢܵܐ: ܕܚܲܡܫܵܐ ܓܵܗܹ̈ܐ ܦܝܼܫܠܹܗ ܡܸܚܝܵܐ ܡ݂ܢ ܝܼܗܘܼܕܵܝܹ̈ܐ ܒܩܲܡܟ̰ܝܹ̈ܐ: ܘܬܠܵܬ݇ܐ ܓܵܗܹ̈ܐ ܡ݂ܢ ܛܵܝܸܦܹ̈ܐ ܒܩܵܛܝܹ̈ܐ ܦܝܼܫܠܹܗ ܓ̰ܘܼܢܓ̰ܸܪܵܐ. ܘܚܲܕ݇ ܓܵܗܹ̈ܐ ܦܝܪܫܠܹܗ ܪܓ̰ܝܼܡܵܐ: ܘܗܕܝܼܪܵܐ ܗ݇ܘ̣ܵܐ ܕܦܵܐܹܫ ܗ݇ܘ̣ܵܐ ܪܘܼܦܝܵܐ ܠܗܲܝܘܵܢܹ̈ܐ. ܘܟܠ ܝܵܘܡܵܐ ܒܸܡܝܵܬܵܐ ܗ݇ܘ̣ܵܐ ܐܲܝܟܼ ܕܒܸܣܗܵܕܵܐ ܠܹܗ: ܚܙܝܼܠܹܗ ܪܵܒܵܐ ܩܝܼܘܿܢܕܝܼܢܘܿܣ ܐܲܝܟܼ ܕܟܬܝܼܒܼܵܐ ܝ݇ܠܹܗ: ܘܠܚܲܪܬܵܐ ܦܝܼܫܠܹܗ ܕܒܼܝܼܚܵܐ ܡ݂ܢ ܢܹܐܪܘܼܢ ܡܲܠܟܵܐ ܓܵܘ ܪܗܘܿܡܹܐ. ܚܘܼܫ ܡܵܝܬܲܚ ܐܲܚܘܿܢܘܵܬ̈ܝܼ ܥܲܡ ܡܫܝܼܚܵܐ: ܘܗ݇ܘܵܝܡܘܿܢ ܚܲܝܠܵܢܹ̈ܐ ܒܡܵܪܲܢ ܘܒܙܲܪܒܵܐ ܕܚܲܝܠܹܗ. ܘܐܸܢ ܡܵܝܬܲܚ ܥܲܡ ܡܵܪܲܢ ܘܥܲܡ ܫܠܝܼܚ̈ܘܼܗܝ ܩܲܕܝܼܫܹ̈ܐ: ܗܵܘܲܚ ܫܲܪ̈ܝܼܟܹܐ ܥܲܡܵܝ ܐܘܼܦ ܒܚܸܩܪܵܐ. ܘܐܵܗܵܐ ܐܲܚܘܿܢܘܵܬ̈ܝܼ ܡ݂ܢ ܐܲܠܵܗܵܐ ܦܝܼܫܬܵܐ ܝ݇ܠܵܗ݁ ܝܘܼܗ݇ܒܸܠܬܵܐ ܐܸܠܵܘܟܼܘܿܢ: ܕܠܹܐ ܗ݇ܘ̣ܵܐ ܐܲܚܟ̰ܝܼ ܡܗܲܝܡܘܼܢܹܐ ܗܲܡܸܢܝܼܬܘܿܢ ܒܡܫܝܼܚܵܐ: ܐܸܠܵܐ ܐܘܼܦ ܕܗܵܘܹܐ ܠܲܢ ܡܕܲܒܪܵܢܵܐ: ܘܥܵܒܸܕܠܲܢ ܡܗܘܼܡܢܹ̈ܐ ܘܡܲܠܦܵܢܹ̈ܐ: ܐܘܼܦ ܠܵܐ ܡܸܢ݇ܕܪܸܫ݇ ܕܗܵܘܲܚ ܡܕܲܒܪ̈ܵܢܹܐ ܘܡܲܠܦܵܢܹ̈ܐ ܐܲܚܟ̰ܝܼ: ܐܸܠܵܐ ܐܘܼܦ ܩܵܒܠܲܚ ܓ̰ܘܼܢܓ̰ܵܪܵܐ ܒܘܼܬ ܫܡܹܗ: ܘܩܲܒܠܲܚ ܐܵܗܵܐ ܦܠܵܫܵܐ ܕܣܵܗܕܘܼܬܵܐ. ܗܲܕܟܼܵܐ ܚܲܫܒܲܚܠܹܗ ܐܵܗܵܐ ܥܵܠܡܵܐ ܘܠܟܠ ܕܐܝܼܬ ܒܝܹܗ ܘܠܚܲܝ̈ܘܼܗܝ ܐܲܝܟܼ ܙܸܒܠܵܐ: ܕܐܲܚܟ̰ܝܼ ܠܲܡܫܝܼܚܵܐ ܩܵܢܲܚ: ܐܲܝܟܼ ܦܵܘܠܘܿܣ. ܚܕܝܼܡܘܿܢ ܐܲܚܘܿܢܘܵܬ̈ܝܼ ܒܡܵܪܲܢ: ܚܕܝܼܡܘܿܢ ܪܵܒܵܐ ܪܵܒܵܐ: ܘܣܵܗܕܘܼܬܲܢ ܕܒܘܼܬ ܡܫܝܼܚܵܐ ܘܕܒܼܝܼܚܘܼܬܲܢ ܒܘܼܬ ܚܵܬܪܹܗ ܕܦܵܝܫܵܐ ܝ݇ܕܥܝܼܬܵܐ ܠܟܐ ܐ݇ܢܵܫܵܐ: ܡܵܪܲܢ ܩܘܼܪܒܵܐ ܝ݇ܠܹܗ: ܕܐܵܗܵܐ ܒܩܝܵܡܬܹܗ ܒܸܬ ܝܵܗ݇ܒܸܠ ܟܠܝܼܠܵܐ ܕܦܲܓܼܪ̈ܲܢ ܩܛܝܼܠܹ̈ܐ. ܗܲܕܟܼܵܐ ܒܘܼܬ ܚܵܕܲܚ ܒܓ̰ܘܼܢܓ̰ܵܪܹ̈ܐ ܒܘܼܬ ܛܵܝܸܦܵܐ ܕܐܲܠܵܗܵܐ: ܘܡܲܟܡܸܠܲܚ ܒܵܨܘܿܪܘܼܬܵܐ ܕܥܝܼܩܘܪܝܵܬܹ̈ܐ ܕܡܫܝܼܚܵܐ ܒܓܘܼܫ̈ܡܲܢ. ܒܘܼܬ ܦܲܓܼܪܹܗ ܕܝܼܠܹܗ ܥܸܕܬܵܐ: ܐܲܝܟܼ ܕܩܵܡ ܡܲܠܸܦܠܲܢ ܫܠܝܼܚܵܐ: ܡ݂ܢ ܐܵܕܝܼܵܐ ܐܲܚܘܿܢܘܵܬ̈ܝܼ ܠܥܸܠܸܠ ܚܵܙܲܚ ܘܛܵܠܒܲܚ: ܕܘܼܟܬܵܐ ܕܡܫܝܼܚܵܐ ܕܝܼܠܹܗ ܡ݂ܢ ܝܲܡܝܼܢܵܐ ܕܐܲܠܵܗܵܐ: ܕܡ݂ܢ ܬܵܡܵܐ ܗܕܝܼܪܵܐ ܝ݇ܠܹܗ ܦܵܐܹܫ ܓܸܠܝܵܐ ܥܲܠܲܢ. ܡܣܵܒܵܒ ܕܐܘܼܦ ܡܵܘܬܲܢ ܘܚܲܝ̈ܝܲܢ ܒܝܹܗ ܛܸܫܝܹ̈ܐ ܝ݇ܢܵܐ: ܘܐܝܼܡܲܢ ܕܡܫܝܼܚܵܐ ܦܵܐܹܫ ܓܸܠܝܵܐ ܐܵܗܵܐ ܕܝܼܠܹܗ ܚܲܝ̈ܝܲܢ: ܗܵܝܓܵܗ݁ ܐܘܼܦ ܚܲܝ̈ܝܲܢ ܒܸܬ ܦܵܝܫܝܼ ܓܸܠܝܹ̈ܐ ܥܲܡܹܗ ܒܚܸܩܪܵܐ.

ܗܵܐ ܐܸܕܝܘܿܡ݇ ܝܵܘܡܵܐ ܦܝܵܫܵܐ ܝ݇ܘܲܚ ܡܕܘܼܡܝܹ̈ܐ ܠܢܒܼܝܹ̈ܐ ܘܠܫܠܝܼܚܹ̈ܐ ܘܦܝܼܫܠܗ݇ܘܿܢ ܩܛܝܼܠܹ̈ܐ: ܐܲܝܟܼ ܕܡܲܕܟܼܘܪܹܐ ܝ݇ܠܹܗ ܛܘܼܒܼܵܢܵܐ ܦܵܘܠܘܿܣ ܒܝܲܕ ܪܕܘܼܦܝܵܐ ܕܬܹܣܵܠܘܿܢܝܼܩܵܝܹ̈ܐ: ܒܹܡܵܪܵܐ ܝ݇ܠܹܗ ܦܝܼܫܠܘܿܟܼܘܿܢ ܡܕܘܼܡܝܹ̈ܐ ܐܲܚܘܿܢܘܵܬ̈ܝܼ ܠܥܸܕܵܬܹ̈ܐ ܐܵܢܝܼ ܕܝܼܗ݇ܘ̣ܵܘ ܒܝܼܗܘܼܕ ܐܵܢܝܼ ܕܒܡܫܒܝܼܚܵܐ. ܕܗܲܕܟܼܵܐ ܐܘܼܦ ܐܲܚܬܘܿܢ ܩܘܼܒܸܠܵܘܟܼܘܿܢ ܡ݂ܢ ܛܵܝܸܦܹ̈ܐ: ܕܵܐܟܼܝܼ ܐܘܼܦ ܐܲܢܹܐ ܡ݂ܢ ܝܼܗܘܼܕܵܝܹ̈ܐ: ܐܵܢܝܼ ܕܠܡܵܪܲܢ ܝܼܫܘܿܥ ܡܫܝܼܚܵܐ ܩܛܹܐܠܗ݇ܘܿܢ: ܘܠܢܒܼܝܹ̈ܐ ܕܡܸܢܵܝ ܩܵܬܲܢ ܛܪܸܕܠܗ݇ܘܿܢ ܠܵܐ ܡܲܟܠܲܚ ܓܵܢܲܢ ܐܲܚܘܿܢ̈ܘܵܬܲܢ ܡ݂ܢ ܓ̰ܘܼܢܓ̰ܵܪܹ̈ܐ ܘܒܩܸܛܠܹ̈ܐ ܒܘܼܬ ܚܵܬܸܪ ܕܡܫܝܼܚܵܐ: ܣܵܒܵܒ ܒܘܼܬ ܕܐܵܗܵܐ ܡܘܼܬܒܹܐ ܝ݇ܘܲܚ. ܘܩܲܒܘܼܠܹܐ ܝ݇ܘܲܚ ܥܝܼܩܘܼܝܵܬܹ̈ܐ ܘܪ̈ܕܘܿܦܝܹܐ ܘܩܸܛܠܹ̈ܐ: ܩܵܐ ܡܲܚܙܵܝܬܵܐ ܕܕܝܼܘܵܢ ܗܲܩ ܕܐܲܠܵܗܵܐ: ܕܚܵܫܲܚ ܠܡܲܠܟܘܼܬܹܗ ܗ݁ܝ ܕܒܘܼܬ ܕܝܼܘܿܗ݁ ܓ̰ܲܢܓ̰ܘܿܪܹܐ ܝ݇ܘܲܚ. ܘܐܸܢ ܗܲܩ ܝ݇ܠܹܗ ܩܵܕ݇ܡ ܐܲܠܵܗܵܐ. ܒܸܬ ܦܲܪܥܹܗ ܥܝܼܩܘܼܝܬܹ̈ܐ ܠܡܲܠܝܸܨ̈ܵܢܲܢ. ܘܐܸܠܲܢ ܕܦܝܵܫܵܐ ܝ݇ܘܲܚ ܡܘܼܠܝܸܨܹ̈ܐ. ܕܦܲܪܩܲܚ ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡ݂ܢ ܫܡܲܝܵܐ: ܥܲܡ ܚܲܝܠܵܐ ܕܡܲܠܲܐܟܼܵܘ̈ܗܝ: ܒܥܕܵܢܵܐ ܕܐܵܬܹܐ ܘܥܵܒܸܕ ܫܩܲܠܬܵܐ ܕܬܘܼܠܵܐ ܒܠܲܗܵܐ ܕܢܘܼܪܵܐ: ܡ݂ܢ ܕܐܵܢܝܼ ܕܠܵܐ ܝ݇ܕܸܥܠܗ݇ܘܿܢ ܠܐܲܠܵܗܵܐ: ܘܠܵܐ ܝ݇ܕܸܥܠܗ݇ܘܿܢ ܠܡܲܫܚܲܕܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ: ܕܐܲܢܹܐ ܒܕܝܼܘܵܢ ܒܸܬ ܦܵܝܫܝܼ ܦܸܪܥܝܹܐ ܛܘܼܠܩܵܢܵܐ ܠܐܲܒܵܕ: ܡ݂ܢ ܩܵܕ݇ܡ ܦܲܪܨܘܿܦܹܗ ܕܡܵܪܝܵܐ ܘܡ݂ܢ ܫܘܼܒܼܚܵܐ ܕܚܲܝܠܹܗ: ܐܝܼܡܲܢ ܕܐܵܬܹܐ ܦܵܐܹܫ ܚܩܝܼܪܵܐ ܒܩܲܕܝܼܫ̈ܘܼܗܝ: ܘܡܲܚܙܸܐ ܥܵܓ̰ܝܼܒܘܼܝܵܬ̈ܘܼܗܝ ܒܡܗܘܼܡܢ̈ܘܼܗܝ: ܡ݂ܢ ܣܵܒܵܒ ܗ݇ܘܹܐܠܵܗ݁ ܫܲܪܝܼܪܬܵܐ ܣܲܗܕܘܼܬܲܢ. ܫܲܪܝܼܪܬܵܐ ܝ݇ܠܵܗ݁ ܐܲܚܘܼܢܘܵܬ̈ܝܼ ܗܲܡܙܲܡܬܹܗ ܕܦܵܘܠܘܿܣ: ܕܐܸܢ ܥܲܡܹܗ ܡܵܝܬܲܚ: ܐܘܼܦ ܥܲܡܹܗ ܒܸܬ ܚܵܝܲܚ: ܘܐܸܢ ܚܵܡܠܲܚ: ܐܘܼܦ ܥܲܡܹܗ ܒܸܬ ܥܵܒܼܕܲܚ ܡܲܠܟܘܼܬܵܐ. ܐܝܼܢܵܐ ܐܸܢ ܟܵܦܪܲܚ ܒܝܹܗ. ܐܘܼܦ ܗ݁ܘ ܒܸܬ ܟܵܦܸܪ ܒܝܲܢ. ܘܐܸܢ ܠܵܐ ܗܲܝܡܸܢܲܚ ܒܝܹܗ: ܐܵܗܵܐ ܒܗܲܝܡܵܢܘܼܬܹܗ ܒܸܬ ܟܵܠܹܗ: ܡܣܵܒܵܒ ܠܹܐ ܡܵܨܹܐ ܕܟܵܦܸܪ ܒܓܵܢܹܗ.

ܠܵܐ ܦܵܫܡܲܚ ܘܠܵܐ ܦܵܝܫܲܚ ܒܥܝܼܩܘܼܬܵܐ ܒܐܵܗܵܐ ܝܵܘܡܵܐ: ܕܒܝܹܗ ܒܸܦܠܵܛܵܐ ܝ݇ܘܲܚ ܡ݂ܢ ܕܐܵܗܵܐ ܥܵܠܡܵܐ: ܠܵܐ ܒܘܼܬ ܪܕܘܼܦܝܲܢ ܘܠܵܐ ܒܘܼܬ ܥܩܲܪܬܵܐ ܕܥܸܕ̈ܵܬܲܢ. ܐܵܦܸܢ ܐܘܼܪܚܵܐ ܨܦܵܝܝܼ ܒܸܬ ܗܵܘܝܵܐ ܩܵܬܵܝ: ܐܲܝܟܼ ܕܐܘܼܦ ܩܵܬܲܢ ܗܕܝܼܪܵܐ ܝ݇ܠܹܗ ܕܗܵܘܹܐ ܠܡܫܝܼܚܵܐ ܣܵܒܵܒ ܐ݇ܡܸܪܹܗ ܫܠܝܼܚܵܐ ܩܲܕܝܼܫܵܐ: ܕܟܠܵܝ ܐܵܢܝܼ ܕܒܣܵܡܵܝ ܝ݇ܠܵܗ݁ ܕܚܲܝܝܼ ܒܝܼܫܘܿܥ ܡܫܝܼܚܵܐ ܦܝܵܫܵܐ ܝ݇ܢܵܐ ܛܪ̈ܝܼܕܹܐ. ܘܐܵܦܸܢ ܥܸܕ̈ܵܬܲܢ ܦܝܼܫܠܗ݇ܘܿܢ ܥܩܝܼܪܹ̈ܐ: ܗܵܐ ܒܸܢܝܵܢܲܢ ܝܼܠܹܗ ܓܵܘ ܫܡܲܝܵܐ ܕܠܹܐ ܝ݇ܠܹܗ ܬܘܼܪܨܵܐ ܒܐܝܼܕܵܬܹ̈ܐ. ܣܵܒܵܒ ܒܘܼܫܵܝܘܼܬܵܐ ܕܟܹܐܢܹ̈ܐ ܘܙܲܕܝܼܩܹ̈ܐ ܒܡܵܘܬܵܐ ܒܘܼܬ ܙܕܥܘܿܬܵܐ ܕܐܲܠܵܗܵܐ ܡܝܼܬܠܗ݇ܘܿܢ. ܘܕܠܵܐ ܡܲܪܝܸܟܸܢ ܠܗܲܡܙܲܡܬܝܼ: ܗܵܐ ܩܵܛܘܿܠܹ̈ܐ ܕܝܲܢ ܡܲܠܝܘܼܙܸܐ ܝ݇ܢܵܐ ܐܸܠܲܢ ܠܦܘܼܡܵܐ ܕܣܲܝܦܵܐ. ܐܘܼܦ ܐܵܕܝܵܐ ܐܵܡܪܲܚ ܒܟܸܪܝܘܼܬܵܐ ܣܵܗܕܘܼܬܵܐ ܕܫܠܝܼܚܵܐ ܒܘܼܬ ܕܝܼܵܝ. ܕܒܟܠ ܥܕܵܢܵܐ ܦܵܝܫܵܐ ܝ݇ܕܥܝܼܬܵܐ: ܕܡ݂ܢ ܚܝܼܵܠܝܼ ܡܸܢܕܝܼ ܠܵܐ ܐ݇ܡܸܪܝܼ: ܐܸܠܵܐ ܡ݂ܢ ܟܬܵܒܹ̈ܐ ܕܐܲܠܵܗܵܐ. ܣܵܒܵܒ ܗܲܕܟܼܵܐ ܒܐܹܡܵܪܵܐ ܝ݇ܠܹܗ ܒܘܼܬ ܕܝܼܵܝ ܐ݇ܢܵܫܹ̈ܐ ܟܹܐܢܹ̈ܐ ܕܦܝܼܫܠܗ݇ܘܿܢ ܡܘܠܝܸܨܹ̈ܐ: ܐܝܼܢܵܐ ܐ݇ܚܹܪ̈݇ܢܹܐ ܒܹܐܡܵܪܵܐ ܝ݇ܠܹܗ ܒܓ̰ܘܼܢܓ̰ܵܪܵܐ ܡܝܼܬܠܗ݇ܘܿܢ. ܘܐ݇ܚܹܪ݇ܢܹܐ ܦܝܼܫܠܗ݇ܘܿܢ ܪܓ̰ܝܼܡܹ̈ܐ: ܘܐ݇ܚܹܪ݇ܢܹܐ ܦܝܼܫܠܗ݇ܘܿܢ ܢܣܝܼܪܹ̈ܐ: ܐ݇ܚܹܪ̈݇ܢܹܐ ܒܦܘܼܡܵܐ ܘܣܲܝܦܵܐ ܡܝܼܬܠܗ݇ܘܿܢ. ܘܣܢܝܼܩܹ̈ܐ ܝܼܗ݇ܘ̣ܵܘ ܘܡܘܼܠܝܸܨܹ̈ܐ ܘܓ̰ܘܼܢܓ̰ܵܪܹ̈ܐ. ܐ݇ܢܵܫܹ̈ܐ ܕܠܵܐ ܝܼܗ݇ܘ̣ܵܘ ܡܲܚܫܘܿܚܹܐ ܐܸܠܵܝ ܥܵܠܡܵܐ. ܦܝܵܫܵܐ ܗ݇ܘ̣ܵܐ ܡܕܘܼܡܝܵܐ ܐܸܠܵܝ: ܐܘܼܦ ܐܲܚܢܲܢ ܐܲܚܘܿܢܘܵܬ̈ܝܼ ܐܵܕܝܼܵܐ ܕܗܵܘܲܚ ܡܕܘܼܡܝܹ̈ܐ ܐܸܠܵܝ: ܐܲܝܟܼ ܕܦܝܼܫܠܲܢ ܡܕܘܼܡܝܹ̈ܐ ܐܸܠܵܝ ܒܓ̰ܘܼܢܓ̰ܵܪܹ̈ܐ. ܗܵܐ ܝܵܘܡܵܐ ܡܩܘܼܒܠܵܐ ܝ݇ܠܹܗ: ܗܵܐ ܥܕܵܢܵܐ ܕܦܘܼܪܩܵܢܵܐ ܝ݇ܠܵܗ݁. ܐ݇ܢܵܫܵܐ ܠܹܐ ܙܵܕܲܥ ܕܝܼܗ݇ܘܵܐ ܗܸܫܝܲܪ ܡ݂ܢ ܣܲܝܦܵܐ: ܕܲܟܼܪܲܚ ܠܗܲܡܙܲܡܬܹܗ ܕܐܲܠܵܗܵܐ: ܕܒܘܼܫ ܚܲܪܘܼܦܬܵܐ ܝ݇ܠܵܗ݁ ܡ݂ܢ ܣܲܝܦܵܐ ܕܬܪܹܝܢ ܦܘܼܡܵܢܹ̈ܐ. ܗܸܟ ܐ݇ܢܵܫܵܐ ܠܵܐ ܐܵܙܸܠ ܡ݂ܢ ܣܸܕܪܲܢ: ܕܐܵܙܲܠ݇ܚ ܟܠܲܢ ܒܟܵܡܝܼܠܘܼܬܵܐ: ܘܡܸܢ݇ܕܪܸܫَ ܕܚܵܕܲܚ ܒܟܵܡܝܼܠܘܼܬܵܐ. ܘܗܲܕܪܲܚ ܓܵܢܲܢ: ܕܡܲܚܙܲܚ ܕܐܵܢܝܼ ܕܐܝܼܢܵܐ ܘܵܓ̰ܸܒ ܐܸܠܲܢ ܐܝܼܢܵܐ ܕܕܝܲܢ: ܕܐܵܢܝܼ ܐܲܠܵܗܵܐ ܕܡܗܘܼܕܪܵܝ ܠܹܗ ܩܵܬܲܢ ܡ݂ܢ ܓ̰ܲܠܕܹܐ. ܕܚܘܼܒܵܐ ܕܝܲܢ. ܘܦܘܼܪܥܵܢܵܐ ܕܕܝܹܗ. ܕܝܲܢ ܙܕܥܘܿܬܵܐ: ܘܕܝܹܗ ܚܲܠܥܲܬ: ܕܝܲܢ ܟܸܟ̰ܚܵܐ: ܘܕܝܹܗ ܗܵܩܵܐ. ܕܝܲܢ ܓ̰ܘܼܢܓ̰ܵܪܹܐ: ܘܕܝܹܗ ܒܘܼܣܵܡܵܐ. ܕܝܲܢ ܕܸܡܵܐ: ܘܕܝܹܗ ܡܲܠܟܘܼܬܵܐ. ܕܝܲܢ ܡܵܘܬܵܐ: ܘܕܝܹܗ ܚܲܝܹ̈ܐ. ܟܲܕ ܪܵܙܝܼܠܹܗ ܕܡܲܚܕܸܐ ܘܗܲܝܸܪ ܘܡܲܒܣܸܡ ܟܲܕ ܒܐܹܡܵܪܵܐ ܩܵܬܲܢ ܒܩܵܠܵܐ ܪܵܡܵܐ: ܟ̰ܵܝܒܘܼ ܪܹ̈ܓܵܘܵܬܹܐ ܛܵܒܹ̈ܐ ܨܦܵܝܝܼ ܩܢܝܼܠܵܘܟܼܘܿܢ ܒܟܲܟܪ̈ܵܘܟܼܘܿܢ ܕܦܝܼܫܠܹܗ ܣܘܼܦܝܵܐ ܐܸܠܵܘܟܼܘܿܢ: ܘܫܩܸܠܵܘܟܼܘܿܢ ܥܸܣܪܵܐ ܥܸܣܪܵܐ ܙܘܼܙܹ̈ܐ.

ܟܲܕ ܐܲܢܹܐ ܡ݂ܢ ܛܘܼܒܼܵܢܵܐ ܫܸܡܥܘܿܢ ܦܝܵܫܵܐ ܝܼܗ݇ܘ̣ܵܘ ܗܘܼܡܙܸܡܹ̈ܐ: ܩܘܼܪܒܸܢܘܿܢ ܓܘܼܪ̈ܵܢܹܐ ܥܲܠ ܕܗܲܕܪܝܼܠܗ݇ܘܿܢ. ܐܝܼܢܵܐ ܚܲܕ݇ ܡܸܢܵܝ ܡ݂ܢ ܕܲܣܬܵܐ ܕܡܵܘܕܝܵܢܹ̈ܐ ܐ݇ܡܸܪܹܗ ܒܩܵܠܵܐ ܪܵܡܵܐ ܡ݂ܢ ܓܵܘ ܐܲܚܘܿܢܘܵܬ̈ܘܼܗܝ ܩܵܐ ܢܲܨܝܼܚܵܐ ܫܸܡܥܘܿܢ: ܝܵܐ ܒܵܒܲܢ ܩܵܬܼܘܿܠܝܼܩܵܐ: ܒܚܸܩܪܵܐ ܩܵܡ ܡܲܒܣܸܡܸܬ݁ ܠܲܢ ܒܝܘܼܠܦܵܢܘܼܟܼ: ܡ݂ܢ ܐܵܕܝܼܵܐ ܒܸܬ ܩܵܪܒܸܢܲܚ ܠܐܵܗܵܐ ܥܒܼܵܕܵܐ. ܩܘܼܪܒܸܢܹܗ ܩܲܕܝܼܫܵܐ ܫܸܡܥܘܿܢ ܘܩܵܡ ܢܵܫܸܩܠܹܗ ܘܐ݇ܡܸܪܹܗ: ܒܪܝܼܟܼܵܐ ܝ݇ܠܹܗ ܒܪܘܿܢܝܼ ܦܘܼܡܘܼܟܼ ܩܲܕܝܼܫܵܐ ܠܐܲܠܵܗܵܐ: ܗܵܐ ܒܵܪ݇ܬ ܩܵܠܘܼܟܼ ܠܸܒܵܢܵܐ ܦܠܸܛܠܹܗ ܡ݂ܢ ܦܘܼܡܘܼܟܼ: ܗ݁ܘ ܒܸܣܗܵܕܵܐ ܝ݇ܠܹܗ ܥܲܠ ܫܲܪܝܼܪܘܼܬܵܐ ܕܓܵܢܘܼܟܼ: ܗܵܝܓܵܗ݁ ܚܕܸܪܹܗ ܒܵܠܹܗ ܛܘܼܒܼܵܢܵܐ ܫܸܡܥܘܿܢ ܠܡܲܕܢܚܵܐ: ܗ݁ܘ ܘܟܠܵܝ ܢܲܨܝܼܚܹ̈ܐ ܕܥܲܡܹܗ: ܘܒܪܸܟܠܗ݇ܘܿܢ: ܘܣܓܸܕܠܗ݇ܘܿܢ ܦܲܐܬܵܝ ܥܲܠ ܐܲܪܥܵܐ. ܘܐ݇ܡܸܪܹܗ ܫܸܡܥܘܿܢ: ܡܵܪܝܵܐ ܡܵܪܝܵܐ: ܐܲܠܵܗܵܐ ܕܝܼܠܹܗ ܒܢܲܦ̮ܫܹܗ: ܡܵܘܕܘܿܝܹܐ ܝ݇ܘܲܚ ܠܟܝܵܢܵܐ ܕܐܝܼܬܘܼܬܘܼܟܼ: ܘܠܦܘܼܪܫܵܢܵܐ ܕܩܢܘܿܡܹ̈ܐ ܕܬܠܝܼܬܵܝܘܼܬܘܼܟܼ: ܩܵܡ ܒܵܪܹܝܬ݁ ܠܲܢ ܒܫܵܦܵܩܲܬܘܼܟܼ: ܘܠܵܐ ܩܵܡ ܫܵܒܼܩܸܬ ܠܲܢ ܒܦܬܲܠܬܲܢ ܘܙܵܒܸܛܘܼܬܵܐ ܕܐܵܟܹܠܩܲܪܨܵܐ. ܐܝܼܢܵܐ ܩܵܡ ܡܲܕܸܪܸܬ݁ ܠܲܢ ܡ݂ܢ ܚܸܠܛܘܼܢܝܵܐ: ܒܝܲܕ ܒܪܘܿܢܘܼܟܼ ܝܼܚܝܼܕܵܝܵܐ: ܘܒܐܝܼܕܹܗ ܩܵܡ ܦܲܪܩܸܬ݁ ܠܲܢ ܡ݂ܢ ܡܵܘܬܵܐ: ܘܩܵܡ ܦܲܪܩܸܬ݁ ܠܲܢ ܡ݂ܢ ܫܝܘܿܠ. ܘܗܘܼܕܸܪܘܼܟܼ ܒܝܲܕ ܩܝܵܡܬܹܗ ܢܘܼܚܵܡܵܐ ܠܟܠܹܗ ܓܸܢܣܵܐ ܕܒܢܲܝ̈ܢܵܫܵܐ: ܘܩܘܼܘܸܠܘܼܟܼ ܡܲܠܟܘܼܬܵܐ ܕܫܡܲܝܵܐ ܠܟܠܵܝ ܩܲܕܝܼܫܹ̈ܐ. ܘܓܘܼܒܝܼܠܘܼܟܼ ܩܵܬܲܢ ܡ݂ܢ ܛܵܝܸܦܘܼܟܼ ܡܗܘܼܡܢܵܐ: ܕܗܵܘܲܚ ܪ̈ܵܒܝܹܐ ܘܟܵܗܢܹ̈ܐ ܘܡܕܲܒܪ̈ܵܢܹܐ ܘܪܹ̈ܫܵܢܹܐ ܒܥܸܕܬܵܐ ܕܫܘܪܝܼܠܘܼܟܼ ܠܡܫܝܼܚܵܐ ܫܘܼܪܵܝܵܐ ܕܦܘܼܪܩܵܢܲܢ ܘܩܵܡ ܡܲܚܫܸܚܸܬ݁ ܠܲܢ ܕܓ̰ܲܢܓ̰ܸܪܲܚ ܒܘܼܬ ܫܵܟܲܪܬܵܐ ܕܫܸܡܘܼܟܼ ܘܡܵܝܬܲܚ ܒܘܼܬ ܚܵܬܸܪ ܕܥܸܕܬܘܼܟܼ. ܦܪܝܼܩܵܐ ܒܕܸܡܵܐ ܕܣܵܘܓܘܼܠܘܼܟܼ ܡܵܪܲܢ ܝܼܫܘܿܥ ܡܫܝܼܚܵܐ. ܩܲܒܸܠ ܡܵܪܝ ܕܸܒܸܚܬܵܐ ܕܦܲܓܼܪ̈ܲܢ: ܕܗܵܘܘܲܚ ܐܸܠܘܼܟܼ ܩܘܼܪ̈ܒܵܢܹܐ ܕܸܟܼܝܹ̈ܐ ܘܡܩܘܼܒܠܹ̈ܐ. ܘܡܲܚܫܸܚܠܲܢ ܠܣܵܗ݇ܡܵܐ ܕܡܛܝܼܠܵܗ݁ ܠܩܲܕܝܼܫܵܐ ܒܢܘܼܗܪܵܐ. ܗܲܒܼܠ ܚܲܝܠܵܐ ܠܙܲܒܘܼܢܹ̈ܐ ܕܛܵܝܸܦܘܼܟܼ: ܘܡܲܩܘܝܼ ܠܡܗܘܼܡܢܹ̈ܐ ܒܬܵܘܕܝܼܬܘܼܟܼ ܒܥܕܵܢܵܐ ܕܓ̰ܘܼܢܓ̰ܵܪܝܼ. ܘܥܒܼܘܿܕ ܥܲܡܵܝ ܢܝܼܫܵܢܩܵܐ ܛܵܒܼܵܐ: ܕܚܵܙܝܼ ܣܵܢܝܵܢܵܝ̈ ܘܢܵܚܦܝܼ: ܕܐܲܢ݇ܬ݁ ܝ݇ܘܸܬ ܡܵܪܝܵܐ ܡܗܲܝܸܪܵܢܲܢ ܘܝܵܗ݇ܒܼܵܢܵܐ ܕܠܸܒܵܐ ܩܵܬܲܢ: ܕܐܸܠܘܼܟܼ ܕܵܝܢܵܢܵܐ ܡܲܠܲܐܟܹ̈ܐ ܕܥܸܠܵܝܹ̈ܐ ܘܬܲܚܬܵܝܹ̈ܐ ܫܘܼܒܼܚܵܐ ܘܐܝܼܩܵܪܵܐ ܘܪܵܡܘܼܬܵܐ: ܒܘܼܬ ܟܠܵܝ ܡܕܲܒܪܵܢܘܼܬܘܼܟܼ ܡܠܝܼܬܵܐ ܡ݂ܢ ܟܠܵܝ ܥܵܩܸܠܕܵܪܘܼܝܵܬܹ̈ܐ: ܐܵܕܝܼܵܐ ܘܒܟܠ ܥܕܵܢܵܐ ܠܐܵܒܲܕ ܐܲܒܵܕܝܼܢ. ܓ̰ܘܼܘܸܒܠܗ݇ܘܿܢ ܟܠܵܝ ܕܓ̰ܸܡܥܝܹ̈ܐ ܝܼܗ݇ܘ̣ܵܘ ܘܐ݇ܡܸܪܘܿܢ: ܒܲܪܸܟܼܡܵܪܝ: ܒܲܪܸܟܼܡܵܪܝ. ܘܦܘܼܫܸܛܠܹܗ ܝܲܡܝܼܢܹܗ ܠܟܸܣܠܵܝ ܘܐ݇ܡܸܪܹܗ: ܚܲܝܠܵܐ ܕܠܵܐ ܗܵܘܹܐ ܙܲܒܘܼܢ ܗܵܘܹܐ ܒܗܲܝܲܪܬܲܢ ܠܐܵܒܲܕ: ܐܵܡܹܝܢ.

ܘܒܲܬ݇ܪ ܕܐܲܢܹܐ ܒܓ̰ܲܠܕܘܼܬܵܐ ܩܘܼܪܒܸܢܘܿܢ ܥܸܣܪܵܐ ܓܘܼܪ̈ܵܢܹܐ: ܘܩܲܪܒܸܢܝܼ ܝܼܗ݇ܘ̣ܵܘ ܡܸܢܵܝ ܥܸܣܪܵܐ ܥܸܣܪܵܐ ܠܣܲܝܦܵܐ. ܒܚܲܕܘܼܬܵܐ ܩܲܪܒܘܿܢܹܐ ܝܼܗ݇ܘ̣ܵܘ ܩܲܕܝܼܫܹ̈ܐ: ܟܲܕ ܡܸܠܝܵܐ ܦܘܼܡܵܝ ܓܸܚܟܵܐ ܘܠܸܫܵܢܵܝ ܬܸܫܒܘܿܚܬܵܐ: ܘܢܵܫܩܝܼ ܝܼܗ݇ܘ̣ܵܘ ܕܦܝܵܫܵܐ ܝܼܗ݇ܘ̣ܵܘ ܠܘܼܒܠܹ̈ܐ: ܠܐܵܢܝܼ ܕܦܝܵܫܵܐ ܝܼܗ݇ܘ̣ܵܘ ܫܒܝܼܩܹ̈ܐ (ܦܝܼܫܹ̈ܐ) ܥܸܣܪܵܐ ܥܸܣܪܵܐ. ܐܝܼܢܵܐ ܫܸܡܥܘܿܢ ܛܘܼܒܼܵܢܵܐ ܝܵܗ݇ܒܸܠ ܗ݇ܘ̣ܵܐ ܠܗ݇ܘܿܢ ܠܸܒܵܠ ܚܲܟ̰ܵܐ ܚܲܟ̰ܵܐ ܟܲܕ ܒܐܹܡܵܪܵܐ: ܕܘܼܫܘܼܢ ܒܢܘܿܢ̈ܝܼ ܥܲܠ ܢܸܟܼܣܹܗ ܕܡܵܘܬܵܐ: ܡ݂ܢ ܣܵܒܵܒ ܫܡܸܛܠܹܗ ܝܼܫܘܿܥ ܒܡܵܘܬܹܗ. ܐܝܼܢܵܐ ܒܥܕܵܢܵܐ ܕܐܵܡܐܵܐ ܩܲܕܝܼܫܹ̈ܐ ܫܩܝܼܠܗ݇ܘܿܢ ܟܠܝܼܠܵܐ ܕܣܵܗܕܘܼܬܵܐ: ܡܘܼܩܘܸܚܠܹܗ ܒܩܵܠܵܐ ܪܵܡܵܐ: ܟܲܕ ܚܙܝܼܠܹܗ ܫܠܲܕܵܝ̈ ܪ̈ܘܼܦܝܹܐ ܝܼܗ݇ܘ̣ܵܘ ܩܘܼܚܵܢܹ̈ܐ ܩܘܼܚܵܢܹ̈ܐ: ܐܲܝܟܵܐ ܝ݇ܠܹܗ ܢܸܟܣܘܼܟܼ ܡܵܘܬܵܐ: ܘܐܲܝܟܵܐ ܝ݇ܠܵܗ݁ ܓ̣ܵܠܝܼܒܘܼܬܲܟܼܝ ܫܝܘܿܠ؟ ܫܟܝܼܪܵܐ ܠܐܲܠܵܗܵܐ ܗ݁ܘ ܕܝܘܼܗܸ݇ܒܼܠܹܗ ܐܸܠܲܢ ܓ̣ܵܠܝܼܒܘܼܬܵܐ ܒܝܲܕ ܡܵܪܲܢ ܝܼܫܘܿܥ ܡܫܝܼܚܵܐ. ܘܡܸܢ݇ܕܪܸܫ݇ ܡܘܼܙܝܸܕܠܹܗ ܘܐ݇ܡܸܪܹܗ: ܟܡܵܐ ܛܵܒܼܵܐ ܝ݇ܠܹܗ ܘܟܡܵܐ ܫܲܦܝܼܪܵܐ: ܠܐܲܚܘܿܢܘܵܬܹ̈ܐ ܕܡܘܼܕܵܠܹܐ ܫܩܝܼܠܗ݇ܘܿܢ ܟܠܝܼܠܵܐ ܕܣܵܗܕܘܼܬܵܐ ܟܡܵܐ ܫܲܦܝܼܪܵܐ ܝ݇ܠܹܗ ܟܠܝܼܠܵܐ ܕܣܵܗܕܘܼܬܵܐ: ܕܦܝܼܫܠܹܗ ܟܡܝܼܠܵܐ ܒܐܸܡܐܵܐ

ܗܲܕܟܼܵܐ ܦܝܼܫܠܹܗ ܫܒܼܝܼܩܵܐ ܢܲܨܝܼܚܵܐ ܫܸܡܥܘܿܢ: ܘܬܪܹܝܢ ܡ݂ܢ ܩܲܫܝܼܫܹ̈ܐ ܣܵܒܹ̈ܐ ܕܗ݇ܘܹܐܠܗ݇ܘܿܢ ܥܲܡܹܗ: ܫܸܡܵܐ ܕܚܲܕ݇ ܡܸܢܵܝ ܚܲܢܲܢܝܵܐ ܘܗ݁ܘ ܐ݇ܚܹܪ݇ܢܵܐ ܥܒܼܸܕ ܗܲܝܟܠܵܐ. ܐܝܼܢܵܐ ܒܥܕܵܢܵܐ ܕܫܘܼܕܸܪܘܿܢ ܕܟܵܦܸܪ: ܦܲܓܼܪܹܗ ܪܲܬܪܘܼܬܹܐ ܗ݇ܘ̣ܵܐ. ܐܝܼܢܵܐ ܠܵܐ ܚܝܼܵܠܹܗ. ܕܚܲܕ݇ ܐ݇ܢܵܫܵܐ ܓܘܼܪܵܐ ܕܫܸܡܹܗ ܝܼܗ݇ܘ̣ܵܐ ܦܘܿܣܝܼ: ܕܝܼܗ݇ܘ̣ܵܐ ܒܐܝܼܩܵܪܵܐ ܕܕܲܪܓܹܗ ܪܹܫܵܐ ܕܥܵܩܸܠܕܵܪܹ̈ܐ: ܐܲܢܹܐ ܟܹܐ ܩܵܪܝܼ ܗ݇ܘ̣ܵܘ ܠܹܗ ܩܵܪܘܼܓܼܒܸܕ: ܗܲܪ ܒܝܲܕ ܕܐܵܢܝܼ ܝܵܘܡܵܢܹ̈ܐ ܦܝܼܫܠܹܗ ܝܘܼܗ݇ܒܼܵܐ ܐܸܠܹܗ ܐܵܗܵܐ ܐܝܼܩܵܪܵܐ ܡ݂ܢ ܡܲܠܟܵܐ. ܟܸܠܝܵܐ ܗ݇ܘ̣ܵܐ ܬܵܡܵܐ: ܕܫܲܪܸܟ ܗ݇ܘ̣ܵܐ ܒܚܙܵܝܬܵܐ ܕܦܪܲܡܬܵܐ ܕܩܲܕܝܼܫܹ̈ܐ. ܘܟܲܕ ܚܙܝܼܠܹܗ ܠܣܵܒܼܵܐ ܗ݁ܘ ܦܲܓܼܪܹܗ ܪܲܬܪܘܼܬܹܐ ܗ݇ܘ̣ܵܐ: ܐ݇ܡܸܪܹܗ ܐܸܠܹܗ: ܠܵܐ ܙܲܕܥܸܬ݁ ܚܲܢܲܢܝܵܐ ܠܵܐ ܙܲܕܥܸܬ݁: ܟ̰ܥܘܼܡ ܥܲܝܢ̈ܘܼܟܼ ܚܲܟ̰ܵܐ ܐܲܝܟܼ ܪܸܡܙܵܐ: ܘܗܵܐ ܚܙܝܼܠܘܼܟܼ ܠܒܲܗܪܹܗ ܕܡܫܝܼܚܵܐ. ܗܲܕܟܼܵܐ ܫܩܝܼܠܹܗ ܟܠܝܼܠܵܐ ܗ݁ܘ ܛܘܼܒܼܵܢܵܐ: ܐܝܼܢܵܐ ܦܘܿܣܝܼ ܦܝܼܫܠܹܗ ܕܒܼܝܼܩܵܐ ܒܓ̰ܲܠܕܘܼܬܵܐ ܒܦܘܼܩܕܵܢܵܐ ܕܓܘܼܪܵܐ ܕܕܝܼܘܵܢ: ܕܬܵܡܵܐ ܗ݇ܘ̣ܵܐ ܒܕܘܼܟܬܵܐ ܫܲܪܝܼܪܬܵܐ: ܘܦܝܼܫܠܹܗ ܐ݇ܣܝܼܪܵܐ: ܗܲܠ ܕܦܵܝܫܵܐ ܡܘܼܩܪܸܒܼܬܹܗ ܐܵܗܵܐ ܗܲܡܙܲܡܬܹܗ ܠܡܲܠܟܵܐ. ܘܒܵܬ݇ܪ ܚܲܢܲܢܝܵܐ ܩܘܼܪܒܸܢܘܿܢ ܠܥܒܼܸܕ ܗܲܝܟܠܵܐ: ܐܘܼܦ ܐܵܗܵܐ ܫܩܸܠܹܗ ܟܠܝܼܠܵܐ ܕܣܵܗܕܘܼܬܵܐ ܘܗܝܼܒܼܝܹܗ ܒܡܫܝܼܚܵܐ.

ܗܵܝܓܵܗ݁ ܩܘܼܪܒܸܢܹܗ ܓܲܢ݇ܒܵܪܵܐ ܕܚܲܝܠܵܐ ܫܸܡܥܘܿܢ: ܘܨܘܼܠܝܼܠܹܗ ܘܐ݇ܡܸܪܹܗ:  ܡܵܪܲܢ ܝܼܫܘܿܥ ܕܨܘܼܠܝܼܠܹܗ ܒܘܼܬ ܨܵܠܒܼܵܢ̈ܘܼܗܝ: ܘܩܵܬܲܢ ܡܘܼܠܸܦܠܹܗ ܕܨܵܠܲܚ ܨܠܘܿܬܵܐ ܒܘܼܬ ܕܸܫܡܸܢܲܢ: ܘܩܘܼܒܸܠܹܗ ܪܘܼܚܹܗ ܕܐܸܣܛܲܦܵܢܘܿܣ ܡܫܲܡܫܵܢܹܗ ܗ݁ܘ ܕܨܘܼܠܝܼܠܹܗ ܨܠܘܿܬܵܐ ܒܘܼܬ ܪ̈ܵܓ̰ܡܵܢܘܼܗܝ: ܩܲܒܸܠ ܪ̈ܘܼܚܵܬܹܐ ܕܐܲܢܹܐ ܐܲܚܘܿܢ̈ܘܵܬܲܢ. ܘܩܲܒܸܠ ܥܲܡ ܕܝܼܵܝ ܐܘܼܦ ܪܘܼܚܝܼ: ܥܲܡ ܟܠܵܝ ܣܵܗ̈ܕܘܼܟܼ ܐܵܢܝܼ ܕܫܩܝܼܠܗ݇ܘܿܢ ܟܠܝܼܠܵܐ ܕܣܵܗܕܘܼܬܵܐ ܒܡܲܥܪܒܼܵܐ: ܘܥܲܡ ܫܠܝܼܚܹ̈ܐ ܩܲܕܝܼܫܹ̈ܐ ܘܥܲܡ ܢܒܼܝܹ̈ܐ ܛܘܼܒܼܵܢܹ̈ܐ. ܘܠܵܐ ܡܲܩܸܡܸܬ݁ ܐܸܠܵܝ ܐܵܗܵܐ ܚܛܝܼܬܵܐ ܠܛܲܪ̈ܕܵܢܹܐ ܕܛܵܝܸܦܘܼܟܼ ܘܠܩܵܛܘܿܠܹ̈ܐ ܕܓܘܼܫ̈ܡܲܢ: ܐܸܠܵܐ ܗܲܒܼܠܗ݇ܘܿܢ ܡܵܪܝܼ: ܕܕܵܝܪܝܼ ܠܝܼ݇ܕܸܥܬܵܐ ܕܐܲܠܵܗܘܼܬܘܼܟܼ ܘܠܦܲܪܡܵܝܬܵܐ ܕܡܵܪܘܿܬܘܼܟܼ: ܒܲܪܸܟܼ ܡܵܪܝܼ ܠܡܕܝܼܢܵܬܹ̈ܐ ܘܠܟܠܵܝ ܡܵܬܘܵܬܹ̈ܐ ܕܓܵܘ ܐܘܼܚܕܵܢܵܐ ܕܡܲܕܢܚܵܐ: ܕܐܸܠܝܼ ܣܘܼܦܝܼܠܘܼܟܼ. ܘܢܲܛܸܪ ܟܠܵܝ ܡܗܲܝܡܢܹ̈ܐ ܕܒܝܼܵܝ: ܐܲܝܟܼ ܒܝܼܒܸܠܬܵܐ ܕܥܲܝܢܵܐ. ܘܛܠܵܢܝܼܬܵܐ ܕܣܘܵܢܵܢ̈ܘܼܟܼ ܦܵܝܫܝܼ ܡܣܘܼܬܪܹ̈ܐ ܘܡܚܘܼܡܝܹ̈ܐ: ܗܲܠ ܕܥܵܒܸܪ ܐܵܗܵܐ ܫܓܼܘܼܫܝܵܐ. ܘܗ݇ܘܝܼ ܥܲܡܵܝ ܗܲܠ ܠܫܘܼܠܵܡܵܐ ܕܥܵܠܡܵܐ: ܐܲܝܟܼ ܩܵܘܠܘܼܟܼ. ܒܲܪܸܟܼ ܡܵܪܲܢ ܐܘܼܦ ܠܐܵܗܵܐ ܐܲܬܪܵܐ: ܕܒܝܹܗ ܦܝܼܫܠܲܢ ܩܘܼܒܠܹܐ ܘܒܝܹܗ ܫܩܝܼܠܲܢ ܟܠܝܼܠܵܐ ܕܣܵܗܕܘܼܬܵܐ. ܘܨܠܝܼܒܼܘܼܟܼ ܗܵܘܹܐ ܐܸܠܹܗ ܢܵܛܘܿܪܵܐ ܒܗܲܝܡܵܢܘܼܬܵܐ ܕܫܪܵܪܵܐ: ܐܵܕܝܼܵܐ ܘܒܟܠ ܥܕܵܢܵܐ ܘܠܥܵܠܲܡ ܥܵܠܡܝܼܢ: ܐܵܡܹܝܢ.   ܘܗܲܕܟܼܵܐ ܥܲܡ ܗܹܡܸܙܡܵܢ̈ܘܼܗܝ: ܓܼܵܠܝܼܒܘܼܬܹܗ ܕܢܲܨܝܼܚܵܐ ܫܸܡܥܘܿܢ ܕܦܝܼܫܠܵܗ݁ ܟܡܝܼܠܬܵܐ ܒܩܛܥܵܝܬܵܐ ܕܪܹܫܹܗ. ܣܵܥܲܬ ܕܬܸܫܥܵܐ ܗ݇ܘ̣ܵܐ: ܝܵܘܡܵܐ ܕܥܪܘܼܒܼܬܵܐ ܕܚܲܫܹܗ ܕܡܵܪܲܢ.

ܐܝܼܢܵܐ ܒܥܕܵܢܵܐ ܕܗܲܕܟܼܵܐ ܦܝܼܫܠܹܗ ܥܒܼܝܼܕܵܐ: ܗ݇ܘܹܐܠܹܗ ܚܸܫܟܵܐ: ܘܡ݂ܢ ܢܵܓܸܣܬܲܢ ܫܸܡܫܵܐ ܦܝܼܫܠܵܗ݁ ܟܘܼܣܝܼܬܵܐ: ܘܙܕܥܘܿܬܵܐ ܘܪܲܬܪܲܬܪܵܬܵܐ ܕܒܼܝܼܩܠܵܗ݁ ܠܟܠܵܝ ܚܵܙܝܵܢܹ̈ܐ. ܐܝܼܢܵܐ ܫܠܲܕܹܗ ܕܢܲܨܝܼܚܵܐ ܫܸܡܥܘܿܢ ܒܲܪ ܨܲܒܵܥܹ̈ܐ ܩܵܬܼܘܿܠܝܼܩܵܐ: ܘܕܐܲܦܸܣܩܘܿܦܹ̈ܐ ܘܕܟܠܵܝ ܩܲܕܝܼܫܹ̈ܐ ܕܥܲܡܹܥ: ܒܗ݁ܘ ܠܲܝܠܹܐ ܦܝܼܫܠܹܗ ܓ̰ܠܝܼܒܵܐ ܡ݂ܢ ܐ݇ܢܵܫܹ̈ܐ ܒܢܲܝ̈ ܣܠܵܒܵܐ ܕܪ̈ܗܘܿܡܵܝܹܐ: ܘܒܸܥܡܵܪܵܐ ܝܼܗ݇ܘ̣ܵܘ ܠܐܲܬܪܵܐ ܕܠܹܕܵܢ: ܘܦܝܼܫܠܹܗ ܩܒܼܝܼܪܵܐ ܒܐܝܼܩܵܪܵܐ. ܐܘܼܦ ܐ݇ܢܵܫܹ̈ܐ ܡ݂ܢ ܡܗܘܼܡܢܹ̈ܐ ܕܡ݂ܢ ܐܲܬܪܵܐ ܐܲܬܪܵܐ (ܐܲܬܪ̈ܵܘܵܬܹܐ ܦܪ̈ܝܼܫܹܐ): ܕܦܝܼܫܠܗ݇ܘܿܢ ܩܘܼܒܠܹ̈ܐ ܒܕܵܘܘܼܠܵܐ ܕܡܲܠܟܵܐ: ܛܠܸܒܠܗ݇ܘܿܢ ܒܘܼܪܸܟܬܵܐ ܡ݂ܢ ܦܲܓܼܪܹ̈ܐ ܕܩܲܕܝܼܫܹ̈ܐ. ܦܝܼܫܠܵܗ݁ ܝܘܼܗ݇ܒܸܠܬܵܐ ܐܸܠܵܝ ܡ݂ܢ ܐܲܦܸܣܩܘܿܦܹ̈ܐ ܕܗ݇ܘܹܐܠܗ݇ܘܿܢ ܒܗ݁ܘ ܙܲܒܼܢܵܐ ܓܵܘ ܐܲܬܪܵܐ: ܦܝܼܫܠܵܗ݁ ܝܘܼܗ݇ܒܸܠܬܵܐ ܐܸܠܵܝ ܡ݂ܢ ܐܲܦܸܣܩܘܿܦܹ̈ܐ ܕܗ݇ܘܹܐܠܗ݇ܘܿܢ ܒܗ݁ܘ ܙܲܒܼܢܵܐ ܓܵܘ ܐܲܬܪܵܐ: ܐܵܢܝܼ ܕܡ݂ܢ ܟܠܵܝ ܥܵܡܪ̈ܵܢܹܐ (ܚܲܝܵܢܹ̈ܐ) ܕܡܲܕܢܚܵܐ ܐܲܚܟ̰ܝܼ ܠܵܐ ܦܝܼܫܠܗ݇ܘܿܢ ܣܘܼܦܝܹ̈ܐ ܠܓ̰ܘܼܢܓ̰ܵܪܹ̈ܐ ܘܠܩܸܛܠܵܐ. ܡ݂ܢ ܣܵܒܵܒ ܡܕܝܼܢ݇ܬܵܐ ܚܲܕܬܵܐܝܼܐ ܦܝܼܫܠܵܗ݁ ܒܢܝܼܬܵܐ: ܘܒܣܵܡܵܐ ܗ݇ܘ̣ܵܐ ܡܲܠܟܵܐ ܠܫܘܼܝܵܢܹܗ. ܘܐܘܼܦ ܛܵܝܸܦܹ̈ܐ ܕܒܝܼܵܗ݁ ܡܘܼܬܸܒܼܠܹܗ: ܚܲܕܬܵܐܝܼܬ ܓܪܝܼܫܵܝܠܹܗ ܘܡܘܼܬܒܼܵܝܠܹܗ ܡ݂ܢ ܕܘܼܟܵܢܹ̈ܐ ܦܪ̈ܝܼܫܹܐ. ܘܐܘܼܦ ܥܵܒܸܕ ܗ݇ܘ̣ܵܐ ܪ̈ܲܡܹܐ ܥܲܠܵܝ: ܡܣܵܒܵܒ ܕܣܠܝܼܒܹ̈ܐ ܝܼܗ݇ܘ̣ܵܘ. ܐܝܼܢܵܐ ܐܵܢܹܐ ܗܲܠ ܠܲܐܟܼܵܐ ܗܲܕܟܼܵܐ ܦܝܼܫܠܹܗ ܗܘܼܡܙܸܡܵܐ ܒܘܼܬ ܕܝܼܵܝ.

ܗܵܕܟܼܵܐ ܝ݇ܠܵܗ݁ ܚܘܼܬܵܡܵܐ ܕܬܲܫܥܝܼܬܵܐ ܕܓܼܵܠܝܼܒܘܼܝܵܬܹ̈ܐ ܕܩܲܕܝܼܫܵܐ ܫܸܡܥܘܿܢ ܐܲܦܸܣܩܘܿܦܵܐ ܘܩܵܬܘܿܠܝܼܩܵܐ ܕܡܲܕܢܚܵܐ: ܗ݁ܘ ܕܦܝܵܫܵܐ ܝ݇ܠܹܗ ܩܸܪܝܵܐ ܒܲܪ ܨܲܒܵܥܹ̈ܐ: ܒܘܼܬ ܐܲܒܼܵܗ̈ܘܼܗܝ ܟܹܐ ܨܵܒܼܥܝܼ ܗ݇ܘ̣ܵܘ ܓ̰ܘܼܠܹ̈ܐ ܐܲܪ̈ܓܘܵܢܹܐ (ܣܡܘܿܩܹ̈ܐ) ܩܵܐ ܡܲܠܟܵܐ: ܘܟܠܵܝ ܗ݁ܝ ܕܲܣܬܵܐ ܒܪܝܼܟܼܬܵܐ ܕܣܵܗܕܹ̈ܐ ܛܘܼܒܼܵܢܹ̈ܐ ܕܥܲܡܹܗ ܝܼܗ݇ܘ̣ܵܘ: ܐܲܝܟܼ ܡܘܼܕܝܼ ܕܝܘܼܗ݇ܒܸܠܵܗ݁ ܫܵܦܵܩܲܬ ܕܐܲܠܵܗܵܐ: ܒܝܲܕ ܡܠܘܿܐܵܐ ܕܡܘܼܫ݇ܟ̰ܚܠܲܢ ܡ݂ܢ ܫܲܪ̈ܒܹܐ ܕܬܘܼܢܝܼܠܗ݇ܘܿܢ ܐ݇ܢܵܫܹ̈ܐ ܚܲܦܛܵܢܹ̈ܐ ܩܲܕܝܼܡܝܼ ܩܵܬܲܢ: ܒܟܸܪܝܘܼܬܵܐ ܥܒܼܝܼܕܵܝ ܠܲܢ. ܕܨܠܘܿܬܵܝ ܥܲܠ ܟܠܲܢ ܐܵܡܹܝܢ.

ܚܬܸܡܠܵܗ݁ ܬܲܫܥܝܼܬܵܐ ܕܣܵܗܕܘܼܬܵܐ ܕܫܸܡܥܘܿܢ ܩܲܕܝܼܫܵܐ ܘܩܵܬܘܿܠܝܼܩܵܐ ܘܣܵܗܕܵܐ ܘܕܐܵܢܝܼ ܥܲܡܹܗ ܫܩܝܼܠܗ݇ܘܿܢ ܟܠܝܼܠܵܐ.

ܛܘܼܒܼܵܢܵܐ ܡܵܪܝ ܫܸܡܥܘܿܢ ܩܵܬܘܿܠܝܼܩܵܐ ܘܕܣܵܗܕܹ̈ܐ ܥܲܡܹܗ: ܕܘܼܟܼܪܘܼܢܝܵܝ ܠܒܘܼܪܸܟܬܵܐ: ܘܨܠܵܘܵܬ̈ܵܝ ܥܲܠ ܟܠܲܢ: ܐܵܡܹܝܢ.

ܥܪܘܼܒܼܬܵܐ ܕܐܸܫܬܵܐ ܕܩܲܝܛܵܐ. ܕܘܼܟܼܪܵܢܵܐ ܕܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ ܩܵܬܘܿܠܝܼܩܵܐ ܦܵܛܪܝܵܪܟܝܼܣ: ܬܲܠܡܝܼܕܹܗ ܕܡܵܪܝ ܦܵܦܵܐ ܩܵܬܘܿܠܝܼܩܵܐ: ܘܕܐܲܒܼܵܗܵܬܹ̈ܐ ܕܫܩܝܼܠܗ݇ܘܿܢ ܟܠܝܼܠܵܐ ܣܵܗܕܘܼܬܵܐ ܥܲܡܹܗ. ܐܲܢܹܐ ܒܝܵܘܡܵܐ ܕܥܪܘܼܒܼܬܵܐ ܕܚܲܫܵܐ ܫܩܝܼܠܗ݇ܘܿܢ ܟܠܝܼܠܵܐ: ܒܫܹܢ݇ܬܵܐ ܐܸܫܬܸܡܵܐܐ ܘܚܲܡܫܝܼ ܘܚܲܡܫܵܐ ܕܝܵܘܢܵܝܹ̈ܐ: ܓܵܘ ܐܲܬܪܵܐ ܕܠܹܕܵܢ ܒܐܲܪܥܵܐ ܕܗܘܼܙܵܝܹ̈ܐ: ܒܝܵܘܡܵܢܹ̈ܐ ܕܫܵܒܼܘܿܪ ܡܲܠܟܵܐ. ܦܝܼܫܠܹܗ ܫܒܼܝܼܩܵܐ ܕܘܼܟܼܪܘܼܢܝܵܝ ܗܲܠ ܥܪܘܼܒܼܬܵܐ ܕܡܵܘܕܝܵܢܹ̈ܐ. ܕܝܼܠܵܗ݁ ܓܵܘܵܢܵܐܝܼܬ ܠܟܠܵܝ ܣܵܗܕܹ̈ܐ. ܐܝܼܢܵܐ ܐܵܗܵܐ ܥܪܘܼܒܼܬܵܐ ܦܝܵܫܵܐ ܝ݇ܠܵܗ݁ ܥܒܼܝܼܕܬܵܐ: ܡܣܵܒܵܒ ܕܒܝܼܘܼܗ݁ ܦܝܼܫܠܹܗ ܡܩܘܼܕܫܵܐ ܡܲܕܒܚܵܐ ܕܡܵܪܝ ܫܸܡܥܘܿܢ ܒܲܪ ܨܲܒܵܥܹ̈ܐ ܒܐܲܬܪܵܐ ܕܠܹܕܵܢ. ܘܦܝܼܫܠܹܗ ܩܒܼܝܼܪܵܐ ܡܵܪܝ ܫܸܡܥܘܿܢ ܒܫܘܿܫܲܢ ܕܒܥܝܼܠܵܡ: ܕܦܝܵܫܵܐ ܝ݇ܠܵܗ݁ ܩܪܝܼܬܵܐ ܒܠܸܫܵܢܵܐ ܐܲܪܵܒܵܝܵܐ ܣܘܼܣ (ܚܘܼܕܪܵܐ: ܦܲܠܓܘܼܬ. ܓ ܪܠܒ- ܪܠܓ).

ܐܝܼܬܼ ܐܹܓܲܪ̈ܝܵܬܹܐ ܠܫܸܡܥܘܿܢ ܒܲܪ ܨܲܒܵܥܹ̈ܐ. ܘܟܹܐ ܐܵܡܪܝܼ ܕܐܸܠܹܗ ܐ݇ܡܝܼܪܹܐ ܝ݇ܢܵܐ ܐܲܢܹܐ ܥܘܿܢܝܵܬܹ̈ܐ. ܝܵܕܲܥ ܚܘܼܫܵܒܹ̈ܐ. ܘܐܵܦܸܢ ܫܵܠܚܝܼܬܘܿܢ. ܒܥܲܝܢܵܐ ܕܬܲܪܥܝܼܬܵܐ ܘܲܕܚܘܼܒܵܐ.

ܘܐܵܗܵܐ ܛܘܼܟܸܣܠܹܗ ܒܬܪܹܝܢ ܕܲܣܬܹ̈ܐ ܨܵܠܝܼ ܓܵܘ ܥܹܕܵܬܹ̈ܐ ܕܡܲܕܢܚܵܝܹ̈ܐ: ܕܵܐܟܼܝܼ ܕܓܵܘ ܡܲܥܪܒܼܵܐ ܦܝܼܫܠܹܗ ܡܛܘܼܟܣܵܐ ܡ݂ܢ ܙܲܒܼܢܹ̈ܐ ܕܐܝܼܓܼܢܵܛܝܼܘܿܣ ܢܘܼܪܵܢܵܐ. ܬܲܠܡܝܼܕܵܐ ܕܝܘܿܚܲܢܵܢ ܐܹܘܲܢܓܵܠܸܣܛܵܐ. (ܒܲܪ ܥܸܒܼܪܵܝܵܐ. ܐܩܠܣ: ܒ: ܠܒ.)

♱♱♱♱♱♱♱♱