ܬܲܫܥܝܼܬܵܐ
܀ ܕܡܵܪܝ ܙܲܝܥܵܐ ܛܘܼܒܼܵܢܵܐ ܀
ܥܡ
܀ ܕܡܵܪܝ ܬܵܒܼܘܿܪ ܬܲܠܡܝܼܕܹܗ ܀
ܒܫܹܢ݇ܬܵܐ ܕܫܸܬܼܡܵܐܐ ܘܥܸܣܪܝܼ ܕܡܲܠܟܵܐ ܐܵܠܹܟܼܣܲܢܕܪܘܿܣ ܝܵܘܢܵܝܵܐ: (ܗ:ܕ. ܫܹܢ݇ܬܵܐ ܝܵܘܢܵܝܬܵܐ، ܕܝܼܠܵܗ̇ 309 ܠܡܵܪܲܢ): ܚܲܕ݇ ܓܲܒܼܪܵܐ ܐܝܼܬ ܗ݇ܘܵܐ ܒܐܲܬܼܪܐ ܕܡܘܼܠܟܵܢܵܐ (ܦܵܠܸܣܛܝܼܢܹ̈ܐ): ܕܫܸܡܹܗ ܝܑܼܗ݇ܘܵܐ ܫܸܡܥܘܿܢ ܬܲܓܵܪܵܐ (ܬܵܓ̰ܝܼܪ): ܘܫܸܡܵܗ̇ ܕܒܲܟܼܬܹܗ ܗܹܠܹܢܹܐ: ܘܬܸܪ̈ܘܲܝܗܝ ܪܵܒܵܐ ܙܲܕܝܩܹ̈ܐ ܗ݇ܘܵܘ ܩܵܕ݇ܡ ܐܲܠܵܗܵܐ ܚܲܝܠܬܼܵܢܵܐ: ܘܟܹܐ ܚܵܕܪܝܼ ܗ݇ܘܵܘ ܒܟܠܲܝܗܝ ܦܘܼܩܕܵܢܘܼ̈ܗܝ: ܘܒܢܵܡܘܿܣܹܗ ܕܡܵܪܝܵܐ ܕܠܵܐ ܠܵܘܡܵܐ ܗ݇ܘܵܘ. ܘܥܲܬܝܼܪܹ̈ܐ ܗ݇ܘܵܘ ܒܕܵܘܸܠܬܵܐ ܪܵܒܵܐ ܓܘܼܪܬܵܐ. ܘܐܝܼܬ ܗ݇ܘܵܐ ܠܗ݇ܘܿܢ ܬܪܹܝ ܒܢܘܿܢܹ̈ܐ: ܘܪ̈ܵܟܵܒܼܹܐ ܗ݇ܘܵܘ (ܕܥܲܠ ܣܘܼ̈ܣܹܐ) ܩܵܕَܡ ܡܲܠܟܵܐ.
ܘܒܚܲܕ݇ ܠܲܝܠܹܐ ܟܲܕ ܕܡܝܼܟܼܵܐ ܗ݇ܘܵܐ ܫܸܡܥܘܿܢ: ܘܛܸܒܥܝܵܐ ܒܫܸܢܬܵܐ ܝܵܩܘܼܪܬܵܐ: ܦܸܫܠܸܗ ܚܸܙܝܵܐ ܐܸܠܹܗ ܡܲܠܲܐܟܼܵܐ ܒܚܸܠܡܵܐ ܘܐ݇ܡܸܪܹܗ ܐܸܠܹܗ: ܫܸܡܥܘܿܢ: ܫܸܡܥܘܿܢ: ܨܠܵܘܵܬܘܼ̈ܟܼ ܘܐܸܪ̈ܘܵܢܘܼܟܼ ܣܸܠ݇ܩܠܗ݇ܘܿܢ ܐܲܝܟܼ ܕܘܼܟܼܵܪܵܢܵܐ ܩܵܕَܡ ܐܲܠܵܗܵܐ. ܘܗܵܕܟܼܵܐ ܒܲܟܼܬܘܼܟܼ ܒܸܬ ܗܲܨܠܵܐ ܠܘܼܟܼ ܒܪܘܿܢܵܐ ܕܒܘܼܪܟܬܵܐ: ܘܒܸܬ ܩܵܪܸܬ ܫܸܡܹܗ ܙܲܝܥܵܐ. ܘܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ ܠܡܲܠܲܐܟܼܵܐ: ܐܝܼܢܵܐ ܐܵܢܵܐ ܚܲܕ݇ ܐ݇ܢܵܫܵܐ ܣܵܒܼܵܐ ܝ݇ܘܸܢ: ܘܐܵܦ ܒܲܟܼܬܝܼ ܓܘܼܪܬܵܐ ܝ݇ܠܵܗ̇ ܒܫܸܢܹ̈ܐ. ܗܵܝܓܵܐ ܐ݇ܡܸܪܹܗ ܐܸܠܹܗ ܡܲܠܲܐܟܼܵܐ: ܐܵܢܵܐ ܝ݇ܘܸܢ ܡܲܠܲܐܟܼܵܐ ܓܲܒܼܪܝܼܠ (ܓܲܒܼܪܝܼܐܹܝܠ) ܕܒܸܟܠܵܝܵܐ ܝ݇ܘܸܢ ܩܵܕ݇ܡ ܐܲܠܵܗܵܐ: ܘܦܸܫܠܝܼ ܡܫܘܼܕܪܵܐ ܕܐܲܢܹܐ ܡܗܲܡܙܸܡܸܢ ܥܲܡܘܼܟܼ ܘܡܲܫܚܸܕܢܘܼܟܼ: ܣܵܒܵܒ ܢܙܝܼܪܹܗ ܕܐܲܠܵܗܵܐ ܒܸܬ ܗܵܘܹܐ ܝܵܠܵܕَܐ ܡ̣ܢ ܡܲܪܒܿܥܵܐ (ܕܐܸܡܹܗ) ܕܝܸܡܹܗ: ܚܲܡܪܐ ܘܫܲܟܼܪܐ ܠܹܐ ܫܵܬܹܐ: ܘܪܘܼܚܵܐ ܕܩܘܼܕܫܵܐ ܒܸܬ ܦܵܐܸܫ ܡܸܠܝܵܐ: ܟܲܕ ܗ̇ܘ ܒܟܹܪَܣܵܐ ܕܝܸܡܹܗ. ܘܓ̰ܘܼܘܸܒܠܹܗ ܫܸܡܥܘܿܢ ܘܐ݇ܡܸܪܹܗ ܠܡܲܠܲܐܟ݂ܵܐ: ܗܹܐ ܡܵܪܝܼ: ܗܵܘܹܐ ܠܝܼ ܐܲܝܟܼ ܗܵܡܙܸܡܬܘܼܟܼ: ܘܐَܙܸܠܹܗ ܡܲܠܲܐܟ݂ܵܐ ܡ̣ܢ ܠܟܸܣܠܹܗ.
ܘܪܥܸܫܠܹܗ ܫܸܡܥܘܿܢ ܡ̣ܢ ܫܸܢܬܹܗ: ܘܡܥܵܓ̰ܸܒ ܗ݇ܘܵܐ ܒܐܵܗܵܐ ܚܸܙܘܵܐ ܐܲܠܵܗܵܝܵܐ ܕܚܙܹܐܠܹܗ. ܘܗܘܼܩܹܐ ܠܹܗ ܠܒܲܟܼܬܹܗ ܟܠ ܡܸܢܕܝܼ ܕܚܙܹܐܠܹܗ ܒܚܸܠܡܹܗ ܒܠܲܝܠܹܐ: ܘܕܵܐܟܼܝܼ ܡܗܘܼܡܙܡܠܹܗ ܥܲܡܹܗ ܡܲܠܲܐܟܼܵܐ ܘܐ݇ܡܸܪܹܗ ܐܸܠܹܗ. ܘܚܓ̰ܸܠܵܗ̇ ܐܵܦ ܗܹܠܹܢܹܐ ܒܐܲܢܹܐ ܗܹܡܸܙܡܵܢܹ̈ܐ ܕܫܡܸܥܠܵܗ̇: ܘܐ݇ܡܸܪܵܗ̇: ܐܸܢ ܪܸܙܵܝܵܐ ܕܡܵܪܝܵܐ ܝ݇ܠܹܗ: ܒܸܬ ܗܵܘܹܐ.
ܘܐܲܠܵܗܵܐ ܩܵܡ ܒܵܣܡܵܐ ܠܹܗ ܒܝܼܵܗ̇: ܘܒܛܸܢܵܗ̇: ܘܝܘܼܗ݇ܒܼܸܠܹܗ ܐܸܠܘܿܗ̇ ܒܪܘܿܢܵܐ ܒܣܲܝܒܘܼܬܵܗ̇. ܘܛܥܸܢܠܵܗ̇ ܒܥܘܼܒܵܗ̇ ܬܸܫܥܵܐ ܝܲܪ̈ܚܹܐ: ܐܲܝܟܼ ܛܲܟܼܣܵܐ ܕܟܠܲܝܗܝ ܒܲܟܼܬܵܬܹ̈ܐ. ܘܫܸܡܥܘܿܢ ܒܲܪ ܡܵܐܐ ܘܥܸܣܪܝܼ ܫܸܢܹ̈ܐ ܗ݇ܘܵܐ ܟܲܕ ܗܘܼܨܸܠܵܗ̇ ܗܹܠܹܢܹܐ ܠܡܵܪܝ ܙܲܝܥܵܐ: ܘܗܹܠܹܢܹܐ ܝܑܼܗ݇ܘܵܐ ܒܲܪܬَ ܬܸܫܥܝܼ ܘܬܠܵܬܵܐ ܫܸܢܹ̈ܐ. ܘܟܲܕ ܒܛܸܢܵܗ̇ ܘܗܘܼܨܸܠܵܗ̇ ܠܝܵܠܵܕَܐ: ܦܸܫܠܹܗ ܩܸܪܝܵܐ ܫܡܹܗ ܙܲܝܥܵܐ: ܣܵܒܵܒ ܫܹܐܕܹ̈ܐ ܠܝܼ̈ܛܹܐ: ܘܒܢܲܝ̈ܢܵܫܵܐ ܟܵܦܘܿܪܹ̈ܐ: ܘܫܘܼܠܛܵܢܹ̈ܐ ܛܵܠܘܿܡܹ̈ܐ (ܙܵܠܘܿܡܹ̈ܐ) ܡ̣ܢ ܫܸܡܹܗ ܒܸܫܥܵܫܵܐ ܝ݇ܢܵܐ.
ܫܡܲܝܵܐ ܚܕܹܐܠܵܗ̇ ܒܡܵܘܠܵܕܹܗ: ܘܐܲܪܥܵܐ ܦܨܸܚܠܵܗ̇ ܒܝܵܘܡܵܐ ܕܥܡܵܕܹܗ. ܘܐܲܝܟܼ ܗ̇ܝ ܪܘܼܚܵܐ ܕܫܪܹܐܠܵܗ̇ ܥܲܠ (ܐܹܠܝܼܫܒܲܥ) ܝܸܡܹܗ ܕܝܘܿܚܲܢܵܢ (ܡܲܥܡܸܕܵܢܵܐ): ܗܵܕܟܼܵܐ ܫܪܹܐܠܵܗ̇ ܐܵܦ ܥܲܠ ܗܹܠܹܢܹܐ. ܡܸܢܕܝܼ ܠܹܐ ܐܵܟܼܠܵܐ ܗ݇ܘܵܐ: ܐܝܼܢܵܐ ܟܹܐ ܨܵܝܡܵܐ ܗ݇ܘܵܐ ܗܲܠ ܪܲܡܫܵܐ: ܘܒܪܲܡܫܵܐ ܟܹܐ ܐܵܟܼܠܵܐ ܗ݇ܘܵܐ ܚܲܟ̰ܵܐ ܡܹܐܟ݂ܘܿܠܬܵܐ، ܘܟܹܐ ܝܵܗ݇ܒܼܵܐ ܗ݇ܘܼܵܐ ܐܸܪ̈ܘܵܢܹܐ ܠܡܸܣܟܹܢܵܐ: ܘܟܹܐ ܡܪܲܚܡܵܐ ܗ݇ܘܵܐ ܥܲܠ ܝܵܬܘܿܡܹ̈ܐ ܘܥܲܠ ܐܲܪ̈ܡܸܠܝܵܬܹܐ ܘܢܘܼܟܼܪ̈ܵܝܹܐ.
ܘܗܘܹܐ ܠܵܗ̇ ܒܝܵܘܡܵܐ ܕܡܵܘܠܵܕܹܗ ܕܡܵܪܝ ܙܲܝܥܵܐ: ܐܲܪܥܵܐ ܫܥܸܫܠܵܗ̇ ܡ̣ܢ ܠܵܘܓ̰ܹܗ ܒܚܲܝܠܵܐ ܕܡܵܪܹܗ: ܘܟܹܐܦܹ̈ܐ ܨܠܸܦܠܗ݇ܘܿܢ (ܟ̰ܠܸܦܠܗ݇ܘܿܢ). ܬܸܫܒܘܿܚܬܵܐ ܠܚܲܝܠܵܐ ܐܲܠܵܗܵܝܵܐ ܕܝܘܼܗ݇ܒܼܸܠܹܗ ܐܵܗܵܐ ܒܪܘܿܢܵܐ ܕܒܘܼܪ̈ܟܵܬܹ̈ܐ: ܢܘܼܪَܒܼܵܐ ܚܩܝܼܪܵܐ: ܘܛܥܘܼܢܬܵܐ ܒܪܝܼܟܼܬܵܐ: ܘܫܸܟܠܵܐ ܫܲܦܝܼܪܵܐ: ܕܡܘܼܓ̰ܝܸܢܠܗ݇ܘܿܢ ܛܥܘܼܢܝܵܬܘܼ̈ܗܝ ܥܠ ܦܲܐܬܘܵܬܹ̈ܐ ܕܐܲܪܥܵܐ.
ܘܒܝܵܘܡܵܐ ܕܗܘܹܐܠܹܗ ܝܵܠܵܕَܐ: ܫܸܡܥܘܿܢ ܒܵܒܘܼܗܝ ܒܸܦܠܵܚܵܐ ܗ݇ܘܵܐ ܒܚܲܩܠܵܐ: ܘܚܲܕ݇ ܐ݇ܢܵܫܵܐ ܐ݇ܙܸܠܹܗ ܘܪܗܸܛܠܹܗ (ܪܚܸܛܠܹܗ) ܘܡܘܼܫܚܸܕܠܹܗ ܠܫܸܡܥܘܿܢ ܘܐ݇ܡܸܪܹܗ ܐܸܠܹܗ: ܦܸܫܠܹܗ ܗܘܼܨܠܵܐ ܒܪܘܿܢܵܐ ܩܵܐ ܕܝܼܘܿܟܼ؛ ܘܓ̰ܘܼܘܸܒܠܹܗ ܫܸܡܥܘܿܢ ܟܲܕ ܦܨܝܼܚܵܐ ܘܐ݇ܡܸܪܹܗ ܠܗ̇ܘ ܐ݇ܢܵܫܵܐ: ܒܸܬ ܝܵܗ݇ܒܼܸܢܠܘܼܟܼ ܚܲܕ ܟܲܟܪܵܐ ܕܕܲܗܒܼܵܐ: ܒܗ̇ܝ ܕܩܵܡ ܡܲܫܚܸܕܬܠܝܼ. ܘܐ݇ܬܹܐܠܹܗ ܫܸܡܥܘܿܢ ܠܒܲܝܬܹܗ: ܘܚܕܹܐܠܹܗ ܒܝܵܠܵܕ݇ܐ: ܘܩܪܹܐ ܠܹܗ ܠܫܒܼܵܒܼܘܼ̈ܗܝ ܘܠܚܸܙܡܵܢܘܼ̈ܗܝ ܘܠܟܠܹܗ ܐܲܬܪܵܐ ܕܚܵܕܸܪ̈ܘܵܢܘܼܗܝ؛ ܘܥܒܼܸܕܠܹܗ ܡܸܫܬܘܼܬܵܐ ܪܵܒܵܐ ܓܘܼܪܬܵܐ: ܘܦܪܸܡܠܹܗ ܥܸܣܪܵܐ ܬܵܘܪܹ̈ܐ ܛܪ̈ܝܼܣܹܐ: ܘܐܲܪܒܥܝܼ ܒܲܪ̈ܥܵܢܹܐ ܫܲܡܝܼܢܹ̈ܐ. ܘܗܘܹܐܠܵܗ̇ ܚܲܕܘܼܬܵܐ ܓܘܼܪܬܵܐ: ܦܨܸܚܠܗ݇ܘܿܢ ܘܡܘܼܒܣܸܡܠܗ݇ܘܿܢ ܘܥܒܼܕܸܠܗ݇ܘܿܢ ܚܠܘܿܠܵܐ: ܫܲܒܼܥܵܐ ܝܵܘܡܹ̈ܐ ܘܫܲܒܼܥܵܐ ܠܲܝܠܵܘܵܬܹ̈ܐ.
ܘܒܝܵܘܡܵܐ ܕܫܲܒܼܥܵܐ ܦܩܸܕܠܹܗ ܫܸܡܥܘܿܢ ܕܡܲܥܡܸܕܝܼ ܠܝܵܠܵܕَܐ. ܘܥܒܼܸܕܠܹܗ ܟܵܗܢܵܐ ܐܲܝܟܼ ܕܐ݇ܡܸܪܹܗ ܐܸܠܹܗ ܫܸܡܥܘܿܢ: ܘܡܚܹܐܠܹܗ ܢܵܩܘܿܫܵܐ (ܕܥܹܕܬܵܐ)؛ ܘܓ̰ܡܸܥܠܗ݇ܘܿܢ ܟܠܲܝܗܝ ܟܵܗܢܹ̈ܐ ܘܡܫܲܡܫܵܢܹ̈ܐ: ܘܟܠܹܗ ܛܵܝܸܦܵܐ ܕܐܲܬܪܵܐ ܕܡܘܼܠܟܵܢܵܐ: ܕܗܵܘܝܼ ܗ݇ܘܵܘ ܐܲܝܟܼ ܬܪܸܥܣܲܪ ܐܲܠܦܹ̈ܐ ܒܢܲܝ̈ܢܵܫܵܐ ܒܡܸܢܝܵܢܵܐ: ܗܲܠ ܕܠܵܐ ܦܸܫܠܹܗ ܐ݇ܢܵܫܵܐ ܕܠܹܐ ܗ݇ܘܵܐ ܐ݇ܬܝܼܵܐ ܠܬܵܡܵܐ. ܘܟܠܲܝܗܝ ܟܵܗܢܹ̈ܐ ܘܡܫܲܡܫܵܢܹ̈ܐ ܕܥܒܼܸܪܗ݇ܘܿܢ ܠܓܵܘ ܗܲܝܟܠܵܐ: ܗܵܘܝܼ ܗ݇ܘܵܘ ܡܸܢܝܵܢܲܝܗܝ ܚܲܕ݇ ܐܲܠܦܵܐ ܩܲܫܝܼܫܹ̈ܐ ܘܡܫܲܡܫܵܢܹ̈ܐ. ܘܡܒܵܬܲܪ ܕܩܘܼܕܸܫܠܗ݇ܘܿܢ ܩܵܐ ܘܲܙܢܵܐ ܕܥܡܵܕܵܐ: ܡܘܼܬܹܐܠܗ݇ܘܿܢ ܠܝܵܠܵܕ݇ܐ ܕܡܲܥܡܸܕܝܼܠܹܗ. ܘܐ݇ܡܸܪܹܗ ܟܵܗܢܵܐ ܠܝܸܡܹܗ ܗܹܠܹܢܹܐ: ܡܘܿܕܝܼ ܒܸܬ ܩܵܪܝܲܬܝ ܠܹܗ ܫܸܡܹܗ ܕܝܵܠܵܕ݇ܐ؟ ܐܵܡܪܗ̇ ܝܸܡܹܗ ܠܟܵܗܢܵܐ: ܐܲܢ݇ܬ ܒܝܼܕܵܥܝܵܐ ܝ݇ܘܸܬ: ܒܗ̇ܝ ܒܝܵܘܡܵܐ ܕܡܵܘܠܵܕܹܗ: ܐܲܪܥܵܐ ܫܥܸܫܠܵܗ̇ ܡ̣ܢ ܠܵܘܓ̰ܹܗ. ܘܩܪܹܐܠܹܗ ܟܵܗܢܵܐ ܫܸܡܹܗ ܕܝܵܠܵܕَܐ ܙܲܝܥܵܐ. ܗ̇ܘ ܕܒܸܫܥܵܫܵܐ ܝ݇ܢܵܐ ܡܸܢܹܗ ܫܹܐܕܹ̈ܐ ܠܝܼ̈ܛܹܐ: ܘܒܢܲܝ̈ܢܵܫܵܐ ܛܵܠܘܿܡܹ̈ܐ. (ܘܡ̣ܢ ܒܵܬܲܪ) ܕܡܫܸܚܠܹܗ ܒܡܸܫܚܵܐ ܕܡܫܝܼܚܘܼܬܵܐ: ܘܡܘܼܥܡܸܕܠܹܗ ܒܫܸܡܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ. ܡܘܼܬܸܒܼܠܹܗ ܟܠܝܼܠܵܐ ܕܕܲܗܒܼܵܐ ܒܪܹܫܹܗ.
ܘܒܝܵܘܡܵܐ ܕܥܡܵܕܹܗ: ܡ̣ܢ ܕܪܸܫ ܥܒܼܸܕܠܹܗ ܫܸܡܥܘܿܢ ܩܵܐ ܒܪܘܿܢܹܗ ܚܕܵܐ ܡܸܫܬܘܼܬܵܐ ܪܵܒܵܐ ܓܘܼܪܬܵܐ. ܘܡܘܼܬܹܐܠܹܗ ܘܦܪܸܡܠܹܗ ܬܡܵܢܐܝܼ ܦܵܐܪܹ̈ܐ ܘܬܪܸܥܣܲܪ ܬܵܘܪܹ̈ܐ. ܘܥܒܼܸܕܠܗ݇ܘܿܢ ܙܘܼܝܵܚܵܐ ܘܦܨܸܚܠܗ݇ܘܿܢ ܒܐܵܗܵܐ ܚܲܕܘܼܬܵܐ ܓܘܼܪܬܵܐ. ܘܝܘܼܗ݇ܒܼܸܠܹܗ ܫܸܡܥܘܿܢ ܐܲܠܦܵܝܹ̈ܐ ܕܕܝܼܢܵܪܹ̈ܐ ܩܵܐ ܐܵܢܝܼ ܐ݇ܢܵܫܹ̈ܐ ܕܓ̰ܡܸܥܠܗ݇ܘܿܢ ܠܟܸܣܠܹܗ: ܘܒܚܘܼܬܵܡܵܐ ܡܘܼܦܫܸܛܲܝܠܹܗ ܒܫܠܵܡܵܐ: ܘܟܠ ܚܲܕَ ܐَܙܸܠܹܗ ܠܒܲܝܬܹܗ. ܐܝܼܢܵܐ ܝܵܠܵܕَܐ ܓܵܪܘܸܣ ܗ݇ܘܵܐ ܒܩܵܘܡܬܵܐ ܘܒܚܸܟܼܡܬܵܐ ܘܫܵܦܵܩܲܬ ܠܟܸܣ ܐܲܠܵܗܵܐ ܘܒܢܲܝ̈ܢܵܫܵܐ. ܘܟܲܕ ܡܛܹܐܠܹܗ ܠܬܠܵܬܵܐ ܫܸܢܹ̈ܐ: ܡܣܘܿܦܹܐܠܹܗ ܒܵܒܹܗ ܠܝܘܿܚܲܢܵܢ ܡܲܠܦܵܢܵܐ: ܕܡܵܠܸܦܠܹܗ ܘܡܲܩܪܹܐܠܹܗ ܒܟܬܵܒܼܹ̈ܐ ܐܲܠܵܗܵܝܹ̈ܐ: ܘܒܘܼܗܪܸܢܵܗ̇ ܬܲܪܥܝܼܬܵܐ ܕܠܸܒܹܗ ܒܟܬܵܒܼܹ̈ܐ ܩܲܕܝܼܫܹ̈ܐ: ܗܲܠ (ܟܬܵܒܼܹ̈ܐ) ܕܕܝܼܵܬܹܩܹ̈ܐ ܕܥܲܬܝܼܩܬܵܐ ܘܚܕܲܬܵܐ ܡ̣ܢ ܠܸܒܹܗ ܬܵܢܹܐ ܗ݇ܘܵܐ ܠܗ݇ܘܿܢ.
ܘܐܝܼܬ ܗ݇ܘܵܐ ܒܩܕܵܠܹܗ ܕܩܲܕܝܼܫܵܐ ܡܵܪܝ ܙܲܝܥܵܐ ܚܲܕ݇ ܨܠܝܼܒܼܵܐ ܕܕܲܗܒܼܵܐ: ܘܝܘܼܩܪܹܗ ܬܵܩܸܠ ܗ݇ܘܵܐ ܚܲܡܫܝܼ ܡܸܬܩܵܠܹ̈ܐ ܕܡܲܠܟܵܐ: ܘܗܲܡܢܝܼܟܼܵܐ (ܛܵܘܩܵܐ) ܕܐܝܼܬ ܗ݇ܘܵܐ ܒܝܼܹܗ ܝܵܩܘܿܢܕܹ̈ܐ ܘܡܲܪ̈ܓܵܢܝܵܬܹܐ ܬܸܠܝܵܐ ܗ݇ܘܵܐ ܒܩܕܵܠܹܗ.
ܘܟܲܕ ܗܘܹܐܠܹܗ ܓܵܘ ܒܹܝܬ ܐܸܣܟܘܿܠܹܐ (ܡܲܕܪܲܫܬܵܐ) ܕܚܲܡܫܝܼ ܐܸܣܟܘܿܠܵܝܹ̈ܐ ܥܲܡ ܚܲܒܼܪ̈ܵܘܵܬܘܼܗܝ: ܘܡ̣ܢ ܒܵܬܲܪ ܬܠܵܬܵܐ ܝܵܘܡܹ̈ܐ ܕܦܝܵܫܬܹܗ: ܫܘܼܪܹܐܠܹܗ ܒܸܠܝܵܦܵܐ ܣܘܼܟܵܠܵܐ ܘܝܘܼܠܦܵܢܵܐ ܕܟܬܵܒܼܹ̈ܐ ܐܲܠܵܗܵܝܹ̈ܐ. ܘܫܪܹܐܠܵܗ̇ ܥܲܠܘܼܗܝ ܪܘܼܚܵܐ ܕܩܘܼܕܫܵܐ: ܘܟܠ ܝܵܘܡܵܐ ܠܲܩܵܕ݇ܡܵܐ ܐܵܙܸܠ ܗ݇ܘܵܐ: ܘܡܒܘܼܗܪܸܢܵܗ̇ ܓܵܢܹܗ ܒܝܘܼܠܦܵܢܵܐ ܐܲܠܵܗܵܝܵܐ. ܘܥܵܓ̰ܒܝܼ ܗ݇ܘܵܘ ܒܝܼܹܗ ܚܲܒܼܪ̈ܵܘܵܬܘܼܗܝ ܕܵܐܟܼܝ ܝܵܠܸܦ ܗَܘܵܐ: ܘܕܠܲܝܬ ܗ݇ܘܵܐ ܐܲܝܟܼ ܕܝܼܹܗ ܒܟܠܲܝܗܝ ܐܲܣܟܘܿܠܵܝܹ̈ܐ: ܡ̣ܢ ܫܵܦܵܩܲܬ ܐܲܠܵܗܲܝܬܵܐ ܕܫܪܹܐܠܵܗ̇ ܒܝܼܹܗ. ܗܵܝܓܵܐ ܡܒܘܼܗܪܸܢܹܗ ܗܵܘܢܹܗ ܘܚܝܼܵܠܹܗ ܘܚܘܼܫܵܒܼܹܗ: ܘܩܘܼܕܸܫܠܹܗ ܠܦܲܓܼܪܹܗ ܒܨܵܘܡܵܐ ܘܒܨܠܘܿܬܵܐ ܘܒܝܲܕ ܢܙܝܼܪܘܼܬܵܐ ܘܕܲܟܼܝܘܼܬܵܐ ܕܓܵܢܵܐ. ܘܒܟܠܹܗ ܠܲܝܠܹܐ ܠܹܐ ܢܵܐܸܡ (ܢܵܝܸܡ) ܗ݇ܘܵܐ: ܗܲܠ ܙܪܵܩܵܐ ܕܝܵܘܡܵܐ.
ܘܒܨܲܦܪܵܐ ܐܝܼܡܵܢ ܕܐܵܬܹܐ ܗ݇ܘܵܐ ܠܟܸܣ ܚܲܒܼܪ̈ܵܘܵܬܘܼܗܝ: ܟܹܐ ܚܵܙܝܼ ܗ݇ܘܵܘ ܠܥܲܝܢܘܼ̈ܗܝ ܕܡܲܓ̰ܪܘܿܝܹܐ ܝ݇ܢܵܐ ܕܸܡܥܹ̈ܐ ܘܐܵܡܪܝܼ ܗ݇ܘܵܘ: ܩܵܡܘܿ ܥܲܝ̈ܢܘܼܟܼ ܕܸܡܥܹ̈ܐ ܡܲܓ̰ܪ̈ܘܼܝܹܐ ܝ݇ܢܵܐ؛ ܘܐܵܡܸܪ ܗ݇ܘܵܐ ܐܸܠܵܝܗܝ: ܡ̣ܢ ܚܲܝܠܵܐ ܕܡܲܪܥܵܐ ܕܐܝܼܬ ܒܪܹܫܝܼ. ܘܡܒܲܗܪܸܢ ܗ݇ܘܵܐ ܦܲܪܨܘܿܦܹܗ ܐܲܝܟܼ ܦܲܪܨܘܿܦܵܐ ܕܡܲܠܲܐܟܼܵܐ. ܘܩܘܼܘܸܠܹܗ ܥܲܡ ܓܵܢܹܗ: ܕܠܹܐ ܛܵܥܸܡ ܡܸܢܕܝܼ ܗܲܠ ܪܲܡܫܵܐ: ܐܝܼܢܵܐ ܐܲܒܼܵܗܘܼ̈ܗܝ ܠܹܐ ܗ݇ܘܵܘ ܪ̈ܓܼܝܼܫܹܐ (ܪ̈ܥܝܼܫܹܐ) ܒܝܼܹܗ: ܕܡܘܿܕܝܼ ܒܸܥܒܼܵܕܵܐ ܗَܘܵܐ.
ܘܟܲܕ ܚܙܹܐܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܕܐܵܗܵܐ ܥܵܠܡܵܐ ܥܵܒܼܘܿܪܵܐ ܝ݇ܠܹܗ: ܘܐܵܦ ܫܲܗܘܸܬܝܵܬܹ̈ܗ ܒܲܛܝܼ̈ܠܹܐ ܝ݇ܢܵܐ: ܘܠܲܝܬ ܡܸܢܕܝܼ ܕܡܥܲܪܩܸܠ ܫܒܼܘܿܩ ܡ̣ܢ ܫܪܵܪܵܐ ܘܟܹܐܢܘܼܬܵܐ: ܗܵܕܟܼܵܐ ܟܠܲܝܗܝ ܫܵܒܼ̈ܘܿܥܹܐ ܒܨܵܘܡܵܐ ܡܘܼܥܒܼܸܪܠܹܗ: ܡ̣ܢ ܚܲܕܒܫܲܒܵܐ ܠܚܲܕܒܫܲܒܵܐ ܐܲܚܟ̰ܝܼ ܚܕܵܐ ܓܸܪܕܲܝܵܐ ܕܠܲܚܡܵܐ ܫܚܝܼܡܵܐ ܐܵܟܼܸܠ ܗ݇ܘܵܐ: ܘܡܝܼܵܐ ܩܲܪܝܼܪܹ̈ܐ ܠܵܐ ܫܬܹܐܠܹܗ ܒܚܲܝܘܼܗܝ: ܐܸܠܵܐ ܫܵܬܹܐ ܗ݇ܘܼܵܐ ܡܝܼܵܐ ܫܵܚܝܼܢܹ̈ܐ ܕܡ̣ܢ ܓܘܼܪܢܵܐ ܕܢܩܝܼܪܬܵܐ ܗ݇ܘܵܐ ܓܵܘ ܟܹܐܦܵܐ.
ܘܟܲܕ ܗܘܹܐܠܹܗ ܬܲܪܬܹܝ ܫܸܢܹ̈ܐ ܒܐܸܣܟܘܿܠܹܐ ܘܪܵܒܵܐ ܝ݇ܠܸܦܠܹܗ: ܐ݇ܡܸܪܹܗ ܠܡܲܠܦܵܢܵܐ: ܡܵܪܝܼ ܡܲܠܝܵܢܵܐ ܝ݇ܠܹܗ ܩܵܬܝܼ ܐܵܗܵܐ ܝܘܼܠܦܵܢܵܐ: ܘܒܵܥܝܸܢ ܕܐܵܙܸܠ݇ܢ. ܘܐ݇ܡܸܪܹܗ ܡܲܠܦܵܢܵܐ: ܒܪܘܿܢܝܼ ܙܲܝܥܵܐ: ܙܹܠ ܒܫܠܵܡܵܐ: ܡܵܪܝܵܐ ܗܵܘܹܐ (ܢܵܛܘܿܪܵܐ) ܒܐܘܼܪ̈ܚܵܬܘܼܟܼ. ܘܐ݇ܙܸܠܹܗ ܠܟܸܣ ܐܲܒܼܵܗܘܼ̈ܗܝ.
ܘܟܠܝܘܿܡ ܝܵܬܸܒܼ ܗ݇ܘܵܐ ܘܩܵܪܹܐ ܗ݇ܘܵܐ ܒܐܹܘܲܢܓܵܠܝܼܘܿܢ ܕܡܵܪܲܢ: ܘܚܙܹܐܠܹܗ ܕܵܐܟܼܝܼ ܕܐَܡܸܪܹܗ ܡܵܪܲܢ: ܕܟܠ ܕܠܵܐ ܫܵܒܼܸܩ ܒܵܒܹܗ ܘܝܸܡܹܗ ܘܐܲܚܘܼܢܘܵܬܘܼܗ̈ܝ ܘܚܵܬܘܵܬܹ̈ܗ: ܠܹܐ ܡܵܨܹܐ ܕܗܵܘܹܐ ܐܸܠܝܼ ܬܲܠܡܝܼܕܵܐ: (ܠܘܿܩܵܐ ܝܕ: 26) ܘܥܘܼܓ̰ܸܒܠܹܗ ܒܐܵܗܵܐ ܬܹܐܘܿܪܝܼܝܵܐ (ܚܝܼܵܠ) ܠܵܐ ܓܘܼܫܡܵܢܵܝܬܵܐ. ܘܗܘܹܐܠܵܗ̇ ܚܝܼܵܠ ܒܠܸܒܹܗ ܕܐܵܙܸܠ ܠܐܘܿܪܸܫܠܸܡ: ܘܕܦܵܐܸܫ ܡܒܘܼܪܟܼܵܐ ܡ̣ܢ ܩܲܒܼܪܹܗ ܕܡܵܪܲܢ: ܘܡ̣ܢ ܕܘܼܟܝܵܬܹ̈ܐ ܩܲܕܝܼܫܹ̈ܐ ܕܓܵܘ ܛܘܼܪܹ̈ܐ ܕܙܲܝܬܹ̈ܐ.
ܘܬܦܸܩܠܹܗ ܠܟܸܣܠܹܗ ܚܼܲܕ݇ ܐ݇ܢܵܫܵܐ ܕܫܸܡܹܗ ܫܲܡܠܝܼ: ܕܒܹܐܙܵܠܵܐ ܗ݇ܘܵܐ ܠܐܘܿܪܸܫܠܸܡ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܕܐܵܦ ܐܵܢܵܐ ܒܸܬ ܐܵܙܸܠ݇ܢ ܥܲܡܘܼܟܼ: ܘܒܸܬ ܗܵܘܸܢ ܐܸܠܘܼܟܼ ܬܲܠܡܝܼܕܵܐ. ܘܐ݇ܡܸܪܹܗ ܐܸܠܹܗ ܫܲܡܠܝܼ: ܬܵܐ ܒܫܠܵܡܵܐ, ܐܝܼܢܵܐ ܐܸܢ ܐܲܒܼܵܗܘܼ̈ܟܼ ܠܵܐ ܫܵܒܼܩܝܼ: ܡܘܿܕܝܼ ܒܸܬ ܥܵܒܼܕܸܬ؟
ܗܵܝܓܵܐ ܐ݇ܬܹܐܠܹܗ ܡܵܪܝ ܙܲܝܥܵܐ ܘܐ݇ܡܸܪܹܗ ܠܒܵܒܘܼܗܝ ܘܠܝܸܡܹܗ ܕܒܵܥܝܸܢ ܕܐܵܙܸܠ݇ܢ ܠܐܘܿܪܸܫܠܸܡ: ܘܒܸܬ ܗܵܘܸܢ ܝܼܚܝܼܕܵܝܵܐ: ܘܐܸܢ ܗܵܘܝܵܐ ܕܠܵܐ ܫܵܒܼܩܝܼܬܘܿܢ ܠܝܼ: ܬܘܼܥܠܝܼ ܡܸܢܵܘܟܼܘܿܢ ܒܸܬ ܛܵܠܸܒܠܵܗ̇ ܡܫܝܼܚܵܐ. ܘܢܦܸܠܗ݇ܘܿܢ ܐܒܼܵܗܘܼ̈ܗܝ: ܒܵܒܹܗ ܘܝܸܡܹܗ ܩܵܕ݇ܡܘܼܗܝ ܟܲܕ ܒܸܒܟܼܵܝܵܐ ܒܡܲܪܝܼܪܘܼܬܵܐ ܘܒܦܵܫܲܡܬܵܐ: ܘܓ̰ܘܼܘܸܒܠܗ݇ܘܿܢ ܘܐ݇ܡܸܪܗ݇ܘܿܢ ܐܸܠܹܗ: ܐܵܗܵܐ ܡ̣ܢ ܠܟܸܣ ܡܵܪܝܵܐ ܗܘܹܐܠܵܗ̇: ܘܗܵܐ ܩܵܐ ܐܲܒܼܵܗܘܼ̈ܟܼ ܒܸܣܢܵܝܵܐ ܝ݇ܘܸܬ: ܘܩܵܐ ܡܵܪܝܵܐ ܡܲܚܘܿܒܹܐ ܝ݇ܘܸܬ, ܙܹܠ ܠܘܼܟܼ ܒܫܠܵܡܵܐ: ܘܡܵܪܲܢ ܗܵܘܹܐ ܥܲܡܘܼܟܼ: ܘܫܲܗܘܸܬܬܹܗ (ܡܲܛܠܵܒܹܗ) ܕܠܸܒܘܼܟܼ ܡܬܲܡܸܡ.
ܘܩܸܡܠܹܗ ܒܨܲܦܪܵܐ ܕܐܵܙܸܠ ܥܲܡ ܫܲܡܠܝܼ ܝܼܚܝܼܕܵܝܵܐ. ܘܐܵܦ ܫܸܡܥܘܿܢ ܒܵܒܹܗ ܩܸܡܠܹܗ ܘܝܘܼܗَܒܼܸܠܹܗ ܠܒܪܘܿܢܹܗ ܡܵܪܝ ܙܲܝܥܵܐ ܬܪܹܝܡܵܐܐ ܟܲܲܟܪܹ̈ܐ ܕܕܲܗܒܼܵܐ: ܘܚܲܡܫܝܼ ܙܵܘ̈ܓܹܐ ܠܒܼܝܼܫܝܵܬܹ̈ܐ: ܕܗܵܘܝܼ ܠܣܢܝܼܩܘܼܬܹܗ. ܘܩܸܡܠܹܗ ܩܲܕܝܼܫܵܐ ܘܐ݇ܡܸܪܹܗ ܠܒܵܒܹܗ ܫܸܡܥܘܿܢ ܘܩܵܐ ܝܸܡܹܗ ܗܹܠܹܢܹܐ: ܦܘܼܫܘܼܢ ܒܫܠܵܡܵܐ. ܘܓ̰ܘܼܘܸܒܠܗ݇ܘܿܢ ܘܐܵܡܪܝܼ ܐܸܠܹܗ: ܐܵܙܵܠ݇ܚ ܚܲܕ݇ ܡܝܼܠܵܐ ܥܲܡܘܼܟܼ. ܘܡܘܼܡܹܐܠܹܗ ܐܸܠܲܝܗܝ ܒܗܹܡܸܙܡܲܢ ܚܲܝܬܵܐ: ܕܠܵܐ ܦܵܠܛܝܼ ܠܒܲܕܲܪ ܡ̣ܢ ܬܲܪܥܵܐ ܕܕܵܪܬܵܐ. ܘܥܦܸܩܠܗ݇ܘܿܢ (ܘܚܦܸܩܠܗ݇ܘܿܢ) ܘܢܫܸܩܠܗ݇ܘܿܢ ܚܘܼܒܵܢܵܐܝܼܬ ܒܝܲܕ ܒܸܟܼܝܵܐ ܘܒܦܵܫܲܡܬܵܐ ܘܐ݇ܡܸܪܗ݇ܘܿܢ ܐܸܠܹܗ: ܙܹܠ ܒܫܠܵܡܵܐ: ܘܡܫܝܼܚܵܐ ܗ̇ܘ ܕܩܵܡ ܦܪܸܫܠܘܼܟܼ ܡܸܢܲܢ ܗ̇ܘ ܗܵܘܹܐ ܥܲܡܘܼܟܼ. ܘܐ݇ܙܸܠܹܗ ܡ̣ܢ ܠܟܸܣܠܲܝܗܝ ܒܚܲܕܘܼܬܵܐ ܘܒܦܵܫܲܡܬܵܐ ܥܲܡ ܗ̇ܘ ܝܼܚܝܼܕܵܝܵܐ. ܘܝܑܼܗ݇ܘܵܐ ܡܵܪܝ ܙܲܝܥܵܐ ܒܲܪ ܫܬܵܐ ܫܸܢܹ̈ܐ: ܟܲܕ ܦܠܸܛܠܹܗ ܡ̣ܢ ܒܹܝܬ ܐܲܒܼܵܗܘܼ̈ܗܝ: ܘܐ݇ܙܸܠܹܗ ܥܲܡ ܗ̇ܘ ܝܼܚܝܼܕܵܝܵܐ ܠܐܘܿܪܸܫܠܸܡ.
ܘܥܘܼܓ̰ܸܒܠܗ݇ܘܿܢ ܒܝܘܼܠܦܵܢܹܗ ܟܵܗܢܹ̈ܐ ܘܡܫܲܡܫܵܢܹ̈ܐ ܕܐܘܿܪܸܫܠܸܡ: ܘܫܵܦܵܩܲܬ ܐܲܠܵܗܵܝܬܵܐ ܙܵܪܩܵܐ ܗ݇ܘܵܐ ܥܲܠ ܦܲܪܨܘܿܦܹܗ: ܘܡܠܲܓ̰ܠܸܓ̰ ܗ݇ܘܵܐ ܒܟܠܲܝܗܝ ܫܘܼܦܪܹ̈ܐ ܐܲܠܵܗܵܝܹ̈ܐ. ܘܦܸܫܠܹܗ ܣܝܼܡܵܐ ܡ̣ܢ ܐܝܼܕܵܬܹ̈ܐ ܕܐܲܦܸܣܩܘܿܦܵܐ ܟܵܗܢܵܐ ܒܓܵܘ ܗܲܝܟܠܵܐ ܕܐܘܿܪܸܫܠܸܡ: ܘܩܘܼܒܸܠܹܗ ܕܲܪܓܼܵܐ ܕܟܵܗܢܘܼܬܵܐ ܒܚܲܕܘܼܬܵܐ. ܘܡ̣ܢ ܒܵܬܲܪ ܕܗܘܹܐܠܹܗ ܬܵܡܵܐ ܬܠܵܬܵܐ ܝܵܘܡܹ̈ܐ: ܐ݇ܬܹܐܠܹܗ ܡܲܠܲܐܟܼܹܗ ܕܡܵܪܝܵܐ: ܘܫܩܸܠܹܗ ܡ̣ܢ ܠܟܸܣܠܲܝܗܝ ܘܠܘܼܒܸܠܹܗ ܠܒܲܪܝܼܵܐ (ܟܲܕ ܝܑܼܗ݇ܘܵܐ) ܒܲܪ ܥܸܣܪܝܼ ܘܫܲܒܼܥܵܐ ܫܸܢܹ̈ܐ.
ܘܐ݇ܙܸܠܹܗ ܡܲܠܲܐܟܼܵܐ ܠܟܸܣ ܥܸܙܵܐ ܕܛܘܼܪܵܐ: ܘܕܒܼܝܼܩܵܐܠܹܗ ܒܐܝܼܕܹܗ ܘܡܘܼܬܝܵܠܹܗ ܠܟܸܣ ܩܲܕܝܼܫܵܐ ܡܵܪܝ ܙܲܝܥܵܐ. ܘܬܘܼܪܣܹܐܠܵܗ̇ ܒܡܲܕܒܪܵܐ ܬܪܸܥܣܲܪ ܫܸܢܹ̈ܐ: ܘܙܸܠܵܗ̇ ܡ̣ܢ ܠܟܸܣܠܹܗ ܥܸܙܵܐ (ܘܚܝܹܐܠܵܗ̇ ܩܘܼܪܒܵܐ) ܒܛܘܼܪܵܐ.
ܘܗܘܹܐܠܵܗ̇ ܒܚܲܕ݇ ܡ̣ܢ ܝܵܘܡܹ̈ܐ ܐ݇ܬܹܐܠܹܗ ܚܲܕَ ܓܲܒܼܪܵܐ ܒܸܥܒܼܵܕܵܐ ܨܲܝܕܵܐ: ܕܫܸܡܹܗ ܬܵܒܼܘܿܪ ܒܪܘܿܢܵܐ ܕܡܲܠܟܵܐ ܦܵܪܵܣ. ܘܚܙܹܐܠܹܗ ܠܥܸܙܵܐ ܘܐ݇ܡܸܪܹܗ ܠܚܲܒܼܪ̈ܵܘܵܬܘܼܗܝ: ܗܵܐ ܚܕܵܐ ܥܸܙܵܐ؛ ܐܲܠܵܗܵܐ ܝܘܼܗ݇ܒܼܵܐܠܹܗ ܐܸܠܲܢ. ܘܡܬܸܚܠܹܗ ܓܹܐܪܵܐ ܠܸܡܚܵܝܘܿܗ̇ ܠܥܸܙܵܐ: ܘܟܠܹܐܠܹܗ ܡܵܪܝ ܙܲܝܥܵܐ ܩܲܕܝܼܫܵܐ ܘܕܒܼܸܩܠܹܗ ܘܐَܡܸܪܹܗ: ܠܲܝܬ ܠܘܼܟܼ ܫܘܼܠܛܵܢܵܐ ܕܥܵܒܼܕܸܬ ܐܵܗܵܐ ܣܘܼܥܕܵܢܵܐ. ܘܫܥܸܫܠܹܗ ܘܙܕܸܥܠܹܗ ܡ̣ܢ ܠܵܘܓ̰ܹܗ: ܘܢܦܸܠܹܗ ܓܹܐܪܵܐ ܡ̣ܢ ܐܝܼܕܵܬܘܼ̈ܗܝ: ܘܝ݇ܕܸܥܠܹܗ ܬܵܒܼܘܿܪ ܒܓܵܢܹܗ ܕܐܵܗܵܐ ܐ݇ܢܵܫܵܐ ܕܐܲܠܵܗܵܐ ܗ݇ܘܵܐ.
ܘܐ݇ܡܸܪܹܗ ܐܸܠܹܗ ܬܵܒܼܘܿܪ: ܒܐܲܠܵܗܵܐ ܡܵܘܡܘܼܝܘܼܟܼ ܝ݇ܘܸܢ؛ ܕܡܵܢܝܼ ܝ݇ܘܸܬ؟ ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܪܝܼܓܵܐ ܝ݇ܘܸܢ ܕܝܼܫܘܿܥ ܡܫܝܼܚܵܐ. ܘܐ݇ܡܸܪܹܗ ܐܸܠܹܗ ܬܵܒܼܘܿܪ: ܘܡܵܢܝܼ ܝ݇ܠܹܗ ܡܫܝܼܚܵܐ؟ ܐ݇ܡܸܪܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܡܫܝܼܚܵܐ ܝܑܼܠܹܗ ܐܲܠܵܗܵܐ ܕܥܲܠ ܟܠ: ܗ̇ܘ ܕܒܪܹܐܠܹܗ ܫܡܲܝܵܐ ܘܐܲܪܥܵܐ: ܘܛܘܼܪܹ̈ܐ ܘܪ̈ܘܼܡܝܵܬܹܐ: ܘܝܵܡܵܬܹ̈ܐ ܘܢܲܗܪ̈ܵܘܵܬܹܐ: ܘܦܵܪ̈ܲܚܬܵܐ ܘܛܲܝܪܹ̈ܐ ܘܩܸܢܝܵܢܹ̈ܐ ܘܗܲܝܘܵܢܹ̈ܐ ܘܟܠܹܗ ܪܸ̈ܓ̰ܒܵܐ ܕܪܵܚܸܫ ܥܲܠ ܐܲܪܥܵܐ. ܘܐܲܠܵܗܵܐ ܐ݇ܚܪܹܢܵܐ ܠܲܝܬ: ܐܝܼܢܵܐ ܚܲܕ݇ ܝܼܠܹܗ: ܘܐܸܠܸܗ ܒܢܲܦ̮ܫܘܼܗܝ. ܐܵܡܸܪ ܬܵܒܼܘܿܪ ܠܡܵܪܝ ܙܲܝܥܵܐ ܩܲܕܝܼܫܵܐ: ܐܵܢܵܐ ܟܹܐ ܣܵܓܼܕܸܢ ܠܚܲܕ݇ ܩܲܝܣܵܐ (ܡܦܘܼܨܠܵܐ) ܒܕܵܡܵܝܬܵܐ ܕܬܵܘܪܵܐ ܕܩܪܝܼܡܵܐ ܝ݇ܠܹܗ ܒܕܲܗܒܼܵܐ: ܘܦܝܵܫܵܐ ܝ݇ܠܹܗ ܩܸܪܝܵܐ ܐܲܪܛܹܡܝܼܣ ܓܘܼܪܵܐ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܩܵܐ ܬܵܒܼܘܿܪ: ܐܵܢܵܐ ܒܸܬ ܐܵܙܸܠ݇ܢ ܥܲܡܘܼܟܼ: ܘܚܵܙܸܢ ܠܗ̇ܘ ܐܲܠܵܗܘܼܟܼ ܕܒܹܐܡܵܪܵܐ ܝ݇ܘܸܬ. ܘܐ݇ܡܸܪܹܗ ܬܵܒܼܘܿܪ ܬܵܐ ܒܵܬ݇ܪܝܼ.
ܘܐ݇ܙܸܠܹܗ ܩܲܕܝܼܫܵܐ ܒܵܬ݇ܪܹܗ: ܘܥܒܼܸܪܹܗ ܠܡܕܝܼܢ݇ܬܵܐ: ܘܚܙܹܐܠܹܗ ܚܲܕ݇ ܐ݇ܢܵܫܵܐ ܕܬܵܪܘܿܨܹܐ ܗ݇ܘܵܐ ܐܲܠܵܗܹ̈ܐ ܕܩܲܝܣܵܐ. ܘܐ݇ܡܸܪܹܗ ܐܸܠܹܗ: ܡܘܿܕܝܼ ܝ݇ܢܵܐ ܐܲܢܹܐ؟ ܐ݇ܡܸܪܹܗ ܗ̇ܘ ܨܲܝܵܪܵܐ ܐܲܢܹܐ ܐܲܠܵܗܹ̈ܐ ܝ݇ܢܵܐ ܕܡܲܠܟܵܐ ܦܵܪܵܣ. ܘܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܘܪܫܸܡܠܹܗ ܨܠܝܼܒܼܵܐ ܥܠܲܝܗܝ: ܘܢܦܸܠܗ݇ܘܿܢ ܟܠܲܝܗܝ ܡ̣ܢ ܕܘܼܟܝܵܬܲܝ̈ܗܝ: ܘܗܘܹܐܠܗ݇ܘܿܢ ܐܲܝܟܼ ܥܲܦܪܵܐ. ܘܚܙܹܐܠܹܗ ܗ̇ܘ ܨܝܲܵܪܵܐ ܕܗܵܕܟܼܵܐ ܥܒܼܸܕܠܹܗ ܩܲܕܝܼܫܵܐ ܘܐ݇ܙܸܠܹܗ ܠܟܸܣ ܡܲܠܟܵܐ: ܘܟ̰ܪܸܬܠܹܗ ܠܓ̰ܘܼܠܘܼ̈ܗܝ ܘܐ݇ܡܸܪܹܗ ܐܸܠܹܗ: ܕܗܵܐ ܚܲܕ݇ ܓܲܒܼܪܵܐ ܐ݇ܬܹܐܠܹܗ ܠܟܸܣܠܲܢ: ܘܩܛܸܠܹܗ ܠܟܠܲܝܗܝ ܐܲܠܵܗܹ̈ܐ ܕܡܲܠܟܵܐ. ܐܵܡܸܪ ܐܸܠܹܗ ܡܲܠܟܵܐ: ܙܹܠ ܘܐ݇ܡܘܿܪ ܐܠܹܗ ܕܐܵܬܹܐ ܠܟܸܣܠܝܼ.
ܘܐ݇ܬܹܐܠܹܗ ܗ̇ܘ ܓܲܒܼܪܵܐ ܨܲܝܵܪܵܐ ܘܐ݇ܡܸܪܹܗ ܠܩܲܕܝܼܫܵܐ ܡܵܪܝ ܙܲܝܥܵܐ: ܕܡܲܠܟܵܐ ܒܸܩܪܝܵܘܼܟܼ ܝܑܼܠܹܗ. ܘܗܵܝܓܵܐ ܩܸܡܠܹܗ ܘܐ݇ܙܸܠܹܗ ܥܲܡ ܗ̇ܘ ܓܲܒܼܪܵܐ: ܘܥܒܼܸܪܹܗ ܩܵܕ݇ܡ ܡܲܠܟܵܐ: ܘܝܘܼܗ݇ܒܼܸܠܹܗ ܫܠܵܡܵܐ ܠܡܲܠܟܵܐ ܘܲܠܟܠܲܝܗܝ ܕܚܵܕܸܪ̈ܘܵܢܘܼܗܝ.
ܘܚܸܪܹܗ ܒܝܹܗ ܡܲܠܟܵܐ: ܘܫܥܸܫܠܹܗ ܡ̣ܢ ܠܵܘܓ̰ܹܗ. ܘܐ݇ܡܸܪܹܗ ܐܸܠܹܗ: ܡ̣ܢ ܐܲܝܟܵܐ ܝ݇ܘܸܬ؛ ܘܠܐܲܝܟܵܐ ܒܹܐܙܵܠܵܐ ܝَܘܸܬ؟ ܘܩܵܐ ܡܵܢܝܼ ܒܣܓܼܵܕܵܐ ܝَܘܸܬ؟ ܐَܡܸܪܸܗ ܩܲܕܝܼܫܵܐ: ܡ̣ܢ ܐܲܪܥܵܐ ܕܡܘܼܠܟܵܢܵܐ ܝ݇ܘܸܢ: ܘܒܹܐܙܵܠܵܐ ܝ݇ܘܸܢ ܠܐܲܬܪܵܐ ܕܕܵܣܵܢ ܥܸܠܵܝܬܵܐ ܠܸܥܡܵܪܵܐ ܬܵܡܵܐ. ܘܐ݇ܡܸܪܹܗ ܐܸܠܹܗ: ܠܡܵܢܝܼ ܒܸܣܓܼܵܕܵܐ ܝ݇ܘܸܬ؛ ܘܐ݇ܡܸܪܹܗ ܐܸܠܹܗ ܡܵܪܝ ܙܲܝܥܵܐ: ܒܸܣܓܼܵܕܵܐ ܝ݇ܘܸܢ ܩܵܐ ܡܫܝܼܚܵܐ ܗ̇ܘ ܕܡܚܹܐܠܗ݇ܘܿܢ ܝܗ݇ܘܼܕܵܝܹ̈ܐ ܥܲܠ ܙܩܝܼܦܵܐ ܒܐܘܿܪܸܫܠܸܡ: ܘܒܝܲܕ ܫܸܡܹܗ ܡܝܼܬܹ̈ܐ ܒܸܩܝܵܡܵܐ ܝ݇ܢܵܐ.
ܘܒܗ̇ܝ ܣܵܥܲܬ ܡܝܼܬ ܗ݇ܘܵܐ ܠܹܗ ܒܪܘܿܢܹܗ ܕܡܲܠܟܵܐ: ܘܛܥܸܢܠܗ݇ܘܿܢ ܘܡܘܼܬܹܐܠܗ݇ܘܿܢ ܠܟܸܣ ܩܲܕܝܼܫܵܐ. ܘܐ݇ܡܸܪܹܗ ܐܸܠܹܗ ܡܲܠܟܵܐ: ܐܸܢ ܡܢܲܚܡܸܬܠܹܗ ܐܵܗܵܐ ܝܵܠܵܕَܐ: ܟܠܲܢ ܒܸܬ ܡܗܲܝܡܸܢܲܚ ܒܐܲܠܵܗܘܼܟܼ.
ܘܗܵܝܓܵܐ ܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܘܟܸܦܠܹܗ ܘܒܪܸܟܠܹܗ ܒܝܲܕ ܨܠܘܿܬܵܐ ܘܨܘܿܠܹܐܠܹܗ. ܘܡܘܼܪܸܡܠܹܗ ܥܲܝܢܘܼ̈ܗܝ ܠܲܫܡܲܝܵܐ ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܗ̇ܘ ܒܡܸܨܥܵܝܘܼܬܵܐ ܕܚܲܝܠܹܗ ܡܝܼ̈ܬܹܐ ܒܸܩܝܵܡܵܐ ܝ݇ܢܵܐ: ܡܢܵܚܸܡ ܠܐܵܗܵܐ ܪܝܼܓܘܼܟܼ: ܕܚܵܙܝܼ ܟܵܦܘܼܪܹ̈ܐ ܘܡܗܲܝܡܸܢܝܼ ܒܝܼܘܼܟܼ: ܕܐܲܢَܬ ܝܼܘܸܬ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܲܝܵܐ. ܘܒܗ̇ܝ ܣܵܥܲܬ ܩܸܡܠܹܗ ܝܵܠܵܕَܐ ܥܲܠ ܐܲܩܠܵܬܘܼ̈ܗܝ: ܘܚܙܹܐܠܗ݇ܘܿܢ ܟܠܲܝܗܝ ܒܢܲܝ̈ ܡܕܝܼܢ݇ܬܵܐ ܡܸܢܕܝܼ ܕܥܒܼܸܕܠܹܗ: ܘܡܘܼܩܘܸܚܠܗ݇ܘܿܢ ܟܠܲܝܗܝ ܒܚܲܕ݇ ܩܵܠܵܐ ܘܐ݇ܡܸܪܗ݇ܘܿܢ: ܫܘܼܒܼܚܵܐ ܩܵܐ ܡܫܝܼܚܵܐ ܐܲܠܵܗܹܗ ܕܙܲܝܥܵܐ: ܒܝܲܕ ܩܪܵܝܬܵܐ ܕܫܸܡܹܗ ܡܝܼܬܹ̈ܐ ܒܸܩܝܵܡܵܐ ܝ݇ܢܵܐ.
ܘܐܝܼܬ ܗ݇ܘܵܐ ܒܗ̇ܝ ܡܕܝܼܢَܬܵܐ ܥܸܣܪܝܼ ܘܬܠܵܬܵܐ ܐ݇ܢܵܫܹ̈ܐ: ܕܢܦܝܼܠܹܐ ܗ݇ܘܵܘ ܒܡܲܪܥܵܐ ܡ̣ܢ ܡܲܥܒܕܵܢܘܼܬܵܐ ܕܣܵܛܵܢܵܐ: ܘܡܘܼܬܹܐܠܗ݇ܘܿܢ ܐܸܠܹܗ ܠܟܸܣ ܩܲܕܝܼܫܵܐ. ܗܵܝܓܵܐ ܩܸܡܠܹܗ ܩܲܕܝܼܫܵܐ: ܘܦܘܼܫܸܛܠܹܗ ܐܝܼܕܵܬܘܼ̈ܗܝ ܠܫܡܲܝܵܐ ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܗ݁ܘ ܕܦܘܼܠܸܛܠܹܗ ܠܸܓܼܝܘܿܢ ܡ̣ܢ ܗܵܘ ܕܒܸܥܡܵܪܵܐ ܗ݇ܘܵܐ ܓܵܘ ܒܹܝܬܼ ܩܒܼܘܼܪܹ̈ܐ: ܒܵܣܸܡ ܠܗ݇ܘܿܢ ܠܐܲܢܹܐ ܪ̈ܝܼܓܵܘܵܬܘܼܟܼ: ܘܕܵܟܼܹܐܠܗ݇ܘܿܢ ܡ̣ܢ ܐܘܼܠܨܵܢܵܐ ܕܫܹܐܕܵܐ ܡܵܪܘܼܕܵܐ؛ ܕܚܵܙܝܼ ܟܵܦܘܿܪܹ̈ܐ ܘܡܗܲܝܡܸܢܝܼ ܒܝܼܘܼܟܼ.
ܘܒܗ̇ܝ ܣܵܥܲܬ ܩܸܡܠܗ݇ܘܿܢ ܟܠܲܝܗܝ ܥܲܠ ܐܲܩܠܵܬܵܝ̈ܗܝ: ܘܦܸܫܠܗ݇ܘܿܢ ܒܣܝܼ̈ܡܹܐ ܡ̣ܢ ܡܲܪ̈ܥܵܝܗܝ. ܘܟܲܕ ܚܙܹܐܠܗ݇ܘܿܢ ܒܢܲܝ̈ ܡܕܝܼܢ݇ܬܵܐ ܠܐܵܗܵܐ ܥܵܓ̰ܝܼܒܘܼܬܵܐ ܕܥܒܼܸܕܠܹܗ ܐܵܗܵܐ ܩܲܕܝܼܫܵܐ: ܘܗܘܼܝܡܸܢܠܹܗ ܬܵܒܼܘܿܪ ܒܪܘܿܢܹܗ ܕܡܲܠܟܵܐ ܘܟܠܵܗ̇ ܡܕܝܼܢ݇ܬܹܗ ܥܲܡܹܗ ܒܐܲܠܵܗܹܗ ܕܩܲܕܝܼܫܵܐ. ܐܝܼܢܵܐ ܒܵܒܹܗ ܠܵܐ ܗܘܼܝܡܸܢܠܹܗ ܒܝܲܕ ܡܫܝܼܚܵܐ. ܘܡܘܼܬܹܐܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܚܲܕ݇ ܓܘܼܪܢܵܐ ܕܟܹܐܦܵܐ: ܘܥܒܼܸܕܠܹܗ ܥܡܵܕܵܐ ܘܩܘܼܪܒܵܢܵܐ. ܘܡܘܼܥܡܸܕܠܹܗ ܠܟܠܲܝܗܝ ܒܢܲܝ̈ ܡܕܝܼܢَܬܵܐ ܡܲܥܡܘܿܕܝܼܬܹܗ ܕܡܫܝܼܚܵܐ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ: ܘܐܵܦ ܬܵܒܼܘܿܪ ܒܪܘܿܢܵܐ ܕܡܲܠܟܵܐ ܥܡܸܕܠܹܗ.
ܘܡ̣ܢ ܒܵܬܲܪ ܐܸܢܹܐ ܐ݇ܙܸܠܹܗ ܩܲܕܝܼܫܵܐ ܠܩܸܠܵܝܬܹܗ. ܘܐ݇ܬܹܐܠܹܗ ܡܲܠܲܐܟܼܵܐ ܕܡܵܪܝܵܐ ܒܠܲܝܠܹܐ ܠܟܸܣ ܬܵܒܼܘܿܪ ܘܐ݇ܡܸܪܹܗ ܐܸܠܹܗ: ܩܘܼܡ ܙܹܠ ܠܟܸܣ ܡܵܪܝ ܙܲܝܥܵܐ: ܘܗܘܝܼ ܐܸܠܹܗ ܬܲܠܡܝܼܕܵܐ. ܘܫܒܼܸܩܠܹܗ ܬܵܒܼܘܿܪ ܟܘܼܪܣܝܹܗ ܘܡܲܠܟܘܼܬܹܗ ܘܒܲܟܼܬܹܗ ܘܒܢܲܝ̈ ܒܲܝܬܹܗ: ܘܗܘܹܐܠܹܗ ܬܲܠܡܝܼܕܵܐ ܠܡܵܪܝ ܙܲܝܥܵܐ. ܘܫܘܼܪܹܐܠܹܗ ܒܝܲܕ ܡܵܠܲܦܬܹܗ ܒܝܘܼܠܦܵܢܵܐ ܐܲܠܵܗܵܝܵܐ: ܘܪܘܼܚܹܗ ܕܡܵܪܝܵܐ ܫܪܹܐܠܵܗ̇ ܒܠܸܒܹܗ: ܘܥܵܒܼܸܕ ܗ݇ܘܵܐ ܫܵܗܲܪܬܵܐ ܟܠܹܗ ܕܠܲܝܠܹܐ ܩܵܕ݇ܡ ܡܵܪܹܗ. ܘܗܘܹܐܠܹܗ ܬܪܹܝ ܫܸܢܹ̈ܐ ܒܐܸܣܟܘܿܠܹܐ (ܒܡܲܕܪܲܫܬܵܐ) ܘܝ݇ܠܸܦܠܹܗ ܪܵܒܵܐ ܟܬܵܒܼܹ̈ܐ.
ܘܪܵܒܵܐ ܕܫܸܡܸܢܹ̈ܐ ܐܝܼܬ ܗ݇ܘܼܵܐ ܠܹܗ ܬܵܒܼܘܿܪ. ܘܚܙܹܐܠܗ݇ܘܿܢ ܥܡܵܠܩܵܝܹ̈ܐ ܕܠܲܝܬ ܬܵܒܼܘܿܪ ܓܵܘ ܒܲܝܬܹܗ: ܘܡܚܹܐܠܗ݇ܘܿܢ ܠܡܕܝܼܢَܬܹܗ ܘܠܐܲܬܪܹܗ ܒܦܘܼܡܵܐ ܕܣܲܝܦܵܐ؛ ܘܣܠܸܒܠܗ݇ܘܿܢ ܠܟܠ ܡܸܢܕܝ ܕܐܝܼܬ ܗ݇ܘܵܐ ܠܗ݇ܘܿܢ. ܘܫܩܸܠܗ݇ܘܿܢ ܥܡܵܠܩܵܝܹ̈ܐ ܠܒܲܟܼܬܹܗ ܕܬܵܒܼܘܿܪ ܘܒܢܘܿܢܘܼ̈ܗܝ: ܘܠܘܼܒܠܲܝܠܗ݇ܘܿܢ ܠܐܲܬܪ̈ܵܝܗܝ.
ܐܝܼܢܵܐ ܒܲܟܼܬܹܗ ܕܬܵܒܼܘܿܪ ܪܵܒܵܐ ܚܲܟܝܼܡܬܵܐ ܗ݇ܘܵܐ: ܘܠܒܼܝܼܫܬܵܐ ܗ݇ܘܵܐ ܚܕܵܐ ܠܒܼܝܼܫܬܵܐ ܣܡܘܼܩܬܵܐ: ܕܠܲܝܬ ܗ݇ܘܵܐ ܐܲܝܟܼ ܕܝܼܘܿܗ̇ ܒܥܵܠܡܵܐ. ܘܐܝܼܡܲܢ ܕܐܵܙܵܠَܐ ܗ݇ܘܵܐ ܒܐܘܼܪܚܵܐ: ܓ̰ܵܕܩܵܐ ܗ݇ܘܵܐ ܡܸܢܘܿܗ̇ ܘܪܵܦܝܵܐ ܗ݇ܘܵܐ ܒܐܘܼܪܚܵܐ. (ܩܵܐ ܢܝܼܫܲܢܩܵܐ).
ܘܐ݇ܬܹܐܠܹܗ ܡܲܠܲܐܟ݂ܵܐ ܕܡܵܪܝܵܐ: ܘܐ݇ܡܸܪܹܗ ܠܬܵܒܼܘܿܪ: ܗܵܐ ܡܕܝܼܢ݇ܬܘܼܟܼ ܘܐܲܬܪܘܼܟܼ ܦܸܫܠܗ݇ܘܿܢ ܣܠܝܼܒܹ̈ܐ ܒܝܲܕ ܥܡܵܠܩܵܝܹ̈ܐ: ܘܡܘܼܒܠܲܝܠܗ݇ܘܿܢ ܠܐܲܬܪܲܝܗܝ ܒܝܲܕ ܣܠܵܒܵܐ. ܐܝܼܢܵܐ ܩܘܼܡ ܙܹܠ ܒܵܬܪܲܝܗܝ: ܘܒܸܬ ܡܵܛܸܬܠܗ݇ܘܿܢ. ܘܗܘܹܐܠܹܗ ܬܵܒܼܘܿܪ ܒܦܵܫܲܡܬܵܐ ܪܵܒܵܐ ܓܘܼܪܬܵܐ: ܘܒܚܲܫܵܐ ܡܼܿܪܝܼܪܵܐ. ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܠܵܐ ܙܵܕܥܸܬ ܡܸܢܲܝܗܝ: ܐܸܠܵܐ ܩܘܼܡ ܙܹܠ ܒܵܬܪܲܝܗܝ. ܘܒܗ̇ܝ ܣܵܥܲܬ ܕܡܵܛܸܬ ܐܲܢ݇ܬ ܠܟܸܣܠܲܝܗܝ: ܐܵܦ ܐܵܢܵܐ ܒܸܬ ܗܵܘܸܢ ܥܲܡܘܼܟܼ ܬܵܡܵܐ. ܘܚܕܹܐܠܹܗ ܬܵܒܼܘܿܪ ܪܵܒܵܐ: ܘܫܩܸܠܹܗ ܚܘܼܛܪܹܗ ܒܐܝܼܕܹܗ: ܘܩܸܡܠܹܗ ܘܐ݇ܙܸܠܹܗ ܒܵܬܪܲܝܗܝ.
ܘܚܙܸܐܠܹܗ ܒܐܘܼܪܚܵܐ ܩܸܛܥܵܛܹ̈ܐ ܡ̣ܢ ܠܒܼܝܼܫܬܵܐ ܕܒܲܟܼܬܹܗ ܕܪܘܼܦܹܐܠܵܗ̇ ܒܐܘܼܪܚܵܐ: ܘܒܐܵܗܵܐ ܡܛܹܐܠܹܗ ܗܼܲܠ ܠܓܵܘ ܥܡܵܠܩܵܝܹ̈ܐ. ܘܚܸܪܹܗ ܒܵܬܲܪ ܚܲܨܸܗ: ܘܚܙܹܐܠܹܗ ܠܡܵܪܝ ܙܲܝܥܵܐ ܒܸܟܠܵܝܵܐ ܠܟܸܣܠܹܗ. ܘܫܩܝܼܠܲܝܠܹܗ ܡܲܠܲܐܟ݂ܵܐ ܕܡܵܪܝܵܐ: ܘܐ݇ܬܹܐܠܗ݇ܘܿܢ ܥܲܠ ܥܡܵܠܩܵܝܹ̈ܐ. ܘܫܥܸܫܠܗَܘܿܢ ܡ̣ܢ ܠܵܘܓ̰ܹܗ ܘܡ̣ܢ ܓܘܼܪܘܼܬܵܐ ܕܩܲܕܝܼܫܵܐ ܟܠܲܝܗܝ ܐ݇ܢܵܫܹ̈ܐ ܕܥܡܵܠܩܵܝܹ̈ܐ: ܘܦܸܫܠܗ݇ܘܿܢ ܫܦܝܼܠܹܐ ܡ̣ܢ ܩܵܕ݇ܡܹܗ: ܘܗܘܹܐܠܗ݇ܘܿܢ ܟܠܲܝܗܝ ܐܲܝܟܼ ܡܝܼܬܹ̈ܐ.
ܘܫܩܸܠܹܗ ܡܲܠܲܐܟ݂ܵܐ ܢܝܼܙܵܐ ܕܢܘܼܪܵܐ ܘܡܚܹܐܠܹܗ ܠܥܡܵܠܩܵܝܹ̈ܐ: ܘܩܛܸܠܹܗ ܡܸܢܲܝܗܝ ܚܲܡܫܵܐ ܐܲܠܦܹ̈ܐ ܐ݇ܢܵܫܹ̈ܐ ܓܲܢَܒܵܪܹ̈ܐ. ܘܫܩܸܠܹܗ ܬܵܒܼܘܿܪ ܒܲܟܼܬܹܗ ܘܒܢܘܿܢܘܼ̈ܗܝ ܘܟܠ ܡܸܢܕܝܼ ܕܐܝܼܬ ܗَܘܵܐ ܠܹܗ: ܘܐَܬܹܐܠܗَܘܿܢ ܠܡܕܝܼܢَܬܵܐ. ܘܗܵܝܓܵܐ ܕܝܼܪܗ݇ܘܿܢ ܬܵܒܼܘܿܪ ܘܐܵܦ ܩܲܕܝܼܫܵܐ ܡܵܪܝ ܙܲܝܥܵܐ ܠܩܸܠܵܝܬܲܝܗܝ: ܘܗܘܹܐ ܠܗَܘܿܢ ܒܗ̇ܘ ܛܘܼܪܵܐ ܥܸܣܪܵܐ ܝܵܘܡܵܢܹ̈ܐ:
ܘܐ݇ܬܹܐܠܹܗ ܡܲܠܲܐܟܼܵܐ ܘܐَܡܸܪܹܗ ܩܵܐ ܩܲܕܝܼܫܵܐ ܡܵܪܝ ܙܲܝܥܵܐ: ܩܘܼܡ ܐܲܢَܬ ܘܬܲܠܡܝܼܕܘܼܟܼ ܬܵܒܼܘܿܪ ܘܙܹܠَܡܘܿܢ ܠܡܕܝܼܢَܬܵܐ ܕܡܵܘܨܸܠ: ܘܡܲܟܪܸܙ ܒܓܵܘܵܗ̇ ܕܡܗܲܝܡܸܢܝܼ ܒܐܲܠܵܗܵܐ. ܘܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܬܵܒܼܘܿܪ ܬܲܠܡܝܼܕܹܗ ܥܲܡܹܗ: ܘܐَܬܹܐܠܗ݇ܘܿܢ ܠܡܕܝܼܢَܬܵܐ ܕܡܵܘܨܸܠ.
ܘܚܙܹܐܠܗَܘܿܢ ܓܵܘ ܡܕܝܼܢَܬܵܐ ܚܕܵܐ ܝܵܠܕَܬܵܐ: ܘܐܝܼܬ ܗܘܵܐ ܠܵܗ ܡܲܪܥܵܐ ܕܣܵܛܵܢܵܐ: ܘܠܹܐ ܫܵܒܼܩܵܐ ܗَܘܵܐ ܕܐَܢܵܫܵܐ ܥܵܒܼܸܪ ܒܥܵܠܘܿܠܵܐ. ܘܐܵܢܝܼ ܕܥܵܒܼܪܝܼ ܗ݇ܘܵܘ: ܒܟܹܐܦܹ̈ܐ ܕܲܪܒܸܢܵܐ ܗَܘܵܐ ܠܗَܘܿܢ. ܘܐَܬܹܐܠܗَܘܿܢ ܐܲܢܹܐ ܬܪܹܝ ܪ̈ܲܒܵܢܹܐ: ܡܵܪܝ ܙܲܝܥܵܐ ܘܬܵܒܼܘܿܪ: ܘܪܵܓ̰ܡܵܐ ܗ݇ܘܵܐ ܠܗَܘܿܢ ܠܛܘܼܒܼܵܢܹ̈ܐ ܒܟܹܐܦܹ̈ܐ. ܐܝܼܢܵܐ ܟܹܐܦܹ̈ܐ ܕܪܵܦܝܵܐ ܗ݇ܘܵܐ ܠܹܐ ܩܲܪܒܸܢܝܼ ܗ݇ܘܵܘ ܠܟܸܣܠܲܝܗܝ: ܒܚܲܝܠܵܐ ܐܲܠܵܗܵܝܵܐ ܕܐܝܼܬ ܗَܘܵܐ ܥܲܡܲܝܗܝ.
ܘܗܵܝܓܵܐ ܩܸܡܠܸܗ ܩܲܕܝܼܫܵܐ ܡܵܪܝ ܙܲܝܥܵܐ ܘܬܵܒܼܘܿܪ ܬܲܠܡܝܼܕܹܗ: ܘܐَܬܹܐܠܗ݇ܘܿܢ ܠܟܸܣ ܐ݇ܢܵܫܹ̈ܐ ܕܡܕܝܼܢ݇ܬܵܐ. ܘܓ̰ܡܸܥܠܗܘܿܢ ܠܟܸܣܠܲܝܗܝ ܘܐَܡܸܪܗ݇ܘܿܢ ܠܛܘܼܒܼܵܢܹ̈ܐ: ܝܵܐ ܫܹܐܕܵܢܹ̈ܐ: ܩܵܡܘܿ ܐ݇ܬܹܐܠܵܘܟܼܘܿܢ ܠܟܸܣ ܐܵܗܵܐ ܫܹܐܕܵܢܬܵܐ؟ ܘܩܸܪܝܵܐܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܐ݇ܡܸܪܹܗ ܐܸܠܘܿܗ̇: ܡܘܿܕܝܼ ܝ݇ܠܹܗ ܫܸܡܵܟܼܝ؟ ܐܝܼܢܵܐ ܗ̇ܝ ܓ̰ܘܼܘܸܒܠܵܗ̇ ܘܐ݇ܡܸܪܗ̇ ܐܸܠܹܗ: ܡܵܪܬܵܐ. ܘܐ݇ܡܸܪܹܗ ܩܲܕܝܼܫܵܐ ܡܵܪܝ ܙܲܝܥܵܐ ܠܗ̇ܘ ܫܹܐܕܵܐ ܕܒܝܼܘܿܗ̇: ܦܠܘܿܛ ܡ̣ܢ ܦܲܓܼܪܵܐ ܕܐܵܗܵܐ ܝܵܠܕَܬܵܐ: ܒܚܲܝܠܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ.
ܘܫܥܸܫܠܹܗ ܫܹܐܕܵܐ ܡ̣ܢ ܠܵܘܓ̰ܹܗ ܕܩܲܕܝܼܫܵܐ: ܘܦܠܸܛܠܹܗ ܒܒܸܟܼܝܵܐ ܡܲܪܝܼܪܵܐ ܘܐ݇ܡܸܪܹܗ: ܕܘܵܝܠܲܢ ܡܸܢܘܼܟܼ: ܝܵܐ ܒܪܘܿܢܵܐ ܕܡܲܪܝܲܡ: ܘܡ̣ܢ ܬܲܠܡܝܼܕܘܼ̈ܟܼ: ܕܫܸܡܘܿܟܼ ܒܸܛܪܵܕܲܢ ܝܑܼܠܹܗ ܡ̣ܢ ܒܹܝܬܼ ܡܲܥܸܡܪܲܢ. ܘܐ݇ܡܸܪܹܗ ܩܲܕܝܼܫܵܐ ܠܗ̇ܘ ܫܹܐܕܵܐ ܠܝܼܛܵܐ: ܠܲܝܬܠܘܼܟܼ ܫܘܼܠܛܵܢܵܐ ܕܩܲܪܒܸܢܸܬ ܠܟܸܣ ܐ݇ܢܵܫܹ̈ܐ ܕܐܵܗܵܐ ܡܕܝܼܢ݇ܬܵܐ.
ܘܐܝܼܬ ܗ݇ܘܵܐ ܓܵܘ ܡܕܝܼܢ݇ܬܵܐ ܕܡܵܘܨܸܠ ܚܲܕ݇ ܡܲܠܟܵܐ ܒܝܼܫܵܐ ܘܡܲܚܠܸܛܵܢܵܐ ܕܣܵܓܼܸܕ ܗ݇ܘܵܐ ܠܨܲܢܡܹ̈ܐ: ܕܫܸܡܹܗ ܝܑܼܗ݇ܘܵܐ ܗܘܿܪܡܹܝܙܕܵܗܘܿܪ: ܕܝܼܗ݇ܘܵܐ ܚܲܕَ ܡܲܠܟܵܐ ܚܲܢܦܵܐ ܘܟܵܦܘܿܪܵܐ. ܘܟܲܕ ܫܡܸܥܠܹܗ ܕܐ݇ܬܹܐܠܗَܘܿܢ ܐܲܢܹܐ ܬܪܹܝ ܐܲܪ̈ܕܸܟܼܠܹܐ ܕܥܹܕܬܵܐ ܩܲܕܝܼܫܬܵܐ: ܐ݇ܡܸܪܹܗ ܠܪ̈ܝܼܓܘܵܬܹܗ: ܙܹܠ݇ܡܘܿܢ ܡܲܝܬܹܐܡܘܿܢ ܠܐܲܢܹܐ ܐ݇ܢܵܫܹ̈ܐ: ܕܚܵܙܲܚ ܡܵܢܝܼ ܝ݇ܢܵܐ؟ ܘܙܸܠܗ݇ܘܿܢ ܪ̈ܝܼܓܵܘܵܬܹܐ: ܘܚܲܕ݇ ܕܫܸܡܹܗ ܗ݇ܘܵܐ ܝܑܼܗܘܼܕܵܐ: ܩܪܹܐܠܹܗ ܠܐܵܢܝܼ ܩܲܕܝܼܫܹ̈ܐ: ܘܠܘܼܒܠܲܝܠܹܗ ܠܟܸܣ ܡܲܠܟܵܐ.
ܘܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܠܛܘܼܒܼܵܢܹ̈ܐ: ܡ̣ܢ ܐܲܝܟܵܐ ܝ݇ܬܘܿܢ؟ ܐܵܡܪܝܼ ܐܸܠܹܗ: ܡ̣ܢ ܐܲܪܥܵܐ ܕܡܘܼܠܟܵܢܵܐ ܝ݇ܘܲܚ. ܘܐܸܢ ܒܵܣܡܵܐܠܹܗ ܡܵܪܝܵܐ: ܒܹܐܙܵܠܵܐ ܝܘܲܚ ܠܐܲܬܪܵܐ ܕܕܵܣܵܢ ܥܸܠܵܝܬܵܐ. ܘܐ݇ܡܸܪܹܗ ܡܲܠܟܵܐ ܐܸܠܲܝܗܝ: ܩܵܐ ܡܵܢܝܼ ܒܸܣܓܼܵܕܵܐ ܝ݇ܬܘܿܢ؟ ܘܐ݇ܡܸܪܗ݇ܘܿܢ ܐܸܠܹܗ: ܩܵܐ ܡܫܝܼܚܵܐ ܒܸܣܓܼܵܕܵܐ ܝ݇ܘܲܚ: ܗ̇ܘ ܕܡܚܹܐܠܗ݇ܘܿܢ ܝܗ݇ܘܼܕܵܝܹ̈ܐ ܥܲܠ ܙܩܝܼܦܵܐ ܒܐܘܿܪܸܫܠܸܡ: ܗ̇ܘ ܕܡܝܼ̈ܬܹܐ ܒܸܩܝܵܡܵܐ ܝ݇ܢܵܐ ܒܫܸܡܹܗ: ܘܟܲܪܹܐ ܘܠܲܥ̈ܠܹܐ ܒܸܫܡܵܥܝܵܐ ܝ݇ܢܵܐ ܘܡܗܲܡܙܘܿܡܹܐ: ܘܡܸܪ̈ܥܝܹܐ ܦܝܵܫܵܐ ܝ݇ܢܵܐ ܡܒܘܿܣܡܵܐ.
ܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ ܐܸܠܲܝܗܝ: ܕܡܵܢܝܼ ܝ݇ܠܹܗ ܐܵܗܵܐ ܒܝܲܕ ܫܸܡܹܗ ܡܝܼܬܹ̈ܐ ܒܸܩܝܵܡܵܐ ܝ݇ܢܵܐ؟ ܐܵܡܪܝܼ ܐܸܠܹܗ ܩܲܕܝܼܫܹ̈ܐ: ܗ̇ܘ ܕܩܵܡ ܫܵܕܸܪܠܲܢ ܠܟܸܣܠܘܼܟܼ: ܐܵܗܵܐ ܝܑܼܠܹܗ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܲܝܵܐ. ܘܫܥܸܫܠܹܗ ܡܲܠܟܵܐ ܡ̣ܢ ܠܵܘܓ̰ܹܗ ܕܩܲܕܝܼܫܵܐ.
ܘܐܝܼܬ ܗ݇ܘܵܘ ܝܗ݇ܘܼܕܵܝܹ̈ܐ ܒܗ̇ܝ ܡܕܝܼܢ݇ܬܵܐ ܡ̣ܢ ܝܘܼܒܵܠܵܐ ܕܐܵܢܝܼ ܕܡܚܹܐܠܗ݇ܘܿܢ ܥܲܠ ܙܩܝܼܦܵܐ ܠܡܵܪܲܝܗܝ. ܘܐܵܡܪܝܼ ܝܗ݇ܘܼܕܵܝܹ̈ܐ ܠܡܲܠܟܵܐ: ܒܕܘܼܓܠܵܐ ܡܗܘܼܡܙܸܡܠܗ݇ܘܿܢ ܐܲܢܹܐ ܬܪܹܝ ܥܲܡ ܡܲܠܟܵܐ: ܘܫܓܼܸܫܠܗ݇ܘܿܢ ܠܸܒܹܗ ܕܡܲܠܟܵܐ ܡ̣ܢ ܫܪܵܪܵܐ: ܘܐ݇ܡܸܪܗ݇ܘܿܢ: ܕܡܫܝܼܚܵܐ ܗܵܐ ܠܹܐ ܝ݇ܠܹܗ ܐܸܬܝܵܐ. ܘܡܘܼܚܠܸܛܠܗ݇ܘܿܢ ܠܡܲܠܟܵܐ: ܘܩܢܹܐܠܗ݇ܘܿܢ ܗܵܘܢܹܗ.
ܘܩܸܡܠܹܗ ܡܲܠܟܵܐ ܒܨܲܦܪܵܐ ܘܪܵܒܵܐ ܚܸܡܬܵܢܵܐ ܒܟܲܪܒܵܐ: ܘܩܪܹܐܠܹܗ ܠܩܲܕܝܼܫܹ̈ܐ ܘܐ݇ܡܸܪܹܗ ܐܸܠܵܝܗܝ: ܐܸܢ ܠܵܐ ܡܲܚܙܝܼܬܘܿܢ ܠܝܼ ܢܝܼܫܲܢܩܹ̈ܐ ܡ̣ܢ ܚܲܝܠܹܗ ܕܡܫܝܼܚܵܐ ܗ̇ܘ ܕܐܸܠܹܗ ܦܠܵܚܵܐ ܝ݇ܬܘܿܢ: ܒܣܲܝܦܵܐ ܚܲܪܘܿܦܵܐ ܒܸܬ ܡܛܲܠܩܸܢ ܠܵܘܟܼܘܿܢ: ܘܩܵܐ ܟܲܠܒܹ̈ܐ ܡܘܼܣܠܝܼܹ̈ܐ ܒܸܬ ܪܲܦܸܢ ܠܵܘܟ݂ܘܿܢ: ܘܒܝܲܕ ܦܵܘܚܵܐ ܕܓܲܪܕܵܐ‐ܒܘܼ̈ܠܹܐ ܒܸܬ ܡܕܵܪܸܢ ܠܵܘܟ݂ܘܿܢ. ܘܦܩܸܕܠܹܗ ܡܲܠܟܵܐ ܒܚܸܡܬܵܐ ܘܐ݇ܡܸܪܹܗ: ܡܲܝܬܹܐܡܘܿܢ ܣܲܝܦܹ̈ܐ ܘܣܟܝܼܢ̈ܝܵܬܵܐ ܚܲܪ̈ܘܿܦܹܐ؛ ܘܟܲܠܒܵܬܝܼܢܹ̈ܐ ܘܣܸܟܵܟܹ̈ܐ ܕܦܲܪܙܵܠܵܐ: ܕܦܵܝܫܝܼ ܩܘܼܛܩܸܛܹ̈ܐ ܗܲܕܵܡܵܝ̈ܗܝ.
ܗܵܝܓܵܐ ܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܩܲܕ݇ܡ ܡܲܠܟܵܐ ܘܐ݇ܡܸܪܹܗ ܐܸܠܹܗ: ܐܸܢ ܡܲܚܙܲܚ ܠܘܼܟܼ ܥܵܓ̰ܝܼܒܘܼܝܵܬܹ̈ܐ ܒܝܲܕ ܚܲܝܠܹܗ ܕܡܫܝܼܚܵܐ ܡܵܪܲܢ: ܒܸܬ ܡܗܲܝܡܸܢܬ ܒܝܼܹܗ؟ ܓ̰ܘܼܘܸܒܠܹܗ ܡܲܠܟܵܐ ܘܐ݇ܡܸܪܹܗ: ܐܸܢ ܡܲܚܙܸܬ ܠܲܢ ܚܲܕ݇ ܢܝܼܫܲܢܩܵܐ: ܐܵܦ ܐܵܢܵܐ ܘܟܠܵܗ̇ ܐܵܗܵܐ ܡܕܝܼܢ݇ܬܵܐ ܒܸܬ ܡܗܲܝܡܢܲܚ ܒܝܲܕ ܡܫܝܼܚܘܼܟܼ. ܘܗܵܝܓܵܐ ܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܬܵܒܼܘܿܪ ܘܒܪܸܟܠܗَܘܿܢ ܥܲܠ ܒܘܼܪ̈ܟܲܝܗܝ ܒܨܠܘܿܬܵܐ: ܘܦܘܼܫܸܛܠܗَܘܿܢ ܐܝܼܕܵܬܵܝ̈ܗܝ ܠܫܲܡܝܵܐ ܘܨܘܿܠܹܐܠܗ݇ܘܿܢ.
ܘܒܗ̇ܝ ܕܘܼܟܬܵܐ ܕܝܼܗ݇ܘܵܘ ܒܝܘܿܗ̇ ܩܲܕܝܼܫܹ̈ܐ: ܝܑܼܗ݇ܘܵܐ ܒܹܝܬ ܩܒܼܘܼܪܐ. ܘܐ݇ܡܸܪ ܗ݇ܘܵܐ ܠܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܲܝܵܐ: ܗ̇ܘ ܕܡܚܹܐܠܗ݇ܘܿܢ ܝܗ݇ܘܼܕܵܝܹ̈ܐ ܥܲܠ ܙܩܝܼܦܵܐ ܒܐܘܿܪܸܫܠܸܡ: ܘܒܗ̇ܘ ܚܲܝܠܵܐ ܕܢܘܼܚܸܡܠܘܼܟܼ ܩܵܐ ܠܲܥܵܙܲܪ ܚܲܒܼܪܘܼܟܼ ܡ̣ܢ ܓܵܘ ܩܲܒܼܪܵܐ: ܢܵܚܸܡ ܠܐܵܗܵܐ ܒܹܝܬܼ ܩܒܼܘܼܪܵܐ: ܕܚܵܙܝܼ ܟܵܦܘܿܪܹ̈ܐ ܘܡܗܲܝܡܸܢܝܼ ܒܝܼܘܼܟܼ: ܕܐܲܢ݇ܬ ܝܼܘܸܬ ܡܫܝܼܚܵܐ ܒܪܘܿܢܹܗ ܕܐܲܠܵܗܵܐ ܚܲܝܵܐ.
ܘܫܥܸܫܠܹܗ ܒܹܝܬܼ ܩܒܼܘܼܪܵܐ ܡ̣ܢ ܠܵܘܓ̰ܹܗ ܕܩܲܕܝܼܫܵܐ: ܘܩܸܡܠܗ݇ܘܿܢ ܡ̣ܢ ܗ̇ܝ ܕܘܼܟܬܵܐ ܬܪܹܝܡܵܐܐ ܓܵܢܵܬܹ̈ܐ: ܩܵܕ݇ܡ ܡܲܠܟܵܐܘܩܵܕَܡ ܟܠܲܝܗܝ ܒܢܲܝ̈ ܡܕܝܼܢَܬܵܐ. ܘܡܘܼܩܘܸܚܠܗ݇ܘܿܢ ܒܢܲܝ̈ ܡܕܝܼܢ݇ܬܵܐ ܒܚܲܕ݇ ܩܵܠܵܐ ܘܐܵܡܪܝܼ: ܫܘܼܒܼܚܵܐ ܠܡܫܝܼܚܵܐ ܡܢܲܚܡܵܢܵܐ ܕܡܝܼܬܹ̈ܐ. ܘܗܘܼܝܡܸܢܠܹܗ ܡܲܠܟܵܐ ܘܐܵܦ ܐَܢܵܫܹ̈ܐ ܕܡܕܝܼܢ݇ܬܵܐ ܒܝܲܕ ܡܫܝܼܚܵܐ.
ܘܐܝܼܬ ܗ݇ܘܵܐ ܠܹܗ ܡܲܠܟܵܐ ܚܲܕَ ܒܪܘܿܢܵܐ ܝܲܟܵܢܵܐ: ܘܫܒ݂ܘܿܩ ܡܸܢܹܗ ܠܲܝܬ ܗَܘܵܐ ܠܹܗ ܚܲܕ ܐَܚܹܪَܢܵܐ: ܘܥܸܣܪܵܐ ܫܸܢܹ̈ܐ ܣܸܡܝܹ̈ܐ ܗَܘܵܐ؛ ܘܠܹܐ ܚܵܙܝܼ ܗَܘܵܐ ܢܘܼܗܪܵܐ ܕܫܸܡܫܵܐ؛ ܘܡܘܼܬܹܐܠܗ݇ܘܿܢ ܠܟܸܣ ܩܲܕܝܼܫܵܐ. ܘܗܵܝܓܵܐ ܩܲܕܝܼܫܵܐ ܡܵܪܝ ܙܲܝܥܵܐ: ܗ̇ܘ ܕܒܸܫܥܵܫܵܐ ܝ݇ܢܵܐ ܫܹܐܕܹ̈ܐ ܡܸܢܹܗ ܘܐܵܦ ܡܲܠܟܹ̈ܐ ܘܫܲܠܝܼ̈ܛܹܐ ܛܵܠܘܿܡܹܐ (ܙܵܠܘܿܡ̈ܐ): ܡܘܼܬܹܐܠܹܗ ܡܝܼܵܐ ܒܚܲܕَ ܡܵܐܢܵܐ: ܘܪܫܸܠܡܹܗ ܥܠܲܝܗܝ ܢܝܼܫܲܢܩܵܐ ܕܨܠܝܼܒܼܵܐ: ܘܡܘܼܪܝܸܣܠܹܗ ܥܲܠ ܥܲܝܢܘܼ̈ܗܝ: ܘܚܙܹܐܠܹܗ ܠܟܠ ܡܸܢܕܝܼ ܨܸܦܝܵܐ. ܘܫܘܼܒܸܚܠܗ݇ܘܿܢ ܠܐܲܠܵܗܵܐ ܒܢܲܝ̈ ܡܕܝܼܢ݇ܬܵܐ ܘܐ݇ܡܸܪܗ݇ܘܿܢ: ܫܘܼܒܼܚܵܐ ܠܐܲܠܵܗܵܐ ܕܝܘܼܗ݇ܒܼܸܠܹܗ ܠܐܵܗܵܐ ܩܲܕܝܼܫܵܐ: ܕܐܲܝܟܼ ܐܲܢܹܐ ܥܵܓ̰ܝܼܒܘܼܝܵܬܹ̈ܐ ܦܝܵܫܵܐ ܝ݇ܢܵܐ ܦܠܝܼܚܹ̈ܐ ܒܐܝܼܕܵܬܘܼ̈ܗܝ.
ܐܝܼܢܵܐ ܝܗ݇ܘܼܕܵܝܹ̈ܐ ܕܡܕܝܼܢ݇ܬܵܐ ܦܸܫܠܗ݇ܘܿܢ ܒܦܵܫܲܡܬܵܐ ܓܘܼܪܬܵܐ. ܘܦܩܸܕܠܹܗ ܡܲܠܟܵܐ ܠܓܘܼܪ̈ܵܢܘܼܗܝ: ܕܟܠܲܝܗܝ ܝܗ݇ܘܼܕܝܹ̈ܐ ܕܓܵܘ ܡܕܝܼܢ݇ܬܵܐ ܒܣܲܝܦܵܐ ܡܲܡܝܸܬܝܼ ܠܗ݇ܘܿܢ: ܘܠܵܐ ܐ݇ܢܵܫܵܐ ܫܵܒܼܩܝܼ ܡܸܢܲܝܗܝ. ܘܦܠܸܛܠܗ݇ܘܿܢ ܓ̰ܲܠܵܕܹܐ ܕܡܲܠܟܵܐ ܘܩܛܝܼܠܲܝ ܠܗ݇ܘܿܢ. ܘܗَܘܹܐܠܹܗ ܡܸܢܝܵܢܵܐ ܕܝܗ݇ܘܼܕܵܝܹ̈ܐ ܕܦܸܫܠܗ݇ܘܿܢ ܩܛܝܼ̈ܠܹܐ ܬܪܸܥܣܲܪ ܐܲܠܦܹ̈ܐ: ܗܲܠ ܕܠܵܐ ܦܸܫܠܹܗ ܡܸܢܲܝܗܝ ܐ݇ܢܵܫܵܐ: ܫܒ݂ܘܿܩ ܡ̣ܢ ܚܲܕ݇ ܚܲܕ݇.
ܘܥܒܼܸܕܠܹܗ ܡܵܪܝ ܙܲܝܥܵܐ ܥܡܵܕܵܐ: ܘܡܘܼܥܡܸܕܠܹܗ ܠܡܲܠܟܐ ܘܟܠܲܝܗܝ ܒܢܲܝ̈ ܡܕܝܼܢ݇ܬܵܐ. ܘܥܒܼܸܕܠܹܗ ܗܸܫܝܵܪ ܠܡܲܠܟܵܐ ܘܦܘܼܩܸܕܠܹܗ: ܕܠܵܐ ܦܵܠܸܛ ܡ̣ܢ ܐܵܗܵܐ ܐܘܼܪܚܵܐ ܕܫܪܵܪܵܐ؛ ܘܕܠܲܝܬ ܐܲܠܵܗܵܐ ܐ݇ܚܪܹܢܵܐ: ܐܸܠܵܐ ܐܸܢ ܕܟܪܸ̈ܣܛܝܵܢܹܐ.
ܘܗܵܝܓܵܐ ܩܸܡܠܸܗ ܩܲܕܝܼܫܵܐ ܕܦܵܠܸܛ ܡ̣ܢ ܡܕܝܼܢ݇ܬܵܐ: ܘܝܘܼܗ݇ܒܼܸܠܹܗ ܡܲܠܟܵܐ ܩܵܐ ܡܵܪܝ ܙܲܝܥܵܐ ܥܸܣܪܝܼ ܘܬܠܵܬܵܐ ܕܹܝܢܵܪܹ̈ܐ. ܘܩܸܡܠܸܗ ܡܲܠܟܵܐ ܘܐَܢܵܫܹ̈ܐ ܕܡܕܝܼܢ݇ܬܵܐ ܘܥܦܸܩܠܗ݇ܘܿܢ (ܚܦܸܩܠܗ݇ܘܿܢ) ܘܢܫܸܩܠܗ݇ܘܿܢ ܠܩܲܕܝܼܫܵܐ ܡܵܪܝ ܙܲܝܥܵܐ ܘܩܵܐ ܬܲܠܡܝܼܕܹܗ ܬܵܒܼܘܿܪ ܘܐ݇ܡܸܪܗ݇ܘܿܢ ܐܸܠܲܝܗܝ: ܙܹܠَܡܘܿܢ ܒܫܠܵܡܵܐ: ܝܵܐ ܡܗܲܝܡܢܹ̈ܐ ܒܪ̈ܝܼܟܹܐ: ܘܐܲܠܵܗܵܐ ܡܵܪܵܐ ܕܟܠ ܡܒܲܪܸܟܼܠܵܘܟ݂ܘܿܢ: ܘܠܵܐ ܡܵܨܝܼ ܣܵܢܝܵܢܵܘܟܼܘܿܢ ܕܩܵܝܡܝܼ ܕܲܠܩܘܼܒܼܠܵܘܟ̣ܘܿܢ: ܘܕܸܫ̰ܡܸܢܵܘܟܼܘܿܢ ܗܵܘܝܼ ܥܲܦܪܵܐ ܬܚܹܝܬ ܐܲܩܠܵܬܵܘܟܼܘܿܢ. ܘܦܸܫܠܗܘܿܢ ܡܒܘܼܪ̈ܟܹܐ ܡܸܢܹܗ.
ܘܫܒܼܸܩܠܗ݇ܘܿܢ ܐܸܠܲܝܗܝ ܗ̇ܘ ܘܬܲܠܡܝܼܕܹܗ ܬܵܒܼܘܿܪ. ܘܐ݇ܙܸܠܗ݇ܘܿܢ ܠܡܵܐܬܵܐ ܕܫܸܡܘܿܗ̇ ܦܝܵܫܵܐ ܗ݇ܘܵܐ ܩܸܪܝܵܐ ܫܘܿܫ. ܘܐܝܼܬ ܗ݇ܘܵܐ ܒܗ̇ܝ ܡܵܐܬܵܐ ܚܲܕ݇ ܪܝܼܓܵܐ: ܕܫܸܡܹܗ ܝܑܼܗ݇ܘܵܐ ܡܲܪܩܘܿܣ: ܘܐܝܼܬ ܗ݇ܘܵܐ ܠܹܗ ܬܪܹܝ ܒܢܘܿܢܹ̈ܐ: ܘܛܸܦܝܹܐ ܗ݇ܘܵܘ ܓܲܪܒܼܵܐ ܡܸܬܚܵܐ ܕܥܸܣܪܝܼ ܘܬܲܪܬܹܝ ܫܸܢܹ̈ܐ: ܘܐܵܣܝܘܼܬܵܐ ܠܵܐ ܡܘܼܫܸܟَܼܚܠܗَܘܿܢ ܐܸܠܲܝܗܝ.
ܘܐܝܼܬ ܗَܘܵܐ ܒܗ̇ܝ ܡܕܝܼܢ݇ܬܵܐ ܚܲܕ݇ ܬܲܢܝܼܢܵܐ ܓܘܼܪܵܐ: ܘܟܠ ܝܵܘܡܵܐ ܚܲܕ݇ ܒܲܪܢܵܫܵܐ ܐܵܟܼܸܠ ܗ݇ܘܵܐ: ܘܣܵܓܼܕܝܼ ܗ݇ܘܵܘ ܐܸܠܹܗ ܐ݇ܢܵܫܹ̈ܐ ܕܗ̇ܝ ܡܵܐܬܵܐ ܬܠܵܬܵܐ ܓܵܗܹ̈ܐ ܒܝܵܘܡܵܐ.
ܘܩܸܡܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܬܵܒܼܘܿܪ ܘܐ݇ܙܸܠܹܗ ܠܟܸܣ ܗ̇ܘ ܓܲܒܼܪܵܐ ܘܐ݇ܡܸܪܹܗ ܐܸܠܹܗ: ܠܡܵܢܝܼ ܒܸܣܓܼܵܕܵܐ ܝ݇ܬܘܿܢ؟ ܘܐ݇ܡܸܪܹܗ ܐܸܠܲܝܗܝ ܗ̇ܘ ܓܲܒܼܪܵܐ: ܟܹܐ ܣܵܓܼܕܲܚ ܠܚܲܕ݇ ܬܲܢܝܼܢܵܐ ܓܘܼܪܵܐ: ܐܲܠܵܗܵܐ ܝ݇ܠܹܗ ܒܫܲܪܝܼܪܘܼܬܵܐ. ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܠܵܐ ܟܵܦܪܸܬ ܒܐܲܠܵܗܵܐ ܚܲܝܵܐ: ܗ̇ܘ ܕܒܪܹܐܠܹܗ ܫܡܲܝܵܐ ܘܐܲܪܥܵܐ: ܘܝܵܡܵܬܹ̈ܐ ܘܢܲܗܪ̈ܵܘܵܬܹܐ ܘܟܠ ܕܐܝܼܬ ܒܝܼܝܲܗܝ. ܘܐ݇ܡܸܪܹܗ ܡܲܪܩܘܿܣ ܩܵܐ ܩܲܕܝܼܫܵܐ: ܐܲܢ݇ܬ ܡܵܢܝܼ ܝ݇ܘܸܬ: ܘܩܵܐ ܡܵܢܝܼ ܒܸܣܓܼܵܕܵܐ ܝ݇ܘܸܬ؟ ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܐܵܢܵܐ ܪܝܼܓܵܐ ܝ݇ܘܸܢ ܕܝܼܫܘܿܥ ܡܫܝܼܚܵܐ: ܘܐܸܠܹܗ ܦܠܵܚܵܐ ܝ݇ܘܸܢ. ܐ݇ܡܸܪܹܗ ܐܸܠܹܗ ܡܲܪܩܘܿܣ: ܕܐܸܢ ܡܒܲܣܡܸܬ ܠܐܲܢܹܐ ܬܪܹܝ ܒܢܘܿܢܝܼ̈ ܡ̣ܢ ܓܲܪܒܼܵܐ: ܐܵܢܵܐ ܘܟܠܵܗ̇ ܡܵܐܬܵܐ ܒܸܬ ܡܗܲܝܡܸܢܲܚ ܒܝܲܕ ܡܫܝܼܚܵܐ.
ܘܐ݇ܡܸܪܹܗ ܩܲܕܝܼܫܵܐ: ܡܲܝܬܹܐܡܘܿܢ ܠܗ݇ܘܿܢ ܠܲܐܟܼܵܐ: ܘܚܙܹܐ ܠܹܗ ܐܸܠܲܝܗܝ ܟܲܕ ܡܲܚܘܘܿܪܹܐ ܓܘܼܫܡܲܝ̈ܗܝ (ܦܲܓ݂ܪ̈ܲܝܗܝ) ܐܲܝܟܼ ܬܲܠܓܵܐ: ܘܥܓ̰ܸܒܠܹܗ ܒܝܼܝܲܗܝ ܩܲܕܝܼܫܵܐ. ܟܲܕ ܡܘܼܬܹܐܠܗ݇ܘܿܢ ܐܸܠܲܝܗܝ ܠܟܸܣ ܐܲܩܠܵܬܹ̈ܗ ܕܩܲܕܝܼܫܵܐ: ܐ݇ܡܸܪܹܗ: ܡܲܝܬܹܐܡܘܿܢ ܠܝܼ ܡܝܼܵܐ ܒܚܲܕ݇ ܡܵܐܢܵܐ. ܘܡܘܼܬܹܐܠܗ݇ܘܿܢ ܐܸܠܹܗ: ܘܡܘܼܬܸܒܼܠܗ݇ܘܿܢ ܩܵܕ݇ܡܘܼܗܝ.
ܘܪܫܸܡܠܹܗ ܥܲܠܲܝܗܝ ܢܝܼܫܲܢܩܵܐ ܕܨܠܝܼܒܼܵܐ ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܕܵܐܟܼܝܼ ܕܒܘܼܣܸܡܠܘܼܟ ܘܕܘܼܟܼܹܐܠܘܼܟܼ ܠܐܵܢܝܼ ܥܸܣܪܵܐ ܓܲܪ̈ܒܼܵܢܹܐ: ܡܕܵܟܼܝܼ ܠܐܲܢܹܐ ܪ̈ܝܼܓܵܘܵܬܘܼܟܼ ܡ̣ܢ ܐܵܗܵܐ ܛܦܵܝܬܵܐ ܕܓܲܪܒܼܵܐ: ܕܚܵܙܝܼ ܟܵܦܘܿܪܹ̈ܐ ܘܐܲܢܹܐ ܐ݇ܢܵܫܹ̈ܐ ܘܡܗܲܝܡܸܢܝܼ ܒܫܸܡܘܼܟܼ ܩܲܕܝܼܫܵܐ ܘܓܘܼܪܵܐ. ܘܒܗ̇ܝ ܣܵܥܲܬ ܦܸܫܠܹܗ ܡܕܘܼܟܼܝܵܐ ܓܘܼܫܡܲܝ̈ܗܝ ܡ̣ܢ ܓܲܪܒܼܵܐ: ܘܩܸܡܠܗ݇ܘܿܢ ܥܲܠ ܐܲܩܠܵܬܲܝܗ̈ܝ ܘܣܓܼܸܕܠܗ݇ܘܿܢ ܩܵܕ݇ܡ ܩܲܕܝܼܫܵܐ. ܘܫܘܼܒܸܚܠܗ݇ܘܿܢ ܠܐܲܠܵܗܵܐ: ܘܡܘܼܩܘܸܚܠܹܗ ܒܵܒܲܝܗܝ ܒܩܵܠܵܐ ܪܵܡܵܐ ܘܐ݇ܡܸܪܹܗ: ܫܘܼܒܼܚܵܐ ܠܡܫܝܼܚܵܐ ܕܒܝܲܕ ܫܸܡܹܗ ܓܲܪ̈ܒܼܵܢܹܐ ܦܝܵܫܵܐ ܝ݇ܢܵܐ ܡܕܘܼܟܼܝܹ̈ܐ؛ ܘܫܡܸܥܠܗ݇ܘܿܢ ܒܢܲܝ̈ ܡܵܐܬܵܐ ܐܵܗܵܐ ܩܵܠܵܐ: ܘܟܠܲܝܗܝ ܫܘܼܒܸܚܠܗ݇ܘܿܢ ܥܲܡܹܗ ܠܐܲܠܵܗܵܐ.
ܘܐ݇ܡܸܪܹܗ ܡܵܪܝ ܙܲܝܥܵܐ: ܐܲܝܟܵܐ ܝ݇ܠܹܗ ܐܲܠܵܗܵܘܟܼܘܿܢ: ܕܐܵܙܸܠ݇ܢ ܘܚܵܙܸܢܠܹܗ؟ ܐܵܡܪܝܼ ܐܸܠܹܗ ܒܢܲܝ̈ ܡܵܐܬܵܐ: ܠܹܐ ܡܵܨܸܬ ܠܹܐܙܵܠܵܐ ܠܟܸܣܠܹܗ: ܕܗܵܐ ܟܠܝܘܿܡ ܚܲܕ݇ ܒܲܪܢܵܫܵܐ ܡܸܢܲܢ ܒܹܐܟܼܵܠܵܐ ܝ݇ܠܹܗ. ܘܒܐܵܗܵܐ ܝܵܘܡܵܐ: ܢܵܘܒܵܐ ܝ݇ܠܹܗ ܕܒܪܘܿܢܵܐ ܕܐܲܪܡܲܠܬܵܐ ܕܐܵܟܼܸܠ ܠܹܗ. ܕܝܼܠܹܗ ܝܲܟܵܢܵܐ ܩܵܬܘܿܗ̇.
ܘܐ݇ܙܸܠܗ݇ܘܿܢ ܩܲܕܝܼܫܵܐ ܡܵܪܝ ܙܲܝܥܵܐ ܘܬܵܒܼܘܿܪ ܠܟܸܣ ܗ̇ܘ ܬܲܢܝܼܢܵܐ: ܘܐ݇ܡܸܪܹܗ ܩܲܕܝܼܫܵܐ ܠܗ̇ܘ ܬܲܢܝܼܢܵܐ: ܬܵܐ ܦܠܘܿܛ ܠܒܼܲܕܲܪ. ܘܦܠܸܛܠܹܗ ܠܒܼܲܕܲܪ ܬܲܢܝܼܢܵܐ: ܟܲܕ ܪܲܬܪܘܼܬܹܐ ܡ̣ܢ ܩܲܕܝܼܫܵܐ ܡܵܪܝ ܙܲܝܥܵܐ. ܘܫܩܸܠܹܗ ܩܲܕܝܼܫܵܐ ܚܘܼܛܪܹܗ ܡ̣ܢ ܐܝܼ̈ܕܵܬܹܗ ܕܬܵܒܼܘܿܪ: ܘܡܚܹܐܠܹܗ ܒܣܸܦܬܹܗ ܕܬܲܢܝܼܢܵܐ ܘܦܘܼܠܓَܼܝܼܠܹܗ: ܦܲܠܓܹܗ ܠܲܐܟܼܵܐ ܘܦܲܠܓܹܗ ܠܲܐܟܼܵܐ ܠܬܪܹܝ ܣܵܡܹ̈ܐ) ܗܲܠ ܠܕܲܢܒܼܹܗ. ܘܥܘܼܓ̰ܸܒܠܗ݇ܘܿܢ ܒܢܲܝ̈ ܡܵܐܬܵܐ: ܘܫܘܼܒܸܚܠܗ݇ܘܿܢ ܠܐܲܠܵܗܵܐ ܘܗܘܼܝܡܸܢܠܗ݇ܘܿܢ ܒܝܲܕ ܡܫܝܼܚܵܐ.
ܘܡܘܼܬܹܐܠܹܗ ܩܲܕܝܼܫܵܐ ܚܕܵܐ ܓܘܼܪܢܵܐ: ܘܥܒܼܸܕܠܹܗ ܥܡܵܕܵܐ: ܘܡܘܼܥܡܸܕܠܹܗ ܐܸܠܵܝܗܝ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ: ܘܫܒܼܸܩܠܹܗ ܐܸܠܲܝܗܝ ܘܐ݇ܙܸܠܹܗ.
ܘܐ݇ܬܹܐܠܹܗ ܡܲܠܲܐܟܼܵܐ ܘܐ݇ܡܸܪܹܗ ܐܸܠܹܗ: ܩܘܼܡ ܙܸܠ ܝ݇ܬܸܒܼ ܒܛܘܼܪܵܐ ܕܓܘܼܪܙܵܢ: ܗܵܢܵܘ ܕܹܝܢ ܓܲܗܪܵܐ. ܘܐ݇ܙܸܠܹܗ ܩܲܕܝܼܫܵܐ ܘܬܲܠܡܝܼܕܹܗ ܬܵܒܼܘܿܪ ܘܥܡܸܪܗ݇ܘܿܢ ܒܗ̇ܘ ܛܘܼܪܵܐ ܐܲܪܒܥܝܼ ܫܸܢܹ̈ܐ: ܟܲܕ ܡܬܲܓܒܘܼܪܹܐ ܓܵܢܲܝܗܝ ܒܕܘܼܒܵܪܹ̈ܐ ܚܩܝܼܪܹ̈ܐ ܘܐܲܠܵܗܵܝܹ̈ܐ. ܐܝܼܢܵܐ ܡܹܐܟ݂ܘܼܠܬܹܗ ܝܑܼܗ݇ܘܵܐ ܠܲܚܡܵܐ ܘܕܸܒܼܫܵܐ ܕܒܲܪܝܼܵܐ. ܘܒܘܼܣܸܡܠܹܗ ܒܗ̇ܘ ܛܘܼܪܵܐ ܚܲܡܫܡܵܐܐ ܠܲܥ̈ܠܹܐ ܘܣܸܡܝܹ̈ܐ.
ܘܐ݇ܡܸܪܹܗ ܐܸܠܹܗ ܡܲܠܲܐܟܼܵܐ: ܩܘܼܡ ܨܠܝܼ ܠܓܵܘ ܐܲܬܪܵܐ ܕܨܲܦܢܵܐ: ܘܒܵܣܸܡ ܠܒܢܲܝ̈ܢܵܫܵܐ ܕܐܝܼܬ ܒܝܼܵܗ̇. ܘܩܸܡܠܹܗ ܨܠܹܐܠܹܗ ܘܐܵܦ ܬܲܠܡܝܼܕܹܗ ܬܵܒܼܘܿܪ: ܘܐ݇ܙܸܠܗ݇ܘܿܢ ܠܡܵܐܬܵܐ ܡܘܼܪܕܢܝܼ. ܘܐܝܼܬ ܗ݇ܘܵܐ ܒܝܼܘܿܗ̇ ܬܲܠܬܲܥܣܲܪ ܣܸܡܝܹ̈ܐ ܘܠܲܥ̈ܠܹܐ: ܘܒܘܼܣܸܡܠܹܗ ܐܸܠܲܝܗܝ ܒܫܸܡܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ. ܘܐܝܼܬ ܗ݇ܘܵܐ ܒܗ̇ܝ ܡܵܐܬܵܐ ܚܲܕ݇ ܐܲܦܸܣܩܘܿܦܵܐ ܕܫܸܡܹܗ ܡܵܪܝ ܫܲܡܠܝܼ: ܗ̇ܘ ܕܐَܙܸܠ ܗ݇ܘܵܐ ܠܹܗ (ܡܵܪܝ ܙܲܝܥܵܐ) ܥܲܡܹܗ ܒܫܘܼܪܵܝܵܐ ܠܐܘܿܪܸܫܠܸܡ: ܘܟܲܕ ܫܡܸܥܠܹܗ ܕܐ݇ܬܹܐܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܥܒܼܸܪܹܗ ܠܡܵܐܬܵܐ.
ܗܵܝܓܵܐ ܩܸܡܠܹܗ ܐܲܒܼܘܼܢ ܡܵܪܝ ܫܲܡܠܝܼ ܘܐ݇ܬܹܐܠܹܗ ܠܟܸܣܠܲܝܗܝ: ܘܦܸܫܠܹܗ ܡܒܘܼܪܟܼܵܐ ܡܸܢܲܝܗܝ ܕܩܲܕܝܼܫܹ̈ܐ: ܘܩܸܡܠܗ݇ܘܿܢ ܥܲܠ ܐܲܩܠܵܬܲܝ̈ܗܝ: ܘܥܦܸܩܠܗ݇ܘܿܢ (ܚܦܸܩܠܗ݇ܘܿܢ) ܘܢܫܸܩܠܗ݇ܘܿܢ ܩܵܐ ܐܸܚܕܵܕܹ̈ܐ؛ ܘܡܘܼܒܣܸܡܠܗ݇ܘܿܢ ܥܲܡ ܐܸܚܕܵܕܹ̈ܐ ܒܚܘܼܒܵܐ ܐܲܠܵܗܵܝܵܐ. ܘܦܸܫܠܹܗ ܡܵܪܝ ܫܲܡܠܝܼ ܒܚܓ̰ܲܠܬܵܐ ܘܒܥܘܼܓ̰ܵܒܵܐ ܓܘܼܪܵܐ: ܡ̣ܢ ܫܵܦܵܩܲܬ ܐܲܠܵܗܵܝܬܵܐ ܕܡܠܲܓ̰ܠܸܓ̰ܵܐ ܗ݇ܘܵܐ ܥܲܠ ܦܲܪ̈ܨܘܿܦܲܝܗܝ: ܘܕܦܸܫܠܗ݇ܘܿܢ ܙܲܒܘܼܢ ܒܦܲܓܼܪ̈ܲܝܗܝ ܡ̣ܢ ܫܵܗܲܪܬܵܐ ܘܨܵܘܡܵܐ ܘܢܙܝܼܪܘܼܬܵܐ.
ܘܐ݇ܡܸܪܹܗ ܐܸܠܲܝܗܝ ܡܵܪܝ ܫܲܡܠܝܼ: ܩܵܡܘܼ ܒܸܥܒܼܵܕܵܐ ܝ݇ܬܘܿܢ ܠܓܵܢܵܘܟܼܘܿܢ ܗܵܕܟܼܵܐ؟ ܛܥܘܼܡܘܼܢ ܚܲܕ݇ܟ̰ܵܐ ܡܹܐܟܼܘܼܠܬܵܐ ܩܵܐ ܣܢܵܕܬܵܐ ܕܚܲܝܘܿܟܼܘܿܢ. ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ ܡܵܪܝ ܙܲܝܥܵܐ: ܩܵܡܘܼ ܡܲܛܪܸܨܲܚ ܦܲܓܼܪ̈ܲܝ݇ܢ ܒܡܹܐܟܼܘܼܠܬܵܐ: ܘܒܐ݇ܚܲܪܬܵܐ ܒܸܬ ܗܵܘܹܐ ܡܹܐܟܼܘܼܠܬܵܐ ܠܬܵܘܠܥܹ̈ܐ ܘܠܣܵܣܵܐ (ܫ̰ܵܢܟ): ܐܲܝܟܼ ܕܦܝܼܫܬܵܐ ܝ݇ܠܵܗ̇ ܐ݇ܡܝܼܪܬܵܐ: ܒܸܬ ܣܵܪܹܐ ܘܒܸܬ ܦܵܐܸܫ ܚܪܝܼܒܼܵܐ. ܘܦܠܸܛܠܹܗ ܒܵܗܣܲܝܗܝ ܒܟܠܹܗ ܗ̇ܘ ܐܲܬܪܵܐ.
ܘܦܸܫܠܗ݇ܘܿܢ ܡܒܘܼܪ̈ܟܼܹܐ ܡ̣ܢ ܐܲܒܼܘܼܢ ܡܵܪܝ ܫܲܡܠܝܼ: ܘܐ݇ܙܸܠܗ݇ܘܿܢ ܠܡܵܐܬܵܐ ܕܐܸܩܕܝܼܫ.
ܘܐܝܼܬ ܗ݇ܘܵܐ ܓܵܘܘܿܗ̇ ܚܕܵܐ ܒܲܟܼܬܵܐ ܡܸܣܟܹܢܬܵܐ: ܘܐܝܼܬ ܗ݇ܘܵܐ ܠܵܗ̇ ܚܕܵܐ ܒܪܵܬܵܐ ܝܲܟܵܢܬܵܐ: ܘܡ̣ܢ ܣܵܛܵܢܵܐ ܦܝܵܫܵܐ ܗ݇ܘܵܐ ܡܓ̰ܘܼܪܸܒܬܵܐ: ܘܚܲܡܫܵܐ ܫܸܢܹ̈ܐ ܐܝܼܬ ܗ݇ܘܵܐ ܠܵܗ̇ ܐܵܗܵܐ ܡܲܪܥܵܐ. ܘܡܘܼܬܝܵܐܠܵܗ̇ ܝܸܡܵܗ̇ ܠܟܸܣܠܹܗ ܕܩܲܕܝܼܫܵܐ ܡܵܪܝ ܙܲܝܥܵܐ. ܘܪܫܸܡܠܹܗ ܨܠܝܼܒܼܵܐ ܥܲܠܘܿܗ̇ ܘܐ݇ܡܸܪܹܗ ܠܗ̇ܘ ܫܹܐܕܵܐ ܠܝܼܛܵܐ: ܬܵܐ (ܦܠܘܿܛ) ܠܒܼܲܕܲܪ. ܘܦܠܸܛܠܹܗ ܗ݁ܘ ܫܹܐܕܵܐ ܒܕܵܡܵܝܬܵܐ ܕܬܵܘܪܵܐ ܐܘܼܟܵܡܵܐ (ܐ݇ܟܘܼܡܵܐ) ܡ̣ܢ ܦܲܓܼܪܹܗ ܕܝܵܠܕ݇ܬܵܐ ܩܵܕ݇ܡ ܐܵܢܝܼ ܒܢܲܝ̈ܢܵܫܵܐ: ܘܩܸܡܠܵܗ̇ ܝܵܠܕَܬܵܐ ܟܲܕ ܒܣܝܼܡܬܵܐ: ܘܐ݇ܙܸܠܵܗ̇ ܠܒܲܝܬܵܐ ܟܲܕ ܡܵܘܕܘܼܝܹܐ ܠܐܲܠܵܗܵܐ ܘܡܫܵܒܘܿܚܹܐ. ܘܦܸܫܠܗ݇ܘܿܢ ܟܠܲܝܗܝ ܒܢܲܝ̈ ܡܵܐܬܵܐ ܒܥܘܼܓ̰ܵܒܵܐ ܓܘܼܪܵܐ ܥܲܠ ܡܸܢܕܝܼ ܕܥܒܼܸܕܠܹܗ ܩܲܕܝܼܫܵܐ. ܘܐ݇ܙܸܠܹܗ ܠܟܸܣܠܲܝܗܝ: ܘܦܵܠܛܝܼ ܗ݇ܘܵܘ ܠܐܘܼܪܥܹܗ (ܠܐܘܼܪܚܹܗ: ܗ:ܕ. ܕܬܵܦܩܝܼ ܗ݇ܘܵܘ ܒܝܼܝܹܗ) ܟܸܢܫܵܐ ܕܒܢܲܝ̈ܢܵܫܵܐ ܟܲܕ ܡܘܼܬܝܹܐ ܥܲܡܲܝܗܝ ܡܲܪ̈ܥܵܢܹܐ ܘܡܒܵܣܸܡ ܗ݇ܘܵܐ ܠܗ݇ܘܿܢ ܒܚܲܝܠܵܐ ܕܡܵܪܹܗ.
ܘܐ݇ܬܹܐܠܹܗ ܠܡܵܐܬܵܐ ܕܟܘܼܡܵܢܹܐ. ܘܐ݇ܢܵܫܹ̈ܐ ܕܡܵܐܬܵܐ ܒܝܼܫܹ̈ܐ ܗ݇ܘܵܘ: ܘܠܹܐ ܣܵܓܼܕܝܼ ܗ݇ܘܵܘ ܠܐܲܠܵܗܵܐ. ܘܐܝܼܬ ܗ݇ܘܵܐ ܡܵܘܬܵܢܵܐ ܓܵܘ ܡܵܐܬܵܐ: ܘܟܠܝܘܿܡ ܡܵܝܬܝܼ ܗ݇ܘܵܘ ܚܲܡܫܝܼ ܐ݇ܢܵܫܹ̈ܐ: ܘܠܲܝܬ ܗ݇ܘܵܐ ܐ݇ܢܵܫܵܐ ܕܩܵܒܼܸܪ ܗ݇ܘܵܐ ܠܗ݇ܘܿܢ. ܘܗܵܝܓܵܐ ܩܸܡܠܹܗ ܩܲܕܝܼܫܵܐ ܘܐ݇ܡܸܪܹܗ ܐܸܠܲܝܗܝ: ܕܐܸܢ ܕܵܝܪܝܼܬܘܿܢ ܡ̣ܢ ܦܘܼܠܚܵܢܵܘܟܼܘܿܢ ܒܝܼܫܹ̈ܐ: ܘܡܗܲܝܡܸܢܝܼܬܘܿܢ ܒܐܲܠܵܗܵܐ ܚܲܝܵܐ: ܘܒܝܲܕ ܒܪܘܿܢܹܗ ܝܑܼܫܘܿܥ ܡܫܝܼܚܵܐ: ܒܸܬ ܛܵܪܕܸܢ ܠܹܗ ܡܵܘܬܵܢܵܐ ܡܸܢܵܘܟܼܘܿܢ. ܐܵܡܪܝܼ ܐܸܠܹܗ: ܗܹܐ ܡܵܪܝܼ ܡܗܲܝܡܘܿܢܹܐ ܝ݇ܘܲܚ ܒܐܲܠܵܗܘܼܟܼ: ܘܒܸܕܝܵܪܵܐ ܝ݇ܘܲܚ ܡ̣ܢ ܦܘܼܠ̈ܚܵܢܲܝَܢ ܒܝܼܫܹ̈ܐ.
ܘܩܸܡܠܹܗ ܩܲܕܝܼܫܵܐ ܘܒܪܸܟܠܹܗ ܒܨܠܘܿܬܵܐ ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܣܲܒܼܪܵܐ ܛܵܒܼܵܐ ܕܐܵܢܝܼ ܕܬܒܸܥܠܗ݇ܘܿܢ ܐܸܠܹܗ (ܕܗܘܹܐ ܠܗ݇ܘܿܢ ܒܢܲܝ̈ ܒܲܝܬܘܼܬܹܗ. ܗ:ܕ. ܟܪܸܣܛܝܵܢܹܐ): ܡܲܪܚܸܩ ܡܵܘܬܵܢܵܐ ܡ̣ܢ ܐܲܢܹܐ ܒܢܲܝ̈ܢܵܫܵܐ: ܕܚܵܙܝܼ ܘܡܗܲܝܡܸܢܝܼ ܒܝܼܘܼܟܼ. ܘܒܗ̇ܝ ܣܵܥܲܬ ܣܸܠَܩܠܵܗ̇ ܨܠܘܿܬܹܗ ܕܡܵܪܝ ܙܲܝܥܵܐ ܠܲܫܡܲܝܵܐ: ܘܓܪܸܫܠܹܗ ܡܲܠܲܐܟܼܵܐ ܐܝܼܕܹܗ ܡܸܢܲܝܗܝ: ܘܠܵܐ ܡܝܼܬܠܹܗ ܐ݇ܢܵܫܵܐ ܒܗ̇ܘ ܝܵܘܡܵܐ: ܫܒܼܘܿܩ ܡ̣ܢ ܒܵܨܘܿܪܹ̈ܐ ܐܵܢܝܼ ܕܛܸܦܝܹ̈ܐ ܗ݇ܘܵܘ ܡܲܪܥܵܐ ܕܫܲܪܥܘܼܛܵܐ (طاعون).
ܘܙܘܼܚܸܚܠܗ݇ܘܿܢ ܒܢܲܝ̈ ܟܘܼܡܵܢܹܐ ܠܡܵܪܝ ܙܲܝܥܵܐ ܘܬܲܠܡܝܼܕܹܗ ܬܵܒܼܘܿܪ: ܘܗܘܼܝܡܸܢܠܗ݇ܘܿܢ ܒܐܲܠܵܗܵܐ.
ܘܐܝܼܬ ܗ݇ܘܵܐ ܒܗ̇ܝ ܡܵܐܬܵܐ ܚܕܵܐ ܐܲܪܡܸܠܬܵܐ: ܕܫܸܡܵܗ݁ ܪܲܦܩܵܐ: ܘܐܝܼܬ ܗ݇ܘܵܐ ܠܵܗ̇ ܒܪܘܿܢܵܐ ܕܠܲܥܠܵܐ ܗ݇ܘܵܐ ܘܣܸܡܝܵܐ: ܘܠܹܐ ܚܵܙܹܐ ܗ݇ܘܵܐ ܢܘܼܗܪܹܗ ܕܫܸܡܫܵܐ. ܘܡܘܼܬܹܐܠܵܗ̇ ܠܟܸܣ ܩܲܕܝܼܫܵܐ: ܘܪܫܸܠܡܹܗ ܥܲܠܘܼܗܝ ܢܝܼܫܲܢܩܵܐ ܕܨܠܝܼܒܼܵܐ: ܘܒܗ̇ܝ ܥܸܕܵܢܵܐ ܦܸܫܠܹܗ ܦܬܝܼܚܵܐ ܦܘܼܡܹܗ: ܘܦܸܫܠܹܗ ܫܸܪܝܵܐ ܝܸܣܘܿܪܵܐ ܕܠܸܫܵܢܹܗ: ܘܫܘܸܪܹܗ ܘܩܸܡܠܹܗ ܥܲܠ ܐܲܩܠܵܬܘܼ̈ܗܝ. ܘܦܸܫܠܗ݇ܘܿܢ ܟܠܲܝܗܝ ܐ݇ܢܵܫܹ̈ܐ ܒܥܘܼܓ̰ܵܒܵܐ ܓܘܼܪܵܐ؛ ܘܐ݇ܬܹܐܠܗ݇ܘܿܢ ܟܠܲܝܗܝ ܒܢܲܝ̈ ܡܵܐܬܵܐ ܘܣܓܼܸܕܠܗ݇ܘܿܢ ܩܵܕ݇ܡ ܐܲܩܠܵܬܹ̈ܐ ܕܛܘܼܒܼܵܢܵܐ ܘܐ݇ܡܸܪܗ݇ܘܿܢ: ܫܘܼܒܼܚܵܐ ܩܵܐ ܡܫܝܼܚܵܐ: ܕܒܫܸܡܹܗ ܪܵܒܵܐ ܚܲܝ̈ܠܹܐ ܦܝܵܫܵܐ ܝ݇ܢܵܐ ܦܠܝܼܚܹ̈ܐ؛ ܘܡܘܼܥܡܸܕܠܹܗ ܐܸܠܲܝܗܝ ܒܫܸܡܵܐ ܕܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܫܵܐ.
ܘܐ݇ܡܸܪܹܗ ܐܸܠܹܗ ܡܲܠܲܐܟܹܗ ܕܡܵܪܝܵܐ: ܩܘܼܡ ܣܠَܘܿܩ ܠܘܼܟܼ ܡܲܐܟܼܵܐ ܠܡܵܐܬܵܐ ܕܐܲܪܒܘܿܫ: ܗ̇ܝ ܕܐܝܼܬ ܓܵܘܘܿܗ̇ ܡܵܘܬܵܢܵܐ. ܘܩܸܡܠܹܗ ܩܲܕܝܼܫܵܐ ܘܬܲܠܡܝܼܕܹܗ ܥܲܡܹܗ: ܘܣܸܠَܩܠܗ݇ܘܿܢ ܠܡܵܐܬܵܐ ܕܐܲܪܒܘܿܫ. ܘܡܘܼܫܟ̰ܸܚܠܗ݇ܘܿܢ ܬܵܡܵܐ ܒܟܠܝܘܿܡ ܒܸܡܝܵܬܵܐ ܗ݇ܘܵܘ ܐܲܪܒܥܵܐ ܐ݇ܢܵܫܹ̈ܐ: ܘܪܵܒܵܐ ܒܵܟܼܝܼ ܗ݇ܘܵܘ ܘܥܵܒܼܕܝܼ ܗ݇ܘܵܘ ܬܵܙܝܼ ܐ݇ܢܵܫܹ̈ܐ ܕܡܵܐܬܵܐ.
ܘܗܵܝܓܵܐ ܩܸܡܠܗ݇ܘܿܢ ܬܸܪ̈ܘܲܝܗܝ ܒܨܠܘܿܬܵܐ ܩܵܕ݇ܡ ܐܲܠܵܗܵܐ ܘܐ݇ܡܸܪܗ݇ܘܿܢ: ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ: ܪܚܸܡ ܥܲܠ ܐܵܗܵܐ ܡܵܐܬܵܐ: ܘܡܲܪܚܸܩ ܡܸܢܵܗ̇ ܫܲܒܼܛܵܐ (ܩܲܛܝܼܵܐ) ܕܟܲܪܒܵܐ: ܕܚܵܙܝܼ ܒܢܲܝ̈ܢܵܫܵܐ ܘܡܗܲܝܡܸܢܝܼ ܒܝܼܘܼܟܼ. ܘܒܗ̇ܝ ܣܵܥܲܬ ܦܸܫܠܹܗ ܡܘܼܟܠܝܼܵܐ ܡܲܠܲܐܟܼܵܐ ܡܲܚܪܸܒܼܵܢܵܐ: ܘܓܪܸܫܠܹܗ ܐܝܼܕܸܗ ܡܸܢܲܝܗܝ.
ܘܒܵܬܲܪ ܐܲܢܹܐ ܐ݇ܬܹܐܠܹܗ ܩܲܕܝܼܫܵܐ ܘܐܵܦ ܬܵܒܼܘܿܪ ܠܐܲܬܪܵܐ ܕܒܲܙ ܠܸܥܡܵܪܵܐ ܬܵܡܵܐ. ܘܠܵܐ ܡܘܼܫܸܟَ̰ܚܠܗ݇ܘܿܢ ܓܵܘܵܗ̇ ܕܘܼܟܬܵܐ ܕܚܵܫܚܵܐ ܗ݇ܘܵܐ ܠܸܥܡܵܪܐ: ܣܵܒܵܒ ܕܛܵܝܸܦܵܐ ܕܩܸܫܝܵܐ ܕܩܕܵܠܵܐ ܗ݇ܘܵܘ. ܘܫܒܼܸܩܠܹܗ ܐܸܠܵܝܗܝ.
ܘܥܒܼܸܪܹܗ ܠܐܲܬܪܵܐ ܕܓ̰ܝܼܠܲܡܓ̰ܝܼܠܘܼ: ܘܚܙܹܐ ܠܹܗ ܓܵܘܵܗ̇ ܕܘܼܟܬܵܐ ܕܚܵܫܚܵܐ ܠܸܥܡܵܪܬܵܐ: ܒܫܸܦܘܿܠܵܐ ܕܛܘܼܪܵܐ ܕܘܼܪܵܟ. ܡܵܪܵܐ ܕܐܲܬܪܵܐ ܝܑܼܗ݇ܘܵܐ ܡܲܠܟܵܐ ܒܵܠܲܩ ܒܲܪ ܡܲܠܟܵܐ ܙܘܼܪܲܩ. ܘܦܫܸܛܠܗ݇ܘܿܢ ܘܡܛܹܐܠܗ݇ܘܿܢ ܒܚܲܝܠܵܐ ܐܲܠܵܗܵܝܵܐ ܠܐܲܬܪܵܐ ܗ̇ܘ ܒܪܝܼܟܼܵܐ ܘܡܒܘܼܪܟܼܵܐ ܓ̰ܝܼܠܘܼ.
ܘܐ݇ܡܸܪܹܗ ܩܲܕܝܼܫܵܐ ܠܬܲܠܡܝܼܕܹܗ ܬܵܒܼܘܿܪ: ܩܘܼܡ ܐܵܙܵܠ݇ܚ ܠܟܸܣ ܡܲܠܟܵܐ ܒܵܠܲܩ: ܘܛܵܠܒܲܚ ܡܸܢܹܗ ܦܲܥ̈ܠܹܐ (ܦܲܠܵܚܹ̈ܐ) ܠܦܘܼܠܚܵܢܵܐ ܕܗܲܝܟܠܵܐ. ܘܐ݇ܡܸܪܹܗ ܩܲܕܝܼܫܵܐ ܡܵܪܝ ܙܲܝܥܵܐ ܠܬܵܒܼܘܿܪ: ܩܘܼܡ ܫܩܘܼܠ ܐܵܗܵܐ ܓܘܼܕܵܐ (ܓܘܼܕܵܐ ܕܡܝܼܵܐ) ܥܲܡܲܢ ܠܣܢܝܼܩܘܼܬܵܐ ܕܡܲܠܟܵܐ. ܘܡܸܠܝܵܐܠܹܗ ܬܲܠܡܝܼܕܹܗ ܡܝܼܵܐ: ܘܛܥܝܼܢܵܐܠܹܗ ܥܲܠ ܚܲܨܹܗ.
ܘܐ݇ܙܸܠܗ݇ܘܿܢ ܬܸܪ̈ܘܲܝܗܝ ܠܟܸܣ ܡܲܠܟܵܐ ܘܒܘܼܩܸܪܗ݇ܘܿܢ ܒܫܠܵܡܹܗ. ܘܩܘܼܒܸܠܹܗ ܐܸܠܲܝܗܝ ܡܲܠܟܵܐ ܒܚܲܕܘܼܬܵܐ: ܘܡܥܵܓ̰ܸܒ ܗ݇ܘܵܐ ܒܚܸܙܘܹܗ ܕܩܲܕܝܼܫܵܐ ܡܵܪܝ ܙܲܝܥܵܐ: ܘܕܵܐܟܼܝܼ ܡܒܲܗܪܸܢ ܗ݇ܘܵܐ ܦܲܪܨܘܿܦܹܗ؛ ܘܪܫܸܡܠܹܗ ܨܠܝܼܒܼܵܐ ܩܲܕܝܼܫܵܐ ܥܲܠ ܗ̇ܘ ܓܘܼܕܵܐ: ܘܗܘܹܐ ܠܗ݇ܘܿܢ ܐܵܢܝܼ ܡܝܼܵܐ ܚܲܡܪܵܐ ܫܡܲܝܵܢܵܐ. ܘܐ݇ܡܸܪܹܗ ܡܲܠܟܵܐ: ܐܵܗܵܐ ܚܲܡܪܵܐ ܫܡܲܝܵܢܵܐ ܝ݇ܠܹܗ: ܠܹܐ ܝ݇ܠܹܗ ܡ̣ܢ ܓܸܦܬܵܐ ܕܥܲܠ ܐܲܪܥܵܐ. ܘܥܘܼܓ̰ܸܒܠܹܗ ܡܲܠܟܵܐ: ܘܓ̰ܘܼܘܸܒܠܹܗ ܘܐ݇ܡܸܪܹܗ ܠܩܲܕܝܼܫܵܐ ܡܵܪܝ ܙܲܝܥܵܐ: ܛܠܘܼܒ ܡܸܢܝܼ ܟܠ ܡܸܢܕܝܼ ܕܒܵܥܝܸܬ ܐܲܢ݇ܬ ܒܸܬ ܥܲܒ݂ܕܸܢ.
ܘܓ̰ܘܼܘܸܒܠܹܗ ܩܲܕܝܼܫܵܐ ܘܐ݇ܡܸܪܹܗ ܠܡܲܠܟܵܐ: ܚܲܝܸܬ ܠܥܵܠܲܡ: ܒܵܥܝܸܢ ܡܸܢܘܼܟܼ ܕܒܵܢܸܬ ܠܝܼ ܒܲܝܬܵܐ. ܘܐ݇ܡܸܪܹܗ ܐܸܠܹܗ ܡܲܠܟܵܐ ܒܵܠܵܩ ܟܲܕ ܦܨܝܼܚܵܐ ܘܚܸܕܝܵܐ: ܕܗܵܐ ܐܵܢܵܐ ܘܟܠܲܝܗܝ ܒܢܲܝ̈ ܐܵܗܵܐ ܐܲܬܪܵܐ ܪ̈ܝܼܓܵܘܵܬܹܐ ܘܙܒܼܝܼܢܹ̈ܐ ܕܕܝܼܘܼܟܼ. ܘܡܸܢܕܝܼ ܕܒܵܥܝܸܬ؛ ܒܸܬ ܥܲܒܼܕܲܚ ܥܲܡܘܼܟܼ.
ܗܵܝܓܵܐ ܩܸܡܠܹܗ ܩܲܕܝܼܫܵܐ ܘܣܓܼܸܕܠܹܗ ܠܡܲܠܟܵܐ: ܘܒܘܼܪܸܟܼܠܹܗ ܘܐ݇ܡܸܪܹܗ ܐܸܠܹܗ: ܡܵܪܝܵܐ ܐܲܠܵܗܵܐ ܡܒܵܪܸܟܼܠܘܼܟܼ ܠܥܵܠܲܡ: ܘܟܠܲܝܗܝ ܕܸܫ̰ܡܸܢܘܼܟܼ ܗܵܘܝܼ ܟܘܼܒܼܫܵܐ (ܙܵܒܸܛ) ܬܚܹܝܬ ܐܲܩܠܵܬܘܼ̈ܟܼ. ܐܵܡܹܝܢ. ܘܕܹܝܪܗ݇ܘܿܢ ܩܲܕܝܼܫܵܐ ܘܬܲܠܡܝܼܕܹܗ ܠܕܘܼܟܬܲܝܗܝ.
ܘܩܸܡܠܹܗ ܡܲܠܟܵܐ ܘܓ̰ܘܼܡܸܥܠܹܗ ܠܟܠܲܝܗܝ ܚܲܝ̈ܠܵܘܵܬܹܗ: ܘܟܠܹܗ ܐܲܬܪܐ ܕܕܵܣܵܢ ܥܸܠܵܝܬܵܐ: ܘܐ݇ܬܹܐܠܗ݇ܘܿܢ ܕܒܵܢܝܼ ܥܘܼܡܪܵܐ ܩܵܐ ܩܲܕܝܼܫܵܐ. ܐܝܼܢܵܐ ܡܝܼܵܐ ܠܲܝܬ ܗ݇ܘܵܐ ܒܗ̇ܝ ܕܘܼܟܬܵܐ ܕܫܸܪܝܵܐ ܗ݇ܘܵܐ ܓܵܘܘܿܗ̇ ܩܲܕܝܼܫܵܐ: ܘܡܚܹܐܠܹܗ ܩܲܕܝܼܫܵܐ ܒܚܘܼܛܪܹܗ ܠܐܲܪܥܵܐ: ܘܒܗ̇ܝ ܥܸܕܵܢܵܐ ܢܒܼܸܥܠܗ݇ܘܿܢ ܡܝܼܵܐ ܡ̣ܢ ܓܹܢ݇ܒܵܐ ܕܣܸܡܵܠܹܗ ܕܗܲܝܟܠܵܐ.
ܘܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܕܫܸܡܹܗ ܡܲܠܟܝܼܙܕܸܩ ܡ̣ܢ ܐܵܗܵܐ ܐܲܬܪܵܐ ܕܓ̰ܝܼܠܘܼ: ܘܐܝܼܬ ܗ݇ܘܵܐ ܠܹܗ ܚܲܕ݇ ܒܪܘܿܢܵܐ: ܘܡܝܼܬ ܠܹܗ ܒܗ̇ܘ ܝܵܘܡܵܐ: ܘܛܥܸܢܠܹܗ ܘܡܘܼܬܹܐܠܹܗ ܠܟܸܣ ܩܲܕܝܼܫܵܐ: ܘܐܵܦ ܚܲܕ݇ ܐ݇ܢܵܫܵܐ ܣܸܡܝܵܐ ܡ̣ܢ ܐܲܬܪܵܐ ܕܒܲܙ ܡܘܼܬܹܐܠܗ݇ܘܿܢ ܠܟܸܣܠܹܗ.
ܘܗܵܝܓܵܐ ܩܸܡܠܹܗ ܩܲܕܝܼܫܵܐ ܒܨܠܘܿܬܵܐ: ܘܦܫܸܛܠܹܗ ܐܝܼܕܵܬܘܼ̈ܗܝ ܠܫܡܲܝܵܐ ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܐܲܝܟܼ ܕܢܘܼܚܸܡܠܘܼܟܼ ܠܒܪܘܿܢܹܗ ܕܐܲܪܡܲܠܬܵܐ ܕܡ̣ܢ ܢܵܐܹܝܢ ܡܕܝܼܢ݇ܬܵܐ: ܗܵܕܟܼܵܐ ܡܢܵܚܸܡ ܠܹܗ ܠܐܵܗܵܐ ܝܵܠܵܕَܐ ܡ̣ܢ ܫܸܢܬܹܗ ܕܡܵܘܬܵܐ ܝܲܥܢܵܐ (ܕܠܹܐ ܣܵܒܼܥܹܐ). ܘܒܗ̇ܝ ܣܵܥܲܬ ܦܸܫܠܹܗ ܡܢܘܼܚܡܵܐ ܝܵܠܵܕَܐ ܘܣܓܼܸܕܠܹܗ ܐܸܠܹܗ. ܘܐܵܦ ܠܗ̇ܘ ܣܸܡܝܵܐ ܪܫܸܡܠܹܗ ܒܢܝܼܫܲܢܩܵܐ ܕܨܠܝܼܒܼܵܐ: ܘܦܸܫܠܗ݇ܘܿܢ ܦܬܝܼܚܹ̈ܐ ܥܲܝܢܘܼ̈ܗܝ. ܘܡܘܼܩܘܸܚܠܹܗ ܡܲܠܟܵܐ ܒܩܵܠܵܐ ܪܵܡܵܐ ܘܟܠܲܝܗܝ ܒܢܲܝ̈ ܐܲܬܪܵܐ ܥܲܡܹܗ ܘܐ݇ܡܸܪܗ݇ܘܿܢ: ܫܘܼܒܼܚܵܐ ܠܐܲܠܵܗܵܐ ܒܵܪܘܿܝܵܐ ܕܲܫܡܲܝܵܐ ܘܐܲܪܥܵܐ: ܘܫܘܼܒܼܚܵܐ ܠܡܫܝܼܚܵܐ: ܕܒܫܸܡܹܗ ܡܝܼܬܹ̈ܐ ܒܸܩܝܵܡܵܐ ܝ݇ܢܵܐ: ܘܣܸܡܝܹ̈ܐ ܒܸܚܙܵܝܵܐ ܝَܢܵܐ.
ܘܗܵܝܓܵܐ ܓ̰ܡܸܥܠܗ݇ܘܿܢ ܡܗܲܝܡܢܼ̈ܐ ܒܪ̈ܝܼܟܼܹܐ ܕܐܲܬܪܵܐ ܕܕܵܣܵܢ ܠܟܸܣ ܩܲܕܝܼܫܵܐ ܘܐ݇ܡܸܪܗ݇ܘܿܢ ܐܸܠܹܗ: ܐܲܒܼܘܼܢ (ܒܵܒܲܢ) ܩܲܕܝܼܫܵܐ ܡܵܪܝ ܙܲܝܥܵܐ: ܚܙܝܼ ܠܐܵܗܵܐ ܐܲܬܪܵܐ: ܐܝܼܬ ܓܵܘܹܗ ܡܵܘܬܵܢܵܐ ܕܫܲܪܥܘܼܛܵܐ. ܘܩܸܡܠܸܗ ܩܲܕܝܼܫܵܐ ܒܨܠܘܿܬܵܐ ܘܥܒܼܸܕܠܹܗ ܒܵܥܘܼܬܼܵܐ: ܬܪܹܝܢܒ̇ܫܲܒܵܐ ܘܬܠܵܬܼܒ̇ܫܲܒܵܐ ܘܐܲܪܒܲܥܒ̇ܫܲܒܵܐ: ܘܦܸܫܠܹܗ ܟܸܠܝܵܐ ܡܵܘܬܵܐ ܡܸܢܲܝܗܝ: ܘܒܐܵܢܝܼ ܝܵܘܡܵܬܹ̈ܐ ܠܵܐ ܡܝܼܬܠܹܗ ܐ݇ܢܵܫܵܐ ܡܸܢܲܝܗܝ: ܐܸܠܵܐ ܒܨܘܿܪܹ̈ܐ ܡ̣ܢ ܐܵܢܝܼ ܕܛܸܦܝܹ̈ܐ ܗ݇ܘܵܘ ܒܫܲܪܥܘܼܛܵܐ. ܘܚܙܹܐܠܹܗ ܩܲܕܝܼܫܵܐ ܠܡܲܠܲܐܟܼܵܐ ܕܡܲܚܪܘܼܒܼܹܐ ܗ݇ܘܵܐ ܐܸܠܲܝܗܝ ܘܐ݇ܡܸܪܹܗ ܐܸܠܹܗ: ܩܵܡܘܼ ܡܛܵܠܘܿܩܹܐ ܝ݇ܘܸܬ ܠܐܵܗܵܐ ܦܸܣܩܹܗ ܕܡܫܝܼܚܵܐ؟ ܘܫܡܸܥܠܹܗ ܐܲܠܵܗܵܐ ܒܵܥܘܼܬܹܗ ܘܨܵܘܡܹܗ ܘܨܠܘܿܬܹܗ: ܘܓܪܸܫܠܹܗ ܡܲܠܲܐܟܼܵܐ ܐܝܼܕܹܗ ܡ̣ܢ ܐܵܗܵܐ ܬܲܥܠܸܡܬܵܐ. ܘܡ̣ܢ ܗ̇ܘ ܝܵܘܡܵܐ: ܐ݇ܚܪܹܢܵܐ ܠܵܐ ܦܸܫܠܹܗ ܡܸܚܝܵܐ ܐܵܗܵܐ ܐܲܬܪܐ ܒܫܲܪܥܘܼܛܵܐ: ܒܨܠܵܘܵܬܹ̈ܗ ܕܩܲܕܝܼܫܵܐ ܡܵܪܝ ܙܲܝܥܵܐ. ܘܗܘܼܝܡܸܢܠܹܗ ܡܲܠܟܵܐ ܘܟܠܹܗ ܐܲܬܪܵܐ ܕܕܵܣܵܢ ܥܸܠܵܝܬܵܐ.
ܘܗܵܝܓܵܐ ܫܘܼܪܹܐܠܹܗ ܡܲܠܟܵܐ ܕܒܵܢܹܐ ܥܘܼܡܪܵܐ ܠܩܲܕܝܼܫܵܐ ܒܦܘܼܩܕܵܢܵܐ ܕܡܵܪܝܵܐ ܐܲܠܵܗܵܐ: ܘܫܘܼܕܪܹܗ ܠܐܿܬܪܵܐ ܘܐ݇ܬܹܐܠܗ݇ܘܿܢ ܦܥ̈ܠܹܐ. ܘܗܵܝܓܵܐ ܫܘܼܪܹܐܠܗ݇ܘܿܢ ܦܠܵܚܹ̈ܐ ܒܝܲܕ ܒܸܢܝܵܢܵܐ ܕܗܲܝܟܠܵܐ: ܟܠܝܘܿܡ ܦܵܠܚܝܼ ܗ݇ܘܵܘ ܚܲܕ݇ ܐܲܠܦܵܐ ܦܵܥ̈ܠܹܐ: ܘܥܸܣܪܝܼ ܘܐܲܪܒܿܥܵܐ ܟܵܘܸܕܢܹ̈ܐ ܟܹܐܦܹ̈ܐ ܡܵܝܬ݇ܝܼ ܗ݇ܘܵܘ. ܘܟܠܝܘܿܡ ܡܹܐܟܼܘܼܠܬܵܐ ܘܫܬܵܝܬܵܐ ܥܵܒܼܕܝܼ ܗ݇ܘܵܘ: ܬܠܵܬܝܼ ܬܵܘܪܹ̈ܐ ܘܚܲܡܫܝܼ ܦܵܐܪܹ̈ܐ ܦܵܪܡܝܼ ܗ݇ܘܵܘ.
ܘܓ̰ܡܸܥܠܗ݇ܘܿܢ ܒܢܲܝ̈ܢܵܫܵܐ ܡ̣ܢ ܓܘܼܪܵܐ ܘܗܲܠ ܠܙܥܘܿܪܵܐ ܐܲܪܒܿܥܵܐ ܐܲܠܦܹ̈ܐ ܒܢܲܝ̈ܢܵܫܵܐ: ܘܒܢܹܐܠܗ݇ܘܿܢ ܠܗܲܝܟܠܵܐ. ܘܣܘܼܩܸܠܹܗ ܒܟܠܲܝܗܝ ܫܘܼܦܪܹ̈ܐ ܪ̈ܘܼܚܵܢܵܝܹܐ ܒܟܵܡܝܼܠܘܼܬܵܐ:
ܘܚܬܸܡܠܹܗ ܒܚܲܝܠܵܐ ܐܲܠܵܗܵܝܵܐ ܘܒܗܲܝܸܪܬܹܗ ܕܡܫܝܼܚܵܐ.
ܘܚܬܸܡܠܹܗ ܒܸܢܝܵܢܹܗ ܕܗܲܝܟܠܵܐ ܒܚܲܡܫܵܐ ܝܲܪ̈ܚܹܐ ܘܬܠܵܬܵܐ ܝܵܘܡܹ̈ܐ: ܐܝܼܵܪ ܘܚܙܝܼܪܵܢ ܘܬܲܡܘܼܙ ܘܐܵܒ ܘܐܝܼܠܘܿܠ ܘܬܸܫܪܝܼܢ ܩܲܕ݇ܡܵܝܵܐ: ܘܬܠܵܬܵܐ ܝܵܘܡܹ̈ܐ ܡ̣ܢ ܬܸܫܪܝܼܢ ܐ݇ܚܲܪܵܝܵܐ: ܘܟܡܸܠܹܗ ܒܸܢܝܵܢܹܗ ܕܐܵܗܵܐ ܥܘܼܡܪܵܐ ܡܸܠܝܵܐ ܚܲܝܹ̈ܐ ܘܚܘܼܠܡܵܢܵܐ ܘܐܵܣܝܘܼܬܵܐ ܩܵܐ ܐܵܢܝܼ ܕܡܗܝܡܸܢܝܼ ܒܝܼܝܹܗ. ܐܵܡܹܝܢ.
ܘܐܝܼܬ ܗ݇ܘܼܵܐ ܠܒܲܕܲܪ ܡܸܢܹܗ ܕܗܲܝܟܠܵܐ ܚܕܵܐ ܟܹܐܦܵܐ ܐܘܼܟܵܡܬܵܐ (ܐ݇ܟܘܼܡܬܵܐ) : ܘܡܝܼܵܐ ܢܵܒܼܥܝܼ ܗ݇ܘܵܐ ܡ̣ܢ ܬܚܘܿܬܘܿܗ̇. ܘܡܘܼܩܛܸܥܠܹܗ ܡܲܠܟܵܐ ܒܵܠܵܩ ܠܐܵܢܝܼ ܡܝܼܵܐ ܕܢܒܼܸܥܠܗ݇ܘܿܢ ܡ̣ܢ ܬܚܘܿܬ ܕܗܲܝܟܠܵܐ ܒܝܲܕ ܨܠܘܵܬܼܵܗ ܕܩܲܕܝܼܫܵܐ. ܘܝܼܗ݇ܘܵܘ ܒܓܹܢ݇ܒܵܐ ܕܣܸܡܵܠܹܗ ܕܗܲܝܟܠܵܐ.
ܘܗܵܝܓܵܐ ܩܸܡܠܹܗ ܡܲܠܟܵܐ ܒܨܲܦܪܵܐ ܕܐܵܙܹܠ ܠܐܲܬܪܹܗ: ܘܛܠܸܒܠܹܗ ܒܘܼܪ̈ܟܵܬܹܐ ܡܸܢܹܗ ܕܩܲܕܝܼܫܵܐ. ܘܗܵܝܓܵܐ ܩܲܕܝܼܫܵܐ ܡܵܪܝ ܙܲܝܥܵܐ ܡܘܼܬܸܒܼܠܹܗ ܐܝܼܕܸܗ ܥܲܠ ܡܲܠܟܵܐ ܒܵܠܵܩ ܘܐ݇ܡܸܪܹܗ: ܐܲܠܵܗܵܐ ܡܵܪܐ ܕܟܠ ܡܒܵܪܸܟܼ ܠܵܘܟܼܘܿܢ: ܘܟܠܲܝܗܝ ܒܘܼܪ̈ܟܵܬܹܐ ܫܡܲܝܵܢܝܵܬܹ̈ܐ ܗܵܘܝܼ ܥܲܠܵܘܟܼܘܿܢ: ܘܒܪ̈ܝܼܟܼܹܐ ܗܵܘܝܼܬܘܿܢ ܒܡܵܪܲܢ: ܘܒܪܝܼܟܼܬܵܐ ܗܵܘܝܵܐ ܐ݇ܬܵܝܬܵܘܟ̣ܘܿܢ ܠܟܸܣܠܲܢ. ܘܕܸܫ̰ܡܸܢܵܘܟܼܘܿܢ ܗܵܘܝܼ ܥܲܦܪܵܐ ܬܚܹܝܬ ܐܲܩܠܵܬ̈ܘܟ̣ܘܿܢ: ܘܠܵܐ ܡܵܨܝܼ ܠܸܩܝܵܡܵܐ ܕܲܠܩܘܼܒܼܠܵܘܟ̣ܘܿܢ. ܘܓ̰ܘܼܘܸܒܠܹܗ ܟܠܹܗ ܛܵܝܸܦܵܐ ܘܐ݇ܡܸܪܹܗ: ܐܵܡܹܝܢ. ܠܡܲܠܟܵܐ: ܘܥܦܸܩܠܹܗ (ܘܚܦܸܩܠܹܗ) ܠܡܲܠܟܵܐ؛ ܘܢܫܸܩܠܗ݇ܘܿܢ ܠܸܚܕܵܕܹ̈ܐ ܚܘܼܒܵܢܵܐܝܼܬ. ܘܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܙܹܠ ܠܘܼܟܼ ܒܫܠܵܡܵܐ: ܘܐܲܠܵܗܵܐ ܡܵܪܵܐ ܕܟܠ ܗܵܘܹܐ ܥܲܡܘܼܟܼ ܟܠܲܝܗܝ ܝܵܘܡܵܬܹ̈ܐ ܕܚܲܝܘܼ̈ܟܼ. ܐܵܡܹܝܢ.
ܘܐ݇ܙܸܠܹܗ ܡ̣ܢ ܠܟܸܣܠܲܝܗܝ: ܘܟܠܲܝܗܝ ܐ݇ܢܵܫܹ̈ܐ ܕܥܲܡܹܗ ܠܒܵܬܲܝ̈ܗܝ: ܘܦܸܫܠܹܗ ܩܲܕܝܼܫܵܐ ܡܵܪܝ ܙܲܝܥܵܐ ܘܬܲܠܡܝܼܕܹܗ ܬܵܒܼܘܿܪ ܒܥܘܼܡܪܵܐ. ܘܟܠܝܘܿܡ ܡܵܝܬ݇ܝܼ ܗ݇ܘܵܘ ܠܟܸܣܠܹܗ ܡܲܪ̈ܥܵܢܹܐ ܘܠܲܥ̈ܠܹܐ ܘܦܸܠܬܹ̈ܐ ܘܣܸܡܝܹ̈ܐ: ܠܟܠܲܝܗܝ ܡܒܵܣܸܡ ܗ݇ܘܵܐ ܒܚܲܝܠܵܐ ܕܡܵܪܹܗ. ܬܪܹܝ ܐܲܠܦܹ̈ܐ ܡܲܪ̈ܥܵܢܹܐ ܒܘܼܣܸܡܠܹܗ ܒܚܲܝܘܼ̈ܗܝ: ܘܬܪܹܝܡܵܐܐ ܘܬܠܵܬܵܐ ܡܝܼܬܹ̈ܐ ܡܢܘܼܚܸܡܠܹܗ. ܘܗܘܹܐܠܗ݇ܘܿܢ ܒܐܵܗܵܐ ܥܘܼܡܪܐ ܬܪܹܝ ܫܸܢܹ̈ܐ ܘܬܸܫܥܵܐ ܝܲܪ̈ܚܹܐ ܗ݁ܘ ܘܬܲܠܡܝܼܕܹܗ.
ܘܬܵܒܼܘܿܪ ܡܪܸܥܠܹܗ ܬܠܵܬܵܐ ܝܵܘܡܹ̈ܐ: ܘܗܘܹܐ ܠܗ݇ܘܿܢ ܟܠܲܝܗܝ ܝܵܘܡܹ̈ܐ ܕܬܵܒܼܘܿܪ ܬܸܫܥܝܼ ܫܸܢܹ̈ܐ ܘܬܠܵܬܵܐ ܝܲܪ̈ܚܹܐ: ܘܡܝܼܬܠܹܗ. ܘܗܵܝܓܵܐ ܡܵܪܝ ܙܲܝܥܵܐ ܩܸܡܠܹܗ ܘܫܘܼܕܸܪܹܗ ܠܟܠܹܗ ܐܲܬܪܵܐ ܕܓ̰ܝܼܠܲܡܓ̰ܝܼܠܘܼ: ܘܐ݇ܬܹܐܠܗ݇ܘܿܢ ܟܠܲܝܗܝ ܡܗܲܝܡܢܹ̈ܐ ܒܪ̈ܝܼܟܼܹܐ: ܘܫܩܸܠܗ݇ܘܿܢ ܠܦܲܓܼܪܹܗ ܕܩܲܕܝܼܫܵܐ ܡܵܪܝ ܬܵܒܼܘܿܪ: ܘܟܘܼܪܡܸܟܼܠܗ݇ܘܿܢ ܒܠܒܼܝܼ̈ܫܝܵܬܹܐ ܫܲܦܝܼܪܹ̈ܐ: ܘܡܘܼܬܸܒܼܠܗ݇ܘܿܢ ܒܓܵܘ ܗܲܝܟܠܵܐ ܒܲܪܵܝܵܐ: ܘܥܒܼܸܕܠܗ݇ܘܿܢ ܥܲܠܹܗ ܬܵܙܝܼ ܬܠܵܬܵܐ ܝܵܘܡܹ̈ܐ. ܘܗܘܹܐ ܠܹܗ ܫܘܼܢܵܝܹܗ ܕܡܵܪܝ ܬܵܒܼܘܿܪ ܒܝܵܘܡܵܐ ܕܪܹܫܹܗ ܕܝܲܪܚܵܐ ܕܐܝܼܠܘܿܠ. (I)
ܘܒܵܬܲܪ ܐܲܢܹܐ: ܡܵܪܝ ܙܲܝܥܵܐ ܠܹܐ ܫܵܠܹܐ ܗ݇ܘܵܐ ܡ̣ܢ ܒܸܟܼܝܵܐ ܩܵܐ ܬܠܵܬܵܐ ܝܲܪ̈ܚܹܐ ܡ̣ܢ ܒܵܬܲܪ ܕܡܝܼܬܠܹܗ ܬܲܠܡܝܼܕܹܗ. ܘܗܘܹܐ ܠܗ݇ܘܿܢ ܟܠܲܝܗܝ ܝܵܘܡܵܬܹ̈ܐ ܕܩܲܕܝܼܫܵܐ ܡܵܪܝ ܙܲܝܥܵܐ ܡܵܐܐ ܘܥܸܣܪܝܼ ܘܬܲܪܬܹܝ ܫܸܢܹ̈ܐ. ܘܝ݇ܕܸܥܠܹܗ ܩܲܕܝܼܫܵܐ ܒܓܵܢܹܗ ܕܡܛܹܐܠܹܗ ܝܵܘܡܵܐ ܕܦܵܠܸܛ (ܕܫܘܼܢܵܝܹܗ) ܡ̣ܢ ܐܵܗܵܐ ܥܵܠܡܵܐ: ܘܫܘܼܕܸܪܹܗ ܘܩܪܹܐܠܹܗ ܠܟܠܲܝܗܝ ܡܗܲܝܡܢܹ̈ܐ ܕܐܲܬܪܵܐ ܕܒܵܩܸܪ ܒܫܠܵܡܵܝ̈ܗܝ.
ܘܫܡܸܥܠܗ݇ܘܿܢ ܟܠܲܝܗܝ ܒܢܲܝ̈ ܐܲܬܪܵܐ ܕܓ̰ܝܼܠܘܼ: ܘܐ݇ܬܹܐܠܗ݇ܘܿܢ ܠܸܚܙܵܝܹܗ. ܘܐ݇ܡܸܪܹܗ ܐܸܠܲܝܗܝ: ܐ݇ܬܹܐܡܘܿܢ ܒܫܠܵܡܵܐ ܝܵܐ ܡܗܲܝܡܢܹ̈ܐ ܒܪ̈ܝܼܟܼܹܐ: ܗܵܘܝܼܬܘܿܢ ܒܝܼܕܵܥܝܵܐ: ܕܗܵܐ ܐܵܢܵܐ ܒܹܐܙܵܠܵܐ ܝ݇ܘܸܢ ܒܐܘܼܪܚܹܗ ܕܟܠܹܗ ܥܵܠܡܵܐ (ܒܸܡܝܵܬܵܐ ܝَܘܸܢ).
ܘܡܘܼܪܸܡܠܗ݇ܘܿܢ ܩܵܠܲܝ̈ܗܝ ܒܝܲܕ ܒܟܼܵܝܬܵܐ ܡܲܪܝܼܪܬܵܐ: ܘܛܠܸܒܠܗ݇ܘܿܢ ܘܐ݇ܡܸܪܗ݇ܘܿܢ ܠܡܵܪܝ ܙܲܝܥܵܐ: ܒܵܪܸܟܼܠܹܗ ܡܵܪܝܼ ܠܐܵܗܵܐ ܐܲܬܪܵܐ ܘܥܲܡܪ̈ܵܢܘܼܗܝ.
ܘܗܵܝܓܵܐ ܩܸܡܠܹܗ ܩܲܕܝܼܫܵܐ ܘܒܟܼܹܐܠܹܗ ܪܵܒܵܐ: ܘܡܦܘܼܪܦܸܠܹܗ ܩܵܕ݇ܡ ܡܵܪܝܵܐ ܐܲܠܵܗܵܐ ܘܐ݇ܡܸܪܹܗ: ܝܵܐ ܨܲܚܨܝܼܵܢܵܐ ܕܠܸܒܵܐ ܘܟܘܼܠܝܵܬܹ̈ܐ: ܘܩܵܕ݇ܡܘܼܟܼ ܐܲܠܵܗܵܐ ܒܸܣܓܼܵܕܵܐ ܝ݇ܘܸܢ: ܘܡܸܢܘܼܟܼ ܪ̈ܲܚܡܹܐ ܒܸܛܠܵܒܵܐ ܝ݇ܘܸܢ: ܥܲܠ ܐܵܗܵܐ ܐܲܬܪܵܐ ܘܥܲܡܪ̈ܵܢܘܼܗܝ: ܘܐܵܦ ܥܲܠ ܟܠ ܒܲܪܢܵܫܵܐ ܕܕܵܟܼܸܪ ܫܸܡܘܼܟܼ ܩܲܕܝܼܫܵܐ: ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ: ܘܐܵܦ ܫܸܡܹܗ ܕܪܝܼܓܘܼܟܼ ܙܲܝܥܵܐ: ܡܲܪܚܸܩ ܡܸܢܲܝܗܝ ܒܲܪܕܵܐ ܘܟܸܦܢܵܐ ܘܡܵܘܬܵܢܵܐ.
ܘܡܘܼܫܡܸܥܠܹܗ (ܐܲܠܵܗܵܐ) ܩܵܠܵܐ ܡ̣ܢ ܫܡܲܝܵܐ ܟܲܕ ܒܹܐܡܵܪܐ: ܡܘܼܪܚܸܩܠܝܼ ܘܡ̣ܢ ܕܪܹܫ ܒܸܬ ܡܲܪܚܸܩܸܢ ܡܸܢܲܝܗܝ ܫܲܒܼܛܵܐ ܕܟܲܪܒܵܐ. ܘܦܸܫܠܹܗ ܦܬܝܼܚܵܐ ܬܲܪܥܵܐ ܕܫܡܲܝܵܐ: ܘܨܠܹܐ ܠܹܗ ܪܘܼܚܵܐ ܕܩܘܼܕܫܵܐ ܘܫܪܹܐܠܹܗ ܥܲܠ ܡܵܪܝ ܙܲܝܥܵܐ: ܘܡܠܲܓ̰ܠܸܓ̰ ܗ݇ܘܵܐ ܦܲܪܨܘܿܦܹܗ ܐܲܝܟܼ ܕܡܲܠܲܐܟܼܵܐ. ܘܚܸܪܹܗ ܠܫܡܲܝܵܐ ܘܚܙܹܐܠܹܗ ܠܡܫܝܼܚܵܐ ܟܲܕ ܒܸܬܝܵܒܼܵܐ ܡ̣ܢ ܝܲܡܝܼܢܹܗ ܕܐܲܠܵܗܵܐ: ܘܐ݇ܡܸܪܹܗ: ܡܵܪܲܢ ܝܑܼܫܘܿܥ ܡܫܝܼܚܵܐ: ܟܠ ܐܲܝܟܵܐ ܕܥܵܒܼܕܝܼ ܠܪܝܼܓܘܼܟܼ ܕܘܼܟܼܪܵܢܵܐ: ܘܕܵܟܼܪܝܼ ܫܸܡܘܼܟܼ ܩܲܕܝܼܫܵܐ: ܘܐܵܦ ܫܸܡܹܗ ܕܪܝܼܓܘܼܟܼ ܙܲܝܥܵܐ: ܛܪܘܼܕ ܡ̣ܢ ܗ̇ܘ ܐܲܬܪܵܐ: ܘܐܵܦ ܡ̣ܢ ܐܲܬܪܝܼ: ܫܲܒܼܛܵܐ ܕܟܲܪܒܵܐ: ܘܠܵܐ ܗܵܘܹܐ ܒܝܼܝܹܗ ܫܘܼܚܢܵܐ: ܘܠܵܐ ܡܲܪܥܵܐ ܘܠܵܐ ܟܘܼܪܗܵܢܵܐ ܒܝܼܫܵܐ. ܘܟܠ ܒܲܪܢܵܫܵܐ ܕܥܵܒܼܸܕ ܠܹܗ ܠܕܘܼܟܼܪܵܢܝܼ ܒܠܸܒܵܐ ܕܸܟܼܝܵܐ ܘܝܵܗ݇ܒܼܸܠ ܡܲܥܣܵܪܹ̈ܐ: ܝܵܐ ܡܵܪܝܵܐ: ܡܲܪܚܸܩ ܡܸܢܹܗ ܫܲܒܼܛܵܐ ܕܟܲܪܒܵܐ. ܐܵܡܼܝܢ.
ܘܡ̣ܢ ܒܵܬܲܪ ܐܵܗܵܐ ܡܪܸܥܠܹܗ ܚܲܕ݇ ܝܵܘܡܵܐ: ܘܦܘܼܫܸܛܠܹܗ ܐܝܼܕܵܬܘܼ̈ܗܝ ܠܫܡܲܝܵܐ ܘܐ݇ܡܸܪܹܗ: ܒܝܼܘܼܟܼ ܝܵܐ ܡܵܪܵܐ ܕܟܠ ܪܘܼܚܝܼ ܡܣܵܦܘܿܝܹܐ ܝ݇ܘܸܢ. ܘܣܘܿܦܹܐܠܹܗ ܪܘܼܚܹܗ ܒܐܝܼܕܵܬܹ̈ܐ ܕܡܵܪܹܗ: ܘܐ݇ܬܹܐܠܗ݇ܘܿܢ ܡܲܠܲܐܟܼܹ̈ܐ ܩܲܕܝܼܫܹܵܐ ܘܙܘܼܝܸܚܠܗ݇ܘܿܢ ܠܢܲܦܫܹܗ (ܠܓܵܢܹܗ) ܒܗܘܼ̈ܠܵܠܹܐ (ܒܪܘܼܡܪ̈ܵܡܹܐ) ܕܪܘܼܚܵܐ ܕܩܘܼܕܫܵܐ: ܘܡܘܼܣܩܵܐܠܗ݇ܘܿܢ ܠܡܲܠܟܘܼܬܵܐ ܕܫܡܲܝܵܐ. ܘܓ̰ܡܸܥܠܗ݇ܘܿܢ ܡܗܲܝܡܢܹ̈ܐ ܒܪ̈ܝܼܟܼܹܐ ܕܐܲܬܪܵܐ ܕܓ̰ܝܼܠܘܼ: ܘܫܩܸܠܗ݇ܘܿܢ ܦܲܓܼܪܹܗ ܕܩܲܕܝܼܫܵܐ ܡܵܪܝ ܙܲܝܥܵܐ: ܘܙܘܼܝܸܚܠܗ݇ܘܿܢ ܒܐܝܼܩܵܪܵܐ ܓܘܼܪܵܐ ܘܒܗܹܪ̈ܘܿܡܹܐ ܘܒܸܣܡܹ̈ܐ ܘܟܘܼܪܡܸܟܼܠܗ݇ܘܿܢ ܒܟܬܵܢܹ̈ܐ. ܘܥܒܼܸܕܠܗ݇ܘܿܢ ܥܲܠܹܗ ܬܸܫܡܸܫܬܵܐ ܘܫܵܗܲܪܬܵܐ ܬܠܵܬܵܐ ܝܵܘܡܹ̈ܐ ܘܬܠܵܬܵܐ ܠܲܝ̈ܠܵܘܵܬܹܐ: ܘܡܘܼܬܸܒܼܠܗ݇ܘܿܢ ܠܦܲܓܼܪܹܗ ܕܩܲܕܝܼܫܵܐ ܒܓܵܘ ܗܲܝܟܠܵܐ ܓܵܘܵܝܵܐ: ܘܗܵܐ ܒܸܫܦܵܚܵܐ ܝ݇ܢܵܐ ܡ̣ܢ ܓܲܪ̈ܡܘܼܗܝ ܗܲܝܸܪ̈ܝܵܬܹܐ ܠܒܢܲܝ̈ܢܵܫܵܐ.
ܗܘܹܐܠܹܗ ܡܵܘܠܵܕܹܗ ܕܩܲܕܝܼܫܵܐ ܡܵܪܝ ܙܲܝܥܵܐ ܒܝܵܘܡܵܐ ܕܣܘܼܠܵܩܹܗ ܕܡܵܪܲܢ: (2)
ܘܝܵܘܡܵܐ ܕܫܘܼܢܵܝܹܗ ܒܐܲܪܒܲܥܒܲܫܲܒܵܐ ܩܲܕ݇ܡܵܝܵܐ ܕܟܵܢܘܿܢ ܐ݇ܚܲܪܵܝܵܐ. (3) ܒܝܲܕ ܨܠܵܘܵܬܹ̈ܗ ܫܵܪܹܐ ܫܲܝܢܵܐ ܘܫܠܵܡܵܐ ܒܐܲܪܒܿܥܵܐ ܦܸܢܝܵܬܹ̈ܗ ܕܥܵܠܡܵܐ: ܘܒܘܼܫ ܙܵܘܕܵܐ ܒܐܵܗܵܐ ܐܲܬܪܵܐ ܕܡܘܼܬܒܼܹܐ ܝ݇ܢܵܐ ܓܲܪ̈ܡܘܼܗܝ ܓܵܘܹܗ: ܗܵܫܵܐ ܘܲܒ݂ܟܼܠܙܒܲܢ ܘܲܠܥܵܠܲܡ ܥܵܠܡܝܼܢ. ܐܵܡܹܝܢ܀
♱♱♱♱♱♱♱♱♱
ܠܦܘܼܬܼ ܩܵܢܘܿܢܹ̈ܐ ܕܟܪܘܿܢܵܢܩܵܢܘܿܢ ܗ:ܕ ܚܘܼܫܒܵܢܵܐ ܕܙܲܒܼܢܹ̈ܐ:
1. ܡܵܪܝ ܬܵܒܼܘܿܪ ܗܘܹܐ ܠܹܗ ܫܘܼܢܵܝܹܗ ܡ̣ܢ ܐܵܗܵܐ ܥܵܠܡܵܐ: ܒܝܵܘܡܵܐ ܕܬܪܹܝܢܒܫܲܒܵܐ 1 ܒܝܲܪܚܵܐ ܕܐܝܼܠܘܿܠ ܫܹܢ݇ܬܵܐ ܕ 430 ܠܡܵܪܲܢ.
2. ܡܵܪܝ ܙܲܝܥܵܐ ܗܘܹܐ ܠܹܗ ܡܵܘܠܵܕܹܗ ܒܝܵܘܡܵܐ ܕܚܲܡܸܫܒܫܲܒܵܐ ܕܣܘܼܠܵܩܹܗ ܕܡܵܪܲܢ: 26 ܒܝܲܪܚܵܐ ܕܐ݇ܝܵܪ ܫܹܢ݇ܬܵܐ ܕ. 309 ܠܡܵܪܲܢ.
3. ܫܘܼܢܵܝܹܗ ܕܡܵܪܝ ܙܲܝܥܵܐ ܗܘܹܐ ܠܹܗ ܒܐܲܪܒܲܥܒܫܲܒܵܐ ܩܲܕ݇ܡܵܝܵܐ ܡ̣ܢ ܟܵܢܘܿܢ ܐ݇ܚܲܪܵܝܵܐ ܕܝܼܠܹܗ: 7 ܒܟܵܢܘܿܢ ܐ݇ܚܲܪܵܝܵܐ ܫܹܢ݇ܬܵܐ ܕ. 431 ܠܡܵܪܲܢ.
♱♱♱♱♱♱♱♱♱
ܬܫܥܝܬܐ ܕܡܪܝ ܙܝܥܐ ܛܘܒܢܐ
ܫܩܝܼܠܬܵܐ ܡ̣ܢ ܟܬܼܵܒܼܵܐ ܕܫܲܪ̈ܒܹܐ ܕܣܵܗܕܹ̈ܐ
ܕܘܼܒܵܩܵܐ؛ ܐ، ܦܲܐܬܘܵܬܹ̈ܐ؛ 389 ‐ 423
ܛܲܒܼܥܵܐ ܕܡܲܠܦܵܢܵܐ ܦܘܿܠ ܒܵܝܓ̰ܵܢ
ܬܘܼܪܓܸܡܵܐ ܘܡܘܼܪܝܸܙܵܐ ܒܩܲܫܝܼܫܵܐ ܥܲܡܵܢܘܼܐܹܝܠ ܪܹܗܵܢܵܐ ܝܵܘܣܸܦ
ܘܛܒܼܝܼܥܵܐ ܒܢܵܦܩܵܬܹ̈ܐ ܕܡܗܲܝܡܢܵܐ
ܫܲܡܵܫܵܐ ܐܵܠܹܟܼܣܲܢܕܲܪ ܚܹܙܲܩܝܵܐ ܓܲܒܼܪܝܼܹܠ
ܕܡܵܐܬܐ ܕܡܵܪܝ ܙܲܝܥܵܐ: ܓ̰ܝܼܠܘܼ
ܡܲܛܒܲܥܬܵܐ ܕܐܵܠܦ̮ܵܐ ܓܪܵܦ̮ܹܝܟ: ܫܝܼܟܵܓܘ 1989
♱♱♱♱♱♱♱♱♱