ܚܲܕܼܒܫܲܒܵܐ ܕܲܬ̣ܪܹܝܢ ܕܡܵܪܝ ܡܘܼܫܹܐ
ܬܸܢܝܵܢ ܢܵܡܘܿܣܵܐ؛ ܝܐ؛ 13‐ ܝܒ؛ 2
ܬܸܒ̣ܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܚܲܡܫܵܐ ܕܐܘܿܪܵܝܬܵܐ؛
ܐܲܚܲܝ̈ ܒܲܪܸܟ̣ܡܵܪܝ܀
ܘܐ݇ܡܸܪܹܗ ܡܘܼܫܹܐ ܐܸܢ ܫܵܡܥܝܼܬܘܿܢ ܠܦܘܼܩܕܵܢܹ̈ܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؛ ܕܡܲܚܸܒܝܼܬܘܿܢ ܠܡܵܪܝܵܐ ܐܲܠܵܗܵܘܟ̣ܘܿܢ ܘܦܵܠܚܝܼܬܘܿܢ ܠܹܗ؛ ܡ̣ܢ ܟܠܹܗ ܠܸܒܵܘܟ̣ܘܿܢ ܘܡ̣ܢ ܟܠܵܗ̇ ܓܵܢܵܘܟ̣ܘܿܢ܀ ܒܸܬ ܝܵܗ݇ܒ̣ܸܢ ܡܸܛܪܵܐ ܕܐܲܪܥܵܘܟ̣ܘܿܢ ܒܙܲܒ̣ܢܹܗ؛ ܩܲܕ݇ܡܵܝܬܵܐ ܘܐ݇ܚܵܪܵܝܬܵܐ؛ ܘܒܸܬ ܓ̰ܲܡܥܸܬ̇ ܕܸܚܠܘܼܟܼ ܘܚܲܡܪܘܼܟܼ ܘܡܸܫܚܘܼܟܼ܀ ܘܒܸܬ ܝܵܗ݇ܒ̣ܸܢ ܓܸܠܵܐ ܒܕܸܫܬܵܐ ܩܵܐ ܪܸܣܩܘܼܟܼ؛ ܘܐܵܟ̣ܠܸܬ̇ ܘܣܵܒ̣ܥܸܬ̇܀ ܗܘܹܐܡܘܿܢ ܗܸܫܝܲܪ ܕܠܵܐ ܦܵܐܹܫ ܫܘܼܕܠܵܐ ܠܸܒܵܘܟ̣ܘܿܢ؛ ܘܩܵܠܒܝܼܬܘܿܢ ܘܦܵܠܚܝܼܬܘܿܢ ܠܐܲܠܵܗܹ̈ܐ ܐ݇ܚܹܪ̈݇ܢܹܐ ܘܣܵܓ̣ܕܝܼܬܘܿܢ ܠܗ݇ܘܿܢ؛ ܘܒܸܬ ܚܵܝܡܵܐ ܟܲܪܒܹܗ ܕܡܵܪܝܵܐ ܥܲܠܵܘܟ̣ܘܿܢ؛ ܘܒܸܬ ܡܲܟܠܹܐ ܫܡܲܝܵܐ ܕܠܵܐ ܗܵܘܹܐ ܡܸܛܪܵܐ ܘܐܲܪܥܵܐ ܠܵܐ ܝܵܗ݇ܒ̣ܵܐ ܡܲܗܨܘܼܠܹ̈ܐ؛ ܘܒܸܬ ܬܵܠܩܝܼܬܘܿܢ ܓ̰ܲܠܕܹܐ ܡ̣ܢ ܐܲܪܥܵܐ ܛܵܒ̣ܬܵܐ ܕܝܵܗ݇ܒ̣ܸܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ܀ ܘܡܲܬܒ̣ܝܼܬܘܿܢ ܐܲܢܹܐ ܦܘܼܩܕܵܢܹ̈ܐ ܒܠܸܒܵܘܟ̣ܘܿܢ؛ ܘܒܓܵܢܵܘܟ̣ܘܿܢ؛ ܘܟܬܘܿܪܘܿܢ ܠܗ݇ܘܿܢ ܢܝܼܫܲܢܩܵܐ. ܥܲܠ ܐܝܼܕܵܬܵܘ̈ܟ̣ܘܿܢ؛ ܘܗܵܘܝܼ ܪܘܼܫܡܵܐ ܓܵܘ ܒܹܝܬ̣ ܥܲܝܢܵܘ̈ܟ̣ܘܿܢ܀ ܘܡܲܠܦܘܿܢ ܠܗ݇ܘܿܢ ܩܵܐ ܒܢܘܿܢܵܘ̈ܟ̣ܘܿܢ؛ ܕܗܲܡܙܸܡܝܼ ܒܝܼܲܝܗܝ؛ ܐܝܼܡܲܢ ܕܐܵܙܠ݇ܝܼܬܘܿܢ ܒܐܘܼܪܚܵܐ؛ ܘܐܝܼܡܲܢ ܕܝܵܬܒ̣ܝܼܬܘܿܢ ܓܵܘ ܒܵܬܵܘ̈ܟ̣ܘܿܢ؛ ܘܐܝܼܡܲܢ ܕܕܵܡܟ̣ܝܬܘܿܢ؛ ܘܐܝܼܡܲܢ ܕܩܵܝܡܝܼܬܘܿܢ܀ ܘܟܬܘܿܒ̣ܘܿܢ ܠܗ݇ܘܿܢ ܥܲܠ ܐ݇ܣܩܘܼܦܝܵܬܹ̈ܐ ܕܒܵܬܵܘ̈ܟ̣ܘܿܢ؛ ܘܥܲܠ ܬܲܪ̈ܥܵܢܵܘܟ̣ܘܿܢ؛ ܕܙܵܝܕܝܼ ܝܵܘܡܵܢܵܘ̈ܟ̣ܘܿܢ ܒܐܲܪܥܵܐ ܕܝ݇ܡܹܐܠܹܗ ܡܵܪܝܵܐ ܐܲܠܵܗܵܘܟ̣ܘܿܢ ܠܒܵܒܵܬܵܘ̈ܟ̣ܘܿܢ ܕܝܵܗ݇ܒ̣ܸܠ ܠܗ݇ܘܿܢ؛ ܐܲܝܟܼ ܝܵܘܡܵܢܹ̈ܐ ܕܫܡܲܝܵܐ ܥܲܠ ܐܲܪܥܵܐ܀ ܘܐܸܢ ܢܵܛܪܝܼܬܘܿܢ ܟܠܲܝܗܝ ܐܲܢܹܐ ܦܘܼܩܕܵܢܹ̈ܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ؛ ܘܥܵܒ̣ܕܝܼܬܘܿܢ ܠܗ݇ܘܿܢ؛ ܘܡܲܚܒܝܼܬܘܿܢ ܠܡܵܪܝܵܐ ܐܲܠܵܗܵܘܟ̣ܘܿܢ؛ ܘܚܵܕܪܝܼܬܘܿܢ ܒܟܠܲܝܗܝ ܐܘܼܪ̈ܚܵܬܹܗ؛ ܘܬܵܒܥܝܼܬܘܿܢ ܐܸܠܹܗ܀ ܒܸܬ ܬܵܠܸܩ ܡܵܪܝܵܐ ܐܲܢܹܐ ܟܠܲܝܗܝ ܛܵܝܸܦܹ̈ܐ ܡ̣ܢ ܩܵܕ݇ܡܵܘܟ̣ܘܿܢ؛ ܘܒܸܬ ܝܵܪܬܝܼܬܘܿܢ ܠܛܵܝܸܦܹ̈ܐ ܒܘܼܫ ܓܘܼܪܹ̈ܐ ܘܒܘܼܫ ܚܲܝܠܵܢܹ̈ܐ ܡܸܢܵܘܟ̣ܘܿܢ܀ ܟܠ ܕܘܼܟܬܵܐ ܕܦܵܣܥܵܐ ܒܝܼܵܗ̇ ܐܸܫܬܵܐ ܕܐܲܩܠܵܘܟ̣ܘܿܢ؛ ܐܸܠܵܘܟ̣ܘܿܢ ܒܸܬ ܗܵܘܝܵܐ. ܡ̣ܢ ܒܲܪܝܼܵܐ ܘܠܸܒ̣ܢܵܢ ܘܡ̣ܢ ܢܲܗܪܵܐ ܠܢܲܗܪܵܐ ܦܪܵܬ؛ ܘܗܲܠ ܝܵܡܵܐ ܐ݇ܚܵܪܵܝܵܐ ܗܵܘܹܐ ܬܸܚܘܼܒ ܕܝܼܵܘܟ̣ܘܿܢ܀ ܘܗܝܼܟ̰ ܐ݇ܢܵܫܵܐ ܠܹܐ ܟܵܠܹܗ ܩܵܕ݇ܡܵܘܟ̣ܘܿܢ؛ ܘܙܕܘܿܥܬܵܘܟ̣ܘܿܢ ܒܸܬ ܝܵܗ݇ܒ̣ܸܠ ܡܵܪܝܵܐ ܥܲܠ ܦܵܬܵܐ ܕܟܠܵܗ̇ ܐܲܪܥܵܐ ܕܦܵܣܥܝܼܬܘܿܢ ܒܝܼܵܗ̇؛ ܐܲܝܟܼ ܕܐ݇ܡܸܪܹܗ ܐܸܠܵܘܟ̣ܘܿܢ ܡܵܪܝܵܐ܀ ܚܙܹܐܡܘܿܢ ܕܒܝܼܵܗܒ̣ܵܐ ܝ݇ܘܸܢ ܩܵܕ݇ܡܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ ܒܘܼܪ̈ܟܵܬܹܐ ܘܠܵܘܛܵܬܹ̈ܐ܀ ܒܘܼܪ̈ܟܵܬܹܐ ܐܸܢ ܡܲܨܝܸܬܝܼܬܘܿܢ ܠܦܘܼܩܕܵܢܹ̈ܐ ܕܡܵܪܝܵܐ ܐܲܠܵܗܵܘܟ̣ܘܿܢ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ܀ ܘܠܵܘܛܵܬܹ̈ܐ ܐܸܢ ܠܵܐ ܡܲܨܝܸܬܝܼܬܘܿܢ ܦܘܼܩܕܵܢܹ̈ܐ ܕܡܵܪܝܵܐ ܐܲܠܵܗܵܘܟ̣ܘܿܢ؛ ܘܐܸܢ ܩܵܠܒܝܼܬܘܿܢ ܡ̣ܢ ܐܘܼܪܚܵܐ ܕܒܸܦܩܵܕܵܐ ܝ݇ܘܸܢ ܐܸܠܵܘܟ̣ܘܿܢ ܐܸܕܝܘܿܡ݇ ܝܵܘܡܵܐ ܘܐܵܙܠ݇ܝܼܬܘܿܢ ܒܵܬ݇ܪ ܐܲܠܵܗܹ̈ܐ ܐ݇ܚܹܪ̈݇ܢܹܐ ܕܠܹܐ ܝܵܕܥܝܼܬܘܿܢ ܠܗ݇ܘܿܢ܀ ܘܟܲܕ ܡܲܥܒ̣ܸܪܘܼܟܼ ܡܵܪܝܵܐ ܐܲܠܵܗܘܼܟܼ ܠܐܲܪܥܵܐ ܕܒܸܥܒ̣ܵܪܵܐ ܝ݇ܘܸܬ̇ ܬܵܡܵܐ ܠܸܪܝܵܬܵܗ̇؛ ܗܲܒ̣݇ܠ ܒܘܼܪ̈ܟܵܬܹܐ ܥܲܠ ܛܘܼܪܵܐ ܕܓܲܪܙܝܼܡ؛ ܘܠܵܘܛܵܬܹ̈ܐ ܥܲܠ ܛܘܼܪܵܐ ܕܓܒܸܠ܀ ܗܵܐ ܕܘܼ ܝ݇ܢܵܐ ܒܥܸܒ̣ܪܵܐ ܕܝܘܿܪܕܢܵܢ ܒܵܬ݇ܪ ܐܘܼܪܚܵܐ ܠܓܢܵܝܬܵܐ ܕܫܸܡܫܵܐ ܒܐܲܪܥܵܐ ܕܟܢܲܥܢܵܝܹ̈ܐ ܘܒܸܬܝܵܒ̣ܵܐ ܝ݇ܢܵܐ ܒܥܵܪܵܒܵܐ [ܒܒܲܪܝܼܵܐ] ܒܲܪܩܘܼܒ̣ܠ ܓܲܠܓܵܠܵܐ؛ ܒܲܪܩܘܼܒ̣ܠ ܒܹܝܬ̣ ܒܲܠܘܼܛܵܐ ܕܡܲܡܪܹܐ܀ ܣܵܒܵܒ ܒܸܥܒ̣ܵܪܵܐ ܝ݇ܬܘܿܢ ܝܘܿܪܕܢܵܢ؛ ܠܸܥܒ̣ܵܪܵܐ ܠܸܪܝܵܬܵܐ ܐܲܪܥܵܐ ܕܝܵܗ݇ܒ̣ܸܠ ܠܵܘܟ̣ܘܿܢ ܡܵܪܝܵܐ ܐܲܠܵܗܵܘܟ̣ܘܿܢ؛ ܘܒܸܬ ܝܵܪܬܝܼܬܘܿܢ ܠܵܗ̇ ܘܝܵܬܒ̣ܝܼܬܘܿܢ ܓܵܘܵܗ̇܀ ܘܢܵܛܪܝܼܬܘܿܢ ܘܥܵܒ̣ܕܝܼܬܘܿܢ ܟܠܲܝܗܝ ܢܵܡܘܿܣܹ̈ܐ ܘܕܝܼܘܵܢܹ̈ܐ ܕܒܝܼܵܗ݇ܒ̣ܵܐ ܝ݇ܘܸܢ ܩܵܕ݇ܡܵܘܟ̣ܘܿܢ ܒܐܵܗܵܐ ܝܵܘܡܵܐ܀ ܐܲܢܹܐ ܢܵܡܘܿܣܹ̈ܐ ܘܕܝܼܘܵܢܹ̈ܐ ܕܢܵܛܪܝܼܬܘܿܢ ܘܥܵܒ̣ܕܝܼܬܘܿܢ ܒܐܲܪܥܵܐ ܕܝܵܗ݇ܒ̣ܸܠ ܠܵܘܟ̣ܘܢ ܡܵܪܝܵܐ ܐܲܠܵܗܵܐ ܕܒܵܒܵܘܵܬܵܘ̈ܟ̣ܘܿܢ ܠܸܪܝܵܬܵܗ̇؛ ܟܠܲܝܗܝ ܝܵܘܡܵܢܹ̈ܐ ܕܚܲܝܝܼܬܘܿܢ ܒܐܲܪܥܵܐ܀
♱♱♱♱♱♱♱♱♱
ܚܲܒ̣ܪܹܗ
ܐܹܫܲܥܝܵܐ؛ ܡ؛ 18‐ ܡܐ؛ 8
ܫܠܵܘ ܢܒ̣ܝܼܘܼܬܹܗ ܕܐܹܫܲܥܝܵܐ؛ ܐܲܚܲܝ̈ ܒܲܪܸܟ̣ܡܵܪܝ܀
ܗܵܕܟ̣ܵܐ ܒܹܐܡܵܪܵܐ ܝ݇ܠܹܗ ܡܵܪܝܵܐ؛ ܠܡܵܢܝܼ ܕܘܼܡܹܐܠܵܘܟ̣ܘܿܢ ܠܐܲܠܵܗܵܐ؛ ܘܠܐܲܝܢܝܼ ܕܵܡܵܝܬܵܐ ܕܘܼܡܹܐܠܵܘܟ̣ܘܿܢ ܐܸܠܹܗ؟ ܚܲܕ݇ ܨܲܠܡܵܐ ܝٔܠܹܗ ܬܘܼܪܨܵܐ ܒܢܲܓ̰ܵܪ؛ ܘܙܲܪܓܲܪ [ܬܲܪܨܵܢܵܐ ܕܕܲܗܒ̣ܵܐ/صائغ] ܡܘܼܟܸܣܠܹܗ ܒܕܲܗܒ̣ܵܐ؛ ܘܣܹܐܡܵܐ ܨܸܦܝܵܐ ܡܘܼܠܒ̣ܸܫܠܹܗ܀ ܦܪܸܫܠܹܗ ܚܲܕ݇ ܩܲܝܣܵܐ ܕܠܹܐ ܣܵܦܸܣ. ܘܓܘܼܒܹܐܠܹܗ ܚܲܕ݇ ܢܲܓ̰ܵܪ. ܘܒܚܸܟ̣ܡܬܹܗ ܓܠܸܦܠܹܗ؛ ܘܬܘܼܪܸܨܠܹܗ ܚܲܕ݇ ܨܲܠܡܵܐ ܕܠܹܐ ܓ̰ܵܘܸܓ̰܀ ܠܵܐ ܫܡܝܼܥܠܵܘܟ̣ܘܿܢ؛ ܘܠܵܐ ܝ݇ܕܝܼܥܠܵܘܟ̣ܘܿܢ؛ ܘܡ̣ܢ ܫܘܼܪܵܝܵܐ ܠܵܐ ܦܸܫܠܵܗ̇ ܐ݇ܡܝܼܪܬܵܐ ܐܸܠܵܘܟ̣ܘܿܢ؛ ܘܠܵܐ ܦܘܼܪܡܹܐܠܵܘܟ̣ܘܿܢ؛ ܡ̣ܢ ܒܸܢܝܲܬܹ̈ܐ ܕܐܲܪܥܵܐ؛ ܘܠܡܵܢܝܼ ܕܝ݇ܬܝܼܒ̣ܵܐ ܝ݇ܠܹܗ ܥܲܠ ܓܠܘܼܠܘܼܬܵܐ ܕܐܲܪܥܵܐ؛ ܘܥܲܡܪ̈ܵܢܵܗ̇ ܐܲܝܟܼ ܩܲܡܨܵܐ. ܘܡܬܸܚܠܹܗ ܫܡܲܝܵܐ ܐܲܝܟܼ ܟ̰ܲܕܪܵܐ؛ ܘܡܬܝܼܚܵܐܠܹܗ ܐܲܝܟܼ ܡܲܫܟܢܵܐ ܩܵܐ ܝ݇ܬܝܵܒ̣ܬܵܐ܀ ܕܥܒ̣ܸܕܠܹܗ ܗܵܟܝܼܡܹ̈ܐ ܐܲܝܟܼ ܠܵܐ ܡܸܢܕܝܼ؛ ܘܕܲܝܵܢܹ̈ܐ ܕܐܲܪܥܵܐ ܐܲܝܟܼ ܗܝܼܟ̰ ܡܸܢܕܝܼ܀ ܠܹܐ ܙܵܪܥܝܼ ܘܠܹܐ ܢܵܨܒ̣ܝܼ. ܘܠܹܐ ܕܵܪܝܼ ܥܸܩܪܵܐ ܒܐܲܪܥܵܐ. ܒܸܬ ܢܵܦܸܚ ܒܝܼܲܝܗܝ ܘܒܵܪܙܝܼ؛ ܘܦܵܘܚܵܐ ܒܸܬ ܡܵܪܸܡܠܗ݇ܘܿܢ ܐܲܝܟܼ ܬܸܒ̣ܢܵܐ܀ ܠܡܵܢܝܼ ܩܲܡ ܕܵܡܝܼܬܘܿܢ ܠܝܼ ܕܕܵܡܸܢ ܐܸܠܹܗ؛ ܒܹܐܡܵܪܵܐ ܝ݇ܠܹܗ ܩܲܕܝܼܫܵܐ؟܀ ܡܲܪܡܘܿܢ ܥܲܝܢ̈ܵܘܟ̣ܘܿܢ ܠܥܘܼܠܘܼܠ؛ ܘܚܙܹܐܡܘܿܢ؛ ܡܵܢܝܼ ܒܪܹܐܠܹܗ ܐܲܢܹܐ؟ ܕܟܹܐ ܦܵܠܸܛ ܒܡܸܢܝܵܢܵܐ ܚܲܝܠܵܘܵܬܲܝ̈ܗܝ؛ ܘܩܵܐ ܟܠܲܝܗܝ ܩܪܹܐܠܹܗ ܫܸܡܵܢܹ̈ܐ. ܒܒܘܼܫܵܝܘܼܬܵܐ ܕܐܝܼܩܵܪܹܗ ܘܒܙܲܪܒ ܕܚܲܝܠܹܗ ܗܝܼܟ̰ ܐ݇ܢܵܫܵܐ ܠܹܐ ܚܵܠܸܛ܀ ܩܵܡܘܿܕܝܼ ܗܲܡܙܘܼܡܹܐ ܝ݇ܘܸܬ̇ ܝܲܥܩܘܿܒ̣؛ ܘܒܹܐܡܵܪܵܐ ܝ݇ܘܸܬ̇ ܝܼܣܪܵܝܹܠ. ܕܛܘܼܫܝܹܐ ܝ݇ܢܵܐ ܐܘܼܪ̈ܚܵܬܝܼ ܡ̣ܢ ܡܵܪܝܵܐ؛ ܘܕܝܼܘܵܢܝܼ ܡܘܼܟܣܵܐ ܝ݇ܠܹܗ ܡ̣ܢ ܐܲܠܵܗܝܼ؟܀ ܠܵܐ ܝ݇ܕܝܼܥܠܘܼܟܼ؛ ܘܠܵܐ ܫܡܝܼܥܠܘܼܟܼ؛ ܕܐܲܠܵܗܵܐ ܠܥܵܠܲܡ ܡܵܪܝܵܐ ܝ݇ܠܹܗ؛ ܘܒܪܹܐܠܹܗ ܡܲܪ̈ܙܵܢܹܐ ܕܐܲܪܥܵܐ. ܠܹܐ ܓ̰ܵܗܝܹܐ ܘܠܹܐ ܟܵܟ̰ܸܚ؛ ܘܠܲܝܬ̇ ܨܲܚܨܵܝܬܵܐ ܠܦܲܪ̈ܡܵܝܵܬܹܗ܀ ܟܹܐ ܝܵܗ݇ܒ̣ܸܠ ܚܲܝܠܵܐ ܠܟܟ̰ܝܼܚܹ̈ܐ ܘܠܡܸܪ̈ܥܝܹܐ ܡܲܙܝܸܕ ܩܘܼܘܲܬ؛ ܒܸܬ ܟܵܟ̰ܚܝܼ ܓ̰ܘܲܢܩܹ̈ܐ ܘܓ̰ܵܗܝܝܼ؛ ܘܓܲܕܘܼܕܹ̈ܐ [ܘܓ̰ܘܲܢܩܹ̈ܐ] ܬܲܪܩܘܼܠܹܐ ܒܸܬ ܬܲܪܩܸܠܝܼ؛ ܘܐܵܢܝܼ ܕܣܵܒܪܝܼ ܒܡܵܪܝܵܐ ܒܸܬ ܡܲܚܠܸܦܝܼ ܚܲܝܠܵܐ؛ ܘܒܸܬ ܗܵܘܹܐܠܗ݇ܘܿܢ ܓܘܼܠܦܵܢܹ̈ܐ ܐܲܝܟܼ ܕܝܵܘܢܵܐ؛ ܘܒܸܬ ܪܵܚܛܝܼ ܘܠܹܐ ܓ̰ܵܗܝܝܼ؛ ܘܚܵܕܪܝܼ ܘܠܹܐ ܟܵܟ̰ܚܝܼ܀ ܫܬܘܿܩܘܿܢ ܓܵܙܪ̈ܵܬܹܐ؛ ܘܡܸܠܲܬܹ̈ܐ ܡܲܚܠܸܦܝܼ ܚܲܝܠܵܐ؛ ܒܸܬ ܩܲܪܒܸܢܝܼ؛ ܘܗܵܝܓܵܗ̇ ܗܲܡܙܸܡܝܼ؛ ܡܐܘܼܕܵܠܹܐ ܠܕܝܼܘܵܢ ܒܸܬ ܩܲܪܒܸܢܝܼ. ܡܵܢܝܼ ܡܘܼܪܥܸܫܠܹܗ ܙܲܕܝܼܩܘܼܬܵܐ ܡ̣ܢ ܡܲܕܢܚܵܐ؛ ܘܩܸܪܝܵܐ ܠܹܗ ܠܐܲܩܠܹܗ܀ ܒܸܬ ܦܵܝܫܝܼ ܣܘܼܦܝܹܐ ܩܵܕ݇ܡܘܼܗܝ ܛܵܝܸܦܹ̈ܐ؛ ܘܡܲܠܟܹ̈ܐ ܦܵܝܫܝܼ ܡܘܼܟܸܦܹܐ. ܒܸܬ ܝܵܗ݇ܒ̣ܸܠ ܐܲܝܟܼ ܥܲܦܪܵܐ ܣܲܝܦܹܗ؛ ܘܐܲܝܟܼ ܩܸܫܬܵܐ ܕܢܵܬܪܵܐ ܩܸܫܬܹܗ܀ ܒܸܬ ܛܵܪܸܕܠܗ݇ܘܿܢ ܘܥܵܒ̣ܸܕ ܫܠܵܡܵܐ؛ ܘܐܘܼܪܚܵܐ ܕܐܲܩܠ̈ܘܼܗܝ ܠܹܐ ܡܲܥܒ̣ܸܪ܀ ܡܵܢܝܼ ܗܘܼܕܸܪܹܗ ܘܥܒ̣ܸܕܠܹܗ؛ ܡܵܢܝܼ ܩܪܹܐܠܹܗ ܠܕܵܘܪܹ̈ܐ ܡ̣ܢ ܪܹܫܝܼܬܵܐ؟ ܐܵܢܵܐ ܝ݇ܘܸܢ ܡܵܪܝܵܐ ܩܵܕ݇ܡܵܝܵܐ ܘܐ݇ܚܵܪܵܝܵܐ؛ ܐܵܢܵܐ ܝ݇ܘܸܢ ܩܲܡ ܚܵܙܝܼܠܝܼ ܓܵܙܪ̈ܵܬܹܐ ܘܙܕܝܼܥܠܗ݇ܘܿܢ ܡܲܪ̈ܙܵܢܹܐ ܕܐܲܪܥܵܐ؛ ܙܕܝܼܥܠܗ݇ܘܿܢ ܘܩܘܼܪܒܸܢܗ݇ܘܿܢ ܘܐ݇ܬܹܐܠܗ݇ܘܿܢ؛ ܘܟܠ ܐ݇ܢܵܫܵܐ ܠܚܲܒ̣ܪܹܗ ܗܲܝܘܼܪܹܐ ܝ݇ܢܵܐ؛ ܘܠܐܵܚܘܿܢܹܗ ܒܹܐܡܵܪܵܐ؛ ܗܘܝܼ ܚܲܝܠܵܢܵܐ. ܘܢܲܓ̰ܵܪ ܒܝܼܵܗܒ̣ܵܐ ܠܸܒܵܐ ܠܙܲܪܓܵܪ؛ [ܠܬܲܪܨܵܢܵܐ ܕܕܲܗܒ̣ܵܐ] ܬܲܦܬܸܦ ܒܟܵܟ̰ܘܼܟ ܕܦܵܠܸܚ؛ ܘܐܵܡܸܪ ܥܲܠ ܩܸܛܥܵܐ ܕܦܲܪܙܠܵܐ ܨܦܵܝܝܼ ܝ݇ܠܹܗ. ܘܡܲܩܘܝܼܠܹܗ ܒܒܸܣܡܵܪܹ̈ܐ ܕܠܵܐ ܫܵܥܸܫ܀
♱♱♱♱♱♱♱♱♱
ܚܲܕܼܒܿܫܲܒܵܐ ܒ ܕܡܘܼܫܹܐ
ܦܵܘܠܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܐܸܓܲܪܬܹܗ
ܕܲܠܘܵܬܼ ܓܵܠܵܛܵܝܹ̈ܐ؛ ܐܲܚܲܝ̈ ܒܲܪܸܟܼܡܵܪܝ܀
ܒܲܣ ܟܠܹܐܡܘܿܢ ܒܐܵܙܵܕܘܼܬܵܐ ܗ̇ܝ ܕܡܫܝܼܚܵܐ ܩܲܡ ܥܵܒܼܸܕܠܲܢ ܐܵܙܲܕ؛ ܘܠܵܐ ܦܵܝܫܝܼܬܘܿܢ ܡܸܢ݇ܕܪܹܫَ ܐ݇ܣܝܼܪܹܐ ܒܢܝܼܪܵܐ ܕܪܹܓܘܼܬܵܐ* ܗܵܐ ܐܵܢܵܐ ܦܵܘܠܘܿܣ ܒܹܐܡܵܪܵܐ ܝ݇ܘܸܢ ܐܸܠܵܘܟܼܘܿܢ ܕܐܸܢ ܓܵܙܪܝܼܬܘܿܢ ܡܫܝܼܚܵܐ ܚܲܕ݇ ܡܸܢܕܝܼ ܠܹܐ ܥܵܒܼܸܕܠܵܘܟܼܘܿܢ ܦܵܝܕܵܐ* ܐܝܼܢܵܐ ܒܝܼܵܗ݇ܒܼܵܐ ܝ݇ܘܸܢ ܣܵܗܕܘܼܬܵܐ ܩܵܐ ܟܠ ܒܲܪܢܵܫܵܐ ܕܦܵܐܸܫ ܓܙܝܼܪܵܐ؛ ܕܕܵܝܢܵܢܵܐ ܝ݇ܠܹܗ ܕܟܠܹܗ ܢܵܡܘܿܣܵܐ ܬܲܡܸܡܠܹܗ* ܦܸܫܠܵܘܟܼܘܿܢ ܒܘܼܛܠܹܐ ܡ̣ܢ ܡܫܝܼܚܵܐ ܐܵܢܝܼ ܕܦܝܼܫܹܐ ܝ݇ܬܘܿܢ ܡܘܼܟܫܸܛܹܐ ܒܢܵܡܘܿܣܵܐ. ܡ̣ܢ ܫܵܦܵܩܲܬ ܢܦܸܠܵܘܟܼܘܿܢ* ܣܵܒܵܒ ܐܲܚܢܲܢ ܒܪܘܼܚܵܐ ܕܡ̣ܢ ܗܲܝܡܵܢܘܼܬܵܐ ܠܗܹܒܼܝܼ ܕܙܲܕܝܼܩܘܼܬܵܐ ܒܸܣܦܵܪܵܐ ܝ݇ܘܲܚ* ܣܵܒܵܒ ܒܡܫܝܼܚܵܐ ܝܼܫܘܿܥ ܠܵܐ ܓܙܘܼܪܬܵܐ ܡܸܢܕܝܼ ܝ݇ܠܵܗ̇؛ ܘܠܵܐ ܥܘܼܪܠܘܼܬܵܐ. ܐܸܠܵܐ ܗܲܝܡܵܢܘܼܬܵܐ ܕܦܵܝܫܵܐ ܬܘܼܡܸܡܬܵܐ ܒܚܘܼܒܵܐ* ܨܦܵܝ ܒܸܪܚܵܛܵܐ ܝ݇ܬܘܿܢ؛ ܡܵܢܝܼ ܚܒܼܸܛܠܹܗ ܠܚܝܼܵܠ ܕܝܼܵܘܟܼܘܿܢ ܕܠܣܲܪܲܣܬܘܼܬܵܐ ܠܵܐ ܡܲܨܝܸܬܿܬܿܝܼܬܘܿܢ؟* ܐܵܗܵܐ ܡܲܛܠܲܒܿ ܠܹܐ ܝ݇ܠܵܗ̇ ܡ̣ܢ ܕܗ̇ܘ ܕܩܲܡ ܩܵܪܹܐ ܠܵܘܟܼܘܿܢ* ܚܲܕ݇ܟ̰ܵܐ ܚܡܝܼܪܵܐ ܟܠܵܗ̇ ܓܒܼܝܼܠܬܵܐ ܟܹܐ ܡܲܚܡܸܥܠܵܗ̇* ܐܵܢܵܐ ܐܝܼܬܠܝܼ ܗܹܒܼܝܼ ܒܝܼܵܘܟܼܘܿܢ ܒܡܵܪܲܢ ܕܡܸܢܕܝܼ ܐ݇ܚܹܪ݇ܢܵܐ ܠܵܐ ܚܵܫܒܼܝܼܬܘܿܢ. ܘܗ̇ܘ ܕܒܸܕܪܵܝܵܐ ܝ݇ܠܹܗ ܚܒܼܵܛܹ̈ܐ ܓܵܘܵܘܟܼܘܿܢ ܗ̇ܘ ܒܸܬ ܩܵܒܸܿܠ ܠܕܝܼܘܵܢ ܟܠ ܡܵܢܝܼ ܕܝܑܼܠܹܗ* ܐܝܼܢܵܐ ܐܵܢܵܐ ܐܵܚܘܿܢܘܵܬ̈ܝܼ ܐܸܢ ܗܵܠܵܐ ܓܙܘܼܪܬܵܐ ܡܲܟܪܘܼܙܸܐ ܝ݇ܘܸܢ؛ ܩܵܡܘܿܕܝܼ ܦܝܵܫܵܐ ܝ݇ܘܸܢ ܛܪܝܼܕܵܐ. ܩܵܡܘܿ ܦܸܫܠܹܗ ܒܘܼܛܠܵܐ ܟܦܘܼܪܝܸܗ ܕܙܩܝܼܦܵܐ* ܐܝܼܢܵܐ ܛܘܼܒܼܵܐ ܕܐܵܦ ܩܛܲܥܝܵܐ ܦܵܝܫܝܼ ܗَܘܵܘ ܩܸܛܥܝܸܐ ܐܵܢܝܼ ܕܒܸܕܪܵܝܵܐ ܝ݇ܢܵܐ ܒܘܼܠܒܵܠܹ̈ܐ ܓܵܘܵܘܟܼܘܿܢ* ܐܝܼܢܵܐ ܐܲܚܬܘܿܢ ܠܐܵܙܵܕܘܼܬܵܐ ܦܸܫܠܵܘܟܼܘܿܢ ܩܸܪܝܹܐ ܐܵܚܘܿܢܘܵܬ̈ܝܼ. ܐܲܚܟ̰ܝܼ ܠܵܐ ܗܵܘܝܵܐ ܐܵܙܵܕܘܼܬܵܘܟܼܘܿܢ ܠܗܲܓ̰ܲܬ ܕܒܸܣܪܵܐ؛ ܐܸܠܵܐ ܒܚܘܼܒܵܐ ܗܵܘܝܼܬܘܿܢ ܙܲܒܿܛ ܚܲܕ݇ ܠܗ̇ܘ ܐ݇ܚܹܪ݇ܢܵܐ* ܣܵܒܵܒ ܟܠܹܗ ܢܵܡܘܿܣܵܐ ܒܚܕܵܐ ܗܹܡܸܙܡܲܢ ܟܹܐ ܦܵܐܸܫ ܬܘܼܡܸܡܵܐ. ܒܗ̇ܝ ܕܡܲܚܸܒܸܬ ܠܫܒܼܵܒܼܘܼܟܼ ܡܐܲܝܟܼ ܓܵܢܘܼܟܼ* ܐܸܢ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܩܵܪܛܝܼܬܘܿܢ ܘܐܵܟܼܠܝܼܬܘܿܢ. ܚܙܹܐܡܘܿܢ ܕܠܵܐ ܗܵܘܝܵܐ ܕܚܲܕ݇ ܡ̣ܢ ܕܗ̇ܘ ܐ݇ܚܹܪ݇ܢܵܐ ܦܵܝܫܝܼܬܘܿܢ ܦܘܼܢܝܹܐ* ܐܝܼܢܵܐ ܒܹܐܡܵܪܵܐ ܝ݇ܘܸܢ ܕܒܪܘܼܚܵܐ ܗܵܘܝܼܬܘܿܢ ܒܸܚܕܵܪܵܐ. ܘܫܲܗܘܲܬܿܬܵܐ ܕܒܸܣܪܵܐ ܗܸܟ̃ ܠܵܐ ܥܵܒܼܕܝܼܬܘܿܢ* ܣܵܒܵܒ ܒܸܣܪܵܐ ܟܹܐ ܫܲܗܘܸܬ ܠܡܸܢܕܝܼ ܕܚܲܙܕܸܓܿ ܠܪܘܼܚܵܐ؛ ܘܪܘܼܚܵܐ ܟܹܐ ܫܲܗܘܸܬܵܐ ܠܡܸܢܕܝܼ ܕܚܲܙܕܸܓܿ ܠܦܲܓܼܪܵܐ. ܘܬܸܪܘܲܝܗܝ ܕܲܪ̈ܩܘܼܒܼܠܵܝܹܐ ܝ݇ܢܵܐ ܕܚܲܕ݇ ܕܗ̇ܘ ܐ݇ܚܹܪ݇ܢܵܐ. ܕܠܵܐ ܥܵܒܼܕܝܼ ܝ݇ܬܘܿܢ ܡܸܢܕܝܼ ܕܠܵܐ ܒܵܣܡܵܠܵܘܟܼܘܿܢ ܠܸܥܒܼܵܕܵܐ* ܐܝܼܢܵܐ ܐܸܢ ܒܪܘܼܚܵܐ ܦܵܝܫܝܼ ܝ݇ܬܘܿܢ ܬܘܼܓܒܸܪܹܐ ܠܹܐ ܝ݇ܬܘܿܢ ܬܚܘܿܬ ܢܵܡܘܿܣܵܐ* ܦܘܼܠܚܵܢܹ̈ܐ ܕܒܸܣܪܵܐ ܦܝܼܫܹܐ ܝ݇ܢܵܐ ܝ݇ܕܝܼܥܝܹܐ. ܕܝܑܼܢܵܐ ܙܵܢܝܘܼܬܵܐ؛ ܟ̰ܲܦܵܠܘܼܬܵܐ ܨܵܥܲܪܬܵܐ؛ ܣܓܼܲܕܬܵܐ ܕܣܵܢܲܡܹ̈ܐ؛ ܚܲܪܵܫܘܼܬܵܐ؛ ܕܸܫ̃ܡܸܢܵܝܘܼܬܵܐ. ܡܲܩܪܲܨܬܵܐ؛ ܟܲܪܒܵܐ؛ ܚܸܡܬܵܐ؛ ܥܵܨܝܼܘܼܬܵܐ؛ ܦܘܼܠܵܓܹ̈ܐ؛ ܟ̰ܠܵܦܹ̈ܐ؛ ܒܲܚܝܼܠܘܼܬܵܐ؛ ܩܸܛܠܵܐ؛ ܪܵܘܵܝܘܼܬܵܐ؛ ܙܡܵܪܵܐ؛ ܘܟܠ ܕܠܐܲܢܹܐ ܕܵܡܝܼ. ܘܐܵܢܝܼ ܕܐܲܢܹܐ ܦܵܠܚܝܼ؛ ܐܲܝܟܼ ܕܡ̣ܢ ܩܵܕ݇ܡܵܝܬܵܐ ܐ݇ܡܸܪܝܼ ܐܸܠܵܘܟܼܘܿܢ؛ ܘܐܵܦ ܐܵܕܝܼܵܐ ܒܹܐܡܵܪܵܐ ܝ݇ܘܸܢ ܕܡܲܠܟܘܼܬܹܗ ܕܐܲܠܵܗܵܐ ܠܹܐ ܝܵܪܬܝܼ* ܐܝܼܢܵܐ ܛܥܘܼܢܝܵܬܹ̈ܐ ܕܪܘܼܚܵܐ ܝܑܼܢܵܐ ܚܘܼܒܵܐ؛ ܚܲܕܘܼܬܵܐ؛ ܫܠܵܡܵܐ؛ ܡܲܪܝܲܟܼܬܵܐ ܕܒܹܐܢܵܐ؛ ܒܲܣܝܼܡܘܼܬܵܐ؛ ܛܵܒܼܘܼܬܵܐ؛ ܗܲܝܡܵܢܘܼܬܵܐ؛ ܡܲܟܝܼܟܼܘܼܬܵܐ؛ ܚܡܲܠܬܵܐ. ܥܲܠ ܕܐܲܢܹܐ ܢܵܡܘܿܣܵܐ ܠܲܝܬ ܦܝܼܫܵܐ ܡܘܼܬܒܼܵܐ* ܐܝܼܢܵܐ ܐܵܢܝܼ ܕܡܫܝܼܚܵܐ ܝ݇ܢܵܐ؛ ܒܸܣܪܲܝܗܝ ܡܚܹܐܠܗ݇ܘܿܢ ܠܙܩܝܼܦܵܐ ܥܲܡ ܟܠܲܝܗܝ ܡܲܪ̈ܥܹܐ ܘܫܲܗܘܲܬܝܵܬܹ̈ܐ ܕܝܼܹܗ* ܒܲܣ ܚܲܝܲܚ ܒܪܘܼܚܵܐ ܘܬܲܒܥܲܚ ܠܪܘܼܚܵܐ* ܘܠܵܐ ܗܵܘܲܚ ܡܵܪܹܐ ܚܸܩܪܵܐ ܒܲܛܝܼܠܵܐ ܡܲܣܠܘܼܝܹܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ ܘܒܲܚܘܼܠܹܐ ܚܲܕ݇ ܒܗ̇ܘ ܐ݇ܚܹܪ݇ܢܵܐ*
♱♱♱♱♱♱♱♱♱
ܠܘܩܐ ܚ: 40 ‐ ܫܘܠܡܐ.
ܐܘܢܓܠܝܘܢ ܩܕܝܫܐ ܕܡܪܢ ܝܫܘܥ ܡܫܝܚܐ
ܟܪܘܙܘܬܼܐ ܕܠܘܩܐ
♰ ܘܟܲܕ ܡܵܠܘܼܦܹܐ ܗ݇ܘܵܐ ܝܑܼܫܘܿܥ ܠܟܸܢܫܹ̈ܐ. ܚܲܕ݇ ܓܲܒܼܪܵܐ ܕܫܸܡܹܗ ܝܘܿܐܵܪܵܫ ܪܹܫ ܟܢܘܼܫܬܵܐ. ܢܦܸܠܹܗ ܩܵܕ݇ܡ ܐܲܩܠܵܬܹ̈ܐ ܕܝܑܼܫܘܿܥ. ܘܒܵܥܹܐ ܗَܘܵܐ ܡܸܢܹܗ ܕܥܵܒܼܸܪ ܠܒܲܝܬܹܗ. ܣܵܒܵܒ ܐܝܼܬ ܗ݇ܘܵܐ ܠܹܗ ܒܪܵܬܵܐ ܝܼܚܝܼܕܵܝܬܵܐ، ܐܲܝܟܼ ܒܲܪ݇ܬ ܬܪܹܥܣܲܪ ܫܸܢܹ̈ܐ، ܘܩܘܼܪܒܸܢܬܵܐ ܗ݇ܘܵܐ ܠܸܡܝܵܬܵܐ. ܘܟܲܕ ܒܹܐܙܵܠܵܐ ܗ݇ܘܵܐ ܥܲܡܹܗ ܝܑܼܫܘܿܥ، ܟܸܢܫܵܐ ܪܵܒܵܐ ܒܸܚܠܵܨܘܼܗܝ ܗ݇ܘܵܐ. ܐܝܼܢܵܐ ܚܕܵܐ ܒܲܟܼܬܵܐ ܕܓ̰ܵܪܹܐ ܗ݇ܘܵܐ ܕܸܡܘܼܗ̇ ܬܪܸܥܣܲܐ ܫܸܢܹ̈ܐ، ܗ̇ܝ ܕܚܘܼܪܸܓ̰ܠܵܗ̇ ܟܠܹܗ ܡܸܢܕܝܼܘܼܗ̇ ܠܐܲܤܝܹ̈ܐ، ܘܠܵܐ ܡܨܹܐܠܵܗ̇ܕܡ̣ܢ ܗܝܼܟ̰ ܐ̄ܢܵܫܵܐ ܦܲܝܫܵܐ ܒܘܼܤܸܡܬܵܐ. ܩܘܼܪܒܸܢܵܗ̇ ܡ̣ܢ ܒܵܬ݇ܪܹܗ، ܘܕܩܸܪܵܗ̇ ܒܫܸܦܘܼܠܵܐ ܕܓ̰ܘܼ̈ܠܹܗ. ܘܒܗ̇ܝ ܣܵܥܵܬ ܟܠܹܐܠܵܗ̇ ܓ̰ܪܹܝܬܵܐ ܕܕܡܘܼܗ̇. ܘܐ݇ܡܸܪܹܗ ܝܑܼܫܘܿܥ: ܡܵܢܝܼ ܕܩܸܪܹܗ ܒܝܼܝܼ. ܘܟܲܕ ܟܠܲܝܗܝ ܒܸܣܪܵܒܼܵܐ. ܐ݇ܡܸܪܹܗ ܐܸܠܹܗ ܫܸܡܥܘܿܢ ܟܹܐܦܵܐ ܘܕܥܲܡܹܗ: ܪܵܒܝܼܵܢ: ܟܸܢܫܹܐ ܡܲܠܝܘܼܨܘܼܟܼ ܝܼܢܵܐ ܘܒܸܚܠܵܨܘܼܟܼ. ܘܒܹܐܡܵܪܵܐ ܝܘܸܬ: ܡܵܢܝܼ ܕܩܸܪܹܗ ܒܝܼܝܼ؟ ܐܝܼܢܵܐ ܗ̇ܘ ܐ݇ܡܸܪܹܗ: ܐ݇ܢܵܫܵܐ ܕܩܸܪܹܗ ܒܝܼܝܼ. ܣܵܒܵܒ ܝܕܸܥܠܝܼ ܕܚܲܝܠܵܐ ܦܠܸܛܠܹܗ ܡܸܢܝܼ. ܐܝܼܢܵܐ ܗ̇ܝ ܒܲܟܼܬܵܐ ܟܲܕ ܚܙܹܐܠܵܗ̇. ܕܠܵܐ ܛܫܹܐܠܵܗ̇ ܡܸܢܹܗ، ܐ݇ܬܹܐܠܵܗ̇ ܟܲܕ ܪܲܬܪܘܼܬܹܐ ܘܢܦܸܠܵܗ̇ ܣܓܼܸܕܠܵܗ̇ ܐܸܠܹܗ ܩܵܕ݇ܡ ܥܲܝܢܵܐ ܕܟܠܹܗ ܥܲܡܵܐ ܘܐ݇ܡܸܪܵܗ̇: ܒܘܼܬ ܐܲܝܢܝܼ ܥܸܠܬܵܐ ܕܩܸܪܵܗ̇. ܘܕܲܐܟܼܝܼ ܒܗ̇ܝ ܥܸܕܵܢܵܐ ܦܸܫܠܵܗ̇ ܒܣܸܡܬܵܐ. ܐܝܼܢܵܐ ܝܑܼܫܘܿܥ ܐ݇ܡܸܪܹܗ ܐܸܠܵܗ̇: ܦܘܼܫ ܠܸܒܵܢܬܵܐ ܒܪܵܬܝܼ ܗܲܝܡܵܢܘܼܬܹܟܼܝ ܩܲܡ ܡܲܚܝܼܵܠܹܟܼܝ، ܙܹܠ݇ ܒܫܠܵܡܵܐ. ܘܗܵܠܵܐ ܗ̇ܘ ܗܲܡܙܘܼܡܹܐ. ܐ݇ܬܹܐܠܹܗ ܚܲܕ݇ ܐ݇ܢܵܫܵܐ ܡ̣ܢ ܕܒܲܝܬܵܐ ܕܪܲܒ ܟܢܘܼܫܬܵܐ. ܘܐ݇ܡܸܪܹܗ ܐܸܠܹܗ: ܒܪܵܬܘܼܟܼ ܡܝܼܬܠܵܗ̇. ܠܵܐ ܡܲܟܟ̰ܸܚ ܠܡܲܠܦܵܢܵܐ. ܐܝܼܢܵܐ ܝܑܼܫܘܿܥ ܫܡܸܥܠܹܗ ܘܐ݇ܡܸܪܹܗ ܠܒܵܒܵܗ̇ ܕܒܪܵܬܵܐ: ܠܵܐ ܙܲܕܥܸܬ، ܐܲܚܟ̰ܝܼ ܗܲܡܸܢ ܘܒܸܬ ܚܵܝܵܐ. ܐܝܼܢܵܐ ܐ݇ܬܹܐܠܹܗ ܝܑܼܫܘܿܥ ܠܒܲܝܬܵܐ. ܘܠܵܐ ܫܒܼܸܩܠܹܗ ܐ݇ܢܵܫܵܐ ܕܥܵܒܼܸܪ ܥܲܡܹܗ. ܐܸܠܵܐ ܠܫܸܡܥܘܿܢ ܘܠܝܲܥܩܘܿܒܼ ܘܠܝܘܿܚܲܢܵܢ ܘܠܒܵܒܵܗ̇ ܕܒܪܵܬܵܐ ܘܠܝܸܡܘܼܗ̇. ܐܝܼܢܵܐ ܟܠܲܝܗܝ ܒܵܟܼܝܼ ܗ݇ܘܵܘ ܘܥܲܒܼܕܝܼ ܗ݇ܘܵܘ ܬܲܥܙܝܼ ܥܲܠܘܼܗ̇. ܐܝܼܢܵܐ ܝܑܼܫܘܿܥ ܐ݇ܡܸܪܹܗ: ܠܵܐ ܒܵܟܼܝܼܬܘܿܢ ܣܵܒܵܒ ܠܹܐ ܝܠܵܗ̇ ܡܝܼܬܬܵܐ: ܐܸܠܵܐ ܕܡܝܼܟܼܬܵܐ ܝܠܵܗ̇. ܘܓܲܚܟܝܼ ܗ݇ܘܵܘ ܥܲܠܘܼܗܝ. ܕܝܲܕܥܝܼ ܗ݇ܘܵܘ ܡܝܼܬܬܵܐ ܝܠܵܗ̇. ܐܝܼܢܵܐ ܗ̇ܘ ܦܘܼܠܸܛܠܹܗ ܠܟܠ ܐ݇ܢܵܫܵܐ ܠܒܼܲܕܲܪ. ܘܕܒܼܝܼܩܵܐ ܠܹܗ ܒܐܝܼܕܘܼܗ̇. ܘܩܸܪܝܵܐ ܠܹܗ ܘܐ݇ܡܸܪܹܗ: ܛܠܝܼܬܵܐ ܩܘܼܡܝ: ܘܕܥܸܪܵܗ̇ ܪܘܼܚܘܼܗ̇. ܘܒܗ̇ܝ ܥܸܕܵܢܵܐ ܩܸܡܠܵܗ̇. ܘܦܩܸܕܠܹܗ ܕܝܲܗܒܼܝܼ ܠܵܗ̇ ܠܹܐܟܼܵܠܵܐ. ܘܥܘܼܓ̰ܸܒܠܗ݇ܘܿܢ ܐܲܒܼܵܗܘܼ̈ܗ̇. ܐܝܼܢܵܐ ܗ̇ܘ ܥܒܼܝܼܕܵܝܠܹܗ ܗܸܫܝܵܪ ܕܠܐ݇ܢܵܫܵܐ ܠܵܐ ܐܲܡܪܝܼ ܡܸܢܕܝܼ ܕܗ݇ܘܹܐܠܹܗ.
♱♱♱♱♱♱♱♱♱