Compiled and Edited by HH Mar Awa III Catholicos Patriarch
ܛܟܼܣܐ ܕܚܠܛܐ ܘܕܨܘܒܬܼܐ ܘܕܡܙܓܼܐ
ܩܲܕܼܡܵܝܑܼܬܼ. ܐܲܒܼܘܼܢ ܕܒܲܫܡܲܝܵܐ؛ ܘܫܲܪܟܵܐ.
ܘܲܡܨܲܠܹܝܢ ܨܠܘܿܬܼܵܐ ܕܗܘܼܠܵܠܵܐ؛ ܐ. ܐܲܫܘܵܐ ܠܲܢ ܡܵܪܲܢ ܘܐܲܠܵܗܲܢ ܕܢܸܬܿܕܲܒܲܪ ܒܕܼܘܼܒܵܪܹ̈ܐ ܕܲܡܝܲܬܿܪܘܼܬܼܵܐ ܕܫܵܦܪܝܼܢ ܠܡܵܪܘܼܬܼܵܟܼ. ܘܢܸܗܘܸܐ ܨܸܒܼܝܵܢܲܢ ܒܢܵܡܘܿܣܵܟܼ. ܘܒܹܗ ܢܸܬܼܗܲܓܸܿܐ ܒܠܸܠܝܵܐ ܘܒܼܐܝܼܡܵܡܵܐ. ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܐܵܡܪܝܼܢ ܗܘܼܠܵܠܵܐ؛ ܐ. ܛܘܼܒܼܵܘܗܝ ܠܓܲܒܼܪܵܐ ܕܒܼܐܘܼܪܚܵܐ.
ܟܲܕܼ ܡܲܝܬܸܿܐ ܢܫܝܼܦܵܐ ܕܲܟܼܝܵܐ؛ ܘܡܸܫܚܵܐ ܕܙܲܝܬܵܐ ܘܡܲܝ̈ܵܐ ܫܲܚܝܼܢܹ̈ܐ؛ ܘܚܵܠܹܛ ܥܲܡ ܚܕܼܵܕܹ̈ܐ؛ ܘܪܵܡܹܐ ܒܹܗ ܚܡܝܼܪܵܐ؛ ܘܣܵܐܹ݁ܡ ܡܸܠܚܵܐ ܐܲܝܟܼ ܕܝܵܕܲܥ؛ ܘܲܡܫܲܡܸܫ ܡ̣ܢ ܛܘܼܒܼܵܘܗܝ ܠܓܲܒܼܪܵܐ؛ ܓ. ܗ̈ܘܼܠܵܠܹܐ؛ ܥܲܕܼ ܕܫܵܠܹܡ ܠܝܵܫܵܐ. ܘܡܵܐ ܕܲܫܠܸܡ؛ ܛܵܒܲܥ ܠܲܓܼܒܼܝܼܠܬܵܐ ܒܚܲܡܸܫ ܕܘܼܟܿܝ̈ܵܢ؛ ܒܲܡܨܲܥܬܼܵܐ؛ ܘܡ̣ܢ ܡܲܕܼܢ̱ܚܵܐ؛ ܘܡ̣ܢ ܡܲܥܪܒܼܵܐ؛ ܘܡ̣ܢ ܓܲܪܒܿܝܵܐ؛ ܘܡ̣ܢ ܬܲܝܡܢܵܐ. ܘܲܡܟܲܣܸܐ ܠܵܗܿ ܛܵܒܼܵܐܝܼܬܼ؛ ܥܲܕܼ ܠܥܸܕܵܢ ܨܘܼܒܵܬܼܵܐ.
܀ܫܠܸܡ̣ ܚܠܵܛܵܐ܀
♱♱♱♱♱♱♱♱♱♱♱♱♱
ܡܵܐ ܕܲܡܨܲܒܸܿܬܼ؛ ܩܲܕܼܡܵܝܑܼܬܼ ܢܵܣܹܒܼ ܡܟܲܦܪܵܢܵܐ ܡ̣ܢ ܐܲܦܹܝ̈ܗ݁ ܕܲܓܼܒܼܝܼܠܬܵܐ. ܘܒܼܵܬܲܪܟܸܿܢ ܚܡܝܼܪܵܐ. ܘܗܵܝܕܹܝܢ ܫܵܩܹܠ ܡ̣ܢ ܡܨܲܥܬܼܵܗ݁ ܕܲܓܼܒܼܝܼܠܬܵܐ ܦܘܼܪܫܵܢܵܐ ܡܲܠܟܵܝܵܐ ܘܥܵܒܹܕܼ ܠܹܗ ܐܲܝܟܼ ܓܘܼܪܢܵܐ ܡܪܲܒܿܥܵܐܝܼܬܼ. ܘܣܵܐܹܡ ܒܹܗ ܩܲܠܝܼܠ ܡܸܫܚܵܐ ܕܙܲܝܬܵܐ ܢܛܝܼܪܵܐ؛ ܘܐܵܙܹܠ ܘܡܲܝܬܹܿܐ ܡܲܠܟܵܐ ܘܐܵܡܲܪ.
ܐܹܪܲܡ̱ܪܡܵܟܼ ܡܵܪܝ ܡܲܠܟܵܐ* ܘܐܹܒܲܪܸܟܼ ܫܡܵܟܼ ܠܥܵܠܲܡ ܥܵܠܡܝܼܢ* ܒܟܼܠܝܘܿܡ ܐܹܒܲܪܟܼܵܟܼ ܘܐܹܫܲܒܲܚ ܫܡܵܟܼ ܠܥܵܠܲܡ* ܪܲܒܿܘܼ ܡܵܪܲܢ ܘܲܡܫܲܒܲܚ ܛܵܒܼ* ܘܠܲܝܬܿ ܣܵܟܼܵܐ ܠܪܲܒܿܘܼܬܹܗ* ܕܵܪܵܐ ܠܕܼܵܪܵܐ ܢܸܫܬܲܥܘܿܢ ܥܒܼܵܕܲܝ̈ܟ* ܘܓܲܢَܒܵܪܘܼܬܼܵܟܼ ܢܚܵܘܘܿܢ* ܘܥܘܼܫܢܵܐ ܕܲܕܼܚܝܼܠܘܼܬܼܵܟܼ ܢܹܐܡܪܘܼܢ* ܘܪܵܘ̱ܪ̈ܒܼܵܬܼܵܟܼ ܢܸܫܬܲܥܘܿܢ* ܘܲܕܼܚܝܼܠܘܼܬܼ ܥܘܼܫܢܵܟܼ ܢܹܐܡܪܘܼܢ* ܘܪܲܒܿܘܼܬܵܟܼ ܐܸܫܬܲܥܸܐ* ܕܘܼܟܼܪܵܢܵܐ ܕܛܲܝ̈ܒܿܘܵܬܼܵܟܼ ܣܲܓܿܝܼ̈ܐܵܬܼܵܐ*
ܘܦܵܬܲܚ ܩܸܣܛܵܐ ܘܫܵܩܹ݁ܠ ܒܬܲܪܬܹܿܝܢ ܨܸܒܼܥܵܬܹ̈ܗ ܡ̣ܢ ܡܲܠܟܵܐ ܘܐܵܡܲܪ؛
ܡܸܬܼܪܲܫܡܵܐ ܘܡܸܬܼܩܲܕܫܵܐ ܓܒܼܝܼܠܬܵܐ ܗܵܕܹܐ ܒܲܚܡܝܼܪܵܐ ܥܲܬܿܝܼܩܵܐ ܘܩܲܕܝܼܫܵܐ؛ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܕܐܸܬܼܝܼܗܸܒܼ ܘܐܸܬܼܝܲܒܲܠ ܠܲܢ ܡ̣ܢ ܐܲܒܼܵܗܲܝ̈ܢ ܩܲܕܝܼܫܹ̈ܐ ܡܵܪܝ ܐܲܕܲܝ ܘܡܵܪܝ ܡܵܐܪܝܼ ܘܡܵܪܝ ܬܐܘܿܡܵܐ ܫܠܝܼܚܹ̈ܐ ܕܗܸܢܘܿܢ ܗ̤ܘܵܘ ܡܬܲܠܡܕܵܢܹ̈ܐ ܕܲܦܢܝܼܬܼܵܐ (ܗܵܕܹܐ) ܡܲܕܼܢِܚܵܝܬܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܪܵܫܹܡ ܥܲܠ ܓܒܼܝܼܠܬܵܐ ܨܠܝܼܒܼܵܐܝܼܬܼ. ܘܟܸܢ ܫܵܩܹܠ ܡ̣ܢ ܡܲܠܟܵܐ ܘܪܵܫܹܡ ܥܲܠ ܡܸܫܚܵܐ ܕܲܒܼܦܘܼܪܫܵܢܵܐ ܡܲܠܟܵܝܵܐ ܒܹܗ ܒܲܙܢܵܐ. ܘܬܼܘܼܒܼ ܫܵܩܹܠ ܒܬܲܪܬܹܿܝܢ ܨܸܒܼܥܵܬܹ̈ܗ ܡܸܢܹܗ ܕܡܲܠܟܵܐ ܘܐܵܡܲܪ؛
ܡܸܬܼܪܲܫܡܵܐ ܘܡܸܬܼܩܲܕܼܫܵܐ ܩܨܵܬܼܵܐ ܗܵܕܹܐ ܒܲܚܡܝܼܪܵܐ ܗܵܢܵܐ ܩܲܕܝܼܫܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܣܵܐܹ݁ܡ ܠܛܲܦܩܵܐ ܕܩܸܣܛܵܐ ܕܐܝܼܬܼ ܒܹܗ ܡܲܠܟܵܐ؛ ܘܐܵܙܹܠ ܡܵܘܒܸܿܠ ܠܵܗ݁ ܠܕܼܘܼܟܿܬܼܵܗ݁؛ ܗܵܢܵܘ ܕܹܝܢ ܠܡܲܕܼܒܿܚܵܐ ܟܲܕܼ ܐܵܡܲܪ؛
ܕܡܵܪܝܵܐ ܗَ̣ܝ ܐܲܪܥܵܐ ܒܲܡܠܹܐܵܗ̇* ܬܹܒܹܝܠ ܘܟܼܠܗܘܿܢ ܥܵܡܘܿܪܹ̈ܝܗ̇* ܡܸܛܠ ܕܗ̤ܘ ܒܝܲܡܵܐ ܣ̣ܵܡ ܫܲܬܼܐ̱ܣܹܝ̈ܗ̇* ܘܲܒܼܢܲܗܪ̈ܵܘܵܬܼܵܐ ܐܲܬܼܩܢܵܗ̇* ܡܲܢܘܼ ܢܸܣܲܩ ܠܛܘܼܪܹܗ ܕܡܵܪܝܵܐ* ܘܡܲܢܘܼ ܢܩܘܼܡ ܒܛܘܼܪܹܗ ܩܲܕܝܼܫܵܐ* ܐܲܝܢܵܐ ܕܕܲܟܼܝ̈ܵܢ ܐܝܼܕܵܘ̈ܗܝ ܘܲܓܼܒܸܐ ܒܠܸܒܹܿܗ* ܘܠܵܐ ܝܵܡܹܐ ܒܢܲܦ̮ܫܹܗ ܒܕܲܓܵܠܘܼܬܼܵܐ ܘܠܵܐ ܝܵܡܹܐ ܒܢܸܟܼܠܵܐ* ܗܵܢܵܐ ܢܩܲܒܸܿܠ ܒܘܼܪܟܿܬܼܵܐ ܡ̣ܢ ܡܵܪܝܵܐ* ܘܙܲܕܝܼܩܘܼܬܼܵܐ ܡ̣ܢ ܐܲܠܵܗܵܐ ܦܵܪܘܿܩܲܢ* ܗܵܢܵܘ ܕܵܪܵܐ ܕܒܼܵܥܹܐ ܘܲܡܣܲܒܲܪ* ܠܦܲܪܨܘܿܦܵܐ ܕܐܲܦܲܝ̈ܟ ܐܲܠܵܗܹܗ ܕܝܲܥܩܘܿܒܼ*
ܘܐܵܡܲܪ. ܡܲܠܟܲܢ ܥܲܡܲܢ ܘܐܲܠܵܗܲܢ ܥܲܡܲܢ؛ ܘܲܡܥܲܕܼܪܵܢܲܢ ܐܲܠܵܗܹܗ ܕܝܲܥܩܘܿܒܼ. ܛܘܼܒܼܵܘܗܝ ܠܥܲܡܵܐ ܕܗܵܟܲܢܵܐ ܐܝܼܬܼ ܠܹܗ. ܛܘܼܒܼܵܘܗܝ ܠܥܲܡܵܐ ܕܗܵܟܲܢܵܐ ܐܝܼܬܼ ܠܹܗ* ܛܘܼܒܼܵܘܗܝ ܠܥܲܡܵܐ ܕܡܵܪܝܵܐ ܗَ̣ܘ ܐܲܠܵܗܹܗ* ܘܡܲܩܸܦ. ܐܲܪܝܼܡܘ ܬܲܪ̈ܥܹܐ ܪܹ̈ܫܲܝܟܿܘܿܢ* ܐܸܬܿܬܿܪܝܼܡܘ ܬܲܪ̈ܥܹܐ ܕܡ̣ܢ ܥܵܠܲܡ* ܕܢܸܥܘܿܠ ܡܲܠܟܵܐ ܕܐܝܼܩܵܪܹ̈ܐ* ܡܲܢܘܼ ܗܵܢܵܐ ܡܲܠܟܵܐ ܕܐܝܼܩܵܪܹ̈ܐ* ܡܵܪܝܵܐ ܚܲܝܠܬܼܵܢܵܐ* ܗ̤ܘܝܘܼ ܡܲܠܟܵܐ ܡܝܲܩܪܵܐ ܠܥܵܠܲܡ*
ܘܬܼܵܠܹܐ ܠܵܗ̇ ܠܩܸܣܛܵܐ ܒܕܼܘܼܟܿܬܼܵܗܿ ܘܢܵܦܹܩ ܘܲܡܫܲܪܸܐ ܬܸܫܒܿܘܿܚܬܵܐ ܠܐܲܠܵܗܵܐ ܒܲܡܪ̈ܵܘܡܹܐ؛ ܓ ܙܲܒܼܢܝܼ̈ܢ. ܘܐܲܒܼܘܼܢ ܕܒܲܫܡܲܝܵܐ. ܘܲܡܫܲܡܸܫ ܡ̣ܢ ܐܲܠܵܗܵܐ ܩ̣ܵܡ؛ ܓ ܗܘܼܠܵܠܹ̈ܐ. ܟܲܕܼ ܗ̇ܘ ܪܵܫܹܡ ܘܓܼܵܒܹܠ. ܘܡܵܐ ܕܫܵܠܹܡ ܠܲܡܨܲܒܵܬܼܘܼ؛ ܟܸܢ ܣܵܠܹܩ ܠܬܲܢܘܼܪܬܵܐ ܘܐܵܡܲܪ؛ ܐܲܣܸܩܲܝܢܝ ܡ̣ܢ ܓܘܼܒܵܐ ܕܕܼܵܘܘܿܢܵܐ ܘܡ̣ܢ ܣܝܵܢܵܐ ܕܲܚܒܼܵܠܵܐ܀ ܐܲܩܝܼܡ ܥܲܠ ܫܘܿܥܵܐ ܪܸ̈ܓܼܠܲܝ ܘܐܲܬܼܩܸܢ ܗܲܠܟܼܵܬܼ̈ܝ. ܘܡܵܠܹܐ ܦܝܼܪܡܵܐ ܓܘܼܡܪܹ̈ܐ ܕܢܘܼܪܵܐ ܘܬܼܵܠܹܐ ܠܹܗ ܘܲܡܟܲܣܸܐ ܠܢܘܼܪܵܐ ܕܲܒܼܬܲܢܘܼܪܬܵܐ. ܥܲܕܼ ܫܵܗܝܵܐ ܩܲܠܝܼܠ؛ ܘܡܵܪܹܩ ܠܵܗ̇ ܫܲܦܝܼܪ ܘܟܸܢ ܓܵܠܹܐ ܠܵܗܿ ܠܢܘܼܪܵܐ. ܘܫܵܩܹܠ ܩܲܠܝܼܠ ܒܸܣܡܹ̈ܐ ܘܣܵܐܹܡ ܒܵܗ̇ ܘܐܵܡܲܪ؛ ܡܸܬܼܩܲܕܫܵܐ ܦܲܚܵܪܵܐ ܗܵܕܹܐ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ.
ܘܡܲܩܸܦ. ܩܲܕܝܼܫܵܐ ܐܲܠܵܗܵܐ؛ ܓ ܙܲܒܼܢܝܼ̈ܢ.
ܘܫܵܩܹܠ ܡܲܠܟܵܐ ܒܐܝܼܕܹܗ ܘܦܵܫܹܛ ܐܝܼܕܹܗ ܒܬܲܢܘܼܪܬܵܐ ܘܐܵܡܲܪ؛ ܡܲܠܟܵܐ ܕܡܲܠܟܹ̈ܐ ܢܚܸܬܼ ܠܲܥܡܵܕܼܵܐ ܘܐܲܪܟܸܿܢ ܪܹܫܹܗ ܩܕܼܵܡ ܝܘܿܚܲܢܵܢ ܕܢܸܥܡܲܕܼ ܡܸܢܹܗ. ܘܣܵܕܲܪ ܗ̇ܝ ܡܲܠܟܵܝܬܵܐ ܒܡܲܕܼܢܚܵܝܵܗ̇ ܕܬܲܢܘܼܪܬܵܐ. ܘܣܵܕܲܪ ܠܲܐܚܪܹܬܼܵܐ ܡ̣ܢ ܡܲܥܪܒܼܵܝܵܗ݁ ܘܐܵܡܲܪ؛ ܡ̣ܢ ܡܲܕܼܢܚܵܐ ܘܡ̣ܢ ܡܲܥܪِܒܼܵܐ؛ ܘܠܲܐܚܪܹܬܼܵܐ ܡ̣ܢ ܓܲܪܒܿܝܵܐ ܘܠܲܐܚܪܹܬܼܵܐ ܡ̣ܢ ܬܲܝܡܢܵܐ ܘܐܵܡܲܪ؛ ܡ̣ܢ ܓܲܪܒܿܝܵܐ ܘܡ̣ܢ ܬܲܝܡܢܵܐ. ܘܠܲܐܚܪܹܬܼܵܐ ܡ̣ܢ ܝܲܡܝܼܢܵܐ ܕܗ݁ܝ ܡܲܠܟܵܝܬܵܐ ܘܐܵܡܲܪ؛ ܛܸܛܘܿܣ ܡ̣ܢ ܝܲܡܝܼܢܹܗ؛ ܘܠܲܐܚܪܹܬܼܵܐ ܡ̣ܢ ܣܸܡܵܠܵܗ̇ ܘܐܵܡܲܪ؛ ܘܕܼܘܼܡܵܟܼܘܿܣ ܡ̣ܢ ܣܸܡܵܠܹܗ؛ ܬܪܹܝܢ ܓܲܝܵܣܹ̈ܐ ܙܩܝܼܦܝܼܢ ܗَ̣ܘܵܘ ܥܲܡ ܚܲܕܼ ܓܲܙܵܐ ܫܡܲܝܵܢܵܐ. ܗ̇ܘ ܕܡ̣ܢ ܝܲܡܝܼܢܹܗ ܠܵܐ ܫܵܠܹܐ ܗَ̣ܘܵܐ ܡ̣ܢ ܕܲܠܡܸܓܼܢܲܒܼ ܘܒܲܓܼܢܘܼܒܼܬܹܿܗ ܐَܚܪܵܝܬܵܐ ܚܲܠܨܸܗ ܗَ̣ܘܵܐ ܠܦܲܪܕܲܝܣܵܐ ܕܲܥܕܸܢ. ܘܠܲܐܚܪ̈ܵܢܹܐ. ܫܲܡܝܼܢܹ̈ܐ ܘܒܲܣܝܼܡܹ̈ܐ ܢܸܗܘܘܿܢ ܘܲܢܚܵܘܘܿܢ ܕܲܬܼܪܝܼܨܘܼ ܡܵܪܝܵܐ؛ ܥܲܫܝܼܢܵܐ ܘܠܲܝܬܿ ܒܹܗ ܡܘܼܡܵܐ.
ܘܡܵܐ ܕܲܫܠܸܡ ܠܡܸܣܕܲܪ ܐܵܡܲܪ؛
ܐܹܒܲܪܸܟܼ ܠܡܵܪܝܵܐ ܒܟܼܠܙܒܲܢ܀ ܐܲܝܟܼ ܥܸܛܪܵܐ ܕܒܸܣܡܹ̈ܐ ܛܵܒܹ̈ܐ ܘܪܹܝܚܵܐ ܕܦܝܼܪܡܵܐ ܒܲܣܝܼܡܵܐ ܩܲܒܸܿܠ ܡܫܝܼܚܵܐ ܦܵܪܘܿܩܲܢ ܒܵܥܘܼܬܼܵܐ ܘܲܨܠܘܿܬܼܵܐ ܕܥܲܒܼܕܲܝ̈ܟ܀ ܘܲܒܼܟܼܠܙܒܲܢ ܬܸܫܒܿܚܵܬܹ̈ܗ ܒܦܘܼܡܝ. ܐܲܝܟܼ ܥܸܛܪܵܐ...܀ ܫܲܒܲܚ. ܥܵܠܲܡ. ܐܲܝܟܼ ܥܸܛܪܵܐ...܀
ܘܫܵܩܸܠ ܩܲܠܝܼܠ ܒܸܣܡܵܐ ܘܪܵܡܹܐ ܒܬܲܢܘܼܪܬܵܐ ܘܲܡܟܲܣܸܐ ܠܵܗܿ ܘܐܵܡܲܪ؛ ܗܲܠܸܠܘܼܝܵܗ ܗܲܠܸܠܘܼܝܵܗ ܫܘܼܒܼܚܵܐ ܠܵܟܼ ܐܲܠܵܗܵܐ. ܓ ܙܲܒܼܢܝܼ̈ܢ.
ܘܡܲܩܸܦ. ܡܫܲܒܲܚ ܐܲܢَܬܿ ܡܵܪܲܢ ܘܠܵܟܼ ܝܵܐܹܐ ܠܡܲܣܵܩܘܼ ܫܘܼܒܼܚܵܐ ܟܠܝܘܿܡ ܠܥܵܠܲܡ ܥܵܠܡܝܼܢ ܐܵܡܹܝܢ. ܫܘܼܒܼܚܵܐ ܠܹܗ ܠܲܡܫܝܼܚܵܐ ܘܬܼܵܘܕܝܼܬܼܵܐ ܠܡ݁ܢ ܕܲܦܬܲܚ ܦܘܼܡܲܢ ܘܝܲܗَܒܼ ܠܲܢ ܕܲܢܗܲܠܸܠ ܒܬܸܫܒܿܚܵܬܹ̈ܗ. ܫܘܼܒܼܚܵܐ ܠܹܗ ܠܲܡܫܝܼܚܵܐ ܘܬܼܵܘܕܝܼܬܼܵܐ ܠܡ݁ܢ ܕܲܦܬܲܚ ܦܘܼܡܲܢ ܘܝܲܗَܒܼ ܠܲܢ ܕܲܢܙܲܡܲܪ ܒܬܸܫܒܿܚܵܬܹ̈ܗ. ܫܘܼܒܼܚܵܐ ܠܹܗ ܠܲܡܫܝܼܚܵܐ ܘܬܼܵܘܕܝܼܬܼܵܐ ܠܡ݁ܢ ܕܲܦܬܲܚ ܦܘܼܡܲܢ ܘܝܲܗَܒܼ ܠܲܢ ܕܲܢܫܲܒܲܚ ܒܬܸܫܒܿܚܵܬܹ̈ܗ.
ܠܐܲܒܼܵܐ ܘܠܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܫܘܼܒܼܚܵܐ ܢܲܣܸܩ ܠܥܵܠܡܝܼܢ ܐܵܡܹܝܢ. ܓ ܙܲܒܼܢܝܼ̈ܢ. ܠܵܐ ܣܵܦܹܩ ܦܘܼܡܲܢ ܕܢܵܘܕܸܐ ܠܵܟܼ ܡܵܪܲܢ ܟܠ ܝܵܘܡܲܝ̈ ܚܲܝܲܝ̈ܢ ܡܸܛܠ ܛܲܝܒܿܘܼܬܼܵܟܼ. ܠܵܐ ܣܵܦܹܩ ܦܘܼܡܲܢ ܕܲܢܩܲܠܣܵܟܼ ܠܵܟܼ ܡܵܪܲܢ ܟܠ ܝܵܘܡܲܝ̈ ܚܲܝܲܝ̈ܢ ܡܸܛܠ ܛܲܝܒܿܘܼܬܼܵܟܼ. ܠܵܐ ܣܵܦܹܩ ܦܘܼܡܲܢ ܕܲܢܫܲܒܿܚܵܟܼ ܠܵܟܼ ܡܵܪܲܢ ܟܠ ܝܵܘܡܲܝ̈ ܚܲܝܲܝ̈ܢ ܡܸܛܠ ܛܲܝܒܿܘܼܬܼܵܟܼ.
ܐܲܩܸܦ. ܕܲܠܘܵܬܼ ܡܵܝܘܿܬܹ̈ܐ ܡܵܪܵܐ ܡܪܲܚܡܵܢܵܐ ܚܘܼܢܲܝܢ ܒܛܲܝܒܿܘܼܬܼܵܟܼ ܘܐܸܬܼܪܲܚܲܡ ܥܠܲܝܢ. ܕܠܵܐ ܙܵܟܹܐ ܩܕܼܵܡܲܝܟ ܟܠ ܕܚܲܝ ܒܲܥܒܼܝܼ̈ܕܹܐ؛ ܐܲܢَܬܿ ܡܵܪܝ ܐܲܦܢܝܼܬܼܵܢ ܡ̣ܢ ܟܠܵܗ̇ ܛܘܼܥܝܲܝ. ܕܐܲܢَܬܿܘܼ ܐܲܠܵܗܵܐ ܘܠܵܟܼ ܝܵܐܹܐ ܫܘܼܒܼܚܵܐ ܠܥܵܠܲܡ ܥܵܠܡܝܼܢ ܐܵܡܹܝܢ.
ܘܐܵܡܲܪ ܡܫܲܡܫܵܢܵܐ. ܫܠܵܡܵܐ ܥܲܡܲܢ.
ܨܠܘܿܬܼܵܐ. ܘܥܲܠ ܐܲܦܲܝ̈ ܟܠܗܘܿܢ ܥܘܼܕܼܪ̈ܵܢܲܝܟ ܘܛܲܝ̈ܒܿܘܵܬܼܵܟܼ ܕܲܠܘܵܬܲܢ ܕܠܵܐ ܡܸܬܼܦܲܪܥܝܼܢ. ܢܵܘܕܸܐ ܠܵܟܼ ܘܲܢܫܲܒܿܚܵܟܼ ܕܠܵܐ ܫܲܠܘܵܐ ܒܥܹܕܬܵܟܼ ܡܟܲܠܲܠܬܵܐ ܡܲܠܝܲܬܼ ܟܠ ܥܘܼܕܼܪ̈ܵܢܝܼܢ ܘܟܼܠ ܛܘܼܒܼܝܼ̈ܢ؛ ܕܐܲܢَܬܿܘܼ ܡܵܪܵܐ ܘܒܼܵܪܘܿܝܵܐ ܕܟܼܠ. ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܡܲܩܦܝܼܢ. ܠܵܟܼܘܼܡܵܪܵܐ ܕܟܼܠܵܗ݁ ܡܵܘܕܹܝܢܲܢ؛ ܘܠܵܟܼ ܝܑܼܫܘܿܥ ܡܫܝܼܚܵܐ ܡܫܲܒܿܚܝܼܢܲܢ. ܕܐܲܢَܬܿܘܼ ܡܢܲܚܡܵܢܵܐ ܕܦܓܼܪ̈ܲܝܢ ܘܐܲܢَܬܿܘܼ ܦܵܪܘܿܩܲܢ ܕܢܲܦ̮̈ܫܵܬܲܢ. ܒܹܝܬܼ ܡܝܼܬܹ̈ܐ ܒܲܪ ܚܹܐܪܹ̈ܐ. ܐܲܝܟܼ ܩܛܝܼܠܹ̈ܐ ܕܲܫܟܼܝܼܒܼܝܼ̈ܢ ܒܩܲܒܼܪܹ̈ܐ. ܠܵܟܼܘܼܡܵܪܵܐ...܀ ܫܲܒܲܚ. ܥܵܠܲܡ. ܠܵܟܼܘܼܡܵܪܵܐ...܀
ܨܠܘܿܬܼܵܐ. ܐܲܢَܬܿܘܼ ܡܵܪܝ ܫܲܪܝܼܪܵܐܝܼܬܼ ܡܢܲܚܡܵܢܵܐ ܕܦܲܓܼܪ̈ܲܝܢ؛ ܘܐܲܢَܬܿܘܼ ܦܵܪܘܿܩܵܐ ܛܵܒܼܵܐ ܕܢܲܦ̮ܫ̈ܵܬܲܢ ܘܲܡܢܲܛܪܵܢܵܐ ܐܲܡܝܼܢܵܐ ܕܚܲܝܲܝ̈ܢ ܘܠܵܟܼ ܡܵܪܝ ܚܲܝܵܒܼܝܼܢܲܢ. ܕܢܵܘܕܸܐ ܘܢܸܣܓܿܘܿܕܼ ܘܲܢܫܲܒܲܚ ܒܟܼܠܥܸܕܵܢ ܡܵܪܵܐ ܕܟܼܠ. ܠܥܵܠܡܝܼܢ.
ܘܐܵܡܲܪ ܡܫܲܡܫܵܢܵܐ. ܐܲܪܝܼܡܘ ܩܵܠܟܼܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ. ܘܥܵܢܹܝܢ. ܩܲܕܝܼܫܵܐ ܐܲܠܵܗܵܐ؛ ܩܲܕܝܼܫܵܐ ܚܲܝܠ̱ܬܼܵܢܵܐ؛ ܩܲܕܝܼܫܵܐ ܠܵܐ ܡܵܝܘܿܬܼܵܐ ܐܸܬܼܪܲܚܸܡ ܥܠܲܝܢ܀ ܫܲܒܲܚ. ܩܲܕܝܼܫܵܐ ܐܲܠܵܗܵܐ...܀ ܥܵܠܲܡ. ܩܲܕܝܼܫܵܐ ܐܲܠܵܗܵܐ...܀
ܨܠܘܿܬܼܵܐ. ܩܲܕܝܼܫܵܐ ܘܲܫܒܼܝܼܚܵܐ ܘܚܲܝܠِܬܼܵܢܵܐ ܘܠܵܐ ܡܵܝܘܿܬܼܵܐ؛ ܕܲܒܼܩܲܕܝܼܫܹ̈ܐ ܥܵܡܲܪ ܘܡܸܬܿܬܿܢܝܼܚ ܨܸܒܼܝܵܢܹܗ؛ ܡܸܬܼܟܲܫܦܝܼܢܲܢ. ܐܸܬܼܦܲܢ ܡܵܪܝ ܘܚܘܼܣ ܘܪܲܚܸܡܥܠܲܝܢ؛ ܐܲܝܟܼ ܕܲܡܥܵܕܲܬܿ ܒܟܼܠܥܸܕܵܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܡܲܩܦܝܼܢ. ܒܲܪܸܟܼܡܵܪܝ؛ ܐܲܪܟܸܿܢܘ ܪܹ̈ܫܲܝܟܿܘܿܢ ܠܲܣܝܵܡܝܼܕܼܵܐ ܘܩܲܒܸܿܠܘ ܒܘܼܪܟܿܬܼܵܐ.
ܨܠܘܿܬܼܵܐ. (ܡܫܝܼܚܵܐ ܢܙܲܗܸܐ ܬܸܫܡܸܫܬܵܟܼ ܒܡܲܠܟܿܘܼܬܼܵܐ ܕܲܫܡܲܝܵܐ)؛ ܘܟܲܕܼ ܫܵܠܡ̈ܵܢ ܢܲܦ̮ܫ̈ܵܬܲܢ ܠܲܚܕܵܐ ܗܲܝܡܵܢܘܼܬܼܵܐ ܓܡܝܼܪܬܵܐ ܕܲܬܼܠܝܼܬܼܵܝܘܼܬܼܵܟܼ ܡܫܲܒܲܚܬܵܐ. ܟܠܲܢ ܒܲܚܕܼܵܐ ܐܵܘܝܘܼܬܼܵܐ ܕܚܘܼܒܵܐ؛ ܢܸܫܬܿܘܸܐ ܕܢܲܣܸܩ ܠܵܟܼ ܬܸܫܒܿܘܿܚܬܵܐ ܘܐܝܼܩܵܪܵܐ ܘܬܼܵܘܕܝܼܬܼܵܐ ܘܣܸܓܼܕܬܼܵܐ ܒܟܼܠܥܸܕܵܢ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܡܲܩܦܝܼܢ ܗܵܠܹܝܢ ܥܘܿܢ̈ܝܵܬܼܵܐ.
ܕܐܲܢَܬܿܘܼ ܟܘܼܡܪܵܐ ܠܥܵܠܲܡ. ܪܲܒܿܟܿܘܼܡܪܹ̈ܐ ܕܬܼܵܘܕܝܼܬܲܢ ܘܲܡܚܲܣܝܵܢܲܢ ܡܫܝܼܚܵܐ ܕܲܗ̤ܘܵܐ ܚܠܵܦܲܝܢ؛ ܕܸܒܼܚܵܐ ܡܩܲܒܿܠܵܐ ܕܠܵܐ ܡܘܼܡܵܐ. ܡܸܢܵܟܼ ܫܵܐܠܝܼܢܲܢ ܫܘܼܒܼܩܵܢ ܚܵܘܒܹ̈ܐ؛ ܡܵܐ ܕܬܼܵܩܸܢ ܟܘܼܪܣܲܝ ܕܝܼܢܵܐ. ܡܦܵܣ ܐܲܢَܬܿ ܓܹܝܪ ܒܚܲܫܵܘ̈ܗܝ ܕܲܟܼܝܵܢܲܢ؛ ܕܒܹܗ ܚܲܫܬܿ ܘܐܸܬܼܢܲܣܝܼܬܿ ܡܸܛܠ ܦܘܼܪܩܵܢܲܢ.
ܐܸܙܕܲܗ̄ܪܘ ܘܠܵܐ ܬܸܚܛܘܿܢ. ܬܲܠܡܝܼܕܼܵܘ̈ܗܝ ܕܲܡܫܝܼܚܵܐ ܘܲܒܼܢܲܝ̈ ܐَܪܵܙܹܗ ܐܸܙܕܲܗ̄ܪܘ ܡ̣ܢ ܚܘܼܠܛܵܢܵܐ؛ ܕܥܲܡ ܚܲܢܦܹ̈ܐ ܘܥܲܡ ܟܵܦܘܿܪܹ̈ܐ. ܕܲܠܡܵܐ ܬܸܣܬܲܪܲܩ ܗܲܝܡܵܢܘܼܬܼܟܼܘܿܢ؛ ܘܡܲܥܡܘܿܕܝܼܬܼܵܐ ܕܲܢܣܲܒܼܬܿܘܿܢ. ܒܲܥܝܵܕܹ̈ܐ ܕܩܵܢܹܝܢ ܐܢَܬܿܘܿܢ ܡܸܢܗܘܿܢ؛ ܡܚܲܒܿܠܵܢܹ̈ܐ ܕܦܲܓܼܪܵܐ ܘܲܕܼܢܲܦ̮ܫܵܐ.
ܡܲܐܣܸܐ ܠܲܬܼܒܼܝܼܪ̈ܲܝ ܠܸܒܵܐ ܘܥܵܨܹܒܼ ܟܹܐܒܲܝ̈ܗܘܿܢ. ܣܲܡܵܐ ܕܲܬܼܝܵܒܼܘܼܬܼܵܐ ܝܲܗَܒܼ ܗَ̣ܘܵܐ ܡܵܪܲܢ؛ ܠܐܵܣܵܘܵܬܼ̈ܵܐ ܡܗܝܼܪܹ̈ܐ ܕܐܝܼܬܲܝܗܘܿܢ ܟܵܗܢܹ̈ܐ ܕܥܹܕܬܵܐ. ܘܐܲܝܢܵܐ ܕܲܡܚܵܝܗܝ ܣܵܛܵܢܵܐ ܒܟܹܐܒܹ̈ܐ ܕܥܵܘ̣ܠܵܐ؛ ܢܹܐܬܸܐ ܢܚܵܘܸܐ ܚܒܼܵܪ̈ܵܬܹܗ. ܠܬܲܠܡܝܼ̈ܕܼܵܘܗܝ ܕܐܵܣܝܵܐ ܚܲܟܿܝܼܡܵܐ؛ ܘܗܸܢܘܿܢ ܡܲܐܣܹܝܢ ܠܹܗ ܒܣܲܡܵܐ ܪܘܼܚܵܢܵܐ.
ܫܲܒܲܚ. ܒܲܨܠܘܿܬܼܵܐ ܕܲܡܒܲܪܲܟܼܬܵܐ ܫܲܝܢܵܐ ܢܲܡܠܸܟܼ ܒܲܒܼܪܝܼܬܼܵܐ؛ ܘܲܒܼܒܼܵܥܘܼܬܼܵܗ݁ ܕܲܒܼܬܼܘܼܠܬܵܐ ܝܲܠܕܹܝ̈ܗ݁ ܕܥܹܕܬܵܐ ܢܸܬܼܢܲܛܪܘܿܢ܀ ܚܲܝܠܵܐ ܕܲܢܚܸܬܼ ܡ̣ܢ ܪܵܘܡܵܐ؛ ܘܩܲܕܫܵܗ̇ ܘܨܲܒܿܬܼܵܗ̇ ܠܐܝܼܩܵܪܹܗ. ܘܝܸܠܕܲܬ̤ ܢܘܼܗܪܵܐ ܫܲܪܝܼܪܵܐ؛ ܘܣܲܒܼܪܵܐ ܘܚܲܝܹ̈ܐ ܠܒܸܪ̈ܝܵܬܼܵܐ. ܢܸܗܘܸܐ ܥܲܡܲܢ ܘܒܲܝܢܵܬܲܢ؛ ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ. ܘܢܲܐܣܸܐ ܠܡܲܪ̈ܥܹܐ ܘܠܲܟܼܪ̈ܝܼܗܹܐ؛ ܘܠܐܲܝܠܹܝܢ ܕܲܪܡܹܝܢ ܒܢܸܣܝܘܿܢܹ̈ܐ. ܘܢܲܦܢܸܐ ܠܐܲܝܠܹܝܢ ܕܐܝܼܬܲܝܗܘܿܢ ܒܐܘܼܪ̈ܚܵܬܼܵܐ ܪ̈ܲܚܝܼܩܵܬܼܵܐ. ܒܲܫܠܵܡܵܐ ܠܓܼܵܘ ܒܵܬܲܝ̈ܗܘܿܢ؛ ܕܠܵܐ ܢܸܬܼܢِܟܼܘܿܢ ܡ̣ܢ ܒܝܼܫܵܐ܀ ܘܐܲܝܠܹܝܢ ܕܲܒܼܝܲܡܡܹ̈ܐ ܪܵܕܹܝܢ؛ ܢܸܫܬܵܘܙܒܼܘܼܢ ܡ̣ܢ ܟܝܼܡܘܿܢܹ̈ܐ. ܘܐܲܝܠܹܝܢ ܕܲܒܼܝܲܒܼܫܵܐ ܡܗܲܠܟܼܝܼܢ؛ ܢܸܬܼܦܲܨܘܿܢ ܡ̣ܢ ܒܲܪܒܿܪ̈ܵܝܹܐ. ܘܐܲܝܠܹܝܢ ܕܲܒܼܫܸܒܼܝܵܐ ܐܸܫܬܿܒܼܝܼܘ؛ ܢܸܫܬܿܪܘܿܢ ܡ̣ܢ ܐܲܣܘܼܪ̈ܲܝܗܘܿܢ. ܘܐܲܝܠܹܝܢ ܕܒܲܩܛܝܼܪܵܐ ܕܒܼܝܼܪܝܼܢ؛ ܚܢܵܢܵܟܼ ܢܒܲܝܲܐ ܟܲܪܝܘܼܬܼܗܘܿܢ. ܘܐܲܝܠܹܝܢ ܕܒܼܝܼܫܵܐ ܫܵܚܹܩ ܠܗܘܿܢ؛ ܢܸܓܼܥܘܿܪ ܒܹܗ ܚܲܝܠܵܟܼ ܪܲܒܵܐ. ܘܐܲܝܠܹܝܢ ܕܒܲܚܛܵܗܹ̈ܐ ܡܗܲܠܟܼܝܼܢ؛ ܚܲܣܵܐ ܘܲܫܒܼܘܿܩ ܚܵܘܒܲܝ̈ܗܘܿܢ. ܘܐܲܝܠܹܝܢ ܕܩܲܪܸܒܼܘ ܩܘܼܪ̈ܒܵܢܹܐ؛ ܬܸܬܿܢܝܼܚ ܒܗܘܿܢ ܐܲܠܵܗܘܼܬܼܵܟܼ. ܘܐܲܝܠܹܝܢ ܕܲܫܟܸܒܼܘ ܥܲܠ ܣܲܒܼܪܵܟܼ؛ ܢܲܚܸܡ ܘܐܲܚܵܐ ܒܛܲܝܒܿܘܼܬܼܵܟܼ܀ ܘܲܚܢܲܢ ܕܐܸܚܲܕܼܢܲܢ ܓܵܘܣܵܐ؛ ܒܲܨܠܘܿܬܼܵܗ݁ ܕܲܡܒܲܪܲܟܼܬܵܐ. ܡܲܪܝܲܡ ܒܬܼܘܼܠܬܵܐ ܩܲܕܝܼܫܬܵܐ؛ ܐܸܡܹܗ ܕܝܼܫܘܿܥ ܦܵܪܘܿܩܲܢ. ܒܵܗ̇ ܢܸܬܼܢِܛܲܪ ܡ̣ܢ ܒܝܼܫܵܐ؛ ܘܢܸܙܟܸܿܐ ܠܟܼܠܗܹܝܢ ܨܸܢܥܵܬܹ̈ܗ܀ ܘܲܒܼܗ̇ܘ ܝܵܘܡܵܐ ܪܲܒܵܐ ܕܒܼܘܼܚܪܵܢܵܐ؛ ܕܩܵܝܡܝܼܢ ܡܝܼܬܹ̈ܐ ܡ̣ܢ ܩܲܒܼܪܹ̈ܐ ܘܦܵܪܫܝܼܢ ܛܵܒܹ̈ܐ ܡ̣ܢ ܒܝܼܫܹ̈ܐ؛ ܢܸܫܬܿܘܸܐ ܕܥܲܡܵܗ̇ ܢܸܬܼܒܲܣܲܡ. ܒܲܓܼܢܘܿܢܵܐ ܕܡܲܠܟܿܘܼܬܼ ܪܵܘܡܵܐ؛ ܘܢܸܙܡܲܪ ܫܘܼܒܼܚܵܐ ܬܠܝܼܬܼܵܝܵܐ؛ ܠܐܲܒܼܵܐ ܘܲܒܼܪܵܐ ܘܪܘܼܚ ܩܘܼܕܼܫܵܐ܀
ܥܵܠܲܡ. ܬܸܓܼܡܹ̈ܐ ܘܛܲܟܼܣܹ̈ܐ ܕܪ̈ܘܼܚܵܢܹܐ ܥܲܡܗܘܿܢ ܕܟܼܵܗܢܹ̈ܐ ܒܥܹܕܬܵܐ ܗܵܐ ܙܵܡ݁ܪܝܼܢ ܬܸܫܒܿܘܿܚܬܵܐ؛ ܒܕܼܘܼܟܼܪܵܢ ܣܵܗܕܵܐ ܩܲܕܝܼܫܵܐ ܡܵܪܝ ܓܝܼܘܲܪܓܝܼܣ ܕܲܢܨܲܚ ܘܲܙܟܼܵܐ ܘܐܸܬܼܟܲܠܲܠ܀ ܘܣܲܝܒܲܪ ܚܲܫܹ̈ܐ ܘܐܘܼܠܨܵܢܹ̈ܐ؛ ܘܢܘܼܪܵܐ ܘܣܲܝܦܵܐ ܘܲܪܓܼܘܼܡܝܵܐ. ܘܫܸܢܕܹ̈ܐ ܕܲܙܢܝܼ̈ܢ ܙܢܝܼ̈ܢ؛ ܡܲܣܒܿܠܝܼܢ ܗَܘ̣ܵܘ ܠܹܗ ܪ̈ܵܕܘܿܦܹܐ. ܘܐܲܒܼܗܸܬ̣ ܠܡܲܠܟܵܐ ܪܲܫܝܼܥܵܐ؛ ܕܪܵܕܹܦ ܗَܘ̣ܵܐ ܠܥܲܒܼܕܹ̈ܐ ܛܵܒܹ̈ܐ. ܘܒܲܣܲܪ ܠܐܝܼܩܵܪ ܫܘܼܠܛܵܢܹܗ؛ ܐܵܦ ܠܐܲܠܵܗܹ̈ܐ ܕܣܵܓܹܕܼ ܗَ̣ܘܵܐ. ܙܹܝܘܿܣ ܘܐܵܦܲܠܘܿ ܘܐܲܪܛܹܡܝܼܣ؛ ܥܒܼܵܕܼ ܐܝܼܕܲܝ̈ܵܐ ܕܒܲܪܢܵܫܵܐ܀ ܘܲܩ̣ܥܵܐ ܓܲܢَܒܵܪ ܚܲܝܠܵܐ ܡܵܪܝ ܓܝܼܘܲܪܓܝܼܣ؛ ܘܐܸܡܲܪ ܠܪܵܘܪ̈ܒܼܵܢܲܝ ܡܲܠܟܵܐ. ܕܠܵܐ ܠܲܡ ܬܸܣܓܿܕܼܘܿܢ ܠܲܦܬܲܟܼܪܹ̈ܐ؛ ܓܠܝܼܦܹ̈ܐ ܡܪ̈ܲܟܿܒܲܝ ܠܐܘܼܡܵܢܹ̈ܐ. ܕܗܵܐ ܡܫܝܼܚܵܐ ܡܲܠܟܵܐ ܕܡܲܠܟܹ̈ܐ؛ ܘܡܵܪܵܐ ܕܟܼܠܗܘܿܢ ܐܲܠܵܗܹ̈ܐ. ܡܵܘܪܸܬܼ ܠܟܼܠܗܘܿܢ ܕܵܚܠܵܘ̈ܗܝ؛ ܓܢܘܿܢܵܐ ܘܛܘܼܒܼܵܐ ܕܠܵܐ ܥܵܒܲܪ. ܘܡܲܠܒܸܿܫ ܫܘܼܒܼܚܵܐ ܒܡܲܠܟܿܘܼܬܹܗ؛ ܠܣܵܗܕܹ̈ܐ ܙܗܲܝ̈ܵܐ ܕܗܲܝܡܸܢܘ ܒܹܗ܀ ܘܟܲܕܼ ܒܲܪܝܼܟܼ ܗَܘ̣ܵܐ ܒܲܨܠܘܿܬܼܵܐ؛ ܩܕܼܵܡ ܡܵܪܹܗ ܡܸܬܼܟܲܫܲܦ ܗَܘ̣ܵܐ ܘܒܼܵܥܹܐ ܘܐܵܡܲܪ. ܕܟܼܠ ܐܲܝܢܵܐ ܕܲܡܥܲܗܸܕܼ ܠܹܗ؛ ܠܝܵܘܡܵܐ ܗܵܢܵܐ ܕܲܪܕܼܝܼܦܘܼܬܼܝ. ܐܲܥܒܲܪ ܡܸܢܹܗ ܒܛܲܝܒܿܘܼܬܼܵܟܼ؛ ܒܲܪܕܵܐ ܘܟܲܦܢܵܐ ܘܡܵܘܬܵܢܵܐ. ܘܩܲܡܨܵܐ ܘܙܵܚܠܵܐ ܘܨܲܪܨܘܼܪܵܐ؛ ܘܫܵܘܒܵܐ ܡܚܲܒܸܿܠ ܚܲܩ̈ܠܵܬܼܵܐ. ܘܕܸܚܠِܬܼܵܐ ܕܠܲܝ̈ܠܵܘܵܬܼܵܐ؛ ܘܟܼܠ ܡܲܪ̈ܕܘܵܬܼܵܐ ܒܝܼ̈ܫܵܬܼܵܐ؛ ܘܢܲܛܲܪ ܠܟܼܠܵܗ݁ ܥܵܡܲܪܬܵܐ؛ ܒܚܲܝܠܵܐ ܪܲܒܵܐ ܕܐܲܠܵܗܘܼܬܼܵܟܼ܀
ܢܹܐܡܲܪ. ܥܲܡ ܟܸܢܫܹ̈ܐ ܥܛܝܼܦܲܝ̈ ܢܘܼܗܪܵܐ؛ ܘܥܲܡ ܣܝܼ̈ܥܵܬܼܵܐ ܕܡܲܠܲܐܟܹ̈ܐ. ܢܛܝܼܪ ܠܵܟܼ ܓܢܘܿܢܵܐ ܒܲܫܡܲܝܵܐ؛ ܡ̣ܢ ܝܲܡܝܼܢܹܗ ܕܡܲܠܟܵܐ ܡܫܝܼܚܵܐ ܦܵܪܘܿܩܲܢ܀ ܐܲܒܼܘܼܢ ܙܲܗܝܵܐ ܘܩܲܕܝܼܫܵܐ؛ ܡܵܪܝ ܦܠܵܢ ܢܲܨܝܼܚܵܐ. ܕܲܦܠܲܚܬܿ ܦܘܼܠܚܵܢ ܟܹܐܢܘܼܬܼܵܐ؛ ܒܥܹܕܬܵܐ ܡܟܼܝܼܪܬܹܗ ܕܲܡܫܝܼܚܵܐ. ܘܲܪܚܸܡܼܬܿ ܨܵܘܡܵܐ ܘܲܨܠܘܿܬܼܵܐ؛ ܘܚܘܼܒܵܐ ܓܡܝܼܪܵܐ ܘܫܲܪܝܼܪܵܐ܀ ܘܗܵܐ ܣܝܼܡܬܼܵܐ ܕܦܲܓܼܪܵܟܼ ܙܲܗܝܵܐ؛ ܢܵܒܼܥܝܼܢ ܡܸܢܵܗ̇ ܥܘܼܕܼܪ̈ܵܢܹܐ. ܘܚܘܼܠܡܵܢܵܐ ܠܟܼܠ ܕܐܲܠܝܼܨܝܼܢ؛ ܘܡܸܬܼܓܵܘܣܝܼܢ ܒܲܨܠܵܘ̈ܵܬܼܵܟܼ܀ ܪܲܒܿ ܚܲܝܠܵܐ ܕܒܹܗ ܙܟܲܝܬܵܝܗܝ ܠܐܵܟܹܠܩܲܪܨܵܐ؛ ܘܡܲܢܥܵܟܼ ܠܐܲܬܼܪܵܐ ܡܠܸܐ ܛܘܼܒܹ̈ܐ. ܘܗܵܫܵܐ ܐܲܦܝܼܣ ܚܠܵܦ ܟܠܲܢ؛ ܕܥܲܡܵܟܼ ܢܸܙܡܲܪ ܒܡܲܠܟܿܘܼܬܼܵܐ؛ ܫܘܼܒܼܚܵܐ ܚܲܕܼܬܼܵܐ ܕܠܵܐ ܦܵܛܲܪ؛ ܠܐܲܒܼܵܐ ܘܲܒܼܪܵܐ ܘܪܘܼܚ ܩܘܼܕܼܫܵܐ.
ܘܟܸܢ ܟܡܵܐ ܕܨܵܒܹܝܢ.
ܘܡܵܐ ܕܡܲܦܸܩ ܦܘܼܪ̈ܫܵܢܹܐ ܡ̣ܢ ܬܲܢܘܼܪܬܵܐ؛ ܣܵܐܹܡ ܠܗܘܿܢ ܒܦܵܬܼܘܿܪܵܐ.
[ܕܐܲܝܟܲܢ ܡܸܣܬܲܕܪܝܼܢ ܦܘܼܪ̈ܫܵܢܹܐ ܒܦܵܬܼܘܿܪܵܐ؛
ܫܵܩܹ݁ܠ ܟܵܗܢܵܐ ܠܦܝܼܠܵܣܵܐ ܒܐܝܼܕܹܗ ܘܡܲܥܛܲܪ ܠܹܗ ܒܒܸܣܡܹ̈ܐ ܘܐܵܡܲܪ؛ ܒܲܣܸܡ ܡܵܪܲܢ ܘܐܲܠܵܗܲܢ ܦܝܼܠܵܣܵܐ ܗܵܢܵܐ ܐܲܝܟܼ ܦܝܼܠܵܣܹܗ ܕܐܵܗܪܘܿܢ ܟܵܗܢܵܐ ܙܲܗܝܵܐ ܒܓܼܵܘ ܡܲܫܟܲܢܙܲܒܼܢܵܐ؛ ܘܕܲܫܠܝܼܚܹ̈ܐ ܒܥܸܠܝܼܬܼܵܐ. ܒܵܪܘܿܝܵܐ ܕܥܸܩܵܪܹ̈ܐ ܒܲܣܝܼܡܹ̈ܐ ܘܲܕܼܗܹܪ̈ܘܿܡܹܐ ܗܲܢܝܼ̈ܐܹܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܫܵܩܹܠ ܠܦܘܼܪܫܵܢܵܐ ܡܲܠܟܵܝܵܐ ܘܟܲܕܼ ܡܲܥܛܲܪ ܠܹܗ ܐܵܡܲܪ؛ ܡܸܬܼܦܪܸܫ ܦܘܼܪܫܵܢܵܐ ܡܲܠܟܵܝܵܐ؛ ܒܫܸܡ ܐܲܒܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܟܸܢ ܪܵܫܹ݁ܡ ܠܦܵܬܼܘܿܪܵܐ ܘܐܵܡܲܪ؛ ܡܸܬܼܪ̱ܫܸܡ ܦܝܼܠܵܣܵܐ ܗܵܢܵܐ ܒܦܲܓܼܪܵܐ ܡܲܚܝܵܢܵܐ ܕܡܵܪܲܢ ܝܑܼܫܘܿܥ ܡܫܝܼܚܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܟܲܕܼ ܦܵܪܹܫ ܠܲܩܨܵܬܼܵܐ ܐܵܡܲܪ؛ ܡܸܬܼܦܪܸܫ ܦܘܼܪܫܵܢܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ. ܟܡܵܐ ܕܨܵܒܹܐ.]
ܘܟܸܢ ܫܵܩܹܠ ܩܲܠܝܼܠ ܒܸܣܡܵܐ ܘܐܵܡܲܪ. ܡܸܫܬܲܪܝܵܐ ܦܲܚܵܪܵܐ ܗܵܕܹܐ ܘܬܸܗܦܘܿܟܼ ܠܲܟܼܝܵܢܵܗܿ ܩܲܕܼܡܵܝܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ. ܘܒܼܵܕܲܪ ܠܹܗ ܒܓܼܵܘܵܗܿ ܠܵܘ ܨܠܝܼܒܼܵܐܝܼܬܼ. ܘܗܵܝܕܹܝܢ ܢܵܚܹܬܼ ܡܼܢ ܬܲܢܘܼܪܬܵܐ؛ ܟܲܕܼ ܦܵܬܼܘܿܪܵܐ ܒܐܝܼܕܹܗ ܕܝܲܡܝܼܢܵܐ؛ ܘܦܝܼܪܡܵܐ ܒܐܝܼܕܹܗ ܕܣܸܡܵܠܵܐ؛ ܘܡܲܥܸܠ ܠܗܘܿܢ ܠܡܲܕܼܒܿܚܵܐ؛ ܒܡܲܙܡܘܿܪܵܐ ܗܵܢܵܐ.
ܫܲܒܲܚܘ ܠܡܵܪܝܵܐ ܬܸܫܒܿܘܿܚܬܵܐ ܚܕܲܬܵܐ* ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ* ܫܲܒܲܚܘ ܠܡܵܪܝܵܐ ܘܒܲܪܸܟܼ ܠܲܫܡܹܗ܋ ܣܲܒܲܪܘ ܡ̣ܢ ܝܘܿܡ ܠܝܘܿܡ ܦܘܼܪܩܵܢܹܗ* ܐܸܫܬܲܥܵܘ ܒܥܲܡܡܹ̈ܐ ܐܝܼܩܵܪܹܗ* ܘܲܒܼܟܼܠܗܘܿܢ ܥܲܡܡܹ̈ܐ ܥܒܼܵܕܵܘ̈ܗܝ* ܡܸܛܠ ܕܪܲܒܿܘܼ ܡܵܪܝܵܐ ܘܲܡܫܲܒܲܚ ܛܵܒܼ* ܘܲܕܼܚܝܼܠ ܥܲܠ ܟܠܗܘܿܢ ܐܲܠܵܗܹ̈ܐ* ܡܸܛܠ ܕܟܼܠܗܘܿܢ ܐܲܠܵܗܹ̈ܐ ܕܥܲܡܡܹ̈ܐ ܣܪܝܼܩܝܼܢ ܐܸܢܘܿܢ* ܡܵܪܝܵܐ ܫܡܲܝܵܐ ܥܒܲܕܼ* ܙܝܼܘܵܐ ܘܫܘܼܒܼܚܵܐ ܩܕܼܵܡܵܘܗܝ* ܥܘܼܫܢܵܐ ܘܬܸܫܒܿܘܿܚܬܵܐ ܒܡܲܩܕܫܹܗ* ܗܲܒܼܘ ܠܡܵܪܝܵܐ ܫܲܪ̈ܒܼܵܬܼܵܐ ܕܥܲܡܡܹ̈ܐ* ܗܲܒܼܘ ܠܡܵܪܝܵܐ ܬܸܫܒܿܘܿܚܬܵܐ ܘܐܝܼܩܵܪܵܐ* ܗܲܒܼܘ ܠܡܵܪܝܵܐ ܐܝܼܩܵܪܵܐ ܠܲܫܡܹܗ* ܫܩܘܿܠܘ ܩܘܼܪ̈ܒܵܢܹܐ ܘܥܘܿܠܘ ܠܕܼܵܪ̈ܵܘܗܝ* ܣܓܼܘܿܕܼܘ ܠܡܵܪܝܵܐ ܒܕܼܵܪܬܵܐ ܕܩܘܼܕܼܫܹܗ*
ܘܣܵܐܹܡ ܠܦܵܬܼܘܿܪܵܐ ܒܟܼܵܘܬܼܵܐ ܡ̣ܢ ܝܲܡܝܼܢܵܐ ܕܡܲܕܼܒܿܚܵܐ؛ ܘܦܝܼܪܡܵܐ ܬܵܠܹܐ ܠܹܗ ܒܕܼܘܟܿܬܹܗ. ܘܗܵܝܕܹܝܢ ܢܵܦܹܩ ܡ̣ܢ ܡܲܕܼܒܿܚܵܐ ܠܒܹܝܬܼ ܕܝܵܩܘܿܢ ܠܡܸܡܙܲܓܼ ܟܵܣܵܐ.
♱♱♱♱♱♱♱♱♱♱♱♱♱
[ܕܟܲܕܼ ܢܸܡܙܘܿܓܼ ܠܹܗ ܟܵܣܵܐ.
ܫܵܩܹܠ ܟܵܗܢܵܐ ܠܟܵܣܵܐ ܒܐܝܼܕܹܗ ܘܡܲܥܛܲܪܠܹܗ ܒܒܸܣܡܹ̈ܐ ܟܲܕܼ ܐܵܡܲܪ؛ ܒܲܣܸܡ ܡܵܪܲܢ ܘܐܲܠܵܗܲܢ ܟܵܣܵܐ ܗܵܢܵܐ ܐܲܝܟܼ ܟܵܣܹܗ ܕܐܵܗܪܘܿܢ ܟܵܗܢܵܐ ܙܲܗܝܵܐ ܒܓܼܵܘ ܡܲܫܟܲܢܙܲܒܼܢܵܐ؛ ܘܕܲܫܠܝܼܚܹ̈ܐ ܒܥܸܠܝܼܬܼܵܐ. ܒܵܪܘܿܝܵܐ ܕܥܸܩܵܪܹ̈ܐ ܒܲܣܝܼܡܹ̈ܐ ܘܲܕܼܗܹܪ̈ܘܿܡܹܐ ܗܲܢܝܼ̈ܐܹܐ ܡܵܪܵܐ ܕܟܼܠ؛ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.]
ܩܲܕܼܡܵܝܑܼܬܼ؛ ܡܲܝܬܸܿܐ ܡܢܹܩܝܼܬܼܵܐ ܕܚܲܡܪܵܐ ܪܹܫܵܝܵܐ؛ ܘܐܵܚܹܕܼ ܠܵܗ̇ ܒܐܝܼܕܹܗ ܕܝܲܡܝܼܢܵܐ؛ ܘܟܼܵܣܵܐ ܒܐܝܼܕܹܗ ܕܣܸܡܵܠܵܐ. ܘܪܵܡܹܐ ܚܲܡܪܵܐ ܒܟܼܵܣܵܐ ܨܠܝܼܒܼܵܐܝܼܬܼ؛ ܡ̣ܢ ܡܲܕܼܢ̱ܚܵܐ ܠܡܲܥܪܒܼܵܐ ܡ̣ܢ ܓܲܪܒܿܝܵܐ ܠܬܲܝܡܢܵܐ ܘܐܵܡܲܪ؛ ܡܸܫܬܲܦܲܥ ܕܡܹܗ ܝܲܩܝܼܪܵܐ ܕܦܵܪܘܿܩܲܢ ܒܟܼܵܣܵܐ ܗܵܢܵܐ؛ ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܟܸܢ ܫܵܩܹܠ ܙܵܒܼܘܿܪܵܐ ܕܡܲܝ̈ܵܐ؛ ܘܢܵܣܹܟܼ ܒܟܼܵܣܵܐ ܒܹܗ ܒܲܙܢܵܐ ܒܐܵܬ̤ܵܐ ܕܲܨܠܝܼܒܼܵܐ ܘܐܵܡܲܪ؛ ܡܸܬܼܡܲܙܓܼܝܼܢ ܡܲܝ̈ܵܐ ܒܚܲܡܪܵܐ ܘܚܲܡܪܵܐ ܒܡܲܝ̈ܵܐ ܘܢܸܗܘܘܿܢ ܬܪܲܝܗܘܿܢ ܚܲܕܼ. ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
ܘܬܼܘܼܒܼ ܫܵܩܹܠ ܡܢܝܼܩܝܼܬܼܵܐ ܕܚܲܡܪܵܐ؛ ܘܪܵܡܹܐ ܒܟܼܵܣܵܐ ܘܐܵܡܲܪ؛ ܘܚܲܕܼ ܡ̣ܢ ܐܸܣܛܪ̈ܵܛܝܼܘܿܛܹܐ ܡܚܵܝܗܝ ܒܕܲܦܢܹܗ ܕܡܵܪܲܢ ܒܠܘܼܟܵܝܬܼܵܐ. ܘܡܸܚܕܼܵܐ ܢܦܲܩܘ ܕܡܵܐ ܘܡܲܝ̈ܵܐ؛ ܘܡ݁ܢ ܕܲܚܙܵܐ ܐܲܣܗܸܕܼ ܘܫܲܪܝܼܪܵܐ ܗَ̣ܝ ܣܵܗܕܘܼܬܹܗ. ܘܗ̤ܘ ܝܵܕܲܥ ܕܲܫܪܵܪܵܐ ܐܸܡܲܪ؛ ܕܐܵܦ ܐܲܢَܬܿܘܿܢ ܬܗܲܝܡܢܘܼܢ. ܒܫܸܡ ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ ܠܥܵܠܡܝܼܢ.
[ܘܫܵܩܹ݁ܠ ܠܟܵܣܵܐ ܒܝܲܡܝܼܢܹܗ ܘܦܝܼܪܡܵܐ ܒܣܸܡܵܠܹܗ ܘܡܲܥܒܲܪ ܠܹܗ ܠܡܲܕܒܚܵܐ ܟܲܕܼ ܐܵܡܲܪ؛ ܡܵܢܵܐ ܐܸܦܪܘܿܥ ܠܡܵܪܝܵܐ ܕܟܼܠܗܘܿܢ ܦܘܼܪ̈ܥܵܢܵܘܗܝ ܥܠܲܝ܋ ܟܵܣܵܐ ܕܦܘܼܪܩܵܢܵܐ ܐܹܩܲܒܸܿܠ܋ ܘܒܲܫܡܹܗ ܕܡܵܪܝܵܐ ܐܸܩܪܸܐ܋ ܢܸܕܼܪ̈ܲܝ ܠܡܵܪܝܵܐ ܐܸܦܪܘܿܥ܋ ܩܕܼܵܡ ܟܠܹܗ ܥܲܡܵܐ܋ ܘܲܒܼܕܵܪܹ̈ܐ ܕܒܲܝܬܹܿܗ ܕܡܵܪܝܵܐ܋ ܘܲܒܼܓܵܘܹܟܼܝ ܥܹܕܬܵܐ܋ ܘܲܒܼܓܵܘܵܟܼ ܡܲܕܼܒܿܚܵܐ܋ ܘܲܒܼܓܼܵܘܵܟܼ ܩܕܼܘܿܫ ܩܘܼܕܼܫܝܼ̈ܢ܋ ܪܹܝܚܵܐ ܕܚܲܝܹ̈ܐ ܦܵܐܲܚ ܗَܘ̣ܵܐ ܡ̣ܢ ܓܵܘ ܥܘܼܡܩܹ̈ܐ ܬܲܚܬܵܝܹ̈ܐ܋ ܘܣܵܩܘܼܗܝ ܡܝܼܬܹ̈ܐ ܘܐܸܬܼܢܲܚܲܡܘ؛ ܘܐܵܘܕܝܼܘ ܒܚܲܝܠܹܗ ܕܲܨܠܝܼܒܼܵܐ܋]
ܫܠ̣ܡ ܛܲܟܼܣܵܐ ܕܨܘܼܒܵܬܼܵܐ
ܘܲܠܝܵܗ ܫܘܼܒܼܚܵܐ ܐܲܡܝܼܢܵܐ؛
ܐܵܡܹܝܢ.
♱♱♱♱♱♱♱♱♱♱♱♱♱
The Order of Ornamenting (Kneading and Baking of the Eucharistic Bread). Web and Font Design by: Fr. Lawrance Namato