ܬܫܥܝܬܐ ܕܚܝ̈ـܐ ܕܡܪܝ ܒܗܝܫܘܥ ܟܡܘܿܠܝܐ
ܬܘܼܪܓܵܡܵܐ ܡܼܢ
ܬܲܫܥܝܼܬܵܐ ܕܕܲܝܪ̈ܵܝܹܐ ܘܝܼܚܝܼܕܵܝܹ̈ܐ
ܛܲܒܼܥܵܐ ܕܦܵܪܝܼܣ ܫܹܢ݇ܬܵܐ 1894.
ܡܩܲܪܒܼܵܢܘܼܬܵܐ
ܐܵܗܵܐ ܟܬܵܒܼܵܐ ܦܝܵܫܵܐ ܝܼܠܹܗ ܡܘܼܩܪܸܒܼܵܐ ܐܲܝܟܼ ܚܕܵܐ ܡܵܘܗܲܒܼܬܵܐ ܩܵܐ ܟܠܲܝܗܝ ܡܝܲܩܪܹ̈ܐ ܒܢܲܝ̈ ܐܘܼܡܬܲܢ. ܦܪܝܼܫܵܐܝܼܬ ܩܵܐ ܡܘܼܚܸܒܲܝ̈ܢ ܒܢܲܝ̈ ܡܵܪܝ ܒܗܝܼܫܘܿܥ. ܒܝܼܲܕ ܐܲܦܪܹܝܡ ܘܚܲܢܵܐ ܕܒܹܝܬ ܩܸܠܵܝܬܵܐ.
ܡܵܘܕܥܵܢܘܼܬܵܐ
ܐܵܢܵܢܩܵܝܬܵܐ ܝܠܵܗ̇ ܕܟܠ ܚܲܕ݇ ܒܲܪܢܵܫܵܐ ܐܲܝܟܼ ܟܡܵܐ ܕܡܸܬܡܵܨܝܵܢܝܼܬܵܐ ܝܠܵܗ̇ ܕܫܵܒܼܸܩܠܹܗ ܚܲܕ݇ ܕܟܼܵܪܵܐ ܦܵܝܫܵܢܵܐ ܓܵܘ ܕܐܵܗܵܐ ܕܘܼܢܝܹܐ: ܕܒܝܼܹܗ ܦܵܝܫܝܼ ܚܸܙܝܹ̈ܐ ܦܘܼܠܚܵܢܹ̈ܐ ܕܦܠܝܼܚܵܐ ܝܠܹܗ ܓܵܘ ܪܲܗܛܵܐ ܕܚܲܝܘܼܗ̈ܝ: ܦܪܝܼܫܵܐܝܼܬ ܕܦܵܝܫܝܼ ܛܒܼܝܼܥܹ̈ܐ ܓܵܘ ܚܲܕ݇ ܟܬܵܒܼܵܐ. ܠܐܲܟܼܵܐ ܦܝܵܫܵܐ ܝܢܵܐ ܚܸܙܝܹ̈ܐ ܚܲܕ݇ ܙܵܘܓܵܐ ܡ̣ܢ ܒܢܲܝ̈ ܐܘܼܡܬܲܢ ܕܒܸܕܒܼܵܚܵܐ ܝ݇ܢܵܐ ܚܲܕ݇ ܣܵܡܵܐ ܡ̣ܢ ܛܥܘܿܢܝܵܬܹ̈ܐ ܕܦܘܼܠܚܵܢܲܝܗܝ ܩܵܐ ܛܲܒܼܥܵܐ ܕܐܵܗܵܐ ܟܬܵܒܼܵܐ. ܘܐܲܢܹܐ ܝ݇ܢܵܐ: ܡܝܲܩܪܵܐ ܐܲܦܪܹܝܡ ܕܩܲܫܝܼܫܵܐ ܝܵܘܣܸܦ ܕܒܹܝܬ ܩܸܠܵܝܬܵܐ ܕܡܵܪܝ ܒܗܝܼܫܘܿܥ: ܘܒܲܪܬ̇ ܙܵܘܓܹܗ ܡܝܲܩܲܪܬܵܐ ܚܲܢܵܐ. ܡܵܪܝ ܒܗܝܼܫܘܿܥ ܚܲܕ݇ ܡ̣ܢ ܕܲܝܪ̈ܵܝܹܐ ܗ݇ܘܵܐ ܓܵܘ ܒܲܪܝܼܵܐ ܕܐܸܣܩܹܛܹܐ ܕܡܸܨܪܹܝܢ. ܐܲܝܟܵܐ ܕܐܘܼܦ ܐܵܕܝܼܵܐ ܚܲܕ݇ ܕܲܝܪܵܐ ܦܝܵܫܵܐ ܝ݇ܠܹܗ ܩܸܪܝܵܐ ܒܫܸܡܹܗ ܓܵܘ ܡܸܨܪܹܝܢ ܕܓܵܘܹܗ ܒܸܫܪܵܝܵܐ ܝܠܹܗ ܐܵܕܝܼܵܐ: ܐܲܝܟܼ ܐܲܣܝܼܪܵܐ ܕܫܘܼܠܛܵܢܵܐ ܕܡܸܨܪܹܝܢ: ܫܲܢܘܼܕܵܐ ܦܵܦܵܐ ܕܥܹܕܬܵܐ ܕܩܘܼܦܛܵܝܹ̈ܐ ܓܵܘ ܕܗ̇ܘ ܐܲܬܪܵܐ. ܒܫܸܡܵܐ ܕܥܘܼܡܪܵܐ ܕܡܵܪܝ ܒܗܝܼܫܘܿܥ ܐܝܼܬ ܗ݇ܘܵܐ ܚܕܵܐ ܡܵܬܵܐ ܓܘܼܪܬܵܐ ܕܐܵܬܘܿܪ̈ܵܝܹܐ ܓܵܘ ܛܘܼܪ̈ܵܢܹܐ ܕܟܡܘܿܠ: ܒܹܝܠ ܐܝܼܪܵܢ ܘܬܘܼܪܟܝܼ. ܟܠܲܝܗܝ ܥܵܡܪ̈ܵܢܹܐ ܕܐܵܗܵܐ ܡܵܬܵܐ ܦܝܼܫܹܐ ܗ݇ܘܵܘ ܩܸܪ̈ܝܹܐ "ܒܢܲܝ̈ ܡܵܪܝ ܒܗܝܼܫܘܿܥ" ܕܐܵܕܝܼܵܐ ܒܘܼܪ̈ܒܸܙܹܐ ܝ݇ܢܵܐ ܓܵܘ ܪܵܒܵܐ ܣܵܡܹ̈ܐ ܕܕܘܼܢܝܹܐ. .
ܬܲܫܥܝܼܬܵܐ ܕܚܲܝܹ̈ܐ ܘܢܸܨܚܵܢܹ̈ܐ ܕܩܲܕܝܼܫܵܐ
ܐܲܒܵܐ ܒܗܝܼܫܘܿܥ ܝܼܚܝܼܕܵܝܵܐ ܟܡܘܿܠܵܝܵܐ
ܕܡ̣ܢ ܒܲܪܝܼܵܐ ܕܐܸܣܩܹܛܹܐ.
ܐܲܚܘܼܢܘܵܬ̈ܝܼ ܒܡܫܝܼܚܵܐ: ܡܘܼܚܸܒܹ̈ܐ ܕܐܲܠܵܗܵܐ ܚܵܝܵܐ. ܫܡܸܥܡܘܿܢ ܡܸܢܝܼ ܕܫܵܪܸܢ ܠܗܲܡܙܘܼܡܹܐ ܒܘܼܬ ܡܝܲܬܪܘܼܬܵܐ ܘܢܸܨܚܵܢܹ̈ܐ. ܘܕܘܼܒܵܪܹ̈ܐ ܕܪܲܒܵܐ ܘܩܲܕܝܼܫܵܐ: ܐܲܒܵܐ ܒܗܝܼܫܘܿܥ. ܗ̇ܘ ܕܦܸܫܠܹܗ ܓܘܼܒܝܵܐ ܒܐܲܠܵܗܵܐ. ܘܦܸܫܠܹܗ ܫܘܼܠܚܵܐ ܡ̣ܢ ܟܠ ܡܸܢܕܝܼ ܕܐܝܼܬ ܓܵܘ ܕܐܵܗܵܐ ܕܘܼܢܝܹܐ. ܘܓܼܠܸܒܠܹܗ ܚܲܫܹ̈ܐ ܘܡܘܼܟܡܸܠܹܗ ܠܟܠܲܝܗܝ ܕܘܼܒܵܪܹ̈ܐ ܕܕܲܝܪܵܝܘܼܬܵܐ ܓܡܝܼܪܵܐܝܼܬ. ܘܗ݇ܘܹܐܠܹܗ ܚܲܕ݇ ܬܲܠܡܝܼܕܵܐ ܓܘܼܒܝܵܐ: ܢܵܛܪܵܢܵܐ ܕܦܘܼܩܕܵܢܹ̈ܐ ܕܡܵܪܝܵܐ. ܘܡܘܼܟܪܸܙܠܹܗ ܠܡܲܫܚܲܕܬܹܗ: ܘܦܘܼܪܸܩܠܹܗ ܠܪܵܒܵܐ ܓܵܢܵܬܹ̈ܐ ܘܡܘܼܬܝܲܝܠܹܗ ܠܡܲܠܟܘܼܬܵܐ ܕܫܡܲܝܵܐ: ܒܝܘܼܠܦܵܢܹܗ ܐܲܠܵܗܵܝܵܐ. ܣܵܗܕܵܐ ܝ݇ܠܹܗ ܐܲܠܵܗܵܐ: ܕܣܲܪܵܣܬܘܼܬܵܐ ܗܵܩܘܼܝܹܐ ܝ݇ܘܸܢ ܩܵܬܵܘܟܼܘܿܢ ܒܘܼܬ ܕܝܼܹܗ: ܗ̇ܘ ܡܸܢܕܝܼ ܕܪܵܒܵܐ ܓܵܗܹ̈ܐ ܚܸܙܝܹ̈ܐ ܝ݇ܢܵܐ ܥܲܝܢ̈ܝܼ. ܐܲܢܹܐ ܒܸܟܬܵܒܼܵܐ ܝ݇ܘܸܢ ܩܵܐ ܦܵܝܕܵܐ ܕܓܵܢܵܬܵܘ̈ܟܼܘܿܢ: ܘܩܵܐ ܕܵܐܢܝܼ ܕܗܵܙܸܪ ܝ݇ܢܵܐ ܕܬܵܦܩܝܼ ܒܝܼܲܝܗܝ.
ܐܵܒܼܵܗܹ̈ܐ ܕܐܵܗܵܐ ܐܲܒܵܐ ܒܵܒܲܢ ܒܗܝܼܫܘܿܥ ܚܲܕ݇ܟܡܵܐ ܐ݇ܢܵܫܹ̈ܐ ܗ݇ܘܵܘ ܟܹܐܢܹ̈ܐ ܘܙܲܕܝܼܩܹ̈ـܐ ܘܙܵܕܥܝܵܢܹ̈ܐ ܡ̣ܢ ܐܲܠܵܗܵܐ: ܡܲܚܸܒܵܢܹ̈ܐ ܕܥܹܕܵܬܹ̈ܐ: ܘܥܵܒܼܕܵܢܹ̈ܐ ܕܐܸܪ̈ܘܵܢܹܐ. ܒܓܸܢܣܲܝܗܝ ܝܼܗ݇ܘܵܘ ܡ̣ܢ ܐܵܪܵܒܝܼܵܐ ܕܓܵܘ ܡܸܨܪܹܝܢ ܡ̣ܢ ܡܵܬܵܐ ܫܸܡܵܗ̇ ܒܵܣܹܢܒܝܼܵܐ. ܐ݇ܢܵܫܹ̈ܐ ܗ݇ܘܵܘ ܡܵܪܹܐ ܐܵܕܲܒ ܘܕܸܟܼܝܹ̈ܐ ܒܦܲܓܼܪܵܐ. ܘܐܝܼܡܵܢ ܕܐܲܠܵܗܵܐ ܚܙܹܐܠܹܗ ܕܘܼܒܵܪ̈ܲܝܗܝ ܚܩܝܼܪܹ̈ܐ: ܝܘܼܗ݇ܒܼܸܠܹܗ ܩܵܬܲܝܗܝ ܫܲܒܼܥܵܐ ܒܢܘܿܢܹ̈ܐ: ܘܒܘܼܪܸܟܼܠܹܗ ܘܡܘܼܙܝܸܕܠܹܗ ܠܕܵܘܸܠܬܲܝܗܝ ܒܦܸܪܝܘܼܬܵܐ. ܘܡ̣ܢ ܒܵܬ݇ܪ ܚܕܵܐ ܥܕܵܢܵܐ ܒܵܒܲܝܗܝ ܡܘܼܢܝܸܚܠܹܗ ܡ̣ܢ ܕܐܲܢܹܐ ܚܲܝܹ̈ܐ ܙܲܒܼܢܵܢܵܝܹ̈ܐ. ܦܸܫܠܵܗ̇ ܝܸܡܲܝܗܝ ܗ̇ܝ ܕܟܹܐ ܬܲܓܒܸܪܵܐ ܗ݇ܘܵܐ ܠܗ݇ܘܿܢ. ܘܓܘܼܪܘܸܣܠܵܗ̇ ܐܸܠܲܝܗܝ ܒܙܕܘܼܥܬܵܐ ܕܐܲܠܵܗܵܐ. ܐܝܼܢܵܐ ܐܲܒܵܐ ܒܗܝܼܫܘܿܥ: ܙܥܘܿܪܵܐ ܗ݇ܘܵܐ ܕܐܵܚܘܼܢ̈ܘܵܬܘܼܗܝ. ܘܒܚܲܕ݇ ܡ̣ܢ ܠܲܝܠܵܘܵܬܹ̈ܐ: ܝܸܡܹܗ ܚܙܹܐܠܵܗ̇ ܚܸܙܘܵܐ. ܐܲܝܟܼ ܕܐܸܢ ܥܲܡܵܗ̇ ܗ݇ܘܵܘ ܫܲܒܼܥܲܢܬܲܝ ܒܢܘܿܢ̈ܘܿܗ̇. ܘܡܲܠܲܐܟܼܵܐ ܕܐܲܠܵܗܵܐ ܒܹܐܡܵܪܵܐ ܩܵܬܘܿܗ̇. ܡܵܪܝܵܐ ܐܲܠܵܗܵܐ ܫܘܼܕܪܸܢܹܗ ܠܟܸܣܠܲܟܼܝ. ܘܒܹܐܡܵܪܵܐ ܝ݇ܠܹܗ ܩܵܬܲܟܼܝ: ܗܲܒܼ݇ܠܝܼ ܚܲܕ݇ ܡ̣ܢ ܒܢ̈ܘܼܢܲܟܼܝ: ܕܩܵܕܸܫ ܫܸܡܝܼ ܓܵܘ ܒܢܲܝ̈ܢܵܫܵܐ. ܘܐ݇ܡܸܪܵܗ̇ ܝܸܡܹܗ ܩܵܐ ܡܲܠܲܐܟܼܵܐ: ܡܵܪܝܼ: ܗܵܐ ܟܠܲܝܗܝ ܕܐܲܠܵܗܵܐ ܝ݇ܢܵܐ: ܠܟܠ ܡܸܢܲܝܗܝ ܕܒܵܥܹܐ ܫܵܩܸܠ ܩܵܐ ܓܵܢܹܗ. ܦܘܼܫܸܛܠܹܗ ܡܲܠܲܐܟܼܵܐ ܐܝܼܕܹܗ ܘܕܒܼܸܩܠܹܗ ܒܐܝܼܕܹܗ ܕܐܲܒܵܐ ܒܗܝܼܫܘܿܥ ܘܐ݇ܡܸܪܹܗ: ܗܵܐ ܐܵܗܵܐ ܝ݇ܠܹܗ ܕܦܵܠܸܚ ܦܘܼܠܚܵܢܹ̈ܐ ܛܵܒܼܹ̈ܐ: ܘܐܵܗܵܐ ܝ݇ܠܹܗ ܗ̇ܘ ܕܒܵܥܹܐ ܠܹܗ ܡܵܪܝܵܐ. ܘܐ݇ܡܸܪܵܗ̇ ܩܵܐ ܡܲܠܲܐܟܼܵܐ ܫܩܘܿܠ ܚܲܕ݇ ܒܘܼܫ ܚܲܝܠܵܢܵܐ ܡܸܢܹܗ: ܣܵܒܲܒ ܐܵܗܵܐ ܡܸܣܟܹܢܵܐ ܝ݇ܠܹܗ ܘܙܲܒܘܼܢ. ܐܵܡܸܪ ܐܸܠܵܗ̇ ܡܲܠܲܐܟܼܵܐ: ܐܵܗܵܐ ܝ݇ܠܹܗ ܚܫܝܼܚܵܐ ܩܵܐ ܚܸܠܡܲܬ ܕܡܵܪܝܵܐ. ܣܵܒܲܒ ܚܲܝܠܹܗ ܒܙܲܒܘܼܢܹ̈ܐ ܒܘܼܫ ܟܹܐ ܦܵܠܸܚ. ܐܲܢܹܐ ܐ݇ܡܸܪܹܗ ܡܲܠܲܐܟܼܵܐ ܘܫܘܼܢܹܐ ܠܹܗ ܘܠܵܐ ܦܸܫܠܹܗ ܚܸܙܝܵܐ.
ܡ̣ܢ ܒܵܬ݇ܪ ܕܦܘܼܪܡܹܐܠܹܗ ܘܚܘܼܠܸܢܹܗ ܒܦܲܓܼܪܹܗ ܩܲܕܝܼܫܵܐ ܐܲܒܵܐ ܒܗܝܼܫܘܿܥ ܝܘܼܗ݇ܒܼܸܠܹܗ ܒܵܠܹܗ ܠܣܓܼܵܕܬܵܐ ܠܐܲܠܵܗܵܐ: ܘܫܘܼܗܘܸܬ ܠܹܗ ܕܩܲܪܒܸܢ ܠܕܘܼܒܵܪܹ̈ܐ ܕܕܲܝܪܵܝܘܼܬܵܐ. ܘܐܝܼܡܲܢ ܕܒܣܸܡܠܵܗ̇ ܠܹܗ ܡܵܪܝܵܐ ܘܡܛܹܐܠܵܗ̇ ܥܕܵܢܵܐ. ܕܡܲܟܡܸܠ ܒܐܝܼܕܹܗ ܪܸܙܵܝܵܐ ܕܡܵܪܝܵܐ: ܓܪܸܫܠܹܗ ܠܟܸܣܠܹܗ ܐܲܝܟܼ ܦܹܐܪܵܐ ܕܸܟܼܝܵܐ ܕܠܵܐ ܠܲܟܵܐ: ܘܡܘܼܬܹܐܠܹܗ ܠܒܲܪܝܼܵܐ ܕܐܸܣܩܹܛܹܐ: ܠܟܸܣ ܪܲܥܝܵܐ ܛܵܒܼܵܐ: ܒܵܒܵܐ ܒܵܐܡܘܼܚ. ܘܐܵܗܵܐ ܗ݇ܘܵܐ ܒܵܒܵܐ ܪܘܼܚܵܢܵܝܵܐ ܕܝܼܝܼ: ܐܵܢܵܐ ܠܵܐ ܚܫܝܼܚܵܐ ܝܘܿܚܲܢܵܢ. ܩܘܼܒܸܠܹܗ ܩܵܬܹܗ ܒܪܵܒܵܐ ܚܲܕܘܼܬܵܐ ܘܡܘܼܠܒܼܸܫܠܹܗ ܐܸܣܟܹܝܡܵܐ ܩܲܕܝܼܫܵܐ ܕܕܲܝܪܵܝܘܼܬܵܐ. ܘܟܠ ܡܸܢܕܝܼ ܕܦܲܩܸܕ ܗ݇ܘܵܐ ܠܹܗ ܡܲܨܝܸܬ ܗ݇ܘܵܐ ܘܡܲܟܡܸܠ ܗ݇ܘܵܐ ܒܗܲܝܡܵܢܘܼܬܵܐ ܘܒܡܲܟܝܼܟܼܘܼܬܵܐ ܓܘܼܪܬܵܐ. ܘܗܲܕܟܼܵܐ ܓܵܫܸܩ ܗ݇ܘܵܐ ܒܦܲܪܨܘܿܦܵܐ ܕܐ݇ܢܵܫܹ̈ܐ ܩܲܕܝܼܫܹ̈ܐ ܘܒܕܘܼܒܵܪ̈ܲܝܗܝ. ܘܟܹܐ ܥܵܓ̰ܸܒ ܗ݇ܘܵܐ ܒܚܲܝܲܝ̈ܗܝ ܡܲܠܲܐܟܼܵܝܹ̈ܐ: ܘܡܵܘܕܹܐ ܗ݇ܘܵܐ ܠܐܲܠܵܗܵܐ ܒܘܼܬ ܟܠ ܛܵܒܼܬܵܐ.
ܒܚܲܕ݇ ܡ̣ܢ ܝܵܘܡܵܢܹ̈ܐ: ܐ݇ܡܸܪܹܗ ܐܸܠܹܗ ܒܵܒܲܢ ܩܲܕܝܼܫܵܐ ܠܹܐ ܝ݇ܠܵܗ̇ ܡ̣ܢ ܘܵܓ̰ܝܼܒܘܼܬܵܐ ܩܵܐ ܐܲܚܘܼܢܘܵܬܹ̈ܐ ܕܚܵܝܪܝܼ ܒܦܵܬܵܐ ܕܐ݇ܢܵܫܹ̈ܐ ܩܲܕܝܼܫܹ̈ܐ: ܘܠܵܐ ܕܓܵܫܩܝܼ ܒܚܲܕ݇ ܡܸܢܕܝܼ ܐ݇ܚܹܪ݇ܢܵܐ. ܗܲܕܟܼܵܐ ܒܟܠ ܥܕܵܢܵܐ ܡܲܟܸܦ ܓܵܫܵܩܬܘܼܟܼ ܠܐܸܠܬܸܚܬ݇: ܐܲܚܟ̰ܝܼ ܚܵܝܪܸܬ ܠܩܵܕ݇ܡ ܐܲܩܠܵܬ̈ܘܼܟܼ. ܘܐ݇ܣܘܿܪ ܢܝܼܲܬܘܼܟܼ ܒܐܲܠܵܗܵܐ ܒܟܠ ܥܕܵܢܵܐ.
ܐܝܼܡܲܢ ܕܫܡܸܥܠܹܗ ܐܲܢܹܐ ܡ̣ܢ ܒܵܒܲܢ ܩܲܕܝܼܫܵܐ: ܩܵܐ ܬܸܠܵܬ ܫܸܢܹ̈ܐ ܗ݇ܘܹܐܠܹܗ ܒܸܚܝܵܪܵܐ ܠܐܸܠܬܸܚܬ݇. ܗܸܟ̰ ܠܹܐ ܓܵܫܸܩ ܗ݇ܘܵܐ ܓܵܘ ܦܲܪܨܘܿܦܵܐ ܕܐ݇ܢܵܫܹ̈ܐ: ܟܹܐ ܒܵܠܸܓ ܗ݇ܘܵܐ ܒܟܬܵܒܼܹ̈ܐ ܩܲܕܝܼܫܹ̈ܐ: ܘܟܹܐ ܚܵܡܹܐ ܗ݇ܘܵܐ ܠܗ݇ܘܿܢ ܒܠܸܒܹܗ. ܘܡܲܫܬܹܐ ܗ݇ܘܵܐ ܠܵܗ̇ ܓܵܢܹܗ ܡ̣ܢ ܗܹܡܸܙܡܵܢܹ̈ܐ ܕܚܲܝܹ̈ܐ ܕܪܘܼܚܵܐ ܕܩܘܼܕܫܵܐ. ܗܲܕܟܼܵܐ ܬܘܼܡܸܡܠܵܗ̇ ܗܹܡܸܙܡܵܢ ܕܒܘܼܬ ܕܝܼܹܗ ܟܬܝܼܒܼܬܵܐ ܝ݇ܠܵܗ̇: ܕܚܲܟܝܼܡܵܐ ܒܠܸܒܹܗ ܟܹܐ ܢܵܛܸܪ ܠܟܠܲܝܗܝ ܦܘܼܩܕܵܢܹ̈ܐ. ܟܹܐ ܨܵܠܹܐ ܗ݇ܘܵܐ ܨܠܘܿܬܵܐ ܗܲܡܵܫܵܐ ܕܠܵܐ ܫܠܵܝܬܵܐ ܐܲܝܟܼ ܕܦܘܼܩܸܕܠܹܗ ܦܵܘܠܘܿܣ ܫܠܝܼܚܵܐ. ܘܒܠܝܼܓܵܐ ܗ݇ܘܵܐ ܒܨܵܘܡܵܐ ܘܫܵܗܲܪܬܵܐ ܕܠܲܝܠܵܘܵܬܹ̈ܐ. ܙܵܘܕܵܐ ܡ̣ܢ ܕܸܒܼܫܵܐ ܚܸܠܝܹ̈ܐ ܗ݇ܘܵܘ ܩܵܬܹܗ ܗܹܡܸܙܡܵܢܹ̈ܐ ܕܐܲܠܵܗܵܐ. ܟܠܝܘܿܡ ܡܲܢܬܘܼܝܹܐ ܗ݇ܘܵܐ ܒܡܝܲܬܪܘܼܬܵܐ. ܘܓܲܪܘܸܣ ܗ݇ܘܵܐ ܐܲܝܟܼ ܐܝܼܠܵܢܵܐ ܢܨܝܼܒܼܵܐ ܥܲܠ ܣܸܦܬܵܐ ܕܫܵܩܝܼܬܵܐ ܕܡܝܼܵܐ. ܕܝܵܗ݇ܒܼܸܠ ܛܥܘܿܢܬܵܐ ܘܛܲܪ̈ܦܹܗ ܠܹܐ ܢܵܬܪܝܼ ܡ̣ܢ ܕܒܵܒܵܐ ܒܵܡܘܿܚ. ܚܙܹܐܠܹܗ ܕܘܼܒܵܪ̈ܘܼܗܝ ܫܲܦܝܼܪܹ̈ܐ: ܟܹܐ ܡܲܚܸܒ ܗ݇ܘܵܐ ܠܹܗ ܘܡܲܚܕܹܐ ܠܹܗ ܒܪܘܼܚܵܐ. ܘܡܘܼܬܸܒܼܠܹܗ ܥܲܠܹܗ ܫܸܡܵܐ ܕܸܢܚܵܐ ܒܘܼܬ ܢܘܼܗܪܵܐ ܕܓܵܢܹܗ ܘܙܪܵܩܵܐ ܕܡܝܲܬܪܘܼܬܹܗ: ܘܡܲܢܬܵܝܬܹܗ ܒܛܵܒܼܵܬܹ̈ܐ. ܘܐܝܼܡܲܢ ܕܗ݇ܘܹܐܠܹܗ ܪܸܙܵܝܵܐ ܕܐܲܠܵܗܵܐ ܕܡܲܢܝܸܚ ܠܒܵܒܲܢ ܩܲܕܝܼܫܵܐ ܐܲܒܵܐ ܒܵܡܘܿܚ ܡ̣ܢ ܕܐܲܢܹܐ ܚܲܝܹ̈ܐ: ܒܘܼܬ ܚܘܼܒܹܗ ܕܠܟܸܣܠܹܗ: ܫܩܸܠܹܗ ܠܘܼܒܸܠܹܗ ܠܗ̇ܘ ܐܲܬܪܵܐ ܕܐܸܠܹܗ ܫܲܗܘܸܬ ܗ݇ܘܵܐ. ܦܸܫܠܝܼ ܐܵܢܵܐ ܚܲܕ݇ ܪܹܓܵܐ ܒܵܨܘܿܪܵܐ: ܥܲܡ ܐܲܚܘܼܢܵܐ ܕܝܼܝܼ ܐܲܒܵܐ ܒܗܝܼܫܘܿܥ: ܘܚܝܹܐܠܝܼ ܥܲܡܹܗ ܒܚܘܼܒܵܐ ܪܘܼܚܵܢܵܝܵܐ ܒܗ̇ܝ ܕܘܼܟܬܵܐ ܕܡܵܪܝܵܐ ܒܣܸܡܠܵܗ̇ ܠܹܗ. ܗ̇ܝ ܕܓܵܘܵܗ̇ ܢܨܸܒܼܠܝܼ ܚܲܕ݇ ܐܝܼܠܵܢܵܐ ܐܲܝܟܼ ܕܦܩܸܕܠܹܗ ܒܵܒܝܼ. ܗܲܪ ܐܲܝܟܼ ܕܢܘܼܒܹܐܠܹܗ ܥܲܠܲܢ ܒܵܒܲܢ ܩܲܕܝܼܫܵܐ ܒܵܡܘܿܚ.
ܐܝܼܢܵܐ ܛܘܼܒܼܵܢܵܐ ܒܵܒܵܐ ܒܗܝܼܫܘܿܥ: ܒܠܝܼܓܵܐ ܗ݇ܘܵܐ ܒܨܵܘܡܵܐ ܕܵܝܸܡ. ܘܠܹܐ ܐܵܟܼܸܠ ܗ݇ܘܵܐ ܡܸܢܕܝܼ: ܡ̣ܢ ܚܲܕ݇ܒܼܫܹܒܵܐ ܠܚܲܕ݇ܒܼܫܹܒܵܐ: ܘܟܹܐ ܫܲܪܸܟ ܗ݇ܘܵܐ ܒܐ݇ܪ̈ܵܙܹܐ ܩܲܕܝܼܫܹ̈ܐ ܕܦܲܓܼܪܹܗ ܕܡܫܝܼܚܵܐ. ܘܟܹܐ ܬܵܢܹܐ ܗ݇ܘܵܐ ܪܵܒܵܐ ܡ̣ܢ ܟܬܵܒܼܹ̈ܐ ܩܲܕܝܼܫܹ̈ܐ ܗܲܡܵܫܵܐ ܟܹܐ ܩܵܪܹܐ ܗ݇ܘܵܐ ܡ̣ܢ ܟܬܵܒܼܵܐ ܕܐܹܪܲܡܝܵܐ ܢܒܼܝܼܵܐ. ܐܝܼܡܲܢ ܕܩܵܪܹܐ ܗ݇ܘܵܐ: ܗ̇ܘ ܢܒܼܝܼܵܐ ܟܹܐ ܐܵܬܹܐ ܗ݇ܘܵܐ ܠܟܸܣܠܹܗ: ܘܩܵܪܹܐ ܗ݇ܘܵܐ ܥܲܡܹܗ ܘܦܵܫܸܩ ܗ݇ܘܵܐ ܩܵܬܹܗ: ܘܡܲܒܣܸܡ ܗ݇ܘܵܐ ܒܚܙܵܝܬܹܗ. ܘܓܵܠܹܐ ܗ݇ܘܵܐ ܩܵܬܹܗ ܡܲܥܢܵܝܵܐ ܕܟܬܵܒܼܹܗ ܪܘܼܚܵܢܵܝܵܐ. ܝܵܘܡܵܐ ܠܝܵܘܡܵܐ ܟܹܐ ܡܲܢܬܹܐ ܗ݇ܘܵܐ ܘܡܲܙܝܸܕ ܗ݇ܘܵܐ ܠܕܘܼܒܵܪܹ̈ܗ. ܟܹܐ ܨܵܐܸܡ ܗ݇ܘܵܐ ܬܲܪܬܹܝܢ ܫܲܒܵܬܹ̈ܐ. ܘܒܵܬ݇ܪ ܕܐܵܗܵܐ ܟܹܐ ܐܵܟܼܸܠ ܗ݇ܘܵܐ ܠܲܚܡܵܐ ܒܲܪܘܼܙܵܐ ܒܡܸܠܚܵܐ. ܒܛܸܫܘܵܐ ܟܹܐ ܦܵܠܸܚ ܗ݇ܘܵܐ ܒܕܘܼܒܵܪܹ̈ܐ ܛܸܫܝܹ̈ܐ. ܘܟܹܐ ܡܲܚܸܒ ܗ݇ܘܵܐ ܫܸܠܝܘܼܬܵܐ. ܘܡܲܚܸܒ ܗ݇ܘܵܐ ܕܚܲܝܹܐ ܚܲܕ݇ ܒܢܲܦ̮ܫܹܗ. ܐܲܠܵܗܵܐ ܒܸܩܪܵܝܹܗ ܗ݇ܘܵܐ ܕܗܵܘܹܐ ܒܲܢܕܲܪ ܩܵܐ ܦܵܪܲܩܬܵܐ ܕܪܵܒܵܐ ܓܵܢܵܬܹ̈ܐ.
ܡ̣ܢ ܒܵܬ݇ܪ ܗܵܕܵܐ: ܡ̣ܢ ܝܵܘܡܵܢܹ̈ܐ ܐ݇ܡܸܪܝܼ ܩܵܬܹܗ: ܐܲܚܘܼܢܝܼ ܩܲܕܝܼܫܵܐ ܕܐܲܠܵܗܵܐ: ܒܸܚܙܵܝܘܼܟܼ ܝ݇ܘܸܢ ܡܲܚܘܼܒܹܐ ܝ݇ܘܸܬ̇ ܝܼܚܝܼܕܵܝܘܼܬܵܐ ܘܫܸܠܝܘܼܬܵܐ. ܐܘܼܦ ܐܵܢܵܐ ܫܲܗܘܘܼܬܹܐ ܝ݇ܘܸܢ ܠܐܵܗܵܐ. ܒܲܣ ܥܵܒܼܕܲܚ ܫܵܗܲܪܬܵܐ ܒܐܵܗܵܐ ܠܲܝܠܹܐ ܡܲܒܠܸܓܸܚ ܓܵܢܲܢ ܒܨܠܘܿܬܵܐ ܘܒܵܥܘܼܬܵܐ. ܐܸܢ ܗܵܘܹܐ ܪܸܙܵܝܵܐ ܕܡܵܪܝܵܐ: ܦܵܝܫܲܚ ܒܗܹܒܼܝܼ ܒܝܼܹܗ ܕܓܵܠܹܐ ܘܡܲܕܸܥ ܠܲܢ: ܐܲܝܢܝܼ ܒܘܼܫ ܨܦܵܝܝܼ ܝ݇ܠܵܗ̇ ܩܵܬܲܢ ܠܸܥܒܼܵܕܵܐ. ܐ݇ܡܸܪܹܗ ܩܵܬܝܼ ܪܵܒܵܐ ܨܦܵܝܝܼ ܬܘܼܢܹܐ ܠܘܼܟܼ: ܘܥܵܒܼܕܲܚ ܨܠܘܿܬܵܐ ܘܒܵܥܘܼܬܵܐ. ܘܒܬܝܵܡܬܵܐ ܕܠܲܝܠܹܐ ܦܸܫܠܹܗ ܓܸܠܝܵܐ ܐܸܠܲܢ ܡܲܠܲܐܟܼܵܐ ܕܡܵܪܝܵܐ: ܘܐ݇ܡܸܪܹܗ ܩܵܬܲܢ: ܗܲܕܟܼܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ: ܟܠܚܲܕ݇ ܡܸܢܵܘܟܼܘܿܢ ܚܲܝܹܐ ܒܢܲܦ̮ܫܹܗ: ܕܬܲܡܸܡܝܼܬܘܿܢ ܠܡܸܢܕܝܼ ܕܡܘܼܬܒܼܵܐ ܝ݇ܬܘܿܢ ܒܠܸܒܵܘܟܼܘܿܢ: ܠܦܘܼܪܩܵܢܵܐ ܕܓܵܢܵܘܟܼܘܿܢ ܘܪܵܒܵܐ ܐ݇ܚܹܪ̈݇ܢܹܐ. ܐܝܼܢܵܐ ܐܲܢ݇ܬ̇ ܝܘܿܚܲܢܵܢ ܚܝܝܼ ܒܐܵܗܵܐ ܕܘܼܟܬܵܐ ܘܐܵܢܵܐ ܒܸܬ ܫܵܕܪܸܢܘܼܟܼ ܥܲܡܵܐ ܪܵܒܵܐ. ܘܒܵܬ݇ܪ ܗܵܕܵܐ ܐ݇ܡܸܪܹܗ ܠܒܵܒܵܐ ܩܲܕܝܼܫܵܐ ܒܗܝܼܫܘܿܥ: ܐܘܼܦ ܐܲܢ݇ܬ ܒܸܬ ܪܵܚܩܸܬ ܚܲܕ݇ܟ̰ܵܐ ܡ̣ܢ ܕܘܼܟܬܹܗ ܕܐܲܚܘܼܢܘܼܟܼ ܘܬܵܪܸܨܠܘܼܟܼ ܓܸܦܝܼܬܵܐ ܘܚܝܝܼ ܓܵܘܵܗ̇. ܘܐܵܢܵܐ ܒܸܬ ܓ̰ܵܡܥܸܢ ܘܡܲܬܸܢ ܠܟܸܣܠܘܼܟܼ ܟܸܢܫܹ̈ܐ ܓܘܼܪܹ̈ܐ. ܘܒܸܬ ܗܵܘܹܐ ܕܲܝܪܵܐ ܒܗ̇ܝ ܕܘܼܟܬܵܐ. ܘܒܸܬ ܦܵܐܹܫ ܩܸܪܝܵܐ ܒܫܸܡܘܼܟܼ. ܘܒܸܬ ܩܵܕܫܝܼ ܓܵܘܹܗ ܫܸܡܝܼ: ܒܕܵܡܵܝܬܵܐ ܕܩܘܼܕܵܫܹ̈ܐ ܕܡܲܠܲܐܟܼܹ̈ܐ. ܒܐܲܢܹܐ ܦܝܵܫܵܐ ܝ݇ܠܹܗ ܬܘܼܡܸܡܵܐ ܗ̇ܘ ܡܸܢܕܝܼ ܕܦܸܫܠܹܗ ܬܘܼܢܝܵܐ ܒܘܼܬ ܕܗ̇ܘ ܕܩܵܕ݇ܡܵܝܬܵܐ ܫܵܪܹܐ ܓܵܘ ܕܐܵܗܵܐ ܒܲܪܝܼܵܐ. ܐܲܢܹܐ ܫܡܸܥܠܲܢ ܡ̣ܢ ܡܲܠܲܐܟܼܵܐ: ܘܡܸܢ݇ܕܪܹܫ݇ ܠܵܐ ܚܙܹܐܠܲܢ ܐܸܠܹܗ. ܒܘܼܬ ܕܐܵܗܵܐ. ܒܵܒܵܐ ܩܲܕܝܼܫܵܐ ܒܗܝܼܫܘܿܥ ܦܪܸܫܠܹܗ ܡܸܢܝܼ: ܘܐ݇ܙܸܠܹܗ ܠܓܲܪܒܝܵܐ ܐܲܝܟܼ ܬܪܹܝ ܡܝܼܠܹ̈ܐ ܡܸܢܝܼ ܪܸܚܩܵܐ: ܬܘܼܪܸܨܠܹܗ ܓܸܦܝܼܬܵܐ ܩܵܐ ܓܵܢܹܗ: ܘܫܪܹܐܠܹܗ ܓܵܘܵܗ̇. ܘܡܵܪܝܵܐ ܗܘܸܐܠܹܗ ܥܲܡܹܗ: ܘܡܘܼܢܬܹܐ ܠܹܗ ܒܟܠܲܝܗܝ ܦܘܼܠܚܵܢ̈ܘܼܗܝ ܘܙܸܕܠܗ݇ܘܿܢ ܡܝܲܬܪ̈ܵܬܹܗ ܒܗ̇ܝ ܕܘܼܟܬܵܐ: ܦܠܸܛܠܵܗ̇ ܒܵܗܣܹܗ ܒܟܠܲܝܗܝ ܕܘܼܟܵܢܹ̈ܐ ܕܡܝܲܬܪܘܼܬܹܗ ܒܟܠ ܐܲܬܪܵܐ. ܘܐܵܬܝܼ ܗ݇ܘܵܘ ܠܟܸܣܠܹܗ ܪܵܒܵܐ: ܘܦܲܪܦܸܠܝܼ ܗ݇ܘܵܘ ܒܝܼܹܗ ܕܡܲܠܒܼܸܫ ܗ݇ܘܵܐ ܠܗ݇ܘܿܢ ܐܸܣܟܹܝܡܵܐ ܕܕܲܝܪܵܝܘܼܬܵܐ. ܘܟܹܐ ܩܵܒܸܠ ܗ݇ܘܵܐ ܠܗ݇ܘܿܢ ܘܡܵܠܸܦ ܗ݇ܘܵܐ ܪܹܐܙܵܐ: ܘܡܲܩܸܡ ܗ݇ܘܵܐ ܣܲܪ̈ܒܵܙܹܐ ܚܲܝܠܵܢܹ̈ܐ ܩܵܐ ܡܫܝܼܚܵܐ ܡܲܠܟܵܐ ܕܡܲܠܟܹ̈ܐ. ܘܦܠܸܛܠܗ݇ܘܿܢ ܡ̣ܢ ܬܲܠܡܝܼܕܹ̈ܗ ܢܘܼܪ̈ܵܒܹܐ ܒܪ̈ܝܼܟܼܹܐ: ܪ̈ܲܒܵܢܹܐ ܡܲܚܸܒܵܢܹ̈ܐ ܕܐܲܠܵܗܵܐ ܘܒܲܪܢܵܫܵܐ. ܘܡܸܠܝܹ̈ܐ ܒܚܘܼܒܵܐ ܟܵܡܝܼܠ: ܐܲܝܟܼ ܕܚܙܹܐܠܗ݇ܘܿܢ ܘܝ݇ܠܸܦܠܗ݇ܘܿܢ ܡ̣ܢ ܕܘܼܒܵܪܹ̈ܐ ܘܗܹܡܸܙܡܵܢܹ̈ܐ ܩܲܕܝܼܫܹ̈ܐ ܕܡ̣ܢ ܦܘܼܡܹܗ. ܘܐܵܢܵܐ ܗܲܡܵܫܵܐ ܟܹܐ ܐܵܙܸܠ݇ܢ ܗ݇ܘܵܐ ܠܟܸܣܠܹܗ. ܟܹܐ ܓܵܠܸܢ ܗ݇ܘܵܐ ܩܵܬܹܗ ܚܘܼܫܵܒܼ̈ܝܼ. ܘܗ̇ܘ ܙܹܐ ܐܵܬܹܐ ܗ݇ܘܵܐ ܠܟܸܣܠܝܼ: ܘܟܹܐ ܡܲܕܸܥ ܗ݇ܘܵܐ ܠܝܼ ܢܝܼܲܬܹܗ.
ܐܝܼܢܵܐ ܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܝ݇ܬܝܼܒܼܵܐ ܓܵܘ ܓܸܦܝܼܬܹܗ ܐ݇ܬܹܐܠܹܗ ܡܵܪܲܢ ܝܼܫܘܿܥ ܡܫܝܼܚܵܐ ܠܟܸܣܠܹܗ: ܘܐ݇ܡܸܪܹܗ ܐܸܠܹܗ ܫܠܵܡܵܐ ܠܘܼܟܼ ܓܘܼܒܝܵܐ ܕܝܼܝܼ ܒܗܝܼܫܘܿܥ: ܩܸܡܠܹܗ ܣܓܼܸܕܠܹܗ ܐܸܠܹܗ. ܘܐ݇ܡܸܪܹܗ ܩܵܬܹܗ ܡܵܪܲܢ: ܒܸܚܙܵܝܵܐ ܝ݇ܘܸܬ̇ ܠܐܵܗܵܐ ܒܲܪܝܼܵܐ ܟܡܵܐ ܪܘܝܼܚܵܐ ܝ݇ܠܹܗ؟ ܡ̣ܢ ܐܵܕܝܼܵܐ ܒܸܬ ܡܲܙܝܸܕܸܢ ܩܵܬܵܘܟܼܘܿܢ ܕܲܝܪ̈ܵܝܹܐ: ܕܩܵܕܫܝܼ ܓܵܘܹܗ ܫܸܡܝܼ: ܐ݇ܡܸܪܹܗ ܩܵܬܹܗ ܒܵܒܵܐ ܒܗܝܼܘܿܥ: ܡܵܪܝܼ ܓܵܘ ܕܐܵܗܵܐ ܒܲܪܝܼܵܐ: ܐܲܢ݇ܬ ܒܸܬ ܬܲܪܣܸܬ ܠܗ݇ܘܿܢ؟ ܘܡܵܪܲܢ ܐ݇ܡܸܪܹܗ: ܬܪܘܿܨܵܐ ܒܹܐܡܵܪܵܐ ܝ݇ܘܸܢ ܐܸܠܘܼܟܼ: ܕܐܸܢ ܡܵܫ݇ܟ̰ܚܸܢ ܓܵܘܲܝܗܝ ܚܘܼܒܵܐ: ܘܢܵܛܪܝܼ ܫܲܪܥܲܬܝܼ ܘܦܘܼܩܕܵܢ̈ܝܼ: ܘܗܲܡܸܢܝܼ ܒܝܼܝܼ: ܐܘܼܦ ܕܐܸܢ ܗܸܟ̰ ܙܲܗܡܲܬ ܠܵܐ ܓܵܪܫܝܼ: ܐܵܢܵܐ ܒܸܬ ܗܵܕܪܸܢ ܠܐܲܟܼܵܐ ܣܢܝܼܩܘܼܬܲܝ: ܘܒܸܬ ܡܲܣܥܒܼܸܢܗ݇ܘܿܢ ܒܛܵܒܼܵܬܹ̈ܐ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܡܵܪܝܼ: ܒܸܬ ܦܵܨܸܬ̇ ܠܗ݇ܘܿܢ ܡ̣ܢ ܓ̰ܘܼܪ̈ܵܒܹܐ ܘܦܠܵܫܹ̈ܐ ܕܕܸܫ̰ܡܸܢܹ̈ܐ؟ ܐ݇ܡܸܪܹܗ ܐܸܠܹܗ ܡܵܪܲܢ: ܐܸܢ ܢܵܛܪܝܼ ܦܘܼܩܕܵܢ̈ܝܼ ܒܸܬ ܦܵܨܸܢܗ݇ܘܿܢ ܡ̣ܢ ܓ̰ܘܼܪ̈ܵܒܹܐ. ܠܟܠܲܝܗܝ ܐܵܢܝܼ ܕܣܵܓܼܕܝܼ ܐܸܠܝܼ: ܒܸܬ ܠܵܒܠܸܢ ܠܡܲܠܟܘܼܬܵܐ ܕܫܡܲܝܵܐ. ܐܲܢܹܐ ܐ݇ܡܸܪܹܗ ܡܵܪܲܢ ܩܵܐ ܒܵܒܲܢ ܩܲܕܝܼܫܵܐ ܒܗܝܼܫܘܿܥ: ܘܝܘܼܗ݇ܒܼܸܠܹܗ ܫܠܵܡܵܐ: ܘܐ݇ܣܸܩܠܹܗ ܠܫܡܲܝܵܐ ܒܚܸܩܪܵܐ ܓܘܼܪܵܐ.
ܡ̣ܢ ܒܵܬ݇ܪ ܕܐܵܗܵܐ: ܪܵܒܵܐ ܗ݇ܘܹܐܠܹܗ ܒܠܝܼܓܵܐ ܒܢܛܵܪܬܵܐ ܕܓܵܢܹܗ: ܚܲܠܘܼܢܹܐ ܗ݇ܘܵܐ ܒܣܓܼܵܕܬܵܐ ܕܡܵܪܹܗ ܐܝܼܢܵܐ ܡܲܠܲܐܟܼܵܐ ܕܡܵܪܝܵܐ: ܗܲܡܵܫܵܐ ܣܲܚܒܸܪ ܗ݇ܘܵܐ ܠܹܗ: ܘܨܵܠܹܐ ܗ݇ܘܵܐ ܨܠܘܿܬܵܐ ܥܲܡܹܗ. ܐܝܼܢܵܐ ܗܵܘ ܣܵܛܵܢܵܐ ܣܵܢܝܵܢܵܐ ܕܛܵܒܼܵܬܹ̈ܐ ܗܲܡܵܫܵܐ ܟܹܐ ܨܵܠܹܐ ܗ݇ܘܵܐ ܩܵܬܹܗ ܢܸܫܒܹ̈ܐ ܕܨܵܐܸܕ ܗ݇ܘܵܐ ܠܹܗ ܒܓܲܪܕܹܗ: ܕܠܵܐ ܡܨܸܐܠܹܗ ܒܝܼܹܗ. ܚܫܸܒܼܠܹܗ ܒܐܘܼܪܚܵܐ ܕܙܘܼܙܹ̈ܐ ܘܐܝܼܩܵܪܹ̈ܐ ܓܵܪܸܫܠܹܗ. ܕܩܵܘܡܵܐ ܒܕܐܲܢܹܐ ܫܵܕܸܠܹܗ. ܐ݇ܙܸܠܹܗ ܠܟܸܣ ܚܲܕ݇ ܐ݇ܢܵܫܵܐ ܓܘܼܪܵܐ ܕܵܘܠܲܬܡܲܢܕ ܕܐܝܼܬ ܗ݇ܘܵܐ ܒܡܸܨܪܹܝܢ: ܡܘܼܚܙܝܼܵܐ ܠܹܗ ܓܵܢܹܗ ܩܵܬܹܗ ܒܕܡܘܼܬܵܐ ܕܡܲܠܲܐܟܼܵܐ: ܘܐ݇ܡܸܪܹܗ ܐܸܠܹܗ: ܕܐܝܼܬ ܓܵܘ ܒܲܪܝܼܵܐ ܕܐܸܣܩܹܛܹܐ ܚܲܕ݇ ܪܲܒܲܢ ܡܝܲܬܪܵܐ: ܟܠ ܡܸܢܕܝܼ ܕܛܵܠܸܒ ܡ̣ܢ ܡܵܪܝܵܐ ܟܹܐ ܝܵܗ݇ܒܼܸܠܹܗ ܙܹܠ݇ ܠܟܸܣܠܹܗ ܘܡܲܩܪܸܒܼ ܩܵܬܹܗ ܒܘܼܪܟܬܵܐ ܘܐܝܼܩܵܪܵܐ. ܡ̣ܢ ܒܲܝܬܘܼܟܼ ܩܵܐ ܕܒܵܪܸܟܼܠܘܼܟܼ. ܗ̇ܘ ܐ݇ܢܵܫܵܐ ܒܘܼܩܸܪܹܗ ܡܘܼܕܝܼ ܝ݇ܠܹܗ ܫܸܡܹܗ؟ ܐ݇ܡܸܪܹܗ ܣܵܛܵܢܵܐ: ܟܹܐ ܦܵܐܸܫ ܩܸܪܝܵܐ ܒܵܒܵܐ ܒܗܝܼܫܘܿܥ.
ܘܩܸܡܠܹܗ ܗ̇ܘ ܐ݇ܢܵܫܵܐ ܫܩܸܠܹܗ ܙܘܼܙܹ̈ܐ ܘܚܲܠܥܲܬܹ̈ܐ ܪܵܒܵܐ. ܘܡܘܼܛܥܸܢܹܗ ܕܵܘܸܠܬܵܐ ܓܘܼܪܬܵܐ ܠܚܵܨܵܐ ܕܓܘܼܡܠܹ̈ܐ: ܘܕܘܼܙ ܛܪܹܐܠܹܗ ܠܒܲܪܝܼܵܐ. ܐܝܼܢܵܐ ܗ̇ܘ ܡܲܠܲܐܟܼܵܐ ܕܟܹܐ ܣܲܚܒܸܪ ܗ݇ܘܵܐ ܠܒܵܒܵܐ ܒܗܝܼܫܘܿܥ: ܐ݇ܡܸܪܹܗ ܩܵܬܹܗ: ܗܵܐ ܣܵܛܵܢܵܐ ܨܘܼܠܝܵܐ ܝ݇ܠܹܗ ܢܸܫܒܹ̈ܐ ܕܡܲܚܲܒܬܵܐ ܕܙܘܼܙܹ̈ܐ ܘܕܐܝܼܩܵܪܹ̈ܐ ܩܵܬܘܼܟܼ. ܣܵܒܲܒ ܪ݇ܚܸܫܠܹܗ ܠܟܸܣ ܚܲܕ݇ ܓܘܼܪܵܐ ܕܡܸܨܪ̈ܵܝܹܐ: ܡܘܼܥܒܼܸܕܠܹܗ ܩܵܬܹܗ ܕܡܲܝܬܹܐ ܠܘܼܟܼ ܕܵܘܸܠܬܵܐ ܘܐܝܼܩܵܪܹ̈ܐ. ܘܩܸܡܠܹܗ ܣܵܒܼܵܐ ܩܲܕܝܼܫܵܐ ܐܲܝܟܼ ܕܚܵܕܸܪ ܓܵܘ ܒܲܪܝܼܵܐ: ܬܦܸܩܠܹܗ ܒܝܼܹܗ ܗ̇ܘ ܐ݇ܢܵܫܵܐ ܥܲܬܝܼܪܵܐ ܘܐ݇ܡܸܪܹܗ ܐܸܠܹܗ: ܐܲܢ݇ܬ ܝܵܕܥܹܬ ܠܗ̇ܘ ܣܵܒܼܵܐ ܓܘܼܪܵܐ ܕܓܵܘ ܕܐܵܗܵܐ ܒܲܪܝܼܵܐ: ܕܟܹܐ ܦܵܐܸܫ ܩܸܪܝܵܐ ܒܵܒܵܐ ܒܗܝܼܫܘܿܥ؟ ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܡܘܼܕܝܼ ܒܵܥܹܬ ܡܸܢܹܗ؟ ܓ̰ܘܼܘܸܒܠܹܗ ܐܵܗܵܐ ܥܲܬܝܼܪܵܐ: ܒܵܥܝܸܢ ܝܵܗ݇ܒܼܸܢ ܩܵܬܹܗ ܙܘܼܙܹ̈ܐ ܕܕܵܘܸܠܬܵܐ ܕܦܲܠܸܓ݇ ܩܵܐ ܐܲܚܘܼܢܘܵܬܹ̈ܐ: ܕܗܵܘܝܵܐ ܒܘܼܪܟܬܹܗ ܒܒܲܝܬܝܼ. ܣܵܒܼܵܐ ܐ݇ܡܸܪܹܗ ܩܵܬܹܗ: ܓܵܘ ܕܐܵܗܵܐ ܒܲܪܝܼܵܐ ܠܲܝܬ ܠܲܢ ܣܢܝܼܩܘܼܬܵܐ ܠܙܘܼܙܹ̈ܐ. ܘܐܵܢܝܼ ܕܝܼܢܵܐ ܒܸܚܵܝܵܐ ܠܐܲܟܼܵܐ ܠܹܐ ܩܵܒܠܝܼ ܠܡܸܢܕܝܼ ܕܡܘܼܬܹܐܠܘܼܟܼ ܥܲܡܘܼܟܼ. ܠܹܐ ܝ݇ܠܵܗ̇ ܠܵܙܸܡ ܕܥܲܓ̰ܸܙܸܬ̇ ܠܓܵܢܘܼܟܼ ܒܐܵܗܵܐ. ܐܲܠܵܗܵܐ ܩܵܒܸܠܹܗ ܩܘܼܪܒܵܢܘܼܟܼ ܕܐܘܿܪ ܡܐܲܟܼܵܐ ܠܡܸܨܪܹܝܢ: ܪ݇ܚܘܿܫ ܠܡܵܬܘܵܬܹ̈ܐ ܦܲܠܓ݇ܝܼ ܠܐܵܗܵܐ ܡܸܢܕܝܼ ܩܵܐ ܡܸܣܟܹܢܹ̈ܐ ܘܝܵܬܘܼܡܹ̈ܐ ܘܐܲܪ̈ܡܸܠܝܵܬܹܐ: ܐܲܠܵܗܵܐ ܒܵܪܸܟܼ ܐܸܠܘܼܟܼ ܘܒܲܝܬܘܼܟܼ.
ܘܕܐܸܪܹܗ ܗ̇ܘ ܐ݇ܢܵܫܵܐ ܠܒܲܝܬܹܗ: ܘܥܒܼܸܕܠܹܗ ܐܲܝܟܼ ܕܦܸܫܠܹܗ ܦܘܼܩܕܵܐ ܒܩܲܕܝܼܫܵܐ ܕܡܵܪܝܵܐ. ܘܟܲܕ ܕܐܸܪܹܗ ܒܵܒܲܢ ܩܲܕܝܼܫܵܐ ܠܕܘܼܟܬܹܗ: ܦܸܫܠܹܗ ܚܸܙܝܵܐ ܐܸܠܹܗ ܣܵܛܵܢܵܐ: ܒܹܐܡܵܪܵܐ ܩܲܡ ܓ̰ܲܢܓ̰ܸܪܸܬ ܠܝܼ ܒܗܝܼܫܘܿܥ! ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܝܵܐ ܣܵܢܝܵܢܵܐ ܕܛܵܒܼܵܬܹ̈ܐ: ܡ̣ܢ ܕܗ̇ܝ ܥܕܵܢܵܐ ܕܦܸܫܠܘܼܟܼ ܒܸܪܝܵܐ: ܚܘܼܪܵܝܝܼ ܡܲܟܟ̰ܘܼܚܹܐ ܝ݇ܘܸܬ̇ ܓܵܢܘܼܟܼ. ܐܵܡܸܪ ܐܸܠܹܗ ܣܵܛܵܢܵܐ: ܐܵܢܵܐ ܒܸܬ ܚܵܫܒܼܸܢ ܕܐܲܢ݇ܬ̇ ܠܹܐ ܝ݇ܘܸܬ̇ ܦܝܼܫܵܐ ܒܸܪܝܵܐ. ܐܵܡܸܪ ܐܸܠܹܗ ܩܲܕܝܼܫܵܐ: ܢܵܓ̰ܸܒܼ ܒܝܼܘܼܟܼ ܡܵܪܝܵܐ ܘܛܵܠܸܩ ܠܘܼܟܼ. ܘܐ݇ܙܸܠܹܗ ܘܠܵܐ ܦܸܫܠܹܗ ܚܸܙܝܵܐ. ܘܬܒܼܸܪܹܗ ܠܢܸܫܒܹ̈ܐ ܕܒܝܼܫܵܐ ܘܝ݇ܬܸܒܼܠܹܗ ܒܕܘܼܟܬܹܗ ܒܫܠܵܡܵܐ: ܘܡܵܪܝܵܐ ܥܲܡܹܗ ܗ݇ܘܵܐ ܒܟܠܹܗ ܦܘܼܠܚܵܢܹܗ: ܕܦܵܨܹܐܠܹܗ ܡ̣ܢ ܟܠܲܝܗܝ ܕܸܫ̰ܡܸܢܹ̈ܐ.
ܡ̣ܢ ܒܵܬ݇ܪ ܩܸܡܠܹܗ ܥܒܼܸܪܹܗ ܠܒܲܪܝܼܵܐ ܓܵܘܵܝܵܐ: ܘܝ݇ܬܸܒܼܠܹܗ ܬܵܡܵܐ ܒܢܲܦ̮ܫܹܗ. ܘܝܘܼܗ݇ܒܼܸܠܹܗ ܓܵܢܹܗ ܠܓ̰ܵܥܦܹ̈ܐ ܓܘܼܪܹ̈ܐ. ܚܲܝܠܬܵܢܵܐܝܼܬ ܦܝܵܫܵܐ ܗ݇ܘܵܐ ܬܘܼܓܒܸܪܵܐ. ܐܲܚܟ̰ܝܼ ܒܝܵܘܡܵܐ ܕܫܲܒܬܵܐ ܘܚܲܕ݇ܒܼܫܹܒܵܐ ܟܹܐ ܫܵܩܸܠ ܗ݇ܘܵܐ ܦܲܓܼܪܹܗ ܘܕܸܡܹܗ ܕܡܫܝܼܚܵܐ: ܘܡܸܢܕܝܼ ܐ݇ܚܹܪ݇ܢܵܐ ܠܹܐ ܐܵܟܼܸܠ ܗ݇ܘܵܐ. ܟܹܐ ܡܲܠܝܸܨ ܗ݇ܘܵܐ ܠܦܲܓܼܪܹܗ ܐܲܝܟܼ ܕܐܸܢ ܠܹܐ ܝ݇ܠܹܗ ܕܕܝܼܹܗ. ܐ݇ܡܸܪܹܗ ܡܵܪܲܢ ܒܐܹܘܵܢܓܲܠܝܼܘܿܢ ܕܝܼܹܗ: ܟܠ ܕܥܲܪܩܸܠ ܒܝܼܝܼ ܐܵܢܵܐ ܒܸܬ ܥܲܪܩܸܠܸܢ ܒܝܼܹܗ. ܦܘܼܠܚܵܢܹ̈ܐ ܕܐܵܢܵܐ ܒܸܥܒܼܵܕܵܐ ܝ݇ܘܸܢ: ܐܘܼܦ ܗ̇ܘ ܒܸܬ ܥܵܒܼܸܕ. ܘܙܵܘܕܵܐ ܡܸܢܲܝܗܝ ܒܸܬ ܥܵܒܼܸܕ. ܒܘܼܬ ܐܵܗܵܐ ܠܹܐ ܝ݇ܠܵܗ̇ ܠܵܙܸܡ ܕܐ݇ܢܵܫܵܐ ܦܵܐܸܫ ܕܘܼܒܵܪ ܒܗ̇ܘ ܡܸܢܕܝܼ ܕܐ݇ܡܸܪܹܗ ܟܬܵܒܼܵܐ. ܣܵܒܵܒ ܟܬܝܼܒܼܵܐ ܝ݇ܠܹܗ: ܐܵܢܝܼ ܕܙܲܒܘܼܢ ܝ݇ܢܵܐ ܓܵܘ ܒܢܲܝ̈ܢܵܫܵܐ: ܚܲܝܠܵܢܹ̈ܐ ܝ݇ܢܵܐ ܠܟܸܣ ܐܲܠܵܗܵܐ.
ܒܸܓ̰ܡܲܥܝܵܐ ܗ݇ܘܵܘ ܠܟܸܣ ܒܵܒܲܢ ܩܲܕܝܼܫܵܐ ܒܢܘܼܢܹ̈ܐ ܪ̈ܘܼܚܵܢܵܝܹܐ: ܓ̰ܡܸܥܠܗ݇ܘܿܢ ܒܪܹܫܹܗ ܐܲܝܟܼ ܕܓ̰ܵܡܥܝܼ ܕܵܒܵܫܹ̈ܐ ܠܫܵܢܵܐ ܕܕܸܒܼܫܵܐ ܟܹܐ ܡܲܣܒܼܸܥ ܗ݇ܘܵܐ ܠܗ݇ܘܿܢ ܒܝܘܼܠܦܵܢܵܐ ܪܘܼܚܵܢܵܝܵܐ ܡ̣ܢ ܗܹܡܸܙܡܵܢܹ̈ܐ ܚܵܝܹ̈ܐ ܕܟܹܐ ܦܵܠܛܝܼ ܗ݇ܘܵܘ ܡ̣ܢ ܦܘܼܡܹܗ ܘܡܩܲܕܫܝܼ ܗ݇ܘܵܘ ܠܐܲܠܵܗܵܐ ܒܕܵܝܸܡܘܼܬܵܐ. ܘܡܵܠܸܦ ܗ݇ܘܵܐ ܠܗ݇ܘܿܢ ܕܡܲܚܸܒܝܼ ܫܸܠܝܘܼܬܵܐ: ܘܪܵܚܩܝܼ ܡ̣ܢ ܓ̰ܡܵܥܝܵܬܹ̈ܐ: ܗܵܘܝܼ ܣܦܝܼܩܹ̈ܐ ܡ̣ܢ ܕܘܼܢܝܹܐ: ܘܡܸܣܟܹܢܹ̈ܐ ܒܪܘܼܚܵܐ. ܘܗܵܘܝܼ ܒܫܵܗܲܪܬܵܐ ܕܠܲܝܠܵܘܵܬܹ̈ܐ: ܘܬܸܫܡܸܫܬܵܐ ܘܦܲܪܦܲܠܬܵܐ ܘܨܠܵܘܵܬܹ̈ܐ ܕܠܵܐ ܗܸܟ̰ ܫܠܵܝܬܵܐ. ܘܐܝܼܕܵܬܲܝ̈ ܠܵܐ ܟܵܠܝܼ ܡ̣ܢ ܦܘܼܠܚܵܢܵܐ ܩܵܐ ܡܠܵܝܬܵܐ ܕܣܢܝܼܩܘܼܬܲܝܗܝ. ܘܩܵܒܲܠܬܵܐ ܕܢܘܼܟܼܪ̈ܵܝܹܐ: ܘܦܵܝܫܝܼ ܡܘܼܚܸܒܹ̈ܐ ܒܝܼܲܝܗܝ: ܘܝܵܗ݇ܒܼܝܼ ܐܸܪܘܵܢܵܐ ܡ̣ܢ ܠܸܒܲܝ. ܘܡܲܚܸܒܝܼ ܢܘܼܟܼܪܵܝܘܼܬܵܐ ܘܡܸܣܟܹܢܘܼܬܵܐ. ܠܬܲܡܵܡܬܵܐ ܕܐܲܢܹܐ ܟܠܲܝܗܝ: ܫܵܒܼܩܝܼ ܪܸܙܵܝܲܝܗܝ: ܘܥܵܒܼܕܝܼ ܪܸܙܵܝܵܐ ܕܐܲܚܘܼܢܘܵܬܲܝ̈. ܐܵܗܵܐ ܝ݇ܠܹܗ ܢܵܡܘܿܣܵܐ ܘܢܒܼܝܼܹ̈ܐ. ܗܲܕܟܼܵܐ ܦܵܩܸܕ ܗ݇ܘܵܐ ܠܗ݇ܘܿܢ ܗ̇ܘ ܩܲܕܝܼܫܵܐ ܕܐܲܠܵܗܵܐ.
ܟܲܕ ܚܙܹܐܠܹܗ ܕܪܵܒܵܐ ܐܲܚܘܼܢܘܵܬܹ̈ܐ ܓ̰ܡܸܥܠܗܘܿܢ ܠܟܸܣܠܹܗ ܦܪܵܝܼܫܵܐ ܠܹܗ ܓܵܢܹܗ ܡܸܢܲܝ: ܘܥܒܼܸܪܹܗ ܠܒܲܪܝܼܵܐ ܓܵܘܵܝܵܐ: ܡܘܼܫ݇ܟ̰ܸܚܠܹܗ ܚܲܕ݇ ܫܩܝܼܦܵܐ ܫܪܹܐܠܹܗ ܬܵܡܵܐ ܩܵܐ ܬܸܠܵܬ ܫܸܢܹ̈ܐ: ܘܠܵܐ ܦܸܫܠܹܗ ܚܸܙܝܵܐ ܠܐ݇ܢܵܫܵܐ. ܝ݇ܪܸܟܼܠܹܗ ܟܵܘܣܹܗ. ܘܕܵܝܸܡ ܒܠܝܼܓܵܐ ܗ݇ܘܵܐ ܒܨܠܘܿܬܵܐ ܘܫܵܗܲܪܬܵܐ ܒܠܲܝܠܹܐ ܘܒܐܝܼܡܵܡܵܐ. ܗܸܟ̰ ܠܹܐ ܕܵܡܸܟܼ ܗ݇ܘܵܐ: ܡ̣ܢ ܚܘܼܒܹܗ ܠܟܸܣ ܡܵܪܝܵܐ. ܡܸܚܝܵܐ ܗ݇ܘܵܐ ܚܕܵܐ ܣܸܟܬܵܐ ܓܵܘ ܫܩܝܼܦܵܐ: ܘܐܵܣܸܪ ܗ݇ܘܵܐ ܒܝܼܘܿܗ̇ ܟܵܘܣܹܗ ܘܟܹܐ ܗܵܘܹܐ ܗ݇ܘܵܐ ܨܵܠܘܿܝܹܐ ܠܐܲܠܵܗܵܐ.
ܘܟܲܕ ܬܘܼܡܸܡܠܘܿܢ ܐܸܠܹܗ ܬܸܠܵܬ ܫܸܢܹ̈ܐ ܐ݇ܬܹܐܠܹܗ ܡܵܪܲܢ ܝܼܫܘܿܥ ܡܫܝܼܚܵܐ ܠܟܸܣܠܹܗ. ܣܵܒܼܵܐ ܟܲܕ ܚܙܹܐ ܠܹܗ ܠܡܫܝܼܚܵܐ: ܦܸܫܠܹܗ ܫܥܝܼܫܵܐ: ܘܗܘܹܐ ܠܹܗ ܪܲܬܪܘܼܬܹܐ ܘܢܦܸܠܹܗ ܠܐܲܪܥܵܐ. ܘܡܵܪܲܢ ܡܘܼܩܸܡܠܹܗ ܘܝܘܼܗ݇ܒܼܸܠܹܗ ܠܸܒܵܐ ܘܐ݇ܡܸܪܹܗ ܐܸܠܹܗ: ܫܠܵܡܵܐ ܐܸܠܘܼܟܼ ܝܵܐ ܒܗܝܼܫܘܿܥ ܓܘܼܒܝܵܐ ܕܝܼܝܼ. ܣܵܒܲܒ ܚܙܹܐܠܝܼ ܠܓ̰ܵܥܦ̈ܘܼܟܼ ܘܩܘܼܒܠܲܝܗܝ ܠܝܼ. ܩܲܡ ܝܵܗ݇ܒܼܸܢܘܼܟܼ ܚܲܠܥܲܬ ܕܟܠ ܐ݇ܢܵܫܵܐ ܕܛܵܠܸܒ ܡܸܢܕܝܼ ܒܫܸܡܘܼܟܼ ܡܸܢܝܼ ܒܸܬ ܫܵܒܼܩܸܢ ܠܚܛܝܼܬܹܗ: ܘܢܵܛܪܸܢܹܗ. ܐܵܡܸܪ ܐܸܠܹܗ ܩܲܕܝܼܫܵܐ: ܡܵܪܝܼ ܒܸܛܠܵܒܵܐ ܝ݇ܘܸܢ ܕܚܲܠܸܢܸܬ ܠܝܼ ܕܡܵܚܸܢ ܚܲܝܠܵܐ ܒܘܼܬ ܚܵܬܸܪ ܕܫܡܘܼܟܼ ܩܲܕܝܼܫܵܐ: ܣܵܒܲܒ ܐܲܢ݇ܬ ܝܼܘܸܬ̇ ܡܵܪܵܐ ܕܟܠ. ܩܘܼܒܸܠܘܼܟܼ ܚܲܫܵܐ ܒܘܼܬ ܚܵܬܸܪ ܕܟܠܵܗ̇ ܕܘܼܢܝܹܐ: ܘܡܝܼܬܠܘܼܟܼ ܘܩܸܡܠܘܼܟܼ ܘܩܲܡ ܦܲܪܩܸܬ̇ܠܲܢ. ܒܲܣ ܟܡܵܐ ܒܘܼܫ ܙܵܘܕܵܐ ܘܵܓ̰ܸܒ ܝܼܠܵܗ̇ ܩܵܬܲܢ ܚܲܛܵܝܹ̈ܐ ܕܫܵܟܪܲܚܠܘܼܟܼ ܘܩܵܒܠܲܚ ܚܲܫܵܐ ܒܘܼܬ ܚܵܬܸܪ ܕܫܸܡܘܼܟܼ. ܘܒܘܼܪܸܟܼܠܹܗ ܡܵܪܲܢ: ܫܒܼܸܩܠܹܗ ܒܫܠܵܡܵܐ: ܘܐ݇ܣܸܩܠܹܗ ܒܚܸܩܪܵܐ ܠܲܫܡܲܝܵܐ.
ܗܵܝܓܵܗ ܐܵܗܵܐ ܒܵܒܲܢ ܩܲܕܝܼܫܵܐ ܝܘܼܗ݇ܒܼܸܠܹܗ ܦܲܓܼܪܹܗ ܠܪܵܒܵܐ ܓ̰ܘܼܢܓ̰ܵܪܹ̈ܐ ܩܸܫܝܹ̈ܐ: ܒܸܚܕܵܪܵܐ ܓܵܘ ܛܘܼܪ̈ܵܢܹܐ ܐܲܝܟܵܐ ܕܠܲܝܬ ܗ݇ܘܵܐ ܚܲܕ݇ ܒܲܪܢܵܫܵܐ. ܘܛܵܫܹܐ ܗ݇ܘܵܐ ܠܕܘܼܒܵܪ̈ܘܼܗܝ ܕܠܵܐ ܦܵܝܫܝܼ ܚܸܙܝܹ̈ܐ ܠܒܢܲܝ̈ܢܵܫܵܐ. ܘܟܹܐ ܗܵܘܹܐ ܗ݇ܘܵܐ ܒܨܵܘܡܵܐ ܘܒܨܠܘܿܬܵܐ ܐܲܡܝܼܢܵܐܝܼܬ. ܟܠ ܟܡܵܐ ܝܵܘܡܵܢܹ̈ܐ ܐܵܟܼܸܠ ܗ݇ܘܵܐ ܠܲܚܡܵܐ ܒܲܪܘܼܙܵܐ ܒܡܝܼܵܐ. ܡܸܢ݇ܕܪܹܫ݇ ܦܸܫܠܹܗ ܚܸܙܝܵܐ ܐܸܠܹܗ ܡܵܪܝܵܐ: ܗܘܼܡܙܸܡܠܹܗ ܥܲܡܹܗ ܘܐ݇ܡܸܪܹܗ ܐܸܠܹܗ ܕܦܵܠܸܛ ܠܒܲܪܝܼܵܐ ܠܟܸܣ ܐܲܚܘܼܢܘܵܬܹ̈ܐ: ܘܗܵܘܹܐ ܩܵܬܲܝ ܒܵܒܵܐ ܘܡܵܠܸܦ ܗ݇ܘܵܐ ܠܗ݇ܘܿܢ ܩܵܢܘܿܢܹ̈ܐ ܘܪܹ̈ܐܙܹܐ ܕܕܲܝܪܵܝܘܼܬܵܐ. ܘܦܘܼܩܕܵܢܹ̈ܐ ܕܒܝܼܲܝ ܥܲܪܩܸܠܝܼ ܚܲܝܲܝ̈. ܐܝܼܢܵܐ ܐܵܗܵܐ ܒܵܒܵܐ ܦܘܼܪܦܸܠܹܗ ܒܡܵܪܝܵܐ ܘܐ݇ܡܸܪܹܗ: ܡܵܪܝܼ ܠܲܝܬ ܠܝܼ ܚܲܝܠܵܐ ܩܵܐ ܕܐܵܗܵܐ ܚܸܠܡܲܬ: ܒܸܙܕܵܥܵܐ ܝ݇ܘܸܢ ܕܠܵܐ ܛܵܠܩܝܼ ܦܘܼܠܚܵܢ̈ܝܼ ܕܒܘܼܬ ܚܵܬܸܪ ܕܫܸܡܘܼܟܼ ܩܲܕܝܼܫܵܐ. ܐ݇ܡܸܪܹܗ ܐܸܠܹܗ ܡܵܪܝܵܐ: ܠܵܐ ܙܵܕܥܸܬ̇: ܐܵܢܵܐ ܒܸܬ ܦܲܪܥܸܢܹܗ ܗܵܩܵܐ ܕܦܘܼܠܚܵܢ̈ܘܼܟܼ ܓܵܘ ܐܘܿܪܸܫܠܸܡ ܫܡܲܝܵܢܝܼܬܵܐ. ܘܒܸܬ ܓܲܪܘܸܣܸܢ ܠܫܸܡܘܼܟܼ ܒܣܲܪܵܣܬܘܼܬܵܐ ܒܹܐܡܵܪܵܐ ܝ݇ܘܸܢ: ܛܘܼܒܼܵܐ ܠܗ̇ܘ ܐ݇ܢܵܫܵܐ ܕܢܵܛܸܪ ܦܘܼܩܕܵܢܹ̈ܐ ܕܡܵܪܝܵܐ. ܗܲܕܟܼܵܐ ܦܠܸܛܠܹܗ ܪܹܝܚܵܐ ܒܲܣܝܼܡܵܐ ܕܫܸܡܵܐ ܕܒܵܒܲܢ ܩܲܕܝܼܫܵܐ ܒܵܒܵܐ ܒܗܝܼܫܘܿܥ ܘܡܠܹܐܠܹܗ ܠܟܠܵܗ̇ ܒܲܪܝܼܵܐ. ܘܐܵܬܝܼ ܗ݇ܘܵܘ ܠܟܸܣܠܹܗ ܪܵܒܵܐ ܐ݇ܢܵܫܹ̈ܐ ܡ̣ܢ ܟܠܲܝܗܝ ܕܘܼܟܵܢܹ̈ܐ ܕܥܵܒܼܕܝܼ ܪܵܐܝܝܼ ܥܲܡܹܗ: ܥܵܓ̰ܒܝܼ ܗ݇ܘܵܘ ܒܡܲܟܝܼܟܼܘܼܬܹܗ. ܩܵܐ ܟܠܲܝܗܝ ܡܵܠܸܦ ܗ݇ܘܵܐ ܙܕܘܼܥܬܵܐ ܕܡܵܪܝܵܐ: ܘܝܵܗ݇ܒܼܸܠ ܗ݇ܘܵܐ ܠܗ݇ܘܿܢ ܠܸܒܵܐ.
ܐܵܢܵܐ ܒܵܨܘܿܪܵܐ ܝܘܿܚܲܢܵܢ: ܒܚܲܕ݇ ܡ̣ܢ ܝܵܘܡܵܢܹ̈ܐ ܪ݇ܚܸܫܠܝܼ ܠܟܸܣ ܒܵܒܵܐ ܒܗܝܼܫܘܿܥ: ܕܝܵܕܥܸܢ ܒܘܼܬ ܕܝܼܹܗ. ܟܲܕ ܡܛܹܐܠܝܼ ܠܬܲܪܥܵܐ ܕܩܸܠܵܝܬܹܗ: ܫܡܸܥܠܝܼ ܩܵܠܵܐ ܕܐ݇ܢܵܫܹ̈ܐ ܗܲܡܙܘܼܡܹܐ ܥܲܡ ܩܲܕܝܼܫܵܐ ܘܒܸܒܟܼܵܝܵܐ: ܬܘܼܩܬܸܩܠܝܼ ܠܬܲܪܥܵܐ ܦܬܸܚܠܹܗ ܩܵܬܝܼ ܘܥܒܼܸܪܝܼ ܨܘܼܠܹܐܠܲܢ ܘܝ݇ܬܸܒܼܠܲܢ. ܐ݇ܡܸܪܝܼ ܒܵܒܵܐ ܩܲܕܝܼܫܵܐ: ܡܵܢܝܼ ܝܼܗܘܵܐ ܗ̇ܘ ܕܐܵܕܝܼܵܐ ܗܲܡܙܘܼܡܹܐ ܗ݇ܘܵܐ ܥܲܡܘܼܟܼ؟ ܐ݇ܡܸܪܹܗ ܐܸܠܝܼ: ܡ̣ܢ ܒܵܬ݇ܪ ܕܫܸܡܥܝܘܿܗ̇ ܝ݇ܘܸܬ̇ ܣܘܿܗܒܲܬܲܢ: ܒܸܬ ܬܵܢܸܢ ܩܵܬܘܼܟܼ. ܩܘܼܣܛܲܢܛܝܼܢܘܿܣ ܡܲܠܟܵܐ ܕܪ̈ܗܘܿܡܵܝܹܐ ܗ݇ܘܵܐ: ܕܐ݇ܬܹܐܠܹܗ ܠܟܸܣܠܝܼ ܡ̣ܢ ܫܡܲܝܵܐ ܟܲܕ ܚܲܫܵܢܵܐ ܒܠܸܒܹܗ: ܒܟܼܹܐܠܹܗ ܘܐ݇ܡܸܪܹܗ: ܠܵܐ ܝ݇ܕܸܥܠܝܼ ܕܚܲܕ݇ ܗܲܕܟܼܵܐ ܗܵܩܵܐ ܓܘܼܪܵܐ ܐܝܼܬ ܩܵܐ ܕܲܝܪ̈ܵܝܹܐ: ܒܘܼܬ ܡܸܣܟܹܢܘܼܬܲܝ ܘܩܲܪܝܼܒܵܝܘܼܬܲܝ ܕܒܘܼܬ ܡܵܪܲܢ: ܐܘܼܦ ܐܵܢܵܐ ܒܸܬ ܗܵܘܸܢ ܗ݇ܘܵܐ ܫܒܼܝܼܩܵܐ ܠܡܲܠܟܘܼܬܝܼ: ܘܗܘܝܼܵܐ ܕܲܝܪܵܝܵܐ. ܘܐ݇ܡܸܪܝܼ ܐܸܠܹܗ: ܠܵܐ ܝܘܼܗ݇ܒܼܸܠܹܗ ܐܲܠܵܗܵܐ ܐܝܼܩܵܪܵܐ ܠܡܲܠܟܘܼܬܘܼܟܼ ܒܫܡܲܝܵܐ؟ ܐ݇ܡܸܪܹܗ ܐܸܠܝܼ ܗܹܐ: ܐܝܼܢܵܐ ܠܹܐ ܡܵܛܹܐ ܠܗ̇ܘ ܕܕܲܝܪ̈ܵܝܹܐ: ܣܵܒܲܒ ܒܸܚܙܵܝܵܐ ܝ݇ܘܸܢ ܚܲܕ݇ܟܡܵܐ ܡܸܢܲܝ: ܐܝܼܡܲܢ ܕܒܸܦܝܵܫܵܐ ܝ݇ܢܵܐ ܡܘܼܢܝܸܚܹ̈ܐ ܡ̣ܢ ܦܲܓܼܪܵܐ: ܡܲܩܘܼܡܹܐ ܝ݇ܢܵܐ ܓܘܼܠܦܵܢܹ̈ܐ ܘܒܸܦܪܵܚܵܐ ܘܒܸܥܒܼܵܪܵܐ ܗܲܠ ܫܘܼܪܵܐ ܕܐܘܿܪܸܫܠܸܡ ܫܡܲܝܵܢܵܝܬܵܐ: ܒܸܥܒܼܵܪܵܐ ܝ݇ܢܵܐ ܕܠܵܐ ܡܲܟܠܵܝܬܵܐ ܡ̣ܢ ܢܵܛܘܿܪܹ̈ܐ ܕܬܲܪ̈ܥܵܢܹܐ ܕܬܵܡܵܐ. ܘܐܵܢܵܐ ܐ݇ܡܸܪܝܼ ܩܵܬܹܗ: ܐܵܗܵܐ ܒܲܣܵܐ ܝ݇ܠܵܗ̇ ܩܵܬܘܼܟܼ: ܕܐܲܢ݇ܬ̇ ܐܝܼܬܠܘܼܟܼ ܒܲܟܼܬܵܐ: ܒܢܘܼܢܹ̈ܐ: ܪܹ̈ܓܵܘܵܬܹܐ: ܕܵܘܸܠܬܵܐ: ܘܡܲܠܟܘܼܬܵܐ: ܐܝܼܩܵܪܹ̈ܐ ܘܕܲܪ̈ܓܼܹܐ: ܘܥܵܒܼܕܝܼܠܘܼܟܼ ܒܵܪܵܒܵܪ ܥܲܡ ܕܐܵܢܝܼ ܕܫܒܼܸܩܠܘܿܢ ܒܵܬܲܝ̈: ܘܕܵܘܸܠܬܲܝ. ܡܘܼܠܝܸܨܹ̈ܐ ܘܣܢܝܼܩܹ̈ܐ: ܒܸܥܒܼܵܕܵܐ ܫܵܗܲܪܬܵܐ ܒܠܲܝܠܹܐ: ܟܦܝܼܢܹ̈ܐ ܨܸܗܝܹ̈ܐ ܕܡܝܼܟܼܹ̈ܐ ܥܲܠ ܥܲܦܪܵܐ. ܐܲܝܟܼ ܕܐ݇ܡܸܪܹܗ ܫܠܝܼܚܵܐ: ܐ݇ܢܵܫܹ̈ܐ ܕܠܹܐ ܝ݇ܠܵܗ̇ ܚܫܝܼܚܬܵܐ ܩܵܬܲܝ ܕܘܼܢܝܹܐ ܐܲܢܹܐ ܬܵܢܘܼܝܹܐ ܝ݇ܘܸܢ ܗ݇ܘܵܐ ܩܵܬܹܗ: ܘܐܲܢ݇ܬ ܬܘܼܩܬܸܩܠܘܼܟܼ ܠܬܲܪܥܵܐ: ܘܗ̇ܘ ܫܘܼܢܹܐܠܹܗ ܟܲܕ ܐܲܢܹܐ ܫܡܸܥܠܝܼ ܡ̣ܢ ܣܵܒܼܵܐ ܩܲܕܝܼܫܵܐ: ܦܸܫܠܹܗ ܡܘܼܙܝܸܕܵܐ ܩܵܬܝܼ ܚܲܝܠܵܐ ܒܘܼܫ ܓܘܼܪܵܐ: ܘܐ݇ܡܸܪܝܼ ܒܪܝܼܟܼܵܐ ܝ݇ܠܹܗ ܡܵܪܝܵܐ ܕܓܠܹܐܠܹܗ ܥܵܓ̰ܝܼܒܘܼܝܵܬܹ̈ܐ ܩܵܐ ܩܲܕܝܼܫ̈ܘܼܗܝ.
ܐܝܼܬ ܗ݇ܘܵܐ ܚܲܕ݇ ܣܵܒܼܵܐ ܝܼܚܝܼܕܵܝܵܐ ܒܐܲܬܪܵܐ ܕܒܲܣܩܝܼ: ܣܵܛܵܢܵܐ ܨܘܼܠܹܐܠܹܗ ܢܸܫܒܹ̈ܐ ܩܵܬܹܗ: ܡܠܹܐܠܹܗ ܒܠܸܒܹܗ ܕܬܵܢܹܐ ܠܲܝܬ ܪܘܼܚܵܐ ܕܩܘܼܕܫܵܐ. ܐܲܚܟ̰ܝܼ ܒܵܒܵܐ ܘܒܪܘܼܢܵܐ: ܐܵܗܵܐ ܚܸܠܛܵܐ ܐܲܫܟܵܪܵܐ ܟܹܐ ܡܲܟܪܸܙ ܗ݇ܘܵܐ ܠܹܗ. ܐܝܼܢܵܐ ܐܲܠܵܗܵܐ ܡܪܲܚܡܵܢܵܐ: ܠܵܐ ܒܥܹܐܠܹܗ ܕܛܵܠܩܝܼ ܦܘܼܠܚܵܢܹ̈ܐ ܕܣܵܒܼܵܐ. ܓܸܠܝܵܐ ܠܹܗ ܐܵܗܵܐ ܥܸܠܬܵܐ ܠܒܵܒܲܢ ܩܲܕܝܼܫܵܐ ܒܗܝܼܫܘܿܥ: ܦܸܫܠܹܗ ܬܘܼܢܝܵܐ ܩܵܬܹܗ ܒܚܸܙܘܵܐ. ܕܩܘܼܡ݇ ܙܹܠ݇ ܠܐܲܬܪܵܐ ܕܒܲܣܩܝܼ ܠܬܹܒܼܵܐܝܼܣ: ܒܸܬ ܚܵܙܸܬ̇ ܬܵܡܵܐ ܚܲܕ݇ ܝܼܚܝܼܕܵܝܵܐ: ܕܡܲܟܪܘܼܙܹܐ ܝ݇ܠܹܗ: ܠܲܝܬ ܪܘܼܚܵܐ ܕܩܘܼܕܫܵܐ. ܐܝܼܢܵܐ ܩܲܕܝܼܫܵܐ ܐܲܒܵܐ ܒܗܝܼܫܘܿܥ: ܫܥܸܫܠܵܗ̇ ܒܠܸܒܹܗ ܚܸܡܬܵܐ ܕܐܲܠܵܗܵܐ ܕܦܵܠܸܚ ܘܡܲܢܟܼܸܣ ܠܗ̇ܘ ܝܼܚܝܼܕܵܝܵܐ ܣܵܒܼܵܐ. ܬܘܼܪܸܨܠܹܗ ܣܵܠܹ̈ܐ ܩܵܐ ܟܠ ܚܲܕ݇ ܡܸܢܲܝ ܬܸܠܵܬ ܢܵܬܝܵܬܹ̈ܐ: ܒܛܘܼܦ̮ܣܵܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ. ܘܠܘܼܒܠܲܝܠܹܗ ܠܡܸܨܪܹܝܢ ܐܲܝܟܵܐ ܕܫܸܪܝܵܐ ܗ݇ܘܵܐ ܗ̇ܘ ܝܼܚܝܼܕܵܝܵܐ. ܘܫܪܹܐܠܹܗ ܠܟܸܣܠܹܗ ܒܕܵܡܵܝܬܵܐ ܕܚܲܕ݇ ܩܲܪܝܼܒܵܝܵܐ. ܘܚܵܕܸܪ ܗ݇ܘܵܐ ܐܵܗܵܐ ܣܵܒܼܵܐ ܩܲܕܝܼܫܵܐ: ܒܵܒܲܢ ܒܗܝܼܫܘܿܥ ܒܐܘܼܪ̈ܚܵܬܹܐ ܕܩܲܕܝܼܫܵܐ ܓܘܼܪܵܐ: ܦܵܠܚܵܢܵܐ ܕܥܵܓ̰ܝܼܒܘܼܝܵܬܹ̈ܐ: ܒܵܒܵܐ ܪܘܼܚܵܢܵܝܵܐ ܩܲܕܝܼܫܵܐ ܡܵܩܵܪܝܼܣ: ܗ̇ܘ ܟܵܡܪܵܢܵܐ ܕܪ̈ܘܼܚܵܬܹܐ ܟ̰ܲܦܵܠܹ̈ܐ:: ܘܩܵܛܘܿܠܵܐ ܕܫܹܐܕܹ̈ܐ: ܥܵܒܼܕܵܢܵܐ ܕܪܵܒܵܐ ܢܝܼܫܲܢܩܹ̈ܐ ܚܩܝܼܪܹ̈ܐ.
ܚܕܵܐ ܡܸܢܲܝ ܒܘܼܬ ܚܲܕ݇ ܐ݇ܢܵܫܵܐ ܐ݇ܡܸܪܹܗ ܒܵܒܲܢ: ܐܝܼܬܠܝܼ ܬܠܝܼܬܵܝܘܼܬܵܐ ܩܲܕܝܼܫܬܵܐ ܒܚܕܵܐ ܐܲܠܵܗܘܼܬܵܐ ܕܐܸܠܵܗ̇ ܒܸܣܓܼܵܕܵܐ ܝ݇ܘܸܢ. ܒܘܼܬ ܐܵܗܵܐ: ܬܘܼܪܨܵܐ ܝ݇ܘܸܢ ܠܐܵܗܵܐ ܦܘܼܠܚܵܢܵܐ ܕܐܝܼܕܵܬ̈ܝܼ: ܠܛܘܼܦ̮ܣܵܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ. ܐܵܢܝܼ ܕܓ̰ܸܡܥܝܹ̈ܐ ܗ݇ܘܵܘ ܐܵܡܪܝܼ ܐܸܠܹܗ: ܒܵܒܲܢ ܐܝܼܬ ܪܘܼܚܵܐ ܕܩܘܼܕܫܵܐ ܥܲܡ ܒܵܒܵܐ ܘܒܪܘܼܢܵܐ: ܬܠܝܼܬܵܝܘܼܬܵܐ ܡܬܘܿܡܵܝܬܵܐ: ܠܵܐ ܒܪܝܼܬܵܐ: ܘܠܵܐ ܡܸܬܦܲܠܓܼܵܢܝܼܬܵܐ؟ ܓ̰ܘܼܘܸܒܠܹܗ ܒܵܒܵܐ ܩܲܕܝܼܫܵܐ ܡܵܪܝ ܒܗܝܼܫܘܿܥ: ܘܐ݇ܡܸܪܹܗ ܠܗ̇ܘ ܕܲܝܪܵܝܵܐ ܝܼܚܝܼܕܵܝܵܐ: ܟܹܐ ܝܵܕܥܸܬ̇ ܚܲܕ݇ ܡܸܢܕܝܼ ܡ̣ܢ ܟܬܵܒܼܹ̈ܐ ܩܲܕܝܼܫܹ̈ܐ؟ ܐ݇ܡܸܪܹܗ ܗܹܐ. ܐܵܡܸܪ ܐܸܠܹܗ ܩܲܕܝܼܫܵܐ: ܫܡܸܥܠܘܼܟܼ ܕܡܘܼܫܹܐ ܐ݇ܡܸܪܹܗ ܒܟܬܵܒܼܵܐ ܕܒܪܝܼܬܵܐ: ܒܪܵܫܝܼܬ ܒܪܹܐܠܹܗ ܐܲܠܵܗܵܐ ܝܵܬ ܫܡܲܝܵܐ ܘܝܵܬ ܐܲܪܥܵܐ: ܘܐܲܪܥܵܐ ܝܼܗܘܵܐ ܣܦܝܼܩܬܵܐ ܘܚܵܪܵܒܵܐ: ܘܚܸܫܟܵܐ ܥܲܠ ܦܵܬܵܐ ܕܝܵܡܵܐ: ܘܪܘܼܚܵܐ ܕܐܲܠܵܗܵܐ ܪܲܦܪܘܼܦܹܐ ܗ݇ܘܵܐ ܥܲܠ ܦܵܬܵܐ ܕܡܝܼܵܐ. ܡܸܢ݇ܕܪܹܫ݇ ܐܹܫܲܥܝܵܐ ܐ݇ܡܸܪܹܗ ܒܘܼܬ ܦܲܪܨܘܿܦܵܐ ܕܒܪܘܼܢܵܐ ܕܐܲܠܵܗܵܐ. ܪܘܼܚܹܗ ܕܡܵܪܝܵܐ ܥܲܠܝܼ. ܒܘܼܬ ܐܵܗܵܐ: ܩܲܡ ܡܵܫܸܚܠܝܼ ܘܫܵܕܸܪܝܼ ܕܡܲܫܚܸܕܸܢ ܠܡܸܣܟܹܢܹ̈ܐ ܘܡܸܢ݇ܕܪܹܫ݇ ܕܵܘܝܼܕ ܐ݇ܡܸܪܹܗ: ܒܸܬ ܫܵܕܪܸܬ ܪܘܼܚܘܼܟܼ ܘܦܵܝܫܝܼ ܒܸܪ̈ܝܹܐ: ܘܒܸܬ ܡܚܲܕܸܬܸܬ̇ ܦܵܬܵܐ ܕܐܲܪܥܵܐ: ܐܘܼܦ ܚܲܙܩܝܼܐܹܝܠ ܢܒܼܝܼܵܐ ܐ݇ܡܸܪܹܗ: ܗܲܕܟܼܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ: ܩܪܝܼ ܠܪܘܼܚܵܐ: ܕܬܵܝ݇ ܢܦܘܿܚܝ݇ ܒܐܲܢܹܐ ܓܲܪ̈ܡܹܐ ܕܦܵܝܫܝܼ ܡܘܼܚܝܼܹ̈ܐ. ܘܝܘܿܚܲܢܵܢ ܡܲܥܡܕܵܢܵܐ ܟܲܕ ܡܲܟܪܘܼܙܹܐ ܗ݇ܘܵܐ ܘܡܲܫܚܘܼܕܹܐ ܒܘܼܬ ܒܪܘܼܢܵܐ ܕܐܲܠܵܗܵܐ: ܐ݇ܡܸܪܹܗ ܚܙܹܐܠܝܼ ܪܘܼܚܵܐ ܨܠܹܐܠܵܗ̇ ܘܟܠܹܐܠܵܗ̇ ܥܲܠܹܗ. ܘܡܸܢ݇ܕܪܹܫ݇ ܡܲܠܦܵܢܲܢ ܦܵܘܠܘܿܣ ܫܠܝܼܚܵܐ ܒܹܐܡܵܪܵܐ ܝ݇ܠܹܗ: ܠܹܐ ܡܵܨܹܐ ܐ݇ܢܵܫܵܐ ܕܬܵܢܹܐ: ܡܵܪܝܵܐ ܝ݇ܠܹܗ ܝܼܫܘܿܥ: ܐܸܠܵܐ ܐܸܢ ܒܪܘܼܚܵܐ ܕܩܘܼܕܫܵܐ. ܘܕܵܢܝܼܐܹܝܠ ܠܒܼܝܼܫܵܐ ܐܲܠܵܗܵܐ ܐ݇ܡܸܪܹܗ ܒܸܚܙܵܝܵܐ ܝ݇ܘܸܢ ܗ݇ܘܵܐ ܟܘܼܪ̈ܣܵܘܵܬܹܐ ܦܸܫܠܘܿܢ ܡܘܼܬܒܼܹܐ: ܡܘܼܕܸܥܠܹܗ ܒܟܘܼܪ̈ܣܵܘܵܬܹܐ ܥܲܠ ܩܢܘܿܡܹ̈ܐ. ܘܥܲܬܝܼܩ ܝܵܘܡܵܢܹ̈ܐ ܝ݇ܬܝܼܒܼܵܐ: ܡܘܼܕܸܥܠܹܗ ܠܚܕܵܐ ܐܲܠܵܗܘܼܬܵܐ ܒܬܠܝܼܬܵܝܘܼܬܵܐ. ܘܡܵܪܲܢ ܦܘܼܩܸܕܠܹܗ ܠܬܲܠܡܝܼܕ̈ܘܼܗܝ ܩܲܕܝܼܫܹ̈ܐ ܘܐ݇ܡܸܪܹܗ: ܙܹܐܠ݇ܡܘܿܢ ܬܲܠܡܸܕܘܿܢ ܘܡܲܥܡܸܕܘܿܢ ܠܟܠܲܝܗܝ ܛܵܝܸܦܹ̈ܐ: ܒܫܸܡܵܐ ܕܒܵܒܵܐ ܘܒܪܘܼܢܵܐ ܘܪܘܼܚܵܐ ܕܩܘܼܕܫܵܐ. ܝܵܐܪܲܒ! ܠܹܐ ܝ݇ܢܵܐ ܡܵܠܝܵܢܹ̈ܐ ܐܲܢܹܐ ܣܵܗܕܘܵܬܹ̈ܐ ܕܡܘܼܬܹܐܠܲܢ ܡ̣ܢ ܟܬܵܒܼܹ̈ܐ ܩܲܕܝܼܫܹ̈ܐ ܒܘܼܬ ܪܘܼܚܵܐ ܕܩܘܼܕܫܵܐ: ܕܡܬܘܿܡܵܐܝܼܬ ܝܼܠܹܗ ܥܲܡ ܒܵܒܵܐ ܘܒܪܘܼܢܵܐ: ܟܲܕ ܠܵܐ ܦܪܝܼܫܵܐ ܡܸܢܲܝܗܝ.
ܐܝܼܡܲܢ ܕܫܡܸܥܠܘܿܢ ܡ̣ܢ ܦܘܼܡܵܐ ܕܒܵܒܲܢ ܩܲܕܝܼܫܵܐ ܠܐܲܢܹܐ ܣܵܗܕܘܵܬܹ̈ܐ ܕܡ̣ܢ ܟܬܵܒܼܹ̈ܐ ܩܲܕܝܼܫܹ̈ܐ ܒܘܼܬ ܪܘܼܚܵܐ ܕܩܘܼܕܫܵܐ: ܗܘܼܡܸܢܹܗ ܗ̇ܘ ܝܼܚܝܼܕܵܝܵܐ ܘܐܵܢܝܼ ܕܥܲܡܹܗ: ܘܩܘܼܒܸܠܗ݇ܘܿܢ ܗܲܝܵܪܬܵܐ ܓܘܼܪܬܵܐ ܕܡܲܢܬܵܝܬܵܐ ܒܡܲܠܦܵܢܘܼܬܵܐ ܕܒܵܒܲܢ ܩܲܕܝܼܫܵܐ ܒܗܝܼܫܘܿܥ: ܘܡܘܼܕܹܐ ܠܗ݇ܘܿܢ ܕܫܲܪܝܼܪܬܵܐ ܝ݇ܠܵܗ̇ ܬܠܝܼܬܵܝܘܼܬܵܐ: ܒܵܒܵܐ ܘܒܪܘܼܢܵܐ ܘܪܘܼܚܵܐ ܕܩܘܼܕܫܵܐ. ܡܘܼܩܘܝܼܲܝܠܹܗ ܒܗܲܝܡܵܢܘܼܬܵܐ ܣܲܪܲܣܬ ܘܕܸܪܹܗ ܠܕܲܝܪܹܗ ܒܫܠܵܡܵܐ ܟܲܕ ܫܵܒܘܼܚܹܐ ܠܐܲܠܵܗܵܐ.
ܘܟܲܕ ܒܸܚܕܵܪܵܐ ܗ݇ܘܵܐ ܓܵܘ ܒܲܪܝܼܵܐ: ܦܸܫܠܹܗ ܫܘܼܦܚܵܐ ܒܲܗܪܵܐ ܫܡܲܝܵܢܵܐ ܩܵܕ݇ܡ ܥܲܝܢ̈ܘܼܗܝ: ܘܚܙܹܐܠܹܗ ܠܒܲܪܝܼܵܐ ܡܠܝܼܬܵܐ ܡ̣ܢ ܡܲܠܲܐܟܼܹ̈ܐ. ܥܘܼܓ̰ܸܒܠܹܗ ܪܵܒܵܐ. ܘܐ݇ܡܸܪܹܗ ܐܵܗܵܐ ܡܘܼܕܝܼ ܝ݇ܠܹܗ؟ ܚܲܕ݇ ܡ̣ܢ ܡܲܠܲܐܟܼܹ̈ܐ ܓ̰ܘܼܘܸܒܠܹܗ ܘܐ݇ܡܸܪܹܗ: ܐܲܚܢܲܢ ܢܵܛܘܿܪܹ̈ܐ ܝ݇ܘܲܚ ܠܩܲܕܝܼܫܹ̈ܐ ܕܓܵܘ ܕܐܵܗܵܐ ܒܲܪܝܼܵܐ. ܥܘܼܓ̰ܸܒܠܹܗ ܘܫܘܼܒܸܚܠܹܗ ܠܐܲܠܵܗܵܐ. ܘܒܹܐܟܼܵܠܵܐ ܝ݇ܠܹܗ ܚܲܡ ܕܪܹ̈ܓܵܘܵܬܹܗ. ܒܟܠ ܥܕܵܢܵܐ ܒܸܡܚܵܝܵܐ ܚܲܝܠܵܐ ܥܲܠ ܕܘܼܒܵܪܹ̈ܐ ܕܡܝܲܬܪܘܼܬܵܐ. ܦܠܸܛܠܵܗ̇ ܒܵܗܣܹܗ ܒܟܠ ܕܘܼܟܵܐ. ܘܫܡܸܥܠܹܗ ܒܘܼܬ ܕܝܼܹܗ ܒܵܒܵܐ ܒܐܝܼܦܵܡܘܿܢ ܕܡ̣ܢ ܬܝܼܡܘܿܢܝܼܩܘܿܢ: ܘܒܥܹܐܠܹܗ ܕܚܵܙܹܐܠܹܗ ܘܫܵܩܸܠ ܒܘܼܪ̈ܟܵܬܹܐ ܡܸܢܹܗ. ܩܸܡܠܹܗ ܘܐ݇ܬܹܐܠܹܗ ܠܟܸܣ ܐܲܒܵܐ ܦܵܘܠܵܐ ܕܡ̣ܢ ܛܵܡܵܐܘܿܣ: ܣܵܒܲܒ ܫܸܡܥܝܵܐ ܗ݇ܘܵܐ ܒܘܼܬ ܕܝܼܹܗ ܕܟܹܐ ܗܵܩܹܐ ܗ݇ܘܵܐ ܒܘܼܬ ܐܲܒܵܐ ܒܗܝܼܫܘܿܥ: ܒܗ̇ܝ ܕܗܲܡܵܫܵܐ ܟܹܐ ܐܵܬܹܐ ܗ݇ܘܵܐ ܠܟܸܣܠܹܗ: ܘܝܵܠܸܦ ܗ݇ܘܵܐ ܒܘܼܬ ܕܝܼܹܗ. ܐ݇ܡܸܪܹܗ ܒܐܝܼܦܡܘܿܢ ܩܵܐ ܐܲܒܵܐ ܦܵܘܠܵܐ: ܡܵܨܸܬ̇ ܥܵܒܼܕܸܬ ܥܲܡܝܼ ܛܵܒܼܬܵܐ: ܘܠܵܒܠܸܬ ܠܝܼ ܥܲܡܘܼܟܼ ܠܟܸܣ ܩܲܕܝܼܫܵܐ ܕܐܲܠܵܗܵܐ ܒܵܒܲܢ ܒܗܝܼܫܘܿܥ: ܫܵܩܠܸܢ ܒܘܼܪ̈ܟܵܬܹܐ ܡܸܢܹܗ؟ ܐ݇ܡܸܪܹܗ ܐܲܒܵܐ ܦܵܘܠܵܐ: ܒܸܙܕܵܥܝܵܐ ܝ݇ܘܸܢ ܕܠܵܒܠܸܢܘܼܟܼ ܠܟܸܣܠܹܗ: ܣܵܒܵܒ ܗܵܠܵܐ ܝܵܠܵܕ݇ܐ ܙܥܘܿܪܵܐ ܝ݇ܘܸܬ̇. ܐ݇ܡܸܪܹܗ ܒܐܝܼܦܵܡܘܿܢ: ܐܲܚܟ̰ܝܼ ܠܵܒܸܠܝܼ ܥܲܡܘܼܟܼ ܗܲܠ ܬܲܪܥܵܐ ܕܩܸܠܵܝܬܹܗ ܘܐܵܢܵܐ ܒܸܬ ܝܵܬܒܼܸܢ ܩܵܕ݇ܡ ܬܲܪܥܵܐ: ܗܲܠ ܕܥܵܒܼܪܸܬ̇ ܘܝܵܗ݇ܒܼܸܬ̇ ܠܹܗ ܫܠܵܡܵܐ ܒܡܲܢܫܘܼܩܬܵܐ: ܘܦܵܠܛܸܬ̇ ܐܲܢ݇ܬ̇ ܘܒܸܬ ܝܵܗ݇ܒܼܸܢܘܼܟܼ ܫܠܵܡܵܐ: ܘܗܲܡܢܹܐ ܝ݇ܘܸܢ ܒܸܬ ܩܵܒܠܸܢ ܒܘܼܪ̈ܟܵܬܹܗ. ܐ݇ܡܸܪܹܗ ܐܲܒܵܐ ܦܵܘܠܵܐ ܐܵܙܲܠ݇ܚ. ܘܐ݇ܙܸܠܗ݇ܘܿܢ ܬܸܪܘܲܝ ܡܐܘܼܕܵܠܹܐ: ܘܨܠܹܐܠܘܿܢ ܠܒܲܪܝܼܵܐ ܕܢܛܝܼܪܵܐ. ܘܟܲܕ ܡܛܹܐܠܗ݇ܘܿܢ ܠܩܸܠܵܝܬܹܗ ܕܒܵܒܵܐ ܩܲܕܝܼܫܵܐ ܡܵܪܝ ܒܗܝܼܫܘܿܥ ܥܒܼܸܪܹܗ ܦܵܘܠܵܐ ܘܝܼܗ݇ܒܼܸܠܗ݇ܘܿܢ ܫܠܡܵܐ ܒܢܫܵܩܬܵܐ ܩܲܕܝܼܫܬܵܐ ܘܨܘܼܠܹܐܠܗ݇ܘܿܢ ܨܠܘܿܬܵܐ ܘܝ݇ܬܸܒܼܠܗ݇ܘܿܢ: ܘܗ̇ܝܓܵܗ ܐ݇ܡܸܪܹܗ ܒܵܒܲܢ ܠܐܲܒܵܐ ܦܵܘܠܵܐ: ܩܵܡܘܼܕܝܼ ܠܵܐ ܡܘܼܥܒܼܸܪܘܼܟܼ ܥܲܡܘܼܟܼ ܠܗ̇ܘ ܐܲܚܘܼܢܵܐ ܙܥܘܿܪܵܐ؟ ܒܵܒܵܐ ܩܲܕܝܼܫܵܐ ܐ݇ܡܸܪܹܗ: ܣܵܒܲܒ ܐ݇ܡܸܪܝܼ ܙܥܘܿܪܵܐ ܝ݇ܠܹܗ: ܠܵܐ ܒܥܹܐܠܝܼ ܕܡܲܥܒܼܸܪܸܢܹܗ ܠܐܲܟܼܵܐ ܐܵܡܸܪ ܐܸܠܹܗ ܒܵܒܲܢ ܩܲܕܝܼܫܵܐ: ܠܵܐ ܐܵܡܪܸܬ̇ ܝܵܠܵܕ݇ܐ ܙܥܘܿܪܵܐ ܝ݇ܠܹܗ: ܣܵܒܲܒ ܦܵܪܘܿܩܲܢ ܐ݇ܡܸܪܹܗ: ܕܐܵܢܝܼ ܕܐܲܝܟܼ ܕܐܲܢܹܐ ܝ݇ܢܵܐ ܝܼܠܵܗ̇ ܡܲܠܟܘܼܬܵܐ ܕܫܡܲܝܵܐ. ܬܪܘܿܨܵܐ ܒܹܐܡܵܪܵܐ ܝ݇ܘܸܢ ܐܸܠܵܘܟܼܘܿܢ ܐܝܼܬ ܪܵܒܵܐ ܕܦܝܼܫܹ̈ܐ ܝ݇ܢܵܐ ܗܘܼܕܪܹ̈ܐ ܕܥܵܒܼܪܝܼ ܠܦܲܪܕܲܝܣܵܐ ܒܐܝܼܕܵܬܹ̈ܐ ܕܐܵܗܵܐ ܝܵܠܵܕ݇ܐ. ܣܵܒܲܒ ܐܝܼܕܵܐ ܕܡܵܪܝܵܐ ܥܲܡܹܗ ܝ݇ܠܵܗ̇. ܘܠܹܐ ܝ݇ܠܹܗ ܙܥܘܿܪܵܐ: ܐܝܼܢܵܐ ܓܘܼܪܵܐ ܝ݇ܠܹܗ ܘܡܝܲܬܪܵܐ. ܦܘܼܩܸܕܠܹܗ ܠܒܵܒܵܐ ܦܵܘܠܵܐ ܕܡܲܥܒܼܸܪܹܗ ܠܟܣܠܹܗ: ܘܡܘܼܬܹܐܠܹܗ ܐܸܠܹܗ ܘܚܦܸܩܠܹܗ ܘܒܘܼܪܸܟܼܠܹܗ: ܘܨܘܼܠܹܠܗ݇ܘܿܢ ܨܠܘܿܬܵܐ ܘܦܠܸܛܠܗ݇ܘܿܢ ܡ̣ܢ ܠܟܸܣܠܹܗ: ܘܕܐܸܪܗ݇ܘܿܢ ܠܕܘܼܟܬܲܝܗܝ ܒܫܠܵܡܵܐ ܟܲܕ ܫܵܒܘܼܚܹܐ ܠܐܲܠܵܗܵܐ.
ܐܝܼܢܵܐ ܐܝܼܡܲܢ ܕܨܵܐܸܡ ܗ݇ܘܵܐ ܒܵܒܲܢ ܩܲܕܝܼܫܵܐ ܒܗܝܼܫܘܿܥ ܒܝܵܘܡܵܐ ܕܥܸܣܪܝܼ ܘܚܲܕ݇ ܠܨܵܘܡܹܗ: ܐ݇ܬܹܐܠܹܗ ܠܟܸܣܠܹܗ ܡܵܪܲܢ ܝܼܫܘܿܥ ܡܫܝܼܚܵܐ: ܝܘܼܗ݇ܒܼܸܠܹܗ ܠܸܒܵܐ ܘܐ݇ܡܸܪܹܗ ܐܸܠܹܗ: ܓܘܼܒܝܵܐ ܕܝܼܝܼ ܒܗܝܼܫܘܿܥ: ܪܵܒܵܐ ܡܘܼܓ̰ܗܹܠܘܼܟܼ ܠܓܵܢܘܼܟܼ. ܓ̰ܘܼܘܸܒܠܹܗ ܒܵܒܲܢ: ܡܵܪܝܼ: ܐܝܼܬܠܝܼ ܗܹܒܼܝܼ ܒܝܼܘܼܟܼ ܕܚܲܠܸܢܸܬ ܠܝܼ: ܒܘܼܬ ܐܵܗܵܐ: ܗܸܟ̰ ܠܹܐ ܝ݇ܘܸܢ ܒܸܪܵܓ݇ܫܵܐ ܒܙܲܒܘܼܢܘܼܬܵܐ. ܘܓܪܸܫܠܹܗ ܡܵܪܲܢ ܘܡܘܼܬܹܐܠܹܗ ܥܲܡܹܗ ܠܟܸܣ ܚܲܕ݇ ܐܲܚܘܼܢܵܐ ܙܲܒܘܼܢ ܘܨܝܼܡܵܐ ܗ݇ܘܵܐ ܩܵܐ ܬܪܹܝ ܝܵܘܡܵܢܹ̈ܐ: ܘܚܙܹܐܠܹܗ ܒܵܒܵܐ ܒܗܝܼܫܘܿܥ ܟܲܕ ܪܘܼܦܝܵܐ ܓܵܢܹܗ ܠܐܲܪܥܵܐ ܒܸܚܕܵܪܵܐ ܡ̣ܢ ܚܕܵܐ ܕܸܦܢܵܐ ܠܗ̇ܝ ܐ݇ܚܹܪ݇ܬܵܐ: ܒܸܛܠܵܒܵܐ ܩܲܪܝܼܪܘܼܬܵܐ ܩܵܐ ܕܡܲܦܝܸܚ ܠܠܸܒܹܗ. ܗܝܼܫ ܠܹܐ ܗ݇ܘܵܐ ܬܝܼܡܵܐ ܝܵܘܡܵܐ ܕܬܪܹܝ ܡ̣ܢ ܨܵܘܡܹܗ: ܒܘܼܩܸܪܹܗ ܐܲܒܵܐ ܡ̣ܢ ܡܫܝܼܚܵܐ ܡܘܼܕܝܼ ܝ݇ܠܵܗ̇ ܩܸܣܲܬܹܗ ܕܐܵܗܵܐ: ܕܗܲܕܟܼܵܐ ܢܦܝܼܠܵܐ ܝ݇ܠܹܗ ܠܐܲܪܥܵܐ؟ ܐܵܡܸܪ ܐܸܠܹܗ ܡܵܪܲܢ: ܨܵܘܡܵܐ ܨܝܼܡܵܐ ܝ݇ܠܹܗ ܩܵܬܝܼ. ܐ݇ܡܸܪܹܗ ܐܸܠܹܗ ܐܲܒܵܐ ܒܗܝܼܫܘܿܥ: ܟܡܵܐ ܝܵܘܡܵܢܹ̈ܐ ܝ݇ܢܵܐ ܕܨܝܼܡܵܐ ܝ݇ܠܹܗ: ܕܗܲܕܟܼܵܐ ܫܘܼܢܫܸܠܵܐ ܝ݇ܠܹܗ ܘܪܘܼܦܝܵܐ ܓܵܢܹܗ ܠܐܲܪܥܵܐ؟ ܐ݇ܡܸܪܹܗ ܡܵܪܲܢ: ܡ̣ܢ ܕܗ̇ܘ ܝܵܘܡܵܐ ܕܩܸܪܝܹܗ ܝ݇ܘܸܢ: ܚܲܕ݇ ܝܵܘܡܵܐ ܕܠܵܐ ܡܹܐܟܼܘܼܠܬܵܐ ܠܹܐ ܝ݇ܠܹܗ ܦܝܼܫܵܐ: ܐܲܚܟ̰ܝܼ ܒܐܵܗܵܐ ܠܲܝܠܹܐ ܝܘܼܗ݇ܒܼܸܠܝܼ ܕܗܵܟܡܝܼ ܥܲܠܹܗ ܟܸܦܢܵܐ ܘܙܲܒܘܼܢܘܼܬܵܐ. ܐܲܢ݇ܬ̇ ܨܝܼܡܵܐ ܝ݇ܘܸܬ̇ ܥܸܣܪܝܼ ܘܚܲܕ݇ ܝܵܘܡܵܐ: ܩܵܡܘܼܕܝܼ ܐܲܝܟܼ ܕܐܵܗܵܐ ܙܲܒܘܼܢ ܠܹܐ ܝ݇ܘܸܬ̇؟ ܐ݇ܡܸܪܹܗ ܝܵܐ ܡܵܪܝܼ ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܕܐܵܡܪܸܬ̇ ܠܝܼ: ܡܘܼܕܝܼ ܒܸܬ ܥܵܒܼܕܸܬ̇ ܩܵܐ ܕܐܵܗܵܐ: ܘܡܘܼܕܝܼ ܒܸܬ ܦܵܪܥܸܬ̇ ܠܹܗ؟ ܐ݇ܡܸܪܹܗ ܡܵܪܲܢ ܒܸܬ ܦܵܪܥܸܢ ܩܵܬܹܗ ܗܵܩܵܐ: ܚܲܕ݇ ܐܲܝܟܼ ܕܩܵܐ ܕܝܼܘܼܟܼ ܕܨܝܼܡܵܐ ܝ݇ܘܸܬ̇ ܥܸܣܪܝܼ ܘܚܲܕ݇ ܝܵܘܡܵܐ. ܣܵܒܲܒ ܐܵܢܵܐ ܩܵܬܘܼܟܼ ܚܘܼܠܸܢܝܼ ܒܨܵܘܡܵܐ ܕܐܲܢܹܐ ܝܵܘܡܵܢܹ̈ܐ. ܘܐܵܗܵܐ ܙܹܐ ܐܲܝܟܼ ܚܲܝܠܵܐ ܕܝܘܼܗ݇ܒܼܸܠܝܼ ܩܵܬܹܗ ܫܘܼܢܫܸܠܵܐ ܝ݇ܠܹܗ. ܒܹܐܡܵܪܵܐ ܝ݇ܘܸܢ ܐܸܠܵܘܟܼܘܿܢ ܐܲܝܟܼ ܕܐ݇ܡܸܪܝܼ ܒܐܹܘܵܢܓܲܠܝܼܘܿܢ: ܬܸܪܘܵܘܟܼܘܿܢ ܒܸܬ ܥܵܒܼܪܝܼܬܘܿܢ ܠܚܲܕܘܼܬܵܐ ܕܡܵܪܵܘܟܼܘܿܢ.
ܡ̣ܢ ܕܗ̇ܝ ܥܕܵܢܵܐ ܡܵܪܝ ܒܗܝܼܫܘܿܥ: ܝܘܼܗ݇ܒܼܵܐ ܠܹܗ ܓܵܢܹܗ ܠܦܘܼܠܚܵܢܹ̈ܐ ܩܸܫܝܹ̈ܐ: ܘܛܠܸܒܠܹܗ ܡ̣ܢ ܐܲܠܵܗܵܐ ܘܐ݇ܡܸܪܹܗ: ܡܵܪܝܼ ܠܹܐ ܒܵܥܝܸܢ ܕܐܵܟܼܠܸܢ ܠܲܚܡܵܐ ܪܵܒܵܐ: ܘܐܝܼܡܲܢ ܕܒܸܦܠܵܛܵܐ ܝ݇ܘܸܢ ܡ̣ܢ ܒܲܪܝܼܵܐ: ܪܵܒܵܐ ܒܸܓ̰ܗܵܝܵܐ ܝ݇ܘܸܢ. ܐܵܡܸܪ ܐܸܠܹܗ ܡܵܪܲܢ: ܠܹܐ ܝܵܗ݇ܒܼܸܢ ܩܵܬܘܼܟܼ ܡܸܢܕܝܼ ܫܒܼܘܿܩ ܡ̣ܢ ܣܘܼܢܩܵܢܘܼܟܼ: ܘܠܩܲܕܪܵܐ ܕܛܲܥܢܘܼܟܼ ܕܠܵܐ ܟܵܟ̰ܚܸܬ̇ ܐܝܼܡܲܢ ܕܐܵܙܠ݇ܬ̇ ܠܚܕܵܐ ܕܘܼܟܬܵܐ. ܡܸܢ݇ܕܪܹܫ݇ ܛܠܸܒܠܹܗ ܡܸܢܹܗ ܘܐ݇ܡܸܪܹܗ. ܡܵܪܝܼ: ܓܵܗܹ̈ܐ ܦܝܵܫܵܐ ܝ݇ܘܸܢ ܙܠܝܼܡܵܐ ܒܟܲܪܒܵܐ. ܐ݇ܡܸܪܹܗ ܐܸܠܹܗ ܡܵܪܲܢ: ܠܵܐ ܬܵܦܪܸܬ̇ ܒܐ݇ܢܵܫܹ̈ܐ: ܠܵܐ ܟܵܪܒܸܬ̇: ܘܠܵܐ ܡܲܢܟܼܸܣܸܬ̇ ܠܐܘܼܦ ܚܲܕ݇ ܐ݇ܢܵܫܵܐ: ܘܠܵܐ ܗܵܟܡܵܐ ܒܝܼܘܼܟܼ ܟܲܪܒܵܐ: ܘܪܘܼܚܵܐ ܕܩܘܼܕܫܵܐ ܫܵܪܝܵܐ ܥܲܠܘܼܟܼ.
ܗܲܕܟܼܵܐ: ܠܟܠ ܕܘܼܟܵܐ ܕܐܵܙܸܠ ܗ݇ܘܵܐ ܐܵܗܵܐ ܒܵܒܵܐ: ܡܵܪܝܵܐ ܥܲܡܹܗ ܗ݇ܘܵܐ. ܟܹܐ ܗܲܡܙܸܡ ܗ݇ܘܵܘ ܥܲܡܹܗ ܐܲܝܟܼ ܕܐ݇ܢܵܫܵܐ ܗܲܡܙܸܡ ܥܲܡ ܚܲܒܼܪܹܗ. ܒܘܼܩܸܪܹܗ ܡ̣ܢ ܡܵܪܲܢ ܘܐ݇ܡܸܪܹܗ: ܡܵܪܝܼ: ܐܸܢ ܐܝܼܬ ܐ݇ܢܵܫܵܐ ܕܡܲܨܝܸܬ ܠܫܸܡܘܼܟܼ ܩܲܕܝܼܫܵܐ ܘܫܵܒܸܚܠܘܼܟܼ ܘܚܵܒܼܸܛ ܥܲܡ ܒܢܲܝ̈ܢܵܫܵܐ ܘܡܲܢܝܸܚܠܗ݇ܘܿܢ ܐܝܼܬ ܠܹܗ ܚܛܝܼܬܵܐ ܒܐܵܗܵܐ ܡܸܢܕܝܼ؟ ܘܡܵܪܝܵܐ ܐ݇ܡܸܪܹܗ ܐܸܠܹܗ ܐܲܝܟܼ ܦܲܥܠܵܐ ܕܦܵܠܸܚ ܥܲܡܘܼܟܼ: ܐܝܼܬ ܫܸܟܘܼܬܵܐ ܕܠܵܐ ܦܵܪܥܸܬ̇ ܠܹܗ ܗܵܩܹܗ؟ ܘܗܲܪ ܗܲܕܟܼܵܐ ܐܘܼܦ ܐܵܢܝܼ ܕܒܸܦܠܵܚܵܐ ܝ݇ܢܵܐ ܥܲܡܝܼ: ܒܸܬ ܦܵܪܥܸܢܹܗ ܗܵܩܲܝܗܝ. ܒܐܘܿܪܸܫܠܸܡ ܥܸܠܵܝܬܵܐ. ܡܸܢ݇ܕܪܹܫ݇ ܒܘܼܩܸܪܹܗ ܘܐ݇ܡܸܪܹܗ. ܡܵܪܝܼ: ܐܸܢ ܐܝܼܬ ܐ݇ܢܵܫܵܐ ܕܝܲܕܸܥ ܕܒܸܚܕܵܪܵܐ ܝ݇ܠܹܗ ܥܲܡ ܒܢܲܝ̈ܢܵܫܵܐ ܘܥܵܒܼܸܕ ܠܗ݇ܘܿܢ ܚܸܠܡܲܬ: ܘܦܵܠܸܛ ܘܥܵܒܼܸܪ ܥܲܡܲܝ: ܘܦܵܐܸܫ ܚܒܼܝܼܛܵܐ ܥܲܡ ܫܸܡܘܼܟܼ ܩܲܕܝܼܫܵܐ: ܘܡܘܼܕܝܼ ܒܸܬ ܗܵܘܹܐ ܩܵܐ ܕܐܵܗܵܐ؟ ܐܵܡܸܪ ܐܸܠܹܗ ܡܵܪܲܢ: ܐܵܗܵܐ ܝ݇ܠܹܗ ܚܲܕ݇ ܬܲܠܡܝܼܕܵܐ ܡܲܨܝܸܬܵܢܵܐ: ܐܸܢ ܪܵܒܵܐ ܓ̰ܲܢܓ̰ܸܪ: ܒܸܬ ܗܵܘܹܐ ܝܵܪܘܿܬܵܐ. ܘܡܸܢ݇ܕܪܹܫ݇ ܒܘܼܩܸܪܹܗ ܒܵܒܵܐ ܩܲܕܝܼܫܵܐ ܘܐ݇ܡܸܪܹܗ. ܡܵܪܝܼ ܐܸܢ ܐܝܼܬ ܐ݇ܢܵܫܵܐ ܕܦܵܠܸܚ ܪܵܒܵܐ ܘܥܵܒܼܸܕ ܬܵܙܝܼ ܒܘܼܬ ܚܵܬܸܪ ܕܫܸܡܘܼܟܼ: ܘܝܲܕܸܥ ܕܵܐܟܼܝܼ ܚܵܒܼܸܛ ܥܲܡ ܒܢܲܝ̈ܢܵܫܵܐ ܘܚܵܕܸܪ ܥܲܡܲܝܗܝ ܘܥܵܒܼܸܕ ܪܵܐܙܝܼ ܐܸܠܘܼܟܼ: ܘܦܵܠܸܚ ܪܵܒܵܐ ܩܵܐ ܫܸܡܘܼܟܼ ܡܘܼܕܝܼ ܝ݇ܠܹܗ ܗܵܩܹܗ؟ ܐܵܡܸܪ ܐܸܠܹܗ ܡܵܪܲܢ: ܗ̇ܘ ܕܥܵܒܼܸܕ ܐܲܢܹܐ: ܒܸܬ ܗܵܘܹܐ ܒܪܘܼܢܵܐ ܘܝܵܪܘܿܬܵܐ. ܐܝܼܩܵܪܹܗ ܓܘܼܪܵܐ ܝ݇ܠܹܗ ܘܗܵܩܹܗ ܪܵܒܵܐ. ܘܒܸܬ ܗܵܘܹܐ ܐܲܝܟܼ ܚܲܕ݇ ܡ̣ܢ ܩܲܕܝܼܫܹ̈ܐ: ܘܒܸܬ ܝܵܗ݇ܒܼܸܢܹܗ ܛܵܒܼܵܬܹ̈ܐ ܘܒܘܼܣܵܡܹ̈ܐ ܒܡܲܠܟܘܼܬܵܐ ܕܫܡܲܝܵܐ. ܐܲܢܹܐ ܐ݇ܡܸܪܹܗ ܐܸܠܹܗ ܡܵܪܲܢ: ܘܦܸܫܠܹܗ ܡܘܼܪܡܵܐ ܒܚܸܩܪܵܐ ܠܫܡܲܝܵܐ.
ܐܝܼܬ ܗ݇ܘܵܐ ܓܵܘ ܐܲܬܪܵܐ ܕܣܘܼܪܝܼܵܐ ܚܲܕ݇ ܝܼܚܝܼܕܵܝܵܐ ܩܲܕܝܼܫܵܐ ܫܸܡܹܗ ܐܲܦܪܹܝܡ: ܕܟܹܐ ܚܵܝܹܐ ܗ݇ܘܵܐ ܒܚܲܕ݇ ܡ̣ܢ ܛܘܼܪ̈ܵܢܹܐ ܕܬܵܡܵܐ: ܘܥܵܒܼܸܕ ܗ݇ܘܵܐ ܬܸܫܡܸܫܬܵܐ ܕܨܠܘܿܬܵܐ ܒܠܲܝܠܹܐ ܘܒܐܝܼܡܵܡܵܐ. ܘܦܝܼܫܵܐ ܗ݇ܘܵܐ ܬܘܼܓܒܸܪܵܐ ܒܕܘܼܒܵܪܹ̈ܐ ܛܵܒܼܹ̈ܐ: ܘܒܥܲܡܠܹ̈ܐ ܪܵܒܵܐ ܓܘܼܪܹ̈ܐ. ܘܐܝܼܬ ܗ݇ܘܵܐ ܠܹܗ ܢܸܨܚܵܢܹ̈ܐ ܥܓ̰ܝܼܒܹ̈ܐ ܒܠܝܼܓܵܐ ܗ݇ܘܵܐ ܒܦܘܼܫܵܩܵܐ ܕܟܬܵܒܼܹ̈ܐ ܘܬܹܐܘܿܪܝܼܵܐ ܕܪܘܼܚܵܐ: ܘܓܲܢ݇ܒܵܪܵܐ ܗ݇ܘܵܐ ܒܦܘܼܠܚܵܢܹܗ: ܘܪܵܒܵܐ ܙܵܕܥܝܵܢܵܐ ܡ̣ܢ ܐܲܠܵܗܵܐ. ܘܗ݇ܘܹܐܠܵܗ̇ ܒܚܲܕ݇ ܡ̣ܢ ܠܲܝܠܵܘܵܬܹ̈ܐ ܟܲܕ ܨܵܠܘܼܝܹܐ ܨܠܘܿܬܹܗ: ܬܘܼܚܡܸܢܹܗ ܒܠܸܒܹܗ ܘܐ݇ܡܸܪܹܗ: ܕܵܐܟܼܝܼ ܡܵܨܸܢ ܡܵܫ݇ܟ̰ܚܸܢ ܪ̈ܲܚܡܹܐ ܩܵܕ݇ܡ ܐܲܠܵܗܵܐ ܐܲܝܟܼ ܚܲܕ݇ ܡ̣ܢ ܩܲܕܝܼܫܹ̈ܐ؟ ܡܸܢܫܸܠܬܵܢܹܐ ܐ݇ܬܹܐܠܹܗ ܩܵܠܵܐ ܡ̣ܢ ܫܡܲܝܵܐ: ܕܒܹܐܡܵܪܵܐ: ܐܝܼܬ ܒܡܸܨܪܹܝܢ ܓܵܘ ܒܲܪܝܼܵܐ ܕܫܸܡܵܗ̇ ܢܛܝܼܪܵܐ: ܚܲܕ݇ ܣܵܒܼܵܐ ܕܟܹܐ ܦܵܠܸܚ ܠܐܲܠܵܗܵܐ ܘܥܵܒܼܸܕ ܠܹܗ ܚܸܠܡܲܬ ܐܲܡܝܼܢܵܐܝܼܬ: ܘܟܹܐ ܦܵܐܹܫ ܩܸܪܝܵܐ ܒܗܝܼܫܘܿܥ. ܗܲܪ ܐܲܝܟܼ ܕܗ̇ܘ ܐܝܼܬܠܘܼܟܼ ܐܘܼܦ ܐܲܢ݇ܬ̇ ܚܘܵܪܦܵܬܘܼܬܵܐ ܠܟܸܣ ܐܲܠܵܗܵܐ. ܩܸܡܠܹܗ ܗ̇ܘ ܝܼܚܝܼܕܵܝܵܐ ܒܚܲܕܘܼܬܵܐ ܓܘܼܪܬܵܐ: ܘܝ݇ܬܸܒܼܠܹܗ ܒܓܵܡܝܼ ܘܐ݇ܙܸܠܹܗ ܡܛܹܐܠܹܗ ܠܐܵܠܸܟܣܵܢܕܪܝܼܵܐ: ܘܒܵܩܸܪ ܗ݇ܘܵܐ ܕܐܲܝܟܵܐ ܟܹܐ ܚܵܝܹܐ ܐܲܒܵܐ ܒܗܝܼܫܘܿܥ. ܡܘܼܕܸܥܠܗ݇ܘܿܢ ܩܵܬܹܗ ܕܟܹܐ ܚܵܝܹܐ ܓܵܘ ܒܲܪܝܼܵܐ ܕܢܛܝܼܪܵܐ. ܘܩܲܡ ܫܵܕܸܪܝܼܠܹܗ ܠܟܸܣܠܹܗ: ܘܡܛܹܐܠܹܗ ܐܸܠܹܗ. ܘܐܝܼܡܲܢ ܕܬܦܸܩܠܹܗ ܒܝܼܹܗ ܐܲܒܵܐ ܒܗܝܼܫܘܿܥ ܚܦܸܩܠܹܗ: ܝܘܼܗ݇ܒܼܸܠܗ݇ܘܿܢ ܫܠܵܡܵܐ ܩܵܐ ܐܘܼܕܵܠܹܐ ܘܩܲܡ ܡܲܥܒܼܸܪܹܗ ܠܩܸܠܵܝܬܹܗ: ܘܨܘܼܠܹܐܠܗ݇ܘܿܢ ܨܠܘܿܬܵܐ ܘܝ݇ܬܸܒܼܠܗ݇ܘܿܢ ܐܝܼܢܵܐ ܗ̇ܘ ܝܼܚܝܼܕܵܝܵܐ ܗܲܡܙܘܼܡܹܐ ܗ݇ܘܵܐ ܐَܣܘܼܪܝܵܐܝܼܬ ܘܐܲܒܵܐ ܒܗܝܼܫܘܿܥ ܠܹܐ ܗ݇ܘܵܐ ܦܲܪܡܘܼܝܹܐ ܠܗܲܡܙܲܡܬܹܗ: ܘܬܘܼܢܸܚܠܹܗ. ܡܘܼܪܸܡܠܹܗ ܒܵܠܹܗ ܠܫܡܲܝܵܐ ܘܐ݇ܡܸܪܗ: ܝܵܐ ܡܵܪܝܼ: ܒܸܛܠܵܒܵܐ ܝ݇ܘܸܢ ܡܸܢܘܼܟܼ ܘܦܲܪܦܘܼܠܹܐ ܠܓܘܼܪܘܼܬܘܼܟܼ ܡܲܕܥܝܼܠܝܼ ܡܘܼܕܝܼ ܝ݇ܠܹܗ ܒܹܐܡܵܪܵܐ ܐܵܗܵܐ ܣܵܒܼܵܐ. ܗܲܪ ܒܗ̇ܝ ܥܕܵܢܵܐ ܐܲܠܵܗܵܐ ܒܘܼܗܪܸܢܹܗ ܠܚܝܼܵܠܹܗ ܒܪܘܼܚܵܐ ܕܫܘܼܪܹܐܠܹܗ ܗܲܡܙܘܼܡܹܐ ܒܠܸܫܵܢܵܐ ܐَܣܘܼܪܝܵܝܵܐ. ܗܘܼܡܙܸܡܠܗ݇ܘܿܢ ܥܲܡ ܐܘܼܕܵܠܹܐ ܒܘܼܬ ܓܘܼܪܘܼܬܵܐ ܕܐܲܠܵܗܵܐ: ܘܡܪܲܚܡܵܢܘܼܬܹܗ ܘܒܘܼܩܸܪܹܗ ܠܒܵܒܲܢ ܩܲܕܝܼܫܵܐ ܒܘܼܬ ܡܝܲܬܪܘܼܬܵܐ ܘܕܘܼܒܵܪܹ̈ܐ ܕܗ̇ܘ ܝܼܣܵܪܠܵܝܵܐ ܕܦܸܠܡܵܐ ܠܲܝܬ ܗ݇ܘܵܐ ܒܝܼܹܗ: ܒܵܒܵܐ ܩܲܕܝܼܫܵܐ ܐܲܒܵܐ ܡܵܩܵܪܝܼܣ ܐܝܼܢܵܐ ܙܲܕܝܼܩܵܐ ܐܲܒܵܐ ܒܗܝܼܫܘܿܥ ܐ݇ܡܸܪܹܗ ܐܸܠܹܗ: ܘܗ̇ܘ ܝܼܗܘܵܐ ܐ݇ܢܵܫܵܐ ܩܵܕ݇ܡܵܝܵܐ ܕܚܝܹܐܠܹܗ ܓܵܘ ܕܐܵܗܵܐ ܒܲܪܝܼܵܐ. ܘܡܘܼܬܸܒܼܠܹܗ ܢܵܡܘܿܣܹ̈ܐ ܘܦܘܼܩܕܵܢܹ̈ܐ: ܘܡܘܼܚܙܹܐ ܠܹܗ ܐܘܼܪܚܵܐ ܕܫܪܵܪܵܐ: ܘܠܘܼܒܸܠܹܗ ܒܝܼܵܗ̇ ܠܟܠ ܚܲܕ݇ ܚܲܝܵܢܵܐ ܕܓܵܘ ܕܐܵܗܵܐ ܒܲܪܝܼܵܐ. ܡܘܼܕܸܥܠܹܗ ܒܘܼܬ ܕܘܼܒܵܪ̈ܘܼܗܝ ܐܲܠܵܗܵܝܹ̈ܐ: ܘܗܘܼܩܹܐܠܹܗ ܪܵܒܵܐ ܥܵܓ̰ܝܼܒܘܼܝܵܬܹ̈ܐ ܓܘܼܪܹ̈ܐ ܕܦܸܫܠܗ݇ܘܿܢ ܦܠܝܼܚܹ̈ܐ ܒܐܝܼܕܵܬ̈ܘܼܗܝ ܩܲܕܝܼܫܹ̈ܐ. ܦܝܵܫܵܐ ܗ݇ܘܵܐ ܡܲܗܬ ܘܥܵܓ̰ܘܼܒܹܐ ܗ̇ܘ ܝܼܚܝܼܕܵܝܵܐ ܒܘܼܬ ܡܸܢܕܝܼ ܕܫܡܸܥܠܹܗ. ܘܐ݇ܡܸܪܹܗ ܟܡܵܐ ܓܘܼܪܵܐ ܝ݇ܠܹܗ ܘܚܩܝܼܪܵܐ ܚܲܝܠܵܐ ܐܲܚܝܼܕ ܟܠ ܕܐܝܼܬ ܗ݇ܘܵܐ ܒܐܝܼܕܹܗ ܕܐܵܗܵܐ ܐ݇ܢܵܫܵܐ: ܩܲܕܝܼܫܵܐ ܓܘܼܪܵܐ ܐܲܒܵܐ ܡܵܩܵܪܝܼܣ. ܐܝܼܢܵܐ ܒܵܒܲܢ ܩܲܕܝܼܫܵܐ ܒܗܝܼܫܘܿܥ ܡܘܼܕܸܥܠܹܗ ܡܝܲܬܪܘܼܬܵܐ ܓܘܼܪܬܵܐ ܕܗ̇ܘ ܝܼܚܝܼܕܵܝܵܐ. ܘܐ݇ܡܸܪܹܗ ܠܐܲܚܘܼܢܘܵܬܹ̈ܐ: ܣܵܒܲܒ ܚܙܹܐܠܝܼ ܕܐܝܼܬ ܥܲܡܹܗ ܚܲܝܠܵܐ ܐܲܠܵܗܵܝܵܐ ܘܡܸܠܝܵܐ ܫܵܦܵܩܲܬ. ܘܐ݇ܬܹܐܠܗ݇ܘܿܢ ܟܠܲܝܗܝ ܘܦܸܫܠܗ݇ܘܿܢ ܒܘܼܪ̈ܟܼܹܐ ܡܸܢܹܗ ܘܝ݇ܬܸܒܼܠܹܗ ܠܟܸܣܠܹܗ ܚܕܵܐ ܫܲܒܬܵܐ ܕܝܵܘܡܵܢܹ̈ܐ: ܘܚܙܹܐܠܹܗ ܠܕܘܼܒܵܪܹ̈ܐ ܘܡܝܲܬܪܘܼܬܵܐ ܕܒܵܒܲܢ: ܘܦܸܫܠܹܗ ܚܘܼܠܸܢܵܐ ܒܠܸܒܹܗ: ܒܘܼܫ ܡ̣ܢ ܚܙܵܝܬܹܗ ܘܫܘܼܒܸܚܠܹܗ ܠܐܲܠܵܗܵܐ: ܘܐ݇ܡܸܪܹܗ ܠܒܵܒܲܢ ܡܵܪܝܼ: ܨܵܠܝܼ ܨܠܘܿܬܵܐ ܒܘܼܬ ܕܝܼܝܼ: ܘܦܘܼܫ ܒܲܫܠܵܡܵܐ ܘܒܵܥܸܢ ܕܐܵܙܸܠ݇ܢ ܠܐܲܬܪܝܼ. ܘܚܦܸܩܠܗ݇ܘܿܢ ܚܲܕ ܗ̇ܘ ܐ݇ܚܹܪ݇ܢܵܐ ܫܒܼܸܩܠܹܗ ܒܫܲܝܢܵܐ: ܘܐ݇ܙܸܠܹܗ ܠܐܲܬܪܹܗ.
ܗ̇ܝܓܵܗ ܐ݇ܬܹܐܠܹܗ ܚܲܕ݇ ܐܲܚܘܼܢܵܐ ܡܸܚܝܵܐ ܒܣܵܛܵܢܵܐ ܕܣܲܚܒܸܪ ܠܒܵܒܲܢ: ܘܐ݇ܡܸܪܗ݇ܘܿܢ ܩܵܬܹܗ ܐܲܚܘܼܢܘܵܬܹ̈ܐ ܕܐܸܢ ܚܲܕ݇ܟ̰ܵܐ ܒܘܼܫ ܓ̰ܲܠܕܹܐ ܗܵܘܸܬ̇ ܗ݇ܘܵܐ ܐܸܬܝܵܐ: ܒܸܬ ܫܵܩܠܸܬ̇ ܗ݇ܘܵܐ ܒܘܼܪܟܬܵܐ ܡ̣ܢ ܕܗ̇ܘ ܐ݇ܢܵܫܵܐ ܓܘܼܪܵܐ ܘܓܡܝܼܪܵܐ: ܕܐܸܬܝܵܐ ܗ݇ܘܵܐ ܠܟܸܣ ܒܵܒܲܢ ܩܲܕܝܼܫܵܐ ܡ̣ܢ ܣܘܼܪܝܼܵܐ. ܘܐܸܢ ܐܘܼܦ ܐܵܕܝܼܵܐ ܐܵܙܸܠ݇ܬ̇ ܒܵܬ݇ܪܹܗ ܒܸܬ ܡܵܛܸܬ̇ ܠܹܗ: ܐܲܚܟ̰ܝܼ ܚܲܕ݇ ܡܝܼܠܵܐ ܒܸܬ ܗܵܘܹܐ ܪܚܝܼܩܵܐ. ܓ̰ܘܼܘܸܒܠܹܗ ܒܵܒܵܐ ܩܲܕܝܼܫܵܐ ܘܐ݇ܡܸܪܹܗ: ܫܘܼܒܼܚܵܐ ܠܫܸܡܘܼܟܼ ܩܲܕܝܼܫܵܐ: ܕܗܵܘܸܬ̇ ܩܵܬܲܢ ܕܲܠܕܸܢܵܢܵܐ ܘܢܵܛܪܵܢܵܐ: ܘܗܲܝܸܪܸܬ̇ ܠܙܲܒܘܼܢܘܼܬܲܢ ܕܐܲܢ݇ܬ̇ ܡܨܸܐ ܚܹܝܠ ܟܠ ܚܲܕ݇ ܐܲܠܵܗܵܐ ܝܼܫܘܿܥ ܡܫܝܼܚܵܐ ܠܐܵܒܵܕ ܐܵܒܵܕܝܼܢ ܐܵܡܹܝܢ.
ܐܝܼܡܲܢ ܕܐ݇ܡܸܪܹܗ ܐܵܡܹܝܢ: ܚܬܸܡܠܹܗ ܨܠܘܿܬܹܗ: ܙܲܕܝܼܩܵܐ ܡܝܲܬܪܵܐ ܘܢܲܨܝܼܚܵܐ ܒܵܒܲܢ ܩܲܕܝܼܫܵܐ ܐܲܒܵܐ ܒܗܝܼܫܘܿܥ ܦܸܫܠܹܗ ܚܸܙܝܵܐ ܡܲܠܲܐܟܼܵܐ ܕܡܵܪܝܵܐ: ܟܲܕ ܐ݇ܣܝܼܪܵܐ ܠܣܵܛܵܢܵܐ ܒܫܸܫܠܝܵܬܹ̈ܐ ܘܟܸܠܝܵܐ ܩܵܕ݇ܡܹܗ ܒܸܠܝܵܝܵܐ ܘܒܹܐܡܵܪܵܐ: ܘܵܐܝ ܐܸܠܝܼ! ܡ̣ܢ ܐܝܼܕܵܬ̈ܘܼܟܼ ܒܗܝܼܫܘܿܥ: ܪܵܒܵܐ ܩܲܡ ܓ̰ܲܢܓ̰ܸܪܬ̇ ܠܝܼ. ܚܵܝܵܐ ܝ݇ܠܹܗ ܡܵܪܝܵܐ: ܕܒܸܪܓܵܕܵܐ ܝ݇ܘܸܢ ܡ̣ܢ ܡܲܕܟܼܵܪܬܵܐ ܕܫܸܡܹܗ: ܒܸܬ ܫܵܒܼܩܸܢܹܗ ܐܵܗܵܐ ܒܲܪܝܼܵܐ ܘܥܵܡܪ̈ܵܢܹܗ ܘܡܫܵܢܸܢ ܠܚܲܕ݇ ܕܘܼܟܬܵܐ ܐ݇ܚܹܪ݇ܬܵܐ. ܐܵܡܸܪ ܐܸܠܹܗ ܣܵܒܼܵܐ ܩܲܕܝܼܫܵܐ: ܝܵܐ ܕܸܫ̰ܡܸܢ ܕܫܪܵܪܵܐ: ܠܹܐ ܝܼܘܸܬ̇ ܒܸܫܠܵܝܵܐ ܡ̣ܢ ܠܲܦܠܵܫܵܐ ܥܲܡ ܪܹ̈ܓܵܘܵܬܹܐ ܕܐܲܠܵܗܵܐ: ܐܵܢܝܼ ܕܓ̰ܸܡܥܝܹ̈ܐ ܝ݇ܢܵܐ ܒܫܸܡܹܗ ܩܲܕܝܼܫܵܐ ܡܘܼܕܝܼ ܝ݇ܠܹܗ ܦܠܵܫܘܼܟܼ ܥܲܡ ܕܐܵܗܵܐ ܐܲܚܘܼܢܵܐ؟ ܘܩܵܐ ܡܘܼܕܝܼ ܦܠܵܫܵܐ ܝ݇ܘܸܬ̇ ܥܲܡܹܗ؟ ܐ݇ܡܸܪܹܗ ܣܵܛܵܢܵܐ ܒܵܥܸܢ ܗܲܪ ܐܵܕܝܼܵܐ ܡܲܫܦܸܠܸܢܹܗ ܘܡܲܡܟܸܟܼܸܢܹܗ. ܐܝܼܢܵܐ ܐܸܢ ܓܵܪܫܸܢ ܐܝܼܕܵܐ ܡܸܢܹܗ ܘܫܵܒܼܩܸܢܹܗ ܕܗܵܘܹܐ ܚܲܝܠܵܢܵܐ ܕܲܪܩܘܼܒܼܠܝܼ: ܘܡܲܙܝܸܕ ܩܵܬܝܼ ܙܲܗܡܲܬܹ̈ܐ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܢܵܓ̰ܸܒܼ ܒܝܼܘܼܟܼ ܡܵܪܝܵܐ ܐܲܠܵܗܵܐ ܘܬܵܠܸܩܠܘܼܟܼ. ܩܘܼܘܸܠܹܗ ܩܵܬܹܗ ܣܵܛܵܢܵܐ ܘܐ݇ܡܸܪܹܗ: ܐܸܢ ܒܐܵܗܵܐ ܓܵܗܵܐ ܫܵܒܼܩܸܬ̇ ܠܵܗ̇ ܓܢܵܗܝܼ: ܡܸܢ݇ܕܪܹܫ݇ ܠܹܐ ܕܵܩܪܸܢ ܒܐܵܗܵܐ ܐܲܚܘܼܢܵܐ. ܗ̇ܝܓܵܗ ܐ݇ܡܸܪܹܗ ܩܲܕܝܼܫܵܐ ܠܡܲܠܲܐܟܼܵܐ ܫܪܝܼܠܹܗ ܗܲܠ ܕܗ̇ܘ ܝܵܘܡܵܐ ܕܡܵܪܝܵܐ ܫܵܩܸܠ ܡܸܢܹܗ ܬܘܼܥܠܵܐ ܕܦܘܼܠܚܵܢ̈ܘܼܗܝ ܒܝܼܫܹ̈ܐ. ܗܲܕܟܼܵܐ ܫܪܹܐܠܹܗ ܘܫܒܼܸܩܠܹܗ. ܘܐ݇ܬܹܐܠܹܗ ܒܵܒܲܢ ܠܟܸܣ ܕܗ̇ܘ ܐܲܚܘܼܢܵܐ. ܚܬܸܡܠܹܗ ܒܪܘܼܫܡܵܐ ܕܨܠܝܼܒܼܵܐ ܩܲܕܝܼܫܵܐ: ܒܫܸܡܵܐ ܕܒܵܒܵܐ ܘܒܪܘܼܢܵܐ ܘܪܘܼܚܵܐ ܕܩܘܼܕܫܵܐ. ܝܘܼܗ݇ܒܼܸܠܹܗ ܠܸܒܵܐ ܘܚܘܼܠܸܢܹܗ ܘܡܘܼܕܼܪܹܗ ܠܩܸܠܵܝܬܹܗ ܟܲܕ ܡܵܘܕܘܼܝܹܐ ܘܫܵܒܘܼܚܹܐ ܠܐܲܠܵܗܵܐ: ܐ݇ܚܹܪ݇ܢܵܐ ܗܸܟ̰ ܠܵܐ ܐ݇ܬܹܐܠܹܗ ܗ̇ܘ ܫܹܐܕܵܐ ܠܟܸܣ ܕܗ̇ܘ ܐܲܚܘܼܢܵܐ. ܘܡ̣ܢ ܝܵܘܡܵܐ ܠܝܵܘܡܵܐ ܒܹܐܙܵܠܵܐ ܗ݇ܘܵܐ ܠܵܩܵܕ݇ܡܵܐ ܒܡܝܲܬܪܘܼܬܵܐ: ܘܡܵܘܕܹܐ ܗ݇ܘܵܐ ܘܫܵܒܸܚ ܗ݇ܘܵܐ ܠܐܲܠܵܗܵܐ ܘܩܘܼܒܸܠܹܗ ܫܵܦܵܩܲܬ ܕܒܵܒܵܐ ܩܲܕܝܼܫܵܐ ܡܵܪܝ ܒܗܝܼܫܘܿܥ.
ܒܚܲܕ݇ ܡ̣ܢ ܝܵܘܡܵܢܹ̈ܐ ܐܵܢܵܐ ܝܘܿܚܲܢܵܢ ܟܲܕ ܝ݇ܬܝܼܒܼܵܐ ܠܟܸܣܠܹܗ ܐ݇ܬܹܠܗ݇ܘܿܢ ܚܲܕ݇ܟܡܵܐ ܐܲܚܘܼܢܘܵܬܹ̈ܐ ܕܒܵܥܝܼ ܝܵܕܥܝܼ ܒܘܼܬ ܕܝܼܹܗ. ܛܠܸܒܠܗ݇ܘܿܢ ܡܸܢܹܗ ܕܝܵܗ݇ܒܼܸܠ ܩܵܬܲܝܗܝ ܚܕܵܐ ܢܵܣܝܼܗܲܬ ܩܵܐ ܦܵܝܕܵܐ ܕܓܵܢܵܬܲܝ̈ܗܝ. ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܲܝܗܝ: ܟ̰ܲܠܸܫܘܿܢ ܩܵܐ ܢܛܵܪܬܵܐ ܕܩܵܢܘܿܢܹ̈ܐ ܕܕܲܝܪܵܝܘܼܬܵܐ: ܝܵܥܢܹܐ ܨܠܘܿܬܵܐ: ܘܨܵܘܡܵܐ: ܘܕܸܟܼܝܘܼܬܵܐ: ܘܡܲܟܝܼܟܼܘܼܬܵܐ: ܘܡܲܚܲܒܬܵܐ ܕܐ݇ܢܵܫܹ̈ܐ: ܚܘܼܒܵܐ ܕܐܲܚܘܼܢܘܵܬܹ̈ܐ. ܘܪܵܒܵܐ ܐ݇ܚܹܪ̈݇ܢܹܐ ܕܟܹܐ ܕܵܡܝܼ ܠܐܲܢܹܐ. ܘܝܘܼܗ݇ܒܼܸܠܹܗ ܢܵܣܝܼܗܲܬ ܘܓܠܹܐܠܹܗ ܩܵܬܲܝܗܝ ܚܘܼܫܵܒܼܹ̈ܐ ܕܠܸܒܵܘܵܬܲܝ̈ܗܝ. ܥܘܼܓ̰ܸܒܠܗ݇ܘܿܢ ܒܝܼܹܗ ܪܵܒܵܐ ܘܟܲܕ ܦܠܸܛܠܗ݇ܘܿܢ ܡ̣ܢ ܠܟܸܣܠܹܗ: ܐܵܡܪܝܼ ܗ݇ܘܵܘ ܩܵܬܝܼ ܐܲܚܘܼܢܘܵܬܹ̈ܐ. ܒܣܲܪܵܣܬܘܼܬܵܐ ܐܵܗܵܐ ܣܵܒܼܵܐ ܩܲܕܝܼܫܵܐ ܝ݇ܠܹܗ. ܣܵܒܲܒ ܚܘܼܫܵܒܼܹ̈ܐ ܕܠܵܒܵܘܵܬܲܢ ܓܠܹܐ ܠܹܗ ܩܵܬܲܢ. ܘܐܵܢܵܐ ܝܘܿܚܲܢܵܢ ܐ݇ܡܸܪܝܼ ܐܸܠܲܝܗܝ: ܪܵܒܵܐ ܓܵܗܹ̈ܐ ܐܵܢܵܐ ܝܵܕܥܸܢ ܕܚܲܕ݇ ܡܸܢܕܝܼ ܥܒܼܝܼܕܵܐ ܝ݇ܘܸܢ ܕܗ̇ܘ ܠܲܝܬ ܠܹܗ ܗܸܟ̰ ܚܲܒܪܵܐ ܒܝܼܹܗ. ܘܐܝܼܡܲܢ ܕܬܦܝܼܩܠܲܢ ܒܐܘܼܕܵܠܹܐ: ܡ̣ܢ ܒܸܣܬܵܝܘܼܬܵܐ ܕܐܝܼܬܠܝܼ ܗܘܝܼܬܵܐ ܥܲܡܹܗ: ܟܹܐ ܬܵܢܹܐ ܗ݇ܘܵܐ ܩܵܬܝܼ: ܦܸܠܵܢ ܫܘܼܠܵܐ ܥܒܼܝܼܕܹܗ ܝ݇ܘܸܬ̇: ܘܡܘܼܙܝܸܕ ܠܗ݇ܘܿܢ ܐܲܚܘܼܢܘܵܬܹ̈ܐ ܬܸܫܒܘܿܚܬܵܐ ܘܫܘܼܒܸܚܠܗ݇ܘܿܢ ܕܐܲܠܵܗܵܐ ܒܸܥܡܵܪܵܐ ܝ݇ܠܹܗ ܒܩܲܕܝܼܫ̈ܘܼܗܝ.
ܚܕܵܐ ܓܵܗܵܐ ܐ݇ܬܹܐܠܹܗ ܒܵܒܲܢ ܩܲܕܝܼܫܵܐ ܠܩܸܠܵܝܬܵܐ ܕܚܲܕ݇ ܡ̣ܢ ܐܲܚܘܼܢܘܵܬܹ̈ܐ. ܕܝܲܕܸܥ ܒܘܼܬ ܕܝܼܹܗ: ܘܚܙܹܐܠܹܗ ܕܕܡܝܼܟܼܵܐ ܝ݇ܠܹܗ: ܘܡܲܠܲܐܟܼܵܐ ܢܵܛܘܿܪܵܐ ܠܟܸܣ ܪܹܫܹܗ. ܘܐ݇ܡܸܪܹܗ ܒܣܲܪܵܣܬܘܼܬܵܐ: ܡܵܪܝܵܐ ܟܹܐ ܢܵܛܸܪ ܠܐܵܢܝܼ ܕܐܝܼܬܠܗ݇ܘܿܢ ܗܹܒܼܝܼ ܥܲܠܹܗ. ܘܐ݇ܙܸܠܹܗ ܟܲܕ ܫܵܒܘܼܚܹܐ ܠܐܲܠܵܗܵܐ.
ܚܲܕ݇ ܐܲܚܘܼܢܵܐ ܦܫܝܼܛܵܐ ܦܠܸـܛܠܹܗ ܡ̣ܢ ܒܲܪܝܼܵܐ ܕܡܸܨܪܹܝܢ: ܕܙܵܒܸܢ ܦܘܼܠܚܵܢܵܐ ܕܐܝܼܕܵܬ̈ܘܼܗܝ. ܬܦܸܩܠܹܗ ܒܚܲܕ݇ ܝܼܗܘܼܕܵܝܵܐ: ܘܕܪܹܫܠܹܗ ܥܲܡܹܗ ܒܘܼܬ ܡܫܝܼܚܵܐ. ܘܐ݇ܡܸܪܹܗ ܐܸܠܹܗ: ܐܲܚܬܘܿܢ ܟܪܸ̈ܵܣܛܝܵܢܹܐ ܐܵܡܪܝܼܬܘܿܢ ܗ̇ܘ ܕܦܸܫܠܹܗ ܡܸܚܝܵܐ ܠܙܩܝܼܦܵܐ ܝܼܗܘܵܐ ܡܫܝܼܚܵܐ: ܐܝܼܢܵܐ ܠܹܐ ܗ݇ܘܵܐ ܗ̇ܘ: ܐܸܠܵܐ ܚܲܕ݇ ܐ݇ܚܹܪ݇ܢܵܐ ܕܕܵܡܹܐ ܗ݇ܘܵܐ ܥܲܠܹܗ. ܗ̇ܘ ܐܲܚܘܼܢܵܐ ܙܹܐ ܒܦܫܝܼܛܘܼܬܹܗ ܐ݇ܡܸܪܹܗ: ܕܘܼܙ ܐ݇ܡܸܪܘܼܟܼ. ܒܬܵܢܵܝܬܵܐ ܕܐܵܗܵܐ ܚܲܒܪܵܐ: ܦܸܫܠܵܗ̇ ܫܩܝܼܠܬܵܐ ܡܸܢܹܗ ܫܵܦܵܩܲܬ ܕܡܲܥܡܘܿܕܝܼܬܵܐ. ܩܵܐ ܪܵܒܵܐ ܥܕܵܢܵܐ ܒܵܒܲܢ ܩܲܕܝܼܫܵܐ ܫܬܸܩܠܹܗ. ܟܲܕ ܚܙܹܐܠܹܗ ܐܲܚܘܼܢܵܐ ܠܣܵܒܼܵܐ ܕܠܹܐ ܝ݇ܠܹܗ ܦܲܪܨܘܿܦܹܗ ܦܫܝܼܩܵܐ ܠܟܸܣܠܹܗ: ܐ݇ܡܸܪܹܗ ܐܸܠܹܗ ܒܵܒܵܐ: ܩܵܡܘܼܕܝܼ ܒܐܵܗܵܐ ܓܵܗܵܐ ܡܘܼܕܸܪܘܼܟܼ ܦܵܬܘܼܟܼ ܡܸܢܝܼ؟ ܐ݇ܡܸܪܹܗ ܩܵܬܹܗ ܒܵܒܲܢ: ܐܲܢ݇ܬ̇ ܡܵܢܝܼ ܝ݇ܘܸܬ̇؟ ܓ̰ܘܼܘܸܒܠܹܗ ܘܐ݇ܡܸܪܹܗ ܐܵܢܵܐ ܦܠܵܢ ܝܼܘܸܢ. ܐ݇ܡܸܪܹܗ ܐܸܠܹܗ ܣܵܒܼܵܐ: ܠܵܐ: ܐܲܢ݇ܬ̇ ܠܹܐ ܝ݇ܘܸܬ̇ ܗ̇ܘ! ܣܵܒܵܒ ܐܲܢ݇ܬ̇ ܠܲܝܬܠܘܼܟܼ ܫܵܦܵܩܲܬ ܕܡܲܥܡܘܿܕܝܼܬܵܐ ܩܲܕܝܼܫܬܵܐ. ܐ݇ܡܸܪܹܗ ܐܸܠܹܗ ܗ̇ܘ ܐܲܚܘܼܢܵܐ: ܒܘܼܬ ܡܘܼܕܝܼ ܪ݇ܚܸܫܠܵܗ̇ ܡܸܢܝܼ ܒܵܒܵܐ؟ ܐ݇ܡܸܪܹܗ ܐܸܠܹܗ ܣܵܒܼܵܐ: ܒܘܼܬ ܕܗ̇ܝ ܗܹܡܸܙܡܵܢ ܕܗܘܼܡܙܸܡܠܘܼܟܼ ܥܲܡ ܝܗܘܼܕܵܝܵܐ ܒܡܸܨܪܹܝܢ: ܗܵܝܓܵܗ ܣܓܼܸܕܠܹܗ ܗ̇ܘ ܐܲܚܘܼܢܵܐ ܘܐ݇ܡܸܪܹܗ: ܫܒܼܘܿܩܠܝܼ ܒܵܒܵܐ ܩܲܕܝܼܫܵܐ. ܣܵܒܲܒ ܕܚܛܹܐܠܝܼ. ܐܵܢܵܐ ܒܦܫܝܼܛܘܼܬܵܐ ܐ݇ܡܝܼܪܵܐ ܠܝܼ ܗ̇ܝ ܗܹܡܸܙܡܵܢ. ܐܵܡܸܪ ܐܸܠܹܗ ܩܲܕܝܼܫܵܐ: ܚܙܝܼ ܒܪܘܼܢܝܼ: ܡ̣ܢ ܐܵܕܝܼܵܐ ܠܵܐ ܩܲܒܠܸܬ̇ ܗܹܡܸܙܡܵܢ ܢܘܼܟܼܪܵܝܬܵܐ ܥܲܠ ܗܲܝܡܵܢܘܼܬܵܐ. ܐܸܠܵܐ ܗ̇ܘ ܡܢܕܝܼ ܕܩܘܼܒܸܠܲܢ ܡ̣ܢ ܐܲܒܼܵܗ̈ܵܬܲܢ ܩܲܕܝܼܫܹ̈ܐ: ܕܚܵܡܲܚܠܹܗ ܒܗܸܫܝܵܪܘܼܬܵܐ. ܨܘܼܠܹܐܠܹܗ ܥܲܠܹܗ ܒܵܒܲܢ ܩܲܕܝܼܫܵܐ ܘܐ݇ܡܸܪܹܗ: ܡܵܪܝܵܐ ܐܲܠܵܗܵܐ: ܠܲܝܬ ܒܲܪܢܵܫܵܐ ܕܠܵܐ ܚܵܛܹܐ: ܐܸܠܵܐ ܐܲܢ݇ܬ̇ ܐܲܚܟ̰ܝܼ ܦܲܪܦܘܼܠܹܐ ܝ݇ܘܸܢ ܒܝܼܘܼܟܼ: ܝܵܐ ܡܸܠܝܵܐ ܪ̈ܲܚܡܹܐ ܘܫܵܒܼܩܸܬ̇ ܚܛܝܼܬܵܐ ܕܐܵܗܵܐ ܐܲܚܘܼܢܵܐ ܕܚܛܹܐܠܹܗ ܒܦܫܝܼܛܘܼܬܵܐ ܕܠܸܒܹܗ ܒܨܠܘܿܬܵܐ ܕܣܵܒܼܵܐ: ܡܘܼܕܸܪܵܐ ܠܹܗ ܐܲܠܵܗܵܐ ܫܵܦܵܩܲܬ ܕܡܲܥܡܘܿܕܝܼܬܵܐ ܩܵܐ ܕܗ̇ܘ ܐܲܚܘܼܢܵܐ.
ܐܝܼܢܵܐ ܐܝܼܬ ܗ݇ܘܵܐ ܚܕ݇ ܐܲܚܘܼܢܵܐ ܕܵܝܸܡܵܢ ܐܵܙܸܠ ܗ݇ܘܵܐ ܒܵܬ݇ܪ ܪܸܙܵܝܵܐ ܕܓܵܢܹܗ: ܘܠܹܐ ܥܵܒܼܸܕ ܗ݇ܘܵܐ ܪܵܐܝܝܼ ܒܣܵܒܼܹ̈ܐ: ܘܠܹܐ ܡܲܨܝܸܬ ܗ݇ܘܵܐ ܥܲܠܲܝܗܝ. ܐܵܗܵܐ ܩܸܡܠܹܗ ܐ݇ܙܸܠܹܗ ܠܡܵܬܵܐ ܕܛܪܘܿܐܝܼ ܠܬܵܝܡܢܵܐ ܡ̣ܢ ܦܝܼܣܛܵܛ ܕܚܵܝܹܐ ܬܵܡܵܐ ܐܲܝܟܼ ܝܼܚܝܼܕܵܝܵܐ. ܒܚܲܕ݇ ܡ̣ܢ ܝܵܘܡܵܢܹ̈ܐ ܪ݇ܚܸܫܠܹܗ ܠܡܕܝܼܢ݇ܬܵܐ ܕܙܵܒܸܢ ܦܘܼܠܚܵܢܵܐ ܕܐܝܼܕܵܬ̈ܘܼܗܝ: ܓܘܼܫܸܩܠܵܗ̇ ܡ̣ܢ ܦܲܢܓ̰ܵܪܵܐ ܕܒܲܝܬܵܗ̇ ܚܕܵܐ ܝܗܘܼܕܵܝܬܵܐ ܚܲܪܵܫܬܵܐ ܘܩܲܡ ܚܵܙܝܵܐ ܠܹܗ ܘܡܠܹܐܠܹܗ ܣܵܛܵܢܵܐ ܒܠܸܒܵܗ̇: ܘܗܘܹܐܠܵܗ̇ ܥܵܫܸܩ ܥܲܠܹܗ: ܘܩܪܹܐܠܵܗ̇ ܐܸܠܹܗ ܘܡܘܼܥܒܼܸܪܵܗ̇ ܠܒܲܝܬܵܗ̇. ܐܲܝܟܼ ܕܙܵܒܼܢܵܐ ܡ̣ܢ ܦܘܼܠܚܵܢܹܗ. ܘܩܲܡ ܕܵܒܼܩܵܐ ܠܹܗ ܓܵܘ ܓܲܪܕܵܗ̇: ܘܡܘܼܥܒܼܸܕ ܠܵܗ̇ ܐܸܠܹܗ ܕܫܵܒܼܸܩ ܠܝܼܚܝܼܕܵܝܘܼܬܹܗ ܘܚܵܝܹܐ ܠܟܸܣܠܵܗ̇. ܘܡܘܼܕܸܪܵܗ̇ ܩܵܬܹܗ ܠܬܵܘܕܝܼܬܵܐ ܕܝܗܘܼܕܵܝܹ̈ܐ ܘܩܲܡ ܡܲܕܡܸܟܼܵܗ̇ ܠܹܗ ܥܲܠ ܒܸܪ̈ܟܵܟܘܿܗ̇ ܘܫܩܸܠܵܗ̇ ܒܲܠܒܝܼܵܢܵܐ ܕܟܵܐܟܹ̈ܐ ܫܘܼܪܹܐ ܠܵܗ̇ ܒܲܠܒܘܼܝܹܐ ܓܵܘ ܟܵܐܟ̈ܘܼܗܝ ܕܠܵܐ ܦܵܐܹܫ ܒܹܝܠܲܝܗܝ ܐܘܼܦ ܚܲܕ݇ ܦܸܪܬܘܼܚܵܐ ܡ̣ܢ ܦܲܓܼܪܹܗ ܘܕܸܡܹܗ ܕܡܵܪܲܢ. ܐܲܝܟܼ ܕܒܓܵܢܹܗ ܒܐ݇ܚܵܪܵܝܬܵܐ ܗܘܼܩܹܐܠܹܗ ܩܵܬܲܢ. ܐܝܼܢܵܐ ܢܦܸܠܵܗ̇ ܐܘܼܪܚܵܐ ܕܚܲܕ݇ܟܡܵܐ ܐܲܚܘܼܢܘܵܬܹ̈ܐ ܕܲܝܪ̈ܵܝܹܐ ܕܡ̣ܢ ܓܵܘ ܒܲܪܝܼܵܐ: ܕܐܵܙܠ݇ܝܼ ܠܡܕܝܼܢ݇ܬܵܐ: ܒܚܕܵܐ ܦܸܠܵܢ ܗܲܓ̰ܲܬ: ܚܸܙܝܲܝܗܝ ܠܹܗ ܐܝܼܣܚܲܩ: ܗ̇ܘ ܕܗ݇ܘܹܐܠܹܗ ܝܗܘܼܕܵܝܵܐ: ܕܒܘܼܩܸܪܹܗ ܕܡ̣ܢ ܒܲܪܝܼܵܐ ܝ݇ܬܘܿܢ؟ ܐܵܡܪܝܼ ܐܸܠܹܗ ܗܹܐ! ܝܵܕܥܝܼܬܘܿܢ ܠܒܵܒܵܐ ܒܗܝܼܫܘܿܥ؟ ܐܵܡܪܝܼ ܗ̇ܘ ܒܵܒܵܐ ܕܝܼܲܢ ܝܼܠܹܗ ܐ݇ܡܸܪܹܗ ܡܵܘܡܘܼܝܹܐ ܝ݇ܘܸܢ ܐܸܠܵܘܟܼܘܿܢ ܒܐܲܠܵܗܵܐ: ܕܐܝܼܡܲܢ ܕܕܵܝܪܝܼܬܘܿܢ ܐܵܡܪܝܼܬܘܿܢ ܠܹܗ: ܕܐܝܼܣܚܲܩ ܝܗܘܼܕܵܝܵܐ ܒܹܐܡܵܪܵܐ ܝ݇ܠܹܗ: ܡܵܘܡܘܼܝܹܐ ܝ݇ܘܸܢ ܐܸܠܘܼܟܼ ܝܵܐ ܒܵܒܵܐ ܩܲܕܝܼܫܵܐ ܕܡܨܵܠܹܬ̇ ܡ̣ܢ ܓܹܒܝܼ: ܣܵܒܲܒ ܢܦܝܼܠܵܐ ܝ݇ܘܸܢ ܒܓܲܪܕܵܐ ܕܣܵܛܵܢܵܐ. ܐܵܢܝܼ ܐ݇ܡܸܪܗ݇ܘܿܢ ܐܸܠܹܗ: ܐܲܚܢܲܢ ܒܸܬ ܬܵܢܲܚܠܹܗ ܒܘܼܬ ܕܝܼܘܼܟܼ. ܐܝܼܢܵܐ ܗ̇ܝ ܝܗܘܼܕܵܝܬܵܐ ܫܡܸܥܠܵܗ̇ ܟܲܕ ܗ̇ܘ ܗܲܡܙܘܼܡܹܐ ܥܲܡ ܐܲܚܘܼܢܘܵܬܹ̈ܐ: ܦܘܼܪܡܹܐܠܵܗ̇ ܕܟܹܐ ܡܵܨܹܐ ܒܵܒܵܐ ܩܲܕܝܼܫܵܐ ܦܲܪܬܸܟ ܠܹܗ ܡ̣ܢ ܐܝܼܕܵܬ̈ܘܼܗ̇: ܦܠܸܛܠܵܗ̇ ܘܐ݇ܡܸܪܵܗ̇ ܠܐܲܚܘܼܢܘܵܬܹ̈ܐ: ܐ݇ܡܘܼܪܘܿܢ ܠܝܼܚܝܼܕܵܝܵܐ ܒܗܝܼܫܘܿܥ: ܕܐܸܢ ܚܲܙܝܵܢܘܼܟܼ ܠܐܲܟܼܵܐ ܒܸܬ ܓ̰ܲܢܓ̰ܸܪܲܢܘܼܟܼ.
ܕܐܸܪܗ݇ܘܿܢ ܐܲܚܘܼܢܘܵܬܹ̈ܐ ܠܒܲܪܝܼܵܐ: ܘܐ݇ܬܹܐܠܗ݇ܘܿܢ ܠܟܸܣ ܒܵܒܵܐ ܩܲܕܝܼܫܵܐ ܕܦܵܝܫܝܼ ܒܘܼܪ̈ܟܼܹܐ ܡܸܢܹܗ: ܡܘܼܢܫܹܐ ܠܗ݇ܘܿܢ ܕܬܵܢܝܼ ܠܹܗ ܒܘܼܬ ܐܝܼܣܚܲܩ. ܗ̇ܝܓܵܗ ܐܵܗܵܐ ܢܒܼܝܼܵܐ ܒܵܒܵܐ ܩܲܕܝܼܫܵܐ ܒܗܝܼܫܘܿܥ: ܣܵܒܲܒ ܒܣܲܪܵܣܬܘܼܬܵܐ ܢܒܼܝܼܵܐ ܗ݇ܘܵܐ: ܐܲܝܟܼ ܐܹܠܝܼܵܐ ܘܐܹܠܝܼܫܲܥ. ܒܘܼܩܸܪܹܗ ܠܐܲܚܘܼܢܘܵܬܹ̈ܐ ܘܐ݇ܡܸܪܹܗ: ܗܘܼܡܙܸܡܠܹܗ ܚܲܕ݇ ܐ݇ܢܵܫܵܐ ܥܲܡܵܘܟܼܘܿܢ ܓܵܘ ܡܸܨܪܹܝܢ ܒܘܼܬ ܕܝܼܝܼ؟ ܐܵܡܪܝܼ ܠܵܐ ܒܵܒܲܢ. ܣܵܒܲܒ ܣܵܛܵܢܵܐ ܚܘܼܫܟܸܢܵܐ ܗ݇ܘܵܐ ܠܕܟܼܵܪܲܝ. ܐ݇ܡܸܪܹܗ ܐܸܠܲܝܗܝ ܩܲܕܝܼܫܵܐ ܕܡܵܪܝܵܐ. ܐܝܼܣܚܲܩ ܝܗܘܼܕܵܝܵܐ: ܠܵܐ ܣܘܼܦܹܐܠܹܗ ܩܵܬܵܘܟܼܘܿܢ ܡܸܢܕܝܼ ܕܐܵܡܪܝܼܬܘܿܢ ܠܝܼ؟ ܐܵܡܪܝܼ ܐܸܠܹܗ ܗܹܐ ܝܵܐ ܒܵܒܲܢ. ܪܵܒܵܐ ܒܘܼܩܸܪܹܗ ܥܲܠܘܼܟܼ. ܘܩܲܡ ܡܵܘܡܹܐܠܘܼܟܼ ܕܡܨܵܠܸܬ̇ ܒܘܼܬ ܕܝܼܹܗ: ܣܵܒܲܒ ܢܦܝܼܠܵܐ ܝ݇ܠܹܗ ܒܓܲܪܕܵܐ ܕܣܵܛܵܢܵܐ. ܘܐܝܼܡܲܢ ܕܐ݇ܡܸܪܹܗ ܐܸܠܲܢ ܐܲܢܹܐ: ܐܵܗܵܐ ܒܲܟܼܬܵܐ ܦܠܸܛܠܵܗ̇ ܡ̣ܢ ܒܲܝܬܵܐ ܘܐ݇ܡܸܪܵܗ̇ ܐܸܠܲܢ: ܬܵܢܹܐܡܘܿܢ ܠܒܗܝܼܫܘܿܥ ܝܼܚܝܼܕܵܝܵܐ: ܕܐܸܢ ܚܵܙܝܲܢܘܼܟܼ ܠܐܲܟܼܵܐ: ܒܸܬ ܥܲܓ̰ܸܙܲܢܘܼܟܼ. ܐܝܼܡܲܢ ܕܩܲܕܝܼܫܵܐ ܫܡܸܥܠܹܗ ܠܐܲܢܹܐ ܚܲܒܪܹ̈ܐ: ܪܵܒܵܐ ܫܓܼܸܫܠܹܗ: ܩܢܸܙܠܹܗ ܐܲܩܠܵܬܹ̈ܗ: ܟܲܕ ܝ݇ܬܝܼܒܼܵܐ ܠܐܲܪܥܵܐ ܘܫܸܦܠܹܗ ܠܵܒܵܬ݇ܪܵܐ ܬܠܵܬܵܐ ܓܵܗܹ̈ܐ. ܡܘܼܩܘܸܚܠܹܗ ܘܐ݇ܡܸܪܹܗ ܡܵܪܲܢ ܝܼܫܘܿܥ ܡܫܝܼܚܵܐ ܗܲܝܸܪܝܼ.
ܥܘܼܓ̰ܸܒܠܗ݇ܘܿܢ ܐܲܚܘܼܢܘܵܬܹ̈ܐ ܘܐ݇ܡܸܪܗ݇ܘܿܢ: ܐܘܼܦ ܐܲܢ݇ܬ̇ ܝܵܐ ܒܵܒܵܐ ܒܸܟܪܵܒܵܐ ܝ݇ܘܸܬ̇؟ ܓ̰ܘܼܘܸܒܠܹܗ ܩܲܕܝܼܫܵܐ ܕܡܵܪܝܵܐ: ܡܵܢܝܼ ܝ݇ܠܹܗ ܕܓܼܵܠܸܒ ܠܦܲܢܕܹ̈ܐ ܕܣܵܛܵܢܵܐ ܥܲܡ ܕܒܲܟܼܬܵܬܹ̈ܐ؟ ܐܸܠܵܐ ܡ̇ܢ ܕܐܲܠܵܗܵܐ ܒܝܼܹܗ ܝ݇ܠܹܗ ܘܥܲܡܹܗ. ܒܵܒܲܢ ܩܵܕ݇ܡܵܝܵܐ ܐܵܕܲܡ: ܒܲܟܼܬܵܐ ܡܘܼܚܠܸܛܠܵܗ̇: ܘܩܲܡ ܦܵܠܛܵܐ ܠܹܗ ܡ̣ܢ ܦܲܪܕܲܝܣܵܐ. ܝܵܘܣܸܦ ܟܹܐܢܵܐ: ܒܐܘܼܪܚܵܐ ܕܒܲܟܼܬܵܐ ܦܸܫܠܹܗ ܕܸܪܝܵܐ ܓܵܘ ܒܹܝܬ ܐܲܣܝܼܪܹ̈ܐ. ܐܹܠܝܼܵܐ ܢܒܼܝܼܵܐ ܡ̣ܢ ܙܕܘܼܥܬܵܐ ܕܐܝܼܙܒܹܠ ܥܪܸܩܠܹܗ ܠܒܲܪܝܼܵܐ. ܫܸܡܫܘܿܢ ܓܲܢ݇ܒܵܪܵܐ ܡ̣ܢ ܒܲܟܼܬܵܐ ܦܸܫܠܹܗ ܐ݇ܣܝܼܪܵܐ. ܘܒܘܼܬ ܚܕܵܐ ܒܲܟܼܬܵܐ ܒܚܲܕ݇ ܝܵܘܡܵܐ ܥܸܣܪܝܼ ܘܬܠܵܬܵܐ ܐܲܠܦܹ̈ܐ ܦܸܫܠܗ݇ܘܿܢ ܩܛܝܼܠܹ̈ܐ ܒܣܲܝܦܵܐ ܡ̣ܢ ܒܢܲܝ̈ ܝܼܣܪܵܝܹܠ. ܝܘܿܚܲܢܵܢ ܡܲܥܡܕܵܢܵܐ ܒܒܲܟܼܬܵܐ ܦܸܫܠܹܗ ܡܘܼܦܪܸܡܵܐ ܪܹܫܹܗ. ܫܠܹܝܡܘܿܢ ܚܲܟܝܼܡܵܐ ܘܡܸܠܝܵܐ ܗܵܘܢܵܐ ܘܦܲܪܡܵܝܬܵܐ ܕܡܘܼܢܬܹܐ ܠܹܗ ܒܡܲܠܟܘܼܬܹܗ ܒܘܼܫ ܡ̣ܢ ܟܠܲܝܗܝ ܡܲܠܟܹ̈ܐ ܕܡ̣ܢ ܩܵܕ݇ܡ ܡܸܢܹܗ ܒܲܟܼܬܵܬܹ̈ܐ ܡܘܼܚܠܸܛܠܗ݇ܘܿܢ ܠܸܒܹܗ. ܦܲܛܪܘܿܣ ܪܹܫܵܐ ܕܬܲܠܡܝܼܕܹ̈ܐ ܒܲܟܼܬܵܐ ܩܲܡ ܡܲܟܦܸܪܵܐ ܠܹܗ ܒܡܵܪܹܗ. ܠܹܐ ܝ݇ܘܸܢ ܠܵܘܡܵܐ ܡܲܬܘܼܒܼܹܐ ܥܲܠ ܩܲܕܝܼܫܹ̈ܐ. ܡ̣ܢ ܩܵܕ݇ܡ ܥܕܵܢܵܐ ܐ݇ܡܸܪܝܼ. ܕܡܵܪܝܵܐ ܐܝܼܬ ܗ݇ܘܵܐ ܚܲܕ݇ܟܡܵܐ ܡܸܢܲܝ ܗܲܠ ܕܥܒܼܝܼܪܵܐ ܠܗ݇ܘܿܢ ܝܵܡܵܐ ܫܓܼܝܼܫܬܵܐ ܕܐܵܗܵܐ ܕܘܼܢܝܹܐ ܥܵܒܼܪܵܢܬܵܐ.
ܐܲܚܘܼܢܘܵܬܹ̈ܐ ܟܲܕ ܫܡܸܥܠܗ݇ܘܿܢ ܐܲܢܹܐ ܥܘܼܓ̰ܸܒܠܗ݇ܘܿܢ ܒܨܸܦܝܘܼܬܵܐ ܕܚܝܼܵܠ ܕܣܵܒܼܵܐ. ܘܫܵܒܚܝܼ ܗ݇ܘܵܘ ܠܐܲܠܵܗܵܐ ܕܒܸܥܡܵܪܵܐ ܝ݇ܠܹܗ ܒܩܲܕܝܼܫ̈ܘܼܗܝ. ܗ̇ܝܓܵܗ ܡܘܼܕܸܥܠܹܗ ܣܵܒܼܵܐ ܕܗ̇ܝ ܒܲܟܼܬܵܐ ܝܗܘܼܕܵܝܬܵܐ ܚܲܪܵܫܬܵܐ ܝ݇ܠܵܗ̇ ܒܗܹܡܸܙܡܵܢ̈ܘܿܗ̇ ܘܒܚܸܪ̈ܫܘܿܗ̇ ܕܪܹܐܠܵܗ̇ ܠܐܝܼܣܚܲܩ ܓܵܘ ܓܲܪܕܵܗ̇ ܘܓܪܸܫܠܵܗ̇ ܕܬܲܡܸܡ ܠܪܸܙܵܝܘܿܗ̇. ܡ̣ܢ ܕܗ̇ܝ ܥܕܵܢܵܐ ܒܵܒܲܢ ܗ݇ܘܹܐ ܠܹܗ ܨܵܠܘܼܝܹܐ ܨܠܘܿܬܵܐ ܒܠܲܝܠܹܐ ܘܒܐܝܼܡܵܡܵܐ: ܒܸܛܠܵܒܵܐ ܡ̣ܢ ܐܲܠܵܗܵܐ ܕܦܵܪܬܸܟ ܠܹܗ ܐܝܼܣܚܲܩ ܡ̣ܢ ܕܗ̇ܝ ܝܗܘܼܕܵܝܬܵܐ. ܫܸܡܥܝܵܐ ܠܹܗ ܡܵܪܝܵܐ ܨܠܘܿܬܵܐ ܕܒܵܒܲܢ ܩܲܕܝܼܫܵܐ ܒܗܝܼܫܘܿܥ. ܘܦܸܫܠܹܗ ܚܸܙܝܵܐ ܐܸܠܹܗ ܘܐ݇ܡܸܪܹܗ: ܓܘܼܒܝܵܐ ܕܝܼܝܼ: ܩܵܡܘܼ ܚܲܕ݇ ܗܲܕܟܼܵܐ ܒܸܓ̰ܗܵܝܵܐ ܝ݇ܘܸܬ̇ ܒܘܼܬ ܐܝܼܣܚܲܩ. ܕܗ̇ܘ ܒܓܵܢܹܗ ܐ݇ܙܸܠܹܗ ܒܵܬ݇ܪ ܪܸܙܵܝܹܗ: ܗܲܠ ܕܢܦܸܠܹܗ ܒܓܲܪܕܵܐ ܕܣܵܛܵܢܵܐ: ܟܦܸܪܹܗ ܒܝܼܝܼ ܘܒܡܲܥܡܘܿܕܝܼܬܵܐ ܕܥܡܸܕܠܹܗ. ܘܛܠܸܒܠܹܗ ܒܵܒܲܢ ܩܲܕܝܼܫܵܐ ܘܐ݇ܡܸܪܹܗ: ܠܹܐ ܫܵܠܸܢ ܡ̣ܢ ܠܛܠܵܒܵܐ ܘܦܲܪܦܘܼܠܹܐ ܒܝܼܘܼܟܼ: ܗܲܠ ܕܪܵܚܡܸܬ̇ ܥܲܠܹܗ. ܘܡܲܕܸܪܸܬ̇ ܠܹܗ ܠܟܸܣܠܲܢ: ܘܫܵܒܼܩܸܬ̇ ܠܓܢܵܗܹܗ. ܘܐ݇ܡܸܪܹܗ ܐܸܠܹܗ ܡܵܪܝܵܐ: ܐܸܢ ܫܵܒܼܩܸܢ ܠܓܢܵܗܹܗ: ܒܸܬ ܫܵܩܠܸܢ ܡ̣ܢ ܗܵܩܘܼܟܼ ܘܝܵܗ݇ܒܼܸܢ ܩܵܬܹܗ. ܐ݇ܡܸܪܹܗ ܣܵܒܼܵܐ: ܡܵܪܝܵܐ ܐܲܢ݇ܬ̇ ܝܼܘܸܬ̇ ܒܵܚܪܵܢܵܐ ܕܠܸܒܵܘܵܬܹ̈ܐ: ܣܵܒܲܒ ܐܲܝܟܼ ܕܐܵܢܵܐ ܒܵܥܹܢ ܕܗܵܘܹܐ ܠܝܼ ܦܘܼܪܩܵܢܵܐ: ܗܲܕܟܼܵܐ ܒܵܥܹܐ ܕܟܠ ܐ݇ܢܵܫܵܐ ܦܵܐܸܫ ܦܘܼܪܩܵܐ. ܠܹܐ ܝ݇ܘܸܢ ܡܨܵܝܵܐ ܕܚܵܡܠܸܢ ܟܲܕ ܐܲܚܘܼܢܝܼ ܚܵܙܸܢܹܗ ܥܲܣܩܘܼܝܵܬܹ̈ܐ: ܘܐܵܢܵܐ ܗܵܘܸܢ ܪܵܗܲܬ: ܟܲܕ ܬܸܪܘܲܝܢ ܝ݇ܘܲܚ ܡ̣ܢ ܚܲܕ݇ ܥܲܦܪܵܐ ܓܒܼܝܼܠܬܵܐ ܕܐܝܼܕܵܬ̈ܘܼܟܼ ܩܲܕܝܼܫܹ̈ܐ. ܗܹܐ ܡܵܪܝܼ. ܥܒܼܘܿܕ ܪ̈ܲܚܡܹܐ ܥܲܠܹܗ. ܡܲܕܸܪܹܗ ܠܒܲܝܬܘܼܟܼ ܩܲܕܝܼܫܵܐ. ܠܹܐ ܟܵܠܸܢ ܡ̣ܢ ܦܲܪܦܲܠܬܵܐ ܘܛܠܵܒܬܵܐ ܡܸܢܘܼܟܼ ܒܠܲܝܠܹܐ ܘܒܐܝܼܡܵܐ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܝܼ: ܗܲܠ ܕܡܲܕܸܪܸܬ̇ ܠܹܗ. ܐ݇ܡܸܪܹܗ ܐܸܠܹܗ ܡܵܪܝܵܐ: ܪܵܒܵܐ ܨܦܵܝܝܼ ܒܸܥܒܼܵܕܵܐ ܝ݇ܘܸܬ̇: ܝܵܐ ܓܘܼܒܝܵܐ ܕܝܼܝܼ ܒܗܝܼܫܘܿܥ: ܣܵܒܲܒ ܝ݇ܕܸܥܠܝܼ ܕܡܲܬܘܼܒܼܹܐ ܝ݇ܘܸܬ̇ ܓܵܢܘܼܟܼ ܒܡܲܕܲܠ ܕܕܵܘܣܬܘܼܟܼ: ܕܵܐܟܼܝܼ ܕܦܘܼܩܸܕܠܝܼ ܠܬܲܠܡܝܼܕ̈ܝܼ. ܠܲܝܬ ܚܘܼܒܵܐ ܒܘܼܫ ܓܘܼܪܵܐ ܡ̣ܢ ܕܐܵܗܵܐ: ܕܐ݇ܢܵܫܵܐ ܡܲܬܸܒܼ ܓܵܢܹܗ ܡ̣ܢ ܓܹܒܵܐ ܕܚܲܒܼܪܹܗ. ܡܐܵܕܝܼܵܐ ܠܹܐ ܫܵܩܠܸܢ ܡ̣ܢ ܦܘܼܪܥܵܢܘܼܟܼ: ܐܸܠܵܐ ܡܲܙܝܘܼܕܹܐ ܒܸܬ ܡܲܙܝܸܕܸܢ ܠܗܵܩܘܼܟܼ ܗܵܩܵܐ ܓܘܼܪܵܐ: ܒܘܼܬ ܚܘܼܒܘܼܟܼ ܠܟܸܣ ܓܒܼܝܼܠܬܝܼ. ܒܘܼܬ ܚܵܬܸܪܘܼܟܼ ܒܸܬ ܥܵܒܼܕܸܢ ܪ̈ܲܚܡܹܐ ܥܲܡ ܐܝܼܣܚܲܩ. ܚܛܹܐܠܹܗ ܘܟܦܸܪܹܗ ܒܝܼܝܼ: ܘܒܸܬ ܡܲܕܸܪܸܢܹܗ ܠܐܲܟܼܵܐ ܠܟܸܣܠܘܼܟܼ. ܘܝܘܼܗ݇ܒܼܸܠܹܗ ܡܵܪܝܵܐ ܫܠܵܡܵܐ ܘܒܚܸܩܪܵܐ ܐ݇ܣܸܩܠܹܗ ܠܫܡܲܝܵܐ.
ܘܐܲܠܵܗܵܐ ܟܪܸܒܠܹܗ ܠܒܲܟܼܬܵܐ ܝܗܘܼܕܵܝܬܵܐ: ܠܵܐ ܥܒܼܸܪܘܿܢ ܪܵܒܵܐ ܝܵܘܡܵܢܹ̈ܐ ܡܸܬܠܵܗ̇. ܘܩܸܡܠܹܗ ܐܝܼܣܚܲܩ ܘܐ݇ܬܹܐܠܹܗ ܠܒܲܪܝܼܵܐ ܠܟܸܣ ܒܵܒܵܐ ܩܲܕܝܼܫܵܐ ܒܗܝܼܫܘܿܥ. ܬܘܼܠܡܸܕܠܹܗ ܘܡܘܼܕܸܪܹܗ ܠܐܘܼܪܚܵܐ ܕܘܼܙ. ܘܗ݇ܘܹܐܠܹܗ ܕܲܝܪܵܝܵܐ ܟܵܡܝܼܠ ܥܵܒܼܕܵܢܵܐ ܕܪܸܙܵܝܵܐ ܕܐܲܠܵܗܵܐ ܒܟܠܲܝܗܝ ܝܵܘܡܵܢܹ̈ܐ ܕܚܲܝ̈ܘܼܗܝ ܨܠܵܘܵܬܲܝ̈ܗܝ ܥܲܡܲܢ.
ܒܚܲܕ݇ ܡ̣ܢ ܝܵܘܡܵܢܹ̈ܐ ܡܸܢ݇ܕܪܹܫ݇ ܒܵܒܲܢ ܒܸܚܕܵܪܵܐ ܗ݇ܘܵܐ ܓܵܘ ܒܲܪܝܼܵܐ: ܚܙܹܐܠܹܗ ܓܵܘ ܛܘܼܪܵܐ ܚܲܕ݇ ܟ̰ܸܠܦܵܐ ܓܘܼܪܵܐ ܘܨܠܹܐܠܹܗ ܓܵܘܹܗ. ܬܵܡܵܐ ܡܘܼܫ݇ܟ̰ܸܚܠܹܗ ܚܕܵܐ ܓܸܦܝܼܬܵܐ: ܚܲܕ݇ ܡܝܼܬܵܐ ܥܲܬܝܼܩܵܐ ܓܵܘܵܗ̇: ܘܚܕܵܐ ܬܲܫܬܵܐ ܡܘܼܬܸܒܼܬܵܐ ܠܚܲܕ݇ ܕܸܦܢܵܐ. ܘܨܘܼܠܹܐܠܹܗ ܨܠܘܿܬܵܐ ܘܝ݇ܬܸܒܼܠܹܗ. ܡܘܼܩܘܸܚܠܹܗ ܘܐ݇ܡܸܪܹܗ: ܝܵܐ ܒܲܪܢܵܫܵܐ ܚܲܝܘܼ̈ܗܝ ܟܸܪ̈ܝܹܐ ܒܐܵܗܵܐ ܕܘܼܢܝܹܐ ܥܵܒܼܪܵܢܬܵܐ. ܕܵܐܟܼܝܼ ܦܝܵܫܵܐ ܝ݇ܘܸܬ̇ ܫܸܪܝܵܐ ܡܸܢܵܗ̇ ܘܒܸܒܛܵܠܵܐ ܝ݇ܢܵܐ ܟܠܲܝܗܝ ܒܘܼܣܵܡ̈ܘܼܟܼ ܐܲܪ̈ܥܥܵܢܵܝܹܐ. ܘܐܝܼܡܲܢ ܕܒܥܹܐܠܹܗ ܕܦܵܠܸܛ: ܬܘܼܚܡܸܢܹܗ ܘܐ݇ܡܸܪܹܗ: ܠܵܒܠܹܢܵܗ̇ ܐܵܗܵܐ ܬܲܫܬܵܐ: ܩܵܐ ܐܲܚܘܼܢܘܵܬܹ̈ܐ ܕܐܵܟܼܠܝܼ ܡܹܐܟܼܘܼܠܬܵܐ ܓܵܘܵܗ̇ ܩܵܐ ܕܕܵܟܼܪܝܼܠܹܗ ܐܵܗܵܐ ܡܝܼܬܵܐ ܒܝܼܵܗ̇. ܫܩܝܼܠܵܐ ܠܹܗ ܕܦܵܠܸܛ ܘܐܵܙܸܠ ܐ݇ܬܹܐܠܹܗ ܩܵܠܵܐ ܡ̣ܢ ܟܘܼܪܵܟܼܵܐ ܕܗ̇ܘ ܡܝܼܬܵܐ ܟܲܕ ܒܹܐܡܵܪܵܐ: ܒܗܝܼܫܘܿܥ: ܡܲܬܸܒܼ ܡܵܐܢܵܐ ܠܕܘܼܟܬܹܗ: ܠܹܐ ܝ݇ܠܵܗ̇ ܚܫܝܼܚܬܵܐ ܕܓܵܘ ܒܲܪܝܼܵܐ ܗܵܘܝܼ ܓܹܢܵܒܼܹ̈݁ܐ. ܘܡܘܼܙܝܸܕܠܹܗ ܩܲܕܝܼܫܵܐ ܘܐ݇ܡܸܪܹܗ: ܗܲܕܟܼܵܐ ܫܒܼܸܩܠܝܼ ܠܡܵܐܢܵܐ ܘܦܠܸܛܠܝܼ ܘܫܘܼܒܸܚܠܝܼ ܠܐܲܠܵܗܵܐ. ܝܵܐ ܡܘܼܚܸܒ̈ܝܼ ܐܲܚܘܼܢܘܵܬܹ̈ܐ: ܐܵܗܵܐ ܡܵܠܘܼܦܹܐ ܝ݇ܠܵܗ̇ ܩܵܬܲܢ. ܕܠܹܐ ܝ݇ܠܵܗ̇ ܠܵܙܸܡ ܕܐ݇ܢܵܫܵܐ ܫܵܩܸܠ ܡܸܢܕܝܼ ܕܠܹܐ ܝ݇ܠܹܗ ܕܝܼܹܗ. ܠܵܐ ܙܥܘܿܪܵܐ ܘܠܵܐ ܓܘܼܪܵܐ: ܘܒܘܼܫ ܙܵܘܕܵܐ ܡ̣ܢ ܡܝܼܬܵܐ.
ܗܲܕܟܼܵܐ ܦܵܩܸܕ ܗ݇ܘܵܐ ܐܵܗܵܐ ܒܵܒܵܐ ܩܵܐ ܐܲܚܘܼܢܘܵܬܹ̈ܐ ܘܐܵܡܸܪ ܗ݇ܘܵܐ: ܠܵܐ ܐܵܙܠ݇ܝܼܬܘܿܢ ܠܐܸܪܚܹܐ ܘܝܵܦܝܼܬܘܿܢ ܠܲܚܡܵܐ ܪܵܒܵܐ: ܐܸܠܵܐ ܡܵܠܹܐ ܠܵܘܟܼܘܿܢ ܗ̇ܘ ܡܸܢܕܝܼ ܕܗܘܼܕܪܵܐ ܝ݇ܠܹܗ ܐܲܠܵܗܵܐ ܩܵܬܵܘܟܼܘܿܢ ܡ̣ܢ ܦܘܼܠܚܵܢܵܐ ܕܐܝܼܕ̈ܵܬܵܘܟܼܘܿܢ ܟܹܐ ܡܵܠܹܐ ܠܵܘܟܼܘܿܢ. ܠܵܐ ܦܵܠܛܝܼܬܘܿܢ ܠܕܘܼܢܝܹܐ ܕܠܵܐ ܬܵܠܩܝܼܬܘܿܢ. ܠܵܐ ܐܵܙܠ݇ܝܼܬܘܿܢ ܠܚܸܓܹ̈ܐ ܕܣܵܗܕܹ̈ܐ ܕܚܵܙܝܼܬܘܿܢ ܟܢܘܼܫܝܹ̈ܐ: ܟܲܕ ܠܲܝܬ ܟܢܘܼܫܝܹ̈ܐ. ܙܹܐܠ݇ܡܘܿܢ ܠܒܵܬܹ̈ܐ ܕܣܵܗܕܹ̈ܐ ܩܲܕܝܼܫܹ̈ܐ ܨܵܠܹܐܡܘܿܢ ܘܐ݇ܡܘܿܪܘܿܢ: ܝܵܐ ܡܵܪܵܐ ܕܣܵܗܕܹ̈ܐ ܩܲܕܝܼܫܹ̈ܐ ܫܒܼܘܿܩܠܲܢ ܓܢܵܗ̈ܵܬܲܢ ܘܚܛ̈ܝܼܵܬܲܢ. ܡܵܠܸܦܠܲܢ ܕܥܵܒܼܕܲܚ ܨܸܒܼܝܵܢܘܼܟܼ ܒܟܠ ܥܕܵܢܵܐ. ܘܕܐܘܿܪܘܿܢ ܠܩܸܠܵܝܵܬܵܘ̈ܟܼܘܿܢ ܟܲܕ ܐܲܚܬܘܿܢ ܫܵܒܘܼܚܹܐ ܠܐܲܠܵܗܵܐ.
ܡ̣ܢ ܒܵܬ݇ܪ ܗܵܕܵܐ ܫܘܼܪܹܐܠܗ݇ܘܿܢ ܒܲܪܒܪ̈ܵܝܹܐ ܒܹܐܬܵܝܵܐ ܠܒܲܪܝܼܵܐ ܘܒܸܩܛܵܠܵܐ ܠܣܵܒܼܹ̈ܐ ܩܲܕܝܼܫܹ̈ܐ ܕܒܸܥܡܵܪܵܐ ܗ݇ܘܵܘ ܬܵܡܵܐ: ܘܢܦܸܠܵܗ̇ ܙܕܘܼܥܬܵܐ ܓܵܘܲܢ ܘܒܚܲܕ݇ ܡ̣ܢ ܝܵܘܡܵܢܹ̈ܐ ܝ݇ܬܝܼܒܼܵܐ ܝ݇ܘܸܢ ܗ݇ܘܵܐ ܠܟܸܣ ܒܵܒܲܢ ܩܲܕܝܼܫܵܐ: ܐ݇ܡܸܪܝܼ ܐܸܠܹܗ ܐܲܚܘܼܢܝܼ ܡܘܼܚܸܒܵܐ: ܠܹܐ ܛܵܫܸܢ ܡܸܢܘܼܟܼ ܡܸܢܕܝܼ. ܕܐܝܼܬ ܒܠܸܒܝܼ. ܡ̣ܢ ܕܗ̇ܘ ܝܵܘܡܵܐ ܕܚܙܹܐܠܝܼ ܒܲܪܒܪ̈ܵܝܹܐ ܡܲܚܪ̈ܘܼܒܼܹܐ ܠܒܲܪܝܼܵܐ ܘܒܸܩܛܵܠܵܐ ܠܐܲܒܼܵܗ̈ܵܬܲܢ ܬܘܼܚܡܸܢܝܼ ܕܫܵܢܸܢ ܡܐܲܟܼܵܐ ܕܠܵܐ ܩܵܛܠܝܼ ܠܝܼ ܘܐܵܙܠ݇ܝܼ ܠܓܹܗܲܢܵܐ ܒܘܼܬ ܕܝܼܝܼ. ܐܝܼܢܵܐ ܐܵܗܵܐ ܩܲܕܝܼܫܵܐ ܐ݇ܡܸܪܹܗ ܐܸܠܝܼ: ܐܸܢ ܐܲܢ݇ܬ̇ ܐܵܙܸܠ݇ܬ̇: ܐܘܼܦ ܐܵܢܵܐ ܒܸܬ ܐܵܙܸܠ݇ܢ ܥܲܡܘܼܟܼ. ܘܩܵܐ ܕܐܵܗܵܐ ܥܸܠܬܵܐ: ܩܸܡܠܲܢ ܬܸܪܘܲܝܢ ܘܨܘܼܠܹܐܠܲܢ ܨܠܘܿܬܵܐ: ܘܦܠܸܛܠܲܢ ܘܐ݇ܙܸܠܲܢ ܠܡܸܨܪܹܝܢ ܘܐܵܢܵܐ ܐ݇ܙܸܠܝܼ ܠܩܠܘܿܙܡܵܐ. ܘܡ̣ܢ ܬܵܡܵܐ ܠܕܲܝܪܵܐ ܕܩܲܕܝܼܫܵܐ ܐܲܢܛܘܿܢܝܼܣ. ܘܬܵܡܵܐ ܡܘܼܫ݇ܟ̰ܸܚܠܝܼ ܚܕܵܐ ܓܸܦܝܼܬܵܐ ܘܫܪܹܐܠܝܼ ܓܵܘܵܗ̇ ܒܢܲܦ̮ܫܝܼ: ܟܲܕ ܦܲܪܦܘܼܠܹܐ ܠܐܲܠܵܗܝܼ ܒܘܼܬ ܚܛܝܼܵܬ̈ܝܼ. ܐܝܼܢܵܐ ܩܲܕܝܼܫܵܐ ܐܲܒܵܐ ܒܗܝܼܫܘܿܥ ܐ݇ܣܸܩܠܹܗ ܠܡܵܪܝܼܣ: ܘܐ݇ܙܸܠܹܗ ܠܒܲܪܝܼܵܐ ܕܬܵܡܵܐ ܘܫܪܹܐܠܹܗ ܓܵܘܵܗ̇ ܝܼܚܝܼܕܵܐܝܼܬ: ܘܪܵܒܵܐ ܒܫܸܠܝܘܼܬܵܐ ܟܹܐ ܬܲܓܒܸܪ ܗ݇ܘܵܐ ܠܵܗ̇ ܓܵܢܹܗ. ܘܐܲܠܵܗܵܐ ܡܘܼܪܸܡܠܹܗ ܫܸܡܹܗ ܒܘܼܬ ܚܵܬܸܪ ܕܦܘܼܠܚܵܢ̈ܘܼܗܝ ܩܵܕ݇ܡܵܝܹ̈ܐ. ܘܙܸܕܠܗ݇ܘܿܢ ܐܲܚܘܼܢܘܵܬܹ̈ܐ ܠܟܸܣ ܕܐܵܗܵܐ ܒܵܒܵܐ ܩܲܕܝܼܫܵܐ ܘܢܒܼܝܼܵܐ ܕܐܲܠܵܗܵܐ. ܘܡܵܠܸܦ ܗ݇ܘܵܐ ܠܗ݇ܘܿܢ ܕܢܵܛܪܝܼ ܚܘܼܒܵܐ ܕܐܲܚܘܼܢܘܼܬܵܐ. ܘܗܲܝܡܵܢܘܼܬܵܐ ܫܲܪܝܼܪܬܵܐ ܕܬܠܝܼܬܵܝܘܼܬܵܐ ܩܲܕܝܼܫܬܵܐ: ܕܝܼܠܵܗ̇ ܚܲܕ݇ ܐܲܠܵܗܵܐ ܕܠܵܐ ܦܘܼܠܵܓܼܵܐ: ܘܕܠܵܐ ܒܘܼܠܒܵܠܵܐ: ܘܕܠܵܐ ܫܘܼܚܠܵܦܵܐ. ܒܵܪܝܵܢܵܐ ܕܟܠ ܒܵܒܵܐ ܒܪܘܼܢܵܐ ܘܪܘܼܚܵܐ ܕܩܘܼܕܫܵܐ. ܕܝܼܢܵܐ ܒܵܪܵܒܵܪ ܚܕܵܐ ܐܲܠܵܗܘܼܬܵܐ ܠܵܐ ܒܪܝܼܬܵܐ. ܐܝܼܬܝܵܝܬܵܐ ܕܡ̣ܢ ܐܵܒܵܕ ܡܵܠܸܦ ܗ݇ܘܵܐ ܠܗ݇ܘܿܢ ܕܠܵܐ ܡܲܚܦܸܠܝܼ ܡ̣ܢ ܠܹܐܙܵܠܵܐ ܠܥܹܕܬܵܐ. ܘܫܵܩܠܝܼ ܦܲܓܼܪܵܐ ܘܕܸܡܵܐ ܕܡܵܪܲܢ: ܕܝܵܗ݇ܒܼܝܼ ܚܲܝܹ̈ܐ ܩܵܐ ܕܐܵܢܝܼ ܕܫܵܩܠܝܼ ܠܗ݇ܘܿܢ.
ܡܸܢ݇ܕܪܹܫ݇ ܟܹܐ ܐܵܡܸܪ ܗ݇ܘܵܐ ܒܘܼܬ ܚܘܼܒܵܐ. ܡܲܚܸܒܘܿܢ ܠܟܠܵܗ̇ ܓܒܼܝܼܠܬܵܐ ܕܐܲܠܵܗܵܐ. ܟܠ ܕܡܲܚܸܒ ܠܐܲܚܘܼܢܹܗ: ܡܲܚܘܼܒܹܐ ܝ݇ܠܹܗ ܠܐܲܠܵܗܵܐ. ܗ̇ܘ ܡܸܢܕܝܼ ܕܥܵܒܼܕܲܚܠܹܗ ܒܐܝܼܕ̈ܵܬܲܢ: ܒܸܥܒܼܵܕܹܗ ܝ݇ܘܲܚ ܒܐܲܠܵܗܵܐ ܘܒܓܵܢ̈ܵܬܲܢ.
ܘܐܲܝܟܼ ܥܵܕܲܬܹܗ ܟܹܐ ܝܵܬܸܒܼ ܗ݇ܘܵܐ ܥܲܡ ܐܲܚܘܼܢܘܵܬܹ̈ܐ: ܘܗܲܡܙܸܡ ܗ݇ܘܵܐ ܥܲܡܲܝ: ܩܵܐ ܝܘܼܬܪܵܢܵܐ ܕܓܵܢ̈ܵܬܲܝ ܘܓ̰ܵܪܸܒ ܗ݇ܘܵܐ ܠܗ݇ܘܿܢ ܕܚܵܙܹܐ ܕܐܸܢ ܩܘܼܝܹܐ ܝ݇ܢܵܐ ܒܗܲܝܡܵܢܘܼܬܵܐ. ܐܵܡܸܪ ܗܵܐ ܣܵܛܵܢܵܐ ܚܵܦܘܼܛܝܼ ܝ݇ܠܹܗ ܕܐܵܡܪܸܢ ܗܹܡܸܙܡܲܢ ܗ̇ܝ ܕܗܲܝܡܵܢܘܼܬܵܐ ܠܹܐ ܡܲܟܫܸܛܵܐ ܠܵܗ̇ ܕܐܵܡܪܸܢܵܗ̇: ܝܲܢ ܥܵܒܼܕܸܢ ܡܸܢܕܝܼ ܕܠܲܝܬ ܠܹܗ ܐܝܼܬܘܼܬܵܐ: ܐܲܝܟܼ ܛܲܟܼܣܵܐ ܕܕܲܝܪ̈ܵܝܹܐ. ܘܐܸܢ ܚܵܙܝܼܬܘܿܢ ܠܝܼ ܕܐܲܢܹܐ ܡܸܢܕܝܼܵܢܹ̈ܐ ܒܸܦܠܵܚܵܐ ܝ݇ܘܸܢ ܒܸܬ ܬܵܒܥܝܼܬܘܿܢ ܐܸܠܝܼ ܘܐܵܬܝܼܬܘܿܢ ܒܵܬ݇ܪܝܼ؟ ܚܲܕ݇ܟܡܵܐ ܡܸܢܲܝ ܐ݇ܡܸܪܗ݇ܘܿܢ: ܐܲܢ݇ܬ̇ ܝܵܐ ܒܵܒܲܢ ܠܹܐ ܚܵܠܛܸܬ̇: ܚܵܣܠܲܢ! ܘܐܸܢ ܚܠܸܛܠܘܼܟܼ: ܒܸܬ ܚܵܡܠܲܚ ܐܸܠܘܼܟܼ. ܐ݇ܚܹܪ̈݇ܢܹܐ ܐ݇ܡܸܪܗ݇ܘܿܢ ܗܸܟ̰ ܠܹܐ ܟܵܠܲܚ ܡ̣ܢ ܡܲܨܝܵܬܬܵܐ ܐܸܠܘܼܟܼ ܒܟܠ ܡܹܢܕܝܼ. ܘܚܲܕ݇ ܣܵܡܵܐ ܐ݇ܚܹܪ݇ܢܵܐ ܐ݇ܡܸܪܗ݇ܘܿܢ: ܟܠ ܡܸܢܕܝܼ ܕܚܵܙܲܚ ܐܲܢ݇ܬ̇ ܒܸܥܒܼܵܕܵܐ: ܐܘܼܦ ܐܲܚܢܲܢ ܒܸܬ ܥܵܒܼܕܲܚ. ܓ̰ܘܼܘܸܒܠܹܗ ܚܲܕ݇ ܡܸܢܲܝ ܒܐ݇ܚܵܪܵܝܬܵܐ ܘܐ݇ܡܸܪܹܗ: ܐܝܼܢܵܐ ܐܵܢܵܐ: ܡ̣ܢ ܣܵܒܲܒ ܕܟܹܐ ܝܵܕܥܸܢܵܗ̇ ܐܘܼܪܚܵܐ ܕܐܲܠܵܗܵܐ ܐ݇ܬܹܐܠܝܼ ܠܟܸܣܠܘܼܟܼ. ܘܐܸܢ ܝܵܕܥܸܢ ܕܒܸܦܠܵܛܵܐ ܝ݇ܘܸܬ̇ ܡ̣ܢ ܐܘܼܪܚܵܐ ܕܐܲܠܵܗܵܐ: ܠܹܐ ܐܵܙܸܠ݇ܢ ܒܵܬ݇ܪܘܼܟܼ: ܘܠܹܐ ܗܵܘܸܢ ܥܲܡܘܼܟܼ. ܗ̇ܝܓܵܗ ܩܸܡܠܹܗ ܐܲܒܵܐ ܒܗܝܼܫܘܿܥ: ܘܢܫܸܩܠܹܗ ܪܹܫܹܗ ܘܐ݇ܡܸܪܹܗ: ܐܵܗܵܐ ܝ݇ܠܹܗ ܢܵܛܪܵܢܵܐ ܕܦܘܼܩܕܵܢܹ̈ܐ ܕܡܵܪܝܵܐ. ܘܐܵܗܵܐ ܐܝܼܣܚܲܩ ܝܼܗܘܵܐ: ܗ̇ܘ ܕܗ݇ܘܹܐܠܹܗ ܝܗܘܼܕܵܝܵܐ ܕܕܐܸܪܹܗ ܘܗ݇ܘܹܐ ܠܹܗ ܚܲܕ݇ ܐ݇ܢܵܫܵܐ ܛܵܒܼܵܐ ܘܡܝܲܬܪܵܐ. ܘܦܠܸܛܠܹܗ ܫܸܡܹܗ ܒܝܵܘܡܵܢܹ̈ܐ ܕܒܵܒܲܢ ܩܲܕܝܼܫܵܐ ܐܲܒܵܐ ܒܗܝܼܫܘܿܥ.
ܗܲܕܟܼܵܐ: ܒܵܒܲܢ ܩܲܕܝܼܫܵܐ ܓܵܘ ܕܗ̇ܘ ܒܲܪܝܼܵܐ: ܗ݇ܘܹܐܠܹܗ ܢܝܼܫܲܢܩܵܐ ܘܕܘܼܡܝܵܐ ܛܵܒܼܵܐ: ܘܥܸܠܬܵܐ ܕܡܵܘܕܝܵܢܘܼܬܵܐ ܩܵܐ ܡܵܠܲܦܬܵܐ ܕܚܲܠܵܢܬܵܐ ܕܐܲܚܘܼܢܘܵܬܹ̈ܐ ܩܵܐ ܦܘܼܪܩܵܢܵܐ ܕܓܵܢ̈ܵܬܲܝ. ܐܝܼܢܵܐ ܐܝܼܬ ܗ݇ܘܵܐ ܚܲܕ݇ ܩܲܫܝܼܫܵܐ ܕܚܲܝܹܐ ܗ݇ܘܵܐ ܠܟܸܣ ܒܵܒܲܢ: ܘܐܝܼܡܲܢ ܕܗܲܡܙܸܡ ܗ݇ܘܵܐ ܒܵܒܲܢ ܥܲܡ ܐܲܚܘܼܢܘܵܬܹ̈ܐ ܒܝܵܗ݇ܒܼܵܠܬܵܐ ܕܢܵܣܝܼܗܲܬ ܩܵܬܲܝܗܝ. ܘܐܵܗܵܐ ܩܲܫܝܼܫܵܐ ܟܹܐ ܗܲܡܙܸܡ ܗ݇ܘܵܐ ܚܲܒܪܹ̈ܐ ܥܲܠܡܵܢܵܝܹ̈ܐ: ܘܐܵܗܵܐ ܒܝܼܵܗ݇ܒܼܵܐ ܗ݇ܘܵܐ ܚܘܼܣܪܵܢܵܐ ܩܵܐ ܐܲܚܘܼܢܘܵܬܹ̈ܐ ܡ̣ܢ ܝܘܼܠܦܵܢܵܐ ܐܲܠܵܗܵܝܵܐ. ܘܟܠܲܝܗܝ ܐܵܢܝܼ ܕܐܵܬܝܼ ܗ݇ܘܵܘ ܠܟܸܣ ܒܵܒܲܢ ܫܵܡܥܝܼ ܗ݇ܘܵܘ ܣܘܼܗܒܲܬܹ̈ܐ ܕܘܼܢܝܵܢܵܝܹ̈ܐ ܡ̣ܢ ܕܗ̇ܘ ܩܲܫܝܼܫܵܐ: ܚܘܼܣܪܵܢܵܐ ܒܸܩܢܵܝܵܐ ܗ݇ܘܵܘ ܡܸܢܹܗ. ܘܟܹܐ ܛܲܪܛܸܡܝܼܝ ܗ݇ܘܵܘ ܥܲܠܹܗ. ܗ̇ܝܓܵܗ ܐ݇ܬܹܐܠܹܗ ܚܲܕ݇ ܣܵܒܼܵܐ ܠܟܸܣ ܐܲܒܵܐ ܒܗܝܼܫܘܿܥ ܕܬܵܦܸܩ ܒܝܼܹܗ: ܓ̰ܡܸܥܠܗ݇ܘܿܢ ܐܲܚܘܼܢܘܵܬܹ̈ܐ ܠܟܸܣܠܹܗ: ܘܬܘܼܢܹܐܠܗ݇ܘܿܢ ܩܵܬܹܗ ܩܸܣܲܬ ܕܗ̇ܘ ܩܲܫܝܼܫܵܐ: ܘܐ݇ܡܸܪܗ݇ܘܿܢ ܟܠܲܢ ܦܝܼܫܹ̈ܐ ܝ݇ܘܲܚ ܫܓܼܝܼܫܹ̈ܐ ܒܗܹܡܸܙܡܵܢܹ̈ܐ ܕܒܹܐܡܵܪܵܐ ܝ݇ܠܹܗ ܩܵܬܲܢ. ܘܐܝܼܡܲܢ ܕܒܹܐܙܵܠܵܐ ܝ݇ܘܲܚ ܠܩܸܠܵܝܬܲܢ: ܐܵܟܼܹܠܩܲܪܨܵܐ ܡܲܕܟܼܘܼܪܹܐ ܝ݇ܠܹܗ ܩܵܬܲܢ ܗܹܡܸܙܡܵܢ̈ܘܼܗܝ ܕܒܸܫܓܼܵܫܵܐ ܝ݇ܘܲܚ. ܐܵܡܸܪ ܐܸܠܲܝܗܝ ܣܵܒܼܵܐ: ܩܘܼܡܘܼܢ ܐܵܙܲܠ݇ܚ ܠܟܸܣ ܒܵܒܲܢ ܘܐܝܼܡܲܢ ܕܐܵܢܵܐ ܒܵܠܓܸܢ ܥܲܡܹܗ ܒܗܲܡܙܲܡܬܵܐ ܡܲܕܟܼܸܪܝܼܬܘܿܢ ܠܝܼ ܘܗ̇ܝܓܵܗ ܐܵܢܵܐ ܒܸܬ ܛܵܠܒܸܢ ܡܸܢܹܗ ܕܡܲܟܠܹܐ ܠܹܗ ܕܠܵܐ ܫܵܓܼܫܝܼ ܚܝܼܵܠܵܘ̈ܟܼܘܿܢ ܒܡܸܢܕܝܼ ܕܗܲܡܙܘܼܡܹܐ ܝ݇ܠܹܗ ܘܩܸܡܠܗ݇ܘܿܢ ܘܐ݇ܬܹܐܠܗ݇ܘܿܢ ܠܟܸܣ ܒܵܒܲܢ. ܘܐܘܼܦ ܗ̇ܘ ܩܲܫܝܼܫܵܐ ܐܲܝܟܼ ܥܵܕܲܬ ܬܵܡܵܐ ܗ݇ܘܵܐ: ܘܗܲܡܙܘܼܡܹܐ ܗܹܡܸܙܡܵܢܹ̈ܐ ܠܵܐ ܪܹ̈ܐܙܵܢܵܝܹܐ: ܘܐܲܒܵܐ ܒܝܼܗܫܘܿܥ ܠܵܐ ܡܘܼܢܟܼܸܣܠܹܗ ܘܪܡܸܙܠܹܗ ܣܵܒܼܵܐ ܠܒܵܒܲܢ: ܘܩܸܡܠܹܗ ܦܘܼܠܸܛܠܹܗ ܠܒܼܲܕܲܪ: ܘܡܘܼܕܸܥܠܹܗ ܩܵܬܹܗ ܒܘܼܬ ܛܲܪܛܲܡܬܵܐ ܘܠܵܐ ܪܵܙܝܼܘܼܬܵܐ ܕܐܲܚܘܼܢܘܵܬܹ̈ܐ ܡ̣ܢ ܕܗ̇ܘ ܩܲܫܝܼܫܵܐ ܣܵܒܵܒ ܐܲܚܘܼܢܘܵܬܹ̈ܐ ܗܲܡܵܫܵܐ ܟܹܐ ܒܵܥܝܼ ܫܵܡܥܝܼ ܡܸܢܘܼܟܼ ܗܹܡܸܙܡܵܢ ܕܐܲܠܵܗܵܐ. ܘܐܵܗܵܐ ܩܲܫܝܼܫܵܐ ܒܸܗܘܵܝܵܐ ܝ݇ܠܹܗ ܥܸܠܬܵܐ ܕܬܲܪܩܵܠܬܵܐ ܩܵܬܲܝ ܒܗܹܡܸܙܡܵܢ̈ܘܼܗܝ. ܐܵܡܸܪ ܐܸܠܲܝܗܝ ܐܲܒܵܐ ܒܗܝܼܫܘܿܥ: ܡܘܼܕܝܼ ܒܵܥܝܼܬܘܿܢ ܥܵܒܼܕܸܢ ܩܵܬܹܗ؟ ܣܵܛܵܢܵܐ ܒܵܥܹܐ ܕܬܵܠܸܩܠܹܗ: ܘܐܲܚܬܘܿܢ ܒܸܛܠܵܒܵܐ ܝ݇ܬܘܿܢ ܕܛܵܪܕܸܢܹܗ ܒܸܬ ܕܵܐܸܢܝܼ ܡܵܪܝܵܐ ܒܘܼܬ ܕܝܼܹܗ. ܒܸܬ ܐܵܡܸܪ ܩܵܬܝܼ ܚܲܕ݇ ܐ݇ܢܵܫܵܐ ܣܘܼܦܹܐܠܝܼ ܒܐܝܼܕܘܼܟܼ: ܘܐܲܢ݇ܬ̇ ܠܵܐ ܩܘܼܒܸܠܘܼܟܼ. ܘܐܸܢ ܬܵܦܪܸܢ ܒܝܼܹܗ ܘܡܲܟܠܸܢܹܗ ܕܠܵܐ ܗܲܡܙܸܡ: ܒܸܬ ܪܵܚܸܩ ܘܐܵܙܸܠ ܡ̣ܢ ܠܟܸܣܠܝܼ: ܘܕܵܐܸܪ ܠܐܲܬܪܹܗ ܘܗܵܘܹܐ ܥܵܠܡܵܝܵܐ. ܘܒܸܬ ܬܵܠܩܵܐ ܓܵܢܹܗ. ܐܝܼܢܵܐ ܘܵܓ̰ܸܒ ܝܼܠܵܗ̇ ܕܚܵܡܠܝܼܬܘܿܢ ܥܲܠܹܗ ܘܐܘܼܦ ܥܲܠܝܼ ܒܚܘܼܒܵܐ. ܘܒܵܬ݇ܪ ܗܵܕܵܐ ܒܸܬ ܡܲܢܝܸܚܵܐ ܓܵܢܵܘܟܼܘܿܢ ܒܝܼܲܢ. ܓ̰ܘܼܘܸܒܠܗ݇ܘܿܢ ܐܲܚܘܼܢܘܵܬܹ̈ܐ ܘܐ݇ܡܸܪܗ݇ܘܿܢ ܐܝܼܢܵܐ ܐܸܢ ܗܵܘܹܐ ܪܵܐܙܝܼ ܕܫܲܚܠܸܦ ܡ̣ܢ ܕܐܵܗܵܐ ܥܵܕܲܬܹܗ: ܘܕܵܐܸܪ ܠܪܹܐܙܵܐ ܕܕܲܝܪܵܝܘܼܬܵܐ: ܒܸܬ ܚܵܡܠܲܚ ܐܸܠܹܗ ܘܡܲܬܒܼܲܚܠܹܗ ܥܲܠ ܪܹܫܲܢ ܗܲܠ ܕܕܵܐܸܪ ܠܒܲܗܪܵܐ.
ܡ̣ܢ ܒܵܬ݇ܪ ܗܵܕܵܐ ܦܘܼܪܡܹܐ ܠܹܗ ܗ̇ܘ ܩܲܫܝܼܫܵܐ ܘܪܥܸܫܠܹܗ ܒܚܸܠܛܹܗ: ܓܪܸܫܠܹܗ ܐܝܼܕܵܐ ܡ̣ܢ ܗܹܡܸܙܡܵܢܹ̈ܐ ܠܵܐ ܕܸܟܼܝܹ̈ܐ ܘܟܹܐ ܡܲܨܝܸܬ ܗ݇ܘܵܐ ܠܒܵܒܲܢ ܣܵܒܼܵܐ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܘܼܗܝ. ܘܗ݇ܘܸܐܠܵܗ̇ ܠܹܗ ܚܲܪܬܵܐ ܛܵܒܼܬܵܐ.
ܒܚܲܕ݇ ܡ̣ܢ ܝܵܘܡܵܢܹ̈ܐ ܟܲܕ ܐܲܒܵܐ ܩܲܕܝܼܫܵܐ ܒܗܝܼܫܘܿܥ ܝ݇ܬܝܼܒܼܵܐ ܒܓܸܦܝܼܬܹܗ ܓܵܘ ܒܲܪܝܼܵܐ ܕܬܹܒܼܵܐܝܼܣ ܕܡܵܪܝܼܣ. ܐ݇ܬܹܐܠܹܗ ܠܟܸܣܠܹ݂ܗ ܡܵܪܲܢ ܝܼܫܘܿܥ ܡܫܝܼܚܵܐ ܘܥܲܡܹܗ ܬܪܹܝ ܡܲܠܲܐܟܼܹ̈ܐ: ܐܲܝܟܼ ܕܦܸܫܠܹܗ ܚܸܙܝܵܐ ܠܒܵܒܲܢ ܐܲܒܼܪܵܗܵܡ ܬܚܘܿܬ ܒܲܠܘܼܛܵܐ ܕܡܲܡܪܹܐ. ܠܹܐ ܝ݇ܠܵܗ̇ ܥܵܓ̰ܝܼܒܘܼܬܵܐ ܐܵܗܵܐ: ܐܲܝܟܼ ܕܐܲܒܼܪܵܗܵܡ ܩܵܕܘܼܫܹܐ ܗ݇ܘܵܐ ܠܫܸܡܵܐ ܕܐܲܠܵܗܵܐ: ܗܲܪ ܗܵܕܵܐ ܐܘܼܦ ܐܵܗܵܐ ܒܵܒܲܢ ܪܹܓܵܐ ܕܐܲܠܵܗܵܐ ܩܵܕܘܼܫܹܐ ܗ݇ܘܵܐ ܠܫܸܡܹܗ ܒܕܵܝܸܡܘܼܬܵܐ. ܐ݇ܡܸܪܹܗ ܐܸܠܹܗ ܡܫܝܼܚܵܐ: ܫܠܵܡܵܐ ܐܸܠܘܼܟܼ ܣܵܒܼܵܐ ܡܝܲܩܪܵܐ ܓܘܼܒܝܵܐ ܕܝܼܝܼ ܒܗܝܼܫܘܿܥ. ܗ̇ܝܓܵܗ ܗ̇ܘ ܣܵܒܼܵܐ ܡܒܘܼܪܟܼܵܐ ܩܸܡܠܹܗ ܒܡܲܠܝܵܙܬܵܐ: ܒܪܸܟܠܹܗ ܘܣܓܼܸܕܠܹܗ ܐܸܠܹܗ. ܫܩܸܠܹܗ ܡܝܼܵܐ ܘܕܪܹܐܠܹܗ ܒܡܵܐܢܵܐ: ܘܛܠܸܒܠܹܗ ܡܸܢܹܗ ܕܚܲܠܸܠ ܠܐܲܩ̈ܠܵܬܘܼܗܝ. ܗ̇ܝܓܵܗ ܐ݇ܣܸܩܠܹܗ ܡܵܪܲܢ ܠܫܡܲܝܵܐ ܒܚܸܩܪܵܐ ܓܘܼܪܵܐ.
ܗܲܕܟܼܵܐ: ܒܵܒܲܢ ܫܲܪܝܼܪܵܐ ܒܗܝܼܫܘܿܥ ܫܬܹܐܠܹܗ ܡ̣ܢ ܕܐܵܢܝܼ ܡܝܼܵܐ: ܘܣܵܡܵܐ ܦܝܼܫܵܐ ܫܒܼܝܼܩܲܝܠܹܗ ܓܵܘ ܡܵܐܢܵܐ: ܗܲܠ ܕܐܵܬܹܐ ܬܲܠܡܝܼܕܹܗ ܡ̣ܢ ܡܸܨܪܹܝܢ ܘܫܵܬܹܐ ܡܸܢܲܝܗܝ ܩܵܐ ܒܘܼܪܟܬܵܐ. ܬܘܼܡܸܡܠܹܗ ܠܗ̇ܝ ܕܟܬܝܼܒܼܵܬܵܐ ܝ݇ܠܵܗ̇: ܕܡܲܚܸܒ ܠܫܒܼܵܒܼܘܼܟܼ ܡܐܲܝܟܼ ܓܵܢܘܼܟܼ. ܐܝܼܢܵܐ ܟܲܕ ܐ݇ܬܹܐܠܹܗ ܬܲܠܡܝܼܕܹܗ ܡ̣ܢ ܠܒܼܲܕܲܪ ܐ݇ܡܸܪܹܗ ܐܸܠܹܗ ܒܪܘܼܢܝ: ܫܬܝܼ ܚܲܕ݇ܟ̰ܵܐ ܡ̣ܢ ܕܐܵܢܝܼ ܡܝܼܵܐ ܕܓܵܘ ܡܵܐܢܵܐ. ܐ݇ܡܸܪܹܗ ܗܹܐ ܒܵܒܝܼ ܒܸܬ ܐܵܙܸܠ݇ܢ ܫܵܬܸܢ. ܐܝܼܢܵܐ ܦܸܫܠܹܗ ܡܘܼܥܝܸܩܵܐ ܒܚܝܼܵܠܹܗ ܘܐ݇ܡܸܪܹܗ: ܡ̣ܢ ܓܹܒܵܐ ܕܬܵܢܹܐ ܒܵܒܝܼ: ܫܬܝܼ ܡܝܼܵܐ ܩܲܪܝܼܪܹ̈ܐ: ܒܗ̇ܝ ܕܐܸܬܝܵܐ ܝ݇ܘܸܢ ܒܚܸܡܵܐ ܘܥܘܼܓ̰ܸܙܵܐ ܝ݇ܘܸܢ: ܘܒܹܐܡܵܪܵܐ ܝ݇ܠܹܗ ܐܸܠܝܼ ܫܬܝܼ ܡ̣ܢ ܡܝܼܵܐ ܕܓܵܘ ܡܵܐܢܵܐ. ܘܠܵܐ ܒܥܹܐܠܹܗ ܕܫܵܬܹܐ ܡܸܢܲܝܗܝ. ܡܸܢ݇ܕܪܹܫ݇ ܐ݇ܡܸܪܹܗ ܐܸܠܹܗ ܩܘܼܡ݇ ܒܪܘܼܢܝܼ ܘܫܬܝܼ ܚܲܕ݇ܟ̰ܵܐ ܡܝܼܵܐ ܡ̣ܢ ܕܓܵܘ ܡܵܐܢܵܐ. ܘܗ̇ܘ ܐ݇ܡܸܪܹܗ ܠܪܵܒܝܼܹܗ. ܨܵܠܝܼ ܨܠܘܿܬܵܐ ܒܘܼܬ ܕܝܼܝܼ: ܒܸܬ ܥܵܒܼܕܸܢ: ܐܝܼܢܵܐ ܠܵܐ ܥܒܼܸܕܠܹܗ. ܐܝܼܢܵܐ ܓܵܘ ܠܸܒܹܗ ܐ݇ܡܸܪܹܗ ܐܸܢ ܒܵܥܹܢ ܫܵܬܸܢ ܡ̣ܢ ܩܘܼܩܵܐ ܒܸܬ ܫܵܬܸܢ: ܣܵܒܲܒ ܐܵܢܝܼ ܩܲܪܝܼܪܹ̈ܐ ܝ݇ܢܵܐ. ܘܓܵܗܵܐ ܕܬܠܵܬܵܐ ܐ݇ܡܸܪܹܗ ܐܸܠܹܗ: ܩܘܼܡ݇ ܫܬܝܼ ܚܲܕ݇ܟ̰ܵܐ ܡ̣ܢ ܡܝܼܵܐ ܕܓܵܘ ܡܵܐܢܵܐ: ܘܐ݇ܡܸܪܹܗ ܒܸܬ ܫܵܬܸܢ: ܘܠܵܐ ܫܬܹܐܠܹܗ: ܘܣܵܒܼܵܐ ܠܵܐ ܥܒܼܸܕܠܹܗ ܩܵܠܵܐ.
ܚܙܹܐܠܹܗ ܬܲܠܡܝܼܕܵܐ ܠܦܲܪܨܘܿܦܵܐ ܕܒܵܒܲܢ ܕܠܹܐ ܝ݇ܠܹܗ ܡܐܲܝܟܼ ܩܵܕ݇ܡܵܝܬܵܐ ܦܩܝܼܚܵܐ: ܒܗ̇ܝ ܥܕܵܢܵܐ ܩܸܡܠܹܗ ܐ݇ܙܸܠܹܗ ܠܡܵܐܢܵܐ ܩܵܐ ܕܫܵܬܹܐ. ܘܓܘܼܠܹܐ ܠܹܗ ܐܝܼܢܵܐ ܠܲܝܬ ܓܵܘܹܗ ܡܝܼܵܐ ܘܕܐܸܪܹܗ ܠܟܸܣ ܒܵܒܲܢ ܘܐ݇ܡܸܪܹܗ ܠܲܝܬ ܡܝܼܵܐ ܓܵܘ ܡܵܐܢܵܐ. ܓ̰ܘܼܘܸܒܠܹܗ ܘܐ݇ܡܸܪܹܗ ܐܸܠܹܗ: ܐܵܢܝܼ ܡܝܼܵܐ ܒܸܬ ܦܵܝܫܝܼ ܗ݇ܘܵܘ ܫܒܼܝܼܩܹܐ ܒܐܲܪܥܵܐ ܗܲܠ ܐܵܕܝܼܵܐ؟ ܐܵܡܸܪ ܐܸܠܹܗ: ܡܘܼܕܝܼ ܗ݇ܘܵܘ ܐܵܢܝܼ ܡܝܼܵܐ ܒܵܒܵܐ؟ ܓ̰ܘܼܘܸܒܠܹܗ ܗܲܡܸܢ ܐܸܠܝܼ ܒܪܘܼܢܝܼ ܕܡܫܝܼܚܵܐ ܐ݇ܬܹܐܠܹܗ ܠܐܵܗܵܐ ܒܲܪܝܼܵܐ ܠܟܸܣ ܐܲܚܘܼܢܵܐ ܡܲܚܸܒܵܢܵܐ ܕܐܲܠܵܗܵܐ ܒܗ̇ܝ ܕܟܹܐ ܚܵܫܸܚ ܗ݇ܘܵܐ ܘܒܘܼܪܸܟܼܠܹܗ ܘܛܠܸܒܠܝܼ ܡܸܢܹܗ ܕܚܲܠܸܠܸܢ ܐܲܩܠܵܬ̈ܘܼܗܝ: ܘܚܘܼܠܸܠܝܼ ܒܐܵܢܝܼ ܡܝܼܵܐ: ܘܐܵܢܵܐ ܫܬܹܐܠܝܼ ܚܲܕ݇ܟ̰ܵܐ ܡܸܢܲܝܗܝ ܘܣܵܡܵܐ ܦܝܼܫܵܐ ܫܒܼܸܩܠܝܼ ܩܵܬܘܼܟܼ. ܘܟܲܕ ܐܲܢ݇ܬ̇ ܠܵܐ ܡܘܼܨܝܸܬܠܘܼܟܼ ܕܫܵܬܸܬ̇ ܗ݇ܘܵܐ ܡܲܠܲܐܟܼܹ̈ܐ ܡܘܼܪܡܲܝ ܠܗ݇ܘܿܢ ܡ̣ܢ ܐܲܪܥܵܐ. ܐܝܼܢܵܐ ܟܲܕ ܫܡܸܥܠܹܗ ܐܲܢܹܐ ܗ̇ܘ ܬܲܠܡܝܼܕܵܐ: ܢܦܸܠܹܗ ܠܐܲܪܥܵܐ ܩܵܕ݇ܡ ܐܲܩܠܵܬܹ̈ܐ ܕܒܵܒܲܢ ܘܫܢܹܐܠܹܗ ܩܵܐ ܚܕܵܐ ܥܕܵܢܵܐ ܝܲܪܝܼܟܼܬܵܐ. ܘܐܝܼܡܲܢ ܕܗ݇ܘܹܐܠܹܗ ܗܸܫܝܵܪ: ܡܘܼܩܸܡܠܹܗ ܣܵܒܼܵܐ ܩܲܕܝܼܫܵܐ ܘܐ݇ܡܸܪܹܗ ܐܸܠܹܗ. ܒܪܘܼܢܝܼ. ܣܵܒܲܒ ܐܵܕܵܡ ܠܵܐ ܡܘܼܨܝܸܬܠܹܗ ܠܒܵܪܝܵܢܹܗ: ܢܦܸܠܹܗ ܡ̣ܢ ܒܘܼܣܵܡܵܐ ܕܦܲܪܕܲܝܣܵܐ. ܐܘܼܦ ܐܲܢ݇ܬ̇ ܐܸܢ ܗܵܘܸܬ̇ ܗ݇ܘܵܐ ܡܘܼܨܝܸܬܵܐ ܥܲܠܝܼ. ܘܠܵܐ ܥܵܒܼܪܸܬ̇ ܗ݇ܘܵܐ ܠܦܘܼܩ̈ܕܵܢܝܼ. ܒܸܬ ܦܵܝܫܸܬ̇ ܗ݇ܘܵܐ ܡܘܼܚܫܸܚܵܐ ܠܕܐܵܗܵܐ ܥܘܼܕܪܵܢܵܐ ܓܘܼܪܵܐ: ܕܦܸܫܠܹܗ ܫܩܝܼܠܵܐ ܡܸܢܘܼܟܼ. ܘܐܵܗܵܐ ܬܲܠܡܝܼܕܵܐ ܪܵܒܵܐ ܦܸܫܠܹܗ ܡܘܼܥܝܸܩܵܐ ܒܠܸܒܹܗ: ܘܪܵܒܵܐ ܦܫܸܡܠܹܗ: ܒܘܼܬ ܠܵܐ ܡܲܨܝܵܬܬܹܗ: ܘܥܲܓ̰ܘܼܙܹܐ ܗ݇ܘܵܐ ܒܘܼܬ ܚܸܠܛܵܐ ܕܥܒܼܸܕܠܹܗ: ܘܦܫܝܼܡܵܐ ܕܠܵܐ ܦܸܫܠܹܗ ܡܘܼܚܫܸܚܵܐ ܠܗ̇ܝ ܡܵܘܗܲܒܼܬܵܐ ܛܝܼܡܵܢܬܵܐ. ܐܝܼܢܵܐ ܣܵܒܼܵܐ ܩܲܕܝܼܫܵܐ ܟܹܐ ܝܵܗ݇ܒܼܸܠ ܗ݇ܘܵܐ ܠܹܗ ܠܸܒܵܐ ܘܐܵܡܸܪ: ܡܐܵܕܝܼܵܐ ܕܦܫܝܼܡܵܐ ܝ݇ܘܸܬ̇ ܒܸܬ ܦܵܐܹܫ ܡܘܼܢܫܝܼܵܐ ܚܸܠܛܘܼܟܼ. ܘܠܵܐ ܡܨܸܐܠܹܗ ܕܝܵܗ݇ܒܼܸܠ ܠܸܒܵܐ ܩܵܬܹܗ. ܗܲܠ ܕܒܚܲܪܬܵܐ ܐܵܗܵܐ ܬܠܡܝܼܕܵܐ ܛܠܸܒܠܹܗ ܡܸܢܹܗ ܘܐ݇ܡܵܪܹܗ: ܡܵܪܝܼ ܘܒܵܒܝܼ: ܥܒܼܘܿܕ ܪ̈ܲܚܡܹܐ ܥܲܡܝܼ ܫܵܕܸܪܝܼ ܠܟܸܣ ܚܲܕ݇ ܐ݇ܢܵܫܵܐ ܕܝܼܠܹܗ ܪܵܒܵܐ ܚܲܝܠܵܢܵܐ ܒܐܲܠܵܗܵܐ ܕܒܵܩܪܸܢ ܡܸܢܹܗ ܒܘܼܬ ܕܐܵܗܵܐ ܚܸܠܛܵܐ ܕܦܠܝܼܚܵܐ ܝ݇ܘܸܢ ܗ̇ܝܓܵܗ ܒܵܒܲܢ ܝܘܼܗ݇ܒܼܸܠܹܗ ܠܸܒܵܐ: ܘܝܘܼܗ݇ܒܼܼܠܹܗ ܚܕܵܐ ܓܸܪܕܲܝܵܐ ܕܠܲܚܡܵܐ ܘܐ݇ܡܸܪܹܗ ܐܸܠܹܗ: ܙܹܠ݇ ܠܡܕܝܼܢ݇ܬܵܐ ܕܐܲܢܛܝܼܢܘܿ ܕܗ̇ܝ ܝܼܠܵܗ̇ ܐܲܢܨܝܼܢܵܐ: ܒܸܬ ܚܵܙܸܬ̇ ܡ̣ܢ ܬܲܝܡܢܵܐ ܕܫܘܼܪܵܐ ܕܡܕܝܼܢ݇ܬܵܐ: ܚܲܕ݇ ܐ݇ܢܵܫܵܐ ܝ݇ܬܝܼܒܼܵܐ ܥܲܠ ܚܲܕ݇ ܩܘܼܚܵܐ ܕܙܸܒܠܹ̈ܐ ܘܝܵܠܹ̈ܕ݇ܐ ܪܲܦܘܼܝܹܐ ܟܹܐܦܹ̈ܐ ܒܝܼܹܗ: ܗܲܒܼܠܹܗ ܐܵܗܵܐ ܓܸܪܕܲܝܵܐ ܩܵܬܹܗ ܒܫܸܡܝܼ: ܘܗ̇ܘ ܒܸܬ ܗܲܡܙܸܡ ܥܲܡܘܼܟܼ. ܩܸܡܠܹܗ ܘܐ݇ܙܸܠܹܗ ܠܡܕܝܼܢ݇ܬܵܐ ܐܲܝܟܼ ܕܦܸܫܠܹܗ ܦܩܝܼܕܵܐ: ܘܡܘܼܫ݇ܟ̰ܸܚܠܹܗ ܠܗ̇ܘ ܐ݇ܢܵܫܵܐ: ܘܝܼܗ݇ܒܼܸܠܹܗ ܠܠܲܚܡܵܐ ܒܫܸܡܵܐ ܕܒܵܒܵܐ ܒܗܝܼܫܘܿܥ ܓ̰ܘܼܘܸܒܠܹܗ ܐܵܗܵܐ ܐ݇ܢܵܫܵܐ ܘܐ݇ܡܸܪܹܗ: ܪܵܒܵܐ ܡܲܚܘܼܒܹܐ ܝ݇ܘܸܢ ܕܫܵܡܥܸܢ ܒܘܼܬ ܕܝܼܹܗ. ܘܐ݇ܡܸܪܹܗ ܩܵܐ ܕܗ̇ܘ ܬܲܠܡܝܼܕܵܐ: ܩܵܡܘܼܕܝܼ ܠܵܐ ܡܘܼܨܝܸܬܠܘܼܟܼ ܠܪܵܒܝܼܘܼܟܼ؟ ܕܦܸܫܠܵܗ̇ ܫܩܝܼܠܬܵܐ ܡܸܢܘܼܟܼ ܐܵܗܵܐ ܚܲܠܥܲܬ ܓܘܼܪܬܵܐ ܕܚܲܕ݇ ܗܲܕܟܼܵܐ ܩܲܡ ܫܵܓܼܫܵܐ ܠܘܼܟܼ ܘܚܵܒܼܛܵܐ ܠܘܼܟܼ. ܐܵܕܝܼܵܐ ܩܘܼܡ݇ ܕܐܘܼܪ ܠܟܸܣ ܒܵܒܘܼܟܼ ܘܡܲܨܝܸܬ̇ ܐܸܠܹܗ. ܘܗܵܘܸܬ̇ ܒܝܼܕܵܥܵܐ ܕܗ̇ܘ ܕܠܵܐ ܡܲܨܝܸܬ ܠܐܲܒܵܐ ܒܗܝܼܫܘܿܥ: ܠܡܫܝܼܚܵܐ ܠܹܐ ܝ݇ܠܹܗ ܡܲܨܝܘܼܬܹܐ. ܘܕܐܸܪܹܗ ܗ̇ܘ ܬܲܠܡܝܼܕܵܐ ܠܟܸܣ ܒܵܒܵܐ ܩܲܕܝܼܫܵܐ ܒܗܝܼܫܘܿܥ ܘܗܘܼܩܹܐܠܹܗ ܩܵܬܹܗ ܟܠ ܡܸܢܕܝܼ ܕܬܘܼܢܹܐ ܠܹܗ ܢܒܼܝܼܵܐ ܕܐܲܠܵܗܵܐ. ܘܝ݇ܬܝܼܒܼܠܹܗ ܥܲܡ ܒܵܒܹܗ.
ܡ̣ܢ ܒܵܬ݇ܪ ܝܵܘܡܵܢܹ̈ܐ ܡܸܢܕܪܹܫ݇ ܦܸܫܠܵܗ̇ ܡܘܼܥܝܸܩܬܵܐ ܓܵܢܹܗ ܒܘܼܬ ܕܗ̇ܝ ܛܲܝܒܘܼܬܵܐ ܕܬܘܼܠܩܵܐ ܠܹܗ: ܘܕܵܝܸܡ ܒܵܟܼܹܐ ܗ݇ܘܵܐ ܘܐܵܡܸܪ: ܘܵܐܝ ܐܸܠܝܼ ܕܒܸܬ ܡܵܝܬܸܢ ܒܐܵܗܵܐ ܬܲܚܡܲܢܬܵܐ ܕܓܵܘ ܠܸܒܝܼ. ܕܠܵܐ ܦܸܫܠܝܼ ܡܘܼܚܫܸܚܵܐ ܠܒܘܼܪܟܬܵܐ ܕܚܲܠܵܠܬܵܐ ܕܐܲܩܠܵܬܹ̈ܐ ܕܡܫܝܼܚܵܐ! ܐܝܼܢܵܐ ܒܵܒܵܐ ܩܲܕܝܼܫܵܐ ܒܗܝܼܫܘܿܥ: ܝܵܗ݇ܒܼܸܠ ܗ݇ܘܵܐ ܠܹܗ ܠܸܒܵܐ ܘܐܵܡܸܪ: ܐܵܕܝܼܵܐ ܕܡܲܚܙܘܼܝܹܐ ܝ݇ܘܸܬ̇ ܦܵܫܲܡܬܘܼܟܼ ܒܬܝܵܒܼܘܼܬܵܐ: ܐܲܠܵܗܵܐ ܥܒܼܸܕܠܹܗ ܪ̈ܲܚܡܹܐ ܥܲܡܘܼܟܼ ܘܦܘܼܚܸܠܹܗ ܠܓܢܵܗܘܼܟܼ.
ܐܝܼܢܵܐ ܗܸܟ̰ ܠܹܐ ܗ݇ܘܵܐ ܒܸܗܘܵܝܵܐ ܪܵܗܲܬ ܒܐܲܢܹܐ ܚܲܒܪܹ̈ܐ. ܛܠܸܒܠܹܗ ܕܫܵܕܸܪܹܗ ܚܕܵܐ ܓܵܗܵܐ ܐ݇ܚܹܪ݇ܬܵܐ ܠܟܸܣ ܕܗ̇ܘ ܣܵܒܼܵܐ ܩܲܕܝܼܫܵܐ: ܕܝܵܗ݇ܒܼܸܠܹܗ ܠܸܒܵܐ ܒܘܼܬ ܚܲܫܹܗ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܒܵܒܵܐ ܒܗܝܼܫܘܿܥ: ܗ̇ܘ ܢܒܼܝܼܵܐ ܣܵܒܼܵܐ ܕܪ݇ܚܝܼܫܵܐ ܝ݇ܘܸܬ̇ ܗ݇ܘܵܐ ܠܟܸܣܠܹܗ: ܡܘܼܢܝܸܚܵܐ ܝ݇ܠܹܗ: ܐܝܼܢܵܐ ܙܹܠ݇ ܠܓܹܒܵܐ ܡܲܕܢܚܵܝܵܐ ܕܡܕܝܼܢ݇ܬܵܐ ܐܲܢܛܝܼܢܘܿ: ܒܸܬ ܚܵܙܸܬ̇ ܚܕܵܐ ܩܘܼܒܵܐ ܒܵܠܵܗ̇ ܠܕܸܫܬܵܐ: ܬܲܪܥܵܗ̇ ܦܬܝܼܚܵܐ: ܥܒܼܘܿܪ ܘܒܸܬ ܚܵܙܸܬ̇ ܓܵܘܹܗ ܬܠܵܬܵܐ ܐ݇ܢܵܫܹ̈ܐ ܡܝܼܬܹ̈ܐ ܕܡܝܼܟܼܹ̈ܐ ܠܕܸܦܢܵܐ ܕܐܘܼܕܵܠܹܐ. ܐܵܗܵܐ ܩܘܼܒܵܐ ܝܼܠܵܗ̇ ܒܹܝܬ ܩܒܼܘܼܪܵܐ ܕܢܒܼܝܼܹ̈ܐ ܐܵܢܝܼ ܕܫܦܸܪܘܿܢ ܠܐܲܠܵܗܵܐ ܒܥܵܠܘܿܠܵܢܹ̈ܐ ܕܒܡܕܝܼܢܵܬܹ̈ܐ ܘܐܝܼܡܲܢ ܕܡܛܹܐܠܵܗ̇ ܥܕܵܢܵܐ ܕܟܠ ܚܲܕ݇ ܡܸܢܲܝܗܝ ܫܵܢܹܐ ܡ̣ܢ ܕܐܵܗܵܐ ܕܘܼܢܝܹܐ: ܟܹܐ ܐܵܣܸܩ ܗ݇ܘܵܐ ܠܗ̇ܝ ܕܘܼܟܬܵܐ ܘܣܵܦܹܐ ܠܵܗ̇ ܓܵܢܹܗ ܒܐܝܼܕܵܬܹ̈ܐ ܕܐܲܠܵܗܵܐ. ܒܲܣ ܥܒܼܘܿܪ ܠܬܵܡܵܐ ܘܡܲܬܸܒܼ ܐܝܼܕܘܼܟܼ ܠܕܗ̇ܘ ܕܕܡܝܼܟܼܵܐ ܝ݇ܠܹܗ ܒܒܹܦܲܠܓܵܐ ܘܒܸܬ ܩܵܐܹܡ ܘܗܲܡܙܸܡ ܥܲܡܘܼܟܼ. ܘܐ݇ܙܸܠܹܗ ܗ̇ܘ ܬܲܠܡܝܼܕܵܐ ܘܡܘܼܫ݇ܟ̰ܸܚܠܹܗ ܠܟܠ ܡܸܢܕܝܼ ܐܲܝܟܼ ܕܦܝܼܫܵܐ ܗ݇ܘܵܐ ܦܩܝܼܕܵܐ ܡܘܼܬܸܒܼܠܹܗ ܐܝܼܕܹܗ ܠܗ̇ܘ ܓܵܘܵܝܵܐ ܘܐ݇ܡܸܪܹܗ ܐܸܠܹܗ: ܩܲܕܝܼܫܵܐ ܐܲܒܵܐ ܒܗܝܼܫܘܿܥ ܒܹܐܡܵܪܵܐ ܝ݇ܠܹܗ ܐܲܠܘܼܟܼ ܩܘܼܡ݇ ܕܗܲܡܙܸܡܸܢ ܥܲܡܘܼܟܼ. ܘܗܲܪ ܒܗ̇ܝ ܥܕܵܢܵܐ ܩܸܡܠܹܗ ܗ̇ܘ ܡܝܼܬܵܐ: ܘܐ݇ܡܸܪܹܗ ܩܵܐ ܬܲܠܡܝܼܕܵܐ: ܡ̣ܢ ܩܵܕ݇ܡܵܝܬܵܐ ܠܵܐ ܐ݇ܡܸܪܝܼ ܐܸܠܘܼܟܼ ܡܲܨܝܸܬܸܬ̇ ܠܪܵܒܝܼܘܼܟܼ؟ ܩܵܡܘܼܕܝܼ ܗ݇ܘܹܐܠܘܼܟܼ ܒܵܨܘܿܪܵܐ ܕܗܲܝܡܵܢܘܼܬܵܐ؟ ܘܐܸܢ ܐܝܼܬܠܘܼܟܼ ܗܲܝܡܵܢܘܼܬܵܐ: ܗܵܐ ܩܲܡ ܡܲܕܥܸܢܘܼܟܼ: ܟܠ ܡܸܢܕܝܼ ܕܚܲܕ݇ ܐ݇ܢܵܫܵܐ ܩܵܒܸܠ ܡ̣ܢ ܒܵܒܵܐ ܒܗܝܼܫܘܿܥ: ܡ̣ܢ ܡܫܝܼܚܵܐ ܩܵܒܘܼܠܹܗ ܝ݇ܠܹܗ. ܘܡ̇ܢ ܕܠܵܐ ܡܲܨܝܸܬ ܠܗ̇ܘ ܩܲܕܝܼܫܵܐ: ܐܘܼܦ ܠܡܫܝܼܚܵܐ ܒܪܘܼܢܹܗ ܕܐܲܠܵܗܵܐ ܠܹܐ ܝ݇ܠܹܗ ܡܲܨܝܘܼܬܹܐ. ܩܘܼܡ݇ ܙܹܠ݇ ܠܟܸܣܠܹܗ: ܘܡܲܨܝܸܬ̇ ܠܟܠ ܡܸܢܕܝܼ ܕܦܵܩܸܕܠܘܼܟܼ. ܣܵܒܵܒ ܗ̇ܘ ܝܼܠܹܗ ܕܦܲܪܦܸܠ ܒܘܼܬ ܕܝܼܘܼܟܼ ܠܟܸܣ ܡܵܪܝܵܐ. ܐܲܢܹܐ ܬܘܼܢܹܐ ܠܹܗ ܢܒܼܝܼܵܐ: ܘܕܡܸܟܼܠܹܗ ܠܕܘܼܟܬܹܗ. ܘܗ̇ܘ ܬܲܠܡܝܼܕܵܐ ܕܐܸܪܹܗ ܠܟܸܣ ܒܵܒܲܢ ܒܗܝܼܫܘܿܥ: ܘܗܘܼܩܹܐܠܹܗ ܟܠ ܡܸܢܕܝܼ ܕܐ݇ܡܝܼܪܵܐ ܗ݇ܘܵܐ ܗ̇ܘ ܢܒܼܝܼܵܐ ܟܲܕ ܥܵܓ̰ܘܼܒܹܐ ܒܡܸܢܕܝܼ ܕܚܙܹܐܠܹܗ ܘܫܡܸܥܠܹܗ. ܘܗ݇ܘܹܐܠܹܗ ܒܸܪܓܵܕܵܐ ܘܪܲܬܪܘܼܬܹܐ ܡ̣ܢ ܗܹܡܸܙܡܵܢ ܕܬܵܢܹܐ ܗ݇ܘܵܐ ܒܵܒܵܐ ܒܗܝܼܫܘܿܥ: ܘܡܲܨܝܸܬ ܗ݇ܘܵܐ ܥܲܠܹܗ ܟܠܲܝܗܝ ܝܵܘܡܵܢܹ̈ܐ ܕܚܲܝ̈ܘܼܗܝ. ܠܵܐ ܗܵܘܝܵܐ ܕܚܲܕ݇ ܐ݇ܢܵܫܵܐ ܒܵܨܘܿܪܵܐ ܕܗܲܝܡܵܢܘܼܬܵܐ ܕܠܵܐ ܗܲܡܸܢ ܒܐܢܹܐ: ܘܥܵܒܼܸܕܠܗ݇ܘܿܢ ܕܘܼܓܠܵܢܹ̈ܐ. ܣܵܒܲܒ ܡܵܪܲܢ ܒܦܘܼܡܵܐ ܕܓܵܢܹܗ ܐ݇ܡܸܪܹܗ "ܟܠ ܡܵܢܝܼ ܕܗܲܡܸܢ ܒܝܼܝܼ: ܦܘܼܠܚܵܢܹ̈ܐ ܕܐܵܢܵܐ ܒܸܥܒܼܵܕܵܐ ܝ݇ܘܸܢ: ܐܘܼܦ ܗܵܘ ܒܸܬ ܥܵܒܼܸܕ."
ܬܪܹܝ ܐܲܚܘܼܢܘܵܬܹ̈ܐ ܕܲܝܪ̈ܵܝܹܐ ܫܡܸܥܠܗ݇ܘܿܢ ܒܘܼܬ ܚܲܝܹ̈ܐ ܕܒܵܒܲܢ. ܩܸܡܠܗ݇ܘܿܢ ܐ݇ܙܸܠܗ݇ܘܿܢ ܠܟܸܣܠܹܗ: ܛܠܸܒܠܗ݇ܘܿܢ ܡܸܢܹܗ ܘܐ݇ܡܸܪܗ݇ܘܿܢ: ܥܒܼܘܿܕ ܥܲܡܲܢ ܚܘܼܒܵܐ ܝܵܐ ܒܵܒܲܢ: ܩܵܒܸܠܲܢ ܕܗܵܘܲܚ ܬܚܘܿܬ ܫܟܘܼܪܹ̈ܐ ܕܨܠܵܘܵܬ̈ܘܼܟܼ: ܘܡܵܠܸܦܠܲܢ ܕܵܐܟܼܝܼ ܡܵܨܲܚ ܩܵܢܲܚ ܠܗ݇ܘܿܢ ܓܵܢ̈ܵܬܲܢ. ܩܘܼܒܠܲܝ ܠܹܗ ܒܚܲܕܘܼܬܵܐ: ܣܵܒܲܒ ܐܝܼܬ ܗ݇ܘܵܐ ܠܹܗ ܚܘܼܒܵܐ ܓܘܼܪܵܐ ܕܐ݇ܢܵܫܘܼܬܵܐ ܘܥܘܼܪܩܸܠܗ݇ܘܿܢ ܠܟܸܣܠܹܗ ܩܵܐ ܪܵܒܵܐ ܝܵܘܡܵܢܹ̈ܐ. ܘܡܵܠܸܦ ܗ݇ܘܵܐܠܗ݇ܘܿܢ ܕܕܵܐܟܼܝܼ ܥܵܒܼܕܝܼ ܪܵܐܙܝܼ ܠܐܲܠܵܗܵܐ. ܘܡ̣ܢ ܒܵܬ݇ܪ ܗܵܕܵܐ: ܒܵܒܲܢ ܒܥܹܐܠܹܗ ܕܪܵܚܸܩ ܡ̣ܢ ܒܢܲܝ̈ܢܵܫܵܐ ܘܗܵܘܹܐ ܒܢܲܦ̮ܫܹܗ ܕܬܲܡܸܡ ܚܸܠܡܲܬ ܕܐܲܠܵܗܵܐ ܒܫܸܠܝܘܼܬܵܐ ܘܪܵܗܲܬܘܼܬܵܐ: ܘܦܵܐܹܫ ܡܘܼܙܝܸܕܵܐ ܒܕܘܼܒܵܪܹ̈ܐ ܛܵܒܼܹ̈ܐ: ܘܐ݇ܡܸܪܹܗ ܠܐܵܢܝܼ ܬܪܹܝ ܐܲܚܘܼܢܘܵܬܹ̈ܐ ܩܘܼܡܘܼܢ ܙܹܐܠ݇ܡܘܿܢ ܥܒܼܘܿܪܘܿܢ ܠܐܵܗܵܐ ܒܲܪܝܼܵܐ: ܘܗܘܹܐܡܘܿܢ ܫܸܠܝܹ̈ܐ ܘܒܠܘܼܓܘܿܢ ܒܨܠܘܿܬܵܐ: ܘܒܩܪܵܝܬܵܐ ܕܟܬܵܒܼܹ̈ܐ ܩܲܕܝܼܫܹ̈ܐ. ܬܲܠܡܝܼܕܹ̈ܐ ܐ݇ܡܸܪܘܿܢ ܐܸܠܹܗ: ܠܟܸܣ ܡܵܢܝܼ ܐܵܙܲܠ݇ܚ ܝܵܐ ܒܵܒܵܐ: ܗܹܡܸܙܡܵܢܹ̈ܐ ܕܚܲܝܹ̈ܐ ܐܲܝܟܵܐ ܡܵܨܲܚ ܡܵܫ݇ܟ̰ܚܲܚ: ܝܵܐ ܩܲܕܝܼܫܹܗ ܕܐܲܠܵܗܵܐ؟ ܐ݇ܡܸܪܹܗ ܐܸܠܲܝܗܝ: ܙܹܐܠ݇ܡܘܿܢ ܐܲܝܟܼ ܕܬܘܼܢܹܐܠܝܼ: ܣܵܒܲܒ ܕܲܝܪܵܝܵܐ ܠܹܐ ܡܵܨܹܐ ܡܲܢܬܹܐ: ܐܸܠܵܐ ܐܸܢ ܒܫܸܠܝܘܼܬܵܐ. ܐܵܡܪܝܼ ܐܸܠܹܗ: ܒܲܣ ܡܲܚܙܝܼܠܲܢ ܐܘܼܪܚܵܐ ܠܐܲܝܟܵܐ ܐܵܙܲܠ݇ܚ؟ ܐܵܡܸܪ ܐܸܠܲܝܗܝ ܪ݇ܚܘܿܫܘܿܢ ܠܒܲܪܝܼܵܐ ܕܕܵܩܘܼ. ܘܐ݇ܙܸܠܗ݇ܘܿܢ ܫܪܹܐܠܗ݇ܘܿܢ ܬܵܡܵܐ.
ܒܚܲܕ݇ ܡ̣ܢ ܝܵܘܡܵܢܹ̈ܐ ܐ݇ܬܹܐܠܗ݇ܘܿܢ ܫܵܠܚܵܢܹ̈ܐ ܕܐ݇ܢܵܫܹ̈ܐ: ܥܒܼܸܪܗ݇ܘܿܢ ܠܩܸܠܵܝܬܵܐ ܕܚܲܕ݇ ܡ̣ܢ ܐܲܚܘܼܢܘܵܬܹ̈ܐ ܘܫܩܸܠܗ݇ܘܿܢ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ. ܐܝܼܢܵܐ ܐܝܼܬ ܗ݇ܘܵܐ ܓܵܘ ܕܗ̇ܘ ܒܲܪܝܼܵܐ ܚܲܕ݇ ܣܵܒܼܵܐ ܕܦܵܐܸܫ ܗ݇ܘܵܐ ܡܘܼܚܠܸܛܵܐ ܒܣܵܛܵܢܵܐ ܡܵܠܸܦ ܗ݇ܘܵܘ ܠܹܗ ܕܡܲܕܸܥ ܩܵܐ ܐ݇ܢܵܫܹ̈ܐ ܡܸܢܕܝܼܵܢܹ̈ܐ ܬܠܝܼܩܹ̈ܐ ܐܲܝܟܵܐ ܝ݇ܢܵܐ. ܘܐܵܡܸܪ ܗ݇ܘܵܐ ܡܲܠܲܐܟܼܹ̈ܐ ܟܹܐ ܡܲܕܥܝܼ ܠܝܼ. ܘܩܸܡܠܹܗ ܪܹܫܵܐ ܕܕܲܝܪܵܐ ܘܐ݇ܬܹܐܠܹܗ ܠܟܸܣ ܕܐܵܗܵܐ ܣܵܒܼܵܐ: ܘܒܘܼܩܸܪܹܗ ܡܸܢܹܗ ܘܐ݇ܡܸܪܹܗ: ܝܵܐ ܒܵܒܵܐ: ܡܲܕܥܝܼ ܠܝܼ ܡܵܢܝܼ ܣܠܸܒܠܹܗ ܠܩܸܠܵܝܬܵܐ ܕܐܵܗܵܐ ܐܲܚܘܼܢܵܐ؟ ܐ݇ܡܸܪܹܗ ܐܸܠܹܗ ܗ̇ܘ ܣܵܒܼܵܐ ܚܠܝܼܛܵܐ. ܐܲܢܹܐ ܬܪܹܝ ܐܲܚܘܼܢܘܵܬܹ̈ܐ: ܕܒܐܲܢܹܐ ܝܵܘܡܵܢܹ̈ܐ ܐ݇ܬܹܐܠܗ݇ܘܿܢ ܫܪܹܐܠܗ݇ܘܿܢ ܓܵܘ ܕܐܵܗܵܐ ܒܲܪܝܼܵܐ: ܐܵܢܝܼ ܣܠܝܼܒܹ̈ܐ ܝ݇ܢܵܐ ܠܐܵܗܵܐ ܕܲܝܪܵܝܵܐ. ܘܐܵܗܵܐ ܡܘܼܣܒܸܛܵܐ ܠܗ݇ܘܿܢ ܟܠܲܝܗܝ ܐܲܚܘܼܢܘܵܬܹ̈ܐ: ܩܸܡܠܗ݇ܘܿܢ ܟܠܲܝܗܝ ܐܲܚܘܼܢܘܵܬܹ̈ܐ ܥܲܡ ܪܹܫܵܐ ܕܕܲܝܪܵܐ: ܕܒܼܸܩܠܗ݇ܘܿܢ ܠܐܵܢܝܼ ܬܪܹܝ ܐܲܚܘܼܢܘܵܬܹ̈ܐ ܩܲܪ̈ܝܼܒܵܝܹܐ ܐܲܝܟܼ ܓܹܢܵܒܼܹ̈ܐ ܘܓ̰ܵܠܵܠܝܼܹ̈ܐ. ܐܝܼܢܵܐ ܒܵܒܲܢ ܪܘܼܚܵܢܵܝܵܐ ܘܢܒܼܝܼܵܐ ܕܡܵܪܝܵܐ: ܐܲܒܵܐ ܒܝܼܫܘܿܥ: ܝ݇ܕܸܥܠܹܗ ܒܪܘܼܚܵܐ: ܘܦܘܼܪܡܹܐܠܵܗ̇ ܠܓ̰ܘܼܪܵܒܵܐ ܕܩܘܼܘܸܡܠܹܗ ܠܬܪܹܝ ܐܲܚܘܼܢܘܵܬܹ̈ܐ ܩܸܡܠܹܗ ܒܡܲܠܝܵܙܬܵܐ ܘܐ݇ܙܸܠܹܗ ܘܡܛܹܐܠܹܗ ܠܬܲܝܡܢܵܐ ܕܕܵܩܘܿ ܘܡܘܼ݇ܟ̰ܸܚܠܹܗ ܠܐܵܢܝܼ ܬܪܹܝ ܐܲܚܘܼܢܘܵܬܹ̈ܐ ܓܵܘ ܒܹܝܬ ܐܲܣܝܼܪܹ̈ܐ ܘܐ݇ܡܸܪܹܗ ܠܪܹܫܵܐ ܕܕܲܝܪܵܐ: ܐܲܢܹܐ ܐ݇ܢܵܫܹ̈ܐ ܕܕܒܼܝܼܩܹܐ ܝ݇ܬܘܿܢ: ܠܹܐ ܝ݇ܢܵܐ ܫܵܠܚܵܢܹ̈ܐ ܕܐ݇ܢܵܫܹ̈ܐ. ܐ݇ܡܸܪܹܗ ܪܹܫܵܐ ܕܕܲܝܪܵܐ: ܚܲܕ݇ ܐ݇ܢܵܫܵܐ ܣܵܒܼܵܐ ܩܲܡ ܡܲܕܸܥܠܲܢ ܕܐܲܢܹܐ ܝ݇ܢܵܐ ܓܹܢܵܒܼܹ̈ܐ.
ܐ݇ܡܸܪܹܗ ܒܵܒܲܢ: ܓ̰ܲܡܥܝܼ ܠܗ݇ܘܿܢ ܠܐܲܟܼܵܐ ܟܠܲܝܗܝ ܐܲܚܘܼܢܘܵܬܹ̈ܐ. ܗ̇ܝܓܵܗ ܦܸܫܠܗ݇ܘܿܢ ܓ̰ܘܼܡܸܥܝܹܐ ܘܐܘܼܦ ܗ̇ܘ ܣܵܒܼܵܐ ܥܲܡܲܝܗܝ. ܘܟܲܕ ܚܙܹܐܠܗ݇ܘܿܢ ܠܒܵܒܲܢ ܣܓܼܸܕܠܗ݇ܘܿܢ ܐܸܠܹܗ ܟܠܲܝܗܝ. ܘܫܩܸܠܗ݇ܘܿܢ ܒܘܼܪ̈ܟܵܬܹܐ ܡܸܢܹܗ. ܗ̇ܝܓܵܗ ܐ݇ܡܸܪܹܗ ܐܸܠܲܝܗܝ ܩܲܕܝܼܫܵܐ: ܡܘܼܕܝ݇ ܒܝܼܫܬܵܐ ܥܒܼܝܼܕܹ̈ܐ ܝ݇ܢܵܐ ܐܸܠܵܘܟܼܘܿܢ ܐܲܢܹܐ ܐܲܚܘܼܢܘܵܬܹ̈ܐ ܩܲܪ̈ܝܼܒܵܝܹܐ ܕܕܒܼܝܼܩܲܝܬܘܿܢ؟ ܐ݇ܡܸܪܹܗ ܐܸܠܹܗ ܗ̇ܘ ܣܵܒܼܵܐ: ܡ̣ܢ ܣܵܒܲܒ ܕܣܠܸܒܠܗ݇ܘܿܢ ܠܚܲܕ݇ ܡ̣ܢ ܐܲܚܘܼܢܘܵܬܹ̈ܐ. ܬܘܼܢܸܚܠܹܗ ܒܵܒܲܢ ܘܐ݇ܡܸܪܹܗ ܩܵܐ ܣܵܒܼܵܐ ܥܒܼܘܿܕ ܚܘܼܒܵܐ ܘܡܵܘܕܝܼ: ܕܦܸܫܠܘܼܟܼ ܡܘܼܚܠܸܛܵܐ ܒܐܲܢܹܐ ܓܸܠܝܵܢܹ̈ܐ. ܐܵܡܸܪ ܐܸܠܹܗ ܣܵܒܼܵܐ: ܐܵܢܵܐ ܠܹܐ ܝ݇ܘܸܢ ܦܝܼܫܵܐ ܡܘܼܚܠܸܛܵܐ: ܐܝܼܢܵܐ ܫܪܵܪܵܐ ܝ݇ܘܸܢ ܬܵܢܘܼܝܹܐ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ ܒܵܒܵܐ ܒܗܝܼܫܘܿܥ: ܥܒܼܘܿܕ ܚܘܼܒܵܐ ܘܡܵܘܕܝܼ: ܕܓ̰ܵܪܘܼܒܹܐ ܦܸܫܠܘܼܟܼ ܓ̰ܘܼܪܒܵܐ ܕܡܲܠܦܸܬ̇ ܣܲܪܵܣܬܘܼܬܵܐ. ܐܝܼܢܵܐ ܐܲܚܘܼܢܘܵܬܹ̈ܐ ܟܹܐ ܝܵܕܥܝܼ ܗ݇ܘܵܘ ܕܒܵܒܵܐ ܒܗܝܼܫܘܿܥ ܢܒܼܝܼܵܐ ܗ݇ܘܵܐ ܕܣܲܪܵܣܬܘܼܬܵܐ ܘܚܲܕ݇ ܐ݇ܢܵܫܵܐ ܪܘܼܚܵܢܵܝܵܐ ܝ݇ܠܹܗ: ܡܘܼܢܟܼܸܣܠܗ݇ܘܿܢ ܠܗ̇ܘ ܣܵܒܼܵܐ. ܘܠܸܒܹܗ ܡܚܹܐܠܹܗ ܩܵܐ ܕܐܵܡܸܪ. ܡܲܚܠܘܼܛܹܐ ܩܲܡ ܡܲܚܠܸܛܝܼ ܠܝܼ ܕܲܝܘܹ̈ܐ. ܘܟܲܕ ܐ݇ܡܸܪܹܗ ܐܵܗܵܐ: ܦܠܸܛܠܵܗ̇ ܡܸܢܹܗ ܪܘܼܚܵܐ ܕܣܵܛܵܢܵܐ ܒܕܘܼܡܝܵܐ ܕܚܕܵܐ ܚܙܘܼܪܬܵܐ ܘܢܝܼ̈ܒܼܘܿܗ̇ ܦܠܝܼܛܹ̈ܐ ܡ̣ܢ ܦܘܼܡܵܗ̇: ܘܒܥܹܐܠܵܗ̇ ܕܪܵܦܝܵܐ ܓܵܢܵܗ̇ ܥܲܠ ܣܵܒܼܵܐ ܘܟ̰ܵܠܦܵܐ ܠܹܗ: ܘܢܓ̰ܸܘܠܹܗ ܒܝܼܵܗ̇ ܒܵܒܲܢ ܩܲܕܝܼܫܵܐ: ܘܒܗ̇ܘ ܕܲܩܝܼܩܵܐ ܬܠܸܩܠܵܗ̇ ܡܩܵܕ݇ܡ ܥܲܝܢܵܐ. ܘܐܲܚܘܼܢܘܵܬܹ̈ܐ ܐܝܼܡܲܢ ܕܚܙܹܐܠܗ݇ܘܿܢ ܐܲܢܹܐ ܒܪܸܟܠܗ݇ܘܿܢ ܘܣܓܼܸܕܠܗ݇ܘܿܢ ܩܵܕ݇ܡ ܒܵܒܲܢ ܘܐ݇ܡܸܪܗ݇ܘܿܢ ܒܫܪܵܪܵܐ ܐܲܠܵܗܵܐ ܒܸܥܡܵܪܵܐ ܝ݇ܠܹܗ ܒܝܼܘܼܟܼ.
ܗ̇ܝܓܵܗ ܥܒܼܸܕܠܗ݇ܘܿܢ ܐܵܙܲܕ ܠܐܵܢܝܼ ܬܪܹܝ ܐܲܚܘܼܢܘܵܬܹ̈ܐ: ܕܦܝܼܫܹܐ ܗ݇ܘܵܘ ܕܒܼܝܼܩܹ̈ܐ. ܘܒܗ̇ܝ ܪܘܼܚܵܐ ܕܐܝܼܬ ܗ݇ܘܵܐ ܠܹܗ ܒܵܒܲܢ ܒܗܝܼܫܘܿܥ ܐ݇ܡܸܪܹܗ ܩܵܐ ܪܹܫܵܐ ܕܕܲܝܪܵܐ. ܙܹܠ݇ ܠܦܸܠܵܢ ܕܘܼܟܬܵܐ ܘܒܸܬ ܡܵܫ݇ܟ̰ܚܸܬ̇ ܠܡܸܢܕܝܼ ܕܦܝܵܫܵܐ ܗ݇ܘܵܐ ܓܢܝܼܒܼܵܐ ܡ̣ܢ ܐܲܚܘܼܢܵܐ. ܘܠܵܐ ܡܘܼܕܸܥܠܹܗ ܕܡܵܢܝܼ ܗ݇ܘܵܐ ܓܹܢܵܒܼܵܐ: ܘܦܘܼܩܸܠܹܗ ܕܠܵܐ ܡܲܕܸܥ ܩܵܐ ܐ݇ܢܵܫܹ̈ܐ ܠܕܘܼܟܬܵܐ ܕܡܸܢܕܝܼ ܓܢܝܼܒܼܵܐ. ܣܵܒܲܒ ܒܸܙܕܵܥܝܵܐ ܗ݇ܘܵܐ ܡ̣ܢ ܚܸܩܪܵܐ ܒܵܛܝܼܠܵܐ. ܘܪܹܫܵܐ ܕܕܲܝܪܵܐ ܥܒܼܸܕܠܹܗ ܐܲܝܟܼ ܕܦܸܫܠܹܗ ܦܘܼܩܕܵܐ. ܘܟܠܲܝܗܝ ܡܐܘܼܕܵܠܹܐ ܫܘܼܒܸܚܠܘܿܢ ܠܐܲܠܵܗܵܐ ܕܒܸܥܡܵܪܵܐ ܝ݇ܠܹܗ ܒܩܲܕܝܼܫܹ̈ܐ.
ܪܵܒܵܐ ܚܲܝܠܵܢܵܐ ܗ݇ܘܵܐ ܒܵܒܲܢ ܒܦܘܼܠܚܵܢܹܗ ܘܛܵܒܼܵܐ ܗ݇ܘܵܐ ܒܕܘܼܒܵܪܹ̈ܐ ܘܚܵܡܠܵܢܵܐ ܗ݇ܘܵܐ ܒܥܕܵܢܵܐ ܕܟܲܪܒܵܐ. ܘܚܲܕ݇ ܐ݇ܢܵܫܵܐ ܕܫܠܵܡܵܐ ܗ݇ܘܵܐ. ܐ݇ܬܹܐܠܹܗ ܠܟܸܣܠܹܗ ܚܲܕ݇ ܐܲܚܘܼܢܵܐ ܕܐܝܼܬ ܗ݇ܘܵܐ ܥܲܡܹܗ ܚܲܕ݇ ܝܵܠܵܕ݇ܐ ܙܥܘܿܪܵܐ. ܘܚܲܕ݇ܟܡܵܐ ܝܵܘܡܵܢܹ̈ܐ ܗ݇ܘܹܐܠܹܗ ܠܟܸܣ ܣܵܒܼܵܐ. ܘܝܵܠܵܕ݇ܐ ܟܹܐ ܚܵܕܸܪ ܗ݇ܘܵܐ ܠܐܲܟܼܵܐ ܘܬܵܡܵܐ: ܘܡܲܟܦܸܪ ܗ݇ܘܵܐ ܩܵܐ ܐܲܚܘܼܢܘܵܬܹ̈ܐ ܘܐܵܢܝܼ ܛܠܸܒܠܗ݇ܘܿܢ ܡ̣ܢ ܒܵܒܲܢ ܘܐ݇ܡܸܪܗ݇ܘܿܢ ܐܸܠܹܗ: ܡܲܢܟܼܸܣܠܹܗ ܐܵܗܵܐ ܐܲܚܘܼܢܵܐ ܕܒܸܗܘܵܝܵܐ ܝ݇ܠܹܗ ܥܸܠܬܵܐ ܕܟܦܘܼܪܝܵܐ ܩܵܬܲܢ: ܐܲܚܘܼܢܘܵܬܹ̈ܐ ܚܫܸܒܼܠܗ݇ܘܿܢ ܒܸܬ ܡܵܚܹܐܠܹܗ ܘܡܵܠܸܦܠܹܗ ܪܹܐܙܵܐ: ܐܝܼܢܵܐ ܒܵܒܲܢ ܠܵܐ ܥܒܼܸܕܠܹܗ ܩܵܬܹܗ ܠܵܐ ܚܸܪܒܵܐ ܘܠܵܐ ܨܦܵܝܝܼ. ܘܡܸܢ݇ܕܪܹܫ݇ ܐ݇ܡܸܪܗ݇ܘܿܢ ܐܸܠܹܗ ܐܲܚܘܼܢܘܵܬܹ̈ܐ: ܡܚܝܼܠܹܗ ܐܵܗܵܐ ܝܵܠܵܕ݇ܐ ܘܬܲܥܠܸܡܠܹܗ: ܕܠܵܐ ܡܲܟܦܸܪܲܢ. ܐ݇ܡܸܪܹܗ ܩܵܬܲܝܗܝ ܐܵܗܵܐ ܠܹܐ ܝ݇ܠܹܗ ܫܘܼܠܵܐ ܕܝܼܝܼ ܕܬܲܥܠܡܸܢܹܗ ܝܵܐ ܒܢܘܼܢ̈ܝܼ. ܘܐ݇ܙܸܠܹܗ ܚܲܕ݇ ܡ̣ܢ ܐܲܚܘܼܢܘܵܬܹ̈ܐ ܕܡܵܚܹܐܠܹܗ: ܠܵܐ ܫܒܼܸܩܠܹܗ ܣܵܒܼܵܐ: ܘܐ݇ܡܸܪܹܗ ܐܸܠܲܝܗܝ: ܐܵܢܵܐ ܒܸܚܫܵܒܼܵܐ ܝ݇ܘܸܢ ܕܒܸܬ ܡܬܲܠܩܸܢ ܟܠ ܡܸܢܕܝܼ ܕܦܠܝܼܚܵܐ ܝ݇ܘܸܢ ܒܟܠܹܗ ܡܸܬܚܵܐ ܕܚܲܝ̈ܝܼ ܕܗܲܠ ܐܵܕܝܼܵܐ. ܐܵܡܪܝܼ ܐܸܠܹܗ: ܡܘܼܕܝܼ ܒܸܬ ܡܬܲܠܩܸܬ̇ ܐܵܡܸܪ ܐܸܠܲܝܗܝ ܚܡܵܠܬܵܐ ܕܲܪܩܘܼܒܼܠ ܕܟܲܪܒܵܐ. ܣܵܒܲܒ ܐܸܢ ܗܲܡܙܸܡܸܢ ܒܟܲܪܒܵܐ ܥܲܡ ܕܐܵܗܵܐ ܝܵܠܵܕ݇ܐ ܗܵܩܵܐ ܕܟܠܹܗ ܦܘܼܠܚܵܢܝܼ ܒܸܬ ܬܵܠܸܩ. ܒܲܣ ܡܘܼܕܝܼ ܒܸܬ ܩܵܢܸܢ: ܐܸܢ ܒܡܲܢܟܼܵܣܬܵܐ ܕܐ݇ܚܹܪ̈݇ܢܹܐ ܬܵܠܩܸܢ ܠܡܸܢܕܝܼ ܕܐܝܼܬܠܝܼ؟
ܗܲܕܟܼܵܐ ܡܘܼܠܸܦܠܹܗ ܩܵܬܲܢ ܕܠܵܐ ܡܲܢܟܼܸܣܲܚ ܠܬܲܠܡܝܼܕܵܐ ܕܠܹܐ ܝ݇ܠܹܗ ܕܝܼܲܢ: ܘܐܘܼܦ ܠܵܐ ܟܵܪܒܲܚ ܥܲܠܹܗ ܐܝܼܡܲܢ ܕܒܸܥܒܼܵܕܵܐ ܝ݇ܠܹܗ ܓܢܵܗܵܐ ܒܬܲܠܡܝܼܕܹ̈ܐ ܕܝܼܲܢ. ܟܬܵܒܼܵܐ ܒܹܐܡܵܪܵܐ ܝ݇ܠܹܗ: "ܬܲܥܠܸܡ ܠܒܪܘܼܢܘܼܟܼ ܒܩܵܛܝܼܵܐ ܕܦܲܪܙܠܵܐ: ܘܠܹܐ ܡܵܐܸܬ: ܘܓܵܢܹܗ ܒܸܬ ܒܵܪܟܼܵܐ ܠܘܼܟܼ. ܐܝܼܢܵܐ ܐܸܢ ܠܵܐ ܬܲܥܠܡܸܬ̇ ܠܝܵܠܹ̈ܕ݇ܐ ܓܵܢܵܬܲܝ̈ܗܝ ܒܸܬ ܬܵܠܩܝܼ."
ܒܟܠ ܥܕܵܢܵܐ ܟܹܐ ܐܵܬܹܐ ܗ݇ܘܵܐ ܡܵܪܲܢ ܠܟܸܣ ܒܵܒܲܢ ܩܲܕܝܼܫܵܐ: ܘܗܲܡܙܸܡ ܗ݇ܘܵܐ ܥܲܡܹܗ ܒܘܼܬ ܒܬܘܼܠܘܼܬܹܗ ܘܕܸܟܼܝܘܼܬܹܗ: ܘܩܲܕܝܼܫܘܼܬܹܗ: ܐ݇ܡܸܪܹܗ ܐܠܹܗ ܡܵܪܝܵܐ. ܒܚܲܕ݇ ܡ̣ܢ ܝܵܘܡܵܢܹ̈ܐ ܒܸܬ ܗܵܘܹܐܠܘܼܟܼ ܕܲܝܪܵܐ ܓܵܘ ܒܲܪܝܼܵܐ ܕܐܸܣܩܹܛܹܐ ܘܒܸܬ ܓ̰ܵܡܥܝܼ ܓܵܘܹܗ ܪܵܒܵܐ ܐ݇ܢܵܫܹ̈ܐ. ܘܒܸܬ ܡܲܣܩܝܼ ܓܵܘܹܗ ܩܘܼܪ̈ܒܵܢܹܐ. ܘܫܸܡܘܼܟܼ ܒܸܬ ܗܵܘܹܐ ܥܲܠܲܝܗܝ: ܘܒܸܬ ܗܵܘܸܬ̇ ܒܵܒܵܐ ܠܒܘܼܫܵܝܘܼܬܵܐ ܕܐܲܚܘܼܢܘܵܬܹ̈ܐ. ܐ݇ܡܸܪܹܗ ܐܸܠܹܗ ܩܲܕܝܼܫܵܐ: ܫܒܼܘܿܩܠܝܼ ܡܵܪܝܼ: ܕܣܵܒܼܵܐ ܝ݇ܘܸܢ: ܠܹܐ ܡܵܨܸܢ ܕܬܲܡܸܡܸܢ ܠܐܵܗܵܐ ܚܸܠܡܲܬ. ܐܵܗܵܐ ܫܘܼܠܵܐ ܝ݇ܠܹܗ ܕܐ݇ܢܵܫܹ̈ܐ ܩܲܕܝܼܫܹ̈ܐ ܐܵܢܝܼ ܕܢܵܛܪܝܼ ܦܘܼܩܕܵܢ̈ܘܼܟܼ. ܘܐܵܢܵܐ ܚܲܛܵܝܵܐ ܝ݇ܘܸܢ ܐܝܼܢܵܐ ܡܵܪܝܵܐ ܓ̰ܘܼܡܸܥܠܹܗ ܠܟܸܣܠܹܗ ܐܲܚܘܼܢܘܵܬܹ̈ܐ ܪܵܒܵܐ. ܘܩܵܐ ܚܲܕ݇ܟܡܵܐ ܡܸܢܲܝܗܝ ܡܘܼܠܒܼܸܫܠܹܗ ܐܸܣܟܹܝܡܵܐ ܕܕܲܝܪܵܝܘܼܬܵܐ ܘܥܡܸܪܗ݇ܘܿܢ ܓܵܘ ܓܸܦܝܼܵܬܹ̈ܐ ܠܚܵܕܸܪ̈ܘܵܢܹܗ. ܟܹܐ ܡܵܠܸܦ ܗ݇ܘܵܐ ܠܗ݇ܘܿܢ ܙܕܘܼܥܬܵܐ ܕܐܲܠܵܗܵܐ ܘܩܪܵܝܬܵܐ ܕܟܬܵܒܼܹ̈ܐ ܩܲܕܝܼܫܹ̈ܐ ܘܡܲܙܡܘܿܪܹ̈ܐ ܘܟܹܐ ܬܵܢܹܐ ܗ݇ܘܵܐ ܩܵܬܲܝ: ܒܢܘܼܢ̈ܝܼ: ܦܠܘܿܚܘܿܢ ܒܐܝܼܕ̈ܵܬܵܘܟܼܘܿܢ ܩܵܐ ܕܚܲܝܝܼܬܘܿܢ. ܐܘܼܦ ܡ̣ܢ ܦܘܼܠܚܵܢܵܘܟܼܘܿܢ ܡܵܨܝܼܬܘܿܢ ܝܵܗ݇ܒܼܝܼܬܘܿܢ ܐܸܪܘܵܢܵܐ ܒܘܼܬ ܓܵܢܵܬܵܘܟܼܘܿܢ. ܐܝܼܢܵܐ ܚܲܕ݇ ܡ̣ܢ ܐܲܚܘܼܢܘܵܬܹ̈ܐ ܝ݇ܬܝܼܒܼܵܐ ܗ݇ܘܵܐ ܘܒܸܫܡܵܥܝܵܐ ܕܒܵܒܲܢ ܡܲܠܘܼܦܹܐ ܝ݇ܠܹܗ ܠܐܲܚܘܼܢܘܵܬܹ̈ܐ ܕܦܵܠܚܝܼ ܒܐܝܼܕ̈ܵܬܲܝܗܝ. ܓܵܘ ܠܸܒܹܗ ܒܹܐܡܵܪܵܐ ܗ݇ܘܵܐ: ܐܸܢ ܒܵܒܲܢ ܦܵܠܸܚ ܗ݇ܘܵܐ ܒܐܝܼܕ̈ܵܬܹܗ ܒܸܬ ܝܲܕܸܥ ܗ݇ܘܵܐ ܠܟܸܟ̰ܚܵܐ ܘܓ̰ܘܼܢܓ̰ܵܪܵܐ ܕܦܘܼܠܚܵܢܵܐ. ܘܐܝܼܡܲܢ ܕܓ̰ܵܗܝܹܐ ܗ݇ܘܵܐ: ܐ݇ܚܹܪ݇ܢܵܐ ܠܹܐ ܚܵܦܸܛ ܗ݇ܘܵܐ ܠܲܢ ܠܦܘܼܠܚܵܢܵܐ. ܒܵܒܲܢ ܝ݇ܕܸܥܠܹܗ ܒܪܘܼܚܵܐ ܘܐ݇ܡܸܪܹܗ ܐܸܠܹܗ. ܒܪܘܼܢܝܼ ܐܲܢܹܐ ܡܸܢܕܝܼܵܢܹ̈ܐ ܕܬܲܚܡܘܼܢܹܐ ܝ݇ܘܸܬ̇: ܛܲܪܛܘܼܡܹܐ ܝ݇ܘܸܬ̇ ܥܲܠܝܼ: ܕܝܑܼܘܸܢ ܚܵܦܘܼܛܹܐ ܘܡܵܠܘܼܦܹܐ ܠܐܲܚܘܼܢܘܵܬܹ̈ܐ ܒܘܼܬ ܦܘܼܠܚܵܢܵܐ ܕܐܝܼܕܵܬܹ̈ܐ: ܘܩܪܵܝܬܵܐ ܕܟܬܵܒܼܹ̈ܐ. ܘܡܲܙܡܘܿܪܹ̈ܐ: ܘܨܠܵܘܵܬܹ̈ܐ: ܘܬܸܫܡܸܫܝܵܬܹ̈ܐ. ܠܹܐ ܝ݇ܘܸܬ̇ ܒܝܼܕܵܥܵܐ ܕܩܵܕ݇ܡ ܐܲܠܵܗܵܐ ܕܒܟܠ ܥܕܵܢܵܐ ܒܹܐܟܼܵܠܵܐ ܝ݇ܘܸܢ ܚܲܡ ܒܘܼܬ ܕܝܼܵܘܟܼܘܿܢ؟ ܘܐܝܼܡܲܢ ܕܗ̇ܘ ܐܲܚܘܼܢܵܐ ܫܡܸܥܠܹܗ ܠܐܲܢܹܐ ܚܲܒܪܹ̈ܐ ܢܦܸܠܵܗ̇ ܣܟܝܼܢܬܵܐ ܡ̣ܢ ܐܝܼܕܘܼܗܝ: ܘܪܘܼܦܝܵܐ ܠܹܗ ܓܵܢܹܗ ܠܐܲܪܥܵܐ ܠܩܵܕ݇ܡ ܐܲܩܠܵܬܹ̈ܐ ܕܒܵܒܲܢ ܘܣܓܼܸܕܠܹܗ ܘܐ݇ܡܸܪܹܗ ܐܸܠܹܗ: ܦܵܚܸܠܝܼ ܝܵܐ ܒܵܒܵܐ. ܐ݇ܡܸܪܹܗ ܐܸܠܹܗ ܐܲܒܵܐ ܒܗܝܼܫܘܿܥ: ܒܪܘܼܢܝܼ ܐܵܢܵܐ ܟܹܐ ܦܵܠܚܸܢ: ܘܐܲܠܵܗܵܐ ܝܲܕܸܥ ܡ̣ܢ ܝܵܘܡܵܐ ܩܵܕ݇ܡܵܝܵܐ ܕܐ݇ܬܹܐܠܝܼ ܠܐܵܗܵܐ ܒܲܪܝܼܵܐ: ܠܹܐ ܝ݇ܘܸܢ ܡܘܼܚܦܸܠܵܐ ܡ̣ܢ ܦܘܼܠܚܵܢܵܐ ܕܠܲܝܠܹܐ ܘܝܵܘܡܵܐ ܟܲܕ ܬܘܼܡܸܡܵܐ ܠܨܠܘܿܬܝܼ: ܟܹܐ ܦܵܠܚܸܢ ܒܐܝܼܕܵܬ̈ܝܼ ܘܡܲܢܘܸܠܸܢ ܠܦܲܓܼܪܝܼ ܕܠܵܐ ܒܲܛܪܸܢ: ܘܩܵܒܸܠ ܬܲܢܒܹ̈ܐ ܓܵܘ ܓܹܗܲܢܵܐ. ܣܵܒܲܒ ܟܠ ܐ݇ܢܵܫܵܐ ܕܐܵܟܼܸܠ ܓ̰ܲܥܦܵܐ ܘܡܲܓ̰ܗܹܐ ܦܲܓܼܪܹܗ ܠܐܲܟܼܵܐ: ܘܡܲܢܘܸܠܹܗ ܒܨܵܘܡܵܐ ܘܒܨܠܘܿܬܵܐ: ܒܫܲܗܪܵܐ ܘܩܪܵܝܬܵܐ ܕܟܬܵܒܼܹ̈ܐ: ܘܦܘܼܠܚܵܢܵܐ ܕܐܝܼܕܵܬܹ̈ܐ: ܐܵܙܲܕ ܝܼܠܹܗ ܡ̣ܢ ܓܹܗܲܢܵܐ. ܘܗ̇ܘ ܕܠܐܲܟܼܵܐ ܠܵܐ ܥܲܓ̰ܸܙ ܠܦܲܓܼܪܹܗ ܒܸܬ ܚܲܠܸܢܵܐ ܥܲܠܹܗ ܙܵܢܝܘܼܬܵܐ ܘܓܼܵܠܒܵܐ ܠܹܗ: ܘܒܸܬ ܝܵܪܸܬ ܓܹܗܲܢܵܐ ܕܠܐܵܒܵܕ.
ܐܲܚܘܼܢܘܵܬܹ̈ܐ ܟܲܕ ܐܲܢܹܐ ܫܡܸܥܠܗ݇ܘܿܢ ܣܓܼܸܕܠܗ݇ܘܿܢ ܐܸܠܹܗ ܘܐ݇ܡܸܪܗ݇ܘܿܢ. ܫܒܼܘܿܩܠܲܢ ܝܵܐ ܒܵܒܵܐ: ܣܵܒܲܒ ܠܹܐ ܡܵܨܲܚ ܚܲܕ݇ ܗܲܕܟܼܵܐ ܦܵܠܚܲܚ ܓܵܢܵܐ ܕܝܼܘܼܟܼ ܚܕܝܼܬܵܐ ܝ݇ܠܵܗ̇ ܒܦܘܼܠܚܵܢܹ̈ܐ ܪ̈ܘܼܚܵܢܵܝܹܐ ܘܪܵܒܵܐ ܚܲܝܠܵܢܬܵܐ ܝ݇ܠܵܗ̇ ܒܝܼܲܝܗܝ. ܘܣܵܡܵܐ ܙܵܘܕܵܐ ܕܦܘܼܠܚܵܢܹܗ ܟܹܐ ܥܵܒܼܸܕ ܗ݇ܘܵܐ ܠܹܗ ܒܛܸܫܘܵܐ ܕܠܵܐ ܝܵܕܥܝܼ ܒܝܼܹܗ. ܐܝܼܢܵܐ ܐܵܢܝܼ ܕܦܸܫܠܗ݇ܘܿܢ ܝܼ݇ܕܝܼܥܹ̈ܐ ܡ̣ܢ ܦܘܼܠܚܵܢ̈ܘܼܗܝ: ܕܒܸܬ ܗܵܘܹܐ ܕܟܼܵܪܲܝܗܝ ܠܐܵܒܵܕ. ܪܵܒܵܐ ܒܵܨܘܼܪܹ̈ܐ ܝ݇ܢܵܐ ܐܵܢܝܼ: ܕܡܛܹܐܠܗ݇ܘܿܢ ܥܲܠܲܝܗܝ ܐܸܣܩܹܛܵܝܹ̈ܐ: ܝܵܥܢܹܐ ܕܲܝܪ̈ܵܝܹܐ ܡܝܲܬܪܹ̈ܐ: ܕܦܸܫܠܗ݇ܘܿܢ ܩܘܼܪܒܸܢܹܐ ܠܐܲܠܵܗܵܐ ܒܡܸܨܥܵܝܘܼܬܹܗ ܓܵܘ ܕܐܵܗܵܐ ܒܲܪܝܼܵܐ.
ܐܝܼܢܵܐ ܐܝܼܡܲܢ ܕܣܐܸܒܼܠܹܗ ܒܵܒܲܢ ܩܲܕܝܼܫܵܐ ܒܗܝܼܫܘܿܥ ܘܣܒܼܸܥܠܹܗ ܝܵܘܡܵܢܹ̈ܐ. ܘܗ݇ܘܹܐܠܹܗ ܦܲܓܼܪܹܗ ܙܲܒܘܼܢ ܡ̣ܢ ܣܲܝܒܘܼܬܵܐ. ܒܣܸܡܠܵܐ ܠܹܗ ܡܵܪܝܵܐ ܕܡܲܢܝܸܚ ܠܪܹܓܹܗ ܘܦܵܠܸܛ ܠܹܗ ܡ̣ܢ ܕܐܵܗܵܐ ܕܘܼܢܝܹܐ ܕܚܲܫܹ̈ܐ ܘܥܹܩܘܼܘܹ̈ܐ. ܘܫܘܼܢܹܐܠܹܗ: ܬܡܵܢܝܵܐ ܒܝܲܪܚܵܐ ܕܛܵܒܲܚ ܕܡܸܨܪ̈ܵܝܹܐ: ܕܝܼܠܹܗ ܬܪܹܝ ܒܬܲܡܘܼܙ. ܘܩܘܼܒܠܵܐ ܠܹܗ ܡܵܪܝܵܐ ܓܵܢܹܗ ܩܲܕܝܼܫܬܵܐ: ܘܦܠܸܛܠܗ݇ܘܿܢ ܠܩܵܕ݇ܡܵܝܘܼܬܵܗ̇ ܡܲܠܲܐܟܼܹ̈ܐ. ܟܲܕ ܒܸܚܕܵܝܵܐ ܒܡܲܦܫܲܛܬܘܿܗ̇: ܗܲܠ ܕܡܘܼܡܛܝܼܵܐ ܠܗ݇ܘܿܢ ܠܡܲܠܟܘܼܬܵܐ ܫܡܲܝܵܢܵܝܬܵܐ ܒܙܘܼܝܵܚܵܐ ܘܐܝܼܩܵܪܵܐ. ܘܐܲܚܘܼܢܘܵܬܹ̈ܐ ܕܝܼܗ݇ܘܵܘ ܥܲܡܹܗ: ܟܘܼܪܸܟܼܗ݇ܘܿܢ ܠܦܲܓܼܪܹܗ ܩܲܕܝܼܫܵܐ: ܒܐܝܼܩܵܪܵܐ ܘܒܙܘܼܝܵܚܵܐ ܓܘܼܪܵܐ. ܘܩܒܼܸܪܗ݇ܘܿܢ ܒܡܘܼܢܝܼܵܐ ܕܐܘܿܝ ܟܲܕ ܡܵܘܕܘܼܝܹܐ ܘܫܵܒܘܼܚܹܐ ܠܐܲܠܵܗܵܐ.
ܐܝܼܢܵܐ ܐܝܼܬ ܚܲܕ݇ ܐ݇ܢܵܫܵܐ ܕܒܵܥܹܐ ܒܵܩܸܪ ܡܸܢܲܢ ܕܟܡܵܐ ܫܸܢܹ̈ܐ ܗ݇ܘܹܐ ܠܹܗ ܒܸܚܵܝܵܐ ܓܵܘ ܒܲܪܝܼܵܐ. ܗܵܘܹܐ ܒܝܼܕܵܥܝܵܐ ܕܫܬܝܼ ܫܸܢܹ̈ܐ ܥܡܸܪܹܗ ܓܵܘ ܒܲܪܝܼܵܐ: ܫܒܼܘܿܩ ܡ̣ܢ ܫܸܢܹ̈ܐ ܕܗ݇ܘܹܐܠܹܗ ܒܡܵܪܝܼܣ ܕܗ̇ܝ ܝܼܠܵܗ̇ ܬܹܒܼܵܐܝܼܣ. ܦܠܸܚܠܹܗ ܪܵܒܵܐ ܦܘܼܠܚܵܢܹ̈ܐ ܘܠܵܐ ܡܨܹܐܠܲܢ ܠܸܟܬܵܒܼܵܐ ܒܘܼܬ ܟܠܲܝܗܝ: ܡ̣ܢ ܒܵܨܘܿܪܘܼܬܵܐ ܕܗܲܝܡܵܢܘܼܬܵܐ ܕܚܲܕ݇ܟܡܵܐ ܐ݇ܢܵܫܹ̈ܐ ܒܲܠܒܝܼܵܢܹ̈ܐ. ܘܐܲܠܵܗܵܐ ܟܹܐ ܝܲܕܸܥ: ܘܗ̇ܘ ܒܸܬ ܦܲܪܸܥܠܹܗ. ܚܲܕ݇ܟ̰ܵܐ ܡ̣ܢ ܪܵܒܵܐ ܕܘܼܒܵܪܹ̈ܐ ܕܐܵܗܵܐ ܦܵܠܵܚܵܐ ܢܲܨܝܼܚܵܐ: ܘܓܘܼܒܝܵܐ ܒܩܲܕܝܼܫܘܼܬܵܐ. ܒܵܒܵܐ ܩܲܕܝܼܫܵܐ ܐܲܒܵܐ ܒܗܝܼܫܘܿܥ ܟܬܸܒܼܠܲܢ.
ܩܵܐ ܚܸܩܪܵܐ ܕܡܵܪܹܗ ܡܲܕܡܝܼܲܚܠܵܗ̇ ܓܵܢܲܢ ܒܕܘܼܒܵܪ̈ܘܼܗܝ ܕܸܟܼܝܹ̈ܐ ܘܩܲܕܝܼܫܹ̈ܐ: ܘܚܵܕܪܲܚ ܒܫܵܘܦܵܦܹ̈ܐ ܕܐܲܩܠܵܬܹ̈ܗ. ܐܲܢܹܐ ܟܬܸܒܼܠܲܢ ܩܵܬܘܼܟܼܘܿܢ ܝܵܐ ܡܲܚܸܒܵܢܹ̈ܐ ܕܐܲܠܵܗܵܐ: ܩܵܐ ܕܟܼܵܪܵܐ ܕܒܵܒܵܐ ܩܲܕܝܼܫܵܐ: ܕܒܝܼܲܕ ܨܠܵܘܵܬܹ̈ܗ ܦܵܝܫܲܚ ܡܘܼܚܫܸܚܹܐ ܠܪ̈ܲܚܡܹܐ. ܘܡܲܣܩܲܚ ܬܸܫܒܘܿܚܬܵܐ ܘܐܝܼܩܵܪܵܐ: ܘܬܘܼܕܝܼܬܵܐ: ܠܡܵܪܲܢ ܝܼܫܘܿܥ ܡܫܝܼܚܵܐ: ܥܲܡ ܒܵܒܹܗ ܘܪܘܼܚܹܗ ܚܵܝܵܐ ܘܩܲܕܝܼܫܵܐ ܐܵܕܝܼܵܐ ܘܒܟܠܲܝܗܝ ܙܲܒܼܢܹ̈ܐ: ܠܥܵܠܲܡ ܥܵܠܡܝܼܢ ܐܵܡܹܝܢ܀
ܚܬܸܡܠܵܐ ܬܲܫܥܝܼܬܵܐ ܕܒܵܒܲܢ ܩܲܕܝܼܫܵܐ
ܡܵܪܝ ܒܗܝܼܫܘܿܥ ܘܠܲܐܠܵܗܵܐ
ܫܘܼܒܼܚܵܐ ܘܪܘܼܡܪܵܡܵܐ:
ܐܵܡܹܝܢ.
♱♱♱♱♱♱♱♱♱